\id JAS - yau 
\h Jems 
\toc1 Jemsho bapiya ngo Duichon owi amnaha irim togoc 
\toc2 Jems 
\toc3 Jems 
\mt1 Jems  
\mt2 Jemsho bapiya ngo Duichon owi amnaha irim togoc  
\ip Yongburoc mata: Jemsho ‘Duichon suraro toroc kiap ogepma tongitnung’ yongo yong fasun fasun mata ogepma ngo Duichon suraro ambaracha togoc. Yu wömai ingoroc kombigoc: Kombing tobic tobic woi duc matahon manomanogon muno. Kombing tobic tobic owi amna yu muyu kombing tobic tobichon boinno fingga toroc kiap ogepma tongitnung. Amna auho toroc kiap ogepma matunai wömai nonu yu angga ingoroc kombiantamon, yuhon kombing tobic tobicno maec.  
\c 1  
\p
\v 1 Noc Jems, noc Kopotoroc orin Yesu Duic yuhon youp amna itat. Nocho bapiya ngoroc Yuda nanohon torop 12 sontha yongo sihat. Son wömai böcsa guroc soni imu fauna ongga kuin simbang sa guroc auhon woce woce idtongung. Oro nocho son sep ogep sinom kantat.   
\s1 Tonguc yecyecho kombing tobic tobic noni toroc tongitac  
\p
\v 2 Oro oröc ori, mepmo foro ihono ihono sondec öngkungmuya son tonguc keantanganu wömai sonu worocha borongdetno sinom tongitnung.  
\v 3 Wömai yaha, son urop kombiang, mepmo ihorocnoho wömai kombing tobic tobic soni toroc tongidang. Toroc tong kamuya son kombing tobic tobic soni kokoreantanganu wömai woroc, mepmodec koing songga idit kiapho sondec mac fiuna moröma engoc.  
\v 4 Moröma idina son koingsongga mepmo sumboda itongon-tang. Tongo son owi amna orogoma tong bumbum soni muno entang. O son toroc kiap ogepmaha madocmui Kopotorochon owi amna ino yabitno sinom entang.   
\s1 Kopotorocho kombic kombic ogepma nimongitac  
\p
\v 5 Oro, amna au son bonip sonidecmaho kombic kombic ogepmaha docmönggai yu muyu Kopotoroc dönac inuna Kopotorocho wo imontac. Kopotoroc yu kombic kombic ogepma inoha makokoreng-itac, o yu amna auho dönac yongidangmaha mayong faditac. Muno yu owi amna ambarac kombic kombic ogepma imoc imocha toup kombingitac.  
\v 6 Wohong gocho dönaca irot yaiot yongidirocha. Muno goc ‘boinno öngkung namangoc’ kombing tobingmina dönac youp tongidiruc. Amna au irot yaidec entacma yu wömai sumpho top yamuc köreuna siho muyu muyu ongi epi tongitacmahon toroc.  
\v 7 Amna ihorocnomaha wömai Morömaho yapmu au maimic. Muno sinom.  
\v 8 Amna ihorocnohon irot kombic kombicno woi yaitni, worocha tongga yu youpno ambarac gendöng gandöngnigon tongitac.   
\s1 Amna uroci orin amna yoctecno koböcmahon nongoru matano  
\p
\v 9 Oröc noni au yu yoctecno koböcma maitimii uroci ididangma yuho borongdearut. Yu woi Kopotorocho yangamin amna moröma idang.  
\v 10 Wohong amna möneng yoctecno koböcma idimangma yu wömai ingoroc kombiarut, gurochon yoctec manomano woi Kopotorocho yangamin yapmu boyömo iditac. Saröc boyömo bisong ongidangma worochon toroc wömai yoctecno manomano ambarac bisong ongbödenahing.  
\v 11 Non kombiamon, sep yu öngga saröc foring yauna dingo onggom songidang. Onggom songga saröc bömböpmoho fökon muuya tong fatfatno ogepma bödengitac. Oro worochon torocgon wömai amna yoctecno koböcmaho bödenahing. O yuhon fim öresac ambarac bisong ongonahing.   
\s1 Tonguc yecyechon foro  
\p
\v 12 Oro amna au mepmo toroc tonguc yecyec bongonodec koing songga entacma yu wömai irot ogepha itonggong koing sogiangoc. Kopotorocho itonggong koing owi amna yuha toup kombiangma imoc imocha mata godingmun fadoc. Worocha tongga amna au tonguc yecyecdec koing songga entacma yu borongdehun.   
\p
\v 13 Oro amna auhon irotno wömuno toctocha fadang uunai wömai yu ihoroc kombiicha: ‘Kopotorocho noc tonguc nehac yo.’ Muno sinom, yu ‘amna wömuno toun’ yongo amna au matonguc yeic. O amnahu o dogu kopothu yu Kopotoroc tonguc imuna wömuno toctocno woi maec.  
\v 14 Muno sinom, tonguc yecyec wömai kiap ingorocnodec öngkungidang: Noniin ibibo noni worocho wömai non wodingga ninong yuuna non sogit akep tongitac.  
\v 15 Sogit akep tongmuna wömuno yitno irot nonin sing nimuna mac fiuna turongo baantac. Turongo bauna macfiuna moröma itmuna omoc koing öngkung nimongitac.   
\p
\v 16 Worochai oröc ori sinom, sonin ibibo soniho son tonguc keuna wömuno toningyit.  
\v 17 Kombiarut, irot ogep orin guram ogepma manomano ambaracho wömai Kopotorocho momdecma nimongitac. Nandöng Kopotoroc yu sep yarop fitnung worochon Morömo itac. Yuhon toroc kiapmo wömai mongurac matongitac. Muno, yapmu auhon doguno sepho foring auna ubarakoti o docutmuhi tongitacma ihoroc yu matic.  
\v 18 Yu wömai inoin irot kombic kombicno tanda kombiun bödeuna fatmata ogepma siuna nonot eboc. Ehuna non wo kombing tobingga itonggong wego sogidomon. Oro itonggong wego sogidomonmaha tongga non manomano au dongyun öngkubungma wo yanggirada Kopotorochon fat osuc fat imongo öngkubomon.   
\s1 Non muyu fatmata ogepmahon toroc itongitnahamon  
\p
\v 19 Nakain oröcnai sinom, son ingoroc kombiarut: Son ambarac nuc sonihon mata kombic kombicha arangarang yongga iditnung. Wohong mata yong fandatha wömai kombic kombicho tongitnung. O irot kombut son karupgon tongitninga.  
\v 20 Muno, irot kombut noniho wömai non toroc kiap nongnongodec itonggonga yongo matongfat nengitac. Kopotorocho kombihac iho.  
\v 21 Sonu wömai abe toroc kiap wömuno orin göra kiap toup tongidang. Worocha son wo ambarac dongyu fauya sonthon kombic kombic soni tohongga fatmata ogepma Kopotorocho irot sonin möng kamogocma worocgon kombing tobiarut. Fatmata ogepma worocho wömai itonggong koing tun öngkung kamuna batip itnahing.   
\p
\v 22 Oro son fatmata ogepma onggimphagon kombininga. Muno, son muyu wo kombingga worochon toroc itongitnung. Son fatmata komanang kombiantanganu wömai woroc, son soni imanang inong yuantang.  
\v 23 Oro amna Kopotorochon fatmata kombingga worochon toroc maitongicma yu wömai amna ino yangamo glasidec angitacma woroc simbang entac.  
\v 24 Yu woi inoin yangamo glasidec angtongga ibarun fauna ongga yangamo kiap tingtingno itacno wo karupgon edet imontac.  
\v 25 Wohong Kopotorochon nongoru wego worocho wömai non turongodec asanyun onguya orung ididamon. Tuna amna au yu nongo-ru wego wo angsoworecno sinom tongmuna matano nongnongo sindarantacma yu wömai fatmata onggimphagon makombiic. Muno yu wömai worochon toroc itongungoc. Tuna Kopotorocho guramno amna worocdec sing imuna yuhon youpno ambarac boinnobarac öngkung tongungoc.   
\p
\v 26 Oro, amna au yu inoha kombiantacma ‘nochon yong moröng toroc kiap woi ogepma sinom yo’. Yu ihoroc kombihac mahong inoin duc matano wömai yu angit maangsoworeunai wömai woroc, amna worochon yong moröngno woi yapmu boyömo entac.  
\v 27 Kopotorocha yong moröng imoc imoc kiap boinno auma wömai ingoroc: Managumboc ungano orin owi kapi mepmodec idangma yu tongfat yecyec kiap. O auma wömai, non itonggong noni ogepma sinom angtorengga guroc ngorochon wömunoha me imonaya worocho non matun betfatnin. Oro, non kiap ihorocno tontamonanu wömai non Kopotorocha yong moröng boinno yong imontamon. Kiap ihorocno wömai yuho yangamin ogepma sinom ididang.   
\c 2  
\s1 Owi amna ambaracha toroc kiap tungugon tong imongitnahamon  
\p
\v 1 Oro oröc ori, son Moröma noni Yesu Duic woi momphon amna mitimni sinom yu kombing tobing imongidang. Worocha wömai sonu oröc banac banac tongitninga. Muno, son muyu owi amna ambarac toroc kiap tungugon tong imongitnung.  
\v 2 Oro nocho toroc mata ingoroc siwa: Son yong moröng suran tongga idiyai oro amna au yu tec tohomunmucno ogepma sinom tohomun muuna oburo siragodec gol ring singmuna engga sonthon suran sonidec sakaun fiantac. Yu wocin engga sakaun fiuna idina oro mit amna uroci au tec tohomun mucno gengo dogit dogityi yu woi ihorocgon suran sonidec ehantac.  
\v 3 Oro amna yai wo sonot engga idinya sonu wömai amna tong fatfatno ogepma woroc oröc tongo omoc idit abam ogepma tengga singgai inontang, “Goc abam ogepma ngorocdec omoc iti.” Wohong amna urocima wömai son inontang, “Goc ongga okoce korungon idongga iti” o au inontang, “Goc nonthon orung noni forodec gurocdec omoc iti.”  
\v 4 Oro son toroc kiap ihoroc tontanganu wömai tingting? Son soniin irot kombic kombic wömuno tanda amna yangsoworengga oröc banac banac tontang. Son amna ambarac toroc kiapmo tungugon matongimogung.   
\p
\v 5 Nakain oröcnai sinom, kombiarut: Owi amna guroc ngocin uroci ididangma yuha wömai Kopotorocho kombing tobic tobicno orongi imogoc. Tongo ‘mom toborucho wömai yuhon fat engoc’ yongo yu eragoc. Mom toborucha wömai Kopotorocho mata godingmun fauna ingoroc yogoc, ‘Amna nocha toup kombingidangma yuho wömai sogitnahing.’  
\v 6 Wohong sonu wömai amna urocima yangam fapfap tong imongidang. Son mata ngo kombingga soworearut: Numari sinompho wömai mepmo soni koroc fingga kangada mata youpdec fohong kungidang? Woi amna möneng yoctecno koböcma idimangma worocho tongidang!  
\v 7 O numariho Moröm sonihon ma morömaha yong saha yongidang? Woi möneng yoctec amnaho yongidang!   
\p
\v 8 Oro, mom toboruchon nongoru moröma ingoroc itac:  
\li1 “Goc gakaha kombingitarocma worochon torocgon nucaiha kombingidiruc.” \rq (Wok Pris 19:18)\rq*  
\p Oro son nongoru wo boinno sinom sindarantanganu wömai itonggong toroc kiap soni ogepma entac.  
\v 9 Wohong sontho amna auha oröc tong imongga o auha me imontanganu wömai woroc, son turongo soni tu öngkupac. O son nongoru mata gumanda nongoru fodic fodic amna entang.  
\v 10 Amna au yu nongoruhon docno tungugon gumarantacma yu wömai nongoru macno ambarac gumandup tongga worochon urago sogiangoc.  
\v 11 Wömai yaha, Kopotoroc tungugon yu nongoru mata yai ingoroc nimogoc:  
\li1 “Son oimna, son nuc soni göra toninga.” \rq (Lo 5:18)\rq*  
\p O auma,  
\li1 “Son nuc soni wot omom toninga.” \rq (Lo 5:17)\rq*  
\p Oro goc wo göra matiroc mahong goc ongga amna au wot omom tontarocma wömai woroc, goc nongoru guman guman amna entaroc.   
\p
\v 12 Oro, sonu wömai nongoru wegohon owi amna idang. Nongoru wego worocho wömai son turongodecma asanyun onguya orung idang. Worocha tongga duc mata soni orin itonggong kiap soni nongoru wegohon toroc iditnung.  
\v 13 Wömai yaha, amnaho nucniha uroci makombingidangma yu wömai Kopotorocho ihorocgon uroci makombingga matano yun bödeuna obukonahing. Wohong amna au nucniha uroci kombingidangma yu wömai mata youpdec ogep itnahing.   
\s1 Kombing tobic tobic noni woi boinnobarac itun  
\p
\v 14 Oro oröc ori, amna auho ingoroc yun: “Noc Yesuha kombing tobing impat yo.” Yu ihoroc yontac mahong yu toroc kiapmo wömunogon tongitac. Oro kombing tobic tobic kiap ihorocnoho wömai yu itonggong koing tun öngkung imontachu? Muno sinom.  
\v 15 Kombiarut, oröc soni auhu o nat soni auhu yu tec tohomun mucno gengo dogit dogityi o nacno möp idinai  
\v 16 sondecma amna auho yu nacnoha o tecnoha matong fatyei komanang inontac, “Goc irot gucdec iti. Goc ongga teca temongmina godiba mönmön yuna o nacno naiya modiba foc toun.” Oro amna worochon matano oröc nat soni wo tingtingno tongfat yeantac? Muno sinom, matongfat yeic.  
\v 17 Oro, worochon torocgon wömai kombing tobic tobic soni boinno muno ida toroc kiap ogepma amnahon itonggongnodec matun öngkuunai wömai woroc, kombing tobic tobicno woi yapmu boyömo sinom entac.   
\p
\v 18 Worochoi oro amna auho ingoroc yun, “Amna au yu wömai kombing tobingidang. O amna au yu wömai toroc kiap ogepma tongidang.” Oro amna worochon matano wömai nocho ingoroc iban imontat, “Gocho toroc kiap ogepma matongitarocmaha nocho tingtinga kombiantat, goc boinno Yesuha kombing tobiharoc? Muno, noc tuctugo makombit. Wohong goc ogep nochon toroc kiap ogepma angmina tuctugo kombiantaroc, noc boinno Yesuha kombing tobingitat.”  
\v 19 Goc ingoroc kombing tobingitaroc: Kopotoroc tunguhogon itac. Woi boinno sinom kombiharoc mahong dogu boyömo yu woi worocgon kombing tobingmuya botongga kudat konoc konoc tongidang.   
\p
\v 20 Goc amna bumbumyi, goc ingoroc makombirochu nuhun? Kombing tobic tobicho toroc kiap ogepma matun öngkuicma woi yapmu sahano sinom itac.  
\v 21 Goc öra noni Abraham yuha kombihi. Yu wömai manano Aisak woto Kopotoroc öret song imoc imocha togoc. Oro yu toroc kiap ogepma wo togocmaha tongga Kopotorocho yu angga amna nongnongo inogoc.  
\v 22 Oro goc yuhon kiap wo angmina ingoroc kombihi: Abrahamphon kombing tobic tobicno orin yuhon toroc kiapmo woi youp ban togomoroc. Abrahamphon toroc kiap ogepmaho kombing tobic tobicno tun koing songga ino yabitno idoc.  
\v 23 Kombing tobic tobicno ino yabitno idocmaha Kopotorochon bapiyaho mata au itacma worocho boinno öngkuboc. Mata wo ingoroc yac:  
\li1 “Abraham yu Kopotoroc kombing tobing imogocmaha tongga Kopotorocho yu amna nongnongo inogoc.” \rq (Stat 15:6)\rq*  
\p Tongo Kopotorocho Abraham ‘nakain amna’ ihoroc inogoc.  
\v 24 Worocha son ingoroc kombiarut: Amna au yu kombing tobic tobichagon Kopotorocho yangamin nongnongo maic. Muno, amnahon toroc kiapmo ogepma orin kombing tobic tobicno worocho youpno ban tontamorocanu wömai yu amna nongnongo entac.   
\p
\v 25 Göra kiap toctoc owi mano Rahap, yu wömai kiapmo ihorocnogon nindahac. Kopotorocho yu toroc kiap ogepma togocmaha owi nongnongo inogoc. Yu wömai amna yai Yosuaho taun angsicsicha inongmudocma wo böcnon yangada fögoc. Yangada föngo mit uyap ogepma indauna ongga ogep idomoroc.  
\v 26 Kombiarut, godip föp noni yaruno muno idinai wömai yu omong fatfatyi kiap entac. O worochon torocgon amna auhon kombing tobic tobicnoho toroc kiap ogepma matun öngkuunai wömai woroc, kombing tobic tobicnoho ihorocgon omong fatfatyi kiap entac.   
\c 3  
\s1 Non muyu duc mata noni angitgon angtorengitnahamon  
\p
\v 1 Oro oröc ori, non amna fandat fandat youp tongidamonma nonthon itonggong kiap noni wömai Kopotorocho mata youpdec orongi sinom angsoworeangoc. Worocha wömai sondecma amna koböcmaho fandat fandat youp toctocha kombiningyit.  
\v 2 Non ambarac-ho wömai manomano kandöc tongidamon. Amna au yu yapmu au kandöc maticma yu wömai amna ino yabitno sinom entac. Tongo yu inoin godip föbo angitgon angtoreantac.  
\v 3 Worochon mata tepmo wömai ingoroc: Non bot hos fasun imoc imochon ain docno au dugodec singidamon. Ihoroc tongga non bot hos wo fasunaya yu nontho kombiamonan wocegon ongontang. Nonu yuhon dugogon yangtorenaya dugoho hosihon föbo moröma fasurantac.  
\v 4 Oro nocho mata tepmo au top giranghon siwa. Top girang woi moröma sinom ididang. Tuna sum koingoho busuna girang ongidang. Wohong girangon farang docno obugu worochogon wömai girang fasurantac. Kepten sa nahenne onggonga kombihacma yu farang docno wo ibaruna top girang moröma ambarac ibaruna wocegon ongontac.   
\p
\v 5 Oro worochon torocgon wömai duc noni ngoi godip föp nonihon docno obugu sinom itac mahong yu worocho wömai önggöngyi toup tongo inoin mano yong morögicno sinom tongitac. Kombiarut, ep dindut obugu sinom worocho dingga ugo dorong morö dingitac.  
\v 6 O duc noni woi ihorocgon ep aranggumphon toroc obugu dingga toup firat tongitac. Yu woi godip föp nonihon docno obuguhong, ducho mata orin toroc moinno koböc dongyun öngkuuya godip föpnoni ambarac dongyun betmangidang. Tuna worocho wömai itonggong noni ep aranggum simbang songmun diuna kandöc ongo obukongidamon. Ep aranggum wo woi ep bohöngon fat.   
\p
\v 7 Oro, non amna, non ogep bot yup arap goröm orin arap top tumoc idangma wo fogida angit yangtorengidamon.  
\v 8 Wohong amna auho inoin duc matano angit angtorehacno wömai maec. Muno sinom, duc noniho bongono muno mata wömuno yongidang. Duc nonidec wömai amna dopdophon song tobicho ducmoda iditac.   
\p
\v 9 Duc noniho wömai non Kopotoroc Nandöng noni yong moröng imongidamon. O duc tungu worochogon wömai amna nuc noni möpmo wagang imongidamon. O nucnoni woi Kopotorocho ino simbang dongyun öngkubung.  
\v 10 Duc tungu worochogon wömai Kopotoroc yong moröng imongitac o amna nucni möpmo wagang imongitac. Mayain oröcnai, toroc kiap ihorocno woi angit maec.  
\v 11 Yamuc daro tunguhogon sunda yamuc sumo epi, top yamuc epi woi maec.  
\v 12 Oröcnai, ep fikho wömai oliv koburo mafiic. O ep waintho wömai fik koburo mafiic. O ihorocgon yamuc daro beci wömai yamuc sumo masuric.   
\s1 Kopotorochon irot kombic kombic ino yabitno  
\p
\v 13 Oro sonthon bonip sonidecma numaho irot kombic kombic ino yabitno idimuna yu manomanohon foro tuctugo kombiun? Ihoroc kombiantacanu wömai amna worocho toroc kiapmo ogepma nindauna anam. Woi idit kiapmo nongnongo orin inoha kombiuna ohonggongyi itmuna toroc kiapmo ogepma toctoc. Momphon kombic kombic ino yabitnoho wömai toroc kiap ihorocno doun öngkungidang.  
\v 14 Worochoi oro, son irot sonin sonihagon kombingmuya nuc soni yanggiraun yanggiraun tontanganu wömai woroc, son ‘kombic kombic ogepma nonot itac’ yongo borongdetninga. Ihoroc tontarocanu wömai goc imanang yongo fatmata boinno wo ayam tong imontaroc.  
\v 15 Imanang kombic kombic ihorocnoho wömai momdecma mahogoc. Muno, wo woi guroc ngorochon manomanogon, woi irot osucnoho tun öngkungitac. O worochon fano woi dogu kopot yuho itac.  
\v 16 Kombiarut, son irot soni sonihagon kombingga nucno yanggiraun yanggiraun tontanganu wömai suraro soni irot tungudec maitning. Muno, toroc kiap wömuno foro ihono ihono ambaracho sonot öngkupnahing.   
\p
\v 17 Worochai oro, amna au yu momphon irot kombic kombic ino yabitno sogiantacma yu wömai amna oweng owengo entac. O yu nucni ot irot tungu sic sicha toup kombiantac. O yu nucni kiap obingo imontac. O yu wömai nucnihon matano sumbentac. O yu nucniha uroci kombiantac. O itonggongno wömai boinno ogepma fiantac. O yu wömai oröc banac banac matic. O yu mata orogomagon yontac.  
\v 18 Kopotorochon irot kombic kombic ino yabitno woi yitno simbang amna obingnohon irotnon dogo kungga mac fiuna boinno ogepma fingitac.   
\c 4  
\s1 Non guroc ngorochon manomanoha oröc tong imonintha  
\p
\v 1 Foro yaha sinom wömai sonidec emoc orin yong osut kiap ididang? Worochon foro wömai ingoroc: Godip föp sonihon ibiboho wömai irot sonin emoc tongidang.  
\v 2 Irot aranggum soniho yapmu manomano fogit fogitha toup öngitac mahong mafogididang. Worocha tongga sontho nuc sonihon manomanoha yang irup öngga nuc soni dopdopha arangarang yongga ida tu matuna son yong osut yongga emoc tongidang. Son ihoroc toup tongidang mahong Kopotoroc yapmu auha dönac wömai mainongidang. Foro worocha tongga son manomanoha möp ididang.  
\v 3 O sonu dönac yongidangma wömai irot oweng owengo ot muno, son wömunogon yongidang. Worocha wömai Kopotorocho yapmu au makamongitac. Sonu soniin ibibo sonihagon kombingmuya ‘yoctec manomano koböcma fogitna’ yongo dönac yongidang.   
\p
\v 4 Son owi amna görani, son ingoroc makombiinghu nuhun? Amna au yu guroc ngorochon manomano ot öroc tontacma yu wömai Kopotorochon ayamo entac. Kombiarut, son irot soni guroc ngorochon manomanodec ding fingga entangma wömai woroc, son Kopotoroc me imontang.  
\v 5 Kopotorochon bapiyaho yac, ‘Yaru ngo Kopotorocho irot nonin sing nimogocma worocho Kopotorocot iditha toup kombihac.’ Oro mata ngo woi komanang irim toctocyi maec.  
\v 6 Worochoi oro, Kopotorochon banac banacno woi moröma sinom. Worocha tongga Kopotorochon bapiyaho wönggon ingo yac:  
\li1 “Kopotoroc yu amna inoha kombiuya öngidangma yu ayam tong imongitac. Wohong amna inoha kombiuya ohuna itongidangma yu wömai yang banauna ogep itnahing.” \rq (Sindaun 3:34)\rq*   
\p
\v 7 Worochai son irot soni Kopotorocha bogiarut. O son dogu kopot ayam tong imongo körengmu ongo son imun fauna korungon ongoun.  
\v 8 Son muyu Kopotorocot ambehecgon ongorut. Ihoroc tuya wömai yu sonot ambehecgon ehantac. Son wömuno toctoc owi amna son turongo toctochon obu soni sac tarut. O son owi amna irot yai kom-bingidangma son irot soni tong sac tongga oweng owengo idarut.  
\v 9 Son soniha irot mepmep tongga yong ointongga idarut. Son yonguang mahong son muyu mongurac tongga uroci kombiarut. O borongdetdet soni mongurac tongga irot soniho nanga fatfat toun.  
\v 10 Son Kopotorocho yangamin ma soni tohorut. Tuna Kopotorocho son föun fadauya onoce sinom entang.   
\s1 Non oröc noniha yong saha yongitnintha  
\p
\v 11 Oro oröc ori, son Kopotorochon owi amnaniha yong saha yongitninga. Amna au orugo soworengga ‘wömuno itac’ yongo mata metec yontacma yu wömai nongoru soworengga yong saha yontac. Gocho nongoru soworeantarocanu wömai goc nongoruhon unenne mairoc. Muno, goc wömai nongoru soworec soworec amna simbang entaroc.  
\v 12 Kopotoroc yu tunguhogon wömai nongoru tun öngkuboc. Tongo inohogon wömai owi amna yangsoworengitac. O yu ino tunguhogon wömai owi amna au itonggong koing dongyun öngkung imonahing o au wömai dongyun obukonahing. Worochai tingting oro, goc numa? Goc nucai yangsoworeirocha.   
\s1 Non önggöngyi tongitnintha  
\p
\v 13 Kombiarut, son amna au son ingoroc yongidang: “Öngahu o kembothu wömai nonu taun audec ongga biruc tungu woce itmanaina bisnis youp tongitnahamon. Bisnis youp tongmanaina möneng koböcma dongyana öngkupnahing.”  
\v 14 Oro son mata ihoroc yong-idang mahong kembot kiapmo yaönomaho sondec öngkuangocma woroc wömai sonu makombiing. Itonggong soni woi guroc mönnohon toroc. Guroc möntho wömai öngga obmukusuc itmuna wohogon bisong ongitac.  
\v 15 Worochai sonu ingoroc yuyai wömai ogep in: “Morömaho kombiuna angit idinai wömai non abe mamongfai ida youp noni ihono ihono tonahamon.”  
\v 16 Worochoi sonu soniin ma soni töngga duc furang tongga youp morö toctocha yongidang. Toroc kiap önggöngyi ihorocno wömai toroc wömuno sinom.  
\v 17 Oro, goc kombiiya toroc kiap au ogepma idinai wömai goc muyu woroc tongidiruc. Matirocanu wömai woroc, turongo wo gocdec edengoc.   
\c 5  
\s1 Amna yoctec möneng koböc idimangma yuhon garac matano  
\p
\v 1 Oro son owi amna möneng yoctec koböc itkamangma sontho kombiarut. Sondec wömai mepmo inobarac sinom öngkup öngkupha tac. Sonu worocha kombingmuya yong ointongga idarut.  
\v 2 Kopotorocho yangamin wömai yoctec möneng soni ambarac urop bom tongo moin tongbödegung. O boru tec tohomumucno soni wo siga kososingogon urop nongbödegung.  
\v 3 O gol orin silwa soni woi nogotno fat bödenahing. Nogotno faima ngorocho wömai mata youpdec turongo soni doun eran öngkung tangtang tonahing. Tuna godip föp soni ep simbang dinahing. Boinno sinom, bongono madango urop eng fom tac mahong sonu yoctec möneng soni komanang sinom feng suran tongidang.   
\p
\v 4 Kombiarut, youp wabkarac soni öndec nacno soni tanangidangma yuhon wöngnacno sontho kokorengidang. Kokoreuya worocho mamboda son firing karang. O youp wabkarac soni nacno feng suran tongidangma yuhon mambocnoho wömai urop Kopotoroc Gesö Morömo yuhon onggimodec öngkupac.  
\v 5 Son wömai guroc ngocin möneng koböcma monmuya manomano ambarac ibip sonihon toroc wöngidang. Son nacno koböcma nongidang. Tongo modip soni toup macfingga idiya son kot omom toctochon bongono urop eng fom tac.  
\v 6 Sonu wömai amna nongnongoma mata youpdec fohong yungga komanang sinom dong omom tongidang. Amna worocho wömai ayam matong kamogung.   
\s1 Non irot noni tongkoing tongga mepmo sumboditnahamon  
\p
\v 7 Worochai oröc ori, son muyu irotsoni tongkoing tongga mepmo sumboda idiya ongga Morömaho ehangoc. Oro, amna örobaracma yu wömai ‘nacno boinno öngkupun’ yongo woha torengga ididang. Yu wömai irotno tongkoing tongga komöc orin sephon torec idiya yuho youpno tunya nacno boinno öngköuya sogito nongidang.  
\v 8 Oro sonu worochon torocgon irotsoni tongkoing tongga Morömaha torengga iditnung. Yaha, yuhon ebep bongono urop engfom tac.   
\p
\v 9 Oro oröcnai, son Kopotorochon owi amnaha mata metec yongitinga. Kombiarut, mata yun bödec bödec amna yu urop simbu göphon mene arangarang yongga itac. Tongo yuho son kang-soworengga urago wömuno kamicyit.  
\v 10 Oro oröc ori, Kopotorochon yong tuctuc amnani osuc idungma yudec wömai mepmo moröma öngkungidung mahong yu muyu irotno tongkoing tongga ida mepmo wo sumbodidung. Oro son yuha kombingmuya yuhon toroc kiapmo wo tanda worochon toroc itongitnung.  
\v 11 Amna worocho magapgap yogungmaha tongga Kopotorocho yu borongdetno moröma sinom yu imuna yudec edengoc. Sonu amna au mano Jop, yuhon fatno urop kombingidang. Yu ihorocgon mepmo moröma yudec öngkubocma woroc sumbodoc. Sumbot tongga idina mit Morömaho mepmo wo tun bödeuna ogepma sinom idoc. Boinno sinom, Moröma noni yu nontha uroci moröma sinom kombingmuna ning banauna ogepma sinom ididamon.   
\s1 Son mata yong koing yongmuya yapmu audec tong koing toninga  
\p
\v 12 Oro oröc ori, yapmu moröma sinom wömai ingoroc kantiwa: Son yong koing mata soni momdechu o gurocdechu o yapmu audechu tong koing tongitninga. Muno sinom, mata soni woi nongnongogon yongitnung. “Öc” yontarocanu wömai boinno tontaroc. O “muno” yontarocanu wömai matiroc. Son mata imanangni yuya Kopotorocho urago wömuno kamicyit.   
\s1 Amna nongnongohon dönacno woi orongi gesönobarac  
\p
\v 13 Oro sondecma amna auho mepmodec idangma yu wömai ‘Kopotorocho tongfat nehun’ yongo dönac inarut. Oro amna au irotnoho kömengmuya idangma yu wömai Kopotorocha yong moröng ap yarut.  
\v 14 Oro sondecma amna obukongga idangma yu wömai surarohon amna dugo inong yuna ehuya dönac yontang. Dönac yongga Kopotorochon madec godibodec unac wagang imontang.  
\v 15 Oro yu dönac wo kombing tobic tobicnobarac yontanganu wömai Morömaho amna wo tun orokontac. O yu turongo togocanu wömai Morömaho yuhon turongono imun faantac.  
\v 16 Worochai oro, son Kopotorochon owi amna, son turongo soni oröc soniot nucno wo inong taun taun tongitnung. O son ‘Kopotorocho non doun orokona’ yongo dönac yongitnung. Oro amna nongnongohon dönacno woi gesönobarac ogepma sinom tongfat nengitac.  
\v 17 Kopotorochon yong tuctuc amna mano Elaiya yu woi noni simbang guroc amna au idoc. Wohong yu ‘komöc muicha’ yongo dönac youp orongi tuna komöc mamuigon idina biruc anfi o yarop six bödegoc.  
\v 18 Oro bongono wo bödeuna mit yu wönggon dönac yuna mom simbu fagariuna komöc möngga öndecma nacno tanac wönggon doun biruc togung.   
\s1 Non muyu oröc noni kandöc onggungma yu wönggon uyap ogepma indanitnahamon  
\p
\v 19 Oro oröc ori, sondecma amna auho Kopotorochon mata boinno imun fauna kandöc ongontacma wömai woroc, son muyu yu uyap ogepma indanda yangada tebarut.  
\v 20 Amna auho wömuno toctoc amna au tongfat yengo inong tobiuna amna wo uyap wömuno imun fauna ibarantacma wömai woroc, Kopotorocho amna worochon turongo koböcma yaun weuna omoc koing maun feic. Mata ngo son edet kamicha.