\id 1TH NT0097.1T Yareba N.T. - Weimer 9-JAN-87 \h 1 TESORONAIKA \toc1 TESORONAIKA SU UWARABAI BOTAI OWAWA \toc2 1 TESORONAIKA \mt1 TESORONAIKA \mt2 SU UWARABAI \mt2 BOTAI OWAWA \c 1 \p \v 1 Na Foro, nana ewa sina owawa ue odatane eawe. Sairasini Timotini nabai ibeda yaba ario waisi. Ya Tesoronaika su uwara, ya Baba Godinu naueta uwaraba yana Godini Yesu Kerisonu uwara. Godima ya kobererau durua ufite ya nesiaba wesarauini ure nudarau ueta mafiro merau ibifoe iba watane. \s1 I Tesoronaika uwara emanu naueta ma kimu utate rorowarau inarebita \p \v 2 Guriguri utedana Godibai yaba we ma kobererau utebaisi. \v 3 Ya iwata, yana Godi imuegou uteda emeba neno arama utaitate kobererau uetaba ejiwa utawa uene uene utaitaro iba Godibai we ma kobererau utaisi. \v 4 Naiyemuturaratu, Godima ya neno arama uteda we mune odi. Ina ya iwata utaisi. \v 5 Naini nanu uwaraini ya ewa kobere sina me sara sina torowa webene yabai wo farawa utaisi. Ema, enona me! Ina Godinu Imumu Kotofunu bunaro fareda yanu naueta ma derawere utasu. Iba yanu ueta yabai kobererau utaisi. \v 6 Enoba naini nanu uwaranu ueta sineta enanari utebita. Yanu Dera Waria Amaranu ueta sineta enanari utaita. Yana Godinu sina nautebitana moana uwarama yaba siosawere utebitaro Godinu Imumu Kotofuma ya durua utebiba Godinu sina nauegou utate yaru derawere uta. \v 7 Ya eno utaba i Masadoniaini Akeiya orofa Godinu naueta uwarama nautate ya enanari ufene weita. \v 8 Godinu sina yabairoma i Masadoniaini Akeiya orofa uwarabai torowa anawa. Yanu Godi imueta moana uwarama i orofa atata uwara nesiabai we inarebitaro nautebitaba naini nanu uwarama sina nono wiawa utaisi \v 9 I sina we inarebita uwarama eno waita, i Tesoronaika su uwarama Foroini danu uwaraba bana weitate emaba kobererau uta. Eno utate i ba me godi ekoitate i ba Godibai aneda i me ibinu ba Godinu gaukara utaitate Godinu uietaroma ma uyari Amara i ureroma fafisu Amara yawotaita eno waita. \v 10 Godima i ba me uetaba ibo utasuba iba Godima koto derawere ufisu. Enoba Yesu Dawa ureroma fafisu Amarama Godinu ibo uetabairoma ya ma wirofisu. \c 2 \s1 Foroma Tesoronaika suro gaukara utebi \p \v 1 Naiyemutu, ya iwata, bodere yabai fasite Godinu sina weda ibisina siosa me, kobererau ibisi. \p \v 2 Aubokona i Firifai su uwarabai ane Godinu sina weisina i uwarama yaba siosawere uta. Uwara faiyawere yaba siosawere ufitae weitaro iyarawa usiro Godima ya durua uiro yabai fasite Godinu sina yaba weisi. \v 3 Naini nanu uwarana meoma weta uwara me. Yabai sina sina waisina meo wiawa ba sina waisite igabuga imueta yabai odawa utaisi. \v 4 Godima ya we mune odiba Dawa ya efite kobererau webie iba ba sina waisi. Me sara uwaranu unuini sina da naufene iba waisi. Godima yanu nenonu imueta iwata utasuba kobererau webie iba ba sina torowa waisi. \v 5 Yabai ibedana garo ueta sina wiawa usite yanu oini ibaiabaini yanu yaba sina weisi inu moko mubene farawa usi. Eno utawa usiro Godini yana iwata utaita. \v 6 Bodere aika uwaraini yaini yaba dera uwara weta ya unutawa, yana Kerisonu afosoro uwaraba yanu ununa yabai ane ane nui webeisina webeisi. Ya unutawaba iba wiawa usi. \v 7 Danuama danu aruma amara kekerama yawotasu, i ari yabai ibeda enanari usi. Sara siosa utawa, kekerama usi. \v 8 Yanu imueta derawere ya uwarabai iba iro ane fasi. Godinu sina webene, Godinu sina torowa me, yanu nenoini yabai odifene iba iro ane fasi. Yana yanu su uwara ari iba eno usi. \p \v 9 Naiyemutu, imue eawe! Yabai ibeda dumuini kowaini gaukara utebisi. I odo yabai Godinu sina weda ietaini ibaiabaini me sara munawa utebisi. \v 10 Ya, Godinu naueta uwarabai ibeda siosawere utawa, meo wiawa, yaba kakara usiro yaini Godini eta. \v 11 Mui amarama danu adarabu we kakara ue we mawetu utebasu i ari naini nanu uwaraini yabai enanari usiro ya iwata utaita. \v 12 Godi Dawa Danu yawotasu orofaro ya anibote Danu araetawere orofaro ibifoe iba yabai waya youriba ya uwara nesia mune Godinu imueta we mawetu uteda weisi. Godinu dabaro anegou uforo Godima efite ina ba webisu weisi. \s1 Emanu naueta buna uiba ue eretaro inare kimu uta \p \v 13 Godinu sina yaba weisiro nautana ina emenu sina me, ina Godinu sina weita. Ba weita. Ina Godinu sina. Ima ya naueta uwara, yanu neno ma wirotasu. Ya eno webaitaba Godibai woroworo we ma kobererau utebaisi. \p \v 14 Bodere i Judia orofa Ju uwarama Godinu Judia orofa sisia uwara emana Yesu Kerisoini Danu uwaraba siosawere uta. Awonana yanu moana su uwarama ya Godinu naueta uwaraba enanari siosawere utaita. \v 15 I Ju uwarama yanu Dera Waria Amara Yesu ma uitate Godinu we bou ueta uwaraini ma uita. Awonana i moana Ju uwarama naini nanu uwara we yoweraitate siosawere utaitaro Godima emaba ibo utasu. I uwarama eme nesiaba ubusi uyaraitate i Godinu sina naueta daba garari ufitae utaita. \v 16 I uwarama Ju me aika uwara yanu sina da naufitate wirofitae iba yaini yowereda yanu sina daba garari utaita. Eno utaitaba emanu ba me ueta deiro deiro amutasuba Godima emaba daido ibo utasu. \s1 Foro danu unu derawere i uwara nono efie \p \v 17-18 Naiyemuturaratu, ya ekoisina yanu neno yabai ibi. Enoba yanu ununa yabai nono owere anibete yanu ibo nawata efene uteda nono arawa usi. Na Foro yabai animane utebitarana seitanima naini nanu uwaranu aneta daba garari utebiba arawa usi. \p \v 19 Yanu Dera Amara Yesu fafiro Danu iboro inafeisi. I kowaro anema naini nanu uwara ma yaru ufisu? Aneba sina derawere webeisi? Yanu moko ane? Yanu mokona yaini Godinu naueta uwara iba yaru ufeisi. \v 20 Ya uwarana yanu kobere araetaba yaba kobererau imuteda yaru derawere utaisibaro! \c 3 \s1 I uwara ma kimu ufie Foroma Timoti siaia uiro ani \p \v 1-2 Yana ya uwaranu ibeta iwata meba imutebe imutebe erawa utute ido wanu torowa Atani suro ibifune weda yanu naiye, Godinu naueta amara Timoti, siaia uturo yabai ani. Yanu naiye Timoti, Dawa Godinu gaukara amara. Dawa Kerisonu sina weta amara. Dawa yanu Godi imueta ma kimu ufite yaba buna sina webie iba yabai siaia uturo ani. \v 3 Yana ane ane yabai faosoro iba Godi ekodiotoba Timoti siaia uturo yabai ani. Yana Godinu uwaraba Godinu wei sina enanari aika uwarama yabai siosawere utaita. Ina ya iwata utaita. \v 4 Yabai ibeda emema ya siosawere ufitaita we kakara usi. Enanari eno utana ina ya iwata utaita. \v 5 Idoba yaba imutebe imutebe na arama uete yanu imuetana ido aba me na iwata umane iba Timoti siaia uero yabai ani. Seitanima yaba siosawere ui aba na iwata me. Nanu gaukara yabai me sini o me, na iwata meba iba Timoti siaia uero yabai ani. \s1 Timoti kobere sina wo fariro Foro yaru ui \p \v 6 Timoti yabai ane farite ibebe ibebe nono owere awona nabai fare eno wei, i Tesoronaika su uwara emanu naueta Godibai oitate uwara nesiaba neno arama uteda eno we imutaita, ya uwara kobererau eno we imutaita. Yana ema efene imutaisi enanari ya efitae imutaita eno wei. \v 7 Naiyemutu, emema naini nanu uwara siosawere utaitaro neno siosa utaisina Timotima naini nanu uwarabai fare i sina weiba ya uwaranu imueta kobererauba yanu neno kobererau utaisi. \v 8 Ya Tesoronaika uwara Godi imuteda merau ibinita weiro nausiba kobererau ibegou utaisi. \p \v 9 Godibai ya Tesoronaika uwaraba ane webeisi? Ya Tesoronaika uwaraba yaru derawere uteda Godi we ma kobererau utaisi. \v 10 Dumuini kowaini yanu unu derawere edono, ya uwara moko moko ere matafete Godinu sina nesia we mawetu ufero Godi imuegou ufoe watane. \s1 Foroma i uwarabai anibie Godibai guriguri utebi \p \v 11 Yanu Baba Godini yanu Dera Waria Amara Yesu Kerisoma ya durua ufisiro yabai anibene watane. \v 12 Yanu Dera Waria Amarama ya Tesaronaika uwaranu neno ma kobererau ufiro uwara nesiaba neno arama ufoe watane. Naini nanu uwaraini ya neno arama utaisi, i ari neno arama ufoe watane. \p \v 13 Eno ufoitana yanu Baba Godima yanu neno ma kimu ufisuba duburo yanu Dera Waria Amara Yesuma Danu uwara nesia woure afisuna yabai kerere mero yanu imuetana roatarau. Ya kobererau imuteda yanu Baba Godinu iboro kerere me inafoita. \c 4 \s1 Godi Danu ununa kobererau inareta \p \v 1 Naiyemutu, nanu mui sina ewado eawe. Yanu Dera Waria Amara Yesuma buna masinuba ya Tesaronaika uwaraba mui buna sina webete we kakara ufene watane. I sina edono, Godi Danu unu ueta yaba weisina enanari uteda kobererau ibebita. Awonana deiro deiro eno uegou utebeawe. \v 2 Yanu Dera Waria Amarama i sina naba weiba enanari yaba waisiro ya nauteda iwata utaita. \v 3 Godi Danu ununa yanu nenona kakaraini roatarau, iga me ibeta iba dita yagera da uawe. \v 4 Ya nesia kobere aweta muneta daba iwata uegou ufote awetaboba ititi kakara uteda yawoegou ufoe iba yaba watane. \v 5 Godinu sina nautawa uwaranu aweta muneta ari da uawe. I uwarama arumami aba awetabo ereda neno wanai uteda ufitae iba me sara munaita. \v 6 Yanu yaiyenu awetanu buribi da aniawe. Eno ufoitana Godima ya fanisi derawere mafisu. I sina yaba bodere we kakara usiba nauegou uforo! \v 7 Godi Dawa unutawa dita yagera fareta. Danu ununa yanu nenoroma kobererau torowa imueta iba ya Danu uwara we mune odi. \v 8 Anama i wasu sina imutawa utasuna emenu imueta ekodawa utasute Godi Dawa Danu Imumu Kotofu yaba matasuro dawa i Godinu imueta ekodasu. \p \v 9 Godinu naueta uwaranu moko moko neno arama ue mataneta, iba ewa owawa da umau. Godi Danu aika ya neno arama ue matafoe we mawetu uiba iba mui sina siaia da umau. \v 10 Yana i Masadonia orofa Godinu naueta uwara nesia neno arama utaitaro ya iwata utaisi. Nono yanu ununa ya Tesaronaika uwara neno arama deiro deiro eno uegou utebeawe. \v 11 Kobererau inare yaure utebeawete mui amaranu ueta sineta da uawete yanu ueta sineta torowa uawete yanu gaukara agema uawe. Bodere eno uawe sina yaba weisiro nauta. \v 12 Eno ufoitana moana uwarabai nui da weboro Godinu sina nautawa uwarama efitate ya kobere uwara webitaita. \s1 Yanu Dera Waria Amarama owefite fare ya ma wirofisu \p \v 13 Naiyemutu, i Godi imutebe uitebita uwaranu ueta sineta ya iwata ufote i Godi imutawa uteda urero da anibitaita uwaranu sorara ueta enanari da ufoe iba mui sina owawa ue odatane. I sina eregou uawe. \v 14 Yesu Kerisoma uite nono i uietaroma uyari. I ueta imutaisina Godima Yesuini Danu Dawa naue imue uteda uitaita uieta uwara nesia enanari uietaroma ma uyafite woure afisu imutaisi. \p \v 15 Yanu Dera Waria Amarama weiba yaba ewa sina waisi, ya me ibinisi uwara, Yesu Kerisonu fafisu kowaro, ya ko Dawabai da anibeisi. Godinu sina nauteda uitebita uwara ko anibitaro nono emanu buribi anibeisi. \v 16-17 Yanu Dera Waria Amara ureroma tarafisuna Dawa yua derawere webiro i botai aneruma sina derawere webiro Godima Danu tawuyo derawere ubufisu. Eno ufiro Yesu Kerisonu uieta uwara uriroma botai uyafitaro nono ya, ewa orofaro uitawa reka me ibinisi uwaraini emaini gosoro manibete nono ya nesia yanu Dera Waria Amara urero atafete yanu Dera Waria Amarabai mane me ibene ibene ibifeisi. \v 18 Enoba ewa sina torowama yanu aika we ma nabi ue matawe. \c 5 \s1 Yanu Dera Waria Amaranu faretaba yanu torowa ue bou uteibe \p \v 1-2 Nanu wene sina abododo ufisu? Yanu Dera Amaranu fafisu kowa waira ueta amaranu dumuro kiwuma fareta ari fafisu. Ina yaba weisiro ya iwata utaitaba aneba nono owawa ue odifeisi? \v 3 Moana uwarama uraneta yaraneta me, merau ibinisi eno webitaitana ido awe derawere sau uyafite ema daido ma arama ufisu. Kuita mubie utebasu awetanu sukana ureta ido sau urasu enanari i awe kowa ido sau fafisuba eme me sara feare da anibitaita. \p \v 4 Naiyemutu, yana dumuro ibeta uwara meba i kowa waira ueta amaranu fareta ari yabai da fafiro neno kirifu da ufoita. \v 5 Ya uwarana i ba arionu adarabu, yana i kowanu adarabu. Yana i dumunu adarabu me. \v 6 Idoba toafurau yawoawe. Aika uwarama nauta kunawere ainebaitaba ya enanari da uawete inare kimu uteda yawoegou uawe. \v 7 I nauta ainaita uwarama dumuro nauta ainaita. I kimu ogo itaita uwarama dumuro iteda gogore utaita. Emanu utaita enanari da uawe. \v 8 Yana i kowanu adarabuba kimu ogoma gogore da ufete yanu Godi imuetaini neno arama uetaini o dadau ueta aiyoni bira ari dadau ufete yanu Yesu Keriso ma wirotasu imueta kofi barueta ari barufeisi. Seitani ya ma serigari da ufiro Yesuma ya daido ma wirofisu. \p \v 9 Godima ya fanisi mafie we odawa uite yanu Dera Amara Yesu Kerisoma ya ma wirofie iba ya we mune odi. \v 10 Yesu Kerisoma yaba tare uiba yaini naini uiteda me ibeda uteibero fafisuna Dawaini ibifeisi. \v 11 Idoba sina kobererau we matawete yanu aika ma buna ue matawe. Awona utaita, i ari enanari utebeawe. \s1 Dubu ario sina \p \v 12 Naiyemutu, mui sina kikiratu wemane watane. Godinu uwara yabai yanu Dera Waria Amaranu gaukara utaitate yabai Danu sina we mawetu utaitaba ema kakara uawe. \v 13 Emanu gaukaraba ema neno arama uteda enanari wesarau ue ibiawe. \p \v 14 Naiyemuturaratu, i ofe ejiwa uwaraba buna sina wiawero gaukara ufita. I nenoma iyaraita uwaranu neno ma buna uawe. I buna me uwara durua uawe. I uwara nesiaba me kekerama uawe. \v 15 Mui amarama ya siosawere ufisuna siosawere moko da uawe. Yanu yanu kobererau ue matawete uwara nesiaba enanari uawe. \p \v 16 Ainewaure yaru utebeawe. \v 17-18 Ainewaure guriguri utebeawe. Ane ane yabai utasuna Godi we ma kobererau utebeawe. Yana Yesu Kerisonu uwaraba Godima ya eno ufoe wasu. \p \v 19 Godinu Imumu Kotofunu daba garari da uawe. \v 20 Godinu sina webitaitana i sinaba da irue wiawe. \v 21-22 Ewa sina nesia ue eawete i kobererau ueta torowama mamegou uawete i siosawere ueta sineta kodiawete eta aika sawe. \p \v 23 I wesarau ueta maeta Godi yanu neno ma roatarau ufie watane. Yanu Dera Waria Amara Yesu Keriso fafisuba yanu imumuini nenoini ofe ubuini ma kobererau ufiro ya fanisi da muboe watane. \v 24 Godima ya Danu adarabu we mune odiba Dawa imueta aika maika da ufite i nesia yaba rorowarau uegou ufisu. \p \v 25 Naiyemutu, Godibai naini nanu uwaraba guriguri uawe. \p \v 26 Godinu naueta uwara nesia ario weda age mamiawe. \p \v 27 Yesunu ifuro wemaro i uawe, Ewa owawa oeta Godinu naueta uwara nesiabai wiawero naufita. \p \v 28 Yanu Dera Waria Amara Yesu Kerisonu kobererau durua ueta yabai ibifie watane. \p Nanu sina ido me sininu.