\id MRK NT0097.MK Yareba N.T. - Weimer 9-JAN-87 
\h MAKANU 
\toc1 MAKANU OWAWA 
\toc2 MAKANU 
\mt1 MAKANU OWAWA  
\c 1  
\s1 Joni babataito amaranu we mawetu ueta sina  
\p
\v 1 Yesu Keriso Godinu Amara Danu kotofu sina ewado owawa ue odatane eawe wei.  
\v 2 Isaiya, Godinu we bou ueta amara danu bukaro Godinu sina arotorowa owawa ue odite efene wei,  
\li1 eawe, Nanu fo weta amara botai siaia umaro anibite Danu daba wabue moya ufisu enanari yanu neno wabue moya utebeawe wei.  
\v 3 I fo weta amarama sina we derawere eme ibawa orofaro inareda iroma webi, Dera Amaranu daba ma nabini ma rorowarau ue bou utebeawe webi,  
\p Isaiyama eno owawa ue odi.   
\p
\v 4 Joni babataito ueta amara eme ibawa orofaro fariro eme faiyawere dawabai are fataro emaba webi, yanu neno neno ueta dubena sawero Godima yanu neno neno ueta mubite imutawa ufiro ya babataito umau wei.  
\v 5 Eno weiro Judia orofa uwaraini Jerusaremu su uwara nesia emanu neno neno ueta we ma borobatate Jonibai are fataro Jodani ogoro Joni ema babataito ui.  
\v 6 Joni danu baruetana kemo eginu ofe, danu kafana borumakaunu ofe, danu ietana sisidomuini firukaini itebi.  
\v 7 Jonima wei, duburo mui amara nanu buribi afisuna Danu buna derawere na ari me wei. Na kobererau meba Danu ibo didi da inare tumau wei.  
\v 8 Ogoma babataito utataneba Dana Godinu Imumu Kotofuma ya babataito ufisu wei.   
\s1 Yesunu babataito kowaini Dawa seitanima ue erebi kowa  
\p
\v 9 Mui kowaro Yesu Nasareta su Gareri orofaroma are Joni babataito utebi orofaro fari. Fariro Jonima Jodani ogoro Yesu babataito ui.  
\v 10-11 Babataito uiro Yesu ogoroma duero ido amuteda erina ure eba uiro Godinu Imumu Kotofuma ubani ari Dawabai tarariro ureroma sina tararite wei, A Nanu Amara ubiba Nanu neno Abai ibinuro yaru utatane wei.  
\v 12 Eno weiro Godinu Imumuma Yesu eme ibawa orofa iro we berairo ani.  
\v 13 Anite Dawa kowa faiyawere foti (40) iro ane ibebiro seitanima Yesu ue efie Dawabai fari. Yesu awe egini ibebiro aneruma taratate Yesu yawotebita.   
\s1 Yesuma ogo egi dimara utebita uwara fo (4) we muni.  
\p
\v 14-15 Joni babataito ueta amara diburaro oita. Oitaro duburo Yesuma Gareri orofaro ane farite Godinu kotofu sina webie ani. Anite wei, Godima yawotasu kowa baworo baworo fafie usinuba yanu neno neno ueta dubena afu sawete Godinu kotofu sina naue imue uawe. uawete mune befororo odiawe wei.   
\p
\v 16 Yesu Gareri mesau nioro inarebe erina Saimonini danu dabue Enuduruini ogoro iwame sane inarebisiro eri. I amara sadeina erio egi woureta amara sadei.  
\v 17 Yesuma emaba wei, Na are yawoawaro anibete ya eme muneta amara sadei odimaro eme we muawaro naueta uwara sibita wei.  
\v 18 Eno weiro sau emanu iwame ido ekoisite Yesubai are fasiro anita.   
\p
\v 19-20 Nono yafa me Yesu aneda Jebedinu amara sadei Jeimisini Joni you ubarero emanu iwame ma wirotebisiro ereda emaba ara wei. Eno weiro sau emanu damamaini waiya ueta uwaraini you ubarero ekoisite Yesunu buribi anibisie dawabai are fasiro anita.   
\s1 Seitaninu imumu siosama rewoe ibi amara  
\p
\v 21-22 Kafenamu suro fata. Fatate ibebe sabate kowa wai uriro Ju uwaranu dubu su ubarero amuite we mawetu uiro Danu we mawetu uetaba neno kirifu uta. Danu we mawetu uetana buna derawere. I tarawatu tisa uwara emanu we mawetu uetana buna me.  
\v 23-24 Seitaninu mui imumu siosama rewoe ibi amara dubu su ubarero ido amuiro seitaninu mui imumu siosama yua wei, Yesu Nasareta su amara ya seitaninu imumu siosaini ane ue matafene arinu wei? Na iwata A, Ana Godinu kobere amara wei.  
\v 25 Eno weiro Yesuma wei, da wiate i amarabairoma amuate ania wei.  
\v 26 Eno weiba seitaninu mui siosa imumuma i amara ma iyari iyari uteda arua derawere weda neno ubareroma fare ani.  
\v 27 I ereta uwara neno kirifu derawere uteda emanu aika we mataneda ewa ane weita? Reka we mawetu uetana bunawere, seitaninu siosa imumuba wenuro nauitate fare anita weita.  
\v 28 Yesunu we mawetu ueta Gareri orofa nesiaro we inarebita.   
\s1 Yesu uwara faiyawere ma wirotebi  
\p
\v 29 Ju uwaranu dubu su ekoitate Saimonini Enudurunu su ubarero Yesuini Jeimisini Jonini nesia ido ane amuta.  
\v 30-31 Ane amutaro Saimoninu daroya ofe wakikiwere wourite ainibi. Ainibiro Yesubai weitaba arite Saimoninu daroyanu agero munite ma uyariro ofe wakiki toba uiro ofe wiroite ani. Ane emaba ieta mairo ita.   
\p
\v 32 Kowa itariro seitaninu moana siosa imumuma rewoe ibita uwaraini ofe woureta uwaraini nesia Yesubai woure fata.  
\v 33 Su uwara nesia danu su bebetoro guruguru ubita.  
\v 34 Ofe aika maika woureta uwara faiyawere ma wiroite seitaninu imumu siosa faiyawere we berai. We berairo seitaninu siosa imumu Yesu Dawa iwata utaba emanu sina weta daba garari ui. Iba sina wiawa uta.   
\s1 Yesu Gareri orofaro sina webi  
\p
\v 35 Wai kukuro Yesu uyarite eme ibawa orofaro anite Godibai guriguri utebi.  
\v 36-37 Utebina Saimonini danu domayamutuini uyatate etana Yesu meba Yesu dobere anitate etate weita, eme nesia a doberaita weita.  
\v 38 Weitaro Yesuma emaba wei, mui suro anibete Godinu sina wemainiaba farea wei.  
\v 39 Weiro Gareri orofa su suro anitate Ju uwaranu dubu su faiyawerero sina weda seitaninu imumu siosa faiyawere we beratebi.   
\s1 Amaimawere amara Yesuma ma wiroi  
\p
\v 40 Buri age amaima utebi amara Yesubai farite jegirari uteda nui wei, anu unu ufasuna na ma wirofaro wiromau wei.  
\v 41-42 Weiba Yesu neno arama derawere uite burite wei, Nanu unu a ma wiromau wei. Amai me sia weiba ofe amaima ido me siniro wiroi.  
\v 43-44 Wiroiro Yesuma buri age amaima me sini amara ido siaia uite wei, eme nesiabai da wiate fuyo ode sina weta amarabai aniate mawetu uaro efi wei. Mosesinu tarawatu buri age amaima fuyo oeta enanari odia. Iba anu ofe kobererau usinu. Iba eno usinuro anu ofe kobererau usinu. I i fuyo ode sina weta uwara efitate iwata ufita wei.  
\v 45 Eno weiro i amara anedana uwara faiyawerebai Yesunu buna ueta nesia webiba nautate su su uwara faiyawere Dawa ode kara utaba Yesu suro farawa kebiro yaubiro su su uwara Yesubai fata.   
\c 2  
\s1 Yesu i buri age badami ui amara ma wiroi  
\p
\v 1-3 Moana kowa me siniro Yesu owerite Kafenamu suro fari. Fariro nautate ane Danu su ubarero guruguru utate uwarama itare amue ueta su bebeto daba garari uta. Yesuma Godinu sina weina amara mui sadei eno mui sadei eno fata. Age sanawa inarawa amara wia warafaro woutate Dawabai anibitae fata.  
\v 4 Fare emanu unu su ubarero anibitae utana eme faiyawereba Yesubai anawa utate emanu su fou dei fefewereba emanu amueta adiroma fou deiro amuta. Amutate fou ma eba utate age sanawa inarawa amaraini danu wia warafaini ebaro oitate kekerama mamitaro Yesubai itari.  
\v 5 Itariro Yesu emanu imueta ereda age sanawa inarawa amaraba wei, nanu amara, anu neno neno ueta munete imutawa une wei.  
\v 6 Eno weiba moana tarawatu tisa uwara beforoma imuteda we imuta, aneba sina eno wasu we imuta.  
\v 7 Eno we imutedaba we imuta, Godinu ifu ma siosa utasute dawa Godiba sina siosa wasu. I sinana sara siosa sina. Godi torowa neno neno ueta mune imutawa utasu we imuta.  
\v 8 Eno we imutaba Yesu Dawa emanu imueta Dawa iwataba ido wei, sina aneba nenoma imutaita wei.  
\v 9 Weite wei, abo sinama ofe woureta amaraba anene wemau, anu neno neno ueta mumate imutawa umau, aba anu wia muate ania wemau wei. Eno weite wei, abo sinama kimuwere wei?  
\v 10 Eno weite wei, Na Ba Eme Sire Amara. Nana ewa nasiniro ibeda uwaranu neno neno ueta mune imutawa ueta buna Nabai ibinuba iba eno utatanero yana ereda iwata utaita wei.  
\v 11 Eno weite age sanawa inarawa amaraba wei, uyate anu wia muate suro ania wei.  
\v 12 Weiba uyarite aniro eme ereda neno kirifu derawere utate weita, ya bodere eno erawa rairo awona kamama eraisi weita. Iba Godinu ifu we ma derawere uegou uta.   
\s1 Yesuma Riwai yua we muni  
\p
\v 13 Yesu nono owerite Gareri mesau gigirari fari. Fariro eme nesia ane guruguru utaro Yesu emaba we mawetu utebi.  
\v 14 Duburo Yesu inarebe erina Arofiasinu amara Riwai danu takesi muneta su kabesiro yaubiro wei, arate iwata ueta amara sia wei. Weiba uyarite Dawabai fariro anisi.   
\p
\v 15 Yesuini Danu iwata ueta uwaraini Riwainu su ubarero yaubeda ieta itebita. Takesi muneta uwaraini neno neno ueta uwaraini faiyawere Danu buribi anitate moana uwara Yesuini yautate ieta itebita.   
\p
\v 16 Moana Ferosi ema tarawatu tisa uwarama etana Yesuini takesi muneta uwaraini neno neno ueta uwaraini ieta itebitaro etate Danu iwata ueta uwaraba weita, Yesuini takesi muneta uwaraini neno neno ueta uwaraini Yesu aneba emaini ieta eno itasu weita?  
\v 17 Weitaro Yesu emanu sina nauite wei, i ofe wourawa uwaraba dogeta amara arawa uite i ofe woureta uwaraba fari wei. Weite wei, ya kobererau waita uwaraba sina wemane waya arawa neno neno ueta uwaraba wemane waya farea wei.   
\s1 Ieta ka uetaba wenauereta  
\p
\v 18 Joni danu iwata ueta uwaraini Ferosi uwaraini emanu baeta tarawatuba moana kowaro torowa ieta itawa ka utebita. I kowaro eno utebitana moana uwarama fare Yesubai weita, Joninu iwata ueta uwaraini Ferosi iwata ueta uwaraini ieta itawa. Anu iwata ueta uwarade, aneba ieta itaita weita?  
\v 19 Weitana Yesuma moko wei, i aweta reka mubisu amara danu ogaroratu ufiro danu domayamutu i ogaroratu da ifitaita? Ema enona me! I reka aweta mubisu amara danu domayamutubai ibifisuba ogaro are ifitaita wei.  
\v 20 Mui kowaro aweta reka mubisu amara anibisuna ogaro da ifitate ka ufitaita. Enanari Na animauna Nanu iwata ueta uwara eno ufitaita wei.   
\p
\v 21 Anama reka wadia fifima bodere wadia ebaro fifinu ufisuna i bodere wadia babafite eba derawere ufisu wei.  
\v 22 Enoba nauawe. Anama reka waini bodere egi ofero adu ufisuna reka wainima bodere egi ofe babaosote itaosoba. I reka wainima bodere egi ofe ma arama ufisu. Iba i reka waini reka egi ofero adu ufisu wei. Yesuma i bodere tarawatunu we mawetu uetaini Danu reka we mawetu uetaba kasei wei.   
\s1 I sabate kowaba wenauereta  
\p
\v 23 Mui sabate kowaro Danu iwata ueta uwaraini feame waiya dabaro inareda Danu iwata ueta uwarama feame ma gogorugari ue ferae ie inarebita.  
\v 24 Eno utebitaba Ferosi uwarama etate Yesuba weita, sabate kowaro eno aneba utaita weita? Yanu tarawatuma wasu, sabate kowaro eno da uawe wasu weita.  
\v 25-26 Weitana Yesuma emaba wei, boderewere Deiwidini danu uwaraini osi utebiba ieta munebita ikiki yawitaitatema nono iwawa utaita. Eibieta Godinu dera fuyo ode sina weta amarama yawotebiro Deiwidi Godinu su ubarero amuite dera dubu su yawoeta uwaranu Godinu ereta kakara buredi mune iteda danu uwaraba mairo ita wei.  
\v 27-28 Eno weite wei, Godima eme ko ubu uite nono duburo i sabate kowa emeba ubu uiba iba i Ba Eme Sini Amara, Dana i sabate kowaini daido yawotebasu wei.   
\c 3  
\s1 I age arama bobo amara  
\p
\v 1 Yesu nono i dubu su ubarero amuite erina age arama amara ido yaubi.  
\v 2 Ido yaubiro i uwarama Yesu ereda we imuta, Yesu i amara ewa sabate kowaro ma wirofisu aba me we imuta? Iba Yesu sabate kowa ma arama utasu we imutate wawei webitae erebita.  
\v 3 Yesuma age arama amaraba wei, uyate abanaro ina wei.  
\v 4-5 Eno weite i uwara nesiaba wei, aboma kobererau, sabate kowaro durua umau aba ma siosa umau? Ma wiromau aba ma uimau wei? Weina wate muma utaro Yesu ibo ui. Ibo uteda i uwara nesia ere owere owere uite emanu Dawaini aya muneta iwata uite i age arama amaraba wei, anu age sa, weiba age saniro rorowarau uiro wiroi.   
\p
\v 6 I Ferosi waita uwarama Ju uwaranu dubu suroma wawaro itata. Itataro moana Erodi waita uwara wawaro atatate we mataneda Yesu ma uieta daba doberebita.   
\s1 I mesau gigirariro wate fare ibita uwara  
\p
\v 7 Yesuini Danu iwata ueta uwaraini mesau gigirariro anitaro Gareri orofa uwaraini Judia orofa uwaraini Yesunu buribi anitate Yesunu we mawetu ueta nauta.  
\v 8-9 Nautate eme faiya faiyawere Yesubai ata. Gareri orofa uwaraini Judia orofa uwaraini Jerusaremu su uwaraini Idumeia orofa uwaraini Jodani etarafu orofa uwaraini Taira su uwaraini Saidoni su uwaraini eme faiyawere nautate ataba Yesuma Danu iwata ueta uwaraba wei, jamana mune bou uawe wei. I uwarama Dawa taka uotoba.  
\v 10 Bodere ofe woureta uwara ma wirotebiba faiyawere reka ofe woureta uwara emanu unu Dawa burifitate wirofitae fata.  
\v 11 I seitaninu moana siosa imumuma rewoe ibita uwarama Yesu etate deuwataro seitaninu moana siosa imumuma weita, Ana Godinu Amara weita.  
\v 12 Weitaba wei, Nanu ifu da we ma boroyawe wei.   
\s1 Yesu Danu iwata ueta uwara nesia tuero we muni.  
\p
\v 13 Yesu maidaniro manite Danu unu utebi uwara yua weiro mare fata.  
\v 14-15 Yesu eme nesina tuero (12) Dawaini ibetaba munite Danu sina webiro webitae munite seitaninu siosa imumu mune saneibitae buna derawere mai.  
\v 16 Emanu ifu ewado. Saimoni reka ifu Fita mami.  
\v 17 Jebedinu amara sadei Jeimisini danu dabue Joni reka ifu Boanari mami. I ifunu ubina ure ruruanu adarabu mami.  
\v 18-19 Enuduruini Firifini Batoromiuini Matiuini Tomasini Jeimisini dawa Arofiasinu amara Tediasini Keinani amara Saimonini Judasi Isikarioti, i amara Judasi Yesuba do mai amara. I uwara nesiaba Yesuma yua weiro fata.   
\s1 Yesuini Biesabo  
\p
\v 20 Yesuini Danu iwata ueta uwara su ubarero amuta. Amutaro eme faiyawere guruguru utaba Yesuini Danu uwaraini ieta itawa uta.  
\v 21 I amara gogore usinu weitaba Yesunu su uwara nautate Yesu mubitae fata.   
\p
\v 22 Moana tarawatu tisa uwarama Jerusaremu suroma fatate weita, Danu nenoro Biesabo ibinuba emanu botai siosa imumunu bunaroma seitaninu siosa imumu we beratasu weita.  
\v 23 Eno weitana Yesuma arawe weiro fata. Fataro kasei sinaroma wei, anene seitani danu aika mune sanebasu wei?  
\v 24 Gaemani uwara emanu aika uraneda saragari ufitate da inafitaita.  
\v 25 Su demurai uwara emanu aika uraneda saragari ufitate da inafitaita.  
\v 26 Seitani danu aika uraneda saragari ufisuna da ibifisu.  
\v 27 Enoba ewa sina nauawe wei, waira ueta amarama buna derawere amaranu su ubarero amufite buna amaranu age uwane tarifite danu ibaiabai waira ufite anibisu eno wei.  
\v 28 Yaba ba watane wei. Eme nesianu siosa uetaini sara siosa wetaini Godima mubite imutawa ufisu wei.  
\v 29 Nono anama Godinu Imumu Kotofuba sara siosa sina webisuna Godima ewa siosa ueta da mubite imutawa ufiro danu sara siosa ueta dawabai ibene ibene ibeibisu wei.  
\v 30 I tarawatu tisa uwarama auboko eno weita, Dana seitaninu mui imumu siosa bobo weitaba Yesu ewa kasei sinaroma wei.   
\s1 Yesunu danuaini Danu dabuemutu  
\p
\v 31 Danu danuaini Danu daburetaini atate wawaro inatate Yesubai sina webitae weita.  
\v 32 Weitaro eme faiyawere Yesubai yaubitaro moana uwara Yesubai fatate weita, Anu anuaini aburetaini arumamini kebiro inaibeda a wenaueraita weita.  
\v 33 Weitana Yesuma wei, Nanu bayaini naburetade anaiya wei?  
\v 34 I guruguru ubita uwara ereda wei, eawe Nanu bayaini naburetaini ewado wei.  
\v 35 Abo uwarama Godinu sina nauegou ufitate Dana unu ufitaitana emana Nanu bayaini naburetaini Nanu arumamini wei ido.   
\c 4  
\s1 I uiti yo saneta amaraba kasei sina  
\p
\v 1-2 Mui kowaro Yesuma maguaro we mawetu utebiro eme faiyawere inare kara uta. Eno utaba youro amuite yaubiro i uwara enea gigirariro inaibita.  
\v 3 Yesuma imueta faiyawere kasei sinaroma webie wei, Nanu sina nauawe, mui amara uiti yo waifie waiya umanite jiru turite nasini daure bou uite yo munite sanebi.  
\v 4 Sanebiro moana uiti yo dabaro itataro gasirama are fatate i uiti yo ie me sita.  
\v 5 Moana yo gebiro duboro itatate sau warata.  
\v 6 Warataro nasini awewewereba kowa farite yanairo ini fuyaraturo ini kimu meba yare yoie me sita.  
\v 7 Moana uiti yo sinisini bobo orobu ubarero itatate warataro orobuwereba tai uwanawa.  
\v 8 Moana uiti yo kobere nasiniro itatate waraegou utate tai faiyawere uwata. Moana faiya nono uwata, tai demurairoma tai nesia toti (30) uwata. Moana faiyawere uwata, tai demurairoma tai nesia sikisiti (60) uwata. moana faiya faiyawere uwata, tai demurairoma tai nesia wani aderedi uwata (100) wei.  
\v 9 Weite eno wei, ya ome bobo aba me? Ome bobo uwarana ewa Nanu sina nauegou uawe wei.   
\s1 I kasei sinanu ubi  
\p
\v 10-11 Duburo i guruguru uta uwara anitaro moana inaibita uwaraini Danu iwata ueta uwara nesia tuero (12) i kasei sinanu ubi dobetate weitaro wei, Godima Danu ureroma nesia yawoe anasu kiwu sina ma borobarasuro ya iwata utaita. Nono Godinu sina nautawa uwara kasei sinaroma torowa nautaitate kasei sinanu ubi iwawa utaita wei.  
\v 12 Ewa Godinu sina nauawe. I Nautawa me uwarama i kobere ueta eraita. Eraitate nono i ba ubina erawa utaita. Nauetana nautaitate nono i sinanu ubi nauegou utawa. I sina nauegou uotote emanu neno neno ueta dubena saotoro Godima mune imutawa uosoba eno utaita wei.   
\s1 Yesuma i uiti yo saneta amaraba wei kasei sina ma boroyari  
\p
\v 13 Yesuma wei, ewa kasei sina ya iwata aba me ari? Iwata da ufoitana mui kasei sina anene iwata ufoita?  
\v 14 I yo waieta amara Godinu sina we inareta amara ari.  
\v 15 I dabana Godinu sina nautaita moana uwara ari. I amara Godinu sina we inarasuro i dabaro inaraita uwarama Godinu sina nautaitaro seitani sau farasute i sina emabairoma daido ma siosa utasu.  
\v 16-17 Weite wei, i moana uiti yo gebiro deiro itari enanari moana uwara i gebiro ari wei. I uwarama Godinu sina nautaitate yaru utaitaro Godinu sinaba awe uyareta farasuro emanu naueta kimu me, emanu naueta i yo ini fuyaratu ari, iba i sina ekodaita.  
\v 18-19 Moana uwara ema orobu ariba Godinu sina nautaitate aika maika imutaitate emanu unu ibaiabai munaitate emanu unu nesia utaitate i sinanu daba garari utaitaba i sina ba sinawa utasu.  
\v 20 Moana uwara ema kobere nasini ari. Godinu sina nautaitate imuegou uteda emanu kobere ueta yawietana faiyanono toti (30) ari utaita. Moana uwara faiyawere nautaita, emanu kobere yawietana sikisiti (60) ari utaita. Moana uwara faiya faiyawere nautaita, emanu kobere yawietana wani aderedi (100) ari utaita, Yesuma wei.   
\s1 Okia wowonaro feare oita nanefaba sina  
\p
\v 21 Yesuma eno eno weite emaba wei, nanefa beafote okia ubarero odifoita aba warafa wowonaro odifoita? Eno wenauerite wei, me, aiyo oeta kabesiro odifoita kasei sinaroma eno wei.  
\v 22 Eno weite wei, mui kowaro i feare ibeta ememetu nesiaini ma borobafite kiwu imuetaini ueta nesia Godima ma borobafite arioro odifiro efitaita wei.  
\v 23 Ya ome bobo uwara Nanu sina nauegou uawe wei.  
\v 24 Emaba nono wei, yanu nautaita ememetu imuegou uforo wei. Yanu naueta Godibai kikiratu odifoitana yanu naueta ma kikiratu ufisu. Yanu naueta Godibai odegou ufoitana mui naueta mafisu wei.  
\v 25 Naueta derawere bobo amaraba mui naueta mafite deramiratu naueta bobo amara danu kikiratu naueta ma dare mubisu wei.   
\s1 Waratasu yoba kasei sina  
\p
\v 26 Yesuma nono wei, Godinu yawoe anasu kowa ewa sina ari. Mui amara yo munasute waiyaro ane farasute oritasu.  
\v 27 Nono aine uyare aine uyare enoma enoma utasuro yo tua faraitate warataita. Yo tua anene faraitate warataita ari dawa iwata me.  
\v 28 Nasini torowama ma waratasuro tua faraitate tata odaitate derawere utaitate uwanaitate ayo uraita.  
\v 29 Ayo uraitaro tai woureta kowa ido farasuba kaiyama ido turasu wei. I Godinu yawoe anasu kowa ewa sina ari Yesuma wei.   
\s1 Masita ana taiba kasei sina  
\p
\v 30 Yesuma wei, Godinu yawoe anasu kowa abo ari wemau? Godinu yawoe anasu kowa abo kasei sina ari wemaro naufoita wei?  
\v 31-32 Eno weite wei, Godinu yawoe anasu kowa masita ana tai ari. I tai deramiratu waitasuro ana derawere waratasuro gasira nesia utumuro yaubaita wei.  
\v 33-34 I uwarama Danu sina naufitae utaba iba Godinu sina kasei sinaroma faiyawere webi. I uwara nesiaba wawuriro wiawa, kasei sinaroma torowa webi. Nono duburo Dawaini Danu iwata ueta uwara emanu aikana i sinanu ubi we ma borobariro nauta.   
\s1 Yesuma enea ufeba bana wei  
\p
\v 35 Yawi siniro Yesuma Danu iwata ueta uwaraba wei, mesau etarafu yofefe wei.  
\v 36-37 Weiba uwara fefera ekoitate Dawa woure ane youro amutate anita. Moana youini anitaro oyau derawere farite ufe uyariro you inufie ui.  
\v 38 Yesuma you muduna afu gutoro nauta ainibiro ma uyareda weita, Tisa Amara, ya uifene utaisi. A imutasu aba me weita?  
\v 39 Weitaro uyarite oyauini ogoba bunawere kodia weiro oyauini ogoini ido me sinite binono sani.  
\v 40 Yesu emaba wei, aneba iyareda imutawa utaita wei?  
\v 41 Weiro neno kirifu utate iyatate weita, i amara abo amararo oyauini ogoini Danu sina nauita weita?   
\c 5  
\s1 Yesuma i seitaninu moana imumu siosama rewoe ibita amara ma wiroi  
\p
\v 1 Yesuini Danu uwarama Gerasini orofa, mesau etarafu iro yofere ane inata.  
\v 2 Ane inataro Yesu amo inariro seitaninu moana imumu siosa rewoe ibita amara Yesubai are fari. I amara eme uri ue oeta eraboro ainebi.  
\v 3-4 Ainebiro danu su uwarama iyareda danu burini ageini aiyonima uwanebitaro ma furufarebiba eme nesia dawa yawoegou utawa utebita.  
\v 5 Dumuini kowaini eme uri ue oeta eraboroini maidaniroini inareda arua weda gebiroma danu torowa umanebi.  
\v 6-8 Yesu inaibiro seitaninu moana imumu siosa rewoe ibita amara yafawereroma erite durami ue Yesunu iboro arite arubi uiro dawabai ibita seitaninu moana siosa imumuma derawere weita, Yesu, Dera Urero Ibinu Godinu Amara, yaba ane ufae utasu weita? Eno weitate weita, Godi Dawa erasua ya fanisi da mai weita. Auboko Yesuma seitaninu moana siosa imumuba amua weiba iba iyareda eno weita.  
\v 9 Yesuma wei, yanu ifu anaiya wei? Weina yanu ifu fefera. Iba faiya faiyawere ibinisi weita.  
\v 10 Ewa orofaroma aniawe da wia weita.   
\p
\v 11 Borosiri faiyawere maidaniro ibeda emanu torowa gusuna ue itebitaro seitaninu moana siosa imumuma Yesubai weita, wiaro anibete borosirinu ubarero itafe weita.  
\v 12-13 Eno weitaro Yesuma wei, aniawe weiba fare anitate borosirinu ubarero itata. Itataro borosiri nesia faiyawere tu tausani (2,000) durami ue anitate maidaniroma mesauro bibu utate imuie me sita.  
\v 14 Enoba i borosiri yawoeta uwara emanu suro durami ue anedana uwara nesiabai weitaro su uwara mesauro fare etate Yesubai fata.  
\v 15 Fare etana i seitaninu moana siosa imumu faiyawerema rewoe ibita amara danu beforo kobererau uiro wadia yurite yaubiba etate i uwara iyata.  
\v 16-17 I uwarama seitaninu moana siosa imumuini boronu ueta nesia etate weitaro i uwara nesiama Yesuba weita, yanu orofaroma ekodiate ania weita.   
\p
\v 18 Yesuma youro amuiro i seitaninu moana siosa imumu me sini amarama wei, naini anibu wei.  
\v 19 Weina Yesuma wei, me, aniate Godinu bunaini neno arama ueta nesia anu su uwarabai wia weiro ani.  
\v 20 Anite Dikaforisi su teni (10) ibita orofaro ane Yesunu bunaini neno arama ueta nesia we inarebiro i uwara nesia nautebitate neno kirifu utebita.   
\s1 Jairasinu arumaini Yesunu wadia burite wiroi aweta  
\p
\v 21-23 Yesu owerite mesau yofere ane inari. Inariro eme faiyawere ode kara utate inaibitaro Ju uwaranu dubu su yawoeta amara, Jairasi, are farite Yesunu iboro arubi uteda wei, nanu arumaratu uifie utasu. Araro anibute anu age danu deiro odiaro wirofi wei.  
\v 24 Weiro ido aniro eme faiyawere Yesunu buribi deiro deiro ue anita.   
\p
\v 25-26 Mui awetaini anita. I aweta ofe derawere wourite onono munebi. Oya tuero (12) muneda dogetabai inarebi. Oya tuero danu oi sane me sinite wirotawa ofe derawere daido ibebi. Ibebiro iro Yesunu buna ueta nauite iba ani.  
\v 27-29 Yesu inarasu weitaro nauite we imui, Danu wadiaro burimauna na wiromau we imui. Eno we imuite anite Yesunu wadiaro burina onono didi ido turiba wiroite na wironea we imui.   
\p
\v 30 I aweta Yesunu wadia burina Yesunu buna i awetabai aniba ma wiroiro Yesu Dawa iwata ui. Iwata uite iba i uwaraba wei, Nanu wadiaro anama burisinu wei?  
\v 31 Weina Danu iwata ueta uwarama weita, ea, ode kara ubinitaba emana burita aba? Aneba anama Na burisinu wasu weita?  
\v 32-34 Weitaro Yesu eta ere ewa ere uiba i aweta iyareda iwura mami. Yesunu buna Dawabai aniba iwata uteda Yesubai are arubi uite danu ui i kiwu utawa we ma borobareda ba sina weina Yesuma wei, aruma, anu nauetama a ma wirosinua da iyate ania. Anu oferi daido me sininuro wirosinu wei.   
\p
\v 35 Yesuma eno webina mui amara Ju uwaranu dubu su yawoeta amaranu suroma are farite Jairasiba wei, anu aruma uisinua. Tisa Amarabai woroworo sina da wia wei.  
\v 36 Weiro Yesuma nauite Jairasiba wei, iya da uyate kimuwere imuea wei.  
\v 37 Weite i uwara nesia kodite Fitaini Jeimisini Jeimisinu dabue Joni woure ane dubu su yawoeta amaranu suro fari.  
\v 38-39 Farite sorara nauite i sorara utebita uwaraba wei, ane utaita? Aneba sorara utaita? I aruma uitawa, nauta kunawere ainibinu wei.  
\v 40 Weiro we iruteda yo weitaro i uwara nesia wawaro odiro itata. I aruma danu danuaini damamaini Fitaini Jeimisini Joni ema torowa su ubarero yaubita.  
\v 41 Yesu i arumanu agero munite wei, tarita kumi, i sinanu ubina arumaratu aba watane uya, eno wei.  
\v 42 Weiro i daisinono ui aruma uyarite inarebiba i yaubita uwarama etate neno kirifu derawere uta.  
\v 43 Yesuma wei, moana uwaraba da wiawete i aruma ieta mawero ifi wei.   
\c 6  
\s1 Yesu Nasaretaro ere ekoita  
\p
\v 1 Jairasinu orofa ekodite Dawaini Danu iwata ueta uwaraini Danu orofaro anita.  
\v 2 Mui sabate kowaro Ju uwaranu dubu su ubarero amuite we mawetu utebi. Eno utebiro eme faiyawere imutebitate neno kirifu utate weita, Danu we mawetu uetaini iwata ueta ina aboro muninu? Danu iwata derawere anama masinu? Danu ueta buna derawere anene utasu? Ya iwata me weita.  
\v 3-4 Weitate weita, ewa amarana su ma inareta amara aba me? Danu danua Merini Danu dabureta Jeimisini Jousefaini Judasini Saimonini Danu arumamini yabai ibinita weita. Weitate Dawana dera amara me weda naue nautawari utaro Yesuma wei, Godinu we bou ueta amara moana uwarama eno imutaita. Nono danu su ubi uwara eno imutawa utaita wei.  
\v 5 Eno uteda eno imutebita ueta buna derawere utawa ui. Ofe woureta uwara torowa demui demui Danu age deiro odiro wirota.  
\v 6 Emanu imutawaba Yesuma neno kirifu ui.   
\s1 Yesuma Danu iwata ueta uwara tueroba gaukara mai  
\p
\v 7 Mui kowaro su su we mawetu ue inarebi.  
\v 8-9 I kowaro Yesuma siaia ufiro anibitae weiro Danu iwata ueta uwara tuero (12) Dawabai fata. Fatate sadei sadei aneibitate seitaninu moana siosa imumu mune saneibitae buna derawere maite wei, ietaini yoateini oini da mubote akurini sadoroini barueta wadia demurai torowa muboita wei.  
\v 10 Mui natofo suro fafote mui suro amufote ibeda yanu sina i su uwaraba we me sibote aniboita wei.  
\v 11 Mui su uwarama ya da mubitate yanu sina da naufitaitana yanu dubena emabai sawete aniawe. Eno ufoitana Godima ema da mubisu eno iwata ufitaita wei.  
\v 12 Eno weiro anitate weita, yanu neno neno ueta dubena sawe weita.  
\v 13 Eno webitate seitaninu siosa imumu faiyawere we beratebitate ofe woureta uwara faiyawere emanu kofiriro oera odebitate ma wirotebita.   
\s1 Joni babataito amaranu ui kowa  
\p
\v 14 Uwara nesia Yesunu ueta sineta iwata utate weitaro Erodi, gaemani dera yawoeta amarama nauite ina iwawa uiro moana uwarama weita, Joni babataito amara uietaroma uyariba buna ueta derawere utebi weita.  
\v 15 Moana uwara eno weita, etei amarana Iraija weita. Moana uwara eno weita, Dawana Godinu we bou ueta amara, bodere we bou ueta uwara ari weita.  
\v 16 Weitaro dera yawoeta amara Erodi i sina nesia nauite wei, ewana Joni. I amaranu nodo nana turero uietaroma uyari wei.  
\v 17-20 Bodere Erodima danu dabuenu aweta Erodiasi muniro Jonima wei, anu abuenu aweta muneta siosawerea kodia wei. Weiro Erodiasima ibo uite Joni ma uifie imui. Eno imuiro Erodi iyarite dawa iwata Jonina Godinu kobere amara, dawa iwata uiba Firifinu aweta Erodiasima Joni ma uitawa uite webe webe webe wei. Weiba Erodi danu uwara siaia uiro anitate Joni mune diburaro oitaro Erodima Joninu sina naufie anebite nauteda iwawa utebi.   
\p
\v 21 Nono Erodi danu danuama dawa muni kowa fariba ogaro derawere uite weiro danu dera su uwaraini danu dera meremere uwaraini Gareri orofa dera uwaraini ido are fata.  
\v 22-23 Fataro Erodiasima we imui, Joni ma uieta kowa farinua we imui. Erodiasinu aruma emabai farite yaura urebiro esega uwaraini Erodini yaru utaro Erodima wei, anu unu ane mamane webate nanu yawotatane orofa muduna mamane webasuna mamau wei.  
\v 24 Weiro i aruma danu danuabai ane wei, baya, ane wemau wei? Weiro wei, aniate Joni babataito amaranu kofiri mai wia wei.  
\v 25 Weiro owerite Erodibai ane farite wei, Joninu kofiri naberero awona odiate mai wei.  
\v 26 Weiba Erodi neno siosa ui.  
\v 27 Auboko danu we bou ui sina weiro esega uwarama nautaba enanari ui.  
\v 28 Enoba Erodima weiro danu meremere amara diburaro anite Joninu nodo ture kofiri naberoro odite owerite i arumabai are farite mai. Mairo munite ane danu danuabai mai.  
\v 29 Joninu buribi inareta uwara nautate ane danu ofe mutate ane eme oeta eraboro uri ue oita.   
\s1 Yesuma i fai tausani (5,000) uwara ieta mairo ita  
\p
\v 30 Yesunu iwata ueta uwara botai siaia uiro ane inarebe nono owetate Yesubai are fatate emanu utebita nesia weita.  
\v 31 Uwara faiyawere ane fare ane fare enoma enoma utebitaro imoitawa, ieta itawa utebitaba Yesuma wei, eme ibawa orofaro anibete imoife wei.  
\v 32 Eno weiro youro anitaro uwara faiyawere etana Yesu anebiba ema iwata Danu anebi orofa iba atate su suroma i orofaro ema ko fata.  
\v 33-34 Ema ko fataro Yesuini Danu iwata ueta uwaraini duburo fata. Fatate Yesu youro inarite i uwara nesia eri. I uwara nesia mamoe ari, yawoeta amara meba daba aika maika anebita enanari i uwara imueta aika maika imutebitaba Yesuma neno arama uite we mawetu utebi.  
\v 35-36 Yawi siniro Danu iwata ueta uwara Dawabai are fatate weita, ewana eme ibawa orofa kowa itafie utasuba wiaro su aboro aboro anibitate ieta oiya ufitae weita.  
\v 37 Weitaro Yesuma wei, ieta mawe weiro weita, ieta oiya ufene wasu weita. Weitate weita, mui amarama oya demurairo munasu oi derawere ina ewa arotorowa weita. Nono aneme ieta oiya ufeisi weita.  
\v 38 Weitaro wei, aniawete buredi abo abo yabai ibinu? Ane eawe wei. Weiro ane etate owetate weita, buredi fai ibinu, erio egi sadeini ibinua weita.  
\v 39-40 Weitaro Yesuma wei, wiawero kabesi aika maika yaufita wei. Weiro mui kabesiro uwara wani aderedi (100) yauta. Mui kabesiro uwara fifiti (50) yauta.  
\v 41 Enoma enoma utaro Yesuma buredi faini erio egi sadeini munite urero ereda Godi we ma kobererau uteda guriguri uite ma birabiarite Danu iwata ueta uwaraba mai. Mairo buredini erio egini i guruguru ubita uwaraba nata nata utaro ita.  
\v 42-43 Itaro dia uriro iwoiwo mutate bosio youtaro bosio tuero (12) wate fata.  
\v 44 Eme faiyawere, fai tausani (5,000) ieta ita.   
\s1 Yesu ogo deiroma Danu iwata ueta uwarabai ani  
\p
\v 45 Yesu Danu iwata ueta uwara ema ko boutiroma siaia uiro Besaida suro anebita.  
\v 46-47 Anebitaro Yesuma i uwara fefera siaia uiro anita. Anitaro Dawa maidaniro manite guriguri utebi. Wai ufie utebiro Danu aika nasiniro ibiro you mesau abanaro ibi.  
\v 48 Yesuma erebiro oyau derawere fariro i uwara jawe urebitana you anawa utebi.   
\p
\v 49 Wai ufie uiro Yesu ogo deiro burima inare inare aneda you serigari ufie ui.  
\v 50-51 Eno uiro Danu iwata ueta uwarama Dawa ereda imumu aba ane eraisi weitate iyareda weitaro wei, iya da uyawete neno kimu uawe. Ewana Na wei.  
\v 52 Weite youro amuiro oyau me sini. Oyau me siniro neno kirifu uta. Emanu neno kimuwereba buredini erio egini mairo ita i ueta iwata utawa uta.   
\s1 Yesuma Genesareta suro ofe keria wourebita uwara ma wirotebi  
\p
\v 53 Youro yofere ane Genesareta orofaro inata.  
\v 54 Inataro uwara faiyawere Yesu etana ema iwataba anitate ofe woureta uwara woutate Yesunu yaubi kabesiro woure fata.  
\v 55-56 Yesu kiki suro o dera suro o waiyaro aboro aboro anebiro ofe woureta uwara woutate fataro weita, Anu wadia fifiro burifete wirofene farisia weita. Weitate ana anama Yesunu wadiaro buriteda wirotebita.   
\c 7  
\s1 Bodere Ju uwaranu we mawetu ueta sina  
\p
\v 1 Moana Ferosi waita uwaraini tarawatu tisa uwaraini Jerusaremu suroma fatate Yesu atata.  
\v 2 Atatate etana Danu iwata ueta uwara ieta iteda age urotawa utebitaro eta.  
\v 3-4 Ferosini Ju uwaraini emanu sirorari baeta edono utebaita. Ieta itebaitana age uroegou utaita, o sitowaroma suro faraitana ieta itawa botai age uroegou utaita. Mui baeta deina! Kafusini okiaini naberoini enoma enoma uroegou utebaita.  
\v 5 Ferosi uwaraini tarawatu tisa uwarama Yesuba weita, Anu iwata ueta uwara yanu baeta uwaranu ueta sina munawa. Age urotawa ieta itaita weita. Aneba eno utaita weita?  
\v 6-7 Weitaro wei, ya sara siosa ueta uwara, Isaiyama yanu eno utaita iba owawa ue odiro enanari utaita. Ya meo bobo uwarade, Yesuma weite wei, Isaiyama eno ba owawa ue odi,  
\li1 ewa uwaranu neno kimuwereba Naba nenoma imutawa bebetuma torowa wegou utaitate emanu guriguri Nabai me sara utaita. Emenu imuetana Godinu imueta eno waita,  
\p Isaiyama yaba eno weiya wei.  
\v 8 Yesuma nono wei, Godinu tarawatu utawa, emanu baeta torowa utaita wei.  
\v 9 Godinu tarawatu ekodaitate emenu baeta ueta munaita wei.  
\v 10 Mosesima eno wei, yanu yanua yamamanu sinaini uetaini nautebeawete ititi kakara bobo yawotebeawe weiya wei. Weite wei, anama danuaini damamaba sina siosawere webisuna ma uiawe Mosesima eno weiya wei.  
\v 11 Weite wei, nono ya eno waita, mui amara danu danua damamaba eno wasu, nanu me maeta ibaiabai kobaniba yaba da mamau. I sinanu ubina Godiba me maeta, iba da mamau wasu, waita.  
\v 12-13 Eno waitaba emanu danua damamaba durua utawa uteda Godinu tarawatu abe sanaitate emenu baeta ma uyaraita. Yanu baeta deina enanari utebaita Yesuma wei.   
\s1 I emenu neno ma iga utasu ememetu  
\p
\v 14 Mui kowaro Yesuma i uwaraba weiro are fataro wei, Nanu sina nauegou uawete iwata uawe wei.  
\v 15 Ieta nesia mui amaranu ubarero anibitaitana da ma siosa ufitaita. Ietama dawa da ma siosa ufitaro ubareroma wawaro amufitaita ememetuma dawa ma siosa ufitaita wei.  
\v 16-17 (Ome bobo uwara ewa sina nauawe!) Eno weite i uwara nesia ekodite su ubarero amuiro Danu iwata ueta uwarama weita, kasei sinanu ubi anene weita?  
\v 18-19 Weitaro wei, ya iwata aba me wei? Ieta nesia mui amaranu nenoro da anibitate desiniro anibitaro duburo wisi areta kabesiro fafitaita iba i amara ma siosa da ufitaita wei. Weina ietata nesiana kobererau weda wei.  
\v 20 Ane ane neno ubareroma amufitaro bebetuma webisuna ina ima i amaranu neno ma siosa ufisu wei.  
\v 21-23 Weite nono wei, nenoroma ememetu amufitaitana i amara ma siosa ufitaita. Siosa imuetaini aruma dita yagera faretaini waira uetaini eme uretaini aweta dita yagera faretaini yaru ue diti ure owere ma owere uetaini neno ka uetaini iruetaini siosa uetaini meo wawei wetaini meo wetaini sasae uetaini me sara uetaini nesina nenoroma wawaro amutaitana ima i uwara ma siosa utaitaro iba siosa ueta utaita wei.   
\s1 Mui aweta danu nauetana danu arumaratu wiroi  
\p
\v 24 Yesu eno weite i Gareri orofa ekodite Taira subai orofaro fari. Farite mui suro kiwuma amuite ibiro i uwara iwata uta.  
\v 25 Mui aweta, danu seitaninu mui siosa imumuma rewoeta bobo arumaratunu danua dana nauite ido are farite arubi ui.  
\v 26 I aweta Ju aweta me, dana Guriki aweta. Danu suna Sairofonisia. I aweta fareda arubi uite nui wei, i seitaninu mui siosa imumu nanu arumanu ubarero rewoe ibinua we beraro anibi wei.  
\v 27 Weiro Yesuma wei, koiniboro ieta iteibitaro dia ureibiro kuasiriba mateibitaro iteibitaita wei. I kasei sinanu ubina edono, Ju uwarama Godinu sina botai mubitaro nono aika uwara Godinu sina duburo mubitaita weda wei.  
\v 28-29 Weiro wei, Dera Amara, ba wasu wei. Weite nono wei, i kuasiri koiniboronu ieta fufuno iteibitaita weina Yesuma wei, i sina ido rorowarau wenuro siosa imumu anu arumabairoma fare ainua, anu suro ania wei.  
\v 30 Eno weiba anite ane suro farite erina seitaninu mui siosa imumu i arumaratubairoma fare aniro i arumaratu me ainibi.   
\s1 Yesuma mui gogore bobo amara ma wiroi  
\p
\v 31 Yesuma Taira suini orofa ekodite Saidoni suini orofaro ane fari. Ane farite nono iroma owere Gareriro ani. Anedana i orofaini suini ekodite iroma ainewaure ue inarebe ane Dikaforisi orofaro farite iroma ane Gareri mesauro fari.  
\v 32 Iro ane fariro moana uwarama sina nautawa wegou utawa sina siosa webi amara woutate fareda weita, Anu age danu deiro odia weita.  
\v 33-34 Weitaro Yesuma i amara wawaro woure anite Danu age rorou i amaranu omero sanite witua uite i amaranu meana burite urero erite nenoma saneda wei, efata, i sinanu ubina uregari ua.  
\v 35 Eno weina i amara danu ome ido tarae yariro sina nauite sina kobererau webi.  
\v 36 I amara eno webiro Yesuma emaba wei, ewa ueta moana uwarabai da wiawe wei. Weiro nautawa utate daido webita.  
\v 37 Emanu neno kirifu derawere utate weita, Danu ueta nesia uegou utasuba ome nautawa uwara nautaitaro sina wiawa uwara sina waita weita.   
\c 8  
\s1 Yesuma fo tausani (4,000) uwara ieta mai  
\p
\v 1-2 Mui kowaro eme faiyawere guruguru uta. Utate ieta meba Yesu Danu iwata ueta uwaraba weiro fataro wei, i uwara Nabai kowa rarogonu ibinitaro ieta meba Na neno arama utatane wei.  
\v 3 Weite wei, odimaro anibitaitana emanu su yafawereba anebe dabaro osima uifitaita wei.  
\v 4-6 Weiro weita, eme ibawa orofade ieta aboro mubero ifitae weitaro wei, yabai buredi aboabo ibinu wei? Weina buredi seweni (7) ibinu weita. Weitaro Yesuma i guruguru ubita uwaraba wei, yauawe weiro yautaro buredi munite Godi we ma kobererau uite we imuteda guriguri uite ma birabiarite Danu iwata ueta uwaraba mairo mutate mataro ita.  
\v 7 Kiki erio egi dawa meratu enanari uite maite ewa mawe weiro mataro ita.  
\v 8 Itaro dia uriro ieta iwo muduna bosio nesia seweni (7) youta.  
\v 9 Eme faiyawere (4,000) uwarama ieta ita. Itaro Yesu ema odiro anita.  
\v 10 Anitaro Yesuini Danu iwata ueta uwaraini youro anitate Damanuta orofaro ane inata.   
\s1 I Ferosi uwara Yesunu buna ueta efitae wenaueta  
\p
\v 11 Ferosi waita uwara fatate yaraneta sina weitate Yesu wenauereda weita, moana buna ueta uaro ureroma fafiro efe weita.  
\v 12 Weitaro neno siosa uite neno saneda wei, ewa uwara aneba mui buna ueta doberaita wei? Nauawe wei. Mui buna ueta ewa uwaraba da umau weite i uwara ekodi.  
\v 13 Ekodite youro yofere mesau etarafu ani.   
\s1 I Ferosi uwaraini Erodi uwaranu wawareta ira yisiti sina  
\p
\v 14-15 Yesunu uwara buredi faiyawere munawa demurairatu torowa mutate anitaro wei, eforo wei. Ferosini Erodi uwaranu wawareta ira yisiti eforo wei. Wawareta ira yisiti kikiratu odifitaro i buredi ma derawere utebasu enanari emanu we mawetu ueta derawere ufiro uwara faiyawere naufitaita wei.  
\v 16 Eno weiro emanu emanu we mataneda weita, ya buredi munawaba iba eno wasu weita.  
\v 17 Weitaro Yesu emanu sina iwata uite wei, aneba burediba sina waita wei? Ya iwata uegou utawa? Yanu neno daido kimuwere?  
\v 18 Diti bobo eraitana erawa? Ome bobo nautaitana nautawa? Ya imutaita aba me wei?  
\v 19 Bodere Na buredi nesia fai (5) ma birabiarero eme faiyawere fai tausani (5,000) itaro iwo muduna bosio abo abo youta wei? Weina bosio nesia tuero (12) yousi weita.  
\v 20-21 Weitaro wei, nono buredi nesia seweni (7) ma birabiarero eme faiyawere fo tausani (4,000) itaro iwo muduna bosio abo abo youta wei? Weina bosio nesia seweni (7) yousi weitaro wei, awona i uero eta iwata utaita aba me wei? Ieta torowa da imuawete kobere naueta ueta imuawe wei.   
\s1 Yesu Besaida suro mui diti basugari bobo amara ma wiroi  
\p
\v 22 Besaida orofaro are fatate inataro moana uwara diti basugari amara woutate fareda weita, ewa amara buriaro wirofi weita.  
\v 23 Weitaro Yesuma i amaranu agero munite su wawaro woure ani. Wawaro woure anite i amaranu ditiro witua uite age deiro odeda wei, erasu aba me wei?  
\v 24 Weiro wei, na eme inaraitaro eratanerogo na eregou utawa. Emana ana ari inaraitaro eratane wei.  
\v 25 Weiro Yesuma Danu age nono deiro odiro erebe erebe wiroite eregou ui.  
\v 26 Eregou uiro Yesuma wei, yanu arisi suro da oweate anu suro torowa ania wei.   
\s1 Fitama Yesuba wei sina  
\p
\v 27 Yesuini Danu iwata ueta uwaraini Sesaria Firifai su suro anita. Anebe Yesuma wei, i uwarama naba anaiya waita wei?  
\v 28 Weiro weita, moana Joni babataito amara waita. Moana Iraija waita. Moana Godinu mui we bou ueta amara waita weita.  
\v 29 Weitaro Yesuma wei, nono yade Naba anaiya waita wei? Weiro Fitama wei, A i Kerisode wei.  
\v 30 Weiro Yesuma wei, i sina moana uwaraba da wiawe wei.   
\s1 Yesu Danu oferi woufite uifisu sina nono wei  
\p
\v 31 Yesuma mui sina nono eno wei, I Ba Eme Sini Amara faiyawere oferi woufiro baeta uwaraini fuyo ode sina weta uwaraini tarawatu tisa uwaraini Danu sina da mubitate Dawa ma uifitaro kowa rarogonu me sibiro uietaroma nono uyafisu wei.  
\v 32-33 Weiba Fitama Yesu mune eta odite dua sina weiro Yesu owerite Danu iwata ueta uwara erite Fitaba wei, seitani Nanu dubenaro fare ania wei. Anu imuetana Godinu imueta me, ina emenu imueta, Yesuma Fitaba eno dua sina wei.   
\p
\v 34 Duburo Yesuma i uwaraini Danu iwata ueta uwaraba yua weiro fataro wei, anama Nanu buribi afie ufisuna danu unu nesia ekodifite kobere ueta korosi ari mubite Nanu buribi aredibeibisu wei.  
\v 35 Weite wei, mui amarama danu unu ewa orofaro me ibifie ufisuna daido uifisu wei. Mui amarama Naini Godinu sinaba uifisuna dawa wirofite me ibene ibene ibeibisu wei.  
\v 36 Anama i orofa atata ibaiabairo danu unu nesia odifite i nesia mubiro danu me ibeta imumu siosa kabesiro feafisude ina kobererau aba me wei? Eno wenauerite ina ba me wei.  
\v 37 Weite wei, mui amara danu me ibeta imumu ma owere mubie uteda mui kobere emetu moko maeta kimuwereba iba eno da ufisu wei.  
\v 38 Anama ewa Godinu Sina nautawa kowaini siosa ueta kowaro Naini Nanu sinaba maru utasuna i Ba Eme Sini Amaraini Danu buna aneruini Danu Damamanu bunaini araetaro ido fafitaitana i amaraba moko a Na iwata me wemate ekodimau wei.   
\c 9  
\p
\v 1 Yesuma emaba wei, Nanu sina ba watane wei, moana ewado inaibinita uwara da uiforo Godinu yawotasu kowa botai bunawere fafiro efoita wei.   
\s1 Yesunu ibo nawatanu ereta aika uite me sini  
\p
\v 2-3 Kowa sikisi (6) me siniro Yesuma Fitaini Jeimisini Jonini wouriro dera maidaniro manitaro Danu ofe ubu aika siniro Danu wadia arioini inakeorau ui. Mui wadia uroeta amarama eno urotawa utebasu.  
\v 4-5 Iraijaini Mosesini me ari ue fasite Yesuini sina sina webitaro i amara rarogonu etate Fitama Yesuba wei, Dera Amara, ewado kobererau yaubinisiba kiki suraratu rarogonu Anu mui Mosesinu mui Iraijanu mui ufeisi aba me wei?  
\v 6 Ema derawere iyataba iba eno wei.  
\v 7 Weina goso ma yariro gosoroma sina tararite wei, ewana Nanu Amara ubiba Danu sina nautebeawe wei.  
\v 8 Weiro sau etana moana uwara iro me, Yesu torowa eta.   
\p
\v 9 Maidaniroma owetate tarareda wei, i ueta eritaba da weboro wei. I Ba Eme Sini Amara botai uietaroma uyafisuna i ueta ido weboro wei.  
\v 10 Weiro nautate we mataneda weita, i uietaroma uyafisu sinade ane weita?  
\v 11 Weitate Dawaba weita, tarawatu tisa uwarama eno waita, Iraija dawa ko afisu. Aneba eno waita weita?  
\v 12 Weitaro wei, ba waita. Iraija dawa ko farite ibeda nesia ue bou bou utebi wei. Godinu bukaroma Ba Eme Sini Amaraba eno wasu, oferi derawere woufiro Dawaba uwarama neno ka ufitaita, eno wasu wei.  
\v 13 Enoba yaba watane, Iraija fariro emanu unu enanari dawabai uta. Godinu bukaroma edono wasu, Yesuma eno wei.   
\s1 Yesu seitaninu mui imumu siosama rewoe ibi amakanu ma wiroi  
\p
\v 14 Yesuini Danu amara rarogonuini Danu inaibita iwata uwarabai are fatate etana uwara faiyawere inaibita. Iwata ueta uwarabai inare kara utaro tarawatu tisa uwaraini Yesunu moana iwata ueta uwaraini dua sina we mataneda inaibita.  
\v 15 Inaibitaro Yesu ido fariro etate neno kirifu utate Dawabai durami ue ane fatate ario weita.  
\v 16 Weitaro wei, ane sina waita wei?  
\v 17 Weiro mui amarama i guruguru ubita uwaranu turoma wei, nanu seitaninu mui siosa imumuma rewoe ibeta bobo amara woure emabai fanea wei.  
\v 18 Weite wei, i seitaninu mui siosa imumuma nanu amara danu sina daba garari utasute moana kowaro mu sanasuro ureiteda bebeturoma gugu farasute nio ataritasuro danu ofe bedada utasuba iba woure emabai fanea wei. Fanete botai Anu iwata ueta uwaraba wenero i imumu siosa we beratawa uita wei.  
\v 19 Weiro Yesuma wei, ya imutawa utaita uwara. Yabai kowa abo abo ibimaro imufoitago wei? Weite wei, i amara woure ara wei.  
\v 20 Weiro woure fataro seitaninu mui siosa imumuma Yesu erite i amara ma iyari iyari uite mu saniro ureite iwura mameda bebeturoma gugu farebi.  
\v 21 Eno utebiba Yesuma i amakanu danu damamaba wei, kowa abo abo eno utasu wei? Weiro wei, kikiraturoma dana eno utebe daisininu wei.  
\v 22 Moana kowaro ina buroini ogoro inufie danu torowa itarebasu wei. Enoba neno arama ufate durua ufasu aba me wei?  
\v 23 Weiro Yesuma wei, aneba ufasu aba me wasu wei? Anama Naini Godini imue naue ufisuna nesia eno ufisu wei.  
\v 24 Weiro i amaranu damamama i bobo derawere wei, na naueta amara wei. Weite wei, nanu naueta kikiratuba na durua ua wei.  
\v 25 Weiro i guruguru ubita uwarama durami ue arebitaba Yesuma i seitaninu mui siosa imumuba wei, nautawa wiawa imumu anibate nono da owere afaro wei.  
\v 26 Weiro i seitaninu mui imumu siosama arua derawere weite i amara ma iyari iyari uite fare ani. Fare aniro i amara uieta ari ainibiba moana uwarama weita, dawa uisinu weita.  
\v 27 Weitaro Yesu danu agero mamite ma uyariro yare inari.   
\p
\v 28 Yesu su ubarero amuiro Danu iwata ueta uwarama kiwuma Dawabai weita, etei seitaninu mui siosa imumu aneba we beratawa utaisi weita?  
\v 29 Eno weitaro wei, i eno seitaninu imumu siosa we berafoe utedana i guriguri ueta kowa torowa ieta ka ufote guriguri rorowarau ufoitana seitaninu imumu siosa we berafoita wei.   
\s1 Yesu Danu uifisu sina nono wei  
\p
\v 30-31 I orofa ekoitate iroma Gareri orofa fare serigari ue oita. Danu iwata ueta uwaraba we mawetu ufie kiwuma anite eno we mawetu uteda wei, Ba Eme Sini Amara moana uwaranu agero mafitaro mubitate ma uifitaro kowa rarogonu me sibiro uietaroma nono uyafisu wei.  
\v 32 Eno weiro Danu sinanu ubi iwata utawa utate iyatate i sinanu ubi wenauerawa uta.   
\s1 Anama derawere  
\p
\v 33 Yesuini Danu uwara inarebe Kafenamu suro are fataro Yesu mui suro amuite Danu uwaraba wei, dabaro inareda sina anene waita wei?  
\v 34 Weiro sina wiawa uta. Ema inaredana yaraneta sina we inarebita. We inareda eno weita, anama dera amara sibisu? Eno webitaba wenauerina iba moko sina wiawa uta.   
\p
\v 35 Yesu ido yaurite yua weiro Dawabai fataro emaba wei, anama dera amara sibie ufisuna i amara botai otowa amara sibite uwara nesianu durua ueta amara sibisu wei. Ewa sina Yesuma Danu naueta uwaraba eno wei.  
\v 36-37 Weite mui amakanu munite emanu tafioro odite yabaite wei, anama mui amakanu ario weda mubisuna dana Naini mubisu. Dawa Na mubisuna dawa Na siaia ui Godini mubisu wei.   
\s1 Yesuma wei, anama yaini wasai utawana dawana yanu naiye eno wei  
\p
\v 38 Jonima wei, Tisa Amara mui amarama seitaninu moana siosa imumu Anu ifuroma we beratebiro esite weisi, ana yaini yanu buribi inareta amara me, a eno ueta kodia weisi wei.  
\v 39 Weiro Yesuma wei, kodia da wiawe wei. Anama buna ueta Nanu ifuro utedana dawa Naba sina siosawere wiawa utebasu wei.  
\v 40 Weite wei, anama yaini Naini wasai utawa utasuna dawana yaini Naini durua ueta amara wei.  
\v 41 Eno weite wei, yana Kerisonu buribi inaraitaba Nanu ifuro mui amarama yaba ogo ifoe mafiro Godima i ueta da imutawa ufite moko daido mafisu. Iba yaba wegou utatane wei.   
\s1 Ueta siosabai woure ereta  
\p
\v 42 Mui amarama Nanu sina naueta amakanuba ba me maosoro siosawere uosoba i ba me maeta amaranu nodoro dera gebiro doifitate enearo sabitaro imuifirona ina kobererau Yesuma wei.  
\v 43 Anu agema a ma siosa ufisuna mui age umane tuate age demuraima ibifasuna ina kobererau. Age sadeima uitawa inaro anibasuna ina siosawereba iba anu age umane tua wei.  
\v 44 Enoba (iro i yareibisu inaro emanu ririraratu da uifitaro ina da ma wairumi ufitaita wei).   
\p
\v 45 Anu burima a mune siosa dabaro odifisuna mui buri umane tuate buri demurai torowama ibene ibene me ibetaro anibasuna ina kobererau. Buri sadeima ina kabesiro anibasuna ina siosawereba iba anu mui buri umane tua wei.  
\v 46 Enoba (Iro i yareibisu inaro emanu ririraratu da uifitaro ina da ma wairumi ufitaita wei.)  
\v 47 Anu ditima a ma siosa ufisuna diti enabira ma guju ue mu sate diti demuraima Godinu yawotasu orofaro eno anibasu ina kobererau. Diti sadei bobo ina kabesiro a sabisuna ina siosawere.  
\v 48 Iro ririraratu uitawa, ainewaure ateibita ina uifiro daido yareiene yareiene yareibisu wei.  
\v 49 Yesuma weite nono wei, Godima Danu ba kimuwere naueta uwara nesiaba emema emanu wari inaro yare fije ure ma rorowarau utaita i ari Godima Danu uwara inama yare ma rorowarau unono utasu wei. Eno uteda emanu naueta ma kimu ufitae kimuwere inama eme ba yarebasu i ari utasu wei.  
\v 50 Soruna kobererau. Sorunu imona me sibiro danu imona nono anene ibifisu? Enanari yana uteiboitana kobererau da sibisuna yana imona me sinasu soru ari. Enoba ya sorunu imona ari ibeda uwara nesiaba moko moko wesa kawewera utebeawe wei.   
\c 10  
\s1 Yesuma i awetabo awerasi okoetaba wasu sina wei  
\p
\v 1 Yesuma i orofa ekodite iroma Judiaini Jodani orofaro farite Jodani ogo yofere inariro i uwara Dawabai inare kara utebitaro Yesu Danu we mawetu ueta utebasu enanari utebi.  
\v 2 Eno utebina Ferosi waita uwarama Yesubai ue efitae fatate wenauereda weita, mui amara danu aweta ekodifisude, kobererau aba siosawere wiaro naufe weita? Danu moko sina anene webisu naufitae iba eno weita.  
\v 3 Weitaro wei, Mosesima yanu sirorari uwaraba anene wei?  
\v 4 Yesuma eno weiro weita, Mosesima eno wei, mui amara danu aweta ekodifie utedana ekoeta feifaro owawa ufite mafite nono ekodifisu weiya weita.  
\v 5 Weitaro Yesuma emaba wei, yanu neno kimuwereba iba eno webiya wei.  
\v 6-7 Godima ana ana ma taka ufiro mui amarama da ma dare mune aika maika odifisu wei. Boderewere Godima orofa atata nesia odeda awetaini awera ubu uiba ana amara danu danuaini damama ekodifite danu awetabai taka ufisuna ema sadei mero demurai ari sibisu.  
\v 8-9 Iba emana sadei me, demurai. Godima ana ana ma taka ufiro mui amarama da ma dare mune aika maika odifisu wei.   
\p
\v 10-11 Duburo su ubarero Danu iwata ueta uwarama dawaba i wei sina wenauetaro wei, mui amara danu aweta ekodifite mui aweta daido mubisuna i amarama dita yagera fafite danu botai awetaba siosa ufisu wei.  
\v 12 O mui aweta danu awera ekodifite mui awera daido mubisina uyare fafite danu botai aweraba siosa ufisu wei.   
\s1 Yesuma kiki koinibororaratu ma kobererau ui  
\p
\v 13 Moana uwara emanu koinibororaratu Dawabai woutate age deiro odifie wo fata. Fataro Danu iwata ueta uwarama dua sina weitaba Yesuma ibo uite emaba wei, ewaro da woure arawe da wiawe wei. I koiniboro fafitae watane wei. Godinu yawotasu emanu iba watane wei.  
\v 14 Eno weite wei, i uwara koiniboronu imueta ari imutaitaro Godima ema yawotasu wei.  
\v 15 Anama Godinu yawotasu koiniboronu imueta ari da mubisuna Godinu yawotasu orofaro da anibisu. Ba watane wei.  
\v 16 I koinibororaratu agema yabatebite mui age kofiri deiro odeda we ma kobererau utebi.   
\s1 I gugua gubari faiyawere amara  
\p
\v 17 Yesu i orofa ekodite dabaro ani. Anebina mui amara durami ue are farite jegirari uteda wei, kobere Tisa Amara, anene umate ibene ibene me ibeta mumau wei?  
\v 18 Eno weiba Yesuma wei, aneba Naba kobererau wasu wei? Mui amara kobererau me, Godi torowana kobererau.  
\v 19 Godinu tarawatu a iwata utasu. Eme da ua, aiyenu awetanu buribi da yowea, waira da ua, da irua, wawei sina webasuna meo da wia, anu anuaini amamaba kobererau uegou ua.  
\v 20 Enoma enoma weiro wei, Tisa Amara, na kikiraturoma eno utebatane wei.  
\v 21 Weiro Yesuma i amaraba neno arama uteda wei, demurairatu eno ufasu, aniate anu ibaiabai nesia maro oiya ufitaro nono ibaiabai me uwaraba anu oi nesia mafate Nanu buribi afasu wei. Anu i nesia emeba mafasu i ari ibaiabai duburo aba urero mafiro mubasu wei.  
\v 22 Weiro i amaranu ibaiabai derawereba danu ibo aika uteda neno siosa uite owerite ani.   
\p
\v 23 Yesuma Danu iwata ueta uwaraba owere owere uteda wei, ibaiabai derawere ode ibeta amara Godinu yawotasu orofaro anibie uteda kimu derawere atafisu wei.  
\v 24 Weiro ifowa ae furiataro Yesuma wei, masigu, Godinu yawotasu dabaro aneda kimu derawere utaitago wei.  
\v 25 Eno weite wei, dera kemo egima mara ebaro fare anibisuna nudawere. Ibaiabai derawere bobo amarama Godinu yawotasu dabaro anedana kimu derawere atafisu wei.  
\v 26 Weiro i sina kamama nauteda neno kirifu derawere utate weita, ina ba anama wirofisu weita?  
\v 27 Weitaro Yesuma ema ereda wei, emema eno da ufitaro Godima nesia ufite Danu aikana ma wirofisu wei.   
\p
\v 28 Weiro Fitama yare wei, nono yade koiniboroini ibaiabai nesia dubena sasite Anu buribi anaisi wei.  
\v 29-30 Weiro Yesuma wei, Nanu sina nauegou uawe wei. Anama danu suini daburetaini arumamini danua damamaini koiniboroini nasinini nesia Godinu sinaini Naba danu ibaiabai nesia dubena sabisu. Dubena sabite duburo danu suini adarabuini arumamini danuaini koiniboroini nasinini i nesia danu kodifisu i ari faiya faiyawere mubisu. nono ini awe uyareta dawabai fafisu. Nono duburo me ibene ibene ibeta mubite ibifisu wei.  
\v 31 Weite wei, moana dera uwara iro otowaratu sibitaita. Moana otowaratu uwara iro derawere sibitaita wei.   
\s1 Yesuma Danu uifisu sina nono wei  
\p
\v 32-33 Jerusaremu dabaro Yesu ko manebi. Maniro Danu iwata ueta uwara neno kirifu utate manitaro moana uwara iyatate manita. Yesuma Danu uwara tuero (12) munite kebiro anite duburo fafisu uetaba wei, Jerusaremu suro anibero mui amarama Ba Eme Sini Amaraba wawei sina webite mafiro dera fuyo ode sina weta uwaraini tarawatu tisa uwara dawa mubitate ma uieta sina webitaita wei.  
\v 34 Eno ufitate aika emeba mafitaro mubitate irufitate Danu ibo nawataro witua uteda domuma ufitaita. Eno utebe ma uifitaro uifiro kowa rarogonu me sibiro uietaroma nono uyafisu wei.   
\s1 Jeimisini Jonima nui Yesubai weisi  
\p
\v 35 Jebedinu amara sadei Jeimisini Joni Yesubai fasite weisi, Tisa Amara, wa sadei wanu imueta waba mai weisi.  
\v 36 Weisiro wei, yaba anene yanu unu mamane waisi wei?  
\v 37 Weiro weisi, Anu bunawere yaure yawoeta kowa ido fafiro A abanaro yaufaro Anu enabira enabira yaufune waitu weisi.  
\v 38 Weisiro wei, yanu wenauereta ya iwata mero, me sara waisi wei. Nanu woumane utatane oferi wakiki ogo ari ifawaisi? Nanu woumane utatane oferi babataito ueta ari ufawaisi aba me wei?  
\v 39 Weina aiwiade enanari ufutu weisi. Weisiro wei, aiwia, ba waisi. Nanu itatane wakiki ogo ifawate Nanu babataito ueta enanari ufawaisigo wei.  
\v 40 Eno weite wei, i yaureta kabesi sadei Nanu meba da mamaro da yaufawaisi wei. Moana uwaraba Godima i kabesi ue bou uiba Dana webiro yaufitaita wei.   
\p
\v 41-42 Danu moana uwara teni (10) i sina nautate Jeimisini Joniba ibo utaro Yesuma emaba yua weite wei, i aika dera yawoeta uwarama emanu uwaraba kimuwere yawoteda emanu imueta emaba kimuwere odaitaro ya ue iwata utaita wei.  
\v 43-44 Emanu ueta yanu me. Yabairoma anama dera amara sibisuna ya nesia durua ufisu. O botai amara sibisuna yanu sabua ueta amara sibisu wei.  
\v 45 Ba Eme Sini Amara ido fariro eme Dawaba durua utawa utaro emaba enademi durua uteda iba fari. Duburo Danu wiroeta onono uwara faiyawereba sabisuba mae munono ari siboita wei.   
\s1 Yesuma i diti basugari bobo amara Batimeusi ma wiroi  
\p
\v 46 Jeriko suro fare aneda Dawaini Danu iwata ueta uwaraini uwara faiyawere iroma anebitaro Timeiasinu amara Batimeusi dawa diti basugari erawa nui webi amara daba gigirariro yaubi.  
\v 47 Yesu fariro Dawa Yesu Nasareta amara nauite yua weite wei, Deiwidinu sisia amara Yesu, naba neno arama ua wei.  
\v 48 Weiro uwara faiyawere fatate weita, sina da wia weitana derawere yua weite wei, Deiwidinu sisia amara, naba neno arama ua.  
\v 49 Eno webiba Yesu inarite wei, i amaraba wiawero Nabai afi wei. Weiro diti erawa amaraba weita, iya da uyate uya weita. Weitate weita, Yesu aba yua wasua weitaba uyari.  
\v 50 Uyarite danu dei barueta ma kosugari uteda mu sanite Yesubai sau ane fari.  
\v 51 Ane fariro Yesuma wei, aba anene umane wenu wei? Weiro i diti erawa amarama wei, Dera Amara, nanu unu diti ba emane watane wei.  
\v 52 Weiro Yesuma wei, ania, anu imuetama a ma wirotasu weiro diti ido forairo erite Yesunu buribi ani.   
\c 11  
\s1 Yesu kini ari Jerusaremu suro ani  
\p
\v 1-2 Yesuini Danu iwata ueta uwaraini Jerusaremu dera natofo suro fafitae arebita. Arebe arebe are mui su sadei Betifeijini Beteni i oriwa maidanibai ibita. Enoba inarebe i su sadei ibita orofa abanaro are fata. Nono iroma Jerusaremu suna yafa me. Are fatate Yesuma Danu iwata ueta mui amara sadei siaia uteda wei, etei yanu ibo afu ibinu mui kirisi weto su ifu Betifeiji iro aniawate eawaro mui su gigirari tubune tutubaro bodere mui amarama yaurawa i otowa doniki egi nama doie odifitaro ibifiro efawaisina ido na ma uregari ue muawate Nabai woure arawa wei.  
\v 3 Eno weite wei, nono eno utebeawaro i doniki ubi uwarama ane utaisi webitate eno webitaita, aneba doniki na ma uregari ue munaisi webitaitana eno wiawa, yanu Dera Waria Amarama mubie wenuba munaisi wiawaro mafita wei.  
\v 4 Weiro ido anisite otowa doniki atasina i doniki su bebetobai tutuburo uwane oitaro inaibiro esite na ma uregari utebisi.  
\v 5 Eno utebisiro i doniki egi ubi uwarama weita, ya ane utaisi weita? Aneba doniki na ma uregari utaisi weita?  
\v 6-7 Weitaro i amara sadeima Yesunu wei sina weisiba ekoitaro doniki Yesubai woure anisi. Ane fasite emanu dei barueta wadia deiro oisiro Yesu ido amo yauri.  
\v 8-9 Eme faiyawere wadiaini farai tataini dabaro ode anebitaro Yesuma fare anebiro botairo anebita uwaraini duburo arebita uwaraini nesia derawere yua weitate weita, yanu Dera Waria Amara weita. Yanu Dera Godinu ifuro farasu Amarana ido farinu osana inu ubina kobererau weda weita. Godima dawaba kobererau utedibebasu weita.  
\v 10 Dawa ido farinuba yanu sirorari amara kini Deiwidima yaure yawotebi i ari nono fafisu. Iba Godima ina ma kobererau utasu weita. Weda derawere yua weita, yanu etua urero Dera Amara osana inu ubina kobererau weda enoma enoma webitaro fare ani.  
\v 11 Fare anite Jerusaremu suro ane farite Dera dubu su ubare mui koruro amui. Amuite iro ane ane nesia erebiro yawi siniba ekodi. Dawaini Danu uwara tuero (12) owere Beteni suro ane fata.   
\s1 Yesuma i boruba ana dodoa wei  
\p
\v 12 Waura warai Beteni su ekoitate aneda Yesu osi uri.  
\v 13-14 Osi uriro warae ibeta bobo boruba ana iro erite tai mune ifie ani. Ane farite erina tai uwaneta kowa me, tata torowaba wei, a tai da uwanebearo anu tai uwarama da iteibitae watane weiro Danu iwata ueta uwara nauta.   
\s1 Yesu dera dubu suro ani  
\p
\v 15 Nono owere Jerusaremu suro are fataro Yesuma dera dubu su ubarero amui. I kakara koruro anawa. Moana koruro amuite oiya ue maeta uwaraini oiya ueta uwaraini yoweriro itataro emanu oi moko mae matata uwaranu kaiyoini fuyo ubani oiya ue mata uwaranu yauretaini mu saniro ma regari uta.  
\v 16-17 I fefenaroma ego woureta uwara da anibitae garari uite wei, Godinu bukaroma eno wasu, Nanu suna eme nesianu guriguri ueta su. Eno wasu aba me wei? Yana waira ueta uwaranu su ari utaita wei.  
\v 18 Weiro i dera fuyo ode sina weta uwaraini tarawatu tisa uwaraini i sina nautate Yesu ma uieta daba dobereda iyarebita. I uwara nesia Yesunu sina nauegou utebitaba iyarebita.  
\v 19 Yawi siniro Yesuini Danu uwaraini i su ekoitate anita.   
\s1 I boruba anaba we mawetu ueta  
\p
\v 20-21 Wau urina dabaro fare aneda etana i dodoa wei boruba ana torowa sibu uriba Fitama wei, Dera Waria Amara, boruba anaba Ana dodoa weiro sibu urinu, ea wei.  
\v 22 Weiro Yesuma wei, Godi kimuwere imutebeawe wei.  
\v 23 Nanu sina wemaro nauawe wei. Anama i maidaniba webisu, uyate enearo ania, eno webite kimuwere imuteda da imutawa ufisuna enanari ufisu.  
\v 24 Ane ane wenauereda guriguri ufote kimuwere imuegou ufoitana mafiro muboita ina yanu wei.   
\p
\v 25 Yana inaibeda guriguri ufoitana mui amarama yaba sara siosa ueta ufiro yana imutawa ufoitaba yanu urero Babama yanu neno neno ueta mubite imutawa ufisu wei.  
\v 26 Yanu yaiyemutunu sara siosa ueta da mune imutawa ufoitana yanu urero ibinu Baba yanu sara siosa ueta da mune imutawa ufisu wei.   
\s1 Yesunu bunaba wenauereta  
\p
\v 27-28 Jerusaremu suro nono owere anita. Dera dubu su fefenaro inarebina dera fuyo ode sina weta uwaraini tarawatu tisa uwaraini baeta uwaraini faiyawere Dawabai fatate weita, A arotorowaba Anu bunaro eno utasu? Anama aba buna mairo eno utasu weita?  
\v 29 Weitaro Yesuma emaba wei, Nanu wenauereta botai yaba wemaro Naba yanu kobererau moko weboitana ananu bunaro utatane wemau wei.  
\v 30 Joninu babataito ueta ureroma Godima weiro ui aba emema weitaro ui wiawero nauma wei.  
\v 31-33 Weiro sina we matatate weita, ane webeisi? Ureroma fari webisuna Dana eno webisu, aneba Joninu wei sina imutawa uta webisu weita. O emebairoma webeisi aba euwari weita? I uwara nesiama imuta, Joni ba we bou ueta amara imutaba iyareda weita, ya iwata me weitaba Yesuma wei, ananu bunaro utatane sina yaba da wemaro naufoita wei.   
\c 12  
\s1 I gureifi tai beata yawotebita siosa uwaraba kasei sina  
\p
\v 1 Yesuma mui kasei sina Danu torowaba emabai eno wei, mui amara gureifi tai waiya umanite jiru turite gebiroma dowa ure kara uite gureifi amune adidiareta koru ubu uite danu dobo uite gureifi yo wai. Eno uite danu waiya moana uwaraba yawofitae mateda mui orofaro ani.  
\v 2 Duburo ayo ureta kowa fariro danu mui waiya ueta amara danu gureifi mubie siaia uiro ani.  
\v 3 Ane fariro i waiya yawotebita uwarama i amara mutate isuma urebe gureifi matawa, ma owetate siaia utaro ani.  
\v 4 Aniro nono mui amara siaia uiro ani. Ane fariro mutate kofiriro urebe siosa ueta uteda siaia utaro ani.  
\v 5 Nono mui amara siaia uiro ani. Ane fariro mutate ma uitaro duburo uwara faiyawere siaia utebiro anebitaro moana isuma urebitate moana ma uitebita.  
\v 6 Enoma enoma utebitaro moana uwara meba i waiya ubi amara danu torowa nenoro we imui, nanu amara ubi siaia umaro dawaba kakara ufitaita we imuite siaia uiro ani.  
\v 7-8 Ane fariro emanu emanu we mataneda weita, ewana danu amara ubiba ma uifete danu waiya yana mubeisi weitate dawa muneda ma uitate danu ofe dowa dubenaro sata.  
\v 9 Eno utaba i waiya ubi amara anene ufisu? Dawa anibite i waiya yawoeta uwara nesia ma uifite danu waiya aika uwaraba mafisu wei.   
\p
\v 10 Godinu bukaro i sina yawitaita aba me? Na iwata ya yawitaita. I bukaroma eno wasu,  
\li1 su ubu ueta uwarama mu sata gebirona i botai tutubu ari sini.  
\v 11 Ewa yanu Godinu uetaba kamama eraisi,  
\p eno wasu wei.   
\p
\v 12 Yesuma i kasei sina emaba weiba Dawa mune ma uieta daba dobetate i uwara nesiaba iyareda ekoitate ane me sita.   
\s1 I takesi oetaba wenauereta  
\p
\v 13 Moana uwarama Ferosi uwaraini Erodi uwaraini Yesunu sina irue nauteda mubitae siaia uta.  
\v 14 Siaia utaro Yesubai ane fatate weita, Dera Amara, Ana meo amara me, ba amara ya iwata utaisi. Uwara nesia arotorowa imutasu. Eme derawere aba kikiratu eno imutawa utasute Godinu sina we mawetu uegou utebasuro ya iwata utaisi weita. Ibago Romani dera gaemani amara Sisaba takesi oi mafeisi aba me weita?  
\v 15 Weitaro emanu irueta imueta Dawa iwataba wei, aneba Na woure eraita wei? Siriwa oi maiwero ema, weiro mata.  
\v 16 Mataro i oi ereda wei, ananu kofirini owawaini ewado ibinu wei? Weiro Sisanu weita.  
\v 17 Weitaro wei, Sisanu ane ane dawaba mawete Godinu ane ane Dawaba mawe weiro kamama nauta.   
\s1 I uietaroma uyaretaba wenauereta  
\p
\v 18-19 Duburo Sadusi uwara Yesubai fata. I uwarama webita, uwara uietaroma da uyafitaita we inarebita. Yesubai are fatate emanu wenauereta sina weita, Dera Amara, Mosesima wei, mui amara aweta mubite aruma amara yanae munawa me ibebe uifisu. Uifiro danu dabuema danu aweta wabu mubiro i uieta amaraba aruma amara yanae mubisu eno owawa ui weiya weita.  
\v 20 Eno weitate weita, adarabu seweni (7) ibebe botai amarama aweta munite aruma amara yanae munawa me ibebe ui.  
\v 21 Uiro danu abana dabuema danu aweta wabu munite aruma amara yanae munawa, me ibebe ui. Uiro danu mui abana dabuema munite aruma amara yanae munawa me ibebe ui.  
\v 22 Uiro enoma enoma i amara sewenima mutate aruma amara yanae munawa uie me sitaro i aweta ido ui.  
\v 23 Duburo i uie uyareta kowaro abo amarama i aweta mubisu? I amara seweni mutaba anama mubisu weita?  
\v 24 Weitaro wei, Godinu bukaro sinaini Danu buna ya iwata meba imutawa utaita wei.  
\v 25 Urero aneruma aweta munawa utaita enanari eme nesia uietaroma uyafitate awetaini awera da mubitaita wei.  
\v 26 Uieta emenu uyareta Mosesinu bukaro yawitaita aba me? I ina yarebi ananu ikiki yawitaita aba me? I ikikiro Godima Mosesiba wei, Nana Eibaramunu Godi, Nana Aisikinu Godi, Nana Jeikofunu Godi eno wei.  
\v 27 Godina i uieta uwaranu Godi me, Dana i wiroeta uwaranu Godi, iba ya iwawa utaita Yesuma wei.   
\s1 Godinu dera tarawatu  
\p
\v 28 Sina sina webitana mui tarawatu tisa amarama farite Yesunu kobere sina nautebe imuteda Yesuba wei, abo tarawatuna derawere wei?  
\v 29 Weiro Yesuma wei, i dera tarawatuna eno, Isaraero uwara, nauawe, yanu Dera Godi, Dawa Godi demurai torowa.  
\v 30 Yanu Dera Godibai yanu unu uetaini imueta nesia odegou utebeawe wei.  
\v 31 Mui dera tarawatuna eno, yanu yaiyemutuba yanu torowa ari neno arama utebeawe. Mui dera tarawatu me wei.  
\v 32 Weiro i amarama wei, ba wasu, Dawa demurai, Godi mui me.  
\v 33 Dawaba neno arama uegou ufete imuegou ufete uegou ufete yanu naiyemutuba yanu torowa ari neno arama uegou ufe, enona kobererau. Fuyo oetaini fuyo yaretaini kobererau me wei.  
\v 34 Weiro danu sina kobererauba Yesuma wei, Godinu yawoeta daba baworo anibae utasu wei. Weiro mui wenauereta wiawa uta.   
\s1 Emenu Godima we mune odi amaraba wenauereta  
\p
\v 35 Yesuma dera dubu su ubarero we mawetu uteda wei, i tarawatu tisa uwarama Keriso Dawa Deiwidinu sisia amara aneba eno waita wei?  
\v 36 Imumu Kotofuma Deiwidiba mawetu uiba Deiwidima wei, Godima Nanu Dera Waria Amaraba wei, Nanu banibira age afu yauaro Aini wasai utaita uwaraba buna umate Anu buri wowonaro odimau wei, Deiwidima eno weiya wei.  
\v 37 Deiwidima Dawaba Waria Amara weide anene Keriso Dawa Deiwidinu sisia amara sini wei?   
\s1 Yesuma i tarawatunu tisa uwaraba eme nesia we kakara ui  
\p
\v 38-39 Yesuma eno weiro i uwara nesia Danu sina nauegou utaro mui we mawetu uteda wei, eforo moana tarawatu tisa uwara yafa asugari ueta wadia barufitate i maketiro inaraita uwaranu ario sina naufitate Ju uwaranu dubu su kobere yaureta kabesiro yaufitate ogaro kowaro kobere yaureta kabesiro yaufitae utebaita.  
\v 40 I uwara emanu unu enoma enoma utedana guriguri yafawere moana uwarama naufitae iba webaitate nono wabu awetabonu ibaiabai waira utebaitaba emaba fanisi derawere mafisu wei.   
\s1 I aweta waburatunu fuyo  
\p
\v 41-43 Duburo Yesuma dera dubu sunu me maeta mauabai yaubeda erebiro uwara faiyawere emanu oi fare sanebita. Moana ibaiabai bobo derawere uwara oi faiyawere sanebitaro nono duburo ibaiabai faiya me wabu aweta are farite danu toea sadeiratu saniro Yesuma Danu iwata ueta uwaraba weiro fataro wei, Nanu sina nauawe wei.  
\v 44 Weite wei, ewa wabu aweta danu ieta oiya ueta oi nesia saninu iba dawa danu oi derawere saninu. Ibaiabai derawere bobo uwara oi faiyawere sanitaro emabai faiya faiyawere ibinuba iba kikiratu sanita wei. Nono i wabu aweta danu oi nesia saninu wei.   
\c 13  
\s1 Yesu i dera dubu su ma siosa ufitaita sina wei  
\p
\v 1 Yesu I dera dubu su ekodite itarebiro Danu mui iwata ueta amarama wei, Dera Amara, gebiro deraraboini su su derawere ea wei.  
\v 2 Weiro Yesuma wei, i dera su su erasu? Gebiro nesia ubefitaro mui gebiroma mui gebiro deiro da ibifisu wei.   
\s1 Kerereini oferi derarabo  
\p
\v 3-4 Duburo Oriwa maidaniro yaubeda dera dubu su erebiro Fitaini Jeimisini Jonini Enuduruini emanu aika fatate Dawaba weita, Anu wenu sina enanari abododo ufisu? I dubu kowaro anene ufiro efero A fafasu weita?  
\v 5 Weitaro Yesuma yare wei, eregou uforo wei.  
\v 6 Uwara faiyawere irufitae Nanu ifuro fafitate webitaita nana Keriso, nana Keriso, enoma enoma iruteda webitaro uwara faiyawere naufitaita wei.  
\v 7 Baworo uraneta rurua naufote emiro uraneta sina naufoitana da iyaforo wei. Enoma enoma ufiro i me sibisu kowa duburo fafisu wei.  
\v 8 I orofa atata uwara aika maika urafitaro mui orofa gaemanini mui orofa gaemanini urafitaro orofa faiyawerero nasini wawana wawana ufiro orofa faiyawere sinai derawere woufitaro enoma enoma ufiro i awe uyareta kowa ido tutubari ufisu wei.  
\v 9 Eregou uforo wei. Ya woufitate kanisoro uwarabai woure anibitaita. Ju uwaranu dubu su ubarero isuma ufitate gaemani uwaraini kini uwarabai woure anibitate Naba ya eno ufitaro emaba Nanu sina weboro iwata ufitaita wei.  
\v 10 Godinu kotofu sina i orofa atata uwara nesiabai botai we anibitaro duburo i me sibisu kowa ido fafisu wei.  
\v 11 I uwarama awe uyareta fafisu kowaro are ya mubitate woure anibitaro ya sina ane weboita da imuforo wei. Godima imueta yaba mafiro sina weboita wei. Ya i sina da weboro Godinu Imumu Kotofuma yanu bebeturoma webisu wei.  
\v 12 Dataema dabueba do mafiro ma uifitaro damama danu amaraba enanari ufiro aruma amara emanu danuaini damamaba wawei webitaro ma uifitaita wei.  
\v 13 Ya Nanu ifu munaitaba i uwara nesia yaba neno ka ufitaita. Anama buna ufiro dubu kowa fafiro dawa wirofisu wei.   
\s1 Daido ba me aramararabo emetu fafie utasu  
\p
\v 14 Mui kowaro i siosa emetu danu ibeta kabesi mero iro ibifiro efoita. Eforo i kabesiro ibeda siosa ueta faiyawere uteibiro ya yawitaita uwara ido iwata ufoita wei. Judia orofaro ibinita uwara maidaniro sau manibitaita wei.  
\v 15 Su ofadaro yaubifitaita uwara su ubarero emanu ibaiabai mubitae da anibitaita.  
\v 16 Waiya uteibitaita uwara da owefitate wadia da mubitaita.  
\v 17 I kowaro dia bobo awetaboini ama ieta kuita bobo awetaboini emanu anibitaita daba siosawere.  
\v 18 Guriguri uteda i awe kowa obi derawere mafisu kowaro da fafie wiawe wei.  
\v 19 I kowa faiyawere fafitaro awe awe derawere uyafitaita. Boderewere Godima i orofa atata ubu ui kowaroma eno me, awona eno erawa utaisi, i kowa me sibiro nono duburo eno da efeisi wei.  
\v 20 Godima i kowa faiyawere ma fuyaratu da ufirona eme nesina uifitae. Nono Danu we muni uwara imuteda iba i kowa faiyawere nono ma fuya ui wei.   
\p
\v 21 Nono mui amarama yaba webisu, keriso ewado o keriso iro eawe eno webisuna da nauforo wei.  
\v 22 Irueta kerisoini irueta we bou ueta uwaraini faiyawere fafitate buna uetaini buna eretaini derawere ufitaro emanu tanana emema efitaita. Eno ufitate Godima Danu we muneta uwara irufitae ufitaita.  
\v 23 Ewa sina nesia yaba wataneba nauegou uforo wei.   
\s1 I Ba Eme Sini Amaranu fafisu kowa  
\p
\v 24-25 Awe kowa nesia me sibiro kowa basugari ufiro sakara ario da ufiro muina ureroma tarafitaro urenu buna derarabo nesia wawana wawana ufitaita.  
\v 26 Nono i Ba Eme Sini Amara gosoro bunaini ario derawere ido fafiro efitaita.  
\v 27 Dawa Danu aneru siaia ufiro anibitate kowa itarasu iroma kowa amutasu iroma ufuniro manamaro aboro aboro ure nasiniro Danu we mune odi uwara nesia mubitaita wei.   
\s1 I boruba anaba we mawetu ueta  
\p
\v 28 Boruba ana eawete iwata uawe wei. Boruba ana tua reka oyarasuro eredana ya iwata, obi kowa ido farinu waita wei.  
\v 29 Enanari ewa watane nesia ufiro efote iwata ufoita. I Ba Eme Sini Amara Dawa fafie bebetoro inarinu iwata ufoita wei.  
\v 30 Nanu sina ba wemaro nauawe wei. Ewa ibinita uwara da uifitaro i wene enanari botai nesia ufisu wei.  
\v 31 Ureini nasini nesia me sibitaro Nanu sina daido ibeibisu wei.  
\v 32 I Yesunu fafisu kowa eme iwata me, urero ibinita aneru iwata me, Godinu Amara Dawa iwata me, Godi torowa Dawa iwata utasu wei.  
\v 33 I fafisu kowa ya iwata meba nauegou ufote eregou uforo wei.  
\v 34 Ewana ewa sina ari, mui amara mui orofaro anibie uteda danu waiya ueta uwarabai emanu gaukara demui demui maite danu dera yawoeta amaraba wei, toafurau yawofaro wei.  
\v 35-37 Enanari yaba wataneba i Dera Amaranu fafisu kowa ya iwata me. Dawa dumu gisigisiro o dumu abanaro o waibai o waura warairo ido fafiro nauta ainibiforo eosoba yaini uwara nesiaba toafurau yawoforo watanea wei.   
\c 14  
\s1 Dera uwarama Yesu ma uifitae we turebita  
\p
\v 1-2 Godima i Isaraero uwara Ijifiroma woure ani ogaroini wawareta ira yisiti me buredi ogaro kowa sadei fafiro iteibitaitaba dera fuyo ode sina weta uwaraini tarawatu tisa uwarama Yesu kiwuma mubitae utate Yesunu ma uieta daba we turebe weita, ogaro kowaro da budari ufeisi weita. Eno uoisiro uwara nesia emanu emanu aika ibo uotote uraotoa weita.   
\s1 Mui awetama Yesu Beteni suro munowere ogo tare odi  
\p
\v 3 Yesuma Beteni suro ibeda Saimoni, dera amaima boboro wiroi amaranu suro yaubeda ieta itebina mui aweta munowere ogo gebiro kawabu, i kawaburo munowere ogo danu dawana derawere, i kawabu woure amo farite ma fomuite i munowere ogo Yesunu kofiriro ma wegari ui.  
\v 4 Eno uiba moana Dawaini yaubita uwarama ibo uteda dua sina weita, aneba me sara saninu?  
\v 5-6 Etei munowere ogo oiya ue mafite toti kina (K30) mubite ibaiabai me uwaraba mafisu ina ido weita. Weitate i awetaba ibo utaro Yesuma wei, kodiawete i awetaba dua sina da wiawe wei. Naba kobererau usinu.  
\v 7 Ibaiabai me uwara yabai ainewaure ibeibitaitaba yanu unu durua ufoe ufoitana ufoita. Na yabai ainewaure da ibimau wei.  
\v 8 Dawa Nanu ofero munowere ogo ma wegari usinuba Nanu uri ue oeta ue bou usinu wei. Nanu sina wemaro nauawe wei.  
\v 9 Godinu kotofu sina orofa atata nesiaro we inareda danu ueta imuteibitaita wei.   
\s1 Judasi Yesu do mafie unu ui  
\p
\v 10-11 Judasi Isikarioti, dawa Yesunu mui tuero (12) iwata ueta amara, dana dera fuyo ode sina weta uwaraba wawei webie fare anite weiro nautate yaru utate oi mafitae weita. Weitaro Judasi Isikariotima Yesu do mafie daba doberebi.   
\s1 Godima Isaraero uwara Ijifiroma woure ani ogaro Yesu Danu iwata ueta uwaraini i.  
\p
\v 12 Wawareta ira yisiti me buredi ogaro, danu botai kowa ido fariro Godima Isaraero uwara Ijifiroma woure ani mamoenatu ogaro uetaba urebitaro Danu iwata ueta uwarama weita, Anu ogaro aboro ufete ifeisi weita?  
\v 13 Weitaro Yesuma Danu mui iwata ueta amara sadei siaia uteda wei, natofo suro aniawate mui ogo woureta amara efawaisina danu buribi aniawa.  
\v 14-15 Aniawate danu suro fawate i su yawoeta amaraba eno wiawa, wanu Dera Amaraini Danu iwata ueta uwaraini ogaro aboro ifie wenu webawaisina i amara yaba dera su koru mui etu deiro mafisu. Mafiro ogaro ueta mune bou uawa wei.  
\v 16 Weiro suro anisite Yesunu sina enanari usite ogaro ueta ue bou usi.   
\p
\v 17-18 Yawiro Dawaini Danu iwata ueta uwara tueroini i suro amo fataro yautate ogaro itebe wei, mui yaini ieta itaisi i amarama Na do mafisugo wei.  
\v 19-20 Eno weiro neno siosa uteda weita, na aba anaiya? Enoma enoma nesina weitaro wei, mui tuero iwata ueta amara naberero dawaini Naini ieta munaitu. I munasu amarama Na do mafisu Naini ieta arotorowa itaitu idoni wei.  
\v 21 Godinu bukaroma wasu i Ba Eme Sini Amara enanari uifisu wei. I Ba Eme Sini Amaraba do mafisu amara danu siosa ueta derawereba danu danuama dawa da mubirona ina kobererau wei.   
\s1 Areto ieta kowa  
\p
\v 22 Yesuini Danu uwaraini ogaro itebe ieta munite Godi kobererau we imuteda guriguri uite ma birabiarite mateda wei, muawe, ewana Nanu ofe wei.  
\v 23-24 Kafusi munite Godiba we kobererau uteda guriguri uite mairo i uwara nesia itebitaro wei, ewana Nanu reka unuro ue matanetanu onono eme faiyawereba itafisu wei.  
\v 25 Nanu sina wemaro nauawe wei. Ewa na didi tai dumamuba ba wemaro nauawe wei. Ewa na didi tai dumamu ewaro nono da imate nono duburo Godinu yawotasu orofaro nadidi tai dumamu nono imau wei.  
\v 26 Soniroma Godiba we kobererau uteda soni weitate Oriwa maidaniro manita.   
\s1 Yesu Fitama Dawa iwata me webisu sina we bou ui  
\p
\v 27 Oriwa maidaniro manebe mane fata. Fatate Yesuma wei, ya nesia Naba maru ufote ekodifoitaba Godinu bukaroma eno wasu, i mamoe yawoeta amara umaro i mamoe nesina daba aika maika anibitaita eno wasu wei.  
\v 28 Nono duburo Godinu bunama Na ma uyafiro Na ko Gareriro animau wei.  
\v 29 Weiro Fitama wei, i uwara nesia Aba maru ufitate ekodifitaro na Aba maru da umate da ekodimau wei.  
\v 30 Weiro Yesuma wei, Nanu sina naua wei, awona dumuro kokora nono webite nono webite ufiro a ko Nanu ifu rarogonu we ma feareda meo webasu wei.  
\v 31 Weiro Fitama daido webe wei, Aini naini uifutuba Aba meo da wemau wei. Weiro Danu moana iwata ueta uwara nesina enanari webita.   
\s1 Yesu Gesemani beataro guriguri utebi  
\p
\v 32 Gesemani orofaro ido ane fatana Yesuma Danu iwata ueta uwaraba wei, yauawero Na guriguri uma wei.  
\v 33-34 Fitaini Jeimisini Jonini wourite anite Danu neno siosa derawere uteda wei, Nanu neno bomu kakei utasuba Na uieta neno utasu wei. Yaubeda yawoawe wei.  
\v 35 Weite yafa me fuyaratu anite arubi ubeda guriguri uteda wei, Baba, ewa wai Nabairoma mubae ufasuna mua wei.  
\v 36 Eno weite wei, Nanu Baba, A nesia ufae watane. Ewa siosawere wakiki ogo ari Nabairoma anibisuna anibisu. Nanu unu da uate Anu unu torowa ua wei.  
\v 37 Eno weite owerite fariro nauta ainibitaro Fitaba wei, nauta ainibinu? Wai fuyaratu yawotasu aba me wei?  
\v 38 Yawoegou uawete guriguri uawe. Siosawere ue ereta yabai faosoro ya siosa uotoa wei. Yanu nenonu unu ufoitana nono yanu ofena buna meba da ufoita wei.  
\v 39-40 Eno weite anite Danu bodere wei sina enanari guriguri uite owerite fariro nono nauta ainibitaro emanu diti nauta uiba moko sina wiawa uta.   
\p
\v 41 Utaro anite nono owerite farite wei, nauta ainibeda imoitaita wei? Ido uyawe. Nanu do maeta kowa farasuba siosa uwara Na mubitaita wei.  
\v 42 Uyawero anibe. Nanu do masinu amara ido farinua eawe wei.   
\s1 Yesu yabatate budari uta  
\p
\v 43 Yesu eno weina Judasi mui tuero iwata ueta amaraini uwara faiyawere kaiyaini isuini woutate fata. I dera fuyo oeta uwaraini Ju uwaranu baeta uwaraini emana ema siaia utaba iba fata.  
\v 44 Auboko Judasima wei, i amara nana koku umaro efoitana ido muawete sau aniawe wei.  
\v 45-46 I orofaro farite Yesubai anite wei, Tisa Amara weite koku uiro yabata.  
\v 47 Yabataro Danu mui inaibi iwata ueta amarama danu kaiya munite i dera fuyo ode sina weta amaranu waiya ueta amaranu ome umane kosari ui.  
\v 48 Yesuma i uwaraba wei, aneba Na waira ueta amara ari munaita?  
\v 49 Dera dubu suro kowa faiyawere we mawetu utebitararo iro Na munawa utate aneba awona kaiyaini isuini mune faraita wei? Godinu bukaroma eno wasuba enanari utaita wei.  
\v 50 Weiro Danu iwata ueta uwara nesina Dawa ekoitate iya durami ue anita.   
\p
\v 51-52 Yesunu mui buribi inareta amara inaibeda wadia torowa baruite inaibiro dawa mamitaro danu wadia okodite ofe torowa durami ue ani.   
\s1 Yesu i kanisoro uwaranu iboro inaibi  
\p
\v 53 I Dawa budari uta uwarama Yesu agero mamitate dera fuyo ode sina weta amaranu suro woure are fataro fuyo ode sina weta uwaraini Ju uwaranu baeta uwaraini tarawatu tisa uwaraini guruguru utebitaro iro are fata.  
\v 54 Fataro Fitama yafawere emanu buribi anite dera fuyo ode sina weta amaranu su teteuro are farite yaubi. Dawaini moana waiya ueta uwaraini ina gigirariro yaubita.   
\p
\v 55 I fuyo ode sina weta uwaraini kanisoro uwara nesia Yesu ma uieta daba doberebe atanawa uta.  
\v 56 Moana uwarama uyareda meoma wawei webitaba imueta daba demurai me.  
\v 57-58 Moana uwarama uyareda meo sina weita, ewa amarama botai wei, eme agema uta dera dubu su ma jugari umate kowa rarogonu me sibiro reka su agema da umate sau ue me simau weiya weita.  
\v 59-60 Moana eno weitaro moana aika sina weitaro dera fuyo ode sina weta amara danu kabesiroma uyareda Yesuba wei, i uwaranu sina nausinu? Aneba A sina mui wiawa? Anene webasu?  
\v 61 Weiba Yesu sina wiawa uiro dera fuyo ode sina weta amarama nono wei, Ana Godinu Amara Keriso aba me wei?  
\v 62 Weina aiwiade weite wei, Ba Eme Sini Amara i buna derawere Godinu banibira age afuro yaufite gosoro fafiro efoita wei.  
\v 63 Eno weiba i dera fuyo ode sina weta amara i sinaba ibo uite danu wadia ma babareda wei, mui wawei weta uwara yua da webe wei.  
\v 64 Danu meo sina nauitaba anene weboita wei? Weiro sina daba demurai weita, Danu sina siosawereba ma uifitae weita.  
\v 65 Weitaro moana uwarama Dawa witua uteda Danu diti wadiama garari utate agema ureda weita, anama A urasu? Wiaro naufe weita. Eno weitaro meremere uwarama Yesu mutate agema urebita.   
\s1 Fitama Yesunu ifu we ma feareda meo wei  
\p
\v 66-67 Fita su teteuro yaubi. Ido yaubiro dera fuyo ode sina weta amaranu mui waiya ueta aruma fare anebe erina Fita ina gigirariro yaubiro ereda wei, a i Nasareta Amara Yesuini iro ibi wei.  
\v 68 Eno weina Fitama wei, Yesu na iwata me wei. A ane wasu ari na i sina iwata me wei. Fita eno weite uyarite ofadaro aniro kokora webi.  
\v 69-70 Kokora webiro i arumama nono erite guruguru ubita uwaraba wei, ewa amara Yesunu amara weina Fitama na me wei. Duburo i guruguru ubita uwarama Fitaba weita, ana i uwara tuero (12) emanu domaya. Ana Gareri amarade weita.  
\v 71 Weitaro Fitama sina siosa weda wei, etei Amara na iwata me wei. Na meo wemauna Godima na ma uifisu wei.  
\v 72 Weiro kokora nono weiro Fitama Yesunu auboko dawaba wei sina imui. Yesuma Fitaba auboko eno wei, kokora nono webite nono webiro auboko a ko Nanu ifu rarogonu we ma feafasu eno wei. I sina Fitama imuteda i wei.   
\c 15  
\s1 Yesu Faeratinu iboro inaibi  
\p
\v 1 Wau uriro dera fuyo ode sina weta uwaraini dera uwaraini tarawatu tisa uwaraini kanisoro uwara nesia sina sina we matatate Yesu mune woure ane Faeratibai mata.  
\v 2 Mataro Faeratima Yesuba wei, A Ju uwaranu kinie weina aiwiade wei.  
\v 3-4 Weiro dera fuyo ode sina weta uwarama wawei sina faiyawere webitaro Faeratima wei, emanu wawei sina derawere rairo a aneba sina mui wiawa utasu wei?  
\v 5 Weiro Yesuma wiawa sina uiba Faerati neno kirifu ui.   
\s1 Yesu uifisua weita  
\p
\v 6 Godima Isaraero uwara Ijifiroma woure ani ogaro kowaro i uwarama dibura amara demuraiba webaitaro dera yawoeta amarama uregari utebasu.  
\v 7 I kowaro mui eme ma uieta amara Barabasini moana eme ma uieta urane yarane ueta uwaraini diburaro ibita.  
\v 8 Guruguru ubita uwarama Faeratibai fatate weita, anu baeta edono ua weita.  
\v 9 Weitaro Faeratima wei, Junu kini waita amara uregari uma wei?  
\v 10 Wei ina dawa iwata, i uwara Yesuba ubusi uyareda we imutate mutaba iba eno wei.  
\v 11 Weiro fuyo ode sina weta uwarama i uwarabai inareda weita, Barabasi uregari ua wiawe weitaro nauteda Yesuba ibo derawere uta.  
\v 12 Enoma enoma we inarebitaba weitaro Faeratima nono wei, Ju uwaranu kini waita amara anene umau wei?  
\v 13 Weina korosiro odia weita.  
\v 14-15 Weitaro wei, Danu siosade, ane usinu wei? Weina korosiro odia derawere webitaba emanu unu ufie uteda Barabasi uregari uite weiro Yesu isuma urebita. Utaro Faeratima Yesu korosiro ure odifitae emaba mai.   
\s1 Meremere uwarama Yesuba sawadi uta  
\p
\v 16 Meremere uwarama Yesu woutate wawaroma dera su fefenaro woure anitate emanu domayamutu yua weitaro fata.  
\v 17-18 Fataro i dera yawoeta uwaranu kukuiwere yafa wadia ma barutate sinisini bobo emetu ubu uteda kofiriro barue oitate irue weita, Ju uwaranu kini eawe weita.  
\v 19 Eno weitate isuma kofiriro ureda witua uteda jejerigari uteda irueta sina webita.  
\v 20 Enoma enoma ue me sitate kukui wadia ma kosugari ue mutate Danu ba baruetama barue oita. Eno utate korosiro odifitae woure anita.   
\s1 Yesu korosiro ikokoma ure badami ue oita  
\p
\v 21-22 Anebitaro Sairina su amara Saimoni Arekisanaini Rufasi emanu damama danu unu dabaroma are fariro atatate weita, Yesunu korosi woua weitate Gorogota orofaro anita. Gorogota sinanu ubina kofiri tai torowa orofa.  
\v 23-24 Iro are fataro mui amara ira bobo waini Yesuma ifie mai. Mairo okodiro korosiro oitate Danu wadiaba kasi waribo uteda aika maika muta.  
\v 25 Kowa mare abanaro fariro korosiro oita.  
\v 26-27 Oitate owawa utate i sina eno ewana Ju uwaranu kini, korosi deiro oitate mui waira amara sadei mui korosi enabira afu oitate mui korosi enabira afu oita.  
\v 28 (Godinu bukaro sinama eno wasuba iba enanari uta, Dawana i siosa utaita uwaranu ubarero ibinu eno wasuba iba enanari uta).   
\p
\v 29 I fare anebita uwarama irueta sina weitate kofirima kereu kereu uteda yo weitate weita, A dera dubu su ma jugari ufate kowa rarogonu nono ubu ufasu weide weita?  
\v 30 Weitate weita, korosiroma itate Anu torowa ma wiroa weita.  
\v 31 Weitaro fuyo ode sina weta uwaraini tarawatu tisa uwaraini ema iruteda weita, aika uwara ma wirotebasute Danu torowa ma wirotawa utasu eno weita.  
\v 32 Keriso, Isaraero kini korosiroma itafiro efete imufe weita. Weitaro i korosiro ibisi amara sadei enanari sara siosa sina edono weisi.   
\s1 Yesunu ui kowa  
\p
\v 33 Kowa otoro i orofa atata nesiaro kowa ario utawa dumu sini ibiro kowa osugari uite ane abanaro farina kowa nono ario ui.  
\v 34 Kowa ane abanaro siniro Yesuma derawere wei, irai, irai, rama sabatani, i sinanu ubina Nanu Godi, Nanu Godi, aneba Na ekodinu?  
\v 35 Eno weiro moana inaibita uwara nautate weita, nauawe, Dawana Iraija yua wasu weita.  
\v 36 Weitaro mui amara anite uriri ari munite isuro uwanite diririwere ana tai dumamuro ma inuite Yesunu bebeturo odite wei, Iraija ido fafite mubiro efe wei.  
\v 37-38 Weiro Yesuma derawere weite ido ui. Uina dera dubu sunu dera garari ueta wadia deiroma babare eminaro itari.   
\p
\v 39 I dera meremere amara Yesunu uieta kowa erite wei, ewa amarana Godinu ba Amara wei.   
\p
\v 40 Awetabo faiyawere yafawereroma inaibeda erebita. Meri Megidarinaini Meri, Jousefaini Jeimisi dawa dubu amara, emanu danuaini Saroumuini erebita.  
\v 41 Yesu Gareriro ibiro i awetaba Danu buribi inarebita. Inareda yawotebitaro i awetaboini moana awetaboini Dawaini Jerusaremu suro are fata.   
\s1 Yesu uri uta kowa  
\p
\v 42-43 Sabate ue bou ueta kowa fariro dumu gisigisi uiba Arimatia amara Jousefa, dawa kanisoro amara, dawa Godinu yawoe arasu kowa yawotebi amara, dana Faeratibai anite Yesunu ofe nui wei.  
\v 44 Weiro Faeratima Yesu ui aba me ari imuite iba danu meremere amaraba yua weite wenaueri.  
\v 45 Wenauerina Yesu uisinu wei. Weiro Faeratima Yesunu ofe mubie i Arimatia amara Jousefa siaia uiro ani.  
\v 46 Anite reka inawere wadia oiya uite owere anite Yesunu ofe korosiroma munite wayarite woure ani. Ane gebiro uri oeta eraboro odi. Odiro dera gebiro ma uberu uberu ue are bebeto garari uta.  
\v 47 Eno utaro Meri Megidarinaini Meri Jousefanu danua erebe Yesunu uri oeta kabesi esi.   
\c 16  
\s1 Yesuma uietaroma uyari  
\p
\v 1-2 Sabate kowa me siniro Meri Megidarinaini Meri Jeimisinu danuaini Saroumuini Yesunu ofero tare oetaba muno ira oiya ue bou utate aita. Aitate Waikukuro uyatate aneda kowa ibo odiro uri oeta kabesiro fatate eta.  
\v 3 Dabaro anebe weita, i dera gebiro bebeto anama ma ubefisu weita?  
\v 4-5 Kowa fariro uri oeta eraboro fare etana i gebiro ifegari ue ibiba ubarero itata. Itatana inakeo wadia bobo ayada amara i erabo banibira afu yaubiba kirifu derawere uta.  
\v 6 Eno utaro wei, iya da uyawe wei. Nasareta Amara Yesu Dawa korosiro ui efoe farita wei? Dawa ewado me, Dawa uyarinu wei. Danu ainibainu ewado kabesi eawe wei.  
\v 7 Aniawete Danu iwata ueta uwaraini Fitaba wiawe, Yesu ko Gareriro anibiro efoita. Yesuma bodere yabai wei sina enanari anibiro efoita wei.  
\v 8 Aneruma eno weiro amutate durami ue aneda iya uyatate iwura mameda aika uwarabai Yesu uyarinu wiawa uta.   
\s1 Yesu Meri Megidarinabai Danu ibo mawetu ui  
\p
\v 9 Fura botai kowa waikukuro Yesu uietaroma uyarite botai i Yesu Dana bodere seitaninu siosa imumu nesia seweni (7) dawabairoma we berairo anita i aweta Meri Megidarina Dana dawabai ane fariro erite ani.  
\v 10-11 Meri Megidarina anite ane Yesunu iwata ueta uwaraini moana naueta uwaraini Dawaba neno arama uteda sorara utebita uwara emabai ane farite wei, Yesu ba uirogo nono awona wirosinute me ibinuro nana ene weiro i wei sina nautawa uta.   
\s1 Yesu Danu iwata ueta uwarabai ibo mawetu ui  
\p
\v 12-13 Duburo amara sadei dabaro anebitaro Yesu aika ofema emabai fariro eta. Etate emana anitate Danu buribi inareta moana uwarabai ane weitaro nautawa uta.   
\p
\v 14 Nono duburo Danu uwara ireweni (11) ieta iteda yaubitaro emabai ane fari. Farite Danu torowa ma boroyarite emanu imutawa uetaini neno kimu uetaini ieta uwaranu emaba are weita sina nautawa uetaba dua sina wei.  
\v 15 Weite nono wei, yana orofa atata nesiaro anebeawete i uwara nesiaba Godinu kotofu sina webeawe wei.  
\v 16 Anama Godinu kotofu sina naufite babataito ufiro ma wirofisu. Anama Godinu kotofu sina da naufisuna siosa kabesiro anibisu.  
\v 17-18 Eno weite wei, Nabai kimuwere imue naue utaita uwara eno ufitaita. Nanu ifuroma imumu siosa we berafitate reka sina aika webitate awe towi mubitate kae ifitaitana da ufitate ofe woureta uwaraba emanu agema deiro odifitaro wirofitaita wei.   
\s1 Godima Yesu urero woure mani  
\p
\v 19 Yesu Danu iwata ueta uwaraba sina we me sinebina Godima Yesu urero woure maniro Danu banibira age afuro mane yaurite daido yaubinu.  
\v 20 I Danu iwata ueta uwarama Godinu sina aboro aboro we inarebitae anita. Anitaro Godima ema durua utebiba sina bunawere weda buna ueta derawere utebitaro i erebita uwarama we imutebita, Godima ema durua utasuro eno utaita we imutebita.