\id JAS NT0097.JA Yareba N.T. - Weimer 9-JAN-87 \h JEIMISINU \toc1 JEIMISINU OWAWA \toc2 JEIMISINU \mt1 JEIMISINU OWAWA \c 1 \p \v 1 Na Jeimisi, nana Godini yanu Dera Waria Amara Yesu Kerisonu gaukara amara. Ya mui abua tuero (12) Isaraero uwara yanu ba su ekoitate orofa atata aika maikaro wo bogaru ue anitaba yaba ario sina weda ya uwarabai ewa owawa siaia umane iba owawa ue odatane. |L \s1 I ue eretama ya ma buna utasu \p \v 2 Nanu naiyemutu nauawe. Urumu uetaini awe uyareta yabai fafisuna yaru uawe. \v 3 I urumu ueta yabai fafiro yanu imueta kimuwere Godibai imuforo yanu imueta owere owere da ufiro yanu Godi imue naue ueta daba daido kimu ufisu. \v 4 Awe uyareta aika maika yabai fafiro inare kimu ue nenoma kobererau imuegou ufoitana kobererau ibifoita. Eno ufoitana yanu kobere imuetana kimu ufisuba yana ane ane kobererau uteiboita. |L \s1 Anama dawabai iwata derawere mena Godibai guriguri ufi \p \v 5 Mui iwata me amara dawa Godibai wenauefiro Godima dawaba iwata derawere mafisu. Emema Godibai ane ane wenauefitaitana Godima ibo da ufite aneba wenaueraita eno da webite emaba nesia maegou ufisu. \v 6 Anama Godibai ane wenauefisuna i amara danu naueta kimuwere nauegou ufite Godibai wenauefisu. Dawa wenaueredana Godima i wene ide naba mafisu aba me ari eno da imufisu! Eno imufisuna dawa enea ogonu ufe ari. Enea ogo ufema rerei rerei ue marebasu enanari danu Godibai nauetana aika maika. \v 7-8 Imueta aika maika amara danu imueta aika maikawereba Godima dawaba ane ane da mafisu. Eno ufote imueta aika maika imuegou ufoitana Godima yaba ane ane da mafisu. \s1 Ibaiabai me amaraini ibaiabai derawere bobo amaraini \p \v 9 Godinu me sara ibeta naueta amara danu me sara ibetaba da imufiro Godima dawa ma derawere ufisuba yaru ufie watane. \v 10 I oi derawere bobo amara danu oiba yaru da ufiro Godima dawa ma otowaratu ufisuba iba yaru ufie watane. Oiro siginama wa fomutasute nono nubo me yare yoitebasu enanari i oi derawere bobo amarama kowa nubo me sau me sibiro danu oi nasiniro me ibifisu. \v 11 Kowa inarasute kowa wakikima koe yare yoitasuro nono sigina wa itarasute danu muno me sinasu enanari i oi derawere bobo uwarama emanu oi gaukaraba imuegou uteda utebe daido ido ba uifitaro me sibisu. \s1 Ibaiabai sina waitana ima eme ue erasu \p \v 12 Anama i siosa ue ereta ekodifisuna Godima dawa we ma kobererau ufiro yaru ufisu. Godima Dawaba neno arama utaita uwara emaba enanari me maeta derawere emaba mafisu. \v 13 Siosa ue ereta yabai fafisuna Godima ya ue erasu da wiawe. Siosa ue ereta Godibai da anibiro nono Godima eme siosawere da ue efisu. \v 14-15 Anama danu siosawere uetaroba i siosawere ueta dawabai ufisu. I amarama danu unu torowa ufisuna dawa siosawere ufisu. Dawa siosawere uteibisuba dawa me sara uifisu. \p \v 16-17 Naiyemutu me sara da imuforo! Yanu urero ibinu Baba, Dawa i urero ario ibaiabai ubu ui, Danu aikana ewa orofaro kobere ibaiabai odasute yaba kobererau ane ane matasu. Godima Danu imueta uro owere owere da ufisu. Mui nanefa kobererau yaregou utasu, i ari Danu ario uegou utebasu. \v 18 Godima Danu ba sina yaba mafie we imuite iba Danu ba sina mairo yana nauteda Danu botai uwara sisi. Nono duburo moana uwarama Danu ba sina naufitate Danu naueta uwara sibitaita. \s1 Ya sina naufeisina enanari ufe \p \v 19 Naiyemutu, ewa sina imuegou uforo! Moana uwaranu sina nauegou uawete sina faiyawere da wiawete ibo sau da uawe. \v 20 Anama ibo utedana Godinu kobere ueta utawa utasu. \v 21 Idoba i siosawere uetaini imueta nesia kodiawe. Godima Danu kobere sina yanu neno ubarero odiba nauegou uawero ima yanu neno ma wirofiro me ibene ibene ibifoita. \p \v 22 Godinu sina nauteda nono kobererau utawa utaitana ina ba me, yanu torowa irutaita. Godinu sina nauawete kobererau uawe. \v 23-24 Anama Godinu sina nauteda kobererau utawa utasuna dawa ato erasu amara ari. I amarama ato ereda danu ibo nawata erasute ekodasute anedana danu ibo nawata iga aba roatarau imutawa utasu. \v 25 Anama Godinu kobere tarawatu sina, i sinama yanu siosa uetabairoma ya ma uregari utasu, anama i sina nautasute nono kobererau utasuna Godima dawa we ma kobererau utasu. \p \v 26 Anama na Godi imutatane wasute danu bebetu yawoegou utawa utasute emeba sina siosawere wasuna i amarana meo bobo amara. Danu torowa irutasu. Danu Godi imuetana ba me. \v 27 Godinu kobere sina naueta uwarama i wabu awetaboini benono koiniboroini durua utaitate Godi imuegou utaitate ewa orofanu siosawere ueta sineta enanari utawa utaita. Eno utaitana emanu imueta kobererau Godima wasu. \c 2 \s1 Neno arama utedana uwara nesiaba arotorowa neno arama ufe \p \v 1 Naiyemutu, yanu Dera Waria Amara Yesu Keriso, i ure Dera Amara imutaita. Enoba mui gugua gubari bobo amaraba kobererau ufote nono mui gugua gubari me amaraba ejiwa ufoitana ina siosawereba eno da uawe. \v 2-4 Mui amara sadei yanu dubu su ubarero amufisisi. Mui amarana kobere wadia, age rorou bubuke bobo amara dawa amufiro nono wadia aramawere bobo amara amufisu. Eno amufisisina yana i kobere wadia bobo amaraba weboita, ewa yaureta deiro are yaua webote nono i wadia arama bobo amaraba weboita, etararo aba eminaro yaua weboitana yana ba me siosawere ufoita. Eno ufoitana mui amarana kobererau, mui amarana siosawere weda iba eno ufoita. Godi Dawa eno utawa utebasu. \p \v 5 Naiyemutu nanu sina nauawe. Godima i me sara ibeta uwara emanu naueta Dawabai odifitae iba ema mune odasute Danu yawoeta orofa Dawaba neno arama utaita uwaraba matasu. Enoba Danu we bou ui yawoeta orofa emaba matasu. \v 6 Nono yana i me sara ibeta uwaranu ifu ma siosa utaita. Aneba eno utaita? I utaita i arina i oi derawere bobo uwarama yaba siosawere uteda i koto yawoeta uwarabai ya ma youre ane odaita. \v 7 I oi derawere bobo uwarama yanu ifu Waria Amara Yesu Kerisonu ifu we ma siosa utaita. Eno utaita rairo aneba i me sara ibeta uwaraba siosawere ue nono i oi derawere bobo uwaraba kobererau utaita? \p \v 8 Godinu kobere tarawatu sina Godinu bukaro eno ibinu, anu torowa neno arama utasu enanari anu aiyeba neno arama ua eno ibinu. Eno ufoitana yanu ueta kobererau ibifisu. \v 9 Yana mui amaraba kobererau utaitate mui amaraba siosawere utaitana yana ba mewere utaita. Ba me utaitaro Godima wasu, yana Nanu tarawatu ma siosa utaitaba yana siosawere uwara wasu. \v 10 Anama Godinu tarawatu nesia utebe i tarawaturoma kikiratu mui utawa utasuna i tarawatu nesia ma siosa utasu. \v 11 Boderewere Godi Danu aika wei, dita yagera da fawe, eme da ma uiawe wei. Enoba dita yagera da fafote nono mui amara ma uifoitana yana Godinu tarawatu nesia ma siosa ufoita. \v 12 Iba imuegou uawe! Ya iwata, Godima ya nesia i emenu siosa uetabairoma ma uregari ueta tarawatu sinaroma koto ufisuba iba kobererau torowa utebeawe. \v 13 Godima yanu ueta nesia erasuba yana uwara neno arama uforo Godima ya enanari neno arama ufisu. Idoba uwara nesiaba neno arama uawero Godima ya fanisi da mafi. \s1 Nauetaro kobere gaukara mena i naueta ba me \p \v 14 Naiyemutu nauawe. Anama na Godi nauegou utatane webite nono kobererau da ufisuna ina kobererau me. Danu nauetana ba meba Godima dawa da ma wirofisu. \v 15-17 Mui naueta aweta aba amara emabai ieta me, kobere wadia me, emanu wadia buje bajawere, emana yabai fafitaitana eno weboita, aniawete ina moawete ieta iawe webote emaba inaini ietaini da mafoitana ina kobererau aba me? Ina kobererau me. Enanari Godi nauegou ufote kobererau da ufoitana yanu nauetana uieta ari, ina buna mero kobererau me. \p \v 18 Anama naba na Godi imutatane webiro wemau, anu imuetana erawa utatane. Ana kobererau utawa utasuba anu imueta anene emau? Nana kobererau utataneba yana nanu kobere ueta efoitana nanu imuetana ba iwata ufoita wemau. \v 19 Yana Godi Dawa demurai imutaita. Ina kobererau. Nono seitaninu siosa imumuma enanari imutaitate iyareda iwura mamaita. \v 20 Ya beforo me uwara! Ya Godi imuteda kobererau utawa utaitana ina arotorowa me. Ina yabai ma iwata umau. \v 21-22 Yanu baba Eibaramuma Godinu sina nauite danu amara Aisiki i fuyo oeta kabesiro ma uifie odiro Godima ereda wei, ana kobere amara wei. Eibaramu Godi nauegou uite enanari uiba iba Aisiki fuyo oeta kabesiro odiro Godima ereda Eibaramunu imuetana kobererau we imui. Ina imutaita aba me? \v 23 Godinu bukaroma wei enanari Eibaramu eno ui. Godinu bukaroma eno wasu, Eibaramuma Godi imuegou uiro Godima ereda Eibaramuna kobere amara weite Godima Eibaramuba nono wei, ana Nanu naiye wei, Godinu bukaroma eno wasu. \v 24 Imue eawe! Mui amarama kobererau utasuna Godima a kobere amara wasu. Mui amarama imutasute kobererau utawa utasuna ina kobererau me. \p \v 25 I igera sasae ue inarebi aruma, Reiabu, dawa enanari kobererau ui. Uite Josuama siaia ui uya amara sadei mune danu suro ma feare odite nono mui dabaro odiro anisi. Eno uiba Godima ereda dawa kobererau we imuite weiro Josuanu uwara Reiabu ma uitawa uta. \v 26 Mui amaranu imumu fearasuna dawa uitasu. Enanari Godi imutaisite kobererau utawa utaisina yanu nauetana uieta ari. \c 3 \s1 Yanu torowa yanu meana yawoegou ufe \p \v 1 Naiyemutu, ya nesia tisa uwara siboe da imuawe. Godima ya tisa uwaranu ueta eregou ufiro ya da we mawetu uegou ufeisina sina kimuwere webisu. Nono i tisa me uwaraba sina kimuwere da webisu. \v 2 Ya nesia siosawere utaisi. Anama danu bebetu yawoegou uteda sina siosa wiawa utasuna dawana kobererau. Dawa danu ofe nesia yawoegou utasu. \v 3 Yana osi egi ma owefene aiyoni danu bebetu ubarero odeda yanu unu dabaro anibie ma youraisiro owereda yanu unu dabaro anasu. \v 4 I dera boutiwere eawe. I boutinu ma boboretana kikiratu. Oyau derawere fareibisuroma i bouti ubi amarama iro maibiro bouti i amaranu unu dabaro anibisu. \v 5 Yareta ina kikiratuma koe derawere yarasu, enanari yanu meanana kikiratu nono i meanama sina derararabo webasu. \v 6 Yanu meanana ina yareta ari. Ina yanu ofero mui emetu. Ina i nasiniro siosawere ueta nesia ari. Seitanima i yawotasuba ima sina derawere webe webe eno uteda yanu ofe inama yanono utasute yanu ueta sineta nesia ma siosa utasu. Yana kikiraturoma eno utebaisi. \v 7-8 Emema egini gasiraini towini erio egini ema nesia ma tanama ue yawoteda nono i meanana ma tanama ue yawotawa utaita. Yanu meanana kae ari. \v 9 Yanu meanama Baba Godiba we ma kobererau utaisite nono yanu meanama eme, emana Godi ari, emaba sina siosawere waisina iba Godiba siosa sina waisi. \v 10 Meana demuraima we ma kobererau uetaini sina siosa wetaini farasuro wasu. Naiyemutu, ina ba me. \v 11 Erio ubiroma kobere ogoini siosawere ogoini arotorowa farawa utaisi. \v 12 Boruba anaro oriwa ana tai uwanawa utebasuro gureifi na didiro boruba tai uwanawa utebasu. Nono enanari i enea ubarero ba ogo ibawa utasu. Nono yanu meanama sina kobererauini siosawereini eno waisi. \s1 Kobere iwata Godibairoma farasu \p \v 13 Yabai abo amarana iwata derawerero beforo buna amara? I amarama danu ueta sineta kobererau uteda na eawe da webisuna dawana iwata derawerero beforo buna amara. \v 14 Yana imueta jaja bobo utaitate yanu torowa ma derawere ufoe utaitate na beforo buna amara waitana ina ba meba eno da uawe. \v 15 Eno imutaitana ina Godinu iwata me. Ina emenu iwata. Eno imutedana Godinu imueta imutawa utaitate seitaninu imueta imutaita. \v 16 Yana emeba yanu imueta jaja bobo sina webote eme ma kikiratu ufote yanu torowa ma derawere ufoitana kerere derawere ido uyafiro ba mewere ufoita. \v 17 Godinu imuetana kobererauba yana urero Godinu imueta imutaitana kobererau uegou uteda urane yarane utawa utaitate emeba kobererau utaitate emenu sina nautaitate emeba neno arama utaitate yanu imueta uro owere ma owere utawa utaitate ba sina torowa webaita. \v 18 Anama moana uwaraini urane yarane utawa utasute sina kobererau wasuna i amarama danu siosa ueta ekodifite kobererau ibifisu. \c 4 \s1 Ana amarama ewa nasininu unu utasuna dawa Godini wasai utasu \p \v 1 Ya moana uwara aneba urane yarane utaita? Yanu unu ueta torowa uteiboe iba urane yarane utaita. \v 2 Mui amaranu ibaiabai muboe imutaitaba iba i amara ma uitaita. Mui amaranu ibaiabai ba diti uro owere ma owere utaitaro matawa utasuba urane yarane utaita. Ya unutawa Godinu imueta. Yanu ununa yanu unu torowaba iba Godibai wenauerawaba yaba matawa utasu. \v 3 Yana Godibai wenaueraitaro matawa utasu. Aneba matawa utasu? Yana me sara wenaueraita. Yanu unu torowa ufoe iba Godibai wenaueraita. Enoba Godima yanu waita ane ane matawa utasu. \v 4 Ya me sara imutaita naueta uwara! Yana ewa orofa atata ibaiabai muboe imuegou utaitate Godi ekodaita. Anama danu ununa ewa orofa atata ibaiabai munasuna dawa Godini wasai utasu. \v 5 Godinu bukaroma eno wasu, Dawa Danu Imumu Kotofu yanu neno ubarero odiro Danu Imumu Kotofuma ya Godi da ekodifete Godiba neno arama ufene iba ya yawoegou utasu, Godinu bukaroma eno wasu. Ina me wasu, eno we imutaita? Enona Me! \v 6 Godima yanu siosawere ueta ekodifoe iba ya durua utasu. Godinu bukaroma wasu, Godima i sasae ueta uwara ekodasute nono i sasae utawa ure nudarau ue kobererau utaita uwara durua utebasu eno wasu. \v 7 Godinu sina muawete yanu nenoma seitanini ba uranono uawete danu sina naue kodiawero dawa ya ekodifite aika anibi. \v 8 Godinu sina naufoe Dawabai aniboro Godima yabai ibeda durua ufisu. Ya siosawere utaita uwara ba me ueta kodiawe. Ya imueta owere owere utaita uwara nenoma siosa imueta kodiawete kobererau torowa uawe. \v 9 Yanu ba me uetaba neno siosa uteda i wiawe. Awonana yanu ba me uetaba yo waita. Eno ueta kodiawete i wiawe. Nenoma yaru ueta kodiawete neno siosa uawe. \v 10 Godibai aniawete yanu torowa ma kikiratu uawero Dawa yanu ifu ma derawere ufi. \s1 Yanu yaiyemutuba sina me sara da wiawe \p \v 11 Naiyemutu, moana uwaraba kamena ka da wiawete sina siosawere da wiawe. Anama danu domayaba sina siosawere webite a siosawere amara webisuna dawa Godinu sina unutawa utasu amara ari. Anama eno ufisuna dawa Godinu sina da naufisu. Yana Godinu tarawatu sina nautawa uteda ina kobererau me weboitana yana Godinu tarawatu sina naueta uwara me, yana Godinu tarawatu sina wawei weta uwara. \v 12 Godi Danu aikana i tarawatu maiba Danu aikana eme wawei webisu. Danu aikana eme ma wirofisu aba ma uifisu. Ya anaiya? Aneba yanu yaiyemutu wawei waita? Eno da wiawe. \s1 Ya Godiba siosawere da ufe \p \v 13-14 Moana uwarama Godi imutawa uteda eno waita, mui tauniro anibete iro oya demurai ibeda besenesi gaukara ufete oi derawere mubeisi waita. Ya uwaraba sina wemaro nauawe. Waidumu fafisuna ya ane ufeisi? Yaini naini ya iwata me. Yanu ibetana waikunaro goso ari, ina kikiratu ibeda sau me ari utebasu. Ya enanari ewa nasiniro nubowere ibawa utaisi. \v 15 Idoba i sina kodiawete eno wiawe, Godima ane ane naba webiro enanari umate eno ibimau eno wiawe. \v 16 Awonana imueta ma derawere ue sasae uteda waita. Eno uteda yanu torowa ifu we ma derawere utaitaba ina siosawere. \v 17 Anama kobere ueta iwata uteda nono enanari utawa utasuna dawa ba me utasu. \c 5 \s1 Gugua gubari derawere uwaranu sina \p \v 1 Ya oi derawere bobo uwara nanu sina nauawe. Yana yanu oi rorowarau munawa utebaita. Eno utebaitaba yabai awe uyareta kowa fafiro kerere muboitaba awona i derawere wiawe. \v 2-3 Yanu ibaiabai derawere yajara utasuro yanu kobere wadia jirikoma ataitaro yanu goruini siriwa oini je ae fare anasu. Uwarama yanu je aeta oi efitate ya wawi uwara iwata ufitaita. Yanu neno yanu oibai ibinuba i dubu kowaro yanu oima yaba wawei wenono ufite ina ari yanu ofe yanono ufisu. Ewa me sibie utasu kowaro yanu ununa ibaiabai torowa muneta ina ba me. \v 4 Moana emema yanu gaukara utaro emanu oi ba matawa mae gagau utaba Godima i moko maeta ereda yanu siosawere ueta iwata utasu. I gaukara uwarama iba i weda wawei waitana yanu Dera Godima emanu waita sina nautasu. \v 5 Yana ewa orofaro ibedana ibaiabai derawere munaitate yanu unu torowa uteda ieta derawere itaita. Boroma keweawere urasuro uraita. Enanari yana yanu unu torowa utaitate yanu neno kewea ari uraitaba uifote uitawa ina kabesiro daido aniboita. \v 6 I kobere uwarama ya urane yarane utawaro yana ema me sara do mateda ma uitaita. \s1 Ya nesia inare kimu ufete yanu Dera Waria Amara yawofe \p \v 7 Nono ya, nanu naiyemutu, yanu Dera Waria Amara fafisuba Dawa toafurau yawoforo! Emema emanu waiya waitaitate yawotebe yawotebe nono duburo ietata munaita. Ema beata waitaitate obi mae kowa yanae ufie yawotaita. \v 8 Enanari ya toafurau yawoforo! Yanu Dera Waria Amara sau fafisuba neno kimu uawe. \p \v 9 Yanu yanu kamena ka da we matawe. Eno ufoitana Godima ya koto ufisu. Yanu dera koto ueta Godi, Dawa yanu bebetobai inaibeda eno koto ufie utasu eawe. \v 10 Naiyemutu, Godinu we bou ueta uwara imue eawe! I uwarama Godinu sina weitaro emema ema siosawere utaro i we bou ueta uwarama uranawa yaranawa Godi ekodawa Danu sina webita. I uwara imue eawete enanari uawe. \v 11 I uwarama Godibai bunawere imuteda Dawa ekodawa utebitaba iba imuteda i uwarana kobere uwara waisi. Boderewere mui naueta amara Jobu enanari ui. Danu sina ya iwata utaita. Dawa Godibai bunawere imutebiba Godima Jobunu dubu kowaro dawaba kobererau ui enanari yaba kobererau utasute ya neno arama utasu. Ina ya iwata utaita. \s1 Kimuwere we bou uetaba wasu sina \p \v 12 Naiyemutu, yanu buna sina wedana ureini nasinini ane ane uetaro da webiawe. Aiwia weboitana aiwia torowa wiawe. Me weboitana me torowa wiawe. Eno ufoitana Godima ya wawei da webisu. Mena Godima ya koto ufisu. \s1 Naueta kobere uwaranu guriguri uetana buna derawere \p \v 13-14 Yabai anama neno siosa uteibisuna guriguri ufi. Anama yaru uteibisuna Godinu ifu soniroma we ma derawere ufi. Anama ofe woureibisuna Godinu sina naueta uwara webiro dawabai fafitate guriguri ufitate yanu Dera Waria Amaranu ifuro webitate i ofe woureta amaranu ofero oera kikiratu odifita. \v 15 Eno ufoitana yanu naueta derawereba i ofe woureta amara wirofiro Godima dawa ma buna ufisu. I amara dawa botai neno neno utebina Godima danu neno neno ueta nesia mubite imutawa ufisu. \v 16 Idoba yanu neno neno ueta yanu yanu we ma boroyare matawete Godibai yanu yaiyemutunu neno neno uetaba guriguri uawero Godima ya ma wirofi. Mui kobere amarama Godibai guriguri utasuna Godima nauteda enanari utasu. \v 17-18 Iraija dawana ba amara torowa. Dawa ya ari. Dawa Godibai obi da mafie guriguri bunawere utebiba oya rarogonu muduna afuro obi matawa ui. Nono obi mafie guriguri uiba Godima nauiro obi derawere mairo ietata waratebi. Danu ueta enanari ufoitana enanari ufisu. \s1 Anama kobere daba ekodifisuna dawa ma owere mune woure afe \p \v 19-20 Naiyemutu, anama Godinu daba ekodifite mui dabaro anibisuna nono mui amarama i amara ma owefite Godinu dabaro odifisuna dawa kobererau ufisu. Eno ufisuna Godinu daba ekodi amara me sara da uifiro danu imumuna uitawa ina kabesiro sara da anibisu. Mui amarama mui amara eno durua ufisuna Godima i ba me utebi amaranu ba me ueta faiyawere mune imutawa ufisu.