\id JON - Yakan Version - Jonah - Dietlinde Behrens - June-2005 
\h Yunus 
\toc1 Jūd Nabi Yunus 
\toc2 Yunus 
\toc3 Yunus 
\mt1 Jūd Nabi Yunus  
\imt1 Pahāti sabab jūd inēnan Nabi Yunus  
\ip Si Nabi Yunus inin aˈa bangsa Israˈel masaley. Sulat sabab si Nabi Yunus inin seddili amban meˈ sulat meˈ nabi sinduwehin.  
\ip Aka-aka inin magpahāti sabab Nabi Yunus weˈ gaˈi iye nuhut pangandaˈakan Tuhan iyehin. Kabayaˈan Tuhanin weˈ subey iye pī hap Niniba, dembuwaˈ puweblo hadje laˈi si lahat Asiriya. Magbanta teˈed aˈa Asiriyahin duk meˈ aˈa Israˈel. Dinaˈak weˈ Tuhanin Nabi Yunus pī magmahalayak. Saguwaˈ gaˈi iye mabayaˈ. Embes pī iye hap silangan tudju Niniba nuhut kappal iye tudju seddepan. Ubus pinatekkahan balaˈ iye weˈ Tuhanin. Iye jānnen, sabab balaˈ miyaˈan, hangkan tuhutne pangandaˈakan Tuhanin.  
\ip Sulat inin magpahāti weˈ Tuhanin magbayaˈ teˈed si kēmon pinapanjarinen, duk pesōng pe magpahāti weˈ malasa iye duk maˈaseˈ si kēmon manusiyaˈ.  
\c 1  
\s1 Lahi si Yunus  
\p
\v 1 Niyaˈ lapal Tuhanin pu si Yunus anak si Amittay.  
\v 2 Paˈinne, “Pī kew si puweblo hadje inēnan Niniba. Magmahalayak kew pī si siye duk akahanun siye weˈ sōng siye pinagmulkaˈan, peggeˈ tiyaˈ ne kiteku hinangde malaˈatin.”  
\v 3 Saguwaˈ si Yunus lahi amban Tuhan tudju lahat inēnan Tarsis. Pī iye hap pantalan si Joppa duk niyaˈ kitene dembuwaˈ kappal sōng pī hap lahat Tarsis inin. Magsukey ne iye, ubus manaˈik diyataˈ kappal duk palalgaˈ ne iye hap Tarsis supaya iye tapalahi amban Tuhan.   
\p
\v 4 Ubus inin pinatekka weˈ Tuhanin baliyu pales manamal diyataˈ tahik, duk lahat-lahat manamal. Agen larak kappalin.  
\v 5 Kēmon aˈa magtarabahu diyataˈ kappal miyaˈan tinalew duk ngalingan siye dangan-dangan si tuhan-tuhanden māku tabang. Ubus bu laboˈde kalgade sinduwehin pī dem tahik supaya ngalampung kappalin.  
\p Saguwaˈ si Yunus andang ne laˈi dem mohang kappal; pabāk iye laˈi duk tuli. Leddek tulinen.  
\v 6 Ubus kapitan kappalin pī si iye mangun iye duk paˈinne, “Tuli pe kew? Dongaˈ kew duk māku tabang kew si tuhannun. Kaw kite bi asipne duk kite bi gaˈi matey.”   
\p
\v 7 Ubus paˈin meˈ magtarabahu si kappalin, “Magpuwaˈan kite bi duk kataˈuhante bang amban sine jānnen hangkan inin umantag.” Ubus magpuwaˈan siye. Manjari kataˈuhande weˈ si Yunus jānnen.  
\v 8 Ubus paˈinde, “Akahanun kami bang asal kaˈu ke jānnen hangkan inin umantag. Ine pagusahanun? Bakas ambannu? Intag lahatnun? Ine bangsanun?”  
\v 9 Sambunganne siye, paˈinne, “Aku inin bangsa Hibrani duk sambahayangku Tuhanin, iye Tuhan si surgaˈin duk iye magpapanjari bulak duk tahikin.”  
\v 10 Paˈinne pe weˈ lahi iye amban Tuhan. Ubus kaˈumāgadan meˈ aˈa maghinang diyataˈ kappalin duk paˈinde, “Laˈat teˈed hinangannu iyan.”   
\p
\v 11 Sigi-sigi pe ngahadje goyakin. Ubus tilewde iye, “Ine subey hinangte si kaˈu inin duk pateddoˈ balik tahikin?”  
\v 12 “Lakasanun bi ku dem tahik,” paˈinne, “ubus ngateddoˈ iyan balik. Kataˈuhanku hep weˈ aku jānnen hangkan tekka lahat-lahat inin si kaˈam.”  
\v 13 Saguwaˈ meˈ aˈahin musey pabasag manamal duk siye tapī si higad. Bu gaˈi takoleˈde, peggeˈ pesōng ngabasag tahikin amban tagnaˈin.  
\v 14 Ubus māku-māku isab siye si Tuhan, paˈinde, “O Tuhan, pabuyuˈ-buyuˈ kami, daˈa kami hukumun pinapatey bang bekkat kami niyawa aˈa inin. Daˈa kami dusehun bisan papatey kami aˈa gaˈ niyaˈ dusenen. Peggeˈ kaˈu du magbayaˈin hangkan inin umantag kēmon.”  
\v 15 Ubus eddoˈde si Yunus duk laboˈde dem tahik. Ubus pateddoˈ ne tahikin.  
\v 16 Hangkan tinalew siye si Tuhan bu magkurban siye duk niyaˈ tunggaˈde hāp si Tuhan.   
\p
\v 17 Saguwaˈ Tuhanin, papīne dembuwaˈ kenna hadje manamal ngaloroy si Yunus. Bu laˈi si Yunus diyalem kennahin tellu ellew duk tellun sangem.   
\c 2  
\s1 Ngampun-ngampun si Yunus  
\p
\v 1 Pag laˈi iye diyalem kennahin ngampun-ngampun si Yunus tudju Tuhan.  
\v 2 Paˈinne,  
\q1 “Pag laˈi ku dem kasusehan lingananku Tuhanin,  
\q2 ubus bu sambunganne ku.  
\q1 Pag laˈi ku diyalem lahat meˈ pateyin māku tabang ku  
\q2 bu pakale kew si paglingankun.   
\q1
\v 3 Lakasannu ku pī dem kalaleman  
\q2 dem tengngaˈ sellang  
\q2 duk sellegin paliput si aku;  
\q1 kadebbunan ku weˈ kēmon goyaknun  
\q2 duk meˈ goyak mahadjehin.   
\q1
\v 4 Kannalku, ‘Pinatahalaˈ ku  
\q2 amban matanu;  
\q1 gaˈi ne kiteku balik\f + \fr 2.4 \ft atawa: Karayaw kiteku balik langgalnu masutsihin. \f*  
\q2 langgalnu masutsihin.’   
\q1
\v 5 Sōng lambo ku weˈ tahik mapaliput si akuhin  
\q2 tahik malalemin paliput si aku.  
\q1 Meˈ sabet dem tahikin palibed si kōkku.   
\q2
\v 6 Palenneb ku pī si poˈon punuhin.  
\q1 Pakissup bulakin pag dumiyalem ku  
\q2 supaya ku gaˈi lumuwas salama-lama.  
\q1 Saguwaˈ kaˈu, Tuhan, Panuhutankun,  
\q2 boˈonu du ku balik amban dem kalaleman, ellum pe.   
\q1
\v 7 Pag sōng ubus ne umulkun  
\q2 taˈessebte kew, Tuhan;  
\q1 ngampun-ngampun ku si kaˈu  
\q2 duk tapī pangampunkun si kaˈu  
\q2 diyalem langgalnu masutsihin.   
\q1
\v 8 Sine-sine nuhut meˈ tuhan-tuhande manggaˈ niyaˈ balinen  
\q2 lebbahande ne sandelde si kaˈuhin, Tuhan.   
\q1
\v 9 Saguwaˈ aku, magpasalamat ku  
\q2 duk magkurban ku si kaˈu.  
\q1 Meˈ bakas tunggaˈku si kaˈuhin tumananku du.  
\q2 Tuhanin hadja manimbulin.”   
\p
\v 10 Ubus inin dinaˈak weˈ Tuhanin si Yunus pinaluwas si kennahin pī si higad tahik.   
\c 3  
\s1 Pī si Yunus hap lahat Niniba  
\p
\v 1 Ubus niyaˈ lapal Tuhanin pu si Yunus kaminduwenen, paˈinne,  
\v 2 “Pī kew hap puweblo hadje inēnan Niniba duk akahanun siye meˈ pinaˈinku si kaˈuhin.”   
\p
\v 3 Tuhut si Yunus pangandaˈakan Tuhanin duk pī iye hap Niniba. Niniba inin luha manamal. Bang kew pabutas amban puweblo iyan subey tellu ellew.  
\v 4 Pag laˈi si Yunus maglengngan-lengngan de ellew nagnaˈ iye magaka-aka, paˈinne, “Bang palabey ampatpūˈ ellew pinakaˈatan du Ninibahin.”  
\v 5 Pag kalede inin kahagad meˈ aˈa Ninibahin lapal amban Tuhanin. Magpatawag-tawag siye weˈ subey siye muwase; duk kēmon meˈ aˈahin amban meˈ langkew pagaˈanen taman diyawaˈ pagaˈanen kēmon siye magsemmek karut, tanda weˈ teyikutande ne duseden.   
\p
\v 6 Pag takale sultan Ninibahin aka-aka sabab inin magtawus iye kuwat amban paningkoloˈanne magbayaˈin. Ānanne semmekne mahāpin duk magsemmek karut iye. Ubus bu ningkoloˈ iye diyataˈ bulak,\f + \fr 3.6 \ft atawa: dem abu bakas ilakasanden \f* tandaˈ weˈ magsusun ne iye duk lebbahanne ne dusenen.  
\v 7 Ubus bu masan iye si meˈ aˈa Ninibahin paˈinne, “Daˈakan inin amban sultanin duk meˈ saweˈne magbayaˈin: Gaˈ niyaˈ subey mangan bisan ine. Aˈa atawa hayep, sapiˈ atawa bili-bili gaˈi subey mangan atawa nginum.  
\v 8 Kēmon meˈ aˈahin subey magsemmek karut duk meˈ hayepin subey du isab bettadande karut. Kēmon siye subey basag ngampun-ngampun si Tuhan māku ampun. Kēmon siye subey teyikutande meˈ hinangande manggaˈi matewwaˈin duk hinangande malaˈatin.  
\v 9 Gaˈi kataˈuhante; kaw gantiˈan Tuhanin pikilannen duk lebbahanne pagamānen duk maˈaseˈ iye si kite bi supaya kite bi gaˈi magkaˈat.”   
\p
\v 10 Pag kite Tuhanin meˈ hinanganden duk weˈ teyikutande ne hinangande malaˈatin, maˈaseˈ ne iye duk gaˈ ne palaˈusne malaˈat bakas panunggaˈne siyehin.   
\c 4  
\s1 Ngamā si Yunus peggeˈ maˈaseˈ Tuhanin  
\p
\v 1 Saguwaˈ si Yunus gaˈi teˈed kahāpan duk astel iye.  
\v 2 Ngampun-ngampun iye si Tuhan paˈinne, “O, Tuhan, iye hep inin bakas tapikilkun pag laˈi pe ku si dī lahatku weˈ sā miyaˈan hinangannun. Iye jānnen hangkan ku lahi palakkes pī hap lahat Tarsis. Kataˈuhanku hep weˈ bētabang kew duk maˈaseˈ, weˈ gaˈi kew mura ngamā duk malasa kew teˈed. Mura gantiˈannu pikilannun duk gaˈi palaˈusnu balaˈ panunggaˈnun.  
\v 3 Hangkan hep, Tuhan, ambat ne ku matey peggeˈ hāp pe ku matey amban ellum.”  
\v 4 Saguwaˈ nambung Tuhanin paˈinne, “Tewwaˈ ke bang kew ngamā?”   
\p
\v 5 Ubus inin paluwas si Yunus amban puweblo miyaˈan duk pī si lugal nampal silangan. Ngahinang iye payad-payad duk ningkoloˈ iye laˈi dem landung ngagad-ngagad supaya kitene bang ine umantag si puweblohin.   
\p
\v 6 Ubus pinatomoˈ weˈ Tuhanin dembuwaˈ jambangan supaya kalandungan kōk si Yunusin duk gaˈi iye kahunitan. Sinna isab si Yunus sabab jambangan miyaˈan.  
\v 7 Saguwaˈ ellew dembuwaˈin, subu-subu pe pinapī weˈ Tuhanin dembuwaˈ olet duk kakanne jambangan miyaˈan. Ubus ngalanes jambanganin.  
\v 8 Pag langkew ne ellewin pinatihup isab weˈ Tuhanin baliyu amban silangan panas manamal. Peddiˈ ellewin diyataˈ kōk si Yunus duk lamma ne iye teˈed. Mabayaˈ ne iye matey duk paˈinne, “Hāp pe ku matey amban ellum.”  
\v 9 Saguwaˈ paˈin Tuhanin pu si Yunus, “Tewwaˈ ke bang kew ngamā sabab maˈumantag si jambangan miyaˈan?” “Aweˈ,” paˈinne. “Batang matey ne ku hawal astelkun.”   
\p
\v 10 Saguwaˈ paˈin Tuhanin, “Keyimanannu jambangan miyaˈan. Gaˈ kew bakas ipatne duk dumaˈin kaˈu matomoˈ iyehin. Bessuwang ne hadja tomoˈ duk bessuwang hadja lanes.  
\v 11 Pesōng pe ku maˈaseˈ si meˈ aˈa Niniba inin peggeˈ niyaˈ labi da hatus duk duwempūˈ ngibu mākanak, gaˈ niyaˈ kasabutande. Duk ekka isab hayep laˈi.”