\id 2TH  
\h 2 TESALONIKA 
\toc1 Nyovara Wao Jirum Paulus Po Ratoe Anugano Amisye Mai No Tesalonika 2 TESALONIKA 
\toc2 2 Tesalonika 
\toc3 2 Tes 
\mt2 Nyovara Wao Jirum Paulus Po Ratoe Anugano Amisye Mai No Tesalonika 
\mt1 2 TESALONIKA 
\c 1  
\s1 Ayao manasyin 
\p  
\v 1 Risyirati Paulus, umba Silas\f + \fr 1:1 \ft Silas apa tame rawain tavonamo Silvanus.\f* muno Timotius javondi tavon. Reamo nyovara waowe so ratoe, reamo ranutugo anugano Amisy wana no munijo Tesalonika wasai, weapamo kawasaeyo watavondijo wama Injayo Amisye ai muno Amisy Yesus Kristus ai.  
\v 2 Reamare kove muno saumane no no Injayo Amisy muno Amisy Yesus Kristus no wasautan tenambe. 
\s1 Paulusa pe usambayambe vatano Tesalonika mai tutir 
\p  
\v 3 Reama arakove, reamo kove raura seo Amisye aijo wasai tutir. Reansambayambeare so mamaisy weye weapamo wapa anave miridi nseo muno wabekobe wasai vambinibe miridi nseo tavon.  
\v 4 Vatane wo wasave tatugadi ti wapa siurije manakoe, weramu wasatawandi rai tutir muno wapanave tawan no Yesus ai. Wemi mbewar arono reansisa anugano Amisye rai janyi, wapa kovo reangkangkamambe wasai wemi reandaura tutir. 
\s1 Masyoto Amisy Yesus pakare no mine vone so rai 
\p  
\v 5 Anakotare umaso mo raroron kakavimbe: Amisye apa ana po rapatimuge mamo mamai dave. Weye wapa anave Ai wemi mbewar ti siurije nande wasai, Amisye po wasaen ti pare weapamo wamamaisyo wasisa Apa munijo be akarive raije rai.  
\v 6 Amisye apa ana po rave mamo mamai tenambe, weti indati Po siurije rasakinav akananto vatano wo wasaveti wasiurije mansai.  
\v 7 Muno Po siurije rapaya wasai, muno reansai tavon. Oma nande no arono Amisy Yesus no no munijo ntiti paje no mine vone so, Po anasine raroron kakavimbe. De irati Apa naito vambunine mansautan.  
\v 8 Muno de irati tanamo mbadurure rautan indamu Po mangke raugajeo vatano wantukambe Amisye aije mansai muno vatano ubeta irati wama Amisy Yesus apa Ayao Kove raije jewene mansai tavon.  
\v 9 Indati Amisy Yesus po mangkeo nuge nuganuije raugaje mansai, Po maeparusya marambe indamu ugwaravainyo taune Ai muno Apa vambunino ntitije rai.  
\v 10 Oma nande no masyoto Amisy Yesus pakare akato no mine vone so. Pakare indamu Apa kawasaeyo manuga ndandinit wo ararimbe muno ukangkamambe Ai—vatan tenambe nanawirati wanave Ai to. Indati weapamo wasisa vatane umaso awa yasyine rai tavon weye wapanave ayao reamo raura wasaije rai to. 
\p  
\v 11 Maisyare omai ti, reansambayambe wasai tutir. Reamo Amisye anajo indamu Po wasaen ti pare weapamo wamamaisyo watavondi Apa waine rai. Muno reansambayambe indamu Po vambunine raunande indamu wapa bekero wapo ana ngkove rarijat muno wapa anakero rui vayave wapo raijar weye wapanave Amisye ai, omamo Po ravera nande mamaisy.  
\v 12 Reansambayambe tai maisy indamu wapo Amisy Yesus aijaseo titive muno Yesus po wasaijasea titive tavon, mamaisyo kovo no no wama Injayo Amisye muno Amisy Yesus Kristus rai. 
\c 2  
\s1 Arono Kristus pakare mararai to, indati ana pamponae Anakakai Akoe masyo vatane mansai 
\p  
\v 1 Arakove, reamare reamo wasanyao irati anakotaro nande arono wama Amisy Yesus Kristus pakare rai, arono indati Po wansanugan wame Wepe wano tenambe.  
\v 2 Reamare wasyisyaube weye vatan inta ubeker wo wasaponae ware Yesus apa masyoto pakare raije nde to. Wabemo wapanave mai jinta! Wo raura ware Apa de to mamo Anawayo Vambunine mo rarorono mai rako, ayao inta mo raura rako. Indako inta ware reama nyovara wao inta mo ratoe rako? Awa ayao mamaisye ramu, weti vemo wasanuga nseo majeve muno wapananepabe rai nora.  
\v 3-4 Vemo vatane inta po wasaponae inya. Weye arono masyoto Amisy Yesus pakare rainyamo, indati anakotare so nande wusyimbe no taiso: Vatane wanui indati usakangkinav ti makirive Amisye ai. Muno vatane inta apa tame mi Akarijo Mamun indati po anasine raroron irati vatano wanui mansai. Opamo marovave Amisye ai, muno po taune aijaseo titive anakotaro rui vayave vatane usambayambe raije rakivan. Opamo ararin dave ti siso tuna Yavaro Amisy ama uga rai pare, “Risyirati Amisye pi risy.” Weramu Akarijo Mamun wato pamo Amisye pare Po amaugo tanamo mbadururo nuge nuganuije rai. 
\p  
\v 5 Arakove, syare wasaemen arono risye wana tenambeowe, syo Akarijo Mamun umaso aura kakavimbe wasai to.  
\v 6 Muno wapo raen animaisye mirati mo apa deye ransopi.\f + \fr 2:6 \ft Anakotaro mo Akarijo Mamun ansopi omamo Ayao Amisye mo raura kakavimbe jewen. Omamo vatane inta dako, anawayo vambunin inta rako, anakotaro kaijinta rako, wamantatukambe rai, weramu somaida Paulus po raura kakavimbe vatano Tesalonika mansai wusyimbe to.\f* Apa masyote deye mamo mamaisyo Amisye apa bekere obo rai, wea indati Akarijo Mamun wato de po anasine rarorono vatane mai.  
\v 7 Naisoamo apa vambunino ngkakai nsiso maninimbe mine so rai to, weramu ana inta mo ansopi ti po anasine raroron kakavimbe rainy. Arono indati ana mo ansopije umaso mamo Amisye po rapaya ai,  
\v 8 wea indati Akarijo Mamun umaso po anasine raroron kakavimbe. Weramu arono Amisy Yesus pakare irati Apa varo kovo ntiti rautan, indati Po anawayoe veano Akarijo Mamun umaso amawisy indamu Po aubaisy. 
\p  
\v 9 Akarijo Mamun opamo de irati Anakakai Akoe apa vambunine rautan. Weti po anainame inta raroron muno po anapaporainye kotaro rui vayave veano vatane maponae.  
\v 10 Muno po anakotaro kakainoanive rui vayave veano vatane maponae. Vatane umaso wenawirati weno nuge nuganuije nde mai weye wonae wanave ayao tugae rai, wemirati mo vatane mansapaya kakaije rai.  
\v 11 Maisyare omai ti, Amisye po mapaya ti wanave ayao aruriate bo rai.  
\v 12 Indati Po mangke raugaje mai weye wanave Apa ayao tugae raije jewen yara mananibe awa ayao kakaije bo rai. 
\s1 Ananyao indamu wansanuga mbambunin 
\p  
\v 13 Reama arakove, weapamo Amisye apa muinye manakoeyo wasai, weti reamo kove raura seo Ai tutir, weye arono manasyin dave Po wasapatimu indamu Po wasapaya irati wapa ayao kakaije ama mangke rai. Po wasapaya kakaije rai weye wapanave ayao tugae rai muno Anawayo Vambunine mo wasanuga raveti ngkakavimbe.  
\v 14 Arono reamo Ayao Kovo Yesus raugaje wasai, Amisye po wasawain wade irati Ai, indamu wasisa wapave irati wama Amisy Yesus Kristus apa kovo ntitije rai.  
\v 15 Weti, arakove, reamare wano tawan no Amisye ai. Muno ananyao reandaura wasaije muno ananyao reamo ratoeyo nyovara waowe rai, omamo wapo raijar matuve tavon. 
\p  
\v 16 Amisye po muinye rarorono wansai to muno Apa kove manakoe ti Po vambunine raugaje indamu wansanuga mbambunin no tawan muno wansanave Amen tutir. Wemi mbewar reamo sambaya rave wama Amisy Yesus Kristus ai muno wama Injayo Amisye ai,  
\v 17 reamo ranajo indamu Amisye po wasanuga raijasea mbambunin muno Po vambunine raugaje wasai indamu wapa ana wadave muno wapa ana wadaura mamo ngkov bintabo. 
\c 3  
\s1 Paulusa pe ubeker ware vatano Tesalonika usambayambe mai 
\p  
\v 1 Reama arakove weap, reamare wapo sambaya rave reansai tavon. Wasambayambe indamu ayao Amisye mavave maneka muno vatano wanui wo raugave nsiso manuga rai, maisyare muno wapo raugave nsiso arono wusyinoe.  
\v 2 Muno wasambayambe indamu Amisye po reansapaya irati vatano mamun muno ukakainoanive mai, weye vatan inta wonae wanave ayao Amisye so raiji. 
\p  
\v 3 Amisye pamo no tawan no wansautan tenambe. Indati Po vambunine raugaje wasai ti wabambunin muno Po wasavijuri jirati Anakakai Akoe ai.  
\v 4 Reandaen Amisye po wasaeranande, weti reamanave wasai weapamo watavondi ananyao reamo raugaje wasai rai no naiso muno miridi nto.  
\v 5 Reamo sambaya rave indamu Amisy Yesus po wasaugav wananta Amisye apa muinye rai muno wasatawandi maisyare Yesus Kristus atawandi wemaisy. 
\s1 Vemo vatan inta pononae po anakere raijari nora 
\p  
\v 6 Reama arakove, Amisy Yesus Kristus apa vambunine no reansai, ti reamo ananyao so raugaje wasai: wagwaravainyo arakovo wononae mansai, nanawirati wo awa anakere raijare ramu muno utavondi ananyao reamo raugaje wasai raije jewen. Vemo weape wenawe watantuna tenambe inya.  
\v 7 Reamamo reamononaeye ramu arono reano no wapa yasyine raijoe, yara reamo anakere raijar tutir. Maisyare wemaisy reambe unanuive wasai, ti wadaen kove mamo watavondi reama ana reamo rave rai.  
\v 8 Namane rinit reamo anakere raijaro panyoambe indamu reamo doije inta ijaro reansai. Weye reamonayo mangke irati vatan inta wasai jinta. Weti wapa anaisyo wapo raunande reandaisy, wemamo reamo ravae.\fig Paulus po anakere raijar panyoambe indamu po apa anaisye ramavun|src="CN01999B.TIF" size="span" loc="2 Tesalonika 3:7-10" copy="David C Cook" ref="2 Tesalonika 3:7-10" \fig* 
\v 9 Weramu ranivara reamare reamo wasanajo indamu wapo reansaeranande reama bekedaije rai weratire, weamo reamo ranajo kai. Weramu reamo ranajo wasai jewen, indamu reambe unanuive wasai indamu wapo wapa anakere raijar tavon.  
\v 10 Arono reano wasarijatoe, reamo ananyao so raugaje wasai taiso: “Vatano ponae po anakere raijari, weamo vemo wapo anaisye raunande po raisy inya.” 
\p  
\v 11 Reamo ananyao umaso raugaje wasai weye reamo ranaun ware arakove inta una no wapa yasyin wononae vayave. Wo taune awa anakere raijare ramu, yara uta ude wo vatano kaijinta awa anakere ransosobe.  
\v 12 Amisy Yesus Kristus apa vambunine no reansai, ti reamo ananyao so raugaje vatane umaso mansai no taiso: “Wapo taune wapa anakotare raeranande maninimbe muno wapo anakere raijar indamu wapo ama ine raisy.”  
\v 13 Muno reama arakove weapamo, vemo wamayondi nora, yara wasatawandi wapo ana ngkove rave. 
\p  
\v 14 Muno wasyisyaube! Ranivara vatane inta ponae beto ananyao reamo ratoe nyovara waowe so rai, weamo vemo wapanya atavon inya muno watantuna arijat inya. Wea inda opamo mamaya dave, pare sakinav apa ayao kakaije rai.  
\v 15 Weramu vemo wapo atantona maisyare wapa marova we amaisy inya. Yara wapo anyao vayave weye wepamo wapa arakova pije. 
\s1 Nyovara waowe ama maran 
\p  
\v 16 Reansambayambe Amisye ai, Opi po kovo saumane raugaje vatane mai, indamu arono anakotaro rui vayave nande wasai, Po saumane raugaje wasanuga rai tutir. Amisye tuna wasautan tenambe. 
\p  
\v 17 \sig Risyirati Paulus, taune inaneme veano nyovara wao ama marane so ratoe: syo kove raura wasai. Syo ratoe sya nyovara wao ama marane rai tenambe indamu vatane wo raen ware, “Tugae, Paulus apa nyovara waowe mi so.”\sig* 
\p  
\v 18 Wama Amisy Yesus Kristus apa kove no wasautan tenambe. 
\cls \sig Risy,\sig* 
\cls \sig Paulus\sig*