\id EPH NT0097.EP Yareba N.T. - Weimer 9-JAN-87 \h EFESA \toc1 EFESA SU UWARABAI OWAWA \toc2 EFESA \mt1 EFESA SU UWARABAI OWAWA \c 1 \p \v 1 Godima Danu unu uite na Foro, Yesu Kerisonu afosoro amara we mune odi. Nana ya Yesu Keriso imuegou utaita uwaraba owawa ue odatane. \p \v 2 Yanu Baba Godini yanu Dera Waria Amara Yesu Kerisoini Emana ya durua ufisite Emanu wesa ueta yaba mafisiro wesarau uteda ibifoe iba eno watane. \s1 Godima Yesu Kerisoro me maeta mairo musi \p \v 3 Godi, Yesu Keriso Danu Damama, Dana ya we mune yanu Dera Waria Amara Yesu Kerisobai ma taka uite i urero kobere ane ane nesia yaba maiba iba Danu ifu we ma derawere ufene watane. \v 4 Godima i nasini ubu utawa uteda i kowaro Yesu Keriso Dana ya ma wirofie iba we mune odi. Godi Danu ununa ya Danu iboro inafete kobererau torowa ufene iba eno ui. \v 5 Boderewere Godima yaba neno arama uteda Danu unu uite Yesu Kerisonu ma wiroeta gaukaraba ya we mune Danu omueta odiro Danu koiniboro sisi. \v 6 Godi Danu ununa ya Danu kobere durua ueta we ma derawere ufene iba Danu Amara ubi yaba mai. \p \v 7 Yesu Keriso Danu kobere durua ueta derawereba Dawa uiro Danu onono itariro ima ya ma wiroite yanu neno neno ueta mune imutawa ui. \v 8 Danu ununa ya Danu imueta nesia daido iwata ufene iba Danu kobere durua ueta yaba maegou ui. \v 9 Godima Danu boderewere kiwuma imueta ma boroyafie iba Danu unu uteda Yesu Keriso siaia uiro fari. \v 10 Godinu imuetana edono, i dubu fafisu kowaro Godima nesia i urero ibaiabaini ewa nasiniro ibaiabaini ya uwaraini i nesia ma aine odifiro Yesuma daido yawofisu. \p \v 11-12 Godi Dawa nesia bunawere uteda Danu unu uiba ya Yesu Kerisobai yanu kabesi musi. Godi Danu ununa ya Ju uwara ya ko Yesu Keriso imuteda yanu naueta Dawabai oisiba emema efitate Danu ifu we ma derawere ufitae iba nesia eno ui. \p \v 13 Nono Yesu Kerisoba webiba ya aika uwara yana i kobere sina, yanu wiroeta sina nautebita. Enoba yana yanu naueta Dawabai oitaro Godima we bou uiro fari Imumu Kotofuma yanu nenoro itarite ya Godinu uwara we mawetu ue odi. I Imumu Kotofuna Godinu isi saneta ari yanu nenoro sane odi. \v 14 Godinu Imumu Kotofu Dana yabai ibinuba ya iwata yanu Godibai moko munetana daido mubeisi. Nono Godima ya mune Dawabai odifiro me ibene ibene ibeda Danu ifu we ma derawere uteibeisi. \s1 Foroma Efesa su uwara iwata derawere ufie Godibai guriguri utebi \p \v 15-16 Enoba ya uwarana yanu naueta Yesu Kerisobai oitate Godinu naueta uwaraba neno arama utaita weitaro nauete Godibai yaba guriguri uteda we ma kobererau utebatane. \v 17 Nanu ununa yanu Dera Waria Amaranu Godi, i araetawere Baba Godi, Dawa ya durua ufiro Danu Imumu Kotofunu imueta yaba ma boroyafiro Godinu imueta nesia iwata uegou ufoe iba Godibai guriguri utebatane. \v 18 Nanu ununa yanu neno ubarero ario ufiro Godinu imueta imutaita we bou ueta iwata ufote i ure imuetaini Godinu imuetaini nesia iwata ufoe iba guriguri utebatane. \v 19-20 Nanu ununa yana Godinu buna ereda iwata ufoita. I bunana Yesu Keriso uietaroma ma uyarite mune ure orofa Danu banibira age afu ma yauri. I bunana ya naueta uwaranu. Ina iwata ufoe iba guriguri utebatane. \v 21 Godima Yesu iro dera yawoeta uwaraini botai uwaraini ure dera uwaraini i awona ibinita uwaraini i reka sakairo ibifitaita uwaraini ema nesia ma serigari ue odi. \v 22 Dawa nesia yawofie iba odite Dana i naueta uwara nesia Yesu emanu kofiri we odi. \v 23 I naueta uwarana Danu ofe. Idoba i kofirini ofeini ofe ubu demurai sinaisi. \c 2 \s1 Godima uietaroma Yesuini ma uyariro wirosite me ibinisi \p \v 1 Bodere ya aika uwarama Godiba gifena uteda siosawere utebitaba uinono ari ue ibebita. \v 2 Bodere yana ewa orofa atatanu siosa imueta dabaro inarebita. I siosawere dera yawoeta amara, dana seitani. Dana i uitebita uwaraini i Godiba gifena utebaita uwaraini yawotasu enanari dana ya eno bodere yawotebiro ibebita. \v 3 I ari ya nesia i uwara emanu ueta sineta enanari utebisi. Yanu siosa nenonu imueta unu torowa utebisi. Yanu ofenu unuini yanu beforonu imueta unuini i nesia eno utebisi. Ya eno utebisiba Godima yaba ibo uteda fanisi mafie utebi. \p \v 4-5 Godi Dawa unutawa ya uwaraba fanisi maeta. Danu ununa neno arama ueta. Siosa nenonu imueta unu uteda Godiba gifena usite uinono ari ue ibisiro Dana yaba ibo utawa neno arama derawere uteda uietaroma ari Yesuini yaini nesia ma uyariro kobererau ibinisi. Godi Danu torowa ya durua uteda ma wiroi. \v 6 Ya Yesu Kerisobai taka usiba Godima yaini Dawaini nesia ma uyarite Dawaini yaini i ure orofaro ibifene we mune odiba awonana Yesuini yaini eno ibinisi. \v 7 Godima yaba neno arama derawere uite iba Yesu Keriso siaia uiro tarite ya ma wiroi. Godi Danu ununa i duburo fareibitaita uwara nesia Danu neno arama ueta efitate iwata ufitae iba eno ui. \v 8 Godi Danu torowa ya durua uteda me ma wirotasuro yanu naueta Godibai odaita. Ya yanu torowa ma wirotawa yanu wiroetana Godinu me maeta. \v 9 Ina yanu gaukara meba iba yanu ifu we ma derawere da ufeisi. \v 10 Godima ya ubu uite yana kobererau ueta torowa uteibene iba Yesu Kerisobai ma taka ui. Dana bodere i kobere ueta sineta odite i uteibene iba Yesu Kerisobai ma taka ui. \s1 Yesuma uwara aika maika ma arotorowa uiro demurai ari ue ibinita \p \v 11-12 Imue eawe! Yanu baya babana aika uwaraba yana aika uwara. I Ju uwarama eno weita, ya Ju uwarana ofe tureta uwara, ya aika uwarana ofe turawa uwara eno weita. Emanu ofe turetana emenu agema tureta. Yanu bodere ibeta imuawe. Bodere yana Yesu Kerisobai ibawa yanu aika ibebita. Yana Godinu muneta uwarabai ibawa yana aika eme ari ibebita. Godi Danu unuro ue mataneta Isaraero uwarabai we bou bou utebi. I we bou bou uetana yanu me. Yana Godi imutawa uteda me sara siosa ibebita. \v 13 Nono awonana yana Yesu Kerisobai ibinita. Yana bodere etararowere ibebita, nono awona Yesu Keriso Yaba uiro Danu onono ewaro itariba yana Godibai baworo ibinita. \v 14 Yesu Keriso Dawa Danu wesa ueta maite Dana yanu wesa ueta ari siniba wesarau ibinisi. Dawa ya nesiaba uite i Ju uwaraini aika uwaraini yana uwara demurai ari ma aine odi. Enoba bodere i Ju uwaraini aika uwaraini emaba wasai utebita. Awonana ya wesarau ibeda yanu naiyemutu waisi. \v 15 Yesu Keriso Dawa ido farite yaba uite Godinu tarawatu nesia mune aika odite ekodi. Danu ununa i Ju uwaraini aika uwaraini uwara demurai Dawabai mune odifiro wesarau ibifene iba eno daido ui. \v 16 Yesu Danu ununa i wasai ueta me sibie iba korosiro ui. Dana korosiro uiba i uwara nesia ema ma demurai uite i uwara ma owerite Godibai baworo mune ane odi. \v 17 Yesu Keriso Dawa ido farite Godinu kobere wesarau ueta sina uwara nesiama naufitae iba i sinanu ubi Amara sinite ya Godibai baworo ibebisi Ju uwaraba webiro moana uwarama ya Godibai ibawa etararowere aika ibebita uwaraba enanari webita. \v 18 Ya uwara nesia Ju uwaraini aika uwaraini Yesuma ya nesia ma wiroiro Godinu Imumu Kotofu yanu nenoro ibinuba Godinu iboro inaibeda guriguri utaisi. \s1 Ya naueta uwarana Godinu ibeta su \p \v 19 Enoba awonana ya aika uwarana aika eme ari me. Yaini Godinu uwaraini ya nesia arotorowa. Yana Godinu ba uwara. \v 20 Ya nesiana Godinu su ari. I afosoro uwaraini Godinu we bou ueta uwaraini emana i su tutubu ari. Yesu Keriso Dana i fou tora ari. Ya nesiana dira yatobe ari eno odi. \v 21 I fou torama i su nesia ma badami utasu i ari Yesu Kerisoma ya nesia ma badami utasuba yana Godinu kakara dubu su ari sinaisi. \v 22 Yesu Keriso Dana yaini aika maika uwaraini mune Dawabai ma taka uteda Godinu su ubu utasu. I suna yanu neno ubare iba Godini Danu Imumu Kotofunu ibeta su ido. \c 3 \s1 Foronu gaukarana aika uwaraba Godinu kobere sina webi \p \v 1 Enoba, na Foro, nana Yesu Kerisonu kobere sina ya aika uwaraba weba na diburaro oita. Nana Yesu Kerisoba dibura ue amarama Godibai yaba guriguri utatane. \v 2 Na imutatane, ya iwata, Godima na imuteda nanu gaukara iba naba mai. Godi Danu ununa na ya uwara durua umane iba nanu gaukara mai. \v 3-4 Godima Danu kiwuma imueta naba ma boroyareda we mawetu ui. Nana auboko i sinaratu owawa eno ue odeba yana i sina yawifoitana Yesu Kerisonu kiwuma imuetanu ubi iwata ue enanari iwata ufoita. \v 5 Bodere Godima Danu kiwuma imueta emebai we ma boroyarawa ui. Nono awonana Godima Danu Imumu Kotofuroma Danu kakara afosoro uwaraini we bou ueta uwarabai we ma boroyari. \v 6 I kiwuma imuetanu ubina edono, i aika uwarama Godinu kobere sina nautaitaba Godima emaini Ju uwaraini ema nesia ma kobererau utasu. I aika uwaraini Ju uwaraini ema nesia Yesu Kerisonu ofero demurai uwara. Idoba Godima Yesu Kerisoro we bou ui. I we bou ueta nesia ya uruama munaita. \p \v 7 Godima na durua uteda Danu kobere sina wemane iba Danu bunaroma na we mune odiro Danu kobere sinanu gaukara amara sire. \v 8-9 Godinu naueta uwarabai nana derawere me, emana derawere. Godima i imutawa uteda Danu kobere sina gaukara naba maiba i aika uwaraba Yesu Kerisonu kobere ueta sineta imueta daido watane. Godima Danu kiwuma imueta anene ufisu iba eme nesiabai watane. Godi Dana i nesia ubu uite nono Danu kiwuma imueta bodere ma boroyarawa utebi. \v 10 Dana eno uiba awonana urero dera aneruma i dubu su naueta uwaranu ueta sineta efitate Godinu iwata derawere nesia iwata ufitae iba eno ui. \v 11 Godima eno boderewere imuite imutebe imutebe nono yanu Dera Waria Amara Yesu Kerisoro enanari ui. \v 12 Enoba ya yanu naueta Yesu Kerisobai oisiba Godiba iyarawa Danu iboro fare inaibeda sina ido waisi. \v 13 Nana yabai Godinu sina weba uwarama na diburaro oita. Na diburaro oita iba neno siosa da uawe. Yana Godinu sina nautate yanu naueta Dawabai oitaya iba neno siosa da uawe. \s1 I Efesa su uwara Yesu Kerisonu neno arama ema iwata ufita \p \v 14 Enoba nana Baba Godinu iboro yajigoma jegirari uteda guriguri utatane. \v 15 I urero ibinita uwaraini i nasiniro ibinisi uwaraini ya naueta uwara nesia yanu Babana Godi. Ya nesia Dawaini uwara demurai iba Dana yanu ba ifu mamasu. \v 16 Nana yaba Godibai guriguri uteda watane, Danu gugua gubari bobo araetarau bunaroma Danu Imumu Kotofuma yanu imueta ma buna ufiro buna ufoe watane. \v 17-18 Nanu ununa ya yanu naueta Yesubai ibifisuba Yesuma yanu nenoro ibifiro eme nesiaba neno arama uegou uteda ini sanegou ufoe iba guriguri utatane. Yaini Godinu naueta uwaraini ya nesia Yesu Kerisonu neno arama ueta derawere iwata ufoe iba guriguri utatane. Danu neno arama uetana ewa ari, i kowa amuetaroma ane kowa itaretaroma etei afuroma ewa afuroma i uwara nesia Danu neno arama uetana ewa ari derawere emabai ibinu. \v 19 Danu neno arama uetana derawereba emenu iwata serigari utasu. Utasurogo nono nanu ununa yana Danu neno arama ueta iwata ufoita. Eno ufoitana Godima yanu nenoro ibegou ufisu. \p \v 20-21 Dawa Danu bunawere Imumu Kotofu yanu neno ubarero odiba ya Dawabai anene imutaisite anene waisiro ini nono moana faiyawere utebasu. Enoba i dubu su naueta uwaraini Yesu Kerisoini ya nesia Godinu ifu ibene ibene we ma derawere uteibene watane. Nanu sina ido. \c 4 \s1 Ya naueta uwara yana Yesunu ofe ari \p \v 1 Nana Yesu Kerisonu gaukara utataneba nana dibura amara. Nana sina bunawere wemaro nauawe. Godi Dawa ya we mune odiba Dana yaba wei sina enanari uawe. \v 2 Yanu ueta sineta eno uawe, yanu ifu we ma derawere da uawete nesia kekerama uawete nesia ure nudarau uawe. Yanu yanu neno arama ue matawe, yanu ueta sineta eno uawe. \v 3 Godinu Imumu Kotofuma ya durua utasuba imueta daba aika maika da imuawete uwara demurai siawete Danu wesarau ibeta enanari ibiawe. \v 4 Godinu Imumu Kotofu Dana demurai, i ari i naueta uwara nesia emana ofe demurai ari. Nono i ari Godinu ma wiroetana demurai. Godima eno imuteda ya nesia we mune odiba i ure daba demurairo manibene imutaisi. \v 5-6 Yanu Dera Waria Amara Dana demurai. Yanu nauetana aika maika me, ina demurai. I babataito uetana demurai. Godi Dana demurai, Dana ya uwara nesia yanu Baba. Dana nesia yawotasute yanu neno ubarero ibeda yaro gaukara uegou utasu. \p \v 7 Yesu Keriso Dana yaba buna aika maika maiba yanu gaukarana aika maika. \v 8 Godinu bukaroma eno wasu, \li1 Dawa dibura uwara ari faiyawere botai mamite urero woure mani. Dana emeba buna aika maika mai, \p Godinu bukaroma eno wasu. \v 9 I urero mani sinanu ubina ane ari? I ubina edono, Dana auboko emina nasiniro tararite nono urero mani. \v 10 I nasiniro tarari Amaraini i ure deiro mani Amaraini Dana Amara demurai. Enoba Dana nasini wowonaroini etu deiroini urero aboro aboro ibeda nesia yawotasu. \v 11 Danu aika maika me maeta bunana edono, moana uwaraba afosoro gaukara ueta mai. Moana uwaraba we bou ueta gaukara mai. Moana uwaraba Godinu sina weta gaukara mai. Moana uwaraba dubu su yawoeta we mawetu ueta gaukara mai. \v 12 Danu ununa i uwara ue bou ufiro emana Godinu gaukara ufitate i naueta uwara nesia ma buna ufitae iba i buna maeta aika maika mai. \v 13 Emana eno utaitaba ya nesia uwara demurai sinaisi. Yanu nauetana demurai. Ya nesia Yesuna Godinu amara enanari imuteda iwata utaisi. Enoba yana koiniboro ari da ibifete dera uwara sibete Yesu Kerisonu imueta nesia imuegou ufete enanari ufeisi. \v 14 Eno ufeisina ya koiniboro arina me. I we gagau uwaranu aika maika imuetana enea ufeini oyau ari. Ima ya woure ane are, ane are, enoma enoma da ufisu. Emanu ununa uwaranu imueta ma siosa ufitaita. \v 15 Ya eno da ufete emeba neno arama uteda ba sina torowa webeisi. Enonago yana Yesu Keriso, yanu kofiri, Dawabai taka uegou ufeisi. \v 16 Dana i ofe yawotasuba i ofe ememetu nesia emanu kabesi aika maikaro ido ibinita. Ibadidima ofe tai nesia ma taka utasu enanari Yesuma yanu kabesiro ma taka utasuro yanu gaukara aika maika utaisi. I ofero aika maika ememetuma emanu emanu neno arama ue mataneda emanu gaukara aika maika utaitaro i ofe derawere utasu. \s1 Ya naueta uwaranu inareta dabana reka \p \v 17-18 Nanu mui sina Yesu Kerisonu ifuro bunawere wemaro nauawe. I Godinu sina nautawa uwaranu ueta sineta ari enanari da uawe. Emanu imuetana siosawere. Emanu nenona igawere. I uwara ema unutawa Godinu weta. Emana Godiba gifena uteda Godibai ibawaba emanu aika ibinita. \v 19 Emana maru utawa i siosa udiri yagera ueta utaitate emanu unu siosawere uetaba iba siosawere uegou utaita. \p \v 20 Yesu Kerisonu imuetana eno me. Yana Yesu Kerisonu sina eno nautawa utebita. \v 21 Na iwata, moana uwarama Yesu Kerisonu sina yaba weitaro nautate Danu ba imueta iwata utaita. \v 22 Enoba yanu siosa nenonu imueta nesia mu sawe. I siosa imueta ima ya bodere irutebiba yana siosawere utebita, i siosawere imuetana yajarawereba kodiawe. \v 23 Idoba reka imueta imuawete reka neno muawe. \v 24 Eno uawero yanu ueta sinetana Godinu ueta sineta ari sibi. Eno ufoitana yana kobererau torowa ufoita. Eno uawero yanu ueta sinetana kobererau sibisu. \p \v 25 Enoba meo da wiawe. Ya nesia yana Yesu Kerisonu ofero ememetuba yanu yanu ba sina we matafe. \v 26 Yana ibo ufoitana siosawere uotoba yanu ibo ueta sau ma nabi uawe. Waura warairoma yawiro ibo bobo ue da ibiawe. \v 27 Seitanima danu siosa imueta yaba maosoba ibo sau kodifoe watane. \v 28 I waira utebaita uwara awona waira da uawete gaukara uegou uawe. Emanu ieta mubitate ieta me uwaraba mafitae iba watane. \v 29 Siosa sina da wiawe. Aboro aboro yaubedana kobere sina torowa wiawero emema naufitaro emanu imueta ma kimu ufiro ina kobererau webita. \v 30 Godinu Imumu Kotofuma neno siosa uosoba siosawere da uawe. Yana Godinu uwaraba Godima Danu Imumu Kotofu yanu neno ubarero odiba nono duburo ya mune Danu orofaro odifisu. \v 31 Neno ka uetaini neno uyaretaini ibo uetaini derawere wetaini meo wetaini uwaraba siosawere uetaini i siosawere ueta nesia kodiawe. \v 32 Yanu yanu neno arama ue mataneda durua uawe. Godima Yesu Kerisoro yanu siosawere ueta mune imutawa ui enanari yanu yanu siosawere ueta muawete imutawa uawe. \c 5 \s1 Yaini naini nesia arioro inareibe \p \v 1 Godima yaba neno arama utasu. Yana Godinu koiniboroba Danu ueta sineta enanari uawe. \v 2 Uwara nesia emaba neno arama uegou uawe. Yesu Keriso Dawa yaba neno arama uteda ui. Ina Danu kobere bonana fuyo oeta ari. Godima i ereda yaru derawere ui. Yesu Kerisonu neno arama ueta enanari uawe. \p \v 3 Dita yagera faretaini i siosa udiri uetaini nesia kodiawe. I me sara siosa ibaiabai muneta kodiawe. Yana Godinu naueta uwaraba i siosa igawere sina yanu yanu da we matawe. \v 4 Siosawere sinaini me sara siosa sinaini igawere sinaini i sina nesiana kobererau meba da wiawetema nono Godibai we ma kobererau torowa uawe. \v 5 Ewa sina imue eawe! I dita yagera farebaita uwaraini siosa udiri utebaita uwaraini emanu unu ibaiabai faiyawere torowa munebaita uwaraini emana eno uteda ema Godi imutawa emana ibaiabai torowa imutaita. Enoba emanu uetana emanu agema ubu ueta godibai siboro ueta ari. I uwara nesia emana Godini Yesu Kerisonu kobere yawotasu orofaro kabesi da mubitaita. \p \v 6 Emenu siosawere irueta sina da nauawe. Enoba Godima Dawabai gifena utaita uwaraba ibo derawere ufite fanisi mafisu. \v 7-8 Yana bodere dumuro ibinono utebita. Nono awonana yana Yesu Kerisobai arioro ibinita. Enoba i arioro ibinita uwaranu ueta i ari uawe. \v 9 Arioro inaibinita ana tai kobererau uwanaita i ari i arioro ibinita uwarama ba sina torowa waitate kobererau utaitate emanu ueta sineta rorowarau utaita. \v 10 Yanu Dera Waria Amaranu unu imueta i ari imuawete enanari uawe. \v 11 I dumuro ibinita uwaranu siosawere ueta enanari da uawete yanu kobere ueta sineta ima emanu siosawere ueta arioro ma boroyawe. \v 12 I uwarama kiwuma siosararabo utaita. Emanu uetaba da wiawe. Eno weboitana maru derawere siboita. \v 13 I ueta nesia Yesunu arioro odifoitana i arioma i ueta nesia emanu ubi ma boroyafiro iwata ufoita. I ma boroyareta ememetu nesiana ario sibisu. \v 14 Enoba mui amarama i sina eno owawa ue odi, \li1 nauta ainibinu amara uya. I uieta uwarabairoma uyaro Yesu Kerisoma a ma ario ufi, \p eno owawa ue odi. \p \v 15 Kobererau torowa uawe. I beforo me uwaranu ueta sineta ari da uawete i beforo bobo uwaranu ueta sineta ari uawe. \v 16 Ewa kowaro emema siosawere utebaitaba yana enanari da uawete aboro aboro yanu kowaro kobererau uawe. \v 17 I beforo me uwaranu ueta ari da uawe. Yanu Dera Waria Amaranu unu imueta ue iwata uawete enanari utebeawe. \p \v 18 Beforo siosawere uosoro ya ma siosa uosoa kimu ogo da iawe. Eno da uawete kobererau uawe. \v 19 Samusi buka sinaini sonini Godinu Imumu kotofunu sonini, i, iba sinaroma yanu yanu we matawete Godibai nenoma yaru uteda soniroma we ma kobererau uegou uawe. \v 20 Yesu Kerisonu ifuro nesiaba yanu Baba Godibai we ma kobererau utebeawe. \s1 Awerasi munetaini awetabo muneta sina \p \v 21 Yana Yesu Keriso imuegou utaitaba yanu ifu we ma derawere da uawete yanu yanu sina naue mataneda ibegou uawe. \p \v 22 Awetabo yana Yesu Kerisonu sina nautaita enanari yanu awerasinu sina nauawe. \v 23 Yesu Keriso Dawa i dubu su naueta uwara yawotasu enanari awerasima awetabo yawotaita. Yesu Keriso Dana i dubu su naueta uwara, Danu ofe ari, emanu ma wiroeta Amara. \v 24 I dubu su naueta uwarama Yesu Kerisonu sina nesia nautaita. Enoba awetaboma enanari yanu awerasinu sina nesia nauegou uawe. \p \v 25 Yesu Kerisoma i dubu su naueta uwaraba neno arama uteda emaba ui enanari ya awerasi yana yanu torowa ari yanu awetabo neno arama uawe. \v 26 Yesu Keriso Danu ununa Danu naueta uwara Godibai mune odifie Danu sina emaba maite babataito uiba toafurau ibinita. \v 27 Danu ununa Danu naueta uwara kobererau mubie Dawa unutawa Danu uwara igawere amaimawere gogofari ari ubeta. Danu ununa Danu naueta uwara Dawabai kobererau ibifitae iba Danu sina maite ema babataito ui. \v 28 Enoba awerasima emanu ofe imuegou utaita enanari emanu awetaboba neno arama ufitaita. Anama danu aweta imuegou utasuna danu torowa neno arama utasu. \v 29 Emema emanu ofe da imutawa ufitaita. Enona me. Emana emanu ofe yawoegou uteda ieta itaitaro ima emanu ofe omutasu. Yesu Keriso Danu naueta uwara yawotasu enanari emanu ofe emanu torowa yawotaita. \v 30 Yana Danu ofe ememetu ariba ya yawotasu. \v 31 Godinu bukaroma eno wasu, enoba mui amarama danu danua damama ekodifite danu awetabai taka ufiro awetaini awera emana demurai ari sibitaita eno wasu. \v 32 I sinana ba. Nana danu ubi eno imutatane, Yesu Kerisoini Danu uwaraini emana demurai ari. \v 33 Nono nanu sina merogo, ya awerasi yana yanu torowa imutaita enanari yanu awetaboba neno arama uawero ya awetaboini yanu awerasinu sina nesia nauawe. \c 6 \s1 Danua damamaini koiniboronu sina \p \v 1 Aruma amara yanu yanua yamamanu sina nesia nauawe. Yana Yesu Keriso imutaitaba eno kobererau uawe. \v 2-3 Yanu yanua yamama ititi kakara uawe, Godinu bukaroma eno wasuba iba eno uawe. Ina Godinu botai we bou ueta bobo tarawatu. Godima i we bou ueta eno wasu, yana eno ufoitana ewa nasiniro oya faiyawere me ibifoita, Godima eno wasu. \p \v 4 Ya damamamutu yana yanu aruma amara ma ibo da uawete imuetaini naueta uwaranu ueta sinetaroma yanu koiniboro we mawetu uawe. \s1 Gaukara uwaraini yawoeta uwaranu sina \p \v 5 Ya gaukara uwara, yana Yesu Kerisonu sina nautaita enanari yanu dera yawoeta uwaraba iya uyareda emanu sina nesia nauawe. \v 6 Yanu dera yawoeta uwarama ya efitate ere erawari ufitaitana emaba garo da uawete yanu gaukara rorowarau uegou uawe, yana Yesu Kerisonu sabua ueta uwaraba ina Godinu unu. \v 7 Yana sabua ueta gaukaraba yaru bobo rorowarau uawe. Yana yanu gaukara emebai torowa utawa yanu Dera Waria Amarabai utaita, iba yaru bobo uawe. \v 8 Imue eawe. Yanu Dera Waria Amara Dana i uwara, sabua ueta uwaraini me inaraita uwaraini emanu kobere gaukaraba emaba moko mafisu. \p \v 9 Ya dera yawoeta uwara, yana yanu sabua ueta uwaraba enanari kobererau utebeawe. Emaba kimu sina da wiawe. Imue eawe. Emanu Dera Yawoeta Amaraini yanu Dera Yawoeta Amaraini Dana demurai. Dana urero yaubeda uwara nesiaba arotorowa moko matasu. \s1 Naueta uwarana meremere uwara ari \p \v 10 Nanu dubu sina wemaro nauawe. Yanu Dera Waria Amarabai ibiawete Danu buna muawete bunawere uawe. \v 11 Yana seitaninu meo irueta nesiaini urafoe iba Godinu biraini kefataini obenini muboe watane. \v 12 Yana i eraisi uwaraini uranawa utaisi. Yana i erawa siosawere yawotasu seitanini danu siosawere gaukara uwaraini ewa dumu kowaro uranaisi. \v 13 Idoba Godinu uraneta ibaiabai awona muawe. I siosawere kowa fafisuna i Godiba wasai utasu amara urane me sibote dawa ma serigari ufote rorowarau inafoita. \p \v 14-16 Enoba yanu uraneta ibaiabai eno mune bou uwawe. Ba imueta ina yanu kafa ari abagaro uawe. Kobererau ueta, ina yanu oro oeta ari muawete baruawe. Godinu kobere sina, ina yanu buri barueta ari muawete baruawe. Yanu Godibai naueta, ina yanu bira ari wourebeawe. Woufoitana seitaninu siosa imuetana ina bubura sanasu ari sabiro birama garari ufoita. \v 17 Godinu wiroeta muawete ina yanu burudu kimu kofi barueta ari iba baruawe. Godinu Imumu Kotofu Dana Godinu sina yaba matasu. I sina, ina yanu dera kaiya ari iba muawe. \v 18 Eno utedana Godibai guriguri utebeawe. Godibai guriguri ufoitana Godima ya durua ufie nui wiawe. Godinu Imumu Kotofuma Danu imueta yabai odifiro Godibai guriguri uawe. Guriguri da kodiawete uyawete i naueta uwara nesiaba Godibai guriguri uawe. \v 19 Nanu ununa Godima naba buna mafiro nana iya da uyamate Danu kobere sinanu feare ibetanu ubi nesia we ma boroyamane iba watane. Enoba naba Godibai guriguri uawe. \v 20 Godima na Danu afosoro amara siaia uiro anete Danu kobere sina webitaraba awona nana diburaro ibine. Na unutawa iya uyareta. Nanu ununa Godinu kobere sina wemane enoba naba Godibai guriguri ufoe iba watane. \p \v 21 Yanu yaiye warai, Tisikasi, dana yanu Dera Waria Amaranu gaukara uegou utebasu. Dana yabai ane fafite nanu sina nesia webiro naufoita. \v 22 Nanu ununa ya uwarama naini nanu uwaranu ueta sineta iwata uforo dana yanu neno ma buna ufie iba dawa siaia uero yabai ari. \p \v 23 Yanu Baba Godini yanu Dera Waria Amara Yesu Kerisoini Emana ya durua ufisisiba yana wesarau ue ibeda i naueta uwara nesia emaba neno arama ufote yanu naueta Godibai odifoe iba watane. \v 24 Ana anama Yesu Kerisoba woroworo neno arama uegou uteibitaitana nanu ununa Godima ema kobererau durua ufie watane. Nanu sina ido me sininu.