\id 1JN - Yele (Rossel) NT [yle] -Papua New Guinea 1998 (DBL 2014) 
\h 1 Njon 
\toc1 1 Njon 
\toc2 1 Njon 
\toc3 1 Njon 
\mt1 1 NJON  
\ip Pini n꞉ii ngê ala pweepwee pee d꞉êê ngê, u pi Njon, Sepédi tp꞉oo, Yesu u dyépi ngmê. Dini ghi n꞉ii ngê pi vy꞉ee ngê doo ya, ala pweepwee u ngwo d꞉êê ngê, Yesu u yoo knî ye dy꞉ââ ngê.  
\ip Pi ngmê knî y꞉oo yi yéli kn꞉aa máádi p꞉uu dnye kapî dé, yipu, Doo u ntââ Chóó Lémi Tp꞉oo pi ngê daapî pyodo. Yipu, Chóó Lémi mupwo d꞉ud꞉umbiy꞉e mb꞉aamb꞉aa dê, dono yi p꞉uu daa t꞉a. Yipu, Dyámê u kópu dé dono dé, dyámê mbêmê tpémi mye dono dé. Yipu, Doo u ntââ Chóó Lémi Tp꞉oo pi ngê daapî pyodo. Yipu, Yesu pi ntee pini, dini ghi n꞉ii ngê Njon Baptist ngê mbápitisîm kwólu, yi ngwo Chóó Lémi Tp꞉oo Yesu p꞉uu kele, yipu, Yesu ghêlî daa vya ngópu, Chóó Lémi Tp꞉oo ngê mwiyé a kuwo ngê. K꞉omodanê kópu pi knî ye yidnyimo tpapê. Myenté k꞉omodanê kópu ye m꞉uu dnyimo tpapê, yipu, K꞉omo tpile Yesu u yoo adnyi dono, ó daadnyi dono, u kópu daa tóó.  
\ip Njon ngê yoo yi wátiwáti u l꞉êê dîy꞉o ala pweepwee pee u ngwo d꞉êê ngê.  
\c 1  
\s1 Kêlî Pini p꞉uu kópu dyuu  
\p
\v 1 Nmî Kêlî Pini p꞉uu nmye nmînê d꞉êê té, pini n꞉ii ghê njini u kn꞉ââ. Mwiyémwiyé dini ghi ngê yi pini doo a ya, nmî dye ghi ngê u kwo nmee a ng꞉aa, nmî chóó nmî ngwolo knî y꞉oo nmî módu, nmî kêê dmi p꞉uu my꞉oo yó. \x * \xo 1:1 \xt Njon 1:1-4\x*  
\v 2 Yi ghéni kn꞉ââ nmî Mî k꞉ii nipi dpîmo a ya, myenté chedê ngê daawa pyódu. Dini ghi n꞉ii ngê pi ngê pyodo, nmî módu. Yi kópu u l꞉êê dîy꞉o u pi ntênê nmye nmo tpapê ngê, dpîno k꞉omodanê té. \x * \xo 1:2 \xt Njon 1:14\x*  
\v 3 Pini n꞉ii nmî módu, kópuni u kwo nmo ny꞉ee too, nmye vyîlo yinmo tpapê too, mu kópu u dîy꞉o nmî nuw꞉o dmi ntee a tóó, nmyi nuw꞉o dmi yinté myedny꞉oo a ya. Nmî Mî mupwo Yesu Kédisu yi k꞉ii ngmidi ngê ntee nmo pyede, u yi nmo a kwo, Yi k꞉ii ngmidi ngê yinté myedmyinê a ya.  
\v 4 Nmye nmînê d꞉êê té, mu kópu u dîy꞉o w꞉aa pêdê pyw꞉ee yó, myenté myepono pyw꞉oo.   
\s1 W꞉êênî paa  
\p
\v 5 Ala kópu dyuu nmî Lémi u kwo nmo ny꞉ee too, nmye vyîlo yinmo tpapê too, Chóó Lémi kââdî ntee tpile ye tóó, mgîdî knî p꞉uu daangma a t꞉a. \x * \xo 1:5 \xt 1 Tim 6:16; Njems 1:17\x*  
\v 6 Ala kópu anmî tpapê knomomê, Nmî Mî k꞉ii ngmidi ngê nmo pyede, ngmênê mgîdî vy꞉o anmî m꞉ii knomomê, ye anmî k꞉omodanê, daa nmî Mî u pono anmî vyápê. \x * \xo 1:6 \xt 1 Njon 2:4\x*  
\v 7 Nmî Mî w꞉êênî ntee a tóó, w꞉êênî yinté anmî m꞉ii knomomê, ye u k꞉ii ngmidi ngê anmî ya, u yoo knî yi k꞉ii ngmidi ngê amyenmî ya, Tp꞉oo Yesu u wêê ngê nmî dono yilî yintómu dpî ghêê té.   
\p
\v 8 Ala kópu anmî tpapê knomomê, Dono nmî mênê daa tóó, ye nmî chóó nmî nuw꞉o knî y꞉oo adnyi dódó nmo, nmî Mî u ndê kópu dyuu nmî mênê daadnyi ya.  
\v 9 Ngmênê nmî dono yilî yi yuu dmi nmî Mî ka anmo y꞉ee knomomê, daawa dóó nmo, kópu mb꞉aa nmo angmê d꞉uu, nmî dono yilî u kuwó wa kéé té, mêdaawa a ngî té, wa ghêê nmo, kamî ngê wa pyódu nmo.  
\v 10 N꞉ii ngê dpo, Dono d꞉oongmê d꞉uu ngê, yi pini ngê nmî Mî u kópu dyuu dpî vy꞉a, mu kópu u dîy꞉o nmî Mî ngê dpo, Pi yintómu a dono nyédi. Yi pini u mênê nmî Mî u kópu dyuu daa ya nyédi.   
\c 2  
\s1 Yesu Kédisu nmî Mbwámê  
\p
\v 1 A tp꞉ee yoo, nmye nînê d꞉êê, mu kópu u dîy꞉o dono kópu daangmêpaa d꞉uu yó, ngmênê dono ngmanmî d꞉uu knomomê, Yesu Kédisu ngê nmî Mî ka amî kwódu nmo, kwowo, Nangê kpada té, \x * \xo 2:1 \xt Hipîlu 9:24\x*  
\v 2 yi yikî dmi a pwo ghay wo. A tp꞉ee yoo, Yesu Kédisu ngê chóó dono daangmê d꞉uu ngê, ngmênê nmî dono yintómu yi l꞉êê dîy꞉o pwene. Daa nmî mo nmî l꞉êê dîy꞉o pwene, ngmênê pi yintómu yi l꞉êê dîy꞉o mye pwene. \x * \xo 2:2 \xt Lóma 3:25; Njon 1:29; 11:52\x*   
\p
\v 3 Nmî Mî ka anmî ng꞉aa knomomê, ye ala kópu nmî lama ntênê wa yââ, Nmî Mî nmî lama pini ngê a tóó, u yoo vy꞉o nmo wee.  
\v 4 N꞉ii ngê dpî vyi, Nmî Mî a lama pini ngê a tóó, u yoo vy꞉o n꞉aa kwo, ngmênê yi pini u kwo daa ng꞉aa yédi, yi pini k꞉omodanê pyu, ndê kópu dyuu u mênê daa ya nyédi. \x * \xo 2:4 \xt 1 Njon 1:6,8\x*  
\v 5 N꞉ii u kópu dyuu ka adî ng꞉aa, vyîlo yi pini nódo nmî Mî nuu ghi d꞉ud꞉umbiy꞉e a tóó. Yi kópu mbêmê nmî lama dpî yââ, nmî Mî k꞉ii ngmidi ngê nmo pyede. \x * \xo 2:5 \xt Njon 14:21,23; 1 Njon 4:12,17; 5:3\x*  
\v 6 N꞉ii ngê dê vyi knomomê, nmî Mî k꞉ii ngmidi ngê nye tóó mo, Tp꞉oo Yesu Kédisu ntee doo a m꞉ii, yi pini yinté myechoo m꞉ii. \x * \xo 2:6 \xt Njon 13:15\x*   
\s1 Dêêpî Kópu kamî  
\p
\v 7 A tp꞉ee yoo, daa dêêpî kópu kamî nmye yinînê d꞉êêd꞉êê, ngmênê dêêpî kópu mbwee. Dini ghi n꞉ii ngê Yesu u yoo vy꞉o wunê nmyinê ghê dniye, yi dêêpî kópu yi ngwo nmyinê ny꞉ee ngópu, nmyepê, Nmyi nuu ghi dmi numo nódo dny꞉oo ya. \x * \xo 2:7 \xt 2 Njon 1:5-6\x*  
\v 8 Ngmênê yi dêêpî kópu kamî ngê mo tóó. Yesu Kédisu ngê yi dêêpî kópu nmî ngópu ntênê dpîmo a chââchââ, yinté my꞉ee chââchââ ngmê. Mgîdî machedê ngê ka pyodopyodo, pywápê ndêndê wunê ka dnyednye. \x * \xo 2:8 \xt Njon 1:9; Lóma 13:12\x*   
\p
\v 9 N꞉ii ngê dpo, Pywápê u wuu n꞉aa m꞉ii, ngmênê u mbwó u kwo a diya yédi, yi pini mgîdî vy꞉o mo m꞉ii. \x * \xo 2:9 \xt 1 Njon 3:10,15; 4:20\x*  
\v 10 N꞉ii nódo u mbwó u nuu ghi a ya yédi, yi pini pywápê u wuu a tóó, pi d꞉uudpo lvêêdî. \x * \xo 2:10 \xt Lóma 14:13\x*  
\v 11 Ngmênê n꞉ii ka u mbwó a diya yédi, yi pini mgîdî vy꞉o a kwo, mgîdî vy꞉o mye m꞉ii. Doo u lama a paa yédi, ngmênê u kwo, Ló y꞉i n꞉aa lêpî, mu kópu u dîy꞉o mgîdî ngê ngwolo dê dpî dyênê dê. \x * \xo 2:11 \xt Njon 12:35\x*   
\p
\v 12 Tp꞉ee dmââdîma, nmye nînê d꞉êê, mu kópu u dîy꞉o Yesu Kédisu u pi mbêmê nmî Mî ngê nmyi dono yilî u kuwó kéé too. \x * \xo 2:12 \xt 1 Kódin 6:11\x*  
\v 13 Mââwe yoo, nmye nînê d꞉êê, mu kópu u dîy꞉o pini n꞉ii dye ghi yintómu doo a ya, nmyi lama a tóó. Pi lvulu yoo, nmye nînê d꞉êê, mu kópu u dîy꞉o dpodombiy꞉e nmyi ghê dniye, Setan nmyi yi yodo u maknopwo nmyi yé ngópu.   
\p
\v 14 Tp꞉ee dmââdîma, nmye nînê d꞉êê, mu kópu u dîy꞉o nmî Mî nmyi lama a tóó. Mââwe yoo, nmye nînê d꞉êê, mu kópu u dîy꞉o pini n꞉ii dye ghi yintómu doo a ya, nmyi lama a tóó. Pi lvulu yoo, nmye nînê d꞉êê, mu kópu u dîy꞉o nmyo wêdêwêdê dé, nmî Mî u kópu dyuu nmyi mênê a kwo, Setan nmyi yi yodo u maknopwo nmyi yé ngópu.   
\p
\v 15 Dyámê nangê kâpu, dyámê u tpile knî yi p꞉uu nmyi nuw꞉o dmi kîngê kwo. Dyámê anmyinê kâpu knomomê, nmî Mî u nuu ghi nmyi nódo daadî ya, \x * \xo 2:15 \xt Lóma 8:7; Njems 4:4\x*  
\v 16 mu kópu u dîy꞉o nmyi nuw꞉o dmi nmî Mî p꞉uu dny꞉oo kwo, dyámê mbêmê kîdnyingê kwo. Yélini yi nuw꞉o dmi dyámê mbêmê a wee, nuw꞉o dono u pono a vyápê nyédi, tpileni dpî m꞉uu ngmê, yi tpile u yi y꞉e a kwo yédi, dyámê u tpile dé dpo kâpu tumo. Yinté lémi ghi nmî Mî ka d꞉uungmêdpo ndê, dyámê mbêmê pi knî y꞉oo yi chóó dpî néti t꞉oo.  
\v 17 Pi knî y꞉oo tpileni yilî yi yi dmi a kwo, chedê ngê wa pyaa dmi, dyámê pê chedê ngê amye pyódu, ngmênê n꞉ii nmî Mî u pono adî vyápê, chedê ngê daawa pyódu. \x * \xo 2:17 \xt Mát 7:21\x*   
\s1 Pini n꞉ii Yesu Kédisu p꞉uu adî d꞉uu  
\p
\v 18 A tp꞉ee yoo, kuwókuwó wéni daa kêmakêma a dyimêdyimê. Ala kópu wunê nmyinê ny꞉ee ngópu, Dîyo pi ngmê Yesu Kédisu p꞉uu adî d꞉uu. Yi kópu ala ngwo kêdê pyódu, pi yilî Yesu Kédisu p꞉uu ka d꞉uu té. Yi kópu u l꞉êê dîy꞉o nmî lama ka tóó, kuwókuwó wéni daa kêmakêma a dyimêdyimê. \x * \xo 2:18 \xt Mát 24:5,24; 2 Njon 1:7\x*  
\v 19 Yi yéli k꞉omo ngê nmî yoo vy꞉o ghê dniye, u kuwó dini ghi ngê mê pwii dniye. Nmî yoo vy꞉o ntênê wodnye kwo, ye nmî vy꞉o pê wee, ngmênê a kuwo nmoo, ntênê u ngwo nmo w꞉ee ngê, nmîmo, Daa nmî yoo vy꞉o yéli. \x * \xo 2:19 \xt Dpodo 20:30\x*   
\p
\v 20 Dp꞉ee yinté yéli, Yesu Kédisu ngê u Ghê Dmi nmyi mênê a yó, u ndê kópu dyuu nmyi lama u ngwo a yaa wo.  
\v 21 Nangê vyi, Nê nmo wunê d꞉êê, mu kópu u dîy꞉o ndê kópu dyuu nmî lama daa kwo. Kêle, ndê kópu dyuu nmyi lama wunê kwo, myenté ala kópu nmyi lama kîyedê tóó, k꞉omodanê kópu u kn꞉ââ ndê kópu dyuu p꞉uu dêdêngmê kwo.   
\p
\v 22 N꞉ii ngê ala kópu a tpapê ngê, Yesu daa Chóó Lémi Tp꞉oo, yi pini k꞉omodanê pyu, Yesu Kédisu p꞉uu a d꞉uu yédi, Yesu ka kpeme dpî yââ, u mî Chóó Lémi ka kpeme myoo yââ. \x * \xo 2:22 \xt Mát 10:32-33; 1 Njon 4:3; 2 Njon 1:7\x*  
\v 23 N꞉ii ngê Yesu dpî mb꞉ii, u mî Chóó Lémi myoo mb꞉ii. N꞉ii ngê Yesu a chââchââ ngê, u mî Chóó Lémi mye chââchââ ngê. \x * \xo 2:23 \xt Mát 10:32-33; Njon 5:23; 2 Njon 1:9\x*   
\p
\v 24 Nmî Lémi p꞉uu kópuni mwiyé nmyinê ny꞉ee ngópu, yi kópu p꞉uu nmyi nuw꞉o dmi dny꞉oo kwo, nangê ngmêê. Yi kópu daanmyinê ngmêê knomomê, ye dye ghi yintómu nmî Mî k꞉ii ngmidi ngê anmyi ya, Tp꞉oo u k꞉ii ngmidi ngê amyenmyi ya.  
\v 25 Kópuni u pi wunê nmo a vyu, daawa dóó nmo, yi kópu ntênê wa d꞉uu, ghê kamî nmo wa a kê, ghéni n꞉ii chedê ngê daawa pyódu. \x * \xo 2:25 \xt Njon 3:15; 6:40\x*   
\p
\v 26 N꞉ii knî y꞉oo kn꞉aa máádi p꞉uu a kapî nmyoo, yi kópu yi yéli yi l꞉êê dîy꞉o nmye d꞉a d꞉êê.  
\v 27 Dp꞉ee yinté yéli, Yesu Kédisu ngê u Ghê Dmi nmyi mênê a yó. Yi ghéni dmi ngê kópu yilî yintómu yi p꞉uu a ndiye kîgha nmyoo, doo u ntââ pi ngmê ngê mêdaadî ndiye kîgha nmyo. Yi ghéni dmi ngê ndê kópu nmye ye tpapê too, k꞉omodanê kópu nmye daangmêwa vyi. U kwo dmyinê ng꞉aa, Yesu Kédisu u k꞉ii ngmidi ngê dmyinê ya. \x * \xo 2:27 \xt Njon 14:26\x*   
\p
\v 28 Nyââ, a tp꞉ee yoo, u k꞉ii ngmidi ngê dmyinê ya, mu kópu u dîy꞉o wéni n꞉ii ngê wa a diyé, u kwo daapîdmyi nkîngê, mywene nmye myedaapaa ghê we. \x * \xo 2:28 \xt 1 Njon 4:17\x*  
\v 29 Nmyi lama kîyedê tóó, Yesu Kédisu p꞉uu dono daangma a t꞉a. Ala kópu nmyi lama myechoo a ya, n꞉ii ngê kópu mb꞉aa a d꞉uud꞉uu too, yi pini nmî Mî tp꞉oo ngê mye tóó. \x * \xo 2:29 \xt 1 Njon 3:10\x*   
\c 3  
\s1 Chóó Lémi tp꞉oomódó tp꞉oomââ yoo  
\p
\v 1 Ndîî kópu ngma ala. Nmî Mî nódo nmî nuu ghi dmi ntênê wunê tóó, u l꞉êê dîy꞉o tp꞉oo módó tp꞉oo mââ ngê a pyódu nmoo, u pi nmî p꞉uu t꞉ângo. Yi kópu u l꞉êê dîy꞉o dyámê mbêmê tpémi y꞉oo daa myeme nmoo, nmî Mî yi lama myedaa tóó. \x * \xo 3:1 \xt Njon 1:12-13; 16:3\x*  
\v 2 A tîdê mbwó yoo, nmî Mî ngê tp꞉oo módó tp꞉oo mââ ngê a pyódu nmoo, ngmênê nmî lama daa tóó, mu dini ghi ngê lónté pini ngê anmîn꞉aa ya. Nmî lama ka tóó, Yesu Kédisu dini ghi n꞉ii ngê wa a diyé, yinté pini ngê anm꞉uu pyaa dmi, mu kópu u dîy꞉o yi ngwo ntênê anm꞉uu m꞉uu. \x * \xo 3:2 \xt 2 Kódin 3:18; Pilipay 3:21\x*  
\v 3 Yélini yi k꞉ii yi kópu nmî lama a tóó, nmî nuw꞉o dmi Yesu Kédisu p꞉uu a wee. Dono ntee p꞉uu daa t꞉a, yinté nmî p꞉uu kîngmê ya.   
\p
\v 4 N꞉ii a dono yédi, yi pini nmî Mî p꞉uu a d꞉uu yédi, u dêêpî kópu dyuu daa chââchââ ngê.  
\v 5 Nmyi lama kîyedê tóó, Yesu Kédisu pi ngê pyodo, nmî dono chedêchedê u l꞉êê dîy꞉o. Nmyi lama mye tóó, chóó u dono daa tóó. \x * \xo 3:5 \xt 2 Kódin 5:21; 1 Pita 2:22-24\x*  
\v 6 Yélini yi k꞉ii Yesu u k꞉ii ngmidi ngê nmo pyede, dpîno dono nyédi, ngmênê n꞉ii a dono yédi, yi pini ngê nmî Lémi doongê módu, u lama myedaa tóó. \x * \xo 3:6 \xt Lóma 6:1-2,14\x*   
\p
\v 7 A tp꞉ee yoo, pi ngê kîngê dóó nmyo. Yesu Kédisu nmî Mî ka pi mb꞉aa ngê ntee a tóó, n꞉ii ngê kópu mb꞉aa a d꞉uud꞉uu too, vyîlo yi pini pi mb꞉aa ngê u kwo a ya yédi. \x * \xo 3:7 \xt 1 Njon 2:29\x*  
\v 8 Pini n꞉ii a dono yédi, yi pini Setan u pono a vyápê yédi. Mwiyémwiyé dini ghi ngê Setan ngê dono u kn꞉ââ a chópu, ala ngwo yinté mye dono. Yi kópu u l꞉êê dîy꞉o nmî Mî Tp꞉oo dyámê mbêmê a loo, u yi u ngwo doo kwo, Setan u némi nî dyênê, yélini dyênê ngê, m꞉aa l꞉âmo té. \x * \xo 3:8 \xt Njon 8:44\x*   
\p
\v 9 Chóó Lémi ngê n꞉ii tp꞉oo módó tp꞉oo mââ ngê dpî pyódu, mêdaa dono yédi, mu kópu u dîy꞉o kamî ngê dpî pyódu. U mî Chóó Lémi ntee a tóó, yinté pini ngê dpî pyódu, doo u ntââ mêdaadî dono. \x * \xo 3:9 \xt 1 Njon 5:18\x*  
\v 10 Chóó Lémi u yoo, Setan u yoo, yi myeme alanté. Pini n꞉ii nódo u tîdê mbwó yoo yi nuu ghi dmi daa tóó, myenté kópu mb꞉aa daa d꞉uud꞉uu too, yi pini daa Chóó Lémi u yoo vy꞉o pini ngmê.   
\s1 Nmyi nuu ghi dmi numo nódo dny꞉oo ya  
\p
\v 11 Kópuni mwiyémwiyé nmyinê ny꞉ee ngópu, alanté a tóó, Nmî nuu ghi dmi numo nódo dny꞉oo ya. \x * \xo 3:11 \xt Njon 13:34-35\x*  
\v 12 Doo u ntââ Keen ntee pini ngê daanmî ya. Yi pini Setan u pono doo a vyápê, u mbwó u ngwo a vyâ. Nmyinê nmye lukwe dîy꞉o a vyâ? Mu kópu u dîy꞉o Keen ngê kópu dono yilî dpîmo a d꞉uud꞉uu, u mbwó ngê kópu mb꞉aa yilî dpîmo a d꞉uud꞉uu. \x * \xo 3:12 \xt Gen 4:8\x*   
\p
\v 13 A tîdê mbwó yoo, mgîdî u yoo nmyi p꞉uu adnyi d꞉uu knomomê, yi kópu nmyi nyepênyepê u kópu ngê kîngê pyódu. \x * \xo 3:13 \xt Njon 15:18-19; Mát 5:11-12\x*  
\v 14 Pwopwo u maa nmo kuwo ngê, ghê kamî u maa p꞉uu nmî ghê dniye. Yi kópu nmî lama a tóó, mu kópu u dîy꞉o nmî tîdê mbwó yoo yi nuu ghi dmi nmî nódo a tóó. Pini n꞉ii nódo yoo yi nuu ghi dmi daa tóó, pwopwo u maa p꞉uu mo kwo. \x * \xo 3:14 \xt 1 Njon 2:11\x*  
\v 15 Pini n꞉ii ka u mbwó a diya yédi, Chóó Lémi ka ngmênê u kwo yi pini ngê u mbwó wunê dê vy꞉a. Nmyi lama kîyedê tóó, N꞉ii ngê pi dpî vy꞉a, ghê kamî u mênê daa ya yédi. \x * \xo 3:15 \xt Mát 5:21-22\x*  
\v 16 Yesu Kédisu ngê chóóchóó u ghê a y꞉ângo, nmî l꞉êê dîy꞉o pwene, nmî lama u ngwo yaa wo, Nmî nuu ghi dmi ndêndê ngê nódo a tóó. Nmo mye ntee dé, nmî tîdê mbwó yoo yi nuu ghi dmi nmî nódo dny꞉oo ya. Daa nmî chóó nmî kópu knî yi p꞉uu nuw꞉o kmêle, nmî tîdê mbwó knî ye vyuwo kmêle. \x * \xo 3:16 \xt Njon 13:1; 1 Tes 2:8\x*  
\v 17 Pi ngmê, u nté ndapî u ntââ mbêmê adî ya, u mbwó doo u ntââ mbêmê adî ya, ngmênê yi pini ka u mbwó daawa ch꞉anê knomomê, doo u ntââ yi pini ngê daawa vyi, Nmî nuu ghi dmi Chóó Lémi nódo ntee wunê tóó, yoo yi nuu ghi dmi yinté a nódo mye tóó. \x * \xo 3:17 \xt Deut 15:7; Njems 2:15-16\x*  
\v 18 A tp꞉ee yoo, Nmyi komo ngê noko módó namê mbumu, ngmênê yi kópu ndêndê ngê dmyinê d꞉uud꞉uu, pi knî ye mb꞉aamb꞉aa ngê dmyinê vyuwo.   
\s1 Nmî Mî k꞉ii ngmidi ngê pyodopyodo  
\p
\v 19 Pi knî ye mb꞉aamb꞉aa ngê anmî vyuwo knomomê, ye nmî lama u ngwo wa yââ, Pini n꞉ii Pi Ndêndê, u pono nmo vyápê té. Yi kópu u l꞉êê dîy꞉o nmî Mî u ngîma daanmîn꞉aa nkîngê.  
\v 20 Ngmênê nmî l꞉êê ghi dmi nmîno nmo dono ngê adnyi ya knomomê, ye nmî Mî ka d꞉ud꞉umbiy꞉e dono ngê adnyi ya, mu kópu u dîy꞉o nmî kópu yilî yintómu u lama dé.  
\v 21 A tîdê mbwó yoo, nmî l꞉êê ghi dmi mb꞉aamb꞉aa ngê adnyi ya knomomê, ye nmî Mî ngîma daanmîn꞉aa nkîngê.  
\v 22 Kópuni u kwo nmo dmyinê too, nmî l꞉êê dîy꞉o wunê d꞉uud꞉uu too, mu kópu u dîy꞉o u dnye nmo nyêmî ngê, u nuu u kópu nmo d꞉uud꞉uu too. \x * \xo 3:22 \xt Mát 21:22\x*  
\v 23 Nmî Mî ngê u yi u ngwo a kwo, A yoo alanté dny꞉oo ya, a tp꞉ee Yesu Kédisu ka dny꞉oo kêlîmî, yi nuu ghi dmi numo nódo myedny꞉oo ya. Yi kópu nmo a vyu, yinté d꞉uud꞉uu koo. \x * \xo 3:23 \xt Njon 6:29; 13:34\x*  
\v 24 N꞉ii ngê nmî Mî u kópu dyuu a chââchââ too, yi pini nmî Mî p꞉uu a ya yédi, nmî Mî yi pini p꞉uu mye ya yédi. Nmî lama a tóó, Nmî p꞉uu a t꞉a, mu kópu u dîy꞉o chóó u Ghê Dmi nmo a kpo. \x * \xo 3:24 \xt Lóma 8:9\x*   
\c 4  
\s1 Ghê dmi myeme u kópu dyuu  
\p
\v 1 A tîdê mbwó yoo, pi knî ye módó namê kêlîmî, ngmênê dmyinê myeme dé. Ghê dmi n꞉ii mbêmê nmye a mbumu nyédi, myedmyinê myeme dé, mu kópu u dîy꞉o pi yilî knî y꞉oo Chóó Lémi u komo k꞉omo ngê a kapî ngópu. Yi yéli daa Chóó Lémi u Ghê Dmi mbêmê a mbumu nyédi, kn꞉aa ghéni dmi mbêmê a mbumu nyédi. \x * \xo 4:1 \xt Mát 24:11\x*  
\v 2 Ala kópu mbêmê dmyinê myeme dé. N꞉ii ngê choo tpapê knomomê, Nmî Mî Tp꞉oo Yesu Kédisu ndêndê ngê pi ntee pi ngê pyodo, yi pini Chóó Lémi u Ghê Dmi mbêmê a mbumu yédi, \x * \xo 4:2 \xt 1 Kódin 12:3\x*  
\v 3 ngmênê n꞉ii ngê yi kópu Yesu p꞉uu d꞉uudpî vyi, yi pini daa Chóó Lémi u Ghê Dmi mbêmê a mbumu yédi. Ghéni dmi n꞉ii mbêmê a mbumu yédi, yi ghéni dmi Yesu Kédisu p꞉uu a d꞉uu yédi. Yi kópu u pi wunê nmyinê ny꞉ee ngópu, nmyepê, Dîyo wa t꞉aa. Ala ngwo nmî vy꞉o wunê ka m꞉ii. \x * \xo 4:3 \xt 2 Njon 1:7\x*   
\p
\v 4 A tp꞉ee yoo, nmyo nmî Mî u yoo ndêndê, yi yéli yi pwo nmyi lee dniye, mu kópu u dîy꞉o ghéni dmi n꞉ii nmyi mênê a tóó, u wêdêwêdê ndîî, wo yéli yi mênê n꞉ii a tóó, têdê.  
\v 5 Dyámê u kópu knî yi p꞉uu a mbumu nyédi, yoo ye dpî ng꞉aa mbê dmi, mu kópu u dîy꞉o yi nuw꞉o dmi dyámê mbêmê a wee. \x * \xo 4:5 \xt Njon 15:19\x*  
\v 6 Ngmênê nmo nmî Mî u yoo. N꞉ii u lama nmî Mî a tóó, nmo wunê ng꞉aa yédi. N꞉ii u lama nmî Mî daa tóó, nmo dêwunê ng꞉aa yédi. Yi kópu knî yi mbêmê ghê dmi dê nmo myeme doo, woni ndê kópu dé yi ghéni dmi, woni k꞉omodanê kópu dé yi ghéni dmi. \x * \xo 4:6 \xt Njon 8:47\x*   
\s1 Nmî Mî nódo nmî nuu ghi dmi a tóó  
\p
\v 7 A tîdê mbwó yoo, nmî nuu ghi dmi numo nódo dny꞉oo ya, mu kópu u dîy꞉o nmî Mî ngê vyîlo yi kópu u yi u ngwo ye kwo. Pini n꞉ii nódo yoo yi nuu ghi dmi a tóó, nmî Mî tp꞉oo ngê dpî pyódu, nmî Mî u lama a ya yédi, nmî Mî wunê nj꞉ii ngê.  
\v 8 Pini n꞉ii nódo yoo yi nuu ghi dmi daa ya yédi, yi pini u lama nmî Mî daa tóó, nmî Mî dêwunê nj꞉ii ngê, mu kópu u dîy꞉o nmî Mî nódo nmî nuu ghi dmi ntênê a tóó.  
\v 9 Nmî lama a tóó, Nmî nuu ghi dmi nmî Mî nódo ntênê a tóó, mu kópu u dîy꞉o chóó Tp꞉oo mu ngmidi dyámê mbêmê a dy꞉ââ ngê, ghê kamî nmo yinê mînê kpo. \x * \xo 4:9 \xt Njon 3:16\x*  
\v 10 Nmî Mî nuu ghi nmî nódo dnyinté a tóó, ngmênê nmî nuu ghi dmi u nódo ntênê a tóó, Tp꞉oo nmo a dy꞉ââ ngê, nmî yikî dmi u pwo ghay wo. \x * \xo 4:10 \xt Lóma 5:8-10\x*   
\p
\v 11 A tîdê mbwó yoo, nmî nuu ghi dmi nmî Mî nódo dnyinté daa tóó, nmî nuu ghi dmi numo nódo yinté myedny꞉oo ya. \x * \xo 4:11 \xt Mát 18:33\x*  
\v 12 Pi ngmê ngê nmî Mî doo u kpêê, ngmênê nmî nuu ghi dmi numo nódo adî ya knomomê, ye nmî Mî nmî p꞉uu adî ya, u nuu ghi nmî nódo ntênê adî ya. \x * \xo 4:12 \xt Njon 1:18\x*   
\p
\v 13 Nmî lama a tóó, Nmî Mî p꞉uu nmo pyede, myenté nmî p꞉uu mye t꞉a, mu kópu u dîy꞉o chóó u Ghê Dmi nmo a kpo. \x * \xo 4:13 \xt 2 Kódin 1:21-22\x*  
\v 14 Myenté pi yintómu yi l꞉êê dîy꞉o Tp꞉oo nmo a dy꞉ââ ngê, nmî Mbwámê ngê a pyódu ngê. Yi pini nmî chóó nmî módu, pi knî ye u pi u ngwo nmo tpapê ngê. \x * \xo 4:14 \xt Njon 3:17\x*  
\v 15 N꞉ii ngê dpo, Yesu nmî Mî Tp꞉oo, yi pini p꞉uu nmî Mî a ya yédi, myenté nmî Mî p꞉uu yi pini mye ya yédi.  
\v 16 Nmî lama a tóó, Nmî nuu ghi dmi nmî Mî nódo a tóó. Yi kópu p꞉uu nmî nuw꞉o dmi a kwo. Pini n꞉ii nódo yoo yi nuu ghi dmi adî ya, yi pini nmî Mî p꞉uu a ya yédi, myenté yi pini p꞉uu nmî Mî a ya yédi. \x * \xo 4:16 \xt Njon 6:69\x*  
\v 17 Pini n꞉ii ntênê yinté a tóó, kuwókuwó wéni ngê u kóté kîgha têdê daadî nkîngê, mu kópu u dîy꞉o Yesu Kédisu ntee a tóó, dyámê mbêmê yinté myeno pyede.  
\v 18 Nyââ, pini n꞉ii nódo yoo yi nuu ghi dmi a tóó, doo u ntââ daadî nkîngê. Pini n꞉ii nmî Mî ka a nkîngê yédi, yi pini nódo yoo yi nuu ghi dmi dnyinté a tóó, u kpadakpada p꞉uu a nuw꞉o yédi.   
\p
\v 19 Yoo yi nuu ghi dmi nmî nódo a tóó, mu kópu u dîy꞉o nmî Mî nódo nmî nuu ghi dmi mwiyé doo a ya. \x * \xo 4:19 \xt 1 Njon 4:10\x*  
\v 20 Pini n꞉ii ngê dê vyi knomomê, Nmî Mî nuu ghi a nódo a tóó, ngmênê yi pini ka u mbwó adî diya, yi pini k꞉omodanê pyu. U mbwó u nuu ghi nódo daadî ya knomomê, pini n꞉ii u kpêê, ye nmî Mî u nuu ghi nódo angênté amaa ya, pini n꞉ii doo u kpêê?  
\v 21 Yesu Kédisu ngê ala dêêpî kópu nmo a kpo, nmopê, N꞉ii nódo nmî Mî nuu ghi a tóó, u mbwó nuu ghi nódo myechoo ya. \x * \xo 4:21 \xt Mát 5:44-45; Mak 12:29-31\x*   
\c 5  
\s1 Setan u wépi pwapî  
\p
\v 1 Nmî lama ka tóó, Yesu Kédisu Chóó Lémi Tp꞉oo. Pini n꞉ii yi kópu ka a kêlîmî, Chóó Lémi tp꞉oo ngê myoo pyódu. N꞉ii nódo nmî Mî nuu ghi a ya yédi, tp꞉oo módó tp꞉oo mââ yoo yi nuu ghi dmi nódo mye ya yédi.  
\v 2 Nmî lama a tóó, Chóó Lémi tp꞉oo módó tp꞉oo mââ yoo yi nuu ghi dmi nmî nódo a tóó, mu kópu u dîy꞉o Chóó Lémi u nuu ghi nmî nódo a tóó, u kwo nmo ng꞉aa nyédi.  
\v 3 Nyââ, Chóó Lémi u nuu ghi nmî nódo ntênê adî ya knomomê, ye u dêêpî kópu dyuu anmî chââchââ. U dêêpî kópu dyuu nmo daa dîngîdîngî, \x * \xo 5:3 \xt Njon 14:15,23-24; Mát 11:30\x*  
\v 4 mu kópu u dîy꞉o yélini yi k꞉ii Chóó Lémi tp꞉oo módó tp꞉oo mââ ngê nmo pyede, u ntââ mbêmê nmo pyede, Setan u wépi u ngwo nmo pwapî ngê. Dononi u pi nmo adî tpapê, daanmî d꞉uud꞉uu, mu kópu u dîy꞉o Yesu Kédisu ka nmo kêlîmî té. \x * \xo 5:4 \xt Njon 16:33\x*  
\v 5 Pi ngê Setan u wépi módó d꞉uudpî puwâ, ngmênê pini n꞉ii u lama a tóó, Yesu Kédisu Chóó Lémi Tp꞉oo, yi pini u ntââ Setan u wépi dpî puwâ. \x * \xo 5:5 \xt Lóma 8:37\x*   
\s1 Yesu Kédisu ka kêlîmî  
\p
\v 6 Yesu Kédisu dyámê mbêmê a loo, kópu u mti p꞉uu miyó kele, mbwaa ngê mbápitisîm kalê ngópu, u vyee têdê wêê p꞉uu pwii wo. Nyââ, doo u mbápitisîm kîgha u l꞉êê dîy꞉o u mo a loo, ngmênê u vyee u l꞉êê dîy꞉o myedê loo. Chóó u Ghê Dmi ngê yi kópu ndê kópu ngê nmo dpî pyódu, doo u ntââ daawa dóó nmo. \x * \xo 5:6 \xt Njon 1:29-34\x*  
\v 7 Kópu pyile knî yi mbêmê Yesu nmo myeme ngê, \x * \xo 5:7 \xt Njon 15:26\x*  
\v 8 Chóó Lémi u Ghê Dmi ngmê, u mbápitisîm kîgha myomo, u vyee têdê wêê n꞉ii p꞉uu pwii wo, pyolo. Yi kópu pyile knî yi nt꞉u mu ngmidi, Yesu Kédisu ndêndê ngê Chóó Lémi Tp꞉oo.  
\v 9 Yi kópu pyile knî nmî Mî ngê Tp꞉oo p꞉uu nmo wunê tpapê too, k꞉omodanê kópu yi p꞉uu daangma a t꞉a. Pi knî ye ntee nmo kêlîmî nyédi, nmî Mî u kópu dyuu ka yinté myedmyinê kêlîmî. \x * \xo 5:9 \xt Njon 5:32-37; 8:18\x*  
\v 10 Pini n꞉ii Chóó Lémi Tp꞉oo ka a kêlîmî, yi kópu pyile knî yi p꞉uu a nuw꞉o yédi. Pini n꞉ii Chóó Lémi u kópu dyuu ka daa kêlîmî, yi pini ngê Chóó Lémi u kópu dpî vy꞉a, kópuni Chóó Lémi ngê Tp꞉oo p꞉uu a vyi too, yi pini yi kópu ka daa kêlîmî yédi. \x * \xo 5:10 \xt Nkal 4:6\x*  
\v 11 Yi kópu u nt꞉u kópu ala, Chóó Lémi ngê Tp꞉oo ka a kââdî nmoo, ghê kamî nmo a kpo, ghéni n꞉ii chedê ngê daawa pyódu.  
\v 12 Pini n꞉ii u nuw꞉o Chóó Lémi Tp꞉oo p꞉uu a kwo, yi pini ngê ghê kamî dpo pyw꞉oo. Pini n꞉ii u nuw꞉o Chóó Lémi Tp꞉oo p꞉uu daa kwo, ghê kamî d꞉uudpo pyw꞉oo. \x * \xo 5:12 \xt Njon 3:36\x*   
\s1 Ghê kamî, ghéni n꞉ii chedê ngê daawa pyódu  
\p
\v 13 A tîdê mbwó yoo, yi kópu dyuu nmye d꞉a d꞉êê, mu kópu u dîy꞉o Chóó Lémi Tp꞉oo ka nmye kêlîmî té. U ya a nga a kwo, Nmyi lama a yaa we, Ghê kamî wunê nmyinê pyw꞉ee ngópu, ghéni n꞉ii chedê ngê daawa pyódu. \x * \xo 5:13 \xt Njon 20:31\x*  
\v 14 Nmî lama ka tóó, nmî Mî ka u nuu u kópu n꞉ii u kwo anmî dmyinê, nmî ngêpê dmi wa a ny꞉oo, yi kópu wa a d꞉uu. \x * \xo 5:14 \xt Njon 14:13\x*  
\v 15 Nyââ, pini n꞉ii u pono a vyápê, kópuni u kwo dpî dmyinê, nmî lama ka tóó, u ngêpê dpo ny꞉oo, yi kópu dpî d꞉uu.   
\p
\v 16 A tîdê mbwó yoo, nmyi vy꞉o pini ngmê ngê dono nmyi ngópu angmê d꞉uu knomomê, u l꞉êê dîy꞉o dmyinê ngêpê, nmî Mî ngê ghê kamî u kwo paa y꞉ee ngê. Pini n꞉ii nmî Mî ka kpeme dpî yââ, yi pini maa dono p꞉uu a kwo, máádi n꞉ii u dî ndiya. Daa yinté pini p꞉uu nmye nînê danê. Yinté pini u dono u l꞉êê dîy꞉o namê ngêpê. Nmî Mî ka daawa diyé knomomê, ye doo u ntââ u dono chedê ngê daawa pyódu. \x * \xo 5:16 \xt Mát 12:31\x*  
\v 17 Dono kópu yintómu kn꞉aadi te u kópu dé, ngmênê kn꞉aadi te kópu woni knî yi l꞉êê dîy꞉o nmî Mî pi ka kpeme d꞉uudpî yââ.  
\v 18 Nmî lama ka tóó, Pini n꞉ii Chóó Lémi tp꞉oo ngê a ya yédi, daa dono yédi, mu kópu u dîy꞉o nmî Mî Tp꞉oo u kwo wunê vyuwo yédi, doo u ntââ Setan ngê daawa dyênê. \x * \xo 5:18 \xt Njon 17:15\x*   
\p
\v 19 Nmî lama ka tóó, Nmo Chóó Lémi tp꞉oo módó tp꞉oo mââ yoo, ngmênê Setan ngê mgîdî u yoo a mbêpê kîgha too.   
\p
\v 20 Nmî lama ka tóó, Chóó Lémi Tp꞉oo nmo a loo, u Mî nmî nuwo yinê mî kwólu, pini n꞉ii Yâpwo Ndêndê. Nyââ, Yâpwo Ndêndê p꞉uu nmo pyede, myenté Tp꞉oo Yesu Kédisu p꞉uu myino pyede. Yi pini Yâpwo Ndêndê, mye ghê kamî u kn꞉ââ. \x * \xo 5:20 \xt Njon 17:3\x*   
\p
\v 21 A tp꞉ee yoo, nmyi nuw꞉o dmi k꞉omo yâpwo knî yi p꞉uu kîngê kwo.  
\p Wu u dî. \x * \xo 5:21 \xt 1 Kódin 10:14 \x*