\id 2TI - Karkar-Yuri NT [leu] -Papua New Guinea 1994 (DBL -2017) 
\h 2 Timoti 
\toc1 Polo Timotin Wakmwaek Kumwimp Pas 
\toc2 2 Timoti 
\toc3 2 Ti 
\mt1 Polo Timotin Wakmwaek Kumwimp Pas  
\imt1 Mekia Akwapnámp Kar  
\ip Jisas pok tenánko, 36 yopwar niamp arake fek, Polo Rom mek kalabus mek yakria mámá pas ankwap Timotimpor kumwimpon.  
\ip Polo Rom mekamp Gavmano man farop pap mwanap wae wonae fiknámp mér námp kwamp, wakmwaek kar má pas kumwi námpon. Mao te ‘Amo Jisasomp e érik séria, Kwaromp Kwapwe Kare Karamp kare kar karan sámp-fákeyakamp’rá sér. Tá touwe kwatae, tá man sámpá yampourou mwanap nɨnɨk korop námpao maok, Timotin ‘Kwaro sánknámp térean pwar kwapono, ankár kárákáre fek téreamp’rá sénámpon.  
\c 1  
\p
\v 1 Ono Pol te Krais Jisasomp aposelono. Kwaro námokuráp nɨnɨk fek onan aposel pap námp te, ono koumteouráp aropan, mao mámá yiki yak Krais Jisasén mérnap fárákapan nénk nanamprá séri námp táman séraraeria ninámpon.   
\p
\v 2 Timoti, amo te onomp karwaok napantá, amo te onokump táráp kare niamp naponoria, ono waráp por má pas má kumwi rae. Ono nɨnɨk namp te, Kwar Naropwar ntiaka Krais Jisas nomp Tokwae Karao námokuráp nɨnɨk fek amwan nɨnɨkia aropompia yonkwae porokwe papanoria nae. \x + \xo 1:2 \xt 1 Ti 1:2\x*   
\s1 Kwaromp karan pwarápaeantánámp kar  
\p
\v 3 Onomp tékénou fákárerao wokwaek kar Kwaromp nɨnɨkaok tukupapnámp taknámp, ono kuri mántwaok akwap nampon. Aeria maok, ono nɨnɨk namp te, Kwaro nke námp fek kwatae nɨnɨki namp yak mo námpono. Ono kumuruk yámaraok amwan nɨnɨkriaka Kwarén kar toropwap namp fek, man ‘Aesio’rá sér i konampon. \x + \xo 1:3 \xt Ap 24:16\x*  
\v 4 Amo onan yonkwae touweria ém napantá, onomp nɨnɨk te amwan warko nkea, am fek warákár nae kar nampono.  
\v 5 Amo Kraisén mér kare nap te wokwaek waráp kupwiwaráp Lois, tá waráp éntupwar Yunis maomp mérep niamp kwekár mono, kare kar nap ono wae mér nampono. \x + \xo 1:5 \xt Ap 16:1\x*  
\v 6 Ae namp kwamp maok, amwan warko nɨnɨkampria sér rae. Kwaromp ourour waráp pourouk yak námp, am te ono wokwaek kar waráp me korok yae pap nanko sámpap ourour táman oukoumwan kuri amo am ourour tokwaeanoria tére kárákáre nap te, arop yaomwian fur napo, yurunk tokwae konámpnámp araknámpampo.  
\v 7 Amo te wae mérono, Kwaro nomwan sápámp Spirit te nomwan apáp sáp naenámp Spiritan mono. Mao nomwan sápnámp Spirit te nomp waempén kárákáre nénk námp, tá nomp Kristen ankwapyaenáp fákáreran nouroup kareria, nomoku nomp yakáp fwapia poukeyakáp mwanámp nɨnɨkan ti-sáp námpon. \x + \xo 1:7 \xt Ro 8:15\x*   
\p
\v 8 Aenámpara, amo nomp Tokwae Karamp kar farákáp nap te pwarápae kwapono. Tá amo ono kalabusi yak namp táman kor pwarápae kwapono, mono. Amo ankár Kwaromp kárákáre sámpea onont am Kwapwe Kare Kar farákápnap tére fek onont touwe sámpampo. \x + \xo 1:8 \xt Ro 1:16\x*  
\v 9 Kwaro nomwan wumwiria warko érékép námp te, apae nomo kwapwe kare nɨnɨk nánko, nomwan warko érékép námpanápe. Mao námokuráp nɨnɨk fek nomwan koupoutáráp napria nɨnɨkia nomwan érékép námpon. Wokwaek kar Kwaro má apár oukoumwan yoro moi yakrá, nomwan námokuráp nɨnɨk fek nɨnɨki tarimpan Krais Jisasén érik sámp-kérépámpon. \x + \xo 1:9 \xt Ef 2:8-9; Ta 3:4-5\x*  
\v 10 Aeno oukoumwan mámá ke fek te Krais Jisas nomwan éréképnámp arop wae érik korop námp fek, Kwaromp aropompao kor wae érik korop námpon. Krais Jisas te sumpwiramp kárákáre wae kwe-pwate nánko, maomp Kwapwe Kare Kar koumteouráp arop waria wae yiki yaká yakáp mwanap mér napon. \x + \xo 1:10 \xt Hi 2:14-15\x*   
\p
\v 11 Mao onan ‘Kwapwe Kare Kar farákápamp’ ria séria sámp-kérépeanánko, ono te koumteouráp aropan am kar yénkrá farákáp konamp aropono. \x + \xo 1:11 \xt 1 Ti 2:7\x*  
\v 12 Ae namp kwamp maok, am tére fek táman onan kar wouroump napo kuri, ono pwarápae mo nampon. Ono mérinamp Tokwae Karan saráp wae nɨk nampon. Aeria maok, ono wae mér kare namp te, mao onan sápnámp tére te kwaporok pwar mono, ankár taokeyakrá akwapea Kraisomp Yae Tokwae korop námp fek naenámpon.  
\v 13 Mámá kar kare amo onomp top kor fekamp wawi nap, am te amo fwapi nɨnɨkria, ankár take pourouráp nɨnɨk fek arop fárákapan yénkrá farákápampo. Aeria maok, amo ankár Krais Jisasén mér kárákáreria man warákárria maok, am nɨnɨk fek arop fárákapan kar farákáp nanapono. \x + \xo 1:13 \xt Ta 1:9\x*  
\v 14 Amo má Kwapwe Kare Kar Kwaro amwan taokeyakampria waráp yaek pap námp te, am te kwapwe kare kare ankankara, amo fwapia yérék korampo. Aenapo Yiki Kor Spirit nomp nɨnɨk mek yak námp, mao fwap amwan am tére nap yaewour naenámpon.   
\p
\v 15 Amo te wae mér napon, apár fi Esia mekamp arop ponankor te wae onan pwar, tá Figelus ntia Hermogenes mao kuri wae onan pwar nepono. \x + \xo 1:15 \xt 2 Ti 4:16\x*  
\v 16 Aenapantá maok, ono Kwar Tokwaeran sénanko, mao Onesiforusén aropompria maok, maomp séraroan kor aropompanoria nampon. Kápae kare por Onesiforus te ono kalabus namp te pwarápae mono, onomp nɨnɨk yae-páráki pap saráp yak konámpon.  
\v 17 Mao te Rom taun tokwae mek koropeaka onantá oupourounkrá yárakia wakmwaek onan nke námpon.  
\v 18 Onesiforuso wokwaek Efesus mek onan yaewour saráp yakámp te, amoku am wae mér kare yak napon. Aenámpantá, ono Kwar Tokwaeran sénamp te nánkár mao kot tokwae naenámp Yae fek man aropomp naenámpria nampon.   
\c 2  
\s1 Timoti te ankár Kraisomp kwapwe kare soldia yak naenámp kar  
\p
\v 1 Onomp táráp e, Krais Jisaso amwan námokuráp nɨnɨk fek nɨnɨkia yaewouránko amo maomp kárákáre sámpea yakamp.  
\v 2 Ono wokwaek kápae kare arop wa nap fek farákápanko, amo wawiap kar táman arop fwap yonkwae kouria arop ankwap fárákapan yénkrá farákáp mwanap aropan farákápampo.   
\p
\v 3 Nkwakwe make ankank korop námpo kor yino Jisas Kraisén méria maomp tére konámp, yinont soldia niamp kárákáre fek fokopeyakampo.  
\v 4 Arop soldia yak námp te, mao te ankwap-ankwap tére mo i konámpon. Mao te ankár soldia térean saráp yae-párák kare tére nánko maok, taokeyak konámp soldia kor maomp tére warákár naenámpon.  
\v 5 Arop resisrá foporakor mwaria te, am ‘Foporakorenk’ ria sérinámp aropamp nɨnɨkaok foporakoria am nɨnɨkaok tukup mo napo te, taokeyaknámp aropao sérrá, ‘Amo te ankank sámp mono!’ \x + \xo 2:5 \xt 2 Ti 4:8\x*  
\v 6 Arop yopwar yoroia taokeyak námp te námokurápara, kare nánko toupourria te, manénkɨr námoku fária, wakmwaek arop nénk konámpono. \x + \xo 2:6 \xt 1 Ko 9:7,14\x*  
\v 7 Amo te ono sénamp kar man nɨnɨkampo. Tak napo maok, Tokwae Karao waráp nɨnɨk mek kwapwe kare nɨnɨk fwap sánk nánko, amo am kar fi ponankor mér nanapon.   
\p
\v 8 Ono Kwapwe Kare Kar sér i konamp te, Jisas Krais te Devito yakámp fi mekampao sumpwiaka fárámpámp táman amo ankár fwapia nɨnɨkampo. \x + \xo 2:8 \xt Ro 1:3-4\x*  
\v 9 Ono am Kwapwe Kare Kar farákáp konamp te, am fi fek táman arop fárákapao onan nke napo te, ono kwataenamp arop niamp nanko, onan nkwakwe make touwe sápria, fákapá páte napono. Aenapan maok, Kwaromp kar te fákapea pap mono. \x + \xo 2:9 \xt Fl 1:12-14\x*  
\v 10 Aenámpara, ono te nɨnɨk kárákáre sámp teyakrá maok, nkwakwe make touwe korop námpan kuri, sámpea Kwaro náráponoria nánkárápnámp arop fákáreran yaewour i konampono. Onomp nɨnɨk te, am fárákapao kor ankár am Krais Jisaso fákeyaknámp yiki yak sámpea méntér yakápi-yakápanáponoria nampon. \x + \xo 2:10 \xt Kl 1:24\x*  
\v 11 Nomo te mámá kar man mér kare mwanámpono:  
\q1 “Nomo mént kare kar sumpwianámp te,  
\q1 warko yiki yakan kor nomo mént yiki yakáp mwanámpon. \x + \xo 2:11 \xt 2 Ko 4:11\x*  
\v 12 Nomo nkwakwe make touwe korop námpan kor,  
\q1 ɨnkɨrmaneanria kárákáre fek yakeanámp te,  
\q1 nomo kor mao námpnámp méntér king yakáp mwanámpon.  
\q1 Aeno nomo man younkwe sɨrareanánko te,  
\q1 mao kuri nomwan younkwe mwaek sɨnaenámpon. \x + \xo 2:12 \xt Mt 10:33\x*   
\q1
\v 13 Táte nomo sérrá, ‘Maonámpaok tukup mwar’ ri námpao,  
\q1 ampaok mo námpon kor,  
\q1 mao námoku te námoku sérinámpaok i konámpon.  
\q1 Mao te ankwap kar sér mo i konámp karenono.” \x + \xo 2:13 \xt Nam 23:19; Ro 3:3-4; Ta 1:2\x*   
\s1 Timoti ankár tére kárákáreria Kwaromp tére arop kare yak naenámp kar  
\p
\v 14 Amo te ankár kápae kare por am arop fárákapao wawanáponoria, Kwaro nke námp fek amo má kar man kárákáre fek sérrá, “Yumo te kar am fik sérarrá yorowari kwapono! Take kar te arop ankárankan yaewour mo i konámpon. Am kar wanap aropan te, nɨnɨk kwatae pap konámpon.” \x + \xo 2:14 \xt Ta 3:9\x*   
\p
\v 15 Amo te ankár tae fek tére fáparákapriaka tére arop kare yak napo maok, Kwaro waráp tére nkea warákár naenámpon. Aenánko maok, amo kokwae moria Kwaromp kar kare kar yae-párák kare farákápria maok, amo Kwaro nke námp fek kor pwarápae mo nanapon. \x + \xo 2:15 \xt Ta 2:7-8\x*  
\v 16 Aeno aropao kwaporok táman sérarnap kar te wawi kwapono, younkwe sánkampo. Take kar te Kwarén younkwe sánk mwanap mwae páraok arop éréképá akwap konámpono.  
\v 17 Take kar te ankáráp kwataerao akwapea tokwae karia arop émi fánámp niamp námpono. Himeneus ntiaka Filetus am fi mekampao takipon.  
\v 18 Am arop yawor te má kar kare máte younkwe sɨrarea arakrá sér i konepon, “Nomo wae warko fápárámp námpara, wakmwaek te warko fápárámp mono.” Am makrá sérarep kar te arop ankwap fárákapamp méran épérépia kwatae pap nepon.   
\p
\v 19 Aeno Kwaro am fek sios yoro naenámp kárákáre kor oumpwar te wae yɨmp tenánko, kárákáre fek fokopeyak námpon. Tá am oumpwar fek kar arakrá kumwi, “Kwar Tokwae námokuráp koumteouráp arop te wae mér kari yak námpon.”  
\m Tá ankwap kumwi tenámpao kor sérrá,  
\q1 ‘Námo te Kwaromp firáp aropono’rá  
\q1 sér i konap arop ponankor te  
\q1 nkwakwe make nɨnɨk kwatae te ankár younkwe sɨr mwanapon.” \x + \xo 2:19 \xt Jo 10:14-15\x*   
\p
\v 20 Ankankráp aropamp nap tokwae mek dis tankáp námp te, gol fek yoroiap, silva fek yoroiap, yao fek yoroiap, kwar fek yoroiap, ará tankáp námpon. Am te ankwapmwaek kwapwe kare téreampor, tá ankwapmwaek te nkwakwe make téreampor. \x + \xo 2:20 \xt Ro 9:21\x*  
\v 21 Kwarén mérnámp aropao am náráp nɨnɨk mekamp kwatae nɨnɨk ponankor younkwe sɨnámp te, Kwaro nke námp fek yiki kare yak námp te, mao te ankank yae-párák námp mwar kák konap dis niampria, amwar kar yak námpon. Aeria Arop Tokwaeran yaewourrá nkwakwe make kwapwe kare tére naeria nanap námpon.   
\p
\v 22 Aenámpara, amo te ménki-tárápuamp nɨnɨk mek korop konámp nkwakwe make kɨkiank nɨnɨk te ankár younkwe mwaek pwarampo. Amo te ankár yae-párák kare nɨnɨk ntiaka mér napan sámp, ankwapan nouroup i konap nɨnɨkan sámp, yonkwae porokwe nɨnɨkan sámpea maok, arop ankwap fárákap yiki kare nɨnɨk fek yakáprá Kwar Tokwaeran wumwi ri konap aropént saráp yakamp.  
\v 23 Aeno épépérépnámp arop fárákapamp kar mwar sérarnap kar kwatae te amo ankár younkwe sɨrampo. Amo te wae mér napon, am takrá sérarap kar te am fek yorowar i konapon.  
\v 24 Tokwae Karamp tére konámp arop te kar yorowar mo, arop ponankor porokwe fekria yonkwae kourráp tisa te man nkwakwe make napo kor yonkwae pwarámp mo i konámpon. \x + \xo 2:24 \xt 1 Ti 3:3\x*  
\v 25 Aeria maok, maomp kar ták-pwarnap aropamp nɨnɨk porokwe fek fwapokwap nánko maok, am támao Kwaro am fákáreran yaewouránko maok, am nɨnɨk pwararea má kar má fwap mér mwanapon.  
\v 26 Am kwekár i konap tisa fárákapan Satano náráp umben mek tirá kérépámp te, am fárákap náráp nɨnɨkaok paokop mwanapria nimpon. Aeno má kar kare man mér napo te, am fárákapamp nɨnɨk warko érik farákár nánko maok, Satanomp umben pwarará amwar yakáp mwanapono.   
\c 3  
\s1 Pwar naenámp yae fek mwanap kar  
\p
\v 1 Aeno amo ankár yae fápae nánko te kápae kare touwe kwatae kare korop naeria námponorá mérampo. \x + \xo 3:1 \xt 1 Ti 4:1\x*  
\v 2 Am te arop fárákapao námoku saráp warákár, tá manian kɨkiank kare mwarea napon. Arop fárákapao námoku támao warákár sérarrá, tá nomoku saráp kwapwe kare námponoria wae, tá ankwapan wouroump-sér mwarea napon. Tá éntupwar naropwaromp karan kor kwe-sɨr, tá arop fárákapao námwan yaewour kwapwe napo, am fárákapan ‘Aesio’rá sér mo mwarea napon. Kwaromp kwapwe kare nɨnɨkan kor wouroumprá amomoránk mwarea napon. \x + \xo 3:2 \xt Ro 1:29-31\x*  
\v 3 Námokuráp firan kor aropomp mo. Wokwaekamp ankankan nɨki sayakrá yorowar. Aeriaka e-poup sérarrá paokopria maok, námokuráp kɨkiank i konap nɨnɨkao tokwae kari yak nánko maok, námokuráp pourou fwapia poukeyak mo mwarea konapon. Ankár yonkwae pwarámpria aropomp nɨnɨk kánanke te yak mo kareria, kwapwe kare nɨnɨkan kor mént wouroump mwanapon.  
\v 4 Aeria maok, námokuráp firan kor ankwapan outɨri mwanapon, tá námokunap nɨnɨk kápae kare kwataeran ti-paokopria maok, námoku támao nɨnɨkrá, ‘Yino te Arop Tokwaeno’rá warákár-séria, námokuráp pouroukamp nkwakwe make nɨnɨk táman warákáránkrá paokopria maok, warko Kwarén warákár mwarea napon.  
\v 5 Aeria maok, Kwaromp nɨnɨkaok tukup nap te némpi párák pourouan sarápria maok, Kwaromp kárákáreran méria kare karonorá nɨnɨk mo. Amo taknap aropént yak kwapon. \x + \xo 3:5 \xt Mt 7:15,21; Ta 1:16\x*   
\p
\v 6 Am taknap tisa fákáre te sánánkar porokwe fek tukupea, nɨnɨk fwapi kárákáre moria, náráp wokwaekamp kwatae nɨnɨkan nɨnɨk tokwae, tá náráp nɨnɨk mek nkwakwe make kɨkiank nɨnɨk koropánknámp koumteouramp nap mek tukupea, am fárákapan kar porokwerá sér i konapon.  
\v 7 Am taknap koumteou yonkwae kour kwapwe ankár sámp mwaria napao maok, am kar mér mwanap pourou mo.  
\v 8 Wokwaek Janes ntiaka Jambres Mosesén yorowarrá yárakipnámp taknámp am arop fákáreao kor má kar kare man kor yorowarrá paokop napon. Am fárákapamp kar yurukup mwanap nɨnɨk te kwatae akwap tenánko, maomp Kwarén mér napao kuri kwekár napon.  
\v 9 Wokwaek kar Janes ntiaka Jambres arop nkeap fek takrá nɨnɨkrá yárakriaka tokwaeri ke fek yak moipon. Aempnámp taknámp am tak nap nɨnɨk te arop ponankor nke nap fek érik korop naenámpon. \x + \xo 3:9 \xt Kis 7:11-13\x*   
\s1 Timoti ankár Kwaromp kar kárákáre fek samp naenámp kar  
\p
\v 10 Aeno amo te wokwaek ono amwan warámpea yárakria aropan kar yénkrá farákáp konamp te am nɨnɨk wae mér napon. Aeria maok, onomp yárak, tá am fi kor nɨnɨk te amo wae mér napon. Ono Kwarén mér kárákáre namp, tá nkwakwe make kar korop námpan kor sánánkar nɨnɨk kárákáre sámpea akwap namp, tá arop nouroup namp, tá kárákáre fek fokopeyakria tére pwar mo namp, am te amo wae mér napono.  
\v 11 Antiok, Aikonium, Listra taun mekamp arop fárákapao onan sámpá yampourou napo, ono nkwakwe make touwe tokwae kwatae sámp namp te amo wae mér napon. Aenampan maok, Kwaro onan yaewour nánko, am kápae kare touwe kwatae korop námpan kor, fwap yakampon. \x + \xo 3:11 \xt Ap 13:50; 14:5,19-20\x*  
\v 12 Karenono, arop ponankor Krais Jisasént yakáprá Kwaromp nɨnɨkaok paokopnap aropan te, Kwarén mér monap aropao nkwakwe make sokoro i konapon. \x + \xo 3:12 \xt Jo 15:20\x*  
\v 13 Aeria maok, kwatae nɨnɨkráp arop, tá kwekár profet fákáre, makia koumteouráp aropan poupwekáp mwarea napon. Satano kor am fárákapan kwekáránko maok, am fárákapamp nɨnɨkao kor kwatae kare naeria námpon.   
\p
\v 14 Aeno amo wokwaek wawia mérinap kar máte kárákáre fek sámpea yárakampo. Tá koumteouráp arop yino am kar yénkrá farákápámp te, amo waeman mér kare napon. \x + \xo 3:14 \xt 2 Ti 2:2\x*  
\v 15 Manénkɨr amo oukoumwan épérmou táráp yakap feknámpia Kwaromp yiki kor Buk fekamp kar mér sámpap te, amo wae mér napon. Am buk te amwan fwap nɨnɨk kwapwe sánk nánko, amo Krais Jisasén méria napo, Kwaro amwan warko warámp naenámpon.  
\v 16 Kwaromp Buk fekamp kar ponankor te Kwaromp Spiritao nɨnɨk sánk nánko kumwi napon. Am kar te nomwan yae-párák kare nɨnɨk yénkrá farákáp naenámp kwapwe karono. Tá koumteouráp aropamp nɨnɨk kwataenámp érik yénkria, nomp paokop fwapokwap i konámpono. \x + \xo 3:16 \xt 2 Pi 1:21\x*  
\v 17 Aenámpara, am kar támao Kwaromp koumteouráp arop nomwan yaewourianánko, nomo ponankor kwapwe kare nɨnɨk pwi nánko, nomo fwap nkwakwe make kwapwe kare tére ponankor tére mwanámp nánap mwanámpon.   
\c 4  
\s1 Timoti ankár kárákáre fek Kwaromp kar farákáp naenámp kar  
\p
\v 1 Krais Jisas te yiki yakápnap aropan ponankor yurukupria, sumpwinap aropan kor mént yurukup naenámpon. Mao te arop ponankor nke nap fek érik koropeaka king yaká yak naenámpon. Ono amwan Kwar ntiaka Krais Jisaso nkenep fek amwan kar kárákáre fek arakrá sér rae: \x + \xo 4:1 \xt Ap 10:42; Ro 14:9-10\x*  
\v 2 Amo ankár kárákáre fek Kwaromp kar farákápampo! Arop am kar wa napan, tá wa mo napan kuri, amo te ankár kárákáre fek am kar farákáp saráp yakampo. Amo te ankár méranáponoria kárákáre kor kare kar farákápria yoporria, yumo fwap tak mwanaponorá warákár sánkampo. Amo kokwae moiaka, porokwe fek kánámpár am fárákapan yénkrá farákápampo. \x + \xo 4:2 \xt Ap 20:20,31\x*  
\v 3 Nánkár wakmwaek arop Kwaromp yae-párák kare kar te warko wa mo mwarea napon. Am fárákap ankwap-ankwap kar wa mwar kar napan wa mwaria, am kar farákáp mwanap aropan wumwi mwarea napon. \x + \xo 4:3 \xt 1 Ti 4:1\x*  
\v 4 Aeria maok, má kar kare pwarará maok, nkwakwe make kwaporok kar mwar sérarap kar táman woupwi pátea wawia mántwaok tukup mwarea napon.  
\v 5 Aeno amoku kare te ankár kápae kare por nɨnɨk kouri yakrá maok, nkwakwe make touwe korop námpon kor kárákáre fek fokopeyakria maok, amo Kwaromp Kwapwe Kare Kar táman téreria koumteouráp aropan farákápamp. Amo te koumteouráp aropan yaewour nanap tére yak námpara, amo ankár am táman fwapia téreamp.   
\s1 Pol wae sumpwi naenámp wonae fik nánko sénámp kar  
\p
\v 6 Aeno oukoumwan te ono sumpwi nanko, onomp yɨri Kwarén ofan sánk mwaria wain ént kwarákár konapnámp kwarákár naenámp te wae wonae fikeane.  
\v 7 Ono yorowarrá akwapea kwe-sɨra nampon. Ono te wokwaek resis kwapwe fárakoprá yáraki namp te, oukoumwan te ono te wae akwapea wonae fik yarápae fek yak nampon. Ae namp te, ono Kwarén mér namp kárákáre fek sámpá yáraki nampon.  
\v 8 Oukoumwan te am fárakoprá akwapea pwar namp fek sámp nanamp ankank te wae nánapia tank námpon. Am sámp nanamp ankank te ará: Tokwae Karao yae-párák kare yurukup konámpara, onan ‘Yae-párák kare aropono’rá sénaenámpon. Am Yae Tokwae fek te onan makrá sénaenámpon. Aeria maok, onan saráp sér mono, arop ankwap fárákap mao érik korop nánko nke mwar karrá yépékrá yakápnap arop fárákap man kor sénaenámpon. \x + \xo 4:8 \xt Yé 2:10\x*   
\s1 Kar pwarnámp kar kánanke  
\p
\v 9 Amo te ononampok koupour koropampo.  
\v 10 Demas te onan pwar akwap teane. Mao te apárokamp nɨnɨkan warákárria taun Tesalonika mek akwap teane. Kresenso kor provins Galesia mek akwap, tá Taituso kor distrik Dalmesia mek akwap námpon. Luk mwar yino yak nempon.  
\v 11 Amo Mak warámpea koropampo. Mao te ono tére nanko yaewour kwapwe konámp aropono. \x + \xo 4:11 \xt Ap 15:37-39\x*  
\v 12 Ono Tikikusén taun Efesus mek sámp-kérép nampon. \x + \xo 4:12 \xt Ef 6:21-22\x*   
\p
\v 13 Amo korop naeria te onomp waempyam taun Troas mek Karpusomp nap mek pátari namp, ará sámpea maok, tá buk mént sámpea koropampo. Aeria maok, onomp fɨr yɨpi fek yoroiap buk nɨk mo pwar korop nanape. Ankár sámpea koropampo. \x + \xo 4:13 \xt Ap 20:6\x*   
\p
\v 14 Aleksander te bras fek nkwakwe make ankank yoro i konámp arop, mao te onan ouroukup konámpara, nánkárap Tokwae Karao am taki námp fek nopok man touwe sánk naenámpon. \x + \xo 4:14 \xt Ro 2:6; 1 Ti 1:20\x*  
\v 15 Amo kor am aropan fwapia mérampo. Mao te yinomp karan kor ankár kwekápia sɨra námpon.   
\p
\v 16 Ono woukourouk kot nap fek te arop ankwapao onont yakria yaewour mo napo maok, arop ponankor onan pwate napo, onoku mwar yak. Aeria ono Kwarén sérrá, ‘Am fárákapao tak nap nɨnɨk te nɨk mo pwarampo.”  
\v 17 Aeno Tokwae Karao onont yakria onan yaewouria kárákáre sáp námpon. Aenánko maok, ono Kwapwe Kare Kar fwap farákáp nanko, ankwap fi ponankor wa napono. As fɨr yamp nánko, as táp mekamp akap konapnámp taknámp, Kwaro onan yopor aropamp yae kwae mekamp pwarokwap námpono. \x + \xo 4:17 \xt Ap 23:11; 27:23\x*  
\v 18 Kwar Tokwaerao onan sokoro napo kuri, fwap yaewourria onan warámpea, námoku poukwapnámp yámar mek pwar naenámpon. Nomo maomp eran sámpeaka sakap saráp yaká yakáp mwanámpon.   
\s1 Kar pwarará ‘Gude’rá sénámp kar  
\p
\v 19 Amo Prisila ntiaka Akwila, tá Onesiforusomp séraroan kor mént ‘Yumwan Polo Guderian’rá sérampo. \x + \xo 4:19 \xt Ap 18:2-3\x*  
\v 20 Erastus te oukoumwan taun Korin mek yak nánko, Trofimus kor touwe nánko, man taun Miletus mek yak nánko pwara nampon. \x + \xo 4:20 \xt Ap 19:22\x*  
\v 21 Amo te koupour mwae oupourounkia koropampo. Takria amo yépék napo, ouwi tokwaenámp ke koropantáno.  
\p Yubulus, Pudens, Linus, Klodia, tá Kristen ankwapyae fákáre makia amwan ‘Gude’rá sénap kar sámp-kérép napono.   
\p
\v 22 Ono nɨnɨk namp te, Tokwae Karao waráp waempént yakanoria nampon. Tá yumwan ponankor námokuráp nɨnɨk fek nɨnɨkia yaewouranoria nampon.