\id 3JN - Iamalele NT [yml] -Papua New Guinea 1988 (web version -2013 bd) 
\h 3 IONI 
\toc1 Ioni yana kiluma ꞌana vetonu 
\toc2 3 Ioni 
\toc3 3 Ion 
\mt1 3 IONI  
\mt2 Ioni yana kiluma ꞌana vetonu.  
\ip Leta deꞌe ꞌana vetonu Ioni i kilumi siwe kebu ꞌana wagava i da yatoi, ꞌasaꞌaiana i vo, Yau ꞌauvea, yamu toꞌedakumeta ꞌwaikuyega.” Letanina i kilumi i nago tamu tovetumagana ꞌwaineye, ꞌana wagava Gaiasa. I kiluma i subiai yana ꞌisaveꞌavina Yaubada yana tofolovavo ꞌwaidie faifaina. Weꞌe tamu tovetumagana ꞌana wagava Diotilifi yana sauluva i awavesakoyeni. Deꞌe letanina ꞌana ꞌidi side baniꞌodi.  
\ib  
\ili1 Vona vekaiwa. 1:1-4  
\ili1 Gaiasa ꞌana subia. 1:5-8  
\ili1 Diotilifi ꞌana awavesako. 1:9-10  
\ili1 Dimitilasi ꞌana awaveꞌatumai. 1:11-12  
\ili1 Yana ꞌalanuai. 1:13-15  
\c 1  
\p
\v 1 \x + \xo 1:1 \xt Fol 19:29\x*Yau ꞌauvea, yamu toꞌedakumeta, a vekaiwa ꞌomu iaku Gaiasa ꞌwaimuye, a nuakalikaliemu mogitana.  
\v 2 Iaku, a veveluꞌui faifaimu bega kebu tamu vita i na sousouyeni ꞌwaimuye, wata ꞌamu lautonova matatabuna ꞌatumaidi, baniꞌodi yamu folova wata yamu sauluva ꞌakonadi ꞌatumaidi Yaubada mataneye.  
\v 3 A ꞌasetai yamu folova wata yamu sauluva ꞌatumaidi Yaubada mataneye fai edavo tovetumagana ꞌifwaidi i maia i luꞌivona ꞌwaikuye ma yamu dumwebika Yaubada yana nuanua tonovidi ꞌu vevematayakeyakedi. Valamunina faifaina a sosoana bwaikina.  
\v 4 \x + \xo 1:4 \xt 1 Kol 4:14-15\x*Nani fuedi faifaidi a sosoana, siwe ꞌaiꞌedi a na nogai natukwavo Keliso yana ꞌailaꞌa, Yaubada yana nuanua tonovidi i vevematayakeyakedi, ꞌeba sosoana bwaikaotogina ꞌwaikuye.   
\s1 Gaiasa ꞌana subia.  
\p
\v 5 \x + \xo 1:5 \xt Lom 12:13\x*Iaku, mogitana ꞌomu ma ꞌamu vetumagana ꞌu folofolova edavo tovetumagana ꞌwaidie. Tovetumagananidi ꞌifwaidi taunidi tolauꞌage-vuvua, ꞌifwaidi ꞌu ꞌisaꞌinanadi ꞌifwaidi ꞌu bavuyedi, siwe matatabudi ꞌu ꞌiꞌisaveꞌavinidi.  
\v 6 \x + \xo 1:6 \xt Fol 15:3\x*I veifufu Keliso yana ꞌAilaꞌa ꞌwaidie yamu ꞌaivaita wata yamu nuakalikali faifaidi. I na tautauyaga, nuanuaku ꞌu na ꞌivaisedi wata ꞌadi ꞌibua ꞌu na veleveledi, nika Yaubada i na sososoana yamu folova faifaina.  
\v 7-8 \x + \xo 1:7-8 \xt Fol 20:33,35; \xt Ibu 13:2\x*ꞌIda Keliso yana ꞌAilaꞌa i lubwaineda tomotoganidi ta na ꞌiꞌivaisedi fai yadi ꞌatamana i ꞌiawedi i lalauꞌage-vuvua Keliso faifaina. I lalauꞌage-maimaiga, kebu tamu ꞌaivaita i da veveluagai Yaubada ꞌana tobavu ꞌwaidiega. Ta na ꞌiꞌisaveꞌavinidiga, ꞌasaꞌaiana matatabuda ta veꞌivaivaita bega Yaubada yana nuanua tonovidi valana, i na vebwaika tomotoga ꞌwaidie.   
\s1 Diotilifi wata Dimitilasi faifaidi.  
\p
\v 9 \x + \xo 1:9 \xt Mad 20:27\x*Basenadi tamu yaku leta a kilumi tovetumaganavo taiadi ꞌwa miamianiga ꞌwaidie, siwe Diotilifi, kumanina nuanuana i na vetoꞌedakumeta ꞌwaimie, yama nuanua i vedumweꞌaiꞌaiedi.  
\v 10 Tutuyanina a na wai, yana sauluva sakoidi a na luꞌivoneyedi ꞌwaimie. I vevebonaivoyema wata i awavesakoyema, siwe wata tamu sauluva sakoiotogina i ꞌiꞌidewai. Tutuyanina Yaubada yana tofolovavo i leꞌwaleꞌwai i baibaila, wata ꞌaiꞌedi egavo nuanuadi i na luꞌumaꞌumaiedi, i tatalabodedi, weꞌe i na luꞌumaꞌumaiediga igodi nuanuana i na veugeugedi Keliso yana ꞌAilaꞌa ꞌwainega.   
\p
\v 11 Iaku, a nuakalikaliemu, sauluva sakoidi kebu ꞌu na vetutuyamediga, nuanuaku sauluva ꞌatumaidi ꞌu na vevetutuyamedi. Egavo i vevesauluva ꞌatumaina taunidi Yaubada natunavo, weꞌe egavo i vevesauluva sakoina taunidi kebu Yaubada i da ꞌasetai mogitana.   
\p
\v 12 Tomotoga fuedi i vo, Dimitilasi yana sauluva ꞌatumaidi.” Baniꞌodi i voneyediga vona mogitana fai yana sauluva tonovidi. ꞌIma wata baniꞌodi a awaveꞌatumaieni, ꞌakonadi ꞌwa ꞌasetama avaꞌai ꞌa na voneyediga tonovidiamo a na vona.   
\s1 Yana vona nuakalikali ꞌana ꞌeba veꞌaꞌava.  
\p
\v 13 Nuanuaku ꞌwaimie a na veifufu manamanawena, siwe kebu kiluma ꞌaisena ꞌwainega.  
\v 14 A nuani ꞌawaie tauniotogiku a na waimo taiadi ta na veifufu.   
\p
\v 15 A veveluꞌui faifaimu, nuanuaku Yaubada nuanua bikadi i na velevelemu mia ꞌatumaina taiadi. Emwavo deꞌe bei yadi vekaiwa i vetunei ꞌwaimuye. Nuanuaku edavo taiadi ꞌwa miamianiga, matatabudi ꞌwaidie ꞌu na luꞌivona yaku vekaiwa.  
\b  
\b  
\p ꞌAsaꞌaiana baniꞌodi,  
\p Yau Ioni.