\id 2TH NT0097.2T Yareba N.T. - Weimer 9-JAN-87 \h 2 TESORONAIKA \toc1 TESARONAIKA SU UWARABAI MUI OWAWA \toc2 2 TESORONAIKA \mt1 TESARONAIKA \mt2 SU UWARABAI \mt2 MUI OWAWA \c 1 \p \v 1 Na Foro ewa sina ya Tesoronaika uwaraba owawa ue odatane. Sairasini Timotini nabai ibeda yana Baba Godini yanu Dera Waria Amara Yesu Kerisonu uwara yaba ario waisi. \p \v 2 Yanu Baba Godini yanu Dera Waria Amara Yesu Kerisoini Emana ya kobererau durua ufisiro wesarau ibifoe watane. \s1 Foro Godiba we ma kobererau ui \p \v 3 Naiyemutu, yaba we ma kobererau utebaisina ina kobererau. Godi imueta faiya faiyawere imutaitate ya neno arama faiya faiyawere ue matanaitaba iba Godibai yaba we ma kobererau utebaisi. \v 4 Moana uwarama ya Tesoronaika uwaraba siosawere utaitaro yana i uetaba arama utawa Godi ekodawa, Godi imuegou utaitaba Godinu naueta uwara nesiabai ina ba webaisi. \s1 Godima yanu kobere uetaro ya ma saragari ue odasu \p \v 5 I uetaroma Godima yaba we mawetu utasu. Ina eno, emema yaba siosa utaitana i siosa uetama Godinu yawotasu orofaro aniboe ue bou utasuro Godima ereda ina ido wasu. Dawa eno wasuba ya Danu orofaro aniboitaba ma kobererau ue bou utasu. \v 6 Godima eno utedana kobererau utasute i yaba siosawere utaita uwaranu fanisi maeta ue bou utasu. \v 7-8 Ya siosawere munaita uwaraba wemaro nauawe. Yanu Dera Waria Amara Yesu ureroma inaro Dawaini Danu buna aneruini fafisuna Godima yaini ya uwaraba yaba imoieta mafiro imoifeisi. Yanu Dera Waria Amara Yesu fafite i Godi iwata me uwara, yanu Dera Waria Amaranu kobere sina nautawa utaita uwara emaba fanisi mafisu. \v 9-10 I uwarama i siosawere kabesiro ane me ibene ibene ibeda yanu Dera Waria Amaranu ibo nawata nono da efitaita. Yesu ido fafiro i uwarama Danu kobere araeta bunawere da efitaro Yesunu kobere naueta uwarama torowa Dawa efitaita. I kowaro Godinu naueta uwarama Yesu Kerisonu ifu we ma derawere ufitaro Danu naueta uwara nesia emana Dawaba raga webitaro emanu sina naufie fafisuna yaini Danu sina nautebitaba Dawaini fafoita. \s1 Foroma Godibai Tesoronaika uwara ma buna ufie guriguri utebi \p \v 11 I wasu sina imutedana Godibai guriguri uteda eno webaisi, Godima ya we mune odiba yanu imueta ma derawere ufite ya ma kobererau ufiro yana imuegou uteda kobererau uforo ya kobere uwara webisu eno webaisi. \v 12 Godini Yesu Kerisoma ya kobererau durua utaitaba ya eno kobererau uforo uwarama efitate yanu Dera Waria Amara Yesu Kerisonu ifu we ma derawere ufitaita. I kowaro Yesuma ya Danu torowabai mune odifite yanu ifu we ma derawere ufisu. \c 2 \s1 Tarawatu ma siosa utaita uwaranu sina \p \v 1-2 Naiyemutu, yanu Dera Waria Amara Yesu Keriso nono owere ewaro fafiro Danu iboro inafeisi. I sina wemaro nauawe. Yanu Dera Waria Amaranu kowa farinu waitaba da nauawete neno siosa da uawe. Moana uwarama Dera Waria Amaranu fafisu kowaba we bou utaisiba iba waisi webitaita aba ewa owawa Foroma siaia usinuba yawitaisi webitaitana ina ba sina meba da nauawe. \p \v 3 Moana uwarama ya irufitaitana emanu sina da nauawe. I kowana me sara da fafisu. I kowa fafie ufisuna eme faiyawere Godi ekodifitate siosawere ufitaro i ba me ueta sineta amara, i siosawere kabesiro anibisu amara ido botai fafisu. \v 4 Dawa fafite i ba me godi nesiaini emanu siboro ueta nesia mu sabite Godinu dera dubu su amufite yaufite nana Godi eno webisu. \p \v 5-6 Yabai ibeda i sina nesia wero imutaita aba me? Ya iwata, Dawa i siosa ueta sineta amaranu fareta daba garari utasuba iba awona farawa. Danu kowa ido fafisuna i siosa ueta sineta amara dawa ido fafisu. \v 7 I kiwuma ba me ueta awona utasu. Nono dawa da fafiro danu daba garari utasuba Dana ewa orofa ekodifite anibisuna i ba me ueta sineta amara ido fafisu. \v 8 I siosa ueta sineta amara dawa fafiro nono duburo Godima fafite Danu bebetu oenama ina ari i amara yafisu. \v 9 I ba me amara dawa seitaninu amara. Dana seitaninu bunama gaukara ufite ereta derawere emeba ue gagau ufite meo buna ueta derawere ufisu. \v 10-11 I ba me amarama i siosawere kabesiro anibitaita uwara daido irufisu. I uwarana Godinu ba sina nautawa, Godinu sina unutawa, Godinu ma wiroeta munawaba Godima emanu imueta da ma owefisuba i ba me ueta amaranu meo sina nauegou daido ufitaita. \v 12 I uwarama meo sina naufitate Godinu ba sina da naufitate emanu unu ba me uegou ufitaitaba Godima ema koto ufite fanisi mafisu. \s1 Godima ya ma owere mubie iba isi sane odi \p \v 13 Naiyemutu, yanu Dera Waria Amarama ya neno arama utasu. Godima ya ma wirofie iba botai tutubari ui kowaroma ya we mune odi. Eno uite Dana ya ma wirofie Danu Imumu Kotofu yanu neno ubarero odiro itarite ya mune Godibai ma taka ue odiro Danu ba sina nauta. Enoba Danu sinaini Danu Imumu Kotofuma yanu neno ma kakaraini roatarau ui. Eno uiba Godibai woroworo eno we ma kobererau ufene utebaisi. \v 14 Godima naini nanu uwaranu bebetuma Danu kotofu sina webene ui. Yana Godinu kotofu sina yaba weisiro Godima yaba yua weiro nauta. Godima ya siaia uiro yanu Dera Waria Amara Yesu Kerisonu araeta muboe iba waya anisi. \p \v 15 Naiyemutu, neno kimu uawete inare kimu uteda yanu owawaro ba sinaini yanu bebetuma waisi ba sinaini eawete enanari uawe. \v 16-17 Yanu Baba Godi, Dawa ya neno arama uteda yaba me ibene ibene ibeta mai. Dawaini yanu Dera Waria Amara Yesuini ya uwaranu neno ma buna ufisite ya durua ufisiro ane ane kobererau ufote weboe watane. \c 3 \s1 Yana Godibai guriguri uawero Dana ya durua ufi \p \v 1 Naiyemutu, nanu dubu sinaratu eawe. Godibai yaba guriguri uawero yanu Dera Waria Amaranu sina webero uwara faiyawere naufitate kobererau ufitaita. Yana nautate kobererau uta, enanari i uwara naufitate kobererau ufitae watane. \v 2 Moana uwarama Godi imutawa utaita. I siosa uwarama naini nanu uwara muotoba Godibai yaba guriguri uawe. \v 3 Yanu Dera Waria Amarama ya ekodawa Dawa ya ma buna ufite ya durua ufisuba seitanima yaba siosawere da ufisu. \v 4 Yanu bunawere waisi sina yana awona utaita enanari nono duburo ufoita. Yanu Dera Waria Amara imutaisiba ya eno utaita, ina ya iwata utaisi. \v 5 Yanu Dera Waria Amarama Godinu neno arama uetaini Yesu Kerisonu inare kimu uetaini we mawetu ufiro iwata ufoe iba watane. \s1 Ya nesia gaukara ufe \p \v 6 Naiyemutu, ewa sina yanu Dera Waria Amara Yesu Kerisonu ifuro we kakara utaisi. Godinu mui naueta amarama yanu weisi gaukara sina nautawa ofe ejiwa uteda gaukara utawa me ibinuba dawabai owiga da ane uawe. \v 7 Yabai ibedana yana me ibawa gaukara utebisi. Yanu bunawere gaukara ueta enanari ufoita ya iwata utaisi. \v 8 Yabai ibedana ieta me itawa oima oiya uteda itebisi ya ma arama uoisiba dumuini kowaini gaukara utebisi. \v 9 Yana Godinu gaukara uwaraba yanu ieta me ifeisina ifeisi. Nono ina ya unutawa. Yanu ueta enanari ufoe iba gaukara utebisi. \v 10 Yabai ibedana eno weisi, mui amarama gaukara utawa utasuna ieta da mawero da ifi weisi. \v 11 Yabai moana uwarama gaukara utawa moana uwaranu ueta sineta me sara ere webaita waitaro nautaisi. \v 12 I uwaraba yanu Dera Waria Amaranu ifuro we kakara uteda buna sina eno waisi, me sina torowa weta kodiawete yanu gaukara uawete yanu ietaini ibaiabaini oiya uawe waisi. \p \v 13 Naiyemutu, kobererau torowa utebe ejiwa da uawe. \v 14 Yabai mui amarama ewa owawaro sina da naufisuna dawa eawete dawabai owiga da uawero dawa maru ufi. \v 15 Dana yanu wasai amara meba dawaba siosawere da uawe. Dawa yanu yaiyeba kekerama we kakara uawe. \s1 Dubu sina \p \v 16 Yanu Dera Waria Amarama yaba Danu wesa mafiro ya aboro aboro woroworo merau ibeiboe watane. Yanu Dera Waria Amarama yabai ibifie watane. \p \v 17 Na Foro, ewa ario sina nanu agema owawa ue odatane. Nanu owawa nesia eno utatane, ina nanu ereta tanana ido. \p \v 18 Yanu Dera Waria Amara Yesu Kerisonu kobererau durua ueta yabai ibifie watane. Nanu sina ido me sininu.