\id LUK NT0097.LK Yareba N.T. Weimer 9-JAN-87 
\h RUKANU 
\toc1 RUKANU OWAWA 
\toc2 RUKANU 
\mt1 RUKANU OWAWA  
\c 1  
\s1 Rukama ewa sina Tiafarasiba owawa ue odi  
\p
\v 1-2 Naiye, Tiafarasi, nanu sina ewado ea. Yesu Kerisoma buna ueta faiyawere yabai utebi. Moana uwarama Danu buna ueta erebitate Danu sina yaba webitate owawa odebe yabai matebita.  
\v 3 Eno utebitaba nanu imuetana eno, Yesunu buna ueta nesia nauegou utebitaraba nesia rorowarau odimate aba siaia umane eno imuteda iba owawa utatane.  
\v 4 I buna ueta naui sina ina ba iwata ufae iba ewa owawa siaia utatane.   
\s1 Aneruma Joni babataito danu danuama mubisu kowa wei  
\p
\v 5 Boderewere Erodi, dana gaemani dera yawoeta amara. Dana Judia orofa yawotebi. Yawotebina i kowaro mui fuyo ode sina weta amara, danu ifu Sakaraiya, iro ibebi. Danu danata demurai uwarana Abaija waita uwara ido. Dawaini danu uwaraini dera dubu suro Godinu gaukara utebita. Sakaraiyanu awetanu ifuna Erisabeti. Erisabetinu waria amarana Eroni. Eroninu uwaraini Godinu fuyo ode sina webita.  
\v 6 Awetaini awera Godinu dabaro rorowarau inareda Danu tarawatuini Danu sinaini nauteda imuegou utebisi. Eno utebisiro Godima emanu kobere ueta sineta erebi.  
\v 7 Eno ibeda Erisabeti desini kimu uiro ero uite kuita munawa me ibebe awetaini awera buruka usi.  
\v 8 I Abaija waita uwaranu gaukara kowa ido fari. I fuyo ode sina weta uwaranu baeta eno, emanu gaukara kowa farinuba emanu ifu ifu feifaro yanatebitate bosioro youtebita. Eno utebitate guriguri utebitate ifu demurai munebita.  
\v 9-10 Enoba i kowaro Sakaraiyanu ifu muta. Mutaba Sakaraiyama dera dubu suro fuyo mafie amuite ibina i guruguru ubita uwara nesia wawaro yaubeda guriguri utebita.  
\v 11 Sakaraiya ido inaibebe erina Godinu aneru bonana ina gibori kaiyo banibira afuro bodere inaibinono inaibiro eri.  
\v 12 Eno ereda neno siosa uteda iya derawere uyari.  
\v 13 Iya uyariro aneruma wei, Sakaraiya, iya da uya wei. Godima anu guriguri ueta nausinuba anu aweta Erisabetima mui amara kuita mubiro ana danu ifu Joni maibasu wei.  
\v 14 Kuita mubiro neno kobererau uteda yaru ufawaro uwara faiyawere ema enanari yaru ufitaita wei.  
\v 15 I amakanu daisibite Godinu dera amara sibiro Godima efisu wei. Idoba anu amarama wainini siosa ogoini da ifisu. Danu danua dawa mubiro Godinu Imumu Kotofuma danu neno ubarero itafisu.  
\v 16 I amarama Godinu sina bunawere wegou ufite eme faiyawere ma owefiro emanu Dera Godibai anibitaita aneruma eno wei.  
\v 17 Iraijanu ueta sinetaini bunaini dana mubite dawa ko anibisu. Anibite emanu damamamutuini koiniboroini ma demurai ufiro ibifitaita. I Godinu sina naue ekoeta uwaranu neno ma owereibiro nono imueta kobererau imuteibitaita. Dawa i uwara eno ue bou ufiro Dera Waria Amara ido fafisu, aneruma eno wei.  
\v 18 Weiro Sakaraiyama aneruba wei, nanu awetaini naini buruka uwaraba anene umate iwata umau wei?  
\v 19 Weiro aneruma dawaba wei, nanu ifuna Geibero. Na Godibai ibatane wei. Godima na ewa kobere sina aba wemane iba siaia usinuro iba fanea wei.  
\v 20 Weite nono wei, nanu sina nautawaba awonaroma i kuita mubisu kowaro wate mu ufate sina wate da webasute me ibifaro Nanu wene ba enanari ufisu wei.  
\v 21 Eno utebisina i guruguru ubita uwarama Sakaraiya yowetebe osi utate we imuta, i amarana aneba ubarero yafawere ibinua we imuta.  
\v 22 Sakaraiyama dera dubu su ubareroma wawaro itarite emaba sina webie uite wiawa uiba i uwarama we imuta, dawa tubetube erinu aba we imuta. We imutaro Sakaraiyama wate mu uiba emaba sina wiawa uite agema torowa wanawana ui.  
\v 23 Eno uite moana kowaro wate wiawa me mu ue ibebe danu gaukara kowa me siniro suro ido ani.  
\v 24 Duburo Erisabetima dia munite sakara fai (5) suro feare yaubebi.  
\v 25 Dana eno wei, na kuita munawaba nanu bodere ibetana aramawere. Awonana Godima na kobererau erasuba emema na da irufitaita wei.   
\s1 Aneruma Merima Yesu mubisu kowa wei  
\p
\v 26 Erisabeti sakara sikisi (6) dia bobo ibina Godima Danu aneru, Geibero siaia uiro aneruma tararite Gareri orofa Nasareta suro ani.  
\v 27-28 I suro mui udiri waribo iwata me aruma ibi. Iro ibebiro mui amarama i aruma buritawa me aworau ibi. Iro me ibebiro mui amarama i arumanu ofe buritawa, i arumama mui amara awera mubie me karu inaibi. I dana mubisu amaranu ifuna Jousefa. Dawa Deiwidinu sisia amara. I arumanu ifuna Meri. Aneruma i arumabai farite wei, yaubinu, Godima ama kobererau utasuba ana Godinu mune odi aruma. Godima abai ibinu wei.  
\v 29 Eno weiba Merima neno siosa derawere uteda we imui, aneba i ario sina nabai eno wasu we imui?  
\v 30-31 I aneruma Meriba wei, iya da uya wei. Godima a kobererau erasuba dia mubate amara mubasuna Danu ifu Yesu maibasu wei.  
\v 32-33 Dana dera amarawere sibiro uwara nesia Dawana I Dera Godinu Amara webitaita. I dera Godima Danu sisia amara Deiwidinu yawoeta kabesi mafiro i Isaraero uwara yawofiro Danu yawoetana da me sibisu wei.  
\v 34 Weiro Merima aneruba wei, na awera meba anene umau wei?  
\v 35 Aneruma dawaba wei, Godinu Imumu Kotofuma abai tarafiro i urero Dera Godinu buna derawerema abai mafiro tare a obari ufisuba iba amara mubaro Godinu kakara amara webitaita wei.  
\v 36 Weite wei, anu atae Erisabeti buruka awetama bodere dia munite i desini kimu waita awetanu sakara awona sikisi (6) me sininu wei.  
\v 37 Ina kimu me, Godima anene webite Danu webisu enanari ufisu wei.  
\v 38 Aneruma eno weiba Merima dawaba wei, na Godinu gaukara aruma ewadoni eate anu wenu sina enanari ua wei. Eno weiro aneruma Meri ekodite ani.   
\s1 Merima Erisabetibai owiga ani  
\p
\v 39 Merima moana kowaro yaubebe uyarite mui Judia orofa maidani suro mani.  
\v 40-43 Merima Sakaraiyanu suro mane farite Erisabeti ario weina Erisabetinu kuita desini ubarero wawana ui. Eno uiro Godinu Imumu Kotofuma Erisabetinu neno ubarero itariba Erisabetima derawere wei, Godima a i aweta nesiabairoma ma kobererau utasute anu mubasu kuita ma kobererau utasu weita wei, nanu Dera Waria Amaranu danuama aneba nabai farinu wei?  
\v 44 Anu ario wenuro naunero nanu kuita desiniro yaru utedaba wawana usinu wei.  
\v 45 Ana Godinu sina nautasuba Godima a ma kobererau utasu. Dawa aba we bou ui enanari ufisu wei.   
\s1 Merima soniroma Godi we ma kobererau ui  
\p
\v 46-47 Eno weiro Merima wei,  
\li1 nanu neno ubareroma Godi we ma derawere utatanete Godi nanu Wiroeta Amara weda yaru uteda watane.  
\v 48 Godima Danu gaukara aruma erasuba iba eno utatane. Enoba i duburo fafitaita uwara nesia na kobererau webitaita watane.  
\v 49 Nanu buna Godima na ma kobererau uiba Danu ifuna kakarawere.  
\v 50-51 Ana anama Dawa imuegou ufitaro awona uwaraini nesia neno arama derawere ufisu watane. Danu age bunawere. I siosa imueta sasae bobo uwara ma beratasuro aika maika anaita.  
\v 52 I dera buna yawotaita uwara mu sanasute i dera me uwara ma uyarasu.  
\v 53 I osi urasu uwaraba kobere kobere ibaiabai matasuro dia uraita. I ibaiabai faiyawere bobo uwaraba matawa utasute we yowereda aniawe wasu.  
\v 54 Danu bodere durua ueta neno arama we bou ueta imutasute ya Isaraero uwara durua utasu.  
\v 55 Godima yanu Babamutu, Eibaramuini danu abua demurai uwaraini nesia neno arama ueta we bou uiba enanari utasu watane,  
\p Merima i sina eno we ma kobererau utebi.  
\v 56 Meri iro sakara rarogonu ibebe ekodite danu suro ani.   
\s1 Joni babataito amaranu muneta kowa  
\p
\v 57 Erisabetinu kuita muneta kowa fariro dana amara muni.  
\v 58 Amara muniro danu abua demurai uwaraini su uwaraini nesia nautate we imuta, Godima Erisabeti neno arama derawere usinuba iba amara muninu, we imutate yaru uta.  
\v 59-60 Kowa eita (8) me siniro i Ju uwaranu baeta kuitanu ofe tureta kowa fariba i uwara nesia fatate guruguru uteda weita, danu damamanu ifu, Sakaraiya mamia weitaro Erisabeti nauite wei, me, danu ifuna Joni wei.  
\v 61-63 Weiro nautate weita, ema, yanu abua demurai uwarabai i eno ifu meya, kodia weitate danu damamaba age wanawana utaro Sakaraiyama age moko wawawana uiro feifa mataro Sakaraiyama owawa ue odi, danu ifuna Joni, odi. Eno odiro i uwara nesia neno kirifu uta.  
\v 64 Sakaraiyama owawa ue odiro danu sina wiawa utebi me siniro sina wate weite Godi we ma kobererau utebi.  
\v 65 Eno utebiba i uwara nesia iya uyata. I sina Judia maidani orofa aboro we inarebitaro nautebita.  
\v 66 I sina nauta uwara nenoma we imuta, Godinu buna i amakanubai ibinuba daisibite ane ufisu we imuta.   
\s1 Sakaraiyanu we bou ueta sina  
\p
\v 67-68 Godinu Imumu Kotofuma Joninu damama Sakaraiyanu neno ubarero itariba Sakaraiyama sina eno we bou uite wei, ya Isaraero uwaranu Dera Godima ya uwarabai tararasute ya ma wirotasuba Dawa we ma kobererau utaisi.  
\v 69-70 Godima Danu we bou ueta uwaranu bebeturoma bodere wei enanari utasu. Godima mui amara Deiwidinu sisia uwarabairoma ma uyari. I Amarana bunawere ma wiroeta Amara.  
\v 71-72 Yaba wasai utaita uwara ufite anama yaba neno ka utaita uwaranu ageroma ya ma darefite odifiro merau anibeisi. Danu bodere wei sina enanari utasu.  
\v 73-75 Godima yanu baba Eibaramu imuteda neno arama uteda Danu we bou ui sina enanari utasuba yaba wasai utaita uwaranu ageroma ya ma darefite ya ma kobererauini we ma fira ufisu. Iba iya da uyafete Godinu iboro kobere ueta sineta ue ibeda rorowarau uteibeisi wei.  
\v 76 Weite wei, a nanu amararatu, aba yanu Dera Godinu we bou ueta amara webitaita. A ko anibate yanu Dera Waria Amaranu daba ue bou ufasu.  
\v 77 Danu sina webaro naufitaro emanu neno neno mubite dubenaro sabisuba Dawa imufitaita.  
\v 78-79 Godima ya neno arama derawere utasuba i dera ario ari ureroma tarafite i dumuini uietanu utumuro ibinita uwara ario ufite yanu daba mawetu ufiro merau ibifeisi watane wei.  
\v 80 I amakanu ibebe daisinite danu neno Godibai odeda neno kobererau ui. Dawa eme ibawa orofaro ibebe ibebe Isaraero uwarabai we mawetu ufie fari.   
\c 2  
\s1 Yesunu muneta kowa  
\p
\v 1 I kowaro Sisa Agasitasi dawa Romani gaemani amara, dana mui tarawatu owawa ue odite siaia uiro aboro aboro woure anitaro nauta. I tarawatuna ifu ifu yawieta tarawatu. I orofa atata uwara nesianu ifu ifu mubie iba i tarawatu owawa ue odi.  
\v 2 Kuiriniasima Siria orofa yawotebina ifu ifu yawieta tarawatu reka fari.  
\v 3 I uwara nesia emanu danua damamanu suro ifu bukaro odifitae anita.  
\v 4 Jousefa, dawa Deiwidinu sisia amaraba Gareri orofa Nasareta suroma Judia orofa Betiremu su, Deiwidinu suro mani.  
\v 5 Dawaba datu mata dia bobo aruma Meri munite emanu ifu bukaro odifisie manisi.  
\v 6-7 Mane ibisina Merima danu botai amara munite wadiama wayare borumakaunu ieta ieta kabesiro odiro ainibi. Ba suro kabesi meba iba borumakaunu ieta ieta kabesiro odi.   
\s1 I mamoe yawoeta uwaraini aneru ana  
\p
\v 8 I orofaro moana mamoe yawoeta uwara emanu mamoe dumuro yawotebita.  
\v 9 Yawotebitana Godinu aneruma emabai fariro Godinu araetama ario derawere ari i mamoe yawoeta uwara ario uiba i uwara iya derawere uyata.  
\v 10 I aneruma emaba wei, iya da uyawete nanu sina nauawe wei, kobere sina wemaro eme nesia nauteda yaru ufitae iba yabai fanea wei.  
\v 11 Weite nono wei, i ma wiroe mune aneta amara, Dawa i Mesaia, Godinu Keriso, Danu danuama awona muninu wei.  
\v 12 Danu ereta tananana eno, aniawete eawe, wadiama wayareta bobo borumakaunu ieta ieta su kabesiro ainibinu iro dobere atafoita wei.   
\p
\v 13-14 Eno weina ido buna aneru faiyawere i anerubai fatate Godi we ma kobererau utate weita, Godinu ifu ma derawere ufeisi weita. Ana anama Godinu sina naufitaitana Danu wesa mafiro merau ibifitaita.  
\v 15 Aneruma eno weitate i uwara ekoitate urero owere manita. Manitaro mamoe yawoeta uwarama weita, Godinu aneruma weita sina Betiremu suro i kuita anibete efe weita.  
\v 16 Eno weitate sau sau anita. Ane fatate etana Merini Jousefa yaubisiro kuitana borumakaunu ieta ieta kabesiro ainibiro eta.  
\v 17-18 Etate ane i aneruma i kuitaba wei sina eme faiyawereba weitaro i sina nauta uwarama neno kirifu uta.  
\v 19-20 I mamoe yawoeta uwarama owetate emanu orofaro anitate iro yaubeda anerunu sinaini emanu eretaini imuteda Godi we ma kobererau utebita. Merima emebai sina wiawa, nesia nenoma imuegou utebi.   
\s1 Yesunu ifu mamita  
\p
\v 21 Kowa eita (8) me siniro Danu ofe tutate Danu ifu Yesu mamita. I ifuna aneruma bodere Meri dia munawa kowaro we bou ui enanari mamita.   
\s1 Yesukanu Simionini Enabai woure anita dera dubu suro  
\p
\v 22 Merinu kakara uroetaini fuyo oeta kowa ido fari. Ina Mosesinu tarawatuba Yesu mutate Jerusaremu suro Yesu Godibai odifitaro efie woure anita.  
\v 23 Godinu bukaroma eno wasu, awetama amara botai mubisuna Godibai odifiro Godima efisu.  
\v 24 Eno wasuba Merini Jousefaini emanu kakara uroeta fuyo odifitae iba anita. I fuyona uku sadeini o ubani sadei. Ina emanu tarawatuba iba i Isaraero uwarama eno utebita.  
\v 25-26 I kowaro mui amara, danu ifuna Simioni, dawa Jerusaremu suro ibebi. I amarama iro ibeda Godi imuteda gaukara rorowarau utebi. Dana ya Isaraero uwaranu ma wiroeta efie uteda ibebi. Godinu Imumu Kotofuma auboko dawaba wei, ana da uifate Godinu we bou ue odi Keriso efate duburo uifasu wei.  
\v 27 Godinu Imumu Kotofuma Simioniba weiro iba Simionima dera dubu suro ani. Iro ane inaibina Merini Jousefama i tarawatu sina enanari ufitae Yesukanu woure fata.  
\v 28-32 Woure fatate Simioni etaro i kuita munite Godi we ma kobererau uteda wei, Dera Godi, Anu naba we bou ui amara eratane, Anu eme nesiabai odi ma wiroeta amara erataneba na ido uimane watane wei. Weite wei, Anu odi Amara, Dana i Ju me aika uwara nesianu dera ario ari. Dana yanu Isaraero uwaranu aretaba uwara efitaita, Simionima eno wei.  
\v 33 Eno weiro Merini Jousefaini i kuitaba wei sina nausite neno kirifu usite imutebisi.  
\v 34 Simionima Merini Jousefa we ma kobererau uite Meriba wei, ewa amakanu ea. Dawa Danu imueta derawere odifisuba moana uwarama ibo uteda Danu imueta da mubitaita. Dawa durua ufisuna moana uwarama Dawa ekodifitaro moana uwarama Dawa naufitate neno kobererau ufitaita.  
\v 35 Dawa uwara faiyawerenu neno ubarero imueta ma boroyafisu. Enoba ana neno arama derawere ufasu, kaiyama anu neno umaneta ari ufasu.  
\v 36-37 I kowaro mui we bou ueta aweta danu ifuna Ena, dawa dera dubu su fefenaro ibi. Dana Fanueronu aruma, i Asura Ju uwarana danu abua demurai uwara. I awetana burukawere. Aweraini oya seweni (7) ibebisiro awera uiro danu torowa oya faiyawere, eiti fo (84) ibebi. I awetama dera dubu su ekodawa, iro kowaini dumuini ibeda guriguri uteda moana kowaro ieta itawa utebi.  
\v 38 Simionima sina we me sinina i aweta ido farite kuita erite Godi we ma kobererau ui. Duburona i ma wiroeta amara efitae Jerusaremu su uwarabai wei, i ma wiroe mune aneta Mesaia waita amara na ere. Enoma enoma webi.   
\s1 Yesuini Danu danua damama Nasareta suro oweta  
\p
\v 39 Merini Jousefa Godinu tarawatuma wei sina enanari utebisina Jerusaremu su ekoisite iroma Gareri orofa, emanu Nasareta suro anisi.  
\v 40 I amakanu daisinebina buna utebite iwata derawere munebiro Godima Dawa ma kobererau utebi. I Yesukanu dera dubu suro ani.  
\v 41 Danu danuaini damama oya ainewaure Jerusaremu suro Godima Isaraero uwara Ijifiroma woure aneta ogaro anebisi.  
\v 42 Yesu oya tuero (12) muniro emanu kakara anebita enanari anita. Iro ane ibebita.  
\v 43-44 I ogaro me siniro danuaini damama Jerusaremu su ekoisite anisiro i otowa amara Yesu anawa, Danu torowa Jerusaremu suro me ibi. Danuaini damama Danu ibeta iwata meba we imuta, Danu domayamutuini uruama anaita we imuteda i kowaro rorowarau anebisi. Dumu sibie uiro Yesu emabai farawa uiba Dawa dobesi. Emanu su uwaraini domayamutuini ema nesiabai doberebe atanawa usi.  
\v 45 Atanawa usiba owesite Jerusaremu suro dobefisie anisi.  
\v 46 Iro ane fasite kowa rarogonu me siniro dera dubu suro atasi. Yesuma i dera tisa uwaranu abanaro yaubeda sina nautebite moko sina wenauereda webi.  
\v 47 Eno utebina i uwaraboma Danu webi moko sina nauteda neno kirifu utebita.  
\v 48 Yesu eno utebina danuaini damama ereda neno kirifu usiro Danu danuama wei, nanu amara, aneba yaba eno usinu? Anu amamaimi naini a doberegou uisi wei.  
\v 49 Weiro Yesuma wei, anene Na doberaita? Nanu Babanu suro yaubinero aneba iwawa utaita wei?  
\v 50 Eno weiro Merini Jousefama Danu sina iwawa usi.  
\v 51 Yesuini ema ido owetate Nasareta suro tanita. Yesuma emaba gifena utawa utebi. Danu danuama ina nesia wiawa uteda nenoma me imutebi.  
\v 52 Yesu daisinebina buna utebite iwata derawere munebiro Godima Dawa ma kobererau utebiro eme Dawa we ma kobererau utebita.   
\c 3  
\s1 Joni babataito amaranu we mawetu ueta sina  
\p
\v 1-2 Taibiriasi Sisa, Romani gaemani dera yawoeta amara, dawa oya fifitini (15) i orofa nesia yawotebi. Danu botai yawotebi oya fotini (14) me siniro dubu oya yawotebina Godima Danu sina Jonibai siaia uiro dawabai tarari. Joni Sakaraiyanu amara, dawa eme ibawa orofaro ibebiro Godinu sina dawabai tarari. I kowaro Faeratina Judia orofa yawotebi. Erodima Gareri orofa yawotebi. Erodi danu dabue Firifima Aituriaini Turekonaitini orofa yawotebi. Risaniasima Eibirina orofa yawotebi. Einasini Kaiyafasini ema i dera fuyo ode sina weta gaukara utebisi.  
\v 3 I kowaro Godinu sina Jonibai tarariro nauite Jonima Jodani ogo ewafuini etarafuini Godinu sina aboro aboro we inarebi. Yanu neno neno ueta dubena sawero Godima yanu neno neno ueta mubite imutawa ufiro ya babataito uma. I sina eno we inarebi.  
\v 4-5 Isaiyama Godinu we bou ueta amarama danu bukaroma eno owawa ue odi,  
\li1 dana eme ibawa orofaro sina we inareda wasu. I Dera Waria Amaranu daba wabue moya uawe. Daba maidanini fafaini kifuru kafuruini ma nabi uawete i daba ma rorowarau uawe.  
\v 6 Eme nesia Godinu ma wiroeta amara efitaita wasu,  
\p Isaiyama eno owawa ue odiro Jonima enanari ui.   
\p
\v 7 Uwara faiyawere Jonibai babataito ufitae fataro Jonima emaba wei, ya tabainu nanatu! Anama Godinu fafisu neno ka yaba weiba iba serigari ufoe nabai durami ue farita wei?  
\v 8 Aniawete ueta ba me dubena afu sawete kobere ueta iboro odiawero Godima efiro ya babataito uma wei. Weite nono wei, me sara uyafote yana Eibaramunu sisia weboitana Godima Eibaramunu sisiana gebiroma ubu ufie ufisuna ubu ufisu wei.  
\v 9 Godinu koto fanisi kowa fafiro ufie utasu. Amarama kowa ramamasute ana umafie utasu enanari Godinu koto, i ari, yanu siosa ueta sineta umafie utasu. Mui ana kobere tai da uwafiro umane tufite mune inaro sabisu wei.  
\v 10 Eno weiba i guruguru ubita uwarama weita, ya anene ufene wasu weita?  
\v 11 Eno weitaba Jonima wei, dei barueta sadei bobo amarama barueta me amaraba demurai mafisu. Enanari ieta bobo amarama nata ufisu wei.  
\v 12 Moana takesi muneta uwarama Jonibai babataito ufitae fatate weita, ya anene ufene wasu weita?  
\v 13 Weitaba Jonima emaba wei, i Romani gaemani uwaranu waita takesi torowa muawete nono mui me sara deiro takesi da muawe wei.  
\v 14 Ami uwarama dawabai fatate weita, yade, anene ufene wasu weita? Weitaba Jonima emaba wei, eme me sara da uawete emanu oi waira da uawete yanu fei oi torowa muawe wei.  
\v 15 Ju uwara nesia i ma wiroe mune aneta Mesaia waita Amara yawoegou utebitaba emanu aika we mataneda weita, Joni, dawa Godinu Mesaia aba me? Emanu emanu eno weita.  
\v 16 Eno webitana Jonima emanu imueta iwata uteda emaba wei, nana ogoma babataito utatane wei. Duburo mui Amara nanu buribi afiro Danu buna derawere na ari me. Na kobererau meba Danu ibo didi da inare tumau wei. Dawa Godinu Imumu Kotofuini ina yaretama ya babataito uegou ufisu wei.  
\v 17 Dawa Danu uiti tai koru kafae ma kobererau ufie saboroma uiti tai etu sanasu. Etu sanasuro oyauma ifuru afuru aika kabesiro woure odasuro uiti tai kafaero itarasu. I ba tai su koruro odasute ifuru afuru da uifisu inaro sanasu. Inama ifuru afuru yareiene yareiene yareibisu Jonima wei.  
\v 18 Jonima enoma enoma we kakara utebite Godinu kotofu sina i uwaraba webi.  
\v 19-20 Gareri orofaro dera yawoeta amara, Erodima danu dabuenu aweta Erodiasi ma dare munite danu ueta ba me faiyawere utebi iba Jonima dua sina wei, Erodiba, iba Erodima Joni diburaro odi. Erodima Joni diburaro odiba ina danu botai ueta siosawere.   
\s1 Jonima Yesu babataito ui  
\p
\v 21-22 Jonima i uwara nesia babataito ue me sinite Yesu babataito uiro Yesuma guriguri uteda webina ure eba ui. Ure eba uiro Godinu Imumu Kotofu, ubani gasira ari, Dawabai tarariro ureroma sina tararite wei, A Nanu Amara ubiba Nanu neno Abai ibinuro yaru utatane wei.   
\s1 Yesunu danatamutu awonu ifu ifu  
\p
\v 23 Yesunu daisineta oya toti (30) muniro uwarabai Danu kotofu sina webi. Uwarama weita, Dana Jousefanu amara, weita. Jousefa, dana Eirinu amara.  
\v 24 Eiri, dana Matatinu amara. Matati, dana Riwainu amara. Riwai, dana Merokainu amara. Merokai, dana Janainu amara. Janai, dana Jousefanu amara.  
\v 25 Jousefa, dana Matataiasinu amara. Matataiasi, dana Eimosinu amara. Eimosi, dana Naumunu amara. Naumu, dana Esorinu amara. Esori, dana Neigainu amara.  
\v 26 Neigai, dana Metinu amara. Meti, dana Matataiasinu amara. Matataiasi, dana Simeinanu amara. Simeina, dana Jousekanu amara. Jouseka, dana Jodanu amara.  
\v 27 Joda, dana Joananinu amara. Joanani, dana Reisanu amara. Reisa, dana Serubabeonu amara. Serubabeo, dana Sirutionu amara. Sirutio, dana Nerinu amara.  
\v 28 Neri, dana Merokainu amara. Merokai, dana Adinu amara. Adi, dana Kosaninu amara. Kosani, dana Emodamunu amara. Emodamu, dana Erunu amara.  
\v 29 Eru, dana Josuanu amara. Josua, dana Iriesanu amara. Iriesa, dana Joriminu amara. Jorimi, dana Matatinu amara. Matati, dana Riwainu amara.  
\v 30 Riwai, dana Simioninu amara. Simioni, dana Judanu amara. Juda, dana Jousefanu amara. Jousefa, dana Jonamunu amara. Jonamu, dana Iriekiminu amara.  
\v 31 Iriekimi, dana Mereanu amara. Merea, dana Menanu amara. Mena, dana Matatanu amara. Matata, dana Neiteninu amara. Neiteni, dana Deiwidinu amara.  
\v 32 Deiwidi, dana Jesinu amara. Jesi, dana Oubedinu amara. Oubedi, dana Bouasinu amara. Bouasi, dana Samoninu amara. Samoni, dana Neisoninu amara.  
\v 33 Neisoni, dana Aminadabunu amara. Aminadabu, dana Adamininu amara. Adamini, dana Aninu amara. Ani, dana Esaronunu amara. Esaronu, dana Feresinu amara. Feresi, dana Judanu amara.  
\v 34 Juda, dana Jeikofunu amara. Jeikofu, dana Aisikinu amara. Aisiki, dana Eibaramunu amara. Eibaramu, dana Tiranu amara. Tira, dana Neionu amara.  
\v 35 Neio, dana Seruganu amara. Seruga, dana Reunu amara. Reu, dana Fereginu amara. Feregi, dana Eberinu amara. Eberi, dana Siranu amara.  
\v 36 Sira, dana Kenaninu amara. Kenani, dana Afakadinu amara. Afakadi, dana Seminu amara. Semi, dana Noanu amara. Noa, dana Remekinu amara.  
\v 37 Remeki, dana Metiuseranu amara. Metiusera, dana Inokinu amara. Inoki, dana Jeiredinu amara. Jeiredi, dana Mererianu amara. Mereria, dana Kenaninu amara.  
\v 38 Kenani, dana Enosinu amara. Enosi, dana Setinu amara. Seti, dana Adamunu amara. Adamu, dana Godinu amara.   
\c 4  
\s1 Seitanima Yesu ue erebi  
\p
\v 1 Godinu Imumu Kotofuma Yesunu neno ubarero itarite inune ui. Yesuma Jodani ogo ekodite owere ani. Owere anebina Godinu Imumu Kotofuma Yesu eme ibawa orofaro woure ane odi.  
\v 2 Ane odiro Yesuma iro kowa foti (40) ibebina seitanima Yesu ue erebi. Yesuma kowa foti (40) iro ibeda ieta itawa me ibebe kowa me siniro osi derawere uiro.  
\v 3 Enoba seitanima Yesuba wei, A ba Godinu Amarana wiaro ewa gebiro buredi sibi wei.  
\v 4 Weiro Yesuma seitaniba wei, Godinu bukaroma eno wasu, emema ieta torowa ifitaitana emanu ibetana ba me wasu wei.  
\v 5 Weiro seitanima Yesu munite mui orofaro woure ane odite i orofa atata kabesini uwaraini nesia sau ma boroyariro eri.  
\v 6 Eriro seitanima Dawaba wei, i kabesini uwaraini nesia naba mairo ina nanuba anaba mamane umauna mamau. Ewa orofa atataini gugua gubarini ewa nesia aba mamaro yawofasu.  
\v 7 Nanu buri gigirariro arubi ufate na guriguri ufasuna i nesia Aba mamau wei.  
\v 8 Weiro Yesuma wei, ewa sina Godinu bukaro eno ibinu, i Dera Godi torowa guriguri uawete Danu gaukara torowa uawe eno ibinu, Yesuma wei.  
\v 9-11 Weiro seitanima Yesu munite Jerusaremu suro woure ani. Ane farite dera dubu su etu fou deirowere woure mane odite wei, Ana Godinu amarana ewadoroma bibu uate taniaro Godima Danu bukaro wei enanari Danu aneruma A yawoteda agema maibitaro merau tane itaro Anu buri gebiroma da ufisu wei.  
\v 12 Weiro Yesuma dawaba wei, Godinu bukaroma eno wasu, anu Dera Godi da ue ea wasu wei.  
\v 13 Seitanima danu siosa ue ereta nesia me siniro Yesu ekodite mui kowaro ue efie ani.   
\s1 Yesu Danu gaukara Gareri orofaro tutubari ui  
\p
\v 14 Godinu Imumu Kotofuma Yesu buna derawere mairo Yesuma Gareri orofaro nono ani. Uwara faiyawere Danu sina i orofa aboro aboro we inarebita.  
\v 15 Yesuma i Ju uwaranu dubu su suro we mawetu utebiro nautebitate Dawa we ma derawere utebita.   
\s1 Yesu Nasareta uwarama ere ekoita  
\p
\v 16 Yesuma Nasareta suro fari. Bodere Yesu Dawa kikiraturo i Nasareta suro ibebi. Danu baeta enanari sabate kowaro Ju uwaranu dubu suro amutebi, i kowaro enanari uite sina yawifie uyari.  
\v 17 Uyariro i we bou ueta amara Isaiyanu buka mui amarama Dawaba mairo muni. Buka mairo munite ma wuraite i sina ane dobere atani. I sinana eno,   
\li1
\v 18 Godinu Imumu Kotofuma Nabai ibinu iba Dana Naba wei, i ibaiabai me uwarabai Godinu kobere sina webia wei iba watane. Na siaia uina i sina wemane fare. I sina eno wemane ya diburaro ibinono ibinita uwara kodiawete aniawe. Ya diti basugari ue ibeta ari ibinita uwara ya eawe. Ya kimu yawotaitaro ibinita uwara iroma kodiawete aniawe.  
\v 19 Godinu kobere yawoeta kowa fafie utasu eno wemane fare.   
\p
\v 20 I sina eno yawite buka garari uite i buka yawotebi amaraba maite yauri. Yauriro i guruguru ubita uwarama Dawa eregou uta.  
\v 21 Yesuma yaubeda wei, awonana yanu nauita Godinu bukaro sina enanari usinu wei.  
\v 22 Eno weiba i uwarama we mataneda weita, Danu sinana kobererau weitate Danu bebeturoma fari kobere sinaba neno kirifu utate weita, ewa anene? Dana Jousefanu amara aba me weita?  
\v 23 Weitaro Yesuma emaba wei, yanu imueta Na iwataba yanu bodere ikiki eno weboita, dogeta amara anu torowa ma wiroa. I ubina eno, anu Kafenamu orofaro buna utebi anu ba suro enanari ua weboita wei.  
\v 24 Eno weite nono wei, Nanu ba sina wemaro nauawe wei. Mui we bou ueta amaranu su uwarama dawa kakara utawa utaita wei.  
\v 25 Ba watane, Iraija imue eawe! Iraijanu ibeda utebi gaukara kowaro wabu awetabo faiyawere ibita. I kowaro oya rarogonuini nono mui oya abanaro obi matawa me ibebiro sinai derawere fari.  
\v 26 Fariro Godima Iraija danu su wabu awetabobai siaia utawa uite Iraija Saidoni orofa Serefati su wabu aweta torowabai siaia uiro aniro durua ui wei.  
\v 27 I we bou ueta amara Iraisa imue eawe! Dana Siria orofa buri age amaima amara, Neimani ma wiroite i Ju buri age amaima uwara ma wirotawa ui wei.  
\v 28-29 Yesu eno weina i Ju dubu suro yaubita uwarama ubusi uyareda uyatate Yesu badedema mutate su maidani woforo sabitae woure anita.  
\v 30 Anebitana Yesuma ema ekodite me ari uite ani.   
\s1 Seitaninu mui imumu siosa bobo amara  
\p
\v 31-32 Yesuma Gareri orofa Kafenamu suro tarani. Iro tare farite sabate kowaro i uwara we mawetu uiro Danu buna sinaba neno kirifu uta.  
\v 33-34 I Ju uwaranu dubu suro seitaninu mui imumu siosama rewoeta bobo amara yaubi. I suro yaubeda iroma derawere wei, Yesu Nasareta Amara, kodia! A yaini ane ue matafene arinu wei? Na iwata, ya ma arama ufae iba arinu. Na iwata A, Ana Godinu kakara amara wei.  
\v 35 Eno weiba Yesuma sau wei, da wiate neno ubareroma amuate ania wei. Yesu eno weiba, i seitaninu mui siosa imumuma i amara mu saniro itariro i seitaninu mui siosa imumuma i amara mui me sara utawa uite ekodite ani.  
\v 36 Eno uiro i ereta uwarama neno kirifu uteda emanu aika we matatate weita, Dana sina bunawere wasuro seitaninu mui imumunu siosama Danu sina nauteda anaita. Danu sina ane ari weita?  
\v 37 I uwarama Danu sina i Gareri orofa aboro aboro we inarebita.   
\s1 Yesu eme faiyawere ma wiroi  
\p
\v 38-39 Yesuma uyarite Ju uwaranu dubu su ekodite Saimoninu suro ani. Ane farite suro amuite erina Saimoninu daroyama ofe wakikiwere wourite ainibiro eri. Ido erebiro i uwarama nui weita, dawa ma wiroa weitaba Yesuma i awetabai inaibeda i ofe wakikiba me sia bunawere weiro wakiki ido toba uri. Wakiki me siniro i aweta uyarite emaba ieta mai.  
\v 40 Kowa itariro i su uwara emanu ofe aika maika woureta uwara nesia Yesubai woure ane oita. Yesubai woure ane oitaro Yesuma ema nesia agema buriro nesia wirota.  
\v 41 Seitaninu moana siosa imumu bobo uwara woure ane oitaro Yesuma weiro seitaninu moana siosa imumuma i uwara ekoita. Ekoitate derawere weita, Ana Godinu Amara weita. I seitaninu siosa imumuma Yesu Dawa Keriso iwata utaba Yesuma emaba Na Keriso da wiawe wei.   
\s1 Yesu Judia orofaro Danu sina wei  
\p
\v 42 Waikukuro Yesuma i su ekodite yaowere orofaro ani. I uwarama Dawa doberebe doberebe atatate nui weita, ya da ekodiate yanu Kafenamu suro yaini ibia weita.  
\v 43 Eno weitaro Yesuma emaba wei, Godinu kotofu yawoeta sina mui su suro wemainiaba iba Godima Na siaia uiro ewaro farea wei.  
\v 44 Yesuma i Judia orofa Ju uwaranu dubu su su aboro aboro Godinu sina ane webi.   
\c 5  
\s1 Yesu Danu botai iwata ueta uwara we muni  
\p
\v 1 Mui kowaro Yesuma Genesareta mesau maguaro inaibeda i uwaraba Godinu sina we mawetu uiro i uwarama Dawabai fare deiro deiro uta.  
\v 2-3 Eno utaro inaibeda erina bouti sadei mesau gigirariro ibitaro eri. I bouti ubi uwarama bouti ekoitate emanu iwame mune ogoro urotebitaro erite Saimoninu boutiro ane amui. Ane amuite Saimoniba wei, jawe uaro eta eta anibe weiro enanari ui. Yesu i bouti ubarero yaubeda iroma i uwara we mawetu ui.  
\v 4 We mawetu ue me sinite Saimoniba wei, ogo sikoru ibinu i afu aniawete yanu iwame sawete erio egi wouawe wei.  
\v 5 Weiro Saimonima wei, Dera Waria Amara, dumuro iwame sane wourebe wourebe ogo egi wourawa usi weite nono wei, Ana wenuba iwame sabero itafisu weiro enanari uta.  
\v 6 Eno utate iwame woutate erio egi faiyawere woutaba iwame ma babafie ui.  
\v 7 Enoba emanu masigu agema fisufisu utaro ema durua ufitae boutiro ane fata. Ane fatate erio egi woutate boutiro oitaro bouti sadei wate fariba inufie ui.  
\v 8 Saimoni Fitama ina erite Yesunu buri gigirari arubi uteda wei, Dera Waria Amara, nana neno neno ueta amaraba na ekodiate ania wei.  
\v 9 Dawaini danu erio egi uruama wouta uwaraini i erio egi faiyawereba iyata.  
\v 10 Jebedinu amara sadei Jeimisini Joni Saimoninu uruama wouta amara sadeima iba iyata. Yesuma Saimoniba wei, iya da uya wei. Awonaroma ane duburo erio egi wourasu i ari eme woufasu wei.  
\v 11 Emanu boutiroma maguaro ane fatate emanu ibaiabai nesia iro ekoitate Yesunu buribi anita.   
\s1 Yesu mui amaimawere amara ma wiroi  
\p
\v 12 Yesuma mui natofo suro ibebina amaimawere amara i suro ibebi. Ibeda Yesu erite Yesubai fare buri gigirariro arubi uteda nui wei, Anu unu ufasuna na ma wirofaro wiromau wei.  
\v 13 Eno weina Yesuma age saneda i amara burite wei, ina Nanu unu. Amaima me sia weina amaima daido me sini.  
\v 14 Yesuma i amaraba wei, eme nesiabai da wiate fuyo ode sina weta amarabai aniate mawetu uaro efi wei. Anu ofe kobererau usinuba Mosesinu tarawatu buri age amaima fuyo oeta enanari uaro emema efita wei.  
\v 15 Yesuma eno weiro iro eta uwarama Danu buna ueta i orofa nesiaro we inarebitaba ofe woureta uwara faiya faiyawere Yesubai wirofitae fata.  
\v 16 Yesuma eme ibawa orofaro guriguri ufie ani.   
\s1 Yesu mui buri age badabada ui amara ma wiroi  
\p
\v 17 Mui kowaro Yesuma we mawetu utebina Ferosi uwaraini tarawatu tisa uwara faiyawere farebitate Yesunu sina nautebita. I Ferosi uwarana Gareri su suini Judia su suini Jerusaremu suini iroma Yesubai fatate sina nauta. I kowaro Godinu ma wiroeta buna Yesubai ibegou ui.  
\v 18 Moana uwarama age sanawa inarawa amara wiaro woutate Yesubai odifitaro ma wirofie woure fata.  
\v 19 Eme faiyawere su bebeto garari utaba anawa uta. Bebetoro anawa utate emanu su fou deina fefewereba iba i sunu fou deiro amutate fou ma eba utate age sanawa inarawa amaraini danu ainibi wia warafaini ebaro oitaro Yesubai itari.  
\v 20 Eno utaro Yesu emanu imueta derawere iwata uite wei, Nanu amara anu neno neno ueta munete imutawa une wei.  
\v 21 Yesuma eno weiba i tarawatu tisa uwaraini Ferosi uwaraini nenoma eno imuta, i Godinu ifu ma kikiratu utasu amara anaiya? Godi torowana emenu neno neno ueta mubite imutawa ufisu eno we imuta.  
\v 22 Yesu emanu wenauereta Dawa iwataba emaba wei, yanu nenoma aneba eno imutaita wei?  
\v 23 Abo sinama ofe woureta amaraba wemau? Anu neno neno ueta mumate imutawa umau, aba uyate anu wia muate ania ari? Abo sinana kimuwere wei? Ane kimu ueta umaro Nanu buna efoita wei?  
\v 24 I nasiniro inareta Ba Eme Sini Amaranu buna derawereba iba emenu neno neno ueta munatanete imutawa utatane. Ina iwawa uotoba eno umau weite i age sanawa inarawa amaraba wei, uyate anu wia muate anu suro ania wei.  
\v 25 Eno weina i amarama emanu iboro uyarite wia munite Godi we ma kobererau uteda danu suro ani.  
\v 26 Eno uiro eme nesia etate neno kirifu derawere uteda iyatate Godi we ma kobererau uteda weita, awonana kamama eraisi weita.   
\s1 Yesu Riwai yua we muni  
\p
\v 27 Yesu i natofo su ekodite ani. Anebina mui takesi muneta amara, danu ifuna Riwai, dawa danu takesi muneta su ubarero yaubiro eri. Yesuma erite i amaraba wei, Nanu buribi arate iwata ua wei.  
\v 28 Eno weiba i amarama ido uyarite iro ane ane nesia ekodite Yesunu buribi ani.  
\v 29 Riwaima Yesunu ogaro derawere ui. Takesi muneta uwaraini moana uwara faiyawere ogaro ifitae fata.  
\v 30 Emaini Yesunu uwaraini ieta uruama itebita. Enoba i Ferosi uwaraini tarawatu tisa uwaraini emana Yesunu iwata ueta uwaraba kamena weda weita, yaini i takesi muneta uwaraini neno neno ueta uwaraini aneba uruama ieta itaita weita?  
\v 31 Weitaro Yesuma emaba wei, i ofe wourawa uwaraba dogeta amara arawa usinute i ofe woureta uwaraba arinu wei.  
\v 32 Enanari i kobere uwaraba wemane waya arawa i neno neno ueta uwaraba neno neno ueta dubena afu sabitae wemane waya farea wei.   
\s1 Ieta kakara uetaba wenauereta  
\p
\v 33 Moana uwarama Yesuba weita, Joninu iwata ueta uwarama emanu baetaba kowa faiyawere ieta itawa ka utaitate guriguri utaita, enanari i Ferosi uwaranu iwata ueta uwarama eno utaita. Nono Anu iwata ueta uwarama eno utawa utaitate ietaini ogoini itebaita weita.  
\v 34-35 Weitaro Yesuma emaba wei, reka aweta muneta amara ogaro ufite danu domayamutubai ibifisuba domayamutu dawabai are ifitaita. Mui kowaro reka aweta muneta amara anibisuna i kowaro ieta da ifitate ka ufitaita. Enanari emema Na woure anibitaitana Nanu iwata ueta uwarama eno ufitaita wei.  
\v 36 Yesu eno weite nono ewa kasei sina emaba wei, mui amarama reka wadia da ma babafite bodere wadia ebaro fifinu da ufisu. Eno ufisuna reka wadiaini bodere wadiaini aika maikaba i reka wadia ma arama ufisu wei.  
\v 37 Nono mui sina eno wei, anama reka waini ogo bodere egi ofero adu uosoro reka wainima bodere egi ofe ma babafite itafisuba i reka wainima bodere egi ofe ma arama ufisu.  
\v 38 Reka waini reka egi ofero adu ufisu.  
\v 39 Enoba anama bodere waini ifite reka waini unutawa ufite webisu, i bodere wainina kobererau webisu.   
\c 6  
\s1 I sabate kowaba wenauereta  
\p
\v 1 Mui sabate kowaro Yesuini Danu iwata ueta uwaraini feame waiyaro inarebita. Waiyaro inareda Danu iwata ueta uwarama feame ma gogorugari utate agema burau ureda ie inarebita.  
\v 2 Eno utaro Ferosi uwarama etate weita, aneba eno utaita? Tarawatuma wasu, sabate kowaro eno da uawe wasude aneba eno utaita weita?  
\v 3 Weitaro Yesuma emaba wei, yanu dera sisia amara Deiwidini danu uwaraini osi urebiba ieta munebi ikiki yawitaita aba me wei?  
\v 4 Weite nono wei, Deiwidima osi urebiba Godinu suro amuite weiro dera fuyo ode sina weta amarama Godinu ereta kakarawere buredi i dera dubu su yawoeta uwara torowanu itebita buredi mairo munite iteda danu uwaraba mairo ita wei.  
\v 5 Yesuma emaba nono wei, i Ba Eme Sini Amara Dana i sabate kowanu ubi Amara. Iba Dana i sabate kowa yawotasu wei.   
\s1 I age arama bobo amara  
\p
\v 6 Mui sabate kowaro i Ju uwaranu dubu suro amuite we mawetu ui. We mawetu uina banibira age arama amara ido yaubiro eri.  
\v 7 I tarawatu tisa uwaraini Ferosi uwaraini Yesu i sabate kowaro i amara ma wirofisu aba me iba erebita. Erebitaro Yesu sabate kowaro i amara ma wirofiro Danu kerere ubina ido webitate Yesu wawei webitae iba eregou utebita.  
\v 8 Yesuma emanu imueta iwata uite age arama amaraba wei, ewado arate ina wei. Eno weiba i amarama uyarite Yesubai ane inari.  
\v 9 Yesuma i uwaraba wei, aboma kobererau, sabate kowaro durua umau aba ma siosa umau? Ma wiromau aba ma uimau wei?  
\v 10 Eno weite i uwara nesia ere owere owere uite i amaraba wei, anu age sa, weiba age saniro rorowarau uite wiroi.  
\v 11 Enoba i uwarama neno ka derawere utate Yesu anene ufeisi we matata.   
\s1 Yesunu afosoro uwara nesia tuero mune odi  
\p
\v 12 I kowaro Yesuma maidaniro guriguri ufie mani. Maidaniro manite Godibai dumu nubo guriguri utebi.  
\v 13 Waikukuro Danu buribi aneta uwara nesia yua weiro Dawabai mane fata. Mane fataro emabairoma amara tuero (12) we munite emaba ya afosoro uwara wei.  
\v 14-16 I uwaranu ifuna eno, Saimoni, mui ifu Fita mami. Fitanu dabue Enuduru, Jeimisini Jonini Firifini Batoromiuini Matiuini Tomasini Arofiasinu amara Jeimisini mui Saimoni, dawa Keinani su amara, dawaini Jeimisinu amara Judasini mui Judasi Isikarioti, Yesu do maeta amaraini, Yesuma i uwara mune odi.   
\s1 Yesu we mawetu ue ma wiroe ui  
\p
\v 17-18 Yesuini Danu uwaraini maidaniroma fafaro tarata. Yesunu buribi aneta uwara faiyawereini Judia orofa uwaraini Jerusaremu su uwaraini enea su Tairaini Saidoni uwaraini eme faiyawere Dawabai Danu sina naufitate ofe woureta aika maika wirofitae fata. Yesuma i seitaninu siosa imumu bobo uwara nesia ma wiroi.  
\v 19 Yesunu buna Dawabairoma fare amuiba i uwarama Yesu buritate wirota.   
\s1 Yaru uetaini inana weta  
\p
\v 20 Yesuma Danu iwata ueta uwara ereda wei, Godinu ure yawotasu orofa ya arama ibeta uwaranu iba yaru uawe.  
\v 21 Ya awona osi wouraitana duburo Godima ya durua ufiro merau ibifoitaba iba yaru uawe. Ya awonana i waita, ya duburo yo weboitaba iba yaru uawe.  
\v 22 Yana i Ba Eme Sini Amaranu uwaraba emema yaba neno ka ufitate yaba me sara ufitate yanu ifu ma siosa ufitaitaba iba yaru uawe.  
\v 23 I kowaro yanu moko muneta urero muboitaba yaru uawete yanu yaru derawereba bibu uawe. I uwaranu danatamutuma Godinu we bou ueta uwaraba enanari utebita.  
\v 24 Eforo! Ya eno uawero ibaiabai derawere uwara i webita. Ema awona yaru utaitana duburo i webitaita.  
\v 25 Eforo! Awonana ema dia uraitana duburo osi ufitaitaba iba i webitaita. Awonana yo waitana duburo neno arama ufitaitaba i webitaita.  
\v 26 Eforo! Awonana emema emaba we ma kobererau utaitana duburo Godima ema da we ma kobererau ufisuba iba i webitaita. Emanu danatamutuma i meo we bou ueta uwaraba enanari we ma kobererau uta.   
\s1 Wasai uwaraba neno arama ueta sina  
\p
\v 27 Yesuma i sina eno weite nono wei, ya nautaita uwaraba sina wemaro nauawe wei, Yanu wasai uwara ibo da uawero yanu neno emabai ibifi. Emema ya neno ka ufitaitana emaba kobererau uawe.  
\v 28 Emema yaba sina siosa webitaitana emaba kobere sina wiawete emaba Godibai guriguri uawe.  
\v 29 Anama yanu taibau ufisuna yanu mui taibau ufie oweawe. Anama yanu seti mubie webite mubisuna yanu dei baruetaini dawaba mawe.  
\v 30 Ana Anama emanu unu derawere ane nui webitaitana emaba mawe. Anama yanu ibaiabai yana mafaro mubisuna ibaiabai demurai nono da we muawe.  
\v 31 Emema yaba ane ufitae weboitana moko enanari uawe.  
\v 32 Yabai anama neno arama moko moko ue matafoitana aneba urero kobere muneta muboe ufoita? I neno neno ueta uwarama enanari utaita.  
\v 33 Yabai anama kobererau moko moko ue matafoitana aneba urero kobere muneta muboe ufoita? I neno neno ueta uwarama enanari utaita.  
\v 34 Yabai anama moko moko we muboitana aneba urero muneta muboe ufoita? I neno neno ueta uwarama enanari utaita.  
\v 35 Yaba wasai utaita uwara neno arama uawete emaba kobererau uawete emaba me mawe. Eno ufote moko da imufoitana yanu urero moko muneta derawere muboita. Eno ufoitana i urero ibinu Godinu adarabu siboita. Yanu Godina kobererau. Dana i imutawa uwaraini siosa utaita uwaraba siosa utawa utasu. Dana wawi me.  
\v 36 Yanu Baba Godima uwaraba neno arama utasu enanari ya enanari uawe. Yesuma eno wei.   
\s1 Moana uwaranu ueta sineta ere weta  
\p
\v 37 Eno weite nono wei, moana uwaraba wawei da weboro Godima yaba wawei da webisu. Moana uwara fanisi da maforo yaba fanisi da mafisu. Moana uwaranu ueta imutawa uforo yanu ueta imutawa ufisu.  
\v 38 Moana uwaraba ane ane maforo yaba mafite nono mui deiro mafite yanu negoro odifiro wate fafisu. Ane ari mafoitana enanari muboita, Yesuma wei.  
\v 39 Yesuma emaba mui kasei sina eno wei, diti basugari amarama mui diti basugari amaranu agero muneda woure anibisuna i amara sadeina kawaro itafisisi.  
\v 40 Ue iwata utasu amarana derawere me, tisa amarana derawere. Ue iwata utasu amara nesia ue iwata ufite duburona danu tisa amara ari sibisu wei.  
\v 41 Aneba mui amaranu diti ubarero ifururatu eregou utaitate yanu diti ubarero ibinu ana tumi erawa utaita?  
\v 42 Aneba waita, kaka, ueta siosawere kikiratu ifuru ari ma mumu umau waitana nono yanu diti ubarero ueta siosararabo, ana tumi ari ibinuro erawa utaita? Ya meo meo uwara yanu diti ubarero ibinu ana tumi botai mu sabote eregou ufoitana nono yanu yatae yabuenu diti ubareroma ifuru ma mumu ufoita wei. Yesuma yanu neno neno uetaba i ikiki wei.   
\s1 Mui anaini danu tai  
\p
\v 43 Yesuma nono wei, kobere ana siosa tai da uwafiro siosa ana kobere tai da uwafisu.  
\v 44 Emema eraita, i ana aika maika emanu tai bobo eraitate waita, i anana siosawere, i anana kobererau eno waita. Boruba tai sinisini bobo anaro munawa utaita. I gureifi nadidi tai iwuwu bobo nadidiro munawa utaita.  
\v 45 I ari, i kobere amarama danu kobere nenoroma kobererau utasu. I siosa amarama danu siosa nenoroma siosawere utasuro danu neno wate farebasuba iba eno webasu, Yesuma wei.   
\s1 Su ma inareta amara sadei  
\p
\v 46 Aneba Na Dera Waria Amara, Dera Waria Amara waitate Nanu sina munawa uteda gifena utaita?  
\v 47 Ana anama Nabai fafitate Nanu sina naufitate enanari ufitaita, i uwarana i ari we enanari umau.  
\v 48 Mui amarama su ubu ufie ui. Su tutubu eba yafawere daure taranite tutubu gebiro deiro sanite gebiroini sakaini sanite isuma yanairo kimu ui. Danu su eno ubu uiro obi oku farite su ma jugari utawa ui.  
\v 49 I uwarama Nabai fafitate Nanu sina naufitate gifena ufitaitana i uwara ewa sina i ari we enanari umau. Mui amarama su ubu ufie uite tutubu sanawa uite su sakai deiro ubu ui. Eno uiro obi oku farite su sau ma jugari uiro i su daido me sini, Yesuma eno wei   
\c 7  
\s1 Yesu mui Romani kafiteninu sabua ueta amara ma wiroi  
\p
\v 1 Yesuma Danu we mawetu utebi sina we me sinite Kafenamu natofo suro ane fari.  
\v 2 Mui Romani ami kafiteninu gaukara ubi amara ofe wourite uifie utebi.  
\v 3 Moana uwarama Yesunu sina weitaro ami kafitenima nauite danu gaukara amara ma wirofie moana Ju dera uwara Yesubai siaia ui.  
\v 4-5 Siaia uiro ane Yesubai fata. Yesubai fatate nui weda weita, i amarana kobere amara, ya Ju uwaraba neno arama utasu. Dana yanu dubu su ubu ui weita.  
\v 6-7 Eno weitaba Yesuini emaini uruama anita. Daba nubo me anebitana i ami kafiteninu siaia ui domayamutu ido are fatate Yesuba i amaranu sina eno weita, Dera Amara, na kobererau meba iba Abai farawa une. Nanu suro da arate sina torowa wiaro nanu gaukara amara wirofi.  
\v 8 Nana dera ami amara. Moana dera uwarama na yawotaitaro nana ami uwara faiyawere yawotatane. Enoba mui amaraba ania watanero anasu. Mui amaraba ara watanero arasu. Nanu gaukara amaraba eno ua watanero enanari utasu watane weiro are weita.  
\v 9 Are weitaro Yesuma neno kirifu uite owere ereda Danu buribi aneta uwara faiyawereba wei, nautaita? I Isaraero uwarabai naueta derawere mui amara i ari atanawa une wei.  
\v 10 Weiro i ami kafiteninu domayamutuma Yesu ekoitate owere suro anita. Ane fatana i amara wiroite yaubiro eta.   
\s1 Yesu mui aweta waburatunu amara uietaroma ma uyari  
\p
\v 11 Mui kowaro Yesuini Danu iwata ueta uwaraini moana uwara faiyawereini Neina suro anita.  
\v 12 Ane farebitana i su uwarama uieta amara suroma woure amo fata. I uieta amarana danu danua waburatunu amara ubi demurai. Wabubai mui amara me. I wabu awetaini su uwara faiyawereini suroma ido amo fata.  
\v 13-14 Amo fatate anebitaro Dera Waria Amara i wabu aweta erite neno arama uteda wei, i da wia weite ane i ui amaranu wiaro buriro i wia wouta uwara ido inata. Ido inataro Yesuma wei, reka amara uya wei.  
\v 15 Weina i amara yare yaurite sina wei. Yesuma i amara danu danuaba mai.  
\v 16 Eno uiba i uwarama iyatate Godi we ma kobererau uteda weita, awonana dera we bou ueta amara yabairoma uyarinu. Awonana Godima ba gaukara usinuro erisi weita.  
\v 17 Yesunu ueta Judia orofa aboro aboro mui su suro we inarebita.   
\s1 Joni babataito amarabairoma sina woure fata uwara  
\p
\v 18-19 Joninu iwata ueta uwarama i sina nesia Joniba weita. Eno weitaro Jonima danu mui iwata ueta amara sadei weiro dawabai fasiro Jonima wei, yanu Waria Amarabai aniawate wiawa, ana yanu yawotaisi amara aba mui amarama fafiro efeisi? Eno ane wenaueawa wei.  
\v 20-21 Weiro i amara sadei anisite Yesubai fasina Yesuma ofe aika maika uwaraini buri bebeu uwaraini diti basugari uwaraini seitaninu siosa imumu bobo uwaraini ma wiroiro esite Yesuba weisi, Joni babataito amarama ya siaia usinuba danu sina abai webune iba faritua weisi. Weisite Joninu sina eno weisi, Ana yanu yawotaisi amara aba mui amarama fafiro efeisi weisi?  
\v 22 Weisiro Yesuma emaba wei, oweawate Jonibai aniawate yanu awona eretaini nauetaini nesia dawaba eno wiawa, i diti basugari uwarana eraitaro i buri bebeu uwarana rorowarau inaraitaro, i buri age amaima uwarana wirotaitaro ofe kobererau utasuro ibinitaro i ome gogore bobo nautawa uwarana ome nautaitaro, i uieta uwarama uietaroma uyaraitaro, i aramawere me sara ibeta uwarama Godinu kotofu sina nautaita.  
\v 23 Anama Na iwawa da ufisuna Godima dawa ma kobererau ufiro yaru derawere ufisu. Jonibai aniawate eno wiawa, Yesuma wei.  
\v 24-25 Joninu sina weta amara sadei anisiro Yesuma i guruguru ubita uwaraba ereda Joninu sina wei. I eme ibawa orofaro ane efoe anita? Oyauma oua ma wawana wawana utasu i ari i amara buna me, i oua ari, efoe anita? Ane efoe anita? Wadia dawana derawere bobo amara efoe anita? I wadia dawana derawere bobo uwarana eme ibawa orofaro ibawa utaitate i dera yawoeta su suro ibinita.  
\v 26 Eno mena ane efoe anita? We bou ueta amara efoe anita? Nanu sina nauawe, dawa otowa we bou ueta amarana me. Dana dera we bou ueta amarawere.  
\v 27 Godinu bukaroma nono dawaba eno wasu, ea, Nanu fo weta amara botai mamaro anibite Anu daba wabue moya ufiro A duburo anibasu ea wasu.  
\v 28 Nanu sina nauawe. I awetabonu muneta koiniborobairoma Jonina derawere, danu gaukarana botai. Ina ba. Nono Godinu yawotasu orofaro ibinu otowaratu amaranu gaukarana derawerero Joninu gaukarana kikiratu, Yesuma eno wei.  
\v 29 Eno weiro i uwaraini takesi muneta uwaraini nautate auboko Jonibai babataito utaba Godi we ma kobererau uta.  
\v 30 I Ferosi uwaraini Mosesinu tarawatu tisa uwaraini Jonibai babataito utawa utaba Godinu imueta ekoita.  
\v 31 Yesuma wei, ewa ibinita eme abo eme ari? Ewa eme ane ari wemau?  
\v 32 Ewa uwarana koiniboro ari watane. Koiniboroma su abanaro yauraitate emanu domayamutuba waita, buma uraisiro ya yaura urawa utaita. Sorara utaisiro ya sorara utawa utaita eno waita.  
\v 33 Joni babataito amara farite moana ietata aika maika itawa, wainini itawa utebiba yana waita, dawa seitaninu mui siosa imumu bobo amara.  
\v 34 I Ba Eme Sini Amarama farinute moana ietata aika maikaini waini ogoini itasuro ereda ya eno waita, Dawa iteba gabariwere amara, waini itasuro beforo siosa utasu amara. Dana takesi muneta uwaraini neno neno ueta uwaranu domaya waita.  
\v 35 Ya eno waitana, nono Godinu imueta Godinu uwara imufitaitana Dawaini Danu imueta daido ba, i ere waita uwarana eno imufitaita, Yesuma eno wei.   
\s1 Yesu i Ferosi amara Saimoninu suro ani  
\p
\v 36 Mui Ferosi amarama Yesuba wei, nanu suro arate ieta ia wei. Weiba Yesuma i amaranu suro ani.  
\v 37 Ane ieta ifie yaubina i natofo su mui neno neno bobo aweta nauite bonana ogo gebiro kawaburo woure amo fari.  
\v 38 Amo farite Yesu yaubiro i aweta Danu buri dubena afu gigirariro inaibeda i webiro inodi Yesunu buriro itari. Enoba i awetama Yesunu danu buri fouma ijima maiturite Yesunu buri koku uite i bonana ogo buriro ma wegari uiro ogo buri deiro itari.  
\v 39 Eno uiro i Ferosi ieta ubi amarama erite we imui, ewa amarana we bou ueta amararona danu ofe buritasu awetana neno neno bobo aweta iwata ufi we imui.  
\v 40-41 Yesuma i amaraba wei, Saimoni, Nanu sina wemaro naua wei. Weiro i amarama wei, Tisa, wiaro nauma. Weina Yesuma wei, mui amara sadeima mui amarabai oi we musi. Mui amarama fai aderedi kina muni, (K500). Mui amarama fifiti kina, (K50) ba torowa muni.  
\v 42 I amara sadeima eno usite nono duburo oi meba moko matawa usiro i oi ubi amarama kodiawa wei. Eno weiba abo amarama i oi ubi amara neno arama derawere utasu? Imue ea, Yesuma eno wei.  
\v 43 Eno weiro Saimonima wei, nanu imuetana eno, i oi derawere we munite moko matawa ui amarama neno arama derawere utasu wei. Weina Yesuma wei, ba wasu wei.  
\v 44 Eno weite owerite i aweta ereda Saimoniba wei, ewa aweta erasu? Anu suro amunero a buri uroeta ogo Naba matawa usinuro i awetama Nanu buri diti inodima urosinute danu fouma ijima maiturinu.  
\v 45 Ana Na koku utawa usinuro dana Nanu buri koku utedibinu.  
\v 46 Ana Nanu kofiri deiro bonana ogo ma wegari utawaro dana Nanu buriro bonana ogo ma wegari usinu.  
\v 47 Enoba aba watane, i awetama Na neno arama derawere utasuba danu neno neno ueta faiyawere muninute imutawa usinu. Ananu neno neno ueta kikiratu munasute imutawa utasuro dawa neno arama kikiratu utasu wei.  
\v 48 Eno weita i awetaba wei, anu neno neno ueta Nana munete imutawa une wei.  
\v 49 Weiro i ieta iteda sina nauta uwarama we mataneda weita, i neno neno ueta mune imutawa utasu amarana ana weita?  
\v 50 Yesuma i awetaba wei, anu imueta derawereba wirosinu. Aniate merau ibia wei.   
\c 8  
\s1 Yesuini anebita awetabo  
\p
\v 1-2 Mui kowaro Yesuma Godinu yawotasu orofa kobere sina we inarebi. Danu uwara tueroini (12) Dawaini anitaro Yesuma seitaninu moana siosa imumu bobo ofe woureta ma wiroi awetabo Dawaini anita. Moana awetabonu ifuna eno, Meri, Maderini waita aweta. Yesuma i awetanu neno ubareroma seitaninu siosa imumu nesia seweni (7) we yowerite i aweta ma wiroi.  
\v 3 I awetaini Jusanu aweta Joana, danu awerana Erodinu mui botai mameta amara. I awetaini Susanaini moana awetabo faiyawere anitate Yesuini Danu iwata ueta uwaraba ietaini oi matebita.   
\s1 I yo saneta amaraba wei kasei sina  
\p
\v 4-5 Su su uwara faiyawere guruguru utaro Yesuma emaba kasei sinaroma we mawetu uteda eno wei, mui amarama yo waifie waiyaro ani. Ane farite jiru turi. Jiru turi me sinite yo mune sane inarebi. Yo sanebiro moana yo dabaro itataro emema deiro amune adire inarebitaro gasirama itebita.  
\v 6 Moana yo gebirowere sakairo itatate sau waratate nasini awewewerero raraka meba yoie yoie uta.  
\v 7 Moana yo sinisini bobo orobu ubarero itatate waratate orobuwereba tai uwanawa uta.  
\v 8 Moana yo kobere nasiniro itatate waraegou utate tai faiya faiyawere uwata. Yo demurairaturoma mui tai wani aderedi (100) uwani weite wei, i ome bobo uwara Nanu watane sina nauegou uawe wei.   
\s1 Yesuma iba kasei sina wei  
\p
\v 9 Danu iwata ueta uwarama Yesuma weita, i kasei sinanu ubina ane ari weita?  
\v 10 Weitaro Yesuma wei, Godinu ununa ya Danu urero yawotasu kiwu sina naufote iwata ufoe utasute nono Dawa unutawa i uwara Danu urero yawotasu kiwu sina nauetaba iba emaba kasei sina torowa ma borobarasuro nautaita. I sinanu ubi iwawa utaitaba iba eraitate bana erawa. Nauetana nautaitate nautawa utaita wei.   
\s1 Yesuma i yo saneta amaraba wei kasei sina ma boroyari  
\p
\v 11 Yesuma eno weite nono wei, i kasei sinanu ubina eno, i yona Godinu sina ari.  
\v 12 I dabana Godinu sina nautaita uwara ari. I amarama Godinu sina we inarasuro i dabaro inaibeta uwarama Godinu sina nautaitaro seitanima sau farasute sina daido mune ma imutawa utasu, i uwarama imuotote wiroaotoba.  
\v 13 Enanari moana uwarana gebirowere sakairo sani, i ari. Godinu sina nautaitate yaru utaitaro Godinu sinaba awe uyareta farasuro i sina nauegou utawa utaitaba emanu nauetana kobererau me. Kobererau meba iba i sina ekodaita.  
\v 14 Moana uwara emana orobuwere orofa ariba Godinu sia nautaitate aika maika imutaitate emanu unu ibaiabai munaitate emanu unu nesia utaitate i sinanu daba garari utaitaba kobererau uegou utawa utaita.  
\v 15 Moana uwara emana i yonu itarebasu kobere nasini ari. Godinu sina nautaitate emanu kobere nenoma imuegou uteda kobere sina wegou utaitate kobererau uegou utaitaro emema eraita, Yesuma eno wei.   
\s1 Okia wowonaro nanefa  
\p
\v 16 Yesuma nono eno wei, nanefa mune beafote okiama wotutu ufoita aba warafa wowonaro feare odifoita? Eno ufoita? Me, eno da ufoita. Nanefa mune beafote aiyo oeta kabesiro odiforo eregou ufitaita wei.  
\v 17 Enanari feareta ememetu nesia, imueta ane ane ma borobafite i kiwuma ueta nesia ma borobafite arioro odifiro efitaita wei.  
\v 18 Ibago i naueta ibaiabai ane ane naufoitana nauegou uawe wei. Anama nauegou ufisuna mui naueta mafisu. I naueta derawere bobo amaraba mui naueta mafite i deramiratu imutasu amarama we imutasu, nanu nauetana ido we imutasuna danu naueta kikiratu ma dare mubisu wei.   
\s1 Yesunu danuaini Danu dabuemutu  
\p
\v 19 Danu danuaini danu dabuemutuini Yesubai anibitae fata. Fatate uwara faiyawere guruguru ubitaba Yesubai ane farawa uta.  
\v 20 Ane farawa utaba moana uwarama Yesuba weita, Anu anuaini abuemutuini A efitae ido faritate wawaro inaibinita weita.  
\v 21 Weitaro Yesuma emaba wei, Nanu bayaini Nanu naburetana Godinu sina nauteda utaita uwara ido eawe wei.   
\s1 Yesuma i enea ufe bana wei  
\p
\v 22 Mui kowaro Yesuini Danu iwata ueta uwaraini boutiro amutaro Yesuma wei, mesau etarafu yofefe wei. Weiba enanari anebita.  
\v 23 Anebitana Yesu nauta ainibiro oyau derawere fari. Oyau fariba ufe uyariro bouti inufie uiba uifitae uta.  
\v 24 I uwarama Yesu ma uyatate weita, Dera Waria Amara, ya uifene utaisi weita. Weitaro Yesuma diti forateda yare yaurite oyauini ufeba bunawere bana weina oyauini ufeini ido me sinite binono sani.  
\v 25 Yesuma Danu uwaraba wei, Na imuegou utaita aba me? Yanu imueta aboro wei? Eno weiro iyareda neno kirifu utate we mataneda weita, ewa amara abo amararo oyauini ogoini Danu sina nauita weita.   
\s1 Yesu seitaninu mui imumu siosama rewoeta bobo amara ma wiroi  
\p
\v 26 Gerasi orofa, mesau etarafu iro ane inata. Gareri orofa mui afu, Gerasi orofa mui afu, mesau abanaro ibi.  
\v 27-29 Gerasi orofaro ane inataro Yesuma maguaro itarina mui Gadara suro seitaninu moana imumu siosama rewoeta bobo amarama Yesu ido atani. I amara kowa faiyawere wadia barutawa ofe torowa inareda suro ainawa uri oeta gebiro eraboro ainebi. (I seitaninu moana siosa imumuma i amarabai kowa faiyawere ure bonoibiba uwarama i amaranu buri age senima uwane tarita. Eno utaro i amarama aiyoni ma furiariro seitaninu mui siosa imumuma dawa ma berairo yaowere orofaro ani). I amarama Yesubai arebina auboko Yesuma seitaninu mui siosa imumuba ania webina i amarama Yesu ereda Yesunu buri gigirariro arubi uite sina derawere wei, Yesu dera urero ibinu Godinu Amara, kodiate na fanisi da ma wei.  
\v 30 Yesuma i amaranu ifu wenaueriro seitaninu imumu siosa faiyawere i amaranu nenoro itataba i amarama wei, nanu ifuna fefera wei.  
\v 31 Weiro seitaninu moana siosa imumuma Yesuba weita, i siosa kabesiro ya siaia da ua weita.  
\v 32 Weitana borosiri faiyawere i maidaniro ieta gusuna ue itebitaro etate Yesubai nui weita, yanu ununa i borosirinu ubarero anibene waisi weitaro Yesuma wei, aniawego wei.  
\v 33 Weiba i seitaninu moana siosa imumu i amaranu nenoroma amo fatate anitate i borosirinu ubarero itata. eno utaba i borosiri nesia durami ue anitate maidaniroma mesauro bibu utate imuie me sita.  
\v 34 I borosiri yawoeta uwarama nesia etate suro durami ue anedana i sina weitaro i nesia nauta.  
\v 35 Su uwarama i ueta nesia efitae anita. Ane Yesubai fatana seitaninu moana siosa imumuma ekoita amara, dawa beforo kobererau uiro wadia yuriro wadia bobo yaubiro etate iyata.  
\v 36 I ereta uwarama seitaninu moana siosa imumuini boronu ueta nesia etate i reka fata uwaraba nesia weitaro nauta.  
\v 37 I Gerasi uwara nesia iya derawere uyatate Yesuba weita, yanu orofa kodiate ania weitaba Yesuma boutiro anibie amui.  
\v 38-39 Amuina i siosa imumu me sini amarama wei, naini anibu. Weina Yesuma me weite wei, anu suro aniate Godinu aba dera neno arama ueta nesia wiaro naufita wei. Weiro i amarama anite i natofo su uwara nesiabai Yesuma dawaba ane ui sina nesia wei.   
\s1 Jairasinu arumaini Yesunu wadia burite wiroi aweta  
\p
\v 40 Yesuma owerite Gareri afu nono ane inari. Uwara faiyawere Yesu yawotebitana Yesu ido fariro ario sina weita.  
\v 41 Mui amara, danu ifuna Jairasi, dawa mui Ju uwaranu dubu su yawoeta amara. Dana Yesubai farite Yesunu buri gigirariro arubi ui.  
\v 42 I amaranu aruma demuraina uifie utebiba iba Yesubai farite wei, nanu suro ara wei. Weiba Yesu ido ani. Anebina uwara faiyawere Dawabai deiro deiro ue anita.  
\v 43 Mui awetaini ani. I aweta ofe derawere woureda oya tuero (12) onono munebi. Oya tuero (12) onono munedaba dogetabai inarebe danu oi sane me siniro wirotawa ui.  
\v 44 I awetama Yesunu dubena afu farite Danu wadia burina onono ido didi turi.  
\v 45 Enoba Yesuma wei, anama Na burisinu wei? Weina i uwara nesia ya me weita. Eno weitaro Fitama wei, Dera Waria Amara, uwara faiyawere Abai deiro deiro utaita ea wei.  
\v 46 Weiro Yesuma wei, anama Na burisinu ari. Nanu buna Nabairoma dawabai ainuro Na iwata utatane wei.  
\v 47 Eno weiba i awetama we imui, Dawa iwata utasu we imuite iya derawere uyarite iwura mameda Yesubai farite arubi uteda danu ofe woureta sina i uwaraba weite wei, nana Dawa burinena na onono ido didi turinuro wirone wei.  
\v 48 Eno weiro Yesuma wei, aruma anu naueta derawereba wirosinu. Aniate merau ibia wei.  
\v 49 Yesuma eno webina mui amarama Jairasinu suroma emabai farite Jairasiba wei, anu aruma uisinu. Uisinua tisa amarabai woroworo sina da wia wei.  
\v 50 Weiro Yesuma nauite Jairasiba wei, iya da uyate imuegou uaro wirofi wei.  
\v 51 Suro ane fataro Yesuma i uwara nesia kodite Fitaini Jonini Jeimisini i arumanu danua damamaini suro woure amui.  
\v 52 Amuina suro yaubita uwarama sorara utaro nauite wei, i da wiawe. I aruma me siniro iwata utate iba yo weita.  
\v 53 Eno weiba i uwarama yo weita. I aruma me siniro iwata utate iba yo weita.  
\v 54 Yesuma i arumanu agero munite ma uyareda wei, arumaratu, uya wei.  
\v 55-56 Weina i daisinono ui aruma ido neno saneda uyari. Yesuma wei, dawaba ieta maro ifi weiro danua damama neno kirifu uta. Yesuma emaba wei, moana uwarabai i sina da wiawe wei.   
\c 9  
\s1 Yesuma Danu iwata ueta uwara tueroba gaukara mai  
\p
\v 1 Mui kowaro Yesuma weiro Danu iwata ueta uwara tuero (12) Dawabai fata. Fataro Yesuma ema seitaninu moana siosa imumu we yowefitate ofe aika maika woureta ma wirofitae iba emaba buna mai.  
\v 2 I afosoro uwaraba buna maite wei, aniawete Godinu yawotasu orofa sina wiawete ofe aika maika woureta uwara ma wiroawe wei.  
\v 3 Yaini woure aneta ibaiabai da muawe. Akurini yoateini ietaini oini mui wadiaini i nesia da mune aniawe wei.  
\v 4 Natofo su fafote mui suro amufote ibeda yanu sinai natofo su uwaraba we me sibote aniboita wei.  
\v 5 Abo su uwarama ya da mubitate yanu sina da naufitaitana yanu dubena emabai sawete sakai buriro maituawero ya ema ekodifote ufoita iwata ufitaro aniawe wei.  
\v 6 Yesuma eno weiba ido anita. Su suro aneda Godinu kotofu sina webitate ofe aika maika woureta uwara ma wirotebita.   
\s1 Erodi Yesu iwawa ui  
\p
\v 7 Erodi, gaemani dera yawoeta amarama Yesunu ueta sineta nesia nauite ina iwawa derawere ui. Moana uwarama weita, Dawana Joni uietaroma uyari.  
\v 8 Moana uwarama weita, Iraija dawa ido owere fari. Moana uwarama weita, mui bodere we bou ueta amara ido fari.  
\v 9 Eno webitaro Erodi i sina nauite iwawa utebe wei, Joninu nodo umane ture. Umane ture rairo anama i buna ueta utasuro nautatane wei? Eno weite Yesu efie doberebi.   
\s1 Yesuma i fai tausani uwara ieta mai  
\p
\v 10 Yesunu afosoro uwarama owetate Yesubai are fatate emanu utebita nesia weita. Yesuma Danu afosoro uwara munite Besaida suro woure ani.  
\v 11 I guruguru ubita uwarama Danu aneta sina nautate Danu buribi anita. Ane fataro Yesuma emaba ario weite Godinu kotofu yawotasu sina emaba weite i ofe woureta uwara ma wiroi.  
\v 12 Yawi sinebina Danu iwata ueta uwarama Dawabai fatate weita, wiaro i guruguru ue ibinita uwara anibitate su aboro aboro ieta ifitate aibitaita. Ewa orofaro suini kabaru me weita.  
\v 13 Weitaro Yesuma emaba wei, i uwaraba ieta mawero ifita wei. Weiro weita, yabai buredi faini (5) erio egi sadeiratu torowa ibinu weita. Anibete i uwaraba ieta oiya ufene wasu weita?  
\v 14-15 Uwara faiyawere eme torowa fai tausani (5000) iro ibita. Yesuma Danu iwata ueta uwaraba wei, i uwara mui kabesiro fifiti (50) we ma yauawe. Enoma enoma ue me siawe wei.  
\v 16 Weiro enanari ue me sitaro Yesuma i buredi faini (5) erio egi sadeini munite urero ereda Godi kobererau we imuteda guriguri uite ma birabiarite Danu iwata ueta uwaraba mairo i guruguru ubita uwaraba nata nata uta.  
\v 17 Nata nata utaro mune itaro dia uri. Ie me sitaro ieta iwo muduna mutate bosio youta. Bosio nesia tuero (12) youtaro wate fari.   
\s1 Fitama Yesuba wei sina  
\p
\v 18 Mui kowaro Yesuma Danu aika ibeda guriguri utebi. Utebiro Danu iwata ueta uwara Dawabai baworo ibita. Yesu guriguri uite Danu iwata ueta uwaraba wei, ewaro uwarama Naba ana waita wei?  
\v 19 Weiro weita, moana uwarama Ana Joni babataito amara waita. Moana uwarama Ana Iraija waita. Moana uwarama Ana mui bodere we bou ueta amara uietaroma uyariba ido owere farinu waita weita.  
\v 20 Weitaro Yesuma emaba wei, yade! Naba anene waita wei? Weiro Fitama wei, Ana Godinu Kerisode wei.   
\s1 Yesu Danu oferi woufite uifisu sina wei  
\p
\v 21-22 Yesuma wei, i sinana ba weite wei, enoba ewa sina moana uwarabai da wiawe wei. Weite wei, i Ba eme Sini Amarama neno oferi faiyawere woufiro i Ju dera uwaraini fuyo ode sina weta uwaraini tarawatu tisa uwaraini Danu sina da muneibitaro Dawa ma uifitaro kowa rarogonu me sibiro Dawa ido uyafisu wei.  
\v 23 Yesuma i guruguru ubita uwara nesiaba wei, anama Nanu buribi afie ufisuna danu unu nesia ekodifite Nanu unu uteda kobere ueta korosi ari ainewaure mameda Nanu buribi daido areibisu wei.  
\v 24 Yesuma nono wei, mui amarama ewa orofaro me ibifie ufisuna daido ba uifisu. Anama Naba uifisuna dawa ba wirofisurogo wirofite me ibene ibene ibeibisu wei.  
\v 25 Anama ewa orofa atata ibaiabai nesia mubite danu neno da ma wirofiro siosa kabesiro feafisuna ina ba me.  
\v 26 Anama Naini Nanu sinaba maru ufiro i Ba Eme Sini Amaraini Danu buna aneruini Danu araetaini Godinu dera arioro fafisuna amaraba moko Na a iwata me wemau wei.  
\v 27 Nanu ba sina wemau, moana ewado inaibinita uwara da uifitate Godinu yawotasu kowa efitate nono ido uifitaita wei.   
\s1 Yesunu ibo nawata aika uite me sini  
\p
\v 28 Kowa eita (8) me siniro Yesuma Fitaini Jonini Jeimisini munite guriguri ufie maidaniro mani.  
\v 29 Iro mane farite guriguri uina Danu ibo nawataini wadia inakeowere dera ario ari ui.  
\v 30-31 Eno uina amara sadei iro me ari fasite Yesuba weisi. Mosesini Iraijaini Godinu araetaro fasite Godinu unu Yesu Jerusaremu suro uieta sina Dawaba weisi.  
\v 32 Fitaini i amara sadeima nauta aibitae uteda i weita sinanu ubi nautawa utate Yesunu araetaini Yesunu uruama inasi amara sadei torowa eta.  
\v 33 Mosesini Iraijaini Yesu ekodifitae utana Fitama Yesuba wei, Dera Amara, yanu ewado yaubinisina kobererauba kiki suraratu rarogonu Anu mui, Mosesinu mui, Iraijanu mui ubu ufeisi wei. Danu imuetana rorowarau meba iba eno wei.  
\v 34 Fitama eno weina goso ido farite ema ma yariro iya uyata.  
\v 35 Gosoroma sina tararite wei, ewana Nanu Amara ubi, Nana Dawa we mune odeba Danu sina nautebeawe wei.  
\v 36 I sina eno weiro etana Yesu torowa inaibiro eta. Iba i kowaro emeba i sinaini eretaini wiawa uta.   
\s1 Yesu seitaninu mui imumu siosa bobo amakanu ma wiroi  
\p
\v 37 Maidaniroma tarataro etei mui kowaro uwara faiyawere Yesu atata.  
\v 38 Mui amarama i guruguru ubita uwaranu turoma derawere wei, Tisa, nanu amara ubi, nanu amara demurairatu eregou ua.  
\v 39 Moana kowaro seitaninu mui siosa imumuma nanu amaranu ubarero itarasuba i wasu. seitaninu mui siosa imumuma nanu amara ma iyari iyari utasuba bebeturoma gugu farasuro seitaninu mui siosa imumuma dawa ureda ekodawa utasu wei.  
\v 40 Anu iwata ueta uwaraba nui wenero seitaninu mui siosa imumu we ma beratawa uita wei.  
\v 41 I amarama eno weiro Yesuma wei, ya imutawa jaja bobo utaita uwara. Yabai kowa aboabo ibimaro imufoita? Anu amara Nabai woure ara wei.  
\v 42 I amara ido woure arina seitaninu mui siosa imumuma ma iyari iyari uteda mu saniro urei. Yesuma seitaninu mui siosa imumuba sina bunawere weite i amara ma wiroite danu damamabai mai.  
\v 43 Yesuma eno uiro uwarama ereda Godinu bunaba neno kirifu uta.   
\s1 Yesu Danu uifisu sina nono wei  
\p
\v 44 I uwarama eno utana Yesuma Danu iwata ueta uwaraba wei, Nanu sina nauegou uawe. Godima bana da webiro Na moana uwaranu age duro odifitaita wei.  
\v 45 Weiro Danu wei sina iwawa uta. Iwata uotoba emanu imueta daba garari ui. Iba i uwarama iyareda i sinanu ubi wenauerawa uta.   
\s1 Anama derawere  
\p
\v 46 I iwata ueta uwarama bebetuma yaraneda weita, yabai abo amarana dera amara weita?  
\v 47-48 Yesuma emanu imueta iwata uite mui amakanu munite Dawabai ma yaurite emaba wei, anama ewa amakanu ari Nanu ifuro durua ufisuna Naini durua ufisu. Anama Na durua ufisuna Na siaia ui Godini durua ufisu. Anama yabai otowaratu sibisu I ari dana derawere wei.   
\s1 Anama yaini wasai utawana dana yaba inarasu  
\p
\v 49 Jonima Yesuba wei, Dera Waria Amara, mui amarama Anu ifuro seitaninu mui siosa imumu we beratebiro esite dana Anu iwata ueta amara meba kodia weisi wei.  
\v 50 Weiro Yesuma wei, kodia da wiawe. Anama yaba wasai utawa utasuna ya durua utasu wei.   
\s1 Mui Samaria su uwara ema unutawa Yesu muneta  
\p
\v 51 Yesunu urero maneta kowa fafie uiba Yesuma Jerusaremu suro rorowarau anibie ui.  
\v 52 Yesuma mui Samaria suro Danu aineta ue bou ufitae siaia uiro anita.  
\v 53 Ane fatate i Samaria uwarama ema unutawa Danu aineta. Yesuma Jerusaremu suro anibie aniba ema unutawa Yesu emanu suro aineta.  
\v 54 Yesunu iwata ueta amara sadei, Jeimisini Jonini i sina nausite Yesuba weisi, sina weburo ureroma ina tarafite ema yare me sibisu, eno webutu aba me weisi?  
\v 55-56 Eno weisiba Yesuma emaba bunawere wei, kodiawa wei. I su ekoitate mui suro anita.   
\s1 Naueta me, me nenoma Yesunu buribi anibita waita uwara  
\p
\v 57 Dabaro anebitana mui amarama Yesuba wei, aboro aboro anibasuna naini animau wei.  
\v 58 Weiro Yesuma wei, oi egina emanu su bobo gasirana mowa bobo, nono i Ba Eme Sini Amara Danu aineta kabesina me wei.  
\v 59 Weite mui amaraba wei, Nanu buribi ara wei. Weiro i amarama wei, Dera Amara, nanu baba uri umauna Anu buribi ido animau wei.  
\v 60 Weina Yesuma wei, me, Nanu buribi anawa uwarama Nanu buribi anawa uieta uwara uri ufitae watane wei.  
\v 61 Eno weite i amaraba nono wei, ade, aniate Godinu kotofu yawoeta sina we inarebea wei. Mui amarama Yesuba wei, nanu su uwaraba ario wemate ekodimate Anu buribi animau wei.  
\v 62 Weiro Yesuma wei, anama Nanu gaukara munasute nono danu bodere ueta imuteda owerasuna i amara kobererau meba Godima dawa yawotawa utasu wei.   
\c 10  
\s1 Yesu i seweniti (70) uwaraba gaukara mai  
\p
\v 1 Mui kowaro Yesuma eme torowa seweniti (70) ema ko sina we anibitaro Dawa duburo we anibie iba ema mune odi. Ema sadei sadei, Danu anibisu su aboro aboro sina we anibitae mune odi.  
\v 2 Mune odite wei, i daureta ietata faiyawere i ari i Godinu sina nautawa uwarana faiyawere. Nono i daureta uwarana faiyawere me i ari Godinu sina we inareta uwarana faiya me. Enoba i daureta ubi Amarabai guriguri uteda wiawero gaukara uwara moana mafiro anibita Yesuma wei.  
\v 3 Aniawete eawe, yana mamoe ari. I mamoena orowa kuabai siaia utatane wei.  
\v 4 Aniawete fausini yoateini mui sadoroini da wouawete eme dabaro atafoitana ario yafawere da wiawe wei.  
\v 5 Ane suro amufoitana eno wiawe, neno kobererau uawe, eno wiawe wei.  
\v 6 I suro kobere amara ibifisuna i su we ma kobererau uawe, mena yanu we ma kobererau ueta owefite yabai ibifie watane wei.  
\v 7 Yana Godinu gaukara uwaraba abo suro amufoitana i su uwaranu ietaini ogoini me ifoita.  
\v 8 Abo natofo suro aniboitana i su uwarama ya mubitate ane ieta mafitaitana iawe wei.  
\v 9 I suro ofe woureta uwara ma wirotedana eno wiawe, Godinu yawotasu kowa baworo fafie usinu wiawe wei.  
\v 10-11 Nono abo suro aniboro i uwarama ya ekodifitaitana dabaro aniawete eno wiawe, ya uwaranu natofo su sakai yanu aika buriro maitureda ekodifero efote Godinu yawotasu kowa fafie usinu efoita, eno wiawe wei.  
\v 12 Yesuma eno weite wei, Godinu koto kowa fafiro Godima i Sodomu su siosawere uwara fanisi kikiratu mafite i su uwara fanisi derawere mafisu wei.   
\s1 Moana su uwara emanu neno Yesubai matawa uta  
\p
\v 13 Ya Korasani su uwaraini Besaida su uwaraini eforo. Godinu buna ueta faiyawere ya erebitaba i Taira su uwaraini Saidoni su uwaraini ina efitarona aramawere wadiaini barufitate konua kofiri deiro odeda emanu ba me ueta ekodifitae wei.  
\v 14 Godinu koto kowa fafiro Godima i Taira su uwaraini Saidoni su uwaraini fanisi kikiratu mafite ya Korasani su uwaraini ya Besaida su uwaraini yanu ba me ueta ekodawaba fanisi derawere mafisu wei.  
\v 15 Yesuma nono wei, ya Kafenamu su uwaraba anene wemau? Urero manibene waita? Ya urero da woure manibite ya mu sabiro uitawa inaro taniboita wei.  
\v 16 Ana anama yanu sina naufitaitana Nanu sina naufitaita. Ana anama ya ekodifitaitana Na ekodifitate Na siaia ui Godi ekodifitaita, Yesuma eno wei.   
\s1 I seweniti uwaranu owere fareta  
\p
\v 17 Duburo i uwara nesia sewenitina (70) owetate Yesubai fatate weita, Dera Waria Amara, Anu ifuro weisiro i seitaninu siosa imumuma yanu sina nautate anita weita.  
\v 18 Weitaro Yesuma emaba wei, eno utebitana bida mamebasu i ari seitanima ureroma ewaro tare ureiro ere wei.  
\v 19 Yesuma nono wei, yaba buna mateda wataneba towini begara ari emetu deiro amune adire anibote yaba wasai utasu amaranu buna serigari uforo ane anema ya ma arama da ufisu wei.  
\v 20 I seitaninu siosa imumuma yanu sina nautaita. Ewaba yaru da uawete yanu ifu urero owawa ue odinuba iba yaru uawe wei.   
\s1 Yesu yaru ui  
\p
\v 21 I kowaro Yesu nenoma yaru uite guriguri uteda wei, Baba, Ana ureini nasinini yawotasu. Ana ewa imueta nesia i orofa atata iwata derawere uwarabai ma fearasute i koiniboro ari uwara emaba ma boroyarasuro iba we ma kobererau utatane. Ina Anu kobere imueta iba eno utasu.  
\v 22 Nanu Babama Danu imueta nesia matasuro enanari utatane. I uwarama Nanu Babanu Amara iwawa utaitaro Godi torowana Dawa iwata utasu. Enanari Godi iwawa utaitaro Godinu Amarama Godi iwata utasute anabai ma boroyarasuro Godi iwata utaita wei.  
\v 23 Yesuma Danu iwata ueta uwara owere ereda emanu aikaba wei, ane ane erebitaba kobererau ibaita wei.  
\v 24 Godinu moana we bou ueta uwaraini moana dera yawoeta uwaraini yanu ereta efitae weitate erawa uta. Yanu nautaita sina naufitae weitate nautawa uta wei.   
\s1 Yesuma i kobere Samaria su amararo wei kasei sina  
\p
\v 25 Mui kowaro Mosesinu tarawatu tisa amarama uyarite Yesu ue efie uteda wei, Tisa, anene umate me ibene ibene ibeta mumau wei?  
\v 26 Weiro Yesuma wei, Mosesinu tarawatuma ane wasu wei? Ina a iwata aba me wei?  
\v 27 Eno weiro i amarama wei, Mosesinu tarawatuma eno wasu, anu unu uetaini imueta nesia Godibai odegou utebea. Godi beforoma imuawete neno arama imuegou uawe, yanu imueta nesia Godi imuawete neno arama uegou uawe, yanu yaiyemutuba yanu aika ari nenoma uegou uawe, eno wasu wei.  
\v 28 Eno weiro Yesuma wei, ba wasu, enanari ufasuna me ibene ibene ibifasu wei.  
\v 29 Weiro i amarama danu torowa ma kobererau ufie uteda wei, nanu naiye ana wei?  
\v 30 Weiro Yesuma wei, mui Ju amarama Jerusaremu suroma Jeriko suro tarani. Tanebina moana waira ueta uwarama danu wadia waira utate isuma utaba uieta ari ainibi.  
\v 31 Ainibiro mui fuyo ode sina weta amarama dabaro me inarebe i amara uieta ari ainibiro erite daba enabira afu kaike uite ani.  
\v 32 Mui Ju baeta utasu Riwai waita amarama enanari ui. Dana i amara erite daba etei afuro kaike uite fare ani.  
\v 33 Nono aika amara dawa Samaria su amarama dabaro anebe fare erite neno arama ui.  
\v 34 Neno arama uiba i amarabai ane jegirari uteda ira amairo odite badesina danu amai wayari. Eno uite i amara mune danu doniki egi deiro ma yaurite ani. Ane otere suro farite i amara yawoegou ui.  
\v 35 Wai uriro uyarite i otere su yawoeta amaraba tu kina (K2) maite wei, i amara yawoegou uaro owemate famaro mui oi deiro sabasuna moko mamau wei.  
\v 36 Yesuma i ikiki eno weite i Mosesinu tarawatu tisa amaraba wei, i amara rarogonuma i waira ueta uwarama urebita amara etana abo amarana danu daiye wei?  
\v 37 Weiro wei, i neno arama ui amara wei. Weina Yesuma wei, aniate enanari ua wei.   
\s1 Yesu Mataini Meribai owiga ani  
\p
\v 38 Yesuini Danu uwaraini anebe mui suro fatana mui aweta, danu ifuna Mata, dana bana wei.  
\v 39 I awetanu dataenu ifuna Meri. Merima Yesunu buri gigirariro yaubeda Yesunu we mawetu ueta naui.  
\v 40 Matama okia ouite imueta aika maika imuiba Yesubai farite wei, Dera Amara, nanu kaka na ekodinuro nanu torowana yaba okia outatane, A imutasu aba me weite wei, wiaro na durua ufi wei.  
\v 41 Weiro Yesuma dawaba moko wei, Mata, ana ane ane imuteda neno siosa utasu wei.  
\v 42 Demurairatu ufasuna kobererau ufasu. Merima ina utasuba na da ma daremau wei.   
\c 11  
\s1 Yesu guriguri ueta we mawetu ui  
\p
\v 1 Mui kowaro Yesuma guriguri ui. Guriguri ue me siniro Danu mui iwata ueta amarama wei, Dera Waria Amara, Jonima danu iwata ueta uwaraba guriguri uteda we mawetu ui, enanari ya we mawetu ua wei.  
\v 2 Weiro Yesuma emaba wei, guriguri utedana eno wiawe, Baba yaini eme nesiani Anu ifu we ma kobererau ufene waisi. Anu yawotasu kowa fafie waisi.  
\v 3 Yanu ieta ainewaure matebea.  
\v 4 Yanu naiyemutunu yaba utaita ba me ueta ina mune aika odaisi, enanari yanu ba me ueta mune aika odia. I siosa ue ereta ibaiabai yabai da woure arate i siosabairoma ya woure eta aika ania wei.  
\v 5-6 Eno weite nono wei, anama danu domayabai dumu abanaro anibite eno webisu, naiye, nanu naiye inarebe farinuro na ieta meba kau rarogonu mai webisu wei.  
\v 7 Eno webisuna i ainibifisu amarama webisu, ieta nui da wiate ania, nanu koiniboroini naini wiaro nauta ainibinisiba da uyamate ieta aba da mamau webisu wei.  
\v 8 Nanu sina nauawe. Danu daiyeba da uyafisu. Iba merogo i amarama woroworo nui weda weibisuba iba uyafite ieta mafisu wei.  
\v 9 Ibago wenaueawero mafi, dobeawete atawe, yaubinu wiawero yaba ma ifegari ufi wei.  
\v 10 Anama wenauefisuna mubisu, anama dobefisuna atafisu, anama yaubinita webisuna ma ifegari ufisu wei.  
\v 11 Mui amarama erio egiba wenauefisuna ananu damamama dawaba towi mafisu?  
\v 12 O kokora bakaba wenauefisuna begara mafisu? Eno da ufisu.  
\v 13 Ya siosa uwarana yanu koiniboroba kotofu maeta mataitana ana anama wenauefitaitana yanu urero ibinu Babama Danu Imumu Kotofu yaba maegou ufisu wei.   
\s1 Yesuini Biesabo  
\p
\v 14 Mui kowaro seitaninu mui siosa imumuma mui amaranu ubarero ibiba i amara sina wiawa ui. Yesuma i seitaninu mui siosa imumu we berairo aniro i amara ido sina wei. Eno uiba i ereta uwarama neno kirifu uta.  
\v 15 Moana uwarama weita, Danu nenoro Biesabo ibinuba i botai siosa imumunu bunaroma seitaninu siosa imumu we beratasu weita.  
\v 16 Moana uwarama Yesu ue efitae uteda weita, Godinu buna ereta ureroma fafiro uaro efe weita.  
\v 17 Yesuma emanu imueta iwata uite emaba wei, gaemani uwara emanu aika uraneda saragari ufitate arama ufitaita. Enanari mui su uwara eno ufitaitana saragari ufitate arama ufitaita.  
\v 18 Seitaninu uwara emanu aika urafitaitana anene ewa orofa yawofitaita? Yana meo waita, Biesaboma Naba buna maiba iba seitaninu siosa imumu we beratatane waitana ya meo waita.  
\v 19 Eno utatanena yanu uwarama seitaninu siosa imumu ananu ifuro we berataita? Ibago i uwarama ya koto ufitate ya meo waita webitaita.  
\v 20 Nono Godinu agema seitaninu siosa imumu we beratanena Godinu yawoeta yabai ma boroyarinu wei.  
\v 21 Mui warini goreini fidi bobo amarama danu su yawotasuba danu ibaiabai kobererau ibasu.  
\v 22 Nono mui buna derawere amarama fafisuna urafite i amaranu biraini uraneta ememetu nesia mubite danu ibaiabai mubite nata nata ufisu wei.  
\v 23 Anama Na durua utawa utasute Na wasai sinasu, enanari anama Naini eme fira utawa utasute me sara sanasu wei.   
\s1 I seitaninu mui imumu siosanu owere fareta  
\p
\v 24 Seitaninu mui siosa imumuma mui amara ekodasute yao orofaro imoifie dobere inarebasu. Doberebe doberebe imoitawa utasuba eno wasu, nanu ekodine suro owere animau wasu.  
\v 25-26 Seitaninu mui siosa imumuma owere ane farasute erasuna i amara yawewe aieta tutuba ari kobererau ibasuba seitaninu mui siosa imumuma anasute seitaninu moana siosa imumu nesia seweni (7) dawa ari me, ina siosawere mune woure farasu. Farasuro ido faraitate amutaitate ido ibaita. Enoba i amaranu bodere ibetana kikiratu ba me. Nono awonana seitaninu siosa imumu faiyawere fare ibaitaba danu ibetana ba mewere. Ewa ibinita uwaranu ibeta enanari ufisu, Yesuma eno wei.   
\s1 Ba kobere yaru ueta  
\p
\v 27 Yesuma eno weiro i guruguru ubita uwarabai inaibi awetama derawere wei, Anu anuama A munite ama maiba Godima anu anua ma kobererau utasu wei.  
\v 28 Weiro Yesuma wei, anama Godinu sina naue imue utaitana Godima ema ma kobererau uegou utasu wei.   
\s1 Yesunu buna ueta efitae webita  
\p
\v 29 Uwara faiyawere farebitana Yesuma yare wei, ewa awona ibinita uwarana siosawere. Ainewaure buna ereta doberaita. Jonanu buna ereta ma boroyariba yaba aika buna ereta da ma boroyafisu wei.  
\v 30 Jonama Niniwe suro buna ereta uiro eta, enanari i Ba Eme Sini Amarama buna ereta ufiro ewa ibinita uwarama efoita wei.  
\v 31 Godinu koto kowa fafiro Siba orofanu yawoeta aweta, emanu kuini, uyafite ewa uwara wawei webite do mafisu. Boderewere dana yafawereroma Soromoninu bunawere we mawetu ueta sina naufie fari. Soromonina dera amara me. Nono awonana mui amara, Dana Dera Amarawere yabai ibinuro ekodaitaba iba i kowaro i awetama yaba wawei webisu wei.  
\v 32 I koto kowaro i Ninewe su uwarama uyafitate ewa uwaraba wawei webitate do mafitaita. Jonama sina sina webiba emanu neno neno mune dubena afu sata. Nono awona mui amara, Dana derawere, Jonana kikiratu, Dawa yabai ibinuro yana ekodaitaba iba wawei webitaita.   
\s1 I ofe ubunu ario  
\p
\v 33 Anama nanefa beafisuna ina da ma feafite aiyo oeta kabesiro odifiro i fafitaita uwara i ario efitaita.  
\v 34 Yanu ditina yanu ofe ubunu ario. Yanu diti kobererauna yanu ofe ubuna ariowere. Yanu diti aramawerena yanu ofe ubuna dumu.  
\v 35-36 Ibago eregou uforo yanu ariona dumu sibisu. Yanu neno ubarero ario derawere ufisuna dumu mena yanu ofe ario ari ufisu, nanefanu ario ari, Yesuma wei. Yanu imueta dumuwerena yanu ibeta aramawere.   
\s1 Yesuma i tarawatunu tisa uwaraini i Ferosi uwaraba sina kimuwere wei  
\p
\v 37 Yesuma sina we me siniro mui Ferosi amarama wei, nanu suro arate ieta ia wei. Weiba Yesu ido ane suro amuite ieta ifie yauri.  
\v 38 I Ferosi amarama erina Yesu age urotawa uiro emanu baeta eno utawaba neno kirifu ui.  
\v 39 Yesuma dawaba wei, ya Ferosi uwarama i kafusini fereitini uroegou utaitana nono yanu neno ubarero imuetana siosararabo. Mui uwaranu ibaiabai nenoma imutaita wei.  
\v 40 Yana daido farafa beforo me! Godima emenu dei ofeini neno ubareroini nesia ubu ui aba me wei?  
\v 41 I kafusini fereitini ibinu ieta, ibaiabai me uwaraba nata nata ufoitana yanu neno roatarau ufiro merau ibifoita wei.  
\v 42 Ya Ferosi uwara, eregou uforo! Yana waiyaro ibaiabai nesiaini moana kikiratu ibaiabai taisi odaita, nono moana uwaraba kobererau utawa utaitate Godi imutawa uteda neno arama utawa utaita wei. Yanu taisi oetaini Godi imuetaini neno arama uetaini nesia uegou uawe wei.  
\v 43 Ya Ferosi uwara eregou uforo! Yana i Ju uwaranu dubu su kobere yaureta kabesi doberegou utaitate yauraita enanari yanu ununa i maketiro inaraita uwaranu ario weta. Eno utaitate yaru utaita wei.  
\v 44 Eregou uforo! Yana ewa ari! emema uri ue oeta kabesi erawa utaitate kakara utawa uteda burima amune adire anaitaro ima ema ma siosa utaita. Yana i feare ibeta uri kabesi ari. Yana eme ma siosa utaitana ema iwata me wei.  
\v 45 Yesuma eno weiro mui Mosesinu tarawatu tisa amarama wei, Tisa A eno wasuba yaba sina siosa wasu wei.  
\v 46 Weiro Yesuma wei, ya tarawatu tisa uwaraini eregou uforo! Yana kimuwere tarawatu sina eme mubitae waita. Ina urumuwereba emema munawa utaitaro yana ema durua utawa utaita. I urumuna age rorou demurairatuma mamawa utaita. Emanu torowama wouraita wei.  
\v 47 Eregou uforo! Yanu yamamamutuma i we bou ueta uwara ma uita. Yana enanari imutaitate i uri oeta kabesi ma wirotaita.  
\v 48 Yanu yamamamutuma Godinu we bou ueta uwara ma uitana ina kobererau yana waitate emanu uri oeta kabesiro werei werei ue odaita Yesuma wei.  
\v 49 Weite nono wei, ibago Godima kobererau imuteda yaba wei, Nanu we bou ueta uwaraini Nanu afosoro uwaraini siaia umaro anibitaro moana ma uifitate moana ma siosa ufitaita Godima eno weiya wei.  
\v 50 Yesuma i sina weite wei, Godinu we bou ueta uwara ma uita. I botai kowaroma i uieta nesia ewa ibinita uwaranu kerere. Iba Godima ya koto ufisu wei.  
\v 51 Eiboronu ma uieta kowaroma are Sakaraiya, i amara i fuyo oeta kabesini dera dubu su abanaro ma uita, danu ma uieta kowaro, i uwara nesiaba Godima ya fanisi mafisu wei.  
\v 52 Ya Mosesinu tarawatu tisa uwara eregou uforo! Yana Godinu kobere imueta emebai ma fearaita. Godinu kobere imuetana su ari. Yana i ki ma fearaitate ubarero amutawa utaitate emenu amueta daba garari utaita wei.  
\v 53 Yesuma iroma anebina i Mosesinu tarawatu tisa uwaraini Ferosi uwaraini ibo derawere uteda wenauereta faiyawere weitate sina siosa weita.  
\v 54 Emanu ununa Yesunu sina mubitate koto ufitae iba sina derawere weita.   
\c 12  
\s1 I meo meo weta uwara eregou uforo  
\p
\v 1 Uwara faiya faiyawere guruguru uteda deiro deiro uteda inataro Yesuma Danu iwata ueta uwara emanu aika eno we kakara ui, i Ferosi uwaranu wawareta ira yisiti eforo wei. Ina meo ueta ema sina waitate aika utaita wei.  
\v 2 Emanu obari ueta nesia ma uregari ufite i feareta ememetu nesia ma borobafisu wei.  
\v 3 Ibago yanu dumuro waita sina kowaro naufitaita. Ane sina su ubarero gimumutaroma weboitana su abanaro derawere webitaita wei.   
\s1 Godiba torowa iya uyafe  
\p
\v 4 Masigu, Nanu sina wemaro nauawe. I ma uieta uwaraba iya da uyawe. I uwarama yanu ofe ma uifitate nono yanu imumu da ma uifitaita.  
\v 5 Anaba iya uyafoita? We kakara umaro nauegou uawe. Anama yanu ofe ma uifite nono yanu imumu uitawa ina kabesiro sabisuba Godi Dawaba torowa iya uyawe wei.  
\v 6 Emema gui gasirararatu fai (5) oiya uteda toea sadei sanaitaba Godima i gasiraratu imutasu.  
\v 7 Godima yanu fouma iji nesia yawitasu iba iya da uyawe. Godima i gasirararatu imutasute nono yabana derawere imuegou utasu wei.   
\s1 Emebai Yesu Kerisonu ifu we ma derawere ueta aba we ma kikiratu ueta sina  
\p
\v 8 Yesuma wei, anama emebai Yesu imutatane webisuna enanari Na i Ba Eme Sire Amarama Godinu anerubai i amara dawa Na iwata utatane wemau.  
\v 9 Anama emebai Yesu na iwata me webisuna enanari Godinu anerubai i amara dawa Na iwata me wemau wei.  
\v 10 Anama i Ba Eme Sini Amaraba sina siosa webisuna Godima danu ba me ueta mubite imutawa ufisu. Nono anama Godinu Imumu Kotofuba ma kikiratu ufisuna danu ba me ueta da mubiro i amarabai daido ibifisu wei.  
\v 11-12 Mui kowaro ya budari ufitate Ju uwaranu dubu suro woure odifitaita. Dera Ju yawoeta uwaraini gaemani dera yawoeta uwarabai odifitaitana iya da uyawete yanu moko sina ane weboita da imuegou uforo Godinu Imumu Kotofuma i kowaro yaba Danu imueta mafiro sina enanari weboita Yesuma wei.   
\s1 I beforo buna me gugua gubari bobo amaraba kasei sina  
\p
\v 13 I guruguru ubita uwarabai mui amarama Yesuba wei, Tisa, nanu kakaba wiaro kakama babanu ibaiabai nata ufite naba mui mafi wei.  
\v 14 Weiro Yesuma wei, anama Na anu koto yawoeta amara odi? Anama Na anu ibaiabai nata nata ueta amara odi?  
\v 15 Efaro! Mui amaranu ibaiabaiba diti urowere ma owere da uforo! Yanu ibetana ibaiabai torowa me. Ana amarama danu unu ibaiabai muneta torowa iba danu ibeta ba me wei.  
\v 16 Eno weite kasei sinaroma eno wei, mui ibaiabai derawere, kobere nasini bobo amara yaubi.  
\v 17-19 I amarama yaubeda we imui, nanu waiya ieta faiyawerero mui su meba aboro odimau we imuite wei, eno umau, nanu ietata oeta su nesia ma jugari umate reka derawere ietata oeta su ubu umate iro nanu feameini nanu ibaiabai nesia odimate nanu torowaba wemau, na ane imumane nabai ibaiabai faiya faiyawere ibinuba ietaini ogoini woroworo iteimate yaru uteimau eno wemau weiya wei.  
\v 20 Dawa eno weiro Godima dawaba wei, gogore amara! Awona dumuro a uifasuba anama i ibaiabai mubisu Godima weiya wei.  
\v 21 Yesuma i ikiki weite wei, enanari anama ibaiabai derawere mune bomu ue munebe munebe, enoma enoma utasute Godinu iborona urero ibaiabai ari me, dana i gogore amara ari sinasu wei.   
\s1 Godibai yanu naueta odiawe  
\p
\v 22 Yesuma Danu iwata ueta uwaraba wei, yanu ibetaini ofeba da imuforo! Yanu wiroeta ietabairoma da wirofeisi. Yanu ofena i baruetama da ma wirofisu.  
\v 23 Yanu ibetana ieta torowa me. Yanu ofena barueta torowa me.  
\v 24 I oaoa gasira imue eawe. I gasirama ana tai waitawa ana tai fira utawa, emabai ietata oeta su mero nono Godima emaba ieta matasu wei. Godima i gasira imutasute nono yabana derawere imuegou utasu wei.  
\v 25 Aneba ainewaure yanu ibetaba imutaita? Anama imutebe imutebe danu kowa ma yafa ufisu wei?  
\v 26 Ido i kikiratu gaukara da ufoitaba aneba dera gaukaraba imutaita wei?  
\v 27 I sigina imue eawe. I sigina emanu torowa gaukara utawa, emanu torowa wadia yurawa utaita wei. Soromonima danu ibeta araetaro wadia baruiro danu wadiana ba mero i siginanu fomuetana kobererau wei.  
\v 28 Godima i koe awona ma waratasute werei werei utasuro nono waidumuna i koe demurai inama yarasu. Godima eno utasuna ya kikiratu naueta uwaraini kowa aboabo yaba wadia yure odifisu wei.  
\v 29 Yanu ietaini ogoini da doberegou ufote da imuforo wei.  
\v 30 I orofa atata uwara nesia ina doberegou utaita. Yanu urero Baba Dawa iwata ina yanu ibeta.  
\v 31 I da doberegou ufote nono Godinu kobere yawoeta doberegou uforo yanu ietaini ane ane nesia mafisu wei.   
\s1 Urero ibinita guguaini gubari  
\p
\v 32 Ya otowa mamoenanatu ari uwara, iya da uyawe wei. Godima Danu yawoeta orofa yaba mafie weite iba ya yawoteda yaru utasu wei.  
\v 33 Yanu ibaiabai oiya ue mawete i ba me ibeta uwaraba oi moana mawe wei. Eno ufoitana yanu ibaiabai urero ibene ibene ibifisu. Iro waira uwarana me. Iro jirikoma ibaiabai ma arama da ufisu.  
\v 34 Yanu ibaiabai aboro ibeibisuna yanu nenona iro ibeibisu wei.   
\s1 Nauta ainawa gaukara ueta uwara  
\p
\v 35-36 Yanu wadiaini nanefaini mune bou uawe. Wadia baruawete nanefa beawete yanu Dera Wari Amara yawoawe. Yanu Dera Waria Amarama aweta muneta ogaroroma fafite yaubinita webisuna kasimu sau ma ifegari ufoita wei.  
\v 37 I dera amara ido fafite danu gaukara uwara nauta ainawa me yaubifitaro efisuna ema we ma kobererau ufisu wei. Yaba ba sina wemaro nauawe. Eno efisuna danu gaukara uwara ma yaufite gaukara wadia ma baruteda danu torowama emaba ieta nabero mafisu wei.  
\v 38 Dumu abanaro o waibai fafite ema eno efite we ma kobererau ufisu wei.  
\v 39 Imue eawe! I su ubi amarama i waira ueta amaranu dawabai fareta kowa iwata ufirona danu su yawofiro su ma siosa da ufie wei.  
\v 40 Enanari yawoegou uforo! I Ba Eme Sini Amara kiwuma fafisuba, Yesuma eno wei.   
\s1 I dubunei ture ueta gaukara amaraini i kasiriwere gaukara amara  
\p
\v 41 Fitama wei, Dera Waria Amara, i kasei sina yanu aikaba wasu, aba i uwara nesiaba wasu wei?  
\v 42 Weiro Yesuma wei, i kobere uetaini imueta uwaraba watane. I dera yawoeta amarama i kobere ueta imueta derawere amara eme yawoeta amara odifiro i su uwara yawofite emanu ieta mafisu.  
\v 43 I dera yawoeta amara ido fafisuna danu gaukara amara eno ufiro efite we ma kobererau ufisu wei.  
\v 44-46 I amara danu ibaiabai nesia yawofie odifisu wei. Nono i gaukara amarama eno we imufisu, nanu dera amara sau da fafisu we imufite i su gaukara arumaini amaraini isuma ureibite ieta derawere ifite siosa ogo iteda beforo arama ufisuna danu dera amarama kiwuma ido fafite i amara fanisi mafite i nautawa uwarabai odifisu wei.  
\v 47 Mui gaukara amarana danu dera amaranu imueta iwata ufite i wene sina enanari da ufisuna i dera amarama i amara isuma derawere ufisu wei.  
\v 48 Nono mui gaukara amarana danu dera amaranu imueta iwata meba isuma kikiratu ufisu wei. Anama derawere mafite nono derawere moko ma, webisu. Anama derawere mubisuna derawere mafisu wei.   
\s1 Yesuma eme yanae ture tu mamamama ui  
\p
\v 49 Yesuma wei, ewa ina nasiniro moamane iba farea wei. Weite wei, iba farero ewa inama ido yare sinasu wei.  
\v 50 Weite Danu uietaba wei, mui kimu babataito ueta ari mumauba iba awonana neno siosa derawere utatanena ina me sibiro duburo kobererau ibimau wei.  
\v 51 Ane we imutaita? Na ya orofa atata uwaraba merau ibeta mamane farea eno we imutaita? Enoba farawa uete mui su uwara, mui su uwara ma saragari umane farea wei.  
\v 52 Awonaroma mui suro uwara fai (5) ibifitaitana ma saragari ue aika maika ufitate i uwara rarogonuba wasai ufitaita. Nono i uwara rarogonuma aika yaubeda i uwara sadeiba wasai ufitaita wei.  
\v 53 Mui suro damamaini amaraini saragari ufisite aika maika ufisisi. Danuaini aruma saragari ufisite aika maika ufisisi. Datamaini dainau saragari ufisite aika maika ufisisi wei.   
\s1 I fafisu kowa iwata ueta  
\p
\v 54 Yesuma i guruguru ubita uwaraba wei, kowa itareta afu goso eraitate waita, awona obi mafisu waitaro enanari utasu.  
\v 55 Ufuniro oyauma farasuna ido kowa inarasu eno waitaro enanari utasu wei.  
\v 56 Ya meoma bobo uwara! I ureini nasini ibaiabai eregou uteda iwata utaita. Nono Godinu buna ueta eregou utawa uteda iwawa utaita wei.   
\s1 Aba siosawere ufie uteibisu amaraini sina ma rorowarau uawe  
\p
\v 57 Aneba i ba ueta iwawa utaitate yanu aika ba me ueta ma rorowarau utawa utaita?  
\v 58 Mui amarama ya koto uwarabai wawei webie woure anibisuna dawaba sau naiye wiawe. Mena i koto dera amarama ya forisimaninu age duro odifiro i forisimanima ya diburaro odifisu wei.  
\v 59 Yaba wemaro nauawe, diburaro odifisuna iro ibeda i faini nesia uforo ya ido ekodifiro wawaro amufoita wei.   
\c 13  
\s1 Yanu ueta siosabairoma oweawe, mena uifoita  
\p
\v 1 I kowaro moana uwarama i Gareri uwaranu fuyo odebita sina weita, i Gareri uwarama Jerusaremu suro Godibai emanu fuyo odebitana Faeratima ema ma uitebi eno weita.  
\v 2 Eno weitaro Yesuma wei, imue eawe, moana Gareri uwarana siosawere uwaraba iba uita, nono moana Gareri uwarana siosawere meba iba uitawa, eno we imutaita?  
\v 3 Ina ba me. Ya nesia yanu neno neno ueta dubena afu da saboitana me sara uifote i ina yareta kabesiro aniboita wei.  
\v 4 I Sairomu uita uwaranu ikiki nauta? Uwara eitini (18) etu yafa gebiro su ubu utaro i su jugari uite i uwara uriro uita. I uita uwarana siosawere uwara nono i moana Jerusaremu suro ibeta uwarana siosa me we imutaita?  
\v 5 Ina ba me watane. Ya nesia yanu neno neno ueta dubena afu da saboitana me sara uifote ina yareta kabesiro aniboita wei.   
\s1 I tai uwanawa boruba ananu kasei sina  
\p
\v 6 Yesuma ewa kasei sina emaba eno wei, mui amarama boruba ana danu waiyaro waite ekodite ani. Ane ibebe duburo boruba tai mubie fare erina boruba tai uwanawa me.  
\v 7 Meba danu waiya yawotebi amaraba wei, oya rarogonu na fare ane, ane fare uteda eratanena boruba tai uwanawa me ibinuba kowama uma wei. Weite wei, aneba nanu waiyaro me sara inaibifisu wei.  
\v 8 Eno weiro i waiya yawotebi amarama wei, dera amara, kodia, mui ragani ibifiro ina yawoegou umate danu inibai kawaratu daumate borumakau wisi mune are odimau.  
\v 9 Eno umaro tai uwafisuna ibifisu, mena umafasu wei.   
\s1 Yesu mui rorowarau anawa daubi ue anebi aweta sabate kowaro ma wiroi  
\p
\v 10 Mui sabate kowaro Yesuma Ju uwaranu dubu suro we mawetu ui.  
\v 11 We mawetu uite erina seitaninu mui siosa imumuma mui aweta ma arama uiro ragani eitini (18) rorowarau anawa daubite yaubiro Yesuma eri.  
\v 12-13 I aweta erite weiro Dawabai fari. Dawabai fariro Yesuma wei, aweta anu oferi woureta me sininuro ana wirosinu weda i aweta agema buriba rorowarau yare inarite Godinu ifu we ma derawere ui.  
\v 14 Eno uiba i Ju dubu su yawoeta amara ibo uteda wei, gaukara ueta kowana sikisi ibinu rairo aneba sabate kowaro ewa aweta ma wirotasu wei?  
\v 15 Eno weiro Yesuma dawaba wei, ya meo uwara! Yana sabate kowaro gaukara utaita. Yanu borumakauini donikini ieta mataita.  
\v 16 Eno utaitaba ewa aweta Eibaramunu sisia aruma, seitanima dawa oya eitini (18) ma arama uiro ibasu iba dawa sabate kowaro wirofisu aba me wei?  
\v 17 Eno weiro Dawaba wasai ueta uwarama maru utaro moana uwara Yesunu buna uetaba yaru uta.   
\s1 I masita ana taiba kasei sina  
\p
\v 18 Yesuma Godinu kobere yawotasu sina we mawetu uteda wei, Godinu yawotasu ane ari? Ane emate ina i ari wemau?  
\v 19 Godinu yawoetana kikiratu masita ana tai ari. I tai mui amarama munite danu waiyaro wairo waratebe waratebe ana derawere waraegou ui. Derawere uiro gasirama emanu mowa i ananu iwararo ubu utebita wei.   
\s1 I wawareta ira yisitiba kasei sina  
\p
\v 20 Eno weite nono wei, Godinu yawotasu ane ari?  
\v 21 Ina ewa ari, mui awetama wawareta ira yisitiratu munite i dera faraua ubarero odiro yisitima i faraua nesia ma foai wei.   
\s1 I amoworatu bebeto  
\p
\v 22 Yesuma Jerusaremu suro ani. Anedana dera natofo suini kiki suro we mawetu utebi.  
\v 23-24 Eno utebina mui amarama wei, Dera Amara, uwara ba torowa wirofitaita wei? Weiro Yesuma emaba wei, Godinu kiki bebetoro anegou uawete eawe wei. Awona uwara faiyawere i bebeto doberaitate anawa utaita wei.  
\v 25 I su ubi amarama uyafite kasimu garari ufiro ya wawaro inaibeda yaubinu weboita, Dera Waria Amara ma ifegari uaro amufe weboro webisu, ya uwara Na iwata me webisu.  
\v 26 Eno webiro weboita, abai ietaini ogoini itebisiro yanu suro we mawetu utebi weboita.  
\v 27 Eno weboro webisu, ya Na iwata me watane, ya sara siosa utaita uwara Nabairoma aniawe webisu wei.  
\v 28 Eibaramuini Aisikini Jeikofuini Godinu we bou ueta uwaraini Godinu yawoeta orofaro ibifitaro eforo yanu aneta daba garari ufisuba da anibote nio bijari uteda i weboita wei.  
\v 29 Eme faiyawere kowa amuetaini kowa itaretaini ewa ufuniroini manamaro aboro aboro fafitate Godinu yawoeta orofa emanu kabesiro yaufitaita wei.  
\v 30 Imue eawe. Moana otowaratu uwarama iro dera uwara sibitaita. Nono moana derawere uwarama iro otowaratu uwara sibitaita wei.   
\s1 Yesunu Jerusaremu suba neno arama ueta  
\p
\v 31 I kowaro moana Ferosi uwarama fatate Yesuba weita, Erodima A ma uifie utasua ewadoroma ania weita.  
\v 32 Weitaro Yesuma emaba wei, aniawete etei orowa kua ari amaraba eno wiawe, ea, Nana seitaninu siosa imumu we beratanete eme ma wirotatane. Awonaini waidumuini etadoini eno umate Nanu gaukara ue me simau.  
\v 33 Godinu we bou ueta uwarama Jerusaremu suro torowa uitebaitaba Naini we bou ueta amaraba awonaini waidumuini etadoini Nanu gaukara uteimau, eno ane wiawe wei.  
\v 34 Eno weite wei, O Jerusaremu su uwara, Jerusaremu su uwara, yana Godinu we bou ueta uwara ma uitaitate Godinu siaia utasu uwara gebiroma uraita. Kokora awetama danu nanatu fakinama obari utasu, enanari Nanu ununa ya Jerusaremu su uwara yawotatanero ya unutawa Nanu yawoeta wei.  
\v 35 Eawe! Godima yanu Jerusaremu su ekodasuba Na da efitate eno webitaita, Godinu ifuro farinu amara Dawa kobererau webitaitana nono Na duburo efitaita wei.   
\c 14  
\s1 Yesu mui ofe bobo amara sabate kowaro ma wiroi  
\p
\v 1-2 Mui sabate kowaro Yesuma mui Ferosi dera yawoeta amaranu suro ieta ifie ani. Ane farina mui buri age wawari amara ido yaubiba i uwarama Yesu i amara sabate kowaro ma wirofisu aba me iba eregou uta.  
\v 3 Yesuma i Mosesinu tarawatu tisa uwaraini Ferosi uwaraba wei, Mosesinu tarawatuma ane wasu? Sabate kowaro ma wiroetana kobererau aba me? Ane wasu wei?  
\v 4 Weiro i uwarama sina moko wiawa, weroro mu uta. Mu utaro Yesuma i amara mune ma wiroite siaia uiro ani.  
\v 5 Yesuma emaba wei, yanu egi ane ane sabate kowaro sakai uri yafa derawere ubarero itafitaro ma youforo amufitaita aba me wei?  
\v 6 Eno weiro Dawaba moko sina wiawa uta.   
\s1 Bana wetaini eme emanu torowa ma kikiratu ueta  
\p
\v 7-9 I ieta itebita uwarama i botai kabesi mubitae fatana Yesuma ema erite emaba wei, mui amarama ya aweta muneta ogaro are iawe webisuna i botai kabesiba da dobeforo utebe mui dera amarawere faosoro yanu kabesi i amaraba maotote maru siotote me sara kabesiro yauotoa wei.  
\v 10 Mui amaranu ogaro ifoe aniboitana emina ubiro yauforo ogaro ubi amarama fafite webisu, naiye, etei kobere kabesiro yaua, webisuna ieta ifitae fafitaita uwarama ya we ma derawere ufitaita wei.  
\v 11 Anama danu torowa ma derawere ufisuna Godima dawa ma kikiratu ufisu. Nono anama danu torowa ma otowaratu ufisuna Godima dawa ma derawere ufisu wei.  
\v 12 Yesuma i ieta ubi amaraba wei, ofua o ogaro ufasuna anu su uwaraini ibaiabai derawere uwaraini torowa waya da youforo emana enanari moko ufitaita wei.  
\v 13 Ogaro ufasuna ibaiabai me uwaraini buri age aramawere uwaraini buri bebeu uwaraini diti basugari uwaraini waya youa wei.  
\v 14 Eno ufasuna i uwarama aba moko utawa ufitaro Godima a ma kobererau ufite i naueta uwaranu ma uyareta kowaro Godima a moko mafisu wei.   
\s1 I dera ogaroba kasei sina  
\p
\v 15 Yesuma eno weiro mui ieta ifie yauri amarama wei, anama ieta Godinu orofaro ifisuna Godima dawa ma kobererau ufisu wei.  
\v 16 Weiro Yesuma mui kasei sina dawaba wei, mui kowaro mui amarama ogaro derawere ufie uteda uwara faiyawere waya youri.  
\v 17 I ogoro ieta kowa farina i ogaro ubi amarama danu gaukara amara siaia ui. I uwara are ieta ifitae siaia uiro ani.  
\v 18 I amara waya anina i uwara nesia ema unutawa danu ieta. Ieta unutawaba mui amarama eno wei, na nasini oiya uneba iro animate ere bou umauba iba ogaro da animau wei.  
\v 19 Mui amarama wei, na borumakau nesia teni (10) oiya uneba animate ema ere bou umauba iba ogaro da animau wei.  
\v 20 Mui amarama wei, na aweta reka muneba ogaro da animau wei.  
\v 21 I uwara enoma enoma weitaba i amara ekodite danu dera amarabai anite i sina nesia dawaba wei. Weiro i su ubi amarama ibo uite danu gaukara amaraba wei, natofo su demurai su suini sau aniate ibaiabai me uwaraini buri age arama uwaraini diti basugari uwaraini buri bebeu uwaraini woure ewaro ara wei.  
\v 22 Weiro i amara ido anite enanari uite danu dera amarabai farite wei, dera amara, anu wenu sina enanari unero nono kabesi faiyawere ibinu wei.  
\v 23 Weiro i ogaro ubi amarama wei, oiroini waiyaro aniate i uwaranu agero muate woure ewaro araro nanu su wate fafi wei.  
\v 24 I botai wenero arawa uita uwara nanu ogaro da are ifitae watane wei.   
\s1 Imuegou ue duburo Yesunu buribi aneibe  
\p
\v 25-26 Yesu ido dabaro ani. Dawa anina uwara faiyawereini uruama Dawaini anebitaro Yesu Dana emaba wei, anama Nanu iwata ueta amara sibie ufite danu danua damamaini awetaini koiniboroini datae dabueini danu unuini emaba danu dubena da sabisuna dawa Nanu iwata ueta amara da sibisu wei.  
\v 27 Anama danu korosi ari da woufisuna dawa Nanu iwata ueta amara da sibisu wei.  
\v 28-30 Weite wei, yabairoma anama dera yafa su ubu ufie utedana botai yaurasute danu oi yawitasu. Danu oi idoba i su ubu ueta gaukara ue me sibisu aba me, yaurasute imuegou utasu. Nono danu oi arotorowa mena su tutubu sabiro oi me sibisuba ekodifiro emema i su efitate dawa irue webitaita wei.  
\v 31 Imue eawe! Mui dera yawoeta kini amarama mui kini amaraini ane urafie uteda botai yaufite danu meremere uwara yawifisu. Danu meremere uwara faiya me teni tausani (10,000) torowa nono i mui kini amaranu meremere uwarana faiya faiyawere tueniti tausaniba (20,000) iba imuegou ufisu.  
\v 32 Ina ido aba me eno imufisu. Arotorowa mena danu fo weta amara siaia ufite webisu, naiye aini naini uruama wesa ue matafutu webisu wei.  
\v 33 Enanari ana anama yanu ane ane da ekodifoitana Nanu iwata ueta uwara da siboita wei.   
\s1 I buna me soru  
\p
\v 34 Soruna kobererau. Sorunu imona me sibiro danu imona nono anene ibifisu?  
\v 35 Imona meba i soruna siosawere ina ba meba emema mune sanaita. Enanari ya kobererau da uteiboitana yana imona me soru ari. Anama ya ome bobona ewa sina nauegou uforo wei.   
\c 15  
\s1 I feari mamoeba kasei sina  
\p
\v 1 Yesuma we mawetu utebina takesi muneta uwaraini siosa ueta uwaraini Danu sina naufitae ido fata.  
\v 2 I Ferosi uwaraini tarawatu tisa uwaraini gimumutaroma weita, ewa amarama siosa uwaraini uruama yaubeda ieta itasu weita.  
\v 3-4 Yesuma emaba kasei sinaroma wei, yabai mui amarama mamoe wani aderedi (100) boboro nono mamoe demurairatu feafisuna mamoe nainiti naini (99) eme ibawa orofaro ekodifite i mamoe demurai doberebe doberebe atafisu. Eno ufisu aba me?  
\v 5 Aiwia eno ufisu. Dawa doberebe doberebe atafite woure eriro odeda yaru ue anibisu.  
\v 6 Suro ane fafite webiro danu su uwaraini domayamutuini fafitaro webisu, nanu fearinu mamoe ataneba naini yaru uawe webisu.  
\v 7 Enanari amara demurai danu siosa ueta dubena afu sabisuna i urero ibinita uwarama yaru derawere ufitate i nainiti naini (99) uwaraba yaru kikiratu ufitaita wei.   
\s1 I feari oi  
\p
\v 8 Yesuma eno weite mui kasei sina nono eno wei, aweta demurai danu teni (10) siriwa oi boboro nono demurai feafisuna nanefa beafite yawewe aifite doberegou utebe utebe atafisu. Eno ufisu aba me wei?  
\v 9 Aiwia eno ufite webiro danu daikemutuini su su uwaraini fafitaro webisu, nanu fearinu siriwa oi ataneba naini yaru uawe webisu.  
\v 10 Enanari mui amarama danu siosa ueta dubena afu sabisuna Godinu aneruma yaru ufitaita wei.   
\s1 Mui amaranu feari amaraba kasei sina  
\p  
\p
\v 11 Yesuma nono mui kasei sina eno wei, mui amarama amara sadei yanae muni.  
\v 12 I dubu yanae muni amarama wei, baba, anu ibaiabai nesia bebeate nanu mairo muma wei. Eno weiba danu damama enanari ui.  
\v 13 Mui kowaro dubu amara danu ibaiabai nesia fira uteda moana uwarabai oiya uite oi munite mui orofaro ani. Daba yafawere anite i aika orofaro me sara utebe oi nesia sane me sini.  
\v 14 Oi ido sane me siniro i orofaro sinai derawere fariro i amara ido osi woure.  
\v 15 Enoba uyarite mui amarabai gaukara ufie ani. Aniro i amarama wei, aniate nanu boro yawotebea wei. Weiro ido ani.  
\v 16 Dawa osi derawere edebari uteda boronu rau ifie imuiro matawa uta.  
\v 17 I amarama yaubeda imuegou utebe imuite we imui, nanu babanu gaukara uwara faiyawere iro ibeda ieta derawere itaitaro ieta moanaini ibinuro na sinaima uine wei.  
\v 18 Eno we imuite wei, awona uyamate nanu bababai animate eno wemau, baba, Godini aba siosawere utebitara.  
\v 19 Nanu ueta sineta siosawereba anu gaukara amara na odia wemau eno we imuiya wei.  
\v 20 Eno we imuite uyarite danu damamabai ani. I amara ido arebiro danu damama danu amara baworo me etararowere dabaro erite neno arama uteda durami ue mane danu amara yabaite koku ui.  
\v 21 Eno uiro i amarama wei, baba, Godini aba siosawere utebitara. Nanu ueta sineta siosawereba awonana na anu amara da wia wei.  
\v 22-24 Weiro damamama wei, nanu amara uieta ari usinute feare ibebe awona farinuba kobere wadia woure are yure odiawete age bubuke odiawete buri barueta odiawete reka keweawere borumakau uawete uda uawere ifete yaura ufe weiro enanari uta.  
\v 25 I botai amarama waiyaro gaukara utebe ekodite farina suro buma ureda yaura urebitaro naui.  
\v 26 Nauite mui gaukara amaraba wei, aneba eno utaita wei?  
\v 27 Weiro gaukara amarama wei, anu abue awona idowere farinuba amamama i reka keweawere borumakau urinuro itaisi wei.  
\v 28 Weiro i amara ibo derawere uite suro anawa ui. Dawa i suro anawa uiba damamama wawaro dawabai ido are farite ara nui wei.  
\v 29 Weiro botai amarama wei, oya faiyawere anu gaukara utebe anu sina woroworo munebitarana reka borumakau naba eno ure matawa utasuro nanu naiyemutuini naini yaru utawa utaisi.  
\v 30 Anu amarama anu oi sasae arumamiba me sara sane me sinite owere farinuro kobere reka borumakau urinute yaru utasu wei.  
\v 31 Weiro damamama wei, nanu amara, aini naini uruama ibinitu. Nanu ibaiabai ane anena anu.  
\v 32 Anu abue uieta ari usinute feare ibebe farinuro ataneba iba yaru utaisi wei, Yesuma kasei sina eno wei.   
\c 16  
\s1 I gaukara ma siosa ui yawoeta amaraba kasei sina  
\p
\v 1 Yesuma Danu iwata ueta uwaraba mui ikiki eno wei, mui amarama danu dera amaranu ibaiabaini oini yawotebi. Yawotebina moana uwarama dera amarabai fatate weita, anu yawotasu amarama anu ibaiabaini oini me sara yawotasu weita.  
\v 2 Weitaba i dera amarama weiro danu yawoeta amara ido dawabai are fariro wei, i sina anene nautatane? Ina ba aba me? Anu gaukara me sininuba aniate anu kabaru buka woure mai, weiro ani.  
\v 3 Anite we imui, anene umau? Na buna meba reiba gaukara da umau. Na unutawa nui weta.  
\v 4 Na imutatane, eno umate nanu gaukara ekodimaro nanu naiyemutuma na yawofitaita we imui.  
\v 5 Idoroma danu dera amaranu moko mafitaita uwara demui demuiba eno wei. I botai amaraba eno wei, nanu dera amara ane moko mafasu wei?  
\v 6 Weina wani aderedi (100) kerosini duromu ari wei. Weiro yawoeta amarama wei, anu feifa mune anu moko fifiti (50) owawa ue odia wei.  
\v 7 Eno weite mui amaraba wei, nanu dera amaraba ane moko mafasu wei? Weina raisi begi ari wani aderedi (100) mamau wei. Weiro yawoeta amarama wei, anu feifa sau mune anu moko eiti (80) owawa ue odia wei.  
\v 8 Eno uiba danu dera amarama we imui, i gagau amarana beforo bunawere we imui. I orofa atata nautawa uwarama iwata derawere uteda Godinu sina naueta uwara iwata kikiratuba ema serigari utaita.  
\v 9 Nanu sina wemane utatane Yesuma wei, ewa amaranu ueta ari da uawete yanu ewa orofa atata oi kobererau yawoawete uwara faiyawere durua uawero yanu naiyemutu sibita. Duburo oi me sibiro uifoitana Godima ya me ibene ibene ibeta suro durua ufisu wei.  
\v 10 Anama ibaiabai kikiratuba sara siosa utawa yawoegou utasuna ibaiabai derawere dawaba matasuro yawoegou utasu wei.  
\v 11 Ewa orofa atata oi yawoegou utawa utaitana anama yaba i urero ba ibaiabai mafiro yawofoita wei?  
\v 12 Mui amaranu ibaiabai yawoegou utawa utaitana anama yanu aikanu ibaiabai mafisu wei?  
\v 13 Mui gaukara amarama dera amara sadeinu gaukara da ufisu. Eno ue efisuna dera amara demuraiba ibo ufiro danu neno mui dera amarabai ibifisu. I dera amara demurainu gaukara uegou ufite i mui amaranu gaukara me sara ufisu wei. Enoba Godinu gaukaraini oi gaukaraini arotorowa da ufoita wei.   
\s1 Tarawatunu sinaini Godinu yawotasu orofa  
\p
\v 14 I Ferosi uwaranu ununa oi. I uwarama Yesunu sina nauteda Yesuba sina siosa weita.  
\v 15 Yesuma emaba wei, ya emebai yanu torowa ma kobererau utaitaro nono Godima yanu neno ubarero imueta iwata utasu. Eme emanu ununa yanu ma kobererau uetaro nono Godi Dawa erasute unutawa i ueta wei.  
\v 16 Bodereroma Joninu kowaro emema Mosesinu tarawatu sinaini i we bou ueta uwaranu sina webita. Joninu kowaroma Godinu kobere yawotasu sina webaisi. Eno webaisiba eme faiyawere Godinu yawotasu orofaro bunawere anaita.  
\v 17 Ureini nasinini me sibisuna ina kimu me. Nono Godinu tarawatu kikiratuna da me sibisu, dana kimuwere, Yesuma eno wei.  
\v 18 Anama danu aweta ekodasute mui aweta munasuna dita yagera farasu wei. Anama mui awera ekodi aweta munasuna dita yagera farasu wei.   
\s1 I gugua gubari bobo amaraini Rasarosi  
\p
\v 19 Yesuma wei, mui ibaiabai derawere wadia kobererau bobo amara ido ibi. I amara dawa ainewaure ieta kobererau iteda kobererau ibebi.  
\v 20-21 I amara ainewaure eno utebina mui ba me amaimawere amarama danu bebetobai ainibeda ibaiabai derawere amaranu ieta fufuno ifie utebi. Eno uteda ainibiro kuasirima fare danu amaima badu utebita.  
\v 22 Mui kowaro i aramawere ibeta amara uiro Godinu aneruma dawa woure Eibaramubai ane oita. Nono i ibaiabai derawere amaraini uiro mune uri uta.  
\v 23-24 I ibaiabai derawere bobo amaranu imumuma ina yarebi kabesiro tarani. I amarama ina kabesiro oferi derawere woureda diti foraina Eibaramuini Rasarosini uruama yaubisiro erite derawere wei, baba Eibaramu, naba neno arama uate Rasarosi siaia uaro danu age rorou ogoro ma inufite nanu meanaro odifiro meana toba ufi wei. Ewa inaro oferi derawere wouratane wei.  
\v 25 Weiro Eibaramuma wei, nanu amara, anu bodere ibebi imue ea. I kowaro ana kobere ibaiabai faiyawere munebiro Rasarosina siosawere ibebi wei. Awonana Rasarosi merau ibinuro ana iro oferi wourasu wei.  
\v 26 Nono yanu orofa anu orofa abanaro kawa derawere ibinuba ewadoroma abai anene anibitaita? Nono iroma yabairo da afitaita wei.  
\v 27-28 Weiro i amarama wei, baba Eibaramu, Rasarosi ewaro nabai da afisuna nanu babanu suro siaia uaro anibite nanu kaka nabue nesia fai (5) we kakara ufiro ewa oferi woureta kabesiro da afitaita wei.  
\v 29 Weiro Eibaramuma wei, Mosesinu tarawatuini Godinu we bou ueta uwaranu buka emabai ibinuba i buka yawifitaita wei.  
\v 30 Weina i amarama wei, me, baba Eibaramu, i buka da yawifitaitaba nono mui amarama uietaroma emabai anibite we kakara ufiro dawa naufitate emanu ba me ueta mune aika odifitaita wei.  
\v 31 Weiro Eibaramuma wei, Mosesinu tarawatu bukaini Godinu we bou ueta uwaranu bukaini da yawifitaitana mui amara uietaroma uyafite emabai anibiro dawa da naufitaita wei.   
\c 17  
\s1 Ueta siosa  
\p
\v 1 Yesuma Danu iwata ueta uwaraba wei, ba me ue ereta ido fafisu. Nono mui amarama mui amara ba me ue efisuna Godima dawa fanisi mafisu wei.  
\v 2 Mui amarama Nanu sina naueta amakanubai ba me maosoro siosawere uosoba i ba me maeta amaranu nodoro gebiro derawere doifitate enea ogoro sabitaro imuifirona ina kobererau yaba we kakara utatane wei.  
\v 3 Yanu yatae yabuema siosawere utasuna dawa we kakara uawe. Eno uforo danu ba me ueta mune aika odifisuna danu ba me ueta imutawa uawe wei.  
\v 4 Dawa mui kowaro yaba ueta siosa seweni (7) siosawere ufite nono owefite neno arama sina webisuna danu ba me ueta mune imutawa utebeawe wei.   
\s1 Naueta  
\p
\v 5 I afosoro uwarama Yesuba weita, Dera Amara yanu naueta ma derawere ua weita.  
\v 6 Weitaro Yesuma emaba wei, yanu nauetana mui kikiratu masita ana tai arina etei sikamai anaba uyate enea ubarero ita weboitana yanu weboita enanari ufisu wei.   
\s1 Gaukara amaranu ueta  
\p
\v 7-8 Yesuma yaba watane wei, mui gaukara amarama kowaro waiyaro gaukara utebe dumu sibiro suro fafisu. Fafiro yana weboita, amara are yauate ieta ia weboita? Enona da weboita. Eno da webote i gaukara amaraba weboita, nanu ieta ue bou uate anu torowa werei uegou uate na yawotebearo ietaini ogoini ie me simaro ido yauate ieta ia weboita wei.  
\v 9 Eno utasuna, ina danu gaukaraba dera amarama dawa we ma kobererau utawa utasu.  
\v 10 Enanari Godinu wasu sina nesia ufoitana yana kobere uwarana me, ya yanu gaukara torowa utaisi, wiawe wei.   
\s1 Yesu i ofe amaimawere uwara nesia teni (10) ma wiroi  
\p
\v 11 Yesu Jerusaremu suro aneda Gareri orofa Samaria orofa abanaro fare ani.  
\v 12-13 Yesu ido ane mui suro farina moana amaima bobo uwara nesia teni (10) dawa atatate etararo inaibeda derawere yua weita, Yesu, Dera Amara, ya neno arama ua weita.  
\v 14 Weitana Yesuma ema ereda wei, aniawete yanu torowa i fuyo ode sina weta uwarabai yanu ibo mawetu uawe wei. Weiro anitana ema ido wirota.  
\v 15 Mui amaima boboro wiroi amarama danu ofe kobererau ui iwata uite owerite anedana Godi we ma kobererau uteda we ma derawere ui.  
\v 16 Eno uite Yesubai farite Yesunu buri gigirariro arubi uteda we ma kobererau uteda we ma derawere ui. I amarana Samaria amara.  
\v 17 I amara eno uiro Yesuma wei, uwara nesia teni (10) wirota aba me? I moana uwara naini (9) aboro anita wei?  
\v 18 Aneba ewa aika amara torowana owerinute are Godinu ifu we ma derawere utasu wei?  
\v 19 Eno weite i amaraba wei, uya, anu imuetama a ma wirosinu wei.   
\s1 I Godinu yawoeta orofanu fareta kowa  
\p
\v 20 Moana Ferosi uwarama weita, Godinu yawoe arasu kowa abododo fafisu weita? Weitaro Yesuma wei, Godinu yawoeta kowanu fareta dawa ereta tanana me iba da efoita.  
\v 21 Awona ewado yawotasu da weboita, awona iro yawotasu da weboita. Godinu yawoeta ewado yabai ibinu eawe wei.  
\v 22 Yesuma Danu iwata ueta uwaraba wei, duburo i kowa ido fafiro i Ba Eme Sini Amara kowa demurairatu efene weboitana da efoita wei.  
\v 23 Moana uwarama yaba eno webitaita, Dawa ewado, Dawa iro eno webitaitana emanu sina da nauawete emabai Na dobere da aniawe wei.  
\v 24 Bidama urero enabirafu enabirafu tiriri ue fa taneda ario utasuro eraita i ari I Ba Eme Sini Amaranu fareta enanari fafiro efoita wei.  
\v 25 Nono botaina Dawa neno oferi derawere woufiro ewa orofa atata ibinita uwarama Dawa ekodifitaita wei.  
\v 26 Noanu kowaro emema ane ane utebita, i Ba Eme Sini Amaranu fareta kowaro enanari ufitaita.  
\v 27 Noanu kowaro emema ietaini ogoini itebitate awetabo awerasi mune matanebitaro Noa ido danu boutiro amuiro obi oku derawere fariro uwara ido uie me sita.  
\v 28-29 Rotinu kowaro enanari utebita. I kowaro emema ietaini ogoini itebitate oiya ue matebitate oiya utebitate waiya waitebitate su ubu utebitaro Roti Sodomu su ekodiro i kowaro Godima inaini barai gebiro wakiki derawere ureroma odiro tararite i uwara nesia yare me sini.  
\v 30 Awona enanari emema emanu ietaini ogoini ifitate emanu unu gaukara uteibitaro i Ba Eme Sini Amara ido fafisu wei.  
\v 31 I kowaro i orofaro yaubeta uwarana su ubarero emanu ibaiabai mubitae da anibitaita. Enanari i waiyaro gaukara ueta uwarama suro da owefitaita wei.  
\v 32 Rotinu aweta imue eawe wei.  
\v 33 Anama ewa orofaro me ibifie ufisuna daido ba uifisu. Nono anama dawa unutawa ewa orofaro me ibetana dawa duburo me ibene ibene ibifisu wei. Yaba ba wemaro nauawe wei.  
\v 34 I dumuro amara sadei uruama nauta ainibifisiro mui amara woure anibiro mui amara iro ibifisu wei.  
\v 35 Aweta sadei uruama okia outeibisiro demurai woure anibiro demurai iro ibifisu wei.  
\v 36 Amara sadei uruama waiyaro gaukara uteibisiro demurai woure anibiro amara demurai iro ibifisu wei.  
\v 37 Eno weiro weita, Dera Waria Amara aboro ina eno ufisu? Weitaro Yesuma wei, emenu ofena i uieta ofe aboro ainibifitaro iro amuoma ifitae anibitaita wei.   
\c 18  
\s1 I koto yawoeta amaraini wabu awetaba kasei sina  
\p
\v 1-2 Yesuma eme guriguri uteibitate da ekodifitae iba ewa kasei sina emaba wei, mui suro koto dera yawoeta amara dawa Godini emeba iyarawa ue me ibebi.  
\v 3 I suro mui wabu awetama ibeda i koto amarabai farebite webi, naba wasai utasu amara wiaro eno ueta ekodifi webi.  
\v 4 I wabu aweta enoma enoma webina i koto dera yawoeta amarama danu unu utawa i awetanu unu weta. I awetanu danu unu utawa uiro woroworo fare webiro dawa nautebe osi uite we imui, na Godini emeba iyarawa utebatane.  
\v 5 Nono ewa wabu aweta nabai sina woroworo wasuro danu sina nautebe na arama uneba awonana danu unu umate dawa durua umau. Utebe woroworo webiosoro nanu ibeta ba me uosoa wei.  
\v 6 Yesuma eno weite wei, i siosawere koto dera amaranu sina nauawe.  
\v 7 Dawa eno utasuna Godinu sina nautaita uwarama Godiba woroworo waitaro emanu waita sina Godima nauegou utasu aba me?  
\v 8 Aiwia, emanu waita sina enanari sau utasu wei. Idoro i Ba Eme Sini Amarama nasiniro nono owefite fafisuna uwarama Godinu sina naufitaro efisu aba me wei?   
\s1 I takesi muneta amaraini i Ferosi amaraba kasei sina  
\p
\v 9-10 Moana uwarama emanu torowaba we imuta, yana kobererau nono moana uwara kobererau me, eno we imutaba Yesuma ewa kasei sina emaba eno wei, amara sadeima dera dubu suro guriguri ufisie anisi. Mui amarana Ferosi amara. Mui amarana takesi muneta amara.  
\v 11 I Ferosi amarama uyarite danu aika imuite guriguri uteda eno wei, Baba Godi, nana moana uwara ari meba we ma kobererau utatane. Na waira amarana me. Na siosa ueta amarana me. Na dita yagera fareta amarana me. Na ewa takesi muneta amara arina me.  
\v 12 Mui fura kowa sadei ieta itawa utatanete nanu ibaiabai nesia taisi matatane, eno wei.  
\v 13 Nono i takesi muneta amarama maru uteda etararo inarite guriguri uteda danu dinamaro ureda wei, Baba Godi nana siosawere amaraba na neno arama ua wei.  
\v 14 Yesuma i sina weite emaba wei, Nanu sina nauawe, Godima i takesi muneta amaranu ba me ueta mune imutawa uiro suro tarani. Godima i Ferosi amaranu ba me ueta munawa ui wei. Anama danu torowa ma derawere utasuna dawa kikiratu ufisu. Anama danu torowa ma otowaratu utasuna Godima dawa ma derawere ufisu wei.   
\s1 Yesu otowa koinibororaratu ma kobererau ui  
\p
\v 15 Moana uwarama emanu koiniboro Dawabai woutate Yesuma ema burifie woure fata. Eno utaba Yesunu iwata ueta uwarama etate dua sina weita.  
\v 16 Weitaro Yesuma i koiniboroba yua weite Danu iwata ueta uwaraba wei, i koiniboro Nabai fafitae watane. Emanu areta daba garari da ufoita. Anama koiniboronu imueta ari imufisuna Godinu yawoeta orofana danu wei.  
\v 17 Yaba ba sina wemaro nauawe. Anama Godinu yawotasu amakanunu imueta ari da mubisuna Godinu yawotasu orofaro da anibisu wei.   
\s1 I gugua gubari bobo amara  
\p
\v 18 Mui yawoeta amarama Yesuba eno wei, kobere Tisa, anene umate me ibene ibene ibimau wei?  
\v 19 Weiro Yesuma wei, aneba Naba kobererau wasu? Godi torowana kobererau, mui amarana kobererau me wei.  
\v 20 Godinu tarawatu a iwata utasu. I tarawatuna eno, dita yagera da fa, eme da ma uia, waira da ua, wawei webasuna meo da wia, anu anuaini amamaba uegou ua. I tarawatuna eno, Yesuma wei.  
\v 21 Weiro i amarama wei, i tarawatu nesia kikiraturoma eno utebatane wei.  
\v 22 Weiro Yesuma nauteda wei, demurairatu utawa utasu, ina eno, anu ibaiabai nesia moana uwarabai oiya ue mafate ibaiabai me uwaraba anu oi mate ido Nanu buribi ara. Eno ufasuna aba urero ibaiabai mafiro i ibaiabai urero ibifisu wei.  
\v 23 Yesuma i sina eno weiro i amarama nauite danu ibaiabai derawereba danu ibo aika uteda neno siosa ui.  
\v 24 Yesuma i neno arama bobo amara ereda wei ibaiabai derawere bobo amarama Godinu yawotasu dabaro anibie ufisuna kimu derawere ue anibisu wei.  
\v 25 Mui egi danu ifuna kemo, dawa mara ebaro fare anibisuna ina kimu me, nono ibaiabai derawere bobo amaranu Godinu ure orofaro anetana kimuwere wei.  
\v 26 Eno weiro i nauta uwarama weita, enoba anama wirofisu weita?  
\v 27 Weitaro Yesuma wei, emema da ufitaitana Godima nesia ufite Danu aikana ma wirofisu wei.  
\v 28 Weiro Fitama Yesuba wei, yanu su ekoisite Anu buribi anisi ea wei.  
\v 29-30 Weiro Yesuma emaba wei, ba sina wemaro nauawe wei, anama danu suini awetaini datae dabueini danua damamaini koiniboroini Godinu yawoetaba ekodinuba awonana faiya faiyawere mubite duburona me ibene ibene ibifisu, Yesuma eno wei.   
\s1 Yesu Danu uifisu sina nono wei  
\p
\v 31 Yesuma Danu amara tuero (12) mune aika odite emaba wei, Jerusaremu suro anaisi eawe wei. Iro fafeisina Godinu we bou ueta uwarama i Ba Eme Sini Amaraba anene webita sina enanari ufisu wei.  
\v 32 Iro Dawa i aika uwaranu age duro odifitaro mune Dawa iruteda siosawere uteda witua ufitaita.  
\v 33 Eno ufitate domuma ufitate ma uifitaro kowa rarogonu me sibiro uietaroma ido uyafisu wei.  
\v 34 Yesuma eno weiro Danu sina kasei sina ari imuteda ubi kimuwereba iwawa uta.   
\s1 Yesu mui diti basugari boboro nui webi amarama ma wiroi  
\p
\v 35 Yesuma Jeriko suro fafie uina mui diti basugari bobo amarama daba gigirariro yaubeda nui webi.  
\v 36 Eno uite i farebi uwaranu rurua nauteda wei, anene utaita wei?  
\v 37 Weina weita, Yesu, Nasareta amara ido fare anasu weita.  
\v 38 Weitaro diti basugari bobo amarama derawere wei, Yesu Deiwidinu sisia amara naba neno arama ua wei.  
\v 39 Eno weiba i uwarama kodia weitaro derawere wei, Deiwidinu sisia amara naba neno arama ua wei.  
\v 40 Weiro Yesuma inarite wei, i amara Nabai woure arawe weiro enanari uta.  
\v 41 I amarama Yesubai fariro Yesuma wei, anu ununa ane ufae wasu wei? Weiro i amarama wei, Dera Waria Amara nanu ununa ba emane watane wei.  
\v 42-43 Weina Yesuma wei, anu nauetama a ma wirosinuba ditima ba ea weina i amarama ba erite Yesunu buribi anedana Godinu ifu we ma derawere ui. I guruguru ubita uwarama i ueta etate Godi we ma kobererau uta.   
\c 19  
\s1 Yesuini Sakiyasi  
\p
\v 1 Yesuma Jeriko suro fare ani.  
\v 2 Iro fare anebiro mui amara danu ifuna Sakiyasi i suro ibi. Sakiyasi dana dera takesi muneta amara. Dana oini ibaiabai derawere bobo amara.  
\v 3 Yesuma ido fare anebiro Sakiyasima Yesu efie anina eme faiyawere guruguru utate dawa garari utaro dawa fuyaratu amaraba Yesu erawa ui.  
\v 4 Enoba ekodite durami ue anite sikamo ana daro mane yauri.  
\v 5 Mane yaubiro Yesu i orofa ido fare anedana etu ana daro ereda i amaraba wei, Sakiyasi, awona anu suro animaua sau ita wei.  
\v 6 Eno weiba i amara Sakiyasi sau ido itarite yaru derawere uteda Yesu woure danu suro ane odi.  
\v 7 I guruguru ubita uwarama i etate gimumutaroma weita, Yesuma etei siosawere amaranu suro dawaini aibie ainu weita.  
\v 8 Sakiyasima Yesunu iboro inarite wei, Dera Amara ea, nanu ibaiabai bebemate enabirafu nabai ibifiro enabirafu ibaiabai me uwaraba mamau wei. Weite wei, mui amaranu ibaiabai waira uena dawaba ini nono mui fo (4) deiro mamau wei.  
\v 9 Eno weiro Yesuma wei, awonana Godinu wiroeta ewa suro farinua wei. Ewa amaraini dawa Eibaramunu sisia amara.  
\v 10 I Ba Eme Sini Amarama dawaini i feareta uwara dobefite ma wirofie iba farinua wei.   
\s1 I goru oiba wasu kasei sina  
\p
\v 11-12 Yesuma anite Jerusaremu suro fafie ui. Fafie uina i uwarama Godinu yawotasu orofa sina ma boroyafie usinu we imutaba Yesuma ewa kasei sina emaba eno wei, mui dera amarama danu orofa ekodite mui orofaro anibiro iro dawa danu orofa yawoeta dera amara sina webitaro naufite owere afie ani.  
\v 13 Enoba danu gaukara uwara nesia teni (10) weiro dawabai fata. Dawabai fataro emaba tueniti kina (K20) tueniti kina maite wei, ewa oi yawoegou uawete besenesi gaukara uawero fama wei.  
\v 14 Danu orofa uwara ema unutawa danu yawoetaba moana uwara dawabai siaia utaro anitate weita, ya unutawa anu yawoetaba iba ya da yawofasu weita.  
\v 15 Duburo i amarama danu yawoeta sina nauite owerite suro fari. Suro farite danu oi mai gaukara uwara besenesi gaukara anene uita iwata ufie ema weiro dawabai fata.  
\v 16 Fatate i botai amarama wei, dera amara, anu mai tueniti kina (K20) mui tu aderedi kina (K200) deiro odine wei.  
\v 17 Weiro dera amarama wei, ana kobere gaukara amara. Ana kikiratu kobererau yawosinuba natofo su teni (10) yawofasu wei.  
\v 18 Mui abana amarama wei, dera amara, anu mai tueniti kina (K20) mui wani aderedi kina (K100) deiro odine wei.  
\v 19 Weiro i dera amarama wei, natofo su fai (5) yawofasu wei.  
\v 20-21 Mui abana amarama farite wei, dera amara, anu tueniti kina (K20) ewado ea wei. Weite wei, a kimu yawoteda beata waitawa nono ietata munasute anu ane odawa utasute munasu. Enoba a na iwata uteda aba iyareda anu tueniti kina (K20) wadiama obari unete ma feare odinete awona munea wei.  
\v 22-23 Weiro i dera amarama wei, a siosa gaukara amara! Ana nanu imueta iwata uteda utawa usinuba aba fanisi mamau wei. Na kimu yawoeta amara beata waitawa ietata munatanete ane ane odawa odeda munatane. Ina a iwata utasude nono aneba nanu oi banikaro odawa usinuro iro oi deiro mafitaro fare munawa une wei?  
\v 24 Eno weite i guruguru ubita uwaraba wei, danu tueniti kina (K20) ma dare muawete etei tu aderedi kina (K200) bobo amaraba mawe wei.  
\v 25 Weiro weita, dera amara, dawabai tu aderedi (K200) ibinu weita!  
\v 26 Weitaro dera amarama emaba wei, nanu sina nauawe wei, i derawere bobo uwaraba mui mafisu. I kikimuikiratu bobo uwaranu kikiratu ma dare mubisu wei.  
\v 27 Eno weite wei, nanu moana orofa uwarana wasai uwara ari nanu yawoeta ema unutawaba ewaro woure arawete nanu iboro uawero uifita weiya wei. Yesuma i kasei sina emaba eno wei.   
\s1 Yesu Jerusaremu suro kini ari ani  
\p
\v 28 I sina we me sinite Dawa ko Jerusaremu suro anebiro Danu iwata ueta uwarama Danu buribi anebita.  
\v 29-30 Anebe ane Betifeijini Beteni suro fafitae uta. I su sadei Oriwa maidani gigiraribai. Iro fafitae utaro Yesuma weiro Danu iwata ueta amara sadei Dawabai fasiro wei, etei mui natofo suro aniawate i suro fafawaisina su gigirari tubune tutuburo otowa doniki egi doie oitaro inaibinuba eawate na ma uregari uawate woure Nabai arawa wei. I donikinu deiro mui amara yaurawa.  
\v 31 Eno weite wei, i otowa doniki aneba na ma uregari utaisi webitaitana emaba eno wiawa, wanu Dera Amarama mubite yaure Jerusaremuro anibisu wiawa wei.  
\v 32 Weiro ane fasite Danu wei sina enanari esi.  
\v 33 I otowa doniki esite ane na ma uregari utebisina i otowa doniki ubi uwarama emaba weita, ya sadei aneba i otowa doniki na ma uregari utaisi weita?  
\v 34 Weitana weisi, wanu Dera Amarama mubite yaure Jerusaremuro anibisu weisi.  
\v 35 I amara sadeima otowa doniki ido wo fare oisi. Oisiro Danu iwata ueta uwarama wadia doniki deiro oitate Yesu deiro weitaro amo yauri. Yesuma ido deiro amo yaurite ani.  
\v 36-38 Yesuma yaurite aniro uwarama emanu wadia dabaro ode anita. Ane Oriwa maidaniroma tarani daba gigirari farebina Danu sina naueta uwara faiyawere buna ueta faiyawere etaba yaru uteda Godinu ifu we ma derawere uteda derawere eno weita, yanu Dera Yawoeta Amara, Godinu ifuro ido farinua weita. Godima Dawa ma kobererau ufisu. Urero wesarau ibinuba Godinu ifu we ma derawere utaisi weita.  
\v 39 Eno weitaba moana Ferosi uwarama Yesuba weita, Tisa, Anu iwata ueta uwaraba wiaro sina ekodifita weita.  
\v 40 Weitaro Yesuma emaba wei, yaba wemaro nauawe, ewa uwarama sina ekodifitaitana i gebiroma sina derawere webitaita wei.   
\s1 Yesu Jerusaremu suba i wei  
\p
\v 41-42 Yesuma Jerusaremu su baworo fareda i su erite i suini i uwaraba i weda wei, awonana Godinu merau ibeta iwawa utasuba Godima Danu merau ibeta abai ma fearasu.  
\v 43-44 Mui kowa fafiro aba wasai ufitaita uwarama fafitate ewaro sakai daure makara ue sakai anu marauro sabitate ode kara ufitate a ma jugari uteda anu uwara ma uifitaita. Eno ufitaro i maraunu gebiro muima muinu deiro da ibifisu. A Godinu me maeta unutawaba iba eno ufitaita Yesuma eno wei.   
\s1 Yesu dera dubu suro ani  
\p
\v 45-46 Yesuma i dera dubu suro amui. Amuite i oiya ueta uwara suroma we ma yowereda emaba wei, Godinu bukaroma eno wasu, Nanu suna guriguri ueta su. Yana Nanu suna waira ueta uwaranu su uta wasu wei.   
\p
\v 47-48 Yesuma kowa ainewaure dera dubu suro we mawetu utebi. Eno utebina i dera fuyo ode sina weta uwaraini i Ju uwaranu yawoeta uwaraini Yesunu ma uieta daba dobetana i uwara nesia Danu sina nauegou utaba Danu ma uieta daba atanawa uta.   
\c 20  
\s1 Yesunu bunaba wenauereta  
\p
\v 1 Mui kowaro Yesuma we mawetu uteda Godinu kotofu sina webina i dera fuyo ode sina weta uwaraini tarawatu tisa uwaraini dera baeta uwaraini ema Yesubai fata.  
\v 2 Fatate weita, Anu bunaro eno utasu? Anama Aba buna masinuro eno utasu? Wiaro naufe weita.  
\v 3-4 Weitaro Yesuma emaba wei, Nanu wenauereta botai wemaro yanu moko sina wiawero nauma weite wei, Joni Babataito uetade ureroma fari aba emebairoma fari wei?  
\v 5 Weina sina we mataneda emanu aika weita, ane webeisi? Ureroma fari webeisina Joni aneba nautawa uta webisu.  
\v 6 Emebairoma fari webeisina i uwara nesia Joni dawa Godinu we bou ueta amara imutaitaba ya gebiroma ufitaita weita.  
\v 7 Emanu aika eno weitate Yesuba weita, ya iwata me weita.  
\v 8 Eno weitaba Yesuma emaba wei, idoba Nanu buna utatane sina anama mairo utatane yaba da wemau wei.   
\s1 I gureifi beata yawoeta siosararabo uwaraba kasei sina  
\p
\v 9 Yesuma i uwara nesiaba ewa kasei sina yare wei, mui amarama gureifi yo waiyaro waite danu waiya moana uwaraba yawofitae mateda mui orofaro ani. Ane iro sakara faiyawere ibebi.  
\v 10 Duburo ayo ureta kowa ido fariro danu waiya ueta amara danu gureifi tai moana mubie siaia uiro ani. Ane fariro i waiya yawoeta uwara ema unutawa maeta iba i amara mutate isuma urebe gureifi tai matawa uteda ma owetate siaia utaro ani.  
\v 11 Nono dawa mui amara siaia uiro ani. Ane fariro enanari isuma urebe siosawere uteda gureifi tai matawa, ma owetate siaia utaro ani.  
\v 12 Dawa nono mui amara siaia uiro ani. Ane fariro enanari ure ma iwiji awiji utate dawa yowetaro ani.  
\v 13 Eno utaba i waiya ubi amarama we imui, anene umau? Nanu amara ubi siaia umaro dawa kakara ufitaita we imui.  
\v 14 Eno We imuite danu amara ubi siaia uiro ani. Ane fariro emanu emanu we matatate weita, ewana danu amara ubiba ma uifete danu waiya yana mubeisi weita.  
\v 15 Eno weitate i amara muneda waiya dowa dubenaro satate dawa ma uita, Yesuma eno wei. Eno weite emaba wei, i waiya ubi amara emaba ane ufisu?  
\v 16 Dawa anibite i waiya yawoeta uwara nesia ma uifite danu waiya aika uwaraba mafisu wei. Eno weiro nauteda weita, ema! eno da ufisu weita.  
\v 17 Weitaro Yesuma ema ereda wei, ane waita? Godinu bukaroma eno wasu, i su ubu ueta uwaranu mu sata gebirona i botai tutubu ari sini, Godinu bukaroma aneba eno wasu wei?  
\v 18 Anama i gebiroro ureifisuna danu tai furiafisu. Nono i gebiroma ananu deiro ureifisuna i amara ure ma musimusi ue sakai ari sibisu Yesuma wei.   
\s1 I takesi maetaba wenauereta  
\p
\v 19 Yesuma i kasei sinana emanu sina webie imutate i tarawatu tisa uwaraini dera fuyo ode sina weta uwaraini Yesu budari ufitae utate i uwaraba iyataba ekoita.  
\v 20 Ekoitate imuegou utate moana uwara Yesubai siaia utaro anita. I uwarama Yesu me iruteda gagau ue anita. Yesu i gaemani dera amaranu age duro odifitae iba Danu sina ane nauegou uta.  
\v 21 I uwarama Yesuba weita, Tisa, Ana eme nesiaba arotorowa utebasu. Eme derawere aba kikiratu eno unutawa utasute ba we mawetu utasute emeba meo utawa utasute Godinu sina ba wasu weita.  
\v 22 Weitate weita, idoba Romani gaemani amara, Sisabai takesi mafeisina ina ido aba me weita?  
\v 23-24 Weitaro Yesuma emanu irueta imueta iwata uteda wei, siriwa oi maiwero ema wei. Weiro mataro ereda wei, ananu kofirini owawaini ewado ibinu wei? Weina Sisanu weita.  
\v 25 Eno weitaba Yesuma wei, idoro Sisanu ane ane Sisaba mawete Godinu ane ane Godiba mawe wei.  
\v 26 Eno weiba nautate i uwaranu iboro Yesu meo gagau utawa utate Danu sinaba neno kirifu uteda wate wiawa wate mu uta.   
\s1 I uietaroma uyaretaba wenauereta  
\p
\v 27 Duburo moana Mosesinu tarawatu utaita uwara, Sadusi waita uwarama Yesubai fata. I Sadusi uwarama eme uietaroma da uyafitaita we mawetu utebita.  
\v 28 I uwarama Yesubai fatate weita, Mosesinu tarawatu eno wasu, mui amarama aweta mubite aruma amara munawa me ibebe uifiro danu dabuema danu aweta wabu mubite i uieta amaraba aruma amara yanae mubisu wasu weita.  
\v 29 Eno weitate weita, adarabu nesia seweni ibita. I botai amarama aweta munite aruma amara yanae munawa me ibebe ui.  
\v 30-31 Me uiro danu buribi dabuema dataenu aweta wabu munite aruma amara yanae munawa me ibebe ui.  
\v 32 I mui abana dabuema i aweta wabu enanari muniro enoma enoma enanari nesia mutate aruma amara yanae munawa me uie me sitaro nono duburo i aweta ido ui.  
\v 33 I aweta amara sewenima mutaba duburo i uietaroma uyareta kowaro abo amarama i aweta mubisu weita?  
\v 34 Eno weitaro Yesuma emaba wei, ewa kowaro ibinita uwarama aweta awera munaita.  
\v 35 Nono i kobere uwara, i uietaroma uyafitate me ibene ibene ibifitaita uwarama aweta awera da mubitaita.  
\v 36 Iro Godinu aneruini i uwaraini arotorowa. I uwarana Godinu adarabuba iro da uifitaita. Godima ema uietaroma ma uyafite me ibene ibene ibeta emaba mafisuba iba nono iro da uifitaita wei.  
\v 37 Eno weite wei, Mosesima wei, Godima i uieta uwara ma uyarasu wei. Mosesima i uitawa yareta ana ereda wei, Godina yanu sirorari uwara Eibaramuini Aisikini Jeikofuini emanu Godi wei.  
\v 38 Yesuma weite wei, Godina i wiroeta uwaranu Godiba iba uieta uwara nesia me ibinita, Godina i ba me sita nautawa uwaranu Godi me, Godima wasu wei.  
\v 39-40 Eno weiba moana tarawatu tisa uwarama mui sina weta unutawaba weita, Tisa, ba wasu weita.   
\s1 I Godinu ma wiroe mune aneta Amaraba wenauereta  
\p
\v 41 I uwarama eno weitaro Yesuma emaba nono wei, i tarawatu tisa uwarama Keriso Deiwidinu sisia amara aneba eno waita?  
\v 42-43 Deiwidima i Samusi bukaro Mesaiaba eno wasu, Godima nanu Dera Waria Amaraba wei, Nanu banibira age afu yauaro aba wasai utebaita uwara buna umate Anu buri eminaro odimau weiya wasu wei.  
\v 44 Yesuma weite wei, Deiwidima Kerisoba Nanu Dera Waria Amara weiba anene Keriso Deiwidinu sisia amara sini wei?   
\s1 I tarawatunu tisa uwaraba Yesuma emeba we kakara ui  
\p
\v 45-46 Yesuma eno weite i uwara nesianu iboro Danu iwata ueta uwaraba wei, i tarawatu tisa uwaraba eregou uforo wei! I uwaranu ununa yafa asugari ueta wadia barufitate maketi kabesiro inaraita uwaranu ario sina naufitate Ju uwaranu dubu su kobere yaureta kabesiro yaufitate ogaro botai yaureta kabesiro yaufitae utaita.  
\v 47 I uwarama wabu awetanu ibaiabai waira utaitate guriguri yafawere eme naufitae iba utaita. Eno utaitaba Godima ema fanisi derawere mafisu, Yesuma eno wei.   
\c 21  
\s1 I wabu awetaratunu fuyo  
\p
\v 1 Mui kowaro Dawa dera dubu suro inaibeda erebina gugua gubari uwara faiyawere me maeta mauaro oi fare sanebita. I ibaiabai derawere bobo uwarama oi derawere fare sata.  
\v 2-3 Nono mui ibaiabai me wabu awetama fare toea sadei saniro Yesuma erite wei, Nanu sina ba yaba wemaro nauawe wei. Ewa wabu aweta oi derawere saninuro i uwara nesia oi kikiratu sanita.  
\v 4 I uwarabai oi faiya faiyawere ibinuba iba emanu oi kikiratu ari sanita. Ewa wabu aweta danu ieta oiya ueta oi nesia saninuba iba danu oi derawere saninu wei.   
\s1 Yesu i dera dubu su ma siosa ufitaita sina wei  
\p
\v 5 Moana uwarama i dera dubu suba eno weita, i dera gebiroraraboini werei werei eawe weita!  
\v 6 Weitaro Yesuma nauite wei, yanu awona eraisi, i, mui kowa ido fafiro gebiro nesia ma ubefitaro mui gebiroma mui gebiro deiro da ibifisu wei.   
\s1 Kerereini oferi derawere  
\p
\v 7 Yesuma eno weiba Dawaba weita, abo kowaro eno ufisu? Ane ueta ufiro efero eno ufisu weita?  
\v 8 Weitaro Yesuma emaba wei, moana uwarama ya irufitae webitaitaba eregou uforo wei. Uwara faiyawere irufitae Nanu ifuro fafitate nana keriso i kowa farinu eno webitaitana emanu sina da naufote emanu buribi da aniboro wei.  
\v 9 Dera urane yarane ueta sina naufote iya da uyaforo wei. Ina botai ufisuna i dubu kowa duburo ido fafisu wei.  
\v 10-11 Yesuma emaba nono wei, mui orofa gaemanini mui orofa gaemanini urafitaita, orofa atata uwara aika maika urafitaita, orofa faiyawere nasini wawana wawana ufisu, orofa faiyawerero sinai derawere woufitate oferi derawere woufitaita, urero ereta efitate iya derawere uyafitate nono urero mui buna ereta efitaita wei.  
\v 12-13 Yesuma eno weite wei, botai ko uwarama ya mune siosawere ufitaita. Ya Ju uwaranu dubu su yawoeta uwaranu age duro odifitate diburaro odifitate dera kini uwaraini gaemani yawoeta uwarabai Nanu ifuba woure odifitaita. Eno ufitaitana i kowaro Nanu sina weboita.  
\v 14-15 I uwaranu wawei weta, ane moko sina weboita da imuegou uforo yaba wemate buna imueta mamaro weboro yaba wasai ufitaita uwarama moko sina da webitaita wei.  
\v 16 Yanu yanua yamama yatae yabue yanie yauwa yanu su uwara, ema nesia ya budari ufitae wawei webitaro ya ufitaro moana uifoita wei.  
\v 17 Uwara nesia ya Nanu ifuba neno ka ufitaro Godima ya durua ufisuba yanu fouma iji me sara da itafisu wei.  
\v 18-19 Bunawere ufote inare kimu ufoitana duburo me ibene ibene ibifoita wei.   
\s1 Yesu Jerusaremu su ma siosa ufitaita sina wei  
\p
\v 20 Yesuma i sina weite wei, meremere uwarama Jerusaremu suro ode kara ufitaitana eforo Jerusaremu sunu ma arama ueta kowa ido fafisu wei.  
\v 21 I kowa ido fafiro i Judia orofa uwarama maidaniro sau manibitaro i waiyaro gaukara ufitaita uwarama Jerusaremu suro da owefitate anibitaita.  
\v 22 Godinu we bou ueta uwaranu webita sina i kowaro Godima Jerusaremu su uwara enanari fanisi mafisu wei.  
\v 23 I kowaro dia bobo awetaboini ama ieta kuita bobo awetaboini emanu anibitaita dabana siosawere. Ewa orofaro siosawere ufitate i uwaraba neno ka derawere ufitaita.  
\v 24 Neno ka derawere ufitate uwara faiyawere dera kaiyama umane tufitaro uifitaro uwara faiyawere budari ufitate mui orofa atata aboro aboro woure anibitaita wei. I aika uwarama Jerusaremu su ma jugari ufitate amune adire anebe anebe emanu kowa ido me sibiro ekodifitaita wei.   
\s1 I Ba Eme Sini Amaranu fareta  
\p
\v 25 Yesuma emaba mui sina eno wei, urero kowaini sakaraini muinaini iro ereta aika maika efoita. Ewa orofaro enea ufe rurua derawere weda uyafisuba emema iya uyafitate ina iwawa ufitaita.  
\v 26 Ure ibaiabai nesia wawana wawana ufisuna emema i fafisu ane aneba neno siosa ufitate uieta ari dowafitaita.  
\v 27 Nanu wene nesia ufisuna i Ba Eme Sina Amarama gosoro bunaini ario derawere ido fafiro efitaita wei.  
\v 28 I nesia tutubari ufisuna rorowarau inawete urero eawero yanu ma wiroeta amara ido fafisu wei.   
\s1 I boruba anaba we mawetu ueta  
\p
\v 29 Yesuma emaba kasei sina eno wei, i boruba anaini aika ana eawete iwata uawe.  
\v 30 Reka tua oyafisuna kowa kowa ido farinu waita.  
\v 31 Enanari nanu wene sina reka ufiro eforo Godinu yawotasu kowa ido fafie usinu iwata ufoita wei.  
\v 32 Yaba ba sina wemaro nauawe. Ewa ibinita uwara da me sibitaro i nesia ufisu wei.  
\v 33 Ureini nasinini me sibiro Nanu sina da me sibisu wei.   
\s1 Yanu yanu ueta sineta yawoegou ueta  
\p
\v 34-35 Eregou uforo! Me sara da ibifote kimu ogo iteda gogore da ufote ewa orofa ibaiabai torowa da imufoitaba ogama gasira kiwuma munasu i ari i kowa kiwuma yabai faosoba wei. I kowana orofa atata ibifitaita uwara nesiabai fafisu.  
\v 36 Eregou uforo! Buna muboe guriguri uforo i siosawere fafisu uetama ya ma siosa da ufiro i Ba Eme Sini Amaranu iboro me inafoita wei.  
\v 37 Yesuma ainewaure dera dubu suro we mawetu utebi. Kowaro we mawetu utebite nono dumurona Oriwa maidaniroma ane ainebi.  
\v 38 Eno utebina i uwarama waura warairo dera dubu suro Dawabai Danu sina naufitae fata.   
\c 22  
\s1 Dera uwarama Yesu ma uifitae we turebita  
\p
\v 1 Godima i Isaraero uwara Ijifiroma woure aneta ogaro kowa fafie ui. Ina wawareta ira yisiti me buredi itebita ogaro.  
\v 2 I kowaro dera fuyo ode sina weta uwaraini i Tarawatu Tisa uwaraini Yesunu ma uieta daba dobetate i uwara nesiaba iyataba atanawa uta.   
\s1 Judasi Yesu do mafie wei  
\p
\v 3 I kowaro seitanima Judasi Isikariotinu neno ubarero itari. Judasina Yesunu mui tuero (12) iwata ueta amara.  
\v 4 Judasima i dera fuyo ode sina weta uwarabai Yesu do mafie ane fari.  
\v 5 Eno uiba i uwarama yaru utate Judasiba oi mafitae weita.  
\v 6 Enoba Judasima Yesunu do maeta daba doberebi. Dawa unutawa eme faiyawerebai do maetaba iba doberebe doberebe eno ui.   
\s1 Yesu i Ijifiroma woure aneta ogaro ifie ue bou ui  
\p
\v 7 Godima Isaraero uwara Ijifiroma woure aneta ogaro kowa ido fari. I kowaro wawareta ira yisita me buredi itebitate ogaronu fuyo mamoenatu urebita.  
\v 8 Enoba Yesuma Fitaini Joniba wei, aniawate i ogaro ue bou uawaro ife wei.  
\v 9 Weiro Dawaba weisi, aboro ane ufutu weisi?  
\v 10 Weisiro Yesuma wei, natofo suro aniawate mui ogo woureta amara eawate danu buribi aniawa.  
\v 11 Ane danu suro amufawaisina i su ubi amaraba wiawa, wanu Tisa amarama wenu, anu owiga uwaranu yaureta koru mawetu uaro iro Naini Nanu iwata ueta uwaraini i ogaro ife wenu, eno wiawa wei.  
\v 12 Eno wiawaro yaba dera yauretaini kaiyo bobo koru mawetu ufiro iro yanu ogaro uawa wei.  
\v 13 Weiro anisite Yesunu wei enanari esite i ogaro ue bou usi.   
\s1 Areto ieta kowa  
\p
\v 14 I ogaro ieta wai ido fariro Yesuini Danu afosoro uwaraini ieta ifitae yauta.  
\v 15 Yesuma emaba wei, Nanu oferi woureta kowa fafie utasuba yaini ewa ogaro iegou umane watane wei.  
\v 16 Yaba wemaro nauawe. Ewa ogaro yaini nono da imate uimauna Godinu yawotasu kowa ido fafiro iro imau wei.  
\v 17 Yesuma eno weite waini kafusi mune Godiba we ma kobererau uite emaba wei, ewa kafusi nata nata uawete iawe wei.  
\v 18 Yaba wemaro nauawe, nadidi tai dumamu nono da imaro Godinu yawotasu kowa ido fafisuna ido nono imau wei.  
\v 19 Eno weite buredi mune Godiba we ma kobererau uite ina ma birabiarite emaba mateda wei, ewana nanu ofe yaba ma birabiaratane. (Ina iteda Na imuawe wei.  
\v 20 Ieta ie me sitaro Yesuma mui kafusi munite wei, ewa kafusina Nanu reka unuro ue mataneta onono yaba itarasu wei.)  
\v 21 Yesuma eno weite wei, Na do masinu amaraini ewa kaiyobai yaubinisi eawe wei.  
\v 22 I Ba Eme Sini Amarana uifisu Godima wasuba enanari uifisu. Nono Na masinu amaraba fanisi derawere mafisua wei.  
\v 23 Eno weiba Danu iwata ueta uwarama emanu aika we mataneda weita, anama eno ufisu weita?   
\s1 Yesunu iwata ueta uwara derawere ufitae yaranebita  
\p
\v 24 I iwata ueta uwarama bebetuma yaraneda weita, yabai abo amarade dera amara weita?  
\v 25 Weitaba Yesuma emaba wei, i aika dera yawoeta uwarama emanu gaukara uwara kimuwere yawotaitaro gaukara uwarama ema yanu dera uwara waita.  
\v 26 Yabaina eno me. Yabai, yanu dera amarana otowaratu ari sibisu. Dawa yanu gaukara utasu.  
\v 27 I kaiyobai yaubeda ieta itasu amara dana derawere. I ieta gaukara utasu amara dana otowaratu. Nono yabai, Nana yanu gaukara utatane Yesuma wei.  
\v 28-29 Yesuma emaba wei, Nanu awe kowa nesiaro yana nabai ibebaitaba Nanu Babama Naba yawoeta orofa mai enanari yaba matatane.  
\v 30 Nanu yawoeta orofa iro Nanu kaiyobai yaubeda Naini ietaini ogoini ifote i Isaraero uwaranu abua tuero (12) yawoteiboita wei.   
\s1 Yesu Fitama Dawa iwata me webisu sina we bou ui  
\p
\v 31-32 Yesuma Fitaba wei, Saimoni, emema uiti tai tore sanaitaro oyauma ifuru afuru ure wawanasu enanari seitani danu ununa ya uwaranu imueta mune ma iwawa iwawa ufiro yanu kobere imueta me sibie utasuba iba Godibai aba guriguri une. Nono duburo anu imueta Godibai ma owefasuna anu aiyemutunu imueta ma kimu ua wei.  
\v 33 Weiro Fitama wei, Dera Waria Amara, Aini diburaro animau. Aini ba uimau wei.  
\v 34 Eno weiba Yesuma wei, Fita, Nanu sina naua wei. Kokora awona da webiro a ko Nanu ifu rarogonu ma feareda meo webasu wei.   
\s1 Fausini yoateini kaiya  
\p
\v 35 Yesuma Danu iwata ueta uwaraba wei, bodere ya siaia uero fausini yoateini mui sadoroini munawa me anita. Yanu anetana ido aba me wei? Weina yanu anetana kobererau weita.  
\v 36 Weitaro wei, awonana i fausini yoate bobo uwara ina woure aniawete ba kaiya me uwara emanu dei barueta emebai oiya ue mawete oi muawete ba kaiya oiya uawe wei.  
\v 37 Eno weite nono wei, Godinu bukama Naba eno wasu, Dawaini i siosawere uwaraini arotorowa waita wasu. Ido Godinu bukaro Naba eno owawa ue odiba enanari ufisu wei.  
\v 38 Yesuma eno weiro weita, Dera Waria Amara, ba kaiya sadeina ewado ea weitana wei, idoya sina kodiawe wei, Yesuma.   
\s1 Yesu Gesemani beataro guriguri utebi  
\p
\v 39 Yesuma suroma itarite Danu Oriwa maidaniro anebi i enanari aniro Danu iwata ueta uwarama Danu buribi anita.  
\v 40 Iro ane farite emaba wei, guriguri uawe utebe siosawere ueta muotote siosawere uotoa wei.  
\v 41-42 Eno weite ema ekodite fuyaratu ani. Anite yajigoma jegirari uite guriguri uteda wei, ewa siosawere wakiki ogo ari, ewa wai Nabairoma mubae ufasuna mua wei. Weite wei, Nanu unu da uate Anu unu ua wei.  
\v 43 (Ureroma aneru Yesubai me ari ue tararite Yesu ma kimu ui.  
\v 44 Ma kimu uiro Yesuma neno oferi derawere woureda guriguri uegou uiba Danu oferoma wadada onono ari nasiniro itari.)  
\v 45 Yesuma guriguri utebe ekodite uyarite Danu uwarabai anina emanu nenonu imueta urumu derawere uiba nauta ainibitaro eri.  
\v 46 Ema erite wei, aneba nauta ainibinita? Uyawete guriguri uawe utebe siosawere ue ereta yabai faosoro siosawere uotoa wei.   
\s1 Yesu yabae budari uta  
\p
\v 47-48 Yesuma eno weina eme fefera ido fata. Judasi mui tuero (12) iwata ueta amara dawa ko fariro i uwara nesia danu buribi fata. Fataro Judasima Yesubai farite Yesu koku uiba Yesuma wei, Judasi, i Ba Eme Sini Amarabai koku utasuna ina eno uraneta uwara woure fareda utasu wei?  
\v 49 Danu iwata ueta uwarama i uwaranu imueta iwata utate Yesuba weita, i uwaraini urafeisi? Yanu ba kaiya ewado ea weita.  
\v 50 Eno weitaro mui iwata ueta amarama ba kaiya munite i dera fuyo ode sina weta amaranu gaukara amaranu banibira ome umane kosari uiro nasiniro itari.  
\v 51 Eno uiro Yesuma wei, eno da uate kodia weite i gaukara amaranu ome burite ma wiroi.  
\v 52 Eno uite Yesuma dera fuyo ode sina weta uwaraini dera dubu su forisimani kafitenini Ju dera uwaraini, Dawa mubitaita uwaraba wei, Na waira ueta amara me rairo aneba ba kaiyaini goreini woure farita wei?  
\v 53 Eno weite wei, i dera dubu suro yabai ibebitararo i kowaro Na budari utawa utate nono awonana yanu kowa. Awonana seitanima buna utasu wei.   
\s1 Fitama Yesunu ifu we ma feari  
\p
\v 54 I uwarama Yesunu agero mune anita. I dera fuyo ode sina weta amaranu suro ane oita. Ema ko anitaro Fitama yafawere emanu buribi ani.  
\v 55 I uwarama su teteuro ina moatate ina gigirariro yautaro Fitaini iro ane yauri.  
\v 56 Iro yaubitana ina ario uiro mui gaukara arumama Fita erebe wei, ewa amaraini Yesuini arotorowa ibisi wei.  
\v 57 Weiro Fitama wei, aruma, i Amara na iwata me wei.  
\v 58 Yaubebe mui amarama wei, dana Yesunu mui iwata ueta amara wei.  
\v 59 Yaubebe yaubebe mui amarama wei, ewa amarana Gareri amaraba dawaini Yesuini arotorowa ibisi wei.  
\v 60 Weiro Fitama wei, amara mera, anu sina na iwata me weina kokora ido wei.  
\v 61-62 Weiro Yesuma owere Fita erina Fitama Yesunu kokora webiro a ko Na rarogonu me webasu wei sina imuite wawaro anite i wei.   
\s1 Yesu we irutate ure yanae uta  
\p
\v 63 Yesu budari uta uwarama Yesu iruteda isuma uta.  
\v 64 Emana Yesunu diti wadiama garari utate agema ureda weita, anama A urinu? We bou uaro naufe weita.  
\v 65 Eno weitate moana siosa sina faiyawere weitate Dawaba siosawere uta.   
\s1 Yesu i dera kanisoro uwaranu iboro inaibi  
\p
\v 66 Wai urina Ju uwaranu dera kanisoro uwarama mitini uta. I dera fuyo ode sina weta uwaraini tarawatu tisa uwaraini dera uwaraini ema nesia kanisoro mitini ufitae utate Yesu mune emanu kabesiro anita.  
\v 67-68 Ane fatate Yesuba weita, Ana Kerisona wiaro naufe weita. Weitaro Yesuma emaba wei, ina wemaro Nanu sina da nauforo yaba wenauereta wemaro moko weboita wei.  
\v 69 Eno weite wei, awonaroma i Ba Eme Sini Amarama i buna derawere Godinu banibira age afuro yaufiro efoita wei.  
\v 70 Weiro weita, Ana Godinu Amara wasu weita? Weitaro Yesuma wei, ba waita wei.  
\v 71 Eno weiba weita, Danu wenu sina nausiba mui wawei weta uwaranu sina da naufeisi weita.   
\c 23  
\s1 Yesu Faeratinu iboro inaibi  
\p
\v 1 I kanisoro uwara nesia uyatate Yesu Faeratibai woure anita.  
\v 2 Ane fatate eno wawei weita, ewa amarama Ju uwara nesia irutasute takesi oi i Romani gaemani uwaraba da mawe wasute Nana Keriso, yanu Dera Yawoeta Amara wasu, eno wawei weita.  
\v 3 Eno weitaba Faeratima Yesuba wei, Ana i Ju uwaranu dera yawoeta amara aba me wei? Weina ba wasu, Yesuma wei.  
\v 4 Weiro Faeratima i dera fuyo ode sina weta uwaraini i guruguru ubita uwaraba wei, i amarabai kerere atanawa une wei.  
\v 5 Eno weiba derawere weita, i Judia orofa uwara, Gareriroma ewaro, i eme nesiabai we mawetu utasute kerere utasugo weita.   
\s1 Yesu Erodinu iboro inaibi  
\p
\v 6 I kanisoro uwara eno weitaro Faeratima nauite wei, i amarana Gareri amara aba me wei?  
\v 7 Weina aiwia weitaba Yesu Erodibai woure anibitae Faeratima wei, Erodima Gareri orofa yawoteda i kowaro Jerusaremu suro ibiba Yesu dawabai woure anibitae wei. Weiro enanari uta.  
\v 8 Erodima Yesu efie utebe i kowaro dana Yesu erite yaru ui. Erodima Yesunu buna ueta sina nauite danu ununa Yesunu buna ueta efie ui.  
\v 9 Enoba Erodima buna ueta efie uteda Yesuba wenauereta faiyawere weiro Yesuma moko wiawa ui.  
\v 10 Erodima eno weina i dera fuyo ode sina weta uwaraini tarawatu tisa uwaraini emana wawei derawere weita.  
\v 11 Erodini danu ami uwaraini Yesuba siosawere uteda irutate kobere wadia barue oitate Yesu ma owetate Faeratibai siaia uta.  
\v 12 Bodere Erodini Faerati moko moko wasai ue matanebisina nono i kowaro naiye we matasi.   
\s1 Yesu uifisua weita  
\p
\v 13-14 Faeratima weiro i dera fuyo ode sina weta uwaraini tarawatu tisa uwaraini i uwara nesia dawabai fataro emaba wei, ewa amara nabai oitate Dawa i Ju uwara nesiabai kerere utasu waitaba Dawa wenauegou unete Dawabai kerere atanawa une.  
\v 15 Enanari Erodima Dawabai kerere atanawaba Dawa nabai moko ma owere siaia usinu wei. Dawabai kerere meba da ma uimau.  
\v 16 Kerere meba wemaro isuma derawere ufitaro me anibisu wei.  
\v 17 (I Ju uwaranu baeta edono, mui oya mui oyaro Faeratima dibura amara demurai ma uregari utebi.)  
\v 18 Faeratima weiba i uwara nesia derawere weita, i amara ma uiate Barabasi yabai odia weita.  
\v 19 (Barabasi dawa Ju uwaraini Romani gaemani uwara urafitae weite eme ma uiba iba diburaro oitaro ibi.)  
\v 20-21 Faeratima Yesu ekodifie uite i uwara nesiaba weina derawere weita, korosiro odia! Korosiro odia weita!  
\v 22 Faeratima sadei weite nono wei, ane kerere usinu? Dawabai kerere meba da ma uimate wemaro isuma ufitaro me anibisu wei.  
\v 23-24 Weiro Dawa korosiro odia eno derawere webitaba Faeratima Yesu uieta sina ido wei.  
\v 25 Ido weite Barabasi, i urane yarane ma uieta amara ma uregari uiro i uwarama emanu unu Yesuba ane ufitae utaba Faeratima Yesu emaba mai.   
\s1 Yesu korosiro ikokoma ure badami ue oita  
\p
\v 26 I uwarama Yesu mune anita. Mune anebitana Sairina orofa amara Saimoni waiyaroma are fariro etate i amara Yesunu korosi woufie weita. Eno weitaro i amara korosi wourite ema anitaro i amara Yesunu buribi ani.  
\v 27-28 Uwara faiya faiyawere emanu buribi anita. Sorara utebita awetaboini anitaro Yesuma owerite emaba wei, ya Jerusaremu su awetabo, Naba i da wiawete yaini yanu koiniboroba i wiawe wei.  
\v 29-30 Mui kowaro siosa kowa ido fafiro emema webitaita, i aruma amara me awetabo yaru ufitaita, i dera maidanini kiki maidanini ureiawete ya ma tafuawero uifene webitaita wei.  
\v 31 Na, i waratasu tata bobo ana ari eno utaitaba ya i sibu ana ariba ane ufitaita, Yesuma eno wei.  
\v 32 Mui amara sadei, kerere ue diburaro ibeta amara sadeini Dawaini ma uifitae woure anita.  
\v 33 Ane kofiri tai torowa webaita orofaro fata. Fatate Dawa korosiro oita. Mui diburaro ibeta amara enabira afu korosiro oitate mui diburaro ibeta amara enabira afu korosiro oitate Yesu abana korosiro oita.  
\v 34 Eno utaro Yesuma wei, Baba, emanu ueta iwawa utaitaba emanu ba me ueta da imua wei. Danu wadia anama mubisu we imutate iba kasi uta.  
\v 35 I guruguru ubita uwarama inaibeda erebitana i Ju yawoeta uwarama irue weita, Dana eno wei, Nana Godinu ma wiroe mune aneta Amara, Godinu Keriso Na, eno weiba moana uwara ma wirotebi enanari Danu torowa ma wirofi weita.  
\v 36-37 I ami uwarama Dawa iruteda diririwere ana tai dumamu Dawa ifie matate weita, Ana i Ju uwaranu dera yawoeta Amarana anu torowa ma wiroa weita.  
\v 38 Mui sina, ewana i Ju uwaranu dera yawoeta amara, eno owawa ue odiro korosi deiro ure oitaro ibi.  
\v 39 Mui diburaro ibi amara, dawa enabira afu korosiro ibeda Yesuba wei, Ana Godinu Keriso aba me? Aini waini ma wiroa wei.  
\v 40-41 Eno weiro etei mui amarama dawaba we kakara uteda wei, eno da wia. Ana anu ueta siosaba uitasude Godiba iya uyarasu aba me wei? Eno weite wei, aini naini wana siosawere utuba iba aidoro uitaitu. Nono ewa amarana siosawere utawa ui.  
\v 42 Eno weite wei, Dera Waria Amara, Anu yawofasu kowa fafisuna na imuegou ua wei.  
\v 43 I amarama eno weiro Yesuma dawaba wei, awonana aini Naini i kobere Faradisia waita orofaro ane ibifutu wei.   
\s1 Yesunu uieta  
\p
\v 44-45 Kowa otoro nono kowa ario utawa dumu sini ibiro kowa ane osugari uite ane abanaro farina kowa nono ario ui. I dera dubu su garari ueta wadia deiroma abanaro babare eminaro itari.  
\v 46 Nesia eno uiro Yesuma derawere wei, Baba, Nanu imumu Anu age duro odine weite ido ui.  
\v 47 Eno uiro ami kafiteni amarama erite Godinu ifu we ma derawere uite wei, ewa amarabai kerere me. Dana kobere amara wei.  
\v 48 I efitae guruguru ubita uwarama nesia etaro Yesu uiba owetate neno siosa derawere uteda suro wo bogaru ue anita.  
\v 49 Yesunu domayamutuini i awetaboini Gareriroma Yesunu buribi ata. I ata uwara nesia iro inaibeda i ueta sineta nesia eta.   
\s1 Yesunu uri ueta kowa  
\p
\v 50-51 Mui Arimatia su amara Jousefa dana kanisoro amara, dawa Godinu sina nautebi. Dana kobere amara. Dawa Godinu yawotasu kowa yawotebi. I kanisoro uwarama Yesu ma uifitae weitaro dawa unutawa Yesu ma uieta.  
\v 52-53 I amarama Faeratibai anite Yesunu ofe nui weite Yesunu ofe korosiroma munite inawere wadiama wayari. Wayare me sinite reka gebiro uri oeta erabo, mui amara iro odawa, dana Yesu i kabesiro woure ane odi.  
\v 54 Odiro i sabate kowa ue bou ueta kowa me sibiro sabate kowa ido fafie ui.  
\v 55 Yesunu buribi i Gareriroma ata awetabo Jousefanu buribi anitate i uri oeta kabesi eta.  
\v 56 Etana Yesunu ofe iro oitaro eta. Etate owetate suro anita. Ane fatate Danu uri oeta bonanawere faudaini ogoini ue bou uta. Eno utaro sabate kowa fariro Godinu tarawatuba imoita.   
\c 24  
\s1 Yesu uietaroma uyari  
\p
\v 1 Sabate kowa me siniro waikukuro i awetaboma emanu ue bou ueta fauda mutate i uri oeta kabesiro anita.  
\v 2 Ane fatana i dera garari ueta gebiro ifegari ubiro eta.  
\v 3 I gebiro ifegari ubiba eraboro itatate etana Yesunu ofe me!  
\v 4 I awetaboma inaibeda imutebitana inakeowere wadia bobo amara sadei emabai ido inaibisi.  
\v 5 Ido inaibisiba iya uyatate tafu derawere uta. I amara sadeima weisi, i me ibeta amara uieta uwaranu kabesiro aneba doberaita weisi?  
\v 6-7 Weisite Dawa ewado me. Dawa uyarite me ibinu weisi. Ya nesia Gareri orofaro ibitana Dana ya uwaraba wei, i Ba Eme Sini Amara siosawere uwaranu age duro odifitaro Dawa ma uifitaro kowa rarogonu me sibiro Dawa nono uyafisu eno wei. Ina imutaita aba me weisi?  
\v 8-9 Eno weisiro Danu sina imutate uri oeta kabesi ekoitate anita. Ane Yesu Danu iwata ueta uwara nesia irewenini (11) nono moana uwarabai i eta sina nesia weita.  
\v 10-11 I awetabonu ifuna Meri Megidarina Joanaini Jeimisinu danua Meri moana awetaboini emana i afosoro uwarabai i sina weitaro nautate ba sina aba me ari we imutate iba imutawa uta.  
\v 12 Fita danu torowana efie uri oeta kabesiro durami ue ani. Ane farite tafu uteda erina uri oeta erabo ubarero i wayareta wadia torowa ibiro erite owerite i nesia nenoma imuteda suro ani.   
\s1 Yesuini Danu iwata ueta amara sadeini Emeiasi dabaro anebita  
\p
\v 13 I kowana fura derawere Sade, Godinu sina naueta amara sadei Jerusaremu suroma Emeiasi suro anisi.  
\v 14 Dabaro anetana Yesu me sini sina sina we mataneda anebisi.  
\v 15 Eno we mataneda anebisina Yesu, Danu aika, ema ataniro emaini uruama anita.  
\v 16 Eno aneda Godima i amara sadeinu ewana Yesu eno iwata ueta daba garari uiba Yesu iwawa usi.  
\v 17-18 Yesuma emaba wei, ane sina wewe anaisi wei? Weiro i amara sadeima neno siosa derawere usite ibo aika usite mui amara danu ifu Kiriofasi, dana Yesuba wei, Jerusaremu su uwara nesia i yaina kowaro kawai kewekewe utaro nono ana kamama fafate banono i ueta a iwata me wei?  
\v 19 Weiro Yesuma emaba wei, ane ueta wei? Weiro weisi, Yesu Nasareta amaraba waisi. Dana Godinu bunawere we bou ueta amara. Danu buna ueta utebiro Godini emeini Dawa kobere Tisa Amara we imutebita.  
\v 20 Yanu dera fuyo ode sina weta uwaraini Ju yawoeta uwarama Dawa uifie weitate Romani gaemani uwaranu agero oitaro korosiro oita.  
\v 21 Eno utaro yana we imusi, Dawa Isaraero uwaranu ma wiroeta amara we imusi. Dawa uina awona kowa rarogonu me sininu.  
\v 22-23 Yanu moana Godinu sina naueta awetaboma yaba sina weitaro neno kirifu uisi. I awetaboma awona waikukuro Danu uri oeta kabesiro anitate owere fare yabai weita, Danu ofe iro ibawa me erisi. Nono tube tuberoma erisina aneru sadeima yaba weisi, Dana uyarinute me ibinu weisi weita.  
\v 24 I awetabo eno weitaba moana eme efitae durami ue anitate eritana i awetabonu weita sina enanari erita weisi.  
\v 25 I amara sadei sina eno webisiba Yesuma emaba wei, ya beforo me uwara! Godinu we bou ueta uwarama Godinu bukaro sina faiyawere owawa ue oitade aneba i sina eregou utawa utaita?  
\v 26-27 Godinu we bou ueta uwarama eno weita, Godinu Kerisoma neno oferi woufite uifite nono uyafite Danu kobere araetawere orofaro manibisu weita, Yesu eno weite Mosesini Godinu we bou ueta uwaranu bukaro ibinu sina Dawaba weita i sina emaba weda i sinanu ubi wegou ui.  
\v 28-29 Yesuma emaba eno webina i natofo suro fafitae uta. Fafitae utaro Yesuma ema serigari uite fare anibie uina bana weisite weisi, dumu sibisuba ewado wabai aibasu weisi. Eno weisiro Yesuini emaini emanu suro anita.  
\v 30 Suro ane fatate ieta ifitae yautaro Yesuma Godibai guriguri uite ieta munite ma birabiarite nata nata ui.  
\v 31 Eno uina emanu diti iroaro ui. Ido kobererau uiro esite Dana Yesu iwata usi. Dawa iwata usiro Yesu emabairoma me ari ui.  
\v 32 Eno uiro i amara sadei emanu emanu eno weisi, dabaro araisiro Godinu bukaroma sina wenuro wa neno kobererau usinu weisi.  
\v 33-34 Idoba i amara sadeima emanu su ekoisite iroma Jerusaremu suro owere anisi. Jerusaremu suro ane fasiro Yesuma iwata ueta uwara nesia irewenini (11) Yesunu buribi aneta uwaraini i amara sadeiba weita, yanu Dera Amara uyarinu. Dawa Fitabai farinua weita!  
\v 35 Eno weitaro i amara sadeima i dabaro aneda ane eta i sina weisite Yesuma buredi ma birabiarinuro ido wa Dawa iwata uitu weisi.   
\s1 Yesu Danu iwata ueta uwarabai Danu torowa fariro eta  
\p
\v 36 Sina eno weisina Yesu Danu aikana me ari uite fare emabai inaibeda ario sina wei.  
\v 37 Eno uiba i uwara nesia imumu enono utaisi we imutate iya derawere uyata.  
\v 38 Yesuma emaba wei, aneba iya uyaraitate Na iwawa iwawa utaita?  
\v 39 Nanu burini ageini eawe. Ina Na. Agema Na buriawete iwata uawe. Imumuna taini damaini me. Na taini dama bobo eawe wei.  
\v 40 Eno weite Danu buri age iwiji awiji ema efitae mawetu ui.  
\v 41 Yesuma eno uiro i uwarama yaru derawere uteda iwawa utate ina imutaro Yesuma emaba wei, yabai ieta ibinu aba me wei?  
\v 42 Weiro Dawaba abuna erio egi mataro i.  
\v 43 Ie me siniro eta.  
\v 44 Yesuma emaba wei, imue eawe! Aubokona yabai ibeda Mosesini i we bou ueta uwaraini Samusi bukaro Naba webita sina enanari ufisu webitara.  
\v 45-46 Ina ido usinu weite Godinu buka sina we ma boroyareda emaba eno wei, boderewere uwarama eno owawa ue oita, Godinu Kerisoma neno oferi ufite uifiro kowa rarogonu me sibiro nono uyafisu.  
\v 47 Godinu wiroeta sina i orofa atata uwara nesiabai we inareibitaita. Anama danu neno neno dubena afu sabisuna Godima danu ba me ueta mubite imutawa ufisu. I sina Jerusaremu suroma aboro aboro we inareibitaita eno owawa ue oita.  
\v 48 Emanu owawa ue oita enanari usinuba yana eraita.  
\v 49 Godinu we bou ui enanari Danu Imumu Kotofu, yabai siaia umaro tarafisu. Ewa natofo suro ibiawero Dawa tarafite Godinu buna yaba maegou ufisu wei.   
\s1 Godima Yesu urero woure mani  
\p
\v 50-51 Yesuma emaba eno weite Jerusaremu suroma Beteni suro aniro Danu buribi anita. Duburo Yesuma Danu age ramameda i uwara we ma kobererau utebiro Godima Dawa urero wo mani.  
\v 52 I uwara ido owetate yaru derawere uteda Jerusaremu suro anita.  
\v 53 Ane fatate ainewaure dera dubu suro anebitate Godinu ifu we ma derawere utebita.