\id PHP NT0097.PH Yareba N.T. - Weimer 9-JAN-87 \h FIRIFAI \toc1 FIRIFAI SU UWARABAI OWAWA \toc2 FIRIFAI \mt1 FIRIFAI SU UWARABAI OWAWA \c 1 \p \v 1 Na Foro, Timotini naini wana Yesu Kerisonu sabua ueta amara sadei. Wana ewa owawa ue odaitu. Yesu Kerisonu naueta uwaraini dubu su yawoeta dera uwaraini dikoni uwaraini ya Firifai su naueta uwara nesiaba ewa owawa siaia utaitua eawe. \p \v 2 Yanu Baba Godini yanu Dera Waria Amara Yesu Kerisoma ya durua ufisite emanu wesa ueta yaba mafisiro merau ibifoe watane. \s1 Foroma Godiba we ma kobererau ui \p \v 3 Nana ya uwaraba imutedana Godibai we ma kobererau utatane. \v 4-5 Ya uwarama Godinu sina nauta. I kowaroma arebe are ewa kowaro naini Godinu sina uruama waisiba na nenoma yaru utatanete Godibai guriguri uteda we ma kobererau utatane. \v 6 Na iwata, Godima yanu neno ubarero reka gaukara ue tutubari ui daido i ari utebe utebe Yesu Kerisonu fafisu kowaro ido ue me sibisu. \v 7 Godima yaini naini ya durua utebiba yaini naini Godinu sina uruama yawoteda weisi. Nana diburaro ibine aba nana Godinu sina we inaratanero yana eno utaitaba yaba neno arama uteda imuegou utatane iba watane. \v 8 Godi Dawa iwata, Yesu Kerisoma yaba neno arama utasu, i ari naini yaba neno arama uegou utatane. \p \v 9 Ya uwarama Godinu imueta imuegou ufote ue iwata uforo yanu neno arama ueta derawere ufie iba Godibai guriguri utatane. \v 10 Ya eno ufoitana i kobere imuetaini siosa imuetaini imue abanaro ma saragari uforo yanu neno roatarau ibifiro Yesu Kerisonu fafisu kowaro emema yaba wawei da webitae watane. \v 11 Nanu ununa ya uwarabai Yesu Kerisonu kobere ueta ibifiro eno uforo emema efitate Godiba we ma kobererau ufitae iba Godibai guriguri utatane. \s1 Foro diburaro ibina ima Godinu sina ma derawere ui. \p \v 12 Naiyemutu nauawe. Na diburaro oetaini ane ane naba uetaini ima na durua utasuro Yesu Kerisonu kotofu sina wegou utatane. \v 13 Na eno utataneba i gaemani dera su meremere uwaraini uwara nesiama nana Yesu Kerisonu naueta amaraba iba diburaro ibine eno iwata utaita. \v 14 Na diburaro ibinero Godinu moana naueta uwarama nanu ueta sineta ereda diburaba iyarawa Yesu Keriso imuegou uteda Godinu sina wegou utaita. \p \v 15 Moana uwarama naba madudu weda emanu unu ufitae naba ibo utedaba Yesu Kerisonu sina waitaro nono moana uwarama Yesu Keriso ba imuteda Danu sina waita. \v 16-17 I dubu waita uwarama iwata, nana Yesu Kerisonu sina yawoteda weba diburaro ibine. Emana iwata utaitate naba neno arama uteda iba Yesu Kerisonu sina waita. Nono i botai waita uwarama emanu torowa imuteda na ma ibo ufitaro na diburaro ibeda neno siosa umane iba Yesunu sina waita. \v 18 Anene wemau? I uwara nesia Yesu Kerisonu sina waitaba nenoma yaru utatane. \s1 Na wiroeta ibimauna Yesu Kerisoini ibifutu \p \v 19 Nana yaru utataneba nono nana yaru uteimau. Na iwata, ya uwarama Godibai guriguri uteiboro Godinu Imumu Kotofuma na durua ufisubago ewa nesia kobererau ufiro diburaroma ekodifitaro wawaro amumau. \v 20 Na Godi imuegou utataneba na unutawa anene maru umau. Nanu awona ibeta ari enanari ibeimau aba uimauna emema ereda Yesu Kerisonu ifu we ma derawere ufitae watane. \v 21 Na eno we imutatane, nana awona ibinena Yesu Kerisoini ibine. Nono nana duburo uimauna i serigari umate kobererau umau. \v 22 Nana nanu awona ba ofero ibimauna Godinu sina uwarabai wemaro nauteda naueta uwara sibitaita. Enoba anene imumau? I me ibeta ibimau aba uimau na iwata me. \v 23 I imueta sadeima nanu imueta ma owefitae utaita. Nanu ununa Yesubai aneta. Ina kobererauba nanu unu Yesubai aneta. \v 24 Nono nana nanu ba ofero ibimauna ya uwara durua umaro yanu naueta kobererau ufisu. \v 25 Enoba na imutataneba ewa sakairo ya uwarabai ibeda durua umaro yanu naueta derawere ufiro yaru ufoita. \v 26 Nana ewado ibeda yabai yadama famauna Yesu Kerisoma na kobererau yawoetaba Godibai we ma kobererau ufoita. \s1 I Firifai uwara Foroini uranetaro inafita \p \v 27-28 Yana Yesu Kerisonu naueta uwaraba kobere ueta sineta uegou uawe. Yabai famau aba me arina yanu kobere ueta sineta sina torowa naumau. Ya uwarama naueta daba demurairo inafote imueta daba demurai imufote uruama Godinu sina weboro yaini wasai ufitaitana iya da uyafoe watane. Yana eno ufoitana i wasai ufitaita uwarama ereda emana i eme da uifitaita inaro anibitaro nono Godima yana ma wirofisu iwata ufitaita. \v 29 Godinu imuetana eno, Godima Danu unu uiba ya uwarama Yesu Keriso imutaitate Danu gaukara utaitaro nono Yesu Kerisonu ifuba awe uyareta yabai farasu Godima eno imutasu. \v 30 Yaini naini ewa uraneta ari seitanini uranaisi. Yana nanu bodere seitanini uraneta ari sina nautate awona nanu uraneta ari eraitaro nono ewa uraneta ari uruama seitanini uranaisi. \c 2 \s1 Yanu torowa ma otowaratu ufete naiyemutuba ure nudarau uteibe \p \v 1 Yana Yesu Kerisobai ibedade buna derawere utaita aba me? Yesu Kerisoma yaba neno arama uteda yanu neno ma nabi utasuro merau ibinita aba me? Godinu Imumu Kotofuini yaini arotorowa ibinita aba me? Yanu yanu neno arama ue matanaita aba me? \v 2 Ya eno ufoitana yanu yanu neno arama ue matawete daba demurai imuawete Godinu gaukara uruama uawero na yaru derawere uma. \v 3 Yanu torowaba da imuawete yanu ifu we ma derawere da uawe. Yanu torowa ma kikiratu uawete moana uwarabana derawere we imuawe. \v 4 Yanu gaukara torowaba da imuawete moana uwaranu ueta sinetaini ere imuawe. \s1 Keriso Danu torowa ma otowaratu uiro Godima Dawa ma derawere ui \p \v 5-7 Yesu Keriso imue eawe. Danu ueta sineta ari enanari ue eawe. Dawana Godi. Nono Danu Godi ueta sineta mamegou utawa uite Danu bunaini Danu araetaini i ekodite sabua ueta amara sineda ba eme sini. \v 8 Dawa ba eme siniba Dawa Danu torowa ma kikiratu uite uietaba iyarawa Dawa i korosiro uieta wourite daido ui. \v 9-11 Enoba Godima Dawa ma uyarite urero odite Danu ifu, i ifu ifu nesiabairoma deiro ma derawere ui. Enoba ana anama Yesu Kerisonu ifu naufitate yajigoma jejerigari ufitae iba eno ui. I urero ibeta uwaraini sakai deiro ibeta uwaraini nasini emina wowonaro ibeta uwaraini ema nesia eno ufitaita. Eme nesia ema bebetuma eno webitaita, Yesu Keriso Dawa yanu Dera Waria Amara eno webitate yanu Baba Godinu ifu we ma derawere ufitaita. \s1 Ya nesia ario ari ue emebai ibife \p \v 12 Naiyemutu, nanu mui sina eawe. Nana yabai ibedana ane webitararo yana nauteda enanari uegou utebita. Nono awonana na yabai ibawa utataneba ya anene utebita enanari uegou utebeawe. Godima wiroeta yaba maiba iba i wiroetaba iyareda i gaukara uegou uawero yanu wiroeta kobererau ufi. \v 13 Godi Dawa yabai ibeda Danu unu uteda Dawa imufote Danu gaukara ufoe durua utasu. \p \v 14-16 Ane ane ufoitana kamena ka da wiawete urane yarane da uawe. Eno ufoitana emema yaba wawei da webitaita. Yana Godinu koiniboro. Idoba yana i siosawere ueta imueta siosa uwaranu dumuwere imueta ari imueta da uawe. Nanefa ario utebasu i ari emabai yanu torowa ario uawete Godinu sina wiawe. Eno uforo Yesu Keriso ido fafisuna nanu yabai utebitara kobererauba yaru umau. \p \v 17-18 Ya uwaranu nauetana Godibai fuyo oeta ari iba na ma uifitaitana ido yaru umau. Nana awona yaini yaru utatane. Enanari yana awona naini nanu uetaba yaru uawe. \s1 Timotiba sina \p \v 19 Yesu Keriso Danu unu ufisuna nana Timoti siaia umaro yabai anibisu. Dawa yabai anibite ibebe owefite nabai fare ya uwaranu sina webiro naumate yaru umane watane. \v 20-21 Timoti Dawa ya uwara imuegou utasu. Nono i moana uwarama Yesu Kerisonu gaukara imutawa emanu ueta sineta torowa imuegou uteda yawotaita. \v 22 Nono Timoti ya iwata. Dawana nanu ba amara ari. Dawaini naini Godinu sina we inarebitu. \v 23 I uwarama anene naba ufitaro iwata umauna Timoti siaia umaro yabai anibie imutatane. \v 24 Na iwata, Yesu Kerisoma nanu daba utasuba naini yabai sau amau. \s1 Efafadaitusiba sina \p \v 25 Nono awona nana eno imutatane, yana Efafadaitusi siaia utaro fo weta amara nabai fare ibeda na durua utebe naini gaukara utasu. Dawaini naini wana Yesu Kerisonu meremere amara sadei ari. Nana dawa ma owemate siaia umaro yabai anibisu, eno we imutatane. \v 26 Dawa danu su uwara ane efie neno arama utasu. Dawa ofe wouriro nautaro dawa yanu nauetaba neno siosa uteda danu suro anibie utasu. \v 27 Dawa ofe derawere wourite uifie uiro Godima dawaba neno arama uteda ma wiroi. Godima dawaini naini waba neno arama ui, nana neno siosa ueta faiyawere wouwoneba iba ma wiroi. \v 28 Enoba nanu unu derawere danu aneta. Dawa anibiro yana dawa efote yaru ufoitaba nanu yaba neno siosa ueta ido me sibisu. \v 29-30 Dawa yabai fafisuna Yesunu ifuro ario derawere wiawe. Dawa Yesu Kerisonu gaukara uteda yana nabai ibawa yanu kabesi munite na durua ui. Eno utedana uifie uiba dawa yabai fafiro yaru uteda i amara munegou ufoe watane. \c 3 \s1 Anama Yesu Kerisoro imutasuna dana rorowarau \p \v 1 Naiyemutu, nanu mui sina ewado eawe. Yesu Kerisoba merau imuteda yaru uawe. Yaba eno webe webe na arama da umaro yana nauteda neno kobererau ufoita. \v 2 Eregou uforo! I siosa uwara emana orowa kua ari, emana eno waita, ya wirofoe ufoitana yanu ofe tuawe waitaba emanu sina da nauforo! \v 3 Yana yanu ofe tufeisina Godinu koiniboro da sibeisi. Yana Godi nenoma imuegou ufeisi deina ido. Ina i ba ofe tureta ari. Yesu Keriso Dawa ya ma wiroiba iba imuteda yaru utaisi. Nono yanu ofema uetaba imutawa utaisi. \v 4 I Ju uwarama emanu ofe turetaba imutaita. Nana ba Ju amara. I Ju uwarama emanu ofe turetabai wirofitaitana na enanari umau. \v 5 Nanu bayama na muniro kowa eita me siniro nanu ofe tuta. Nanu baya babana Isaraero uwara. Emana Benijameninu sisia uwara. Enoba nana ba Ju amara. Nana Ferosi amara sirete Mosesinu tarawatu uegou ue. \v 6 Bodere nana Godi i Ju uwaranu imueta ari imutebitaraba iba Godinu naueta uwaraba siosa derawere utebitara. Nono i Ju uwaranu tarawatu nesia uegou utebitaraba i Ju uwaranu ueta sinetaro nabai kerere me. \v 7 Nono awonana nanu bodere imueta ari me eno we imutatanete nanu unu Yesu Keriso imumane iba nanu bodere imueta mu sanatane. \v 8 Nanu Yesu Keriso imueta, ima nanu bodere imuetaini ueta sinetaini ane ane serigari utasuba nana Yesu Keriso mumane iba i nesiana me ari eno imutatane. \v 9 Enoba Mosesinu tarawatuma na ma kobererau ueta bouro Yesu Kerisobai ibawa utatanete Yesu Kerisoma na ma kobererau ueta bouro Dawabai ibine. Godi Danu unu emema Yesu Keriso imueta, ima Godibairoma fariba ya ma kobererau utasu. \v 10-11 Nanu unu Yesu Keriso iwata umate Danu uietaroma uyareta buna iwata umate Dawabai awe uyareta uruama mumate Dana ui enanari uimate uyamane iba i bodere imueta nesia ekodatane. Nanu unu i uietaroma uyareta enanari uyamane iba watane. \s1 Foro dawa durami ue dobiriro fafie ui \p \v 12 Nono nanu wene i nesia nana utawa unete Yesu Kerisonu imueta nesia utawa uteda i nesia umane utatane. Yesu Kerisoma na Danu amara we odiba nanu ununa Danu imueta nesia uegou umane watane. \v 13-14 Naiyemutu, Danu imueta nesia utawa une. Nono i bodere daba ekodete awona i reka daba ereda anegou utatane. Nanu ditima i dobiri ereda nanu moko ane mumane watane. Godi Dana weiba Yesu Kerisoma ya ma wiroi. Eno uiba yanu reka ibeta urero ibinu. Enoba nana i dobiri ereda nanu moko ane mumane weda utatane. \p \v 15 Ya naueta derawere uwarama naini eno imufoe watane. Nono moana aika imufote Godinu ba sina nauegou ufoitana Godima ya we mawetu ufiro i ba imueta iwata ufoita. \v 16 Yanu ueta anene naue uteda usi enanari ufene watane. \p \v 17 Naiyemutu, ewa sina ewado eawe. Nanu ueta sineta ari enanari uawe. Nanu ueta sineta ari utaita uwara eregou uawe. \v 18 Nanu bodere we sina enanari i weda wemaro nauawe. Uwara faiyawere Godinu dabaro inaregou utawa uteda Yesu Keriso korosiro uieta Amaraba wasai utaita. \v 19 Ema uifitaitana i siosawere kabesiro anibitaita. Emanu godina kobere ietaini emanu desini. Emanu maru uetaba sasae utaita. Ewa nasiniro ibeta torowaba imuegou utaita. \v 20 Nono yanu ba ibetana urero ibeta. Yanu ma wiroeta Amara, Yesu Keriso iroma fafisu, iba yawoegou utaisi. \v 21 Yesu Keriso Dawana bunawere. Dawa fafite nesia ma serigari ufite i nesia Dana Danu bunama yawofisu. Dana eno fafite yanu yajara ofe mune sabite Danu bunama Danu kobere ofe ari yaba reka ofe mafisu. \c 4 \s1 Iba sina wei \p \v 1 Naiyemutu, yaba neno arama derawere uteda ya emane watane. Yana nanu nenoma yaru uetaini nanu gaukaranu moko munetaini iba naiyemutu, yanu Dera Waria Amarabai ba ibegou uawe. \p \v 2 Yudiaini Sinitaikini i aweta sadeima Yesu Kerisonu imueta daba demurai imufisite urane yarane da ufisie watane. \v 3 Naiye, ana nanu gaukara uruama utasu amara, i aweta sadei durua ua. I aweta sadeima na durua utebitaro Godinu sina webitara enanari emaini mui amara Keremeni i moana uwara, emanu ifu ifu Godinu me ibeta bukaro ibinu, emaini Godinu gaukara uruama utebita. \p \v 4 Ewa sina eawete enanari uawe. Yesu Kerisobai ibedana yanu nenoma yaru derawere utebeawe. Nono wemaro nauawe. Nenoma yaru derawere utebeawe. \p \v 5 Yanu Dera Waria Amara fafie usinua eme nesiabai ure nudarau uawe. \v 6 Ane aneba nenoma da imuawe Godibai yanu wenaueretaini unu nesiaba Godibai guriguri uteda we ma kobererau uawe. \v 7 Ya eno ufoitana Godinu wesa ueta yabai ibifisu ina emenu wesa ueta arina me. Yabai ibeda Yesunu bunama ya yawofiro Yesubai merau ibifoita. \p \v 8 Naiyemutu, nanu dubu sina ewado eawe. I ba uetaini kobere uetaini emeba rorowarau uetaini roatarau imuetaini araetawere imuetaini ure nudarau uetaini ane anena kobererauro Godi we ma kobererau ueta iyana imuegou uawe. \v 9 Nanu we mawetu ueta sinetaini nesia ere naue utebita, enanari uawero i wesarau Godi Dawa yabai ibifi. \s1 Foroma Firifai uwaranu me maetaba yaru ui \p \v 10 Yana nanu ibetaba imuteda naba ane ane mataitaba Godibai we ma kobererau utatane. Na iwata, bodere yanu unu naba me maeta. Nono bodere me maeta daba meba matawa uta. \v 11 Nanu ibetana kobererau aba siosawerena iba nenoma imutawa uteda daido me ibatane. Nanu aramawere ibetaba kamena ka wiawa utatane. \v 12 Nabai ibaiabai kikiratu ibinu aba derawere ibinuna nana kobererau ibatane. Ieta osi uretaini ieta dia uretaini na iwata. Ibaiabai derawere aba ibaiabai me na iwata uteda imutawa utatane. \v 13 Yesu Kerisoma naba buna matasuba nana ane ane nesia utatane. \p \v 14 Nono yana nanu aramawere ibetaba naba ane ane matebitaba kobererau utebita. \v 15 Ya Firifai su uwara ya iwata, na Masadonia orofaro ibeda Godinu sina webe ekodete anero yana naini i maetaini munetaini uruama utebisi. Moana dubu su uwarama eno utawa utebitaro nono ya Firifai su uwara yanu torowa eno utebita. \v 16 Na Tesoronaika suro ibitarana yana oi mui kowaro nono mui kowaro siaia utebitaro nabai farebiro munebitara. \v 17 I oiba imuegou utawa utatane. Yana oi mataitaba Godibai yanu moko muboita, iba imuegou uteda yaru utatane. \v 18 Nabai awona derawere ibinu. Yana ane ane Efafadaitusiba mataro woure fare naba mairo derawere ibinu. Yanu maetana bonanawere fuyo oeta ari. Godima yanu maeta ereda ina kobererau we imutasu. \v 19 Godi Danu gugua gubari Yesu Kerisobai ibinu enanari yabai mafie watane. \v 20 Yanu Baba Godinu ifu ainewaure ibene ibene we ma derawere ufene watane ina ido. \s1 Dubu ario sina \p \v 21 Yesu Kerisonu naueta uwara nesiaba nanu ario sina wiawe. I nabai ibinita naueta uwarama yaba ario sina waita. \v 22 I naueta uwaraini nono i gaemani yawoeta amara, Sisa, danu suro gaukara utaita naueta uwaraini ema nesia yaba ario sina waita. \p \v 23 Yanu Dera Waria Amara Yesu Kerisonu kobere durua ueta yabai ibifie watane.