\id MAT NT0097.MT Yareba N.T. - Weimer 9-JAN-87 
\h MATIUNU 
\toc1 MATIUNU OWAWA 
\toc2 MATIUNU 
\mt1 MATIUNU OWAWA  
\c 1  
\s1 Yesunu danatamutu awonu ifu ifu  
\p
\v 1 Ewana Yesu Kerisonu sirorari sina. Dana Deiwidinu sisia amara. Dana Eibaramunu sisia amara.   
\p
\v 2 Eibaramu dana Aisikinu damama. Aisiki dana Jeikofunu damama. Jeikofu dana Judaini danu dabuemutu emanu damama.  
\v 3 Juda dana Feresini Sira emanu damama. Emanu danuana Teima. Feresi dana Esaromunu damama. Esaromu dana Remunu damama.  
\v 4 Remu dana Aminadabunu damama. Aminadabu dana Neisoninu damama. Neisoni dana Samoninu damama.  
\v 5 Samoni dana Bouasinu damama.  
\p (Bouasinu danuana Reiabu.) Bouasi dana Oubedinu damama.  
\p (Oubedinu danuana Ruta.) Oubedi dana Jesinu damama.  
\v 6 Jesi dana Deiwidinu damama. Deiwidi dana dera kini amara. Deiwidi dana Soromoninu damama.  
\p (Soromoninu danuana Uraianu aweta.)  
\v 7 Soromoni dana Reoboamunu damama. Reoboamu dana Abaijanu damama. Abaija dana Asanu damama.  
\v 8 Asa dana Jiosefetinu damama. Jiosefeti dana Joremanu damama. Jorema dana Usaianu damama.  
\v 9 Usaia dana Jotemunu damama. Jotemu dana Eiasinu damama. Eiasi dana Esikaianu damama.  
\v 10 Esikaia dana Manasanu damama. Manasa dana Eimosinu damama. Eimosi dana Josaianu damama.  
\v 11 Josaia dana Jekonaiaini danu dabuemutu emanu damama. I kowaro Babaronia orofa uwarama i Ju uwara mutate Babaronia orofaro dibura odinono uta.   
\p
\v 12 I uwarama Ju uwara Babaronia orofaro woure oitaro Jekonaiama Sirutio yanae muni.  
\p Sirutio dana Serubabeonu damama.  
\v 13 Serubabeo dana Abaudinu damama. Abaudi dana Iriekiminu damama. Iriekimi dana Asonu damama.  
\v 14 Aso dana Sadokonu damama. Sadoko dana Eikiminu damama. Eikimi dana Iriudinu damama.  
\v 15 Iriudi dana Iriesanu damama. Iriesa dana Meitaninu damama. Meitani dana Jeikofunu damama.  
\v 16 Jeikofu dana Jousefanu damama. Josefa dana Merinu awera. Merima Yesu muni. Yesunu mui ifuna Keriso waita.   
\p
\v 17 Enoba bodere Eibaramubairoma abuamutu arebe arebe arebe are Deiwidibai fotini (14) are me sini. Nono Deiwidibairoma abuamutu are Babaronia orofaro oita kowabai mui fotini (14) are me sini. Nono i Babaronia orofaro oita kowabairoma abuamutu arebe are Godi Danu ma wiroe mune aneta Amara Yesubai mui fotini(14) are me sini.   
\s1 Merima Yesu Keriso muni  
\p
\v 18 I Yesu Keriso Danu danuama Dawa muni sinana eno, Yesunu danua Merina bodere datu mata. Josefama mubie datu mataro aweta awera mune matanawa utawa me inarebe dia muni. Godinu Imumu Kotofuma Merinu neno ubarero itariro iba dia munite ibi.  
\v 19 Jousefa dana Meri ekodifie we imuirogo nono dana kobere amaraba dawa unutawa emema Meri we iruotoba iba Meri kiwuma ekodifie we imutebi.  
\v 20 Eno imutebina Godinu aneru tuberoma farite wei, Deiwidinu amara Jousefa, Meriba iya da uyate dawa anu aweta mua wei. I diaro kuitana Godinu Imumu Kotofuma masinu amara wei.  
\v 21 Merima i amara mubiro Danu ifu Yesu maibasuba Dana Danu uwaranu neno neno uetaroma ma wirofisu aneruma eno wei.   
\p
\v 22 Godinu we bou ueta amarama weiba enanari ui.  
\v 23 Godinu we bou ueta amarama eno wei,  
\li1 nauawe, mui awera munawa aruma dia mubite amara mubisu. I amaranu ifuna Imanuera weboita. (I ifunu ubina Godima yabai ibinu),  
\p Godinu we bou ueta amarama eno wei.   
\p
\v 24-25 Jousefa nauta ainibebe ido uyarite Godinu anerunu wei sina enanari uite Meri danu aweta muni. Jousefama ido Meri muniro uruama ainawa me ibisiro Merima i Amara ido muniro Jousefama i Amara Danu ifu Yesu mami.   
\c 2  
\s1 Kowa amueta afu uwara Yesu efitae fata  
\p
\v 1-2 Merima Yesu Judia orofa Betiremu suro muni. I kowarona dera yawoeta amara Erodima i orofa yawotebi. I muni kowaro moana muinanu ubi iwata derawere uwarama i kowa amueta orofa yafawereroma Jerusaremu suro are fatate weita, i Ju uwaranu reka muninu yawoeta amara aboro? Kowa amueta afu Danu muina esiba iba Dawa guriguri ufene farisia weita.  
\v 3 Erodima emanu sina nauite neno siosa ui. I Jerusaremu su uwara nesia enanari uta.  
\v 4 Erodima weiro i dera fuyo ode sina weta uwaraini tarawatu tisa uwaraini dawabai fata. Fataro wei, i we bou ueta uwarama Keriso aboro mubie weita wei? I kuita, Ju uwaranu kini, aboro muninu wei?  
\v 5-6 weiro weita, Judia orofa Betiremu suro. Godinu we bou ueta amarama eno owawa ue odi,  
\li1 a Judia orofa Betiremu su, ana su kikiratu nono ana i Judia yawoeta uwarabai ana derawere, abairoma mui dera yawoeta amara uyafite Godinu Isaraero uwara yawofisu,  
\p eno owawa ue odi weita.   
\p
\v 7 Erodima i iwata derawere uwaraba kiwuma weiro dawabai fata. Fataro wei, i muina abo kowaro fariro eta wei?  
\v 8 Weite wei, Betiremu suro aniawete i kuita doberegou uawe wei. Kuita doberebe atafoitana nabai are wiawero ma dari Dawabai animate guriguri umau wei.  
\v 9 I uwarama Erodinu sina nautate ekoitate anita. Aneda etana i kowa amueta afu muina arite su foubai eda urero inaibiro eta.  
\v 10 I muina etate emanu nenoma yaru derawere uta.  
\v 11 I uwarama i su ubarero amutate etana kuitaini Danu danua etate jejerigari uteda Dawa guriguri uta. Eno utate emanu kobere me maeta ememetu ma ifegari utate Dawaba goruini bonanawere faudaini bonanawere ogoini mata.   
\p
\v 12 Godima i iwata derawere uwarabai tuberoma farite wei, yanu owereta kowaro Erodibai da anibote yanu mui dabaro yanu suro ane faforo weiro enanari uta.   
\s1 Jousefaini Meri i kuita ma iyare woure Ijifiro anita  
\p
\v 13 I uwarama ane me sitaro Godinu aneruma Jousefabai tuberoma farite wei, uyate i kuitaini Danu danua muate Ijifi orofaro sau ania. Erodima i kuita dobere ma uifie utasuba iro ane ibiaro Nana wemaro nono owere ara wei.  
\v 14 I dumuro Jousefa uyarite i kuitaini Danu danua munite iroma woure Ijifi orofaro ani.  
\v 15 Ijifi orofaro ane ibifiro Erodi uifiro fafie iba ani. Godinu we bou ueta amarama wei iba enanari ui. Godima Danu we bou ueta amaranu bebeturoma eno wei, Nanu amara Ijifiroma ara wei, iba eno ui.   
\s1 Erodima weiro koiniboro ma uitebita  
\p
\v 16 I iwata derawere uwarama Erodibai ane farawa utaro Erodima i uwara na iruita we imuteda ibo derawere ui. Ibo uite dawa i uwarabai iwata uiba moana uwara siaia uteda eno wei, aniawete Betiremu suini nono i gigirari su suro oya sadei me sinawa masiguraratu nesia ma uiawe wei.   
\p
\v 17 Erodima eno uiro Godinu we bou ueta amara Jeremaianu bodere sina i kowaro enanari ui.  
\v 18 Jeremaiama eno wei,  
\li1 mui wate tanana Reima subairoma farite i weda sorara ui. Reisorobairoma sirorari uta awetabo emanu koiniboroba i webita, nesia ibawa, uitaba iba i wedibebita,  
\p Jeremaiama eno wei.   
\s1 Ijifiroma owetate emanu suro fata  
\p
\v 19-20 Erodi ido uiro Godinu aneruma Ijifiro Jousefabai tuberoma farite wei, uyate i kuitaini Danu danua muate Isaraero orofaro ania. I kuita ma uifitae utebita uwarana uie me sinitaya ania wei.  
\v 21 Josefa ido uyarite i kuitaini Danu danua munite woure Isaraero orofaro ani.   
\p
\v 22-23 Ane farite Jousefa mui sina nauina Akiriasima danu damama Erodinu kabesi muninute Judia orofa yawotasu eno nauite iyarite iro ibawa i orofa ekodite ani. Nono Godinu aneruma tuberoma wei iba Gareri orofaro ani. Ane Nasareta suro ibi. Enoba Godinu we bou ueta uwaranu sina ido enanari ui. Emanu sina eno, Dawa Nasareta su amara webitaita eno weita.   
\c 3  
\s1 Joni babataito amaranu webi sina  
\p
\v 1-2 I kowaro Joni babataito amarama Judia eme ibawa orofaro fariro eme faiyawere dawabai fataro wei, Godinu yawoe anasu kowa fafie utasuba yanu neno neno ueta dubena afu sawe wei.  
\v 3 Godinu we bou ueta amara Isaiyama i amaraba eno wei,  
\li1 dana eme ibawa orofaro sina we inareda wasu, i Dera Amaranu daba wabue moya uawe wasu,  
\p Isaiyama eno wei.   
\p
\v 4 Joni danu baruetana kemo eginu ofe, danu kafana borumakaunu ofe, danu ieta sisidomuini firukaini itebi.  
\v 5-7 Jerusaremu su uwaraini Judia orofa uwaraini i Jodani orofa mamamama uwara nesia Jonibai fatate emanu neno neno ueta we ma borobayataro Jonima ema Jodani ogoro babataito utebi.  
\p Jonima erina i Ferosi uwaraini Sadusi uwaraini dawabai fataro erite emaba wei, ya tabainu muneta! Anama Godinu fafisu neno ka ueta yaba weiba iba serigari ufote iya aniboe nabai durami ue faraita wei?  
\v 8 Aniawete yanu ueta ba me dubena afu sawete kobere ueta iboro odiawe. Eno uawero Godima efi wei.  
\v 9 Eno weite nono wei, me sara uyafote Eibaramu dawa yanu baba yana danu sisia uwara weboitana Godima Eibaramunu moana sisia uwara gebiroma ubu ufie imufisuna ubu ufisu wei.  
\v 10 Godinu koto fanisi kowa fafie utasu. Mui amarama kowa ramamasute ana umafie utebasu enanari Godinu koto kowa i ari, yanu siosa ueta sineta umafie utasu. Mui ana kobere tai da uwafiro umane tufite mune inaro sabisu wei.  
\v 11 Ya yanu neno neno ueta dubena afu sanaitana ya ogoma babataito utatane. Nono mui amara nanu buribi afiro Danu buna derawere na ari me. Nana kobererau meba Danu ibo didi da inare tumau. I amarama ya Godinu Imumuini ina yaretama babataito uegou ufisu wei.  
\v 12 Dana Danu uiti tai waiya ueta saboro agero ibinuba Danu uiti tai koru kafae ma kobererau ufie saboroma uiti tai etu sabisu. Etu sabiro oyauma ifuru afuru aika kabesiro woure odifiro uiti tai kafaero itafisu. Itafiro Dana Danu ba uiti tai su koruro odifite i ifuru afuru i uitawa inaro sabisu wei.   
\s1 Jonima Yesu babataito ui.  
\p
\v 13 Jonima Yesu babataito ufie iba Yesuma Gareriroma Jodani ogoro are fari.  
\v 14 Joni dawa unutawa i babataito ueta iba Yesuba wei, nana Abai babataito uegou umau rairo aneba nabai are farinu wei?  
\v 15 Weiro Yesuma wei, ido, Na babataito ufasuna Godinu kobere imueta enanari ufutu wei. Eno weiba Jonima Yesu babataito ui.   
\p
\v 16 Jonima Yesu babataito ue me sinina Yesuma ogoroma duero amuteda erina ure eba uiro Godinu Imumu Kotofuma ubani ari tararite Danu deiro yauriro eri.  
\v 17 Eno uiro ureroma sina tararite wei, ewana Nanu amara ubiba Nanu neno Dawabai ibinuro yaru utatane wei.   
\c 4  
\s1 Seitanima Yesu ue erebi  
\p
\v 1 Godinu Imumu Kotofuma Yesu munite woure eme ibawa orofaro ani. Woure aniro seitanima Yesu ue efie Dawabai fari.  
\v 2 Yesuma iro ibeda kowa fotini (40) dumu foti (40) ieta itawa. Ieta itawa me ibebe kowa foti (40) me siniro Yesu osi derawere uri.  
\v 3 Osi uiro seitanima Yesubai farite wei, A Godinu amarana wiaro ewa gebiro ieta sibi wei.  
\v 4 Weiro Yesuma moko wei, Godinu bukaroma eno wasu, emema ieta torowa ifitaitana emanu ibetana ba me. Nono Godinu bebeturoma sina nesia naufitaitana emanu ibetana ba, eno wasu Yesuma wei.   
\p
\v 5-6 Seitanima Yesu ido munite woure Jerusaremu suro ani. Ane i dera dubu su etu fou deirowere odite wei, A Godinu Amarana ewadoroma bibu uate taniaro Godinu bukaroma eno wasu,  
\li1 Danu aneruma A yawoteda agema maibitaro merau itafaro Anu buri gebiroma da ufisu,  
\p wasuba iba bibu ua wei.  
\v 7 Weiro Yesuma dawaba wei, Godinu bukaroma nono eno wasu, anu Dera Godi da ue ea wasu wei.   
\p
\v 8 Seitanima Yesu nono munite mui yafa maidani otoro woure mane odi. Mane odite i orofa atata kabesini uwaraini nesia tube tuberoma ari ma boroyariro Yesuma eri.  
\v 9 Eriro seitanima Yesuba wei, nanu buri gigirari arubi ufate nabai guriguri ufasuna ina nesia Aba mamau wei.  
\v 10 Weiro Yesuma ido wei, seitani Nabairoma ania! Godinu bukaroma eno wasu, anu dera Godibai torowa guriguri uawete Danu gaukara torowa uawe eno wasu Yesuma wei.   
\p
\v 11 Seitanima Yesu ido ekodiro aneruma Dawabai taratate yawota.   
\s1 Gareri orofaro Yesu Danu gaukara ue tutubari ui  
\p
\v 12 Moana uwarama Yesubai fatate weita, Joni budari uta weitaro nauite Gareri orofaro ani.  
\v 13-14 Nasareta suroma ane Sebiuronini Nafatarai orofa Kafenamu suro fari. Kafenamu su enea gigirari ibiro iro Godinu we bou ueta amara Isaiyama weiba iba iro fari.  
\v 15 Isaiyama eno wei,  
\li1 Jodani ogo etarafu enea gigiraribai Sebiuroni Nafatarai orofaini i orofa sadei ibita. Gareri orofana aika uwaranu ibeta kabesi. Gareri orofa uwara faiyawere iro dumuro ari yaubebitana ario ari derawere uiro eta.  
\v 16 I uieta utumuro ari yaubeta uwarabai Godinu ario derawere ui,  
\p Isaiyama eno wei.  
\v 17 I kowaroma Yesuma sina derawere eno wei, i urero yawotasu kowa fafie utasuba yanu neno neno ueta dubena afu sawe wei.   
\s1 Yesuma ogo egi woureta uwarabo fo (4) we muniro Danu buribi anita  
\p
\v 18 Yesuma Gareri mesau nioro inarebe erina dataeini dabue Saimoni danu mui ifu Fita dawaini danu dabue Enuduruini emanu iwame ogoro sane inarebisiro eri. I amara sadeina erio egi woureta amara sadei.  
\v 19 I amara sadei erite emaba wei, Na are yawoawaro anibete ya eme muneta amara sadei odimaro eme muawaro naueta uwara sibita wei.  
\v 20 Weiro ido i amara sadei emanu iwame sau ekoisite Yesunu buribi anisi.   
\p
\v 21-22 Iroma Yesu anebe erina mui dataeini dabue, Jebedinu amara sadei Jeimisini Jonini emanu damamaini boutiro yaubeda iwame ma wirotebitaro eri. Ema erite yua weiro emanu damamaini boutini ekoisite Danu buribi anisi.   
\s1 Yesuma eme faiyawere we mawetu uteda ma wirotebi  
\p
\v 23 Yesuma Gareri orofa aboro aboro inarebi. I Ju uwaranu dubu su suro we mawetu uteda Godinu kotofu yawotasu sina webite i uwaranu oferi aika maikaroma ma wirotebi.  
\v 24 Eno utebiba i Siria orofa uwara Danu buna ueta nautate emanu oferi aika maika uwaraini siosa imumu bobo uwaraini meo uie uyare ueta uwaraini age sanawa buri inarawa uwaraini ema nesia Yesubai woure fare oitaro ema nesia ma wiroi.  
\v 25 Ema ma wiroiro Gareri uwaraini Dikaforisi uwaraini Jerusaremu su uwaraini Judia orofa uwaraini Jodani eterafu uwaraini uwara fefera faiyawere ema Danu buribi anita.   
\c 5  
\s1 Yesuma maidaniro yaubeda sina webi  
\p
\v 1-2 Yesuma i uwara faiyawere erite maidaniro manite yaurina Danu iwata ueta uwara Dawabai mane fata. Fataro emaba yare wei.   
\s1 Yesuma eme yaru ufitae wei  
\p
\v 3 Weite Yesuma eno wei, ana anama emanu nauetaba Godibai weduru ue sasae utawa ue emanu torowa ma otowaratu uteda yaru utaita. I uwarana Godinu urero yawotasu orofana emanu.   
\p
\v 4 Awona emanu siosawere uetaba imuteda i waita uwara, Godima ema ma etoto ufiro yaru ufitaita.   
\p
\v 5 I emanu torowa ma derawere utawa utaita uwara Godima emaba i reka orofa atata nesia mafiro iro ibeda yaru ufitaita.   
\p
\v 6 I uwara emanu ununa Godinu kobere imueta ari uegou ufitae ogoini ieta nodo wourebaita i ari utaita uwarana Godima ema durua ufiro enanari kobererau ufitate yaru ufitaita.   
\p
\v 7 I emeba ure nudarau utaita uwara Godima emaba moko ure nudarau ufiro yaru ufitaita.   
\p
\v 8 I uwara emanu nenonu imueta roatarauba emana Godi efitate yaru ufitaita.   
\p
\v 9 Ana anama wesarau ueta emebai mawetu uteda uteibitaitana Godima emaba Nanu aruma amara webiro naufitate yaru ufitaita.   
\p
\v 10 I uwarama kobererau utaitaro emema emaba siosawere utaita. Enoba Godima i kobere uwaraba Danu ure yawoeta orofa mafiro iro ibeda yaru ufitaita.   
\p
\v 11 Emema yabai Naba siosa sina webitate siosawere ufitate meoma wawei sina webitaitana yaru uawe.  
\v 12 Yanu moko muneta derawere urero muboitaba yaru derawere uawe. Bodere i uwaranu danatamutuma Godinu we bou ueta uwaraba enanari siosa utebita.   
\s1 Yesuma soruini ario ari ibinita uwaraba wasu sina  
\p
\v 13 Yana ewa orofa atata uwaranu soru ari. Emema imonawere soru itebaita i ari yana kobererau utebaitana emema ereda ina kobererau webaita. Sorunu imona me sibisuna anene danu imona nono imona ufisu? Ina ba meba mu sanaitaro emema deiro amune adire anaita, i ari yana siosawere ufoitana emema yanu sina da naufitaita.   
\p
\v 14 Yana ewa orofa atatanu nanefa ario ari. Mui maidani otoro ibinu su da feafisu.  
\v 15 Emema nanefa beataitate okia ubarero odawa utaitate aiyo oeta kabesiro odaitaro i nanefama i su ubare nesia ario utasu.  
\v 16 Enanari yanu kobere ueta nanefa ario ari uawero emema efitate yanu urero ibinu Baba Godinu ifu we ma derawere ufita Yesuma wei.   
\s1 Yesuma Godinu tarawatuba wasu sina  
\p
\v 17 Mosesinu tarawatuini Godinu we bou ueta uwaranu sina mune samau da imuawe. Ina mu samane farawa unete ina ma borobayamane farea wei.  
\v 18 Nanu sina ba wemaro nauawe, ureini nasinini sau da me sibite ibifisu. I woworo Godinu tarawaturoma mui sina tai kikimuikiratu me sara da feafisu. Sara da ufiro nesia uegou ufisuna ina idoni me sibisu wei.  
\v 19 Anama Godinu tarawatu sina demurairatu nautawa utasute nono moana uwaraba enanari we mawetu utasuna dawa i ure yawoeta orofaro kikiratu sibisu wei. Nono anama Godinu tarawatu sina nesia nauegou utasute nono moana uwaraba enanari we mawetu utasuna i ure yawoeta orofaro dana derawere sibisu wei.  
\v 20 Yaba wemaro nauawe wei. Weite wei, i Ferosi waita uwaraini tarawatu tisa uwarama aneane kobererau utaitate nono moana ueta uegou utawa utaita. Nono yana Godina torowa Kobererau uegou uforo yanu kobere ueta sinetama i Ferosi uwaraini tarawatu tisa uwaranu ueta sineta serigari ufisuna i ure yawoeta orofaro ane ibifoita wei.   
\s1 Yesuma ibo uetaba wasu sina  
\p
\v 21 Mosesima i bodere uwaraba eno wei, i bodere uwaraba eno weita, eme da ma uiawe. Anama mui amara ma uifisuna dawa koto ufitaita weita. Nono yaba eno watane, anama danu domayaba ibo ufisuna dawa koto ufitaita. Nono anama danu domayaba siosawere webisuna i kanisoro uwarabai woure ane odifitaro dawaba sina kimuwere webitaita.  
\v 22 Nono anama danu domayaba ana beforo siruru me amara webisuna dawa i uitawa inaro anibisu wei.  
\v 23-24 Ana Godinu fuyo oeta kabesiro anu fuyo oeta odifae anibate nono iro anu aiyema aba ibo utasu imufasuna anu fuyo oeta iro ibifiro anu aiyebai anibate nesia dawaini ma rorowarau ufawate nono owefate anu fuyo oeta odia wei.   
\p
\v 25 Mui amarama ya koto uwarabai wawei webie woure anibisuna dawaba sau naiye wiawe. Mena i ya wawei webisu amarama ya koto yawoeta dera amaranu age duro odifiro koto yawoeta dera amarama ya forisimaninu age duro odifiro forisimanima ya diburaro odifisu.  
\v 26 Nanu ba sina wemaro nauawe, ya diburaro odifiro sau wawaro da amufoita. Daido iro ibeda yanu moko faini oi nesia maforo ya odifiro wawaro aniboita wei.   
\s1 Yesuma dita yagera faretaba wasu sina  
\p
\v 27 Dita yagera da fawe eno weitaro ya nauta.  
\v 28 Nono yaba eno watane, anama mui aweta o aruma dita yagera fafie imutasuna dana nenoma dita yagera farasu Yesuma eno wei.  
\v 29 Anu banibira afu ditima a ma siosa ufisuna ma guju uate mu sate diti demuraima ibifasuna ina kobererau, diti sadeima i uitawa inaro anibasuna ina siosawere iba ma guju uate mu sa.  
\v 30 Anu banibira afu agema a ma siosa ufisuna i mui age umane tuate age demuraima ibifasuna ina kobererau. Ofe ubu nesiaini uitawa inaro anibasuna ina siosawere wei.   
\s1 Yesuma aweta awera okoetaba wasu sina  
\p
\v 31 Mosesima i bodere uwaraba eno wei, anama danu aweta ekodifie utedana danu awetaba dawa ekoeta koto feifa mafite ekodifisu weiya wei.  
\v 32 Eno weite wei, nono Nana yaba watane, anama danu igera sasae utawa aweta mui ubi mero me ekodifisu. Me ekodifisuna i aweta ma igera sasae ufisu. Iba i awetama mui amara danu awera mubisuna igera sasae daido utedibeibisu wei. Weite wei, eno uteibiro danu reka aweraini daido dita yagera utedibeibisu wei.   
\s1 Yesuma kimuwere we bou uetaba wasu sina  
\p
\v 33 Mosesima i bodere uwaraba eno wei sina ya nauta. I sinana eno, buna we bou ufoitana meo da wiawete ane we bou ufoitana Godibai enanari uawe eno weiya wei.  
\v 34 Nono Nana yaba watane, sina we bou utedana i sina ma buna ufoe ufoitana urenu ifuro da wiawe ina Godinu yaure yawoeta orofa wei.  
\v 35 Nono enanari wei, nasininu ifuro da wiawe ina Danu buri amue ibeta kabesi wei. Jerusaremu sunu ifuro da wiawe ina i dera yawoeta amaranu su wei.  
\v 36 Yanu kofiriro da wiawe yana i fouma iji da weboro inawere aba dubawaru da ufisu wei.  
\v 37 Yanu sinana aiwia o me torowa wiawe. Nono mui aika buna sina weboe ufoitana seitaninu aramawere imueta yabai mafiro weboita Yesuma wei.   
\s1 Yesuma moko moko siosawere ue matanetaba wasu sina  
\p
\v 38 Mosesinu wei sina ya nauta. I sina eno, mui amarama mui amaranu diti ma guju ufisuna danu diti moko ma guju uawe. Mui amarama mui amaranu nio ma furiafisuna danu nio moko ma furiawe eno weiya wei.  
\v 39 Nono yaba watane, mui amarama yaba siosawere ufisuna moko da uawe. Mui amarama yanu mui taibau ufisuna yanu mui taibau dana nono ufie oweawe.  
\v 40 Nono mui amarama yanu seti mubie ya kotoro woure anibisuna yanu setini yanu dei baruetaini dawaba mawe.  
\v 41 Mui meremere amarama danu ununa danu ego yana woure daba fuyaratu aniboe bunawere webisuna dawaini i yafa dabaro aniawe.  
\v 42 Moana uwarama nui webitaitana emaba mawete nono moana uwarama yabai ane we mubitaitana emaba mawe Yesuma eno wei.   
\s1 Yesuma wasai uwaraba neno arama ueta wasu sina  
\p
\v 43 Mosesinu wei sina ya nauta. I sinana eno, yanu yaiyemutuba neno arama uawete nono yanu wasai uwaraba neno ka uawe eno weiya wei.  
\v 44 Eno weite wei, nono Nana yaba watane, yanu wasai uwaraba neno arama uawete yaba siosawere utaita uwaraba Godibai guriguri uawe.  
\v 45 Eno ufoitana yanu urero ibinu Babanu adarabu siboita. Godima i uwara nesiaba eno uteda Danu kowa ario i kobere uwaraini i siosa uwaraba matasute Danu obi i kobere uwaraini i siosa uwaraba enanari matasu.  
\v 46 Moana uwarama ya neno arama utaitaro emaba moko neno arama utaitana Godima ina kobererau da webisu. I takesi muneta uwarama enanari utaita.  
\v 47 Yanu yaiyemutu torowaba ario sina weboitana ina ba me. Uwara nesia enanari utaitaro i Godi iwata me aika uwaraini eno utaita.  
\v 48 Yanu ueta sineta Godinu kobere ueta sineta ari uegou uawe, Yesuma i sina eno wei.   
\c 6  
\s1 Yesuma nata uetaba wasu sina  
\p
\v 1 Yanu ununa emema yanu ueta sineta efitate yanu ifu we ma derawere ufitae iba da uforo. Emema efitate yanu ifu we ma derawere ufitae ufoitana ina yanu moko muneta nono yanu urero ibinu Babama yaba kobererau me maeta moko da mafisu.   
\p
\v 2 Yanu ununa ibaiabai me uwaraba ane mafoitana emema naufitate efitae yua derawere da wiawete kiwuma mawe. I meoma weta uwarama Ju uwaranu dubu suini natofo su daba dabaro eno utaita. Yaba ba wemaro nauawe, emema eno utaita wei. Weite wei, yaba ba wemaro nauawe, emema eno utaitaba ina emanu moko muneta.  
\v 3 Yanu ununa ibaiabai me uwaraba ane mafoitana kiwuma maforo emema da efitaita.  
\v 4 Ido kiwuma uforo yanu Yamamama i kiwu ueta erasuba ya ma kobererau ufisu Yesuma wei.   
\s1 Yesuma guriguri uetaba wasu sina  
\p
\v 5 Yana guriguri utedana i meo meo uwaranu guriguri ueta ari da uforo. I uwarama emanu ununa emema ema ereta iba Ju uwaranu dubu suro o dabaro inaibeda emema efitae guriguri utaita. Yaba ba wemaro nauawe, Godima ema ma kobererau da ufisu.  
\v 6 Yana guriguri utedana yanu su koruro aniawete kasimu garari uawete yanu urero Yamamabai kiwuma guriguri uawe. Eno ufoitana yanu Yamamama yanu kiwuma ueta erasuba ya ma kobererau ufisu.   
\p
\v 7 Guriguri utedana i Godi iwata me aika uwaranu sina faiya faiyawere emanu ba me godibai guriguri ueta ari da uforo I uwarama sina faiya faiyawere webitaro Godima naufie imutaita.  
\v 8 I uwaranu ueta ari da uforo. Yanu urero Yamama yanu unu nesia iwata utasu. Yanu wenauereta wiawa utaitaro Dawa iwata utasu.  
\v 9 Guriguri utedana eno wiawe,  
\li1 yanu urero ibinu Baba, Anu ifu kakarawereba Aba ititi kakara utaisi.  
\v 10 Anu yawotasu kowa fafie waisi. Anu ununa ua, urero utasuba nasiniro enanari ua.  
\v 11 Awonana yanu ainewaure matebasu ieta mai.  
\v 12 Yanu naiyemutunu ba me ueta yaba utaita, ina mune aika odaisi enanari yanu ba me ueta mune aika odia.  
\v 13 I siosa ue ereta ibaiabai yabai da woure arate i siosabairoma ya woure eta ania.  
\v 14 Yana emenu ba me ueta mune aika odifoitana yanu urero ibinu Yamamama yanu ba me ueta mune aika odifisu.  
\v 15 Nono emenu ba me ueta da mune aika odifoitana yanu Yamama yanu ba me ueta da mune aika odifisu.  
\p Yesuma i sina eno wei.   
\s1 Yesuma ieta itawa kakara uetaba wasu sina  
\p
\v 16 Yana Godibai guriguri ufoe uteda ieta itawa utaitana yanu ibo nawata aika maika da uawe. I meoma weta uwarama Godibai guriguri ufitae uteda ieta itawa utaitana odakoko taraita. Eno da uawe. I uwarama eno utaitaba ina emanu moko muneta.  
\v 17-18 Godibai guriguri ufoe uteda ieta da ifoitana yanu kofirini ibo nawata uroawero emema yanu ieta itawa ueta da efitaro yanu urero ibinu Yamama i yanu kiwuma ueta erasuba yaba kobererau maeta moko mafisu Yesuma wei.   
\s1 Urero ibinita guguaini gubari  
\p
\v 19-20 Ibaiabai derawere ewa sakairo deiro deiro da odiawe. Ewaro jirikoini towima ina itaitaro waira ueta uwarama ibaiabai waira utaitaba yanu nauetaini Godibai gaukara ueta ina urero ibaiabai ari iba nauegou uteda ibaiabai ewa sakairo deiro deiro da odiawe.  
\v 21 Yanu ibaiabai aboro ibasuna yanu nenoini iro ibasu.   
\s1 Yanu ofenu ario  
\p
\v 22 Yanu ditina yanu ofe ubunu nanefa ario ari. Enoba yanu ditina kobererau yanu ofe ubuna ariowere.  
\v 23 Nono yanu diti aramawerena yanu ofe ubuna dumuwere. Enanari yabai ario mena yana dumu ariba eregou uforo! Yabai dumu derawere ibinu. Yanu imueta igawerena yanu ibeta aramawere.   
\s1 Sabua ueta amaraini danu yawoeta amara sadei  
\p
\v 24 Mui gaukara amarama dera amara sadeinu gaukara da ufisu. Eno ufisuna mui dera amara ma yaru uteda nono mui dera amara ma ibo ufisu. I dera amara demurainu gaukara uegou uteda nono i mui amaranu gaukara me sara ufisu. Enoba Godinu gaukara uteda gugua gubarini Godini nesia da ma demurai ufote gaukara da ufoita wei.   
\p
\v 25 Enoba yaba watane, yanu ibetaini ofeba da imuforo! Yanu wiroeta ietabairoma da wirofeisi. Yanu ofena i baruetama da ma wirofisu. Iba ietaini barueta torowa woroworo da imuawe.  
\v 26 I gasira imue eawe. I gasirama ana tai waitawa ana tai fira utawa, emabai ietata oeta su mero nono yanu urero ibinu Babama emaba ieta matasu. Godima ema imuteda nono yabana derawere imuegou utasu.  
\v 27 Anama eno imutebe imutebe danu ibeta kowa ma yafa ufisu? Me.   
\p
\v 28 Aneba wadiaba imutaita? I sigina imue eawe! I sigina emanu torowa gaukara utawa emanu torowa wadia ue yurawa me warataita.  
\v 29 Soromonima danu araeta wadia baruina danu wadiana ba mero i siginanu fomueta araetana kobererau.  
\v 30 Nono Godima i koe awona ma werei werei ue odasuna nono waidumu i koe inama yafitaita. Godima eno utasuna nono ya kikiratu naueta uwaraini yaba wadia matasude wei.  
\v 31 Ibago ane ietaini ogoini ifete ane barufeisi da imue weboro!  
\v 32 I Ju me aika uwarama ina doberegou utaitaro nono yanu urero ibinu Baba ina yanu ibeta Dawa iwata utasu.  
\v 33 Ietaini ogoini ane ane nesia da doberegou ufote nono Godinu kobere yawoe anasu orofa doberegou uforo yanu ietaini ane ane nesia yaba mafisu.  
\v 34 Ibago waidumu ane ufisu eno da imuforo wei. Waidumu i ueta sineta ido fafisuna ido imufoita. Kowa demurainu ueta sineta i kowaro torowa imuegou ufoita, Yesuma eno wei.   
\c 7  
\s1 Moana uwaranu ueta sineta ere wawei weta  
\p
\v 1-2 Yesuma wei, moana uwarabai mui amaraba me sara wawei da weboro Godima yaba moko wawei da webisu. Wawei webote fanisi mafoitana Godima enanari yaba moko wawei webite fanisi mafisu. Ane ufoitana enanari muboita.  
\v 3 Aneba mui amaranu diti ubarero ifururatu eregou utaitate yanu diti ubarero ibinu ana tumi erawa utaita?  
\v 4-5 Aneba waita, kaka, ueta siosawere kikiratu, ifuru ari, anu ditiro ibinu ma mumu umau waitana yanu diti ubarero ueta siosararabo, ana tumi ari, ibinuro ya erawa utaita? Ya meo meo uwara yanu diti ubarero ibinu ana tumi botai mu sabote eregou ufoitana nono yanu yatae yabuenu diti ubarero ifuru ma mumu ufoita wei.   
\p
\v 6 Godinu kobere sina i nautawa uwarabai sara da mafoita. I uwarana kua ari enoba emabai me sara da mawe. Yanu Godinu matasu imueta, ina oi gebiro ari, ina borosiribai da saboita. Saboitana borosirima amune adire anibitate nono ma owere ya umafitaita Yesuma wei.   
\s1 Wenaueawete dobeawete yaubinu wiawe  
\p
\v 7 Wenaueawero mafiro muawe. Dobeawete atawe. Yaubinu wiawero ma ifegari ufi wei.  
\v 8 Anama wenauefisuna mafiro mubisu. Anama dobefisuna atafisu. Anama yaubinu webisuna dawaba ma ifegari ufisu wei.  
\v 9 Ananu amarama ietaba nui webisuna gebiro mafisu? Me.  
\v 10 Ananu amarama erio egiba nui webisuna towi mafisu? Eno da ufisu.  
\v 11 Ya siosa uwarama anene yanu koiniboroba kobere maeta mataitana ya iwata enoba ana anama ane Godibai wenauefoitana yanu urero ibinu Yamamama yaba kobererau maeta maegou ufisu.  
\v 12 Emema yaba enanari ufitae imutedana emaba enanari utebeawe. Eno ufoitana ina Godinu tarawatu sinaini Danu we bou ueta uwaranu sina ubi idoba eno ufoita Yesuma wei.   
\s1 I amoworatu kasimu  
\p
\v 13 Yesuma nono wei, i kikiratu bebetoro fare aniawe. I uitawa yareiene yareiene ueta ina kabesinu bebetona derawerero i dabana kimu meba uwara faiyawere iro fare anaita.  
\v 14 Nono i ibene ibene me ibeta kabesinu bebetona amoworaturo i dabana kimuwereba uwara faiya me dobere fare anaita.   
\s1 Mui anaini danu tai  
\p
\v 15 I meo we bou ueta uwaraba eregou uforo! Emanu ibo nawatana mamoe eginu ereta ari ema awe egi me nono emanu imuetana orowa kuanu imueta ari.  
\v 16 Ema anene utaitana yana ema iwata utaita. Emema gureifi nadidi tai me sara ruruwere nadidiro munawa utaitate boruba tai sinisini bobo anaro munawa utaita.  
\v 17 Idoba kobere ana kobere tai uwanasu. Siosa ana siosa tai uwanasu.  
\v 18 Kobere ana siosa tai uwanawa utasu. Siosa ana kobere tai uwanawa utasu.  
\v 19 I siosa ana kobere tai uwanawa utasuba umane turaitate ina yaretaro sanaita.  
\v 20 I uwaranu ueta, ana tai ari, eraitate ema iwata utaita.   
\s1 Boderewereroma Na ya iwata utawa  
\p
\v 21 Moana uwara faiyawere Naba Dera Amara, Dera Amara waitana nono i uwara nesia i ure yawoeta orofaro da anibitaro Nanu urero ibinu Babanu imueta utaita uwarama torowa iro anibitaita.  
\v 22-23 Nono uwara faiyawere Godinu koto kowaro Nabai webitaita, Anu ifuro we bou utebisite seitaninu siosa imumu we beratebisite buna ueta utebisi eno webitaitana ya siosawere utaita uwara Nana ya iwata meba Nabairoma aika aniawe wemau Yesuma wei.   
\s1 Su ma inareta amara sadei  
\p
\v 24 Anama Nanu sina nautasute utasuna dana iwata derawere amara ari. I amarama danu su tutubu eba yafawere daurite tutubu gebiro deiro sanite gebiroini sakaini sanite isuma yanairo kimu ui.  
\v 25 Danu su eno ubu uiro obi matebiro oku farebiro oyau derawere farebiro su gebiro deiro ibiba jugari utawa ui.  
\v 26 Anama Nanu sina nautasute gifena utasuna dana beforo me amara ari. I amarama danu su tutubu sanawa uite magua deiro ubu ui.  
\v 27 Eno uiro obi matebiro oku farebiro oyau derawere farebe i su ma jugari uiro i su daido me sini Yesuma eno wei.   
\s1 Yesu Danu yawoeta wakiki  
\p
\v 28 Yesuma Danu sina we me siniro i uwara nesia Danu we mawetu uetaba neno kirifu uta.  
\v 29 Yesuma bunawere we mawetu utebi. I tarawatu tisa uwaranu we mawetu ueta i ari meba i uwara neno kirifu derawere uta.   
\c 8  
\s1 Yesuma ofe ubu amaimawere amara ma wiroi  
\p
\v 1 Yesuma maidaniroma tararina uwara faiya faiyawere Danu buribi anita.  
\v 2 Mui amaimawere amara Yesubai farite jegirari uteda nui wei, Dera Waria Amara, Anu unu ufasuna na ma wirofaro wiromau wei.  
\v 3 Weiro Yesuma Danu age sanite i amara buriteda wei, Nanu unu a ma wiromaro wiroa wei. Weina i amaranu amaima ido me siniro wiroi.  
\v 4 Yesuma i amaraba wei, eme nesiabai da ane wiate fuyo ode sina weta amarabai torowa aniate anu ofe mawetu uaro efi wei. Anu ofe kobererau usinuba Mosesinu tarawatu buri age amaima fuyo oeta enanari uaro emema efitate anu ofe wirosinu iwata ufita wei.   
\s1 Yesuma mui Romani ami kafiteni amaranu gaukara ueta amara ma wiroi  
\p
\v 5-6 Yesuma Kafenamu suro farina mui Romani gaemani ami kafitenima Yesubai farite nui wei, Dera Waria Amara, nanu gaukara amarana age sanawa buri inarawa me aineda ofe derawere wourinute me ainasu wei.  
\v 7 Weiro Yesuma dawaba wei, iro animate dawa ma wiromau wei.  
\v 8 Weiro ami kafitenima Dawaba wei, Dera Waria Amara, na kobererau meba nanu suro da arate me sina torowa wiaro nanu gaukara amara wirofi wei.  
\v 9 Eno weite wei, nana dera ami amara. Moana dera uwarama na yawotaitaro nana ami uwara faiyawere yawotatanete mui amaraba ania watanero anasu. Mui amaraba ara watanero arasu. Nanu gaukara amaraba eno ua watanero enanari utasu wei.  
\v 10 Weiro Yesuma i sina nauite neno kirifu uite Danu buribi aneta uwaraba wei, yaba ba wemaro nauawe. I Isaraero uwarabai imueta derawere ewa amaranu imueta i ari atanawa une wei.  
\v 11-12 Yaba watane, eme faiyawere kowa amueta afuini kowa itareta afuini ure yawoeta orofaro fafitate Eibaramuini Aisikini Jeikofuini kaiyobai yaubeda ieta ifitaro nono i Ju uwara, i ba urero yawoeta kabesi mubitae utaita uwara, Godima ema wawa, i dumuwere kabesiro mu sabiro iro emanu nio bijari uteda i webitaita wei.  
\v 13 Yesuma eno weite i ami kafiteniba wei, ania, kimuwere imusinuba enanari ufisu wei, Weina i danu gaukara amarama ido wiroi.   
\s1 Yesu eme faiyawere ma wirotebi  
\p
\v 14 Yesuma Fitanu suro amui. Amo erina Fitanu daroya ofe wakiki wourite ainibiro eri.  
\v 15 Erite danu agero mamiro ofe wakiki ido toba ui. Toba uiro Fitanu daroyama uyarite Yesuba ieta mai.   
\p
\v 16 Dumu sinebiro emanu seitaninu mui siosa imumu bobo uwara Dawabai woure oitaro Yesu bebetuma seitaninu mui siosa imumu we beraite i oferi woureta uwara nesia ma wiroi.  
\v 17 Bodere Godinu we bou ueta amara Isaiyama weiba Yesuma enanari ui. Isaiyama eno wei,  
\li1 Dawa yanu ofe ba me munite yanu oferi woureta mune ma wiroi,  
\p Isaiyama eno wei.   
\s1 Naueta me, me nenoma Yesunu buribi anibitae waita uwara  
\p
\v 18 Uwara faiyawere Yesu ode kara utaro Yesuma erite Danu iwata ueta uwaraba etarafu yofefe wei.  
\v 19 Eno weina mui tarawatu tisa amarama Yesubai farite wei, Tisa, aboro aboro anibasuna naini animau wei.  
\v 20 Weiro Yesuma dawaba wei, i oi egina emanu su bobo, gasirana emanu mowa bobo, nono i Ba Eme Sini Amara Danu aineta kabesina me wei.  
\v 21 Weiro mui iwata ueta amarama wei, Dera Waria Amara, nanu baba uifiro uri ue odimate Anu buribi animau wei.  
\v 22 Weina Yesuma wei, me, awona Nanu buribi ara. Nanu buribi anawa uwarama Nanu buribi anawa uieta uwara uri ufitae watane wei.   
\s1 Yesuma oyabibiba bana wei  
\p
\v 23 Yesuma bouti ubarero amuiro Danu iwata ueta uwarama Danu buribi anitate amutate anita.  
\v 24 Anitaro Yesu nauta ainibina oyabibi derawere fari. Oyau fariba enea ufe uyariro bouti inufie uiro Yesu daido nauta ainibi.  
\v 25 Eno uiba i iwata ueta uwarama Yesu ma uyatate derawere weita, Dera Waria Amara, ya uifene utaisia ma wiroa weita.  
\v 26 Weitaro wei, ya naueta kikiratu uwara aneba iyaraita weite uyarite oyauini ogoini bana weiro nautaro binono sani.  
\v 27 Enoba i uwarama neno kirifu uteda weita, ewa amara abo amararo oyauini ogoini Danu sina nautaita weita?   
\s1 Yesu seitaninu moana imumu siosa bobo amara sadei ma wiroi  
\p
\v 28 Gadarinisi orofa, mesau etarafu iro ane inata. Seitaninu moana siosa imumuma rewoi ibeta bobo amara sadei uri oeta gebiro eraboro ibebina. I amara sadei awe derawereba emema i dabaro anawa.  
\v 29 I amara sadeima Yesu atasite weisi, Godinu Amara waba ane ufae utasu? Wanu koto kowa farawaba waba fanisi da ma weisi.  
\v 30 Weisina borosiri faiyawere etararo ieta ie inarebita.  
\v 31 Idoba seitaninu moana imumu siosama weita, ya we ma berafasuna i borosirinu ubarero siaia uaro anibe weita.  
\v 32 Weitaro Yesuma emaba wei, aniawe wei. Weina anitate i borosirinu ubarero itata. Itataba i borosiri nesia durami ue anitate maidani otoroma mesauro bibu utate imuie me sita.   
\p
\v 33 I borosiri yawotebita uwarama i orofa ekoitate sau durami ue anita. Ane natofo suro fatate imumu siosa bobo amara sadei wirota sina weitaro nauta.  
\v 34 I natofo su uwara nesia suroma anita. Ane Yesubai fatate Yesu ereda yanu orofaroma sau ania weda nui weita.   
\c 9  
\s1 Yesuma mui buri age badabada ubi amara ma wiroi  
\p
\v 1 Yesuma bouti ubarero amuite etarafu, Danu su onamero yofere ani.  
\v 2 Ane fariro moana uwarama age sanawa buri inarawa amara wia warafaro oitaro ainiro Yesubai woure fare oita. Oitaro i amara woure fata uwaranu naueta kimuwere Yesuma erite i age sanawa buri inarawa amaraba wei, Nanu amara, anu neno neno ueta Nana mune imutawa unea neno kimu ua wei.  
\v 3 Eno weiba moana tarawatu tisa uwarama emanu aika eno weita, ewa amarama dawaini Godini arotorowa wasuna dawa Godiba sina siosa wasu weita.  
\v 4 Weitaro Yesuma emanu imueta iwata uteda emaba wei, aneba nenoma siosawere imutaita?  
\v 5 Abo sinama wemau? Anu neno neno ueta mumate imutawa umau aba uyate anu wia muate ania ari? Abo sinama kimuwere wei?  
\v 6 Yesuma eno weite wei, i nasiniro inarasu Ba Eme Sini Amaranu buna derawereba iba emenu neno neno ueta munasute imutawa utasuro yana nesia ereda iwata utaita weite i age sanawa buri inarawa amaraba wei, uyate anu wia muate anu suro ania wei.  
\v 7 Weiro i amara uyarite danu suro ani.  
\v 8 I guruguru ubita uwara nesia ereda neno kirifu uta. Godima emeba buna derawere eno maiba we ma kobererau uta.   
\s1 Matiu Yesuma we muni  
\p
\v 9 Yesuma iroma ani. Anebina mui takesi muneta amara, danu ifuna Matiu, dawa takesi muneta suro yaubiro Yesuma eri. Erite wei, Nanu buribi ara weina ido uyarite Yesunu buribi ani.   
\p
\v 10 Yesuma su ubarero ieta ifie yauri. Takesi muneta uwara faiyawereini neno neno ueta uwara faiyawere Yesuini Danu iwata ueta uwarabai ieta ifitae fata.  
\v 11 Fataro i Ferosi uwara etate Yesunu iwata ueta uwaraba weita, yanu tisa amaraini i takesi muneta uwaraini neno neno ueta uwaraini aneba uruama ieta itaita weita?  
\v 12 Weitaro Yesuma nauite wei, i ofe wourawa uwaraba dogeta amara arawa uite i ofe woureta uwaraba fari wei.  
\v 13 Nanu ununa yanu neno arama ueta, Na unutawa yanu fuyo oeta, aniawete i sinanu ubi ue iwata uawe wei. I kobere uwaraba wemane waya farawa i neno neno ueta uwaraba wemane waya farea wei.   
\s1 I ieta itawa kakara uetaba wenauereta  
\p
\v 14 Joninu iwata ueta uwarama Yesubai fatate weita, i Ferosi uwaraini yaini baetaba ieta itawa ka utaiside nono Anu iwata ueta uwarama aneba ka utawa ieta itaita weita?  
\v 15 Eno weitaro Yesuma emaba wei, i reka aweta muneta amarama danu domayamutuini ogaro itasuba i ogaro itaita uwarama i da webitaita. Dawa emabai ibinuba iba i da webitaita. Nono mui kowaro i reka aweta muneta amara mubitate woure aika orofaro odifitaitana i uwarama ieta da ifitate ieta ka ufitaita. Enanari emema Na woure anibitaitana Nanu iwata ueta uwarama eno ufitaita wei.   
\p
\v 16 Anama reka wadia fifima bodere wadia ebaro fifinu ufisuna i bodere wadia babafite eba derawere ufisuba iba eno da ufisu wei.  
\v 17 Enoba nauawe, reka waini bodere egi ofero adu ufoitana bodere ofe da foafisuba iba eno da ufisu. Adu ufoitana i bodere egi ofe babafiro waini nasiniro itafiro egi ofeini waini ido arama ufisu. Reka waini reka egi ofero adu ufoitana wainini egi ofeini ido kobererau ibifisu wei.   
\s1 Jairasinu arumaini i Yesunu wadiaro burite wiroi aweta  
\p
\v 18 Yesuma emaba eno webina mui Ju uwaranu dubu su yawoeta amarama farite Yesunu buri gigirariro jegirari uteda wei, nanu aruma uisinua arate Anu agema dawa buriaro wirofite me ibifi wei.  
\v 19 Weiro Yesuma ido uyarite i amaranu buribi ani. Danu iwata ueta uwara dawaini anita.   
\p
\v 20-21 Ido anitaro mui aweta ofe derawere wourebe onono woroworo munebi. Oya tuero (12) eno munebi. I awetama eno we imui, Danu wadia fifiro burimate wiromau we imuite Yesunu dubena afuro farite Danu wadia fifiro buri.  
\v 22 Buriro Yesuma owerite i aweta ereda wei, aruma, neno kimu ua. Anu naueta derawereba iba wirosinu wei. Weina i aweta daido ba ido wiroi.   
\p
\v 23 Yesuma i yawoeta amaranu suro farina moana uwarama feku ari ubutaro i guruguru ubita uwarama sorara derawere utebitaro eri.  
\v 24 Erite i uwaraba wei, eta seriawe i arumana ba uitawa me nauta ainibinu wei. Weiro i uwarama we iruteda yo weita.  
\v 25 Yesuma weiro i guruguru ubita uwara nesia wawaro itata. Itataro Yesu ido suro amuite i arumanu agero muniro i aruma uietaroma ido uyari.  
\v 26 I sina i orofa atata nesiaro we inarebita.   
\s1 Yesuma diti basugari amara sadei ma wiroi  
\p
\v 27 Yesuma iroma anebi. Anebina diti basugari amara sadeima Danu buribi aneda derawere weisi, Deiwidinu amara waba neno arama ua weisi.  
\v 28 Weisiro suro amuina i amara sadei iro amusite Dawabai fasiro Yesuma emaba wei, eno umau imutaisi wei? Weina weita, Dera Waria Amara, aiwia weisi.  
\v 29 Weisiro Yesuma emanu diti buriteda wei, yanu naueta derawereba yaba enanari umau wei.  
\v 30 Eno weiro emanu diti ido forairo esi. Yesuma emaba bunawere eno wei, moana uwarabai da wiawa wei.  
\v 31 Weiro i amara sadei i wei sina naue nautawa ari usite i orofa atata nesiaro i ueta nesia we inarebisi.   
\s1 Yesuma wate wiawa amara ma wiroi  
\p
\v 32 Yesuini i uwaraini iroma anita. Anitana moana uwarama seitaninu mui siosa imumuma rewoi ibeta bobo sina wiawa amara Dawabai woure fare oita.  
\v 33 Yesuma i seitaninu mui siosa imumu we berairo aniro i amara ido sina wate wei. Enoba i guruguru ubita uwarama neno kirifu utate weita, ya Ju uwarama eno ueta bodere erawa awona kamama eraisi weita.  
\v 34 Weitaro i Ferosi uwarama weita, Dawa i dera siosa imumunu bunaroma seitaninu siosa imumu we beratasu weita.   
\s1 Uwara nesiaba Yesuma neno arama derawere ui  
\p
\v 35 Yesuma dera natofo suini kiki natofo su suro inareda Ju uwaranu dubu su suro we mawetu uteda Godinu yawotasu orofa sina weda i aika maika ofe woureta uwaraini oferi woureta uwaraini ema nesia ma wirotebi.  
\v 36 Yesuma i guruguru ubita uwara erina i uwarana buna me, imueta aika maika imutebita. I uwarana mamoe ari. I mamoena yawoeta amara meba daba aika maika me inarebaita i ari i uwaranu imueta aika maika imutebitaba Yesuma emaba neno arama ui.  
\v 37 Iba wei, i daure ieta ietatana faiyawere, i ari i Godinu sina nautawa uwarana faiyawere. Nono i daureta uwarana faiyawere me, i ari Godinu sina we inareta uwarana faiya me.  
\v 38 Enoba i daureta ubi Amarabai guriguri uteda gaukara uwara Danu daureta orofaro siaia ufiro anibitae wiawero mafiro anibita Yesuma wei.   
\c 10  
\s1 Yesunu iwata ueta uwara nesia tuero (12)  
\p
\v 1 Yesuma weiro Danu iwata ueta uwara tuero (12) Dawabai fata. Fataro Yesuma ema seitaninu siosa imumu we yowefitate ofe aika maika wouretaini oferi aika maika ma wirofitae iba emaba buna mai.  
\v 2-4 I uwara tueronu (12) ifuna ewado, botaina Saimoni danu mui ifuna Fita. Dawaini danu dabue Enuduruini Jebedinu amara Jeimisini danu dabue Joni. Emaini Firifini Batoromiuini Tomasini i takesi muneta amara Matiu. Emaini Arofiasinu amara Jeimisini Tediasini Keinani amara Saimonini Yesu do mai amara Judasi Isikarioti. Emanu ifu ifu ido.   
\s1 Yesuma Danu iwata ueta uwara tueroba gaukara mai  
\p
\v 5-6 Yesuma i uwara tuero (12) siaia uteda sina eno we kakara ui, i Ju me aika uwarabai da aniawete i Samaria uwaranu su suro da aniawete i Isaraero uwara, i uwarana feareta mamoe ari, i uwarabai aniawe wei.  
\v 7-8 Ane Godinu yawotasu kowa fafie utasu wiawete i ofe woureta uwara ma wiroawete moana uieta uwara ma uyawete i amaimawere uwara ma wiroawete seitaninu siosa imumu we berawe wei. Yana i buna ueta derawere munaitana moko oi matawa utaitaba iba enanari moko da mubote me mafoita wei.  
\v 9-10 Yesuma nono wei, yanu fausiro oi da youawete yoate da muawete mui wadiaini buri baruetaini akurini da muawe wei. Weite wei, i uwarama i gaukara ueta amara dawaba danu ieta moko mafitaitaba iba i nesia da mune aniawe wei.  
\v 11 Mui natofo suro aniboitana Godinu sina naufie uteda ya we mubisu amara dobere atawete danu suro ibiawe. Mui su suro da ibiawe. I su demurairo torowa ibebe nono i natofo su ekodiawete aniawe wei.  
\v 12-13 I amaranu suro amufoitana ario sina wiawete i suro ibeta uwara kobererauna Godinu wesa kawewera ueta yabai ibifisu we ma kobererau uawe. Mena yanu wesa kawewera ue we ma kobererau ueta owefite yabai ibifie watane wei.  
\v 14 Ana anama ya da mubitate yanu sina da naufitaitana yanu dubena emabai sawete sakai buriroma maituawero ema ekodifoita iwata ufitaro ido aniawe wei.  
\v 15 Yaba watane Godinu koto kowa fafiro siosa Sodomu su uwaraini Gomora su uwaraini fanisi kikiratu mafite i ya ere kodifitaita su uwarabana fanisi derawere mafisu wei.   
\s1 I fafie are marinu oferi derawere  
\p
\v 16 Eawe, ya mamoe ari orowa kuabai siaia umauba towi ari beforo buna uawete ubani gasira danu wate ari ure nudarau wiawete kobererau imuegou uawe wei.  
\v 17 Emeba eregou uforo ya kanisoro uwarabai woure odifitate Ju uwaranu dubu suro woure odifitaro isuma ufitaita.  
\v 18 Eno ufitate gaemani dera yawoeta uwaraini kini uwaraini Ju me aika uwarabai woure odifitaita. Godima ya Nanu sina weboro naufitae ufisuba iba eno ufitaita Yesuma wei.  
\v 19 Eno ufitaitana sina daba anene webeisi da imuawe. Da imuawero i sina weta kowa ido fafisuna yana sina da weboro Godima yabai imueta ido mafiro weboita wei.  
\v 20 I kowaro yanu sina da weboro yanu Godinu Imumu Kotofuma yanu bebeturoma sina webisu wei.   
\p
\v 21 I kowaro dataema dabue do mafiro ma uifitaita. Damama danu amara enanari ufisu. Aruma amarama emanu danua damamaba enanari ufitaro ma uifitaita.  
\v 22 Ya Nanu ifu munaitaba i uwara nesia yaba neno ka ufitaita. Anama buna ufiro dubu kowa ido fafiro dawa wirofisu wei.  
\v 23 Yaba siosawere ufitaitana mui natofo suro sau aniawe wei. Yaba ba watane, i Isaraero uwaranu su suro anebe anebe sau da ane me siboro i Ba Eme Sini Amarama ido fafisu wei.   
\p
\v 24-25 I ue iwata amarana derawere me, danu tisa amarana derawere. I gaukara amarana derawere me, danu dawa yawoeta amarana derawere. I ue iwata amaraini tisa amaraini arotorowa sibisisina ina ido. I gaukara amaraini yawoeta amaraini arotorowa sibisisina ina ido Yesuma wei. Na i su ubi amaraba Biesabo, seitani waitana, ya i su gaukara uwaraini ifu siosararabo webitaita wei?   
\s1 Ya nesia Godiba torowa iya uyareibe  
\p
\v 26 Emeba iya da uyawe. Emanu obari ueta ememetu nesia ma uregari ufite emanu feareta ememetu nesia ma boroyafisuba iba emaba iya da uyawe wei.  
\v 27 Dumuro yaba ane sina wemaro naufoitana enanari nono yana kowaro weboita. Nono yaba gimumutaroma wemaro naufote nono yana su abanaro inawete sina derawere wiawe wei.  
\v 28 I ma uieta uwaraba iya da uyawe. I uwarama yanu ofe ma uifitate nono yanu imumu da ma uifitaita. Enoba anama yanu ofe ma uifite nono yanu imumuini ofeini i uitawa inaro sabisuba Dawaba torowa iya uyawe wei.  
\v 29 Emema gui gasira sadei kiki gebiro oi demuraima oiya ue mataitaro itaita. Mui gasiraratu nasiniro me sara da itafisu. Yanu ure Babama i gasirararatunu itareta Dawa iwata.  
\v 30 Godima yaba imuegou utasu. Dawa yanu fouma iji nesia yawiteda iwata utasu.  
\v 31 Godima i gasiraratu imutasute nono yabana imuegou utasuba iya da uyawe wei.   
\s1 Emebai Yesu Kerisonu ifu we inaretaini Dawa na iwata me weta  
\p
\v 32 Anama emebai nanu naueta Yesubai ode webisuna Nana Nanu urero ibinu Bababai dawa Na imutatane wemau.  
\v 33 Anama emebai Yesu na iwata me webisuna Nana Nanu urero ibinu Bababai i amara dawa Na iwata me wemau wei.   
\s1 Yesuma eme ma saragari ufie fari  
\p
\v 34 Ane we imutaita? Na yaba merau ibeta, wesa mamane fare, eno we imutaita? Enoba ewaro farawa ue. Na ewa nasiniro wesarau ueta mamane farawa. Na wesarau ueta mamane farawarogo Nanu sina wemaro moana uwara nauteibitaro moana uwara nautawa uteda urane yarane uteibitae iba farea wei.  
\v 35 Weite wei, mui amaraini danu damama ma saragari ue aika maika eno umane fare, mui arumaini danu danua ma saragari ue aika maika eno umane fare, mui awetaini danu dainau ma saragari ue aika maika eno umane farea wei.  
\v 36 Enoba duburo nanu gaukara ueta amaranu wasai uwarana dawaini su demurai uwara idoni wei   
\p
\v 37 Anama danua damamaba neno arama derawere utasute Naba neno arama kikiratu utasuna dawa kobererau meba Nanu amara da sibisu. Anama danu aruma amaraba derawere neno arama utasute Naba neno arama kikiratu utasuna dawa kobererau meba Nanu amara da sibisu.  
\v 38 Anama danu unu da ekodifite kobere ueta korosi ari da woufisuna dana kobere amara meba Nanu amara da sibisu.  
\v 39 Anama ewa orofaro merau ibifie ufisuna dawa daido uifisu. Nono anama Naba uifisuna dawa dubu kowaro ibene ibene me ibeibisu wei.   
\s1 Moko maeta sina  
\p
\v 40 Anama ya mubisuna dawa Na mubisu. Anama Na mubisuna dana Na siaia ui Godi mubisu.  
\v 41 Anama Godinu we bou ueta uwaranu sina naufisu, dana i uwara, Godinu we bou ueta uwaraba iba naufisuna Godima i we bou ueta uwaranu kobererau moko maeta enanari dawabai mafisu. Anama mui kobere amaranu sina naufisu, dana i amara, kobere amaraba iba naufisuna Godima i kobere amaranu moko maeta enanari dawabai mafisu.  
\v 42 Anama Nanu iwata ueta amakanu nodo raraka ufie ogoratu mafisuna dana Nanu amaraba Godima i ogo maeta amaraba moko derawere mafisu wei.   
\c 11  
\s1 Joni babataitobairoma sina woure fata uwara  
\p
\v 1 Yesuma Danu iwata ueta uwara tuero (12) emaba we mawetu ue me sinite ani. Anite i Ju uwaranu natofo su suro we mawetu utebi.   
\p
\v 2-3 Jonima diburaro ibina Yesunu sina weitaro nauite danu iwata ueta uwara Yesu Kerisobai siaia uiro anitate weita, Ana yanu yawotaisi Amara aba mui amarama fafiro efeisi weita?  
\v 4-5 Weitaro Yesuma wei, oweawete Jonibai aniawete yanu awona eretaini nauetaini nesia dawaba eno wiawe, i diti basugari uwarana eraitaro i buri bebeu uwara rorowarau inaraitaro i buri age amaima uwara wirotaitaro ofe kobererau ue ibinita, ome gogore nautawa uwara nautaitaro uieta uwara uietaroma uyaraitaro aramawere me ibeta uwara Godinu kotofu sina nautaita wei.  
\v 6 Enoba anama Naba iwawa da ufisuna Godima dawa ma kobererau ufiro yaru derawere ufisu. Eno ane Jonibai wiawe Yesuma wei.   
\p
\v 7 I uwarama Yesu ekoitate anita. Anitaro Yesuma i guruguru ubita uwaraba Joninu sina eno wei, i eme ibawa orofaro ane efoe anita? Oyauma oua ma wawana wawana utasuna i amara buna me, oua ari, efoe anita?  
\v 8 Ane efoe anita? Wadia dawana derawere bobo amara efoe anita? I wadia dawana derawere uwarana dera yawoeta uwaranu suro ibinita.  
\v 9 Aneba iro anita? Godinu we bou ueta amara efoe anita? Nanu sina nauawe. Dawa otowaratu we bou ueta amara me. Dawana dera we bou ueta amarawere.  
\v 10 Godinu bukaro sinama dawaba eno wasu,  
\li1 ea, Nanu fo weta amara botai dawa ko sia umaro anibite Anu daba wabue moya ufiro A duburo anibasu ea,  
\p i sinama eno wasua wei.  
\v 11 Weite wei, Nanu ba sina nauawe. I awetabonu munaita adarabu nesiabai Joni babataito waita amara dawana derawere i uwarana kikiratu. Enorogo nono Godinu yawotasu orofaro ibinita otowaratu uwarana derawerero Jonina kikiratu.  
\v 12 Joni babataito amaranu kowaroma are awona Godinu yawotasu sina bunawere webaisi. Eno webaisiba emema Godinu yawotasu orofaro anibitae uteda buna derawere utaita.  
\v 13 Godinu we bou ueta uwaraini Mosesinu tarawatuini emana Godinu yawoeta sina we bou utaro Joni ido fari.  
\v 14 Idoba yanu unu i sina imufoe ufoitana Joni dawana Iraija ido fari.  
\v 15 Ana anama ome bobona ewa sina nauawe Yesuma wei.   
\p
\v 16-17 Weite Yesuma nono wei, ewa ibinita uwara abo uwara ari? Ewa uwara ane ari wemau? Ewa uwarana koiniboro ari watane. Koiniboroma su abanaro yauraitate emanu domayamutuba waita, buma uraisiro ya yaura urawa utaita. Ya neno arama sorara utaisiro nono ya sorara utawa utaita.  
\v 18 Joni babataito amarama farite ietaini ogoini itawa utebiba yana weita, dawa seitaninu mui siosa imumu bobo amara weita.  
\v 19 Nono i Ba Eme Sini Amarama farite buredini wainini itasuro yana eno meo waita, Dawa iteba gabariwere amara, waini itasuro beforo siosa utasu amara. Dana takesi muneta uwaraini neno neno ueta uwaranu domaya waitana Godinu imueta Godinu uwara imufitaitana Dawaini Danu imueta daido ba, i eraita uwarama eno imufitaita, Yesuma eno wei.   
\s1 I Yesubai neno odawa uta suana  
\p
\v 20 Yesuma buna ueta faiyawere moana natofo suro utebiro i su uwarama erebitate emanu neno neno ueta dubena afu sanawa utebita.  
\v 21 Enoba Yesuma dua sina emaba wei, ya Korasini su uwaraini Besaida su uwaraini eforo! Godinu buna ueta faiyawere ya erebitaba i Taira su uwaraini Saidoni su uwaraini ina efitarona aramawere wadia barufitate konua kofiri deiro odeda emanu ba me ueta ekodifitae wei.  
\v 22 Godinu koto kowa fafiro Godima i Taira su uwaraini Saidoni su uwaraini fanisi kikiratu mafite ya Korasini su uwaraini ya Besaida su uwaraini fanisi derawere mafisu wei.  
\v 23 Yesuma nono wei, ya Kafenamu su uwara, urero manibene waita? Iro da manibote uitawa inaro aniboita wei. Godinu buna ueta faiyawere erebitaba i Sodomu su uwarama ina efitarona emanu su awona ibifie wei.  
\v 24 Godinu koto kowa fafiro Godima i Sodomu su uwara fanisi kikiratu mafite ya fanisi derawere mafisu wei.   
\s1 Yesuma wei, Nabai arawete imoiawe wei  
\p
\v 25 I kowaro Yesuma eno wei, Baba, Ana ureini nasinini yawotasu. Ana Anu imueta nesia i orofa atata iwata derawere uwarabai ma fearasute i koiniboro ari uwarabai ma borobarasuro iba we ma kobererau utatane.  
\v 26-27 Ina Anu kobere imueta iba eno utasu Yesuma wei. Weite Danu iwata ueta uwaraba wei, Nanu Babama Danu imueta nesia Naba matasuro enanari utatane. Emema Nanu Babanu Amara anaiya iwawa utaitaro Godi torowana Danu Amara Dawa iwata utasu. Enanari Godi iwawa utaitaro Godinu Amarama Godi iwata utasute anabai Godi ma borobarasuro emana Godi iwata utaita wei.   
\p
\v 28 Ya gaukara derawere utaitate urumuwere ego wouraita uwara ari, uwara ya Nabai arawero yaba imoieta mamaro imoiteda merau ibiawe.  
\v 29 Nanu tobo ana ari wouawete Nanu imueta ue iwata uawe. Nanu nenona ure nudarau Na awe meba Nabai yanu neno ure nudarau ufote imoifoita.  
\v 30 Nanu tobo anana urumu me. Nanu egoini urumu meba yanu neno kobererau imoifoita, Yesuma eno wei.   
\c 12  
\s1 I sabate kowaba wenauereta  
\p
\v 1 Mui sabate kowaro Yesuini Danu iwata ueta uwaraini feame waiyaro inarebita. Waiyaro inarebe Danu iwata ueta uwara osi uriba feame ma gogorugari utate agema burau ureda ie inarebita.  
\v 2 Eno utebitaro Ferosi uwarama etate Yesuba weita, yanu tarawatuma wasu, sabate kowaro eno da uawe wasude Anu iwata ueta uwarade aneba eno utaita ea weita.  
\v 3 Weitaro Yesuma emaba wei, Deiwidinu osi uriba ieta munebi ikiki yawitaita aba me?  
\v 4 Deiwidima osi uriba Godinu suro amuite weiro dera fuyo ode sina weta amarama Godima erebi kakarawere buredi mairo Deiwidini danu domayamutuini mutate ita. I buredina kakarawere. I dera dubu su yawoeta uwara torowama itebita, Godinu tarawatuba.  
\v 5 Godinu tarawatu bukaro dera fuyo ode sina weta uwarama Godinu sabate kowa ma siosa utebita sina ibinuro ina yawitaita aba me wei? I uwarama Godinu sabate kowa ma siosa uteda enanari Godinu tarawatu ma siosa utebitana nono Godima emabai kerere odawa ui wei.  
\v 6 Idoro Na yabai ibine amarana derawerero yanu dera dubu suna otowaratu wei.  
\v 7 Godima eno wasu, Nanu ununa yanu neno arama ueta. Na unutawa yanu fuyo oeta. I sina iwata uforona i kerere me uwara wawei da weboe wei.  
\v 8 I Ba Eme Sini Amara Dawana i sabate kowanu ubi amara. Dana i kowa yawotasu, Yesuma wei.   
\s1 Yesuma age aramawere amara ma wiroi  
\p
\v 9 Yesuma iroma anite Ju uwaranu dubu suro amui.  
\v 10 Amuina age arama amarama ido yaubiro eri. Eriro moana uwarama Yesu meo wawei sina webitae Dawaba weita, sabate kowaro ma wiroetana kobererau aba me weita?  
\v 11 Weitaro Yesuma emaba wei, yanu moana egi sabate kowaro sakai uri yafa derawere ubarero itafitaro ma youforo amufitaita aba me wei?  
\v 12 Yana egi imutaitate nono eme imuegou utawa utaita wei? Enoba sabate kowaro kobererau uetana ido aba me wei?  
\v 13 Eno weite i age arama demurai amaraba wei, anu age sa weiro enanari uiro danu age wiroite mui age ari ui.  
\v 14 Eno uiro i Ferosi uwarama wawaro itatate Dawa anene ufete ma uifeisi weda we matanebita.   
\s1 Godima mune odi gaukara amara  
\p
\v 15-16 Yesuma emanu imueta iwata uiba ema ekodite iroma ani. Anina uwara faiyawere Danu buribi anitaro ema nesia ma wiroite emaba wei, moana uwarabai Nana ya ma wiroeta sina da wiawe wei.  
\v 17 Godinu we bou ueta amara Isaiyama weiba iba eno ui. Isaiyama eno wei,   
\li1
\v 18 Nanu we mune odine gaukara amara eawe. Dawa Nanu Amara ubiba Nanu neno Dawabai ibinu. Nanu Imumu Kotofuma Dawabai odimaro Dawa i Ju me aika uwaranu ueta sineta ma rorowarau ufisu.  
\v 19 Dawa urane yarane da ufite dua sina derawere da webisu. Uwarama Danu wate tanana su abanaro da naufitaita.  
\v 20 Dawa tafu ubeta oua da ma furiafisu, i buna me uwarana tafu ubeta oua ari. I uwaraba da ma siosa ufisu. Dawa nanefa uiki yareta da ma uifisu. I buna me uwarana nanefa uiki ari. I uwaraba da ma siosa ufisu. Dana nesia rorowarau ere webite kobererau ufiro i kobere uetama ueta nesia serigari ufite ibeibisu.  
\v 21 I Ju me aika uwarama Danu ifu naufitate Dawa naue imuegou ufitae Dawa yawoegou ufitaita,  
\p Isaiyama eno wei.   
\s1 Yesuini Biesabo  
\p
\v 22 Moana uwarama diti basugari sina wiawa seitaninu mui siosa imumuma rewoeta bobo amara Dawabai woure oitaro Yesuma dawa ma wiroiro i amara sina wate weda danu diti kobererau siniro eri.  
\v 23 I uwara nesia neno kirifu utate weita, ewa amarana Godinu ma wiroe mune aneta amara aba me weita?  
\v 24 I Ferosi uwarama ina nautate weita, ewa amarama i botai siosa imumu Biesabonu bunaro torowa seitaninu siosa imumu we yowerasu weita.  
\v 25 Yesuma emanu imueta iwata uite emaba wei, mui gaemani uwara emanu aika uraneda saragari ufitaitana arama ufitaita. Mui natofo su uwara emanu aika uraneda saragari ufitate aika maika da inafitaita. Su demurai uwara emanu aika uraneda saragari ufitaitana aika maika da inafitaita.  
\v 26 Seitanima danu moana uwara we yowere sabisuna danu torowa sanono ufisu. Eno ufisuna danu torowa ma saragari ufiro danu yawoeta buna ureifisu.  
\v 27 Na Biesabonu bunaroma seitaninu siosa imumu we beratanena yanu uwarama seitaninu siosa imumu ananu bunaroma we berataita wei? Ibago i uwarama ya koto ufitate ya meo waita webitaita wei.  
\v 28 Nono Godinu Imumu Kotofunu bunaroma seitaninu siosa imumu we beratanena Godinu yawoeta yabai ma boroyarasu wei.   
\p
\v 29 Mui amarama buna amaranu ibaiabai waira ufie uteda anene ufisu? Dawa i buna amaranu buri age ko botai uwane tarifite nono duburo danu ibaiabai waira ufisu.   
\p
\v 30 Enanari anama Naini arotorowa fira fara utawa utasuna dawana Naini wasai utasu, enanari anama Naini arotorowa fira fara utawa utasuna dawana eme yowerasu Yesuma eno wei.  
\v 31 Godima uwaranu neno neno uetaini siosa sina weta nesia mubite imutawa ufisu. Anama Godinu Imumu Kotofuba siosa sina webisuna Godima i siosa da mubite imutawa ufiro danu siosa ueta i amarabai daido ibeibisu.  
\v 32 Anama i Ba Eme Sini Amaraba siosa sina webisuna ina mubite imutawa ufisu. Anama Godinu Imumu Kotofuba siosa sina webisuna ina da mubite imutawa ufiro i siosana dawabai ibene ibene ibeibisu wei.   
\s1 Mui anaini danu tai  
\p
\v 33 Kobere ana warafisuna kobere tai uwafisu. Siosa ana warafisuna siosa tai uwafisu. Mui ana kobere tai uwafisuna ina kobere ana webitaita. Mui ana siosa tai uwafisuna ina siosa ana webitaita. Ane uwafisu enanari webitaita wei.  
\v 34 Ya towinu muneta! Yana siosawereba anene kobererau weboita wei? Mui amaranu neno ubarero i imuetama wate farinuba iba wasu.  
\v 35 I kobere amarana danu kobere nenoroma kobererau utasu. I siosa amarana danu siosa nenoroma siosawere utasu.   
\p
\v 36-37 Yaba ba watane. Godinu koto kowa fafiro Godima uwaranu me sara sina nesia wenauefisu wei. I kowaro yanu kotofurau sinaba Godima yaba kotofurau ufisu. I kowaro yanu siosawere sinaba Godima yaba siosawere ufisu Yesuma wei.   
\s1 Yesunu buna ueta efitae webita  
\p
\v 38 Moana tarawatu tisa uwaraini Ferosi uwaraini Yesuba weita, Tisa, buna ueta uaro efe weita.  
\v 39 Weitaro wei, ewa siosawere ue Godinu sina nautawa uwarama buna ereta doberaita. Nono Jonanu buna ereta ma boroyariba yaba mui aika buna ereta da ufite nono i Jonanu buna ari da ma boroyafisu.  
\v 40 Jonama dera erio eginu desini ubarero kowa rarogonu dumu rarogonu ibiba enanari i Ba Eme Sini Amarama nasini ubarero kowa rarogonu dumu rarogonu ibifisu.  
\v 41 I Niniwe su uwarama Godinu koto kowaro uyafitate ewa uwara wawei webitate do mafitaita. I uwarama Jonanu sina nautate emanu neno neno uetaroma dubena sata. Jonana dera amara me. Awonana yabai dera amarawere ibinuro ekodaitaba iba i Niniwe su uwarama ya wawei webitaita.  
\v 42 Godinu koto kowa fafiro Siba orofanu yawoeta aweta, emanu kuini, uyafite ewa uwara wawei webite do mafisu. Boderewere dana orofa emiroma Soromoninu bunawere we mawetu ueta sina naufie fari. Soromonina dera amara me. Awonana yabai dera amarawere ibinuba i kowaro i awetama uyafite ya wawei webisu wei.   
\s1 Seitaninu mui siosa imumu nono owerite fari  
\p
\v 43-45 Seitaninu mui siosa imumuma mui amara ekodasute yao orofaro ane imoifie dobere inarebasu. Doberebe doberebe dawa imoitawa utasuba eno wasu, nanu ekodine suro owemate animau wasu. Eno wasute i seitaninu mui siosa imumuma owere ane farasute erasuna i amara yawewe aitasuro su ubarero wawawere kobererau ibasuba siosa imumuma anasute seitaninu moana siosa imumu seweni (7) dawa ari me, ina siosawere, mune woure farasu. I nesia dawaini faraitate amutaitate ido ibaita. Enoba i amaranu bodere ibetana kikiratu ba me. Nono awonana siosa imumu faiyawere dawabai rewoe ibaitaba danu ibetana ba mewere. Enoba ewaro ibinita siosa uwaranu ibeta enanari ufisu, Yesuma wei.   
\s1 Yesunu danuaini Danu dabuemutu  
\p
\v 46 Yesuma sina webina Danu danuaini daburetaini atate Yesuba sina webitae inaibita.  
\v 47 Ido inaibitaro mui amarama Yesubai wei, Anu anuaini Anu abuemutuini emana aba sina webitae ewado are inaibinita wei.  
\v 48 Weiro Yesuma dawaba wei, Nanu bayaini nabuemutude anaiya wei?  
\v 49 Weite Danu age Danu iwata ueta uwaraba fisu uteda wei, ewa Nabai nautaita uwarana Nanu bayaini nabuemutuini ido wei.  
\v 50 Ana anama Nanu urero ibinu Baba Godinu sina nautaitate enanari utaitana emana Nanu nabuemutuini arumaini baya ari wei.   
\c 13  
\s1 I yo saneta amaraba kasei sina  
\p
\v 1 I kowaro Yesuma i suroma wawaro itarite enea gigirariro anite yauri.  
\v 2 Iro yaubiro uwara faiyawere Dawa inare kara utaba Yesuma uyarite bouti ubarero amui. Bouti ubarero amo yauriro i uwarama maguaro inata.   
\p
\v 3 Yesuma kasei sinaroma emaba faiyawere we mawetu uteda eno wei, mui amarama yo waifie waiyaro ani.  
\v 4 Ane yo sane inarebina moana yo dabaro itata. Dabaro itataro gasirama fatate ita.  
\v 5 Moana yo gebirowere nasiniro itataro i nasini awewewereba yo sau warata.  
\v 6 Nasini awewewerero yo sau waratate kowama yanairo ini fuyaratuba yoie yoie uta.  
\v 7 Moana yo sinisini bobo ruru ubarero itatate waratate orobuwereba tai uwanawa.  
\v 8-9 Moana yo kobere nasiniro itatate waraegou utate tai faiyawere uwata. Tai demurairoma tai wani aderedi (100) uwani. Mui tai demurairoma tai sikisiti (60) uwani. Mui tai demurairoma tai toti (30) uwani weite wei, ya ome bobo uwarana Nanu sina nauegou uawe wei.   
\s1 I kasei sinanu ubi  
\p
\v 10 Yesuma i sina we me siniro Danu iwata ueta uwarama Yesubai fatate weita, aneba emaba kasei sinaroma wasu weita?  
\v 11 Weitaro Yesuma emaba wei, Godinu ununa ya Danu ure yawoeta kiwu sina naufote iwata ufoe utasute nono Dawa unutawa i uwara Danu ure yawoeta kiwu sina nauetaba iba emaba kasei sina torowaroma ma borobarasuro nautaita wei.  
\v 12 Nanu sina naueta derawere bobo uwaraba mui naueta mafite nono i deramiratu nautaita uwaranu kikiratu naueta ma dare mubisu.  
\v 13 Enoba emaba kasei sinaroma watane. Iba i uwarama eraitate bana erawa. Nauetana nautaitate i sinanu ubina iwawa utaita.  
\v 14 Isaiyama bodere weiba iba enanari uta. Isaiyama eno wei,  
\li1 yanu ido nauegou ufote i sinanu ubina iwawa ufoita. Yanu ido eregou ufote ba ubina da efoita.  
\v 15 Ewa uwaranu nenona imuegou utawa. Emanu omena nautawa utaita. Emanu ditina nautama diti bumu utasuro aibitae utaita. Enoba erawa utaitate nautawa utaitate nenoma iwawa utaitate Nabai owerawa utaitaba ema ma wirotawa utatane. Eno da ufitarona ema ma wiromane,  
\p Isaiyama eno wei.  
\v 16 Yesuma i sina weite emaba wei, yana eregou utaitate nauegou utaitaba Godima ya ma kobererau utasuro kobererau ibinita wei.  
\v 17 Yesuma wei, yaba ba sina wemaro nauawe wei, Godinu we bou ueta uwaraini Danu kobere uwara faiyawere yanu ane ane eraita efitae weitate erawa uta. Emanu ununa yanu ane ane nautaita naufitae utate nautawa uta, Yesuma wei.   
\s1 Yesuma i yo saneta amaraba kasei sina ma boroyari  
\p
\v 18 I yo sane inarasu amara sinanu ubi ewado nauegou uawe, Yesuma wei.  
\v 19 I ubina eno, anama Godinu yawotasu sina nauteda iwawa utasuna seitanima farasute i sina i amaranu neno ubareroma ma dare munasu. Ina i dabaro itata yo ari.  
\v 20-21 Anama Godinu sina nauteda yaru utasute danu nauetana derawere me, fuyaratu i yo ini ari, iba moana kowaro nautasuro Godinu sinaba awe uyareta farasuro i amarama Godinu sina sau ekodasu. Ina i gebiro duboro itata yo ari.  
\v 22 Anama Godinu sina nauteda danu ununa aika maika imueta danu ununa ibaiabai derawere munasuba i sinanu daba garari utasuro i sina tai uwanawa utasu. Ina i ruru ubarero itata yo ari.  
\v 23 Anama Godinu sina nauteda iwata utasuba dawa Godinu gaukara utasu. Mui amarama Godinu gaukara derawere utasu yawietana wani aderedi (100) ari utasu. Mui amarama Godinu gaukara deranono utasu yawietana sikisiti (60) ari utasu. Mui amarama Godinu gaukara kikiratu utasu yawietana toti (30) ari utasu, Yesuma wei.   
\s1 Uruba wei kasei sina  
\p
\v 24 Yesuma emaba mui kasei sina eno wei, Godinu yawotasu kowa ewa sina ari. Mui amarama kobere uiti tai danu waiyaro waite ani.  
\v 25 Nono dumuro eme nauta ainibitaba mui wasai amarama farite uru tai i kobere uiti taibai waite ani.  
\v 26 Duburo i uiti waratana i uruini warata.  
\v 27 Enoba i gaukara uwarama su ubi amarabai fatate weita, dera amara, ana kobere tai wai aba me? Nono anene uru faiyawere waratasu weita?  
\v 28 Weitaro wei, mui amarama naba wasai uite iba eno ui wei. Weiro i gaukara uwarama dawaba weita, i uru ma rerefeisi aba me weita?  
\v 29-30 Weitaro wei, me, da ma rerefoita. Eno ufoitana moana uitini ma rerefoitoba ekodiawero uitini uruini uruama warafitate ayo ufitaitana i uiti muneta uwaraba eno wemau, i uru botai ma rereawete inaro yafoe utedana tobo uawe. Tobo uawete nono duburo i ba uiti ma rereawete nanu ieta oeta suro odiawe wemau wei. Yesuma i kasei sina eno wei.   
\s1 Masita ana taiba wei kasei sina  
\p
\v 31 Yesuma mui kasei sina emaba eno wei, Godinu ure yawotasuna masita ana tai ari. Mui amarama i tai munite danu waiyaro wai.  
\v 32 I taina mui derawere ana tai ari me. I taina kikimusikiratu. Ina waratasute ana derawere utasuro i gasirama emanu mowa i ana iwararo utebaita wei.   
\s1 Wawareta ira yisitiba wei kasei sina  
\p
\v 33 Yesuma emaba mui kasei sina eno wei, Godinu urereo yawotasuna ewa sina ari, mui awetama wawareta ira yisitiratu munite dera faraua ubarero odiro yisitima i faraua nesia ma foai wei.   
\s1 Yesuma kasei sinaroma we mawetu utebi  
\p
\v 34 Yesuma ewa sina nesia kasei sinaroma i guruguru ubita uwaraba wei. Wawuriro wiawa, kasei sinaroma torowa webi.  
\v 35 Godinu we bou ueta amara Isaiyama bodere weiba iba Yesuma enanari wei. Isaiyama eno wei,  
\li1 nana kasei sinaroma wemau. I nasini tutubari ui kowaroma feareta sina we ma boroyamau,  
\p Isaiyama eno wei.   
\s1 Yesuma i uruba wei kasei sina we ma boroyari  
\p
\v 36 Yesuma boutiroma itarite guruguru ubita uwara ido ekodite suro amui. Suro amuiro Danu iwata ueta uwarama Dawabai fatate weita, i waiyaro uru warataita sinanu ubi we ma boroyaro iwata ufe weita.  
\v 37 Weitaro wei, i kobere tai waitasu amarana i Ba Eme Sini Amara.  
\v 38 I waiyana ewa orofa atata. I kobere taina Godinu yawotasu orofaro aneta uwara. I siosa taina seitaninu uwara.  
\v 39 I siosa tai waitasu wasai amarana seitani. I ayo ureta kowana ewa orofa atatanu me sibisu kowa. I muneta uwarana Godinu aneru.  
\v 40 I uru mune inama yaraita i ari i me sibisu kowaro enanari ufitaita.  
\v 41-42 I Ba Eme Sini Amarama Danu aneru siaia ufiro tarafitate Danu orofaro i siosa ue ereta uwaraini i siosa uwaraini nesia mubitate i uitawa inaro sabitaro iro anibitaita emema emanu nio bijari uteda i webitaita.  
\v 43 I kowaro Godinu sina nautaita uwara, i kobere uwarama Godinu yawotasu orofaro kowa ario ari ario ufitaita. I ome bobo uwarana nauegou uawe wei.   
\s1 I feare ibeta gugua gubariba wei kasei sina  
\p
\v 44 Yesuma wei, Godinu ure yawotasu ewa sina ari. Mui amarama mui waiyaro feare oitaro ibi i oi derawere daurite eri. I oi daure erite nono sakaima ma tafure odite ani. Suro ane farite danu ibaiabai nesia oiya ue maite oi munite nono i nasini oiya ui wei.   
\s1 Fera agewa waita emeruba wei kasei sina  
\p
\v 45 Godinu ure yawotasu ewa sina ari, mui sitowa amarama oi gebiro, danu ifuna fera agewa ari dobere ani.  
\v 46 Doberebe doberebe kobere fera agewa danu dawana derawere atani. Ido atanite ane danu ibaiabai nesia oiya ue maite oi munite owerite i fera agewa oiya ui wei.   
\s1 Iwameba wei kasei sina  
\p
\v 47-48 Godinu ure yawotasu ewa sina ari. Moana uwarama emanu iwame enea ubarero satate erio egi aika maika nesia mutaro iwame wate fariba i uwarama duero ma youtaro amui. Duero amuiro i uwarama yautate i kobere erio egi bosioro youtate i siosawere erio egi mu sata.  
\v 49-50 Ewa orofa atata dubu kowa me sibiro enanari ufisu. Godinu aneruma enanari ufitaita. Godinu aneruma tarafitate i siosawere uwara i kobere uwarabairoma mubitate uitawa inaro sabitaro iro anibitaita emema nio bijari uteda i webitaita wei.   
\s1 Rekaini bodere kobere ibaiabaiba wasu sina  
\p
\v 51 Yesuma emaba wei, i watane sina nesia nautaita wei? Weina nautaisi weita.  
\v 52 Weitaro Yesuma wei, Mosesinu tarawatu tisa amarama Godinu ure yawotasu sina ue iwata utasuna i ibaiabai, bodereini reka ibaiabai, ma borobarasu enanari Mosesinu tarawatu tisa amarama danu bodere imuetaini danu reka imuetaini we mawetu utasu wei.   
\s1 Yesu Nasareta uwarama ere ekoita  
\p
\v 53 Yesuma i kasei sina we me sinite iroma ani.  
\v 54 Ane Danu orofaro farite i Ju uwaranu dubu suro we mawetu ui. We mawetu utebiro i uwarama neno kirifu utate weita, ewa amara Danu iwata derawere aboro muninute Danu buna ueta anene utasu?  
\v 55 Dawa etei su ma inareta amaranu amara aba me? Meride Danu danua aba me? Jeimisini Jousefaini Saimonini Judasini ema Danu dabureta aba me?  
\v 56 Danu arumami yabai ibinita aba me? Ewa amarana anene dera amara? Danu iwata aboro muninu weita?  
\v 57 Eno weitate Dawaba ibo utaro Yesuma emaba wei, mui we bou ueta amaranu su uwaraini danu orofa uwarama dawa ititi kakara utawa utaitaro aika uwarama dawa ititi kakara utaita wei.  
\v 58 I uwarama imutawa utaba emabai buna ueta utawa ui.   
\c 14  
\s1 Joni babataitonu uieta kowa  
\p
\v 1-2 Erodi, dana gaemani dera yawoeta amarama Yesunu buna ueta sina nauite danu gaukara uwaraba wei, i amarana Joni babataito amara. Dawa uietaroma uyariba iba i buna eno utasu wei.   
\p
\v 3 Bodere Erodima Joni diburaro odi. Erodima danu dabue Firifinu aweta Erodiasi waira ue muni.  
\v 4 Eno uiro Jonima dawaba wei, anu abuenu aweta muneta siosawereba kodia wei.  
\v 5 Weiba Firifinu aweta Erodiasima ibo uite woroworo webiba Erodima Joni diburaro odite ma uifie wei. Weiro i uwara nesia Joni Godinu we bou ueta amara imutaba Erodima iyarite Joni ma uitawa ui.   
\p
\v 6 Duburo Erodinu danuama dawa muni kowa fariba ogaro derawere uiro uwara faiyawere ogaro ifitae fata. Ido fataro ogaro itebitana Erodiasinu aruma emabai yaura urebiba Erodima neno ubarero yaru ui.  
\v 7 Yaru uite i arumaba wei, nabai ane mubae webasuna ina aba mamau eno bunawere we bou ui.  
\v 8 Eno weiro danu danuama weiba i arumama Erodiba wei, Joni babataito amaranu kofiri naberoro odiate mai wei.  
\v 9 Eno weiro Erodi neno siosa ui. Nono dawa botai bunawere we bou uiba danu ogaro itebita uwarama nautaba Erodima danu wei enanari ui.  
\v 10 Dana weiro danu uwarama dibura suro anitate Joninu nodo ture kofiri naberoro oita.  
\v 11 Eno utate ane fatate i arumaba mataro i arumama munite ane danu danuaba mairo eri.  
\v 12 Enoba Joninu iwata ueta uwarama diburaro fatate Joninu ofe mutate ane uri uta. Uri ue me sitaro Yesubai anitate Joninu uieta sina nesia weita.   
\s1 Yesuma i eme fai tausani (5000) ieta mairo ita  
\p
\v 13 Yesuma i sina ido nauite i orofa ekodite bouti ubarero amuite eme ibawa orofaro ani. Aniro uwara faiyawere nautate natofo su suroma duero Dawabai anita.  
\v 14 Anitaro Yesuma etarafu farite maguaro inarite i uwara nesia ereda neno arama ui. Neno arama uiba emanu ofe woureta uwara ma wiroi.   
\p
\v 15 Dumu sinebiro Yesunu iwata ueta uwarama Dawabai fatate weita, ewa orofana eme ibawa orofa. Nono dumu siosoa sau wiaro i uwara nesia natofo su suro anibitate ieta oiya ufita weita.  
\v 16 Weitaro Yesuma wei, aneba anibitaita? Emaba ieta mawe wei.  
\v 17 Weiro weita, yabai buredi faini (5) erio egi sadei torowa ibinu weita.  
\v 18 Weitaro Yesuma wei, ina woure Nabai arawe wei.  
\v 19 Weite weiro i uwara nesia samarai deiro yauta. Yautaro Yesuma i buredi faini (5) erio egi sadeini munite urero ereda Godi we ma kobererau uite i buredi ma birabiarite Danu iwata ueta uwaraba mairo emana i guruguru ubita uwaraba nata nata uta.  
\v 20 I uwara nesia itaro dia uri. Ie me sitaro iwo muduna mutate bosioro youtaro bosio tuero (12) wate fata.  
\v 21 Eme faiyawere fai tausani (5000) ieta itaro nono awetaboini koiniboroini ieta ita.   
\s1 Yesuma ogo deiro inarebi  
\p
\v 22 Yesuma weiro Danu iwata ueta uwara ema ko boutiro amutate etarafu yofeta. Yoferebitana Yesuma i guruguru ubita uwaraba weiro anita.  
\v 23 Anitaro Yesu Danu torowana guriguri ufie maidaniro mani. Manite dumu siniro Danu aika iro ibi.  
\v 24 Yesuma iro ibina i boutina ogo abanaro ane fari. Oyau fariro ufe uyariba etarafu anawa.  
\v 25 Goso gigigiro Yesuma ogo deiro inarebe emabai ane fari.  
\v 26 Yesu farebina i iwata ueta uwarama Dawa etate iyareda arua derawere weitate weita, ina imumu weita.  
\v 27 Weitana Yesuma emaba wei, neno kimu uawe. ewana Na, iya da uyawe wei.  
\v 28 Weiro Fitama wei, Dera Waria Amara, ina Ana wiaro ogo deiro Abai ama wei.  
\v 29 Weiro Yesuma ara wei. Weina Fitama boutiroma itarite Yesubai ani.  
\v 30 Anina oyau fariro ufe uyariro Fitama ereda iyarite ogoro inui. Inuteda derawere wei, Dera Waria Amara, na ma wiroa wei.  
\v 31 Weiro Yesuma Fitanu agero sau munite wei, ana imueta kikiratu amara! Aneba imutawa usinu wei.  
\v 32 Weiro bouti ubarero amusiro oyau ido me sini.  
\v 33 Idoba i bouti ubarero yaubita uwarama Yesu guriguri uteda weita, Ana Godinu Amara weita.   
\s1 Yesuma Genesareta suro ofe keria bobo uwara ma wiroi  
\p
\v 34 Ogo etarafu yofetate Genesareta orofaro ane inata.  
\v 35 Ane inataro i orofa uwarama Yesu fari iwata utate emanu ofe woureta uwara Dawabai woure fare oita.  
\v 36 Fare oitaro ofe woureta uwarama weita, Anu wadia fifi burifene waisi weita. Idoba ana anama Yesunu wadia fifiro buritana ido wirota.   
\c 15  
\s1 Yanu abuamutunu we mawetu ueta  
\p
\v 1-2 Moana Ferosi uwaraini tarawatu tisa uwaraini Jerusaremu suroma Yesubai ane fatate weita, Anu iwata ueta uwarama yanu baeta uwaranu ueta sina nautawa utaita. Ieta itaitana age urotawa utaita. Aneba eno utaita weita?  
\v 3 Weitaro Yesuma emaba wei, yade, aneba yanu baeta sina nauegou utaitate nono Godinu tarawatu sina nautawa utaita?  
\v 4 Godinu tarawatuma eno wasu, yanu yanua yamamanu sinaini uetaini munebeawete yawotebeawe. Anama danu danua damamaba sina siosawere webisuna dawa ure uiawe, Godinu tarawatuma eno wasu.  
\v 5-6 Nono yana eno waita, mui amarama danu me maeta Godiba matasuba danu danua damamaba da mafisuba danu damama kakara da ufisuna ina ido waita. Eno utaitaba yanu baeta ma uyaraitate Godinu tarawatu sina abesanaita wei.  
\v 7-8 Weite wei, ya meo meo ueta uwara! Bodere Isaiyama yaba ba we bou uteda wei, Godinu wei sina edono,  
\li1 ewa uwarana Naba bebeturoma waitate nenoma Na imutawa utaita.  
\v 9 Na guriguri me sara utaita. Emenu imuetana Godinu imueta eno we mawetu utaita,  
\p Isaiyama yaba eno weiya Yesuma wei.   
\s1 I emenu neno ma iga utasu ememetu  
\p
\v 10 Yesuma weiro i uwarama Dawabai fata. Fataro Yesuma wei, Nanu sina nauawete enanari ue iwata uawe wei.  
\v 11 Ieta ane ane mui amaranu ubarero anibitaitana ima i amara da ma siosa ufitaita. Ane ane imuteda siosa neno ubareroma amufitaro bebetuma webisuna ima i amara ma siosa ufisu wei.   
\p
\v 12 Danu iwata ueta uwarama Dawabai fatate weita, i Ferosi uwarama Anu sinaba dua uita weita.  
\v 13 Weitaro Yesuma wei, Nanu urero Babanu waitawa ui yo nesia Dana ini bobo ma dorodafisu.  
\v 14 I uwaraba da imuawe. I uwarana diti basugari uwara ari, Godibai urero aneta daba iwawa utaita. I diti basugari bobo uwarama mui diti basugari bobo amaranu agero muneda woure anaitana ema nesia kawaro itaraita wei.  
\v 15 Fitama Yesuba wei, i kasei sinanu ubi wiaro naufe wei.  
\v 16 Weiro Yesuma wei, ya uwara imueta bobo meba ewa sina iwawa utaita?  
\v 17 Ina eno, ieta nesia mui amaranu desiniro anasute duburo wisi areta kabesiro farasu.  
\v 18 Nenoroma siosa ane ane imueta amutasuro bebetuma wasuba iba ina ima i amara ido ma siosa utasu.  
\v 19 Nenoroma siosa imueta faiyawere amutaita. Ma uieta imuetaini dita yagera fareta imuetaini waira ueta imuetaini meo wawei weta imuetaini eno amutaita.  
\v 20 Mui amaraba siosa sina weta imueta amutasu. I amutaita imuetama i amara ma siosa utaita. Yanu age urotawa utaitate ieta itaita baetana ina ima i amara ma siosa utawa utasu wei.   
\s1 Mui aweta danu nauetaba wiroi  
\p
\v 21 Yesuma iroma anite Taira suini Saidoni suro ane fari.  
\v 22 Iro ane fariro mui Keinani su awetama Dawabai farite derawere wei, Dera Waria Amara, naba neno arama ua. Mui seitaninu siosa imumuma nanu arumanu neno ubarero rewoe ibeda siosa utasuba Deiwidinu amara na durua ua wei.  
\v 23 Weiro Yesuma dawaba moko sina wiawa ui. Eno uiba Danu iwata ueta uwarama fatate weita, i aweta yabai derawere wasuba wiaro anibi weita.  
\v 24 Weitaro wei, Godima Na i Isaraero uwarabai siaia ui. I uwarana feareta mamoe ari emabai torowa Na siaia ui wei.  
\v 25 Weiro i awetama fare Danu buri gigiraribai jegirari uteda wei, Dera Waria Amara, na durua ua wei.  
\v 26 Weiro Yesuma wei, i koiniboronu ieta mumate kuasiriba samauna ina ba me wei. I koiniborona Isaraero uwara ari i kuasirina Ju me aika uwara ari iba eno da umau wei.  
\v 27 Weiro i awetama wei, Dera Waria Amara, ba wasu. I kuasirima emanu ema yawoeta uwaranu ieta fufuno itarebasuro itaita wei.  
\v 28 Eno weiro Yesuma dawaba wei, aweta, anu imuetana derawere. Idoba anu ununa enanari ufisu wei. Weiro i awetanu aruma ido wiroi.   
\s1 Yesu eme faiyawere ma wiroi  
\p
\v 29 Yesuma iroma ani. Anedana Gareri mesau nioro inarebe iroma maidaniro mani. Mane farite yauri.  
\v 30-31 Mane yaubiro uwara faiyawere Dawabai mane fata. Emanu buri bebeu uwaraini buri age badami uwaraini diti basugari uwaraini sina wate wiawa uwaraini moana uwara faiyawere woure mane fatate Yesunu buri gigirariro oitaro Yesuma ema nesia ma wiroi. Eno uiro i sina wate wiawa uwara wate weitate i buri age badami uwarama buri age rorowarau ue fare anitate i buri bebeu uwarama buri rorowarau ue fare anitate i diti basugari uwarama ba eta. I uwara nesia eno utaro i guruguru ubita uwarama neno kirifu uteda i Isaraero uwaranu Godinu ifu we ma derawere uta.   
\s1 Yesuma eme fo tausani (4,000) ieta mai  
\p
\v 32 Yesuma weiro Danu iwata ueta uwarama Dawabai fataro wei, ewa uwarana kowa rarogonu Nabai ibeda ieta itawa utaitaro emaba Na neno arama utatane. Ema ewadoroma odimaro dabaro anibitaitana osima uiotoba iba ema da siaia umau wei.  
\v 33 Weiro Danu iwata ueta uwarama Dawaba weita, ewa yao orofade ieta aboro mubero i uwara nesia ifitaita weita?  
\v 34 Weitaro Yesuma emaba wei, buredi aboabo yabai ibinu wei? Weiro buredi sewenini (7) erio egi ba torowaratu weita.  
\v 35-36 Weitaro wei, i uwara nasiniro we ma yauawe weite buredini erio egini munite Godibai we ma kobererau ui. We me sinite buredini erio egini ma birabiarite Danu iwata ueta uwaraba mairo mutate i guruguru ubita uwaraba mata.  
\v 37 Mataro i uwarama mune ie dia uta. Ie me sitaro ieta iwo muduna mutate bosioro youtaro bosio seweni (7) wate fata.  
\v 38 Eme fo tausani (4,000) faiyawere itaro awetaboini koiniboroini ieta ita.  
\v 39 Yesuma ido weiro i guruguru ubita uwara nesia anita. I uwara ido anitaro Yesu bouti ubarero ido amuite boutiroma yofere Magadani orofaro ane fari.   
\c 16  
\s1 Yesunu buna ueta efitae webita  
\p
\v 1 Moana Ferosi uwaraini Sadusi uwaraini Yesu ue efitae Dawabai fatate weita, buna ueta uaro urero ufiro efe weita.  
\v 2 Weitaro Yesuma emaba wei, yawi sinebasuro gajigaji beatasu goso eraitate waidumu kowa inafisu waita.  
\v 3 Nono wai urasuro dubawaru goso eraitate awona obi mafisu waita wei. I urero goso ereta yana iwata uegou utaitate nono Godinu awona utasu ueta yana iwawa utaita wei.  
\v 4 Ewa siosawere ue Godinu sina nautawa utaita uwarama buna ereta efoe waitaro mui buna ereta yaba da mafiro Godima Jonabai ui i ueta torowa efoita wei. Eno weite ema ekodite ani.   
\s1 I Ferosi uwaraini i Sadusi uwaraba wawareta ira yisiti sina  
\p
\v 5 Ogo etarafu yofere ane inatana Danu iwata ueta uwarama buredi imutawa utate munawa uta.  
\v 6 Ferosi uwaraini Sadusi uwaranu sinana wawareta ira yisiti ari. Sina kikiratu webitaitana derawere ufiro emema naufitaitaba eforo watane wei.  
\v 7 Weiro Danu iwata ueta uwarama i sinanu ubi we mataneda weita, yana buredi munawa A iba eno wenu weita.  
\v 8 Weitaro Yesuma emanu sina iwata uteda emaba wei, ya kikiratu naueta uwara. Aneba burediba sina we matanaita?  
\v 9 Aneba iwawa utaita? Aubokona buredi fai ma birabiarero eme fai tausani (5,000) itaro bosaru bosio aboabo youta? Ina imutawa utaita?  
\v 10 Nono buredi seweni (7) ma birabiarero eme fo tausani (4,000) itaro bosaru bosio aboabo youta?  
\v 11 Ina imutawa utaita? Burediba wiawa unero aneba iwawa utaita? I Ferosi uwaraini Sadusi uwaranu wawareta ira yisiti eforo watane wei.  
\v 12 Eno weiba Dawa i Ferosi uwaraini Sadusi uwaranu wawareta ira yisitiba wiawa uite Ferosi uwaraini Sadusi uwara emanu we mawetu uetaba weiro iwata uta.   
\s1 Fitama Yesunu ifu we ma boroyari  
\p
\v 13 Duburo Yesuma Sesaria Firifai orofaro ane fari. Iro farite Danu iwata ueta uwaraba wei, ewa uwarama i Ba Eme Sini Amarana abo amara waita wei?  
\v 14 Weiro weita, moana uwarama Dawana Joni babataito amara waita. Moana uwarama Dawana Iraija waita. Moana uwarama Dawana Jeremaia aba mui we bou ueta amara waita weita.  
\v 15 Weitaro Yesuma emaba wei, yade, Naba anene waita wei?  
\v 16 Weiro Saimoni Fitama wei, Ana Godinu Mesaia, Ana i me ibinu Godinu Amara wei.  
\v 17 Weiro Yesuma wei, Saimoni Jonanu amara, Godima a we ma kobererau usinu. Mui amarama i moko sina aba wiawa usinuro Nanu urero ibinu Babama ina aba we ma boroyarinuro iba wenu wei.  
\v 18 Fita Nanu sina naua. Ana Fita. Anu ifunu ubina gebiro. Nono i gebiro deiro Nanu sina naueta uwara odimaro i uietanu bunama ina da ma jugari ufisu.  
\v 19-20 Aba i ure yawotasu orofa na widu ari mamaro ananu ueta ane ane uwane tarifaro dawabai ibifisu enanari urero uwane tarifiro dawabai ibifisu. Ananu ueta ane ane uregari ufate mune aika odifasu enanari urero uregari ufite mune aika odifisu wei. Yesuma eno weite nono bunawere wei, Nana Keriso i Mesaia, moana uwarabai eno da wiawe wei.   
\s1 Yesu Danu oferi woufite uifisu sina wei  
\p
\v 21 I kowaroma Yesuma Danu iwata ueta uwaraba Danu ueta ufisu we mawetu ui. Dawa Jerusaremu suro anibiro i Ju uwaranu baeta uwaraini dera fuyo ode sina weta uwaraini tarawatu tisa uwaraini emana Dawa ure yanae ufitaro oferi derawere woufite uifite nono kowa rarogonu me sibiro Yesuma uietaroma ido uyafisu. Yesuma emaba eno we mawetu ui.  
\v 22 Eno we mawetu uiro Fitama Yesu mune aika odite we kakara uteda wei, Dera Waria Amara, nanu ununa Godima i uwaranu ueta mune ekodifisuba Aba eno da ufitae watane wei.  
\v 23 Weiro Yesuma owerite Fitaba eno wei, seitani anu imuetama Nanu imueta garari ufie utasuba Nabairoma eta ania weite wei, ana Godinu imueta imutawa, emenu imueta imuteda iba eno wasu wei.   
\p
\v 24 Yesuma Danu iwata ueta uwaraba wei, anama Nanu buribi afie ufisuna danu unu nesia ekodifite kobere ueta danu korosi ari mubite dawa uifie Nanu buribi afisu.  
\v 25 Anama danu ewaro me ibeta yawoegou ufisuna ina feafiro Nabai ibene ibene da ibifisu. Anama danu me ibeta yawoegou utawa ufite Naba uifisuna dawa Nabai ibene ibene me ibeibisu.  
\v 26 Mui amarama ewa orofa atata ibaiabai nesia mubiro danu me ibeta imumu siosa kabesiro feafisuna ina kobererau me. Eno ufisuna danu imumu anene moko oiya ufisu wei?  
\v 27 I Ba Eme Sini Amaraini Danu aneruini ema Danu Damamanu bunaini araetaro fafisuna uwara nesia ane ane utaitaba emaba enanari moko mafisu wei.  
\v 28 Yaba ba wemaro nauawe. Moana ewado inaibinita uwarama da uifitaro i Ba Eme Sini Amara Danu yawoeta orofaroma ido fafiro efitate nono uifitaita Yesuma wei.   
\c 17  
\s1 Yesunu ibo nawatanu ereta aika uite me sini  
\p
\v 1 Kowa sikisi (6) me siniro Yesuma Fitaini Jeimisini danu dabue Jonini emanu aika munite dera maidaniro mani.  
\v 2 Iro mane farite emanu iboro Yesu Danu ofe aika ui. Danu ibo nawata kowa ario ari ario ui. Danu wadia goso ari inawere ui.  
\v 3 Eno uiro Mosesini Iraijaini Yesubai ido me ari usite fare sina sina webisi.  
\v 4 Enoba Fitama Yesuba wei, Dera Waria Amara yanu ewado ibinisina kobererau. Anu ununa nana moana kiki suraratu rarogonu umau. Anu mui, Mosesinu mui, Iraijanu mui, Anu ununa ina ubu umauna ubu umau wei.  
\v 5 Eno weina ariowere gosoma ema ma yariro gosoroma sina tararite wei, ewana Nanu Amara ubi. Nanu neno Dawabai ibinuba Danu sina nautebeawe wei.  
\v 6 Weiro iwata ueta uwarama i sina nautate nasiniro arubi uteda iya uyata.  
\v 7 Eno utaro Yesuma emabai farite ema buriteda wei, uyawete iya da uyawe wei.  
\v 8 Weiro emanu diti foratana moana uwarana me. Yesu torowa inaibiro eta.  
\v 9 Maidaniroma taratana Yesuma emaba bunawere wei, ewa tubetube erita imumu moana uwaraba da wiawero i Ba Eme Sini Amara uietaroma uyafisuna ido wiawe wei.  
\v 10 Weiro i iwata ueta uwarama weita, i tarawatu tisa uwarama Iraija dawa ko fafisu aneba eno webaita weita?  
\v 11 Weitaro Yesuma wei, ba waita. Iraija dawa ko farite ibeda ane ane nesia ue bou bou utebi wei.  
\v 12 Nanu sina wemaro nauawe. Iraija dawa fariro emana dawa iwawa utate dawaba siosawere uta. Enanari i Ba Eme Sini Amaraba siosawere ufitaita wei.  
\v 13 Eno weiba Danu iwata ueta uwarama Dawa Joni babataito amaraba wasua we imuta.   
\s1 Yesuma seitaninu mui imumu siosama rewoeta bobo amararatu ma wiroi  
\p
\v 14-15 I guruguru ubita uwarabai ta fataro mui amarama Yesubai farite jegirari uteda wei, Dera Waria Amara, nanu amaraba neno arama ua wei. Nanu amarama uieta ari utebasu. Moana kowaro inaini ogoro faiya faiyawere itarebasu. Enoba oferi derawere wourasu.  
\v 16 Nanu amara Anu iwata ueta uwarabai woure anero ma wirofitae uitana ma wirotawa uita wei.  
\v 17 Weiro Yesuma wei, ya imutawa jaja bujiji utaita uwara! Yabai kowa aboabo ibimaro Na naue imue ufoita wei? Eno weite wei, i amara ewaro Nabai woure ara weiro eno uta.  
\v 18 Yesuma i seitaninu mui siosa imumuba sina bunawere weiro seitaninu mui siosa imumuma i amara ekodite aniro i amara ido wiroi.   
\p
\v 19 Duburo Danu iwata ueta uwara emanu aika Yesubai fatate weita, i seitaninu mui siosa imumu aneba we ma beratawa uisi weita?  
\v 20 Weitaro Yesuma wei, yanu imueta kikiratuba iba we beratawa uita. Yaba ba wemaro nauawe. Yanu imuetana mui kikiratu masita ana tai arina etei maidaniba uyate etararo ania weboitana enanari ufisu wei. Anene webote kimuwere naue imue ufoitana enanari ufisu wei.  
\v 21 Nono guriguri ueta kowaro torowa ieta ka uteda Godibai guriguri ufoitana ewa siosa imumu ari we ma berafoita wei.   
\s1 Yesu Danu uieta sina nono wei  
\p
\v 22-23 Duburo Gareri orofaro ibebitana Yesuma emaba wei, i Ba Eme Sini Amara mui uwaranu age duro odifitaro Dawa ufitaro uifiro kowa rarogonu me sibiro uietaroma nono uyafisu wei. Weiba Danu iwata ueta uwara neno siosa derawere uta.   
\s1 I dubu sunu takesi maeta ueta  
\p
\v 24 Yesuini Danu uwara Kafenamu suro fata. Fataro i Ju uwaranu dubu su takesi muneta amarama Fitabai farite wei, anu tisa amarama i dubu su takesi oi sanasu aba me wei?  
\v 25 Weiro Fitama wei, aiwia, Dawa sanasu wei. Duburo Fitama suro fariro Yesuma wei, Saimoni ane imutasu? I dera kini uwarama abo uwarabai takesi oi munaita? Emanu daburetabai aba moana uwarabai? Ane imutasu wei?  
\v 26 Weiro Fitama wei, moana uwarabai wei. Weiro Yesuma wei, idoba i daburetana takesi oi sanawa utaitate me inaraita wei.  
\v 27 Nono i dubu su takesi muneta uwara yaba ibo da ufitaitana enearo aniate erio egi kimai ogo abanaro sa. Sate i botai erio egi muate danu bebeturo siriwa oi eate ina aini Naini wanu takesi oi. I oi ido mune i takesi muneta uwarabai ane ma wei. Yesuma eno weiro Fitama enanari ui.   
\c 18  
\s1 Anama derawere  
\p
\v 1 Mui kowaro Yesunu iwata ueta uwarama Dawabai fatate weita, ure yawoeta orofaro yabaina abo amarama iro dera amara sibisu weita?  
\v 2-3 Weitaro Yesuma weiro mui amakanu Dawabai woure fare oita. Woure fare oitaro Yesuma i amakanu munite emanu abanaro ma yaurite wei, yaba ba wemaro nauawe. Yana Godinu yawotasu koiniboronu imueta ari da muboitana ure yawoeta orofaro da aniboita.  
\v 4 Anama ewa amakanunu imueta ari imuteda danu ifu da we ma derawere ufisuna dawa ure yawoeta orofaro botai dera amara sibisu wei.  
\v 5 Anama mui amakanu ewa amakanu ari Nanu ifuro ba durua ufisuna Naini durua ufisu wei.   
\s1 Yana siosawere ufene siosawere uetama ya ue erebasu  
\p
\v 6 Nono anama Nanu sina naueta amakanuba ba me maosoro siosawere uosoba i ba me maeta amaranu nodoro gebiro derawere doifitate enearo sabitaro imuifirona ina kobererau Yesuma wei.  
\v 7 Ewa orofa atata uwarabai siosawere ue ereta faiyawere ibinuba siosawere utaita. Ba me ue ereta faiyawere fareibisu. Nono mui amarama mui amarabai ba me ue efisuna Godima dawa fanisi mafisu wei.  
\v 8 Yanu mui buri agema ya ma siosa ufisuna i ya ma siosa ufisu buri age umane tuawete buri age demuraima ibifoitana ina kobererau. Buri age sadeima uitawa inaro ya sabitaitana ina siosawereba iba buri age umane tuawe.  
\v 9 Yanu mui ditima ya ma siosa ufisuna i diti torowa ma guju uawete mu sawete diti demuraima ibifoitana ina kobererau. Diti sadeima uitawa inaro ya sabitaitana ina siosawereba iba diti ma guju uawete diti demuraima ure orofaro aniboitana ina kobererau, diti sadei bobo uitawa inaro aniboitana siosawere wei.   
\s1 I feareta mamoeba kasei sina  
\p
\v 10 Koiniboroba ewa amakanu ari emaba me sara nenoma ibo da uforo! Yaba ba wemaro nauawe. Emanu yawoeta aneruna urero Nanu Bababai ibinitaba iba emaba ibo da uforo wei.  
\v 11 Weite wei, i Ba Eme Sini Amarama i Godinu sina nautawa uwara ma wirofie iba ewaro fari wei.  
\v 12 Ewa imue eawe! Mui amarama mamoe wani aderedi (100) boboro nono mamoe demurairatu feafisuna mamoe nainiti naini (99) maidaniro ekodifite i mamoe demurai dobere anibisu. Eno ufisu aba me? Aiwia eno ufisu.  
\v 13 Dawa ane doberebe doberebe i mamoe ido atafite neno wanai derawere ufite i nainiti naini (99) fearawa mamoe moanaba enanari yaru da ufisu.  
\v 14 Enanari yanu urero ibinu Baba Dawa unutawa ewa koiniboro ari uifitate uitawa inaro aneta wei.   
\s1 I ueta siosa utebaita kaka nabue ma rorowarau ueta  
\p
\v 15 Anu aiye aba siosawere ufisuna dawabai aniate dawa torowaba i siosa ueta wia. Eno wiaro naufisuna dawaini aini naiye webawaisi.  
\v 16 Da naufisuna nono amara demurai aba amara sadei muate i amarabai nono owere aniawete i sina nono wiaro i amara sadei anu sina naufisite anu sinana ba imufisite i amaraba webisisi.  
\v 17 Eno webisiro da naufisuna Godinu sina naueta uwara nesiabai i sina wiaro i uwarama dawaba webitaita. Eno webitaro da naufisuna Godinu sina naueta uwarama dawa ekodifitate dawa wawaro odifitaro i amarana aika amaraini takesi muneta amara ari imufoita wei.   
\s1 Bana wetaini eno ua weta  
\p
\v 18 Yaba ba wemaro nauawe. Ananu ueta ane ane ewa nasiniro uwane tarifoitana urero enanari uwane tarifisu. Nono ananu ueta ane ane ewa nasiniro uregari ufote mune aika odifoitana urero enanari uregari ufite mune aika odifisu wei.  
\v 19 Nono yaba ba wemaro nauawe. Yabai amara sadeima aba moana uwarama imueta daba demurai imuteda Godibai wenauefitaitana Nanu urero ibinu Babama ina emaba mafisu.  
\v 20 Nanu sina naueta uwara sadei aba rarogonu aboro aboro Nanu ifu weda ibeibitaitana iro emabai ibeimau wei.   
\s1 I mune imutawa utawa gaukara amaraba kasei sina  
\p
\v 21 Fitama Yesubai farite wei, Dera Waria Amara, nanu naiye naba aboabo siosawere ufiro mumate imutawa umau? Ba me nesia seweni (7) ufiro mumate imutawa umau wei?  
\v 22 Weiro Yesuma dawaba wei, ba me nesia sewenina me. Ina da yawifasu. Danu ba me ueta faiya faiyawere muate imutawa ua wei.  
\v 23 Enoba Godinu ure yawotasuna ewa sina ari. Mui dera kini amarama danu dera gaukara uwaranu gaukaraini we muneta oini ma rorowarau ufie ui.  
\v 24 Eno utebina mui gaukara amarama dawabai fari. I amarama dera kinibai oi derawere teni mirioni kina (K10,000,00) munite nono moko matawa ui.  
\v 25 Dawabai oi meba moko da mafie weiba dera kinima wei, dawaini danu awetaini koiniboroini danu ibaiabai nesia oiya ue mateda oi muawete nesia naba maiwe wei.  
\v 26 Weiro i gaukara amarama dera kinibai jegirari uteda nui wei, dera amara yawoaro i oi nesia aba enanari mama wei.  
\v 27 Eno weiba dera kini i gaukara amaraba neno arama uteda i amarabai oi moko munawa uite ekodiro daido ani.  
\v 28 I gaukara amarama ane mui gaukara amara atani. Aubokona dubu atani gaukara amarama i botai gaukara amarabai oi tu tausani kina (K2000) we munite nono moko matawa ui. Enoba i botai gaukara amarama i mui amara atanite danu nodoro mamite wei, nanu oi moko mai wei.  
\v 29 Weiro i mui gaukara amarama jegirari uteda nui wei, yawoaro nesia moko mama wei.  
\v 30 Weiro i botai gaukara amara dawa unutawa yawoetaba weiro oi moko sau mafie mutate diburaro oita.  
\v 31 I botai amarama eno uiro moana gaukara uwarama i ueta etate neno siosa utate i dera kinibai anitate wawei weita.  
\v 32 Weitaro dera kini amarama nauite weiro i botai amarama dawabai are fari. Are fariro dera kini amarama dawaba wei, a siosawere gaukara amara! Ana nabai nui weiro aba neno arama uete nesia mune imutawa ue wei.  
\v 33 Enorairo anu aiye aneba enanari neno arama utawa usinu wei.  
\v 34 Weite ibo derawere uteda i amaranu moko oi nesia mafie iba i amara dibura yawoeta uwaranu age duro odi.  
\v 35 Enoba yanu yaiyemutunu ba me ueta da mune imutawa ufoitana Nanu urero ibinu Baba Godima yanu ba me ueta da mune imutawa ufisu wei.   
\c 19  
\s1 Yesuma i awetabo awerasi ekoetaba wasu sina  
\p
\v 1 Yesuma i sina nesia we me sinite Gareri orofa ekodite ani. Ane iroma Jodani ogo etarafu Judia orofaro fari.  
\v 2 Uwara faiyawere Danu buribi anitate iro fataro ema ma wiroi.  
\v 3 I Ferosi uwarama Yesubai ue efitae fatate woure ereda weita, mui amarama danu aweta me ekodifie ufisuna yanu tarawatu iba ane wasu weita?  
\v 4-6 Weitaro Yesuma wei, ewa sina yawita aba me? Godima awetaini awera ubu uite wei, idoro i amarama danu danua damama ekodifite danu awetabai taka ufiro emana sadeina merago demurai ari sibisisi Godima wei. I sina ya yawita aba me Yesuma wei? Weite nono wei, Godima eno uiba awetaini awera sadei ari me, emana demurai ari. Godima ema ma taka uiba mui amarama ema da ma darefisu wei.  
\v 7 Weiro weita, idorogo nono Mosesima aneba eno wei, mui amarama danu aweta ekodifie uteda ekoeta koto feifa danu awetaba mafite ekodifisu weiya weita?  
\v 8 Eno weitaro Yesuma emaba wei, yanu neno kimuwereba iba Mosesima eno wei. I tutubari ui kowaroma ina eno utawa utebita.  
\v 9 Nono yaba watane, mui amaranu aweta uyare farawa ufiro nono i amarama i aweta me ekodifite mui aweta mubisuna dita yagera fafite danu botai awetaba siosa ufiro dana mui awera mubite uyare fafisu wei.  
\v 10 Yesuma eno weiro Danu iwata ueta uwarama weita, ina enoba mui amarama aweta munawa utasuna ina kobererau weita.  
\v 11 Weitaro Yesuma wei, uwara nesia ewa sina da imufitaro Godima moana durua ufisuna imufitaita wei.  
\v 12 Moana uwara emanu danuamutuma ema eno mutaba aweta munawa utaita. Moana uwarama moana uwara kaiyama tutaba aweta munawa uta. Nono moana uwarama i ure yawotasu sina nauegou ufitae iba aweta munawa utaita. Anama ewa sina nauegou utasuna dawa enanari utasu Yesuma wei.   
\s1 Yesu i kiki koinibororaratu ma kobererau ui  
\p
\v 13 Moana uwarama emanu koiniboro Yesubai woure ane odifitaro Dana Danu age emanu kofiri deiro odifite guriguri ufie iba woure fata. Woure fataro i Danu iwata ueta uwarama emaba dua sina weita.  
\v 14 Weitaba Yesuma emaba bunawere wei, i koiniboro Nabai afitae watane. I ure yawoeta orofana emanuba. Emanu Nabai areta daba garari da uforo wei.  
\v 15 Weite Danu age emanu kofiri deiro odite ema ekodite ani.   
\s1 I gugua gubari faiyawere reka amara  
\p
\v 16 Mui amarama Yesubai farite wei, Tisa Amara, ane kobererau umate me ibene ibene ibimane wasu wei?  
\v 17 Weiro Yesuma dawaba wei, ane kobererauba wenauerasu? Godi Danu torowana kobererau. Me ibene ibene ibifae ufasuna Godinu tarawatu sina nesia nauegou ua wei.  
\v 18-19 Weiro i amarama wei, abo sina wei? Weiro Yesuma wei, eme da ma uia, yagera da fa, waira da ua, wawei webasuna meo wawei da wia, anu anua amamaba uegou ua, anu aiyeba anu aika neno arama utasu enanari neno arama ua wei.  
\v 20 Eno weiro i reka amarama Yesuba wei, i wenu nesia utebatane, mui anene umau wei?  
\v 21 Weiro Yesuma dawaba wei, anu ununa Godi ari kobererau sibae ufasuna aniate anu ibaiabai nesia oiya ue mate i oi nesia ibaiabai me uwaraba mate Nanu buribi ara wei. Eno ufasuna ana urero ibaiabai mubasu wei.  
\v 22 Weiro i reka amarama nauite dawabai ibaiabai faiyawereba neno siosa uteda Yesu ekodite ani.  
\v 23 Yesuma Danu iwata ueta uwaraba wei, yaba ba wemaro nauawe. Ibaiabai derawere bobo amarama Godinu ure yawotasu dabaro anedana kimuwere anibisu wei.  
\v 24 Nono yaba watane, mui egi danu ifuna kemo, dawa mara ebaro fare anibisuna ina kimu me. Ibaiabai derawere bobo amaranu aneta dabana kimuwere wei.  
\v 25 Weiro Danu iwata ueta uwarama nautate neno kirifu derawere uteda weita, enoba anama wirofisu weita?  
\v 26 Weitaro Yesuma ema ereda wei, emema eno da ufitaro Godima i nesia ufite Danu aika ema ma wirofisu wei.  
\v 27 Weiro Fitama moko wei, yanu ane ane nesia ekoisite Anu buribi araisia wei. Enoba ane mubeisi wei?  
\v 28 Weiro Yesuma emaba wei, ba wemaro nauawe, i Ba Eme Sini Amarama i reka fafisu orofaro Danu kobere yawoeta yaureta deiro yaufisu. Yaubifiro yana Nanu buribi anaita uwarama mui yawoeta yaureta deiro yaufote i Isaraero uwaranu abua tuero (12) yawofoita wei.  
\v 29 Anama danu suini dataeini dabueini arumamini danuaini damamaini koiniboroini beataini Nanu ifuba ekodifisuna duburo mui faiya faiyawere mubite me ibene ibene me ibeibisu wei.  
\v 30 Nono moana dera uwarana iro kikiratu sibitaita. Moana otowa uwarana iro derawere sibitaita Yesuma wei.   
\c 20  
\s1 I gureifi tai beataro gaukara ueta uwara  
\p
\v 1 I Godinu ure yawotasuna ewa sina ari. Mui su ubi amarama waikunaro uyarite moana uwara danu gureifi waiyaro gaukara ufitae gaukara mafie ani.  
\v 2 Ane farina dawaini i gaukara uwaraini oi sina we matatate ido weita. I uwarama mui kowaro gaukara ufitaro i waiya ubi amarama emaba siriwa oi demurai emaba moko mafie weita. Eno weitaba i waiya ubi amarama ema siaia uiro danu waiyaro anita.  
\v 3 Ane beata utebitaro kowa mane abanaro sinina i waiya ubi amara ido maketi ibi orofaro ane farite erina moana uwara waiya utawa me yaubitaro eri.  
\v 4 Eno erite emaba wei, nanu waiyaro aniawete gaukara uawero yanu moko fei ido mama wei. Weiro i uwara ido anita.  
\v 5 Kowa otoro mane inarite nono kowa osugari ue otoroma ane abanaro sinina nono anite enanari ui.  
\v 6 Yawi sinina nono anite erina moana uwara me inaibitaro erite wei, aneba ewa kowaro me inaibinita wei?  
\v 7 Weiro weita, mui amarama gaukara yaba matawa usinuba me inaibinisi weita. Weitaro wei, yaini nanu waiyaro aniawete gaukara uawe wei. Weiro ido anita.  
\v 8 Kowa me siniro dumu sibie uiba waiya ubi amarama danu oi yawotebi amaraba wei, i gaukara uwara wiaro abai fafitaro i duburo waiyaro anita uwara emanu oi mafate nono i abanaro anita uwaraba mafate nono i botai anita uwaraba emanu oi duburo mafasu wei.  
\v 9 Eno weiro i oi yawotebi amarama weiro i kowa otoro anita uwara ido fata. Fataro emaba siriwa oi demurai amara demui demuiba eno matebi.  
\v 10 Enoma enoma utebina i botai waiya ufitae anita uwarama fatate we imuta, ya oi derawere mubeisi we imutaro emaba siriwa oi demurai amara demui demuiba enanari matebi.  
\v 11-12 Matebiro i botai uwarama waiya ubi amaraba kamena weitate weita, i duburo anita uwarama gaukara kikiratu uita. Ya botai anisi uwara waura warairoma ane yawiro kowa yarateda gaukara derawere uisiro nono emaini yaini moko fei arotorowa masinu weita.  
\v 13-14 Weitaro waiya ubi amarama emanu mui amaraba wei, naiye, aba siosawere utawa une. Botai oi sina we matanisite siriwa oi demurai yaini naini eno ufeisi weisiba anu oi ido muate ania. Nanu unu i dubu anita uwaraini ya botai anita uwara arotorowa maetaba iba eno mane wei.  
\v 15 Ewa oina nanuba anene mamauna mamau. Ina ido aba me? Nanu kobererau uetaba ibo utasu, waiya ubi amarama eno wei.  
\v 16 Idoba i dubu uwarama iro botai sibitaro i botai uwarama iro dubu sibitaita, Yesuma eno wei.   
\s1 Yesu Danu uifisu sina nono wei  
\p
\v 17-18 Yesuini Danu iwata ueta uwaraini Jerusaremu suro anita. Anebitana Yesuma Danu iwata ueta uwara tuero (12) ema mune aika odite emaba wei, Jerusaremu suro anaisi eawe. Iro fafero i Ba Eme Sini Amara i dera fuyo ode sina weta uwaraini tarawatu tisa uwaranu age duro odifitaro Dawa uifie webitate i aika uwaranu age duro odifitaita.  
\v 19 Odifitaro i aika uwarama Dawa iruteda domuma ufitate korosiro odifitaita. Dawa ido uifiro kowa rarogonu me sibiro nono uietaroma uyafisu wei.   
\s1 Danuama danu amara sadeiba nui weta  
\p
\v 20 Jebedinu awetama danu amara sadei mune Yesubai woure fari. Wo farite jegirari uteda danu ununa kobererau mubie iba eno ui.  
\v 21 Eno uiro Yesuma wei, ane ufae wei? Weiro i awetama wei, wiaro Anu yawoeta orofaro anibasuna iro nanu mui amara Anu banibira age afuro yaufiro nanu mui amara Anu ewani age afuro yaufisu wei.  
\v 22 Weiro Yesuma wei, yanu wenauereta ya iwata mero ya me sara waita. Nanu uraneta wakiki ogo ifawaisi aba me wei? Weina aiwia ifutu weisi.  
\v 23 Weisiro Yesuma wei, ba waisi, Nanu imau uraneta wakiki ogo ifawaisi. Nono i yaureta kabesi sadei Nanu meba da wemaro da yaufawaisi. Godima i kabesi ue bou uiba Dana webiro yaufitaita wei.  
\v 24 Weiro i moana iwata ueta uwara teni (10) i sina nautate i amara sadeiba ibo uta.  
\v 25 Ibo utaro Yesuma weiro i iwata ueta uwara nesia Dawabai fata. Fataro Yesuma emaba wei, i aika uwaranu dera yawoeta uwarama emanu gaukara uwaraba kimuwere yawoteda emanu imueta emaba kimuwere odaita. Eno utaitana ina ya iwata utaita wei.  
\v 26 Nono yabai eno da ufoita. Yabairoma anama dera amara sibisuna ya nesia durua ufisu.  
\v 27 Anama botai amara sibisuna dawa yanu sabua ueta amara sibisu wei.  
\v 28 Enanari i Ba Eme Sini Amara emema Dawaba durua da ufitaro emeba durua ufie iba ewaro fari. Dawa uifiro Danu wiroeta onono nasiniro itafiro nono Danu ononoma uwara faiyawere moko mae munono ari ufisu wei.   
\s1 Yesu diti basugari amara sadei ma wiroi  
\p
\v 29 Jeriko suroma anita. Anitaro uwara faiyawere emanu buribi anita.  
\v 30 Anebitana diti basugari amara sadei daba gigirariro yaubeda Yesu fare anebiro nausite derawere weisi, Dera Waria Amara, Deiwidinu sisia amara, waba neno arama ua weisi.  
\v 31 Weisiro i guruguru ubita uwarama ibo uteda eno da wiawa weita. Weitana derawere weisi, Dera Waria Amara, Deiwidinu sisia amara, waba neno arama ua weisi.  
\v 32 Weisiro Yesuma inarite wei, yaba ane umane waisi wei?  
\v 33 Weiro weisi, Dera Waria Amara wanu ununa ditima ba efutu weisi.  
\v 34 Weisiro Yesuma neno arama uteda emanu ditiro burina emanu diti forairo ido wirosite ereda Yesunu buribi anisi.   
\c 21  
\s1 Yesu kini ari uite Jerusaremu suro fari  
\p
\v 1-2 Jerusaremu suro fafitae ureda mui su Oriwa Maidani gigiraribai ibi Betifeiji suro are fata. Fataro Yesuma Danu iwata ueta amara sadei siaia uite wei, etei kirisi weto suro aniawa. Ane fafawaisina mui donikini danu otowa natuini doie oitaro inaibinuba efawaisina ema ma uregari uawate woure Nabai arawa.  
\v 3 Eno uteibawaro mui amarama yaba ya ane utaisi webisuna yanu Dera Waria Amarama mubie wenu wiawaro yaba mafi wei.  
\v 4 Godinu we bou ueta amarama i sina bodere weiba iba Yesuma eno wei.  
\v 5 I we bou ueta amarama eno wei,  
\li1 I Saioni Orofa uwaraba wia, emanu Dera yawoeta amara emabai fafisu. Dawa dera amara ari da fafisu. Mui donikinu natu deiro yaufite fafisu wia,  
\p I we bou ueta amarama eno wei.  
\v 6 I iwata ueta amara sadei ido anisite Yesunu wei sina enanari usi.  
\v 7 I amara sadei i donikini danu otowa natuini woure fasite emanu wadia otowa donikinu dubena deiro oisiro Yesuma ido deiro yauri.  
\v 8 Uwara faiyawere emanu wadia dabaro sane oitaro moana uwara farai tata ture dabaro sane oita.  
\v 9 Moana uwara ko botai anitaro Yesu abanaro aniro nono moana uwarama emanu buribi anebita. Eno utate i botai anebita uwaraini i dubu arebita uwara nesia derawere webita, Godima we mune odiro Deiwidibairoma sirorari ui amara Dawa kobererau. Dana Godinu ifuro ido farinu webita. Godima Dawa ma kobererau ufisu. Ure uwarama Danu ifu we ma derawere utaita. Enoma enoma derawere webita.  
\v 10 Webitaro Yesuma Jerusaremu suro ido fari. Fariro i Jerusaremu uwarama neno wanai uteda weita, ewa amarana ana weita?  
\v 11 Weitaro i dabaro anebita uwarama weita, ewa amarana Godinu we bou ueta amara. Dawana Gareri orofa Nasareta su amara weita.   
\s1 Yesu dera dubu suro ani  
\p
\v 12 Yesuma i dera dubu su ubarero amui. Amuite oiya ue maeta uwaraini oiya ueta uwaraini yoweriro wawaro anita. Yesuma i oi moko mae matata uwaranu kaiyoini fuyo oita ubani karaini oiya ue mata uwaranu yauretaini mu saniro dowata.  
\v 13 Yesuma eno uite wei, Godinu bukaroma eno wasu, Nanu suna emenu guriguri ueta su. Nono yana Nanu suna waira ueta uwaranu su ari uita wasu wei.  
\v 14 I diti basugari uwaraini i buri bebeu uwaraini ema dera dubu suro Yesubai fataro ema ma wiroi.  
\v 15-16 I dera fuyo ode sina weta uwaraini tarawatu tisa uwaraini Yesunu buna ueta etana i koiniboroma i dera dubu suro weroroka weda Godima we muni odiro Deiwidibairoma sirorari ui Amara Dawa kobererau weitaro nautate ibo utate Yesuba weita, i koiniboronu sina nautasu aba me weita? Weitana aiwia, nautatane wei. Weite wei, ewa sina yawita aba me? I sinana edono, i otowa koiniboroini ama itaita koiniboroini emanu Dera Amaranu ifu we ma derawere ue we ma kobererau utaita. Na iwata, i sina ya yawita wei.  
\v 17 Weite Yesu ema ekodite Jerusaremu suroma Beteni suro ane aini.   
\s1 Yesuma i boruba ana dodoa wei.  
\p
\v 18 Wai uriro uyarite Jerusaremu suro owere anebe osi uri.  
\v 19 Osi uriba ane erina mui boruba ana daba gigirariro inaibiro eri. Erite mune ifie ane farina boruba tai uwanawa me tata torowa ibitaro erite i boruba anaba wei, duburo mui tai da uwafasu wei. Weina boruba ana ido tata reora uite sibu uri.  
\v 20 Eno uiro Danu iwata ueta uwarama etate neno kirifu utate weita, i boruba ana anene sau sibu urinu weita?  
\v 21 Weitaro Yesuma emaba wei, yaba ba wemaro nauawe. Yana nauegou ufote imueta sadei sadei da ufoitana Nana i boruba taiba une i enanari ufote nono mui buna ueta ufoita. Etei maidaniba uyate enea ubarero ita weboitana yanu weboita enanari ufisu.  
\v 22 Nauegou ufote imuegou uteda guriguri ufote aneba Godibai wenaueforo Godima yaba mafisu wei.   
\s1 Yesunu buna dobereda wenauerebita i wenauereta  
\p
\v 23 Yesuma dera dubu su ubarero amuite we mawetu ui. We mawetu uina i dera fuyo ode sina weta uwaraini Ju uwaranu baeta uwaraini Yesubai fatate weita, ananu bunaro A eno utasu? Anama buna Aba mairo eno utasu weita?  
\v 24 Weitaro Yesuma emaba wei, yaba Nanu wenauereta botai wemaro yana moko sina weboitana nono anama Naba buna masinuro eno utatane wemau wei.  
\v 25 Joninu babataito ueta, ina ureroma fari aba emebairoma fari wei? Weina sina we mataneda emanu aika weita ane webeisi? Ureroma fari webeisina Joni aneba nautawa uta webisu.  
\v 26 Nono emebairoma fari webeisina i uwara nesia Joni Godinu we bou ueta amara imutaitaba emema yaba ane ufitaita weita?  
\v 27 Emanu aika eno weitate nono Yesuba weita, ya iwata me weita. Weitaro Yesuma wei, moko sina wiawa utaitaba idoba Nanu buna utatane sina yaba da wemau wei.   
\s1 I dataeini dabueba kasei sina  
\p
\v 28 Ewa sina imue eawe Yesuma wei. Mui amaranu amara sadei dawabai ibisi. Damamama danu botai amarabai anite wei, nanu gureifi tai waiyaro aniate gaukara ua wei.  
\v 29 Weiro botai amarama nauite da animau wei. Eno weite duburo danu imueta ma owereda waiyaro anite gaukara ui.  
\v 30 Damamama nono dubu amarabai anite enanari wei. Weiro dubu amarama wei, na animau weirogo nono anawa ui.  
\v 31 Abo amarama danu damamanu sina naui wei? Weina botai amarama weita. Weitaro Yesuma wei, yaba ba wemaro nauawe. I takesi muneta uwaraini emeba uyare fareta awetaini ema ko Godinu ure yawoeta orofaro anibitaro yana aniboita aba me Yesuma wei.  
\v 32 Eno weite nono wei, Jonima farite Godinu kobere sina webina yana dawa nautawa utaro i takesi muneta uwaraini emeba uyare fareta awetaboini emana danu sina nauta. I uwarama eno utaro yana etate yanu ba me ueta dubena afu sanawaba danu sina nautawa uta Yesuma eno wei.   
\s1 I gureifi tai beata yawoeta siosararabo uwaraba kasei sina  
\p
\v 33 Mui kasei sina nauawe Yesuma wei. Mui amarama danu gureifi yo waiyaro waite dowa urite gureifi amune adidiarebita koru ubu uite danu waiya dobo uite danu waiya moana uwarama yawofitae maite mui orofaro ani.  
\v 34 Duburo ayo ureta kowa ido fariro danu gaukara uwara i waiya yawoeta uwarabai gureifi moana mubitae ido siaia ui.  
\v 35 Dawa mui amara siaia uiro ane fariro i amara isuma urebita. Nono dawa mui amara nono siaia uiro ane fariro i ani amara dawa ma uita. Dawa mui amara siaia uiro ane fariro gebiroma uta.  
\v 36 Nono dawa moana gaukara uwara faiyawere siaia utebiro ane farebitaro emaba enanari enoma enoma utebita.  
\v 37 Duburo waiya ubi amarama wei, awonana nanu amara ubi siaia umaro dawaba kakara ufitaita wei. Weite danu amara ubi siaia uiro ani.  
\v 38 Ane fariro i uwarama dawa etate emanu aika weita, etei amarana danu amara ubiba dawa ma uifete danu waiya yana mubeisi weita.  
\v 39 Eno weitate i amara muneda waiya dowa dubenaro satate dawa ma uita Yesuma eno wei.  
\v 40 Eno utaba i waiya ubi amarama fafite i waiya yawoeta uwaraba ane ufisu wei?  
\v 41 Weiro weita, dawa i siosawere uwaraba kimuwere ufiro uifitaita. Eno ufite danu waiya ma dare moana yawoeta uwaraba mafiro ayo ureta kowa fafiro dawaba na didi tai mafitaita weita.  
\v 42 Weitaro Yesuma emaba wei, ewa wemau sina Godinu bukaro yawita. I sinana edono, i su ubu ueta uwaranu mu sata gebirona i botai tutubu ari sini. Ewa yanu Godinu uetaba kamama eraisi. I sinana eno, Yesuma wei.  
\v 43 Idoba yaba watane, Godinu yawotasu orofa yabairoma ma darefite aika uwaraba mafiro i uwarama Godinu gaukara uegou ufitaita.  
\v 44 Anama ewa gebiro deiro buridu ufite gebiro deiro ureifisuna danu torowa tai ure furufafisu wei. Weite wei, nono i gebiroma ananu deiro ureifisuna i gebiroma i amara ure ma musimusi ufiro daido i amara sakai ari sibisu Yesuma wei.  
\v 45 I dera yawoeta uwaraini Ferosi uwaraini i kasei sina nauteda Dawa yaba wasu we imuta.  
\v 46 Eno we imutate Yesu budari ufitae weita. Weitaro i guruguru ubita uwarama Yesu Godinu we bou ueta amara imutaba dera fuyo ode sina weta uwaraini Ferosi uwaraini iyatate ekoita.   
\c 22  
\s1 I aweta muneta ogaroba kasei sina  
\p
\v 1 Yesuma emaba nono mui kasei sinaroma wei.  
\v 2 Dawa wei, Godinu ure yawotasu ewa wemau sina ari. Mui dera kini amarama danu amaranu aweta muneta ogaro ufie ui.  
\v 3 Enoba danu gaukara uwara siaia uiro waya anita. Waya anitaro ogaro ietaba uwara farawa uta.  
\v 4 Ogaro ubi amarama nono moana gaukara uwara siaia ufie uteda wei, aniawete i ogaro ifitae wene uwaraba eno wiawe, nanu ogaro nesia ue bou une. I borumakauini keweawere borumakau nanatuini eno unero ietata nesia ue me sineba i aweta muneta ogaro are iawe wiawe wei. Weiro danu gaukara uwara ido anita. Ane fatate danu wei sina enanari weita.  
\v 5 Weitaro i uwara i sina nautate moana uwarama ema iruteda emanu waiyaro sitowaro aboro aboro wo bagaru ue anita.  
\v 6 Moana uwarama i kini amara danu gaukara uwara mune emaba siosawere uteda utaro uita.  
\v 7 Eno utaba i dera kini amarama ibo derawere ui. Ibo derawere uite danu meremere uwara siaia uiro anita. I danu gaukara ueta uwara ma uita uwarabai ane fatate moko ema ma uitate emanu su su inama yata.  
\v 8 I dera kini amarama danu gaukara uwaraba wei, nanu ogaro me sininuba i botai wene uwarana siosawereba da ifitaita.  
\v 9 Idoba i dera daba daba aboro aboro aniawete abo uwara atawete wiawero afita wei.  
\v 10 Weiro i gaukara uwarama anitate kobere uwaraini siosa uwaraini atatate woure fataro i aweta muneta ogaro su wate fari.  
\v 11-12 I dera kini amara i ogaro itebita uwara efie fari. Farina mui amarana i aweta muneta wadia yurawa uiro erite wei, naiye, a aweta muneta wadia bobo mede nono anene ewa suro amusinu wei? Weiro sina wiawa wate mu ui.  
\v 13 Wate mu uiro kini amarama mui ogaro yawoeta amaraba wei, danu buri age uwane tariate dawa i wawa dumuwere kabesiro saro itafi. I kabesiro uwarama nio bijari uteda i webitaita.  
\v 14 Godima wasu, eme faiyawere arawe wasuroma nono duburona demui demui torowa we mubisu wei.   
\s1 I takesi oetanu wenauereta  
\p
\v 15 I Ferosi uwarama Yesu ekoitate wawaro anita. Ane emanu unu Yesu irufitaro Yesu ane moko sina webiro budari ufitae iba emanu aika sina sina we matata.  
\v 16 I uwarama eno we matatate emanu iwata ueta uwaraini Erodinu uwaraini siaia utaro Yesubai Danu sina irue naufitae anita. Ane fatate weita, tisa Ana ba amara. Mui amara derawerero nono mui amara kikiratu eno imutawa utasute Godinu sinaini Danu imueta we mawetu uegou utasu.  
\v 17 Eno utasuba Romani gaemani uwarabai takesi mafeisina ina ido aba me? Wiaro naufe weita.  
\v 18 Weitaro Yesuma emanu siosa imueta iwata uite wei, ya meoma weta uwara! Aneba Na iruteda wenaueraita?  
\v 19 I takesi oi maiwero ema wei. Weiro Dawaba siriwa oi mataro muni.  
\v 20 Mune ereda wei, ananu kofirini owawaini ewado ibinu wei?  
\v 21 Weina Sisanu weita. Eno weitaba Yesuma emaba wei, idoro i dera gaemani yawoeta amara Sisanu ane ane dawaba mawete Godinu ane ane Godiba mawe wei.  
\v 22 Weiro i uwarama nautate neno kirifu utate Yesu ekoitate anita.   
\s1 I uietaroma uyaretanu wenauereta  
\p
\v 23 I kowaro moana Sadusi uwara ido fata. I uwarama eme uietaroma da uyafitaita eno imutebita.  
\v 24 I uwarama Yesubai fatate weita, tisa, Mosesinu tarawatu eno wasu, mui amarama aweta mubite aruma amara munawa me ibebe uifiro danu dabuema danu aweta wabu mubite i uieta amaraba aruma amara yanae mubisu wasu weita.  
\v 25 Yanu sina webero naua. Adarabu nesia seweni (7) ibita. I botai amarama aweta munite aruma amara yanae munawa me ibebe ui.  
\v 26 Danu dabuema danu aweta wabu munite enanari me ibebe ui. Enoma enoma i amara seweni (7) enanari utate aruma amara yanae munawa me ibebe uita.  
\v 27 Uie me sitaro duburo i aweta wabu ido ui.  
\v 28 Idoba i uie uyareta kowaro ana amarama i aweta mubisu? Ewa orofaro i uwara nesia i aweta mutaba ana amarama i aweta iro mubisu weita?  
\v 29 Eno Weitaro Yesuma emaba wei, Godinu bukaro sinaini Godinu buna ya iwata meba iba iwawa utaita wei.  
\v 30 I uietaroma uyafitaita kowaro aweta awera da mubitaita. Iro i uwarana Godinu aneru ari iba aweta awera da mubitaita wei.  
\v 31-32 Weite wei, Mosesinu uietaroma ma uyareta sina imue eawe. Mosesima Godinu wei sina eno owawa ue odi, Nana Eibaramunu Godi, Aisikinu Godi, Jeikofunu Godi Mosesima eno owawa ue odiro yana yawita. Godi Dawa i uieta uwaranu Godi me. Dawana i wiroeta uwaranu Godi Yesuma wei.  
\v 33 Weiro i guruguru ubita uwarama nautate Danu we mawetu uetaba neno kirifu uta.   
\s1 Godinu dera tarawatu  
\p
\v 34 Yesuma i Sadusi uwaranu sina weta daba garari uiro Ferosi uwarama nautate nesia ma aitate Yesubai fata.  
\v 35-36 Fataro mui amarama Yesu ue efie uteda wei, tisa abo tarawatuna i botai tarawatu wei?  
\v 37 Weiro Yesuma dawaba wei, anu unu uetaini imueta nesia Godibai odegou uate utebea wei.  
\v 38 Ina i dera botai tarawatu.  
\v 39 Nono muini eno, anu torowaba anu aika neno arama utasu enanari anu aiyemutuba neno arama uegou ua wei.  
\v 40 Mosesini i we bou ueta uwaranu sina nesia i tarawatu sadeibairoma fariro weita Yesuma wei.   
\s1 I Mesaiaba wenauereta  
\p
\v 41-42 I Ferosi uwara guruguru utaro Yesuma emaba wenauereda eno wei, Godinu Kerisoba ane waita? Dawa ananu amara wei? Weiro Dawaba weita, Dawa Deiwidinu sisia amara weita.  
\v 43 Weitaro Yesuma emaba wei, Godinu Imumu Kotofuma Deiwidiba bunawere imueta maiba aneba Deiwidima Keriso nanu Dera Waria Amara wei?  
\v 44 Dawa eno wei,  
\li1 Godima nanu Dera Waria Amaraba wei, Nanu banibira age afu yauaro Anu wasai uwaraba buna umate Anu buri eminaro odimau,  
\p Dawa eno wei.  
\v 45 Deiwidima i sina bodere aneba eno wei? Deiwidima Kerisoba nanu Dera Waria Amara weina Yesude anene danu sisia amara sini wei?  
\v 46 Weiro nautate moko sina wiawa utate i kowaroma mui wenauereta wiawa uta.   
\c 23  
\s1 Yesuma i tarawatunu tisa uwaraini Ferosi uwaraba we kakara ui  
\p
\v 1-2 Yesuma i guruguru ubita uwaraini Danu iwata ueta uwaraba wei, i tarawatu tisa uwaraini Ferosi uwaraini Mosesinu tarawatu iwata uteda i Ju uwaranu dubu suro we mawetu utaita wei.  
\v 3 Enoba emanu we mawetu ueta sina nauawete enanari uawete nono emanu ueta sineta enanari da uawe wei. I uwarama sina derawere we mawetu utaitate nono enanari utawa utaita.  
\v 4 I uwarama emenu tarawatu ego ari urumuwere emenu eriro aberaitate emanu age rorou demurairatuma i ego mamawa utaita.  
\v 5 Ane ane uteda emema efitae iba eno utaita. Godinu sina obari ue ageini befororo uwane taritebaitaro ibaita. Kikiratu obarina me, deranono obari ue uwanaita. Nono emanu wadia yafawere barue sanaitaro fa tanasu. Emema ina nesia efitae iba eno barue inaraita.  
\v 6 Ogaro anaitate eme efitae i dera uwaranu yaureta kabesiro yauraita. Ju uwaranu dubu suro amutaitate eme efitae i botai yauraita kabesiro yauraita.  
\v 7 Emanu ununa i maketi kabesiro inaraita uwaranu ario sina naueta. Emanu ununa emema ema dera tisa webitaro naufitae iba eno utaita Yesuma wei.  
\v 8 Ya nesia yatae yabue ya nesia su demurai uwaraba yabai mui amaraba tisa amara da wiawe. Yabai tisa Amara demurai ibinua wei.  
\v 9 Yana ewa orofaro mui amaraba Baba da wiawe. Yanu Baba demurai urero ibinua  
\v 10 Nono mui amaraba dera amara da wiawe. Yabai Dera Amara demurai ibinua Dana Keriso.  
\v 11 Anama yabai derawere sibisuna dawa yanu gaukara amara sibisu.  
\v 12 Anama danu torowa ma derawere ufisuna Godima dawa ma kikiratu ufisu. Anama danu torowa ma otowaratu ufisuna Godima dawa ma derawere ufisu wei.   
\s1 Yesuma i tisa uwaranu ueta sineta ba meba we arama ui  
\p
\v 13 Yesuma we kakara sina eno wei, ya tarawatu tisa uwaraini Ferosi uwaraini ya meoma weta uwara eregou uforo! Godinu ure yawoeta orofa daba garari utaitaba emema anawa utaita. Yana iro anawa utaitaro nono emema emanu unu i ure orofaro anibitae utaitana emanu anaita daba garari utaita.  
\v 14 Ya tarawatu tisa uwaraini Ferosi uwaraini ya meoma weta uwara eregou uforo! Yana wabu awetaboba meoma uteda emanu ibaiabai nesia suini waira utaitate nono guriguri yafawere irue utaita. Enoba Godima ya fanisi derawere mafisu wei.  
\v 15 Ya tarawatu tisa uwaraini Ferosi uwaraini ya meoma weta uwara eregou uforo! Mui amara yanu iwata ueta amara sibie enea ubarero, duero, aboro aboro dobere anaita. Nono mui amarama yanu iwata ueta amara sibisuna yana yanu siosa ueta dawaba maforo siosa derararabo sibiro yaini dawaini uitawa inaro aniboro Godima yaba fanisi mateda dawaba fanisi derawere mafisu wei.  
\v 16 Ya we mawetu ueta uwara diti basugari ueta uwara ariba eregou uforo! Ya eno waita, anama i dera dubu sunu ifuro buna we bou ufisuna ina ba me. Nono anama i dera dubu su ubarero gorunu ifuro buna we bou ufisuna dawa enanari ufisu waita wei.  
\v 17 Ya diti basugari gogore uwara! Ane derawere, i goro aba i dera dubu su? I suma goro ma kakara uiba i suna derawere wei.  
\v 18 Yana eno waita, anama sina weda fuyo oeta kabesinu ifuro we bou ufisuna i kabesi buna meba enanari da ufisu waita. Nono anama i sina weda i fuyonu ifuro we bou ufisuna i fuyona bunawereba enanari ufisu waita.  
\v 19 Ya diti basugari erawa utaita uwara! Anema derawere? I fuyo oeta aba fuyo oeta kabesi? I fuyo oeta kabesima fuyo oeta ma kakara utasuba i kabesina derawere.  
\v 20 Anama sina weda fuyo oeta kabesinu ifuro buna sina wasuna i fuyo oeta kabesini fuyo nesia emanu ifuro buna sina wasu.  
\v 21 Anama sina weda dera dubu sunu ifuro buna sina wasuna dera dubu suini i dera dubu suro ibinu Godinu ifuro buna sina wasu.  
\v 22 Anama sina weda urenu ifuro buna sina wasuna Godinu yaure yawoeta orofaini iro yaubinu Godinu ifuro buna sina wasu wei.  
\v 23 Ya tarawatu tisa uwaraini Ferosi uwaraini ya meoma weta uwara eregou uforo! Yana waiyaro ibaiabaini moana kikiratu ibaiabai nesia taisi odegou utaitate nono i tarawatu buna ememetu, uwaraba kobererau uetaini neno arama uetaini Godi naue imuetaini ina utawa utaita. I taisi oetaini ina nesia da imutawa ufote nono i tarawatu ueta nesia uegou uforo wei!  
\v 24 Ya diti basugari we mawetu ueta uwara! Yana ieta naberoro mimini yonitawa uteda mu sanaitarogo nono dera kemo, dana boro derawere ari nesia ido yonitaita i ari yana i kikiratu tarawatu uegou utaitate nono i derawere tarawatu me sara utaita wei.  
\v 25 Ya tarawatu yawoteda ueta uwaraini Ferosi uwara, yaba watane, eregou uforo! Yana eno utaita, kafusini nabero etu deiro torowa urotaitate nono ubarerona igabuga derawere ibebasu. Enanari yanu ofe deirona urotaitaro nono yanu neno ubarena igabugawere. Iro waira uetaini eme uretaini eno imueta faiyawere imutaita.  
\v 26 Ya Ferosi waita uwara. Yana diti basugari bobo uwara ari. I kafusi ubare botai urofoitana danu wawaro roatarau sibisu.  
\v 27 Ya tarawatu tisa uwaraini Ferosi uwaraini, ya meoma weta uwara eregou uforo! Yana eme uri oeta kabesi ari. Deiro ariowere ina kobererau. Nono ubarero uieta uwaranu taini igabuga ememetu faiyawere ibinu. Yana i ari.  
\v 28 Emema yanu ofe ubuini ibo nawata eraitate dawa kobererau we imutaitaro nono yanu imuetana meorarabo Yesuma wei.   
\s1 Yesuma i tisa uwara fanisi mubitaita sina wei  
\p
\v 29-32 Ya tarawatu tisa uwaraini Ferosi uwaraini ya meoma weta uwara eregou uforo! Yana i we bou ueta uwaranu uri oeta kabesi ma wirotaitate Godinu kobere uwaranu uri oeta kabesiro werei werei ue odeda waita, yanu abuamutubai ibiferona i we bou ueta uwara da ma uifene waita. Eno waitana yana i we bou ueta uwara ma uitebita uwaranu koiniboro weda waita. Eno waitaba emanu siosawere ueta enanari ue me siboita wei.  
\v 33 Yana towi ari. Ya towinu muneta nanatu! Ane ufote uitawa inaro da aniboita?  
\v 34 Idoba yabai we bou ueta uwaraini iwata derawere uwaraini tarawatu tisa uwaraini ema nesia yabai siaia umaro fafitaita. Fafitaro moana ma uifote moana korosiro odifote moana yanu dubu suro isuma ufote yanu natofo su suro emaba siosawere ufote ure yowefoita.  
\v 35 Eno ufoitaba Godima ya fanisi mafisu. I kobere uwaranu ma uietana yanu kerere. Eiborobairoma Barakaiasinu amara Sakaraiyabai, i amara i fuyo oeta kabesini dera dubu su abanaro yana dawa ma uita, i uwara nesianu ma uieta ina yanu kerere.  
\v 36 Yaba ba watane, i nesiaba Godima ewa ibinita uwara fanisi mafisu wei.   
\s1 Yesuma Jerusaremu su uwaraba neno arama ui  
\p
\v 37 Yesuma nono wei, O Jerusaremu su uwara, yana Godinu we bou ueta uwara ma uitaitate Godinu siaia utasu uwara gebiroma uraitade. Kokora awetama danu nanatu fakinama obari utasu enanari Nanu ununa ya Jerusaremu su uwara yawomane watane nono ya unutawa Nanu yawoeta wei.  
\v 38-39 Idoba Godima yanu Jerusaremu su ekodinuba Na da efitate eno webitaita, Godinu ifuro farinu Amara Dawa kobererau webitaitana nono Na efitaita wei.   
\c 24  
\s1 Yesuma i dera dubu su ma siosa ufitaita sina wei  
\p
\v 1 Yesuma dera dubu su ekodite anibie ui. Anibie uina Danu iwata ueta uwarama Dawabai fare weita, i dera dubu su su are ea weita.  
\v 2 Weitaro Yesuma emaba wei, awona yana i dera dubu su su eraita? Yaba ba sina wemaro nauawe. Mui kowa fafiro i su gebiro nesia ma ubefitaro mui gebiroma mui gebironu deiro da ibifisu wei.   
\s1 Kerereini oferi derawereba wasu sina  
\p
\v 3 Yesuma Oriwa maidaniro mane yauri. Ido yauriro Danu iwata ueta uwara emanu aika Dawabai mane fatate weita, Anu dera dubu suba wenu sina abo kowaro eno ufisu? I dubu kowaro anene ufiro efero a fafasu weita?  
\v 4 Weitaro Yesuma wei, eregou uforo! Moana uwarama ya irufitae fafitaita.  
\v 5 Uwara faiyawere Nanu ifuro fafitate nana Keriso webitate eme faiyawere irufitaita.  
\v 6 Dera uranetanu rurua ewado baworo naufote emirowere orofaro me sina torowa naufoitana iba iya da uyawe. Ina eno ido fafiro nono i dubu fafisu kowa ina oidea wei.  
\v 7 Mui orofa gaemanini mui orofa gaemanini urafitaita. I orofa atata uwara aika maika urafitaita. Orofa faiyawerero sinai derawere woufitaita. Orofa faiyawerero nasini wawana wawana ufisu.  
\v 8 Ina nesia ufisuna eme emanu oferi awetama kuita mubie uteda oferi derawere wourebasu i ari ido reka woufitaita wei.  
\v 9 Ina eno ufisuna emema ya siosawere ufitae uteda budari ufitate ma uifitaita. Yana Nanu sina naufoitaba eme nesia yaba neno ka ufitate iba eno ufitaita.  
\v 10 I kowaro uwara faiyawere Na ekodifitate emanu aika do mafitate emanu aika urane matafitaita.  
\v 11 I kowaro meoma we bou ueta uwarama uyafitate meo sina webitaro uwara faiyawere emanu sina naufitate emanu buribi anibitaita.  
\v 12 I kowaro emema ba me ueta derawere ufitaitaba neno arama ueta ekodifitaita.  
\v 13 Nono anama awonaroma inare kimu ue i dubu fafisu kowaro ane fafisuna dana wiroeta mubisu.  
\v 14 Godinu yawotasu sina i orofa atata uwara nesiabai we inareibitaro i orofa atata uwara nesia naufitaro i dubu kowa ido fafisu.   
\s1 Daido ba me aramararabo ememetu fafie utasu  
\p
\v 15 Boderewere Godinu we bou ueta amara Daniera dana eno wei, mui siosawere emetuma kakara su koruro inafiro efoita wei. Enoba ya yawitaita uwara ina iwata utaita, iba eregou ufoe watane Yesuma wei.  
\v 16 Eno efoitana i kowaro i Judia orofaro ibifitaita uwara maidaniro sau manibitaita.  
\v 17 I ofadaro yaubifitaita uwara suro ibaiabai mubitae da amufitaita.  
\v 18 I waiyaro gaukara uteibitaita uwara emanu wadia mubitae suro da owefitaita.  
\v 19 I kowaro i dia bobo awetaboini ama ieta kuita bobo awetaboini emanu anibitaita dabana siosawereba sau da anibitaita.  
\v 20 Enoba guriguri uawero yanu sau aneta kowa i awe awe kowaro aba obi mafisu kowaro aba sabate kowaro sau da fafi, Yesuma wei.  
\v 21 I kowaro awe derawere uyafisu. Boderewere Godi i orofa atata ubu ui kowaroma awona eno erawa utaisiba nono duburo eno da efoita.  
\v 22 I awe derawere uyareta kowa kowana siosararaboba iba Godima da ma fuyaratu ufirona eme nesia feafitae, enorogo Godi Danu mune odasu uwara nesia imuteda iba i kowa ma fuyaratu ui.  
\v 23 I kowaro mui amarama Keriso ewado aba Keriso iro ea webisuna danu sina da nauforo wei.  
\v 24 I kowaro irueta kerisoini irueta we bou ueta uwaraini uyafitate buna uetaini eretaini eme irufitae ufitate Godinu muneta uwara irufitae ufitaita.  
\v 25 Yana i ueta nesia efoitaba awonana Nana yaba sina wemaro nauegou uawe!  
\v 26 I kowaro Dana eme ibawa orofaro ibinu webitaitana da naufote iro da aniboro Dana i su koruro yaubinu webitaitana emanu sina da naufoe iba awona yaba watane wei.  
\v 27 Bidama kowa amueta afu kowa itareta afu tiriri ue fa taneda ario utasuro eraita enanari i Ba Eme Sini Amaranu fareta efoita wei.  
\v 28 I uieta ofe aboro aboro ainibifitaro iro amuo gasirama ifitae anibitaita wei.   
\s1 I Ba Eme Sini amaranu ureroma owere fafisu sina  
\p
\v 29 I dera awerarabo ememetu me sibitaitana daido sau ewa yana awona eraisi kowa dumu ufiro nono sakara da ario ufiro muina ureroma burubafitate nasiniro itafitaro i urenu buna derararabo nesia wawana wawana ufitaita.  
\v 30 Idoba i kowaro i Ba Eme Sini Amaranu fareta tanana urero ufiro efitate i orofa atata uwara nesia i webitaita. I Ba Eme Sini Amara gosoro bunaini ario derawere ido fafiro efitaita.  
\v 31 Dawa fafite areda Danu aneru siaia ufie tawuyo ubufiro anibitate Danu muneta uwara kowa amueta afuro kowa itareta afuro ufuniro manamaro aboro aboro nesia ane mubitaita wei. |L  
\s1 I boruba anaba we mawetu ueta  
\p
\v 32 I boruba ana eawete iwata uawe. Boruba ana reka tua ido yarebasuro obi kowa ido farinu webaita.  
\v 33 Enanari Nanu wene i sina nesia ufiro efoitana i Ba Eme Sini Amara fafie uteda bebetoro inarinu iwata ufoita.  
\v 34 Yaba ba wemaro nauawe. Ewa ibinita uwara da uifoitaro ewa nesia botai ufisu.  
\v 35 Ureini nasinini me sibiro Nanu sina da me sibisu Yesuma wei. |L  
\s1 Yesunu fafisu kowaini wai mui amarama iwata me  
\p
\v 36 I fafisu kowa eme iwata me, i urero ibinita aneru iwata me, Godinu Amara Dawa iwata me, Godi torowa Dawa iwata utasu wei.  
\v 37 Noanu kowaro ane ane utebita enanari i Ba Eme Sini Amaranu fareta kowaro ufitaita.  
\v 38-39 Noanu kowaro emema ietaini ogoini itebitate aweta awera munebitana Noa danu bouti ubarero amuiro obi oku derawere ido fariba uwara nesia ogo okuro imuie me sita. Enorogo ema i emabai fafie arebi emetu iwata me. Emanu unu ibaiabai utebitaro oku farite ema woure ane me sinina ido nesia iwata uta. I arina i Ba Eme Sini Amaranu fafisu kowaro enanari ufisu.  
\v 40 I kowaro amara sadei waiyaro uruama gaukara ufisisina mui amara woure anibiro mui amara ibifisu.  
\v 41 Aweta sadei uruama okia oufisisina mui aweta woure anibiro mui aweta ibifisu.  
\v 42 Yanu Dera Amaranu fareta kowa wai ufiro aba yawiro ya iwata meba eregou uforo wei.  
\v 43 Ewa sina imue eawe. I su ubi amarama i waira ueta amaranu dumuro fareta iwata ufirona danu su yawofiro su ma siosa da ufie wei.  
\v 44 Idoba i Ba Eme Sini Amaranu fareta kowa ya iwata meba ainewaure toafurau yawoteiboro wei.   
\s1 Dubunei furiare ueta gaukara amaraini i kasiriwere gaukara amara  
\p
\v 45 Mui dera amara danu mui gaukara amara danu suini waiyaini ibaiabai nesia yawofie odiro i amarama i su uwara emanu ieta ido matebi. Eno utebina kobererau utebi aba me?  
\v 46 Enanari i yawoeta amarama fafisuna danu gaukara ueta amarama enanari ufiro efite dawa we ma kobererau ufisu wei.  
\v 47 Ba wemaro nauawe. I yawoeta amarama i amara danu ibaiabai nesia yawofie mune odifisu wei.  
\v 48-50 Nono mui siosawere gaukara amara eno we imufisu, nanu dera amara sau da fafisu we imufite danu uruama gaukara utaita uwara isuma ufite ietaini kimu ogoini i beforo arama uwarabai iteibisuna danu dera amara kiwuma ido fafisu.  
\v 51 Ido fafite dawa fanisi mafite i meoma weta uwarabai sane odifiro iro emema nio bijari uteda i webitaita Yesuma eno wei.   
\c 25  
\s1 I arumami nesia teniba kasei sina  
\p
\v 1 Godinu ure yawoetana ewa sina ari Yesuma wei. Arumami teni (10) emanu nanefa mutate i aweta muneta amara atafitae anita.  
\v 2 Moana arumami fai (5) emanu beforona bunawere. Nono moana arumami fai emanu beforona buna me.  
\v 3 I beforo buna me arumami anibitae uteda emanu nanefa mutate nono nanefa ogo munawa me anita.  
\v 4 I beforo buna arumami emanu nanefaini ogoini ogo botoro mutate anita.  
\v 5 I arumami nesia anitana aweta muneta amara farawa uiro nauta aita.  
\v 6 Nauta ainibitaro dumu abanaro i aweta muneta amara ido farinu arawete eawe eno derawere weitaro nauta.  
\v 7 I arumami nautate uyatate nanefa beafitae uta.  
\v 8 Eno utana i beforo buna me arumamima i beforo buna arumamiba weita, yanu nanefa uifitae utaitaya yaba ogoratu maiwe weita.  
\v 9 Eno weitaro i beforo buna arumami weita, yabai ogo derawere meba yaini yaini arotorowa da mubeisia aniawete i sitowa uwarabai reka oiya uawe weita. Weitaba ido anita.  
\v 10 Anitana i aweta muneta amara ido fariro i ue bou uta arumamini dawaini aweta muneta ogaro ifitae suro amutaro kasimu ido garari ui.  
\v 11 Duburo i beforo buna me arumami fatate kasimubai inaibeda weita, dera amara, kasimu ma ifegari uaro ya amufe weita.  
\v 12 Weitaro i amarama wei, ya na iwata meba kasimu da ma ifegari umau wei.  
\v 13 Enoba i fafisu kowaini waini wai ufiro aba yawiro ya iwata meba eregou uteda yawoegou uforo Yesuma wei.   
\s1 I gaukara uwara rarogonuba kasei sina  
\p
\v 14 Godinu ure yawoetana ewa sina ari Yesuma wei. Mui amarama mui orofaro anibie uteda danu gaukara uwara weiro dawabai fata. Fataro ema danu waiyaini suini ibaiabai nesia yawofitae wei. Eno weite danu gaukara uwaraba oi mai.  
\v 15 Mui amaraba fai tausani kina (K5,000) maite mui amaraba tu tausani kina (K2,000) maite mui amaraba wani tausani kina (K1,000) mai. I uwaranu buna aika maikaba iba oi aika maika mai. I oi mae me sinite iroma mui orofaro ani.  
\v 16 Aniro i fai tausani kina muni amarama sau anite besenesi gaukara uteda mui fai tausani kina deiro odi.  
\v 17 Enanari i tu tausani kina muni amarama mui tu tausani kina deiro odi.  
\v 18 Nono i wani tausani kina muni amarama danu dera amaranu oi munite sakai uri daurite i oi i uriro ma feare odite ani.  
\v 19 Dera amara mui orofaro ibebe ibebe kowa faiyawere ibebe nono owerite fari. Suro farite danu oi mai gaukara uwara besenesi gaukara anene utebita iwata ufie ema weiro dawabai fata.  
\v 20 Fataro i fai tausani kina muni amarama danu mui fai tausani kina oi deiro woure farite wei, dera amara, ana naba fai tausani kina mairo nono mui fai tausani kina deiro ue odineba ewado mua wei.  
\v 21 Weiro danu dera amarama wei, ana rorowarauini kobere gaukara ueta amara. Ana kikiratu kobererau yawosinuba odimaro derawere yawofasu. Nabai are ibeda yaru ua wei.  
\v 22 Nono i tu tausani kina muni amarama farite wei, dera amara, ana naba tu tausani kina mairo nono mui tu tausani kina deiro ue odineba ewado mua wei.  
\v 23 Weiro dera amarama wei, ana rorowarauini kobere gaukara ueta amara. Ana kikiratu kobererau yawosinuba odimaro derawere yawofasu. Nabai are ibeda yaru ua wei.  
\v 24 Nono duburo i wani tausani kina muni amarama dawabai farite wei, dera amara, ana kimuwere yawotasu amara. A kimuwere yawoteda beata waitawa nono ietata munasute ane ane odawa utasute nono munasu.  
\v 25 Enoba na a iwata uteda aba iyareda anu wani tausani kina sakairo uri uete ma feare ode. Idoa anu oi awona mua wei.  
\v 26 Weiro wei, ana siosawerero ofe ejiwawere gaukara amara! Nana kimu yawoeta amara. Beata waitawa ietata munatanete ane ane odawa odeda nono munatane.  
\v 27 Ina a iwata utasude nono aneba nanu oi banikaro odifaro fare nanu oi muneda mui oi deiro odifitaro fare munawa une wei?  
\v 28 Weite wei, Danu wani tausani kina ma dareawete i fai tausani kina bobo amaraba mawe wei.  
\v 29 I ibaiabai derawere bobo amarabai mui mafiro mubiro dawabai faiya faiyawere ibifisu. I kikimusikiratu uwaranu kikiratu ibaiabai ma dare mubisu wei.  
\v 30 I siosawere gaukara amara muate i dumuwere wawa kabesiro mune sawero itafi. Idoba iro emema emanu nio bijari ufitate i webitaita, i dera amarama eno wei. Yesuma i sina emaba wei.   
\s1 I dubu oname koto kowa  
\p
\v 31 I Ba Eme Sini Amaraini danu aneruini ario derawerero fafitaitana Dawa Danu dera yaure yawoeta orofaro yaufisu.  
\v 32-33 Ido yaufiro i orofa atata uwarama Danu iboro fafitate inafitaita. Inafitaro ema ma saragari ufisu. Mamoe yawoeta amarama danu mamoeini goutini ma saragari uteda aika maika odasu enanari i Ba Eme Sini Amarama i mamoe ari uwara Danu banibira age afuro odifite i gouti ari uwara Danu ewani age afuro odifisu.  
\v 34 Odifite nono i Dera Waria Amarama Danu banibira age afu uwaraba eno webisu, Godima yaba we ma kobererau utasuba arawe. Godima ureini nasinini ubu uteda yanu yawoeta orofaini ido ubu uiba arawete i orofaro yauawe.  
\v 35 Nana osi wourero Naba ieta mata. Na ogo nodo uiro Naba ogo mata. Na aika amara ari yabai farero Na ario derawere weita.  
\v 36 Na wadia eruwere inarebitararo Naba wadia mata. Na ofe wourero Na durua uta. Na diburaro ibitararo Nabai fatate owiga uta webisu.  
\v 37 Eno webiro Godinu sina naueta uwarama eno webitaita, Dera Waria Amara, abo kowaro osi wouriro ereda Aba ieta masi? Ogo nodo uiro Aba ogo masi?  
\v 38 Abo kowaro aika amara ari yabai fariro A ario derawere weisi? Abo kowaro Anu wadia eruwere esite Aba wadia masi?  
\v 39 Abo kowaro ofe wouriro ereda A durua usite A abo kowaro diburaro ibiro owiga usi webitaita.  
\v 40 Eno webitaro Dera Amarama emaba eno webisu, ba sina wemaro nauawe. Nanu sina naueta uwaraba eno utebitana Naba utebita webisu.  
\v 41 Eno webite Danu ewani age afu uwaraba webisu, ya siosawere uwara, Godima yaba we ma kobererau utawa utasu. Godima i uitawa ina seitanini danu aneruba ubu ui. Nabairoma i uitawa inaro aniawete iro ibiawe webisu.  
\v 42 Na osi wourero Naba ieta matawa. Na ogo nodo uiro Naba ogo matawa.  
\v 43 Yabai aika amara ari farero Na ario wiawa. Na wadia eruwere inarebitararo Naba wadia matawa. Na ofe wourero Na durua utawa. Na diburaro ibitararo Na owiga utawa uta webisu.  
\v 44 Eno webiro webitaita, Dera Waria Amara, abo kowaro osi wouriro ogo nodo uiro aika amara ari farite ofe wourite diburaro ibiro esite A durua utawa usi webitaita.  
\v 45 Webitaro webisu, yaba ba sina wemaro nauawe. Nanu sina naueta uwara durua utawa utebitana Na durua utawa utebita webisu.  
\v 46 I uwarama i uitawa inaro anibitaro Godinu sina kobererau naueta uwarama me ibene ibene ibeta orofaro anibitaita Yesuma eno wei.   
\c 26  
\s1 Dera Uwarama Yesu ma uifitae we matanebita  
\p
\v 1-2 Yesuma i sina nesia we me sinite Danu iwata ueta uwaraba wei, kowa sadei me sibiro i Godima Isaraero uwara Ijifiroma woure aneta ogaro kowa fafisu. I kowaro i Ba Eme Sini Amara moana uwaranu age duro mafitaro korosiro ure odifitaita wei.  
\v 3-4 I dera fuyo ode sina weta uwaraini Ju uwaranu baeta uwaraini i botai dera fuyo ode sina weta amaranu suro guruguru uta. I botai dera amaranu ifuna Kaiyafasi. Danu suro anitate Yesu kiwuma budari ufitate ma uifitae we turebita.  
\v 5 Ane fatate weita, i uwarama ibo uotote yaini uraotoba i ogaro kowaro Yesu da mubeisi weita.   
\s1 Yesu mui awetama Beteni suro bonanawere ogoma tare odi  
\p
\v 6-7 Yesuma Beteni suro ane yaubi. Dawa amaima derawere amara Saimoninu suro ane yaubiro mui awetama bonana ogowere, danu dawana derawere, gebiro kawaburo woure farina Yesu ieta itebiro i awetama bonana ogowere Danu kofiriro ma wegari uiro ogo kofiri deiro itari.  
\v 8 Eno uiro Danu iwata ueta uwarama etate ibo uteda weita, aneba me sara ma wegari usinu?  
\v 9 I ogo oiya ufite oi me uwaraba i oi mafisuna ina kobererau weita.  
\v 10 Weitaro Yesuma emanu imueta iwata uite wei, i aweta dua sina da wiawete kodiawe. Dana Naba kobererau usinu.  
\v 11 Ibaiabai me uwara ainewaure yabai ibaitaba Na yabai ainewaure da ibimau.  
\v 12 I ogo Nanu ofero ma wegari usinuba Nanu uri ue oeta ue bou usinu.  
\v 13 Yaba ba wemaro nauawe. Godinu sina i orofa atata kabesi aboro aboro we inareda ewa awetanu ueta webitaro naufitate dawa imufitaita wei.   
\s1 Judasi Yesu do mafie we imui  
\p
\v 14-15 Judasi Isikarioti dawana Yesunu mui tuero (12) iwata ueta amara. Dawa i dera fuyo ode sina weta uwarabai anite wei, Yesu yanu agero odimauna naba ane mafoita wei? Weiro dawaba siriwa oi toti (30) mata.  
\v 16 Oi mataro Judasima Yesunu do maeta daba doberegou ui.   
\s1 Yesu i Ijifiroma woure aneta ogaro Danu iwata ueta uwaraini i  
\p
\v 17 I wawareta ira yisiti me buredi ogaro kowa ido fari. I kowa ido fariro Danu iwata ueta uwara Dawabai fatate weita, anu Godima Isaraero uwara Ijifiroma woure aneta ogaro aboro ue bou ufeisi weita?  
\v 18 Weitaro wei, etei natofo suro mui amarabai aniawete dawaba wiawe, yanu Tisa Amarama wenu, Nanu kowa farinuba anu suro Naini Nanu iwata ueta uwaraini i ogaro ifeisi wenu wiawe eno wei.  
\v 19 Weiro Danu iwata ueta uwarama Danu wei sina enanari utate i ogaro ue bou uta.  
\v 20 Yawi sinina Yesuini Danu iwata ueta uwara tuero (12) ieta itebita.  
\v 21 Ieta itebitana Yesuma wei, ba sina wemaro nauawe, yabairoma mui amarama Na do mafisu wei.  
\v 22 Eno weiba neno siosawere uteda naba wasu? Naba wasu? Demui demui nesia eno we fare anita.  
\v 23 Eno webitaro Yesuma wei, dana Naini ewa ieta naberoro ieta mubisuna dana Na do mafisu wei.  
\v 24 I Ba Eme Sini Amara uifisu Godinu bukaroma eno wasuba enanari uifisu. Nono Dawa do mafisu amaraba fanisi derawere mafisua wei. I do maeta amaranu danuama dawa da mubirona ina kobererau wei.  
\v 25 Weiro Judasi i do mai amarama wei, Dera Waria Amara, dana na aba me wei? Weiro Yesuma wei, ba wasu, dawa a wei.   
\s1 Areto ieta kowa  
\p
\v 26 Yesuini Danu uwaraini ogaro ita. Ogaro iteda Yesuma buredi mune guriguri uite ma birabiarite Danu iwata ueta uwaraba mateda wei, ewana Nanu ofe, i mune iawe wei.  
\v 27 Yesuma nono kafusi munite Godibai we ma kobererau uite Danu uwaraba mateda wei, ya nesia iawe.  
\v 28 Nanu onono ima Godinu reka unuro ue mataneta ma kimu ufite uwara faiyawereba itafisu. Itafite emenu neno neno ueta urofisu wei.  
\v 29 Ba watane, ewa na didi tai dumamu duburo da imaro Nanu Babanu yawoeta kowa fafisuna Danu yawotasu orofaro kowaro yaini Naini nono ifeisi wei.  
\v 30 Yesuini Danu uwaraini soni weitate i su ekoitate Oriwa maidaniro manita.   
\s1 Yesu Fitama Dawa iwata me webisu sina we bou ui  
\p
\v 31 Oriwa maidaniro mane fataro Yesuma emaba wei, ya nesia awona dumuro Na ekodifoita wei. Godinu bukaroma eno wasu, i mamoe yawoeta amara umaro i mamoe nesia wo bogaru ue anibitaita wasu.  
\v 32 Godima Na uietaroma ma uyafiro Na ko Gareri orofaro animaro ya iro aniboita wei.  
\v 33 Weiro Fitama bunawere wei, i uwara nesia aba maru ufitate A ekodifitaitarogo nono nana A da ekodimau wei.  
\v 34 Weiro Yesuma wei, Nanu ba sina wemaro naua wei. Kokora awona dumuro webiro a ko Nanu ifu rarogonu we ma feareda meo webasu wei.  
\v 35 Weiro Fitama wei, aini uimane umauna Aba meo da wemau wei. Eno weiro Danu iwata ueta uwara nesia enanari weita.   
\s1 Yesu Gesemani orofaro guriguri utebi  
\p
\v 36 Yesuini Danu iwata ueta uwaraini mui orofaro anita. I orofanu ifuna Gesemani. Iro ane fataro Yesuma emaba wei, ya ewado yaubiawero Na etararo animate guriguri uma wei.  
\v 37-38 Weite Fitaini Jebedinu amara sadei munite ani. Anite neno siosa derawere uteda i amara rarogonuba wei, Nanu neno bomu kakei utasuba Na uieta neno utasu wei. Ewado yaubeda Naini yawoawe wei.  
\v 39 Weite ema ekodite fuyaratu anite arubi uteda guriguri uite eno wei, Baba, ewa siosawere wakiki ogo ari Nabairoma anibisuna anibisu. Nono Nanu ununa da uate Baba Anu unu torowa ua wei.  
\v 40 Weite uyarite Danu iwata ueta uwarabai ane farina nauta aitaro ereda Fitaba wei, ni furatu Naini aneba yawotawa utaita?  
\v 41 Yawoegou uawete guriguri uawe, siosawere ue ereta yabai faosoro uotoa wei. Yanu nenonu unu ufoitana nono yanu ofena buna meba da ufoita wei.  
\v 42 Eno weite nono anite guriguri uteda wei, Baba ewa siosawere urane yaraneta Nabairoma da anibisuna Anu unu umate uimau wei.  
\v 43 Nono uyarite Danu iwata ueta uwarabai farina emanu diti bomuwere uiba daido nauta ainibitaro eri.  
\v 44-45 Erite nono owerite ani. Ane guriguri uteda enanari weite uyarite Danu iwata ueta uwarabai fari. Farite emaba wei, ya daido nauta ainibeda imoitaita? I kowa ido farinuba i Ba Eme Sini Amara siosawere uwaranu age duro odifitaita.  
\v 46 Uyawero anibe. Na do masinu amara ido farinua eawe wei.   
\s1 Yesu budari uta  
\p
\v 47 Yesu eno weina Judasi, dana mui tuero iwata ueta amara, dawaini uwara faiyawereini ema goreini dera kaiyaini woure fata. I dera fuyo oeta uwaraini Ju uwaranu baeta uwaraini emana ema siaia utaba iba fata.  
\v 48 Aubokona Judasi, i do maeta amara, dana i uwaraba wei, abo amara nana koku umauna dawana i amaraba muawe eno wei.  
\v 49 Judasima Yesubai farite wei, Dera Waria Amara, yaubinu weite yabaite koku ui.  
\v 50 Eno uiro Yesuma wei, naiye, anu unu ane ua wei. Weiro i fata uwarama Yesu fare yabae budari uta.  
\v 51 Eno utaba Yesunu mui iwata ueta amarama danu ba kaiya munite i dera fuyo ode sina weta amaranu gaukara amaranu ome umane kosari uiro itari.  
\v 52 Eno uiro Yesuma dawaba wei, anu kaiya fausiro odia. I kaiyama uraneta uwarana enanari eno uifitaita.  
\v 53 Imue eawe! Nanu unu umauna Nanu Bababa wemaro aneru faiyawere siaia ufiro tarafitate Na durua ufitaita. Na eno umauna Godinu bukaroma wasu sina enanari da ufisu.  
\v 54 Godinu bukaroma ina eno ufisu wasuba iba ewa uwarama eno utaita wei.  
\v 55 Eno weite i fata uwaraba wei, aneba Na waira ueta amara ari kaiyaini gorema muboe faraita? Kowa ainewaure dera dubu suro yaubeda yaba we mawetu utebitararo Na budari utawa uta.  
\v 56 Godinu we bou ueta uwaranu weita sina enanari ufisuba iba eno utaita wei. Weiro Danu iwata ueta uwara nesia Dawa ekoitate iya wo bagaru ue anita.   
\s1 Yesu i dera kanisoro uwaranu iboro inaibi  
\p
\v 57 I tarawatu tisa uwaraini Ju uwaranu baeta uwaraini Kaiyafasi dawa i botai fuyo ode sina weta amara, i uwara dawabai fare yaubitaba i Yesu muta uwarama Yesu Kaiyafasibai woure ane fata.  
\v 58 Fitama etararowere i uwaranu buribi ani. Ane Kaiyafasinu su teteuro farite i forisimani uwarabai Yesuba ane ufitaro efie yaubi.  
\v 59-61 I dera fuyo ode sina weta uwaraini i kanisoro uwara nesia Yesuba meo wawei weda Yesu ma uifitae daba dobeta. Dobetana uwara faiyawere fatate Yesu meo wawei weita. Meo wawei weitaba Yesu ma uieta daba atanawa uta. I uwarama enoma enoma wawei weitaro nono amara sadei fasite weisi, ewa amarama wei, Godinu dera dubu su ma jugari umate kowa rarogonuro nono ubu umanu weiya weisi.  
\v 62 Weisiro i botai dera fuyo ode sina weta amarama uyarite Yesuba wei, i sina nausinute aneba moko sina wiawa utasu wei?  
\v 63 Weiro Yesuma sina mui wiawa uiro wei, i amara sadei aneba A wawei waita wei? Eno weite i botai dera fuyo ode sina weta amarama Yesuba nono wei, Godinu ifuro ba sina wiaro naufe. Ana Keriso Godinu Amara aba me? Wiaro naufe wei.  
\v 64 Weiro Yesuma wei, anu sinana ba wei. Weite wei, awonaroma i Ba Eme Sini Amarama i buna derawere Godinu banibira age afuro yaufite nono duburo i gosoro fafiro efoita wei.  
\v 65 Weiro i botai fuyo ode sina weta amarama neno siosa derawere uiba danu yafa asugari wadia ma babareda wei, Dawa Godiba sina siosa wenuro nauisiba moana wawei weta uwaranu sina da naufeisi wei.  
\v 66 Weite i kanisoro uwaraba nono wei, Dawaba ane ufoita wei? Weiro weita, Dawa siosawere wenuba uifisu weita.  
\v 67-68 Weitate Yesunu ibo nawataro witua utate Danu diti wadiama garari utate agema ureda weita, anama A urinu? Ana Kerisoba we bou uaro naufe weita.   
\s1 Fitama Yesu Dawa iwata me wei  
\p
\v 69 Eno utebitana Fitama wawa i su teteuro yaubi. Yaubiro mui arumama dawabai farite wei, ana Yesu Gareri Amarabai ibi wei.  
\v 70 Weiro Fitama i uwara nesia emanu iboro yaubeda wei, anu sina na iwata me wei.  
\v 71 Weite ofadaro ane yauri. Yauriro mui arumama dawa ereda i uwaraba wei, ewa amaraini Yesu Nasareta Amaraini uruama ibisi wei.  
\v 72 Weiro Fitama wei, firisi, ba watane, i amara na iwata me wei.  
\v 73 Duburo i me inaibita uwarama Fitabai fatate weita, ana Danu mui amarade. Aini Danu wate tanana arotorowa waisiba ana Danu mui amara iwata utaisi weita.  
\v 74 Weitaro Fitama wei, na meo me, ba watane. Na meo wemauna Godima na ma uifisu. I amara na iwata me eno meo wei. Eno weiro kokora ido wei.  
\v 75 Kokora ido weiro Fitama nauite Yesunu bodere wei sina, kokora webiro a ko Nanu ifu rarogonu we ma feafate meo webasu wei. I sina imuteda wawaro anite i derawere wei.   
\c 27  
\s1 Yesu Faeratibai woure anita  
\p
\v 1 Wai urina i dera fuyo ode sina weta uwaraini Ju uwaranu dera uwaraini Yesunu ma uieta daba dobereda we matata.  
\v 2 We matatate Yesu mutate Danu age uwane taritate Dawa Romani gaemani dera yawoeta amara, Faeratibai woure ane oita.   
\s1 Judasinu uieta  
\p
\v 3-4 Eno utaro Judasi, Yesu do maeta amarama erina Yesu ma uifitae utaro erite danu imueta ma owerite siriwa oi toti (30) munite i dera fuyo ode sina weta uwaraini dera uwaraini emabai anite oi ma owere mafie wei, Dawa siosa amara me, kobere amara ma uifoe iba ba me ue wei. Weiro weita, ina yanu kerere me, ina anu kerere weita.  
\v 5 Weitaro Judasima i siriwa oi dera dubu su ubarero sanite owerite ani. Ane danu torowa nama nodo turite ui.  
\v 6 I dera fuyo ode sina weta uwarama i oi mutate weita, ina eme ma uieta oi, ina onono oi. Yanu tarawatuba i oi dera dubu su oibai da odifeisi weita.  
\v 7 Eno weitate mui sina we matatate jogo okia ubu ueta amaranu nasini aika uwara uifitaro ema iro uri ufitae iba i nasini oiya uta.  
\v 8 Eno utaba awona i nasiniba onono nasini waita.  
\v 9-10 Godinu we bou ueta amara Jeremaiama boderewere eno weiba iba enanari uta. Jeremaiama eno wei, moana Isaraero uwarama Dawaba siriwa oi toti (30) mafeisi weita. I oi mutate okia ubu ueta amaranu nasini oiya uta. Godima naba eno wenuba iba watane Jeremaiama wei.   
\s1 Faeratima Yesu wenaueri  
\p
\v 11 Yesuma ido dera yawoeta amaranu iboro inari. Inariro dera amarama wei, Ana i Ju uwaranu dera yawoeta amara aba me wei? Weiro Yesuma dawaba wei, anu sinana ba, aiwia wei.  
\v 12 I dera fuyo ode sina weta uwaraini Ju uwaranu baeta uwaraini Yesu wawei weita. Weitaro Yesuma moko sina wiawa ui.  
\v 13 Sina wiawa uiba Faeratima Yesuba wei, emanu wawei weta nausinu? Aneba sina moko wiawa utasu wei?  
\v 14 Weiro Yesuma wiawa uteda emanu wawei weta moko demurairatu wiawa uiro dera yawoeta amarama neno kirifu ui.   
\s1 Yesu uifisua weita  
\p
\v 15 I Godima Isaraero uwara Ijifiroma woure aneta ogaro kowaro oya mui muiro Isaraero uwarama emanu unu webitaro dera yawoeta amarama enanari dibura amara demurai ma uregari utebiro anebi.  
\v 16 I kowaro mui siosawere dibura amara, danu ifuna Barabasi, dawa diburaro ibi.  
\v 17 I uwara nesia guruguru utaro Faeratima emaba wei, abo amara ma uregari umau? Barabasi aba Yesu i Keriso waita amara ma uregari umau? Wiawero nauma wei.  
\v 18 I uwarama Yesuba ubusi uyareda iba Faeratibai oitaro Faeratima ina iwata ui.  
\v 19 Nono i koto uwaranu yaureta deiro yaubeda sina webina danu awetama mui sina siaia uite wei, Dawa kobere amaraba Dawa kodia. Awona na tuberoma Dawa enete neno siosa derawere uneba Dawa kodia wei.  
\v 20 Nono aubokona i dera fuyo ode sina weta uwaraini Ju uwaranu baeta uwaraini emana i guruguru uwaraba weita, Faeratima webisuna Barabasi ma uregari uate Yesu ma uia wiawe weita.  
\v 21 Dera yawoeta amarama nono wei, i amara sadei eawero abo amara ma uregari umau wiawero nauma wei. Weiro Barabasi ma uregari ua weita.  
\v 22 Weitaro Faeratima wei, Yesu i Keriso waita amaraba anene umau wei? Weina korosiro ure odia weita.  
\v 23 Weitaro Faeratima wei, ane siosawere usinu wei? Weina ibo derawere utate weita, korosiro odia weita.  
\v 24 Faeratima erina i uwarama danu sina munawa utate urafitae utaba Faeratima ogo danu agero ma wegari uite i uwaranu iboro danu age uroteda wei, Danu uietaba mui emeru da umauba uifisuna nanu kerere me, yanu aika uawe wei.  
\v 25 Weiro i uwara nesia weita, ewa kerere yaini yanu koiniborobai ibeibisu weita.  
\v 26 Eno weitaro Faeratima Barabasi ma uregari uite weiro i ami uwarama Yesu isuma uta. Utaro Faeratima Yesu korosiro ure odifitae ami uwara emaba mai.   
\s1 Meremere uwarama Yesuba sawadi uta  
\p
\v 27 I dera yawoeta amaranu ami uwarama Yesu woure dera yawoeta amaranu su fefenaro oita. Oitate i ami uwara nesia Yesubai fata.  
\v 28 Fatate Yesunu wadia ma kosugari utate i dera yawoeta uwaranu kukuiwere yafa wadia ma baruta.  
\v 29 Eno utate sinisini bobo emetu kofi ubu utate Danu kofiri deiro oita. Oitate akuri Danu banibira agero oitate jejerigari uteda irue weita, Ju uwaranu dera yawoeta amara eawe enoma enoma weita.  
\v 30 Eno utate Dawa witua utate i akuri mutate ima Yesunu kofiriro uta.  
\v 31 Eno irutate i kukui wadia ma kosugari utate Danu wadia ma barutate korosiro ure odifitae Dawa woure anita.   
\s1 Yesu korosiro ikokoma ure badami uta  
\p
\v 32 Anebitana Sairina orofa amara danu ifuna Saimoni ido fariro atate yabai ara weita. Ewa amaranu korosi woua weitaba wouri.  
\v 33 Wouriro ane Gorogota orofaro fata. (I orofanu ifu ubina kofiri tai torowa.)  
\v 34 Iro fatate waini iwi ari kawere iro ma dininu utate Dawaba mata. Mataro munite badu uite itawa ekodi.  
\v 35 I ami uwarama Yesu korosiro ure oita. Oitate Danu wadia abo amarama mubisu weitate kasi waribo uta.  
\v 36 Eno utate yaubeda Yesu erebita.  
\v 37 I ami uwarama wawei weta owawa oitate korosi deiro Yesunu kofiribai ure oita. I sinana eno, ewana Yesu, i Ju uwaranu dera yawoeta amara. I sina eno owawa ue oitate korosi deiro ure oita.  
\v 38 I uwarama waira ueta amara sadeini korosiro ure oita. Mui amara Yesunu banibira age afuro oitate mui amara Yesunu ewani age afuro oita.  
\v 39-40 I fare anebita uwarama irueta sina weitate kofiri kereu kereu uteda yo weitate weita, A dera dubu su ma jugari ufate kowa rarogonu nono ubu ufasu weide, botai Anu torowa ma wiroa. Ana Godinu Amara aba me? Ana Godinu Amarana korosiroma ita, eno irue weita.  
\v 41-42 I dera fuyo ode sina weta uwaraini tarawatu tisa uwaraini Ju uwaranu baeta uwaraini ema nesia Yesuba irue weita, Dawa aika uwara ma wirotebite Danu torowa da ma wirofisu eno irue weita. Dawa ya Ju uwaranu dera yawoeta amarana korosiroma itafisuna Dawa naue imue ufeisi weita.  
\v 43 Dawa Godi imutasu. Nana Godinu amara wenuba Godinu neno Dawabai ibifisuna Godima Dawa durua ufiro efe irue weita.  
\v 44 I waira ueta amara sadeima Dawaba enanari we irusi.   
\s1 Yesunu uieta kowa  
\p
\v 45 Kowa otoro inarite kowa ario utawa dumu sini ibi. Nono kowa osugari uite ane abanaro farina kowa nono ario ui.  
\v 46 Kowa ane abanaro siniro Yesuma derawere wei, Irai, Irai, rama sabatani, i sinanu ubina Nanu Godi, aneba Na ekodinu? Yesuma eno wei.  
\v 47 Weiro i guruguru ubita uwarama nautate moana uwarama weita, etei Amarama Iraija yua wasu weita.  
\v 48 Weitaro mui amarama anite uriri ari munite isuro uwanite diririwere ana tai dumamuro ma inuite Yesu ifie woure ani.  
\v 49 Aniro moana uwarama weita, kodia, Iraija fafite Dawa ma wirofisu aba me ari, ina efeisi weita.  
\v 50 Yesuma nono derawere weite ido ui.  
\v 51 Yesu uiro me sinina dera dubu sunu kakara korunu garari ueta dera wadia deiroma babare eminaro itari. I nasini wawana wawana uiro gebiro saragari uiro eme uri ue oita kabesi ifegari uta.  
\v 52 Ifegari utate i bodere Godinu sina nautate uita uwara, Godima ema ma uyari.  
\v 53 Duburo Yesuma uietaroma uyariro i uietaroma uyata uwarama Jerusaremu suro anitaro uwara faiyawere ema eta.  
\v 54 I ami kafitenini danu ami uwaraini ema Yesu yawoteda i nasini wawana wawana uetaini nesia etate neno kirifu derawere uteda weita, ewana Godinu ba Amara weita.  
\v 55 Awetabo faiyawere etararo inaibeda erebita. I awetabo Yesunu buribi Gareriroma anitate Dawa yawotebita.  
\v 56 Moana awetabonu ifuna eno, Meri Megidarina Jeimisini Jousefa emanu danua Merini Jebedinu adarabunu danua, i awetaboini moana awetaboini ema i utebi sinebi nesia erebita.   
\s1 Yesu uri uta kowa  
\p
\v 57 Yawi sinina mui ibaiabai derawere bobo Arimatia amara Jousefa ido ane fari. I amarana Yesunu iwata ueta amara.  
\v 58 Dawa ido ane farite Faeratibai ane Yesunu ofe mubie fari. Ido ane fariro Faeratima danu uwaraba weiro enanari Yesunu ofe mata.  
\v 59 Mataro Jousefama Yesunu ofe munite reka inawere wadiama wayari.  
\v 60 Wayare me sinite danu reka gebiro uri ue oeta eraboro ane odite dera gebiro ma uberu uberu ue are bebeto garari uite ekodite ani.  
\v 61 Meri Megidarinaini etei mui Merini uri oeta kabesi etararo yausite erebisi.   
\s1 Meremere uwarama Yesunu uri kabesi yawotebita  
\p
\v 62-63 I ogaro ue bou ueta kowa me siniro wai uriro i dera fuyo ode sina weta uwaraini Ferosi uwaraini Faeratibai fatate weita, dera amara, etei meo amara bodere me ibebi i odoro wei, kowa rarogonu me sibiro nono uyamau weiro nausite imutaisiba iba farisia weita.  
\v 64 Eno weiya wiaro anu ami uwarama i uri oeta kabesi kowa rarogonu yawoegou ufita. Danu iwata ueta uwarama Danu ofe waira uotote Dawa uietaroma uyarinu webiotoa weita. Eno ufitaitana Danu duburo meo uetana derawere, Danu auboko botai meo uetana kikiratu weita.  
\v 65 Weitaro Faeratima wei, yabai ami uwara ibinita. Ema woure odiawero yawofita wei.  
\v 66 Weiro anita. Ane fatate i dera garari ueta gebiro ma badami uegou utate nama widu utate ami uwara oitaro yawotebita.   
\c 28  
\s1 Uietaroma uyari kowa  
\p
\v 1 Sabate kowa me siniro wai kukuro Meri Megidarinaini mui Merini Yesunu uri oeta kabesiro anisi.  
\v 2 Ane fasina nasini derawere wawana wawana ui. Uiro Godinu aneru ureroma tararite i dera gebiro ma uberu uberu ue ane eta odite gebiro deiro amo yaubi.  
\v 3 Danu ofe ubuna bidanu ario ari. Danu wadiana inawere goso ari.  
\v 4 I uri ue oeta kabesi yawotebita ami uwarama aneruba iya derawere uyatate dowatate uieta uwara ari sita.  
\v 5 I aneruma i aweta sadeiba wei, iya da uyawa. Na iwata, yana i korosiro oita Yesu doberaisi.  
\v 6-7 Dawa ewado me. Dawa uyarinu. Danu wei sina enanari usinu. Danu ainibi kabesi are eawate sau aniawate Danu iwata ueta uwaraba sina wiawa. Ane eno wiawa, Dawa uietaroma uyarinuba Dawa ko Gareri orofaro anibiro iro ane efoita eno wiawa. Yaba ba watane wei.  
\v 8 Weiro nausite uri oeta kabesi ekoisite iya uyareda neno kirifu usirogo yaru uteda Danu iwata ueta uwaraba webisie durami ue anisi.  
\v 9 Anisina Yesuma ema dabaro atanite wei, farisi wei. Weiro ema Danu buri gigirari jegirari uteda Dawa guriguri usi.  
\v 10 Guriguri ue me sisiro Yesuma wei, iya da uyawa. Nanu naiyemutu Gareri orofaro anibitate Na iro efitaita. Aniawate emaba i sina eno wiawa wei.   
\s1 Meremere uwaranu fare weita sina  
\p
\v 11 I aweta sadeima dabaro anebisina moana uri oeta yawoeta uwarama Jerusaremu suro anitate i dera fuyo ode sina weta uwarabai fatate emaba i fare me siniro eta ememetu nesia weita.  
\v 12-13 Weitaro dera fuyo ode sina weta uwarama nautate weitaro Ju uwaranu dera uwara emabai fata. Fataro sina sina we matatate i ami uwaraba oi mateda weita, i uwara nesiaba eno wiawe, Danu iwata ueta uwarama dumuro fatate ya nauta ainibisiro Danu ofe waira ue mutate anita eno wiawe.  
\v 14 Romani gaemani dera yawoeta amarama i sina naufisuna yana dawaba eno webero ya fanisi da mafisu weita.  
\v 15 Eno weitaro ami uwarama i oi mutate anitate enanari meo weita. I Ju uwarabai awona i ikiki enanari waita.   
\s1 Yesu Danu iwata uwarabai fariro eta  
\p
\v 16 Yesunu iwata ueta uwara ireweni (11) Gareri orofaro anita. Ane fatate Yesunu wei maidani iro manita.  
\v 17 Mane fatana Yesu inaibiro etate moana arubi uteda guriguri utaro moana imutawa uta.  
\v 18 Yesuma emabai farite wei, Godima buna derawere Naba masinuba ureini nasini yawotatane.  
\v 19-20 Idoba i orofa atata uwara nesiabai aniawete Godinu sina wiawero naufitate Nanu iwata ueta uwara sibitaro ema babataito uawe. Baba Godinu ifuro Danu Amaranu ifuro Danu Imumu Kotofunu ifuro ema babataito uawete Nanu yaba bunawere we sina emaba enanari we mawetu uawero naufita wei. Yabai ibimaro ureini nasini me sibiro yabai daido ibimau. Ina imue eawe Yesuma eno wei.