\id 1TI NT0097.3T Yareba N.T. - Weimer 9-JAN-87 
\h 1 TIMOTIBAI 
\toc1 TIMOTIBAI  BOTAI OWAWA 
\toc2 1 TIMOTIBAI 
\mt1 TIMOTIBAI  
\mt2 BOTAI OWAWA  
\c 1  
\p
\v 1 Na Foro, Yesu Kerisonu afosoro amara ewa sina owawa nana ue odatane. Yanu ma wiroeta Godini Yesu Keriso Dana i ma wiroeta gaukara ue me sibisu eno we imutaisi. Emana na afosoro amara we mune oisiba iba ewa sina watane.   
\p
\v 2 Timoti ewa sina ea. Bodere nanu we sina nauiba Yesunu sina naueta amara siniro iba aba nanu amara ari watane. Yanu Baba Godini yanu Dera Waria Amara Yesu Kerisoini Emana a kobererau durua ufisite Emanu wesa ueta aba mafisiro merau ibifae watane.   
\s1 Yanu meoma weta nesia ekodife  
\p
\v 3-4 Na bodere Masadonia orofaro animane uete aba Efesa suro ibia we, aba enanari watane. Efesa suro ibeda i uwaranu aika we mawetu ueta, ina Godinu meba emaba bana weda kodiawe wia. I uwarama Godinu sina imutawa emanu uwaranu bodere ikikini emanu sirorari sina woroworo imue ibeda webaitaba emaba eno da wiawete kodiawe wia. I uwarama eno webaitaba moana uwarama Godinu ba imueta imutawa me sara imutaita. Enoba uwarama emanu naueta Godibai odawa utaita.   
\p
\v 5-6 I Efesa su Godinu naueta uwarama neno arama uegou ufitate nenoma kobererau ufitate Godi imuegou ufitae iba watane. I tisa uwarama nanu sina ina iwawa utaitate urane yarane utaitate me sara waita.  
\v 7 I tisa uwarama Mosesinu tarawatu we mawetu ufitae weda nono i tarawatunu imueta iwawa iwawa utaita.  
\v 8 I tarawatuba Godinu wei sina enanari we mawetu utaisina i tarawatuna kobererau.  
\v 9-11 Nono Godima ya ma wiroiba i tarawatuna yanu tarawatu me, ina i siosawere utaita uwaranu. Moana uwarama mui tarawatu ekodaitate dera uwaranu sina nautawa utaitate Godi imutawa utaitate ba me utaitate Godinu sina nautawa utaitate sina siosawere waitate danua damamaini emeini ma uitaitate dita yagera faraita. Sodomu su uwaranu siosa ueta enanari amara sadeima aweta awera ari utaita. Eme mame muneta utaita, meo waita, wawei waita. Nono yanu araetawere Godinu kobere sina, i sina nana watane. I we mawetu ueta sina abanaro ma siosa uteibitate aika maika siosawere uteibitaitaba iba Godima i tarawatu Mosesibai mai. Iba naini Godinu kobere sina emaba watane.   
\s1 Godima Foroba neno arama uiro Foroma Godiba we ma kobererau ui  
\p
\v 12 Yanu Dera Waria amara Yesu Kerisoma na Danu sina wemane iba we mune odite Dawa da ekodimane na durua utasuba Dawaba we ma kobererau utatane.  
\v 13 Bodere nana Dawaba siosawere utebitara. Danu ifu ma siosa ue Danu naueta uwara ma siosa uteda Dawaba sina siosawere webitara. Nanu beforo ba me. Nana kobere iwata meba Godima na fanisi matawa nanu ba me ueta mune sani.  
\v 14 Yanu Dera Waria Amarana kobererau. Nana Dawabai taka ue odineba Dana naba we mawetu utasuro nanu naueta Dawabai odeda Danu neno arama ueta ari enanari emebai neno arama utatane.   
\p
\v 15 Yesu Kerisoma ba me ueta uwaranu neno ma wirofie iba ewa orofaro fari. Ina ba. Uwara nesia i sina naufitae iba watane. Dana na, i botai ba me ueta amara na ma wiroi.  
\v 16 Godima naba neno arama utebiba Yesu Kerisoma na, i botai siosawere ueta amara ma wiroite emema Danu kekerama ueta efitate Dawabai wirofitate me ibene ibene ibifitae iba eno ui.  
\v 17 Yanu Godi Dawa nesia iwata utasu. Dana yanu me ibene ibene ibeta Godi. Yana Dawa erawa utaisi. Dawa da me sibisu. Godi demurai Dawa torowa. Godi mui me. Enoba Danu ifu we ma derawere ufete Dawaba ainewaure we ma kobererau uteibene watane.   
\s1 Timoti buna uate wasai ueta serigari ua  
\p
\v 18 Nanu amara Timoti, nanu buna sina wemaro naua. Godinu we bou ueta uwarama bodere aba we bou utaba enanari uate uraneta uwara ari kobererau buna uate yanu Dera Waria Amaranu gaukara eno ua.  
\v 19 Yesu imuegou uate kobererau uaro anu nenoro imueta kobererau ufi. Moana uwarama emanu neno imueta imutawa emanu ununa siosawere uetaba iba siosawere utebita. Eno utebitaba enea ufe derawerema bouti ma arama utasu, enanari i uwarama emanu Godi imueta ma arama uta.  
\v 20 Mui amara sadeima eno usi. Emanu ifuna Aimeniasini Arekisanaini. I amara sadei Godiba sina siosa da webisite iwata ufisie iba ema seitanibai ode.   
\c 2  
\s1 Guriguri uetanu sina  
\p
\v 1 Anu botai gaukara sinana edono, Godibai orofa atata uwaraba guriguri uteda we ma kobererau ua.  
\v 2 I gaemani dera yawoeta uwaraini yanu dera uwaraba guriguri uaro Godima ema durua ufiro ya nesia merau ibeda urane yarane da ufete Godi imuegou uteda kobererau ufeisi.  
\v 3-4 Ya eno utaisina kobererauba yanu ma wiroeta Godima yaru utasu. Godi Danu ununa eme nesia wiroeta. Ema nesia danu ba sina naueta.  
\v 5 Godi Dawa demurai, mui me. Godini emenu abanaro inareta Amarana demurai. I Amarana Yesu Keriso.  
\v 6 Dana uwara nesia ma wirofite Godibai odifie iba ewa nasiniro mune yaino ue odi. Godima i ma wiroeta kowa ido farinu weiba ya iwata utaisi, Yesuma Godinu unu uite uwara nesiaba ido korosiro ui.   
\p
\v 7 Godima iba na Danu sina weta amaraini afosoro amara mune odi. Na meo wiawa, ba watane. Aika uwarama Godinu ba sina imufitate Dawabai wirofitae iba na emanu tisa amara we mune odi.   
\p
\v 8 Uwarama guriguri ufitae guruguru utaitana nanu ununa ema nesia uranawa yaranawa ibo utawa age kobererau Godibai deiro saneda guriguri uteibitae watane.   
\s1 Awetabunu sina  
\p
\v 9-10 I naueta awetaboini kobererau ibifitaita watane. Emanu wadiaba sasae da ufitate werei aika maika erawa nautawa da odifitate emanu fouma inita aika maika da yanafitae watane. Nono nanu ununa i awetaboma Godinu sina nauegou ufitate kobererau ufitaitana ina emanu werei ari.  
\v 11 Awetaboma sina faiyawere da webitate sina nauegou ufitae watane.  
\v 12 Na unutawa awetaboma eme we mawetu uetaba eno utawa utaita. Yanu dubu suro awetaboma eme da we mawetu ufitae watane.  
\v 13 aneba eno watane? Godima Adamu botai ubu uite nono buribi Iwi ubu uiba iba eno watane.  
\v 14 Seitanima Adamu irutawa, dana Iwi iruiro nauite ba me ui.  
\v 15 Awetabonu gaukarana kuita muneta. Eno ufitate Godi imufitate sina derawere da webitate kobererau ibifitate eme neno arama ufitaitana Godima ema ma wirofisu.   
\c 3  
\s1 Dubu su yawoeta uwaranu sina  
\p
\v 1 Mui sinana edono, ina ba, anama dubu su yawoeta gaukara mubie imufisuna danu imuetana kobererau.  
\v 2-3 I dubu su yawoeta amara dawa kobererau ueta sineta uteda ibifiro uwarama dawa siosa amara da webitaita. Dawa aweta sadei me. Dawa aweta demurai amara. Dawa i nesia ititi kakara bobo kekerama ufisu. Dawa kobere imueta amara. Dawa sina kobererau webisu. Dawa moana uwaraba bana webisu. Dawa kobere we mawetu ueta amara. Dawa kimu ogo ie beforo arama ueta amara me. Dawa urane yarane da ufite kobererau ibifisu. Dawa oi muneta torowa amara me.  
\v 4 Dawa danu su kobererau yawoteda danu adarabu kobererau yawofiro danu adarabu gifena da ufitate emeba ititi kakara ufitaita.  
\v 5 Nono dawa danu ba su da yawoegou ufisuna dawa Godinu su anene yawofisu?  
\v 6 Dawa Godinu sina reka naueta amara me. Dawa reka naufite yawofite sasae ufisuna Godima seitaniba fanisi mai enanari i amaraba fanisi mafisu.  
\v 7 Godinu sina nautawa uwarama dawa kobere amara webitaro seitanima dawa ma siosa da ufiro dawa da ureifisu. Nanu dubu su yawoeta sina ido.   
\s1 Dubu suro gaukara ueta uwaranu sina  
\p
\v 8 Dikoni sinana edono, dikonini yawoeta uwaraini emanu ueta sineta arotorowa. Dikoni uwarana kobere ueta sineta uwaraba emema ereda emaba ititi kakara ufitaita. Waini ogo derawere da ifitaita. Ema unutawa oi muneta torowa. Ema sina meo wiawa baro torowa webitaita.  
\v 9 Godima emaba Danu imueta we ma boroyariba ema roatarau nenoma Yesu Keriso imuegou ufitaita.  
\v 10 Ema dikoni gaukara ufitae webitaitana aika dubu su gaukara botai kobererau ufitaro uwarama ema kobererau webitaitana Godinu sina naueta uwarama ema ido dikoni mune odifitaita.   
\p
\v 11 I dikoninu awetabona kobererau ibifitaita. Ema kimu ogo da ifitate gogore da ufitaita. Moana uwarabai emeba siosawere weda emanu sina da woure tobo tufitaita. Eme da we irufitaita. Emaba kobererau ufitaita.  
\v 12 I dikoni gaukara ueta uwarana aweta demurai uwara. Emanu adarabuna gifena me yaru ueta uwara.  
\v 13 I dikoni uwarama emanu gaukara kobererau ufitaitana Godinu naueta uwarama ema dera kobere uwara webitaro ema Yesu Keriso imuegou ufitate Danu sina wegou ufitaita. Nanu dikoni sina ido.   
\s1 Godinu sina ubini ueta kiwu derawere  
\p
\v 14 Nanu ununa yabai sau famane watane. Na sau famau aba sau da famau ari na iwata meba ewa sina nesia ana efae iba owawa ue odatane.  
\v 15 Ewa sina efasuna yanu me ibinu Godinu dubu su gaukara uwara ane uwara ari mune odifasu. Godinu dubu su uwarama Danu ba sina yawoegou ufitaro moana uwarama i sina ma siosa da ufitaita.   
\p
\v 16 Yanu Yesu Keriso imuetanu ubina derawere. Iba eno webaisi, Dawa ba eme siniro Danu Imumu Kotofuma Danu kobererau ueta ma boroyari. Aneruma Dawa erebitaro emema Danu sina i orofa atata su su nesiaro webita. Orofa atata uwarama emanu naueta Dawabai oitaro Godima Dawa munite Danu araetawere orofaro woure amo odi.   
\c 4  
\p
\v 1 Godinu Imumu Kotofuma eno wasu, uwara faiyawere i dubu kowaro Godi ekodifitate seitaninu tisa uwaranu meo we mawetu ueta imufitate emanu dabaro anibitaita wasu.  
\v 2 Seitaninu tisa uwarama meoma webitaro seitanima emanu neno inama yanono ufisuba ba me, meo torowa webitaita.   
\p
\v 3-4 I uwaranu meo webitaita sinana edono, amara aweta da mua, aruma awera da mua, moana ieta da iawe, eno webitaita. Godima emeba ieta nesia maiba emema Godibai emanu ietaba we ma kobererau ufitaitana nesia ifitaita.  
\v 5 Godima ietata nesia kobererau wasuba yana Godibai yanu ietaba we ma kobererau ufeisina ietata nesia kobererau ufisu.   
\s1 Timoti Godinu gaukara kobererau ua  
\p
\v 6 Timoti, a i sina Godinu naueta uwarabai webasuna ana Yesu Kerisonu kobere sina weta amara sibaro Godinu ba sinaini Danu we mawetu uetaini ieta ari ifasuba buna uteda kobererau ufasu.  
\v 7 I bodere ikiki, ina Godinu ikiki meba da imuate Godinu sina imuegou uate anu imueta ma kimu ua.  
\v 8 A iwata, ofenu ueta sinetana ya otowaratu durua utasu, ai Godinu ueta sinetana ainewaure, awonaini duburoini i me ibene ibene ibeta orofaro durua utebasu.  
\v 9-10 Yanu i me ibinu Godi, Dawa uwara nesia emanu ma wiroeta Godi. Ana anama emanu naueta Dawabai odaitaro ema ma wirotasu. Yana Dawa imuegou utaisiba uwara efitae iba gaukara uegou utaisi.   
\p
\v 11 Ido, uwara nesia, i sina weda eno we mawetu ua.  
\v 12 Uwarama a ayada amara torowa siosawere webitaitana ina kobererau meba eno ua, kobere sina torowa wiate kobererau ibiate neno arama uate Godi imuegou uate dita yagera imueta da imua. Eno ufasuna a kobererau imufitaita.  
\v 13 Na abai famauna uwara nesiabai Godinu sina yawitebeate i sinanu ubi webiate i uwara we mawetu utebea.   
\p
\v 14 Timoti, Godinu we bou ueta uwarama aba we bou uta, enanari Godinu Imumu Kotofuma aba buna mairo i dubu su yawoeta uwara emanu age anu kofiri deiro oitaba i gaukara yawoegou ua.  
\v 15 I gaukara uegou utebea. Ina uegou uaro uwarama anu kobere uteibasu efitaita.  
\v 16 Anu ueta sinetaini we mawetu uetaini kobererau uegou ufaro! Kobererau uteibasuna Godima aini anu sina naueta uwaraini durua ufiro yanu ibeta merau ibifoita.   
\c 5  
\s1 Kobere uetama eme ma rorowarau ueta sina  
\p
\v 1 Nanu emeba kakara ueta sinana edono, a reka amaraba i dera uwara nesiaba iba sina webasuna ibo bobo da wia. Anu amamaba kobererau wasu sina ari emaba wia. I reka uwara nesia anu atae abuebai utebasu i ari i uwarabai enanari ua.  
\v 2 Anu anuabai utebasu i ari i awetabo nesiabai enanari ua. I arumami nesia aini itareta arumami i ari ua. Ema dita yagera fafae da imua.   
\s1 Wabu awetaboba wasu sina  
\p
\v 3 Mui awetanu awera uifiro yawoeta eme meba i moana wabu awetabo yawoa.  
\v 4 Mui wabu awetana danu koiniboroini aba danatamutu bobo, i uwarama emanu Godibai gaukara ufitate emanu danua warai danata warai yawofitaitana ina kobererau. Godima ina kobererau imutasu.  
\v 5 I koiniboro me wabu awetaboma Godi imuegou ufitate guriguri uteibitaitana Godinu naueta uwarama ema yawofitae watane.  
\v 6 Nono i wabu awetaboma emanu unu torowa ufitaitana emana uieta uwara ariba Godinu naueta uwarama ema da yawofitae watane.  
\v 7 I sina eno bunawere webaro wabu awetaboma enanari ufitaro uwarama efitate moana uwarabai emaba siosawere da webitae watane.  
\v 8 Anama danu danata demurai uwara da yawofisuna dana ba me. Anama danu iwa demurai uwara da yawofisuna dana siosa derawerero nono Godinu sina nautawa aika uwaranu ueta siosana otowanono.   
\p
\v 9-10 Mui wabu awetama i dubu su wabu awetabonu gaukara ufie webisuna eno imue ea. Dawa oya sikisiti (60) munite awera demurai torowa muni. Danu koiniboro kobererau yawotebite moana uwara bana weda ieta matebite Godinu naueta uwaranu buri urotebite ofe woureta uwara durua utebite ane ane kobererau utebina i dubu su wabu awetabonu ifubai danu ifu odia.   
\p
\v 11 Reka wabu awetanu ifu da odia. I reka wabu awetaboma awera mubitae Keriso ekodifitaita.  
\v 12 Eno ufitaitana emanu we bou ueta abanaro ma tufitaro Godima ema fanisi mafisu.  
\v 13 I reka wabu awetaboma ofe ejiwa ufitate gaduna isegari bobo uwaranu su suro ane sina faiyawere me sara webitate uwaranu ueta sineta imufitaita.  
\v 14 Enoba nanu imuetana eno, i reka wabu awetaboma awera mubitate aruma amara mubitate emanu su yawoegou ufitaro seitanima ya Godinu naueta uwaraba siosawere da webie watane.  
\v 15 Moana reka wabu awetaboma owere seitaninu buribi anaitaba iba watane.  
\v 16 Godinu naueta uwarabai anama iwa demurai wabu aweta bobona dawa yawofiro Godinu naueta uwarama i wabu aweta da yawofitate i eme me wabu awetabo yawofitaita.   
\s1 Dera baeta uwaraba wasu sina  
\p
\v 17 I dubu su yawoeta dera uwara, Godinu sina weda we mawetu uegou utebita uwara ya Godinu naueta uwarama ema kakara uawete emanu moko derawere mawe.  
\v 18 Godinu bukaroma eno wasu, borumakau uiti tai deiro amune adidiare ufiro uiti tai burubare itafisuna borumakaunu bebetu garari da uaro dawa uiti ifisuna ifisu wasute nono wasu, mui gaukara amarama danu gaukara utasuba danu moko mawe wasu.  
\v 19 Anama i dubu su dera yawoeta amaraba wawei webie ufisuna da naua. Ereta amara sadei aba rarogonu enanari webitaitana ido naua.  
\v 20 Abo dera yawoeta amarama ba me uteibisuna Godinu naueta uwara nesiabai woure odiawete koto uawero uwarama efitate iya uyafitate ba me da ufitaita.   
\p
\v 21 Godini Yesu Kerisoini Godinu kobere aneruini emanu iboro inaibeda aba bunawere wemaro naua. Ewa sina nesia rorowarau wia. Ewa amarana nanu naiye aba etei amarana nanu komariba iba da wemau eno da we imuate i sina uwara nesiabai bunawere webaro naufitae watane.  
\v 22 Mui amara dubu su dera yawoeta amara mune odifae ufasuna anu age danu kofiri deiro me sara da odiate danu ueta sineta ko botai eregou ua. I amaranu ba me ueta uruama uoisia, ba me da ua!   
\p
\v 23 Ogo torowa da ia. Anu desini oferi utasuba waini kikiratu itebea   
\p
\v 24 Moana uwarama ba me wawuriro utaitaro moana uwarama ereda Godima emaba fanisi daido mafisu iwata utaita. Moana uwarama feare ibetawere ba me utaitaro moana uwarama awona erawa utaita. Nono Godima emanu ba me ueta erasuba emaba fanisi mafiro efitaita.  
\v 25 Enanari moana uwaranu kobere ueta eraitate moana uwaranu kobere ueta erawaro nono Godima i kobere ueta ma boroyafisu.   
\c 6  
\s1 Sabua ueta uwaraba sina  
\p
\v 1 I sabua ueta uwarama emanu yawoeta uwaranu ifu we ma derawere ufitaitaba uwarama Godinu ifu ma iga da ufitate yanu we mawetu uetaba sina siosawere da webitae watane.  
\v 2 Moana sabua ueta uwaranu yawoeta uwarana Godinu naueta uwara. Emaini Godinu naueta uwaraba emanu yawoeta uwaraba gifena da ufitate ititi kakara ufitae watane. I yawoeta uwarana Godinu naueta uwaraba Godima ema neno arama utasuba sabua ueta uwarama gaukara uegou ufitae watane. I sina i uwaraba wegou ufaro naufitae watane.   
\s1 Gugua gubari faiyawere muneta sina  
\p
\v 3-4 Anama Yesu Kerisonu kobere imueta ina Godinu imueta da we mawetu ufite nono aika uwaranu imueta we mawetu ufisuna dana sasae bobo amara, danu beforona buna me. Danu ununa bebetuma yaraneta. Moana uwaraini sina faiyawere we matafie uteda uwaranu sina serigari ufie utasuba urane yarane ufitate wawei meo webitate uwaraba siosawere imufitaita.  
\v 5 I bebetuma yaranaita uwara emanu ba me uetama emanu imueta ma arama utasuba ema ba wiawa meo torowa waita. Emanu ununa oi torowa mubitae iba Godinu kotofu sina waita. I uwarabai owiga da ua.  
\v 6 Abo amarana ibaiabai derawere bobo amara? Anama uranawa yaranawa Godi imuteda merau ibasuna dana ibaiabai derawere amara. Godi imuetaini ibaiabai derawereini ina demurai ari.  
\v 7 Yanu bayamutuma ya mutaro ewa orofaro ibaiabai wourawa me fasiba uifeisina ibaiabai da woure anibeisi.  
\v 8 Yabai ietaini wadiaini ibifisuna mui ibaiabai da dobefete ina ido webeisi.  
\v 9 Moana uwara emanu ununa oi derawere mubitae iba siosawere utaita. Emanu siosawere uetama emanu neno ma arama utasuba i uwarama siosawere imutaitate me sara ueta utaitaba i uitawa ina kabesiro anibitate iro me ibene ibene ibifitaita.  
\v 10 Ananu ununa oi torowa muneta, i ununa i siosawere ueta nesianu ubi. Moana uwaranu ununa oi torowaba emanu naueta ekoita. Eno utaba warima egi yanatebasu i ari emanu ba me ueta ima emanu neno yanatebitaro neno siosa utebita.   
\s1 I wiroeta mamegou ua  
\p
\v 11 Timoti, ana Godinu amaraba i siosawere uetabairoma durami ue aniate kobererau ueta uate Godi imuteda Dawa ari siate eme neno arama uate emenu aika maika ueta sineta da imuate ibo da ua.  
\v 12 Anu imueta derawere ufie seitanini woroworo uraneta ari utebea. Ana uwara faiyawerebai na Godi imutatane weiba Godima aba me ibene ibene ibeta mafie yua we mune odi. I me ibene ibene ibeta mamegou ua.  
\v 13-14 Godima wasuba nesia me ibinu. Dawa a durua ufisu. Yesu Kerisoma Fonitia Faeratibai inaibeda iyarawa Dana ba sina wei. Dawa a durua ufisu. Nana Godini Yesu Kerisonu iboro inaibeda Godinu iba sina awonaroma Yesu Kerisonu fafisu kowaro uegou ufaro uwarama efitate aba siosawere da webitae watane.  
\v 15 Yanu buna Godi, Dana i dera kini uwaranu kini, Dana i dera uwara nesianu Dera Waria Godi. Danu kowa fafiro Dawa Yesu Keriso ureroma siaia ufiro tarafiro uwarama efitaita.  
\v 16 Yanu Godi Dawa danua me. Dawa ubi me, risi me, Dawa me ibene ibene ibinuba nono Dawa da uifisu. Danu torowa eno ibinu. Dawa ariowerero ibinu. I ario derawereba uwarama iro anawa utaitate Godi erawa utaita. Ewa Godinu ifu we ma derawere uteibero Dawa ya me ibene ibene ibeta yawoteibie iba watane.   
\s1 Gugua gubari faiyawere uwaranu sina  
\p
\v 17 Ibaiabai derawere uwaraba sina eno webaro naufitae watane. Ibaiabai derawere uwara sasae da uawete i awona ibinu oi, waidumu me sibisuba iba i oi da imuawete Godi Dawa nesia matasuro munaisi, iba Godi imuawe.  
\v 18 I uwarama kobererau ufitae watane. Emanu kobererau uetana eno, emanu ibaiabaina ibaiabai me uwaraba nata nata ufitae watane.  
\v 19 Emana eno ufitaitana emanu duburo ure suro ane ibifitaita suna ina emanu ewa nasiniro ode ibinita gugua gubari ari kimuwere iro ane ibifitae emanu mawo odinono ue bou utaita. Iba awonaini ane dubu kowaro i me ibene ibene ibeta daido ba mubitaita. Iba eno wiaro naufita.   
\s1 Anu gaukara eregou uteda ua  
\p
\v 20-21 Timoti, nanu sina naua! Godima aba mai, i, yawoegou ufaro! Moana uwarama, Godinu sina me, meo sina aika maika, aika maika waitate ina ba imueta waita. Eno waitaba moana uwarama nauteda Godi ekodaita. Godinu kotofu sina ma arama da ua iba watane. Godinu neno yabai ibifiro Godima ya kobererau durua ufie watane. Nanu sina ido me sininu.