\id PHM FLM - Bible Iyansi
\ide UTF-8
\h FILEMƆ
\toc1 Un'kaan akà Filɛmɔ
\toc2 FILEMƆ
\toc3 Flm
\mt2 Un'kaan akà
\mt1 Filemɔ
\imt Nsɛmà
\ip Filemɔ wà un'kaan kàn'söönà ikɔ̈kɔ̈ unsà in'kaan myanswà kàsöön Pɔl baar. Nde kàtöm wa sye akà Apyà, bàfàsi naa nde wà un'kyay a Filemɔ, akà un'tɔŋ abi Arship, anà akà Ikööŋ ifàköŋ u ndwà a Filemɔ. Aŋan'yeerà bàfàsi naa Pɔl un'kaan awà kàsön u mbul an'kwem an'syaam aŋisyaam ungö ukwà a Yɛsu Klistɔ, umpal kàkäl nde u bɔlokà u Lɔmà.
\ip Isin kàsön Pɔl un'kaan awà akà Filɛmɔ kyàkäl mutswà mɔ̈ɔ̈ a Ɔnɛsim, mwan ande unsà dweelà. Ɔnɛsim wà un'sɔ a Filɛmɔ awà kun'tiin. Pɔl kun'swɛŋ mbwo umpal kàkäl nde u bɔlokà ntɔn nde kàsi làkwikilà amu Yɛsu Klistɔ. Pɔl kàkwen naa Ɔnɛsim ufurà akà Filɛmɔ asànaa un'klistɔ anà mbuur aŋàsɔɔmà. Mfuurà ande kwo yun'twääl ntaaŋàmbar. Mbuul a ikɔb Ɔnɛsim yà naa « mfun ». Ikaswaŋà naa kusà Ɔnɛsim kàkäl anki mfun akà Filemɔ, wɛɛ apanà nde kan'bulà mfun. Pɔl we anà ukwen mbɔɔn ntɔn Ɔnɛsim anà we anà làzir sye akà Filemɔ. Pɔl ukasɔnà kan'kɔɔ ande ŋàkwo naa nde we anà ukwen mufurà akà Filemɔ, undiir wanswà kàkɔ̈ɔ̈n awal nde ntɔn an'yilà a Ɔnɛsim. Wɛɛ Pɔl akayɔɔbà Filɛmɔ sye naa mɔ̈ɔ̈ ande ŋàkwo wà nkul ufuur nde akà nde. Pɔl kan'sà làkyän naa Filemɔ ayàpà nkul a ifà imwɛy. Un'kaan awà wàŋàyilà abà:
\ip - 1.1-3: Nsɛmà a un'kaan anà mbɔr
\ip - 1.4-7: An'tɔɔn anà ngyamàkà
\ip - 1.8-22: Pɔl an'bɔɔn Filemɔ ntɔn Ɔnɛsim
\ip - 1.8-22: Mbɔr a ntsüü anà nsaak.
\ie
\c 1
\s1 Mbɔr
\p
\v 1 Pɔl, mbuur a bɔlokà ntɔn Yɛsu Klistɔ anà un'tɔŋ abi Tumàtɛ, bi ban'pà mbɔr akà ngye Filemɔ, nkween abi anà un'baay abi, 
\v 2 anà akà un'tɔŋ abi wà un'kaar Apyà, anà akà Arship awà afànwaan ità imwɛy anà bi, anà akà un'tüüb awà afàköŋ u ndwà angye. 
\v 3 Wɛy Taaràbi Nzam anà Mwol Yɛsu Klistɔ bàlapɛ kab a ngway anà duu!
\s1 Ukwen anà làkwikilà a Filemɔ
\p
\v 4 Filemɔ, mɛ in'fàpà an'tɔɔn akà Nzam amɛ taaŋ lanswà, anà in'fatà din u ngyamàkà amɛ, 
\v 5 ntɔn mɛ in'fàwem làsaŋ a làkwikilà angye akà Mwol Yɛsu anà ukwen angye akà aŋin'kyɛɛl banswà. 
\v 6 Mɛ kàlɔ̈m akà Nzam naa làkwikilà làbà bi un'tüüb, ngye anà mɛ, làkäl ngwal amu ngye, ntɔn la làswɛŋ ubwaŋàbwaŋ ubwaŋ banswà ibà bi abà ntɔn Klistɔ. 
\v 7 Un'tɔŋ, mɛ kàmɛn un'sak anà ngwal mbɔɔn, ntɔn, u mbwo a ukwen angye, ngye kàkwaam mpem a aŋin'kyɛɛl.
\s1 Pɔl kan'sà ndɔ̈ɔ̈m ntɔn Ɔnɛsim
\p
\v 8 Lalan, itàkal naa mɛ in'wà nsaay amu Klistɔ mukaswaŋ buur angye, 
\v 9 wɛɛ mɛ in'kwen mukasà ndɔ̈ɔ̈m yi kà ikↄb a ukwen. Inye, mɛ Pɔl, in'wà un'nün anà in'wà apanà u bɔlokà ntɔn Yɛsu Klistɔ, 
\v 10 mɛ amalɔn ntɔn Ɔnɛsim, awà kàbulà mwan amɛ unsà dweelà apà u bɔlokà. 
\v 11 Kusà, nde kàkäl anki ndöŋ akà ngye, wɛɛ apanà nde wà ndöŋ akà bi, akà ngye asànaa akà mɛ. 
\v 12 Mɛ amafuur awà, nde wà asànaa mpem amɛ ŋakwo. 
\v 13 Mɛ in'làkwen mukun'kaar tsütsü apà mɛ ntɔn nde kan'syääl kà ikal angye umpal in'wà mɛ u bɔlokà ntɔn Làsaŋ Aŋàbwaŋ. 
\v 14 Wɛɛ mɛ inkwen anki mukyer abun ukɔɔn ukwen angye, ntɔn ngye akɔ̈ɔ̈n akyer ubwaŋ a ngwal, wɛɛ unsà mpem aŋàbwaŋ. 
\v 15 Taaŋ lumwɛy nkaabà angye anà Ɔnɛsim u kitaaŋ yàkäl mbwo ngye mukal ipepey anà nde. 
\v 16 Ntɔn apanà nde kà afàkal un'sɔ mpɛl a mpɛl anki, wɛɛ nde kan'söön un'sɔ: nde wà un'tɔŋ a nkween. Nde wà ndöŋ mbɔɔn akà mɛ, wɛɛ nde kan'söön sye ndöŋ mbɔɔn akà ngye, asànaa mbuur, asànaa un'tɔŋ angye amu Klistɔ! 
\v 17 Abun, isàkal naa ngye afan'wal asànaa un'tɔŋ angye unsà làkwikilà, un'wɛl sye asànaa alan'wal ngye. 
\v 18 Isàkal naa nde ibii kà nà kakyer, itàkal naa nde we anà nkul angye, wɔm ya yanswà udu un'tswe amɛ. 
\v 19 Mɛ, Pɔl, an'sɔn kà an'kɔɔ amɛ ŋàkwo, mɛ in'kyer asafuur ya. Ndöŋ yatɛy akà mɛ mukayɔɔb naa ngye sye, ngye awe anà nkul amɛ, nkul ya mɔ̈ɔ̈ angye ŋàkwo! 
\v 20 Inye, un'tɔŋ, nkyeer ubwaŋ aban ntɔn Mwol: kwaam mpem amɛ ntɔn ukwen a Klistɔ. 
\v 21 Yà ntɔn unkyeey angye waa mɛ amasöön: mɛ in'kyàyöb naa ngye ayàkyer byàŋàsöön indiir amalɔ̈ɔ̈m mɛ bi. 
\v 22 Apanà sye, ndɔ̈ɔ̈n ikal abɔ̈ɔ̈n: mɛ an'sà làkyän naa, ntɔn ngyamàkà abɛ, itaan a mbɔɔn tɛy, bàyan'fuur ba akà bɛ.
\s1 Mbɔr a ntsüü
\p
\v 23 Ɛpafras, un'tɔŋ awà u bɔlokà anà mɛ ntɔn Yɛsu Klistɔ, kàmapà mbɔr. 
\v 24 Atɔŋ bàfàsal anà mɛ bàmapà mbɔr sye: Malakɔ, Aristark, Damas anà Lukà. 
\v 25 Wɛy kab a ngwal a Mwol Yɛsu Klistɔ làkäl anà bɛ.