\id 2TI  2 Timothy NT Yawu - Foreman 15/7/95 
\h 2 TIMOTI 
\toc1 Pol ere Timoti erne yuri sene basem siglou 
\toc2 2 Timoti 
\toc3 2 Timoti 
\mt1 2 TIMOTI  
\mt2 Pol ere Timoti erne yuri sene basem siglou.  
\is1 Kiyi late tuma.  
\ip Gwote siglou Pol ere Timoti erne bas rasen newopitim. Pol ere Timoti erne siglou peske bas rasem. Gwote siglou e yurik bas rasem siglou. Pol ere Romke tetan ake yaperke temenem. Rom tame eme erne pen sate nenem, eke ere gwote siglou bas rasem. Timoti ere Efesus komke temenem, ere Kristen lakerebe yaku etek kerebetem.  
\ip Pol ere Timoti eteri apeikap. Pol ere Timoti erne God eteri tuma wusowum, ere meten Kristen tem, eke Pol ere Timoti erne yenkap wobetem.  
\is1 Pol ere Timoti erne bas rasem tuma gwo.  
\ip Sapta 1—4. Timoti ere kip yaku eisau keren yin ere God eteri yaku kere tame seken ek tete.  
\c 1  
\p
\v 1-2 Timoti, an Pol, an nene gwote siglou bas rasbe. Ne ari yen. Ne ari selpapri yenkap. God ere wom, an Krais Jisas eteri aposel tame tem. God ere tuma kiyi namderasen etep wom. Krais Jisas erne kenawaike abote tatame eme noub som temente. E kiyi namderasem tuma an wusoute, eke ere ane etep won yim.  
\p Timoti, Apei Godken Krais Jisasken epe nene pap yewon noub nenen ne pap yenbo temente.   
\s1 Nema God eteri tuma yenbo wusoute, nema sebera mane yate.  
\p
\v 3 Areri yeiwarege eme pap yenbo ten God eri tuma meten eri yaku noub nenbetemkap, an etepwou kir nenbe. Etep tebe, areri selpap an abobe, an wule yenbo nenbe. Kwokwos kwokwos, neirken yabelken, an God erken namdebe, an nene abon God erne nerene pir wobe, erne wolabe, ere nene noub nenbetete.  
\v 4 Neren keramkap, an etep sene abobe, eke an nene som abobe, an nene sene late abobe. An nene sene late, an metekwaste.  
\v 5 Neren kenawaike abobe wule an etepwou abobe. Etepkap wule neri owi Loisken neri nawo Yunisken epe noub etep sebetem. Neren kir ne etepkap kenawaike abobe wule kir noub sebe, an etep abobe.  
\v 6 Eke, an neri selpap tagwobe. Kiyi an nene let tarek kerem, God ere nene mure wuri newom. Tame eme ker lisin ker ere eiyin wayen eisau tebekap, neren petem mure ne God eteri yaku yenbo kerete, ete mure ere sene eisau tete.  
\v 7 Ne metten. God ere nemne be wos be wos akbe wule beke newo. Berai. Ere nemne mure petbe wule newom. Ere nemne tatame emne pap yewon noub nenbe wule newom. Ere nemne selpap yaper kuyese mo wobe wule newom.   
\p
\v 8 Epkap ne neremri Aneyen eteri tuma wusoute, ne sebera mane yate. An Aneyen eteri yaku kerebe tame, eke eme ane ake yaperke won wurin tetan. Aren tetankap, ne mane sebera yate. An God eteri yaku keren mus metbekap, ne God eteri mure peten eteri tuma yenbo wusowun mus kir mette.  
\v 9 God ere nemne wopetem, nema eteri tatame tem. Nerem kerebetem yaku yenbok ere nemne sene beke wopet. Berai. Eter, ere eteri selpapke ere nemne kobo lan, sene petem. Kiyisapewai ere nowsel mak seikmenem, ere nemne abon Krais Jisas eterke nemne pette wom.  
\v 10 Sene God eteri pap yewobe wule ere genik tem. Neremne Kobo Labe Tame, Krais Jisas, ere more tame tem. Ere tame sabe wule teitkwunem. Ere God eteri tuma yenbo nemne wusoubetem. Eke nema metem, tatame eme erne kenawaike abobe, eme sene beke sa, eme noub som temente.  
\v 11 Ete tuma yenbo God ere ane wusoute wom. Eke, an aposel tame tem, an eteri tuma wusou tame tem.  
\v 12 Eke an gwopkap mus metbe. An pap yaper beke te. Berai. Aren kenawaike abobe tame erne an metten. Ere areri selpap, areri wou, areri yaku noub lakeren yin ere sene ek yate nenbe.   
\p
\v 13 An nene wusoubetem tuma seken, ne noub tobobetete. An nene wusoubetemkap, ne tatame emne etep kir wusoubetete. Nema Krais Jisas eterken tetan tatame. Eterken tetan tatame eme kenawaike abobe wuleken pap yewobe wuleken seten. Ne ete wule noub me tobote.  
\v 14 God ere eri tuma yenbo newon, ne noub lakerete. God Eteri Wou ere neremri selpapke tetan. Eter ere nene kobo late, eteri murek ne ete wos noub lakerete.   
\p
\v 15 Ne metem, Esia provinsri tame nogwape eme ane magel tayen ane mesginin yim. Tame pes epe Figelusken Hermogenesken epe etep kir ane mesginin yim.   
\p
\v 16 Onesiforus ere etep beke nen. Berai. Tewo nogwape ere ane yan labetem, an pap yenbo metbetem. Etep nenbetem, an Aneyen erne wometbe, ere erne eteri yentaken emne pap yewote. An ake yaperke tetan, ere ane yan late beke ak, sebera beke ya.  
\v 17 Berai. Ere Rom komke yam yabelke ere ane sopen yin ane ek lam.  
\v 18 Ne metem. Kiyi an Efesus komke temenem, ere ane kobo labetem. An abobe, Aneyen ere sene yate yabel ere erne pap yewon noub nente nenbe.   
\c 2  
\s1 Timoti ere Krais Jisas eteri ei nai tame yenbo tete.  
\p
\v 1 Timoti, areri yen, Krais Jisas ere nene pap yewobe, ne mure petbe. Ne ete murek muresen tette.  
\v 2 An nene tuma wusoubetem, an tatame nogwape etemri bitimik wusoubetem. Ete tuma ne akeite tame yenbo emne wusoute. Ete tame eme tatame emne kuyese sene wusoute tame etemne ne wusoute.   
\p
\v 3 Ne Krais Jisas eteri ei nai tame yenbo tete. Nema eteri yaku keren mus metbekap, ne mus kir mette, ne mane akte.  
\v 4 Ei nai tame eme komri wos o kel pet yaku beke abon kere. Berai. Eme etemri taresi ei nai tame eteri tumawou meten tobobe. Eme abobe, emri taresi tame ere emne metekwaste, eke eteri tumawou eme meten tobobe.  
\v 5 Tame ere resis amete, eme resis amebe wulek noub tobote. Ere noub beke kip tobo, ere tokwo beke kip pet.  
\v 6 Tame eme now yaku eisau kerete, ete tame etem, eme nowri awos kiyi petbe. Ete wule yenbo.  
\v 7 Ari woye tuma ne noub abote. Aneyen Jisas ere nene kobo late, ne ete tuma somo noub kuyese mette.   
\p
\v 8 Ne Jisas Krais erne abote. Ere Devit eteri tame supa. Ere sam, ere wou sene peten wayen yim. Ete tuma yenbo an wusoube.  
\v 9 Ete tuma yenbo an wusoube, eke an mus metbe. Eme ane ake yaperke won wurim, eme tame yaper peikbekap, eme ane etepke kepke peikten. Eme ane kepke peikbekap, eme God eri tuma yenbo kepke mapeke kip peik?  
\v 10 Eke an mus eisau metbe, an beke abo. God eter kenem tatame an etemwoune abobe. Eme God eteri tuma yenbo worwor mette. Sene Krais Jisas ere emne sene peten eme noubwai som temente. An etep abobe, eke an metbe mus an me taskwurbe.   
\p
\v 11 Gwotek wobe tuma e seken. Nema worwor mette.  
\q1 Nema Jisas eterken sam, yuri nema eterken noub som temente nenbe.   
\q1
\v 12 Nema metbe mus me taskwurte, etepkap yuri nema Jisas eterken kom panen site.  
\q1 Nema erne magel taite, eter kir ere nemne magel awosein taite.   
\q1
\v 13 Nema erne beke kip abo, ere nemne som abote. Nema eteri yen, eke ere nemne som abote.   
\s1 Timoti ere yaku noub kerete, ere God eteri yaku kerebe tame seken tete.  
\p
\v 14 Ete wos kwokwos kwokwos ne Kristen taken tameken emne selpap tagwote. God eteri bitimik ne emne noub etep wote. Kem tuma mane walekap naite. E wule yenbo berai. Walekap naibe tuma metbe taken tameken eme etep mette, emri selpap yaper tete nenbe.   
\p
\v 15 Neri kerebe yaku God ere metekwaste, ne etep abote. Etep abote, ne tuma wusou yaku muresen kerebet. God eteri tuma seken ne noub wusoute. Etep tete, God ere nene metekwaste, ne sebera beke kip ya.  
\v 16 Metye. Ne pap auk tuma mane namdete. Etepkap tuma e wule yaper nenbe tuma. Taken tameken eme ete tuma namdete, eme God erne mesginte.  
\v 17 Emri etepkap namdebe tuma e ker eiyin eisau tebekap, etepke tebe. Etepkap namdebe tame etemri tame pes epe Himeneusken Filetusken.  
\v 18 Epe God eteri tuma seken mesginin etep wobe. Nema kiyi san wou sene petem. Sene nema wou beke kip pet. Etep wobe, eme kau Kristen emri kenawaike abobe wule yaper nenbe.   
\p
\v 19 Metye. God eri noub yeworuwum kwat ere som kwaite. Ete kwat, ere gwote tuma etek bas rasten. Aneyen ere eteri tatame emne noub metten. Gwote tuma e kir etek bas rasten. Taken tameken eme etep wobe. An Aneyen eteri. Etep wobe taken tameken eme wule yaper mesginte. Etep bas rasten.   
\p
\v 20 Be wos be wosken tatame eme ake eisauke temenbe, eme akeite akeite ouken wareken tetan. Kau eme golke rasem ou, kau eme silvak rasem ou. Etepkap ou eme ou yenbo, mikken. Ete ou maime ere mwa kwunbe yabelke ere ete ou peten ek nenbe. Akeite ou eme meke nenbe, kau eme ou selke rasbe. Ete ou tatame eme peten kwokwos kwokwos a etek abe.  
\v 21 Taken tameken eme yaper nenbe wos mesginin eme wule yenbowou nente, eme ou yenbokap. Eme yaku yenbo eisau kuyese kerete. Etemri Aneyen ere emne wote, eme metke rake, be yaku yenbo kerete. Keryen God eri yaku yenbo eme kuyese kerete.   
\p
\v 22 Tametobo tame emri pap wayebe wos yaperkap, ne etep late, ne pap mane wayete. Etepkap tame ne emne mesginin amekwunte. Ne yaku eisau keren wule yenbowou tobobet. Ne God erne kenawaike abon yaku yenbo kerebet. Ne akeite tatame emne pap yewote. Ne tatame etemken noub site. Aneyen erne kenawaike abon eterken tuma namdebe tatame etemken ne etep ari woye tuma yaku eisau keren tobobet.  
\v 23 Eikse akse tame emri namdebe tuma ne mane mette. Eme etepkap tuma namden yibe, sene eme walekap naibe.  
\v 24 Aneyen Jisas eteri yaku kerebe tatame, eme tatame emken walekap mane naite. Eme tatame nogwape emne noub elen me eyarbetete, God eteri tuma emne wusoubetete. Taken tameken eme emne tuma yaper wote, eme emne mane awosein wote.  
\v 25 God eteri yaku kerebe tame eme God eri tuma magel taibe tatame emne God eri tuma noub elen me wusoute. Etep tete, ere abote, God erne magel taibe tatame emne God ere kobo lan eme selpap yaper mesginin tuma seken worwor mette.  
\v 26 Etep tete, eme selpap yenbo sene pette, eme Satan erne mesginin amen yite. Kiyi Satan ere emne keresukun eme eteri kulke temenem.   
\c 3  
\s1 Jisas ere sene yate yabel tatame eme wule yaper kenake nente nenbe.  
\p
\v 1 Ne gwote tuma abote. Jisas eri yate yabel mekin mekinte nenbe, wos nogwape yaper eme ek tete nenbe.  
\v 2 Ete yabel tete, taken tameken nogwape emri tete nenbekap gwo. Eme etemri maime wusomwou abote nenbe, eme tatame emne beke kip abote. Eme kelwou pete abote nenbe. Eme emri sig maime kworere eisau won wan gwolete nenbe. Eme tatame emne workwoyeken reste nenbe. Eme anenawo emri tuma naswoite nenbe. Eme pir beke kip wo. Eme wule yenbo beke kip tobo, eme wule yaperwou nente nenbe.  
\v 3 Eme tatame emne kobo beke kip la. Eme bebe tuma o ei tuma eme beke kip geruwun eyar. Eme kerebe tuma kenake som wobetete nenbe. Eme emri selpap yaper nente nenbe. Eme tatame emne paku yaper pete nenbe. Wule yenbo eme mo wote nenbe.  
\v 4 Eme tamenowu emne yena ten emne peiktame etemri letke raste nenbe. Be wos eme nente, eme beke kip noub abon ek nen, eme bepou me nente nenbe. Eme etep wote. Neremwou nema apeilake tame. Eme God erne beke kip metekwas, eme gwote selri wulewou metekwaste nenbe.  
\v 5 Eme Kristen wule bepou me sete, eme Kristen wule eri mure erne magel taite nenbe. Etepkap tame ne emne lan ganwouke amekwunte.   
\p
\v 6 Etepkap tame kau eme selpap yaper tetan ta emri akek elen me wurin emne tuma yikwokwobe. Ete ta eme wule yenbo me belen be wos be wos yaper kenake nente abobe.  
\v 7 Etepkap ta eme porere pette won seilawoibe, eme tuma seken kenake mapeke met?  
\v 8 Kiyi Janesken Jambresken epe Moses eteri peiktame temenemkap, ete tuma yikwokwobe tame eme tuma sekenri peiktamekap tetan. Emri selpap e yaper. Eme sabe wule kenawaike abobe, ete wule seken berai.  
\v 9 Emri nenbekap ere oksubu yite nenbe. Janesken Jambresken epri wule yaper ere kom genik temkap, emri nenbe wule yaper ere kir kom genik tete nenbe.   
\s1 Timoti ere God eteri wule noub sete.  
\p
\v 10 Neren, ne arenken temenem, an God eri tuma wusoubekap, aren nenbetemkap, areri selpap ne etep metten. An God erne kenawaike abobe. An tatame emne pap beke waye, an emne pap yewobe. An God eri yaku eisau som kerebe, an beke mesgin. Ne etep metten.  
\v 11 Akeite tame eme ane yaper nenbekap, an mus metbekap, ne etep metten. Ne metem, Antiok tame, Aikoniam komri tame, Listra komri tame, eme ane yaper nenbetem. Yaper nenbetem, Aneyen eter ere ane sene petem, an yenbo tem.  
\v 12 Ye. Tatame eme Krais Jisas erken belandeten, God eteri wule sete abote, tatame eme emne yaper nente nenbe.  
\v 13 Tame yaperken yikwokwo tuma wusoube tameken eme etep yaper som nenen yin eme wule yaper nogwapewai sene nente nenbe. Eme tatame emne som tuma yikwokwote, tatame eme etemne awosein tuma yikwokwote.  
\v 14 Neren, nene God eteri tuma wusoubetem tame ne etemne noub metten. Eke eme nene wusoubetem tuma seken ne etep kenawaike som abobet. Ne kenawaike abobe tuma seken, ne etep kenawaike som abon tobote.  
\v 15 Ne nebule yen temenem, ne God eteri siglouri tuma yenbo noub metbetem. Ete tuma ere nene porere kuyese newote, ne Krais Jisas eterne kenawaike abon ere nene sene pette.  
\v 16 Kiyi God eter womke, tame eme eri wom tuma akei siglouke basem. Etep tem, ete tuma e yenbo, e nemne selpap porere seken newobe. Nema wule yaper nente, God eteri tuma e nemne wotaken nemne kelu yenboken wule yenboken peterabe.  
\v 17 Etepkap tebe, God eteri tatame eme mure peten nogwape metke rake yaku yenbo kuyese kerebe.   
\c 4  
\s1 Timoti ere God eteri tuma noub wusoute.  
\p
\v 1 Jisas Krais ere kelpe temente tatameken sam tatameken emne akei noub sin lan seigte nenbe. Ere genik tete nenbe, ere kom panen site nenbe. Eke Godken Jisasken etepri bitimik an nene tuma wuri noub etep wobe.  
\v 2 Ne God eteri tuma yenbo som wusoubetete. Eike eme neri tuma mette mo wote, ne mane abote. Ne noub som wusoubetete. Ne emri selpap ragerkwunte, eme worwor mette. Ne emne won eme emri wule yaper mesgintek, eme wos yenbowou nente. Ne etemne porere yenbo newote, ne emne pap mane wayete. Kwokwos kwokwos ne emne tuma noub wusoubetete.  
\v 3 Metye. Yuri tatame nogwape eme tuma seken mette mo wote. Emri selpapke eme yikwokwo tuma wusoube tame etemri tuma mette nenbe. Eke eme tuma yikwokwobe tame nogwape emne wopeten emri tuma metekwasen mette nenbe.  
\v 4 Eme tuma seken magel tayen sene beke kip met, eme sukuyetawou mette.  
\v 5 Neren, ne selpap yenbo som temente. Ne mus meten me taskwurte. God eteri tuma wusou tame etemri yaku ne etep kerete. God ere nene wom yaku ne noub keren yin omote.   
\s1 Pol ere sate nenbe.  
\p
\v 6 Aren, an sate mekin mekinye. Juda eme wain ok God eterne kwar pebe tiyke sirbekap, ari nep yeirte. An gwote nowsel mesginte mekin mekinye.  
\v 7 An yaku eisau akei nenbetem. God ere ane newom yaku an keren omom. An God erne som abobe.  
\v 8 God ere ane newote tokwo yenbo e som rasten. Tatame emne Noub Sin Labe Tame, Aneyen eter, ere ane newote. Eter sene yate yabel ere arenwoune beke kip newo. Berai. Ere genik tete yabel kouten tatame emne akei ere ete tokwo emne newote. Ete tokwo gwopkap. Ere nemne tatame yenbo wote nenbe.   
\s1 Timoti ere Pol erne agetage yin late.  
\p
\v 9 Ne ane agetage yan late.  
\v 10 Demas ere nowselri wos metekwasem, ere ane mesginin Tesalonaika komke yim. Kresens ere Galesia provinske yim. Taitus ere Dalmesia komke yim.  
\v 11 Luk eterwou ere arenken som tetan. Ne yate, ne Mak erne panen kep etep ane yan late. Mak ere ane yaku kobo late.  
\v 12 An Tikikus erne Efesus komke won yim.  
\v 13 Ne yate, ne ari saket sen yate. Kiyi an Troas kom mesginim, an saket Karpus eterke mesginim. Ari siglou ne kir sen yate. Ne noub la. Tuma basten por toub wuske nenem siglou ne mane wan gette. Ne etep kir sen yate.   
\p
\v 14 Aleksander ere ain peten akeite akeite wos yaku kerebe tame, ere ane yaperwai nenem. Eter nenemkap Aneyen ere erne awosein nente nenbe.  
\v 15 Ne erne noub la. Ere nene yaper mane nente. Nerem wusoubetem tuma ere worwor me naswoyim.   
\p
\v 16 Kiyi Romri tame eme ane tuma namdem, tame wuri ane kobo beke la. Akei eme ane mesginin yim. Arenwou an tuma awosein namdem. Etep nenem, an abobe, God ere emne yaper awosein mane nente.  
\v 17 Aneyen ere ane ei woram. Ere ane mure newom, an God eteri tuma akei noub wusowum, akeite akeite nowselri tatame eme ete tuma metem. Aneyen ere ane kobo lan ane sene petem, eme ane beke pe. Por eisau ere yen wuri tan, ar ere erne agetage petbekap, Aneyen ere ane etepke petem, an yenbo tem.  
\v 18 Be wos yaper ane tete, Aneyen ere ane sene pette, an eteri nelke tetan kom an etek noub tete. Eteri sig nema eisau som wobe. E seken.   
\p
\v 19 Akwilaken Prisilaken epne ne wusoute, an epne pir wobe. Onesiforus eteri yentaken etemne kir an pir wobe.  
\v 20 Erastus ere Korin komke som tetan. Trofimus ere yaper metem, an erne Miletus komke mesginim.  
\v 21 Ne agetage ane yan late. Woru worate nenbe, e nene kelu tukte nenbe.  
\p Yubulus, Pudens, Linus, Klodia etem, akeite lakemaseken nogwape eme nene pir wobe.   
\p
\v 22 An abobe, Aneyen ere nerenken temente. Ere kemne akei kemne pap yewon noubwai nente.  
\p Pol ere bas rasem tuma ab eteke.