\id HEB NT0097.HE Yareba N.T. - Weimer 9-JAN-87 
\h IBURU 
\toc1 IBURU WAITA UWARABAI OWAWA 
\toc2 IBURU 
\mt1 IBURU WAITA UWARABAI OWAWA  
\c 1  
\s1 Godinu Amarama kobere sinarau yaba mai  
\p
\v 1 Boderewere Godima Danu we bou ueta uwaraba buna aika maika mairo emana yanu abuamutuba Godinu sina webita.  
\v 2 Nono awonana i me sibisu kowaro Godima Danu Amaraba buna maiba Danu Amarama yabai Godinu imueta ido we ma boroyarasu. Godima weiro Danu Amarama ureini nasinini kowaini sakaraini muinaini nesia ubu ui. Godinu Amara Yesuma i nesia yawofie iba Dawa mune odi.  
\v 3 Godinu araetaini Danu Amaranu araetana arotorowa. Godini Dawaini emana arotorowa. Dana Danu buna sina wasuro ewa orofa atata ememetuini kowaini sakaraini muinaini nesia kobererau utaita. Dana emenu siosawere ueta munite ema ma roatarau ufie iba korosiro uite urero i buna derawere Godinu banibira age afu mane yauri.   
\s1 Godinu Amarama aneru nesia serigari ui  
\p
\v 4 Yesuma eno uiba Godima Danu Amarana derawere we odite i aneruba otowaratu we odi. Enanari Danu ifu derawere mamite emanu ifu otowaratu mami.  
\v 5 Godima aneruba eno wiawa Danu Amara torowaba eno wei,  
\li1 Ana Nanu Amara. Awonana Na Anu Amama  
\p eno wei. Nono mui aneruba eno wiawa, Nana anu  
\li1 amama simaro ana Nanu amara sibasu,  
\p eno wiawa ui.  
\v 6 Godima Danu Amara ubi ewa orofaro siaia ufie utedana Dana eno wei,  
\li1 Godinu aneru nesia Dawabai guriguri ufitaita,  
\p eno wei.  
\v 7 Godinu bukaroma eno wei,  
\li1 Godima Danu aneru oyau ari odasute Danu gaukara ueta aneruna ina bubura ari odasu,  
\p eno wei.  
\v 8 Nono Godima Danu Amaraba emabai nono eno wei,  
\li1 Ana Godi, Ana yawoteda enanari ibene ibene yawoteibasu. Ana Anu uwara arotorowa rorowarau yawotasu.  
\v 9 Anu ununa kobererau ueta. A unutawa siosawere ueta. Enoba Godi, Anu Godima Anu masigubairoma A mune aika odite Ana dera Kini Amara odiro Ana yaru ui,  
\p eno wei.  
\v 10 Eno weite nono mui sina eno wei,  
\li1 Dera Waria Amara, Ana i orofa atata nasini nesia ubu uite Anu agema i ure ubu ui.  
\v 11-12 I ureini nasinini nesia me sibiro nono Ana daido ibifasu. I ureini nasinini buruka ufisuba ema ura ufasu. Wadia eru utebasaute iga utebasu enanari ureini nasinini nesia aika ufite eru ufiro Anu torowana aika da ufate arotorowa daido ibifasu. Ana buruka da ufate me ibene ibene daido ibeibasu,  
\p eno wei.  
\v 13 Godima aneruba eno wiawa ui,  
\li1 arawete Nanu banibira age afu yauawero yaba wasai utaita uwara ma serigari umate eminaro odimaro yanu buri emanu deiro sawe,  
\p emaba eno wiawa Danu Amaraba torowa eno wei.  
\v 14 Enoba i aneruna ane ari? Emana Godinu gaukara ueta imumu torowa. Godima ema siaia utasuro anaitate Godinu wiroeta mubitaita uwara durua utebaita.   
\c 2  
\s1 Godima ya ma owere muniba imueta derawere  
\p
\v 1 Yesu Keriso Dana derawereba Godinu daba ekodioisiba yanu nausi ba sina enanari uegou ufeisi.  
\v 2 I aneruma i tarawatu Mosesiba mata. I tarawatuna ba. I tarawatu sina nautawa uwara gifena utebitaba Godima ema fanisi matebi.  
\v 3 Enoba Godinu wiroeta sina da naufete gifena ufeisina anene me ibifeisi? Enona me. Godima yaba fanisi derawere mafisu. Yanu Dera Waria Amara Dawa ko i wiroeta webiro nautebita. I nautebita uwarama ina ba sina weitaro nausi.  
\v 4 Emana ina ba eno webitana nono Godima bunawere uetaini kamama eretaini enoma enoma uteda nono Danu unu uite Danu Imumu Kotofunu buna aika maika emeba matebi.   
\s1 Yesuna ya ma wiroe munetanu kofiri  
\p
\v 5 Imue eawe! Godima i ureini nasinini kobererau ibifiro aneruma yawofitae we odawa ui. Ewa nasinina i reka ureini reka nasini yawoetaba watane.  
\v 6 Godinu bukaroma eno wasu,  
\li1 O Godi, i ba emeini i Ba Eme Sini Amara ema ane ari iba emaba imuegou utasu? Ana nesia ubu uiro emana eme torowa rairo, aneba ema woroworo durua utasu?  
\v 7-9 Ana aneru derawere odite I Ba Eme Sini Amarana eme otowaratu odiba iba Dawa kowa eno fuyaratu ibebi. Ibebe nono duburo Dawa ma buna uite Danu ifu we ma derawere uite Dana ane ane nesia yawofie iba i ememetu nesia ma kikiratu ui,  
\p eno wasu. I sinanu ubina edono, Godi Danu ununa emema nesia yawofitae iba ema mune odi. Eawe, nono awonana emema nesia yawotawa utaitaro eraisitema yanu Dera Yawoeta Amara Yesu eraisi. Boderena i aneruna derawere, Dana otowaratu, eno kowa yafa me fuyaratu ibebi. Godi Danu ununa Yesuma uwaraba tare uifie iba odi enanari Yesu Keriso Danu torowa otowaratu sinite tararite ui. Enoba Godima Dawa ma uyarite Danu ifu we ma derawere uiba Dana kobererau yawotasuro ina ya ere iwata utaisi.  
\v 10 Godi Dana nesia ubu uiba nono nesia ue me sibisu. Enoba Dana weiro Yesuma Danu uwara faiyawere Danu torowa ari ma kobererau ufite Godinu iboro ma inafie iba oferi derawere wourebi. Dawa oferi derawere wourebiba iba Danu torowa yanu kobere ma wiroeta Amara sini. Ina Godinu kobere imueta.   
\p
\v 11 I eme ma kobererau ueta Amaraini i kobere uwaraini emanu Damamana demurai. Enoba Yesu i uwaraba maru utawa uteda yana Nanu naburetaini arumami eno wasu.  
\v 12 Yesuma eno wei,  
\li1 Baba Godi, Anu ifu Nanu naburetabai wemate emabai ibeda emaini Naini Aba soniroma we ma kobererau ufeisi,  
\p eno wei.  
\v 13 Yesuma nono wei, Nanu imueta Godibai odegou umau wei. Eno weite wei, Nana ewado, Naini Godima Naba mai koiniboroini ewado ibinisi wei.   
\s1 Yesu ya durua ufie iba Ba Eme Sini  
\p
\v 14-15 Dana wei, koiniboro emana ofeini nenoini onono bobo. Enoba Yesu Dana ema ari sini. Seitani dana i uietanu ubi amaraba, Yesu Danu ununa seitani ma siosa ufite i uietaba iya uyareta sabua ueta ari uwara ma uregari ufie iba eme sinite ui.  
\v 16 Ya iwata, Yesu Dana aneru sinawa. Dana Eibaramunu sisia amara sini.  
\v 17 I sinanu ubina eno, ya uwaraba Dana Godinu gaukara uegou uteda Godinu kobere durua ueta fuyo ode sina weta Amara sibite uwaranu siosawere ueta mubite imutawa ufie iba Danu dabureta ari sini.  
\v 18 Eno siniba awonana ane aneba i siosawere ufene imutaisi uwara durua utasu. Seitanima Yesubai danu siosa imueta mairo Yesu Dawa unutawa ini, nono oferi derawere utebiba iba awona i uwara durua utasu. Nono Yesu Dawa iwata i seitanima emebai siosawere ueta iba ya durua utasu.   
\c 3  
\s1 Yesunu ifuna kobererauba Mosesinu ifu ma serigari ui  
\p
\v 1 Naiyemutu, Godi Danu ununa ya Danu kobere uwara sibete Dawaini urero ibifene iba yaini we mune odiba nanu sina wemaro nauawe. Ya yanu naueta Yesubai oisiro Godima Yesu yanu Godibai nauetanu fuyo ode sina weta Amara odiba Dawa imuegou uawe.  
\v 2 Godi Danu ununa Yesu i gaukara ufie Dawaba i gaukara mairo Godiba gifena utawa kobererau utebi. Enanari Mosesi dana Godinu uwarabai ibeda Godiba gifena utawa uteda Danu gaukara uegou utebi.  
\v 3 I su utasu amara danu imueta derawereba iba dana derawere, i suna derawere me. Enanari Yesu Dana derawere. Dana Godinu Amara ubi. Mosesi dana Godinu sabua ueta amaraba dana otowaratu.  
\v 4 Ya iwata, i su nesia emema utaita enanari Godi Dana nesia ubu ui.  
\v 5 I arina Mosesima Godinu uwarabai ibeda Godiba gifena utawa ui. Dana Godinu gaukara amara iba Godinu ueta ufisu sina emabai webi.  
\v 6 Yesu Keriso Dana Godinu Amara iba Dana Godinu su yawotasu. Imue eawe. Ya buna utaisite Godi imutaisite Danu we bou ueta nesia mubene imutaisina yana Danu su uwaraba ya nesia Dana yawotasu.   
\s1 Sina nautawa uwara da ane imoifitaita  
\p
\v 7 Godinu Imumu Kotofuma eno wasu,  
\li1 yana Danu sina awona naufoitana gifena da uawe.  
\v 8 I sinana eno, bodere yanu yanatamutuma i yao orofaro inaredana Godiba gifena uteda Dawa ekoitate Godi woure eta. Awona eno da uawe, Godinu Imumu Kotofuma eno wasu.  
\v 9 Iro yanu yanatamutuma Na ue erebita. Nana emaba oya foti (40) durua uteda kobererau utebitararo eredana nono Na unutawa uteda ue erebita.  
\v 10-11 Eno utebitaro emaba ibo uete we, i uwaranu imuetana siosawere torowa imutaitate Nanu imueta ema iwata me we. Eno wete ibo uteda we imue, emana Nabai da fafitate da imoifitaita we imue,  
\p Godima eno wei. Godinu Imumu Kotofuma i sina nesia awona yaba eno wasu.   
\s1 Isaraero uwaranu ueta ari da ufete Godinu sina da naue kodife.  
\p
\v 12 Naiyemutu, yana neno siosawere ibeda Godi imutawa uotote i me ibeta Godi ekodiotoba yanu torowa imuegou uawe.  
\v 13 Ibago siosawere imuetama iruosoro mui amarama siosawere ueta imuosote gifena uosoba awona yanu yanu durua ue matawe. Godima wei, Nanu watane kowana awona ibinita kowaba watane wei. Enoba Godinu sina nesia nauegou utebeawe.  
\v 14 Yana yanu naueta Yesu Kerisobai oitate Dawa imuegou uta enanari awona dawa imuegou utaitana yaini Dawaini uruama yaubeda Danu imuetaini ane ane nesia munaita.   
\p
\v 15 Godinu Imumu Kotofuma eno wasu,  
\li1 awona yana Danu sina naufoitana gifena da uawe. Yanu yanatamutuma Godinu sina nautawa uteda gifena utebita i ari da uawe,  
\p eno wasu.  
\v 16 Ana anama Godinu sina nautate gifena uta? I Ijifiroma Mosesinu buribi anebita uwara ema nesia Godinu sina nautebitate gifena utebita.  
\v 17 Godima anaba oya foti (40) ibo utebi? Godima i siosawere ue yao orofaro me sara uitebita uwaraba ibo utebi.  
\v 18 Godima i eno inarebita uwaraba wei, Nabai da fafitate da imoifitaita wei. Dana eno weide anaba wei? Dana i gifena ue siosawere utebita uwaraba wei.  
\v 19 Imue eawe. Emana Godi imutawa utebitaba iba Godibai imoieta kabesiro anawa uta.   
\c 4  
\s1 Godinu uwaranu imoieta  
\p
\v 1 Godima we bou uteda wei enanari awona eno wasu, Nabai arawete imoiawe eno wasu. Godima yana siosawere wiosoro Dawabai anawa uotote imoitawa uotoba iyafote rorowarau uegou ufoe watane.  
\v 2 Bodere emana Godinu kobere sina nauta ya enanari nausi. I uwarama Godinu kobere sina nautaro ima ema durua utawa ui. Aneba? Emana nauteda emanu naueta Godibai odawa utaba i kobere sinama ema durua utawa ui.  
\v 3 Ya awona nautaisi uwara, yanu naueta Godibai odaisiba yana Dawabai ane imoitaisi. Godima eno wei, yanu babamutuba,  
\li1 Nana ibo uteda emaba we, emana Nabai daido da fare imoifitaita we,  
\p Dana eno wei. Godima ureini nasinini ubu utebi i kowaro Danu gaukara ue me sinite i sina ido eno wei.  
\v 4 Godinu bukaro i kowa seweninu sina edono ibinu, Godima gaukara utebe ekodite kowa seweniro imoi, eno ibinu.  
\v 5 Godinu bukaroma i sinaba nono eno wasu, emana Nabai da fafitate Naini uruama da imoifitaita eno wasu.  
\v 6 Godinu kobere sina botai nautebita uwarama emanu naueta Godibai odawa utate iba Godibai ane imoitawa utaba nono awonana ana anama Godibai imoifitae utaitana ane imoitaita.  
\v 7 Imue eawe. Godima mui kowa odite nono mui kowa awonaini enanari odasu. Deiwidi dana Godinu sina eno wei,  
\li1 awona yaba nui watane. Danu sina naufoitana Dawaba gifena da uawe,  
\p eno wei. I sina nana auboko owawa ue ode.   
\p
\v 8 Mui Isaraero amara Josua dana i uwara durua ufiro i uwarama Godibai ane imoieta kowa odiba i odoro ane imoifitarona Godima emaba mui imoieta kowa da webie.  
\v 9 I sinanu ubina edono, Godima nesia ubu ue me sinite ido imoi. Enanari yanu ununa Dawabai imoifene ufeisina Dawabai ane imoifeisi.  
\v 10 Anama Godibai imoitasuna Godima imoiteda Danu gaukara ekodi enanari i amarama danu gaukara ekodasu.  
\v 11 Enoba ya nesia Godibai ane imoie efene watane. Emana gifena utebita i ari uoisite Godibai anawa uoisiba eno da ufene watane.   
\p
\v 12 Godi Dawa me ibeda bunawere utasu enanari Danu sina bunawere utasu. Godinu sinana awe derawere oini derena nio sadei bobo ba kaiya ari. I kaiyana awerogo nono Godinu sina awe derawere. I sinama kaiya ari emenu neno baka tai umanono utasute siruru tai umanono utasute emenu nenoma imuetaini unu uetaini nesia iwata uteda ma boroyarasu.  
\v 13 Ya Godibai ane ane ma fearawa utaisiro Dana nesia erasu. Dana i orofa atata nasiniro ibinita ememetu nesia erasu. Ya nesia Dawabai ane yanu ueta sineta nesia webeisi.   
\s1 Yesuna yanu dera fuyo oeta Amara  
\p
\v 14 Enoba yanu Dera fuyo ode sina weta Amara, Godinu Amara Yesu, Dana Godinu kobere me ibeta orofaro aniba yanu naueta ma kimu ufete inare kimu ufene iba watane.  
\v 15 Yanu dera fuyo ode sina weta Amara Dawa iwata yaini naini ya nesia buna meba ya durua utasu. Seitanima danu siosawere imueta yabai odasu enanari yanu dera fuyo ode sina weta Amarabai siosawere imueta nesia odiro Dana siosawere utawa uiba Dawa seitaninu siosawere imueta iwata uteda ya durua utasu.  
\v 16 Enoba da iya uyafete yanu imueta ma kimu ufete Godinu kobere durua ueta yaure yawoetanu orofaro anibeisi. Iro anibeisina Godima yaba neno arama uteda durua ufiro siosawere da ufete me ane ibeibeisi.   
\c 5  
\s1 Yanu botai fuyo ode sina weta amara Yesu Dana kobererauro bunawereba Dana ya ma owere muni  
\p
\v 1 I fuyo ode sina weta uwara emebairoma mune odasuro emana Godibai i uwaraba gaukara utaita. I fuyo ode sina weta uwarama i uwaranu Godibai me maeta munaitate i uwaranu siosawere uetaba Godibai fuyo odaita.  
\v 2 I fuyo ode sina weta uwara emaini buna meba emana i siosawere utaita uwaranu ueta sineta iwata utaitate ema kekerama durua utaita.  
\v 3 I fuyo ode sina weta uwara emana buna meba siosawere utaitate emanu siosawere uetaba fuyo odaita. I uwaranu siosawere uetaba fuyo odaita enanari emanu siosawere uetaba Godibai fuyo odaita.  
\v 4 Mui amarama i fuyo ode sina weta gaukara danu torowa da mubisu. Godima Eroni mune odi, enanari i fuyo oeta uwara mune odasu.   
\p
\v 5 I ari Yesu Keriso Danu torowa i fuyo ode sina weta gaukara munawa uite danu ifu we ma derawere utawa ui. Dawa eno utawaro nono Godima Dawaba wei,  
\li1 Ana Nanu Amara awonana Na Anu Amama. Anu ifu we ma derawere utatane,  
\p eno wei.  
\v 6 Godinu buka mui afuroma eno wei,  
\li1 Ana fuyo ode sina weta Amara me ibene ibene ibifasu. Mekisideki dawa ko fuyo ode sina webi, i ari Anu torowa enanari uteibasu,  
\p eno wei.   
\p
\v 7 Yesu Dana ewa nasiniro ibeda Dawa iwata Godima Dawa uietaroma ma wirofisu. Enoba Dana arua we i weda Godibai guriguri utebi. Dana Godi ititi kakara uteda imutebiba Godima Danu sina nautebi.  
\v 8 Yesu Dana Godinu Amararogo nono Dawa i oferi woureda Danu gaukara kobererau ufie iba gifena utawa ue iwata ui.  
\v 9 Dana ba kobererauba Danu sina nautaita uwaranu ma wiroeta Amara siniba ema ma wirotasuro me ibene ibene ibaita.  
\v 10 Nono Godima wei, Mekisideki dana Nabai fuyo ode sina webiba Ana danu sirorari ari iba enanari uteibasu.   
\s1 Ya kiki koiniboro ari da ibeibe  
\p
\v 11 Danu fuyo ode sina weta uwara sinanu ubina faiyawere ibinurogo i sinana kimuwere nono yanu beforo buna meba i sinanu ubi wiawa une.  
\v 12 Yana Godinu sina yafawere nautebitaba awona yana tisa uwara siboe watane. Nono yana Godinu kimuwere sina nauegou utawa utaitaba emebai da we mawetu uforo mui tisa uwarama yaba Godinu nudawere sina webitaita. Enoba yana amaro kuita ariba yana ba ieta itawa ama torowa itaita.  
\v 13 Anama ama itasu dana kuita ari. Dana i ba uetaini meo uetaini nesia iwawa ata bata utebasu.  
\v 14 I dera uwara emana ba uetaini meo uetaini iwata uteda abanaro ma saragari utaitate ieta torowa itebaita i ari.   
\c 6  
\s1 Ya buna ufete yanu naueta mamegou ufe  
\p
\v 1 Enoba Yesu Keriso botai ubi we mawetu ueta sina torowa woroworo da webete Danu mui bunawere sina naufene watane.  
\v 2-3 I botai ubi sina nesina eno, siosawere ueta sinetaini yanu naueta Godibai oetaini babataito uetaini kofiri deiro agema oetaini uietaroma eme ma uyaretaini Godinu me ibene ibene fanisi maetaini i sina nesia woroworo da webete Godinu mui buna we mawetu ueta sina nauteda iwata ufene iba watane. Godi Dana unu eno ufisuna eno ufete Yesu Keriso da ekodifeisi.   
\p
\v 4-6 Godinu sinama moana uwaranu imueta ma ario ufisu. Eno ufiro emana i urenu wiroeta mubitaro Godinu Imumu Kotofuma emabai ibifisu. Emabai ibifiro emana Godinu kobere sina ieta inono ufitate i duburo fafisu buna ueta iwata ufitate nono nesia ekodifitaitana anene ema ma owefiro emanu neno neno ueta dubena afu sabitaita? Eno ufitaitana emana Godinu Amaraba sina siosawere eme ditiro webitate Dawa korosiro nono ure odifitate Dawaba dubena sabitaitaba ema da ma owefiro emanu neno neno ueta dubena afu daido da sabitaita.   
\p
\v 7 I Godinu kimuwere sina nautaita uwaraini nautawa uwarana ewa kasei sina ari. Obima ainewaure mateda nasini mae ma nuda utasuro ieta aika maika i nasiniro waratasuro i waiya ubi uwarama itaita. Enoba Godima i nasini ma kobererau utasu.  
\v 8 Nono i nasiniro orobu torowa waratasuna ina kobererau me. I enona Godima i nasini we ma siosa ufiro inama yafisu.   
\p
\v 9 Naiyemutu, nanu sina nauawe. Eno watanete eno we imutatane, yana orobu waratasu nasini arina me. Yana Godinu ma wiroeta sina nautaitaba Godinu iboro inare kimu ufoita eno we imutatane.  
\v 10 Godi Dana siosawere me. Dana kobererau. Yana Danu gaukara utedana i naueta uwara durua utebita enanari utaitaba yana Godiba neno arama utaitaro Dana yanu ueta nesia da imutawa ufisu.  
\v 11 Nanu ununa ya nesia bunawere uteiboro i dubu kowa fafiro Godinu we bou ueta yawotaita enanari nesia muboe watane.  
\v 12 Ofe ejiwa da uawe. Moana uwarama emanu naueta Godibai odeda ure nudarau yawoegou utebaitate Godinu we bou ueta nesia munaita. I uwaranu ueta sineta eawete enanari uawe.   
\s1 Godinu we bou ueta nauegou ufe  
\p
\v 13 Godima Eibaramuba we bou uteda weite nono mui dera amara meba Danu ifuro Danu torowa wei.  
\v 14 Godima Eibaramuba eno wei, Nanu ifuro Nanu torowa watane. Nana a ma kobererau umate aba sisia uwara faiyawere mamau wei.  
\v 15 Godima eno weiba Eibaramuma kekeramaratu yawotebiba dana Godinu we bou ueta nesia enanari muni.  
\v 16 Mui amarama we bou ueta sina webisuna dana mui amara dawa ari me, mui dera amaranu ifuro webisu. Dana mui dera amaranu ifuro webisuna uwaranu bebetuma yaraneta ido me sibisu.  
\v 17 Godi Danu ununa Danu we bou ueta mubitate emema iwata ufitaro Dawa Danu imueta da ma owere mubie iba Danu ifuro wei.  
\v 18 Enoba Danu we bou uetaini Danu ifuro wetaini i ueta sadeima uro owere ma owere da ufiro Godima meo da webisu. Enoba ya Godibai ane merau ibinisi uwarama yanu imueta ma buna ufete Godinuro imutaisi we bou ueta nesia imuegou ufene iba Godima yaba eno ui.  
\v 19 Bouti anikama you ogo ubarero ma kimu utasu, i arina wiroeta imutaisina ima yanu neno ma kimu utasu. Yesu Keriso yanu ma wiroeta Amara Dana yaba i urero wadiama garari ueta koruro Godibai ani.  
\v 20 Yesu Dawa ko ya durua ufie iba iro manite ibeda awona i botai fuyo ode sina weta gaukara utasu enanari uteibisu. Mekisideki dana fuyo ode sina webi i ari awonana Yesu Danu torowa enanari utasu.   
\c 7  
\s1 Mekisideki dawa dera fuyo oeta amara  
\p
\v 1 Mekisideki dana Seiramu orofanu kini amara. Dana i Seiramu orofa uwara yawotebi. Dana i Dera Godinu botai fuyo ode sina weta amara. Eibaramu dana moana kini foini(4) uranebe urane ma serigari uite owere fari. Farebina Mekisidekima ane Eibaramu atanite we ma kobererau ui.  
\v 2 Eno uiro Eibaramuma danu ibaiabai bebere aika maika odi. Odite i teniroma demui demui munite Mekisidekiba mai. Mekisidekinu botai ifunu ubina rorowarau yawoeta kini. Dana Seiramu orofanu kiniba danu mui ifunu ubina wesarau ueta kini.  
\v 3 Mui amarama Mekisidekinu ibeta ikiki odawa ui. Iba Mekisideki danu danua damama ya iwata me. Danu sirorari sisia uwara ya iwata me. Danu danuama muni kowa ya iwata me. Danu uieta kowa ya iwata me. Dana Godinu amara ari. Danu fuyo ode sina weta gaukara ina me ibene ibene ibeibisu.   
\p
\v 4 Dana dera amara imuawe! I bodere dera amara Eibaramu dana Mekisidekiba danu uranetaro serigari uite muni ibaiabai teniroma demurai munite mai.  
\v 5 Riwainu sisia uwarama torowa i fuyo ode sina weta taisi ibaiabai munebita. Godinu tarawatuma weiba iba emana emanu su uwarabairoma taisi ibaiabai munebita. Godinu tarawatuma weiba iba emana emanu su uwarabairoma taisi ibaiabai munaita. Ema nesia Eibaramunu sisiade nono emabairoma taisi ibaiabai munebita.  
\v 6 Mekisideki dana Riwainu sisiana me. Merogo nono dana Eibaramubairoma taisi ibaiabai muniba Godinu we bou ueta muni amaraba we ma kobererau ui.  
\v 7 Imue eawe! I we ma kobererau ueta amarana derawere, i we ma kobererau ueta muneta amarana otowaratu.  
\v 8 I fuyo ode sina weta uwarama taisi ibaiabai munebitana uitebita. Nono Mekisideki dana me ibeta amara, dana taisi ibaiabai munebi Godinu bukaroma eno wasu.  
\v 9 Nanu sina wemaro nauawe. Eibaramuma taisi ibaiabai mai enanari Riwai i taisi ibaiabai muneta amarama Mekisidekiba taisi ibaiabai mai.  
\v 10 I kowaro Riwai danu danuama dawa munawa uiro Riwai dana danu sirorari amara Eibaramunu iwaro ibina Mekisidekima Eibaramu atani.   
\s1 Reka fuyo ode sina weta amarama bodere fuyo oeta uwaranu kabesi muni  
\p
\v 11 Godima eno we imui, Nana fuyo ode sina weta uwara odimaro i Riwai uwarama i gaukara rorowarau ufitae we imuite iba i tarawatu owawa ue odite Isaraero uwaraba mai. Nanu sina nauawe, i fuyo ode sina weta uwarama eme ma rorowarau ufitarona mui aika fuyo ode sina weta amara Eroni arina me, Mekisideki ari da sibie.  
\v 12 Mui aika fuyo ode sina weta amara siniba Godima reka tarawatu odi.  
\v 13 Nana Yesu Kerisoba watane. Dana Eroninu sisia amara me, Dana mui sisia amara. Danu sirorari uwarama fuyo ode sina weta gaukara utawa utebita.  
\v 14 Ya iwata, yanu Dera Waria Amara Danu sirorari amarana Juda. Mosesima Judanu sisia uwara fuyo ode sina weta uwara we odawa ui.   
\s1 Yesu Danu ainewaure fuyo oeta gaukarana Mekisisidekinu gaukara ari  
\p
\v 15 Imue eawe! I arina mui amara uyarite i fuyo ode sina weta gaukara utebi. Dana Mekisideki ari.  
\v 16 Ewa Amarama Danu sirorariroma fariro emema fuyo ode sina weta amara odawa uta. Dana bunawereba Dawa uitawa me ibene ibene ibifisu iba fuyo ode sina weta Amara sini.  
\v 17 Godinu bukaro owawana Keriso Dawaba eno wasu, Mekisidekima fuyo ode sina webi i ari Anu torowa eno utedibeibasu, eno wasu.  
\v 18 I bodere tarawatuna buna me kobererau utawa uiba Godima ina mune aika odi.  
\v 19 Mosesinu tarawatuma eme ma rorowarau utawa uide i ma wiroeta Amara imutaisiba Dana ya ma rorowarau ufite Godibai woure odifisu.   
\p
\v 20 Godima Yesu Keriso fuyo ode sina weta Amara mune odite Danu ifuro ido wei. I bodere fuyo ode sina weta uwaraba Danu ifuro wiawa ui.  
\v 21 Godima Danu ifuro bunawere weiba Yesu Keriso Dawa fuyo ode sina weta Amara sini. Godima eno wei,  
\li1 Godima Danu ifuro weiba Danu imueta da ma owefiro Ana fuyo ode sina weta gaukara me ibene ibene ibeda ainewaure uteibasu,  
\p Godima eno wei.  
\v 22 Dana eno weiba ya iwatade Yesu Dana Godinu kobere unuro ue mataneta yawoeta Amara daido sini.   
\p
\v 23 Nono ewa mui sina nauawe. I bodere fuyo ode sina weta uwarama uiteda emanu gaukara ekodebitaba iba uwara faiyawere i gaukara utebita.  
\v 24 Nono Yesu Dana me ibene ibene ibeibisuba Danu gaukara mui amarama da mubisu.  
\v 25 Enoba uwarama Yesubai ane faraitate Godibai anaitaro Yesuma me ibene ibene ibeda emeini Godini abanaro inaibeda Godibai emeba nui wasute ema ma wirotebasu.   
\s1 Fuyo oeta Amara Yesu Dawa rorowarauro kobererauba ya durua utasu  
\p
\v 26 Ina kobererauba Yesu Keriso Dana yanu kobere fuyo ode sina weta Amara sini. Dana ya durua utebasu. Dana ba kobererau. Dana siosawere utawa ui. Godima Dawa i siosawere ueta uwarabairoma munite i ure deiro woure mane odiro ibinu.  
\v 27 Yesu Dana moana fuyo ode sina weta uwara arina me. Dana ainewaure Danu siosawere uetaini i uwaranu siosawere uetaini Godibai fuyo odawa utebasu. Dana Godibai demurai Danu torowa daido odi.  
\v 28 Mosesinu tarawatu kowaro emena rorowarau me uwara mutate fuyo ode sina weta uwara oita. Ema ko eno utaro nono Godima Danu ifuro bunawere weite Danu Amara Dana me ibene ibene ibeta ba kobere rorowarau Amara, i botai fuyo ode sina weta Amara mune odiba me ibene ibene ibeibisu.   
\c 8  
\s1 Yesu yanu Dera fuyo ode sina weta Amara  
\p
\v 1 Nanu sina edono, yanu Dera fuyo ode sina weta Amara i arina ibinu. Dana urero Dera yawotasu Godinu banibira age afu yaubinu.  
\v 2 Dana i kakarawere koruro Godibai fuyo ode sina weta gaukara utasu. I kakarawere su emema ubu utawaro Godima Danu aika torowa ubu uiba iba ina ba su.   
\p
\v 3 Emema i fuyo ode sina weta uwara maetaini fuyo oetaini odifitae iba mune oita. Enoba ewa Dera fuyo ode sina weta Amarama enanari Godibai fuyo oetaini me maeta mateibisu.  
\v 4 Dana ewa nasiniro ibifirona i fuyo ode sina weta gaukara da ufie. Ewa nasiniro fuyo ode sina weta uwara ibeda i tarawatunu waita maeta enanari fuyo odaitaba iba Dawa fuyo ode sina weta gaukara da ufie.  
\v 5 I urero fuyo ode sina weta gaukarana ba, ewa nasiniro utebita uwarama urero ba gaukaranu ukaka utebita. Mosesinu gaukarana i ari. Godima Mosesiba wei, i farai dubu su ufasuna i maidaniro aba mawetu ue, i enanari ubu ua wei.  
\v 6 Nono awonana Godima Yesu Kerisoba mai gaukarana derawere, i bodere fuyo ode sina webita uwaranu gaukarana otowaratu. Enanari Dana yawotasu unuro ue matanetana derawere i botaina otowaratu. Godinu reka we bou uetana kobererauba iba Danu unuro ue matanetana derawere.   
\s1 Reka unuro ue matanetama bodere ue mataneta serigari ui  
\p
\v 7 I botai unuro ue matanetaba kobererau ibifirona i dubu unuro ue mataneta da uteibene.  
\v 8 Nono ina enona me. Godima Danu uwaraba neno siosa uteda eno wei,  
\li1 Nana eno watane, mui kowa fafiro Isaraero uwaraini Juda uwaraini emabai reka unuro ue mataneta mamau.  
\v 9 Yanu sirorari uwara Ijifi orofaroma woure odete unuro ue mataneta emabai ode i arina me, yabai reka odimau. Emaini Naini yanu unu ue matasite nono emana enanari utawa utaba iba ema ekode Godima wei.  
\v 10 I Isaraero uwarabai odimau reka unuro ue matanetana edono, i awe kowa me sibiro Nana Nanu tarawatu emanu befororo odimate emanu nenoro owawa ue odimau. Nana emanu Godi simaro emana Nanu uwara sibitaita.  
\v 11 Emana emanu su uwara da we mawetu ufitaita. Emana emanu su uwaraba Godi iwata uawe eno da webitaita. I uwara nesia Na iwata ufitaita. I dera uwaraini otowa uwaraini ema nesia Na iwata ufitaita.  
\v 12 Nana emanu siosawere uetaba ibo da umate emanu gifena ueta mune imutawa umau,  
\p Godima eno wei.  
\v 13 Godima reka unuro ue matanetaba weiba ya iwata i boderena arama uiro danu kowa ido me sini. I me sini ememetuna me sibie utasu.   
\c 9  
\s1 Bodere fuyo oeta uwarama egi ononoma fuyo odebitana buna me  
\p
\v 1 I botai unuro ue matanetaba Godima eme guriguri rorowarau ufitae enoba iba sina weiro nono guriguri ueta dubu su uta.  
\v 2 Emana farai su sataro ibi. Farai su sataro fisia korunu ifuna kakara kabesi weita. I koru ubarero nanefaini kaiyoini i Godiba maeta buredini i nesia iro ibita.  
\v 3-4 Nono i korunu garari ueta wadia etarafu i kakara derawere koru ibi. I kakara derawere koruro i goru fuyo oeta kabesiro ibina iro bonanawere fuyo inama yarebita. I unuro ue mataneta goru bogesi iro ibina ubarero i mana waita ieta goru oeta kawabu ibiro Eroninu tua bobo akuri ibiro i unuro ue mataneta sina bobo gebiro sadei ubarero ibita.  
\v 5 Nono i bogesi deiro aneru sadei ari serubimu waita ememetu sadei ibebisina Godinu araeta ibebi. Emana ibeda emanu fakinama i siosawere ueta mune imutawa ueta kabesi ma utumu utebita. Awona i nesia da wegou umau.   
\p
\v 6 I farai dubu su eno utebitaro i fuyo oeta uwarama ainewaure i fisia koru ubarero ane emanu gaukara utebita.  
\v 7 Ema eno utebitaro i dera fuyo ode sina weta amara danu aika oya demurairo kowa demurai i kakara derawere koru ubarero ane danu gaukara eno ui, dana eginu onono mune Godibai dawaini danu uwaranu iwawa ata bata bobo siosawere utebitaba fuyo odite eno ui.  
\v 8 Godinu Imumu Kotofuma i sinanu ubi eno we ma boroyarasu, i fisia kakara koru ibifisuna i kakara derawere korunu daba garari ufiro emema iro da anibitaita eno we ma boroyarasu.  
\v 9 Ina kasei sina ari. I sinana edono, awonana emema Godinu ditiro anawa utaita. I Godibai me maetaini fuyo oetaini ima i guriguri utaita uwaranu neno ma nabi utawa utasuba emana neno siosa utaita.  
\v 10 I me maetaini fuyo oetaini ina ietaini ogoini kakara uroeta ememetu torowa. Ina i farai dubu sunu siboro ueta daba. Ina emanu ofe ma rorowarau ueta ememetu. Iba eno ue ibebitaro nono Yesu Keriso ido farite i Godibai reka guriguri ueta daba nesia ma boroyaregou ue odite i bodere utebita nesia mune eta aika sane odi.   
\s1 Yesu Keriso Danu torowa Danu ononoma fuyo odi  
\p
\v 11 Ewa sina imue eawe. Yesu Keriso Dana ido farite i kobere guriguri uetanu dera fuyo ode sina weta amara ibinu. Danu gaukara utasu farai dubu suna derawere. Ina kobererau. I bodere farai dubu suna derawere me, kobererau me. Danu farai dubu su ari emema ubu utawa utaba ina ewa orofaro farai dubu su me.  
\v 12 Yesu Keriso Dana i fisia koruro fare anite i ure kakara derawere koruro daido ane itari. Dana goutini borumakau natunu onono fuyo odifie munawa uite Dana yaba ba uiro Danu onono itariba ya me ibene ibene ibeta daido ibifeisi.  
\v 13 I goutini borumakau yaweranu ononoini i reka borumakau towia inaro yarebita konuaini munebitate i kakara tarawatu nautawa uwara emanu uetana rorowarau me, emanu ofero mame odebitaro emana rorowarau ibebita.  
\v 14 Ewana barogo nono Yesu Kerisonu ononoma i serigari derawere utasu. Godinu me ibene ibene ibeta Imumu Kotofuma Dawabai ibebiro Yesuma Danu torowa umaurau fuyo oeta ari Godibai odi. Danu ononoma yanu uietawere imueta urotasute ya i me ibene ibene ibeta Godinu gaukara ufene neno ma nabi ue odasu.   
\s1 Yesu Kerisonu ononoma reka ue mataneta ma kimu ui  
\p
\v 15 Enoba Yesu Keriso Dana i reka unuro ue mataneta yawotasute i Godima yua we muni uwarama Godinu me ibene ibene ibetaini ane ane we bou ueta nesia mubitae iba eno utasu. Emema i botai unuro ue matanetaro siosawere utebitana Yesu Keriso uite ema i siosawere uetabairoma ma dare mune odiro kobererau utebita.  
\v 16 Mui amarama uifie uteda dana ane sina weite dawa me siniro danu wei sina enanari uta.  
\v 17 Nono dawa uitawa me ibifisuna danu wei sina enanari da ufitaita.  
\v 18 Enoba emema egi urebitaro uitebitaro emanu onono itarebina i botai unuro ue mataneta sina ido ma kimu utebi.  
\v 19 Mosesima i tarawatunu iba sina nesia i uwaraba we me sinite borumakaunu ononoini ogoini mune ma dininu uite mamoenu inawere iji mune isuro uwane tarite ononoini ogoro ma inui. Ma inuite ma fisu uiro ononoma i tarawatu bukaini eme deiro itari.  
\v 20 Dana eno uteda wei, Godi Danu ununa ya uwara i unuro ue mataneta enanari ufita weiya wei. Ewa ononoma i unuro ue mataneta ma kimu utasu wei.  
\v 21 I ui enanari Mosesima i isu ma fisu uiro i ononoma farai dubu suini i siboro ueta okiaini naberoini nesia deiro itari.  
\v 22 Imue eawe! I tarawaturo ononoma nesia urotebi. Onono itarawa utebina emenu ba me ueta mune imutawa utawa utebi. Onono itarebina emenu ba me ueta mune imutawa utebi.   
\s1 Yanu sara siosa mune sabie Yesu Danu torowa fuyo odinono ui  
\p
\v 23 I ememetu nesia ina i ba urero ememetunu ukaka ari. Enoba ononoma ema uroiro roatarau ibita. Nono i urero ememetubai aika kobererau fuyo odasu.  
\v 24 Nanu sina nauawe, Yesu Keriso Dana emema ubu uta kakara koruro anawa uite Dana urero mani. I emema ubu uta koruna i urero korunu ukaka ari. Dana urero Godibai yaba webie mani.  
\v 25 I Ju uwaranu dera fuyo ode sina weta amarama oya woroworo danu ofenu onono munawa eginu ononoma munebite i kakara koruro ane odebi. Nono Yesu Keriso Danu torowa Danu ofenu ononoma fuyo faiya faiya odawa daido demurairatu odi.  
\v 26 Danu torowa Danu ononoma fuyo faiya faiya eno odifirona i ureini nasini ubu ui kowaroma awona faiya faiyawere oferi woureibie. Enona meba Dana ewa me sibie utasu kowaro emenu siosawere ueta mune aika odifie iba demurai daido ba fari.  
\v 27 Ya nesia woroworo da uie uyare ufete daido demurai uifero Godima ya koto ufisu.  
\v 28 I ari Yesu Keriso Dana eme faiyawerenu siosawere ueta mune aika odifie Godibai demurai Danu torowa umaurau fuyo odite ui. Dana duburo nono fafisu. Emenu siosawere uetaba nono uifie da fafisu. Dawaba yawotaita uwara ma wirofie iba fafisu.   
\c 10  
\s1 Bodere fuyo oetama yanu sara siosa ueta mune aika sanawa ui  
\p
\v 1 I Ju uwaranu tarawatu ina i fafisu ba uetana me. Ina inu ukaka ari. I uwarama oya woroworo Godibai fuyo odebitaro nono i fuyo oetama i Godi doberebita uwara ma rorowarau utawa utebi.  
\v 2 I fuyo oetama i uwara ma rorowarau ufiro i uwarama daido kobererau sibitate emanu ba me uetaba neno siosa da ufitarona i fuyo ode sina weta uwarama fuyo woroworo da odifitae.  
\v 3 Eno meba uwarama i woroworo fuyo oeta imutebitana emanu ueta siosawere oya woroworo ido imutedibebita.  
\v 4 I borumakauini goutinu onono, ima emenu siosawere ueta mune aika sanawa uteibie.   
\p
\v 5-7 Enoba Yesu Keriso Dana ewa orofaro tarafie uteda Godiba wei,  
\li1 A unutawa egima fuyo oetaba iba Ana Nanu ofe fuyo oetaba ue bou ui. Emana egi fuyo oeta kabesiro mune odebitate inama yarebitaro Ana iba yaru utawa ui. Yaru utawa uiro Nana we, Godi, Nana ewado, Godinu bukaroma wasu sina enanari Anu unu umau we,  
\p Yesuma eno wei.  
\v 8 Yesu Dana botai eno wei, A unutawa egima fuyo oetaba iba yaru utawa utasu. Emana emanu siosawere ueta mune aika odifitae iba egi fuyo odaitate inama yaraitaro Ana ereda yaru utawa utasu wei. I uwarama fuyo oeta Godinu tarawaturo utebitade nono Yesuma i sina eno wei.  
\v 9 Dana eno weite nono wei, Nana ewado. Anu unuro umane iba fanea wei. Enoba Godima i botai egi fuyo oeta mu sanite Yesu Keriso, i ba fuyo oeta Danu torowa umaurau fuyo odi.  
\v 10 Yesu Keriso Dana Godinu unu uite Danu ofe demurai daido fuyo odiba yana yanu siosawere uetaroma roatarau daido ibeda neno kobererau utaisi.   
\s1 Yesunu fuyo oetama ya ma wiroi  
\p
\v 11 I Ju uwaranu fuyo ode sina weta uwarama ainewaure inaibeda emanu gaukara utebitate i fuyo oeta woroworo eno utebita. Nono i fuyo oetama emanu siosawere ueta mune aika odawa utebita.  
\v 12 Nono Yesude! Dana demurai fuyo odiro i fuyona daido ido. Dana eno uite Godibai manite Godinu banibira age afu mane yaubinu.  
\v 13 Iro mane yauriba Godima Dawaba wasai utaita uwara urane ma serigari ufite Danu buri wowonaro odifie yawotasu.  
\v 14 Yesu Keriso Dana Danu ofe demurai odite Danu uwara emanu siosawere uetaroma mune aika odiro ema Godibai neno kobererau uteda ibinita.   
\p
\v 15-16 Godinu Imumu Kotofuma Godinu sina yaba eno we ma boroyareda eno wei, Godima wasu,  
\li1 awe kowa me sibiro emaini Naini yanu unu ufete ue matafero Nana Nanu tarawatu emanu neno ubarero odimate emanu owawa ue odimau wasua,  
\p eno wei.  
\v 17 Godima nono eno wei, Nana emanu siosawere uetaini Nabai gifena ueta da imuteimau wei.  
\v 18 Godima i siosawere ueta mune imutawa utasuba mui fuyo da odifeisi.   
\s1 Nauegou ufete Godibai anibe  
\p
\v 19 Naiyemutu, Yesu Keriso Dana yaba uiro Danu onono itariba ya i urero kakara derawere koruba iyarawa iro rorowarau anibene watane.  
\v 20 Dana i urero kakara derawere koruro reka daba wabuiba Dana reka me ibene ibene ibeta daba ari wabue odi. I reka daba i garari ueta wadia Danu furiari ofebai fare anasu. Enoba ya Danu furiari ofebai fafete rorowarau i kakara derawere koruro anibeisi.  
\v 21-22 Yanu Dera fuyo ode sina weta Amarama Godinu su yawotasuba Godibai anibene watane. Yanu imueta rorowarau imutaisi. Yanu naueta Godibai daido odaisi. Yesu Kerisonu ononoma yanu siosa neno uroite yanu siosa neno ma nabi uiro neno siosa utawa usiro yanu ofe roatarau ogoma uroiro Dawa imuegou utaisi. Eno ue Godiba iyarawa Dawabai rorowarau anibene watane.  
\v 23 Ya Yesu Keriso imuegou ufene watane. Godi Danu sinana ba. Danu imueta uro owere ma owere da ufisu. Anene webite enanari ufisuba iba Yesu Keriso imuegou ufene watane.  
\v 24 Yanu yanu imue matafete durua ufete neno arama ue matafete kobererau uteibene watane.  
\v 25 Moana uwarama guruguru utawa utaita enanari guruguru ueta da ekodifene watane. Yesu Kerisonu fafisu kowa fafie utasuba yanu imueta ma buna ue matafene watane.   
\s1 Godinu Amaraba dubena da sabe  
\p
\v 26 Nanu sina nauawe. Ya Godinu ba sina nautedana nono yanu unu utaisite siosawere utaisina i siosawere uetaba mui fuyo oeta me.  
\v 27 Mui fuyo oeta meba i bunawere koto uetaba iya uyafene watane. Ana anama Godiba wasai ufitaitana Godima ibo derawere ufiro i dubu kowaro inama ema siosawere yare me sibisu.  
\v 28 Anama Mosesinu tarawatuba gifena utasuna dawabai ure nudarauini neno arama meba ereta amara sadei aba rarogonuma wawei webitaro i amara ma uifitaita.  
\v 29 Nono mui amarama Godinu Amara ekodifite i unuro ue mataneta ma kimu ueta onono, ina danu urero maneta onono, i wiroeta daba ma siosa ufite Godinu kobere durua ueta Imumu Kotofuba sina siosawere webisuna i amaraba fanisi derawere mafisugo.  
\v 30 Godima bodere eno wei, i uwarabai koto uetana Nanu, Nana emaba moko mamau wei. Dana eno weite nono wei, i Dera Waria Amara Dana Danu uwara nesia koto ufisu wei. Ya iwata Dawa.  
\v 31 I me ibeta Godima i eno ueta siosanu moko fanisi mafie Danu age duro yanu torowa maetana ba me iba iya uyafe.   
\s1 Yanu nauetaro inare kimu ufe  
\p
\v 32 Yanu bodere ueta sineta imue eawe. Godinu ario, ima yanu neno ubarero ario uiro yabai awe aika maika uyatarogo nono yana ekodawa rorowarau inare kimu uta.  
\v 33 Moana uwarama uwara faiyawerebai yaba sina siosawere webitate siosawere utebitate nono moana uwaraba enanari utebitana yana i siosawere ueta munebita uwara durua ufote emabai ane inafoe we imutebita.  
\v 34 Yana i dibura uwaraba imuteda durua utebita. Moana uwarama yanu ibaiabai munebitana yanu me ibene ibene ibeta ibaiabai ibinuba yana ibo utawa yaru utebita enanari utebeawe.  
\v 35 Iya da uyawete inare kimu uawe. Iya da uyafote buna ufoitana Godinu kobere moko maeta muboita.  
\v 36 Yana kekerama ufoitana Godinu unu ueta ufote Danu we bou ueta nesia muboita.  
\v 37 Godinu owawa bukaroma eno wasu,  
\li1 kowa faiyawere mero i fafisu Amara Dawa da yawofite sau ido fafisu.  
\v 38 Nono Nanu kobere uwarade, emana imuteda me ibene ibene ibifitaita. Nono moana uwara ema unutawaba owere anibitaitana emaba ibo umau,  
\p eno wasu.  
\v 39 Yana i owere ane feareta uwara arina me. Enona me. Ya yanu nauta Godibai oisiro ya ma wiroi.   
\c 11  
\s1 Nauetanu sina ubi  
\p
\v 1 I Godibai nauetade ane ari? I erawa me imutaisi ememetu daido mubeisi. I erawa ememetu ido ibinu we imutaisina ina yanu Godibai naueta ido.  
\v 2 I bodere bunawere utebita uwara Godibai nautebitaba Godima emaba kobere uwara webi.   
\p
\v 3 Yanu naueta Godibai ibinuba Godima weiro i ureini nasinini nesia ido sirorari ui we imutaisi. Enoba i eraisi ememetu nesia i erawa ememeturoma fata.   
\s1 Eiboroini Inokini Noa  
\p
\v 4 Eiboro danu naueta Godibai ibiba dana Godibai kobere fuyo odiro Keini danu fuyona kobererau me. Eiboro dana Godibai nautebiba Godima danu fuyo oeta kobererau ereda dawaba kobere amara wei. Eiboro dana uite nono danu Godibai nauetaba dana yaba wasu ari.   
\p
\v 5 Inoki danu naueta Godibai ibiba dana uitawa uiro Godima dawa mune Danu torowabai odiba emema Inoki erawa uta. Godinu bukama eno wasu, Godima Inoki munawa ui i kowaro Inoki kobererau uiro Godima dawaba kobere amara wei eno wasu.  
\v 6 Anama danu naueta Godibai ibawana Godima dawaba kobere amara da webisu. Ananu ununa Godibai anasuna Godi Dana ibeda Dawa doberegou utaita uwaraba moko matasu eno we imutasute Godibai anasu.   
\p
\v 7 Noa danu naueta Godibai ibiba Godima dawaba i fafisu ememetu weiro naui. Dana Godinu sina nauite bouti ubu uiro danu awetaini adarabuini emanu awetaboini amutate uitawa uta. Noama eno uite i nautawa uwaranu siosawere ueta ma boroyarite danu nauetaba Godinu kobere ueta muneta amara sini.   
\s1 Eibaramu  
\p
\v 8 Eibaramu danu naueta Godibai ibiba Eibaramuma Godinu sina nauite danu orofa ekodite Godima dawaba we bou ui orofaro ane ibi. Dana danu orofa ekodite i reka orofa bodere erawa uite i aneta daba dawa iwata me nono ekodawa daido ani.  
\v 9 Danu naueta Godibai ibiba dana i orofaro aika eme ari ibi. Godima Aisikini Jeikofuini emaba enanari we bou uiba emaini Eibaramuini emana farai suro ibebita.  
\v 10 Eibaramu danu ununa Godinu ubu ueta su, i suna me ibene ibene ibifisu tutubu bobo su mubie yawoteda iba ba su utawa uite farai suro me sara ibebi.   
\p
\v 11 Eibaramunu naueta Godibai ibiba dana Aisiki yanae muni. Dana ofe kimu amara warai. Danu buruka awetana desini kimu aweta. Godima dawaba we bou uteda weiro Godima enanari ufisu we imuite Aisiki yanae muni.  
\v 12 Dana uieta amara ari nono i amara demurairoma danu sisia uwara faiya faiyawere i muina ari, i enea gigirari magua ari sirorari utebita.   
\p
\v 13 I uwara nesia emanu naueta Godibai oitate uita. Godinu we bou ueta munawa utate yafawereroma nesia etate weita, ya ewa orofaro aika eme ari ibinisi. Ya i me dabaro uwara ari weita.  
\v 14 I eno webaita uwarama emanu mui orofa doberaitaro ya iwata utaisi.  
\v 15 Emana emanu ekoita orofaba imutawa uta. Emanu unu ufitate owere anibitarona anibitae nono owereta unu meba owerawa uta.  
\v 16 Nono eno utawa utate i kobere orofa, i ure orofa mubitae imuegou uta. Godima emaba natofo su ubu uiba emana Dawaba yanu Godi webitaba Godi emaba maru utawa ui.   
\p
\v 17 Eibaramuma danu naueta Godibai odiba Godima weiro Eibaramu Godibai danu amara Aisiki fuyo odinono ui. Aisiki dana Eibaramunu amara demurai.  
\v 18 Godima Eibaramuba wei, anu amara Aisikibairoma anu sisia sirorari ufitaita weiro nauteda danu amara Godibai fuyo odifie ui.  
\v 19 Eibaramu dawa eno we imui, Godima nanu amara uietaroma ma uyafisu eno we imuite enanari danu amara uietaroma ma owere munono muni.   
\s1 Aisikini Jeikofuini Jousefa  
\p
\v 20 Aisikinu naueta Godibai ibiba dana danu amara sadei Jeikofuini Isoba i fafisu kobererau ueta we ma kobererau ui.   
\p
\v 21 Jeikofunu naueta Godibai ibiba Jeikofuma uifie uteda Jousefanu amara sadeiba we ma kobererau uite danu akuri mame kimu uteda Godibai guriguri ui.   
\p
\v 22 Jousefanu naueta Godibai ibiba Jousefama uifie utedana i Isaraero uwara Ijifiroma Godima woure anibiro anibitaita i odoro danu uieta ofenu tai aboro woure ane uri ufitaita i sina danu uwaraba we enanari ui.   
\s1 Mosesi  
\p
\v 23 Mosesinu danuaini damamanu naueta Godibai ibiba Mosesinu danuama dawa muniro danu danuaini damama dawa sakara rarogonuro ma feare oisi. Ma feare oisite dawa kobere kuita ereda Godima i kini amaranu bunaroma ma wirofisu weisite danu wei sina nautawa usi.   
\p
\v 24-25 Mosesinu naueta Godibai ibiba dana daisinite dawa unutawa dawa Feronu arumanu amara weta dawa unutawa i kikiratu yaru uteda siosawere ueta. Danu ununa danu uwarabai awe uyareta uruama woufie ui.  
\v 26 Dana i fafisu moko muneta ereda eno we imui, Isaraero uwaranu ma wiroeta Amaranu ifuro siosawere mumauna ina kobererau, ewa Ijifi orofanu gugua gubari nesia ina kobererau me eno we imui.   
\p
\v 27 Mosesinu naueta Godibai ibiba dana i kininu ibo uetaba iyarawa Ijifi orofa ekodite ani. Dana i erawa utaisi Godi enono ereda iba owerawa uite daido ani.  
\v 28 Mosesinu naueta Godibai ibiba dana Godinu sina nauite i ma uieta aneruma fare ani ueta sina nesia enanari ui. Dana eno uite wei, mamoenu onono yanu su bebeto fisia fisiaro odiawe weiro nautate enanari utaba ma uieta aneruma i Isaraero uwaranu botai adarabu nesia ma uitawa ui.   
\s1 Isaraero uwara faiyawere bunawere nauta  
\p
\v 29 I Isaraero uwaranu naueta Godibai ibiba emana i Kukuiwere Enea ubarero, ina rarara nasini ari, fare anita. Emana eno utaba Ijifi orofa uwarama enanari ue etate enea ogoma ema ma inuiro uie me sita.   
\p
\v 30 I Isaraero uwaranu naueta Godibai ibiba emana Jeriko natofo su ode kara ue anita. Emana enoma enoma kowa seweni(7) utebitaba Jeriko sunu dera gebiro marauwere ido jugari ui.  
\v 31 I bodere dita yagera uyareta aruma Reiabu dawa danu naueta Godibai reka odeda dana i orofa ere bou uta uya amara rarogonu ma feare odiro Isaraero uwarama fatate i Godinu sina nautawa uwara ma uitate i aruma ma uitawa utaro wiroite me ibi.   
\p
\v 32 Nana nono mui wemau aba me? Nabai wai derawere meba Gidionini Barakini Samusonini Jefataini Deiwidini Samueroini i we bou ueta uwara nesia emanu ikiki da wemau.  
\v 33-34 Emanu naueta Godibai ibiba emana orofa aika maika uwara urane ma serigari utebitate eme nesia kobererau yawoegou utebitate Godinu we bou ueta nesia munebita. Emana moana osi ue awe derawere uyareta egi danu ifuna raiyoni danu bebetu garari utebitate derawere ina yareta ma uitebitaro emema ema kaiyama ma uitawa utebita. Emana buna meba Godima ema ma buna utebiba i aika uwara urane ma serigari utebita.  
\v 35 Moana awetabonu naueta Godibai ibiba emana Godinu sina nautaro Godima emanu uitebita uwara uietaroma ma uyariro emana emanu uitebita uwara nono munebita. Moana uwara emanu unu i kobere me ibene ibene ibeta mubitae utate dibura ekodawa utaro emaba siosawere uteda isuma urebitaro uitebita.  
\v 36 Emema moana uwara iruteda isuma urebitate moana uwara diburaro sane odebita.  
\v 37 Emema moana uwarabo gebiroma urebitate soma abanaro turebitate dera kaiyama umane ma uitebita. I bodere naueta uwara emana mamoeini goutinu ofe baruteda aramawere ibebitaro emema emaba awe uteda siosawere utebita.  
\v 38 Emana kobererau, i orofa atata uwarana kobererau me. Emana i me dabaro inaraita uwara ari yao orofaro maidaniro aboro aboro inareda gebiro ebaini nasini kotoro ainebita.   
\p
\v 39 Godima i naueta uwara nesia kobererau erite Danu uwaraba kobere ueta we bou uiro nono emana i we bou ueta munawa uta.  
\v 40 I sinanu ubina edono, Godima imuteda yaba ma rorowarau ufie ui. Dawa unutawa emanu torowa ma rorowarau ueta. Danu ununa emaini yaini ya nesia ido ma rorowarau ufie iba eno ui.   
\c 12  
\s1 Yesuro ereda naue imue ufe  
\p
\v 1 Nanu sina wemaro nauawe. Uwara faiya faiyawere emana naueta uwara yanu ueta sineta, ina siraka ari eraita. Enoba i urumu ememetu nesia yanu oferoma mu sabete yanu unuro siosawere ueta ekodifete durami ufete Godima yabai odi siraka uegou ufene watane.  
\v 2 Yanu nauetana Yesubairoma farasu Dana yanu nauetanu sirorarini dubu amaraba ya yanu ditima Dawabai eregou ufene watane. Dana i Godibai yaru ueta imuteda Danu korosiba iyarawa uite uwarama Dawaba siosawere ueta imutawa uite nono awonana Dana Godinu yaubetanu banibira age afu yaubinu.   
\s1 Godi Danu unu ya ma rorowarau ufie iba ya kimuwere ure ma rorowarau utebasu  
\p
\v 3 Yana neno siosa uotote ekodiotoba siosawere ueta emema Yesuba neno ka uteda siosawere utebitana Dana moko ibo utawa me ibi, ina imuegou uawe.  
\v 4 Yana i siosawere uetaba uranedana i uranetaba yanu onono itarawa utasuba duburo itafisu aba?  
\v 5 Godima ma buna ueta sina Danu adarabuba webasu. Yana Danu adarabude aneba i sina imutawa utaita? I sinana edono,  
\li1 Nanu amara, anu Dera Waria Amarama a ure ma rorowarau uteda fanisi matasuba ibo da uate iba imuegou ua. Dana aba bunawere iba sina wasuba neno siosa da ua.  
\v 6 I Dera Waria Amarama anaba neno arama utasute dawa ure ma rorowarau ue fanisi matasu. Dana anaba Danu amara we odasute dawa isuma urasu,  
\p Godinu bukaro owawama eno wasu.  
\v 7 Godima ya ure ma rorowarau utasua ibo da uawete kekerama uawe. Yana Godinu adarabuba iba eno utasu. Ana ananu danua damamama emanu amara ure ma rorowarau uteda fanisi matawa utaita?  
\v 8 Danu adarabu ure ma rorowarau ufite nono ya ure ma rorowarau da ufisuna yana Danu adarabu me. Yana dabaro muneta uwara ari.  
\v 9 Yanu yamamamutuma ya ure ma rorowarau utebitaba emaba ibo utawa uteda emanu ifu we ma derawere utebisi. Enoba yanu imumunu Damamaba gifena da ufete merau ibegou ufeisi.  
\v 10-11 Yanu yamamamutuma ina kobererau we imuteda kowa faiya me ya isuma urebita. Nono Godi Danu unu ya ma kobererau ufiro Danu rorowarau ueta sineta enanari ufene iba ya ure ma rorowarau utasuna ya neno siosa uteda eno we imutaisi, ina kobererau me, iba oferi wouratane eno we imutaisi. Godima abo uwaraba fanisi mateda ma rorowarau utasuna duburo i uwarama kobererau ufitate wesarau ibifitaita.   
\s1 Ya buna ufete inare kimu ufe  
\p
\v 12-13 Enoba yanu buna me age sawete yanu buna me wawanawere yajigo ma buna uawe. I bebeuwere buri daido siosa derawere da ufite rorowarau ufisuba Godinu rorowarau dabaro yanu naueta ma kimu uawete kobererau anebeawe.   
\p
\v 14 Uwara nesiabai wesarau ibiawe. Kobererau torowa ue eawe. Eno da ue efoitana Godi da efoita.  
\v 15 Imuegou uawete Godinu kobere durua ueta da ekodiawe. Kawere ana ari siotote emenu imueta ma siosa uotoba yanu ueta imuegou uawe.  
\v 16 Isoma kowa demurairatu ieta nabero ifie danu dawa botai muni amararairo danu botai kabesima ieta oiya ue muni. Yana i ari yanu unu torowa uotote dita yagera faotote yanu Godibai ibeta botai kabesi oiya ue muotoba yanu ueta sineta imuegou uawe.  
\v 17 Duburona Isoma danu damamanu we ma kobererau ueta mubie weite i weda imutebe imutebe danu bodere siosawere ueta ma rorowarau utawa uiba danu damamama dawa ekodi.   
\s1 Ya nesia kobere maidani Sainaibai fasi  
\p
\v 18-19 Yana i nasiniro maidanibai farawa utaita. I Isaraero uwarama Sainai maidaniro fatana yareta ina yariro dumu derawere fariro oyabibi ido fariro tawuyo derawere weiro ureroma sina tararite derawere weiro i nautebita uwara ema unutawa i sina kimuwere wetaba iba kodia weita.  
\v 20 I tarari sinanu ubina edono, egima aba anama i maidani burifisuna yana dawa gebiroma sane ure ma uiawe wei.  
\v 21 I eretana kimuwereba Mosesima wei, nana iwura mameda iya uyaratane wei.   
\p
\v 22 Yana iro farawa utaitate yana Sioni maidanibai, i me ibeta Godinu su, i ure Jerusaremu suini aneru faiya faiyawerebai faraita.  
\v 23-24 Yana Godiba botai yaru uteda guruguru utaita adarabu, emanu ifu ifu torowa urero owawa ue odiro ibinu, yana emabai faraita. Yana i eme nesiaba koto utasu Godibai faraita. Yana Godima ma rorowarau ui kobere emenu urero me ibeta imumubai faraita. Yana i unuro ue mataneta yawotasu kobere Amara Yesubai faraita. Eiboro dana uiro danu onono nasiniro itarina Godima neno siosa uirogo nono Yesu Keriso Dana uiro Danu onono nasiniro itarina Godima neno siosa utawa yaru uteda kobererau uiba ya durua utebasu iba yana Eiboronu ononobai farawa Yesu Kerisonu ononobai faraita.   
\s1 Ya uwara eregou ufe  
\p
\v 25 Imue eawe! Yesu Dana yaba wasuba Danu sina nauforo! Bodere Mosesima ewa nasiniro inareda sina weiro nono Godima Danu sina nautawa utebita uwaraba fanisi mai. Godima emaba eno uiba yana i urero ibinu Amaranu sina da naufeisina dubu oname kowaro Godima yaba fanisi derawere mafisugo!  
\v 26 Bodere i maidaniro Godima weiba i nasini wawana wawana utebi. Nono awona Godima we bou uteda wei, Nana nasini torowa ma wawana wawana da umate ureini nasinini nesia ido nono demurai ma wawana wawana umau wei.  
\v 27 Dana nono i sina demurai weiba ya iwata, i ubu ui ememetu nesia wawana wawana ufite me sibiro nono i wawana wawana da ufitaita ememetu torowa ibifitaita.   
\p
\v 28 Yanu Godinu yawotasu ibifeisi orofa wawana wawana da ufisuba Godibai we ma kobererau ufene watane. Yana yaru uteda Godibai Danu unu ufete Dawaba ititi kakara uteda imuegou ufete guriguri ufene watane.  
\v 29 Yanu Godi Dana i ane ane yare me sibisu ina ari iba watane.   
\c 13  
\s1 Yanu naiyemutuba neno arama ufe  
\p
\v 1 Ya naueta uwara kaka nabue ari yanu yanu neno arama ue mataneiboe iba watane.  
\v 2 Aika uwarama yanu suro fafitaitana bana wiawe. Bodere moana uwarama eno utedana ema iwata me abo uwaraba webitana aneruba webita.  
\v 3 I naueta diburaro ibinita uwara imuawete yaini emabai ibeta ari iba imuteda durua uawe. Enanari yana ba ofero ibinitaba i oferi woureta uwara imuteda durua uawe.   
\p
\v 4 Awetabo munetaini awerasi munetaini ina kobererau eno we imuawe. Awetabo ya yanu awerasibai ibedana aika awerasibai da aniawero enanari awerasi ya yanu awetabobai ibedana aika awetabobai da aniawe. Godima i siosawere imuteda dita yagera fareta uwaraba koto ufisu.   
\p
\v 5 Yanu unu nesia oibai da odiawete yabai ibinita ibaiabairatu towoe torowa imuawe. Godi Dana yaba wei, ya da ekodimate yabai daido ibeimau wei.  
\v 6 Enoba yanu imueta ma kimu ufete eno webeisi,  
\li1 i Dera Waria Amarana yanu durua ueta Amaraba iba emanu uetaba iya da uyafeisi,  
\p eno webeisi.   
\p
\v 7 Yanu dera uwarama bodere Godinu sina yaba webita. Emanu ueta sinetaini uietaini imuawete enanari uawe.  
\v 8 Arenaini awonaini me ibene ibene ibeta kowaini, Yesu Keriso Dana aika maikana me Dana demurai.  
\v 9 Yana imueta daba aika maika imuotoba emenu aika maika we mawetu ueta sina da nauawe. Godinu kobere durua uetama yanu neno ma kimu ufisu deina ido. Ietanu tarawatu sinana ido me. Ana anama i ieta tarawatu sina nautaitana i tarawatuma ema durua utawa utasuba emanu sina da nauawe.   
\p
\v 10 I fuyo ode sina weta uwarama ewa nasini farai dubu suro emanu gaukara utaitaba iba i fuyo egi itaitatema nono yanu yabai ibinu fuyo oeta kabesi aikaba iba iro egi itawa utaitade.  
\v 11 I dera fuyo ode sina weta amarama i eginu onono munasute emenu siosawere uetaba i kakara derawere koruro fuyo odifie woure anasu. Nono emana i ba egi ma youre anaitate su barunaro inama yaraita.  
\v 12 Enoba Yesu Danu ununa i uwaranu siosawere ueta Danu ononoma urofiro ya Godibai rorowarau inafene iba Jerusaremu su barunaro ba ui.  
\v 13 Enoba ya i su barunaro Dawabai anibete i awe uyareta nesia Dawaini uruama woufeisi.  
\v 14 Ewa nasiniro yanu me ibene ibene ibeta natofo suna me iba ya i fafisu natofo su dobereda yawotaisi.  
\v 15 Nanu sina nauawe. Yesuma ya durua utebasuba Danu ifu we ma derawere ufete Godibai we ma kobererau uteibene iba watane. Ina yanu Godibai fuyo oeta ari.  
\v 16 Ewa sina imue eawe. Kobererau torowa utebeawete yanu yanu durua ue matanebeawe. Eno ufoitana ina kobere fuyo oeta ariba Godima yaru derawere ufisu.   
\p
\v 17 Yanu dera uwarama yanu neno uba yawotaitaba emaba gifena da uawete emanu iba sina nauawe. Duburo emana Godibai emanu gaukara nesia we ma boroyafitaitaba iba awona ya kobererau yawotaita. Emaba gifena da ufoitana yaru uteda ya kobererau yawofitaita. Gifena ufoitana neno siosa bobo ya siosawere yawofitaita.   
\s1 Gurigurina ya durua ueta  
\p
\v 18 Godibai yaba ainewaure guriguri utebeawe. Yanu nenoro imueta kobererauba neno siosa utawa utaisite yanu unu kobererau torowa ufene utaisi.  
\v 19 Nanu ununa yaini naini sau atafene Godibai naba bunawere guriguri ufoe watane.  
\v 20 Yesu Keriso Dana yaba uite Danu ononoma i me ibene ibene ibeta unuro ue mataneta ma kimu uiba Godima Dawa uietaroma nono ma uyarite i mamoenu Dera Yawoeta Amara we odi.  
\v 21 Nanu ununa i wesarau ueta Godima yaba Danu kobere imueta mafite ya ue bou ufiro Danu unu nesia ufoe watane. Godima Yesu Kerisonu ifuro yanu neno ubarero Danu unu ufie watane. Ya nesia Yesu Kerisonu ifu me ibene ibene we ma derawere uteibene iba watane. Nanu sina ido.   
\s1 Dubu sina  
\p
\v 22 Naiyemutu, nanu nui sina wemaro nauawe. Nanu owawa ewado yafawere meba nanu iba sinaini ma kimu ueta sina eregou uawe.  
\v 23 I dibura yawoeta uwarama Timoti ma uregari utaro Timotima dibura ekodite ani. Nanu unu i sina naufoe iba watane. Timotima nabai sau fafisuna dawaini naini yabai anibute ya efutu.   
\p
\v 24 Nanu ario sina yanu dera yawoeta uwaraini Godinu naueta uwaraini ema nesiaba wiawe. I Itaria orofa naueta uwara nesia emanu ario sina yaba waita.   
\p
\v 25 Godima ya kobererau durua ufie watane. Nanu sina ido me sininu.