\id ACT NT0097.AC Yareba N.T. - Weimer 9-JAN-87 
\h AFOSORO 
\toc1 AFOSORO  UWARANU UETA 
\toc2 AFOSORO 
\mt1 AFOSORO  
\mt2 UWARANU UETA  
\c 1  
\s1 Tiafarasiba ario weta  
\p
\v 1-2 Nanu naiye warai, Tiafarasi, nanu botai owawaro Yesu Danu botai gaukara tutubari ui i odoroma i ue arebi ueta sineta abai wero naui. Eno ue arebe Godima Dawa muniro urero mani i odoro Danu we muneta uwaraba Godinu Imumu Kotofunu bunaro iba sina webi.  
\v 3-4 Yesuma ba uite uietaroma uyarite emaba Danu torowa ma boroyariba Dawa uitawa awonana urero me ibinu. Dana emabai sakara demurai kowa teni, ina nesia kowa foti (40), ibeda Godinu yawotasu orofaba weda wei, Jerusaremuro ibeda aika da aniawe wei. Nono emaba wei, ewaro yawoawe weite wei Godinu we bou ui sina bodere wero nauta enanari ufisu wei.  
\v 5 I ari Jonima ogoma eme babataito utebi. Duburo kowa faiya me, me sibisuna Godima ya nesia Danu Imumu Kotofuma babataito ufisu Yesuma wei.   
\s1 Yesu urero mani  
\p
\v 6 I uwara guruguru utate Yesuba wenauetate weita, Dera Waria Amara, awona i yawoeta orofa Isaraero uwaraba mafasu aba me weita?  
\v 7 Wenauetaro wei, Godima torowa kowaini wai nesia odiba ya da iwata ufoita wei.  
\v 8 Imumu Kotofuma yabai itafisuba buna ufote Nanu fo weta uwara sibote Jerusaremuini Judiaini Samariaini i orofa ata nesia Nanu sina we inareiboita wei.  
\v 9 I sina Weiro nautate erebitaro Yesu ido urero mani. Maniro gosoma garari uiro Yesu erawa uta.  
\v 10-11 Yesuma ido manebiro erebitana mui wadia inakeo bobo amara sadei emabai fare inaibeda weisi, ya Gareri uwara aneba inaibeda etu urero eraita weisi? Yesu i manasuro eraita enanari ewaro eno owefite fafisu weisi.   
\s1 Judasinu gaukara kabesi munetaba mui amara we mune oita  
\p
\v 12 Oriwa maidani sabate kowaro inareta daba ni yafa meratu Jerusaremu su baworo.  
\v 13-14 Iroma Jerusaremu suro are fatate emanu su ubarero amuta. Fitaini Jonini Jeimisini Enuduruini Firifini Tomasini Batoromuini Matiuini Arofiasinu amara Jeimisini Keinani orofa amara Saimonini Jeimisinu amara Judasini moana awetaboini Yesunu danua Merini Danu daburetaini ema ainewaure guriguri utedibebita.   
\p
\v 15-16 I kowaro Fitama uyarite guruguru ubita uwara faiyawere, wani aderedi tueniti (120) emaba wei, masigu, Godinu bukaro wei, enanari ui. Imumu Kotofuma Judasinu ueta nesiaba Deiwidinu bebeturoma wei. I amarama Yesuba do maiba Yesu muta.  
\v 17-19 Dawaini yaini ibeda Yesunu gaukara uteda i Judasi danu do maeta oima nasini oiya uite anite urei. Ureiro desini babariro yajiwa fariro Jerusaremu su uwara nesia iwata utate i nasini Ekedama mamita. I sinanu ubina onono nasini mamita wei.  
\v 20 Fitama nono wei, Godinu buka Samusiro ewa sina ibinu,  
\li1 Danu su me ibifiro mui amara iro da ibifiro mui amarama danu kabesi mubisu.   
\p
\v 21-22 Ewa sina Samusi bukaro ibinu weite wei, Jonima Yesu babataito ui. I kowaroma ane fare utebe urero mani kowa erebi amara mubero fafite Yesunu uyareda ui sina fo weta amara sibi wei.  
\v 23-25 Weiba ifu sadei oita. Mui amaranu ifuna Jousefa, danu mui ifuna Basabasi, danu mui ifuna Jasitasi oitate mui amaranu ifuna Mataiusi oitate guriguri utate weita, O Dera Waria Amara, Ana uwara nesianu neno iwata utasuba abo amara Judasinu ekodi kabesi mubisu weita?  
\v 26 Weitate erawa utate mui ifu mutate etana Mataiusinu ifu muta. Eno utaba Mataiusima mui afosoro tueronu (12) kabesi munite mui afosoro amara sini.   
\c 2  
\s1 Imumu Kotofunu fareta  
\p
\v 1 Fenitikosi kowa ido fari. Fariro i uwara su demurairo yaubita.  
\v 2-3 Yaubitaro ureroma rurua oyabibi ari sau tararite i su inune uiro ina kuido ari bububu ui. Eno uite i uwaranu deiro yaure yaure ui.  
\v 4 Uiro Godinu Imumu Kotofuma tararite i uwara nesianu neno ubarero inune uteda iwata mairo sina aika maika webita.   
\p
\v 5-6 Jerusaremu suro naueta Ju uwara faiyawere yaubita. Mui orofa atataroma fatate yaubebe i rurua nautebitaba iro anitate emanu aika maika sina tanana naue naue utate neno kirifu derawere uta.  
\v 7 Eno utate we imuteda weita, i sina waita uwarana Gareri uwara.  
\v 8 Anene yanu ba sina waitaro yanu sina tanana nautaisi weita?   
\p
\v 9-11 Orofa atata aika maikaroma fata. I orofanu ifu ifuna ewado, Fatiaini Midini Iramaitini Mesofateimiaini Judiaini Kafadosiaini Fonitusini Eisiaini Furigiaini Famufiriaini Ijifini Ribia Sairinabaini Romanini iroma ba Ju uwaraini Jubai guriguri utebita aika uwara, Kuritini Areibia orofa uwaraini Jerusaremu suro fatate nauteda Godinu buna ueta yanu ba sinaroma waitaro nautaisi weita.  
\v 12 Weitate neno kirifu utate we imuteda moanama weita, ewa ane weita?  
\v 13 Weitaro moanama irutate weita, reka waini ogo ita iba eno waita weita.   
\s1 Fitanu sina  
\p
\v 14 I nautebita uwarama eno weitaba Fitaini i amara ireweni (11) ido uyatate Fitama wei, nanu Ju uwaraini Jerusaremu suro yaubinita uwara nesia, nanu sina nauegou uawe wei.  
\v 15-16 Ewa uwara reka waini ogoma arama utawa. Awonana kowa abanarowere iba ewa uwara waini itawa wei.  
\v 17 Iba Godinu bodere we bou ueta amara Joerama eno wei, Godima wasu,  
\li1 dubu kowaro Nanu Imumu Kotofu siaia umaro uwara nesiabai itafisuba yanu arumamini adarabuini sina we bou ufitaita. Ufitaro yanu reka masigu tubetube efitaro yanu baeta uwara tuberoma efitaita.  
\v 18 Efitaro Nanu Imumu Kotofu siaia umaro Nanu waiya ueta aruma amara nesiabai itafisu. Itafisuba sina we bou ufitaita.  
\v 19-20 Ufitaro urero buna ueta umate nasiniro buna ueta umate ononoini inaini giborini umaro kowa ario mero dumu torowa. Sakara onono ari sibiro nono i Dera Waria Amaranu bunawerero ario derawere fareta kowa ido fafisu.  
\v 21 Anama i Dera Waria Amaraba ya ma wiroa webitaitana ma wirofisu,  
\p Godima wasu Joerama eno wei.   
\p
\v 22 Fitama i uwaraba eno weite nono emaba wei, Isaraero uwara nanu sina nauawe wei. Yesu Nasareta Amaraba watane wei. I Amara Godima muniro ya nesia Danu neno kirifu uetaini Danu buna uetaini Danu ueta nesia eta. Godima yaba i ueta Yesubai uiro ereda iwata uta.  
\v 23 Godima imuite Dawa yabai mairo yana sina webe webe utebitaba aika uwarama korosiro oitaro ui.  
\v 24 Uiro Godima ma uyariba Dawa nono da uifite me ibene ibene ibeibiro uietama Dawa da mubisu wei.  
\v 25-26 Deiwidima Yesunu sina eno wei,  
\li1 nana erebatanero Godima nabai me ibene ibebe ibeda nanu banibira age afu ibebasuba neno ubarero iya da uyamauba nanu nenoma yaru uete nanu bebetuma yaru ueta sina we. wete i duburo fafiro mumau daido ba yawotatane  
\v 27 Nanu imumu Eidisiro da ekodifiro anu kakara amaranu ofe yajara da ufisuba iba ewa orofaro ibimauna da iyamau.  
\v 28 Ana i me ibene ibene ibeta muneta daba naba ma boroyarite nabai ibebasuba na yaru umau,  
\p Deiwidima eno weiro Fitama eno wei.   
\p
\v 29 Eno weite wei, nanu naiyemutu, i sina ma boroyamane watane wei. Yanu waria amara Deiwidi uiro uri utaro Danu uri oeta kabesi ewaro ibinu.  
\v 30 Deiwidina we bou ueta amara. Godima ba webou uiro Deiwidi dawa iwata ui, Godima danu mui sirorari amara mubite dera yawoeta amaranu yauretaro odifisu.  
\v 31 Dawa iwata uite Yesunu uyareta kowa imuite iba weite wei,  
\li1 Danu Imumu uieta orofaro ekodawa uiro Danu ofe yajara utawa ui,  
\p Deiwidima eno wei.  
\v 32 Fitama weite wei, Godima Yesu uietaroma ma uyariro ya nesia esi.  
\v 33 Godi Danu banibira buna agema Yesuba ma ario uite wei, Imumu Kotofu aba mamau wei. Enanari mairo muniba eretaini uetaini nesia Dawabairoma arasu wei.  
\v 34-35 Fitama eno weite wei, Deiwidima urero anawarogo ewa sina wei,  
\li1 i Godima Nanu Dera Waria Amaraba wei, Nanu banibira age afu yauaro aba wasai utaita uwaraba buna umate mumate Anu buri eminaro odimau Godima weiro  
\p Deiwidima eno wei.   
\p
\v 36 Fitama eno weite wei, Isaraero uwara, ewa Yesu yana korosiro oita Amara, Godima Dera Waria Amaraini Keriso mamiba imufoe watane wei.  
\v 37 Weiro nautate neno siosa uteda weita, anene ufeisi weita?  
\v 38 Weitaro Fitama wei, yanu siosa uetaini imueta dubena afu sawete Yesu Kerisonu ifuro babataito uawero Yesu Kerisoma yanu neno neno nesia mubite imutawa ufite Godinu Imumu Kotofu mafiro muboita wei.  
\v 39 Weite wei, i we bou ueta yaini yanu koiniboroini aika maika Godinu yua webisu uwaraini ya nesia yanu we bou ueta wei.   
\p
\v 40 Enoma enoma webe wei, ewa siosa sirorari ueta ma wiroawe wei.  
\v 41 Fita danu sina nautebita uwara babataito utaro eme faiya faiyawere tiri tausani (3,000) i afosoro uwara emabai ane taka uta.  
\v 42 Eno utate ainewaure guruguru utebitate afosoro uwaranu sina nautebitate emanu owiga ueta utebitate ieta ma birabiarebitate iteda imutebita. Yesu yaba uiba yaru utaisi imutebitate guriguri utebita.   
\p
\v 43 Godima Danu afosoro uwara buna mairo buna ueta utebitaro uwara nesia iyarebita.  
\v 44-45 Imueta uwara daba demurai nesia ma dinunu utate i naueta uwara nesia arotorowa utate emanu nasini ibaiabai oiya ue matate ibaiabai me uwaraba nata uta.  
\v 46-47 Eno utate imueta demuraiba dera dubu su ubarero amutebitate su aika maika ieta ma birabiarebitate ieta yaru bobo nata utebitate Godiba we ma kobererau utebitate uwara nesiaba wesa utebita. Godima moana uwara ma wiroteda i naueta uwarabai odebi.   
\c 3  
\s1 I buri badami ui Amara ma wirota  
\p
\v 1 Mui yawiro guriguri kowa fariba Fitaini Joni dera dubu suro anisi.  
\v 2 Guriguri ufisie anebisiro mui amara danu danuama dawa muni, iroma buri arama uiba moana uwarama dera dubu su kobere kasimubai woure ane odebitaro yaubeda oi nui webi.  
\v 3-4 Fitaini Jonima dera dubu suro anebisiro i amara sadei ereda nui weiro dawa esite Fitama wei, Jonini wa ea wei.  
\v 5-6 Weiro i amara oi mubie waita weda eregou uiro Fitama wei, na oi me. nanu nabai ane ibinu ima aba mamau wei. Yesu Keriso Nasareta Amaranu ifuro uyate ania wei.  
\v 7 Weite danu agero mamite ma uyariro danu buri ekini burini nabi uiro wiroite ido uyarite ani.  
\v 8 Ane Fitaini Jonini dera dubu su ubarero amuite bibu ureda Godiba we kobererau ui.  
\v 9-10 Eno utebiro i uwara etate i amara kobere kasimubai yaubeda ane aneba nui webasu amara iwata uteda danu nabi uite wiroi iba neno kirifu derawere uta.   
\s1 Fita dera dubu suro sina webi  
\p
\v 11 I amara Fitaini Joninu age mamiro i uwara Soromoninu ofadaro sau durami ue are fata.  
\v 12 Fataro Fitama wei, Isaraero uwara aneba neno kirifu uitate igera utaita wei? I amaranu buri wanu bunaini kobererau uetama ma nabi uitu eno we imutaita wei?  
\v 13 Weite wei, Eibaramuini Aisikini Jeikofunu Godi, yanu babamutunu Godima Danu waiya ueta Amara Yesu we ma derawere usinuba Dawa ma nabi usinu. I kobere kakara Amara Faeratibai oitate wawei weitaro Faeratima Dawabai kerere meba me siaia ufie ui.  
\v 14-15 Eno uiro yanu unu utawa Dawa me siaia ueta. Iba eme ma uietaini sara siosa ueta amara mafie nui weitate nono i me ibeta maeta Amara ma uitaro Godima uietaroma ma uyariro ya nesia esi.  
\v 16 Yesunu ifuma ma nabi usinu weite wei, i ifuro imuituba i amara kobererau yanu iboro ma nabi usinuro i amara ereda iwata utaita weite wei, ba watane. Yesu Kerisoro imuituba i amara kobererau ma nabi usinuro buna usinuro eraita wei.   
\p
\v 17-18 Fitama nono wei, naiyemutu, na iwata utatane. Yaini yanu dera uwaraini bodere yanu utebita inu ubi ya iwata meba iba eno utaba Godima Yesunu oferi woureta Danu we bou ueta uwaraba wei enanari ui wei.  
\v 19 Iba yanu sara siosa uetaini imueta dubena sabote Godibai owefoitana yanu sara siosa uetaini imueta maitufiro me sibiro Godima yabai ibeda yanu imoieta kowa faiyawere yabai siaia ufiro fafisu wei.  
\v 20 Boderewere i Keriso, Godinu munite yaba mateda weite mai Amara Yesu, yabai siaia ufisu.  
\v 21 Awona Dawa urero ibinuba duburo orofa atata ma wiroeta kowa me sibiro ido tarafisu wei. Bodere Godima Danu we bou ueta uwaraba i kowa wei, Fitama wei.  
\v 22 Nono wei, Mosesima eno wei, Godima yabairoma mui we bou ueta Amara na ari mubiro Danu sina anene webiro naufoita.  
\v 23 Anama Danu sina da naufisuna ma uifisu Mosesima wei.  
\v 24 I we bou ueta uwara nesia Samuerobairoma eno webita Fitama wei.  
\v 25-26 Ya nesiana we bou ueta uwaranu adarabu. Yana Godinu we bou ueta naueta uwara. Godima Eibaramuba we bou uiro yanu babamutu nautaro awona ya nesia nautaisi. Godima Eibaramuba wei, anu koiniboroba i orofa atata uwara nesia we ma kobererau umau, Godima eno wei. Godima Danu waiya ueta Amara Yesu, ma uyarite yabai ko siaia ui. Eno uite yanu neno neno uetabairoma ya nesia ma owefite we ma kobererau ufie uteda iba siaia ui wei.   
\c 4  
\s1 Fitaini Joni i kanisoro uwaranu iboro inaibisi  
\p
\v 1 Fitaini Jonima i guruguru ubita uwaraba sina webisiro fuyo ode sina weta uwaraini dera dubu su forisi kafitenini Sadusi tisa uwaraini emabai ido are fata.  
\v 2-3 I afosoro amara sadeima Yesu uietaroma uyari enanari eme nesia uietaroma uyafitaita, we mawetu utebisiba iba dera uwara ibo utate emabai fatate dumu gisigisi utebiro fatate budari utate ana ebaro oita.  
\v 4 Eme faiyawere Yesunu uietaroma uyareta sina nautate moana nautawa utaro moana naue imue uta. Godinu sina naueta uwara nesina fai tausani (5,000) faiya faiyawere.   
\p
\v 5-6 Wai uriro Ju dera uwaraini baeta uwaraini Mosesinu tarawatu tisa uwaraini nesina Jerusaremu suro guruguru uta. Utaro i dera fuyo ode sina weta amara Enasini danu dera uwara Kaiyafasini Jonini Arekisanaini danu su uwaraini emabai Jerusaremu suro are fata.  
\v 7 Are fatate moana uwarama i afosoro uwaraini buri arama bobo ma wiroeta i amaraini guruguru ubita uwarabai woure are abanaro oita. Oitaro kanisoro uwarama weita, yanu iboro inawe weitate nono weita, ewa anene usi?  
\v 8-9 Ananu bunaro o ananu ifuro eno usi weita? Eno weitaro Godinu Imumu Kotofuma Fitanu neno ubarero inune uiba Fitama yare wei, ewa uwara dera uwaraini baeta uwaraini nanu sina nauawe weite wei, i amaranu buri wiroeta wenaueraita wei?  
\v 10 I wiroeta ubi wemaro yaini Ju uwara nesiaini nauawete iwata uawe wei. Yesu Keriso, Nasareta Amaranu bunama i amaranu buri ma wirosinuro yabai kobererau inaibinu wei. I Yesu yana korosiro oita. Oitaro uiro Godima uietaroma ma uyari.  
\v 11 Godinu bukaroma Dawaba wasu,  
\li1 I su ubu ueta uwaranu mu sata tutubu ina botai tutubu ari sini,  
\p Godinu bukaroma eno wasu wei.  
\v 12 Dana torowa ya ma wirofisu. Ewa orofa atataro ibeta mui amarama ya da ma wirofisu. Godi Dana Dawa ifu derawere maiba Danu ifuma ya ma wirofisu Fitama eno wei.   
\p
\v 13-14 Fitaini Joni ema iyarawa usi. Nono bodere i amara sadei ema sikuru utawarogo sina bunawere weisi. Weisiro i kanisoro uwarama i weisi sina imutate neno kirifu uteda we imuta, i amara sadeina Yesunu buri ura imutate i buri aramaroma wiroeta amara Fitaini Jonibai inaibiro etate iba moko sina wiawa utate weita, wawaro aniawe weitaro anita.  
\v 15-16 Anitaro kanisoro uwarama eno weita, i uwaraba anene ufeisi weita? Jerusaremu uwara nesia emanu buna ueta iwata utaita.  
\v 17-18 Iba i amaranu buri ma wirotawa uita da webeisi weita. Weitate nono weita, moana uwarama i ueta nauotoba Yesunu ifuro da webawaro we kakara ufeisi weitate arawe weitaro fataro weita, Yesunu ifuro uetaini wetaini daido da uforo weita.   
\p
\v 19-20 Eno weitaro Fitaini Jonima yare weisi, Godinu sinama kobererau, o yanu sinama kobererau, ananu sina naufutu wiawero naufu weisi. Yanu nauetaini eretaini nesia webutu weisi.  
\v 21 Weisiro i kanisoro uwarama bunawere we kakara uta. I Jerusaremu su uwara nesia i ueta erebitaba Godiba we ma kobererau utebita.  
\v 22 I wiroi amarana reka amara me. Danu oyana foti (40). Kanisoro uwarama buna derawere sina we kakara utate fanisi matawa uteda me siaia utaro anita.   
\s1 I naueta uwara buna mubitae guriguri uta  
\p
\v 23 Fitaini Jonima i kanisoro uwara ekoisite i amara sadeima emanu domayamutubai sau anisite i dera uwaraini baeta uwarama emaba weita sina nesia weisi.  
\v 24 Nesia weisiro nautate i uwara nesina Godiba sina weita, yanu Baba Godi, Ana orofa atataini ureini eneaini ana omaini idina madinaini erawa nautawa ane ane nesia Ana ubu ui.  
\v 25 Ana weiro Imumu Kotofuma Anu gaukara amara Deiwidi yanu sirorari amarabai weiba Deiwidima wei,  
\li1 i aika uwara aneba neno ka utebita? I Isaraero uwara nesia aneba me sara imutebita?  
\v 26 I kini uwara nesina emanu aika ue bou utebitaro i yawoeta uwara nesina Godini Danu we mune odi Amaraini urafitae inata,  
\p Deiwidima eno wei.  
\v 27 I uwarama weitate weita, Erodini Fonitia Faeratini aika uwaraini Isaraero uwaraini, Jerusaremu suro kobere Yesu Keriso, Anu we mune odi Amaraini urafitae fata.  
\v 28 I ueta nesia Ana bodere ufitae wei enanari uta.  
\v 29 Baba, awona i kanisoro uwaranu uraneta sina nauate ya, Anu gaukara ueta uwara, durua uaro Anu sina bunawere webene waisi.  
\v 30 Anu buna age sate uwara ma wiroate Anu neno neno utawa Kotofu Amara Yesunu ifuro buna ueta ua weita.  
\v 31 Godibai i guriguri ue me sitaro emanu yaubita kabesi wawana wawana uiro Godinu Kotofu Imumu emanu neno ubarero itariba Godinu sina bunawere webita.   
\s1 I uwara emanu ibaiabai ma dinunu uta  
\p
\v 32 Godinu sina naueta uwarana imueta daba demurai uwara. I uwara nesia emanu waiyaini ibaiabaini, nanu wiawa utate nesia nata nata uta.  
\v 33 I afosoro uwarama Yesunu uyareta kowa bunawere webitaro Godima emaba derawere ma kobererau utebi.  
\v 34-35 Mui amara osi urawa ui. Nesia kobererau ibebita. I waiyaini su bobo uwara emanu waiyaini suini oiya ue matate i oi afosoro uwaraba mataro afosoro uwarama i oi mutate i oi me uwaraba nata nata uta.   
\p
\v 36 Mui Riwai amara danu ifu Jousefa danu orofa Saifurasi, i afosoro uwarama i amara Banabasi webita, i ifunu ubina we ma nabi ueta amara.  
\v 37 I amarama enanari danu yawotebi waiya ane mairo oiya utaro oi munite afosoro uwaraba mai.   
\c 5  
\s1 Ananaiasini Safaira  
\p
\v 1-2 Mui amara Ananaiasi danu awetanu ifu Safaira, i amara mui nasini oiya uite i oi munite moana oi suro odite nono moana oi i afosoro uwaraba are mai. Aweta aweranu ueta kiwu nesia dawa iwata.  
\v 3 Ananaiasi moana oi wo fariro Fitama wei, Ananaiasi Seitaninu mai imueta aneba munite Godinu Imumu Kotofuba irutasu wei? Anu nasini mairo oiya utaro muni i oi moana ma feare odinute moana are matasu, iba Imumu Kotofu irutasu wei.  
\v 4 Bodere i nasini anu. Nono weiro i nasini oiya utaro i oi nesia ana muni iba i oi nesina anu. Aneba siosa imueta nenoma imutasu? Emeba irutawaro Godibai irutasugo wei.  
\v 5 Eno weiro Ananaiasi nauite dowareda daido ba ui. Ba uiro me siniba iba iro ibita naueta uwara iya derawere uyata.   
\p
\v 6 Moana reka uwara are fatate Ananaiasinu ofe wayatate anitate uri uta.  
\v 7 Duburo i kowa marebiro danu aweta i ueta iwata utawa uite are fari.  
\v 8-9 Fariro Fitama wei, ewa oina anu nasini weiro oiya utaro muni oi? Mui me aba? Wiaro nauma wei, Eno weiro aiwiade, idoni weina Fitama wei, aneba Godinu Imumu Kotofu ue efae wasu wei? Anu aweranu uri ueta uwarama bebetobai faritaba a woufitaita wei.  
\v 10 Eno weiro i aweta ido dowareda ui. Daido ba uiro me sini. I reka uwara fareda etana me siniba woutate danu awerabai ane uri uta.  
\v 11 Godinu sina naueta uwaraini moana uwaraini i ueta sina nautate iya derawere uyata.   
\s1 Bunawere ueta aika maika  
\p
\v 12 I afosoro uwarama uwara faiyawerebai Godinu buna uetaini kamama ueta utebita. Godinu naueta uwara nesina mui dera dubu su ofadaro, danu ifuna Soromoninu ofada, iro guruguru utedibebita.  
\v 13 I aika uwara emaba kobere uwara imutebitate iyarebitaba emabai emaini ane yaurawa.  
\v 14 Moana uwara Godinu sina nauteda imutebitate emeini awetaboini i naueta uwarabai ane taka utebita.  
\v 15 I afosoro uwarama enoma enoma utebita i uwara emanu ofe woureta uwara wiaro woure dababai ane odebita. Fitama fare inareibiro kowa dagioma danu imumu eme emanu deiro utumu saneibiro wirofitae iba emanu ofe woureta uwara woure ane dababai odebita.  
\v 16 Jerusaremu kirisi weto su su uwara emanu ofe woureta uwara woure fataro siosa imumu bobo uwaraini ofe woureta uwara nesina wirota.   
\s1 I afosoro uwaraba siosa uta  
\p
\v 17-18 I dera fuyo ode sina weta amaraini danu domayamutuini i Sadusi tisa uwara emana i afosoro uwaraba neno ka uteda madudu sina weitate i afosoro uwara budari utate ana ebaro oita.  
\v 19 Oitaro dumuro Godinu aneruma ana eba sunu kasimu ma erearite i uwara woure wawaro fare ani.  
\v 20 Anite wei, dera dubu su ubarero inafote Yesunu reka me ibeta sina weboro wei.  
\v 21 Eno weiro nauegou uta. Wai urina dera dubu su ubarero i sina we mawetu utebita.  
\p I kowaro dera fuyo ode sina weta amaraini danu domayamutuini emana i kanisoro uwaraini Isaraero baeta uwaraini dera mitini ufitae yua weita. Yua weitate moana uwara i ana ebaro afosoro uwara woure afitae siaia utaro anita.  
\v 22-23 Anebe ane fatate etana eme me. Eme meba owetate are fatate weita, i ana eba sunu kasimu nesia garari ubinuro yawoeta uwarama yawoegou utaitaro ubarero amuisite erisina eme iro me weita.  
\v 24-25 Eno weitaro nauteda aboro anita ari we imutana mui amarama farite i sina webie uteda wei, i ana ebaro oita uwarana dera dubu su ubarero inaibeda we mawetu utaita wei.  
\v 26-27 Weiba forisi kafitenini forisimanini ido anitate Isaraero uwara ema gebiroma uotoba iyatate i afosoro uwara kekerama woure fatate kanisoro uwaranu iboro inawe weitaro inaibita.  
\v 28-29 Inaibitaro i dera fuyo ode sina weta amarama wei, etei Amaranu ifuro da weboe we kakara usi wei. Yanu ueta eawe. Jerusaremu su uwara nesina yanu sina nauita wei. Eno uteda yana waita, Yesunu uieta sina urumu yabai ibinu eno waita weiro nautate Fitaini afosoro uwarama weita, Godinu imueta mubeisi. Nono emenu imueta da mubeisi weita. Yana Yesu korosiro oitaro ui.  
\v 30-31 Nono yanu Babamutunu Godima Dawa uietaroma ma uyarite Danu enabiraro odite Yesu yanu dera Amararo ma wiroeta Amara odi. Isaraero uwarama emanu neno neno ueta dubena sabitaro emanu neno neno ueta nesia mubite imutawa ufisuba iba Godima eno odi.  
\v 32 I uetana nesia eraisi. Godinu Imumu Kotofu Danu naueta uwarabai mai. Imumu Kotofuini yaini i ueta nesia eraisi weita.   
\p
\v 33 I kanisoro uwara i sina nautate ubusi derawere uyatate i afosoro uwara ufene weita.  
\v 34-35 Weitaro mui kanisoro amara danu ifu Gameiria, dawana Ju uwaranu tarawatu dera tisa amara. I uwara nesina dawa kobere amara imuta. I amarama uyarite i afosoro uwara anibitae weiro anitaro wei, Isaraero uwara, i uwaraba anene ufote eregou uforo wei.  
\v 36 Bodere mui amara danu ifu Teudasi ido yare inarite na dera amara weiro uwara faiyawere fo aderedi (400) dawabai ane taka uta. Eno utaro Teudasi ido ma uitaba danu buribi inareta uwara nesina daba aika maika anita.  
\v 37 Nono duburo Gareri amara danu ifu Judasi, i ifu ifu yawieta kowaro inariro moana uwara dawabai taka uta. Judasima me siniro danu uwara nesina daba aika maika anita.  
\v 38 Iba ewa uwara ekodiawe watane wei. Emanu uetana emenu uetana dowafisu.  
\v 39-40 Emanu uetana Godinu ueta uteibitaitana da mu saboita. Mu saboitana Godini uraneiboita iba watane. Weiba kanisoro uwarama danu sina nautate i afosoro uwara yua weitaro fataro isuma utate Yesunu ifuro da we mawetu uforo we kakara uteda siaia uta.  
\v 41 Eno utaro dera mitini ekoitate anita. I uwarana Yesu Kerisonu uwaraba moana uwarama emaba siosawere utebita. Utebitaro Godima bana wiawa afosoro uwaraba kobererau imuiba afosoro uwarama maru utawa yaru uta.  
\v 42 Kowa woroworo dera dubu su ubarero o uwaranu su ubarero Yesu Kerisonu kotofu sina we inarebita.   
\c 6  
\s1 Durua ueta uwara seweni  
\p
\v 1 Duburo i iwata ueta uwara faiyawere uyarebitate Guriki sina webita Ju uwaraini ba Ju uwaraini yaranebita. Guriki sina webita Ju uwarama weita, yanu wabu awetaboba emanu ietaini oini ba torowa matebaita weitaba iba yaranebita.  
\v 2-3 Eno utaba i tuero (12) afosoro uwarama i Godinu sina naueta uwara nesia yua weitaro fata. Fataro weita, Godinu sina da webete ietaini oini nata nata ufeisina ina kobererau meba iba Godinu Imumu Kotofu bobo beforo bunawere uwara seweni (7) muawero i nata nata ueta gaukararo odife weita.  
\v 4 Yanu aika guriguri utedibeibete Godinu sina wedibeibeisi weita.  
\v 5 Weitaro emanu sina nautate Godinu sina naueta Imumu Kotofu bobo amara Sitiwanini moana uwara Firifini Fokorasini Naikeini Taimonini Famenasini Nikorasini danu orofa Anitiyoka, dawa Ju amara ari sini, i uwaranu sina nautate afosoro uwarabai oita.  
\v 6 Woure oitaro i afosoro uwarama guriguri uteda age kofiri deiro oita.  
\v 7 Godinu sina we inarebitaro Godinu iwata ueta uwara Jerusaremu suro faiyawere uyarebita. Fuyo ode sina weta uwara faiyawere Godinu naueta uwara sinebita.   
\s1 Sitiwani yabae budari uta  
\p
\v 8 Godima Sitiwani ma kobererau uite buna derawere maiba Sitiwanima buna uetaini kamama uetaini faiyawere utebiro erebita.  
\v 9 Moana dubu su uwara, yana aika yawoeta waita uwara, i uwaraini moana Sairina uwaraini moana Arekisana uwaraini moana Sirisia uwaraini moana Eisia uwaraini i orofa aika maika uwara nesina uyareda Sitiwanini yarata.  
\v 10 Eno utaro danu iwata derawerero Godinu Imumuma danu bebeturo webiba ekoita.  
\v 11 Ekoitate anitate moana meoma bobo uwara mutaro i meoma bobo uwarama weita, Sitiwanima Mosesini Godiba sina siosa wasu weita.  
\v 12 Eno weitaba i guruguru ubita uwara nautate Sitiwaniba ubusi uyata. I dera Ju uwarama Sitiwani budari utate i kanisoro uwarabai woure anita.  
\v 13 Woure anitaro i meoma bobo uwarama weita, etei amarama i dera dubu suini Mosesinu tarawatuba sina siosa wasu weita.  
\v 14 Weitate weita, etei amarama wei, Yesu Nasareta Amarama i dera dubu su ma siosa ufite Mosesinu tarawatu nesia mu sabisu weiro nausi weita.  
\v 15 Weitaro i kanisoro uwara nesina Sitiwaninu ibo nawata etana ario derawere ui. Anerunu ibo nawata ari eta.   
\c 7  
\s1 Sitiwaninu sina  
\p
\v 1 I dera fuyo ode sina weta amarama wei, emanu wawei sina meo aba ba wei?  
\v 2 Weiro Sitiwanima sina moko wei, babamutu kaka nabue, nanu sina nauawe wei, yanu sirorari amara Eibaramu danu orofa Mesofateimiaro ibebi, Erani suro anawa. Iro me ibebiro yanu Baba Godi, yanu kobere Godiwere Eibaramubai are fari.  
\v 3 Farite wei, anu su uwaraini orofaini ekodiate mui orofaro ania wei. Iro aniaro i reka orofa aba mawetu uma wei.  
\v 4 Weiro Karidia orofa ekodite ani. Ane Erani suro fari. Farite iro ibebiro danu damama uiro me sini. Me siniro Godima Eibaramu ewa Isaraero orofa, yanu ibinisi orofaro wo fare odi.  
\v 5 Odite nasini matawa uite ewa orofa atata nesia aini anu koiniboroba mamau we bou ui. I we bou ui kowaroma Eibaramu dawa koiniboro me.  
\v 6 Godima mui sina Eibaramuba eno wei, anu koiniboro ewa orofa duburo ekodifitate aika orofaro anibitaita. Iro oya faiyawere, fo aderedi (400) ibifitaro aika emema ema kimuwere yawofitaita wei.  
\v 7 I aika emenu ema yawoetana ba meba Nana ema fanisi mamau. Eno umaro anu uwara owefitate ewa orofaro nono fare ibeda Naba ainewaure guriguri uteibitaita Godima wei.  
\v 8 Godima Danu we bou ueta Eibaramuba mai. I we bou uetanu towanana ofe tureta. Eibaramuma Aisiki yanae muniro kuitanu kowa eita (8) me siniro danu ofe turi. Aisikima Jeikofu yanae muni. Jeikofu yanu sirorari uwara tuero (12) yanae muni.   
\p
\v 9 Jeikofuma ema yanae mune me siniro yanu sirorari uwarama Jousefaba ibo utate moana uwarabai mataro oiya utaro Ijifi orofaro woure anitaro sabua ueta amara sini.  
\v 10 Iro woure anitaro Godima Jousefa yawotebiro ani. Ane Ijifi orofaro fariro Jousefa durua uiba siosa ueta utawa ui. Godima Jousefa buna mairo Feroma, dera Ijifi yawoeta amara, Jousefa kobere amara we imuite mune danu su yawoeta amara we odi.  
\v 11 Mui waina Ijifini Keinani orofaro arumu derawere yauta, yanu babamutu sinai derawere wouta, ieta meba.  
\v 12 Ieta Ijifi orofaro ibinu weitaro Jeikofu nauite danu adarabu ireweni (11) iro siaia uiro anitate oweta.  
\v 13 Nono siaia uiro anita. Ane fataro Jousefa emabai danu torowa mawetu uteda nana Jousefa weiro i dera amara Feroini Jousefanu dataemutu iwata uegou ui.  
\v 14 Jousefama weiro danu damamaini danu su uwara nesia wo fata, eme faiyawere (75) wo fata.  
\v 15 Jeikofu Ijifi orofaro taranite iro ibebe ui. Dawaini yanu babamutu uie me sita.  
\v 16 Uie me sitaro woure ane Sikamu orofanu eraboro uri uta. I uri ue oeta kabesina Eibaramuma Eimo waita abuabairoma danu adarabuba oima oiya ue mateda muni.   
\p
\v 17 Godima Eibaramuba Isaraero orofa mamau we bou ui. Godinu we bou ui kowa fafie uiro yanu sirorari uwarama koiniboro faiyawere yanae munebitaba eme faiyawere Ijifi orofaro ibebita.  
\v 18 Mui kini amara uyarite Jousefa uiro danu ifu dawa iwata meba iba yanu uwaraba ba mewere utebi.  
\v 19 Utebe emanu reka muneta amakanu nesia ma uifie weiba emanu reka muneta amakanu nesia oiro sataro uita.  
\v 20 I kuita adarabu sanebita kowaro Mosesi danu danuama Mosesi muniro Godima erina kobere amara eri. Mosesinu danua damama sakara rarogonu yawotebe daido ekoisi.  
\v 21 Ekoisiro Feronu arumama i amakanu munite omuiro danu amara sini.  
\v 22 Mosesima Ijifi uwaranu sikuru utebe iwata derawere muniba danu wetaini ueta derawere ui wei.   
\p
\v 23 Mosesima Feronu suro ibebe ibebe oya foti (40) munite uyarite danu Isaraero masigu efie ani.  
\v 24 Ane erina mui Ijifi amarama Isaraero amara isuma urebi. Urebiba Mosesima i Ijifi amara ba ureiro ui.  
\v 25 Mosesima eno we imui, nanu uwara iwata utaita, Godima na siaia usinuba nanu uwara Ijifi orofaroma woure animane fare eno iwata utaita we imuirogo danu uwara i imueta ema iwata utawa utaba danu torowa irui.  
\v 26 Wai uriro danu su uwarabai nono ani. Ane erina Isaraero amara sadeima uranebisi. Uranebisiro wei, kodiawa ya su demurai amara sadei aneba uranaisi wei?  
\v 27-28 Weiro mui yaranebi amarama wei, a ana? Anama a dera amara odinu? Arena i Ijifi amara uri, awona na enanari ufae wasu wei?  
\v 29 Weiro Mosesima i sina nauite iya uyarite Ijifi orofa ekodite mui orofaro sau ani. Ane Midiani orofaro fari. Fare ibebe aweta munite danu amara sadei yanae muni wei.   
\p
\v 30-32 Mosesima iro oya foti (40) ibebe mui kowaro Sainai maidani gigirariro ani. Anebe erina anaraturo ina yarebi. Ina ubarero aneru inaibiro ereda we imui, ewa ane? we imuite durami ue farina Godima wei, Nana anu sirorari uwaranu Godi, Eibaramuini Aisikini Jeikofunu Godina Na wei. Weiro Mosesima iya derawere uyareda erawa ui.  
\v 33 Uiro Godima wei, anu sadoro buriroma ma kosugari ua wei, ewa sakaina kakarawereba iba watane wei.  
\v 34 Weite wei, Ijifi uwaranu yawoetana kimuwereba Nanu uwaranu ibetana aramawere. Emanu ibetaini i wetaini naueba ema nesia iroma woure animau wei. Iba a Ijifiro siaia umaro aniate i uwara woure ania wei.   
\p
\v 35 Bodere Isaraero uwarama Mosesi unutawa utate weita, anama a dera amara odi weita? Godima i amara siaia uiro ani. Aniro ina ubarero inaibi aneruma dawa durua uiba emanu wiroeta amarana dawa.  
\v 36 Buna uetana faiyawere utebite danu uwara Ijifiroma Kukui Enea ubarero woure fare ani. Yao orofaro ane fatate iro ane fare ane fare utebe oya foti (40) enoma enoma utebita.  
\v 37 Ewa Mosesima danu uwaraba wei, Godima na we mune odi, i ari mui we bou ueta amara, yabai we mubite odifisu wei.  
\v 38 Ewa Mosesini eme ibawa orofaro ibeda iro sina weta gaukara utebi. Sainai maidaniro maniro aneruma dawaba sina wei. Iro yanu buna tarawatu munite yabai tarari wei.   
\p
\v 39 Yanu abuamutuma danu sina nautawa utate i amara we ma beratate we imuta, yanu Ijifiro ainetana kobererau, ewa orofana aramawere we imuta.  
\v 40 Nono Eroniba weita, yanu godi nesia ubu uaro ina ya woure anibe weita, ewa Mosesi, i woure areta amara, aboro ainu weita?  
\v 41 Weitate borumakaunatu goruma ubu utate borumakauba fuyo mata. Emanu ubu uetaba yaru derawere uta.  
\v 42 Utaba Godima i uwara ekodiro i uwarama muinaini kodaraba guriguri utebita. Emanu uetaba Godima we bou ueta uwaranu bukaro wei,  
\li1 yanu eme ibawa orofa oya foti (40) ibeta kowaro fuyo nabai odebita.  
\v 43 Nabai me, wei, i ba me godiba imutebita wei, Morokinu aineta suratu wourebitate Refaninu muina wourebitate yanu agema ubu ueta ememetuba imutebita wei, eno utebitaba ya nesia Babaronia orofaro siaia umaro aniboita wei,  
\p i we bou ueta uwaranu bukaro Godima eno wei.  
\v 44 Sitiwanima wei, yanu abuamutuma farai dubu su eme ibawa orofaro woure inarebita. Godima Mosesiba weiro i farai dubu su enanari ubu uta.  
\v 45 Duburo emanu areta kowaro eme faiyawere uranebitaro iya wo bagaru ue anita. I kowaro Josuaini i farai dubu su woure anita. Eno utebe Josua ido uiro me siniro i farai dubu su oya faiyawere ibebe ane Deiwidinu kowa ido fari.  
\v 46 Godima Deiwidi erite dawana kobere amara imuiba Deiwidi danu ununa Jeikofunu Godinu dera dubu su ufie wei.  
\v 47 Weirogo dana me, danu amara Soromonima i dera dubu su ubu ui.  
\v 48-49 Godima emenu ubu ueta suro ibawa utasu. I bodere we bou ueta amarama wei,  
\li1 urena Nanu yaureta kabesi, sakaina Nanu buri amueta kabesi. Enoba ane su Naba ufoita? Aboro imoimau wasu?  
\v 50 Nanu agema nesia ubu ue wasu,  
\p i we bou ueta amarama eno wei.   
\p
\v 51 Sitiwanima wei, ya ome bobo me uwara yanu imueta ma kimu ue naue nautawa utaitate Imumu Kotofunu daba garari garari utaita wei. Yanu yamamamutuma eno utebitaba ya enanari utaita wei.  
\v 52 Yanu yamamamutuma i we bou ueta uwara nesia emaini urane yarane utebitate i Yesu fafisu sina webita uwara utaro uita. I fari Amara Godinu Kobere Amara, yana meo wawei weitate utaro ui wei.  
\v 53 I aneruma mai tarawatu, Godinu tarawatu, yana ma siosa utebita wei.   
\s1 Sitiwani gebiroma uta  
\p
\v 54 Sitiwani eno weiro Isaraero dera uwarama ibo derawere utate abate gabari uta.  
\v 55-56 Utaro Imumu Kotofuma Sitiwaninu neno ubarero itariba Sitiwanima urero erite wei, Yesuma Godinu banibira age afuro inaibinuro eratane wei.  
\v 57-58 Eno weiro emanu ome garari utate derawere we mamitate i amara ma youtate su wawaro mu satate gebiroma uta. Eno utate emanu dei wadia reka amara Soroma yawofie mata.  
\v 59-60 Eno utebitana Sitiwanima guriguri uteda wei, Baba Godi, nanu imumu mua weite jegirari uite wei, Baba, emanu ueta ba mewereba emabai da odifaro wei. Eno weite ido ui.   
\c 8  
\s1 Soroma Yesunu naueta uwara ure yanae ui  
\p
\v 1-2 Soro danu unu Sitiwani ureta iba Sitiwani utana Foronu neno ido itari. Moana Isaraero Godi naueta uwara are fatate i weda Sitiwaninu ofe mune uri uta. Danu uieta kowaroma moana uwarama Jerusaremu dubu su naueta uwaraba ba me uta. Eno utaba wo bagaru ue aika maika anita. Judiaini Samaria orofaro anita. I afosoro uwara torowama Jerusaremu suro ibebita.   
\p
\v 3 Soroma i naueta uwaranu su suro anite uwara budari uite emeini awetaboini budari uite ana ebaro mune ane odi.   
\s1 Godinu Sina Samaria suro weita  
\p
\v 4 I wo bagaru ue anita uwarama mui su suro Godinu sina we inarebita.  
\v 5-6 Firifima mui Samaria suro tarani. Tare Yesu Kerisonu sina i uwarabai weiro i uwara nesia danu sina nauegou uta. Danu buna ueta ereda danu sina nauteda yaru uta.  
\v 7-8 Firifima weiro seitaninu moana siosawere imumuma emenu ubareroma amuteda arua weda iya wo bagaru ue anita. Moana buri age bebeu bobo uwaraini buri aramararabo uwara wirotaro iba i Samaria su uwara yaru uta.   
\p
\v 9 Saimoni dana dodoa weta amara Samaria suro ibebi. Ibeda eno webi, nana dera amara webi.  
\v 10-11 Eno webiba i uwara nesianu imuetana ba dera amaraea weita. Dana dodoa weda buna ueta utebiba iba dana dera amara weita.  
\v 12 Weitate etana Firifima Godinu yawoetaini Yesu Kerisonu ifuba sina webi. Webiro nautate Yesu imutate Firifibai emeini awetaboini babataito uta.  
\v 13 Eno utaro Saimonima nauite Firifibai babataito ui. Uiro Firifini Saimoni uruama inarebisi. Inarebe Saimonima Firifinu buna ueta nesia erite neno kirifu ui.   
\p
\v 14 Samaria uwara Godinu sina nautaita weitaro Jerusaremu suro ibita afosoro uwarama nauta. Nautate Fitaini Joni siaia utaro tanisi.  
\v 15 Tane i uwarabai guriguri usite weisi, Baba, Anu Imumu Kotofu siaia uaro emabai itafi weisi.  
\v 16 Godinu Imumu Kotofu i Samaria uwarabai bodere itarawa ui. Yesunu ifuro torowa babataito uta.  
\v 17 Utaba Fitaini Jonima emanu age i uwaranu kofiri deiro oisiro Godinu Imumu Kotofuma emanu neno ubarero itari.   
\p
\v 18-19 Saimonima Imumu Kotofu itariro erite wei, Fitaini Joniba oi mamaro yanu buna maiwero nanu age moana uwaranu kofiri deiro odimaro Godinu Imumu Kotofu itafisu wei.  
\v 20-21 Weina Fitama wei, ane imutasu? Godinu me maeta oiya ufasu wei? Eno imutasuba anu oini arama ufasu wei. Anu imuetana ba meba yabai gaukara da ufasu. Anu nenona Godibai imutawa utasuba yabai gaukara da ufasu wei.  
\v 22 Anu imuetana aramawereba Godiba guriguri uaro anu neno neno ueta maitufi wei.  
\v 23 Anu imuetana aramawereba siosa ueta utebasu wei.  
\v 24 Weiro Saimonima wei, na unutawa i siosa uetaba naba Godibai guriguri uawero na ma wirofi wei.   
\p
\v 25 Fitaini Jonima emanu sinaini Yesunu sina we me sisite owesite moana Samaria su suro anisi. Ane Godinu sina we inarebe ane Jerusaremu suro ane fasi.   
\s1 Firifini mui Itiofia dera amara  
\p
\v 26 Godinu aneruma Firifibai tare wei, taniate etei Jerusaremu suroma Geisaro tarane ibinu daba tania wei. Etei dabana eme inarawaba yao orofa weiro ani.  
\v 27 Ane farina mui dera Itiofia amara, Kuini Kadasinu oi yawoeta amara ido fari. Dana Jerusaremu dera dubu suro anite guriguri uite owerite ido fari.  
\v 28 Danu osi egi ma youreta uiri bobo warafaro yaubeda Godinu buka Isaiya yawie yawie ido fari.  
\v 29 Ido farina Godinu Imumu Kotofuma Firifiba wei, dawabai ania wei.  
\v 30 Weiro durami ue ani. Ane fariro i amara Isaiya buka yawiro nauite wei, anu yawitasuna i ubi nautasu aba me wei?  
\v 31 Weiro i amarama wei, ane naumau mui amarama na we mawetu ufisu deina ido wei. Weite yua wei, nabai amo yaua weiro amo yauri.  
\v 32 I amaranu yawitebi sinana edono,  
\li1 Emema mamoe ma uifitae mune anaitana mamoe arua wiawa utasu o mamoenatunu iji turaitana arua wiawa utasu enanari emema Dawa ma uifitae mune anitana arua wiawa ui.  
\v 33 Dana arua wiawa uiba mui amarama bana weda kodiawe wiawa ui. Dana uite urero manite iro ibinu. Anama ewa uwaranu siosa ueta webisu,  
\p i amarama i sina edono yawi.   
\p
\v 34 Yawie me sinite Itiofia amarama Firifiba wei, i we bou ueta amarade ewa sina anaba wasu? Danu torowaba aba mui amaraba wasu wei?  
\v 35 Weiba Firifima i sinaroma wei enanari Yesunu kotofu sina nesia i amarabai we mawetu utebi.  
\v 36 Eno we mawetu ue anebe ogo ane atasi. Ane atasiro Itiofia amarama Firifiba wei, na babataito umane watane. Na babataito ufasu aba me wei?  
\v 37 (Weiro Firifima wei, anu naueta kobererauna babataito umanu, nono anu naueta siosawerena babataito da umau wei. Weina Yesu Keriso Godinu Amara imutatane wei.)  
\v 38 Weite osi ma youreta emetu duero odiro ogoro itasi. Tare Firifima Itiofia amara babataito ui.  
\v 39 Eno uiro ogoroma duero amutebisiro Godinu Imumu Kotofuma Firifi munite sau woure ani. Aniro Itiofia amara Firifi erawa uite nenoma yaru ui.  
\v 40 Firifima Asotu suro farite iro Godinu sina weite moana su suro we inarebe Sesaria suro ane fari.   
\c 9  
\s1 Soro danu neno Yesubai mai  
\p
\v 1-2 Soro ibo uteda Yesunu naueta uwaraba ba me utebi. Uite botai dera fuyo ode sina weta amarabai anite wei, owawa mairo Damasikosi Ju uwaranu su suro animate i naueta uwara emeini awetaboini nesia budari umate mune Jerusaremu suro famau wei. Eno weiro owawa eno ue mairo woure ani.   
\p
\v 3-4 Damasikosi orofaro anebiro ario derawere ureroma tararite dawa wokuku uiro Soro ido sakairo urei. Ureiro ureroma sina tararite wei, Soro, aneba Naba ba me utasu wei?  
\v 5 Weina a anaiyade wei? Weiro wei, Nana Yesu. Ainewaure Naba ba me utasu wei.  
\v 6 Awona uyate Damasikosi suro aniaro anu ufasu gaukara aba mui amarama webiro naua wei.  
\v 7 Weiro dawaini inarebita danu domayamutu i sina nautatego ba eme erawa utate wate wiawa uta.  
\v 8 Soro uyarite diti foraite efie erina erawa uiba agero mutate Damasikosi suro mune ane fata.  
\v 9 Ido mune ane fataro kowa rarogonu ditima ba erawa uite ogoini ietaini itawa uite me ibi.   
\p
\v 10 Godinu mui naueta amara Ananaiasi dawa Damasikosi suro ibebi. Iro i amara Ananaiasi ainibebe tubetube erina Yesuma wei, Ananaiasi, weina na ewado wei.  
\v 11 Weiro Yesuma wei, uyate ane daba rorowarau ane Judasinu su ubarero amua. I suro amuate i Tarasu su amara Soro aboro wia wei. Soro iro ibeda guriguri utasuba dawa atafasu wei.  
\v 12 Weite wei, Soro dawa iwata anu iro ane fareta. Dana tubetuberoma a iro ane fafasu erinuba iba dawa iwata, ana iro ane fafate anu age danu deiro odifaro diti wirofisu wei.  
\v 13 Weiro Ananaiasima wei, Dera Waria Amara Soro na iwata, etei amara anu Jerusaremu suro ibeta uwaraba ba mewere utebasu.  
\v 14 I dera fuyo ode sina weta uwarama dawaba we enanari utate owawa mataro muni. Munite iba dawa ewa suro fari. Fari ina Anu ifuro waita Anu uwara woure anibie iba fari wei.  
\v 15 Weiro Yesuma wei, aniaro etei amara awona Nanu amara mune odineba anibite aika uwara faiyawere emanu dera yawoeta uwaraini Isaraero uwaraba Nanu sina we inareibisu wei.  
\v 16 Dana Nanu amaraba emema dawaba siosawere ufitaita. Ina dawaba we mawetu umaro naufisu eno weiro Ananaiasi nauite ido ani.  
\v 17 Ane suro farite amuite age deiro odeda wei, kaka Soro, i Dera Yesu, i abai dabaro fari Amarama na abai siaia usinuro fane. Anu diti basugari me sibisuba Godinu Imumu Kotofu anu neno ubarero itafie iba fanea wei.  
\v 18 Weiro danu ditiro ibi emetu itariro ido eri.  
\v 19 Eriro dawa babataito utaro ieta ite buna ui.   
\s1 Soroma Damasikosi suro Godinu sina wei.  
\p
\v 20 Soroma Damasikosi su naueta uwarabai ibeda Godinu sina Ju uwaranu dubu su suro anite wei, Yesu, Dana Godinu Amara wei.  
\v 21 Weiro i sina naueta uwara neno kirifu utate weita, ewa amarana i Jerusaremu su Godinu naueta uwaraba ba me utebi amara danu ununa ewa naueta uwara budari ufite woure fuyo ode sina weta uwarabai odifie farinu weita.  
\v 22 Soro danu iwata derawere uiba eno wei, Yesu Dana Keriso, Godima ya ma wirofie mune yabai odi Amara wei. Eno weiba i Ju uwarama sina mui wiawa uta.   
\p
\v 23 Kowa faiyawere me siniro moana Ju uwarama Soro danu ma uieta daba doberebita.  
\v 24 Soro emanu imueta dawa iwata. I Ju uwarama i suini dera dowa kasimuini dabaini Soro ma uifitae kowaini dumuini eregou uteda yawoegou uta.  
\v 25 Eno utaro i naueta uwarama dumuro Soro dera bosioro oitate nama i dera bosioro doitate dowa deiroma ma bebere kiwuma oitaro itarite ani.   
\s1 Soro Jerusaremu suro ani  
\p
\v 26 Iroma Jerusaremu suro farite i naueta uwarabai ibifie ani. Aniro dawaba weita dawa naueta amara meba iba iya uyaraisi weita.  
\v 27 Mui amara, danu ifu Banabasi, i amarama Soro munite i naueta uwarabai woure ani. Woure anite i afosoro uwarabai wei, ewa amarama Yesu Damasikosi dabaro eriro Yesuma dawaba weiro Soroma i Damasikosi su uwarabai sina bunawere weiya wei.  
\v 28 Eno weiro Soroma i uwarabai ibeda Jerusaremu su suro ane fare ane fare uteda Godinu sina webi.  
\v 29 Dawaini Guriki sina waita Ju uwaraini sina sina we matata. Soro danu iwata derawereba i Guriki uwarama danu ma uieta daba doberebita.  
\v 30 I naueta uwarama emanu imueta iwata utate Soro mutate Sesaria suro woure ane oita. Iro oitate iroma Tarasu suro siaia utaro ani.   
\p
\v 31 I kowaro Judiaini Garerini Samaria orofaro ibeta naueta uwarama merau ibeda wesarau ue ibebita. I kowaro eno ibebitaro emanu naueta derawere ui. I naueta uwarama Godiba we ma kobererau utebitaro Godinu Imumu Kotofuma ema durua utebiba eme faiyawere Godinu sina nautebitaba i naueta uwarabai ane taka utebita.   
\s1 Fita Ridaini Jafa suro ani  
\p
\v 32 Mui kowaro Fitama aboro aboro ani. Anebe Godinu Rida suro ibeta uwarabai owiga ufie tarani.  
\v 33 Tare farite mui buri badami uiro inarawa me ibebi amara eri. I amarana oya eita (8) inarawa wiaro ainibebi.  
\v 34 Fitama i amara erite wei, Enasi Yesu Kerisoma a ma wirotasuba uyate anu wia mua wei. Weina i amara ido uyari.  
\v 35 I Rida suini Seroni fafaro ibebita uwarama i wiroi amara etate Godibai imue naue uta.  
\v 36 I kowaro mui naueta wabu aweta Tabita (danu Guriki ifuna Dokasi) Jafa suro ibeda kobere ueta sineta faiyawere utebi. Kobererau uteda, ieta nata nata utebi.  
\v 37 Enoma enoma utebe ofe wourite ainibebe ui. Uiro emanu baeta uteda danu ofe mutate ogoma urotate sunu dei koruro oita. Moana naueta uwarama Fita Rida suro ibinu weitaro nautate amara sadei siaia utaro anisi.  
\v 38 Iro aneta dabana yafa me, fuyaratu. Jafaroma Ridaro ane Fitabai fasite weisi, yanu suro sau ara weisi.  
\v 39 Eno weitaro Fitaini ido owetate ata. Are fataro moana uwaraini Fita i dei koruro manita. Mane fatana i wabu awetabo iro inaibeda i weda Tabitanu wadia fifinu utebi ibaiabai Fitaba mawetu utaro eri.  
\v 40 Fitama i uwara nesia wawaro odiro tanita. Tanitaro Fitama owerite jegirari uite guriguri uteda wei, Tabita uya wei. Weina diti ido foraite Fita erite ido yare yauri.  
\v 41 Yare yauriro Fitama danu agero munite ma uyarite i naueta uwaraini moana wabu awetaboini yua weite emaba mairo i wabu aweta wiroite me inaibiro eta.  
\v 42 I Jafa su uwara i ueta nautate Yesubai naue imue uta.  
\v 43 Fita dawa Saimoni, egi ofe faureta amaranu suro ibebi. I Jafa suro kowa faiyawere ibebi.   
\c 10  
\s1 Fitaini Koniriasi  
\p
\v 1 Koniriasima Sesaria suro ibebi. Ami kafitenina dawa. Danu meremere uwarana Itaria waita uwara.  
\v 2 Koniriasi dana kobere amara. Dawaini danu sisia uwara nesina Godiba kakara uteda iyareda Godi guriguri utebita. Ainewaure i aramawere ibeta Ju gugua gubari me uwaraba ietaini ibaiabai matebite Godibai guriguri utebi.   
\p
\v 3 Mui kowaro, yawi sinono uiro yaubebe tubetube eri. Erina aneruma dawabai farite wei, Koniriasi.  
\v 4 Eno weiro dawa iya derawere uyareda wei, aneba farinu wei? Weiro aneruma wei, Godima anu guriguri uetaini kobere ueta sineta nesia erinute Dawa a kobere amara erinuba na siaia usinuro fanea wei.  
\v 5 Awona moana uwara siaia uaro Jafa suro Saimonibai, danu mui ifu Fita, iro anibitate dawa woure abai afita wei.  
\v 6 Dana i suro mui su ubi amara Saimoni, dawa egi ofe faureta amara danu suro me fare ibinu, i suna enea gigiraribai ibinu weite aneru ido ani.  
\v 7-8 Aneru ido aniro Koniriasima weiro danu gaukara amara sadeini danu meremere amara danu dawa yawotebi amara dawa Godinu mui naueta amaraini dawabai fataro i aneruma dawabai wei i sina emaba weite Jafa suro siaia uiro anita.   
\p
\v 9 Anebe abanaro ane aita. Wau uriro uyatate anita. Anebitana kowa otoro Fitama su deiro guriguri ufie amui.  
\v 10 Amuite osi uriba ieta ifie wei. Weiro ieta outebitana me yaubebe tubetuberoma eri.  
\v 11 Erina ure eba ui. Uiro erina wadia derawere koru ubu uite odiro tarari. Tarariro Fitama egi ibo aika maika nesia koruro eri.  
\v 12-13 Boro, warai, kuike, kariri gasira, towi, nesia koruro ibitaro eri. Eno eriro mui wate iroma wei, Fita uyate i egiana uate ia wei.  
\v 14 Eno weiro Fitama wei, Baba, ina Ju uwaranu itawa ibaiabaiba na da imau wei.  
\v 15 Weiro Godima wei, ibaiabai ma kobererau unede aneba siosawere wasu weite ma owere muniro mani.  
\v 16 I egi bobo wadia nono tararite mani, nono tararite mani. Enoma enoma ui.   
\p
\v 17-18 Eno uiro Fita iwawa uteda yaubi. Yaubina i amara rarogonu ido fatate weita, Saimoni Fita ewado yaubinu aba me weita?  
\v 19-20 Weitaro Fitama danu tubetube eri i imutebina Godinu Imumu Kotofuma wei, Nana siaia ue amara rarogonu abai ido farita, emabai taniate emaini ania wei.  
\v 21 Weiro Fita ido uyarite taranite wei, yanu doberaita amarana na ewado, aneba farita wei?  
\v 22-23 Weiro weita, yanu kafiteni amara Koniriasima a woufete anibero anu sina naufie wenuba abai farisia weita. Aneruma Koniriasibai a are woureta sina weiba iba farisia weita. Yanu kafiteni amarana kobere amara dawa Godibai guriguri utebasu.  
\p I Ju uwarama dawa kobere amara eno we imutaita weitaro nauite Fitama i amara rarogonu bana weiro dawaini aita. Wau uriro anita. I amara rarogonuini Fitaini moana Jafa naueta uwaraini nesia anita.  
\v 24 Anebe abanaro ane aita. Wau uriro anita. Anebitana Koniriasima ema yawoteda danu su uwara weiro fata. Fare yawotebitaro Fitaini danu uwara Sesaria suro fata.  
\v 25 Fataro Koniriasima uyarite Fitanu buri gigirariro arubi ui.  
\v 26 Arubi uina Fitama agero munite ma uyareda wei, na Godi me, uya wei.  
\v 27 Weite suro woure amuite erina eme faiyawere yaubita.  
\v 28 Yaubitaro wei, Ju uwaraini aika uwaranu uruama owiga uetana kakara derawereba iba eno utawa utaisi. Nono Godima naba wei, awonana kakara me. Eme nesia arotorowa weiro nauete iba ewaro yabai fanea wei.  
\v 29 Anu uwarama fare weitaro ido uyarete ane wei. Aneba na ewaro woure arita wei?  
\v 30-32 Eno weiro Koniriasima wei, i auboko kowaro yawi sinebiro guriguri uteda yaubitararo mui aneruma fare wei, Koniriasi, Godima anu guriguri uetaini kobere ueta nesia ere naue utasu. Enoba anu suroma moana uwara siaia uaro Jafa suro anibitate i amara Fita dawa i mui egi ofe faureta amara Saimoninu su enea gigiraribai iro ibinu webitaro abai afi weiya wei.  
\v 33 Aneruma eno weiba eno wero awona ewado farinu wei. Awona Godima erasuro yaubinisi uwara Godima abai wasu sina wiaro naufe wei.   
\s1 Fitanu sina  
\p
\v 34 Fitama wei, Godima eme nesia arotorowa imutasuba awona ina na iwata utatane. Godima Ju uwaraini aika uwara imutawa utasu.  
\v 35 Anama Godi iyareda Danu ueta utasuna Godima i amara kobere amara weda imutasu.  
\v 36 Godi Danu unu Yesu Keriso Danu kobere sina Isaraero uwarabai webiro naufitate neno kobererau ufitae iba Yesu Keriso siaia uiro ewaro fari. Yesu Kerisona eme nesianu Dera Waria Amara.  
\v 37 Ya iwata utaita i sina, Judia orofa su suro we inarebi. Joni babataito amara danu sina me siniro Yesu Gareri suroma Judia su suro we inarebi.  
\v 38 Ya iwata, Godima Nasareta Amara Yesubai Danu Imumu Kotofu mairo kobere uetaini wetaini uite seitaninu imumu siosa we berairo anita. Godima Dawabai ibiba iba eno ui.  
\v 39 Danu Judia su suro uetaini, Danu Jerusaremu suro ueta nesia yana esi. Eno esiro Ju uwarama Yesu korosiro ure oitaro ui.  
\v 40 Kowa rarogonu me siniro Godima Dawa uietaroma ma uyari. Ma uyariro Yesuma uietaroma uyarite moana uwarabai fari.  
\v 41 Uwara nesiabai farawa, Godinu muneta uwara torowabai fariro esi. Esite Dawaini ieta isi wei.  
\v 42-43 Yesuma yaba wei, aniawete uwara nesiaba eno wiawe, i uieta uwaraini me ibeta uwaraini nesina Nabai koto ufitaita wiawe wei. Nana Godinu we mune oeta Amaraba iba ema koto umau wiawe wei. I we bou ueta uwara nesina Yesuba eno weita, Yesu Kerisoma eme nesiaba uiba ana anama Yesu imuegou ufitaro Godima emanu ba me ueta mubite imutawa ufisu weita, Fitama wei.   
\s1 I Ju me aika uwara Imumu Kotofu muta  
\p
\v 44 Fitama eno webina Godinu Imumu kotofuma i sina naueta uwaranu neno ubarero itari.  
\v 45 Itariro Fitaini Ju naueta uwaraini ereda neno kirifu uta. Godinu Imumu Kotofuma i Ju me aika uwaranu neno ubarero itariba iba neno kirifu uta.  
\v 46 Godinu Imumu Kotofuma emabai itariba sina aika maika weda Godi we ma kobererau utebita.  
\v 47 Eno utaro Fitama wei, Godinu Imumu Kotofuma yabai itari, enanari emabai itarinuba ema babataito ufene watane wei.  
\v 48 Weite weiro i uwara mutate Yesunu ifuro babataito uta. Eno utaro Fitaini danu uwara moana kowa emabai ibebita.   
\c 11  
\s1 Fita danu sina Jerusaremu suro mai  
\p
\v 1 I aika uwarama Godi nautaita weitaro i afosoro uwaraini Judia orofaro naueta uwara i sina nauta.  
\v 2-3 Fitama Jerusaremu suro are fari. Fariro moana Ju naueta uwarama dawaba dua sina weita, ofe turawa uwaraini aneba owiga utasu weita?  
\v 4-5 Weitaro Fitama i auboko ueta nesia emaba wei, Jafa suro guriguri uete yaubebe tubetube erena wadia derawere ureroma nabai tarari.  
\v 6-7 Tarariro boro, warai, kuike, kariri, gasira, towi egi nesia koruro ibiro erero ureroma sina wei, Fita, uyate uate ia wei.  
\v 8-9 Weiro, Baba, ina Ju uwaranu itawa ibaiabaiba da imau wero ureroma sina nono wei, Na Godima i ibaiabai ma kobererau unea i ibaiabai siosawere da wia weiya wei.  
\v 10 Weiro i ueta nesia rarogonu tarare mane ui.  
\v 11 Eno utebina amara rarogonu Sesaria suroma Jafa suro na woufitae ido fata.  
\v 12 Fataro Godinu Imumu Kotofuma naba wei, i aika uwaraba da imuate aini i uwaraini ania wei. Eno weiro ewa moana uwara sikisi (6) naini anisi. Iro anisite ane i amaranu suro amusi.  
\v 13 Amusiro i amarama wei, aneruma nabai farite wei, moana uwara wiaro anibitate Jafa suro Saimoni, danu mui ifu Fita, woufitate afita.  
\v 14 Afitaro sina webiro naufote wirofoita wei.  
\v 15 I amara eno weiba anisiro sina wemane utebitarana Imumu Kotofuma emabai tarari. Auboko yabai tarari enanari nono emabai tarari.  
\v 16 Enoba Yesunu sina imue. Yesuma wei, Jonima ogoma babataito ui. Duburo ya Imumu Kotofuma babataito ufisu. Eno wei sina imueya wei.  
\v 17 Yaini naini Yesu imusiro Godinu me maeta, Danu Imumu Kotofu yaba mai. Enanari i aika uwarama Yesu imutaro emaba Danu me maeta mai. Eno uiba na derawere meba Godinu me maeta daba garari da umau wei.  
\v 18 Weiro nautate Godi we ma kobererau uteda weita, aika uwarama Godibai fataro Godima ema ma wiroite me ibene ibene ibeta mai weita. Enoba aika uwara emanu unu Godibai fafitaitana fafitaita weita.   
\s1 I Anitiyoka suro naueta uwara  
\p
\v 19 Sitiwaninu ui kowaroma moana uwarama uyatate i naueta uwaraba ba mewere utebita. Utebitaba i naueta uwarama orofa aika maikaro wo bagaru ue anita. Moana Fonisia orofaro anita. Moana Saifurasi orofaro anita. Moana Anitiyoka suro anita. Anitate Ju uwara torowaba Godinu kobere sinaini Yesunu sina weita.  
\v 20 Moana Saifurasini Sairina waita naueta uwarama Anitiyoka suro anita.  
\v 21 Anitaro Yesu Danu buna mairo Godinu kobere sina weitaro eme faiyawere nautate Yesunu buribi anita.   
\p
\v 22 I ikiki Jerusaremu suro ibeta naueta uwarama nautate Banabasi siaia utaro ani.  
\v 23 Anitiyoka suro ane farite Godinu ma kobererau utebi erite yaru derawere uteda wei, i aika naueta uwaraba wei, yanu imueta nesia Yesubai mawete ainewaure Yesunu buribi inarebeawe wei.  
\v 24 Banabasina kobere amara. Godinu Imumu Kotofuma dawabai ibegou uiba, danu nauetana derawere. Dana weiro eme faiyawere nautate Yesunu buribi anita.   
\p
\v 25 Banabasima Anitiyoka su ekodite Tarasu suro Soro dobefie ani.  
\v 26 Ane farite Soro munite owerite Anitiyoka suro woure fari. Anitiyoka suro i naueta uwarabai oya demurairo ibeda uwara faiyawere Godinu sina we mawetu utebisi. Anitiyoka suro ko naueta uwarana Kurisitini uwara weita.   
\p
\v 27 I kowaro moana Godinu we bou ueta uwarama Jerusaremu suroma Anitiyoka suro tarata.  
\v 28 Mui Godinu we bou ueta amara, danu ifuna Agabasi, Godinu Imumu Kotofu dawabai ibegou uiba dana yare wei, ewa orofa atata uwara nesia osi derawere woufitaita wei. (Danu wei sina enanari i dera yawoeta amara, Kurodiasinu kowaro ido fari).  
\v 29 Agabasima eno weiba i naueta uwara nesia weita, ya nesina oi mafero yanu Judia ibeta naueta uwaraba mafitaita weita.  
\v 30 Weitate oi mataro Banabasini Soroma musite i Judia naueta uwaranu yawoeta uwaraba ane masi.   
\c 12  
\s1 Awe faiyawere uyarebita  
\p
\v 1-3 I kowaro i dera yawoeta amara Erodima moana naueta uwaraba ba mewere ui. Joninu datae Jeimisi Erodima weiro warima yanataro ui. Eno uiro Ju uwarama i ueta etate yaru uta. Yaru utaba Erodima Fita ana eba suro mune odifie dobere wei. (I kowaro Ju uwara emanu Godima ema Ijifiroma woure aneta ogaro itebita.) I kowaro Erodima Fita dobere wei.  
\v 4 Weiro anitate Fita budari utate mune ana eba suro oita. Oitaro Erodima weiro meremere uwara faiyawere nesia sikisitini (16) dawa yawota. Erodima eno we imui, Godima Isaraero uwara Ijifiroma woure aneta ogaro me sibiro Fita i Ju uwaranu iboro woure odimate ma uimau we imui. Eno we imuiro Fita diburaro oitaro ibi.  
\v 5 Iro ibiro iba i naueta uwarama Fitaba Godibai guriguri utebita.   
\s1 Fita diburaroma wawaro amui  
\p
\v 6 Erodima Fita waidumu wemaro ane woufitaita we imui. I dumuro Fita senima buri age uwane taritaro Fitama meremere amara sadeinu abanaro nauta ainibi. Mui amara sadeima kasimubai inaibeda yawotebisi.  
\v 7 Ainibiro Godinu aneruma dibura su ubarero farina ario derawere ui. Aneruma Fitanu manamaro fare urite agero munite ma uyareda uya wei. Weina seni uregari uite itari.  
\v 8 Itariro aneruma wei, anu wadia yuate sadoro odia. Weiro eno uiro aneruma wei, anu dei wadia baruate nanu buribi ara wei.  
\v 9 Eno weite aniro Fita danu buribi ani. Fita anerunu utebi dawa iwata me, ina ba o meo, eno we imui. Danu imuetana tube eratanea we imui.  
\v 10 Yawoeta amara sadei inaibisiro mui amara serigari usite nono mui amara serigari usi. Eno usite bebetobai fasina i aiyoni kasimu danu torowa ifegari ui. Uiro wawaro anisi. Wawaro anisite daba demurairo anedana aneru ido me ari ui.   
\p
\v 11 Aneruma dawa ekodiro Fita i ane ane nesina ba eno iwata uite wei, Godi Danu aneru siaia usinuro tararinute Erodini Ju uwaranu siosa imuetaroma na mune wawaro odinu wei.  
\v 12-13 Eno weite Merinu suro ani. Meri dana Joni Makanu danua. I suro uwara faiyawere guruguru ubeda guriguri utebitana Fita ido farite kasimuro goigoi uteda yaubinita weiro mui aruma danu ifuna Roda dana i kasimu ma ifegari ufie fari.  
\v 14 Fare Fitanu wate tanana nauite yaru uteda i kasimu ma ifegari utawa owerite i guruguru ubita uwarabai durami ue ani. Ane wei, Fita su wawaro inaibinu wei.  
\v 15-16 Weina ana gogore bobo meo wasu weita. Weitaro Rodama nono bebetu kimu uite wei, meo me, ba watane wei. Weiro weita, ina danu aneru weita. Weitana Fita dawa inaibeda goigoi uteda inaibi. Eno utebiba kasimu ane ma ifegari utana Fita dawa ido inaibiro etate iba i uwara emanu neno kirifu derawere uteda sina sina weita.  
\v 17 Weitaba Fitama age ramamiro weroroka ekoita. Ekoitaro Fitama danu ana eba suro ibiro aneruma dawa iroma wawaro woure amo odi sina wei. Weite emaba wei, Jeimisini i naueta uwaraba ewa sina wiawe weite ema ekodite mui orofaro ani.   
\p
\v 18 Wai uriro meremere uwarama Fita erawa utaba dawa dobere weda weroroka derawere weita.  
\v 19 Erodima weiro danu uwara Fita doberebe doberebe atanawa utaro danu dibura yawoteda inaibita meremere uwara koto ui. Koto uite wei, i meremere uwara nesia uawe wei. Weite Judia orofa ekodite Sesaria suro ane ibi.   
\s1 Erodinu uieta  
\p
\v 20 Erodima Tairaini Saidoni uwaraba ibo derawere ui. Uiba i Tairaini Saidoni uwarama we imuta, Erodinu orofaro ieta munebaisi we imuta. Iba Erodinu su yawoeta amara Barasusibai fatate weita, yanu ununa Erodini sina ma rorowarau ufene farisia weita. Weitaro Barasusima Erodibai i sina ane wei. Erodima kowa odiro dawabai are fata.  
\v 21 I kowaro Erodima danu kininu werei werei odite danu dera yaureta deiro yaubeda sina derawere wei.  
\v 22 Weiro nautate derawere weita, danu wate tanana emenu wate tanana me, mui godinu wate tanana ari wasu weita.  
\v 23 Weitaro emaba kodiawe wiawa uite emanu sina naufie uiba Godinu aneruma fanisi mairo kiki tabairaratuma danu yajiwa ie me sitaro Erodi ui.   
\p
\v 24 Godinu sina derawere uiba, iba eme faiyawere naue imue utebita.   
\p
\v 25 Banabasini Soro emanu gaukara ue me sisite Jerusaremu suroma owesite aneda Joni Maka emaini woure anisi.   
\c 13  
\s1 Banabasini Soro mune siaia uta  
\p
\v 1 Anitiyoka suro naueta uwara ibebita. Emabai Godinu we bou ueta uwaraini tisa uwara ibebita. Emanu ifuna Banabasini Simioni, danu mui ifu Naiga, dawaini Rusiasi, dawa Sairina su amara, dawaini Manaeni, Erodinu dabue, dawaini Soroini, i uwarama emabai ibebita.  
\v 2 Mui kowaro iro ibeda guriguri uteda ieta itawa utate ka utaro Godinu Imumu Kotofuma emaba wei, Banabasini Soro mune odiawero Nanu gaukara ufisisi wei.  
\v 3 Weiro ieta itawa, guriguri uteda age Soroini Banabasinu kofiri deiro oitate guriguri utate ema siaia utaro anisi.   
\s1 Saifurasi suro anisi  
\p
\v 4 Emana anisiro Godinu Imumu Kotofuma emanu daba mawetu uiro Serusia suro anisi. Ane fasite boutiro amusite Saifurasi mutumuturo anisi.  
\v 5 Ane Saramisa suro fasi. Fasite Ju uwaranu dubu suro Joni Makaini amuta. Amo Godinu sina i uwaraba weita.   
\p
\v 6-7 Duburo Saramisa su ekoitate Saifurasi su su nesiaro Godinu sina we inarebita. We inarebe Feifasu suro fata. I suro mui Ju wada barau amara ibi. Dana irueta meo we bou ueta amara. I amaranu ifuna Barayesu, dawa i suro ibiro Soroini danu uwarama fatate i amara eta. I amarana Saifurasi mutumutu yawoeta amara, Suragasi Forusinu domaya. I yawoeta amara Soroini Banabasinu Godinu sina naufie emaba weiro danu suro amusi.  
\v 8 Godinu sina webisie amusiro nono i wada barau amara, danu Guriki ifuna Iramasi, emanu sina weta daba garari ufie yawoeta amaraba wei, emanu sina da naua wei. Dawa unutawa i dera yawoeta amara Godi nauetaba, iba eno wei.  
\v 9-10 Eno weiro Imumu Kotofuma Sorobai ibegou uiba Soro danu mui ifu Foro, dana i wada barau amara erebe ero ite wei, ana seitaninu amara. Ana kobere uetaba wasai amara. Anu imuetana ba me, irueta imuetana torowa. Godinu kotofu sina weta daba aneba ma bebeu ue garari ufae utasu? Eno ueta kodia wei.  
\v 11 Nanu sina naua wei, Godima a awona fanisi matasuba moana kowaro diti basugari ufate kowa da efasu Foroma wei. Eno weiro danu ereta daba garari uiro mui amara danu agero mubite woure inareibie dobere ani.  
\v 12 I dera yawoeta amarama nesia erite Godinu buna wetaini uetaba kirifu uteda Godi naue imue ui.   
\s1 Fisidia Orofa Anitiyoka suro ibebita  
\p
\v 13 Foroini danu uwaraini Feifasu su ekoitate boutiro amutate Famufiria orofaro anita. Ane Fega suro fata. Fataro Joni Makama i uwara ekodite owerite Jerusaremu suro ani.  
\v 14 Banabasini Foroma Anitiyoka, Fisidia orofa, suro anisi. Ane fasite sabate kowaro Ju uwaranu dubu suro amusi.  
\v 15 Amusiro mui amarama Mosesinu tarawatu bukaini we bou ueta bukaroma yawi. Yawie me siniro i dubu su yawoeta uwarama Foroini danu uwaraba weita, naiyemutu, yanu unu durua ueta sina weboitana naufeisi weita.  
\v 16 Weitaro Foroma uyareda age ramamite wei, Isaraero uwaraini Godiba iyaraita uwaraini nanu sina nauawe wei.  
\v 17 Isaraero uwaranu Godi yanu sirorari uwara ema munite Ijifi orofaro ema ma derawere uiro ibita. Ibitaro nono iroma danu buna agema woure ani.  
\v 18-19 Woure ane eme ibawa orofaro odite ema oya foti (40) yawotebi. Duburo Godima i Isaraero uwara durua utebiro mui Keinani orofa su su uwaraini uranebita. Enoma enoma utebe orofa su su uwara seweni (7) ure me sitaro Keinani orofa yanu sirorari uwaraba mai. Mairo oya faiyawere fo aderedi fifiti (450) Keinani orofaro ibebita.  
\v 20 Ibebitaro Godima emabai koto ueta uwara odi. Samueronu kowa fariro emanu we bou ueta amara Samuero dawa emabai mune odi.  
\v 21 Odiro yanu sirorari uwarama Godiba weita, yanu ununa kini yabai odia weita. Weitaba Godima Kisanu amara Soro, Benijameninu abuaroma sirorari ui amara emaba mai. Mairo Soroma oya foti (40) ema yawotebi.  
\v 22 Oya foti (40) yawotebiro Godima dawa kodite Deiwidi ma uyare emanu kini mune odi. Mune odite wei, ewa amara Jesinu amarana Nanu unu amara. Dana Nanu sina nesia naufisu Godima wei.  
\v 23 Foroma wei, Godima we bou uite Deiwidinu sisia Amara Yesu munite Isaraero uwara emanu ema ma wiroeta Amara mune odi, Foroma wei.  
\v 24 Weite wei, Joni dawa ko fari. Farite Isaraero uwaraba wei, yanu neno neno ueta dubena sawete babataito muawe Jonima wei.  
\v 25 Weiro Joni danu kowa me sibie uiro nono wei, na ana amara imutaita wei? Yanu yawotaita amara na me. Mui Amarama nanu buribi afisu. Dana Dera Amarawere. Nana dera amara meba Danu iboro da inare tumau wei, Jonima. Foroma i sina emaba eno wei.   
\p
\v 26 Foroma wei, nanu kaka nabue, ya Eibaramunu sisia uwaraini ya Godiba iyaraita uwaraini nauawe wei. Godima ewa ma wiroeta sina yabai siaia uiro arinu wei.  
\v 27 I Jerusaremu suro ibebita uwaraini emanu dera uwaraini emana Yesu utaro ui. I uwarama Dawa iwata meba imutawa uta. I we bou ueta uwaranu sina sabate kowaro ainewaure yawitebitaro nautebitate imutawa utebita. Eno utebitaba i we bou ueta uwaranu weita sina enanari ba ui.  
\v 28 I Jerusaremu suro uwarama Yesunu ueta sineta siosa me atanawa utate Faeratibai anitate me sara weitaro utaro ui.  
\v 29 Uiro i uwarama i we bou ueta uwaranu Yesu uieta we bou uta sina enanari uta. Utaro Yesuma uiro Danu ofe korosiroma mutate gebiro uri ue oeta kabesiro oita.  
\v 30 Eno utaro duburo Godima Dawa ma uyariro ibinu.  
\v 31 Yesu inarebiro Danu Gareriroma Jerusaremu buribi aneta uwarama Dawa erebita. Erebitaba awona i sina i erawa uwarabai waitaro nautaita wei.  
\v 32-33 Godima yanu sirorari uwaraba Danu kotofu we bou ueta mairo awonana yabai i kotofu sina waitu wei. Godima Yesu ma uyarite awonana Danu we bou uetana yabai ido usinu wei. Samusi bukaro sadei ewa sina ibinu,  
\li1 Ana Nanu Amara, Anu Amamana Na.  
\p I sina eno ibinu.  
\v 34 Foroma wei, Godima Yesu ma uyarite wei, Danu ofe yajara da ufisu wei. Samusi bukaro i sina eno ibinu,  
\li1 Aba ma kobererau umau, Deiwidiba we bou ue enanari Aba umau.   
\p
\v 35 I Samusi bukaro ewa mui sina ibinu,  
\li1 Ana weiba Anu kakara Amaranu ofe yajara da ufisu.  
\p I sina Samusi bukaro eno ibinu.   
\p
\v 36 Foroma wei, ewa sinana Deiwidinu me, Yesunu. Deiwidima Godinu gaukara danu uwarabai uite ui. Uiro danu sirorari uwarabai uri utaro danu ofe yajara ui.  
\v 37 Godinu ma uyareta Amaranu ofena yajara utawa ui wei.  
\v 38-39 Nauawe, ewa Amara torowama yanu neno neno ueta maitufisu wei. Ana anama Dawa imutaitaro Dana torowa emanu neno neno ueta maiturasuro Godima emana kobere uwara imutasu. Mosesinu tarawatuma i neno neno ueta maiturawa utasu wei.  
\v 40 Eforo, i we bou ueta uwaranu sina yabai fafisu aba? Emanu sina eno,   
\li1
\v 41 Ya Godiba siosa sina waita uwara eno imufote uifoita weita. Yabai Nanu uetana derawere. Mui amarama yaba i ueta nesia we mawetu ufiro da naufoita,  
\p i uwarama eno weita.  
\v 42 Foro danu sina eno weiro dawaini Banabasi wawaro anita. Anitaro weita, etei mui sabate kowaro nono wiawaro naufe weita.  
\v 43 I uwara nesia wo bagaru ue anitaro moana Ju uwaraini moana Godiba iyarebita uwarama Foroini Banabasinu buribi anita. Anitaro weisi, Godima ya kobererau durua utasuba Danu dabaro inaregou uforo we enanari usi.   
\p
\v 44 Etei mui sabate kowaro i su uwara faiyawere Godinu sina naufitae anita. Eme ba torowa suro yaubita.  
\v 45 Eme faiyawere anitaro moana Ju uwara i eme fefera etate unutawa iba dua sina weitate Foronu we mawetu uetaini wetaini meo weitate i amara sadeina siosawere weita.  
\v 46 Eno weitaro Foroini Banabasima iyarawa usite weisi, Godi Danu unuba i sina yabai ko waitu. Awona Godinu sina mu sanaitate yanu torowa koto utaitaba Godinu me ibene ibene ibeta da muboita weisi. Eno utaitaba i aika uwaraba webutu weisi.  
\v 47 Godima Danu bukaroma yaba eno wei,  
\li1 i Ju me aika uwaranu ariona ya. Anibote i orofa atata aika maika uwara nesiabai weboro naufitaitana wiroeta mubitaita,  
\p eno wei.  
\v 48 Foroma eno weiro i Ju me aika uwara nautate yaru uteda Godiba we ma kobererau uta. Godinu mune oeta uwara faiyawere Godi imuta.  
\v 49 Godinu sinama aboro aboro nesia anegou ui.   
\p
\v 50 I Ju uwara ema unutawaba ejiwa sina weitaro moana baeta awetaboini emeini nautate Foroini Banabasi natofo su uwarama yowetaro anisi.  
\v 51 Ane emanu buriro sakai maitusiro i Ju uwarama ema ekoita iwata uta. Foroini Banabasi Anitiyoka suroma Aikoniamu suro anisi.  
\v 52 Godinu Imumu Kotofuma Danu iwata ueta uwarabai ibegou uiro yaru derawere uta.   
\c 14  
\s1 Aikoniamu suro anisi  
\p
\v 1 Aikoniamu suro ane fasite Ju uwaranu dubu suro amusite Godinu sina bunawere weisi. Weisiro moana Ju uwaraini Guriki uwaraini nautate Godi imuta.  
\v 2 Godinu sina nautawa Ju uwarama dua sina weitaro i aika uwarama nautate i Godinu sina naueta uwaraba ubusi uyata.  
\v 3 Foroini Banabasi iro kowa faiyawere ibeda Yesunu kobere durua ueta sina weisi. Weisiro Yesu erite emabai buna uetaini ereta faiyawere mairo usi.  
\v 4 I Aikoniamu su uwara imueta daba demuraina me. Moana uwarama Ju uwaranu sina nauta. Moana uwarama afosoro uwaranu sina nauta.  
\v 5 I aika uwaraini Ju uwaraini emanu yawoeta uwaraini i afosoro uwara gebiroma ufitae utaro nausi.  
\v 6-7 Nausite i su sau ekoisite Raikonia orofa su sadeiro anisi. Risitaini Debi suro anisi. I su sadeini i orofa kabesi faiyawere ane iro Yesunu sina we inarebisi.   
\s1 Risitaini Debi suro anisi  
\p
\v 8-9 Mui Risita su amara danu buri takami uiro anawa, dawa danu muneta kowaroma buri anawa eno ibebi.  
\v 10 Dana Foronu sina nauiro Foroma i amara eregou uteda i amarana wirofie imutasu we imuite derawere wei, anu burima yare ina wei. Weina sau uyari.  
\v 11 Eno uiro i guruguru uta uwarama etate emanu Raikonia sinaroma weita, godi eme ari yabai farita eawe weita.  
\v 12 Weitate emanu godi Jufata, danu ifu Banabasinu mui ifu mata. Emanu mui godi Makari, danu ifu Foronu mui ifu mata. Foro dawa sina weta amaraba iba Makari ifu mata.  
\v 13 I godi Jufatanu dubu su barunaro inaibi. I dubu su fuyo oeta amaraini moana uwaraini siginaini borumakau mutate fuyo i afosoro uwaraba odifitae su barunabai woure fata.  
\v 14-15 Fataro Banabasini Foro nausite imuteda emanu wadia ma bujebaje usite i uwarabai fare weisi, aneba eno utaita weisi? Wana godi me, wana ba eme, ya ari weisi. Kotofu sina webune yabai farisia weisi. I kotofu sina eno, i ba me godina kodiawete oweawete i me ibene ibene ibeta Godibai aniawe weisi. I ba Godima ureini nasini eneaini ibaiabai nesia ubu ui.  
\v 16 Boderewereroma uwarama emanu unu utebita. Utebitaro Godima emanu sara siosa ueta ereda me yawotebi.  
\v 17 Ereda yawotebe ibo utawa uite ema obi ureroma siaia uiro itari. Obi matebiro emanu ieta derawere waratebiro yaru utebita. Godima eno uite awona enanari utasuba Danu aika eno ma boroyarasuba Dawa ba Godi iwata utaisi weisi.  
\v 18 Enoma enoma webe webe oisiro i uwarama fuyo oeta ekoita.   
\p
\v 19 Moana Ju uwarama Anitiyokaini Aikoniamu suroma i Risita su uwarabai are fatate Foroini Banabasiba wawei weita. Eno woroworo webitaba i uwara nautebe arama utate gebiro mutate Foro sane uta. Eno utaro sakairo urei. Ureiro agero mutate ma youre su baruna wawaro sane oita. Dana uisinua we imutate iba iro sane oita.  
\v 20 Sane oitaro Yesunu buribi aneta uwarama Foro ode kara utana Foroma uyarite suro ani. Wai uriro uyarite Banabasini iroma Debi suro ane fasi.   
\s1 Siriaroma Anitiyokaro oweta  
\p
\v 21-22 Debi su uwarabai Yesunu kotofu sina weisiro uwara faiyawere nautate Godi imue naue uta. Duburo Debi su ekoisite owesite Risita suini Aikoniamu suini Anitiyoka su Godinu sina naueta uwarabai ane Godinu sina eno weisi, Godibai ibegou uawe. Awe awe kowa faiyawere uyafiro duburo Godinu yawoeta orofaro aniboita weisi. Eno weisiba i Godinu sina naueta uwarama nautate buna uta.  
\v 23 Foroini Banabasima i dubu su su yawoeta uwara mune emabai oisite ieta itawa ka utate i uwaraba guriguri uteda weisi, Yesu, ema yawoegou ua weisi. Enoma enoma usite anisi.   
\p
\v 24 Ane Fisidia orofa serigari usite Famufiria orofaro fasi.  
\v 25 Fega suro fasite Godinu sina weisite ekoisite anisi. Ane Ataria suro tanisi.  
\v 26 Boutiro amusite iroma Anitiyoka suro anisi. I Anitiyoka suro aubokona Godima weiro i uwarama Foroini Banabasi mune oitate Godibai emaba guriguri utaro anisite nono reka owere fasi.  
\v 27 Fare weisiro i Godinu sina naueta uwara nesia fata. Fataro weisi, Godima i aika uwaranu neno ma ifegari uiba i aika uwarama emanu naueta Godibai odaita weisite Godinu ueta nesia emaba weisi.  
\v 28 Foroini Banabasima Anitiyoka suro i naueta uwarabai kowa faiyawere ibisi.   
\c 15  
\s1 Jerusaremu suro fare atane matata  
\p
\v 1 Foroini Banabasima Anitiyoka suro ibebitana moana Judia uwarama Anitiyoka suro fatate weita, Ju uwaranu ofe tureta da tufoitana nono Godima ya da ma wirofisu weita.  
\v 2 Foroini Banabasima derawere weisi ina ba me weisi. Eno webisina i Anitiyoka su Godinu sina naueta uwarama Foroini Banabasini moana Anitiyoka Godinu sina naueta uwara i sina Jerusaremu afosoro uwaraini dubu su yawoeta uwarabai i sina webitae siaia uta. Siaia utate su baruna wawaro woure oitaro anita.   
\p
\v 3 Ane Fonisia orofa su suini Samaria orofa su suro Godinu sina weita. Eno weita, Godima i aika uwara awona ma wirotasu weita. Eno weitaro naueta uwarama yaru derawere uta.  
\v 4 Jerusaremu suro ane fataro i naueta uwaraini afosoro uwaraini dubu su yawoeta uwaraini ario weita. Duburo i uwara nesina dubu suro guruguru uta. Utaro Godinu emabai ueta nesia emaba weita.  
\v 5 Eno weitaro moana Ferosi waita uwarama yare weita. I aika uwaranu ofe tufete Mosesinu tarawatu nesia uforo webeisi weita.   
\p
\v 6 I afosoro uwaraini dubu su yawoeta uwarama i sina ma rorowarau ufitae guruguru uta. Utate sina faiyawere we matata.  
\v 7 We matataro Fitama uyarite wei, naiyemutu nanu sina nauawe wei. I bodere kowaro yabairoma na mune odi. I aika uwarabai Danu sina wemaro naufitate imufitae na mune odi.  
\v 8 Godima i aika uwaranu nenoma imueta Dana iwataba Danu Imumu Kotofu siaia uiro emabai itari. Yana Godinu Imumu Kotofu musi, i ari muta.  
\v 9 Godima emaini yaini arotorowa imui. I uwarama nautate Godi imutaro emanu neno neno ueta maituri wei.  
\v 10 Eno uiba aneba ofe tureta sina waita? Eno waitana Godinu sina garari ufoe utaita wei. Eno utaitana Godinu sina naueta uwaranu nodoro urumuwere ayuayu ari doifoe utaita wei. Bodere yanu abuamutuini yaini i ayuayu ari woure anawa aneba ya aika uwara yanu ofe tuawe waita wei?  
\v 11 Emanu wiroetaini yanu wiroetana arotorowa. Emaini yaini naufeisina yanu Dera Waria Amara Yesu Kerisonu kobere durua uetaba Godima ya ma wirofisu wei.   
\p
\v 12 Fitama eno weiro i guruguru ubita uwarama nauteda sina wiawa uta. Wiawa utaro Foroini Banabasinu Godi i aika uwarabai buna ueta sina weisiro nauta.  
\v 13 Emanu sina we me sisiro Jeimisima yare wei, kaka nabue, nanu sina nauawe wei.  
\v 14 Fitama wenu, Godima i aika uwara munasute ma wirotasuro nono Danu sina naueta uwara sinaita, wenuro nauisi Jeimisima wei.  
\v 15 I sinana i we bou ueta uwaranu weita sinaini arotorowa wei. Emanu sina eno,   
\li1
\v 16 Godima eno wei, mui jugari ui su ma kobererau ufiro uyafisu i ari, Deiwidinu ma jugari ui su nono maimaro uyafisu. Uyafiro Dera yawoeta Amara odimau.  
\v 17 Enoba uwara nesia, Nanu ifu waita aika uwaraini dobefitate i Dera Amaranu buribi anibitae iba eno umau wei.  
\v 18 Boderewere Godima i sina eno wei,  
\p i we bou ueta uwarama eno weitaya wei.   
\p
\v 19 Jeimisima nono wei, nanu imuetana eno, i Yesunu buribi aneta aika uwaranu ibeta ma kimu da ufeisi wei.  
\v 20 Emaba eno owawa ufeisi. I ba me godinu fuyo oeta ieta da iforo, dita yagera da faforo, mimi utaisiro onono itarawa utasu egi da iforo, onono da iforo, eno owawa ufete emabai siaia ufeisi wei.  
\v 21 Bodere kowaroma moana uwarama Mosesinu tarawatu natofo su suini Ju uwaranu dubu su nesiaro sabate ainewaure ina yawitebitaro iro ane nautebita. Awona enanari dubu suro ane yawitaisiro nautaita wei.   
\s1 I Ju me aika naueta uwaraba mai owawa  
\p
\v 22-23 Eno weiro i afosoro uwaraini yawoeta uwaraini Godinu sina naueta uwara nesia nautate idoni, weitate amara sadei, Judasi Basabasini Sairasi muta. I amara sadeina dubu su yawoeta amara sadei. I amara sadeima Foroini Banabasini arotorowa Anitiyoka suro siaia ufitae we mutate emanu imueta owawa ue oita. Emanu owawana eno, ya Godinu sina naueta uwara nesia, afosoro uwaraini yawoeta uwaraini yana ya Anitiyokaini Siriaini Sirisia su aika naueta uwaraba ario weisi. Yanu sina nauawe.  
\v 24 Moana uwarama ewadoroma yabai anitate weita, Mosesinu ofe tureta uawe weitaro ya iwawa utaro nausi. I uwara yana siaia utawa usiro emanu imuetama me weita.  
\v 25 Awonana yanu imuetana eno, amara sadei munisiba emaini Banabasini Foro warai siaia ufero yabai anibitaita.  
\v 26 Banabasini Foroma Yesunu gaukara utebisiba moana uwarama ma uifitae utaro ema uietaba iyarawa usi.  
\v 27 Judasini Sairasi siaia utaisiba fafisisina bebetuma i owawa sina nesia webisisi.  
\v 28 Imumu Kotofuini yanu imuetana eno ya aika uwaranu ibeta ma kimu utawa utaisi. I sinaratu torowa waisi.  
\v 29 Eno, i ba me godinu fuyo oeta egi da iawe, onono da iawe, mimi utebaitaro onono nasiniro itarawa utebasu egi da iawe, dita yagera da fawe. Eno ufoitana kobererau ibifoita. Ido yanu sina me sininu.   
\p
\v 30 I amara sadei siaia utaro anita. Ane Anitiyoka suro tanita. Tare weitaro i naueta uwarama guruguru uta. Utaro i owawa mataro yawita.  
\v 31-32 Yawie me sitate sina kobererauba yaru uta. I we bou ueta amara sadei, Judasini Sairasima sina faiyawere i uwaraba weisina i uwaranu imueta kobererau uta.  
\v 33 Moana kowaro iro itebitaro i Godinu sina naueta uwarama Judasini Sairasi siaia utaro owesite Jerusaremu su Godi naueta uwarabai ario sina woure ane fasi.  
\v 34 (Sairasi danu aika iro ibebi dawa anawa.)  
\v 35 Foroini Banabasima Anitiyoka suro ibeda emaini moana Godinu sina naueta uwarama Godinu sina weda we mawetu utebisi.   
\s1 Foroini Banabasi ode waie matasi  
\p
\v 36-38 Mui kowaro Foroma Banabasiba wei, wanu bodere Godinu sina we inarebitu iro nono anibute efutu wei. Kobererau aba aramawere ibinita efutu weiro nauite Banabasima Joni Maka woufie wei. Weiro Foro dawa unutawa Joni Maka woureta. Bodere Joni Maka ema Famufiria orofaro ekodite aniba iba Foro dawa unutawa Joni Maka woureta.  
\v 39 Emanu imuetana aikaba Banabasini Joni Makama anisi. Boutiro amusite Saifurasi mutumuturo anisi.  
\v 40 Foroini Sairasima iro anisi. I naueta uwarama Godibai Foroini Sairasiba guriguri utate siaia utaro anisi.  
\v 41 Ane Siriaini Sirisia orofa su suro Godinu sina we inarebisiro i Godi nautebita uwara emanu imueta ma kobererau uta.   
\c 16  
\s1 Timoti Foroini Sairasini ani  
\p
\v 1 Foroini Sairasima Debi suro ko anisite ekoisite Risita suro ane fasi. I suro mui amara danu ifu Timoti atasi. Timoti danu danuana Godinu sina naueta Ju aweta, danu damamana Guriki amara.  
\v 2 I Risitaini Aikoniamu Godinu sina naueta uwarama Timoti dana kobere amara we imutebita.  
\v 3 Eno imutaba Foroma Timotiba wei, aini Godinu sina we inareta dabaro anibeisi wei. I Ju uwara emanu baeta uteda Timoti munite danu ofe turi. Timoti danu damamana Guriki amaraba iba danu ofe turawa uiro i Ju uwara nesia dawa iwata utaba eno ui.  
\v 4 Duburo Foroini danu uwara moana orofaroini su suro aboro aboro ane inareda i aika uwarabai anitate emaba Jerusaremu suro ibita afosoro uwaraini dubu su yawoeta uwaranu imueta sina webita. I uwara naufitate ane ane webitae iba webita.  
\v 5 Eno utebitaba i Godinu sina naueta uwaranu imuetana derawere uyariro uwara faiyawere Godi imutaba i dubu su uwara faiyawere uyata.   
\s1 Toroasiro Foronu tubetube  
\p
\v 6 Iroma Eisia orofaro anibitae utaro Godinu Imumu Kotofuma i daba garari ui. Garari uiba Firigiaini Gareisia orofa aboro aboro inarebita.  
\v 7-8 Ane Misia orofa gigirari fatate Bitinia orofaro anibitae utaro Yesunu Imumu Kotofuma iro da aniawe weiba Misia orofa serigari utate Toroasi suro tanitate iro aita.   
\p
\v 9 Dumuro Foroma nauta ainibebe tube eri. Tuberoma mui Masadonia amara inaibeda nui wei, Masadonia orofaro arate ya durua ua wei.  
\v 10 Foroma i tube erite yaba weiba Godi Danu ununa Danu sina i uwarabai webene i daba usinu imusite i daba dobefene usi.   
\s1 Firifairo Ridia danu neno Yesubai mai  
\p
\v 11 Yana boutiro amusite Toroasiroma Samotureisiro anisi. Anisite aisite wau uriro Samotureisiroma Niaforusiro anisi.  
\v 12 Iroma Firifai suro fasi. Firifaina i Masadonia orofanu botai su. I suna Romani uwaranu su. Iro fasite kowa faiyawere ibisi.  
\v 13 Sabate kowaro moana uwara ogo gigirariro guruguru uteda guriguri utebaita weitaro nausite anisi. Su baruna wawaro anisite ogo gigirariro ane fasite moana guruguru uta awetaboba Godinu sina weisi.  
\v 14 Yanu sina naui mui awetana danu ifu Ridia. Danu su Taiataira. I awetana Godi guriguri utebi. Danu gaukarana kukui wadia oiya ueta. Dana Foronu sina nauiro Godima danu neno ma ifegari uiba Foronu sina nauegou ui.  
\v 15 Dawaini danu suro ibebita uwara nesia yabai babataito utaro Ridiama wei, yana na Godi nauegou utatane imuteiboitana nanu suro are ibiawe wei. Eno webiba danu suro anisi.   
\s1 Firifainu dibura suro  
\p
\v 16 Mui kowaro i guriguri ueta kabesiro anedana wada barau aruma atasi. I arumana seitaninu mui imumu siosa bobo aruma. Dana wada barau gaukara uteda oi derawere munebite danu yawoeta uwaraba matebi.  
\v 17 I arumama yanu buribi arite orere derawere wei, ewa uwarana Godinu gaukara uwara. Godima ya ma wirofie farita eawe wei.  
\v 18 Kowa ainewaure woroworo eno webiro Foro nautebe arama uite wei, i aruma danu neno ubarero ibi siosa imumuba bunawere wei, Yesunu ifuro watane a danu neno ubareroma amuate fare wawaro ania wei. Weina sau ido amuite fare ani.  
\v 19 I arumanu yawoeta uwarama etate we imuta, yanu oi muneta daba ido me sininu we imuta. Foroini Sairasi budari utate i su tutububai yaubeta koto uwarabai woure ane oita.  
\v 20 Eno utate weita, i Ju amara sadeima siosa sina waisiro ewa uwarama siosa siosa imutaita weita.  
\v 21 I Romani uwaranu tarawatu da nauawe waisi weita.  
\v 22 Weitaba eme faiyawere guruguru uteda ibo utaba i koto ueta uwarama Foroini Sairasinu wadia ma babare satate weitaro isuma uta.  
\v 23 Isuma urebe urebe ekoitaro onono farebi. Enoma enoma utate ema woure dibura su ubarero ane oitate i dibura yawoeta amaraba weita, i amara sadei yawoegou ufaro weita.  
\v 24 Eno weitaba i amara sadei mune ane i dibura sunu ubare koruro odi. Odite senima emanu buri sadei mune anaro uwane badame ue odi.   
\p
\v 25 Dumu abanaro Foroini Sairasima Godiba guriguri uteda soni webisiro i dibura su ubarero yaubita uwara nauta.  
\v 26 Soni webisina sakai wawana wawana derawere uiro dibura su wawana wawana uiba dibura su kasimu nesia ifegari utaro i dibura uwaranu seni nesia kokosugari utate itata.  
\v 27 I dibura yawoeta amara nauta ainibiro eno utebina danu diti forairo uyareda kasimu ifegari ueta erite we imui, i dibura uwara nesia iya anita, we imuite danu kaiya munite danu nodo tufie utebi.  
\v 28 Eno utebiro Foroma derawere wei, eno da ua wei, ya nesina ewado wei.  
\v 29 Weiro nauite iya derawere uyareda nanefa mai wei. Ekiwa munite dibura su ubarero sau itarite iya derawere uteda iwura mameda Foroini Sairasinu buri gigirariro arubi ui.  
\v 30 Eno uite uyarite Foroini Sairasi woure wawaro odite wei, yawe, wiroeta anene mumau wei?  
\v 31 Weina Dera Waria Amara Yesu imuegou ua weisi. Eno ufasuna aini anu suro ibeta uwara nesia Dawabai wirofoita weisi.  
\v 32 I dibura yawoeta amaranu su ubarero amutaro Foroini Sairasima i amaraini danu suro ibeta uwaraba Godinu sina weisi.  
\v 33 Weisiro i amarama Foroini Sairasi munite emanu ofe uburo iwiji awiji ogoma uroiro dawaini danu sisia uwara nesia emabai babataito uta.  
\v 34 Babataito utaro i amarama ema woure danu suro ane ieta nabero mairo ita. Eno uiro dawaini danu sisia uwarama emanu naueta Godibai oitate yaru derawere uta.  
\v 35 Wai urina i koto ueta uwarama forisimani siaia utaro anita. I amara sadei ma uregari ufitae anita. Ane fatate weita, i amara sadei ma uregari uaro anibisi weita.  
\v 36 Weitana i dibura yawoeta amarama Foroba i sina eno wei, i koto ueta uwarama ya ma uregari umane waya siaia uitaba iba wawaro aniawate kobererau aniawa wei.  
\v 37 Weina Foroma wei, emana wa emenu ditiro isuma urebita. Wana siosa ueta utawa utu. Wana Romani uwara. Emanu ununa wanu kiwuma aneta. Ina da ufutu. Fafitate wa woure ane odifitaita wei.  
\v 38 Weiro forisimani anitate i koto uwaraba Foronu sina weita. Foroini Sairasima yaini ya Romani uwara weita i sina nautate iyata.  
\v 39 Iyataba Foroini Sairasibai anitate nenoro imutate ario weitate nui weita, yanu natofo su kodiawate aniawa nui weita. Eno weitaro dibura suroma amusite anisi.  
\v 40 Ridianu suro anisite i Godinu sina naueta uwaraba Godinu sina weisite emanu imueta ma kobererau usite natofo su ekoisite anisi.   
\c 17  
\s1 Tesoronaika suro  
\p
\v 1-2 Foroini Sairasima ane Amofiforisi suini Aforonia suro fare fare daido fare anisi. I su sadeiro fare fare daido fare ane Tesoronaika suro fasi. Iro Ju uwaranu dubu su inaibiba Foroma amuite Godinu sina wei. Danu eno ainewaure utebi iba sabate kowa rarogonu i dubu suro amutebite Godinu bukaroma sina bunawere webi.  
\v 3 Eno wei, yanu fafisu yawoeta Amara awe awe derawere muneda oferi derawere woufite uifite nono uietaroma uyafisu wei. Nana ewa Yesu Kerisoba watane.  
\v 4 Eno bunawere weiro moana nautate ina Yesu Keriso eno we imutate iba Foroini Sairasibai ane taka uta. Moana Godi naueta dera Guriki uwara, emeini awetaboini emanu naueta Yesubai oitate emabai ane taka uta.   
\p
\v 5 Eno utaro moana Ju uwara ema Godi nautawaba iba dua sina weitate siosa uwara faiyawere mutate Foroini Sairasi ufitae imutaro eme fefera guruguru uteda weroroka derawere weita. Weitate Jesoninu suro anitate fare Foroini Sairasi i kanisoro uwarabai woure ane odifitaro fanisi mafitae iba anita.  
\v 6 Jesoninu suro fatate Foroini Sairasi dobetana meba munawa uta. Munawa utaba Jesonini moana naueta uwara budari utate i kanisoro uwarabai woure ane oita. Woure ane oitate weita, Foroini Sairasi, i amara sadeima orofa atata uwara nesianu imueta ma siosa siosa usite awona ewaro farisia weita.  
\v 7 Awona farisite Jesoninu suro ainibinisi weita. I amara sadeima dera yawoeta amara Sisanu tarawatu nautawa utaisia weita. Mui kini Amara, Danu ifu Yesu, ibinu waisia weita.  
\v 8-9 Eno weitaro i natofo su uwaraini kanisoro uwarama i sina nautate jaja utate weita, Foroini Sairasiba yabai oi maiwe weita. I amara sadeima merau ibebe anibisisina yanu oi ma owere mafeisi weita. Eno weitaro oi mataro kanisoro uwarama ema siaia utaro anita.   
\s1 Beria suro anisi  
\p
\v 10 Foroini Sairasibai ane fatate dumuro siaia utaro Foroini Sairasi anisi. Ane Beria suro fata. Beria suro fatate dubu su ubarero Godinu sina webitae amuta.  
\v 11 I Beria Ju uwarana kobere uwara. Tesoronaika su uwara ari me. I Beria uwarama Godinu sina nauegou utate Godinu buka ainewaure yawiegou utebita. Foroini Sairasinu sina ba aba me we imutaba iba Godinu buka yawiegou utebita.  
\v 12 Eno utebitaba Ju uwara faiyawereini dera Guriki emeini awetaboini emanu naueta Yesubai oita.  
\v 13 Foroma Godinu sina Beria suro webina Tesoronaika uwarama nautate Beria suro ane fatate ibo uteda ejiwa sina weitaba uwara faiyawere Foroba jaja uta.  
\v 14 Eno utaba i Godinu sina naueta uwarama Foro siaia utaro ane bouti munite moana uwaraini ani. Sairasini Timotima Beria suro ibebisi.  
\v 15 Foroini danu uwarama Atena suro fataro Foroma emaba wei, aniawete Sairasini Timoti nabai siaia uawero nabai sau fafisisi wei.   
\s1 Atena suro  
\p
\v 16 Foroma Atena suro i amara sadei yawotebina i Atena su uwaranu agema ubu ueta godi fefera deina ereda neno siosa utebi.  
\v 17 Eno utebiba Ju uwaranu dubu su ubareini natofo su guruguru ueta kabesiro i Ju uwaraini guruguru ueta uwaraba Godinu sina bunawere webi.   
\p
\v 18 Moana Efikuriani waita uwaraini moana Sitoiki waita uwara atanite emaba Godinu sina wei. Weiro nautate moanama weita, ewa sina bana bobo amarama ane wasu weitaro moanama weita, dana aika siboro uetaba wasu weita. Foroma Yesuini Danu uietaroma uyareta sina webiba iba eno weita.  
\v 19 Eno weitate Foronu agero mutate emanu guruguru utebita maidaniraturo woure mane oita. I maidaninu ifuna Areafagu. Iro woure mane oitate weita, anu reka siboro ueta sina wiaro naufe weita.  
\v 20 I sina bodere nautawa awona kamama nautaisi weita. I sinanu ubi iwata ufene waisi weita.  
\v 21 (Atena uwaranu karana eno, ainewaure kamama wetaini uetaini naueta iwata ufitae utedibebita. Iba uwaranu aika maika sina nauteda sina faiyawere wedibebita).   
\p
\v 22 Ibago Foroma Areafagu guruguru ueta abanaro yare wei, Atena uwara nanu sina nauawe wei, yana siboro uegou utebaitaro na eratane wei. Yanu siboro ememetuna faiyawere, nana ane ene wei.  
\v 23 Na anedana mui fuyo oeta enero danu owawa oeta ibinu. I owawa oetana eno, ewa fuyo oetana ya iwata me godinu. Ewa Godi yaba watane wei.  
\v 24 Ewa Godina ureini nasini i ibaiabai nesia ubu ui. Ewa Godi Dawa ureini nasini yawotasuba, Dana emema ueta suratu ubarero ibawa utasu wei.  
\v 25 Emenu agema Dawaba ane ane matawa utaisi, Danu torowama yanu neno sanetaini me ibeta ane ane matebasuba iba Dawaba matawa utaisi wei.  
\v 26 Godima amara demurairatu munite orofa atata uwara nesia Dawabairoma ubu uite emanu orofa aika maikaro odite emanu ibeta oya enanari weiba eno me ibebaisi wei.  
\v 27 Eno uite uwara nesia Dawa dobefitate imufitae iba eno ui. Yabairoma Dawabai daba yafa me, Dana baworo.  
\v 28 Foroma emaba wei, awonana Dawa Godiba iba inaraisite me ibebaisi. Ya uwaranu owawa oeta uwarama eno weita, yana Danu sisia uwara weita.  
\v 29-30 Yana Danu sisia uwaraba Godi Dawa siriwa, o goro, o gebiro, o emenu imueta ememetuna i ari me, eno da imufeisi wei. Bodere uwarama Godi iwata meba iba Godima ema ibo utawa. Awonana Dana ya uwara nesiaba eno buna wasu, yanu neno neno ueta dubena afu sawe wasu wei.  
\v 31 Godima, Danu odi kowaro, ewa orofa atata uwara nesia mui amarabai rorowarau koto ufisu wei. I Amarama uietaroma ma uyariba ya nesia iwata ufene iba eno ui wei.  
\v 32 I uietaroma uyareta sina nautate moana uwarama meo, weita. Moana uwarama yanu ununa nono naufeisi weita.  
\v 33 Foroma sina we me sinite i uwara ekodite wawaro ani.  
\v 34 Wawaro aniro moana uwaraini dawabai anitate emanu naueta Godibai oita. Daionisia, dawa Areafagu koto amara, dawaini mui aweta Damarasini moana uwaraini dawabai anitate emanu naueta Godibai oita.   
\c 18  
\s1 Korinita suro  
\p
\v 1 Foroma Atena su ekodite Korinita suro ane fari.  
\v 2 I suro Ju amara danu ifu Akuira atani. Danu danuama dawa muni orofana Fonitia. Akuirama danu aweta, Fasiraini Itaria orofaroma reka fasi. Korodiasi Sisa, Romani dera yawoeta amarama Ju uwara nesianu ibeta unutawaba weiro awetaini awera Itariaroma Korinita suro are fasi. Foroma ema efie emanu suro ani.  
\v 3 Foroini Akuira emanu gaukara arotorowa. Emanu gaukarana farai wadia ueta iba Foroma emabai ibeda arotorowa farai wadia gaukara utebita.  
\v 4 Sabate kowaro ainewaure Ju uwaranu dubu suro amutebiro Ju uwaraini Guriki uwaraini sina sina we matanebitaro moana Ju uwaraini Guriki uwarama Foronu sina nautebita.   
\p
\v 5 Duburo Sairasini Timotima Masadoniaroma are ido fasi. Are fasiro Foroma Ju uwaraba wei, Yesuna ya Ju uwaranu ma wiroeta Amara wei.  
\v 6 I Ju uwarama Foronu sina munawa utate emanu imueta ma kimu uteda Yesuba siosa sina weita. Eno utaba Foroma uyarite i uwara ema ekodifie uteda iba danu wadia ure fufuteda wei, yana Godi unutawaba ina yanu kerere, nanu kerere me wei. Awonana ya Ju uwara ekodimate i aika uwarabai animate Godinu sina wemau wei.  
\v 7 Foroma i Ju uwaranu dubu su ekodite Taitasi Jasitasinu su, i dubu subai, ane amui. Taitasi Jasitasi dawa Godinu mui naueta amara.  
\v 8 Kurisifasi, dawa i Ju uwaranu dubu su yawoeta amara, danu suro ibeta uwara nesiaini moana Korinita uwaraini emanu naueta Yesubai oitate emabai babataito uta.  
\v 9 Mui dumuro Foroma nauta ainibebe tube erina Yesuma wei, iya da uyate wate mu da ua wei.  
\v 10 Weite wei, abai ibineba eme aba da urafitaita wei. Nanu Na imufitaita uwara faiyawere ewa suro ibinita wei.  
\v 11 Foroma tube eno eriba Korinita suro mui oyaroma ane mui oya abanaro iro ibeda ainewaure i uwarabai Godinu sina webi.   
\p
\v 12 I amara Garioma i Akeiya orofa yawotebina i Ju uwara faiyawerema Foroba ibo utate urafitae uteda yare Foro i koto ueta uwarabai woure ane oita.  
\v 13 Iro woure ane oitate weita, ewa amarama eno wasu, Godi torowa imutebeawe wasuba yanu tarawatu ma siosa utasu weita.  
\v 14 Weitaro Foroma danu ununa sina webie uina nono i koto yawoeta amara, Garioma Foronu sina weta daba garari uite i Ju uwaraba wei, danu kerere anene? Dawa waira utawa, eme urawa eno utawaba iba dawa koto da umau wei.  
\v 15-16 Yanu Ju uwaranu tarawatu sina ma siosa ui o yanu buruka uwaraba siosa sina wei o ina na iwata me, weite danu koto su ubareroma ema yoweriro anita.  
\v 17 Ane reka Ju uwaranu dubu su yawoeta amara Sositinisi mune isuma urebita. Koto subai Sositinisi isuma urebitana Garioma i uetaba sina mui wiawa ui.   
\s1 Anitiyoka suro oweri  
\p
\v 18 Foroma kowa faiyawere Korinita suro ibebe nono i su ekodite boutiro amuite Fasiraini Akuira munite Siria orofaro anibie ui. Iro anibie aneda Sinikuria suro farite Godiba bodere we bou uiba danu kofiri giriri ui. Ina Ju uwaranu baeta.  
\v 19 Iroma Efesa suro ane fata. Fataro Foroma Fasiraini Akuira ekodite Ju uwaranu dubu suro amuiro dawaini i Ju uwara sina sina bunawere we matanebita.  
\v 20-21 I Ju uwarama bana weitana Foroma me weite wei, Godi nanu owereta webisuna ido owemate famau wei. Weite Efesa suroma ane boutiro amuite Sesaria suro ani.  
\v 22 Anebe ane Sesaria suro farite i Godinu sina naueta uwarabai manite iro mane yaubi. Mane yaubebe i uwara ekodite Anitiyoka suro tarani.  
\v 23 Tane Anitiyoka suro ibebe i su ekodite Gareisiaini Firigia orofa su suro aneda Godinu sina weite i Godinu sina naueta uwaranu imueta ma buna ui.   
\s1 Aforasi Korinitaini Efesa suro ani  
\p
\v 24 Duburo mui Ju amara, danu ifu Aforasi, danu Arekisania suroma Efesa suro fari. Dana kobere sina wetaini Godinu buka yawieta amara.  
\v 25 Aubokona moana uwarama dawa Yesunu imueta we mawetu utebitaro dana Joninu babataito ueta torowa iwata uite Yesunu imueta nesia nautawaba iba iwata utawa ui.  
\v 26 I amarama Efesa suro farite danu neno nesia sina weta unu uiba Ju uwaranu dubu su ubarero amuite Godinu sina bunawere wei. Weiro Fasiraini Akuirama nausite i amara musite Godinu imueta nesia dawaba we mawetu uegou usi.   
\p
\v 27 Duburo Aforasima danu unu Akeiya orofaro anetaba i naueta uwarama owawa oitate i Akeiya orofa naueta uwarabai siaia utate weita, ewa amaranu ueta sineta kobererauba dawa muawe. I owawaro eno we oitate siaia uta. Aforasima iro farite Godinu sina naueta uwaranu imueta ma kobererau ui.  
\v 28 Dana Godinu buka muneda iroma Yesuna i Ju uwaranu ma wiroeta Amara bunawere we mawetu uiba i Ju uwarama sina mui wiawa uta.   
\c 19  
\s1 Foro Efesa suro ani  
\p
\v 1-2 Aforasima Korinita suro ibebina Foroma i maidani orofaro inarebe iroma Efesa suro tarani. Tare moana naueta uwara ataneda wei, yanu Godi imuta kowaro Godinu Imumu Kotofuma yanu neno ubarero itariro muta aba me wei? Weina ane wasu, Godinu Imumu Kotofude ane weita?  
\v 3 Weitaro Foroma wei, ananu imueta mutate babataito uta weina Joninu weita.  
\v 4-6 Weitaro Foroma wei, Jonima wei, yanu neno neno ueta dubena afu sawete nanu buribi areta Amara imuawe, Jonima wei. I amarana Yesu, Foroma weiro i uwara nautate emabai Yesunu ifuro babataito utaro Foroma age emanu kofiri deiro odi. Eno uiro Godinu Imumu Kotofuma emanu neno ubarero itariro sina aika maika weitate Godinu we bou ueta sina weita.  
\v 7 Amara tuero (12) eno uta.   
\p
\v 8-9 Foroma sabate ainewaure Ju uwaranu dubu su ubarero amutebite Godima ya kobererau yawotasu webi. Sakara rarogonuro eno utebiro moana uwarama emanu imueta ma kimu uteda imutawa utate i guruguru ubita uwara nesiaba weita, ewa Yesunu dabana siosawere weitana Foroma Godinu sina naueta uwara munite woure ani. Ane Tiranasinu sikuru su ubarero kowa woroworo guriguri uteda Godinu sina webi.  
\v 10 Oya sadeiro eno utebitaro i Eisia uwara nesia, Ju uwaraini Guriki uwara nesina Yesunu sina nautate moana naueta uwara sitaro moana nautawa uta.   
\s1 Sikiwanu adarabu  
\p
\v 11 Godima Foro danu buna mairo Foroma buna ueta derawere ui.  
\v 12 Uiba danu agesifi o wadia mutate ofe woureta uwaranu ofero oitaro sau wirotaro seitaninu moana imumu siosa emanu neno ubareroma amutate anita.  
\v 13 Moana Ju me inareta wada barau uwarama Yesunu ifuro seitaninu moana imumu siosa yowetate eno weita, Foronu wasu Yesunu ifuro aniawe weita.  
\v 14-15 Mui Ju fuyo oeta amaranu adarabu nesia sewenima (7) eno utana i seitaninu mui imumu siosama wei, Yesu na iwata, Foro na iwata, nono yade anaiya wei?  
\v 16 Weina i seitaninu mui imumu siosa bobo amara iroma kiubaro i amara seweni (7) urite emanu wadia mune eta kebiro sane ure yanae ui. Eno utebiba i uwara su ubareroma ofe torowa wawaro sau fare anita.  
\v 17 I Efesa su uwara nesia, Ju uwaraini Guriki uwara i ueta nautate iya derawere uyatate Yesunu ifu we ma kobererau uta.  
\v 18 Reka naueta uwara faiyawere emabai fatate emanu dodoa wetaini siosa ueta sineta we ma borobayata.  
\v 19 Moana wada barau uwarama emanu barau ibaiabaini bukaini woure kabesi demurairo sane oitate inama yata. I bukana faiyawere. I bukanu dawana teni tausani kina (K10,000).  
\v 20 Eno utaba Godinu sina derawere weitaro eme faiyawere emanu naueta Godibai oita.   
\s1 Efesa uwara weroroka webita  
\p
\v 21 Duburo Godinu Imumu Kotofuma Foro Danu imueta mairo Foroma nenoma we imui, Masadoniaini Akeiyaro fare animate Jerusaremu suro animau eno we imuite wei, nono duburo iroma Romani dera suro animau wei.  
\v 22 Foroma danu dawa durua ueta amara sadei Timotini Erasitasini Masadonia orofaro siaia uiro anisina dawa Eisia orofaro moana kowaro iro ibebi.  
\v 23 I kowaro uwara faiyawerema Godinu sina naueta uwaraini urafitae uta.  
\v 24 Dimitirisima weiba iba urafitae uta. I amara danu gaukarana i ba me godi, Daienanu kiki suraratu siriwama ubu ueta. Ina danu gaukara. Moana uwarama i gaukara utebitate oi derawere munebita.  
\v 25-26 Dimitirisi i uwaraba weiro guruguru utaro wei, yawe, ewa gaukara utaisite oi derawere munaisi weite wei, Foroma wasu, agema ueta godina ba godi me wasuba Efesa uwaraini Eisia orofaro ibinita uwara faiyawere danu sina nautaitate i agema ubu ueta godi ekodaita wei.  
\v 27-29 Eno wasuba yanu besenesi ureifisu wei. Eisia orofa uwaraini orofa atata uwara nesina yanu aruma godi Daienanu dera dubu su da imufitate dawaba siboro da ufitaro danu ifu kikiratu ufisu wei. Weiro nautate ibo derawere uteda derawere weita, Efesa sunu Daiena dana derawere, weitaba Efesa su uwara nesia imueta aika maika utate dera guruguru kabesiro sau anedana Masadonia amara sadei, Geiasini Aritikasi mune ma youre anita. I amara sadeina Foroini uruama inarebita.   
\p
\v 30-31 Foro dana i guruguru kabesiro anibie uiba moana Godinu sina naueta uwarama danu daba garari utaro moana dera Eisia yawoeta uwara, Foronu domayamutuma sina siaia utate weita iro da ania weitaba ekodi.   
\p
\v 32 Moana uwarama emanu imueta derawere weitaro moana uwarama emanu aika imueta derawere weita. Enoma enoma webitaba i me yaubita uwarama emanu imueta iwata meba we imuta, aneba ya ewaro farisi we imuta.   
\p
\v 33-34 Enoba moana Ju uwarama Arekisana ma berabera utaro i uwaranu iboro ane inari. Iro ane inarite i uwaraba moko sina webie age ramamiro i uwarama dana Ju amara etate sina derawere weita, Efesa sunu Daiena dana derawere weita. Weitate i sina fefera webitaro kowa ane serigari ui.   
\p
\v 35 Kowa serigari uiro, i natofo sunu owawa oeta mui amarama age ramamite weroroka ekodiawe weiba i uwarama weroroka ekoitana i amarama wei, ya Efesa su uwarama Daienanu dubu su yawotaisite i ureroma sakairo itareta kakara gebiro yawotaisiro i orofa atata uwara nesia iwata utaita wei.  
\v 36 Iwata utaitaba weroroka kodiawete siosa ueta da uawe wei.  
\v 37 I afosoro uwarama yanu godinu ibaiabai waira utawa uitate yanu godiba siosa sina wiawa uita wei.  
\v 38 Dimitirisini danu uwarama wawei sina webitae ufitaitana i koto ueta uwarabai anibitate emanu wawei sina webitaita wei.  
\v 39 Yade, wawei sina weboitana i koto uwarabai weboita wei.  
\v 40 Romani yawoeta uwarama yanu uraneta yaraneta naufitate fanisi mafitaita wei. Yanu uraneta yaranetana ba me wei.  
\v 41 Eno weite i uwara nesia siaia uiro wo bagaru ue anita.   
\c 20  
\s1 Foro Masadoniaini Gurisi orofaro ani  
\p
\v 1 Duburo i weroroka me siniro, Foroma weiro Godinu sina naueta uwarama dawabai guruguru utaro Godinu sina weite ema ario weda ekodite Masadonia orofaro ani.  
\v 2 Masadonia orofa aboro aboro ane Godinu sina naueta uwaranu imueta ma kobererau utebe ekodi.  
\v 3 Masadonia orofa ekodite Gurisi orofaro ani. Ane farite sakara rarogonu ibebe Siria orofaro anibie uteda boutiro amufie ui. Uina moana uwarama dawa ma uieta daba doberebitaro nauiba ekodite Masadonia orofaro owemate burima duero animau wei.   
\p
\v 4 Moana uwaraini anita. Safatu, Beria su amara, dawa Firusunu amara, dawaini ani. Aritikanisi Sekunada Tesoronaika su amara sadeini anisi. Geiasi Debi su amaraini ani. Timoti ani. Eisia orofa amara sadei, Tisikasini Torofimasini anisi. Foroini i uwaraini Gurisi orofa ekoitate Firifai suro ane fata. Na Ruka, Firifai suro ema yawotebitarana ido are fata.  
\v 5 Foroini aneta uwara ema ko botai Firifai suroma Toroasi suro anitate iro ya yawotebita.  
\v 6 I Godima Isaraero uwara Ijifiroma woure aneta ogaro kowa me siniro boutiro amusite Firifai suroma Toroasi suro anisi. Anebe anebe kowa fo (4) me siniro Toroasi su musi. Iro fasite kowa seweni (7) yaubisi.   
\s1 Foronu dubu owiga Toroasi suro ani  
\p
\v 7 I uiki botai kowa, Sadero, areto ieta ifene guruguru usiro Foroma Godinu sina wei. Foro dawa waidumu anibisu iba sina fefera webiro sakara serigari uite mare otoro fari.  
\v 8 I sunu etu dei koru rarogonuro yaubisiro nanefararatu bububu utebita.  
\v 9 Mui reka amara, danu ifu Yutikasi, dana su ario areta ebaro yaubeda nauta ainibiro Foroma sina fefera webiba i amarama nauta kunawere ainibebe ureite etuaroma tare sakairo dowarite ui.  
\v 10-11 Uiba Foroma sau taranite i amara yabateda wei, weroroka kodiawe wei, awonana neno saneda ibinu wei. Weiro su dei koruro nono manisiro Foroma ieta nata nata uiro isi. Ie me sisiro Foroma Godinu sina webe webe wau uriro ekodi.  
\v 12 Ekodiro i guruguru uwarama i reka amara mutate neno kobererau ue anitaro yana anisi.   
\s1 Toroasiroma Mairitasiro ani  
\p
\v 13 Ane bouti ubarero amusite anisi. Forona duero ani. Yana boutiroma Foro Eisosa suro atafene anisi.  
\v 14 Eisosa suro ane fasite yawotebisiro Foroma farite bouti ubarero amuiro Mitarina suro anisi.  
\v 15 Iroma ane Kiosa orofa serigari usite ane aisite wau uriro uyasite Samosa suro ane fasi. Samosa suro ane fasite ane aisite wau uriro uyasite ido Mairitasi suro ane fasi.   
\s1 Foroma Efesaro naueta baeta uwaraba ario wei  
\p
\v 16-17 Foro dawa unutawa Eisiaro ibeta. Danu ununa mui Ju uwaranu ogaro kowa, Fenitikosi waita, fafisuba Jerusaremu suro ibeta, iba Efesa su serigari ufie uiba i Efesa dubu su yawoeta uwara sina fo odiro aniro dawabai ane fata.  
\v 18-19 Ane fataro wei, nanu sina nauawe wei, nanu yabai ibebitara ya iwata. Nanu fare kowaroma Godinu gaukarabai neno nesia ure nudarau utebe i webe sasae utawa utebe Godinu gaukara kobererau utebatane wei. I Ju uwarama na ma uifitae utebitaba awe kowa uyarebiro Godinu gaukara uegou utebitara wei.  
\v 20-21 Yabai Godinu kobere sina dubu suini yanu su suro Ju uwaraini Guriki uwarabai sina demurai eno webitara, yanu neno neno dubena afu sawete yanu naueta yanu Dera Amara Yesu Kerisobai odiawe eno webitara wei.  
\v 22 Godinu Imumu Kotofuma naba wasuba awonana Jerusaremu suro animau wei. Iro anene naba ufitaita na iwata me wei.  
\v 23 Godinu Imumu Kotofuma naba eno wasu, mui su suro anibaro a diburaro odifitate siosawere ufitaita wasu, wei. Eno ufitaitana da ekodimau, nanu me ibetaba da imumaubaro wei.  
\v 24 I Dera Amara Yesunu mai gaukara rorowarau umane animau wei. Moana uwarabai Godinu kobere sinaini Danu kobere durua uetaini ido wemane animau wei.   
\p
\v 25 Aubokona yabai ibebe Godima ya yawotasuba Danu sisia uwara sinaisi wero nauta wei. Awonana mui sina da wemaro yana nanu ibo nawata nono da efoita wei.  
\v 26-27 Mui sina kikiratu yaba wemau wei. Godinu kobere sina yaba wegou utebitaraba ana anama me ibebe ibebe yanu naueta Godibai da odifote me uifoitana i uietana nanu kerere me wei.  
\v 28 Godinu Imumu Kotofuma ya yawoeta uwara mune odiba yanu torowa eregou ufote yanu Godinu sina naueta uwara yawoegou uforo wei. Godima Danu sina naueta uwara Yesunu ononoma oiya uiba Godinu sina emaba maforo naufitaita wei.  
\v 29 Na animaro moana siosa uwarama uyafitaita wei.  
\v 30-31 (Awe boroma gasira ifie yowere anasuro iya anaita i ari) siosa uwarama uyafitate Godinu sina naueta uwarabai fafitate we berafitaita wei. Moana meo uwarama yabairoma uyafitate meo sina webitate irufitaitaba moana uwarama emanu buribi anibitaitaba ibago yawoegou uforo wei. Nana yabai neno arama uteda i weda ainewaure Godinu sina wegou utedibebitara wei. Oya rarogonu eno utebitara wei. Awonana ya Godibai odimaro ya yawofisu wei.  
\v 32 Godinu sina wegou uforo yanu imueta ma kobererau ufite Danu we mune oeta uwarabai yanu kabesi odifisu wei.   
\p
\v 33-34 Mui amaranu oini wadiaba nana yaru ue diti ure owere ma owere utawa ue, nanu agema gaukara uteda naini nanu uwaranu ietaini wadiaini oiya utebitara wei.  
\v 35 Nanu utebitara i ari ufote i buna me uwara durua ufoita wei. Yesunu sina imuawe wei. Yesuma eno wei, i maeta amaranu yaruna derawere, i muneta amaranu yaruna otowaratu. Eno weiba iba imuawe Foroma wei.  
\v 36 Eno weiro yajigoma jejerigari utate guriguri utate uyata.  
\v 37-38 Uyatate i weda Foro yabatate koku uteda dawa nono da efeisi we imutate neno arama derawere uteda boutiro woure ane oita.   
\c 21  
\s1 Foro Jerusaremu suro ani  
\p
\v 1 I Efesa dubu su yawoeta uwara ekoisite boutiroma Kosi suro anisi. Ane aisite uyasi. Iroma uyasite ane Rouda su musi.  
\v 2 Iroma Fatara suro ane fasite yanu anisi bouti ekoisi. Ekoisite mui Fonisia orofaro aneta bouti ubarero amusite anisi.  
\v 3-4 Anebe Saifurasi mutumutu ereda serigari usite Siria orofaro anisi. Anebe ane Taira su musi. I bouti ego woure uwafuro odifitae iro ane inata. Ane inataro tanisite i su Godinu sina naueta uwara doberebe emabai uiki demurai sane aisi. Godinu Imumu Kotofuma Danu naueta uwaraba weiro i uwarama Foroba eno we kakara utate weita, Jerusaremu suro da ania weita.  
\v 5-6 I uiki me siniro i Godinu sina naueta uwara, emeini awetaboini koiniboro nesiama ya woure ane enea gigirariro oitaro maguaro yajigoma jejerigari uteda guriguri usite ario weisite yana bouti ubarero amusiro emana owetate suro anita.   
\p
\v 7-8 Taira su ekoisite Torimai suro ane fasi. Fasite i Godinu sina naueta uwarabai owiga usite aisite wau uriro Sesaria suro anisi. Ane fasite bouti ekoisite Firifinu su ubarero ane amusi. Firifina Godinu sina weta amara. Firifi demurai dawana i sewenini (7) afosoro durua ueta uwarabai oita amara. I amarabai yaubisi.  
\v 9 Firifi danu karu arumami fo (4). I arumamina awerasi munawa me karu ibeda Godinu sina fo webita.   
\p
\v 10 I suro ibisina Godinu mui we bou ueta amara Agabasima Judiaroma iro are fari.  
\v 11 Yabai farite Foronu yafa wadia kafa ari munite danu torowa buri age uwane tarite wei, Godinu Imumu Kotofuma wasu, i Jerusaremu Ju uwarama ewa wadia bobo amara mubitate, i aika uwaranu agero odifitaita wasu wei.  
\v 12 Eno weiro nausite i su uwaraini yaini Foroba weisi, iro da anebea i weda weisi.  
\v 13 Weisiro Foroma wei, aneba i waita wei? Eno utaitaba neno arama derawere utatane wei. Nanu neno nesia iro animane imutatane wei. Dibura odifitaitana idorogo nono na Yesunu ifuba na ma uifitaitana ina ido. Idorogo nanu neno nesia iroba animau wei. Foro eno weiro nausi.  
\v 14 Danu imueta kimu uiba ekoisite weisi, Yesu, Anu ununa ua weisi.   
\p
\v 15-16 Yanu Sesariaro ibeta kowa me siniro yanu ibaiabai fira usite Jerusaremu suro manebe manebe mane fasi. Moana Sesaria Godinu naueta uwarama ya Sesaria suroma Jerusaremu suro woure mane fata. Mane fatate Neisonanu suro oita. Neisona dawa Saifurasi mutumutu amara. Dawa bodere Yesu Kerisonu buribi anite awonaini daido inarebasu. I amara Neisonabai ibifene iba woure ane oita.   
\s1 Foro Jeimisi efie ani  
\p
\v 17 Jerusaremu suro fasiro i Jerusaremu Godinu sina naueta uwarama yaba ario derawere weita.  
\v 18 Etei mui kowaro Jeimisini i Godinu sina naueta yawoeta uwara yaubitaro emabai ane fasi.  
\v 19 Foroini yaini emabai ane fasiro Foroma ema nesia ario weite Godinu aika uwarabai gaukara utebi sina eno wei, Godima Danu imuetaini buna maiba i Ju me aika uwarabai Godinu sina nesia we inarebitararo i aika uwarama nauteda Godi imutebita wei.  
\v 20 Eno weiro nautate Godi we ma kobererau uta. Utate Foroba weita, kaka naua, Ju uwara faiyawere, tausani emanu naueta Godibai oita. I uwara nesia Mosesinu tarawatu imuegou utaita weita.  
\v 21 Moana uwarama emaba weita, Foro dawa unutawa Mosesinu tarawatu weita. Foro dawa unutawa yanu Ju uwaranu baeta weita. Foroma eno wasu weita. Yanu amarararatunu ofe da tuawe wasu weitaro ewa Ju uwarama nauta, Godinu sina naueta uwarama Forobai i sina eno weita.  
\v 22-23 Weitate iba anene ufeisi weita? Anu ewaro fareta sina naufitaitaba iba yanu sina naua weita. Yabai amara fo (4) Godiba we bou utaba awona me yaubinita.  
\v 24 I uwara muate emanu fuyo oeta oiya uaro emanu kofiri giriri ufita weita. Emaini dera dubu suro aniate Mosesinu kakara uroeta ogo eno uroa weita. Eno ufasuna i uwarama efitate Foro Mosesinu tarawatu uegou utasu imufitaitana ina ido webitaita weita.  
\v 25 Nono Godinu aika naueta uwara yanu imueta owawa oisite emabai siaia usi. Yanu imuetana eno, i meo godiba maeta fuyo ieta da iawe, egi onono da iawe, i mimi utaro onono farawa egi da iawe, dita yagera fareta da uawe. Yanu imuetana eno oisite Godinu sina aika naueta uwarabai siaia usi weita.  
\v 26 Weitaro Foroma naui. Etei mui kowaro Foroini i amara fo (4) dera dubu suro uruama anitate kakara uroeta ogoma urotate dera dubu su ubarero i fuyo oeta uwarabai amuta. I fuyo oeta uwarama emanu kakara kowa ido tutubari uiro kowa seweni (7) me sibiro emanu fuyo egi odifitaro efitae iba emabai amo fata.   
\s1 Foro dera dubu suro yabae budari uta  
\p
\v 27-28 I kakara kowa seweni (7) me sibie uiro moana Eisia orofa Ju uwarama Foro dera dubu su ubarero etate eme faiyawerebai ane Foroba wawei sina weita. I uwarama Foro budari utate eno weita, Isaraero uwara ya durua uawe weita. Ewa amarama yaini Mosesinu tarawatuini dera dubu suba siosa sina wasuro eme faiyawerema nautaita weita. Dana Guriki uwara dera dubu su ubarero woure odiba yanu kakara su ma siosa ui weita.  
\v 29 Auboko Foroini Efesa amara Torofimasi Jerusaremu natofo suro inarebitaro etate iba Foroma i Guriki amara yanu dera dubu su ubarero woure odi we imuta iba eno weitaro i Jerusaremu su uwara nesia nautate ubusi uyata.  
\v 30 Ubusi uyatate Forobai fatate agero muneda dera dubu su ubareroma wawaro ma youre anita. Wawaro anitaro i dera dubu su kasimu sau garari uta.  
\v 31-32 I uwarama Foro ma uifitae urebitana moana uwarama dera ami yawoeta amarabai fare weitaro nauite danu ami kafiteni uwaraini dawaini sau anita. Iro ane fatana i uwarama i dera ami yawoeta amara etate Foro urebita ido ekoita.   
\p
\v 33 Ami yawoeta dera amarama fare Foro budari uite weiro seni sadeima Foronu age uwane tarita. Ami yawoeta dera amarama wei, ewa amara ane usinu weite dawa abo amara wei?  
\v 34 Weiro moana uwarama mui wawei sina weitaro moana uwarama aika wawei sina weita. Emanu weroroka derawereba yawoeta dera amarama we imui, ane waita we imuite weiro ami uwarama Foro woure emanu suro ane oita.  
\v 35-36 I su adibai fataro i Jerusaremu su uwara ubusi derawere uyatate weita, i amara ma uia weitaba ami uwarama Foro woure eriro oita.   
\s1 Foroma danu ubi danu torowa ma boroyari  
\p
\v 37 Oitate su ubarero woure amufitae utaro Foroma ami dera yawoeta amaraba wei, aba sina wemau aba me wei? Dera ami yawoeta amarama neno kirifu uteda wei, a Guriki sina iwata utasu wei?  
\v 38 Weite wei, ana etei Ijifi amara aba me? Etei amarama mui odoro uraneta uwara fo tausani (4000) munite emaini gaemanini uranite eme ibawa orofaro woure ani wei.  
\v 39 Weiro Foroma wei, nana i amara me. Nana Ju amara. Nana Sirisia orofa Tarasu su amara. Tarasu suna derawere wei. Enoba ewa uwaraba sina wemane watane wei.  
\v 40 Eno weiro dera ami yawoeta amarama wei, anu sina wiaro naufita wei. Weiro Foroma adiro amo inarite age ramamiba weroroka ekoita.   
\c 22  
\p
\v 1 Weroroka muma utate ekoitaro Foroma Ju uwaranu sinaroma wei, babamutu kaka nabue nanu moko sina nauawe wei.  
\v 2 Weiro emanu ba sina nautate weroro mu utaro wei.  
\v 3 Nana Ju amara. Nanu bayama na Sirisia orofa Tarasu suro muniro ibebitara wei. Gameiriama na yanu abuamutunu tarawatu we mawetu utebiba Godinu tarawatu imuegou utebitara. Yana awona Godinu tarawatu imuegou utaita i ari imuegou utebitara wei.  
\v 4 Boderewere Godinu sina naueta uwara ma siosa uete emanu uieta daba doberete emeini awetaboini nesia dibura su ubarero woure fare ode.  
\v 5 Eno ueba i dera fuyo ode sina weta amaraini danu kanisoro uwara nesia iwata utaita wei. I kanisoro uwarama emanu imueta owawa oitate yanu ba Ju uwarabo woumane naba mata. Mataro Damasikosi suro i Godinu sina naueta uwara budari umate Jerusaremu suro woure amaro fanisi mafitae ane wei.   
\s1 Foro danu neno Yesubai mai sina wei  
\p
\v 6-7 Foro eno weite wei dabaro anete Damasikosi su famane anena ario derawere ureroma tararite na wokuku uiro sakairo ureiero sina tararite wei, Soro, aneba Naba ba me utasu wei?  
\v 8 Weina nana we, A anaiyade wero wei, Nana Yesu Nasareta Amara. Naba ba me utasu wei.  
\v 9 Naini nanu uwara i ario esirogo nanu uwarana i ario etate i sina nautawa uta.  
\v 10 Dana naba weiro nana we, Dera Waria Amara, ane umau wero wei, uyate Damasikosi suro aniaro mui amarama aba mamau gaukara sina webiro naufasu wei.  
\v 11 Weiro uyarero arioma diti basugari uiba nanu naiyemutuma nanu agero muneda Damasikosi suro woure anita, Foroma eno wei.   
\p
\v 12-13 Iro ane farero mui tarawatu yawoegou ueta amara, Ananaiasima nabai fari. I Ju uwara nesina Ananaiasiba weita, dana kobere amara webita. I amarama nabai farite wei, kaka Soro diti ea wei. Eno weiro daido i amara ere wei.  
\v 14-16 Ananaiasima naba wei, yanu abuamutunu Godima a mune odi. Godinu imueta iwata ufate Danu rorowarauini roatarau Amara efate Danu Amaranu sina Danu bebeturoma naufae iba odi weite wei, uwara nesiabai anibate Godinu sina webasu wei. Anu nauetaini ereta nesia emabai webasu weite wei, aneba yaubinu? Uyaro a babataito umaro anu neno neno ueta Yesubai we ma boroearo maitufisu wei. Ananaiasima naba eno weiya Foroma wei.   
\s1 Godima Foro Ju me aika uwarabai Danu sina ane webie yua wei  
\p
\v 17-18 Foroma weite wei, duburo owerete Jerusaremu suro farete dera dubu su ubarero amuete guriguri ue. Guriguri uete tubetube erero Yesu Kerisoma tubetuberoma wei, ewa uwarana emabai Nanu sina da naufitaitaba sau Jerusaremu su ekodiate ania wei.  
\v 19 Weiro we, Dera Waria Amara, uwara nesiana nanu ema Ju uwaranu dubu su ubarero amuetaini Godinu sina naueta uwara mune dibura ane oetaini nanu uraneta sina ema nesia iwata utaita.  
\v 20 Sitiwani Anu sina weta amara utaro danu onono itariro na ere. Emanu Sitiwani ureta ina nanu unu ido. I urebita uwaranu dei barueta nana yawoe we.  
\v 21 Wero wei, daba yafawere i Ju me aika uwarabai siaia umaro ania weiya wei.   
\p
\v 22-23 Foro i aika uwarabai eno webina i guruguru ubita uwara nautate nono weita, danu yabai ibetana aramawere uaro uifi weitate emanu wadia ma buruburu uteda konua mutate urero sata.  
\v 24 Eno utaba ami yawoeta dera amarama weiro Foro ami uwaranu su ubarero woure ane oita. Woure ane oitaro dera yawoeta amarama i uwaranu weroroka iwata ufie wei, isu muawete uawero ba sina webiro nauma wei.  
\v 25 Weiro buri age nama uwane taritaro Foroma ami kafiteniba wei, nana Romani amara, yana na koto utawa uitaba anu uretana kobererau aba siosawere, Romani uwaranu tarawatuba, Foroma wei.  
\v 26 Eno weiro kafiteni i ufie utebi ekodite ami yawoeta dera amarabai ane farite wei, a ane utasu wei? Etei amarana Romani amara wei.  
\v 27-28 Weiro dera yawoeta amara uyarite Forobai ane farite wei, ana Romani amara aba me weina aiwiade weiro wei, nanu ba orofa ekodete Romani orofa oi derawere oiya uete Romani amara sirete ibine wei. Weiro Foroma wei, nanu babana Romani amaraba nana Romani amara wei.  
\v 29 Eno weiba i Foro uwane tarieta uwarama ekoitaro ami dera yawoeta amara iyari. Dana weiba danu ami uwarama Foro uwane taritaro Foroma na Romani amara weiba iba iya uyari.   
\s1 Foro kanisoro uwaranu iboro inaibi  
\p
\v 30 Etei mui kowaro dera yawoeta amarama i uwaranu wawei weta iwata ufie uite weiro Foro ma uregari uta. Ami dera yawoeta amarama i fuyo oeta uwaraini i kanisoro uwara nesia yua weiro dawabai fataro Foro ma uregari utate woure i uwarabai oitaro emanu iboro inari.   
\c 23  
\p
\v 1 Foroma i kanisoro uwara eregou uteda wei, kaka nabue nanu sina nauawe wei. Boderewereroma awona nanu ueta sinetana kobererau, Godima erasuro nana iyarawa utatane wei. Nanu ueta sinetana kobererau wei.  
\v 2 Weiro i dera fuyo ode sina weta amara, Ananaiasima, i inaibita uwaraba wei, danu bebeturo uawe wei.  
\v 3 Eno weiro ido utaro Foroma wei, Godima a moko ufisu wei. A imueta sadei bobo amara iba anu wasu i ba utawa me sara utasu. Uteda Mosesinu tarawatuma na koto uteda wenuro na uritaba tarawatu ma siosa usinu wei.  
\v 4 Weiro i inaibita uwarama weita, aneba Godinu dera fuyo ode sina weta amaraba siosa sina wasu weita?  
\v 5 Weitaro Foroma wei, ari, kaka nabue, dana Godinu dera fuyo ode sina weta amara na iwata meba iba wene wei. Godinu bukaroma eno wasu, yanu uwaranu yawoeta amaraba siosa sina da wiawe wasu Foroma wei.   
\p
\v 6 Foroma i kanisoro uwara ereda we imui, moana uwarana Sadusi waita uwara, moana uwarana Ferosi waita uwara, we imuite wei, kaka nabue nanu sina nauawe wei, nana Ferosi amara. Nanu abuamutuna Ferosi uwara. Na uietaroma uyareta imutataneba yana na koto utaita wei.  
\v 7 I Sadusi uwaraini Ferosi uwaranu imuetana demurai me. Emanu imuetana aika maika.  
\v 8 (I Sadusi uwaranu imuetana eno, uietaroma uyareta mui daba me, aneru me, imumu me, eno we imutebita. Nono Ferosi uwarama i imueta nesia rarogonu imuegou utebita.)  
\v 9 Enoba yare yaranebita. I Ferosi tarawatu tisa uwarama uyatate weita, ewa amarana kobere amara dawabai siosa me. Aneruma dawaba sina wasuro wasu aba me, ya iwata me weita.  
\v 10 Eno weitaro derawere yaranebitate Foronu enabiraro inare enabiraro inare utate agero mune ma yourebita. Enoma enoma utebitaba dera ami yawoeta amara iyareda we imui, i amara abanaro ma saragari ufitaita we imuite weiro ami uwarama sau fatate i yaraneta uwarama ma beratate Foro emanu ami suro woure ane oita.   
\p
\v 11 Dumu siniro Yesuma Forobai fare inarite wei, iya da uyate buna ua wei. Auboko Jerusaremu su uwarabai Nanu sina wei, enanari Romani uwarabai Nanu sina webasu wei.   
\s1 Ju uwara Foro ma uifitae we tuta  
\p
\v 12 Wau uriro moana Ju uwarama we bou utate eno weita, ietaini ogo da ifete Foro ma uifeisina ogoini ieta ido ifeisi weita.  
\v 13-14 Uwara foti (40) eno utate i fuyo ode sina weta uwaraini emanu baeta uwarabai anitate weita, ieta da ifete Foro ma uifetema ido ifeisi, we bou utaisi weita.  
\v 15 Eno utaisiba yana wiawero dera ami yawoeta amarama Foro yabai woure afiro Foroba sina webitae irufitaro Foro afiro ma uifeisi weita.   
\p
\v 16 Foro danu teworero amara i Ju uwaranu we bou ueta sina nauite ami uwaranu suro Forobai anite i sina wei.  
\v 17 Weiro Foroma nauite mui kafiteni amaraba wei, ewa amarama dera ami yawoeta amaraba sina webisuba yawoeta amarabai woure ania wei.  
\v 18 Weiro mune yawoeta amarabai woure ane odite wei, ewa amarama aba sina webisu wei. I dibura amara, Foroma naba wenu ewa amarama ami yawoeta amaraba sina webisuba woure ania wenuba iba abai woure fanea wei.  
\v 19 Weiro i dera yawoeta amarama i amaranu agero mune aika odite wei, ane webasu wei?  
\v 20 Weiro i amarama wei, i Ju uwarama imueta daba demurai uita wei. Waidumu aba eno webitaita, Foro kanisoro uwarabai siaia uaro afiro mui sina webeisi webitaita wei.  
\v 21 Emanu sinana meo sinaba iba da naua wei, uwara foti (40) feare yaubifitaro Foro fafiro ma uifitaita wei. Anu sina naufitae awona ue bou utaita wei.  
\v 22 Weiro dera ami yawoeta amarama nauite wei, ewa sina mui amarabai da webaro weite siaia uiro i amara ido owere ani.   
\s1 Foro i dera gaemani amara Firikibai siaia uta  
\p
\v 23-24 Dera ami yawoeta amarama mui kafiteni amara sadei yua weiro fata. Dawabai fataro wei, burima aneta ami uwara tu aderedi (200), osi egiro yaure aneta ami uwara seweniti (70), wari bobo ami uwara tu aderedi (200) ue bou uawate dumu abanaro Foro muawete Sesaria suro Firiki, gaemani dera yawoeta amarabai anegou uawe wei. Foroba mui osi egi mawaro yaufite anibi wei.  
\v 25 Weite owawa eno yanai, na Korodiasi Risiama a kobere yawoeta amara Firikiba ario watane.  
\v 26 Nanu sina kikiratu naua.  
\v 27 Ewa siaia utatane amara, I Ju uwarama budari utate ma uifitae utaro nana farete i amara ma darete dana Romani amara iwata ue.  
\v 28 Nanu ununa aneba wawei sina weita iwata umane uete Ju kanisoro uwarabai i amara woure ane ode.  
\v 29 Woure ane odero i Ju uwarama emanu dubu su tarawatuba wawei sina weita. Yanu tarawatuba wawei sina wiawa utaba iba diburaro aneba ibifisu o aneba uifisu, ina ba me.  
\v 30 I Ju uwarama ewa amara ma uifitaita weitaro mui amakanuma nabai wenuro nauneba iba abai sau siaia utatane. I wawei weta uwara duburo fafitate abai dawaba wawei sina webitaita. Nanu sina ido me sininu.  
\v 31 Dera ami yawoeta amarama eno yanaite danu kafitenibai owawa mairo muta. Mutate dumu abanaro Foro mutate anita. Ane Atifatasi suro fatate aita.  
\v 32-33 Wai uriro i burima aneta ami uwara ido owetate emanu suro ataro i osiro yaure anita uwarama Foro woure anita. Ane Sesaria suro fatate i dera gaemani yawoeta amaraba owawaini Foro mata.  
\v 34-35 I yawoeta amarama owawa yawite Foroba wei, anu orofa aboro wei? Weiro Foroma wei, nanu orofana Sirisia weiro nauite wei, ido i wawei weta uwarama fafitaitana anu sina naumau wei. Danu uwaraba weiro Foro mutate Erodinu dera gaemani su ubarero woure oitate kasimu garari utate yawota.   
\c 24  
\s1 Ju uwarama Foronu ueta sineta wawei webita  
\p
\v 1 I kowa fai (5) me siniro dera fuyo ode sina weta amara, Ananaiasini baeta uwaraini mui koto sina weta amara Tetarasini Foro koto ufitae fata. I gaemani dera yawoeta amarabai fata.  
\v 2 Fataro yawoeta amarama weiro Tetarasima danu sina wawei webie uteda uyarite wei, Firiki, a kobere amara. Anu yawoetana kobererauba yanu ueta sineta ibetana kobererau wei. Ana kobere tarawatu yabai odinuba awona kobererau ibinisi wei.  
\v 3 Anu yawoeta kobererauba tenikiu derawere waisi wei.  
\v 4 A arama uosoba yanu sina kikiratu wemaro naua wei.  
\v 5 Ewa amara Foro dana ba me. Dana i orofa atata Ju uwaranu imueta ma siosa utasu wei. Dana i Nasareta waita uwaranu mui dera amara.  
\v 6-8 Dana yanu dera dubu su ma siosa ufie aniba iba i amara budari usi wei. Weite wei, yanu wawei sinana ba. Yanu ununa dawa yanu tarawatuma koto ufene usina i ami dera yawoeta amarama farite i amara bunawere yabairoma ma dare munite ani. Eno uite nono Raisusima eno wei, dawaba wawei weta uwara abai afene weiba iba farisi wei. I amara wenauearo webiro nauate yanu wawei sinana ba iwata ufasu wei.  
\v 9 Eno weina i Ju uwara nesia enanari weita.   
\s1 Foro danu moko sina Firikibai wei  
\p
\v 10 I gaemani dera yawoeta amarama Foronu sina naufie age fisu uiro Foroma uyarite wei, ana ewa orofa uwara oya faiyawere yawotebiba nanu neno kobererau umate nanu imueta sina moko wemau Foroma wei.  
\v 11 Kowa tuero (12) me sini, i buribi dera dubu suro anete guriguri ue wei. I kowa iwata utasu wei.  
\v 12-13 I kowaro Ju uwaranu dera dubu suro o dubu su suro o natofo suro na uranawa yaranawa, emanu imueta ma siosa utawa rairo aneba na koto utaita wei? Emanu abai naba wawei waita sinana ba me wei.  
\v 14 Nanu mui sina eno, etei amaranu mui wenu sina ina ba. I uwaranu meo waita dabana na imutatane wei. Yanu babamutunu Godibai guriguri utatane wei. I tarawatunu sina nesia na imutatane. I we bou ueta uwaranu sina nesia imutatane wei.  
\v 15 Godima uwara nesia, kobere uwaraini siosa uwaraini uietaroma ma uyafisu wei. I inaibinita uwaraini naini i yawoegou utaisi wei.  
\v 16 Godinu uwarabai na siosa utawa uegou utataneba neno kobererau ue ibine wei.   
\p
\v 17 Moana oya mui orofaro ibebe iroma nanu uwarabai fuyo odimane fare wei.  
\v 18 Farete Mosesinu kakara ueta uete dera dubu su ubarero amue wei. Amuero nabai eme me, weroroka wiawa ue wei.  
\v 19 Eno utebitarana moana Eisia orofa Ju uwarama na eta wei. I uwarama na etate budari utaba aneba na muta inu ubi fare anu iboro nabai wawei wiawa utaita wei.  
\v 20 Bodere kanisoro uwaranu iboro inarero nanu siosa uetade ewa uwarama ane eta wei?  
\v 21 Nanu sina demurairatu eno we, uietaroma uyareta na imutataneba iba awona na koto utaita we, Foroma wei.   
\p
\v 22-23 Firiki dawa i naueta uwaranu imueta iwataba i Ju uwaraba wei, awona koto kodiawe wei. Eno weite Foroba wei, ami dera yawoeta amara Risia fafisuna aba ane umate wemau weite danu kafiteniba wei, Foro dibura suro odiaro danu domayamutu fafitate ane mafitae ufitaitana mafitaita wei.   
\s1 Foro Firikini Durisiranu iboro inaibi  
\p
\v 24-25 Duburo Firikima weiro Foroma Firikini danu Ju aweta danu ifuna Durisira emabai fari. Fare emaba sina bunawere wei, Yesu Keriso imuawate emebai kobererau uawate yanu unu torowa da uawaro Godima duburo fafite koto ufisu wei. Eno weiro Firikima iya uyarite wei, aniaro nanu odimau kowaro wemaro fafasu wei.  
\v 26 Firiki danu imuetana eno, Foroma Firiki dawaba oi mafisua we imuteda iba Foro webiro woroworo dawabai farebiro sina sina webisi. Firikini Foro eno utebisi.  
\v 27 Oya sadei me siniro Fosia Fesama Firikinu kabesi muni. Firikima i Ju uwara garo uite wei, Foro dibura suro ibifisu wei. |L  
\c 25  
\s1 Foro Sisabai anibie wei sina  
\p
\v 1 Fesama fariro kowa rarogonu me siniro Fesama Sesaria suroma Jerusaremu suro mani.  
\v 2-3 Iro mane fariro i dera fuyo ode sina weta uwaraini dera Ju uwaraini dawabai fatate Foroba sina wawei weitate nui weita, Foro siaia uaro Jerusaremu suro fafi weita. Emanu ununa feare yaubebe Foro ma uifitae iba eno weita.  
\v 4-5 Eno weitaro Fesama wei, Foro Sesaria suro yaubinu wei. Na iro tanimaro yanu dera uwaraini iro tarafitate danu siosa ueta sina wawei webitaita wei.   
\p
\v 6 Fesama Jerusaremu suro ibebe kowa eita (8) me siniro ekodite Sesaria suro tarani. Wai uriro Fesama danu koto koruro anite danu yaureta deiro yaurite wei, aniawete Foro woure arawe weiro ane woutate fata.  
\v 7 Foro ido fariro i Sesaria suro tarata Ju uwarama Foro ode kara utate sina faiyawere wawei weitarogo emanu sina ba meba Fesa emanu sina nautawa ui.  
\v 8 Ju uwarama weitaro Foroma moko sina eno wei, i Ju uwaranu tarawatuini dera dubu suini gaemani dera yawoeta amara Sisaba siosa utawa utebitara wei.  
\v 9 Fesama i Ju uwara garo uite Foroba wei, Jerusaremu suro manibero aba sina wawei nabai webitaita. Eno ufasua aba me wei?  
\v 10 Weina Foroma me weite wei, awona Sisanu kotoro inaibine, ina kobererau wei. I Ju uwaraba siosa utawa uero a iwata utasu wei.  
\v 11 Na siosa uteda uieta kerere umarona uimane na iyarawa uietaba kerere mena da uimau wei. Emanu agero na da odia wei. Nanu unu dera amara Sisabai animau deina ido wei.  
\v 12 Fesaini danu kanisoro uwaraini sina we matatate Fesama Foroba wei, Sisabai anibae wenuba Sisabai anibasu wei.   
\s1 Foro Agirifaini Benisinu iboro inaibi  
\p
\v 13 Moana kowa me siniro Kini Agirifaini danu aweta Benisini Sesaria suro fatate Fesa ario weita.  
\v 14 Sesaria suro kowa faiyawere ibebitaba Fesama Foronu dibura sina emaba eno wei, Firikima mui amara, Foro, dibura suro odiro ibebe ibebe awona dibura suro me yaubinu wei.  
\v 15 Na Jerusaremu suro ane farena, i Ju uwarama i amaraba nabai wawei weitate i amara uaro uifi weita.  
\v 16 Weitaba we, yanu Romani uetana eno, dibura uwaraini wawei weta uwaraini sina sina we matafitaita, mena dibura oeta amara wawei weta uwaranu agero me sara da odifeisi we wei.   
\p
\v 17 Weite wei, i Ju uwarama i amara koto ufitae fata. Fataro ido wai uriro nana wero i uwaraini Foroini koto ufitae nabai are fata.  
\v 18 Fatate emanu wawei sina weitana Foronu siosa ueta sina wiawa emanu aika weita.  
\v 19 Emanu dera dubu su siboro ueta sina wawei weita. Eno weita, Yesu Dawa me sini weitaro Foroma wei, Yesu uitawa Dawa me ibinu wei.  
\v 20 Eno weitaba ane umau na iwata meba, Foroba we, Jerusaremu suro anibero iro wawei webitaita. Eno ufasu aba me?  
\v 21 Wena Foroma me weite wei, nanu ununa Sisabai animau wei. Eno weiba wero owetate dibura suro woure oita. Duburo Sisabai siaia umaro anibisu wei.  
\v 22 Fesama eno weiro Agirifama wei, i amaranu sina naumane watane wei. Weina Fesama wei, waidumu naufasu wei.   
\p
\v 23 Wai uriro Agirifaini Benisini werei werei utaro emanu dera ami uwaraini i koto su ubarero amuta. Amutaro Fesama weiro ane Foro woure fata.  
\v 24 Fesama yare wei, Kini Agirifa, ya uwara nesia ewa amara eawe wei. I Ju uwara nesia Jerusaremu su uwaraini ewa su uwaraini ewa amaraba sina nabai wawei weitate eno weita, i amara uaro uifi weita.  
\v 25 Weitaro dawabai kerere meba aneba uifisu? Daba aika Sisabai animau weiba dawa siaia umau wei.  
\v 26 Siaia uteda owawa anene yanamate nanu dera amarabai siaia umau wei? Na dawa wawei weta sina mena wiawero Foro naufite webiro naufe wei. Kini Agirifa danu sina nauate wiaro enanari owawa ue odimau wei.  
\v 27 Wawei weta daba meba na unutawa dawa Sisabai me sara siaia ueta wei.   
\c 26  
\s1 Foro danu moko sina Agirifabai wei  
\p
\v 1 Agirifama Foroba wei, anu ikiki wiaro naufe wei. Foroma uyarite age sanite ramameda danu moko sina eno webi.  
\v 2 I Ju uwarama naba wawei webitaba awona abai nanu moko sina wemane yaru uteda nenorau une wei.  
\v 3 Ana i Ju uwaranu baeta uraneta yaraneta nesia iwata uegou utasuba nanu sina nauegou ua wei.   
\p
\v 4 Nanu suini Jerusaremu suro ibebitaraba i Ju uwarama nanu ueta sineta kikiraturoma iwata utaita wei.  
\v 5 I Ferosi uwaranu kimu imueta na munegou utebitara. Ina i uwara iwata utaitaba eno aba webitaita aba me wei?  
\v 6-7 Godima yanu abuamutuba eme uietaroma uyareta we bou ui. I we bou ueta na imutatanero i Ju uwara nesia ainewaure guriguri uteda imuegou utaita wei. Eno utaitate nono na iba koto utaita wei.  
\v 8 Godima uieta uwara uietaroma ma uyarasuro aneba imuteda kirifu utaita wei?   
\p
\v 9 Bodere nanu imuetana eno, Yesunu buribi aneta uwaraba ba mewere umau, ina kobererau na eno we imue. Eno we imuete enanari utebitara wei.  
\v 10-11 I fuyo ode sina weta uwarama weitaro nana Godinu sina naueta uwara Jerusaremu dibura suro mune ode. I uwarama Godinu sina naueta uwara ma uifitae weitaro nana aiwia, ma uiawe weya wei. Nana ubusi derawere uyarete Godinu sina naueta uwara Godiba siosa sina webitae uete emaba siosawere ue. Jerusaremu suroma aika su su aboro aboro eno utebitara wei.  
\v 12 Iba i fuyo ode sina weta uwarama naba owawa matate ane ua weitaro na Damasikosi suro ane.   
\s1 Foro danu neno Yesubai mai sina nono wei  
\p
\v 13 Foroma nono wei, na anebitarana kowa otoro ario derawere, kowana danu ario kikiratu. Kini nanu sina naua, i ario derawere ureroma tararite naini nanu uruama aneta uwaraini wokuku ui.  
\v 14 Eno uiba ya nesia sakairo dowasina Ju uwaranu sinaroma mui sina weiro naue. I sina eno wei, Soro, aneba Naba ba me utasu weita wei, ana Godini uranasuba oferi wourasu wei.  
\v 15-16 Weina a anaiyade wero Yesuma wei, Nana Yesu. Naba ba me utasu weite naba wei, uyaro a siaia uma wei. Abai fanete Nanu sina weta amara odine. Nanu gaukara amara odineba siaia umaro anibate i orofa atata uwaraba anu awona eretaini duburo ereta webaro naufitaita wei.  
\v 17-18 A durua umaro aba siosa ueta Ju uwaraini aika uwaraini da ufitaita. I uwarabai anibate nanu sina webaro emanu ditima efitate dumu daba ekodifitate Godibai anibitaita wei. Eno ufitaro Godima emanu neno neno ueta mubite imutawa ufite ema Nanu naueta uwarabai odifisu Yesuma Naba wei, Foroma i sina eno wei.   
\s1 Foro danu gaukara sina wei  
\p
\v 19-20 Foroma eno weite wei, Kini Agirifa, i ure tubetube ereta erete enanari ue. I Damasikosi su uwarabai ko we. Nono Jerusaremu uwaraba wete nono duburo i Judia uwaraini aika uwarabai ane eno we, yanu neno neno kodiawete Godibai aniawe we. Godibai aniboitaba siosa ueta kodiawete kobere ueta torowa uawe we.  
\v 21 Eno weba i Ju uwara na dera dubu suro budari utate na ma uifitae uta wei.  
\v 22 Godima na durua utasuba awona ewado inaibeda yabai dera uwaraini otowa uwarabai Godinu sina watane. Mosesini i we bou ueta uwarama weitaro enanari watane wei.  
\v 23 I uwarama weita, I Mesaia oferi derawere woufite Dawa ko uietaroma uyafite Ju uwaraini aika uwarabai ario derawere odifisu wei.  
\v 24 Foroma danu moko sina eno weiro Fesama derawere wei, Foro, ana gogore usinu. Sikuru derawere utebiba gogore usinu wei.  
\v 25 Weiro Foroma wei, O kobere amara Fesa, nana gogore me wei. Na ba sina watane wei.  
\v 26 Nanu watane sina Kini Agirifa a iwata utasu. I ueta nesia dumuro utawa uite arioro uiba a iwata utasu wei.  
\v 27 Kini Agirifa, i we bou ueta uwaranu sina imutasu aba me weite wei, a imutasuna na iwata wei.  
\v 28 Weiro Agirifama wei, anu ununa nana nanu naueta Yesubai sau odimau wei.  
\v 29 Foroma wei, sau odifasu aba kekerama odifasu ina ido. Nanu ununa aini ewa nautaita uwaraini nesia yanu naueta Yesubai odifoita wei. Na ari siboita, nanu dibura budari uetana me, nono ba naueta uwara siboita wei.  
\v 30-31 Foroma eno weiro Kini Agirifaini Fesaini Benisini emanu uwara nesia uyatate wawaro anitate emanu torowa weita, etei amarabai kerere me, uieta kerere me, dibura kerere me weita.  
\v 32 Weitaro Agirifama Fesaba wei, dana Sisabai animau da webirona awona dawa dibura ekodifite wawaro anibie wei.   
\c 27  
\s1 Foro boutiroma Romani suro ani  
\p
\v 1 Yanu Itaria orofaro aneta ue bou utate Foroini moana dibura uwaraini mui ami kafiteniba mata. I kafiteninu ifuna Juriasi. Dana Sisa Agasitasi waita danu ami amara.  
\v 2 I amaraini boutiro amusi. I boutina Adamitiuma suroma fari. Nono owefite Eisia orofa su suro mubie ani. I boutiro yaini mui amaraini danu ifuna Aritikasi, dana Masadonia orofa Tesoronaika su amara, dawaini i boutiro amusite anisi.  
\v 3 Wai uriro anebe Saidoni su fasi. Juriasima danu imueta derawere Forobai odiro Foroma boutiroma itarite suro ani. Danu domayamutubai yadama ani.  
\v 4 Ane farite iroma owere ariro nono boutiro anisi. Oyau derawere fariba Saifurasi mutumutu dubenaro anisi.  
\v 5 Anebe anebe ane enea abanaro fasi. Iroma anebe Sirisiaini Famufiria su serigari usite amusite Risia orofa Maira su ido fasi.  
\v 6 I ami kafitenima mui Itariaro aneta bouti dobere ane atanite ya nesia woure i Arekisana suroma fari boutiro odi.   
\p
\v 7 Maira su ekoisite anisi. Oyau derawere fariba moana kowaro kekerama anebe anebe Sinadasi su serigari usi. Oyau derawere farite yanu aneta daba garari uiba Kuriti mutumutu iboro Saramone su baworo fare anisi.  
\v 8 Yanu anetana kimuwereba kekerama anisi. Kekerama anebe i kobere Dera Boutinu ibeta orofaro fasi. Rasia suna i orofabai.   
\p
\v 9-10 Yanu aneta kowa kekerama anebe sau ane farawa usiba yanu mui aneta dabana aramawere. I Godima Isaraero uwara Ijifiroma woure aneta ogaro me siniba iba bouti kowana me. Kowa serigari uiba Foroma wei, yawe, nanu imuetana eno, anibeisina yanu boutini egoini arama ufitaro moana uwara ofe arama ufiro uifitaita wei.  
\v 11 Eno weiro ami kafiteni amarama nautawa uite i bouti yawoeta uwaranu sina naui.  
\v 12 Oyauini obi kowa fariba yanu bouti ibeta orofa ba meba mui Kuriti mutumutu bouti ibeta orofa, Finiki su mubete iro ibifene weita.   
\s1 Enea abanaro oyabibi fari  
\p
\v 13 Kiki oyau farite kobererau uiro we imuta, yanu aneta kowa farinu we imutate emanu bouti anika ma youtaro Kuriti magua gigirari anisi.  
\v 14 Anebisiro oyabibi derawere farite enea abanaro bouti woure ani.  
\v 15 Bouti ma owefitae utana enanari utawa uiba ekoitaro oyabibima bouti ure ma berairo ani.  
\v 16 Anebe anebe Kauda mutumutu dubenaro anisite yanu ma yousi dinigi ma youre bouti deiro oisi.  
\v 17 Bouti saragari uosoba imusite kimu na musite bouti uwane ma kimu usi. I bouti yawoeta uwarama weita, Afirika maguaro ma berafiro anibene weitate iya uyareda i dei farai mune wo tarata. Eno utaro oyabibima bouti ma berairo anisi.   
\p
\v 18 Wai urina ufe derawere uyariba i boutiro uwarama ego mu sataro enearo itari.  
\v 19 Etei mui kowaro bouti ibaiabai nesia ane ane mune sataro enearo itari.  
\v 20 Oyabibi kowa faiyawere farebe kowaini sakaraini muinaini ba me uiba yana imusina uifeisi eno we imusi.   
\p
\v 21-22 Kowa faiyawere ieta itawaba Foroma i uwarabai farite wei, yawe, aneba nanu auboko we sina nautawa uta? Aneba Kuriti orofa ekoitaba ewa ibaiabai nesia abe sanaita weite wei, iya da uyawete neno kimu uawe wei. Yana da uifeisi wei. I bouti torowa arama ufisu wei.  
\v 23 Ewa dumuro Godinu aneru nabai farinu wei. I Godi, na imuegou utatane wei.  
\v 24 Danu aneruma nabai farinute wenu, Foro iya da uya wenu, Sisabai anibate danu iboro inafasu wenu. Ewa boutiro anaita uwara nesia da uifoita wenu.  
\v 25 Eno wenuba enanari ufisu, na imutatane, Foroma weite wei, ibago buna uawe wei.  
\v 26 Mui mutumutu maguaro bouti amufisu wei.   
\p
\v 27-28 Uiki sadei me siniro Eidiria enearo me anisi. Dumu abanaro bouti gaukara uwarama we imuta, magua baworo we imutate emanu towoeta na sataro enea ubarero itari. Itariro danu yafa etana foti (40) mita eta. Bouti aniro nono sataro enea ubarero itariro etana toti (30) mita eta.  
\v 29 Etate we imuta dera gebiro ane amufeisi we imutate anika fo (4) mune jogono afu enearo sataro itari. Itariro bouti kimu ui. Emanu unu kowa amufie iba guriguri uta.  
\v 30 Moana bouti gaukara uwarama bouti ekodifitae dinigi nama doitate oitaro itari. Itariro weita, mui anika bouti iboro sabeisi irue weita.  
\v 31 Eno weitaro Foroma ami kafitenini ami uwaraba wei, i uwara anibitaitana ya nesia uifoita wei.  
\v 32 Weiro ami uwarama na umane tutaro dinigi ani.   
\p
\v 33-34 Waibai Foroma wei, uiki sadei ieta itawa ibinitaba ieta iawe weite wei, buri age ofe ubu arama da ufisu. Ieta iawete buna uawe wei.  
\v 35 Eno weite i uwarabai buredi munite Godiba we ma kobererau uite buredi ma biraite i.  
\v 36 Eno uiro etate ido ieta ita.  
\v 37 I boutiro anita uwara nesia tu aderedi seweniti sikisi (276) uwara etate ita.  
\v 38 Ieta ie me sitate uiti tai mutate enearo sataro bouti fe ui.   
\s1 Bouti enearo saragari ui  
\p
\v 39-40 Wai urina magua etate i orofa iwawa uta. Utate i wanasi etana kobere magua eta. Etate iro anibitae weitate anika umane tutaro ibi. Eno uteda jogono ma owereta jawe nesia na uregari utate ibo farai sataro maguaro anisi.  
\v 41 Ane bouti ibo enea ubare gebiro duboro amusiro bouti kimu ui. Ufe derawere boutinu jogonoro urebiro bouti berugari ui.  
\v 42 Ami uwarama emanu kafiteniba weita, dibura uwara me sara aine anibitaitana ma uifeisi weita.  
\v 43 Weitaro ami kafiteni dawa unutawa Foro uieta iba kodiawe weite wei, ogo iwata uwara itawete aine aniawe wei.  
\v 44 Ogo iwata me uwara i boutiro ibinu ibaiabai o ana o ane ane mune sawete deiro aine aniawe wei. Weiro eno utate i uwara nesia maguaro ane amue me sita.   
\c 28  
\s1 Mota mutumuturo ibebita  
\p
\v 1 Maguaro fasite i mutumutunu ifuna Mota nausi.  
\v 2 I Mota uwarama yaba kobererau utebita. Obi matebiro iwu farebiba ina moatate yaba ario weita.  
\v 3-6 Foroma ina mune inaro odina awe towi ina buburaroma amuite Foronu agero aite siroro ubiro Foro age fisu uiro itari. I su uwarama etate weita, ewa amarana ma uieta amara, ogoro imu uitawa uiba awonana uifisu weita. Danu age wawafiro dowafite uifisu weitate yawotebitana me. Foro merau ibiba weita, dana ma uieta amara me, dana mui godi weita.   
\p
\v 7 I mutumutu dera yawoeta amara Fubiasinu nasinina baworoba dana arawe weiro dawabai anisi. Kowa rarogonu yaba ieta nata nata utebiro itebisi.  
\v 8 Fubiasinu damama ofe derawere wouri. Ofe wakikiwere wouriba Foro dawabai anite guriguri uteda age danu ofe deiro odiro wiroi.  
\v 9 Foro eno uiba i ofe woureta uwara nesia Forobai fatate wirota.  
\v 10 Enoba i uwarama yanu aneta kowaro me maeta faiyawere boutiro oita.   
\s1 Mota mutumuturoma Romani suro anita  
\p
\v 11 Sakara rarogonu me siniro ya anisi. Yanu boutina Arekisana suroma fari bouti. Oyabibi kowaro iro ibebe anibie ui. Danu towanana Sokaka Amara sadei ari. Ina emanu godi sadeinu ereta tanana.  
\v 12 Ya ane Sirakiu suro fasite kowa rarogonu iro aisi. Kowa rarogonu me siniro nono anisi.  
\v 13 Bebeuwere ane Regiuma suro fasite nono iroma anisi. Ane aisiro wai uriro kobere oyau fariro anisi. Ane Futiori suro fasi.  
\v 14 Fasite bouti iro ekoisi. Godinu sina naueta uwara dobere ane atasi. Atasiro bana weitate uiki demurai ibiawe weitaba emabai kowa seweni (7) ibisi. Kowa seweni me siniro Romani dabaro burima duero anisi.  
\v 15 Anisina Godinu sina naueta uwarama nautate atafitae fata. Fatana moana uwarama Kabaru Rarogonu kabesiro yawotebitaro moana uwarama are Afiasi guruguru ueta kabesiro atafitae are fata. Fataro Foroma erite Godi we ma kobererau uite neno kimu ui.   
\s1 Romani suro ibebita  
\p
\v 16 Romani suro fasiro ami kafitenima Foroba wei, anu suro ibiaro mui ami amarama a iro yawofi weiro eno ui.   
\p
\v 17 Kowa rarogonu me siniro Foroma weiro i Ju uwaranu yawoeta uwara dawabai fata. Fataro emaba wei, kaka nabue, nanu sina nauawe wei. Yanu su uwaraba ba me utawa uete yanu babamutunu baetaba ba me utawa uero Jerusaremu su uwara na me sara mutate Romani uwaranu agero oitaro na ewaro are.  
\v 18 I Romani uwarama na koto utate nabai kerere mero uieta kerere meba na ekodifitae weita.  
\v 19 Eno weitaro Ju uwarama dua sina weitaro nana we, Sisabai animane watane we. Sisabai animate nanu Ju uwaraba meo wawei da wemau wei.  
\v 20 Ewa sina wemane wenero iba farita wei. Ju uwarama Mesaia fafisu imutaitaro nana Mesaia fari imutataneba na dibura amara wei.  
\v 21 Weiro weita, Judia uwarama anu sina owawa matawa utaro yanu Ju uwara yabai fatate aba wawei wiawa uta weita.  
\v 22 I Godinu sina naueta uwaranu sina wiaro naufe weita. Uwara nesia i Godinu sina naueta uwaraba wawei webitaba iba wiaro naufe weita.   
\p
\v 23 Eno weitate kowa oitate anita. I kowa fariro Foronu suro eme faiyawere fata. Fataro Foroma emaba waura warairoma yawiro we mawetu utebi. Mosesinu bukaini i we bou ueta uwaranu bukaini munite i bukaroma Godinu yawoeta orofaini Yesuini we mawetu utebiro nautebita.  
\v 24 I uwara Yesu imufitae iba eno uiro moana uwarama naue imue utaro moana uwarama nautawa utaba iba yaranebita.  
\v 25-26 Yarane me sitaro Foroma wei, Godinu Imumu Kotofuma weiba i we bou ueta amara Isaiya enanari eno wei,  
\li1 i Ju uwaraba wia, naufote efoitana iwawa ufoita wia.  
\v 27 Yanu neno kimuwere, yanu ome nautawa, yanu diti erawaba iba imutawa ufoita. Ereta, naueta, wiroeta, ya unutawaba Nabai da afoitana ya da ma wiromau wia,  
\p Isaiyama eno wei.  
\v 28 Foroma eno weite wei, ewa sina nauegou uawe wei, Godima Danu wiroeta i aika uwarabai matasuba mubitaita wei.  
\v 29 Eno we me sinina i Ju uwara emanu emanu bebetuma bunawere urane yarane ue mataneda anita.   
\p
\v 30 Foroma danu su oiya uite oya sadei iro ibebi. Danu sina weta daba garari utawa utaba uwara faiyawere dawabai fata.  
\v 31 Fataro Foroma emaba Godinu yawoeta orofa sinaini Dera Waria Amara Yesu Kerisonu sina wegou uiro nauta.