\id PHP NT0013.ph1 YAWEYUHA DEIBLERS TFR DP-DEC 21-APR-86 
\h PILIPI 
\toc1 Pilipi wewenasida Polokaho luhuwa je bibo 
\toc2 PILIPI 
\mt1 Pilipi wewenasida Polokaho luhuwa je bibo  
\c 1  
\s1 Pilipi wewenasida dilimidanaki luhuwa je bibo ga.  
\p
\v 1 Nemo Poloma Timotite magoina minoidanaki Jisesi Kalaestida elekele welalita Pilipi numutoka wewenasiya Jisesi Kalaestikumu eli elewole ikadanaki Jisesida wewenala yuha lolo i-minabo wewena ito pastaki ito monokamidana elekele welaki edimo luhuwa maya je noliboe.  
\v 2 Ahote Omai ito We napate Jisesi Kalaestitokati hulu ito nasahili edimotoka mino-loko woko minowa minowa oko netiye loko noloe.  
\pi1 \bd 1\bd* Apo 16:12   
\s1 Pilipi wewenamu Omailoka libo.  
\p
\v 3 Nemokahoya edimokumu ele-loko nowodanaki Omaineda epoka lokaka noe.  
\v 4-5 Edimoya ga laloya api iki elikadanaki ayahasilo li nupa iki yowanuwa likaka abo ito nilebomuya elekoko muki yupeka edimokumuye loko Omailoka lokaka noboya muluneuka wati iyoko We napamidana epoka lokaka noe.  
\v 6 Ito sa-loko ele wehe loko ele-minoe: Yowanuwa lalo edimotoka api ibo we Omaimo le-loko woko le su-noiyoko Jisesi Kalaesti nisitibo onawaya alili ekolaiye.  
\v 7 Edimoya nemo ulawaneu minaboma nenako, nemokahoya edimo mukikumu sa-loko elekaka noboya wati one: Nemoya malokaya nala numuku hulinitikayoko minoyoko, ito ga lalomuye loko ga yowanu leko le wehe loko noloyoko edimoki nemokiya Omaimidana nasahilila maya ona moloko lekaka noune.  
\v 8 Jisesi Kalaestikaho emo ukala lemekaka noibomidana ulautiya nemokaho edimokumuye loko milumatipo elekaka noboya Omailimo makoko elene lina wati gaya noloe.  
\v 9 Ito dukatipo bitabomo ito elekakatipomo ito eliki eli wehe litabomo napa o-loko wetiye loko Omailoka lo molokaka noe.  
\v 10 Sa-okadeko saina ohalawa mudai sa-iki ideko Jisesi Kalaesti nisitibo onawaloya duka laloki lihimatipo minametibo minikiki,  
\v 11 Jisesi Kalaestida li ikitiki li-minadeko emokaho dilipe wehe lolibetadeko, wehe liki minatabomidana sainahenala wavu-liki li soto pideko, Omaimidana luhuwala lamedala soto mino wehe loko netiye loko Omailoka lokaka noe.   
\s1 Kalaestikaho minoko leko nesateya lolo okaiye.  
\p
\v 12 Wewenanelita, eli opa ikatae loko maya lo noliboe. Nemoya lahelamibo nesalimo nupalo soto pibolimoya Jisesida ga laloya anuwa heko li letihekala, ga lalo maya hutili oko woko suwetiye loko soto pibo maya ne.  
\v 13 Nemoya Kalaestikumuye liki nala numuku hulinitikayoko minobo weya aneya maloka uliki we napanipomidana imi welaki ito maloka wewenakiya datalo woko suwone.  
\v 14 Ito nemoya nala numuku minobomuye liki malokati wewenatele malokaya We napamu eliki olo likadanaki Omaimidana gala domoda wamiyoko eli elewole i-miniki li soto molikaka niae.   
\p
\v 15-16 Ito Kalaestida monokalaya maloka wewenasi emo asetokaiyoko emo asetokaiyoko iki likaka niae. Edimoya suwaki pelesa jiki nemo sa-obokidana sa-etudawolae liki edimonipo ulinipo liki yowikili sa-niadanaki Kalaestida uliwa likaka niaboya, nala numuku minobo mupilaloya edawaki yowanu nimikili sa-ikaka niae. Ito maloka wewenasiya mulunipou wati iyoko Jisesi Kalaestida gala wehe liki likaka niae.  
\v 17 Edimoya elikiki ukanipo nimikadanaki, Omailimo maloka minoko ga laloya elewole oko ilimitiye loko lokadanaki nilime molaibo ne liki likaka niae.  
\v 18 Ito yamidana mamidana oko monokauya suwa dukakihe, ito duka lalouti li moliki litabomuya lowa-sawa ametune. Ito aha Kalaestida galalimoya hutili okaka noiye. Yalimoya ihilawa le soto pekaiyoko nenako, muluneuya wati okaka noiye.   
\p
\v 19 Ito edimosiya nemokumuye liki Omailoka likaka yowanuya likadeko ito Jisesi Kalaestida weuna oluholimo nilime wati ideko wati oko minatubo nesa le soto molonetakolaiye loko muluneuya elekoko wati okogo minakoloe.  
\v 20 Ito minokakamuhe, helekakamuheya, nukane olo lo-minadeko ito nuka nepaya Kalaestida mekoyoko yalimoya luhuwane lolo etiye loko sa-loko woko minobo maya ne. Ito sa-loko woko minatuwe loko owane helekaka nesaneya ma le soto molamoko ele wati okoko nukanedunu ewa oko ele-minakoloe.  
\v 21 Minokaka ito helekaka nesamidana monawaya nemotoka sakoya ne: Kalaestikahoya minoko leko nesaneya lolo okaiye. Ito helekaka nesalimoya yoweko nebo nesaya le soto molonetatiye.  
\v 22 Ito maya mikauka kolo meko minatubo nesalimoya aku yowanunemidana ihilawa maya le soto molatiye. Yamuya nenahamu le lolowa etiye loko lobo nesalimoya natau upe-nape okaiye.  
\v 23 Nemoya saina makomamuhe ito makomamuhe nelokaka noiye. Maya mikaya hulikoko Kalaestida le soto molokoko emoki minokaka nesamuya nelokaiyoko nenako, aya nesaya yoweko ne.  
\v 24 Sa-oneboya, edimoya lahelamikatae loko akuya edimoki magoina ma mikauka koloko minoyoko wati etiye.  
\v 25 Ito yatoka nesamuya elewole oko ele-minobo nenako, nemo olotiya helamoko edimoki minoko dilipe wati oyoko eli elewole ikakatipoya ito mulutipou aila uluma silekaka noibolimoya napa o-loko wetiye.  
\v 26 Ito edimotoka aku woko minoyoko, nemokumuye liki Jisesi Kalaestitoka likaka niabosi aku koli miki eke litatae loko ele-minoe.   
\p
\v 27 Edimoya iki moliki itabo nesa makokolimoya Kalaestida gala lalomidana aweyahalo minokadeko duka moli makoko ikiki mutihiki miniki gala lalomidana yowanuwa elewole iki nilideko ito ihilawa li soto nimoladeko edimotoka alikaya nowoko maya mudatuwe. Ito hotoka minoko gatipogoya elituwe.  
\v 28 Ulatipolo wemu ma domoda wamiyoko elewole iki minadanaki abuha-wowotipoya woko aha nesa lolo amideyo. Omailimoya aya ganeya dilipekadeko, aya wesiya sima natabomidana monawa li soto molakilae. Ito Omailimo lilimitibomidana monawaya li soto molakilae.  
\v 29 Monokamidana ulalalo wemuya sa-liki elitae: Kalaestidaya sainahena lolo itatae loko ito eli elewole itatae lokogo minamiye. Emokumuye liki miluma nesamidana mupilalo minatae loko ele libenebo maya ne.  
\v 30 Ito nemoya monokamuye loko hapa lowauya elewole yowanu noloyoko mudaneli-minabo maya ne. Sa-ikaka i-minabo maya nenako, olotiyaki asaoko noloyoko anewaya mudaikaka niae. Ito monokamuye liki aya lowauya edimoki asaikiya litae loko ele libenebo maya ne.  
\pi1 \bd 13\bd* Apo 28:30 \bd 30\bd* Apo 16:19-40   
\c 2  
\s1 Kalaestikaho eimola ukala limibomuye loko Omaimo le sawa jibo.  
\p
\v 1 Edimoya Kalaestitoka oli mebomuye loko dilipe hulu iyoko minikaka niaboya ito uka libiyoko nasahilitipoki minikaka ito Omaimidana weuna oluhoki minikaka ito mulutipou hiyoko miluma elikakaya muki edimotoka nehe.  
\v 2 Yatoka nesahena muki edimotoka nedeko maya, muluneu wati ideko minatuwe liki elikakatipoya makoko aweyaha ideyo. Sa-nikiya duka bikaka ito duka datatipo muti hikakaya makoko aweyahalo minadeyo.  
\v 3 Edimotipomu elikiki dupa liki yowi yowi nesa maya mako lolo amilo. Edimo dupatipoya li-liki limiki molikiki wewenatipomukiya adoha nesa liki elilo.  
\v 4 Ito wewena makolimo eimolago wati etibo yowanuwa lamoko maloka wewenalakiya wati itae loko elitiye.  
\v 5 Jisesi Kalaestikaho elekaka ibo nesa leko makoko aweyaha oko edimotoka minadeyo.  
\v 6 Emoya Omai weuna oluhoki minoko sa-ibomuya Omaiki makoko aweyaha oko minoibototi nenahamuya hulatuwe loko lamoko, le ikitamidanaki,  
\v 7 emo onowela maya hulikoko elekele wesida onowenipo maya le kolokoko lemo wewenakidana soto pibo maya ne. Sa-okadanaki, oko moloko ibolawaya wewenakidana wehe loko sa-one.  
\v 8 Sa-nokoya eimola ukala maya leko lemeko molokoko Omailimo lo molaibo galo maya ameme-kameme idanaki helitibo onawaya le alili iboya owate luwekakamidana oko le alili okadanaki yoho yaha yalo maya helenebo ne.  
\v 9 Sa-ibomuye loko ahola Omaikaho ilime yowalo molokoko uliki we lolo oetokaiyoko, emo uliwalimoya yoweko minadeko muki wewena lemo luliteya lemeko netiye loko loetonebo ne.  
\v 10 Sa-okadeko okulumau ito ma mikauka ito maya mika ulauka minabolawakiya muki nisiki Jisesida uliwalo di bola hiki epoka litatae.  
\v 11 Ito depauti depautiya Jisesi Kalaestiya We napa ne liki litabolimoya yoweko nedeko ahola Omaimidana lamedala lolo etiye.  
\pi1 \bd 10-11\bd* Aes 45:23   
\s1 Olohamidana sainalalo minabo wewenasidaya he hada obetatune.  
\p
\v 12-13 Yamuya nukane libeminobo oluhone motao, edimoya muki yupekaya gane eliki likakamidana minabotoya koli miki minalo. Omai eimolakahoya dukau yowanu lidanaki letibotoka molatibotoka nideko elewole okaka abuha-wowo ito saina ihilawa le soto pekaka abuha-wowoya libekaka noinako, edimoki magoina minoyokogo nehekala, hotoka minoyokoki dilimibomidana ihilawa le soto molatune liki woko opa okatune liki uli uli liki topa topa iki dabuha molalo.  
\v 14 Edimoya muki nesa ni-liki sa-okatiye liki upalo hapalo ga liki pelesakiya jamilo.  
\v 15 Sa-nideko, lihimatipo minametibo dukau wati onetibo minatae. Saniki wewena laeni li lekesa jiki li lahelibo lahelamibo ikaka niabo wewenasida ilikawanipouya lubu jenebo dukauya edimo Omaimidana oluhola maya duka lalokigo miniki lamukidana hi hada itae.  
\v 16 Hi hada iki elewole depa mutiwa likakamidana awa maya li soto moliki li biki minatae. Sa-nideko Kalaesti nisitiboto maya edimokumuye loko oko moloko obo ito edawaki yowanu loboya aha minamibomidana monawa maya soto pekadeko elowa jeko nukaneuka wati etiye.  
\v 17 Ito nemoya noheleko eli elewole ikakatipoya Omailoka jokila hi miminabo nesakidana neyoko, yamidana mupilalo oladane kiseko helitubo nesamu elowa jiki edimoya mulutipou wati ideko minataboya nemoki elituboya lahelepa nelakolaiye.  
\v 18 Ito edimoki asaiki elowa jideko magoina muluteu wati ideyo.   
\s1 Timotiko Epapolodaetasiko.  
\p
\v 19 We napa Jisesikaho elitibo dowa lokadeko maya Timotidama enemane oko edimotoka oli hekoyoko wetiye loko noloe. Sa-okoko gatipo mako le wili jeko nisekadeko elekokoya muluneu wati etiye.  
\v 20 Emokidana wewena makomalokaya minamae. Emokahoya edimokumu wati oko elidanaki ukaladunu milumatipo elekaka noiye.  
\v 21 Maloka wewenasiya edimonipomugo eliki Jisesi Kalaestida yowanulamuya ma elamaboya,  
\v 22 Timotikaho minoko leko ibotokaya mudaiboya monawala lalo neyoko, edimosiya alo mudai-minae. Ipa makolimo aholada ilime wati okaka noibomidana oko gala lalomidana yowanulamukiya nemoda nilime wati okaka iye.  
\v 23 Ito nemotokaya yamidana mamidana saina soto pitibokumuya ele wehe lokoko emodaya enemane oko oli hekoyoko wetiye loko ele-minoe.  
\v 24 Sa-ideko, We napamamo nemesalo molokadeko nemokiya mino hana amoko edimotoka wekolo yamuya ele-minoko noloe.   
\p
\v 25 Nemoya saina makomu ohu jeko minoyoko edimosiya Epapolodaetasida oli hikayoko, niseko nilime elewole onetoko nilime wati okaka we ito monokamidana lowau elewole we maya wewenane lolo oko minokaka noibo wemidana opaya le wili je libituwe loko noloe.  
\v 26 Emo elaibo gawaya edimo elikabo maya ne. Emokumuya adoha nesa liki mulutipou elikatae loko elibo nesalimo eda oneyoko maya noloe.  
\v 27 Ito saina mako elokaiyoko helekolo molakolo iboya, Omaimo ukala miboya eimoladago mamiye. Nemoya muluneu okohu ibomidana mupilaloya kolo mekatiye loko eimola ukala nimidanaki ilime haka loetaiye.  
\v 28 Sa-ibo nenako, edimoya muda-elikiki mulutipou lalo etiye loko ito nemokahoya elitubo eda amideko minatuwe lokoko ilime o'e lamoko olotiya oli hekoyoko minabotoka yaitaya nowiye.  
\v 29 Sa-ominoyo, edimotoka wideko maya We napaloka woko kolaibo we maya ne likiki mulutipouka lalo ideko ilimi lalo ilo. Edimoya yamidana wewenasida maya dilipi napa iki dilipi lalo ilo.  
\v 30 Emoya Kalaestida yowanulamuye loko helekolo ibokutiya edimo hotoka miniki nilimi wati itabo anuwa minamiyoko, elekele onetatuwe loko upala latila etibomu eliboya eda elamiye.   
\c 3  
\s1 Omaimidana omudalo wehe loko minokakamidana ihilawa.  
\p
\v 1 Wewenanelita, sa-loko lo suwekoloe: We napaloka koliki minabomuye liki mulutipouka wati onedeko minalo. Aya ga maya aku esewau leko lo libituwe loko eloboya eda amiye, ito edimotoka mino moloko minoko dilipe elewole olibetatiye.  
\v 2 Edimo liwe ulakidana yowanu liki minabo wewenasidamuya ujapa iki minalo. Edimoya lahelibo lahelamibo nesa liki Omailimo dilipitiye liki Omaimidana anela dupanipolo nimoliki dupa hukikaka niabo wewenasidamuya ujapa iki minalo.  
\v 3 Omaimidana weuna oluholimo lilimiyoko, Omailoka monoka lokaka noudawo ito Jisesi Kalaestitoka kolokudanaki elowa jekaka noudawo ito lemo lupaloti oko moloko udawo nesamuya ma ele elewole amudawo wewenaya lemoya wehe loko Omaimidana oluhola minune. Edimo minahekela lemotego Omaimidana anelaki minokaka ihilawa le-minune.  
\v 4 Nemoneya edimokidana nupadunu oko moloko obo nesadunu elewole nepa mutiwa litubo ne loko elewole oko emesalo molatubo anuwaya minatidanako, nemo aha emesalo molatine. Ito maloka wewenasiya edimo dupalo elewole iki emesalo molatidanako, nemoya asaetuwe loko le-loko yoweko asebetoko elewole oko emesalo moloko minatine.  
\v 5 Sakomuya noloe: Nemoya soto pekodanaki minoyoko, onawa 8-pala wokaiyoko, nupaloya Omaimidana anela molaboma ne. Nemoya Isilaelo wewenasikuti Benisamanida awola wehe loko Juda we ulawa soto pobo maya ne. Saoboma neboya, Mosesekaho lo hukoko libo gamidana elekelewa lolo oko Palasisi wewena lolo oko minoe.  
\v 6 Sa-okoko nemoya Juda wewenasida monokanipomuya nabuha adoha molodanaki, Jisesida wewenalale yuhasida lowa he boboma ne. Sa-okoko Mosesekaho lo hukoko libo galoya eleko emesalo moloyoko, maloka wewenasiya lihimanemu ohu jeboya minamiye.  
\v 7 Sa-oneboya, nemo mako hapa saina le-minobo nesamuya elekoyoko, ihilawa lolo oko minokaiyoko, alikaya Kalaestikumuye loko hapa lolo-halo okaka obo nesamuya eloyoko aha nesa lolo iye.  
\v 8 Ito yagoya minamiye. Jisesi Kalaestiya nemo We napane lolo one loko elobomidana meinawa yowekaiyoko, muki maloka nesamuya eloyoko woko aha nesa lolo iye. Nemoya Kalaestida le sa-etuwe loko emokumuye loko muki nesahenaya mudaoboya esuwawa lolo okaiyoko, muki woko tolowa oko suwiye.  
\v 9 Nemoya emotoka kolokoko minodanaki, Mosesekaho lo hukoko libo gaya ele lekodanaki, neimonekahoya Omaimidana omudaloya wehe loko minamoe. Kalaestikumu ele elewole okodanaki Omaimidana omudaloya lihimane minamibo minokaka nesamuya nelokaiyoko ele elewole okakamidana minatuwe loko Omailimo lihimanemu elekaiyoko suwibomidana ulaugo minokaka noe.  
\v 10 Ito nemoya Kalaestida monawala ele wehe letuwe loko ito emo aleuti sinokakamidana abuha-wowo maya nemotoka soto pitiye loko ito emo miluma elibolawalo maya kolo meko nemoki elituwe loko ito helekolo noko oko moloko ibo monawa lituwe loko,  
\v 11 ito sakokoya woko helekakakuti sinokaka nesaya le soto molatuhe loko elekaka noe.  
\pi1 \bd 5\bd* Lom 11:1; Apo 23:6; Apo 26:5 \bd 6\bd* Apo 8:3; Apo 22:4; Apo 26:9-11   
\s1 Anewa maya muda wehe lominodanaki lolosa jeko nowoe.  
\p
\v 12 Nemokahoya aya nesa maya alo lekoe loko lamoe. Ito nukaneya wehe lokogo ne loko lamoe. Aha Jisesi Kalaestikaho nilime sa-ibomuye loko emotokati aya onowelaki nesa maya lituwe loko nabuha moloko nowoe.  
\v 13 Wewenanelita, neimonemu eloboya aya onowe lalo maya alo lekoe loko lamoe. Mamidanago sa-okaka noe. Hulikoko nisobo anu maya nemesaloka neboya, yamuya elamoe. Sakokoya nomudaloka nebo nesa maya lituwe loko nade watokaka noe.  
\v 14 Sa-onebo nenako, Omailimoya Jisesi Kalaestidamuye loko okulumau anulo nilime molaidanaki anulo hulonetaiyoko, onowelaki nesa lituwe loko muda wehe lominodanaki wehe loko lolosa jeko nowoe.  
\v 15 Lemo monokau napa ludawo wewena mukilitaya aya onowelaki nesamugo ele makoko oikoko minatune. Ito ga maya nolobomuya elitaboya anutipoya aitomidana minadeko maya Omailimo dukau he hada okadeko eli wehe likilae.  
\v 16 Sa-oneboya, alo omutoko wudawo anulogoya emesalo moloko wetuniyo.   
\p
\v 17 Wewenanelita, nemoya omutoko nowoboto muda-nelikiki niyakauya nemesalo moliki nisilo. Ito maloka wewenasiya ayamidanago iki li omutiki wikaka niae. Sa-ikaka niayo, edimoda mudaikiki maya ayaloya demesalo moliki diyakauya nisilo.  
\v 18 Sakiya ninisiki maya sa-liki eli-minalo: Nemoya maloka wewenamuya lo libe-loko nisewa nisewa obo maya ne. Oloti maya nomuda nouvalakiya aku lo noliboe. Edimoya iki moliki ikaka niabo nesalimoya Kalaesti maya yoho yaha yalo helibomidana lowa hi mikaka niabo ilene.  
\v 19 Edimo dupalimo umu helekaka noibo nesalimoya aya wewenasida omainipo lolo one. Sa-ikiki aito aito nesaya owanipo luwitibo nesa liki li sawa jikaka niae. Sa-ikiki maya mikauka nesamugo elikaka niae, Sa-ikiki sima nikaka nesamidana epa nesala lolo niae.  
\v 20 Sa-iki minaboya, lemoya okuluma ebamidana ahola minudanaki, lilimekaka we We napate Jisesi Kalaestikahoya okulumauti limitibomuya ewa oko minokaka noune.  
\v 21 Emokahoya nisekoko muki nesa maya le nupa napa oko le amaekukago molokadeko, emo ahobalaukago dilipe molokaka abuha-wowodunuya lupa elamibo lupaya le wili jekadeko eimola lamedalaki upalakidana lolo ekolaiye.  
\pi1 \bd 17\bd* 1 Kol 4:16; 1 Kol 11:1   
\c 4  
\s1 Aku le datalo moloko lobetaibo ga.  
\p
\v 1 Sa-onenako, nukane libeminobo wewenalita, aku edimokumuya nonelaiye. Edimoya yowanunemidana ihilawa lolo iminayoko, edimokumuya elowa jekaka noe. Edimoya dabuha moliki We napaloka koliki emola wewenala yuha lolo iki minalo.   
\p
\v 2 Ito Juwodiyako Sitikakoya We napamidana oluhola lolo aibomuye liki duka moli makokoto iki minasaiye loko noloe.  
\v 3 Ito makoko yowanugu emesalo moloko lekaka wewenanelika, emoya aya mena loweya dilipe wati o. Edimo minaiboya, ito Kelemeto ito wewenanele malokakiya ga lalomidana miluma yowanuguya nilimi wati i-minabo ne. Ulinipoya elewole iki minabo wewenasida dulinipo jibo bukugu ne.   
\p
\v 4 Edimoya We napaloka kolabomidana ulauya miniki elowa jiki minalo. Sa-ideko nemoya aku data leko mulutipouya aila uluma silideko minalo loko letuwe.  
\v 5 We napa maya alo lomudalokaya nisekolaiye. Muki wewenasidaya hulugutigo yamidana mamidana ibitalo.  
\v 6 Yatoka nesamuya adoha nesa leko delamideyo. Sainahenamu ohu nijiki maya Omailoka wako likikiya alo libenebo nesamukiya epoka liki minalo.  
\v 7 Sakiya minadeko, Omaimidana hululalimo wewenasi elikaka nesanipo asebetoko nebolimoya duka ito dataloya ujapa obetokadeko Jisesi Kalaestitoka koliki minatae.   
\p
\v 8 Wewenanele yuhalita, ga makoya sa-loko lo nosuwoe: Saina ihilawaya elekele omekaka, ito saina lalo ito wehe loko minokaka nesa, ito ukulo hege-pege loko nebo nesa, ito muda lalo okakamidana nesa, ito ele lalo okaka nesa, ito eto onebo nesa, ito muluteu wati okaka nesahenamuya data eliki minalo.  
\v 9 Nemoya oko moloko odanaki, api-napi olibetodanaki saina-maina woko le nupa oko dilipeko minoyoko mudaikiki elebotogoya minatae. Sakiya minadeko, hulumidana ahola Omailimoya edimokiya minakolaiye.   
\s1 Poloma upaloka saina li mebomu lo bibo ga.  
\p
\v 10 Edimoya onawa hanaya aha mini-liki niseyoko duka wati okaiyoko, olotiya akuya nemokumu elikiki li lalo initiki ehadahena nimikayoko, yamuya eloyoko, We napamuya elowa jeko muluneu lahelepa adoha noiye. Omutokoya edimosi nemokumu elikakawaya elikaboya, muki nesahena lenetatune liki anuwa ohu jeboya eda adoha delokaiye.  
\v 11 Nemoya yamidana mamidana nesa ulau minodanaki, osele nelamideko minatubomidana monawa alo mudakobo nenako, nemoya yamidana nesane minamiyoko ohu jeko lamoe.  
\v 12 Nemoya li-liki yowikiki ito li-liki limikiki initaboya, aha sa-ikaka nesa liki sa-ideko aha wati oko minakoloe. Ito saina no elekele oko minokaka, ito hukono-pakono oko minokaka, ito saina-maina uvaminaki we minokakahe, ito nodekumu onawalo minokaka nesamidana ulau olo-loko minokakamidana monawamu ohu ohu nojoyoko, Omailimo alo lo nemeko api-napi onetokaiyoko minoe.  
\v 13 Kalaestikaho abuha-wowo nemekaiyoko, aito aito lahelamibo nesamidana ito lalomidana mupilalo aya abuha-wowola maya muki le-minodanaki abuha-wowo loko minokaka noe.   
\p
\v 14 Sa-oneboya, edimoya miluma-aluma eleko minoyoko, nilimi wati ikaka niabo nesamuya eloyoko lahelepane nelokaka noiye.  
\v 15 Pilipi numutoka wehena ito menakipahenasiya nemo ganeya alo eli-minae. Nemoya Jisesida gala lalomuya yowanula api obo onawaloya Masedoniya eba maya hulikoko nowodanaki, Jisesida wewenala yuha malokasiya aha minayoko edimosigo monoka maku liboyoko ehada nemeyoko oko minudawo maya ne.  
\v 16 Ito Tesolonika numutoka minoyoko nupalo nesane li olo jinitiki minabo ne.  
\v 17 Nemoya ehada uvaminamugo lamoe. Monokatipomidana ihilawa edimotoka soto pekoko mino-loko yowitiye loko noloe.  
\v 18 Oloti maya saina li soto molinitiki suwaboya waitoko neyoko, yamuya elitae loko luhuwa maya je noliboe. Epapolodaetasi maya edimotokati ehada leko niseko nemekaiyoko, uvaminaneki we lolo okoko minoe. Edimosiya saina nemebo nesamuya eloyoko Omaimidana uda ji mikayoko nuvala lalo wibo ilekaiye. Ito jokila hi mebolimoya Omai elaibo nesa lolo okaiye.  
\v 19 Ito Omaine saina-mainahena le soto molokaka aholakaho Jisesi Kalaestitoka koli mebomuye loko lalo nesahena newelusa olibetokadeko saina makomu ohu jamikilae.  
\v 20 Ahote Omaimidana epoka lokaka nesalimoya mino-loko yoweko netiye. Watiyae.  
\pi1 \bd 15\bd* 2 Kol 11:9 \bd 16\bd* Apo 17:1   
\s1 Dupamu elaiyoko luhuwa jeko suwoko bibo ga.  
\p
\v 21 Nemoya Jisesi Kalaestitoka wiki kolikiki Omaimidana wewenala yuha lolo iki minabo wewena mukisidaya ekenipo nolobetoyo, li bilo. Ito nemoki minikaka niabo wewenanelesiyaki eketipo nililibitae.  
\v 22 Ito muki maya monoka elebo wewena ito uliki we napa Sisada elekele itikaka niabo wewenasikiya eketipo lilibitikaka niae.   
\p
\v 23 We napa Jisesi Kalaestida nasahililalimo edimotoka minowa minowa oko netiye loko noloe. Watiyae.