\id COL NT0097.CO Yareba N.T. - Weimer 9-JAN-87e 
\h KOROSE 
\toc1 KOROSE SU UWARABAI OWAWA 
\toc2 KOROSE 
\mt1 KOROSE SU UWARABAI OWAWA  
\c 1  
\p
\v 1-2 Godima Danu unu uite na Foro Yesu Kerisonu afosoro amara we odi. Naini Timotini wana ewa owawa ue odaituba ya Godinu Korose su naueta uwara, ya Godi imuegou utaita uwaraba ewa owawa yabai siaia ufuro eawe. Godima ya durua ufite Danu wesa uetaini ure nudarau uetaini mafiro wesarau ibifoe watane.   
\s1 Godima Korose su uwaranu naueta ma derawere ui  
\p
\v 3 Yesu Kerisonu Damama, Godi, Dawabai guriguri utedana Godibai yaba we ma kobererau utaisi.  
\v 4-5 Yana Godi imuegou uteda Godi nautaita uwaraba neno arama utaita weitaro nausi. Yana Godinu ba sina auboko yabai fafiro nautaba i ure orofa kobere yaru ueta imuegou utebaita weitaro nausiba Godibai guriguri utedana yaba we ma kobererau utaisi.  
\v 6 Godinu kotofu sina yabai fariro nauta. I sina awona i orofa atata nesia aboro aboro we inaraitaro emema nautaitate reka uwara sinaita. Ya Korose su uwarama Godinu sina nauteda Godinu neno arama uetaini ba wetaini iwata utate reka uwara ari sita, enanari awona moana uwarama enanari utaita.  
\v 7 Efafarasima yaba Godinu sina weiro nauta. Dawaini Yesu Kerisonu sabua ueta amara. Dawa yabai nanu kabesi munite Godinu sina weiro nauta.  
\v 8 Efafarasima naini nanu uwarabai fare wei, Imumu Kotofuma i Korose su naueta uwaraba durua utasuba emeba neno arama utaita weiro nausi.   
\s1 Foroma Korose su uwaranu naueta ma buna ufie Godibai guriguri utebi  
\p
\v 9 I sina nausite Godibai ainewaure guriguri utedana eno waisi, i Korose su uwara durua uaro anu unu iwata uteda Anu ba sina naufitate ubi iwata ufita, eno waisi.  
\v 10 Godinu neno ma yaru ufoitaba Danu ifu we ma derawere ufote emebai kobere kobererau torowa ueta ufote Godi iwata derawere ufoe iba Godibai eno waisi.  
\v 11 Godima danu buna derawereroma ya ma buna ufiro yabai ane ane ufisuna ido kimuwere ue ibeda ure nudarau uforo Godinu yaru yanu neno ubarero ibifie waisi.  
\v 12 Godima ya ma kobererau uiba Danu ariowere yawoeta orofaro anibete yana i naueta uwaraini yanu urero muneta mubete merau ibifeisiba ya Godibai we ma kobererau uteiboe waisi.  
\v 13 Godima ya i dumuwere orofanu bunaroma ya ma dare munite Danu Amara ubinu orofaro woure mane odi.  
\v 14 Danu Amara ubinu ononoma yanu seitanibai sabua uetabairoma oiya ue mune eta odite yanu ba me ueta sineta nesia munite imutawa ui.   
\s1 Yesu Kerisonu uetaini Danu gaukara  
\p
\v 15 Nana Yesu Kerisonu sina wemaro nauawe. Godima me ari ibasuro emema Danu ibo nawata erawa utaitaro Yesu Keriso Godinu ibo nawata ma boroyarasu. Godini Dawaini arotorowa. Godima Danu Amara ubu utawa uiro Godinu ubu ueta kowa farawa uiro Yesu Dawa daido me ibi.  
\v 16 Godima Yesu Dawabairoma i ureini nasinini ememetu nesia ubu ui. Dawa i ereta ememetuini erawa ememetuini i ure orofa atataini ewa orofa atatanu kini uwaraini ure yawoeta dera uwaraini aneruini Danu torowaba Danu ifu ma derawere ufitae iba i nesia ubu ui.  
\v 17 Yesu Dawa ko ibebi. I ureini nasini ememetu nesia Danu bunaro i nesia ma badami ue ibinita.  
\v 18 Dawana i ofenu kofiri. I ofena Danu naueta uwara, Danu dubu su. Dawa ko uietaroma uyariba Dawa i uietaroma uyafitate me ibifitaita naueta uwaranu Dera Waria Amara. Erawa nautawa ane ane derawere me, Dawana derawere, Dawana botai.  
\v 19 Godi Danu unu uite Danu imuetaini ueta sineta nesia Danu Amarabai odiro ibi.  
\v 20 Danu unu uteda Danu Amara uifiro Danu korosiroma itareta ononoma ureini nasinini uwaraini ane ane nesia Godinu ibo tufiro emeini Godini ane ane wesarau ue ibifitae iba Yesu Keriso eno ui.   
\p
\v 21 Bodere ya Korose su uwarama Godibai ibawa eta kebiro ibeda Godini wasai ue ibita. Ya eno ue ibeda Godiba wasai ueta imutedaba ba me utebita.  
\v 22-23 Eno utebitaba Godinu Amara eme nesiaba tare uite emema Godibai anibitae iba Godinu ibo turi. Godi Danu unu ya uwara kakarawere neno roatarau imuetaini kobere uwara mune Godibai ane odifiro Godima yaba ibo da ufie iba eno ui. Godinu kotofu sina uwara nesiabai we inarebitaro nautebita yaini enanari nauta. Na Forona i kotofu sina weta amara. Ya uwara i kotofu sina nauegou ufote aika maika da imufote Godinu sina da ekodifoitana Yesu Kerisoma ya Godibai mune ane odifiro Godima yaba ibo da ufisu.   
\s1 Foroma Korose su uwara durua utebi  
\p
\v 24-25 Ya Korose su uwaraba awe uyareta faiyawere nabai farebita. Nono i awe uyaretaba iyarawa yaru utatane. Na awe uyareta wourataneba Yesu Keriso durua utatane. Yesu Kerisoma Danu uwara, emana Danu dubu suba awe uyareta faiyawere mune wourite ui. Na awona mui awe uyareta Danu uwaraba mune woure me simau. Nana Yesu Kerisonu dubu su yawoeta sina weta amara. Godima Danu kobere imueta nesia i aika uwarabai we ma boroyamane iba na Danu sina weta amara we mune odi.  
\v 26 I tutubari ui kowaroma arebe are awona ewa kowaro Godi Danu kiwuma imueta ma boroyarawa uiro me ibebi. Nono awonana i feare ibetawere imueta Danu naueta uwarabai we ma boroyaratane.  
\v 27 Godi Danu unu Danu kobere imuetarau Danu naueta uwarabai webie utasu. Danu imueta ya Ju me aika uwarabaini webie utasu. Danu kiwuma imueta eno, Yesu Keriso Dawa yanu neno ubarero ibinuba i araetawere me ibene ibene ibeta orofaro aniboita iwata utaita.  
\v 28 I orofa atataro inaredana uwarabai we kakara uteda Godinu iwataro Yesu Kerisonu sina weisi. Yanu unu uwara nesia Yesubai ibeda naueta derawere bobo Godibai odifene iba Danu sina nesia we mawetu utaisi.  
\v 29 Ewana nanu gaukara. Yesu Kerisoma Danu buna naba matasuba i gaukara uegou utatane. |L   
\c 2  
\s1 Eme sina nauegou ufitate meoma weta ekodifita  
\p
\v 1 Nanu sina nauawe. Uwarama uranebaita i ari nana yaini i Reodisia su naueta uwaraini nanu ibo nawata erawa uwara nesiaba derawere imuteda Godibai guriguri utebatane.  
\v 2 Nana Godibai guriguri uteda weta sinana eno, yanu yanu neno arama ue mataforo yanu neno nesia demurai ari ufiro buna ufisu. Yana Godinu imueta iwata uegou ufote Danu Yesu Keriso kiwuma imueta iwata ufoita. I kiwuma imueta Yesubai ibinu, eno watane.  
\v 3 Yesu Keriso Dawa nesia iwata utasu. I kobere imueta nesia Dawabai ibinu. I Godini emenu iwataini imueta nesia Dawabai ibinu.   
\p
\v 4 Moana uwarama yaba bebetuma gugu fareda ba sina ari meoma wiotoba iba i sina yaba wemaro naufoe iba eno watane.  
\v 5 Nana yabai ibawaro nono nanu neno yabai ibinuro yana kobererau uteda Yesu Keriso imuegou utaitaba nenoma yaru utatane.   
\s1 Ya nesia taka ufete wirofe  
\p
\v 6 Yana Yesu Keriso naue imue uta i ari awona Dawa naue imue uteda ibiawe.  
\v 7 Ana inima sakai ubarero tanasu enanari yanu imueta Yesubai odegou uforo yanu naueta derawere ufie watane. Efafarasima yaba eno we mawetu utebiro nautebitaba iba enanari uawete Godibai we ma kobererau uegou uawe.   
\p
\v 8 Moana uwarama Yesu Kerisonu imueta imutawa emenu imueta torowa imutaitate emenu ueta sinetaba waita. Emanu uetana kobererau me. Emanu imuetana iruetawere. Enoba emanu imuetaini wetaini ima yanu naueta ma siosa uosoba da nauawe.  
\v 9 Ya iwata, Yesu Dana Godi. Nono Dawa ofe munite ibinurogo Godi Dawaini Yesunu ofero daido ibinu.  
\v 10 Enoba Dawaini yaini demuraiba yanu wiroeta derawere usinu. Dana i urero aneruini bunaini nesia emanu kofiri. Dana ema yawotasu.   
\p
\v 11 Nanu sina eawe. Yana Yesubai ibeda ofe tunono uta. Agema ofe torowarogo daido me muta. Yesubai ofe tureta ari mutate yanu siosa ueta bodere wadia eru kosugari ue saneta ari uta.  
\v 12 Eno utate babataito uteda Yesuini uitaro Godima Yesuini yaini i babataito uetaroma uietaroma ma uyanono ma uyari. Yana yanu naueta Godibai oitaba Godima Yesu uietaroma ma uyari enanari ya ma uyari.  
\v 13-14 Nono bodere ya uieta uwara ari ibebita. Yana ba me uteda yanu siosa neno ofe tureta ari turawa iba uieta ari ibebita. Nono Godima Yesu Keriso Dawaini yaini ma uyarite reka me ibeta mai. Dawa yanu ba me ueta nesia mune imutawa uite i tarawatunu yabai wawei weta owawa oeta obari uite mune aika odeda korosiro ure odi.  
\v 15 Godima eno uite seitanini danu uwaraini emanu buna, ina uraneta ememetu ari, ma dare muni. Godima Yesu Keriso korosiro oeta, ima seitaninu buna ma serigari uite uwara nesia efitae wawurirowere ue odi.   
\s1 Ya Yesuini arotorowa uisite ibinisi  
\p
\v 16 Enoba mui amarama ietaini ogoini mui dera kowaini mui reka sakaraini sabate kowaba danu imueta torowa webisuna da naufoe watane.  
\v 17 I imueta nesiana i duburo fafie utasu inu ukaka torowa. Nono Yesu Kerisona ba ido.  
\v 18 Iba mui amarama danu tuberoma ereta sina weda danu torowa ma otowaratu ufite anerubai guriguri ufisuna enanari da uawe. Eno ufoitana ima ya ma siosa ufisu. Eno ueta amaranu imuetana ba me. Danu imuetana siosa imueta torowa imutasu.  
\v 19 I amarama Yesu Keriso munegou utawa, Yesu Keriso Dana yanu kofiri. I kofirima i ofe ubu nesiaba buna matasuro ima yanu ofero ememetu nesia daisineda ofe derawere uteda demurai utasu. Enoba yanu ofena Godinu bunama ma daisinasu.   
\p
\v 20 Yana Yesuini uitana i nasiniro imuetaba uita. Eno uita rairo aneba awona ewa nasiniro ibinita uwaranu imuetaini iba sina nauteda eno utaita?  
\v 21 I imueta eno, agema da buria, da ie ea, agema da burie ea, eno wasu.  
\v 22 I wasu imueta enanari ufeisina i imueta ido sau me sibisu. Ina eme emanu imuetaini we mawetu uetaba iba sau me sibisu.  
\v 23 Ina ba, i emenu imuetama buna uteda yanu nauetaroma ma ureiteda yanu ofe ma arama ufie utasu. Enoba yanu diti danu iwatana derawererogo nono ima ya da durua ufiro i yanu nenonu siosa imueta da ekodifeisi. Iba eno da imuawe wei.   
\c 3  
\s1 Godima yaini Yesuini uietaroma ma uyari  
\p
\v 1 Godima yaini Yesu Keriso ma uyariba i urero ueta sineta doberegou uawe. Yesu Keriso Dawa iro Godinu banibira age afuro mane yaubinuba i urero ueta sineta uawe.  
\v 2 Ainewaure i urero imueta imuteda ewa nasiniro imueta ekodiawe.  
\v 3 Aiwia, yana uitarogo awona yanu wiroeta me ibetana Yesu Kerisoini Godibai feare ibinuba i urero imueta imuawe.  
\v 4 Yesu Keriso Dana yanu wiroetaini me ibeta. Dawa fafisuna yaini Danu araeta arioro ane ibifeisi.   
\s1 Ya reka uwara sisi  
\p
\v 5 Enoba ewa sakainu ueta ma uiawete ekodiawe. I uetana eno, dita yagera faretaini siosa udiri uetaini igawere yagera fareta imuetaini mui aruma o amara o aweta o emeba eno uyaretaro i siosa diti ure owere ma owere uetaini ibaiabai derawere muboe uetaini ina ba me godibai guriguri ueta ariba i nesia ma uiawete kodiawe.  
\v 6 Ana anama i wasu i ari i siosa ueta utaitana Godinu ibo derawere emabai utebasu.  
\v 7 Bodere yanu ibetana ewa sakairo ibeta ariba yana enanari uteda ibebita.   
\p
\v 8 Nono awonana i mune sanedana i nesia mu sawe. Ina eno, ibo uetaini ubusi uyaretaini meoma wetaini emebai mui amara we ma arama uetaini ma siosa uetaini yanu bebeturoma i nesia mu sawete ekodiawe.  
\v 9 Yanu yanu meoma da we matawe. Yana i siosa nenoini danu siosa uetaini ekoitate reka neno mutaba meoma da we matawe.  
\v 10 Yana reka uwara sita. Godima yanu reka neno ubu uiba kowa mui muiro ue ereda iwata utaitate Dawa ari sinaita.  
\v 11 Yabaina uwara aika maika me. Yabaina Guriki uwaraini Ju uwaraini me. Yabaina ofe tureta uwaraini ofe turawa uwaraini me. Yabaina aika emeini oiro me ibeta uwaraini me. Yabaina sabua ueta uwaraini sabua utawa ueta uwaraini me. Yabaina Yesu Keriso Dawa derawere. Dana ya nesia ma arotorowa uteda yanu nenoro ibebasu.   
\s1 Naiyemutuba neno arama ueta mube  
\p
\v 12 Enoba ya Godinu muneta uwara, Godima ya neno arama uteda Danu gaukara ufoe ya mune aika odiba eno uawe. I gaukara wadia ari eno baruawe. I gaukarana ewa ari uawe, neno arama uetaini emebai nata nata uetaini yanu ifu we ma derawere utawa uetaini we ma kakara uetaini ibo utawa uetaini i nesia wadia ari baruawete kobererau utebeawe.  
\v 13 Ibo da uawete yanu yanu durua ue matawete mui amarama yaba kamena webisuna i sina da nauawete mune imutawa uawe. Yanu Dera Waria Amarama yanu siosa ueta mune imutawa ui enanari yanu yaiyemutuba eno utebeawe.  
\v 14 Ya eno uawete nono i derawere uetana eno uawe. Yanu yanu neno arama ue matawe. Eno ufoitana i neno arama ueta ima ya nesia ma taka ufite ma nabi ufiro merau ibifoita.  
\v 15 Yesu Kerisoma ya yua we munite ofe demurai ari ue odiba Danu wesa uetama yanu neno yawoteibiro merau ibeda kobererau ufote Godibai we ma kobererau ufoe watane.  
\v 16 Yesu Kerisonu we mawetu ueta sina imuawero yanu neno tairo ibifi. I sina imuawete iwata derawere uteda yanu yanu we mawetu ue matawete we kakara ue mataneda samusini Godi we ma kobererau ueta soni aika maika we Godi imueta soni safararo aika maika eno eno soniroma wiawe.  
\v 17 Anene webote ane ufote ane ane ufoitana Yesu Kerisonu ifuro uteda Dawaini Baba Godinu iboro inaibeda we ma kobererau uawe.   
\s1 Awetaini aweraini koiniboroini emanu wiroeta  
\p
\v 18 Nanu mui sina nauawe. Ya awetabo yanu awerasinu sina nauegou uawe. Eno ufoitana Yesu Kerisonu unuro ufoita.   
\p
\v 19 Ya awerasi ya enanari yanu awetaboba neno arama uteda ibo da uawete kobererau torowa uawe.   
\p
\v 20 Ya koiniboro yaini yanu yanua yamamaba gifena da uawete emanu sina nauegou uawe. Eno ufoitana Yesu Kerisonu unuro ufoita.   
\p
\v 21 Ya koiniboronu damamamutu yana yanu arumami adarabuba me sara sina woroworo da wiawe utebe ema nesia neno siosa uotoa.   
\s1 Gaukara uwaraini yawoeta uwaranu sina  
\p
\v 22 Ya gaukara uwara yana yanu yawoeta uwaranu sina nesia nauteda uegou uawe. Emana ya ereibitaitaba ema garo ueta ari eno da uawe. Yanu neno Yesubai ibinuba emanu sina nauegou uawe.  
\v 23 Ya uwara, ane ane ufoitana ina emenu gaukara me, ina Yesu Kerisonu gaukara we imuawete uegou uawe.  
\v 24 Eno ufoitana ya iwata, yanu Dera Waria Amarabai me ibene ibene ibeta muboita, ina yanu moko. Yana Yesu Kerisonu gaukara utaitaba Dawabai yanu moko muboita.  
\v 25 Anama siosawere ufisuna Godima dawaba siosawere moko mafisu, moana uwara da ekodifite ema nesia emanu ueta sinetaba moko enanari mafisu. Ane ane ufitaitana enanari moko mafisu.   
\c 4  
\p
\v 1 Ya yawoeta dera uwarama yanu sabua ueta uwaraba siosawere da uawete kobererau torowa uawe. Imue eawe, yanu dera yawoeta Amarama urero ibeda ya erasu.   
\s1 Guriguri uetaini rorowarau inareta iba sina  
\p
\v 2 Ya uwara nesiaba wemaro nauawe. Guriguri me sara da uawete eregou uteda rorowarau uawete yanu imueta yawoteda Godibai we ma kobererau uawe.  
\v 3-4 Godibai yaba eno guriguri uawe. Godima Danu mui sina weta daba ma ifegari ufiro i Yesu Kerisonu kiwuma imueta sinaba iba nana diburaro ibine, i imueta wawuriro daido wemane eno weda guriguri uawe.   
\p
\v 5 I nautawa uwarabai ibedana kobere ueta ue, kobere sina we, enoma enoma utebeawe. Yanu gaukara kowa sara da uawete yawoegou uawe.  
\v 6 Kobere imonarau ieta i ari kobere sina kekerama kekerama wiawe. I uwara nesiabai anene moko weboe ufoitana eno wiawe.   
\s1 Foroma Tisikasini Onesimasi siaia ui.  
\p
\v 7 Tisikasi dawa yabai fafite nanu ueta sineta webisu. Tisikasi dawana kobere naueta amara. Dawa Yesu Kerisonu gaukara uegou utasu. Dawaini wana Yesu Kerisonu sabua ueta amara sadei.  
\v 8 Dawa ya uwaraba nanu ueta sineta webite yanu neno ma kimu ufiro yaru ufoe iba siaia uero yabai anasu. Yabai fafite enanari webisu.  
\v 9 Ya Korose su uwaranu mui su amara Onesimasi, dawana Godi imuegou ueta kobere amarawere, dawaini uruama anaitaba iro fafitate ewado ane ane utebi ueta yaba webitaita.   
\s1 Foroma Korose su uwaraba ario sina wei  
\p
\v 10 Aritikasini naini uruama diburaro ibinitu. Dana yaba ario sina wasu. Makaini dawa Banabasinu dabue dawaini yaba ario sina wasu. Nana Makanu sina fo yaba siaia uero eta. Dawa yabai fafisuna bana wiawe.  
\v 11 Josua danu mui ifuna Jasitasi dawaini yaba ario sina wasu. Ju uwarama nabai ibawaro i amara rarogonu torowa nabai ibeda uruama gaukara utedibinisi. I amara rarogonuma nanu neno we ma nabi utebaita.   
\p
\v 12 Yanu mui su amara Efafarasi dawa yaba ario sina wasu. Dawana Yesu Kerisonu mui sabua ueta amara. Dana Godibai guriguri utedana eno wasu, nanu su uwara durua uaro Anu imueta imuegou ufitate Anu dabaro anegou ufitate naueta derawere ufita eno wegou utasu.  
\v 13 Na iwata, dana kobere amara. Dana ya Reodisia su uwaraini Iraforosi su uwaraba guriguri utedana gaukara derawere uegou utasu.  
\v 14 Ruka, yanu dogeta amara warai dawaini Dimasini yaba ario sina waisi.   
\p
\v 15 Nanu ario sina i Reodisia su naueta uwaraba wiawete nono i aweta Nemefesini danu suro guruguru utebaita uwaraini emaba nanu ario sina wiawe.  
\v 16 Ewa owawa yawie me sibote i Reodisia su naueta uwarabai siaia uforo anibiro ema dari efitaita. Nono nanu emabai auboko siaia uero ani owawa yana moko muawete yawiawe.  
\v 17 Ekifasiba eno wiawe, Yesu Kerisoma aba mai gaukara nesia uegou ua, eno wiawe.   
\p
\v 18 Na Foroma ewa ario sina nanu agema owawa ue odatane. Na diburaro ibineba na imutawa da uforo.  
\p Godima ya durua uteibie watane. Nanu sina ido me sininu.