\id 1TI - yau 
\h 1 Timoti 
\toc1 Polho bapiya ngo Timotiha irim togoc 
\toc2 1 Timoti 
\toc3 1 Timoti 
\mt1 1 Timoti  
\mt2 Polho bapiya ngo Timotiha irim togoc  
\ip Yongburoc mata: Timoti yu amna berac au. Yu Polot itongga yuot Duichon youp tongidomoroc. Tongo Polho ‘yu ting tongga Duichon youp amna ogepma entac’ yongo Timoti suraro yangtorec torechon yong fasun fasun mata inogoc.  
\c 1  
\p
\v 1 Noc Pol, noc Duic Yesu yuhon aposelno. Kopotoroc orin Duic yuho wömai ‘nocho youp woroc towa’ yongo noc soworegomoroc. Kopotorocho non wömunodecma öcangyun muuya itonggong koing nimogoc. O Duic Yesu yu engmuna non itonggong sadec ningat fongungoc. Wohai nonu yuha torec ididamon.   
\p
\v 2 Timoti, kombing tobic tobic notiha tongga gocu nochon manana sinom itaroc. Tongo nocho bapiya ngo gocha yongo irim tat.  
\p Kopotoroc Nandöng noni orin Duic Yesu Moröma noni, yuho gocha uroci kombingga gang banangmuna iroda tun guc mauna ogep iti.   
\s1 Non imanang fandat fandat amnaha onggim sinintha  
\p
\v 3 Noc Masedonia provins onggonga togotan bongono wocin wömai nocho urop ‘Efesus taun wocegon iti’ yongo kiring gamogot. Woce wömai amna au fatmata ogepma kandoc fandadidang. Ihoroc tuya goc woce itmina amna wo ‘muno’ inongo bongbong sing imiruc.  
\v 4 O ihorocgon ‘yu bem fat orin ombu sakungnihon ma torop embat embatha tongga bongono tong samborec tongitninga’ yongo ‘muno’ iniruc. Mata boyömo ihorocnoho wömai amnahon irotno komanang sakauna mataho emoc tongidang. Wohong Kopotorochon youp wömai öngkung tangtang matic. Kopotorochon youp woi kombing tobic tobichon manomano.  
\v 5 Kopotorocho youp namogocma worochon foro wömai ‘nuc oröcha irot imoc imoc kiap öngkupun’ yongo namogoc. Oro irot noni Kopotorocho yangamin oweng owengo entacanu o ihorocgon non irot nonin nuc noniha kombing moin moin makombininanu o ihorocgon kombing tobic tobic noni boinno entacanu wömai woroc, nontho irot noni boinno sinom nuc noniha tong fup imontamon.  
\v 6 Wohong amna au yu kiap ihorocno urop imu fauna mata böyömohagon kombingidang.  
\v 7 Yu wömai Kopotorochon nongoru mata owi amna yong fandat fandatha toup kombiang mahong yu ino nongoruhon foro makombiing. Yu inoha wömai etno sinom itmuya mata orongi sinom fandadidang.   
\p
\v 8 Non urop kombiamon, amnaho Kopotorochon nongoru nongnongo fandaantanganu wömai nongoruho owi amna ogepma sinom tongfat yengitac.  
\v 9 O ihorocgon Kopotorocho nongoru sigocma woi ‘amna ogepmahagon’ yongo masigoc. Muno, nongoru woi amna wömunoha bongbong sicsicyi itac. Woi nongoru fodic fodic amna orin emoc toctoc amna yuha tobingo sigoc. O owi amna wömuno Kopotoroc me imongidangma yuha woi ihorocgon sicsicyi itac. O owi amna kunkun maengma orin owi amna guroc ngorochon toroc kiapgon tanidangma yuha woi ihorocgon yongo sigoc. O amna inoin mac nandöng dongyu omongidangma orin amna sopma yuha woi ihorocgon yongo sigoc.  
\v 10 O ihorocgon, nongoru woi owi amna göra youp orin nucniot toroc kiap yangam fapfapni tongidangma yuha woi sicsicyi itac. O ihorocgon amna auho amna nucno sogito akep tongo ‘yuhon fenoho möneng namarut’ yongo kiringidangma orin imanang amna orin owi amna yong koing matano gumanidangma yuha wömai nongoruho ‘muno’ yongitac. O ihorocgon owi amna ambarac kombing tobic tobic nonihon foro nongnongo wo tu gendöng tongidangma yuha wömai Kopotorocho ‘nongoruho yu tobihun’ yongo nongoru sing imogoc.   
\p
\v 11 Nonu mata yong fandadidamonma worocho wömai fatmata ogepma oröc tong imongo imongtoc tongitac. Fatmata ogepma wo wömai Kopotorocho nakain obunadec sing namogoc. Tuna worocho wömai Kopotorochon itonggong wairurubarac nindangitac. Boinno, yong moröng noni ambarac Kopotorocgon yong imongitnahamon.   
\s1 Kopotorocho Pol angbanauna youp orongi tongidoc  
\p
\v 12 Moröma noni Duic Yesu yu inoin youphon gesö namogoc. Worocha tongga nocho ecec moröma inongitat. O yuho nocha ingoroc kombigoc: Noc irotna yuhon youpha bogingitat. Tongo yuho noc inoin youpha nanong mudoc.  
\v 13 Boinno, osuc wömai nocho yuhon mano yong moin moin yong tongidot. O nocho amna ingingo sinom ida Duichon suraro ayam tong imongidot. Wohong bongono wocin wömai nocho abe etno ida Duic makombing tobing imogot. Worocha tongga Kopotorocho nocha uroci kombingga nangbanauna nocho yuhon amna öngkubot.  
\v 14 Boinno, Kopotorocho Moröma nonihon banac banacno irotnan koriuna nocdec ducmotno sinom togoc. Tongo yuho noc nang banauna Duic Yesuhon madec irot imoc imoc kiap orin kombing tobic tobic kiap namogoc.   
\p
\v 15 Yesu Duic yu wömuno toctoc owi amna itonggong tun öngkung imoc imocha gurodec ohogoc. Mata wo woi boinno sinom non ambarac sogit akep tona. O wömuno toctochon morömo woi noc naka itat.  
\v 16 Wohong Duic Yesu yu inoin toroc kiap obingo sinom owi amna tong indac indacha kombigoc. Foro worocha tongga yuho noc wömuno toctoc amna moinno sinom itatma nocha uroci kombingmuna nang banagoc. Yesu yu wömai ‘owi amna auho kiap nocdec öngku-bocma angitnung’ yongo togoc. Tuna owi amnaho wo angmuya Yesu kombing tobing imonggahai wömai yu itonggong koing sogiup.  
\v 17 Boinno sinom, itonggong Morömo woi Kopotoroc yu tungugon itac. Nonu yu mangidamon mahong yu wömai iditnoho iditno edengoc. Yuhagon wömai nonu yong moröng imongitnahamon, öngahu o mithu o bongono muno, woi boinno.   
\s1 Timoti yu ‘wömunohon gesö ohoun’ yongo emoc orongi toun  
\p
\v 18 Timoti nakain manana sinom, nocho yong fasun fasun mata ngo gantatma woi Kopotorochon amna auho gocha yong tuctuc mata yogungma worochon toroc ganot. Goc mata woroc sumbentarocanu wömai gocu Duichon emoc ogepma angitgon tongga  
\v 19 kombing tobic tobica kokorengga magapgap yiroc. O gochon iroda Kopotorocho yangamin eran itmuna oweng owengo itun. Amna auho tong bumbum tongo öp siuya irotno Kopotorocho yangamin bet fauna kombing tobic tobicno obukogoc. Top girango gigo koroc öngga obukongidangma worochon toroc.  
\v 20 Amna yai Himeneus orin Aleksander yu ihorocgon togomoroc. Ihoroc tunya nocho ‘yu Kopotoroc wönggon inong saha totimorocha’ yongo dogu kopothon oburodec fohong yugot. Wocin ida mepmo aun feuna irotno ibararun.   
\c 2  
\s1 Dönachon nongoru matano  
\p
\v 1 Oro nocho yapmu moröma ingoroc gantiwa. Goc muyu Duichon suraro kiring imiya yu owi amna ambaracha dönac youp tongo iditnung. Woi dogu kopothon gesöno tohongga ‘Kopotorocho owi amna tongfat yehun’ yongo dönac yarut. O manomano ambaracha ecec inongitnung.  
\v 2 Yu muyu gavmantha orin surarohon dugo ambaracha ‘Kopotoroc yu tongfat yehun’ yongo dönac youp tongitnung. Ihoroc tuya yu non angit ningtoreuya non ambaracho irot gucdec ogep iditnahamon. Tongo non Kopotorochon toroc kiap ogepma tanmanaina ogepma iditnahamon.  
\v 3 Dönac yocyoc kiapmo ihorocnoho wömai Kopotoroc, itonggong koing tun öngung nimoc nimoc amna noni, yuho yangamin angit sinom itac.   
\p
\v 4 Fatmata ogepma woi itonggongon mata boinno itac. Worocha tongga Kopotorocho ‘owi amna ambarac fatmata ogepma kombinung’ yongo itonggong koing imoc imocha kombihac.  
\v 5 Boinno sinom, Kopotoroc yu tunguhogon itac. O yuot guroc amnaot amna bonipma tungugon itacma woi Yesu Duic, amna worocgon.  
\v 6 Yu inoin itonggongno owi amna ambarac dogu kopothon oburodecma wöcwöcha imun fadoc. Bongono wocin wömai Kopotorocho ingoroc nindagoc, yu owi amnani inoha fogit fogitha kombingitac.  
\v 7 Tongo Kopotorocho ‘noc yuhon duc orin aposel itiwa’ yongo soworeng namuna nocho bumbumyi nanonot ongga kombing tobic tobic kiap tungu boinno itacma wo yong fandat inong tongitat. Noc boinno yat, imanang mayot.   
\s1 Amnahon nongoru matano  
\p
\v 8 Oro amnaha wömai nocho ingoroc kombihat. Amna suraro böcsa danong idangma yu muyu oburo tuu fadauna dönac youp tongitnung. Woi irot kombutot tongga nucnoha mataho emoc tongga muno, yu muyu Kopotorocho yangamin kunkun ida dönac youp tongitnung.   
\s1 Owihon nongoru matano  
\p
\v 9 Oro owiha wömai nocu ingoroc kombihat: Owi yu tec tohomumöcno ogepma fohongyu möngitnung. Wohong yui möneng moröma monda tec boru wöngnacno önggöngyi wöc wöcno woi angit maic. O yu önggöngyi tongmuya bigo sakemo imong echon echon tongo goreng wöngnacno önggöngyi orin golho bigodec tongfat itninga.  
\v 10 Wohong owi Duichon ma sogit sogityi yu muyu toroc kiap ogepma tongitnung. Kiap ihorocnoho wömai yuhon tong fatfatno ogepma edengoc.   
\p
\v 11 O ihorocgon owi yu inoha kombiuya ohuna öpgon iditnung. Tongo ‘Kopotorochon mata tuctugo kombina’ yongo kombic kombic youp tongitnung.  
\v 12 Owi auho suraro fatmata ogepma yong silip toctocha wömai nocho ‘muno sinom’ yat. O owi auho amna au moröm tong imontacma wömai angit maec. Muno, owiho öpgon ito amnaho unennegon iditnung.  
\v 13 Wömai yaha, Kopotoroc yu Adam osuc tobingmuna, Iv wömai mit tobigoc.  
\v 14 O ihorocgon dogu kopot yu wömai osuc Iv tonguc yeuna Ivho matano sumboda Kopotorochon nongoru yembodoc. Adampho wömai mit togoc.   
\p
\v 15 Worochoi oro, owi yu kombing tobic tobicno sogit akep tonggai o nucni irot tong fup tong imoc imoc tonggai o yu Kopotorocho yangamin kunkun itmuna inoha kombiuya ohonggongyi idinai wömai woroc, Kopotorocho yu wönggon tong fogiuna managumboc bacbachon uyapdec itonggong koing sogitnahing.   
\c 3  
\s1 Pastohon nongoru mata  
\p
\v 1 Timoti, nocho mata boinno au ingoroc gantiwa: Amna auho pasto youp toctocha kombiantacanu wömai woroc, yuho youp moröma ogepma sinom sogit sogitha yac.  
\v 2 Oro pasto yu suraroho yangamin tong bumbumno muno amna nongnongo sinom edengac. O Pasto yu owino tungugon tong siun. O kombic kombicno wömai orongi itun. O yu godibhon ibibo angitgon angtorengo edengac. O toroc kiapmono ogepgon itun. O kuin wömai yuho ogepgon yangtorengo edengac. O fandat fandat youpno wömai tuctugo tongo edengac.  
\v 3 O yu wain yamuc koböcma nango bumbum yicha. O yu amna obingno ida emoc orin yong osutu tongiticha. O irotno mönengdec ding fingiticha.  
\v 4 O yu muyu inoin feno angitgon yangtorengo edengac. Ihoroc tuna managumbocniho yu anggendingmuya matano sumboto itongitnung.  
\v 5 Wömai yaha, amna auho inoin feno angit mayangtoreicma wömai yu Kopotorochon suraro tingtingno sinom yangtoreangoc? Woi yu angit mayangtoreic.  
\v 6 O amna au öngahemgon irotno ibanda kombing tobic tobicno abe singo itacma yu suraro yangtorec torec youp ticha. Yu youp moröma sogito inoin mano onoce tuicyit. Yu ihoroc tontacmaha wömai Kopotorocho yuhon matano yun bödeuna urago wömuno imangoc. Woi yuho dogu kopot imogocma worochon toroc.  
\v 7 Oro pastohon ma wömai owi amna Duichon surarodec ma sakau ficficyi yuho yangamin ihorocgon ogep itun. Ihoroc maicanu wömai yu tong bumbum au tuna dogu kopotho tonguc yeuna möantac.   
\s1 Duichon surarohon tongfat yecyec amnahon nongoru matano  
\p
\v 8 Oro worochon torocgon wömai suraro tongfat yecyec amna yu owi amnaho yangamin amna ogepma idiya suraroho yu yang gendingitnung. Yu mata nongnongogon yongo mata yaitniu yongitninga. O yu wain yamuc obmugon nongitnung. O ihorocgon yuho amna au tonguc yengo möneng inoha woding tongoninga.  
\v 9 Muno, yuhon irot tong bumbumno muno Kopotorocho yangamin eran itun. Tongo yu kombing tobic tobichon foro moröma Kopotorocho tun öngkung nimogocma wo sogit akep tongo kokorengitnung.  
\v 10 Suraroho osuc yuhon youpnohon toroc kiapmo toroc tong imongo angsiuya ogep inai wömai yuho suraro tongfat yecyec youp kömbaha tongitnahing.   
\p
\v 11 Oro suraro tongfat yecyec amnahon oweni yu ihorocgon owi amnaho yangamin ogepma idiya suraroho yang gendingitnung. Yu mata metec yongitninga. O yu ihorocgon wain yamuc koböc naninga. O youpno manomano nongnongogon tongitnung.   
\p
\v 12 Suraro tongfat yecyec amnaho owi tungutnigon yong fingitnung. Tongo inoin owi wabkarac orin youp manomanono ogepgon yangtorengitnung.  
\v 13 Suraro tongfat yecyec amna auho youpno ogepgon tunai wömai yuho suraroho yangamin ma moröma ogepma sinom sogiangoc. Tuna yu Yesu Duic kombing tobing imongitacmahon foro owi amna orongigon yong fandat inangoc.   
\s1 Fatmata ogepma woi yapmu moröma sinom  
\p
\v 14 Timoti, nocho urop gocot engga gacgacha kombihat mahong nocho osuc yong fasun fasun mata ngo siaya gocot ongontac.  
\v 15 Tuna mepmo auho noc sogiuna noc gocot karupgon maehayai wömai gocu mata ngo embatmina tuctugo kombiantaroc, Kopotorochon fenoho kiapmo yanomahong tanitnung. Kopotorochon feno yu woi itonggong Morömo yuhon owi amna torop. Tongo yu woi mata boinnohon forodongno itmuna fatmata ogepma imongtoc tongitac.  
\v 16 Mayain, kombing tobic tobic nonihon foro woi moröma sinom. Kopotorocho ingoroc nindagoc:  
\li1 Duic yu amna sinom nonot eran öngkuboc. Tuna Kunkun Yaruho ‘yu amna nongnongo itac’ yongo youpno tong koing togoc. Tuna sum yaruho yu agung. Tuna yuhon fatmata ogepma guroc danong fandat tonggongyi itac. Tuna guroc amnaho yu kombing tobing imogung. Tuna Kopotorocho yu inoin yaguno idit sadec yangat tögoc.   
\c 4  
\s1 Amna koböcmaho kombing tobic tobicno imu faangoc  
\p
\v 1 Kunkun Yaruho ingoroc yong tangtang yac: Bongono madango wocin wömai owi amna au yu kombing tobic tobicno imu fauna dogu boyömohon imanang mata tannahing. Dogu wömunoho wömai mata boyömo ihono ihono fandat inuya yu woroc sumbotnahing.  
\v 2 Dogu kopothon imanang mata wömai imanang amna auho duc-decma surarodec ongungoc. Imanang amna worochon kombic kombicno woi dogu kopothon werano sogidocmaha obukong-bödengitac.   
\p
\v 3 Amna ihorocnoho wömai ‘owi amna oimna toninga’ yongo muno inongidang. O ihorocgon yu nacnohon gendic tongo owi amna inongidang, son nacno ihono ihono nongitninga. Wohong Kopotorocho nacno ambarac ‘owi amnaho ecec nanongo naarut’ yongo dongyun öngkubung. Tuna kombing tobic tobic owi amna uyap boinno kombiangma yuho wömai nacno ambarac nongidang.  
\v 4 Non urop kombiamon, manomano ambarac Kopotorocho dongyun öngku-bungma woi ogepmagon. Worocha non wo yanaya yapmu wömuno simbang itninga. Muno, non worocha Kopotoroc ecec inongo nongitnahamon.  
\v 5 Kopotorocho mata yuna manomano ambarac öngkubungmaha orin dönac noniha tongga wömai manomano ambarac Kopotorocho yangamin angit itac.   
\s1 Polho ‘Timoti yu Duichon youp orongi toun’ yongo inong koing togoc  
\p
\v 6 Oro Timoti, goc mata ngo ganotma surarodec oröcai yong fasun imontarocanu wömai gocu Duic Yesuhon youp amna ogepma edengoroc. Ihoroc tongmina gocu kombing tobic tobichon uyap boinnodecgon ongontaroc. Goc osucgon kiap ihorocnogon tanidoroc.  
\v 7 Mata fat boyömo orin bem fatha wömai me imongga onggim sirocha. Wohong ‘Kopotorochon toroc kiap ogepma gakain itonggongadec eran öngkupun’ yongo worochon tong koing toctoc youp tongidiruc.  
\v 8 Godip föp noni tong yungan toctochon youp wömai tongidamon mahong youp ihorocnoho obmukusucgon tongfat nengitac. Wohong itonggong noni Kopotorocho yangamin tong ogep toctochon youp worocho wömai manomano ambaracha ogepma sinom tongfat nengitac. Woi itonggong non önga idamonma worocha tongfat nengitac o ihorocgon itonggong koing mit sogitnahamonma worocha ihorocgon tongfat nengitac.  
\v 9 Mata ngo woi boinno sinom. Worocha owi amna ambaracho mata wo kombingga worochon toroc itongitnung.   
\p
\v 10 Kopotoroc itonggong Morömo, yu owi amna ambarac wömuno-decma öcangyun muuya itonggong koing imoc imocha kombihac. O non kombing tobic tobic owi amna nonu itonggong ogepma wo boinno sinom sogitnahamon. Worocha tongga nonu Kopotorochon youp orongi sinom tongidamon. Tongo non ‘Yesu urop ehantac’ yongo yuha torec ididamon.   
\p
\v 11 Goc muyu mata wo suraro fasun imongo ‘yuho tarut’ yongo kiring imongidiruc.  
\v 12 Goc abe amna berac itaroc mahong amna auho gango kombiuya goc amna orogoma muno yo, ihoroc kombininga. Worocha tongga gakain duc mataya o itonggong kiapa o nucai irot imoc imoc kiapa o kombing tobic tobic kiapa o sacsago idit kiapa woi ambarac ogepmagon suraro tong indaiya yu gang gendingga gakain toroc kiapgon tannahing.  
\v 13 O gocho suraro Kopotorochon mata embat imongo worochon foro inong tangtang tongga o fatmata ogepma yong silip tong imongga idiya naka wömai ehangot.   
\p
\v 14 Oro, surarohon dugoho suran tongo oburo bicadec out tohogungan bongono wocin wömai amna auho gocha yongo Kopotorochon yong tuctuc mata au yuna Kopotorocho fatmata fandat inoc inochon guram gesö gamogoc. Tuna goc guram wo youp imongidiruc. Edet gamicha.  
\v 15 Goc youp wo ambarac gacigon tongidiruc. Goc iroda youpha boging impi. Ihoroc tontarocanu wömai gakain toroc kiap managumboc simbang maic. Muno, amna orogoma simbang entac. Tuna owi amna ambaracho gauya goc amna ogepma sinom edengoroc.  
\v 16 Goc gaka woho, gaka acacho itongoi. Gakain itonggong kiap woi nongnongo itun. O goc kombing tobic tobic nonihon foro suraro yong fasun inongitarocma woi nongnongogon inongidiruc. Goc kiap ihorocno sogito akep toi, imi faicha. Gocho ihoroc tontarocanu wömai gocho owi amna gakain mata sumbodi-dangma yu ogepmagon yangtoreia son ambaracho itonggong koing au feangoc.   
\c 5  
\p
\v 1 Goc amna basi inong fadirocha. Muno, gocho yu yangmina gakain nandöngai simbang idiya mata unimno inongo mepmono tobing imongidiruc. O amna beracma gocho yaiya yu oröcai simbang idiya worochon toroc tong imongidiruc.  
\v 2 O owi basi yu ihorocgon gakain macai simbang yangidiruc. O owi berac yu gakain nadai simbang yangidiruc mahong yang irup uirocha, muno gochon kiapa oweng owengogon itun.   
\s1 Owi kapihon nongoru mata  
\p
\v 3 Oro, owi kapi au inogon sinom, tongfat yecno muno idinai wömai woroc, goc owi ihorocnoma tongfat yengidiruc.  
\v 4 Wohong owi kapi au yuhon weni manani o obigi örani idanganu wömai worochogon macno angtorengitnung. Toroc kiap ihorocno woi kombing tobic tobic nonihon foro sinom itac. Worocha weni manani obigi örani yu muyu inoin feno yangtorecno sinom tongitnung. Ihoroc tontanganu wömai yuho mac nandöng obi öra wöngnac urago ogepma imontang. Toroc kiap ihorocnoho wömai Kopotorocho yangamin ogepma sinom iditac.  
\v 5 Oro owi kapi au tongfat yecno muno uroci sinom entacanu wömai woroc, yu Kopotoroc kombing tobing imongo yuhon tongfat yecnoha torec entac. Kumbonghu o sep bongonodechu bongono muno yu ‘Kopotorocho tongfat nehun’ yongo dönac youp tongo entac.  
\v 6 Wohong owi kapi au godibohon ibibogon tarantacma yu wömai abe wec itacan urop Kopotorocho yangamin omomyi simbang entac.   
\p
\v 7 Oro Timoti, yong fasun fasun mata ngo ganotma gocho owi amnadec yong fasuri. Fasuriya yu toroc kiap ogepma ihorocnogon tuya amna auho yuha kombing moin moin matoning.  
\v 8 Wohong amna au yu inoin mac nandöng o inoin nogot docnoni angit mayangtoreicma yu wömai kombing tobic tobic nonihon toroc matic. Bumbumyi nano yu inoin feno angit yangtorengidang. Worocha wömai yuhon toroc kiapmoho kombing tobic tobic amna ihorocnohon toroc kiapmo anggiraantac.  
\v 9 Oro owi kapi kiap au wömai surarohon ma toropdec sihi, wömai ingoroc: Owi kapi urop basi detdetyi birucno 60hon toroc idangma, o opno tungugon tong sigungma  
\v 10 o suraroho kombiuya yu toroc kiap ogepma tongidang. Noc wömai toroc kiap ogepma ingorocnoha yat: Inoin managumbocni ogepgon yangtorec torec kiap o amna korungonma ehuya oröc tong imongo nacno tong song imoc imoc kiap, o Kopotorochon suraro manomanoha mongorec tong imoc imoc kiap, o owi amna mepmodec idiya tongfat yecyec kiap, o nucni tong ogep tong imoc imocha irotno bogic bogic kiap. Oro, owi kapi ihorocnomaho wömai mano toropdec sakai fihun.   
\p
\v 11 Wohong owi kapi birucno koböc maengma yuhon ma wömai ma toropdec siirocha. Yu abe berac idangmaha tongga wönggon opno yong ficficha irotno fadang uuna Duichon youp imu faantac.  
\v 12 Ihoroc tongo yu osuc ‘Duichon youpgon tona’ yongo yong koing yogungma wo gumaruya turongo yudec entac.  
\v 13 O ihorocgon, owi auhon opno omuna wömai au yu forosingga tong koroc koroc tongmuya böc danong kubing tohongidang. O ihorocgon au yui duc yamuc tongo mata metec yongidang. O auho wömai yapmu au forono makom-bingma worochon mata yong fandadidang.  
\v 14 Worochai oro nocho ingoroc kombihat, owi kapi abe beracbum ididangma yu wönggon opno yong fingo managumboc fogito böcno yangtorengitnung. Ihoroc tuyai wömai ayam noniho Duichon suraroha mata metec yocyocno maic.  
\v 15 Boinno, owi kapi berac au yui urop dogu kopot tantantha ibaru fadoc.   
\p
\v 16 Oro, kombing tobic tobic owi au yuhon fenodec owi kapi au idinai wömai owi worocho yu yangtorehun. Ihoroc tuya wömai suraroho yu angtorec torecha kombiuya mameptic. Tongo suraroho wömai owi kapi tongfat yecno muno uroci sinom idangma yuhong yang-torengitnahing.   
\s1 Suraroho amna dugo angit yangtorengitnung  
\p
\v 17 Oro amna dugo au youpno angitgon tongidangma yu wömai suraroho yang gendingga wöngnacno angitgon imongitnung. O amna dugo fandat fandat youp orin suraro mata yong silip tong imoc imoc youp orongi tongidangma yu wömai suraroho gending imocno sinom tongmuya wöngnacno worochon toroc moröma imongitnung.  
\v 18 Kopotorochon bapiyaho worocha mata ingoroc yac:  
\li1 “Bot bulmakauho gochon youp tunai dugo akep tia nacno möp icha.” \rq (Lo 25:4)\rq*  
\p O mata au ingoroc itac:  
\li1 “Youp amna au wömai youpnohon wöngnacno sogihun.” \rq (Luk 10:7)\rq*   
\p
\v 19 Oro amna auho surarohon dugoha mata metec au yun öngkuuna wömai goc mata worocha onggim siirocha. Worochoi oro amna yaihu anfihu mata wo imongtoc tuyai wömai mata wo koing sontac.  
\v 20 Koing suna amna dugo wo suraroho yangamin eran idina sontho yu tobingitnung. Tuna dugo au idangma kiapmo woroc ango botong-itnahing.   
\s1 Timoti yu inoin toroc kiapmo angsoworengo itun  
\p
\v 21 Timoti, nocho Kopotoroc orin Duic Yesu orin sum yaru yuho yangamin ingoroc kiring gampiwa: Yong fasun fasun mata noc ganongitatma wo nong nongogon sumbodidiruc. O goc oröc banac banac tirocha. Muno goc muyu owi amna ambarac toroc kiap tungugon tong imongidiruc.  
\v 22 O gocho amna au karupgon obura bigodec out tohongo youphon guram sing imirocha. Amna worocho mit youpdec ongmuna turongo tun öngkuuna turongo worocho gocdec icyit. Gocu gakain itonggonga angsoworengo Kopotorocho yangmin sacsago oweng owengo itongidiruc.   
\p
\v 23 Timoti, goc obukoc koböcma tongitaroc. Worocha tongga goc yamuc sumogon nongidirocha. Muno, wain obmugon yamucot mongurac tongo naantarocma wömai worocho modiba tongfat geantac orin obukoc yitno tun bödeangoc.   
\p
\v 24 Oro, amna auhon turongonoho wömai eran ida amna dugo sing imuna mata youpdec osuc ididang. Wohong amna auhon wömuno wömai öp idina menan engtengga mit eran öngkupnahing.  
\v 25 O worochon torocgon wömai toroc kiap ogepma auho eran idang. O toroc kiap ogepma abe öp idangma yu wömai mit eran öngkung-bödenahing.   
\c 6  
\s1 Youp wabkarac nongoru mata  
\p
\v 1 Oro amna ambaracho amna auhon youp wabkarac ididangma yu muyu morömo gending imongo youpno angitgon tongitnung. Ihoroc tuya wömai amna auho Kopotorochon manoha orin yong fasun fasun mata nonu yongidamonma worocha yong samborec mata mayic.  
\v 2 O youp wabkarac auhon morömano yu ihorocgon Duicha kombing tobing imongitacanu wömai youp wabkaracho yu anggendicno sinom tongedengoc. Wömai yaha, yui Duichon madec yan oröc simbang entamorocmaha. Ihoroc tongo yu youpno ogepma sinom tongitnung. Yu ingoroc kombiicha, yu woi oröcnagon worocha noc yuhon mata ogep fodiantat. Muno sinom, yu muyu ‘morömaho youpnahon boinno ogepma sogiun’ yongo irotno tong fup tong imongitnung.  
\p Oro Timoti, goc yong fasun fasun mata nocho ganongitatma worocho wömai suraro inongo ‘ihoroc tarut’ yongo kiring imiruc.   
\s1 Mönenghon nongoru mata  
\p
\v 3 Oro Moröma noni Yesu Duic yu yong fasun fasun mata nongnongogon ninongidoc. Tuna amna auho yuhon matano imun fauna kombing tobic tobic nonihon foro tong gendöng tuna suraro kandöc fasunidang.  
\v 4 Oro amna ihorocno wömai yapmu au tuctugo makombiing. Wohong inoha wömai yui kombingidang non amna orogoma sinom idamon yo. Amna ihorocnoho wömai mataho nucno yanggiraun toctoc orin yong osut taptapha toup kombingidang. Wohong kiap ihorocnoho wömai suraro tun mointongga amnahon irodin toroc kiap ingorocno dongyun öngkungidang: Nucni yanggiraun yanggiraun kiap o mataho emoc toctoc kiap inong moin moin toroc kiap o kombing bunbun kiap ihorocno wömai öngkungidang.  
\v 5 Amna worochon irot kombic kombicno wömai gendöngni sinom. Yui bongono muno yong osutgon tongöang. O Kopotorochon mata boinno wömai yuot maec. Yu kombic kombic ogepmaha docmöang. Yu wömai kombingidang kombing tobic tobic woi möneng au fetfethon uyap.   
\p
\v 6 Boinno sinom, kombing tobic tobichon uyapdecu wömai nonu yapmu orogoma sinom sogitnaya worocho ogepma sinom tongfat neun. Woi irot guc orin irot ogepdec idit kiap.  
\v 7 Mac noniho noni bauya nontho yoctec noni muno gurocdec ngocin öngkubomon. O worochon torocgon non yapmu au fogida guroc ngo maimana faic.  
\v 8 Worochoi oro, nonu nacno orin tec nap noni toroc nonidec itnimangma wömai nonu worocha kombinaya angit edengac.  
\v 9 Owi amna möneng yoctec koböcma fogit fogitha kombingidangma yu wömai dogu kopotho tonguc imontac. Tuna yu toroc kiap bumbumyi o wömuno tongmuya yoctec möneng manomanono ambarac gorong onguya o yu ino obukongbödenahing. Woi gagacho arap fogididangma worochon toroc wömai owi amna ihorocnoho obukocno sinom tonahing.  
\v 10 Irot mönengdec ding fing akep toctoc kiapmo worocho woi manomano wömunohon forono sinom itac. Amna au yu wömai ‘möneng koböcma fogitna’ yongo kombingidang. Ihoroc tongo kombic kombic worocho yu inong wodiuna kombing tobic tobicno imu asan muuna mepmo morö yudec öngkungidang.   
\s1 Polho Timoti youphon foroha fasun imogoc  
\p
\v 11 Timoti, gocu Kopotorochon amna itaroc. Worocha tongga goc manomano wömuno ihorocno me imongo ibari fauna Kopotorochon toroc kiap ogepma fogit akep tongidiruc. Nocho wömai toroc kiap ingorocnoha yat: Kopotorocho yangamin nongnongo idit toroc kiap orin kombing tobic tobic kiap o nucno irot tong fup imoc imoc kiap o youp ogepmaha kiringga karup maimu fatfat toroc kiap o nucno toroc kiap obingno imoc imoc kiap.  
\v 12 Gocu kiap ihorocno tongga kombing tobic tobichon gasungdec domdomgon sinom ongga irot ogeba itonggong koing sogiruc. Wömai yaha, gocho owi amna koböcmaho yangamin gakain kombing tobic tobicahon foro yong taborocan bongono wocin wömai Kopotorocho ‘goc itonggong koing sogihi’ yongo ganong wodigoc.   
\p
\v 13-14 Oro Kopotoroc Itonggong Morömo orin Duic Yesu yuho yangamin wömai nocho ‘ingoroc tongidiruc’ yongo kiring gampiwa: Kopotorocho youp gamogocma wo wömai gocho sogit akep tongo tong kandöc kandöcno muno nongnongogon tongo idiya ongga Moröma noni Duic Yesu yu wönggon ehangoc. Yesu yu ihorocgon koing songga itmuna Pontius Pailatho yangamin fatmata ogepma yong taboc.  
\v 15 Oro Yesu yu wömai Kopotorocho bongono yongo sigocan wocin wönggon ehangoc. Kopotoroc yu tungugon Moröma itac, yu ino tunguhogon manomano yangtorengitac, yu manomano ambaracnohon kingno orin amna moröma ambarac idangmahon amna morömano itac. Yu tunguhagon wömai nonu yong moröng imongidamon.  
\v 16 Yu tunguho wömai iditno itmuna mamic. O yuhon idit sadec yaguno wairurubaracma urang möngga itacan woce wömai amna auho ambehecgon mangic. O amna auho yu acacno wömai maidocmaho maec. Gesö ambarac yuotgon idina nontho yugon ang-gendingga yong moröng imongitnahamon, öngahu o mithu, bongono muno. Woi boinno.   
\s1 Amna möneng koböcma idimangma yuhon nongoru mata  
\p
\v 17 Oro, owi amna önga guroc ngocin itmuya möneng yoctecno koböcma idimangma yu wömai gocho ingoroc inong tobingidiruc: Yu önggöngyi tongga ‘owi amna au yangiratna’ yongo kombininga. Muno sinom, yu muyu Kopotoroc kombing tobing imongitnung, inoin yoctec mönengha muno. Möneng yoctecnoho wömai ambarac bisong ongonahing. Wohong Kopotoroc yu wömai non manomano ambarac angitgon nimongitac. Tuna nonu worocha borongdeditnahamon.  
\v 18 Oro owi amna au yu wömai möneng koböcma idimang. Gocho yu nongoru ingoroc imiruc: Yu mönenggon munohong toroc kiap ogepma woroc wömai ihorocgon koböcma tongitnung. Yu gipmo itninga. Muno yuho manomano koböcma amna uroci silip tong imongitnung.  
\v 19 Yuho ihoroc tuya wömai woroc, yu itonggong mithon manomano orogoma feng suran tonahing. Tuna worocho wömai ogepma sinom tongfat yeuna yu itonggong boinno sogitnahing.   
\s1 Polho Timoti garac mata madango inogoc  
\p
\v 20-21 Timoti, gaka woho, acacho itongoi. Kopotorocho youp gamogocma wo nongnongogon tongidiruc. Tongo mata ihono ihono Kopotorocho irodinma muno, worocha onggim sirocha. Amna auho wömai fatmata ogepma ayam tong imongo mata kandöc yongidang. Tuna auho yuhon mataha onggim singga ingoroc yongidang: Woi kombic kombic moröma au yo. Wohong yu wömai kombing tobic tobicno urop imu fadoc. Tuna gocho amna ihorocnoma me imongo yuot korungon itongidiruc.  
\p Kopotorochon banac banacno gocot itun.