\id 1PE - Biblɛ Iyansi
\ide UTF-8
\h 1 PETƆLÀ
\toc1 Un'kaan atàtwɛb wà Petɔlà
\toc2 1 PETƆLÀ
\toc3 1Pe
\mt2 Un'kaan atàtwɛb wà
\mt1 Petɔlà
\imt Nsɛmà
\ip Un'kaan atàtwɛb a Petɔlà wà un'kaan a un'sɛŋ awà bàtöm akà klistɔ abà ban'buul mpem benàben kitiir a nsi a Azi Minɔ̈ɔ̈r, ŋàbà Türki. Baar a itiir a nsi aki bàkäl baar a mpem a ube. Un'kaan awà akwen mupà làkyän aba un'kanà: uman mpay mbwo mwɛy anà Klistɔ ntɔn muswaŋ mbaan akaŋankir aba. « Ukyer ubwaŋ » sye taaŋ lanswà, amà man'kyän ande myilä anà ilä. Un'kaan awà wàŋàkab itin inà. Itin kyàtàtwɛb kyà muswaŋ an'kyän a Nzam amà màkalɔɔmà naa mbuur mbuur ukäl win'kyɛɛl, alà làfàpà mbwo a ngyööb a mɔ̈ɔ̈ a dudu unsà idiim aŋàbwaŋ kyà « nkɔɔŋ a mɔ̈ɔ̈ ». Itiir kyà yweel kyàmuswaŋ mbaan a nkääl, ayà amu Klistɔ, ntɔn mukal mbuur aŋàbwaŋ, un'sɔ aŋàbwaŋ itàkal un'kaar aŋàbääl wàŋàbwaŋ. Itiir kyàtär kyà ntɔn muyöb làkyän a iköŋ aŋàbà, yöb naa Nzam wà mbak a baar a mɔ̈ɔ̈ anà bàŋàkwà. Itin kyànà kyà ntɔn muwal ilää aŋàbwaŋ ntɔn baar aŋàmɛɛ nkwaaŋ kyekà ba bàfàkyer ndaa aŋàbwaŋ. Ntsülà ifàpà baar aŋàyɛl un'kanà asànaa atö anà asyee mukal bàŋàtsim ubwaŋàbwaŋ. Yanswà ifàtsü unsà mbɔr a ntsüü. Nkye un'kaan awà wà ntööm a Petɔlà? Amwɛy bàfàkyer akyey. Bamwɛy bàfàsi naa waa wun'kaan a un'lɔŋki mwɛy ungö a mbul nkam yimfum a Petɔlà. Itàkal naa abà, ikaswaŋà naa waa bàtööm « baar bàkàtɔŋ unsi asin » ikɔ̈ɔ̈n ubwaŋ ntɔn ba. Kyekà, ndaa ayi yàbulà ikal a kab a Nzam. Kyakin, abà ba bàŋàbilà afwee u mɛɛn, ba ban'kwo muswaŋ nsöön aba anà mutà imbäl a Làsaŋ, làsaŋ aŋàbwaŋ là Nzam. Bi ibà baar ban'kwo musɔɔm nkääl a iköŋ unsà mbaan anà ukwen a un'tɔŋ, mɔ̈ɔ̈ abi wàŋàpà akà Klistɔ. Wà Klistɔ afàpà an'kyän a mpay ifàman bi, unsà nkääl aŋàbwaŋ abi, unsà làkyän abi. Abun un'söön wàmuswaŋ Ikööŋ umbwo a idiim a isin: bàkyer udu a Klistɔ « nkɔŋ a mɔ̈ɔ̈ », aklistɔ bà nkɔŋ a mɔ̈ɔ̈ a ndwà a dweelà mwɛy. Unsà ndaa iler un'sɛŋ a Isàlɛl u mɔŋ a Sinayi, ba bàŋàsà « un'lwaaŋ aŋàsɔɔl, iköŋ a mfum a angaŋ, un'sɛŋ a Nzam, un'sɛŋ awà wànde ». Ba bambäl akà baar a ukwen a Nzam. Un'kaan awà bàtöm sye akà aklistɔ a Bitini. Kyeka, u nsɛmà a mbul nkam, kàkäl anà mfum a Bitini ikɔb ande Pline le Zöne. « Babilɔn ». Nde akasii unsà an'kyän ande naa ba bàkäl indiir abunàbun anà babämà ndaa ambe yifà ifà akà atɔŋ aba mpa abà Ayudà, anà bamɛɛy nkwaaŋ. Kyakin ntööm wà mukyer mbwo yanswà mufakwɛy un'kanà ntɔn munaan an'kyän aba amu imbuur a Yɛsu Klistɔ awà mpay aba. U ngyamàkà a an'diim ilääb mbɔr, Petɔlà wàmufuur an'kyän ande mitääŋ naa Nzam ba mɔ̈ɔ̈ katsü aben anà kapɛ aben làkyän a mɔ̈ɔ̈ umbwo a ukwà anà ngwiiyà a Yɛsu Klistɔ. Asànaa Klistɔ, ba bàkäl anà làbɔ̈ɔ̈n u ndaa ande umbwo a nkääl aba anà nsyääl aba kusà a mpay. An'lwɛŋ a nsyääl bapɛɛ u ndaa iler isal a mbuur mbuur, nkääl uboo a asyääl anà alɔɔŋ, làbɔ̈ɔ̈n uboo abääl, mɔ̈ɔ̈ uboo a Ikööŋ anà nkääl kusà a baar mpa abà Ayuda. U kab làtyeen, un'söön wàmupà ndam a nswɛɛŋ akandweer, amfum a Ikööŋ, atö anà aŋàlàkwikilà banswà: ba bàkäl aŋàtsim unsà mpay, bàsi làkyän unsà ilää a Nzam! Un'kaan an'tsü unsà mbɔr.
\ip Isàkal naa atääŋ a un'kaan wà ban'sà muküünà unsà làkwikilà aba, itàkal naa mpay yà mwo, yà sin sin ntɔn imbäl akyà ban'kwo ba mutà u mɛɛn: kyakin, ilɔɔmà naa mɔ̈ɔ̈ aba wanswà, nkääl aba yanswà « itɛn isal aŋàbwaŋ a Nzam », ntɔn baar mpa abà Ayudà bàyöb isal aŋàbwaŋ aba anà bàsyäŋà Nzam kilä usàyà nde.
\ie
\c 1
\s1 Mbɔr
\p
\v 1 Mɛ Petɔlà, ntööm a Yɛsu Klistɔ, an'pà mbɔr akà baar kàsɔ̈ɔ̈l Nzam, bàfàkal u nsi a ingyey anà bàkyàpää u Pɔn, Ngalàtyà, Kapadɔs, Azi anà Bitini, 
\v 2 Taa Nzam kàlasɔ̈ɔ̈l kusà asànaa kàkwen nde, u mbwo a un'kyɛɛl a Dweelà, ntɔn bɛ làkäl anà unkyeey akà Yɛsu Klistɔ anà bàŋàpɔŋà u mbwo a an'kil ande.
\p Wɛy kab a ngway anà duu màkäl mbɔɔn anà bɛ!
\s1 Làkyän a mɔ̈ɔ̈
\p
\v 3 Wɛy nsaak ikäl akà Nzam, Taa a Mwol abi Yɛsu Klistɔ! Unsà ngyɛb ande yàkölàköl, nde kipɛ mɔ̈ɔ̈ akün ntɔn bi ikäl anà làkyän a mɔ̈ɔ̈ u mbwo a ngwiiyà a Yɛsu Klistɔ uboo a akü, 
\v 4 ntɔn mudil kwal alà kàlɔ̈ɔ̈n Nzam ntɔn baar ande. Kwal alà làkwe anki làtay, itàkal làbü ŋingyäy, itàkal làpiy ntwɛn a la bwà. Nde wàmulɔ̈ɔ̈nà la u du ntɔn bɛ, 
\v 5 bɛ baar ukatii nde kà unkaak a ngwal ande u mbwo a làkwikilà, ntɔn ngweel a mɔ̈ɔ̈ ayà isàmɛnà kà ilä a ntsüü.
\p
\v 6 Kyakin, bɛ làbàŋàyɔl a un'sak, itàkal naa u kitaaŋ bɛ làbà u ngyɛb u mbwo a nsii ifà ifà. 
\v 7 Ntɔn ntal a làkwikilà abɛ làŋàsii yan'söön ntal a wɔl alà làfàtay itàkal naa la ban'fub u mbaa. Lakwikilà alà làsàwal nsyäŋà, làkoo anà ibyääl umpal usàmɛnà Yɛsu Klistɔ. 
\v 8 Bɛ làfàkwen Yɛsu Klistɔ ukɔɔn akun'man. Apanà sye bɛ làbàmusà làkwikilà amu nde itàkal naa bɛ ŋàtuman anki, anà bɛ làbàmufuur a un'sak ifà asin anà wàlàkoo, 
\v 9 ntɔn bɛ lan'wal isin a làkwikilà abɛ: ngweel a mɔ̈ɔ̈ abɛ.
\p
\v 10 Aŋangɔɔm bàleŋ anà bàbaal pànsi pànsi ngweel a mɔ̈ɔ̈ ayi, anà ba bàtɛ ngɔɔm ntɔn kab a ngway alà kàlɔ̈ɔ̈n Nzam ntɔn bɛ. 
\v 11 Ba bàleŋà naa paŋà nà, naa sye ndaa nà isàkal asànaa kàkyään Dweelà a Klistɔ kàkäl uboo a ba, umpal kàkyään nde mpay isàkal akà Klistɔ kusà anà làkoo ande làsàyà ungö. 
\v 12 Nzam kàmɛɛy akà aŋangɔɔm naa isal aki kà kyàkäl ntɔn ba ŋakwo anki, wɛɛ ba kya bàkyerà ntɔn bɛ. Ntɔn, apanà indiir ibi, alɔɔŋ a Làsaŋ Aŋàbwaŋ bàlakyäänà bya u mbwo a ngwal a Dweelà In'kyɛɛl kàtöm Nzam fà du. Akyeey, ba ŋakwo bàkwen musà ileer aba unsà bya.
\s1 Làkäl unsà mɔ̈ɔ̈ a in'kyɛɛl
\p
\v 13 Kyakin, làyöŋà an'kyän abɛ ntɔn isal, làkäl unsà làbɔ̈ɔ̈n, làsi làkyän abɛ lanswà unsà kab a ngway alà bàlatwääl kà ilä a mɛɛy a Yɛsu Klistɔ. 
\v 14 Asànaa baan a unkyeey, twon lan'lab ilään a ndür làkäl bɛ akyà umpal làkäl bɛ aŋàdiimà, 
\v 15 wɛɛ ifà imwɛy asànaa mbuur kàlabel wà in'kyɛɛl, wɛy bɛ làkäl bà in'kyɛɛl unsà nkääl abɛ yanswà, 
\v 16 ntɔn, bàsön naa: « Bɛ làsàkal bà ŋin'kyɛɛl, ntɔn mɛ in'wà aŋin'kyɛɛl. »
\p
\v 17 Wɛɛ isàkal naa bɛ làfàbeel naa Taa, mbuur awà afàtsul nsaŋ, ukɔɔn un'kɔl aŋàyↄŋ akà mbuur wanswà unsà isal ande, làkäl unsà bɔɔmà sye umpal làbà bɛ pà u mɛɛn. 
\v 18 Làyöb naa kà unsà indiir aŋàkwà anki, asànaa ngim, itàkal wɔl, waa bàlabeen unsà nkääl a ube làwɛl bɛ akà ataaràbɛ. 
\v 19 Aay, bɛ bàlabeen unsà an'kil a ntal a Klistɔ, asànaa mwan a un'kɔk akɔ̈ɔ̈n too itàkal làbiin, 
\v 20 awà bàtöm kusà mutàkyer du anà mɛɛn, anà bun'swɛŋ kà ilä a ntsüü ntɔn bɛ. 
\v 21 U mbwo a nde, bɛ làfàsà làkwikilà amu Nzam awà kun'wiiy uboo a akü, anà kun'pɛ làkoo, ntɔn làkwikilà anà làkyän abɛ màkäl amu Nzam.
\p
\v 22 Bɛ làpöŋ mɔ̈ɔ̈ abɛ u mbwo a unkyeey akà ndandaa, ntɔn bɛ làkwen bɛ a bɛ ukɔɔn akal ayà mpem yweel. Wɛy ukwen a mpem a pɛɛlà anà bà ipepey bàkäl uboo a bɛ. 
\v 23 Ntɔn bɛ bàlabör u mɔ̈ɔ̈ akün, kà u mbwo a imbɛŋ kyan'kwo mukwà anki, wɛɛ u mbwo a imbɛŋ mpa kyan'kwo mukwà, unsà ndaa a Nzam ayà mɔ̈ɔ̈ anà yà mbul a in'tye. 
\v 24 Ntɔn:
\q1 mbuur wanswà wà asànaa un'lɛŋ aŋàyɔm,
\q1 anà làkoo ande lanswà là asànaa iful a un'lɛŋ,
\q1 un'lɛŋ usàyɔm, iful ande kyan'bwà,
\q1
\v 25 wɛɛ ndaa a Mwol yà mbul a in'tye.
\m Kyekà, ndaa ayi, yà Làsaŋ Aŋàbwaŋ alà bàlakyään.
\c 2
\s1 Ngyɛɛl u mbwo a ngwɛɛl a Ndaa
\p
\v 1 Abun, làpiy nkyɛl yanswà, an'kwaar a ube manswà, mpem yweel yanswà, un'köl wanswà, anà ntwee yanswà. 
\v 2 Lànü bɛɛl aŋàpɔŋà là Ndaa asànaa baan a kɔɔ, ntɔn u mbwo a la, bɛ làyɛl ntɔn ngweel a mɔ̈ɔ̈. 
\v 3 Kyakin, « bɛ lan'kyey naa Mwol wà ubwaŋ. »
\p
\v 4 Làsin tsütsü apà nde, nkɔŋ a mɔ̈ɔ̈ ayà bàpiy baar, wɛɛ ya yàŋàsɔɔl anà yàntal kusà a Nzam. 
\v 5 Bɛ ŋakwo làbilà asànaa nkɔŋ a mɔ̈ɔ̈ u ntööŋ a Ndwà ufàkal Dweelà, ntɔn mukyer itsuŋ a angaŋ a Nzam, ntɔn mukun'pà ibɔɔn in'kyɛɛl abyà ufàkyey Nde u mbwo a Yɛsu Klistɔ. 
\v 6 Ntɔn bàsön u Ndaa Aŋàsɔn naa:
\q1 « Le, mɛ an'sà nkɔŋ a twɛrà u Siyɔn,
\q1 nkɔŋ a ntal ayà kàsɔ̈ɔ̈l mɛ.
\q1 Mbuur awà asà làkyän amu ya, usàman anki nswɛn akà ikikye. »
\m
\v 7 Abun, ibyääl kye akà bɛ aŋàlàkwikilà, wɛɛ akà baar mpa abà aŋàlàkwikilà,
\q1 « nkɔŋ ayà bàpiy atööŋ,
\q1 yàbulà nkɔŋ a isin, nkɔŋ a twɛrà.
\m
\v 8 Ya yà nkɔŋ mwey bàfàböl baar,
\q1 un'kul mwɛy afàbwiy baar. »
\m Baar abà bàfàbwà ba, ntɔn ba bàkyàtɔn musà làkwikilà amu Ndaa. Awà undiir kàkwe mukayɛɛl.
\p
\v 9 Wɛɛ bɛ, bɛ làbà itwà aŋàsɔɔl, itsuŋ a angaŋ amfum, un'sɛŋ in'kyɛɛl, un'sɛŋ kàwɛl Nzam ntɔn mukal wànde. Nde kàlabel mutoo u làpib anà muman pɛɛlà ande là ubem, ntɔn bɛ làkàkyään isal ande byà ibaŋ. 
\v 10 Itaan, bɛ làkäl anki un'sɛŋ, wɛɛ apanà, bɛ làbà un'sɛŋ a Nzam. Bɛ baar mpa làwɛl nsyääm, wɛɛ apanà, bɛ làkyàwal nsyääm a Nzam.
\s1 Làkäl asànaa asyääl a Nzam
\p
\v 11 Ankwen amɛ, mɛ amàlalɛɛl, asànaa alyaaŋ a mbwo anà angyey, twon lan'kal anà ilään a ndür abyà ifànwaan ità anà mɔ̈ɔ̈ abɛ. 
\v 12 Làkäl anà nkääl aŋàbwaŋ kusà a baar mpa abà Ayudà, ntɔn, unsà undiir nsil awà bàfàlatwee ba naa bɛ làbà baar abe, ba bàmɛn isal abɛ byàŋàbwaŋ anà ba bàsi Nzam làkoo kà ilä usàyà nde.
\p
\v 13 Làkäl anà unkyeey akà imfum a mɛɛn kyanswà, ntɔn Mwol, itàkal akà mfum awe anà ikɔ̈b a dudu, 
\v 14 itàkal akà an'kuvɛrnɔ̈ɔ̈r ufàtɔm nde mupà ntaaŋàmbar akà baar abe anà musyäŋà baar bàfàkyer ubwaŋ. 
\v 15 Ntɔn ba bà ukwen a Nzam naa bɛ làkyer ubwaŋ ntɔn mudübà min a insil mpa bàyöb akà undiir mwɛy. 
\v 16 Làkäl asànaa baar abye anà insaay, ukɔɔn asyääl kya asànaa nkümà ntɔn mufwe nkyɛl abɛ, wɛɛ làkyer asànaa asyääl a Nzam. 
\v 17 Làpɛ ibyääl akà baar banswà, lakwen atɔŋ abɛ, làyöb ikɔ̈b a Nzam, lun'syäŋà mfum.
\s1 Mbaan a mpay a Klistɔ
\p
\v 18 Asyääl a ndwà, làkäl anà unkyeey mbɔɔn akà ankum abɛ, kànà akà bàŋàbwaŋ anà bàduu mpɛl anki, wɛɛ anà akaŋitswumbuun. 
\v 19 Abun, yà ubwaŋ mbɔɔn mukyey mpay bàfipà ukɔɔn isin aya, ntɔn musyäŋà Nzam. 
\v 20 Abun, làkoo nà mukaŋ mpem naa bàladüb ntɔn ibii lan'kyer bɛ? Wɛɛ isàkal naa bɛ lan'man mpay ntɔn ubwaŋ lan'kyer bɛ, la là kab a ngway u mii a Nzam. 
\v 21 Kyekà, yà ntɔn ya waa bàlabel, ntɔn Klistɔ sye kàkɔɔm mwäänà ntɔn bɛ, nde kàlaswɛŋ mbaan ntɔn bɛ làläb nkääl ande. 
\v 22 Nde kàkyer anki man'be, ndaa a an'kwaar sye yàtoo anki u mun ande, 
\v 23 nde kàfuur anki in'tswe, mpal bun'tö in'tswe. Wɛɛ mpal bun'pɛ ba mpay, nde kàŋän anki, wɛɛ ya yanswà nde kàpɛ akà mbuur afàtsul nsaŋ a balàbal lanswà. 
\v 24 Nde kàsyen buur a man'be abi nde ŋakwo tii u kulunsi, ntɔn bi kàkü anà man'be abi ŋakwo, ntɔn bi ikäl anà mɔ̈ɔ̈ ntɔn balàbal, nde kàlakɔɔr u mbwo a iwà ande. 
\v 25 Ntɔn bɛ làdiimà mbwo asànaa in'kɔk, wɛɛ apanà, bɛ lan'furà akàun'kyɛɛŋ a in'kɔk anà un'leer a mɔ̈ɔ̈ abɛ.
\c 3
\s1 Akaar anà adim aba
\p
\v 1 Bɛ akaar sye, làkäl anà unkyeey akà adim abɛ, ntɔn isàkal naa bye anà abaal bumwɛy uboo aba làkwikilà latɛy unsà ndaa a Nzam, waa ba bàsà làkwikilà u mɔ̈ɔ̈ aba ntɔn nkääl aŋàbwaŋ yà akyay aba, 
\v 2 unsà nkääl aŋàpɔŋà anà yà làzir abɛ. 
\v 3 Wɛy ntwɛn abɛ ikɔ̈ɔ̈n akal nà u nsà mpɛl asànaa: ntswee aŋàtɔŋ, an'yak a wɔl anà ipfɛy a ntal, 
\v 4 wɛɛ, wɛy ntwɛn abɛ ikäl yàŋàyee uboo a mpem, ntwɛn ikɔ̈ɔ̈n mbɔ̈ɔ̈n yà dweelà a làbɔ̈ɔ̈n anà làduu, yà ntal a kölàköl u mii a Nzam. 
\v 5 Kyakin mbalà yumwɛy, yayi yàkäl mbwäär a akaar in'kyɛɛl abà bàsi làkyän amu Nzam, abà bàkäl anà unkyeey akà adim aba, 
\v 6 asànaa Saal kàsi nde làbɔ̈ɔ̈n akà Abàlam anà kun'bel nde naa mwol ande, nde mbuur làbà bɛ baan ande bakaar, mukyer ndaa aŋàbwaŋ anà mukɔɔn akal unsà bɔɔmà.
\p
\v 7 Bɛ adim sye, làkäl anà nkääl a un'tüüb unsà ngwem anà làyöb nsöön a bwääl alye a akaar. Lasi akyay abe làzir, ntɔn ba, asànaa bɛ, ba bà aŋakwal a kab a ngway a mɔ̈ɔ̈, waa akà ndaa mwɛy ikɔ̈ɔ̈n asà lingyoomà uboo a ngyamàkà abɛ.
\s1 Nkyeer a ubwaŋ
\p
\v 8 Mumay, làkäl an'kyän an'mwɛy ma, làkal anà ngweem a ngyɛb, làkwen bɛ a bɛ, làkäl anà nsyääm anà làbɔ̈ɔ̈n. 
\v 9 Twon làfuur ube udu a ube, itàkal in'tswe udu a in'tswe, wɛɛ làsaak, ntɔn bàlabel ntɔn nsaak, ntɔn muwal kwal a nsaak. 
\v 10 Kyakin,
\q1 « Wɛy mbuur akwen mɔ̈ɔ̈ anà ilä aŋàbwaŋ,
\q1 ukäl unsà igyɛɛŋ mutɛn ndaa a mbe anà mutà loor,
\q1
\v 11 uwɛy ube anà ukyer ubwaŋ,
\q1 uleŋ duu anà ukäl uboo a la unsà muküünà.
\q1
\v 12 Ntɔn mii a Mwol myà udu a baar a balàbal,
\q1 anà an'tsü ande mà ipɔl ntɔn muwem ngyamàkà aba,
\q1 wɛɛ ntabwey a Mwol ifàpà ngö akà baar bàfàkyer ube. »
\p
\v 13 Nà asàlakyer ube, isàkal naa bɛ làbà ngwal mukyer ndaa aŋàbwaŋ? 
\v 14 Itàkal naa bɛ làbà muman mpay ntɔn làfàkyer bɛ ndaa a balàbal, làyöb naa bɛ làbà unsà un'sak. Twon lan'man bɔɔmà a baar bumwɛy anà twon lan'kal udu udu. 
\v 15 Wɛɛ làpɛ làkoo akà Klistɔ taaŋ lanswà asànaa Mwol uboo a mpem abɛ. Làkäl ngwal taaŋ lanswà mufuur ndaa aŋàbwaŋ akà baar banswà bàkwen muyöb làkyän alye anà bɛ. 
\v 16 Wɛɛ ya ikäl abà unsà duu anà làzir. Làkäl anà an'kyän aŋàbwaŋ ntɔn baar bàfàlatwee, anà bàfàman naa nkääl a Klistɔ uboo abɛ yatɛy, waa ba bàsàman nswɛn. 
\v 17 Isàkal naa ba bà ukwen a Nzam, yan'söön ubwaŋ muman mpay ntɔn ubwaŋ làfàkyer bɛ, akwànaa mukyer ube. 
\v 18 Kyakin, Klistɔ nde ŋakwo, kàmɛn mpay mbalà mwɛy ya, ntɔn man'be a baar, nde mbuur akɔ̈ɔ̈n man'be, waa kàlakweel, bɛ baar a man'be, ntɔn mukàlapà akà Nzam. Nde bun'dwä unsà ndür ande yà imbuur, wɛɛ bun'fuur u mɔ̈ɔ̈ unsà ngwal a Dweelà In'kyɛɛl. 
\v 19 Kyakin kàkyen nde mukàlɔŋ itàkal naa an'dweelà màkäl uboo a bɔlokà, 
\v 20 akà baar bàtön mukyey, umpal kàkäŋ Nzam mpem - kà ilä kàtöŋà Nɔwà an'swà amà bàbilà baar ntal ikikye, banswà bàkäl baar naan mpa bàkü uboo a an'dà. 
\v 21 Kya kyàkäl idiim a ndüümà akyà ifàlatswà mɔ̈ɔ̈ papanà: kya kà kyà ntɔn mpööŋ a làbiin a ndür anki, wɛɛ ntɔn unkyeey akà Nzam unsà an'kyän aŋàbwaŋ, nde afàlatswà mɔ̈ɔ̈ u mbwo a ngwiiyà a Yɛsu Klistɔ, 
\v 22 awà kàkyen du, wà u kɔɔ a ibaal a Nzam, anà bàpɛ sye akà nde muyaal udu a akyeey, aŋikɔ̈b anà aŋangwal.
\c 4
\s1 Mɔ̈ɔ̈ akün
\p
\v 1 Abun, asànaa Klistɔ kàmɛn nde mpay u ndür ande, bɛ sye làkäl aŋàtsim unsà an'kyän nsil ma, ntɔn mbuur awà kàmɛn mpay u ndür ande, kàkyakaab anà man'be, 
\v 2 mpalàbà, wɛy nkääl abɛ, unsà ilä byan'saal unsi a mɛɛn pà, ikäl asànaa abà ukwen a Nzam, wɛɛ kà asànaa abà ukwen a baar anki. 
\v 3 Bɛ sye làdwä taaŋ mbɔɔn mukyer ndaa ayà ifàpà un'sak akà baar mpa abà Ayudà, mukal uboo a pfürà, unsà ilään a ndaa a mbe, unsà ngyöör a man, unsà in'kyɔm, u nweel a man anà u ngyamàkà a itɛk. 
\v 4 Apanà, ba bà muman ndaa mwɛy yà ubem naa bɛ lan'fàtɔn mukyer ndaa a nswɛn kà imɛɛy mbwo mwɛy anà ba, anà ba sye bàmukàlabɛy. 
\v 5 Wɛɛ ba bàsàmɛɛy nkyeer aba u mii a mbuur awà kan'kwo mutsul nsaŋ a baar a mɔ̈ɔ̈ anà bàŋàkwà. 
\v 6 Kyakin Làsaŋ Aŋàbwaŋ alà bàsam itàkal akà baar aŋàkwà: abun, itàkal naa ba bàsapà ntaaŋàmbar ntɔn nkääl bàkäl ba ayà u mɛɛn, asànaa naa baar banswà, wɛɛ unsà ngwal a Dweelà, ba ban'kwo mukal anà mɔ̈ɔ̈ ufàpà Nzam. 
\v 7 Ntsüü a ndaa yanswà yà tsütsü. Kyakin, làkäl anà an'yeerà anà imbämdir a Dweelà ntɔn bɛ làyamà. 
\v 8 Kusà aya yanswà, làkäl anà ukwen a ngwalàngwal bɛ a bɛ, ntɔn ukwen bàfàdwa nkul. 
\v 9 Làkäl anà mbaay bɛ a bɛ, ukɔɔn asà nkyɛɛr. 
\v 10 Wɛy mbuur mbuur usi kab a ngway kàwɛl nde akà Nzam ntɔn ubwaŋ a baar bumwɛy ukɔɔn aŋüŋün. Abun, bɛ làsàkal anà nkääb aŋàbwaŋ yan'kab a Nzam mà ifà ifà. 
\v 11 Wɛy mbuur awe anà kab ntɔn mulɔŋ, nde u lɔŋ ndaa a Nzam. Wɛy mbuur awe anà kab ntɔn mubay baar bumwɛy, nde ukyer a ngwal ayà kun'pɛ Nzam. Wɛy naa unsà ya yanswà, làkoo làfurà akà Nzam, u mbwo a Yɛsu Klistɔ. Wɛy naa làkoo anà ngwal byàkäl ipepey akà nde. Wöö wöö!
\s1 Mbiilà u mpay a Klistɔ
\p
\v 12 Ankwen amɛ, twon lan'man ndaa yà ubem isàkal naa bɛ làbà muman mpay, asànaa naa ya yà ndaa mwɛy yà ingyey. 
\v 13 Wɛɛ bɛ làkäl unsà un'sak itàkal naa bɛ làbà muman mpay mbwo mwɛy anà Klistɔ, ntɔn bɛ làsàman un'sak mbɔɔn umpal làsàmɛnà làkoo ande akà baar banswà. 
\v 14 Isàkal naa bàsàlato ntɔn bɛ làbà alɔŋki a Klistɔ, bɛ làbà baar un'sak, ntɔn Dweelà a làkoo, Dweelà a Nzam wuboo a bɛ. 
\v 15 Wɛy naa akà mbuur mwɛy amu bɛ ukɔɔn awal ntaaŋàmbar, naa ntɔn nde kàkyer adwa, kàkyer ayib, kàkyer undiir mwɛy wà ube, anà kàbilà sye u ndaa abar. 
\v 16 Wɛɛ isàkal naa mbuur mwɛy an'man mpay naa ntɔn nde wà un'klistɔ, nde twon an'man nswɛn, wɛɛ wɛy nde upɛ Nzam làkoo ntɔn kan'wal nde ikɔb a un'klistɔ.
\p
\v 17 Taaŋ a nsaŋ lan'kwo, ya itàtwab akà bi baan a Nzam. Abun, isàkal naa ya isàtwab akà bi, wɛɛ ya isàkal aben akà baar bàfàtɔn Làsaŋ Aŋàbwaŋ a Nzam? 
\v 18 Asànaa itɛɛnà Ndaa Aŋàsɔn:
\q1 « Isàkal naa mbuur a balàbal mɔ̈ɔ̈ asàwà a mpay yanswà,
\q1 nkye isàkal akà mbuur un'be anà mbuur a man'be? » 
\v 19 Kyakin, wɛy baar bàfàman mpay asànaa abà ukwen a Nzam, bàpɛ mɔ̈ɔ̈ aba akà Nkyer, nde mbuur a làbɔ̈ɔ̈n, anà ba bàsi muküünà mukyer ubwaŋ.
\c 5
\s1 Uler làböl a in'kɔk a Nzam
\p
\v 1 Kyakin, mɛ an'pà un'kanà akà andweer a Ikööŋ abà uboo a bɛ. Mɛ sye in'wà un'dweer asànaa ba, anà in'wà mbäl a mpay a Klistɔ, mɛ mbuur in'we anà kab a làkoo alà làsàmɛnà. Le undiir in'lɔɔmà mɛ akà ba: 
\v 2 Làdii làböl a in'kɔk kàlapɛ Nzam, twon làler la a un'kaak a ngwal wanswà, wɛɛ unsà mpem aŋàbwaŋ asànaa ukwen Nzam, twon lan'kyer ntɔn muleŋ bweel, wɛɛ unsà ukwen. 
\v 3 Twon làyaal baar abà bàlapɛ muler a un'kaak a ngwal abɛ, wɛɛ làkäl mbaan ntɔn in'kɔk. 
\v 4 Kyakin, bɛ làsàwal mpà a làkoo mpa isàbi ubwaŋ aya akà ikikye umpal usàyà Nkum a aseey.
\p
\v 5 Mbwo mwɛy, bɛ atö anà asye, làkäl anà unkyeey akà andweer. Anà bɛ banswà, làkäl anà làbɔ̈ɔ̈n unsà nkääl abɛ, bɛ a bɛ, ntɔn « Nzam afàtɔn aŋun'yɔl, wɛɛ nde afàswaŋ ubwaŋ ande akà aŋàlàbɔ̈ɔ̈n. » 
\v 6 Abun, làsi làbɔ̈ɔ̈n ungyɛl a kɔɔ a ngwal a Nzam, waa nde usàlasɛɛn taaŋ kàsi nde, 
\v 7 làpɛ nkyɛɛr abɛ yanswà akà nde, ntɔn nde mbuur afàlabɔŋ.
\p
\v 8 Làduub mii abɛ, làkäl unsà igyɛɛŋ! ntɔn ŋankir abɛ, ileŋ, wàmuyileŋ asànaa nkwee a umpɔr ayileŋ mbuur adyà. 
\v 9 Lumbäär, làkäl aŋàtsim unsà làkwikilà abɛ. Làyöb naa mpay nsil yayi bàpɛ akà atɔŋ abɛ abà u mɛɛn. 
\v 10 Nzam, aŋangyɛb yanswà awà kàlabel unsà làkoo ande là mbul a in'tye u mbwo a Klistɔ, nde ŋakwo asàlapà ngwal ungö a kitaaŋ làsàman bɛ mpay, nde akyer asàlatsiim, asàlatsümà udu a in'bään a ngwal. 
\v 11 Wɛy ikɔ̈b ikäl anà nde mbul a in'tye! Wöö wöö!
\s1 Mbɔr a ntsüü
\p
\v 12 Mɛ kàlasöön bingɔk bi u mbwo a Silàvɛ, awà in'fàwal mɛ asànaa un'tɔŋ a lää, ntɔn mukàlalɛɛl anà mutà imbäl naa yà unsà kab a ngway a Nzam làndandaa waa bɛ làbaŋàtsim.
\p
\v 13 Iköŋ a aklistɔ akyà pà u Babilɔn, kyàmàlatööm mbɔr, anà Malakɔ, mwan amɛ. 
\v 14 Làpɛɛl mbɔr a un'kaay a atɔŋ bɛ a bɛ.
\p Wɛy duu làkäl anà bɛ banswà làbà amu Klistɔ!