\id JAS Yongkom James proj#256 Kanin Amyap / Steve Christensen cons chkd 2/00 \h Yems \toc1 Yems Yems Ye Kerek \toc2 Yems \mt1 Yems \mt2 Yems Ye Kerek \is1 Kerek Kee Komo Dowad Wongkoon \ip Wongkoonman kuu Yesu ye daman Yems. Ye kuu Yuudan anam andiwen kumbed ambibkin maa maa aom doriib kuyaa wongkoon. Ye dowaken kuu anam andi aromkonoyiib kerime anded. Kwane, anam andi anam kuu amun amun kamenabiyiib ande korokboon. Kwane, anam andi anam kuu okad yiri ye meeni inameniibban ande korokboon. Wongkoon ye weeb kuu AD 50 areb o AD 62 areb. \is1 Korok Weng \io1 1. Kubendi Weng Ibduruk (1:1) \io1 2. Komboon Kaamobi Aom Kangdommo Dobirime Andi Ye Weng (1:2-18) \io1 3. Wengambere Awine Kandiyiib Kwane Kamenabiyiib (1:19-27) \io1 4. Yena Yaa Manmo Keraib Andi Ye Weng (2:1-13) \io1 5. Anam Andiyiib Ambangkiyiib (2:14-26) \io1 6. Nub Ong Kuu Ongme Kangkadme Oonem Andi Ye Weng (3:1-12) \io1 7. Meeni Kangdom Kiwaan Ayoob (3:13-18) \io1 8. Okad Yiri Ye Meeni Inamen Awinaib Andi Ye Weng (sapta 4) \io1 9. Yiribman Yemoondanbed Yena Benkubunaib Andi Ye Weng (5:1-6) \io1 10. Ongkandi Weng Yena (5:7-20) \c 1 \p \v 1 Ne kuu Yems, God yoom Yariman Yesu Keresu yoom yi deme karub. \p Amyenimbon wad ayoobdan bokesaware wenebe ambibkin maa maa kuyaom doriib, yiib yaa kubendi weng wongkane keendaan. \s1 Yobdoodiib Birandiyiib Ye Dabab \p \v 2 Nangkodmia, dabab maa maa yiib yaa meneboka, kubimombed dobirime, \v 3 amborom kuu yiibkaad kuu dabab menebe yiib anam andi yaa komboon kaamondi kuu kangdommo doberembirime andi ye inamen darewoob keri yeman kowe. \v 4 Kangdommo doberembirime andi ye inamen kuu yiminmo keraneen kuu, yiib inamen kuu Yesu arebmo yiminmo keraniib, yiib inamen aom kuu ma dowan keraanban. \p \v 5 Yiib kuyaom kuu kanembed meeni kangdom embengmo keroka, God yaa kaamonok. God kuu ambarakmoon dee ande onmiyiibban kumbed yiminmo bangkandi ye God kowe, kaamonaneen kuu Godbed inande konaneen. \v 6 Kumban ye kaamoni God yaa kuu anam andene karekmiyiibban keraneen kumbed yimin, amborom kuu kanembed karekmoon kuu oknondok karamok ari nuubbed kanbarande kawene kamene kamenmo wenemoon areb kowe. \v 7 Korondaiwa kwamune ye karub kuu Yarimanbed maawaneena maandaniin ande meenaan. \v 8 Ye inamen kuu ayoob ayoob karub keroon. Ye inamen korem kuu konoo embeng barakbarak kamenu amonombemoon areb. \p \v 9 Kuristen angkodmi ambokda keroon kuu Godbed kankoone yumbon ari konoon kowe kerengkanok. \v 10 Kuristen angkodmi yiribman yemooniib keroon kuu Godbed kankubune yumbon yiri konoon kowe kwangkon kerengkanok, amborom kuu ye kuu nong wuung yeere bobnemoon areb keraneen kowe. \v 11 Kedi, aron yure yaro mananuuna nimin daananuun kumbed nong koknanuune wuung nuubne womberekore wuung ye manimanandeb kuu monmaraneen. Kwamune areb kii, yiribman yemoon ye karub kuu wan ambokibine ye deme awinoon aom kumbed kwane bobnaneena dowan keraneen. \p \v 12 Karub kanembed komboon kaamoni ye dabab meneboon yaa kangdommo dobaraneen kuu Godbed amun kerundoon, amborom kuu yiminmo dobaraneen kuu wadkeri ye kakman king ye korok ari dereni yeman areb kandaneen. Kakman keyaa Godbed weng kunduk yedme kowoon, ye yaa mimyob dowaken keenimaibdan yi dowad. \p \v 13 Kwane, ambarakmok andi ye birandi eb yaa monoka, kekane yedmaab, “Kedi Godbed ne yaa ambarakmok andi ye birawi kamoon.” andaab. God kuu arewambed ye yaa ambarakmok ande bironindeban, ye kangkon karub kane yaa ma ambarakmok ande biranaanban. \v 14 Kumban nimakarub korem kuu yi inamen arewa yaambed dedmone dedmone kamoon kumbed ambarakmi yaa meeni dowakeniib keraiwe birondimaan. \v 15 Kwane, meeni dowaken kee wanabemoon areb keranuun kuu yu dana kuu ambarakmi. Ambarakmi kaine amnaneen kuu bobni keraneen. \p \v 16 Nangkodmia, birondi yaa anam andaib. \v 17 Komo komo kuu demkoronmo munobmo bangkandi yeman amuniib kuu, Ewen ari doreen ye Ambembed bangkandaane kaminimaan. Ye kuu arona wooda mindonga ongmenaboon ye God, ye kuu kuruwak kan kwangka kowe kan kangka kowe kaimaib arebban, maa kere maa kere kaimokban. \v 18 Ye kuu ye dowakeniib keroonkob anam anam ye weng yaambed nub anam anduuwe, ongmendoone ye dana meed keruwen kumbed kumkam korem ongmenaboon kuu burudande yumbon ari kanduwen. \s1 Yesu Ye Weng Amun Wengamberedandaib \p \v 19 Nangkodmia, meenime. Yiib korem kuu wengambiri yaambed kuu kirodmombed kii, weng dakmi yaambed kuu emambed, norin wandi yaambed kuu emambed kii, \v 20 amborom kuu karub ye norin kuu Godbed dowaken keroon ye yorokmo dobiri kanminimokban kowe. \v 21 Kwana kowe, nenem inamen koremiib inamen arewa mimim koremiib kuu kwane kirarundenib, yiibka kankubuniyiib kerenib God ye weng yiib niindem aom arumenaboon yaa awinime. God ye weng kee bobni yaa burudande bindi yeman. \p \v 22 God ye weng kee kwane wengamberekoriwa kuyaa awinokban keraniib kuu, yiibka yiibmeren bironaniib. Kowe, weng keyaambed wengambere awinime. \v 23 Kwane, karub kanembed God ye weng wengamberekore kuyaa awinokban kerimaan kuu, ok kuruwak yaa ye murubia wedmekore \v 24 koronde wene ari ye murubia komarewa wedmoon kuu kirodmo nonondandemoon areb. \v 25 Kumban, karub kanembed demkoron anammo ye amob, ambarakmi ye wii kanangka kowimaan ye amob kui, kuyaom kimingke korobe wedmemberene nonondandiyiibbanbed kwamunemo kamimaan kuu, komo komo kamaneen kuu Godbed amun kerunaneen. \p \v 26 Kwane, karub kanembed yeka yedmaneen, “Ne kuu anam ande amob awinaan.” andaneen kuned kangkadme meenmiyiib dakmokban keraneen kuu, yeka yemeren birananeene ye anam ande amob awini ye kerekmen kuu anam idiibban. \v 27 Anam ande amob awini ye kerekmen nub Ambe Godbed dowakeniib kerundene kukuu karadmo yorokmo yeman ande yedmoon kukei, dana anenab yoom nima irib yoom dabab komarewa kandiwen kuu wedme awandenib, yiibka okad yiri ye inamen arewa kumaom kombaraub ande kangkadmime. \c 2 \s1 Yena Yaa Manmo Keri Ye Inamen Ambangkaib \p \v 1 Nangkodmia, yiib kwane nub Yariman Yesu Keresu nambiriyiib doreen yaa anam andiwen kowe, yena yaa manmo keri ye inamen ambangkaib. \v 2 Kwamune, karub maa gold ye dingki kandingiib deebe ebkad amunmombed inwaraneen kumbed yiib kurikuri wengbon aom meneena, kamboknon ye karub ebkad korobmo deeboon kangkon mananeen kuu, \v 3 ebkad amun inwaroon ye karub kuyaamo kubenenib yedmenaniib, “Eb mene dibiri yeman amun karimbed dibere.” andaniib kumban, kamboknon karub yaa no yedmaniib, “Yakuyaa dobere.” o “Ne yon dad yirimbed dibere.” andaniib kuu, \v 4 yiib kuu inamen arewa yaambed andokbe karub yena ben ari keriiwa karub yena ben yiri kiribe keriib kii! Kukuu amunoo? Dowan! \p \v 5 Mimyob dowaken keendimain ye angkodmia, wengambirime. Okad yiridanbed kane kane yaa kamboknon andimaib ye karuwa nimaya kuu, Godbed kinoona yi anam andi yaa yiminmo kerekoriwa, oonimbon aom mimyob dowaken keendoondan yi yumbon yeka ye weng kunduk kowoon kuu kandaniib. Eeyoo? \v 6 Kumban yiib kuu kamboknondan yaa weng arewambed damangkandiwen. Ma, yiribman yemoondanbed yiib yaa deme darewoob bangkandimaib kumban od embeng kondimaib dee? Yimbed yiib awingke wengyundi dowad kangdod korok yaa be winimaib dee? \v 7 Yiib Yariman yaningko amun kuu yimbed wengamborokbanabimaib dee? Korem kee kwamunemo kamimaib kuda. \p \v 8 Kuned, God Ye Weng Karadmo aombed nub King ye amob ye wengbed yedmoon kuu “Ebka ebmeren yaa mimyob dowaken kowimaab areb kuu, eb dia doriibdan yaa kwangkon kwane mimyob dowakenbed keende.” andoon. Kuye weng kuu yiibbed anammo awinaniib kuu, yiib kuu yiminmo kamaniib. \v 9 Kumban yiib kuu yena yaa manmo keri ye inamen kwane ambangkaniib kuu ambarakmaniiwe amobbed yiib kuu amob domangkidan ande korokbendaneen. \v 10 Kwane, karub kanembed God ye amob korem kuu oonoon kumban mimo domokbaneen kuu, ambarakme amob korem domangkoon ye karub keroon. \v 11 Kedi, Godbed yedmoon, “Nenem kamaab.” andoon. Kumban ye kangkon yedmoon kuu, “Kumka o kuman ayaab.” andoon. Kowe, yiib kuu nenem kamimokban kumban kumka kuman ayiwen kuu yiib kuu God ye amob domangkidan keriwen. \p \v 12 Yiib kuu ambarakmi ye wii kanangka kowimaan ye amobbed wengyundaneen kuyaa meenmiib kumbed, kwamunemo dakmenib kwamunemo kamime. \v 13 Amborom kuu kane kanembed ambarakmidan yaa mimyob keende kakman are nonondandaanban kuu, Godbed yi yaa mimyob keende kakman are nonondandiyiibbanbed wengyundaneen. Mimyob keende kakman are nonondandi kuu wengyundi burudande ari keroon ye inamen kii. \s1 Anam Andiyiib Amun Amun Kamiyiib \p \v 14 Nangkodmia, karub kanembed Yesu yaa anam andaan ande yedmimaan kumban amun amun kamimokban kuu idiib dee? Anam andi keyaambed Godbed bindaneen dee? Dowan! \v 15 Kwamune, kuristen angkodmi maa wonong o karub kuu ebkadiibban animaniibban keraneen kuu \v 16 yiib kuyaombed karub maambed ye yaa yedmaneen, “Wene, amunmo doborok, ebkadiib animaniib kerok.” andaneen kumban, komo dowan keroon yaa ma awanenaanban kuu idiib dee? Dowan! \v 17 Kwamune areb kuu amun amun kamiyiibban ye anam andi kuu anamban, bobnemoon areb. \p \v 18 Kumban karub maambed yedmaneen, “Karub maa ye no wengbed anam andi kumbed yimin, maa ye amun amun kamiyiib ye anam andi kangkon yimin.” andaneen kuu amunban. Ye amun amun kamiyiibban ye anam andi kuu korokbewok, yiminbanaa! Ne kuu ne kamiyiib kumbed ne anam andi korokbena. \v 19 No wengbed ye kuu anam andoon kuu God mimo, maayiibban. Kuu amun kumban, awad arewa kwamune yikaad kumbed kiringmenabiyiib unimaib. \p \v 20 Inameniibbanman, eb dowaken kuu amun amun kamiyiibban ye anam andi kuu idiibban kuu korokbewok andewed dee? \v 21 Nub awo amaan yiri Abraham kuu nengke God yaa baeb koni dowad bot wenorene ye dana Aisek kande kan kwari kowoon kumbed Godbed ye yaa yorokmoman ande meenoon dee? Anamaa. \v 22 Kudi, wedmeewoo? Ye anam andiyiib ye amun amun kamiyiib ibmo daboknoon kumbed kwanoon. Ye komo kamoon kumbed ye anam andi kuu yiminmo keroon. \v 23 Kwane, God Ye Weng Karadmo aombed yedmoon, “Abraham kuu Godbed komo dakmoon yaa anam andoon kowe, Godbed ye yaa yorokmoman ande kowoon.” andoon kuu anam id keroone, ye kuu God ye angkodmi andimaib. \v 24 Nimakarub kuu yi anam andimo kumbed God yaa yimin keraanban, amun amun kamiyiib dabokniwed yimin keraniib kedi. \p \v 25 Kwamune areb kuu kiwaan ari wonong Rehab kwangkon, yu kuu Yuudan yi darobidan angkodmendenu kiwaan kimyen ari nongkobeen kumbed Godbed yu yaa yorokmo ye wonong ande meenoon dee? Anamaa. \v 26 Karub id kuu kingkiniibban angkeen kuu bobnoon kwamune areb kuu, anam andi kuu amun amun kamiyiibban kuu idiibban, bobnemoon areb. \c 3 \s1 Kaadkerimbed Komo Weng Dakmubka \p \v 1 Nangkodmia, yiib kuyaom kuu yemoonbed kwane God ye weng kedmengkandi ye korok korok kerem andaib, amborom kuu yiib yiibkaad nub kane kane God ye weng kedmengkanduubdan kuu yobdood kamkonomo arimbed wengyundaneen kowe. \p \v 2 Nub korem kuu kiwaan yemoon yaambed ambarakmi yaa kombirimaub. Karub kanembed weng arewa ambong ma yedmindo keraneen kuu, ye kuu demkoronmo ye karub, yeka yemeren kangkadme korobe oonimaan ye karub kui. \v 3 Kedi, nub kuu hoos mongkodkono aom angkani yeman kankereknekorub nen dewenebanuub kuu, hoos kumundin kuu nubbed komo kamanuub kuu nub wengmo wengambaraneen. \v 4 Ma, kwamune motod yaa meenime. Yi kuu kedbon kedbon kwangkon nuubbed benwinimaan kumban, kamundi ye ud embeng yibi anuk angkeen kumbed motod oonoon ye karubbed awinene kunaya wanandameen kuyaamo wananeen. \p \v 5 Kwamune areb, nub ong kuu nub id aom kuyaa yone angkeen kuu embeng kumban, kuyaambed kerengkan weng miin dareb dareb meneboon. Meenime, nembereng embeng kumbed at biid koknoon yaa awine kande denaneene, kwane denenmo wene dura darewoob kuu dene dookbemoon areb. \v 6 Kowe, ong kuu kwane amot areb. Ong kuu arewamo, indob o dingki o yon kwamune awene arebban. Kukuu karub id kumundin kan monmare arewa kerene, inamen korem be kiwaan arewa ari nongkobimaan. Kukuu kumbaanban yamotbon ye inamen yaambed kwane ambangkimaan. \p \v 7 Dingkan maa maa korem, ayari oniib niiniib yiyiib ok niindem yiri dange weneen ye dingkaniib kuu karubbed bangkandaiwa amongkob kerimaib. \v 8 Kumban karub maambed ong kuu kan kwamune kerok ande ma kwanindo. Ong kuu kangkadmindeban ye barang miin arewa, arud niin ye ambod arewayiib areb. \p \v 9 Kwane, ong mimo kumbed nub Yariman Ambe God yaningko kankoonenub, angkon ong mimo kumbed karub yena yaa woonbi weng dakmimaub, kuned nimakarub kuu Godbed yeka ye kuruwak ongmendoondan kui. \v 10 Kube kankooni wengiib weng arewa ye woonbi wengiib kuu mongkodkono mimo kumaom kumbed menebimaan. Nangkodmia, kwamune kamaib. \v 11 Kwane, karamokiiwa okmanambon okiiwa kuu ok kirubdem mimombed dabokne ibmo menebanuun dee? Dowan! \v 12 Nangkodmia, yedob at arimbed olif yob iraneen dee o munid nong arimbed yedob yob dibaraneen dee? Dowan! Kwamune areb kuu karamok ye kirubdem aombed ok ambod amuniib yaro menebaunban. \s1 Ewen Ari Ye Meeni Kangdom \p \v 13 Yiib kuyaom kuu kane kanembed meeni kangdomiib kerenib yorokmo meenimaib? Kee kwamune awiniibdan kuu yi meeni kangdom yaambed yika kankubune amun amun kamimaib kumbed yi meeni kangdom korokbime. \v 14 Kumban yiib niindem aom kuu wungkandi mung kook arewiib kirim inameniib keroka, kuyaa kerengkanaib, kuyaa aadikmaib. \v 15 Kwamune ye meeni kuu Ewen arimbed minimban, kukuu okad yiri yeman, id ye dowaken yeman, awad arewa ye meeni kui. \v 16 Kedi, kunayambed kwane wungkandiyiib kirim ye inameniib, kuyaa kwangkon ibonmo kerinban ye inameniib deme miin arewa maa maa korem kuu yiib wedmaniib. \p \v 17 Kumban Ewen arimbed minimaan ye meeni kangdom kuu ibduruk kuu karadmo, angkon ari kuu yewenubbon ye inameniib arudiibban ema dobiri ye inameniib yena yi dabderem aom dobiri ye inameniib mimyob keende kakman are nonondandi ye inamen yiminmoyiib yob amunmo iri ye inamen yiminmoyiib manmo keri ye inameniibbaniib aadikmiyiibbaniib kui. \v 18 Karub maa dore karub maa dore wedyiri dobere kiwaan ongme kunum keri ye karub kuu kab kibingkemoon areb yewenub bangkandaneen kuu yob wandemoon areb yorokmo dobiri kandaneen. \c 4 \s1 God Ye Dabderem Aom Dobirime \p \v 1 Komarewa keraankob yiibkareb nangmenabiyiib wengberenabiyiib kaimaib? Yiib id ye dowaken yaambed amenengkanabe ben bangkandimaan kumbed yiib yaa nangbandimaanoo? Anamaa! \v 2 Yiib dowaken yiribman amun maanda ande meenimaib, kumban kandokban kowe, yiib kuu ayako bobnok ande kamiib. Yiib kuu karub maa ye yiribman nembed kanda ande kamimaib kumban ma kandokban kowe, wengbiriyiib nangbiyiibmo kamiib. Yiib kuu kwamune ma kandokban amborom kuu God yaayiib kaamonokban kowe. \v 3 Kwane, yiib kuu God yaa kaamoniwen kuu ma kandindo keriwen, amborom kuu inamen abdon ye dowad yaambedmo kaamonibko komo kondaneena kandaniib kuu yiib id ye dowaken yaamo kowe awinandamiibkob kondindo keroon. \p \v 4 Yiib inamen God yaa kuu nenem wonong yu karuwiib kumban koronde karub yena yaa yarebimaun areb. Karub kanembed okad yiri ye inamen yaa kube daboknaneen kuu God yaa arud wandembaraneen kuu yiibkaadkerindokowoo? Anamaa, kane kanembed okad yiri ye inamen yaa kube daboknaniib kuu God ye bondan keraniib kii. \v 5 Kwane, God Ye Weng Karadmo aombed yedmoon kuu “Kingkin Karadmo nub niindem aom Godbed kowaana dobirimaan kuu ye dowakeniibban awad o kingkin maayiib mene nub niindem aom dobiri kuu yiminban, norin wandi yeman.” andoon kuu yiibbed meeniwen kuu idiibbanoo? Yii, idiib. \v 6 Kwane, Godbed nub yaa ye kabamoon ye mimyob dowaken keendimaan kuu angkon ari yenayiib keendimaan. Kwamunekob, God Ye Weng aombed yedmoon, \q1 “Godbed kerengkandan yaa manmo kerimaan, \q2 kumban kankubune yirimbed dobiridan yaa ye kabamoon kondoon ye mimyob dowaken kondimaan.” andoon. \p \v 7 Kwani kowe, yiibka kankubune God ye dabderem aom dobirime. Yiib anam andi kangdommo doriib kumbed Seten yaa manmo kerime. Kwananiib kuu yiib yaa koronde yaro dore wananeen. \v 8 God ye dia mene dobirime. Kwananiib kuu yiib dia mene dobaraneen. Ambarakmidan, yiib dingki oganabime. Inamen amuniib inamen arewayiib kamenabidan, yiib niindem aom are karadmo kerime. \v 9 Mimyob wandenib dabab warenib yuudi ameng kamime. Yiib ambon kamenabi kuu amonombe dabab warime. Yiib kubi kuu amonombe niindem aom yiminban kerime. \v 10 Yariman ye murubia arimbed yiibka kankubunime. Kwananiib kuu yembed yiib benkoobaneen. \p \v 11 Angkodmia, yiibkanmo yaa wengamborokbanabaib. Karub kanembed ye kuristen angkodmi yaa wengamborokbanabaneen o ambarakmoon ande wungkananeen kuu, kuye wengbed God ye amob yaa wengamborokbanabe arewa ande wengyundaneen. Kwamune ye karub kuu amob awini ye karubban, amob yaa no wengyundi korok areb keroon. \v 12 Kumban, Amob Ongmenabe Wengyundi Ye Karub kuu mimo, bindaneen o monmaraneen kuu yembedmo yimin. Kowe, yiib kuu kane ye karub keriwenkob kwane yaro dore yiib dia doriibdan kuu ben nongkobe wengyundandamiib? \s1 Korondebko Godbed Eb Dobiri Kiwaan Ongmok \p \v 13 “Kibik o awari kuu wene taun kemaom o yamaom wenenub weeb mimo doberenub, od deme awinenub od darewoob ongmanuub.” ande yedmimaibdan, yiib ne yaa wengambirime. \v 14 Yiib kuu awarimbed yiib dobiri komarewa keraneen kuu yiibkaadban, kudi. Yiib kuu amareng mana areb, kan yaro boknaana wedmaiwa aron dukmenmo angkon ika dowan keremoon areb. \v 15 Kwana kowe, kekane yedmime, “Kekee Godiib ye dowaken keraneen kuu, kwane doberenub deme kee kwamune awinanuub.” andime. \v 16 Kumban yiib kuu “Nub dowaken yaambed kwamune awinanuub.” andimaib kuu kerengkan weng. Weng kwamune awene korem kee arewamo. \v 17 Kwane, karub kanembed amun kami angkeen kuu wedmoon kumban ma awine ambangkindo kuu, ye kuu ambarakmoon. \c 5 \s1 Yobdood Weng Yiribman Yemoondan Yaa \p \v 1 Yiribman yemoondan, yiib kuu weng kee wengambirime. Mimyob wandenib yuudi ameng kirindime, amborom kuu miin kubiyiibban ye dabab darewoob menene yiib ari kombere yerekmandameen kowe. \v 2 Yiib yiribman kuu deende weneena, dobaabbed yiib ebkad ane biringkanan weniiwa kamiib. \v 3 Yiib od goldiiwa silvaayiiwa kwangkon kemengkod dore weneena kameen. Ku kemengkod dore weneen kumbed aron yimin wande wenuun yaron arimbed yiib yiribmana biamoda yiibka kirim keriwen ande korokbendenib, yiib id yaa kwane amot areb dene ane dandaneen. \p \v 4 Kedi, yiib demedan yiib yongbon aombed id wandiwen yaa od korobe bangkandindo kumbed ambarakmi kee wedmime ande baande kamiib kii. Kwane, yi weng kee wene Aromkonomo Ye Yariman ye kerendem aom awunoona wengamboroon. \v 5 Kwane, yiib kuu okad yiri doriib kuu yiribman yemoon ibonmo beo ano doriibdan. Yiibbedmo kubena keeniwendan. Yiib kuu animan duudkab kiom anengkanao karub kiom kiommo wiribiib kuu, dingkan areb kainderebiwed yenbande ani yeman areb keriwen, wengyundi yaron yaa meenimokban kowe. \v 6 Kwane, yiibbed yorokmodan yiib yaa manmo kerindo kuyaa dudimbed wengyunde ambarakmiwen andekorib ogoodmo yenib nongkobiwen. \s1 Dabab Menebaneen Yaa Yodbirimban Iwarimbed Dobirime \p \v 7 Angkodmia, yodbirimban iwarimbed dobirime, kwane ari wene Yariman mananeen yaron kerok. Wedmime, yongbon yarian kuu okad ongme kab arumekoriwa yodbirimban iwarimbed doberemberenib am mini aron keruko am monoko nub kab kuu yeederene id yemoon keroka ande meedme doberembirimaib kii. \v 8 Kowe, yiib kwangkon yodbirimban iwarimbed doberemberene kangdommo dobirime, amborom kuu Yariman mananeen yaron kuu dia doreen kowe. \p \v 9 Angkodmia, yiibkanmo yaa mungkubmangkab kamaib. Kwamaniib kuu yiib bene wengyundaneen. Wengyundi Ye Korok kuu yiib ambib ambongko yaa mene doremoon areb keroon. \v 10 Angkodmia, profesidan yaa meenmime. Yi kuu Yariman yaningko yaambed dakmenabiiwe yenambed durud yewed yi yaa bangkandiwen kuu yodbirimban iwarimbed doberembiriwen. Yi dobiri kerekmen yaa meenmenib kuye yoman winime. \v 11 Kwane, iwari meenme kangdommo doberembiriwendan kee Godbed amun kerundoon ande yedmimaub kuda. Jobbed dabab meneboon kuyaa iwari meenme kangdommo doberemboroone Godbed ye dowad komo ambangkoon ye weng kuu yiib kuu wengambiriwen. Yariman kuu mimyob keendiyiib mimyob keende kakman are nonondandiyiib yiminmo awinoon. \p \v 12 Nangkodmia, weng darewoob kuu kei. Wiim aangke yedmaib, Ewen ari o okad yiri o yiribman komo komo yaningko yaambed kowe yedmaib. Kwane, yiib weng yedmandamibka, ee keroka kwane no ee andime, ma, yii keroka kwangkon kwane no yii andime. Yiib kwamaniib kuu yiib yaa wengyunde dabab kondaanban. \s1 Yiib Anam Andi Yaambed Kurikuri Kerime \p \v 13 Karub kanembed dabab kandoka yeka kurikuri kerok. Karub kanembed kuboka yeka God yaa yookiib wingke kube kankoonok. \v 14 Kwane, karub kanembed bob anikad kande angkimboroka yeka kurikuri yi korok korok baandok. Baandoko yi kumbed menebenib Yariman yaningko yaambed ye korok ari oiyo bune kurikuri kamenime. \v 15 Anam andi yaambed kurikuri kamenaniib kumbed bob anikad angkeen ye karub kuu Godbed ongmenaneena wadkeraneen. Kwane, ye kuu ambarakmoon keraneen kuu Godbed are nonondandaneen. \p \v 16 Kwana kowe, Godbed yiib ongmendaneena wadkeraniib ye dowad yiib ambarakmi kuu yiib kuristen angkodmia yaa neman dianmo dakmoon dakmoon kamenekorib neman kurikuri neman kurikuri kamime. God ye yorokmoman ye kurikuri kuu ambangki yiminmo keri yeman. \v 17 Elaidya kuu karubmo, nub areb. Kwane, ye kuu kamkonomo kangdommo naawonbed am monokban keruk ande kurikuri kamoon kuu kwane weeb ayoobmim ari wood benmeyiib amiib minimban keroon. \v 18 Kwamune, angkon ari yembed ika kurikuri keroona am ika muneena kwane ika animan kab dembe wonoon. \p \v 19 Nangkodmia, karub kanembed karub maa anam anam ye kiwaan koronde angkani ye karub wedmenaneen kuu kuye kiwaan ari ika nenwananeen kuu, \v 20 weng keyaa ika meene. Karub kanembed ambarakmi ye karub kiwaan abdon ari weneen kuu amonombe nen kiwaan amun ari nenwananeen kuu, ambarakmoon ye karub kuu ye bobni yaa burudande bindaneene ambarakmi miin yemoon kwangkon are nonondandaneen.