\id JHN NT0097.JN Yareba N.T. - Weimer 9-JAN-87 
\h JONINU 
\toc1 JONINU OWAWA 
\toc2 JONINU 
\mt1 JONINU OWAWA  
\c 1  
\s1 I sinana wiroeta  
\p
\v 1 Boderewere eme ibawa kowaro i Sina ibebi. I Sinana Yesu Keriso, Dana Godibai ibebi. I Sinana Godi.  
\v 2 I eme ibawa kowaro i Sina Godibai ibebi.  
\v 3 Iro ibeda Dana nesia ubu ui. Godima weiba Yesuma i ememetu nesia Danu aika ubu uiro i ememetu nesia ema me farawa uta.  
\v 4 I me ibene ibene ibetana Yesu, Danu. I me ibetana ario ari. Emema i ariobai faraitate iwata utaita.  
\v 5 I ario derawere utasute dumu garari utasuro ido me ari utasu. Dumuma i ario garari utawa utasu.   
\p
\v 6 Godima Danu fo weta amara Joni siaia uiro fari.  
\v 7 Joni ido farite Yesunu arioba i ario sina webiro eme nesia naufitate Yesunu dabaro anibitae iba fari.  
\v 8 Joni dawa i webie fari i ariona me. I arioba webie fari.  
\v 9 I webi ba ariona farite eme nesia ario utasu.   
\p
\v 10 Dana i orofa atata ememetu nesia ubu uite nasiniro farite ibiro i orofa atata uwara nesia Dawa iwawa uta.  
\v 11 Dawa Danu Isaraero uwarabai farite ibiro eme faiyawere Dawa munawa utaro ya uwara ba torowa Dawa musi.  
\v 12 Yesunu sina naue muneta uwara Yesuma Godinu adarabu mune odite buna mairo Godinu adarabu sita.  
\v 13 Yesunu sina naue muneta uwarana nono danuamutuma reka muneta ari utaita. Emanu damamanu iwama ema ubu utawa, emenu unuma ema ubu utawa, emenu ofe ubu utawa, nono Godinu imuetama ema ubu uiro Godinu adarabu sita.   
\p
\v 14 I Sinana eme sinite yabai ibeda Dana yaba neno arama derawere uteda ba sina wei. Danu araetarau ya esi. Dawa Godinu amara ubiba Dana araetawere.   
\p
\v 15 Jonima Dawa erite i guruguru ubita uwaraba wei, nanu we amara ewadoni eawe wei. Nauawe eno we, nanu buribi fafisu we amara ido farinu wei. Dawa derawere, na ari me, boderewere Dawa ko ibebiro na duburo fare weya wei.   
\p
\v 16 Dana ya nesiaba neno arama utasute ainewaure durua uteda ma kobererau utasuro merau ibinisi wei.  
\v 17 Mosesima Godinu tarawatu yaba mairo nono Yesu Kerisoma yaba Godinu neno arama uetaini ba sinaini mai.  
\v 18 Mui amarama Godi erawa uiro i Danu Amara Ubi, Godini uruama ibi Amara, Dana Godi erite yabai nesia wei.   
\s1 Joni babataito amaraba sina  
\p
\v 19-20 Ju uwarama fuyo ode sina weta uwaraini i dera dubu su yawoeta Riwai waita uwaraini Jerusaremu suroma siaia utaro Jonibai ane fatate weita, a anaiya, weitaro Jonima bunawere wei, nana Keriso me wei. Godima Dawa siaia ufiro fafite i Ju uwara durua ufisu. Nana i amara me wei.  
\v 21 Eno weiro weita, anene, ana Iraija aba anaiya weitana nana Iraija me wei. Jonima eno weiro nono weita, ana i we bou ueta amara aba anaiya? Godinu sina webasu aba me weitana nana i dera we bou ueta amarana me wei.  
\v 22 Eno weiro weita, a anaiya? Wiaro naufete ane yanu ya siaia uitaro arisi uwarabai ane webero naufita weitate weita, a anu torowaba anene wasu weita?  
\v 23 Weitaro Jonima wei, Isaiyama naba weiya wei,  
\li1 nana i we bou ueta amara wei, enanari na eme ibawa orofaro eno watane, i Dera Waria Amaranu daba ma nabini ma rorowarau ue bou utebeawe watane,  
\p Isaiyama Joniba weiro Jonima i sina eno wei.   
\p
\v 24-25 I Ferosi uwarama siaia uta uwarama nono weita, nana Keriso me, Iraija me, i we bou ueta amara me wenude nono ade aneba babataito utasu weita?  
\v 26 Weitaro Jonima wei, nana ogoma babataito utatane wei. Yabai mui amara inaibinuro yana Dawa iwawa utaita wei.  
\v 27 Dana nanu buribi afiro Dawa Dera Amaraba Danu ibo nana da inare tumau wei.  
\v 28 Jonima i Jodani ogo etarafu Beteni suro babataito utebina i sina nesia ido fare weita.   
\s1 Godinu reka mamoe  
\p
\v 29 Etei mui kowaro Jonima eriro Yesu farebina Jonima wei, eawe, Godinu Reka Mamoe waita amara ido farinu. Dana i orofa atata uwara nesianu neno neno ueta mubite abe sabisu wei.  
\v 30 I amaraba eno we, Dana derawere. Dawa ko ibi. Na derawere me weya wei.  
\v 31 Aubokona Dawa iwawa uete ya Isaraero uwara nesia Dawa iwata ufoe iba ogoma babataito utebitara wei.  
\v 32-33 Nono Godinu Imumu Kotofuma ubani gasira ari ureroma tararite Dawabai tare ibiro erete we imue, bodere Godima naba wei, Nanu Imumu Kotofuma mui amarabai itafiro efasuna i Amara Dana Nanu Imumu Kotofuma babataito ufisu wei, eno we imue.  
\v 34 Jonima eno weite wei, na ereba Dana Godinu Amara ubi demurai iba yabai watane wei.   
\s1 Yesunu botai iwata ueta uwara  
\p
\v 35-37 Etei mui kowaro Jonini danu iwata ueta amara sadeini uruama inaibitana Yesu fare ani. Fare anebiro Jonima wei, Godinu reka mamoe waita amara eawa weiro danu iwata ueta amara sadeima nautate Yesunu buribi anita.  
\v 38 Anitaro Yesu owerite ema ereda wei, aneba araisi weiro weita, Rabai, i ifunu ubina Tisa.  
\v 39 Rabai, anu su aboro weita? Weitana wei, are eawa wei. Weiro Dawaini anitate Danu su eta. Kowa mare oto serigari uite ane abanaro inarite usinuba i kowana Dawabai ibita.   
\p
\v 40 I mui amarama Joninu sina nauite ani. I amaranu ifuna Enuduru. Dana Saimoni Fitanu dabue.  
\v 41-42 I amarama danu datae, Saimoni, doberebe atanite wei, i Mesaia Dana i Keriso, Dawa atanisi weite danu datae Yesubai woure fare odi. Odiro Yesuma Fita ereda wei, ana Joninu amara Saimoni. Aba reka ifu Sifasu maimau wei. Sifasuini Fitaini ifu demurai. I ifunu ubina kiki gebiro.   
\s1 Yesu Firifini Natania we muni  
\p
\v 43 Etei mui kowaro Yesuma Gareri orofaro anibie uite Firifi doberebe atanite wei, Nanu buribi ara wei.  
\v 44 Firifini Enuduruini Fitaini emana Besaida su uwara.  
\v 45 Firifima Natania doberebe atanite wei, Mosesini tarawatu bukaini i we bou ueta uwaranu weita amara atanisi wei. Jousefanu amara Yesu Nasareta su amara atanisi wei.  
\v 46 Weiro Nataniama wei, dana Nasareta su amara wei? Iroma kobere amara da afisu weite Dana i Keriso me wei. Weiro Firifima wei, are ea wei.  
\v 47-48 Arebitana Yesuma Natanianu areta ereda wei, eawe, ba Isaraero amara ewado, dawabai meo me weiro Nataniama wei, anene na iwata utasu wei? Weiro Yesuma wei, i boruba ana ubiro inaibainuro Firifi abai sau ane farawa usinuro Na ko a ene wei.  
\v 49 Weina Nataniama wei, Rabai Ana Godinu Amara. Ana ya Isaraero uwaranu Dera Yawoeta Amara wei.  
\v 50-51 Weiro Yesuma wei, anu boruba ana ubiro inaibeta enete weneba iba eno imutasu? Mui buna ueta derawere ewa ari me duburona derawere efasu wei. Weite nono emaba wei, Nanu ba sina nauawe wei. Duburo ure eba ufiro Godinu aneruma na, Ba Eme Sire Amarabai tarareibitate urero amutebitaro efoita wei.   
\c 2  
\s1 Keina suro mui amara aweta muni  
\p
\v 1 Kowa sadei me siniro Yesunu danua mui aweta muneta amaranu ogaroba Gareri orofa Keina suro ane yaubi.  
\v 2 Yesuini danu iwata ueta uwaraini waya youtaro iro ane yaubita.  
\v 3-4 I ogaro itebita uwarama waini ie me sitaro Yesunu danuama Yesu Dawaba wei, wainina me sininu weiro Yesuma wei, baya aneba Nabai wenauerasu? Nanu kowa farawa oide iba durua da umau wei.  
\v 5 Weiro nauite i ogaro utebita gaukara uwaraba wei, Dana sina ane webisuna enanari uawe wei.   
\p
\v 6 Dera gebiro okia sikisi (6) inaibita. Kikiratuna me, yafararabo dera kasa okia ari sikisi inaibita. Ju uwarama ogo totate emanu kakara uroeta i ogoma urota.  
\v 7 Yesuma wei, i inaibinita okia ogo adu uawe weiro enanari utaro wate fata.  
\v 8-9 Yesuma nono wei, kikiratu toawete ogaro yawoeta amaraba mawero ifi wei. Weiro enanari utaro i ogaro yawoeta amarama kikiratu i. Ie erina i ogo ido waini siniro aboroma fari dawa iwawa ui. (I ogo tota gaukara uwarama iwata uta). I ogaro yawoeta amarama ite weiro aweta muneta amara dawabai fari.  
\v 10 Fariro i ogaro yawoeta amarama wei, ewa wainina kobererau wei. I ogaro saneta uwaranu baetana aika. Kobere waini botai mataitaro ie dia uraitana duburona i aramawere waini mataita wei. Anu kobere waini botai matawa usinute nono duburo masinu wei.   
\p
\v 11 I buna uetana Yesunu botai buna ueta. I buna uetana Gareri orofa Keina suro uite Danu dera buna ma boroyariro Danu iwata ueta uwarama Dawa imuegou uta.   
\p
\v 12 Yesu eno uite Keina su ekodiro Dawaini Danu danuaini Danu daburetaini Danu arumamini Danu iwata ueta uwaraini Kafenamu suro tanita. Tare fatate moana kowa iro ibita.   
\s1 Yesu dera dubu suro ani  
\p
\v 13 Godima Isaraero uwara Ijifiroma woure aneta ogaro kowa fafie uiba Yesuma Jerusaremu suro mane fari.  
\v 14 Mane farite dera dubu suro amuite erina moana uwarama borumakauini mamoeini ubanini oiya ue mataro moana uwarama oi kaiyobai yautate oi moko mae matanebitaro eri.  
\v 15 Erite na munite egi ureta na ari uwanite i uwaraini egini yoweriro wawaro itata. I oi moko mata uwaranu kaiyo ma regari uiro oi fitata ui.  
\v 16 Eno uteda i ubani oiya mata uwaraba wei, ewa nesia woure aniawe wei. Nanu Babanu suro sitowa su ari da uawe wei.  
\v 17 Eno uiba Danu iwata ueta uwarama imuta. Godinu bukaro i sina eno ibinu, Godinu su imuegou utataneba uimau, i sina eno ibiba iba eno imuta.   
\p
\v 18 I Ju uwarama Yesuba weita, ane buna ueta ufaro ereda Ana Dera Amaraba iba ewa gaukara eno usinu iwata ufeisi weita?  
\v 19 Weitaro Yesuma wei, ewa dera dubu su ma jugari uforo nono kowa rarogonuro nono ubu umau wei.  
\v 20 Weiro weita, ewa dera dubu su oya foti sikisi (46) ubu utedibebita nono anu aikana i kowa rarogonuro ubu ufae wasu weita?  
\v 21 Eno wei ina Yesuma Danu ofe ububa wei.  
\v 22 Duburo uietaroma uyariro Danu iwata ueta uwarama Danu wei sina imutate i sinaini Godinu bukaini naue imue uta.   
\s1 Yesu eme nesia iwata utasu  
\p
\v 23 Yesuma Godima Isaraero uwara Ijifiroma woure aneta ogaro kowaro Jerusaremu suro ibebiba moana uwarama Danu buna ueta etate Dana Godinu Amara naue imue uta.  
\v 24 Yesuma emanu imueta iwata uiba iba emanu agero Danu torowa odawa ui.  
\v 25 Eme nesianu neno iwata uiba mui amarama Dawabai emenu imueta aika maika wiawa ui.   
\c 3  
\s1 Yesuini Nikodimasi  
\p
\v 1 I Ferosi uwaranu tarawatu yawoeta amara danu ifuna Nikodimasi Dawa Ju uwaranu kanisoro amara.  
\v 2 Dawa dumuro Yesubai are farite wei, Rabai, Ana Godibairoma farite Danu sina wasuba ya iwata utaisi wei. Godima A siaia uiba fare ewaro buna ueta utasuba Ana Godibairoma fari ya iwata utaisia wei.  
\v 3 Weiro Yesuma wei, aba ba sina wemaro naua wei. Anama reka danuama muneta ari da ufisuna Godinu kobere yawotasu orofa da efisu wei.  
\v 4 Weiro Nikodimasima wei, Dera Amara, anene reka danuama muneta ari ufisu weite wei, anene kikiratu sibite danu danuanu desini ubarero amufiro danu danuama dawa nono mubisu wei?  
\v 5 Weiro Yesuma wei, aba ba sina wemaro naua wei. Anama ogoini Godinu Imumu Kotofuma reka muneta ari da ufisuna Godinu yawotasu orofaro da anibisu wei.  
\v 6 Weite wei, danuama kuita mubiro itafite eme sibisu wei. Nono Godinu Imumu Kotofuma reka mubiro Danu Imumu mubite wiroeta reka ureroma mubisu wei.  
\v 7 Reka danuama muneta ari mubisu weneba imueta kirifu da ufaro wei.  
\v 8 Oyauma danu torowa fare anasuro danu rurua nautasute danu are aneta daba iwawa utasu, enanari Godinu Imumu Kotofuma mui amara reka munasuro iwawa utasu wei.  
\v 9 Weiro Nikodimasima wei, ewa anene wei?  
\v 10-11 Weiro Yesuma wei, aba ba sina wemaro naua wei. Ana Isaraero uwaranu mui tisa amara. Aneba iwawa utasu wei? Yanu eretaini imueta ibaiabaini aba waisiro munawaba iwawa utasu wei.  
\v 12 Ewa nasininu imueta aba wenero iwawa usinuba urenu imueta aba wemaro anene iwata ufasu wei?  
\v 13-14 Mui amarama urero manawa ui. Na, i Ba Eme Sire Amara iro ibebe nasiniro tarare wei.  
\v 15 Mosesima towi eme ibawa orofaro isuro aiyo odiro ana anama kimuwere imuteda etate uitawa uta, enanari i Ba Eme Sire Amara, Na, korosiro odifitaro anama danu naueta Nabai odifisuna urero me ibene ibene mubite ibeibisu wei.  
\v 16 Godima i orofa atata uwara nesia neno arama derawere uite Danu Amara ubi yabai maiba anama danu naueta Dawabai odifite dawa me sara da uifite urero me ibene ibene ibeibisu wei.  
\v 17 Godima Danu Amarana uwara fanisi mafie siaia utawa uite nono i uwara nesia Dawabai wirofitae iba siaia uiro fari wei.  
\v 18 Anama Danu naueta Yesu Kerisobai odasuna Godima dawaba koto da ufiro me sara da uifisu Godima eno wei. Anama danu naueta Yesu Kerisobai odawa utasuna Godima dawa koto daido uite uieta afu mune odiba dawana me sara uifisu. Godinu Amara ubi imutawa utasuba me sara uifisu, Yesuma wei.  
\v 19 Aneba eno koto ufisu? I orofa atata uwara nesiabai ario derawere fariro i uwara unutawa ario fareta. Emanu ueta sineta siosawereba iba emanu ununa dumu iba koto ufisu.  
\v 20 I siosa ueta utaita uwara ema unutawa ario. Emanu siosa ueta ario uosote ma boroyaosoba i ario unutawa utaita.  
\v 21 I kobere ueta utasu amarama i arioba iyarawa utasu. I arioro arasuba eme nesia eraitate Godima dawa durua utasuba eno utasua we imutaita, Yesuma wei.   
\s1 Yesuini Joni  
\p
\v 22 Yesuma eno weiro Dawaini Danu iwata ueta uwaraini Judia orofaro anitate ibitaro uwara emabai fatate babataito uta.   
\p
\v 23 I kowaro Jonima eme babataito utebi. Dera ogo Enoni suro Seiramu subai ibiba uwara faiyawere Jonibai fataro ema babataito utebi.  
\v 24 Joni dibura suro odawa me ibebi i odoro uwara babataito utebi.  
\v 25-26 Joninu buribi aneta uwaraini mui Ju amaraini emanu babataito aikaba iba yaranebitaro Joninu uwara dawabai fatate weita, Rabai, i Jodani etarafu yabai ibi amara, anu sina wei amara, imutasu? Eme nesia i amarabai faraitate babataito utaita weita.  
\v 27 Weitaro Jonima wei, i urero ibinu Godima i gaukara masinuba iba eno utasu, Godima da mafisuna uwara nesia eno da ufitaita wei.  
\v 28 Nana Keriso me wero nauta wei. Na ko siaia uiro farero Dawa nanu buribi fari wei.  
\v 29 I reka aweta bobo amara reka aweta muneta amara waitaro i reka aweta danu awerabai anasu i ari Yesunu uwara Dawabai anaita. Reka aweta muneta amarama wasuro danu domaya nauteda yaru utasu, enanari, Yesunu sina nauteda na yaru utatane wei.  
\v 30 Dana derawere sibiro nana kikiratu simau wei.   
\s1 I ureroma fari amara  
\p
\v 31 Danu kabesi ureroba Dawana derawerero eme ari me. I nasiniro ibinita uwarama nasini ibaiabai torowa waita. I ureroma fari amara, Dawa derawere.  
\v 32 Danu eretaini ueta nesia wasuro naue imutawa utaita wei.  
\v 33 Anama Yesunu sinana ba we imutasuna Godi Dawana ba we imuteda iba eno wasu.  
\v 34 Godinu siaia uiro fari Amarama Godinu sina wasuro Godima Dawabai Danu Imumu Kotofu maegou utasu wei.  
\v 35 Godinu neno Danu Amarabai ibinuba Godima ane ane nesia Yesunu age duro odi wei.  
\v 36 Anama Godinu Amarabai danu naueta odasute me ibene ibene ibeta munasu. Anama Godinu Amaranu sina da naufisuna i ibene ibene ibeta orofa da efisuba dawabai Godinu ibo ueta daido ibeibisu Jonima wei.   
\c 4  
\s1 Yesuini i Samaria aweta  
\p
\v 1 Uwara faiyawere Yesubai babataito utaro uwara faiya me Jonibai babataito uta weitaro i Ferosi uwara nauta.  
\v 2 (Yesuma i uwara babataito utawa uiro Danu iwata ueta uwarama deina ba i uwara babataito utebita).  
\v 3 I Dera Amara Yesuma i Ferosi uwaranu imueta iwata uite Judia orofa ekodite owerite nono Gareri orofaro ani.  
\v 4 Danu ani dabana Samaria orofa abanaro amune ture fare ani.   
\p
\v 5 Yesuma ane Samaria orofa suro fari. I su ifuna Saika. I suna yanu sirorari amara Jeikofuma danu amara Jousefaba bodere mai nasini gigiraribai.  
\v 6 Jeikofunu dauri ogo koto i nasiniro ibi. Kowa mare otoro reka fare serigari uiro Yesuma i ogo kotobai farite daba yafawere arebe ofe arama uiba yaubi.   
\p
\v 7 Mui Samaria su aweta ogo tofie fariro Yesuma wei, ogo toate mairo Na ima wei.  
\v 8 (Yesunu uwarana iro Dawaini yaubawa. Samaria suro ieta oiya ufitae anita. Yesu Danu aikaratu yaubebe i sina wei.)  
\v 9 Eno weiro i awetama wei, ana Ju amara. Aneba na Samaria su awetabai sina wasu wei? Aneba naba ogo mai ima wasu wei? Ju uwarama Samaria uwaraba sina wiawa utebaitaro nono aneba a naini sina webae wasu wei?  
\v 10 Weiro Yesuma wei, Godinu me maetaini i ogo mai ima watane amaraini a iwata ufarona nabai webaro aba i me ibene ibene ibeta ogo ari aba mamaro ifae wei.  
\v 11 Eno weiro i awetama wei, abai ogo toretana me. Ewa ogo nasini ubare nubowere ibinuba me ibene ibene ibeta ogo ari aboro tofasu wei?  
\v 12 Yanu baba Jeikofu, dawaini danu adarabuini danu borumakauini emana ewa ogo itaro i ogo koto yaba mai. Dawa kikiratu A derawere eno imutasu wei?  
\v 13 Weiro Yesuma wei, ana anama ewa ogo ifitaitana nono ogo nodo ufitaita wei.  
\v 14 Ana anama Nanu mamau ogo ifitaitana nono ogo nodo da ufitaita. Nanu mamau ogo gebiroro amutasu ubi erio ari, da yaraifisu. Enanari i ogo emanu nenoro ubi erio ari amufisu. I ogona me ibene ibene ibeta ariba da yaraifisu wei.  
\v 15 Weiro i awetama wei, Dera Amara, i ogo mai imaro ogo nodo da ufiro ewa ogo are da toreimau wei.  
\v 16-17 Eno weiro Yesuma wei, aniate anu awera woure ara weina na awera me wei. Eno weiba Yesuma wei, ba wasu wei.  
\v 18 Awera fai (5) munite ekodite awona anu suro aini ibinu amara anu awera meba iba ba wenu wei.  
\v 19-20 Eno weiba i awetama dawaba wei, Dera Amara, Ana Godinu we bou ueta Amara weite wei, yanu Samaria babamutu etei maidaniro guriguri utebita. Ya Ju uwarama Jerusaremu suro torowa guriguri uforo waita wei.  
\v 21 Weiro Yesuma wei, aweta, Nanu sina nauegou ua wei. Mui kowa fafiro etei maidaniro o Jerusaremu suro Bababai guriguri da ufitaita wei.  
\v 22 Ya Samaria uwara Godi iwawa utaitaba iba Godi ba guriguri utawa utaita. Ya Ju uwarama Godi iwata utaisi. Danu ma wiroeta Amara Ju uwarabairoma fariba iba Godi ba guriguri utaisi wei.  
\v 23 Reka kowa farinuba i Godi ba guriguri utaita uwarama Godi nenoma guriguri utaitana ina ba guriguri ueta idoni. Godi Danu unu i nenoma imue guriguri ueta uwara wei.  
\v 24 Godina kobere Imumuba ya erawa utaisiba iba Dawa yanu nenoroma guriguri utaisina ba guriguri utaisi wei.  
\v 25 Yesuma eno weiro i awetama dawaba wei, i Mesaia fafisu weitaro naue wei. Danu mui ifuna Keriso. Dawa fafite nesia ma boroyafisu wei.  
\v 26 Weina Yesuma wei, I Mesaiana Na ewado wei.   
\p
\v 27 Yesuma eno webina Danu iwata ueta uwara fatate etana Yesuini i awetaini sina we matanebisiro etate neno kirifu utate ya sina ane waisi we imuteda nono ya sina ane waisi wiawa uta.   
\p
\v 28-30 I awetama danu okia ekodite owerite suro ani. Ane farite su uwaraba wei, mui amarama nabai farinute nanu ueta sineta nesia wenuba Dana Keriso aba me, arawete eawe weiro i su uwara ido anita.   
\p
\v 31-32 I aweta eno utebina Yesunu iwata ueta uwarama Yesu Dawaba weita, Rabai, ieta ia weitana wei, Nanu ieta aika iba ya iwawa utaita wei.  
\v 33-34 Weiro weita, mui amarama ieta Dawaba masinuro isinu aba, eno we matataro Yesuma wei, Nanu ietana Godinu imuetaini gaukaraini Danu mai gaukara ue me simau, ina Nanu ieta ari wei.  
\v 35 Yesu eno weite wei, ya eno waita, sakara fo (4) me sibiro yanu beataro ieta ibaiabai daufeisi waitaro nono Nana yaba eno watane, i eme nesia eawe, emanu nenona ba sineta ieta ariba i daureta kowa ido farinu watane wei.  
\v 36 Anama daure fira fara utasuna moko muneta munasuro danu muneta uwarama me ibene ibene ibeta munaitaba iba i waieta uwaraini i daure fira fara ueta uwaraini yaru utaita wei.  
\v 37 I bodere ikiki sinana ba. I sinana eno, mui amarama waitasuro mui amarama daurasu, i sina eno wei.  
\v 38 Yesuma ewana kasei sina weda eno wei, yanu yo waitawa uta ememetu daufoe siaia ue wei. Aika uwarama yo waie me sitaro yana emanu waieta ememetu dauraitaba iba emaini yaini i gaukara uruama utaita wei. I sinanu ubina eno, moana uwarama Godinu sina we inaraitaro moana uwarama buribi areda i uwara mune Godibai odaitana emana gaukara uruama utaita wei.   
\p
\v 39 I awetama suro anite wei, mui amarama nanu bodere ueta sineta nesia wenu weiba moana su uwarama emanu imueta nesia Yesubai oita.  
\v 40-42 I Samaria uwarama Yesubai fatate bana weitaro emabai kowa sadei ibeda Yesuma ema we mawetu utebina i su uwara faiyawere emanu naueta Yesubai oitate i awetaba weita, ana i amaranu buna uetaini weta yaba weiro nausi weita. Nono Danu wenu sina nauegou utaisite Dana i orofa atata uwaranu ma wiroeta Amara iwata utaisiba iba nauegou utaisi weita.   
\s1 Yesu mui gaemani dera amaranu amara ma wiroi  
\p
\v 43 Kowa sadei me siniro wai uriro uyarite Gareri orofaro ani.  
\v 44 Auboko Yesuma wei, Godinu we bou ueta amaranu su uwarama dawa kakara utawa utaitate iba eno we imutaita, dawa dera amara me we imutaita wei.  
\v 45 Ane Gareri orofaro fariro i Gareri uwarama yaru utate ario derawere weita. I Gareri uwarama Jerusaremu suro Godima Isaraero uwara Ijifiroma woure aneta ogaro anitate Yesunu ueta nesia etate iba nono yaru uta.  
\v 46-47 Yesuma ane Gareri orofa Keina suro fari. Bodere i Keina suro Yesuma ogoma waini ui. Yesu iro fariro Yesu Judiaroma Keina suro farinu weitaro mui Kafenamu gaemani amara naui. I Kafenamu gaemani amaranu amararatu ofe derawere wourite uifie utebiba Yesubai are farite wei, arate nanu amararatu ma wiroa nui wei.  
\v 48 Weiro Yesuma wei, buna uetaini eretaini efasuna imufate da efasuna da imufasu wei.  
\v 49 Weina nui wei, Dera Waria Amara ara, nanu amara uifisu wei.  
\v 50 Weiro Yesuma dawaba wei, ania, anu amara wirosinuba ibifisu weina Danu sina kimuwere naue imuteda ani.  
\v 51 I ami amara owerite tanebina danu gaukara uwara dabaro marebe dawa atatate weita, anu amara merau ibinua weita.  
\v 52 Weitaro wei, abo kowaro wirosinu weiro weita, arena kowa oto serigari uite kikiratu ani i odona ofe wakiki me siniro wiroi weita.  
\v 53 Eno weitaba danu damama we imui, arena i kowaro Yesuma anu amara wirosinu weiba iba wiroi we imuiba dawaini danu su uwara nesia emanu naueta Yesubai oita.   
\p
\v 54 Yesuma Judiaroma Gareriro farite ewa buna uetaini mui buna uetaini i buna ueta sadei ui.   
\c 5  
\s1 Yesu mui amara mui ogo koru gigirariro ma wiroi  
\p
\v 1 Mui kowaro Yesuma Ju uwaranu mui ogaro ietaba Jerusaremu suro mani.  
\v 2 I Jerusaremu suro mamoenu fare aneta bebeto gigiraribai mesauratu ibi. Ju uwarama emanu sinaroma Beseda webita. Ofada fai (5) i mesau ode kara utaro ubita.  
\v 3 Oferi aika maika woureta uwara faiyawere i ofadaro ainibebita. Moanana buri anawa uwara, moanana buri bebeuwere aneta uwara, moanana diti basugari uwara, moanana buri age bedada buwere uwara. (I uwarama ogo taritari ufie yawotebita.  
\v 4 Mui kowa kowaro aneruma ogoro itareda ogo ma taritari utebina i botai ogoro itarebi amarama wirotebi).   
\p
\v 5 Nono mui amarana oya toti eita (38) oferi woureda me ainibebi.  
\v 6-7 Dawa eno ainibebiro Yesuma farite ereda wei, dawa kowa faiyawere ainibebasua we imuite wei, anu ununa wiroeta wei? Weiro i oferi wourebi amarama wei, Dera Waria Amara, ogo taritari utebasuna na ogoro woure tare oeta amara meba mui amara dawa ko itarebasu wei.  
\v 8-10 Weiro Yesuma wei, uyate anu wia muate ania weina i amara ido wiroiba uyarite danu wia munite ani. Danu aneta kowana sabate kowaba moana Ju uwarama dawa etate weita, awonana sabate kowa. Anu wia da woufate anibasu. Yanu tarawatuba kodia weita.  
\v 11 Weitaro i amarama wei, i Amarama na ma wirosinute wenu, anu wia muate ania wenu wei.  
\v 12-13 Eno weiro weita, anama aba anu wia muate ania wenu, weitana dawa iwata me. Yesuma i guruguru ubita uwaranu ubarero aniba i amara Yesu erawa uite iwawa ui.   
\p
\v 14 Duburo Yesuma i Dana ma wiroi amara dera dubu suro atanite wei, Nanu sina naua wei. Awona a wirosinuba nono duburo siosa ueta da ufaro ufasuna i wouri oferi ari mui oferi deranono wouosoa wei.  
\v 15 Weiro i amara Yesu kodite, i Ju uwarabai anite wei, Yesuma na ma wirosinu wei.  
\v 16 Weiro nautate Yesu sabate kowa ma siosa usinu we imutate Yesuba ibo uta.  
\v 17 Eno utaro Yesuma emaba wei, Nanu Baba kobere gaukara utebasuba Nana kobere gaukara utebatane wei.  
\v 18 Yesu eno weiba ubusi uyatate Yesu ma uifitae uta. Yesuma sabate kowa imutawa uite wei, Godina Nanu Baba weiba Godini Dawaini weda we ma arotorowa uiba iba ubusi uyata.   
\s1 I Ba Eme Sini Amara Dana dera yawoeta amara  
\p
\v 19 Yesuma emaba wei, Nanu ba sina wemaro nauawe wei. Godinu Amara Danu aika Danu imuetama gaukara utawa utasu wei. Danu Damamanu gaukara erasute utasu. Godima ane ane utasuro Danu Amarama enanari utasu wei.  
\v 20 Godinu neno Danu Amarabai ibinuba Danu gaukara nesia Danu Amarabai ibinuba Danu gaukara nesia Danu Amarabai mawetu utasu wei. Nono duburo mui buna ueta i bodere ueta ari me, buna ueta derawere Dawabai mawetu ufiro neno kirifu ufoita wei.  
\v 21 Godima uieta uwara ma uyarasuro me ibaita enanari Danu Amarama ana anaba me ibeta matasu wei.  
\v 22-23 Godima uwara koto utawa utasute i gaukara Danu Amaraba masinuro utasuba eme nesia Godi Dawa we ma kobererau uteda waitana enanari Yesu we ma kobererau uteda webitaita wei. Anama Danu Amara we ma kobererau utawa utasu enanari Danu Damama we ma kobererau utawa utasu wei.  
\v 24 Nanu ba sina wemaro nauawe wei. Ana anama Nanu sina nautaitate Na siaia ui Godi imutaitate me ibene ibene ibeta munaita. Munaitaba Godinu kotobai anawa utaitaba uieta serigari utaitate me ibene ibene ibaita wei.  
\v 25 Nanu ba sina wemaro nauawe wei, i kowa farinuba i reka wiroetana me, emana uieta uwara ari, ema Godinu Amaranu sina naufitate i reka wiroeta mubitate wiroeta me ibene ibene ibifitaita wei.  
\v 26 Godima me ibene ibene ibeta Imumuba Danu Amara mairo iba Danu Amarana me ibene ibene ibeta Amara.  
\v 27 Godinu Amarana Ba Eme Sini Amaraba Godima Dawa buna maiba eme nesia koto utasu wei.  
\v 28-29 Nanu sinaba neno kirifu da uawe wei. Mui kowa fafiro i uieta uwara nesia Danu sina naufitate uyafitate Danu kotobai fafitaro i kobere ueta uwarama me ibene ibene ibifitaro i siosa ueta uwarama i fanisi orofaro anibitaita wei.   
\s1 Yesuma emebai Danu torowaba ere wei  
\p
\v 30 Nanu imuetama utawa utatanero Godima Danu buna matasute wasuro nautatanete koto utatane wei. Nanu imueta kodatanete Godinu imueta dobere ereda utataneba iba koto rorowarau utatane wei.   
\p
\v 31 Nana Nanu sina wemauna Danu sina ba me weboita, weite wei, nono Nanu Babama Nabai wasu i sinana ba wei.  
\v 32-33 Yanu uwara Jonibai siaia utaro Jonibai fataro Nanu sina ba weiro nauta. Nautate owetate yabai fatate weitaro nauta Yesuma wei. Joninu sinana emenu sina.  
\v 34 Jonima Naba wasuna ina idorogo nono Nanu torowa i sina wataneba ya nesia Na naue imue ufote wirofoita wei.   
\p
\v 35 Yesuma nono wei, Joni dana nanefa ario ari uiba danu arioro inaibeda danu sina kowa faiya me nautate yaru uta.  
\v 36 Jonima i sina weda Na ma boroyariro danu ma boroyaretana derawere me. Awonana Nanu ma boroyaretana derawere ibinu. I ma boroyaretana Nanu buna ueta. Ima Na ma boroyaregou utasuro emema ereda Godima Na siaia ui iwata utaita wei.  
\v 37 Godima Na siaia uite Nanu gaukara kobererau wei. Yana Godinu wate tanana nautawa utaitate Dawa erawa utaita.  
\v 38 Danu siaia uiro ewaro tarari Amara imutawa utaitaba Godinu sina yanu nenoro ibawa utasu wei.  
\v 39 Yana Godinu buka eregou utaita. I bukaroma ere me ibene ibene ibeta muboe imutaitana i bukaro sinama Na yanu wiroeta Amara wasu wei.  
\v 40 Na imutawa utaitate Nabai yanu wiroeta fare munawa utaita wei.  
\v 41 Emema Naba kobere sina waitana Na unutawa i sina weta.  
\v 42 Yanu neno Godibai ibawa utaitaro Na iwata utatane wei.  
\v 43 Godinu ifuro yabai farero Na munawa utaita. Duburo mui amarama danu aika ifuro yabai fafisuna dawa muboita wei.  
\v 44 Yanu ununa emema ya kobere uwara webitae utaitate nono Godima ya kobere uwara weta ya unutawa utaitaba iba Godi imutawa utaita.  
\v 45 Yanu imuetana eno imutaita, Dawa Godibai ya wawei webisu. Nana yaba eno wawei da wemau. Yana Mosesinu tarawatu imuegou utaitaba ima ya wawei webisu.  
\v 46 Mosesinu tarawatu imutaitana ina Na imutaitaba Mosesi Naba bukaro owawa ue odi.  
\v 47 Danu owawaro sina ereda da naue imue ufoitana anene Nanu sina naue imue ufoita, Yesuma wei.   
\c 6  
\s1 Yesu i fai tausani (5,000) uwaraba ieta mai  
\p
\v 1 Duburo Yesuma Gareri mesau yofere ani. I mesaunu mui ifuna Taibiriasi waita.  
\v 2 Yesu ido yofere aniro uwara faiyawere Danu buribi anita. I uwarama Yesunu bunama ofe aika maika ma wirotebiro etaba Danu buribi anita.  
\v 3 Yesuma i mesau yofere ane amuite Danu iwata ueta uwara maidaniro woure mani. Maidaniro manebe mane yaubita.  
\v 4 Godima Isaraero uwara Ijifiroma woure aneta ogaro kowa ido fafie uiba iba eme faiyawere Danu buribi manita.  
\v 5 Manitaro Yesuma Danu ditima ere ane are uite i eme fefera ereda Firifiba wei, ieta anene oiya ufero i uwara nesia ieta ifitaita wei?  
\v 6 (Yesu Dawa iwataro nono Firifi me woure ereda iba eno wei).  
\v 7 Eno weiro Firifima wei, tueniti kinana (K20) aido me. Ima ieta oiya ufeisina ewa uwara nesia ifitaro aido da sibisu wei.  
\v 8-9 Weiro Saimoni Fitanu dabue, Enuduruma Yesuba wei, buredi faini (5) erio egi sadeiratuini mui amararatubai ibinua wei. Ibinurogo ina ieta derawere meba anene uwara faiyawere ieta ifitaita wei.  
\v 10-11 Weiro Yesuma wei, i uwara wiawero kabesi demurairo yaufita wei. I kabesina samarai bobo kabesiba i uwara eme torowa fai tausani (5,000) yautaro Yesuma i buredini erio egini munite Godiba guriguri uteda we ma kobererau uteda ma birabiarite nata nata uiro itaro dia uri.  
\v 12 Ie me sitaro Yesuma Danu iwata ueta uwaraba wei, iwo muduna nesia fira uawero me sara da ibifi wei.  
\v 13 Weiro buredi iwo muduna mutate bosio youtaro bosio tuero (12) wate fata.  
\v 14 I ieta ita uwarama i buna ueta etate weita, i amara, Dawana Godinu we bou uite fafisu wei amara idoni weita.   
\p
\v 15 Yesu Dawa iwata i uwarama Dawa agema mubitate emanu dera yawoeta amara ma uyafitae imutaba ema ekodite maidaniro mani.   
\s1 Yesu ogo deiroma Danu iwata ueta uwarabai anebi  
\p
\v 16 Yawiro Yesunu iwata ueta uwarama mesauro tanitate Yesu yawota.  
\v 17 Yawotebitana yawi siniro ekoitate boutiro amutate Kafenamu suro yofere anita. Anebitana dumu siniro Yesu daido farawa ui.  
\v 18 Anebitana oyau derawere fariro ufe derawere uyari.  
\v 19-20 Jawe ure ogo abanaro anebitaro Yesu ogo deiro inarebiro eta. Etaro emabai fafie uina iya derawere uyataro Yesuma wei, ewana Na, iya da uyawe wei.  
\v 21 Weiro i uwarama yaru uteda Yesu durua utaro boutiro amui. Amuiro ido emanu unu orofaro daido me ari utate sau fata.   
\s1 I uwara Yesu doberebita  
\p
\v 22 Wai uriro i mesau etarafu uwarama Yesu efitae guruguru utate yawota. Yesuini Danu iwata ueta uwaraini emanu guruguru ueta kabesi arena fatana bouti demurai ibiro eta. Nono Yesunu iwata ueta uwarama Dawa koitate emanu aika boutiro ane yofeta. I uwarama ina iwata utaba iba Yesu yawotebita.  
\v 23 Moana bouti Taibiriasi orofaroma ieta ita kabesiro fare inata.  
\v 24 I uwarama Yesuini Danu iwata ueta uwaraini etana meba ekoitate i bouti nesiaro amutate Kafenamu suro Yesu dobere yofeta.   
\s1 Yesuna wiroetanu ieta ari  
\p
\v 25 I uwarama mesau etarafu yofetate amutate Yesu doberebe atatate weita, Rabai, abododo ewado fari weita?  
\v 26 Weitaro Yesuma wei, Nanu ba sina wemaro nauawe wei. Nanu buna ueta imutawa utaitate nono buredini erio egini ie me sitaba iba Nabai ibifoe utaita wei.  
\v 27 Yanu nasini ibeta gaukara yajara ieta ari ina da uegou uforo wei. Nono i me ibene ibene ibeta ieta ari ina kobere gaukara uegou uawe wei. Godima Danu imueta Na, Ba Eme Sire Amarabai odiba Nana i me ibene ibene ibeta matatane, Yesuma eno wei.   
\p
\v 28 I uwarama Yesuba weita, anene Godinu gaukara ufero Godima ina kobererau webisu weita?  
\v 29 Weitaro Yesuma wei, Godinu yabai siaia ui Amara imutaitana ina Godinu gaukara wei.  
\v 30 I uwarama Yesuba weita, ane buna ueta ufaro efete A naue imue ufeisi weita? Ane gaukara ufasu?  
\v 31 Yanu babamutuma eme ibawa orofaro inareda ieta danu ifuna mana itebita. Godinu bukaro eno odi. Dana emaba ureroma itari ieta mairo ita, i bukaro eno ibinu weita.  
\v 32 Weitaro Yesuma wei, Nanu ba sina nauawe wei. Mosesima ureroma itari ieta matawa uiro Godima i urero ieta mai wei. Nanu Babama i ba ieta ureroma matasu wei.  
\v 33 Godinu ieta ureroma tararasuba i orofa atata uwarama ina ifitate me ibene ibene ibifitaita wei.  
\v 34 Weina Dera Waria Amara, i ieta yaba matebea weita.   
\p
\v 35-36 Yesuma emaba wei, Nana yanu me ibene ibene ibeta ieta. Ana anama Nabai fafitaitana i uwara osi da ufitaita wei. Ana anama Na imufitaitana ogo nodo da ufitaita, eno Yesuma weite wei, auboko Na yaba wene, yana Na eraitate imutawa utaita wene wei.  
\v 37 Nanu Babama moana uwara Naba matasuba i uwara nesia Nabai fafitaitana da we yowemau wei.  
\v 38 Na ureroma Nanu unu umane tararawa. Godinu unu umane tarare.  
\v 39 Godima Na siaia uiro Danu unu umane iba tarare wei. Godinu ununa eno, Danu Naba matasu uwara da we ma feamate i uwara nesia i dubu kowaro we ma uyamaro me ibene ibene ibifitaita wei.  
\v 40 Nanu urero ibinu Baba Danu ununa eno, ana anama Danu Amara efitate emanu naueta Dawabai odifitaitana me ibene ibene ibeta mubitaro i dubu kowaro ema we ma uyamau wei.   
\p
\v 41-42 Yesuma wei, Nana i ureroma tarari ieta weiba iba i Ju uwarama kamena weda weita Dawana Yesu, Jousefanu amara. Danu danuaini damamaini ya iwata. Anene wasu, Na ureroma tarane wasu weita?  
\v 43 Weitaro Yesuma wei, yanu torowa kamena da wiawe wei.  
\v 44 Eme me sara Nabai da fafitaro Nanu Na siaia ui Godima ema we ma youfisuna Nabai fafitaro i dubu kowaro ema we ma uyamau wei.  
\v 45 I we bou ueta uwarama eno owawa ue oita, Godima ema nesia we mawetu ufisu eno owawa ue oita. Ana anama Godi naufitate iwata ufitate Nabai fafitaita wei.  
\v 46 Eme nesia Godi erawaro i Godibairoma tarari Amara Danu torowa Godi eri wei.   
\p
\v 47 Nanu ba sina wemaro nauawe wei, ana anama emanu naueta Nabai odaitana me ibene ibene ibeta munaita wei.  
\v 48 Nana i me ibene ibene ibeta ieta wei.  
\v 49 Yanu yamamamutuma eme ibawa orofaro ieta danu ifuna mana itebitate uitebita wei.  
\v 50 I me ibene ibene ieta ureroma tarariba mui amarama ifisuna da uifisu wei.  
\v 51 Anama i ieta ifisuna me ibene ibene ibifisu wei. I ieta matataneba i orofa atata uwara nesia ifitate me ibene ibene ibifitaita, i ietana Nanu ofe wei.   
\p
\v 52 Yesuma eno weiro nautate emanu emanu weitate weita, i amara anene danu ofe mafiro yana ifene wasu weita?  
\v 53 Weitaro Yesuma emaba wei, Nanu ba sina wemaro nauawe wei. I Ba Eme Sini Amaranu ofeini iwaini da ifoitana me ibene ibene ibeta yabai me wei.  
\v 54 Anama Nanu ofeini iwaini ifisuna me ibene ibene ibeta dawabai ibifisuba i dubu kowaro dawa we ma uyamau wei.  
\v 55 Nanu ofena ba ieta. Nanu iwana ba ogo wei.  
\v 56 Anama Nanu ofeini iwaini ifisuna dawaini Naini ibifutu wei.   
\p
\v 57 Eno weite wei, i me ibetanu ubina Baba Godiba iba Nana me ibine, enanari anama Nanu ofe ifite me ibene ibene ibeibisu wei.  
\v 58 Ewa ietana i ureroma tarari ieta. Yanu yamamamutuma mana ieta itate uita, i mana ietana aika. Anama ewa ieta ifisuna me ibene ibene ibeibisu wei.  
\v 59 Yesuma Kafenamu suro ibeda i Ju uwaranu dubu su ubarero i sina we mawetu utebi.   
\s1 I me ibene ibene ibeta sina  
\p
\v 60 Moana iwata ueta uwarama i sina nautate weita, ewa sina kimuwere anama nautasuro wasu weita?  
\v 61 Weitaro Yesuma emanu emanu webita sina iwataba emaba wei, i sinaba Naini ibo uteda waita wei?  
\v 62 I Ba Eme Sini Amarama Danu bodere ibebi orofaro maneibisuna yana efote nono ya anene imufoita wei?  
\v 63 Godinu Imumu Kotofuma me ibene ibene ibeta matasuro ba ofema me ibene ibene ibeta matawa utasu wei.  
\v 64 Yaba eno watanero moana uwara imutawa utaita wei. (Yesuma bodereroma i nautawa uwara iwata uite Danu wawei weta amara Dawa iwata ui).  
\v 65 Yesuma wei, iba wene, Nanu Babama ana ana da we mubisuna Nabai da fafitaita wei.   
\p
\v 66 Yesunu buribi aneta uwara faiyawerema i sina nautate Yesu ekoitate owetate emanu unu daba enanari anita.  
\v 67 Anitaro Yesuma Danu iwata ueta uwara tueroba (12) wei, ya enanari Na ekodifote yanu unu dabaro aniboita, wei?  
\v 68-69 Weiro Saimoni Fitama wei, Dera Waria Amara, abo amarabai anibeisi wei? Abai torowa me ibene ibene ibeta ibinuba imutaisite Ana Godinu Kakarawere Amara we imutaisi wei.  
\v 70 Weiro Yesuma emaba wei, ya uwara tuero (12) Nana we mune odero nono mui amara dawana seitani wei.   
\p
\v 71 Yesuma Saimoni Isikariotinu amara Judasiba wei. Judasi dawa mui tuero (12) iwata ueta amara. Judasima Yesu do mafisu amara.   
\c 7  
\s1 Yesuini Danu dabuemutu  
\p
\v 1 Yesuma i sina weite Kafenamu su ekodite Gareri orofa aboro aboro me inarebi. Dawa unutawa Judia orofaro aneta. I Ju uwaranu dera uwarama Danu uieta daba doberebitaba iba iro anawa ui.   
\p
\v 2-3 I Ju uwaranu su kikiratu ue ieta daure ogaro ueta kowa ido fafie uiba Yesunu daburetama Dawaba weita, i Judia orofaro ogaro aniate buna ueta uaro anu buribi aneta uwara efita weita.  
\v 4 Anama emema danu ueta efitae utasute kiwuma utawa utebasute eme nesiabai utebasu weita.  
\v 5 (Danu dabureta emanu naueta Dawabai odawaba iba eno weita.)  
\v 6 Weitaro Yesuma emaba wei, Nanu buna ueta umau kowa farawaro yanu ueta utaita kowa ainewaure ido ibinu wei.  
\v 7 I orofa atata uwarama yaba neno ka utawa utaita. I uwaranu siosa uetaba wataneba Naba neno ka utaita wei.  
\v 8 Yanu torowa i ogaro aniboro Nanu kowa farawa uegou uiba Na awona iro da animau wei.  
\v 9 Eno weite Yesu Dawa Gareriro ibi.   
\s1 Yesu i dera dubu sunu ogaroro ani  
\p
\v 10-11 Duburo Yesunu daburetama ogaroba anitaro Yesuma kiwuma ogaroro aniro emema Dawa erawa uta.  
\v 12 I Ju uwarama i ogaro kabesiro Yesu doberebe weita, Dawa aboro weitana uwara faiyawere Dawaba kekerama gimumutaroma weita. Moana uwarama weita, Dawa kobere amara, weitaro moanama weita, Dana i uwara irutasu weita.  
\v 13 I Ju dera uwaraba iyatate iba gimumutaroma webita.   
\p
\v 14 I ogaro kowa rarogonu me siniro Yesuma i Ju uwaranu dera dubu suro amuite we mawetu ui.  
\v 15 We mawetu utebiro i Ju uwarama nautate neno kirifu uteda weita, i Amara sikuru utawa ui rairo Danu iwata aboro muninu weita?  
\v 16 Weitaro Yesuma emaba wei, Nanu imueta wiawa utatanete Na siaia ui Godinu imueta watane wei.  
\v 17 Anama Godinu unu uegou ufisuna dawa eno iwata ufisu, Nana Godinu imueta watane o Nanu imueta watane, dawa iwata ufisu wei.  
\v 18 Anama danu imuetaroma webasuna emenu we ma kobererau ueta mubie iba webasu. Anama dawa siaia ui Godi we ma kobererau ufitae utasuna i amarana kobererauro dawabai meo mero ba amara wei.  
\v 19 Bodere Mosesima danu tarawatu yaba mai. Nono i tarawatu yana imutawa utaitade aneba Na ma uifoe utaita wei.  
\v 20 Weiro i uwarama weita, Ana seitaninu mui imumu siosa bobo amaraba ana gogore bobo weita. Anama A ma uifisu weita?  
\v 21 Weitaro Yesuma emaba wei, sabate kowaro i ofe wouri amara demurai ma wiroeba iba ya neno kirifu utaita.  
\v 22 Mosesima yanu ofe tureta mai. (Mosesibairoma me, ina yanu babamutubairoma fari) Emabairoma fariba sabate kowaro mui amakanunu ofe turaita wei.  
\v 23 Eno utaitana Mosesinu tarawatu imutaitate nono Godinu sabate kowa imutawa utaita wei. Eno utaitaba i amara ma wiroeba kobererau ibinuro aneba Naba ibo utaita wei.  
\v 24 Yana koto utaitana me sara da uawete rorowarau uawe wei.   
\s1 Dawa Godinu Mesaia aba me  
\p
\v 25-26 Yesuma eno weiba moana Jerusaremu su uwarama weita, ewana emanu ma uifitae weita amara aba me? Eno weitate weita, Dawa yabai sina derawere wasuro i uwarama wate mu utaita weita. Yanu dera uwarama Dana i Keriso we imutaita aba?  
\v 27 Ewa amaranu su ya iwata utaisi. I Mesaianu fareta orofa emema iwata me, aboroma fafisu weita?  
\v 28 Weitaro Yesuma i Ju uwaranu dera dubu suro we mawetu utebe i sina nauite Yesuma nono derawere wei, Nanu suini Naini ya iwata utaisi waita? Eno weite wei, Nanu torowa Nanu unuro ewaro farawa uero Na siaia ui Godi Dawana ba. Yana Dawa iwawa utaita wei.  
\v 29 Nana Dawa iwataro Dana Na siaia uiro Dawabairoma ewaro fare wei.  
\v 30 Yesuma eno weiba i uwarama Yesu budari ufitae utaro Danu kowa farawa uiba Dawa mame munawa uta.  
\v 31 I dera dubu suro guruguru ubita uwara faiyawere emanu naueta Yesubai oitate eno weita, ewa Amarana i Mesaia. Mui amarama duburo fafisuna danu uetama ewa Amaranu buna ueta serigari da ufisu weita.   
\s1 Meremere uwara Yesu yabae budari ufitae siaia uta  
\p
\v 32 Eno weda gimumutaroma webitaro nautate i Ferosi waita uwara emaini i dera fuyo ode sina weta uwaraini forisimanima Yesu budari ufitae siaia utaro anita.  
\v 33 Ane Yesubai fataro Yesuma wei, yabai kikiratu ibimate Na siaia uiro ewaro fare Godibai animau wei.  
\v 34 Yana Na doberebe da atafote Nanu ibimau orofaro da afoita wei.  
\v 35 Eno weiba i Ju uwarama we mataneda weita, ewa Amara aboro anibiro dawa da atafeisi weita? Yanu we berasiro Guriki uwaranu orofaro anita uwarabai anibite ema we mawetu uteibisu aba?  
\v 36 Ane wenu, yana Na doberebe da atafote Nanu animau orofaro da afoita wenu weita?   
\s1 I me ibeta fa tanasu ogo  
\p
\v 37 I ogaro ie me sinebita kowaro Yesuma yare wei, ana anama ogo nodo utaitana Nabai afote ifoe watane wei.  
\v 38 Godinu bukaroma eno wasu, anama Danu naueta Nabai odasuna danu nenoroma me ibene ibene ibeta dera ogo ari amufite emebai anibisu, wasu wei.  
\v 39 (I sinana Godinu Imumu Kotofuba wei. Ana anama emanu naueta Yesubai odifitaro Godinu Imumu Kotofuma emabai itafiro mubitaita. I kowaro Yesuma urero manawa uiba Godima Danu Imumu Kotofu matawa ui.)   
\s1 I uwarama aika maika imutebitate tu aika maika ibebita  
\p
\v 40-41 Yesunu sina nautaro moana uwarama weita, ewa Amarana Godinu ba we bou ueta fafisu weita Amara weitaro moana uwarama weita, I Mesaiama Gareriroma da fafisu weita.  
\v 42 Godinu bukaroma wasu, i Mesaiana Deiwidinu sisia amara. Deiwidinu su, Betiremu suroma fafisu, Godinu bukaroma eno wasu weita.  
\v 43 Enoba i uwarama abanaro saragari uta.  
\v 44 Saragari utaba moana uwarama Yesu budari ufitae weitana Yesu mame munawa uta.   
\s1 I Ju dera uwarama emanu naueta Yesubai odawa uta  
\p
\v 45 I forisimani uwarama owetate i dera fuyo ode sina weta uwaraini Ferosi uwarabai fataro weita, aneba Dawa woure arawa me farita weita?  
\v 46 Weitaro forisimanima weita, Danu wenu sina bunawerero moana uwarama Danu wenu sina ari wiawa utaita weita.  
\v 47 Weitaro i Ferosi uwarama weita, Dawa yade irusinuro danu sina nautedibaita weita?  
\v 48 Eno weitate weita, i dera yawoeta uwaraini yaini Dawa imutawa utaisi.  
\v 49 I guruguru ubaita uwarama Mosesinu tarawatu iwata meba Godima ema fanisi derawere mafisu weita.  
\v 50-51 Eno weitaro Nikodimasi dawa i auboko Yesubai ani amara, dawa Ferosi amara, i amarama emaba wei, yanu tarawatuma eno wasu, mui amara me sara fanisi da uawe wasu. Koto ufote danu ueta sineta naufote iwata ufote ido fanisi mafoita wasu wei.  
\v 52 Weiro dawaba weita, aini Gareriroma farinu? Weitate weita, Godinu buka eregou ufasuna we bou ueta uwarama Gareriroma da fafitaita iwata ufasu weita.  
\v 53 Eno weitaro i uwara nesia ekoitate emanu su suro wo bogaru ue anita.   
\c 8  
\s1 Mui awera bobo aweta danu awera ekodite mui amaraba utebiro atata  
\p
\v 1 Yesuma Oriwa maidaniro manite iro aini.  
\v 2 Wai uriro Yesuma owerite taranite dera dubu suro amui. Amuiro uwara faiyawere farebitate guruguru utebitaro Yesuma yaubeda we mawetu utebi.  
\v 3-4 Yesuma webina moana tarawatu tisa uwaraini Ferosi uwaraini ema moana emeba utebi aweta mutate woure Yesubai fata. Fatate i guruguru ubita uwaranu iboro ma inatate Yesuba weita, tisa amara, ewa aweta kerere usinuro erisite munisite iba Abai woure farisia weita.  
\v 5 Mosesinu tarawatuma eno wasu, i dita yagera fareta uwara gebiroma ure ma uiawe wasu weita, nono Ade anene webasu weita?  
\v 6-8 Yesu wenauefitate Yesunu webisu sina naufitate Yesu ue efitae iba eno weita. Eno weitaro Yesu ubiri tafu uteda agema sakairo owawa yanaina woroworo webita, wiaro naufe webitaba Yesuma uyarite wei, i neno neno utawa amarama i awetabai dana botai gebiro sabiro dawa uifisu weite yaurite nono tafu uteda agema sakairo nono owawa yanai.  
\v 9 Yesuma eno uiro i Ju uwarama kiwuma wo bagaru ue demui demui dera uwara ko anitaro Yesuini i awetaini i guruguru ubita uwaranu iboro emanu aika ibita.  
\v 10 Enoba Yesuma uyarite i awetaba wei, anu wawei weta uwara aboro? Aba wawei waita aba me?  
\v 11 Weina i awetama wei, Dera Amara, moana uwara me wei. Weiro Yesuma wei Nade, aba a siosawere weda wawei da wemau. Enoba aniate mui neno neno ueta da ua wei.   
\s1 Yesuna ewa nasininu ario  
\p
\v 12 Mui kowaro Yesuma i dera dubu suro yaubita uwaraba wei, Nana ewa orofa atatanu dera nanefa ario ari. I orofa atata uwara nesia we mawetu utataneba iba Nana emanu dera ario ari. Nanu buribi afitaita uwarana dumuro da inareibitaita. Enoba Nanu wiroeta arioro anedibeibitaita wei.  
\v 13 Weiro i Ferosi uwarama weita, anu torowa anu sina wasuba iba meo wasu weita.  
\v 14 Weitaro Yesuma wei, meo me, ba watane wei. Nanu torowa Nanu ueta sineta sina wataneba iba ina ba sina wei. Nanu are orofa Na iwata utatanete Nanu animau orofa Na iwataro nono ina ya iwata me wei.  
\v 15 Yanu utaita kotona emenu koto ari. Na uwara koto utawa utatane.  
\v 16 Nono Nana eme koto uteimarona Nanu torowana me, Na siaia ui Godi Dawa Na durua ufiro Nanu kotona ba sibie wei.  
\v 17 Ya uwaranu tarawatuma eno wasu, amara sadeima mui iba sina waisina, i sinana ba wasu wei.  
\v 18 Naini Na siaia ui Godini Nanu sina waitu wei.  
\v 19 Yesuma eno weiro Dawaba weita, Anu Amama aboro weitana wei, Naini Nanu Babaini ya iwata me wei. Na iwata uforona Nanu Baba iwata ufoe watane wei.   
\p
\v 20 Yesuma i sina dera dubu su oi muneta koruro weiro Danu kowa farawa uiba i Ju uwarama Dawa budari utawa uta.   
\s1 Ya Nanu anatane orofaro da aniboita  
\p
\v 21 Nono Yesuma emaba mui sina eno wei, Na animaro Na doberebe doberebe Na da atafoitana yanu neno neno ueta yabai daido ibifiro uifoita wei. Nanu animau orofaro da aniboita wei.  
\v 22 Weiro i Ju uwarama weita, Danu torowa Danu nodo tufisu aba? Aneba eno wasu, Nanu animau orofaro da aniboita wasu weita?  
\v 23-24 Weitaro Yesuma wei, yana sakairoma uyataro Nana ureroma fare. Yana sakai ubi uwara. Nana ure ubi Amara, weite wei, iba wene, yanu neno neno ueta yabai ibifiro uifoita. Nana i ma wiroeta Amara da imufote yanu neno neno ueta yabai ibifiro uifoita wene wei.  
\v 25 Weiro Dawaba weita, a anaiya? Weitana wei, Nanu sina yaba boderewereroma webatane wei.  
\v 26 Yaba Nanu sina faiyawere wemate ya koto derawere umau wei. Na siaia ui Godi, Dana ba, iba ane ane Naba wasuro enanari orofa atata uwara nesiabai watane wei.   
\p
\v 27-28 Yesuma Baba Godiba weiro i uwara i sina iwawa utaba Yesuma emaba wei, yana i Ba Eme Sini Amara korosiro ikokoma ufoita i kowaro Nana i Amara, Godinu Amara, iwata ufote mui eno iwata ufoita. Nana Nanu imueta utawa utatanete Godinu imuetaini we mawetu uetaini torowa watane, eno iwata ufoita wei.  
\v 29 Na siaia ui Godi Nabai ibinu. Danu imueta utataneba Dawa yaru utasute Na ekodawa utasu wei.  
\v 30 Yesuma eno weiba uwara faiyawere emanu naueta Dawabai oita.   
\s1 Me inareta uwaraini sabua ueta uwara  
\p
\v 31-32 Yesuma Danu sina naue imue utebita Ju uwaraba wei, Nanu sina nauegou ufoitana Nanu ba iwata ueta uwara sibote Nanu ba sina iwata ufoitaba yanu siosanu sabua ueta arina ido me sibisu wei.  
\v 33 Weiro weita, yana Eibaramunu sisia uwara moana uwarama ya yawotawaba aneba yanu sabua ueta arina me sibisu wasu weita?  
\v 34 Eno weitaba Yesuma emaba wei, Nanu ba sina wemaro nauawe wei. Ana anama siosa ueta utaitaro i siosa uetama ema yawotasuba emana siosa uetanu i sabua ueta uwara ari.  
\v 35 I sabua ueta amarama danu yawotasu amaranu suro da ibeibisu. Nono i yawotasu amaranu amara torowama danu ewa nasiniro ibeibisu kowaro danu damamanu suro ibeibisu.  
\v 36 Ibago Na Godinu Amarama ya ma wiromauna yanu siosa ueta sineta ekodifote merau ibegou ufoita wei.  
\v 37 Yana Eibaramunu sisia uwara Na iwataro nono ya unutawa Nanu sina yaba weta iba yana Na ma uifoe utaita wei.  
\v 38 Nana Nanu Babanu ba sina naueba yaba webatanero yana yanu yamamanu wei sina nautebaitate iba eno utaita wei.  
\v 39 Weiro i uwarama Yesuba weita, Eibaramu, dana yanu baba weitaro wei, yana Eibaramunu uwararona danu utebi enanari uteiboe watane wei.  
\v 40 Nana Godima weiro naue ba sina yaba ba webatanero nono yana Nanu uieta daba doberebaita. Eibaramunu ueta gaukara enanari me wei.  
\v 41 Eno utaitana yanu yamama seitaninu ueta sineta enanari utaita wei. Weiro weita, yanu bayamutuma ya dabaro munawa uta. Yanu babana demurai, Dawa Godi weita.  
\v 42 Eno weitaro Yesuma emaba wei, Godi Dawa yanu yamamana me. Dawa yanu yamamarona yanu neno Nabai odifoe. Na Dawabai ibebitararo Godi Dawa Na siaia uiro Dawa ekodete Dawabairoma fareba Godi yanu yamamarona yanu neno Nabai odifoe watane wei.  
\v 43 Aneba Nanu sina nautawa utaita? Ya unutawa Nanu sina weta iba yanu ome garari utaitate Nanu sina nautawa utaita wei.  
\v 44 Yanu yamamana seitani. Yana danu adarabuba yana danu ueta utaita. Boderewereroma seitani dawa ma uieta amara. Dawa unutawa ba ueta. Dana meo bobo amara torowa, dawabai ba me. Dawa sina wasuna meo torowa wasu. Dana meo weta ubinu damama.  
\v 45 Ibago yaba ba sina watanero ya naue imue utawa utaita wei.  
\v 46 Anama Naba A siosa utasu webisu? Eno da webisu. Nana ba sina watanero aneba Na naue imue utawa utaita wei?  
\v 47 Anama Godibairoma fafisuna Godinu sina naufisu wei. Yana Godibairoma farawa utaba Godinu sina nautawa utaita wei.   
\s1 Yesuini Eibaramu  
\p
\v 48 Yesuma eno weiro i Ju uwarama Dawaba weita, eno waisi, Ana seitaninu mui siosa imumu bobo Samaria orofa amara waisi ina ba aba me weita?  
\v 49 Weitana Yesuma wei, Na seitaninu mui siosa imumu bobo me wei. Nana Nanu Baba we ma kobererau utatanero yana Naba sina siosa waita wei.  
\v 50 Nanu torowaba we ma kobererau utawa utatanero Godi Dana Na we ma kobererau utasuba i meo uwara nesia koto rorowarau ufisu wei.  
\v 51 Eno weite nono wei, Nanu ba sina wemaro nauawe wei, ana anama Nanu sina nauegou uteda yawoegou ufitaitana da uifitate me ibene ibene ibifitaita wei.  
\v 52 Weiro i Ju uwarama Dawaba weita, abai seitaninu mui siosa imumu ibinuro ya iwata utaisi weita. Eibaramuini i we bou ueta uwara nesia uitaba aneba anama Nanu sina nauegou ufisuna da uifite me ibene ibene ibifisu wasu weita?  
\v 53 Yanu baba Eibaramu dawa ui. I we bou ueta uwara nesia uita, aneba eno wasu? Ana derawere, i uwarana kikiratu we imutasu? Ade anaiya? Wiaro naufe weita.  
\v 54 Eno weitaro Yesuma wei, Nanu torowa Na we ma kobererau umauna ina ba me. Ya eno waita, Godina yanu Baba waita, i Godima Na we ma kobererau utasute Na ma derawere utasu wei.  
\v 55 Ya Dawa iwawa utaitaro Nana Dawa iwata utatane. Nana Godi iwata me wemauna yanu meo sina ari wemau. Nana Godi iwata utatanete Danu sina nauteda uegou utatane wei.  
\v 56 Yanu yamama Eibaramuma Nanu fareta kowa efie utebe farero erite yaru ui wei.  
\v 57 Weiro i Ju dera uwarama weita, A reka Amara. Anene Anu oyana fifiti (50) munawaro nono Ana Eibaramu erite wasu weita?  
\v 58 Eno weitana Yesuma wei, boderewere Na ko ibebitararo danu danuama Eibaramu dawa duburo muni wei.  
\v 59 Yesuma eno weiba i Ju dera uwarama gebiro mutate Yesu ma uifitae utaro Yesuma me ari uite dera dubu su ekodite ani.   
\c 9  
\s1 Yesuma i danuama diti basugari bobo muni amara ma wiroi  
\p
\v 1 Mui kowaro Yesuini Danu iwata ueta uwarama inarebitaro mui amara danu danuama dawa muni kowaroma diti basugari bobo ido yaubi.  
\v 2 I uwarama dawa serigari ue fare aneda Yesunu iwata ueta uwarama Yesuba weita, ewa amara siosa uiro aba danu danua damama siosa usiba iba danu danuama dawa diti basugari bobo muniro yaubinu weita?  
\v 3 Weitaro Yesuma wei, dawa siosa ueta utawa danu danua damamama siosa ueta utawa usiro danu danuama dawa me eno torowa muni. Godi Danu buna ueta dawabai ufiro uwarama i buna efitae iba danu danuama dawa eno muniro yaubinu wei.  
\v 4 Na siaia ui Godinu gaukara kowa arioro sau ufero nono dumu sau sibisuna gaukara da ufeisi wei.  
\v 5 Ewa orofa atataro ibedana Nana ewa orofa atatanu ario ari wei.  
\v 6-7 Eno weite sakairo witua uite witua ma bisibasa uite sakai mune i amaranu ditiro mameda wei, Sairomu waita mesauraturo aniate anu diti uroa. (Sairomu ifunu ubina siaia ueta). Yesuma eno weiro i amara nauite enanari ane uite owerite ditima ba erere fari.   
\p
\v 8 Danu su uwaraini danu domayamutuini dawa emebai nui webi amara iwata utaba iba eno weita, i nui weda me yaubebasu amarana ewa amara aba dawa anaiya weita?  
\v 9 Weitaro moana uwarama weita, aiwia i amara idoni weitaro moana uwarama weita, me, dana dawa ari weita. Weitaro i diti wiroiro ba eregou ui amarama wei, na idode wei.  
\v 10 Weina anu diti anene wirosinu weita?  
\v 11 Weitaro i amarama wei, mui amara Danu ifuna Yesu Dawa Danu witua sakairo usinute nanu ditiro mameda wenu, Sairomu mesauro aniate anu diti iro uroa wenuro enanari ane diti uronete wironea wei.  
\v 12 Weina weita, i Amara aboro? Weitana na iwata me wei.   
\s1 I Ferosi uwarama i amaranu diti nabi ui i wenauereta  
\p
\v 13 I uwarama i diti basugari wiroi amara Ferosi waita uwarabai woure fare oita.  
\v 14 Yesuma sabate kowaro i sakairo witua uite i amaranu ditiro mamite ma wiroi.  
\v 15 I uwarama i amara woure oitaro Ferosi uwarama weita, anene usinute erasu weita? Weitaro wei, Dana sakai nanu ditiro maminuro uronete ene wei.  
\v 16-17 Weiro moana Ferosi uwarama weita, sabate kowa imutawa utasuba dawa Godibairoma farawa weitaro moanama weita, mui siosa ueta amara eno da ufisu weita. Enoba abanaro saragari utaba nono i amaraba weita, anu diti ma wirosinu amaraba ane wasu? Weitana Dana Godinu we bou ueta Amara wei.  
\v 18-19 I amarana diti basugari boboro wiroi amara imutawa utate i amaranu danua damama yua weitaro fataro weita, ewa amarana yanu muneta diti basugari bobo amara aba me? Awona anene erasu weita?  
\v 20 Weitaro weisi, aiwia, ewana wanu muneta diti basugari bobo amara.  
\v 21 Anene erasu ari, wana iwata me. Dawa dera amaraea dawabai wenaueawe weisi.  
\v 22-23 Danua damamama i Ferosi uwaraba iyasite iba eno weisi. I Ju dera uwarama auboko weita, anama Yesuna i Mesaia webisuna dera dubu suroma yowefeisi weitaba iba danua damamama enanari weisi, dawa dera amaraea dawabai wenaueawe weisi.  
\v 24 Eno weisiba Ferosi uwarama nono weitaro diti basugariroma wiroi amarama emabai fariro dawaba weita, Yesu, Dana siosa amaraba Godi Dawa torowa we ma kobererau utebea weita.  
\v 25 Weitaro i amarama wei, Dana siosa amara aba me, na iwata me. Nono nana diti basugari ue ibebe ibebe awonana eratanete ina na iwata utatane wei.  
\v 26 Weiro weita, Dawa aba ane usinu? Anu diti anene ma wirosinu weita?  
\v 27 Weitana i amarama wei, yaba auboko wenero nautawa uita. Aneba nono wemaro naufoita? Yanu ununa Danu iwata ueta uwara siboita wei?  
\v 28 Weiro dawaba siosa sina weitate bunawere weita, ana Danu iwata ueta amara. Yana Mosesinu iwata ueta uwara.  
\v 29-30 Godima Mosesiba sina webi, ina ya iwata utaisi. Ewa Yesu, Dawa aboroma fari? Ya iwata me, weitaro wei, kamama nautatane weite wei, Dana nanu diti ma wirosinuro yana Dawa iwata me.  
\v 31-32 Godima i siosa ueta uwaranu sina nautawa utasuro ina ya Ju uwara nesia iwata utaisi wei. Anama Godi guriguri utasute Godinu unu utasuro Godima danu sina nautasuro ina ya iwata utaisi. I amarama eno weite wei, boderewereroma uwarama diti basugariroma eme ma wirotawa utebita.  
\v 33 Godima Dawa siaia utawa ufirona gaukara me sara da ufie uteibie wei.  
\v 34 Eno weiro i uwarama dua utate sina siosa weitate eno weita, anu munetaroma siosa ueta utebiba awona ya we mawetu ufae utasu weita? Eno weitate i Ju uwaranu dera dubu suroma dawa we yowetaro ani.   
\s1 Yanu neno diti basugari utebasu enanari utasu  
\p
\v 35 Yesuma i sina nauite i amara dobere ane atanite wei, i Ba Eme Sini Amarabai naue imue utasu aba me?  
\v 36 Weiro i amarama wei, Dawa anaiya wiaro naumate naue imue umau wei.  
\v 37 Eno weiro Yesuma dawaba wei, ana Dawa erasuro Dana awona aini sina wasu wei.  
\v 38 Weina i amarama wei, Dera Waria Amara, na kimuwere nautatane. Eno weite Yesunu buri gigirariro jerigari ui.   
\p
\v 39 Yesuma wei, dera koto umane iba ewa orofaro fare wei. Enoba i diti basugari uwara efitae farete i eraita uwara diti basugari ufitae fare wei.  
\v 40 Weiro moana inaibita Ferosi uwarama nautate weita, yaini diti basugari utaisi aba me weita?  
\v 41 Weitaro Yesuma wei, yana diti basugari ufirona yabai kerere me, ya eraisite iwata utaisi waitaba yanu kerere yabai ibeibisu wei.   
\c 10  
\s1 Mamoenu ibeta su  
\p
\v 1 Nanu ba sina wemaro nauawe, Yesuma wei, anama i mamoe dowa bebetoro da fare amufite nono i dowa bebefite ubarero me sara itafisuna i amarana wairawere meo amara.  
\v 2 I mamoe yawoeta amarama i dowa bebetoro torowa fare itarasu.  
\v 3 I kasimu yawoeta amarama dawaba i kasimu ma ifegari utasuro mamoe yawoeta amarama danu mamoenu ifu ifuro dabitasuro nautaitaro ema woure anasu.  
\v 4 Dawa ko anasuro mamoema Danu wate tanana iwata uteda nautaitate Danu buribi anaita.  
\v 5 I mamoema aika amaranu buribi danu wate naue anawa utaitate danu wate tanana iwawa uteda ekodaitate iya durami ue anaita wei.   
\s1 Yesuna kobere mamoe Yawoeta Amara  
\p
\v 6-7 I sina nautaita uwarama Danu kasei sina iwawa utaba Yesuma i sina eno we ma boroyarite wei, Nanu ba sina wemaro nauawe wei. Nana i mamoe dowa bebeto ari.  
\v 8 I auboko fare anebita tisa uwarana waira uwara, meo uwaraba i mamoema emanu sina nautawa utebita.  
\v 9 Nana i mamoe dowa bebeto ari. Ana anama Nabai afitate ubarero anibitate Nabai wirofitaro ema kobererau yawomaro merau ibeda ane fare uteda ieta ataneibitaita wei.  
\v 10 I waira ue meoma weta amarama waira ue ma uie ma siosa ufie iba arasu wei. Nana i mamoenu ibeta ma kobererau umaro ibegou ufitae iba farea wei.  
\v 11 Nana i mamoenu kobere ema yawoeta Amara. I mamoenu kobere yawoeta amarama danu mamoe yawoegou ufie iba mamoeba uietabana iya uyarawa emaba daido uitebasu wei.  
\v 12 I oi gaukara amarana ba yawoeta amara meba wurufu, dera orowa kua ari, farasuro erasute i mamoe danu meba ekodasute durami ue anasuro dera orowa kua arima i mamoe turo amuteda mamasute ma beratasuro wo bogaru ue anaita wei.  
\v 13 I amarana oi gaukara amaraba dawa unutawa mamoe kobere yawoeta. I mamoe danu meba iba ekodasute iya durami ue anasu wei.  
\v 14-15 Nana i mamoenu kobere yawoeta amara. Nanu Babama Na iwata utasuro Nana Nanu Baba iwata utatane, enanari Nanu mamoe Na iwata utatanero mamoema Na iwata utaitaba Nanu mamoeba uimau wei.  
\v 16 Moana aboro aboro ibinita mamoe Nanu. I mamoema ewa dowa ubarero ibawa utaitaba ane mune woumaro Nanu sina naufitate mamoe nesia tu demurai sibitaro mamoe yawoeta amara demurai sibisu wei.   
\p
\v 17 Nanu ununa uimate uietaroma uyamate nono nanu me ibeta mumate ibimauba Nanu Babanu neno Nabai ibinu wei.  
\v 18 Mui amara danu torowana Na da ma uifiro Nanu unu eno uimau. Nanu Babama Na buna derawere maite weiba iba Nanu torowana uimate nono uyamau wei.   
\p
\v 19-20 I Ju uwarama Danu sina nautate imueta aika maika imutaba abanaro saragari utate moana eno weita, Dana seitaninu mui siosa imumu boboro gogore sina wasuba aneba naufeisi?  
\v 21 Weitaro moanama weita, Danu sinana seitaninu mui siosa imumu bobo amaranu sina ari me weitate weita, i seitaninu siosa imumuma diti basugari uwara da ma wirofisu weita.   
\s1 Yesu i Ju uwarama ejiwa uta  
\p
\v 22-24 I kowaro Ju uwarama emanu dera dubu su ma wiroeta ogaro itebita. I kowana iwuwere kowa. I kowaro Yesuma dera dubu su Soromoninu ofadaro inarebina i Ju uwarama Dawabai fatate Dawa ode kara uteda weita, Anu ba sina abododo webaro naufeisi weita? Ana i Mesaia aba me? Wegou uaro naufe weita.  
\v 25-27 Weitaro Yesuma emaba wei, Na wenero nautawa uita wei. Nanu Babanu wei gaukara utatanero i gaukarama Na ma boroyarasuro eraita weite wei, yana Nanu mamoe meba Nanu sina nautawa utaita wei. Nanu mamoe Na iwata utatanero nanu sina nauteda Nanu buribi araita.  
\v 28 Araitaro emaba me ibene ibene ibeta matataneba me sara da uifitate fanisi orofaro da anibitaro mui amarama ema Nanu age duroma da ma dare mubisu wei.  
\v 29 Nanu Babama ema Naba mai. Dana derawerero emena derawere me. Dana derawereba mui amarama Nanu Babanu age duro ema da ma dare mubisu wei.  
\v 30 Nanu Babaini Naini wana demurai wei.   
\p
\v 31-33 Yesuma eno weiba i Ju uwarama Yesu nono ma uifitae iba gebiro mutaro Yesuma wei, Nana Godinu buna ueta faiyawere yanu ditiro utebatane wei. Abo buna uetaba Na gebiroma ma uifoita weiro i Ju uwarama weita, Anu kobere uetaba da ufeisi weita. Ana Godiba sina siosa wenute Ana emero nono Godini Naini arotorowa wenuba iba gebiroma ufeisi weita.  
\v 34-35 Weitaro Yesuma emaba wei, yanu tarawatu bukaroma Godi eno wasu, yana godi ari watane eno wasu Yesuma weite nono wei, Godima Danu sina i uwaraba maite emaba yana godi ari wei. Godinu bukana ba iba i sina ba ibifisu Yesuma wei.  
\v 36 Godima eno weiro aneba Godinu mune odiro fare Amaraba eno waita? Dana wenu, Godini Naini demurai wenuba iba Godiba siosa sina wasu waita wei?  
\v 37 Nanu Babanu gaukara utawa uteimauna Na da naue imue ufoita wei.  
\v 38 Nanu Babanu gaukara utataneba Nabai da naue imue ufoitana Nanu ueta imuegou uawe wei. Eno ufoitana Nanu Babama Nabai ibinuro Nana Dawabai ibine iwata ufoita wei.  
\v 39 Yesuma eno weiba i uwarama Yesu budari ufitae weitaro Yesuma ema ekodite me ari uite aniro munawa uta.   
\p
\v 40 Yesuma Jerusaremu suroma anite Jodani ogo yoferite Joni babataito amaranu botai babataito utebi orofaro farite iro ibi.  
\v 41 Eme faiyawere Yesunu sina naufitae Dawabai fatate emanu emanu weita, Jonima buna utawa uite anene Yesuba wei i sinana ba weita.  
\v 42 Weitaro eme faiyawere emanu naueta Yesubai oita.   
\c 11  
\s1 Rasarosinu uieta sina  
\p
\v 1 Mui amara danu ifuna Rasarosi, dawa ofe wouri. Dawaini danu aruma sadei, Merini Mata Beteni suro ibebita.  
\v 2 (I ofe wouri amaranu aruma, Meri, dawa Yesunu buriro bononawere ogo ma wegari uite Yesunu buri danu yafa fouma ijima maituri).  
\v 3-4 I uwara Beteni suro ibebitana Rasarosi ofe ido wouri. Dawa ofe wouriba i aruma sadeima sina weisiro Yesuba ane weita, Dera Waria amara, anu aiye warai Rasarosi, dawa ofe derawere wourinu weitaro Yesu nauite wei, danu ofe wouretana ba uieta ofe wourawaba mena emema i wourinu ofe efitate Godinu ifuini Nanu ifuini we ma derawere ufitaita wei.   
\p
\v 5 Yesuma Mataini Merini Rasarosiba neno arama utebi.  
\v 6 Yesuma Rasarosi ofe woureta sina nauite sau Beteni suro anawa uite i suro kowa sadei ibi.  
\v 7 Kowa sadei me siniro Yesuma Danu iwata ueta uwaraba wei, Judia orofaro nono anibe wei.  
\v 8 Weiro i iwata ueta uwarama weita, Tisa, i Ju uwarama A auboko iro gebiroma ufitae utade aneba iro anibasu weita?  
\v 9-10 Weitaro Yesuma emaba wei, kowa amutasuna ario farasuro kobere inareta farasu. I kowanu arioro inareda ewa orofa atatanu ario erasuba buridu urawa utasu weite wei, anama dumuro inarasuna i ario dawabai meba buridu urasu wei.  
\v 11 Eno weite emaba wei, yanu yaiye Rasarosina nauta ainibinuba animate dawa ma uyamau wei.  
\v 12 Weiro i Danu iwata ueta uwarama weita, dawa nauta ainibifisuna wirofisu weita.  
\v 13-14 Rasarosi ba me siniba Yesuma iba eno weiro iwata ueta uwarama iwawa utate Rasarosi ba nauta ainibi imutaba Yesuma emaba wei, Rasarosi me sini wei.  
\v 15 Na botai iro anawa ueba iro animate buna ueta derawere umauna yanu imueta ma buna ufoitaba iba yaru utatane weite wei, dawabai anibe wei.  
\v 16 Eno weiro, i sokaka waita amara Tomasima danu domayamutu iwata ueta uwaraba wei, yaini anibete dawa ma uifitae ufitaitana yaini nesia uifeisi wei.   
\s1 Yesu Dana uietaroma ma uyaretaini me ibetanu ubi  
\p
\v 17 Yesu Beteni suro ido ane farina Rasarosi uri ue oitaro kowa fo (4) uriro ainibi.  
\v 18-19 Jerusaremu suroma Beteni suro daba yafawere me, fuyanono iba Ju uwara faiyawere Mataini Meribai fatate i weda yaubita.  
\v 20 Yesu ido arasu weitaro Mata nauite durami ue ane Yesu ataniro Meri suro yaubi.  
\v 21-22 Matama Yesubai farite wei, A auboko sau ewaro fafarona nanu eweri uitawa me ibifie weite wei, na iwata awona ane Godibai webasuna Godima aba mafisu wei.  
\v 23-24 Eno weiro Yesuma dawaba wei, anu aena nono uyafisu weiro Matama Yesuba wei, i uietaroma uyareta kowa muiro uyafisu imutatane wei.  
\v 25 Weina Yesuma wei, Nana i uietaroma ma uyaretaini me ibene ibene ibetanu ubi weite nono wei, anama danu naueta Nabai odifite uifite nono uyafite me ibifisu wei.  
\v 26 Ana anama me ibinitaro Na nautaitana da uifitate me ibene ibene ibifitaita. A imutasu wei?  
\v 27 Weiro Matama Dawaba wei, Dera Waria Amara, aiwia ina na imutatane. Ana i Mesaia imutatanete Ana Godibairoma ewa nasiniro fari Amara imutatane wei.   
\s1 Yesu i wei  
\p
\v 28-29 Matama i sina weite owerite suro ane farite kekeramaratu Meriba wei, yanu Tisa Amara farinute aba wenu weiro Merima nauite sau uyarite ani.  
\v 30 (Yesuma i natofo suro ane farawa uite i botai Matama Dawa atani iro ibi).  
\v 31 I uieta suro yaubita Ju uwarama Merinu aneta etate we imuta, i aruma danu daenanu uri ue oeta kabesiro anibite daenaba iro i webie anasu we imutate danu buribi anita.  
\v 32 Merima Yesubai ane farite Danu buri gigiraribai arubi uteda wei, A auboko ewaro sau fafarona nanu eweri da uifite me ibifie wei.  
\v 33-34 Da uifie weite Meri dawaini i Ju uwaraini nesia i weitaro Yesuma ema erite neno siosa uteda wei, Rasarosi aboro uri ue oita weiro weita, Dera Waria Amara are ea weita.  
\v 35-36 Eno weitana Yesuma i weiro i Ju uwarama weita, Yesu Rasarosiba neno arama derawere utasu weita.  
\v 37 Eno weitaro moana uwarama weita, ewa amarama diti basugari amara ma wiroi rairo nono aneba Rasarosi webiro wirotawa ui weita?   
\s1 Yesuma Rasarosi uietaroma ma uyari  
\p
\v 38 Eno weitaro nauite Yesu neno siosa nono uite ane Rasarosi uri ue oita kabesiro ane fari. I uiro uri ue oeta kabesina gebiro erabo.  
\v 39 Mui gebiroma i uri bebetoro garari ue oitaro ibiba Yesuma wei, i gebiro mune eta kebiro odiawe wei. Weiro i uiro uri ue oita amara dawaini uruama itasi aruma, Matama wei, danu uieta kowa nesia fo (4) me sininuba urara fafisu wei.  
\v 40 Eno weiro Yesuma i aruma dawaba wei, auboko Nana aba wene enanari kimuwere imufasuna Godinu buna derawere efasu wene wei.  
\v 41 Yesu eno weiba i gebiro ma ubere eta kebiro oita. Oitaro Yesuma diti etu urero erite guriguri uteda wei, Baba, awonana Na Ana Nanu sina nautasuro A we ma kobererau utatane.  
\v 42 Na iwata, A Na woroworo nautasuro ewa inaibinita uwarama Ana Na ewaro siaia uiro fare imufitae iba eno watane wei.  
\v 43 Eno weite sina derawere weda yua wei, Rasarosi, uriroma uyate wawaro amua wei.  
\v 44 Eno weina i ba uiro uri ue oita amara Rasarosi dawa ba ido uietaroma uyarite amo fari. Danu buri age wadiama wayare wayare utate kofiri ibo nawata mui wadiama obari utate oitaro ainibi. Eno ainibebe eno bobo amo fari. Amo fariro Yesuma wei, i amaranu ofero ibinu wadia ma uregari uawero suro anibi wei.   
\s1 Dera uwara Yesu ma uifitae we turebita  
\p
\v 45-46 Moana Ju uwara, Merini uruama anita uwarama Rasarosi uietaroma uyari i etate Yesu naue imue utaro nono moana Ju uwarama Jerusaremu suro anitate Ferosi uwarabai Yesunu buna ueta weitaro nauta.  
\v 47 I eno ueta sina nautate iba i dera fuyo ode sina weta uwaraini Ferosi uwarama weita, kanisoro mitini ufe weitaba i kanisoro uwara ido fare guruguru uta. Ido fare guruguru utaro weita, i Amarama buna ueta faiyawere utasuba anene ufeisi weita?  
\v 48 Weitate weita, me ere kodeibero Dana eno uteibisuna uwara faiyawere danu buribi anibitaitaba i Romani dera yawoeta uwarama emanu ami uwara siaia ufitaro fafitate yanu dera dubu suini yanu Ju uwaranu su nesia ma siosa ufitaita weita.  
\v 49-50 Eno weitaro i fuyo ode sina weta uwara emanu dera amara, danu ifuna Kaiyafasi, dana eno wei, yanu imuetana ba me. I amara yana Dawa da ma uifero Danu torowa uifisuna ina kobererau. Ya i sina imutawa utaita. Nono aneba ya Ju uwara nesia uifeisi wei?  
\v 51 (I oyaro, i amara Kaiyafasi dawa dera fuyo ode sina weta amaraba Godima Dawabai Danu imueta maiba iba Yesuma i Ju uwaraba uifisu we bou ui.  
\v 52 I we bou uetana Ju uwara torowaba wiawa ui. Wiawa uite Godinu arumami adarabu aboro aboro ema nesiaba uifite Dana uwara nesia mune uwara demurai odifisu).  
\v 53 Enoba i dera Ju uwarama weita, Yesu Dawa ma uifeisi weita.   
\p
\v 54 I kowaroma Yesuma i Ju uwarabai emanu iboro baworo inarawa ui. Idoba Yesu Jerusaremu su ekodite Efaramu suro ani. I suna eme ibawa orofa gigirariro ibebi. Yesu iro anite Dawaini Danu iwata ueta uwaraini iro ibebita.   
\p
\v 55 Duburo i Godima Isaraero uwara Ijifiroma woure ani ogaro kowa baworo uiba uwara faiyawere aboro aboroma Jerusaremu suro emanu ogaroro kakara uroeta urofitae fata.  
\v 56 Iba iro fatate Yesu doberebe doberebe osi utate dera dubu su ubarero inatate weita, ya uwara ane imutaita? Yesu Dawa ogaro fafisu aba me weita?   
\p
\v 57 I dera fuyo ode sina weta uwaraini Ferosi uwarama auboko weita, anama i amara Yesu efisuna yabai are webiro naufe weita. I weita ina emanu ununa Yesu yabae budari ufitae iba eno weita.   
\c 12  
\s1 Yesu Beteni suro bonanawere ira ogoma tare odi  
\p
\v 1 Kowa sikisi (6) me sibiro i Godima Isaraero uwara Ijifiroma woure aneta ogaro fafisu. I kowaro Yesuma Beteni suro ani. I uietaroma ma uyari amara Rasarosi, danu suro ani.  
\v 2 Ieta outaro moana uwaraini Yesuini Rasarosini eno yautaro Rasarosinu aruma Matama ieta nabero mairo ita.  
\v 3 Ieta itebitana Merima bonanawere ira ogo, danu dawana derawere, ima munite Yesunu buriro ma wegari ui. Eno uite tafu uteda Meri danu fouma ijima Danu buri maituriro bonana derawere farite i su inune ui.  
\v 4-5 Judasi Isikarioti, dawa mui Yesunu iwata ueta amara, dawa Yesu ma uifitae do mai amara, dana wei, i bonanawere ogo aneba moana emebai oiya ufate moni toti kina (K30) mubate ibaiabai me uwaraba matawa usinu wei?  
\v 6 I amara dawa ba ibaiabai me uwara imufite wiawarogo dawana i iwata ueta uwaranu oi banika yawoteda emanu oi waira utebiba iba eno wei.  
\v 7 Eno weiro Yesuma wei, i arumaba sina fusama kodiawete dua sina da wiawe wei, i ibinu munowere ogo dawabai ibifiro Na uri ufitaita i kowaro Nanu ofero ma wegari ufisu wei.  
\v 8 I ibaiabai me uwarama ainewaure yabai ibaitaro nono Na yabai ainewaure da ibimau wei.   
\s1 Dera uwara Rasarosi ma uifitae we turebita  
\p
\v 9 Ju uwara faiyawere Yesuma Beteni suro yaubiro nautate Yesuini Rasarosi i uietaroma ma uyari amaraini efitae iba ane fata.  
\v 10-11 Uwara faiyawere Rasarosi uietaroma uyari kamama etate emanu naueta Yesubai oitaba i dera fuyo ode sina weta uwarama Rasarosini Yesunu ma uieta daba dobere imuta.   
\s1 Yesu kini ari uite Jerusaremu suro ani  
\p
\v 12-13 Etei mui kowaro Yesuma Jerusaremu suro fafie arebiro i ogaro fata uwarama i sina nautate farai tata woutate Yesu atafitae anita. I uwarama aneda weita, yanu ma wiroeta amarama arasu. Dawa Godinu ifuro arasuba we ma kobererau ufeisi weita. Ana ya Ju uwaranu dera yawoeta amarawere weita.  
\v 14-15 Yesuma otowa doniki dobere atanite i donikinu deiro yauri. Godinu bukaroma enanari wasu,  
\li1 ya Saioni orofaro ibinita uwara iya da uyawero yanu Dera Yawoeta Amarawere otowa doniki deiro yaurasute ido yabai farasu eawe,  
\p eno wasu.  
\v 16 Yesunu iwata ueta uwara iwawa utarogo nono Dawa urero araeta munina ido Godinu bukaroma wasu sina imutana ina Yesu Dawaba uta.  
\v 17 Yesu Rasarosi uietaroma ma uyarite uriroma yua weiro amui kowaro i eme nesia Dawaini inarebitaba iba Yesuma utebi sinebi i nesia we me sitaro nauta.  
\v 18 Nautaba iba i uwara nesia Yesu atafitae anita.  
\v 19 I uwara nesia anitaba Ferosi uwarama sina we matatate weita, eawe, yanu sina nautawa utaitate i uwara nesia Danu buribi anaita weita.   
\s1 Moana Guriki uwara Yesu efitae utebita  
\p
\v 20 Moana Guriki uwaraini i ogaro kowaro Godibai guriguri ufitae Jerusaremu suro manita.  
\v 21-22 Iro manitate mane Firifi, dawa Gareri orofa Beseda su amara, dawabai mane fatate weita, dera amara, yana Yesu efene iba ewaro mare farisia weitaro Firifima nauite ema ekodite Enudurubai ani. Firifima Enudurubai ane weiro ema sadei Yesubai anisite weisi.  
\v 23 Weisiro Yesuma wei, i Ba Eme Sini Amaranu kowa farinuba Godima Dawa ma derawere ufisu wei.  
\v 24 Nanu ba sina wemaro nauawe wei, feame tai nasiniro itafite nuda ufite warafite tai faiyawere uwafisu, mena i feame yo danu torowa nasiniro daido ibifisu. Ibebe tai da uwafisu enanari Na uimauna uwara faiyawere uietaroma uyafitaita, mena uwara faiyawere uietaroma da uyafitaita wei.  
\v 25 Anama danu ununa ewa orofaro ibifie ufisuna dawa ba uifisu wei. Anama ewa orofaro ibeta dawa unutawana dawa me ibene ibene mubite ibifisu wei.  
\v 26 Anama Nanu gaukara mubite uifie ufisuna Nanu buribi ido afisu wei. Na aboro ibimauna dawaini iro Nanu gaukara amara ibifisu wei. Anama Nanu gaukara uegou ufiro Godima dawa we ma kobererau ufisu wei.   
\s1 Yesu Danu uifisu sina wei  
\p
\v 27 Yesuma wei, Nanu neno siosa utasu. Ane wemau? Baba, Nanu uieta kowa Nabairoma mune eta aika odia wemau? Me, eno da wemau wei, Nana eno umane iba ewa orofaro fareba uimau wei.  
\v 28 Baba, Anu ifu ma derawere ua wei. Yesuma eno weina ureroma sina tararite wei, Nanu ifu botai ma derawere uete enanari nono awona ma derawere umau wei.   
\p
\v 29 Godima urero sina eno weiro i guruguru ubita uwarama i sina nautaro nono moana uwarama weita, ure urinu weitaro moana uwarama weita, aneruma Dawaba wenu weita.  
\v 30-31 Eno weitaba Yesuma wei, i sina Naba wiawa usinute yabai wenu weite wei, Godinu koto kowa farinuba i nautawa uwaraba fanisi mafite ewa orofa yawoeta amara, seitani, mu sabiro danu bunaroma nesia dowafisu wei.  
\v 32 Na korosiro odifitaroma eme nesia we ma youre fare Nabai odimau wei.  
\v 33 (Danu uieta daba emaba ma boroyariba iba eno wei.)  
\v 34 Weiro i guruguru ubita uwarama weita, yanu tarawatu bukaroma eno wasu, i Mesaia da uifite me ibene ibene ibifisu wasu. Eno wasude a aneba wenu, i Ba Eme Sini Amara korosiro odifitaita weitate weita, i Ba Eme Sini Amara, Dawa anaiya weita?  
\v 35 Weitaro Yesuma wei, Nanu ikiki wemaro nauawe wei, Nana dera nanefa ario ari. Yabai kikiratu ibimaro Nanu arioro afote Nanu sina nauforo dumuma ya da garari ufiro daba da iwawa ufoita. I dumuro inarebaita uwara ema iwata me aboro anebaita ari wei. Nana ario ari.  
\v 36 Na naue imue ufoitana i arionu adarabu siboita wei. Yesuma eno weite ema ekodite me ari uite aniro Yesu erawa uta.   
\s1 I Ju uwara emanu naueta Yesubai odawa uta  
\p
\v 37 Yesuma buna ueta faiyawere utebiro erebitate nono imutawa utebita.  
\v 38-39 Eno utebitaba Godinu we bou ueta amara Isaiyanu bodere sina awona enanari ui. Isaiyanu bodere sinana eno,  
\li1 Dera Godi, yanu ba sina nautawa utaitate Yesunu buna eraitate imutawa utaitaba ibago yanu Dera Waria Amara naue imue utawa utaita,  
\p Isaiyama weite nono eno wei,   
\li1
\v 40 Emanu diti ma basugari usinute emanu neno ma kimu usinuro iba ditima eotote nenoma imuotote Nabai aotote wiroaotoba, eno utaita,  
\p Isaiyama eno wei.  
\v 41 Isaiyama Yesunu bunaini araeta erite iba eno wei.  
\v 42 Moana dera Ju yawoeta uwarama emanu naueta Yesubai oitate mui uwarabai Yesunu sina wiawa uta Yesunu sina wiotoro Ferosi uwarama ema dera dubu suroma we yoweotoba iya uyatate iba Yesunu sina wiawa uta.  
\v 43 Emanu ununa emenu we ma kobererau ueta. Ema unutawa Godima ema we ma kobererau ueta iba emebai Yesunu sina wiawa uta.   
\s1 Yesunu sinama eme koto ufisu  
\p
\v 44 Yesuma yua weite wei, anama Na naue imue utasute Na siaia ui Godini naue imue utasu wei.  
\v 45 Weite wei, Anama Na erasute Na sisia ui Godini erasu wei.  
\v 46 Na ewa orofa atatanu ario ari umane iba ewaro fareba anama Na naue imue ufisuna dumuro da ibifisu wei.  
\v 47 Anama Nanu sina naufite nono da ufiro dawa koto da umau. Eme koto umane farawa uete eme ma wiromane iba fare wei.  
\v 48 Anama Nanu sina nautawa utasute Na ekodasuna danu dera koto amara ibinu. Nanu watane sinama danu dera koto amara ari. Nanu watane sinama dawa duburo koto ufisu wei.  
\v 49 Nanu imueta torowa wiawa utatane. Nanu Babama eno wia wasuro enanari watane wei.  
\v 50 Anama Nanu Babanu sina naufisuna me ibene ibene ibifisu. Nanu Babama Naba eno wia wenuba iba Nana enanari watane wei.   
\c 13  
\s1 Yesu Danu iwata ueta uwaranu buri uroi  
\p
\v 1 I kowa me sibiro wai ufiro Godima Isaraero uwara Ijifiroma woure aneta ogaro kowa fafisu. Eno Yesu Danu uwaraba neno arama ue ane Danu urero maneta kowaroma emaba neno arama derawere ui.   
\p
\v 2-3 Seitanima danu do maeta imueta Judasi Isikariotiba mai. Yesuini Danu iwata ueta uwaraini ieta itebitana Yesu Dawa iwata, Godima Dawaba buna nesia mairo Godibairoma ewaro fariba enanari Godibai nono owere manibisu.  
\v 4 Ina iwata uite uyarite Danu dei barueta ma kosugari uite tawero munite abagoro uwani.  
\v 5 Eno uite ogo munite dera disiro ma wegari uite i iwata ueta uwaranu buri ogoma uroite Danu abagoro uwani taweroma maituri.  
\v 6 Enoma enoma utebe Saimoni Fitabai fari. Fariro Fitama Yesuba wei, Dera Waria Amara, nanu buri urotasu wei?  
\v 7 Weiro Yesuma wei, Nanu gaukara awona iwawa utasuna duburo iwata ufasu wei.  
\v 8 Weina Fitama wei, kodia nanu buri da urofasu weiro Yesuma wei, anu buri da uromauna ana Nanu iwata ueta amarana me wei.  
\v 9 Eno weiba Saimoni Fitama wei, Dera Waria Amara, nanu buri torowa me, nanu ageini kofirini nesia uroa wei.  
\v 10 Weiro Yesuma dawaba wei, anama ogo tarasuna iga meba buri torowa urotasu weite wei, yana iga mero nono amara demurai dana igawere wei.  
\v 11 Yesu Dawa iwata Danu Dawa do maeta amara iba wei, ya nesiana iga mero nono amara demurai dawa igawere wei.   
\p
\v 12 Emanu buri uroe me sinite Danu dei barueta baruite Danu kabesiro ane yaurite emaba wei, Nanu awona yaba une imutaita aba me?  
\v 13 Yana Na Dera Waria Amaraini Tisa Amara waita. Yana ba waita, ina Na wei.  
\v 14 Nana yanu Dera Waria Amaraini Tisa Amara, Na yanu buri uroneba yanu buri enanari uroawe wei.  
\v 15 Na yanu Dera Waria Amara yanu buri uronero eritaba Nanu yaba une gaukara enanari utebeawe wei.  
\v 16 Yesuma eno weite nono wei, Nanu ba sina wemaro nauawe wei, i gaukara amarana derawere me, danu dawa yawoeta amarana dawa derawere, enanari siaia uiro ani amarana dawa derawere me, i siaia uteda wei amarana dawa derawere wei.  
\v 17 Nanu sina nautaitaba enanari ufoitana Godima yanu neno ma kobererau ufisu wei.  
\v 18 Ya uwara nesiaba wiawa utatanete i Nana we mune odero ibinita uwara Na iwata utatanete emaba torowa watane wei. Eno uneba Godinu bukaro sinama wasu enanari usinu. Godinu bukaro sinama eno wasu, Naini ieta itaitu, i amarama Na do mafisu Godinu bukaro sinama eno wasu.  
\v 19 I sina yaba awona wataneba duburo enanari ufiro efote ido iwata ufote Na naue imue ufoita wei.  
\v 20 Weite nono wei, Nanu ba sina wemaro nauawe wei, anama Nanu siaia utatane uwara mubisuna dawa Na mubisu wei. Anama Na mubisuna dawa Na siaia ui Godi mubisu wei.   
\s1 Yesu Judasima dawa do mafisu sina wei  
\p
\v 21 Yesuma eno weite neno siosa uteda wei, Nanu ba sina wemaro nauawe, mui yabai ibinu amarama Na do mafisu wei.  
\v 22 Eno weiba Danu iwata ueta uwarama ere mataneda Danu sina iwawa uta.  
\v 23 Mui iwata ueta amarama Yesubai yaubi. I amarana Yesunu unu faiya utebi amara.  
\v 24 I iwata ueta uwarama Yesunu sina iwawa utaba Fitama i amaraba age fisu uteda wei, Dana anaba wasu wenauea wei.  
\v 25 Weiro i amara Yesubai baworo yaubiba dana Yesuba wei, Dera Waria Amara, anama Aba eno ufisu wei?  
\v 26 Weiro Yesuma wei, ya erebeawero ewa ieta suriaro tore mamaro mubisu, i mubisu amarama Na do mafisu weite enanari uite Saimoni Isikariotinu amara Judasiba mairo mune i.  
\v 27 Ie me siniro seitanima Judasinu neno ubarero itari. Yesuma Judasiba wei, anu unu gaukara sau ua wei.  
\v 28-29 (Eno weiro i Danu iwata ueta uwarama i sina iwawa utate we imuta, Judasima yanu oi banika yawotasuba Yesuma wenu yanu ogaro ieta ane oiya ua oi ibaiabai me uwaraba oi ma weda wenu we imuta.)  
\v 30 Judasima i ieta mune ie me sinite wawaro sau ani. Wawarona dumuwere.   
\s1 I reka tarawatu  
\p
\v 31 Judasima wawaro aniro Yesuma wei, i Ba Eme Sini Amaranu kowa farinuba Godima Nanu buna derawere ma boroyafiro efote iba Godinu araetawere efoita wei.  
\v 32 Dana Godinu buna ma boroyafiro enanari Godima Danu buna awona ma boroyafisu wei.   
\p
\v 33 Yesuma nono wei, Nanu adarabu, yabai kowa kikiratu ibimau wei. Nanu Ju uwaraba bodere we sina, enanari yaba watane. Na animauna yana Na doberebe doberebe da atafote Nanu animau kabesiro da afoita wei.  
\v 34 Yaba reka tarawatu eno mamau, Nanu neno yabai ibinu, enanari yanu yanu neno arama ue matanebeawe wei.  
\v 35 Orofa atata uwarama yanu neno arama ueta efitate ya uwarana Yesunu iwata ueta uwara iwata ufitaita wei.   
\s1 Yesu Fitama Danu ifu we ma feafisu sina wei  
\p
\v 36 Yesuma eno weiba Saimoni Fitama wei, Dera Waria Amara, aboro anibasu wei? Weina Yesuma wei, Nanu animau kabesiro awona Nanu buribi da afate nono duburo Nanu buribi afasu wei.  
\v 37 Eno weiro Fitama wei, aneba awona Anu anasu iro da animau weite wei, Aba uimau wei.  
\v 38 Weiro Yesuma Fitaba wei, Naba uifasu? Nanu ba sina aba wemaro naua wei, kokora da webiro a ko Nanu ifu nesia rarogonu we ma feareda meo webasu Yesuma wei.   
\c 14  
\s1 Yesuna Danu Damamabai aneta daba demurai  
\p
\v 1 Yesuma wei, neno siosa da uawete Godi naue imue uawete Naini enanari naue imue uawe wei.  
\v 2 Nanu Babanu ibinu orofaro su faiyawere ibinu, iro su merona yaba da wemane wei.  
\v 3 Iro animate yanu su ue bou umate duburo owemate famate ya woure animau wei. Iro woure animaro yaini Naini uruama ibifeisi wei.  
\v 4 Nanu animau daba ya iwata utaita wei.  
\v 5 Yesu eno weiro Tomasima wei, Dera Waria Amara, Anu anibasu kabesini daba ya iwata meba Anu anibasu daba anene iwata ufeisi wei?  
\v 6 Weiro Yesuma Tomasiba wei, Nana i urero aneta dabanu ubi, Nana i ba wetanu ubi nana i wiroetanu ubi iba mui amarama mui dabaroma Bababai da fafisu wei. Enoba Nana Bababai aneta daba demurai idoni wei.  
\v 7 Na iwata uforona Nanu Baba iwata ufoe watane wei Awonana Godi eraitaba Dawa iwata utaita wei.  
\v 8 Weiro Firifima Yesuba wei, Ana Baba Godi we mawetu uaro efete ya neno kobererau ufe wei.  
\v 9 Weiro Yesuma wei, Firifi, yabai kowa faiyawere ibebitarade, aneba Na iwawa utaita wei? Anama Na erinute Nanu Baba erinu wei. Aneba yanu Baba Godi we mawetu ua wenu wei?  
\v 10 Nanu sina naua, Nanu Babaini Naini Wa demurai, Wana arotorowa. Dana Na, Nana Dawa wei. Nanu imueta torowa wiawa utatanero Nanu neno ubarero ibinu Babama Danu gaukara Nabai utasu wei.  
\v 11 Nanu sina nauawe, Nanu Babaini Naini Wa demurai, ina imuawe. Mena bodere Nanu buna utebitara ueta sineta imuawete Naini imuawe wei.  
\v 12 Yesuma nono wei, Nanu ba sina wemaro nauawe wei. Ana anama emanu neno Nabai odegou ufitaitana Nanu buna ueta ufitaro Na Nanu Bababai animauba emana buna ueta derarabo, Nanu otowa buna ueta ari, da ufitaita wei.  
\v 13 Ane Nanu ifuro wenauefitaro eno umaro Godinu buna Nabai efitaita wei.  
\v 14 Ane Nanu ifuro webote ane weboita enanari yaba umau wei.   
\s1 Yesuma Imumu Kotofu we bou ui  
\p
\v 15 Yesuma nono wei, Naba neno arama ufoitana Nanu sina nauegou ufoita wei.  
\v 16 Eno ufoitana Nanu Bababa eno wemau, emabai mui Durua Ueta Imumu Kotofu siaia ua wemaro siaia ufiro yabai tarafite ibene ibene ibifisu wei. I wei sina Dana Godinu Imumu Kotofu. Dawa Godinu ba sina torowa yaba we mawetu ufisu wei.  
\v 17 We mawetu utasuro i orofa atata nautawa uwarama Dawa ere naue utawa utedaba iba Dawa munawa utaitarogo nono Dawa yabai ibinuba nono duburo yanu neno ubarero itafisuba yana Dawa iwata utaita wei.   
\p
\v 18 Yesuma wei, ya da kodimaro benono da ufoita yabai fare ibimau wei.  
\v 19 Ewaro kowa faiya meratu ibimaro i orofa atata nautawa utaita uwarama nono Na da efitaita wei. Yana Na efoita. Na merau ibimauba yaini merau ibifoita wei.  
\v 20 Godinu Imumu Kotofu fafisu kowaro eno iwata ufoita, Nana Godibai ibine yana Nabai ibinita, Nana yabai ibine, eno iwata ufoita wei.  
\v 21 Ana anama Nanu tarawatu nauegou ufitaitana Nabai emanu neno odifitaro Godima i uwarabai Danu neno odifisu. Odifiro Nana Nanu neno emabai odimate Nanu torowa emaba mawetu umau wei.  
\v 22 Eno weiba mui Judasi (Judasi Isikariotina me) dana wei, Dera Waria Amara, anene ya naueta uwara torowaba Anu torowa ma boroyafate i orofa atata nautawa uwaraba da ma boroyafasu wei?  
\v 23 Weiro Yesuma wei, ana anama emanu neno Nabai odifitate Nanu sina nauegou ufitaro Nanu Babama emabai Danu neno odifiro Dawaini Naini emabai ibifutu wei.  
\v 24 Ana anama emanu neno Nabai odawa utaitana Nanu watane sina naue enanari utawa utaita wei. Nanu imuetama wiawa utatanete Godinu imuetama watane Yesuma wei.   
\p
\v 25 Yesuma wei, awona yabai ibedaba iba eno watane wei.  
\v 26 Duburo Godima Danu Imumu Kotofu, yanu Durua Ueta Imumu Kotofu, Nanu ifuro yabai siaia ufiro itafite ya nesia we mawetu ufite yanu beforo ma owefiro Nanu watane sina nesia imufoita wei.  
\v 27 Wesarau ueta yabai odeda ina Nanu wesarau ueta yaba matatane. Ina i orofa atata uwaranu wesarau ueta arina me. Neno siosa da uawete iya da uyawe wei.  
\v 28 Nana animate owemate yabai famau wenero nauita wei. Nanu Babana derawere, Nana kikiratu. Nanu Bababai animauba yana yanu neno Nabai odifote neno arama ufoitana yaru ufoita wei.  
\v 29 Yabai ibeda wene sina enanari ufiro Na naue imue ufoita wei.  
\v 30 Sina yafawere yaba da wemau. Ewa orofa atatanu siosa yawoeta amara fafie utasu. Danu buna derawere meba Na da yawofisu wei.  
\v 31 Godinu wasu sina enanari utataneba i orofa atata uwara nesia eno we imufitaita, Dawa Godi nautasute neno arama derawere utasu we imufitaita wei. Yesuma wei, uyawero ewadaroma anibe wei.   
\c 15  
\s1 Yesu Dana ba na didi  
\p
\v 1 Yesuma wei, Nana i ba na didi ubi ari. Nanu Babana i beata yawotasu amara.  
\v 2 Nanu tai uwanawa iwarana Dana umane ture sanasute ereda kaitu ue sanasu. Nono i tai uwanasu iwara tai faiyawere uwafie iba risi risi kekerama turasu.  
\v 3 I arina yana Nanu watane sina nautaitaba Godima yanu naueta ma derawere utasu.  
\v 4 Yana i tai uwanasu nadidi iwara ari wei. Nabai ibegou ufoitana Na yabai ibegou umau wei. I iwara na didi ubi mena tai da uwafisu, enanari Nabai da ibifoitana yanu ueta sinetana kobererau me wei.   
\p
\v 5 Nana i nadidi ubi ari yana i nadidinu iwara ari. Anama Nabai ibegou ufiro dawabai ibegou umaro danu ueta sineta kobererau, i tai faiyawere uwanasu iwara ari wei. Na ekodifoitana Godinu unu da ufoita wei.  
\v 6 Mui amarama Nabai da ibifisuna Godima dawa iwara i tai uwanawa ari mu sabiro sibu ufisu wei. Sibu ufiro iwara fira ufite inaro sabiro yafisu wei.  
\v 7 Yana Nabai ibegou ufote Nanu sina nauegou ufoitana anene wenaueforo enanari yaba ufisu wei.  
\v 8 Yanu ueta sineta kobererauba emema eno imufitaita, i uwarana Yesunu ba iwata ueta uwara eno we imufitate Godi we ma derawere ufitaita wei.  
\v 9 Godima Danu neno Nabai ibinu, enanari Nanu neno yabai ibinuba kobererau ibiawero Nanu neno yabai ibifi wei.  
\v 10 Nana Godinu sina nauegou utatanero Danu neno Nabai ibinu, enanari yana Nanu sina nauegou utaitana Nanu neno yabai ibinu wei.   
\p
\v 11 I sina yaba wataneba Nanu yaru ueta yabai ibifiro yana yaru derawere ufoita wei.  
\v 12 Yesuma eno weite nono wei, Nanu tarawatuna eno, Nana yaba neno arama utatane enanari yana yanu yaiyemutuba neno arama utebeawe wei.  
\v 13 Mui amarama danu domayamutuba uifie neno arama derawere ufisu, ina neno arama uetanu ubi idoni wei.  
\v 14 Nanu wemau sina nauegou ufoitana yana Nanu naiyemutu siboita wei.  
\v 15 Ya Nanu gaukara uwara mui da wemate naiyemutu wemau. I gaukara uwarama emanu yawoeta amaranu imueta iwata me. Nanu Babanu wei sina nesia yaba wataneba iba naiyemutu watane wei.  
\v 16 Yana Na munawa utaita. Kobere ueta uforo yanu kobere ueta me ibene ibene ibeibie iba ya munataneba anene Godibai Nanu ifuro wenaueforo yaba mafisu wei.  
\v 17 Ewa tarawatu sina yaba eno watane, yana yanu yanu neno anama ue matanebeawe wei.   
\s1 Ewa nasiniro uwarama Yesunu buribi aneta uwaraba wasai derawere ufitaita  
\p
\v 18 Yesuma wei, i orofa atata uwarama yaba neno ka utaitana Na ko neno ka utaba iba yaba neno ka utaita wei.  
\v 19 Yana i orofa atata nautawa uwara ari ibiforona ema yaba neno arama uteibitae nono Nana ya emabairoma we mune eta aika odeba ya ema ari meba iba yaba neno ka utaita wei.  
\v 20 Nanu bodere we sina imuawe. Nana eno we, i gaukara amarana derawere, i yawoeta amarana kikiratu, ina ba me. I yawoeta amarana derawere. I gaukara amarana kikiratu, eno weya wei. Na i yawoeta amaraba siosawere utaba enanari ya i gaukara uwaraba siosawere ufitaita. Nanu sina bodere naufitarona enanari yanu sina naufitae wei.  
\v 21 Ewa orofa atata uwarama Na siaia ui Godi iwawa utaitaba yana Nanu uwaraba iba yaba siosawere ufitaita wei.  
\v 22 Botai emabai farawa uete Nanu sina emabai wiawa uena emabai kerere me. Nono emabai farete Nanu sina emaba weba emanu kerere ibinuba yabai kerere me da webitaita wei.  
\v 23 Anama Naba neno ka utasute Nanu Bababa neno ka utasu wei.  
\v 24 Mui amarama emabai mui buna ueta da ufiro nono Nanu torowa mui buna ueta emabai umarona emabai siosa uetana me. Buna eno utebitararo erebitaba Naini Nanu Baba Godini Waba neno ka uta wei.  
\v 25 Emanu tarawaturo ibinu i ari ufitae iba ewa eno utaba ina ido. Ema Naba ubi mero me sarawere neno ka uta emanu tarawaturo eno ibinu.  
\v 26 I Durua Ueta Kobere Imumu Kotofu Godibairoma siaia umaro yabai itafisu. Dana Godinu ba sina we mawetu ufisu. I Imumu Kotofu, Dawa Godibairoma itafite Naba sina webisu.  
\v 27 Yade, boderewereroma Nabai ibeda erebitaba yana Naba sina weta uwara wei.   
\c 16  
\p
\v 1 Yesuma wei, i sina nesia yaba weneba nono duburo yana Na da ekodifoita wei.  
\v 2 Moana uwarama ya Ju uwaranu dubu suroma we ma yowefitaita wei. I kowa ido fafisuba i kowaro moana uwarama Godinu gaukara ufitae webitate ya ma uifitaita wei.  
\v 3 I uwarana Nanu Babaini Naini iwata meba iba eno ufitaita wei.  
\v 4 Sina eno wataneba duburo i watane sina enanari ufiro Nanu yaba we kakara utatane sina imufoita wei. Weite wei, auboko yabai ibitara iba ewa watane sina yabai wiawa ue wei.   
\s1 I Imumu Kotofunu gaukara  
\p
\v 5-6 Nono awonana Na siaia ui Godi Dawabai animauba yabai mui amarama Naba A aboro anasu da webisu wei. Weite wei, A aboro anibasu wiawa utaitate Nanu wene sinaba neno arama utaita wei.  
\v 7 Nanu sinana ba. Nanu aneta dabana kobererau. Na da animauna yanu Durua Ueta Imumu Kotofu Dawa yabai da fafisu. Nana iro animate Dawa siaia umaro yabai itafisu wei.  
\v 8 Yabai itafisuna i orofa atata nautawa uwaraba emanu neno neno ueta we mawetu ufite Godinu kobere imueta we mawetu ufite Godima koto ufite fanisi mafie wei i sina nesia we mawetu ufisu wei.  
\v 9 Na naue imue utawa utaitaba emanu neno neno ueta we mawetu ufisu wei.  
\v 10 Nana Nanu Bababai animaro Na nono da efoitaba Godinu kobere imueta we mawetu ufisu wei.  
\v 11 Ewa orofa atata siosa yawoeta amarama Godibai koto daido usinuba iba Imumu Kotofuma Godinu koto ueta emabai we mawetu ufisu wei.   
\p
\v 12 Nanu sina faiyawere wemaro awona iwawa uotoba iba yaba da wemau wei.  
\v 13 Godinu ba Imumu Kotofuma fafite yaba ba sina we mawetu ufisu. Danu imueta da webiro Babaini wanu sina weburo naufite i sina webite i fafisu ememetu nesia yaba webisu wei.  
\v 14 Nanu imueta nesia mubite we mawetu ufiro nauteda Na we ma kobererau ufitaita wei.  
\v 15 Nanu Babanu imueta ibaiabaina Nanuba iba wene, Nanu imueta mubite yaba we mawetu ufisu wei.   
\s1 Neno arama uetaini yaru ueta  
\p
\v 16 Kowa faiya me yaini ibebe animaro yana Na nono da efote nono kowa faiya mena yana Na nono efoita wei.  
\v 17-18 Eno weiba Danu moana iwata ueta uwarama we mataneda weita, ane wenu, kowa faiya mena yana Na da efote nono kowa faiya mena nono efoita wenute Nanu Bababai animauba wenu, weitate weita, i kowa faiya me sinana ane sina? Danu sina ya iwata me weita.  
\v 19 Yesuma emanu Dawaba wenauefitae utebita, i sina, iwata uite emaba wei, Nana wene, kowa faiya mero Na da efote nono kowa faiya mero Na efoita wene, iba iwawa uteda waita wei?  
\v 20 Nanu ba sina wemaro nauawe wei, yana i weda neno arama uforo i orofa atata nautawa uwarama yaru ufitaita. Yana neno arama ufote nono neno arama ekodifote yaru ufoita wei.  
\v 21 Mui awetama kuita mubie uteda botai yaru da ufisu. Kuita mubitema oferi ido me sibiro i oferi woufasu da imufite kuita ido mubisuba yaru ufisu wei.  
\v 22 Enanari awonana yabai yaru me. Duburo ya emauna nenoma yaru uforo yanu yaru yabairoma moana uwarama da ma dare mubitaita wei.  
\v 23 I kowaro Na mui wenauereta da wenauefoita wei. Nanu ba sina wemaro nauawe wei. Nanu Bababai Nanu ifuro ane wenaueforo yaba mafisu wei.  
\v 24 Boderewereroma are awona Yana Nanu ifuro ane wenauerawa utebita. Nono awonaroma ane Nanu ifuro wenaueawete muawete yaru derawere utebeawe wei.   
\s1 Yesuma ewa nasini arisiari  
\p
\v 25 Yaba kasei sinaroma watane wei. Mui kowa fafiro kasei sinaroma da wemate Nanu Babanu sina nesia yaba ba wemau wei.  
\v 26-27 I kowaro Nanu ifuro wenaueforo Bababai yaba yanu sina da wemau wei. Yanu neno Nabai oitate Na Godibairoma fare eno imutaitaba Godi Danu neno yabai ibinuba iba yanu sina Dawabai da wemau wei.  
\v 28 Na Godibairoma ewa orofaro fareba nono ewa orofa ekodimate owemate Godibai animau wei.   
\p
\v 29 Yesuma eno weiro Danu iwata ueta uwarama weita, ido awonana kasei sinaroma wiawa utasute ba sina wawuriro wasu weita.  
\v 30 Ana nesia iwata utasute yanu wenauereta iwata utasuba iba da wenauefeisi weita. Enoba Godima A siaia ui, imutaisi weita.  
\v 31 Weitaro Yesuma wei, aiwia awona Na imutaita wei.  
\v 32 I kowa fafie usinuba ya nesia Na ekodifote yanu su suro wo bogaru ue aniboro Nanu torowa ibimau wei. Nono Nanu aika me, Babama Nabai ibifisu wei.  
\v 33 Nana wene sinana yanu neno Nabai odifote kobererau ibifoe iba wene. Ewa nasiniro ibedana oferi woureiboita. Nono Nana ewa nasininu ueta sinetaini ibaiabai nesia arisiareba iba inare kimu uawe wei.   
\c 17  
\s1 Yesu Danu iwata ueta uwaraba guriguri ui  
\p
\v 1 Yesuma i sina nesia we me sinite diti urero sanite ereda wei, Baba, i kowa ido farinuba Anu amara we ma derawere uate Anu araeta mairo Anu Amara Nana A we ma derawere umane watane wei.  
\v 2 Ana Naba weiba ewa orofa atata uwara nesia yawotataneba Ana Nanu age duro odi i uwara me ibene ibene ibeta emaba mamane watane wei.  
\v 3 I me ibene ibene ibetana i ari, ana anama A, i Ba Godini, Na, Yesu Keriso, Anu siaia ui Amaraini imufitaitana emana me ibene ibene ibifitae watane wei.  
\v 4 Anu Naba mai gaukara nesia ewa orofaro ue me sinataneba A we ma derawere uteda watane wei.  
\v 5 Baba, boderewere, eme me, nasini me, ana oma me, i kowaro Abai ibebitararo Ana Na ma derawere uite Anu araeta mai. Awonana enanari Abai Na ma derawere uate Anu araeta Naba mai watane wei.   
\p
\v 6 Ana moana orofa atata uwara munite Nanu age duro odi. I uwaraba Anu imueta webitararo nautebita. I uwarana Anu uwara, iba Naba mairo Anu sina nauteda uegou utebita.  
\v 7 Anu Naba mai ibaiabai nesia Abairoma farinuro iwata utaita watane wei.   
\p
\v 8 Anu Naba wei sina emaba wero nautaba Ana Na siaia uiro Abairoma fare imuegou utaita watane wei.  
\v 9 I uwara durua ua. I orofa atata uwara nesia durua ua wiawa utatane. Ana Nanu age duro mai uwarana Nanu uwara. Iba i uwarana Anuba durua ua watane wei.  
\v 10 Nanu uwarana Anu. Anu uwarana Nanu. Emanu gaukaraba emema Na we ma kobererau utaita watane wei.  
\v 11 Awonana ewa orofa ekodimate Abai manimaro i uwara ewa orofaro ibifitaita. Kobere Baba, Anu bunama Ana Naba mai uwara yawoegou ufaro Aini Naini demurai ibinitu enanari ema demurai ibifitae watane wei.  
\v 12 Ana Naba mai uwarabai ibebe ema Nanu bunama yawoegou utebitara. Eno yawoegou utebitararo moana fearawaro i Godinu bukaroma wasu amara, i uitawa ina kabesiro anibisu amara, dawa torowa fearinu. Idoro Godinu bukaroma wasu enanari ufisu watane wei.  
\v 13 Awonana Abai famauba i sina wataneba i uwarama Nanu yaru ueta ari yaru ufitae watane wei.  
\v 14 Anu sina Nanu uwara emaba webitararo nautebita. I orofa atata nautawa uwaranu imueta imutawa utatanero Nanu uwaraini enanari imutawa utaitaba iba i orofa atata nautawa uwarama ema neno ka utaita watane wei.  
\v 15 I nautaita uwara ema ewadoroma da muate ema durua uaro seitaninu bunama ema da yawofie watane wei.  
\v 16 Nana ewa orofa atata amarana me, enanari ema ewa orofa atata uwarana me watane wei.  
\v 17 Anu sinana ba, iba ema ma kakara uaro ewa sina naufitaitaba ewa orofa atatanu siosa ueta sineta ekodifitate kakarawere aika ibifitae watane wei.  
\v 18 Ana Na ewa orofa atata uwarabai siaia uiro fare enanari Nanu uwara ewa orofa atata uwarabai siaia utatane.  
\v 19 Nana Nanu neno Abai odeda rorowarau ibebatane. Nanu ununa ema Anu sina nauteda enanari ufitae watane wei.   
\p
\v 20 Baba, ewa uwara torowa wiawa utatane. Nono ewa uwarama Anu sina webitaro naufitaita. I naufitaita uwara nesia durua ufae watane.  
\v 21 Nanu ununa i uwara nesia demurai sibitate imueta demurai imufitae watane. A Nabai ibinuro Abai ibine, enanari wabai ibifitae watane. Wabai ibifitaro i orofa atata uwarama efitate Ana Na siaia ui iwata ufitae watane.   
\p
\v 22-23 Anu araeta Naba mai enanari emaba maeba Aini Naini demurai ibinitu, enanari demurai ibegou ufero i orofa atata nautawa uwarama efita. Ana Na siaia uite Anu neno Nabai ui, enanari Anu neno emabai utasu iwata ufitae iba sina eno watane wei.  
\v 24 Baba, Nanu ununa Ana Nanu age duro mai uwara Nabai ibeta. Ana Na boderewere, emeini nasinini ana omaini me, i kowaro Anu unu Naba uite Nanu araeta maiba iba Nanu ununa ema Nabai ibeda Nanu araeta efitae watane wei.  
\v 25 O kobere Baba, i orofa atata nautawa uwarama A iwawa utaitaro Nana A iwata utatanero ewa uwarama Ana Na siaia ui iwata utaita.  
\v 26 Nana Anu ifu emaba webitararo nautebita enanari wemauba Anu unu Naba ui enanari emaba ufaro Na emanu neno ubarero ibimaro ido iwata ufitae watane wei.   
\c 18  
\s1 Yesu yabae budari uta  
\p
\v 1 Yesuma i sina we me siniro Dawaini Danu iwata ueta uwaraini anita. Anebe ane Kidironi kafuru etarafu ane fata. I orofaro mui oriwa beata ibiro i beata wetoro fare ubarero anita.  
\v 2 Yesuini Danu iwata ueta uwaraini bodere i orofaro ane farebitaba Judasi, Yesu do maeta amarama i orofa dawa iwata ui.  
\v 3 I dera fuyo ode sina weta uwaraini Ferosi uwarama ami uwaraini forisimani Judasiba mataro woure ani. I uwara nesia nanefaini ekiwaini ureta yanaeta ibaiabai nesia iro woure anita.  
\v 4 Ane fataro Yesuma i Dawabai ane fafisu ueta nesia iwata uite emaba wei, ana doberaita wei?  
\v 5 Weina Yesu Nasareta Amara weita. Weitaro Yesuma wei, Na ewado wei. Judasi Yesu do maeta amara i fata uwarabai inaibi.  
\v 6 Yesuma eno weina i uwara dubenama ane dowata.  
\v 7 Yesuma nono wei, ana doberaita? Weina Yesu Nasareta amara doberaisi weita.  
\v 8 Eno weitaro Yesuma wei, Na ewadode ane doberaitaba ewa Nanu iwata ueta uwara ekodiawero anibita wei.  
\v 9 (Aubokona Yesuma wei, Ana Nanu agero mai uwara nesiana Nabairoma fearawa eno we bou uiba iba ewa uwara ekodiawero Nabairoma anibita sina wei.)  
\v 10 Yesuma eno weiro Saimoni Fitama danu ba kaiya muni. Munite i dera fuyo ode sina weta amaranu gaukara amaranu banibira ome umane kosari uiro nasiniro itari. I gaukara amaranu ifuna Marakasi.  
\v 11 Fita eno uiro Yesuma wei, anu kaiya, kaiya youetaro odiate kodiaro eno ufitate emanu wakiki ogo mafitaro Nana ima wei.   
\s1 Yesu Enasinu iboro inaibi  
\p
\v 12 Yesuma weiro i ami uwaraini emanu kafitenini i Ju uwaranu forisimanini Yesu mutate budari utate woure anita.  
\v 13 Ane Enasibai ko ane oita. Enasina Kaiyafasi danu darome. Kaiyafasi Dawa i botai dera fuyo ode sina weta gaukara i oyaro utebi.  
\v 14 Bodere Kaiyafasima i Ju uwaraba wei, aneba ya nesia uifeisi. Amara demuraima yaba uifisu, ina ido, wei. I sina enanari ui.   
\s1 Fitama Yesunu ifu we ma feari  
\p
\v 15-16 I uwarama Yesu woure anebitana Saimoni Fitaini mui iwata ueta amaraini emanu buribi anisi. Ane i auboko dera fuyo ode sina weta amara Enasinu su teteuro fata. Dana i mui iwata ueta amara iwataba i iwata ueta amaraini Yesu ubarero anitaro Fitana marau bebeto wawaro inaibi. I mui iwata ueta amarama kasimu yawoeta arumaba weiro kasimu ma ifegari uite Fitaba wei, amua weiro Fitama marau ubarero ani.  
\v 17 Aniro i kasimu yawoeta arumama Fitaba wei, ana i Amaranu mui iwata ueta amara aba me wei? Weina Fitama wei nana me wei.   
\p
\v 18 Iwu farebiba i gaukara uwara ofe iwuma arama utate ina moataro ina gigirariro inaibita. Fitaini i ina gigirariro inaibi.   
\s1 I dera fuyo ode sina weta amarama Yesu wenauerebi  
\p
\v 19 I dera fuyo ode sina weta amarama Yesuba wei, Anu iwata ueta uwara ana ana? Ane sina we mawetu utebasu?  
\v 20 Enoma enoma webiba Yesuma wei, kiwuma we mawetu utawa utebitara. I uwara nesiabai we mawetu utebe i Ju uwaranu dubu suini i dera dubu su ubarero we mawetu utebitararo i Ju uwarama Na nautebita wei.  
\v 21 Aneba Na wenauerasu wei? Nanu sina nautebita uwara wenauearo Nanu sina ema iwataba aba webitaita wei.  
\v 22 Eno weiba mui inaibi forisimanima Yesunu ibo nawataro agema urite wei, aneba i dera fuyo ode sina weta amaraba eno wasu wei?  
\v 23 Weiro Yesuma dawaba wei, Na ane sina siosa wenego wiaro nauma wei. Na mui sina siosa wiawa rairo aneba Na urinu wei?  
\v 24 Weiro Enasima ekodite Yesu i botai dera fuyo ode sina weta amara, Kaiyafasibai siaia uiro Danu age uwane tarieta bobo woure ane oita.   
\s1 Fitama Yesunu ifu nono we ma feari  
\p
\v 25 Fitama ina gigirariro inaibina i uwarama weita, ana Danu mui iwata ueta amaraba aba me weita? Weitana Fitama na me wei.  
\v 26 I dera fuyo ode sina weta amaranu mui gaukara amara, dawa i ome umane turi amaranu su amara, dana Fitaba wei, i beataro aini Dawaini ene aba me wei?  
\v 27 Weiro Fitama me weina kokora ido wei.   
\s1 Yesu Faeratinu iboro inaibi  
\p
\v 28 Waikunaro i uwarama Yesu mutate Kaiyafasinu su ekoitate i gaemani yawoeta amaranu dera suro woure ane oita. I uwara i su ubarero amutawa, emanu kakara tarawatuba. Godima Isaraero uwara Ijifiroma woure aneta ogaro itawa uotoba iba i Ju uwarama su ubarero amutawa uta.  
\v 29 Amutawa utaba Faeratima wawaro emabai itarite wei, ewa amaraba ane wawei sina weboita wei?  
\v 30 Weiro weita, Dawa siosa ueta amara iba woure farisia weita. Merona anu agero da odifene uteibene weita.  
\v 31 Weitaro Faeratima wei, yanu torowama Dawa mubote yanu tarawatuma Dawa koto ufoita wei. Weiro weita, yana Dawa da ma uifeisi, Romani gaemani uwaranu tarawatuba, weita.  
\v 32 (Yesuma bodere Danu uieta eno we bou ui enanari ufisu iba eno weita.)   
\p
\v 33 Faeratima i gaemani su ubarero amuite weiro enanari Yesu woure are oitaro Faeratima wei, Ana i Ju uwaranu dera yawoeta amara aba me wei?  
\v 34 Weiro Yesuma wei, anu torowa wenauerasu aba moana uwarama i sina aba waitaro wenauerasu wei?  
\v 35 Weiro Faeratima wei, na Ju amara me. Anu Ju uwaraini dera fuyo ode sina weta uwarama a woure are oita. A ane usinu wei?  
\v 36 Weiro Yesuma wei, Na ewa orofa atata yawotawa utatane. Nana ewa nasiniro yawoeta kini uwara ari me. Na ewado yawoteimarona Nanu gaukara uwarama Na garari uteda urafitaro i Ju uwaranu age duro Na da odifasu. Nono Na ewa orofa atata yawotawa utatane wei.  
\v 37 Weiro Faeratima wei, Ana dera yawoeta amara wei? Weiro Yesuma wei, Na dera yawoeta amara, ba wasu. Ibago Nanu bayama Na muniro ewa orofaro farena ba sina wemane fare. I ba sina naueta uwarama Nanu sina nautaita wei.   
\s1 Yesu uifisua weita  
\p
\v 38-39 Yesu eno weiro Faeratima wei, ba sina ina ane wei? Eno weite wawaro itarite i Ju uwaraba wei, Dawabai kerere me weite wei, ya Ju uwaranu baeta eno, Godima Isaraero uwara Ijifiroma woure aneta ogaro kowa mui muiro dibura amaraba webaitaro uregari utebataneba yanu ununa i Ju uwaranu dera yawoeta amara ma uregari umau aba me wei?  
\v 40 Weina derawere weita, ewa amarana me, Barabasi ma uregari ua weita. (Barabasi, dana waira ueta amara).   
\c 19  
\p
\v 1-3 Faeratima weiro danu ami uwarama Yesu mutate isuma uta. Utate sinisini bobo emetu kofi ubu utate Yesunu kofiriro barue oitate Yesunu wadia ma kosugari utate I dera yawoeta uwaranu kukui wadiawere mutate barue oita. Eno utate Yesubai fatate irue weita, Ju uwaranu dera yawoeta amara ea weda agema Yesu urebita.  
\v 4 Eno utebitana Faeratima wawaro i Ju uwarabai anite wei, Yesu fafisuna Dawabai kerere me imutataneba ya imufoe iba fafisu wei.   
\p
\v 5-6 Eno weiro Yesuma sinisini kofini kukuiwere wadiaini baruite wawaro ido amo fari. Fariro Faeratima i guruguru ubita uwaraba wei, i amarana ewado eawe, weina i dera fuyo ode sina weta uwaraini dera Ju uwaraini emana weita, korosiro odia, korosiro odia weita. Enoma enoma webitaba Faeratima wei, Dawabai kerere me imutataneba yanu torowa Dawa muawete korosiro odiawe wei.  
\v 7 Weiro i Ju uwarama moko weita, yabai tarawatu ibinu weitate weita, Dawa Nana Godinu Amara weiba yanu tarawatuba uifisu weita.   
\p
\v 8-9 Eno weitaro Faeratima nauite iyareda gaemani su ubarero amuite Yesuba wei, aboroma farinu wei? Weina Yesuma moko wiawa ui.  
\v 10 Wiawa uiba Faeratima nono wei, sina naba moko wiawa? Nanu buna derawereba a uregari uawe wemaro enanari ufitaita. A korosiro odiawe wemaro enanari ufitaita rairo aneba sina moko wiawa utasu wei?  
\v 11 Eno weiro Yesuma dawaba wei, Godima anu buna maiba iba Naba eno ufasu. Godima aba buna matawana Naba eno da ufasu. Ibago anu neno neno uetana kikiratu. I amarama Na anu age duro masinu, i amaranu neno neno uetana derawere wei.   
\p
\v 12 Eno weiba Faeratima Yesu ekodite i uwarabai anite Yesu uregari ufie weina i Ju uwara ema unutawa uregari uetaba weita, ewa amara uregari ufasuna ana i dera yawoeta amara Sisanu domaya me weitate weita, anama na dera yawoeta amara webisuna Sisa ma kikiratu ufisu weita.  
\v 13 Weitaro Faeratima i sina nauite weiro, enanari Yesu woure i koto kabesiro oita. I Ju uwarama i kabesinu ifuna Gabata webaita. I ifunu ubina fetawawere gebiro kabesi, semenesi ari.   
\p
\v 14-15 Godima Isaraero uwara Ijifiroma woure aneta ogaro ue bou ueta kowa ido fariro kowa mare otoro inari. Faeratima i Ju uwaraba wei, yanu dera yawoeta amara Dawa ewado weina Dawa ma uia, Dawa ma uia, korosiro odia derawere weita. Enoma enoma webitaro wei, ya Ju uwaranu dera yawoeta amara korosiro odimane waita wei? Weiro i dera fuyo ode sina weta uwarama moko weita, yanu dera yawoeta amarana Sisa. Yabai mui dera yawoeta amara me weita.  
\v 16 Eno weitaro Faeratima Yesu ma uifitae emanu age duro daido mai.   
\s1 Yesu korosiro ikokoma ure badami ue oita  
\p
\v 17 I uwarama Yesu mutaro Yesuma Danu korosi Danu torowa woure ani. Anebe anebe mui orofaro ane fari. (I orofana Kofiri Tai Torowa Orofa webaita). Ju uwaranu sinaroma Gorogata webaita.  
\v 18 I orofaro fatate Yesu korosiro oita. Mui amara enabira afu mui korosiro ure oitate mui amara enabira afu mui korosiro oitate Yesu abana mui korosiro oita.  
\v 19 Faeratima sina yanaite i korosi deiro odi. I sinana eno owawa ue odi, Yesu Nasareta Amara, Ju uwaranu Dera Yawoeta Amara.  
\v 20 Faeratima i sina Ju uwaranu sinaroma odite Romani uwaranu Ratani sinaroma odite Guriki sinaroma odi. I sina rarogonuroma odite Yesunu korosi deiro odi. I kabesi Jerusaremu su baworoba Ju uwara faiyawerema i sina yawitebita.  
\v 21 I dera fuyo ode sina weta uwarama Faeratiba weita, Ju uwaranu dera yawoeta amara eno da owawa ua weitate weita, ewa amara danu imueta iba wenu, Nana Ju uwaranu dera yawoeta amara eno owawa ua weita.  
\v 22 Weitana Faeratima wei, eno owawa ue odineba enanari ibifisu wei.   
\p
\v 23-24 I ami uwarama Yesu korosiro oitate Yesunu wadia mune nata nata utate kabesi fo (4) ode ode uta. Ami uwara foma (4) Yesu korosiro oitaba iba eno uta. Danu dei baruetaini mutaro nono i dei baruetana kobere wadia, abanaro fifinu ueta me. I wadia deiroma wowonaro rorowarau ubu uiba i ami uwarama we mataneda weita, ewa wadia da ma babafete kasi waribo ufero anama mubisu weita. Godinu bukaroma wasu sina enanari ufisuba iba eno uta. Godinu bukaroma wasu,  
\li1 Nanu wadia mune nata nata ufitate Nanu dei baruetaba kasi waribo ufitaita,  
\p eno wasuba iba i ami uwarama enanari uta.   
\p
\v 25 Yesunu danuaini Kirofasinu aweta Merini Meri Megidarina awetaini Yesunu korosi gigirariro fare inaibita.  
\v 26 Inaibitana Yesuma Danu danuaini Danu iwata ueta ubi amara erite Danu danuaba wei, baya, anu amara ewado ea wei.  
\v 27 Weite Danu iwata ueta amaraba wei, i awetana anu anua ewado ea wei. Eno weiba duburo Danu iwata ueta amarama Danu danua ido danu suro odifie muni.   
\s1 Yesunu uieta  
\p
\v 28 Eno webina Yesu Dawa iwata Danu me sibisu kowa fariba wei, Na ogo nodo utasu wei. Godinu bukaroma wasu sina enanari ufisuba iba eno wei.  
\v 29-30 Mui diririwere ana tai dumamu okiaro ibiro uriri ari emetu mutate isuro uwatate dumamuro ma inutate Yesunu bebeturo oitaro Yesuma ite wei, Nanu gaukara ido me sininu wei. Weite Danu kofiri tafu uite ido ui.   
\s1 Yesunu gaumaro warima yanata  
\p
\v 31 I kowana i Ju uwaranu sabate ue bou ueta kowa. I sabate kakarawere, Godima Isaraero uwara Ijifiroma woure aneta ogaro i kowaro fafisuba. Ibago i Ju uwara unutawa i amara rarogonu korosiro ibetaba Faeratiba weita, i amara rarogonunu buri ma furiawete woure ane odiawe weita.  
\v 32 Eno weitaba ami uwarama anitate enabira afu amaraini enabira afu amaraini emanu buri ma furiata.  
\v 33 Ma furiatate Yesubai fatate etana Yesu uiba Danu buri ma furiarawa uta.  
\v 34 Ma furiyarawa utaro mui ami amarama wari munite Yesunu gaumaro yanairo ogoini onono ido fare itari.  
\v 35 I ueta sineta na nesia ereba iba owawa odatane. Nanu sinana ba iba owawa odataneba ya eforo yanu naueta derawere ufie watane.   
\p
\v 36-37 Godinu bukaroma wasu sina enanari ufisuba ina nesia enanari ui. Godinu bukaroma eno wasu, Danu mui tairatu da ma furiafitaita, eno wasute nono mui sina eno wasu, emanu gaumaro yanata amara nono efitaita, eno wasu.   
\s1 Yesunu uri uta kowa  
\p
\v 38 Duburo Jousefa, Aramatia su amara, dawa i Ju uwaraba iyariba Yesu kiwuma nautebi, dawa Faeratibai Yesunu ofe mubie anina Faeratima ido wei. Ido weiro Jousefama Yesunu ofe korosiroma munite ani.  
\v 39 Nikodimasi, dawa bodere dumuro Yesubai fari, i amarama uri oeta bonanawere fauda, danu ifuna muraini aroaini, ina faiyawere, danu urumuna fifiti (50) kiro, woure fari.  
\v 40 Wo fariro Jousefaini Nikodimasini Yesunu ofe musite kobere inawere wadia musite i fauda bobo Yesunu ofe wayasi. I Ju uwaranu baeta eno iba eno uta.  
\v 41 Yesunu korosi oeta kabesi gigirariro mui oriwa ana beata ibi. I beataro reka uri oeta erabo mui amara iro odawa, kabesi ibi.  
\v 42 I Ju uwaranu sabate sau fafisuba i uri oeta kabesi baworoba i amara sadeima Yesu mune iro ane ma aine oisi.   
\c 20  
\s1 I wawawere uri oeta kabesi  
\p
\v 1 Sabate kowa me siniro waikukuro Meri Megidarina i uri oeta eraboro fari. Fare erina uri garari ueta gebiro mu saniro eta aika ainibiro eri.  
\v 2 Eno erite owerite Fitaini etei Yesunu unu faiya utebi iwata ueta amarabai durami ue ani. Emabai ane farite wei, yanu Dera Waria Amara eraboroma munitate aboro oita ari na iwata me wei.  
\v 3 Fitaini etei mui iwata ueta amaraini uri oeta eraboro durami ue anisi.  
\v 4 Anisina etei mui iwata ueta amarama Fita serigari uite i eraboro dawa ko ane fari.  
\v 5 Dawa ko ane farite tafu uite erabo ubarero erina i inawere wayata wadia ainibiro erite iro itarawa ui.  
\v 6-7 Itarawa uina Fitama danu buribi farite i erabo ubarero itari. Itarite i ainibi inawere wadia erite Yesunu kofiri wayata wadia uregari utawaro i mui wadiabai ainawa, danu kabesiro eno ura ue odiro ainibiro eri.  
\v 8 Eriro mui dawa ko fari iwata ueta amarama itarite ereda Yesu uietaroma uyarinu imui.  
\v 9 (Boderena Godinu bukaro Yesu uietaroma uyafisu wei sina iwawa usite esite imusi.)  
\v 10 I iwata ueta amara sadei ido owesite emanu suro anisi.   
\s1 Yesu Meri Megidarinabai ibo mawetu ui  
\p
\v 11-12 Merima i eraboro nono fari. Fare bebeto gigirariro inaibeda i webi. I weda kofiri tafu uteda erabo ubarero erina inakeorau wadia bobo aneru sadei mui kofiri afu kabesiro yauriro mui buri afu kabesiro yauriro eri.  
\v 13 Eriro i aneru sadeima weisi, aweta, aneba i wasu weisi? Weisiro wei, Nanu Dera Waria Amara ewadoroma munitate aboro oita ari na iwata meba iba i watanea wei.  
\v 14 Eno weite owerite Yesu ereda Dawa Yesu iwawa ui.  
\v 15 Iwawa uiro Yesuma wei, aneba i weda, ana doberasu wei? Weiro Merima Dawana beata yawoeta amara imuite wei, amara, ana Dawa ewadoroma wourinute mui orofaro ane odinuba i orofa wiaro iro animate Danu ofe woure animau wei.  
\v 16 Eno weiro Yesuma wei, Meri. Eno weina Meri owerite Yesu iwata uteda Ju uwaranu sinaroma wei, Rabonai wei. (I sinanu ubina nanu tisa amara.)  
\v 17 Yesuma Meriba wei, Nanu Bababai manawaya Nanu ofero da mamiate Nanu iwata ueta uwarabai aniate eno wia, Nana Baba Godibai manatane. Nanu Baba yaini yanu yamama, Nanu Godi yaini yanu Godibai manatane wia wei.  
\v 18 Eno weiba Meri owerite ani. I iwata ueta uwarabai ane farite wei, yanu Dera Waria Amara ene weite Yesunu wei sina nesia emaba enanari wei.   
\s1 Yesu Danu iwata ueta uwarabai fariro eta  
\p
\v 19 I kowana Sade kowa, yawi siniro i iwata ueta uwarama suro yaubita. I uwarama Ju uwaraba iyataba kasimu garari uta. Kasimu garari utaro Yesuma i su ubarero emabai me ari uite inaibeda wei, iya da uyawete merau ibiawe wei.  
\v 20 Weite Danu ageini Danu gaumaini emaba mawetu ui. I iwata ueta uwarama i Dera Waria Amara etate neno kobererau utate yaru uta.  
\v 21 Yesuma emaba nono wei, merau ibiawe wei. Nanu Baba Na siaia ui enanari Nana ya siaia utatane wei.  
\v 22 Weite Danu bebetu oeno emanu deiro ubuite wei, Godinu Imumu Kotofu muawe wei.  
\v 23 Weite nono wei, yana uwaraba eno weboita, yanu neno neno ueta muneda imutawa usinu, weboitana enanari ufisu. Nono yanu neno neno ueta munawa usinu weboitana enanari emabai emanu neno neno ueta daido ibifisu wei.   
\s1 Yesuini Tomasi  
\p
\v 24 Yesu fare eno utebina Tomasi, sokaka waita amara, dawa i uwarabai ibawa ui.  
\v 25 Dawa fariro i iwata ueta uwarama dawaba weita, yana i Dera Waria Amara erisi weita. Weitaro Tomasima wei, nanu age rorouma Danu age amairo da burimate nanu agema Danu gauma amairo da maimauna da imumau weite wei, agema amairo burimauna imumau wei.   
\p
\v 26 Kowa eita (8) me siniro i iwata ueta uwaraini Tomasini suro nono yaubita. Kasimu garari utate yaubitaro Yesuma nono emabai me ari uite inaibeda wei, iya da uyawete merau ibiawe wei.  
\v 27 Eno weite Tomasiba wei, Nanu age eate anu age rorouma buriate anu age Nanu gauma amairo buria. Aneba imutawa? Eno da uate imuegou ua wei.  
\v 28 Weiro Tomasima wei, Ana nanu Dera Waria Amara ubi. Ana nanu Godi ubi wei.  
\v 29 Weiro Yesuma Tomasiba wei, ana Na erinuba iba naue imue usinu weite wei, ana anama Na da efitate me naue imue ufitaitana emana yaru derawere wei.   
\s1 Ewa bukanu sina ubi  
\p
\v 30 Yesuma buna ereta faiyawere utebiro Danu iwata ueta uwarama i nesia erebita. Nono i ereta nesia ewa bukaro owawa ue odawa ue.   
\p
\v 31 I owawa ode buna ueta efote Yesu Dana Godinu we mune odi Amara, Dana Godinu Amara imufote me ibene ibene ibifoita.   
\c 21  
\s1 Yesu Danu iwata ueta uwara sewenibai ibo nono fariro eta  
\p
\v 1 Yesuma Danu torowa Gareri mesauro nono emabai fariro Danu iwata ueta uwarama Dawa eta. Ina eno ui.   
\p
\v 2 Saimoni Fitaini Tomasi, sokaka waita amaraini, Natania, Gareri orofa Keina su amaraini, Jebedinu amara sadeini Yesunu mui iwata ueta amara sadeini yaubita.  
\v 3 Yaubitana Saimoni Fitama wei, na erio egi woumane anatane, weina yaini anibeisi weita. Weitate anitate boutiro amutate jawe ure anita. Anitate i dumuro erio egi wourawa daido me yaubita.   
\p
\v 4 Waikukuro Yesu maguaro inaibiro Danu iwata ueta uwarama etate Dawa iwawa uta.  
\v 5 Yesuma wei, masigu, erio egi wourita aba me wei? Weina me weita.  
\v 6 Weitaro Yesuma wei, yanu ogo egi woureta woto banibira afu sawete erio egi wouawe wei. Weiro enanari utate erio egi faiyawere iba emanu woto woure amutawa uta.  
\v 7 Yesunu iwata ueta ubi amarama wei, Dana yanu Dera Waria Amara wei. Weiro Saimoni Fitama nauite seti meba danu dei wadia mune baruteda ogoro bibu urite aine maguaro ani.  
\v 8 Eno uina i moana iwata ueta uwarana boutiro anita. Ane erio egi wate fari woto ma youre maguaro ane fata. Emanu daba yafa me, fuyaratu, wani aderedi (100) mita torowa.  
\v 9 Maguaro ane fatate etana Yesuma erio egini buredi ina imuro abuna utebiro eta.  
\v 10 Yesuma wei, yanu moana wourita erio egi woure arawe wei.  
\v 11 Weiba Saimoni Fitama boutiro anite erio egi bobo woto fokia ma youre maguaro odi. Wotoro erio egi wanaderedi fifiti tiri (153) faiyawererogo woto ma babarawa ui.  
\v 12 Yesuma emaba wei, arawete ieta iawe wei. Eno weiba Danu iwata ueta uwarama a anaiya wenauerawa utate Dawa iwata uta.  
\v 13 Yesuma buredini erio egi munite emabai ane nata nata ui.  
\v 14 Yesuma uietaroma uyarite Danu iwata ueta uwarabai kowa sadei fariro eta. Etaro inarebe ewana nono ane fariro eta.   
\s1 Yesuini Fita  
\p
\v 15 Ieta ie me sitaro Yesuma Saimoni Fitaba wei, Joninu amara Saimoni ewa uwaranu neno arama ueta ari mero ana Na neno arama derawere utasu aba me wei? Weiro Fitama wei, aiwia Dera Waria Amara, A iwata Aba neno arama utatane wei. Weiro Yesuma wei, mamoe yawoeta amarama mamoenanatu ieta matasu enanari Nanu mamoenanatu ari Nanu Na naue imue utaita uwaraba Nanu sina wia wei.  
\v 16 Weite Fitaba nono wei, Joninu amara Saimoni, ana Na neno arama utasu aba me wei? Weiro Fitama Dawaba wei, Aiwia, Dera Waria Amara, A iwataro Aba neno arama utatane wei. Weiro Yesuma wei, mamoe yawotasu amarama mamoenanatu yawotasu enanari Nanu Na naue imue utaita uwara yawoegou ua wei.  
\v 17 Yesuma Saimoni Fitaba rarogonu nono wei, Joninu amara Saimoni, Naba neno arama utasu aba me wei? Eno rarogonu weiba Fitama neno siosa uteda wei, Dera Waria Amara, A nesia iwata utasute A iwataro Aba Neno arama utatane wei. Weiro Yesuma dawaba wei, mamoe yawoeta amarama mamoe ieta matasu enanari Nanu Na naue imue utaita uwaraba Nanu sina wia wei.  
\v 18 Yesuma eno weite nono wei, Nanu ba sina wemaro naua wei. A reka amara sinite inareda anu wadia baruite anu unu daba aboro aboro anibae uite enanari ui wei. A ofe kimu sibate anu age sabaro mui amarama anu ofero wadia ma barufite anu agero maibite anu unu dabana me, danu unu aika dabaro a woure anibisu wei.  
\v 19 (Yesuma Fitanu uieta daba ma boroyafiro Fitama Godinu ifu ma derawere ufie iba eno wei.) Eno weite wei, Nanu buribi arate Na da ekodia wei.   
\s1 Yesuini Danu mui iwata ueta amara  
\p
\v 20 Yesu eno weiro Fitama owere erina Yesunu unu faiya utebi iwata ueta amara, i amarama auboko ieta nabero itebita kowa muiro Yesubai yaubeda wei, Dera Waria Amara, anama Aba do mafisu wei?  
\v 21 I amarama emanu buribi fariro Fitama erite wei, etei amarade?  
\v 22 Weiro Yesuma dawaba wei, dawa da uifite me ibifiro Na famate ina Nanu unu umauna ina anu uetana me. Enoba Nanu buribi arate da ekodia wei.  
\v 23 Yesuma eno weiba i sina Yesunu sina naueta uwarabai eno we inarebita, Yesunu unu faiya utebi mui iwata ueta amara da uifite me ibifisu eno we inarebita. Yesuma eno wiawa uite eno wei, Dawa da uifite me ibifiro Na famate ina eno umauna ina anu uetana me, eno torowa wei.  
\v 24 I iwata ueta amarana na Joni. Nana nesia ereba nanu sinana ba iba owawa ue odatane.   
\s1 Dubu sina  
\p
\v 25 Yesuma ueta faiyawere utebi. Danu ueta nesia buka faiyawerero odifitarona i orofa atata su nesia kikiratuba iba wate fafitae uyafitae wei.