\id GAL NT0013.GA1 YAWEYUHA DEIBLERS TFR DP-DEC 21-APR-86 
\h GALAISIYONI 
\toc1 Galaisiyoni wewenasida luhuwa Polomamo je bibo 
\toc2 GALAISIYONI 
\mt1 Galaisiyoni wewenasida luhuwa Polomamo je bibo  
\c 1  
\s1 Galaisiyoni wewenasida dupamu elaiyoko luhuwa je bibo ga.  
\p
\v 1 Nemo Poloya aposolo we makolimo noli hamibo ito wewena makolimo yowanu litane loko lonetamibo, Jisesi Kalaestiki ito Kalaesti helenebokuti aku ilime sinaibo we Omai ahote edimo ganipoloya aposolo lolo obo ne.  
\v 2 Nemo wewenanele malokaki ito edimo malo minaboki magoina minudanaki, Jisesida wewenala yuha Galaisiya ebakuka mini-liki wabosidaya luhuwa nesatipo je noliboe.   
\p
\v 3 Ahote Omai ito We napate Jisesi Kalaestitokatiya nasahili ito huluya edimotoka minomo yoweko minadeyo.  
\v 4 Jisesiya ahote Omailimo libotoka molaibotoka oloti onawaloya lahelamibo nesalimo lilime lahelamekolo ibokutiya lilimitiye loko lihimatemu minokaka ibolawa maya eimolaya hulaiye.  
\v 5 Sakoya sa-onenako, yamuya Omaimidana luhuwala maya le sawa jeko mino-loko woko netiye. Watiyae.   
\s1 Ga laloya aito mako minamiye.  
\p
\v 6 Edimoya Kalaestida nasahililau koliki minatae loko lesa molo libibo weloya mini hana amadanaki, demesa mikadanaki aito monokauya wiki data ameme iki elikaka niae. Sa-ikaka niayoko, nemoya yamuya ehe loko nololibetoe.  
\v 7 Ga lalo mako minamiboya, aha maloka wewenasiya Kalaestida gala lalo maya le opa etupe liki aito monokaya li li biki duka li opa adanaki, yamidana sa-niaboya,  
\v 8 nemokahohe ito okulumauti okanaki we makolimohe ga lalowa yeimaloka lo libudawoya lo libamoko le opa oko aito ga lo libitiboya, jomidana epa nesa lolo ekolaiye.  
\v 9 Ga maya hapa ludawo gamidanagoya aku noloe. Maloka wewenasiya ga lalowa hapaya li li beyoko elebo ga maya li opa iki aito aweyaha iki li libitaboya, meinawaya jomidana epa nesa lolo itabo ne loko akuya lo noliboe.  
\v 10 Ga maya noloboya wewenalita mudai lalo itae loko lamoe. Omaimoya muda lalo etiye loko noloe. Nemoya wewenasiya nemodamuya elideko yowitiye loko yowanu letidanako, Kalaestida elekele otoko minametine.   
\s1 Poloma aposolo lolo ibomidana monawa.  
\p
\v 11 Wewenanelita, nemokahoya ga lo libituyo, elilo. Jisesida ga lalo lo liboboya wewenasi datauti li soto molabo minamiye.  
\v 12 Ito wewenasitokati minamiye. Ito wewenasiya wetome-katome abototi minamiye. Jisesi Kalaestikaho eimola lo soto moloko lo nimibo ne.  
\v 13 Nemoya hapa Juda we minodanaki, luwawanipouya minoko saina-mainahena oko moloko obo monawamu li libikayoko, eli-minae. Nemoya Omaimidana monokala eli-minabo wewenaya ulana molobetoko kohaidoko doli doli hodanaki, dilipe lahelibo lahelamibo okaka oboya,  
\v 14 oluho nahalunelesida asebetoko dotele ahotelesida latatelesida ganipoya lemametiye loko aya galimoya elewole oko netiye lokodanaki, nabuha moloko sa-okaka obo ne.  
\v 15 Sa-okaka oboya, Omailimo hapa yeikala doneda ohumanau minoyoko, nasahili onetoko nilime eto onetoko lesa molonetaiye.  
\v 16 Lesa molo nimiboya eliyoko etokaiyoko, gawa maya hetoka wewenasitoka loko le hutili etane loko ipalamidana monawalama lo soto moloko nilipiye. Ito sa-iboya, aya gamuya ele wehe loko ele-minobo nehe loko maloka wewenasitoka loka obetamoboya ne.  
\v 17 Ito Jelusalemu numutokaya omutiki aposolo lolo iki minabolawaya mudakoko edimosiya aya ga lalo maya li soto moliki li nimitae loko yowamoe. Mudaohekala, enemane oko Alabiya mikauka wewena minamabotokaya wili jeko woko minodanaki, Damasikasi ebatoka wili jeko woko hetoe.  
\v 18 Sako woko yaloka minoyoko meleke 3-pala wokaiyoko, Pitada maya muda-elatuwe loko Jelusalemu numutokaya yowekoyoko, magoina salele lowego minoiye.  
\v 19 Sakoya minoiboya, aposolo malokasida maya mudaidamoe. We napatemidana unala Jemisidagoya muda-eloe, emoya monoka ujapa we napa minaibo nenako.  
\v 20 Ito nemokahoya Omailokati monoka lobomidana gawaya luhuwa nojoboya, Omaimidana omudalalo wati okaiyoko luhuwa nojoe.  
\v 21 Ito sa-okodanaki, Siliya mikauka ito Silisiya mikaukaya woko minoe.  
\v 22 Ito Judiya mikauka wewena Kalaestida wewenalasiya nemodaya mudaneli wehe lamae.  
\v 23 Edimosiya maloka wewenasi nemodamu ga mako layoko sa-liki ele: Emokahoya kohalelaidanaki ulana mololetoko loli heko monoka maya le opa etuwe loko sa-ibo welimoya aku le wili jeko wewenasidaya monoka lo nobiye.  
\v 24 Likadanaki nemotoka soto bibo nesahenamu Omaimidana epoka liki minikaka ae.  
\pi1 \bd 13\bd* Apo 8:3; Apo 22:4-5; Apo 26:9-11 \bd 14\bd* Apo 22:3  
\pi1 \bd 16\bd* Apo 9:3-6; Apo 22:6-10; Apo 26:13-18  
\pi1 \bd 18\bd* Apo 9:26-30   
\c 2  
\s1 Aposolo malokasiya Poloda yowanulamu eleyoko lahelepa ibo.  
\p
\v 1 Sako, meleke 14-palaya wokaiyoko, Banabasite aku le lika oko Jelusalemu numutoka yoweko, Taetasida maya le kolokoko magoina yowune.  
\v 2 Sa-udawoya, aha samune. Omailimo lo nimiboto yoweko sa-une. Sakoya yowoboya, muki numuto namato wewena hetoka wewenasidaya gala lalo maya wetome oko lo bekaka nobo ga maya monoka ujapalo wemagoya li esa iki minayoko yoweko wetome oko lo boe. Omutoko yowanu loboki ito oloti lobo yowanumakiya maloka wewenasiya mudai hulikatae liki li bikadeko, aha minokatiye loko sa-obo ne.  
\v 3 Sa-iyoko, hetoka we makolimo Jisesidamu ele elewole okayako, monoka wesida ujapa wesiya aya wemidana upaloka Omaimidana anela molatune liki likaka aboya, maloka wewenasiya nemoki minoibo we Taetasiya Giliki we nenako, emoya Juda we lolo etiye liki upaloya Omaimidana anelama moletametune liki li hukitamae.  
\v 4 Sa-oneboya, suwalo wewena malokasiya yeimaloka nisiki luwawateuya halukuya hetae. Lemoya Jisesi Kalaestitoka woko omeko minudanaki, Mosesekaho lo molaibo gamidana nalau minamudawomidana monawa maya mudatune liki Mosesekaho lo hukoko libo gamidana elekele we lilime molatune liki haluku eba wili jiki mudatabo weya nise.  
\v 5 Yatoka wesiya Taetasida upaloya Omaimidana anela molitakili, lemo lilimetune liki likayoko nenako, lemoya Jisesida gala lalolimoya edimotoka le ikitoko litiye lokoko ele bamudawo ne.  
\v 6 Sa-ikayoko, muki wewenasi eleyoko monokalo duliki we minabo wesiya anute hiki li likiliya yamidana mamidana nesa lilitamabo ne. Ito nemoya edimokumu eloboya, aitomidana iki minamabo ne. Omailimoya makoko aweyaha oko lupaloka mudaiboya yoweko lemeko minamiye. Jelusalemu numutoka yowobo yupekaya aya monoka ujapalo wesiya aito ga lalo mako wetome oko lo bebe etane liki amida miki li nemamae.  
\v 7 Edimosiya sa-liki li nemamiki, sa-likigo ele: Omailimoya Pitadaya Juda wewenasitoka Jisesida gala lalo maya lo soto molatiye loko loetaibo ne. Ito nemodaya asako hetoka wewenasitoka gala lalo maya lo soto molatane loko lonetaiye liki ele.  
\v 8 Pitakaho Juda wewenasida aposolo lolo ibomidana oko, nemoya asako Juda wewena minamabo hetoka wewenasida aposolonipo lolo oe, Omaimidana abuhalaloya.  
\v 9 Sa-iyoko, Jemisile Jonile Pitalesidamuya monokamidana duliki we minahe liki elebo welikaya, Omailimoya elewole yowanula maya le ohemikaiye liki nemodamuya ele. Sa-liki eliki edimoki lemoki makoko gama lo bekaka noune liki elikadani Banabasimakiya dadeuya le. Sa-ikayoko edimo hetoka minabo wewenasitoka monoka yowanu nileiyoko, lelimote Juda wewenasitoka noluniyoko, oko leko minatune liki li hukae.  
\v 10 Wewena ebili nabili limiki minabolawasida nasahili ibitasaiye likigoya li neme. Sa-ikayoko, aya yowanu maya nabuha moloko lituwe loko ele-minoe.  
\pi1 \bd 1\bd* Apo 11:30; Apo 15:2   
\s1 Enitiyoko numutoka Polokaho Pitada auha mibo ga.  
\p
\v 11 Pitama Enitiyoko numuto nisiyoko, emotokatiya lahelamibo nesa mako soto pekaiyoko mudakoko omuda lelei pelesa jeko gaya lo moe.  
\v 12 Yamidana monawaya sako ne: Omutokoya hetoka wewena Jisesida monoka elebo wewenaya Jemisimamo doli hekaiyoko nisebo wewena malokasiya, Pitaleki magoina miniki nodenesa ninayoko, alikaya Juda wewenaya niniseyoko mudakoko, hetoka wewenasitokakiya Omaimidana anela dupalo netiye liki likaka niabo wewenasidamuya omodala wokaiyoko, hetoka wewenasida maya hulo hoto obetokoko magoina minoko nodenesa namiye.  
\v 13 Sa-okadanaki, woko leko niseko leko okaiyoko, maloka Juda wewena iwenipoleki enonipo lowe nebo wewenasida demesalo moliki Pitakaho sa-ibokidana sa-niayoko, Banabasi maya edimotoka kolo meko edimosi iki moliki abomidana sa-iye.  
\v 14 Sakiya miniki Jisesida ga lalomidana anulau maya wehe liki wamayoko, mudakoko muki wewenasida dowisalo Pitada maya emoya Juda we minadawoya, lemo Juda wewenalika liyakau jamoko hetoka wewenasi iki moliki ikaka niabokuya wokaka noko hetoka wewenaya Juda wewenalika liyakau jitae loko noladawoya wehe lamiye, loko lo moe.   
\s1 Juda wewenaki hetoka wewenakiya eli elewole abokumugo dilimekaka noiye.  
\p
\v 15 Lemoya hetokaya opa-napa minikaka niabo wewenautiya soto pamune. Juda wewenautiya soto pudawo wewenalita sa-loko elekaka noune:  
\v 16 Mosesekaho lo hukoko libo galoya ele lekoko yowanuwa le-loko wokuniyoko, lihimateya suwetibo nesa minamiye. Jisesi Kalaestitogoya ele elewole etudawoya lihimateya suwetibo minakolune. Loko elekudanaki Mosese lo hukoko libo galoya yowanu le-loko woko minuniyopakala, Jisesidamugoya ele elewole uniyoko, lihimateya suwokadeko minatune lokogo elune. Mosesekaho lo hukoko libo galoya yowanu li-liki wiki minatabo wewenaya lihimanipo minametibo ne loko minamiye, aha netibo ne.  
\v 17 Kalaestitoka woko omuniyoko lihimate suwetiye loko minudawo neboya, hetoka wewenakidana lahelamibo nesa lolo noko yamuya nenae loko letune. Kalaestikaho lahelamibo nesa lolo ilo loko lilime molokaka noihe. O'e, sako minamiye.  
\v 18 Latate Mosesekaho lo hukoko libo galoya ele lekoko wokuniyoko, lihimate suwetibo nesa alo ale judawo nesa maya aku tetudawoya, wehe loko lo hukoko libo ga maya pelesa jekaka noudawomidana monawa maya soto pekolaiye.  
\v 19 Mosesekaho lo hukoko libo galimoya kohanelo helibo ilekaiboya, elewole nepa mutiwa litubo nesa lamiye. Ito Mosesekaho lo hukoko libo gamidana nalalau minametubo nesa lekaiboya Omaimidanamuye loko minatuwe loko ne. Lahelamibo nesa lolo okakakumuya nemo Kalaestida yoho yaha yalo kohanelabo maya ilekaka noiboya,  
\v 20 olotiya minoko leko noboya, neimonego minamoe. Kalaestikaho nukauya minoko leko noiyoko, nupadunuya minoko leko noboya Omaimidana ipalamuya elewole oko nata kekoko sako minokaka noe. Emoya epa mutiya molokoko nemokumuye loko epa mutiya hulaibo ne.  
\v 21 Lo hukoko libo ga maya ele letudawototiya lihimate suwokaka nesa netidanako, Kalaestiya aha yatoka helibo ilitibo neboya, Jisesikahoya nohelidanaki Omaimidana nasahilila maya le oheletaibo nesa maya nemo hulamoe.  
\pi1 \bd 16\bd* Sam 143:2; Lom 3:20-22   
\c 3  
\s1 Lo hukoko libo galoya ele lekaka nesa nehe ito Jisesikumuya ele elewole okaka nesa ne.  
\p
\v 1 Kee, Galaisiya wewena nei wewena yamalae, ekahimamo dilipe opa-napa iye. Jisesi Kalaestiya yoho yaha yalo helibomidana monawa maya dilipeko lo libudawo ne. Sa-udawo maya, domudadunu wehe liki mudai-minaboma ne.  
\v 2 Saina makomu loka olibetakoloyo, elikiki maya li nimilo. Edimoya Omaimidana weuna oluho lebo maya nenaha ikiki lebo ne. Mosesekaho lo hukoko libo ga maya eli likadanaki lebo nehe, ito Jisesikumu eli elewole ikiki lebo ne.  
\v 3 Nenaha iyoko nei minae. Omai weuna oluhomidana anuloka li-liki wabokuti li wili jiki edimotipo elewoleyatipoloti Omaimidana ebalaloka woko hetatune liki data nielehe.  
\v 4 Monokaya edimotoka nebokumuye liki lahelamibo nesa lolo nilibitayoko, oliwaki nesa mupilatipolo aha nesakidana yowibo nehe. O'e, sakoya minamiye.  
\v 5 Omailimoya weuna oluhoya lemeko ito adoha nesa elewoleya le soto mololibetokaka noiboya, Mosesekaho lo hukoko libo ga maya eli likayoko sa-okaka noihe, ito Jisesida gala lalo maya eli elewole ikayoko le libekaka noiye.   
\p
\v 6 Monoka bukuguya latate Aebalahamuda monawalamuya emo Omaimidana ele elewole okaiyoko, Omailimoya lihimaka minamibo we loko liye liki luhuwa ji-minabo maya ne.  
\v 7 Sa-onenako, edimo eli elewole ikaka niabo wewenaya Aebalahamuda awolale wehe liki minae liki elilo.  
\v 8 Ito hetoka wewenasiya eli elewole ideko lihimanipo le hulobetatibo ga maya hapa elekoko monoka bukuguya Omailimo Aebalahamuda gala lalo maya lo miboya sa-liki luhuwa ji-minabo ne: Makukalimoya muki hetoka wewenasitokaki leko suwekolaiye.  
\v 9 Sa-onenako, Aebalahamukahoya ele elewole idanaki jibo iyakalauya jiki witaboya emo makulama likilae.  
\v 10 Ito Mosesekaho lo hukoko libo gauya emesalo molikaka abo wewenaya jomidana epa nesa lolo ikilae. Yamuya monoka bukuguya sa-liki luhuwa ji-minabo ne: Mosesekaho lo hukoko libo galoya muki wehe liki emesalo molamitaboya, Omaimo edimokumuya epalo molakolaiye.  
\v 11 Mosesekaho lo hukoko libo aloya ele lekoko lihimate Omailoka suwetibo nesa minamiye. Yamidana monawaya alo soto pitiye loko monoka bukuguya ga mako sa-loko ne: Elewole iki elebolalimoya Omaimidana owisalaloya lihimatipo suwokadeko minatabo wewenasiya elewole iki miniki liki ikilae.  
\v 12 Ito lo hukoko libo galoya emesalo molokoko elewole etudawomidana monawaya aito ne. Aya gaya elewole oko ele lekoko minowa minowa etudawo nesa ne. Aya nesamuya monoka bukuguya lo hukoko libo gamidana yowanuwa liwa liwa iki liki suwiki minatabo wewenaya elewole ikigo minakilae, loko luhuwa jenebo ne.  
\v 13 Ito monoka bukuguya wewenasida yanawa iki yalo tebo wewenaya jomidana epa nesala lolo ikilae, loko luhuwa jenebo ne. Kalaestida maya asaiki yanawa iki yalo tikayoko, lemokumuye loko Omailimoya epalo molaibo wekidana lolo iye. Sakoko Mosesekaho lo hukoko libo gamidana adeuti maya wina oletaiye.  
\v 14 Ito Kalaestidamuye loko Aebalahamuda makulalimoya muki numuto namato wewenasitoka woko litiye loko sa-oletaiye. Sa-okadeko, Omailimoya weuna oluho litae loko lo mololetaiboya elewole oko lata kekoko lekolune.  
\pi1 \bd 6\bd* Jen 15:6; Lom 4:3 \bd 7\bd* Lom 4:16 \bd 8\bd* Jen 12:3 \bd 10\bd* Dut 27:26  
\pi1 \bd 11\bd* Hab 2:4 \bd 12\bd* Liv 18:5 \bd 13\bd* Dut 21:23   
\s1 Mosesekaho lo hukoko libo gaki ito Omailimo le limituwe loko libo gaki.  
\p
\v 15 Wewenanele yuhakuse, edimo mudaiki eli-minabo nesa makomaloya lo moloko letuyo, elilo. We lowesiya saina makomuya li kohikiki luhuwa jisaiboya, makolimoya le oha etiboto minamiye. Ito emo alikaya kolo meko luhuwa jitabolawaya minamiye.  
\v 16 Ito Omailimoya Aebalahamudaya ito awopilakalesidaya dilipe napa etuwe loko lo hukobetoko liboya, awopilalale mukisidamuya lamibo ne. Makoko Kalaestidamuya libo ne.  
\v 17 Monawa sa-onebomuya noloe: Omailimoya hapaya dukamidana uvaminala limituwe loko loneboma ne. Loko liboya, meleke 430 oko wokaiyoko, Mosesekaho lo hukoko libo gama soto piye. Aya lo hukoko libo galimoya alika niseko Omailimo libo gamidanaya le oha amitabo, ito malokaya hukiki li hulamitabo ne.  
\v 18 Monokamidana uvaminalaya lo hukoko libo gautiya lekaka nesa minatidanako, Omailimoya ga lo mololetoko libokutiya lametine. Sa-oneboya, watiya minamiye. Omailimo Aebalahamudaya aha nesakidana monokamidana uvaminala le ohetaibo maya ne.   
\p
\v 19 Sa-onenako, lo hukoko libo ga maya nenahamuya ne. Olo. Wewenalika pelesa jikaka niabo nesamidana monawa maya lo soto molatuwe loko Omailimoya alikaya kolo meko lonebo ne. Ito mino-loko wowa wowa noideko, Aebalahamuda awola maya le ohetatuwe loko lo molonebo we Jisesi maya soto pekadeko suwetiye loko lonebo maya ne. Ito lo hukoko libo ga maya okananipoki we makosiya limiki luwawateu minaibo weya Moseseda adeu molokaiyoko limibo ne.  
\v 20 Ito we mako luwawateu we netiboya makoko wewenamu minamekolaiye. Muki wewenasidamuya minakolaiye. Sa-oneboya, Omaiya makoko weya nenako, Aebalahamuda saina mako le ohetatuwe loko omudalo lo moloetaiboya eimoladamugo lo moloetaiye.  
\pi1 \bd 16\bd* Jen 12:7 \bd 17\bd* Eks 12:40 \bd 18\bd* Lom 4:14   
\s1 Mosesekaho lo hukoko libo ga maya soto pibomidana monawa.  
\p
\v 21 Ito Mosesekaho lo hukoko libo galimoya Omailimo lo mololetaibo gamidanaya asetamekolaiye. Mosesekaho lo hukoko libo galimoya elewole lepa mutiwa lemekaka nesa minatidanako, wehe loko aya gautiya lihimate suwokadeko minokakamidana anulaya soto petine.  
\v 22 Sa-oneboya, muki wewenaya lahelamibo nesamidana adelau minudawomidana monawaya monoka bukugu li soto moli-minabo ne. Sa-onenako, Jisesi Kalaestidamuya elewole oko elekuniyoko, le oheletatuwe loko lo mololetaibo nesamidana ulawa letudawoya sako ne.  
\v 23 Lemo Juda wewenasiya hapa yeikala elewole oko elekaka anuwa soto pamiyoko, Mosesekaho lo hukoko libo galimoya nala lemekaiyoko, aya nalauya mino-loko nowuniyoko, ele elewole okaka galalimoya alika wehe loko soto piye.  
\v 24 Ito Mosesekaho lo hukoko libo galimoya wehe loko minokaka anuwa maya lolo oko ujapa oleto-loko wiboto minuniyoko, Kalaestitoka lilime molokaiyoko, elewole oko eludanaki lihimate suwokadeko minakolune.  
\v 25 Lemoya elewole oko elekaka anuwaya soto pekaiyoko, yalo maya li jeko nowuniyoko, lilime wewesokakamidana adeu maya molamiye.  
\v 26 Ito edimoya olotiya Jisesi Kalaestikumuya elewole iki elebokumuye liki muki numuto namatoya Omaimidana wewenala lolo iki minae.  
\v 27 Noku udikikiya Jisesi Kalaestida emeke moliki upalo nesakidana epa mutiwala maya aloya li kolikae.  
\v 28 Sa-onenako, yamuya Juda wewena minabo ito hetoka wewena minaboya, meusa oluho lolo iki elekele iki minabo ito aha minikaka niaboya, we menaya aito aito minikaka abo nesa maya alo suwokaiyoko, muki wewenalitaya Jisesi Kalaestitokago wikiki makoko wewena lolo ikae.  
\v 29 Sa-ikiki Kalaestida oluhola lolo abo maya nenako, Aebalahamuda awopilalale yuha wehe liki lolo iki miniki Aebalahamuda uvaminala le ohetatuwe loko lo moloetaibo nesa mukiya edimo nesatipo lolo ekolaiye.  
\pi1 \bd 29\bd* Rom 4:13   
\c 4  
\s1 Koha moloko ga.  
\p
\v 1 Yamidana monawaya koha moloko ga makoya neyo, elilo. Oluho aida makolimo ahola helekadeko uvaminala litiboya, aholaya aha nedeko meusa oluhokidana aweyaha oko minakolaiye.  
\v 2 Sa-ideko, yatolalesiyahe ito aholada unala ipalalesiya ujapa itiki minakilae. Sakiya ujapa iti-minadeko, aya oluhoma napa leko elewole okoko aholakaho lo molaibo onawa maya nisideko aya uvaminalama litibo ne.  
\v 3 Sa-onenako, lemoya hapa yeikalaya ayamidana oko monokauya olopa wewena lolo oko minamoko, mikamidana mupilalo suwa omai lolo okoko ya nesamidana elekele oetoko minudawo ne.  
\v 4 Sakoya minuniyoko, alikaya molaibo onawama alili okaiyoko, Omaimamo ipalada maya oli hiyoko, lemeko mena makomidana ohumanau minokoko etaiyoko soto pibo ne. Sakoya soto pekoko Mosesekaho lo hukoko libo gamidana elekele oetoko nebo ne.  
\v 5 Lemoya lo hukoko libo gamidana nalalauti olutoletokadeko, Omailimoya lilime sa-etiye loko Omaimidana ipala maya soto pibo ne.  
\v 6 Ito edimoya Omaimidana oluhola lolo iki minabokumuye loko Omaimidana ipalamidana weuna oluho dukau oli hekaiyoko, lemeko neyoko, emo elewoleyalaloti we abao ahone loko lokaka noune.  
\v 7 Sa-onenako, lemoya yamidana meusa oluho minamune, Omaimidana oluhola minune. Ito eimola ipala minadawokumuye loko eimola nasahililalo uvaminaka litadawo ito sainaka wavu-leko litadawo we lolo oko minokaka noane.  
\pi1 \bd 5\bd* Lom 8:15-17   
\s1 Polo maya Galaisiya wewenamu miluma elibo.  
\p
\v 8 Hetoka wewenalitaya hapa yeikalaya Omaimu elamiki suwa-sawa omaimidana lipi mikakamidana nalalau minadanaki, elekele itiki minae.  
\v 9 Saboma neboya, oloti maya Omaimidana monawala mudai wehe nilae. Sa-iminayoko nenako, olotiya wehe loko Omailimoya mudalido-loko noyowiye. Sa-okaiyoko, aha nesa ulawa minamibo ito abuhala minamibo nesaya nenahamuya li dowisaloka molikiki elekele itiki minatae.  
\v 10 Sakiya mini-liki niwadanaki Omailimo lepoka letiye liki aito aito onawalo ito ukato ito melekelo holiya minikaka niae.  
\v 11 Sa-niayoko, yowanunelimo edimotokaya ihilawa jametihe loko eloyoko, edane nelokaka noiye.   
\p
\v 12 Wewenanele yuhase, nene loko letuyo. Edimokidana sako Mosesekaho lo hukoko libo gautiya nilime olutokaiyoko minobo ne. Sa-ominoyo, edimokiya asaiki sa-ilo. Edimoki alo omutoko magoina mino-loko nowudaki Mosesekaho lo hukoko libo ga mukiya emesalo molamobo ne, edimo emesalo molamabomidana. Aya onawaloya edimo nilimi dowa lae.  
\v 13 Hapa yeikalaya miluma nesa jelekoko adaya api oko gala lalo maya lo libobo ne liki alo eli-minaboma ne.  
\v 14 Ito nupauya sogotamoko eda nelaiboya, yamuya osele delamibo ne. Sa-obo nesa maya mudai-miniki lesa ju li nemeboya, Jisesi Kalaestihe ito okananipoki wesida ju li bebo ilekaiye.  
\v 15 Sa-ikiya ya yupekaya elowa jiki minikaka aboma neboya, olotiya nakahauka wahelae. Edimoya monawatipoya wehe libokumuya lo libekoloyo, elilo. Edimoya domudatipoya nemoda nilimetune liki letidanako aha nemetine.  
\v 16 Ito olotiya wehe lonebo gaya lo libe libe noboya, ulatipolo we lolo okohe.  
\v 17 Maloka wewenasiya depoka likaka niaboya, saina lalomuya lamae. Lilime yolalo malo ilitadeko nemodaya oli initikiki edimodaya dulinipo li sawa jitae liki dabuha molikaka niae.  
\v 18 Saina lalomugoya depoka lokaka nesaya wehe loko nesa ne. Edimoki woko minobo yupekago minamiye. Muki yupekaya lolo ikaka ideko woko wehe lekolaiye.  
\v 19 Oluhonele, edimokumuye loko ohaya miluma napa-napa noeloe. Menakipasiya oluho etakili miluma elikaka niabokidana milumatipo noeloe. Kalaestida mona-hanawala maya edimotoka soto pitiye loko edimokumuya miluma napa-napa noeloe.  
\v 20 Edimoda nata keke oko edimo dowisaloya enemane oko woko aitomidana oko hulu oko gaya lo libituwe loko elekaka noe.   
\s1 Mena lowe Hegako ito Selakosito koha moloko libo ga.  
\p
\v 21 Edimo Mosesekaho lo hukoko libo gamidana iguka minatune liki likaka niabosidaya loka olibetatuyo, li nimilo: Edimoya lo hukoko libo gamidana luhuwa maya lepi-minabomidana monawa elamahe.  
\v 22 Yauya Aebalahamuya ipala lowe etone liki luhuwa ji-minaboma ne. Makoya elekele oluwa elekele olu Hegakaho etaiye, ito makoya huki mebo mena Selakaho etaiye.  
\v 23 Elekele olumamo etaibo oluhoya uliwa Isimaeloya aha yatoka soto pibo ne. Ito huki mebo menamamo etaibo oluho uliwa Aesikidaya Omailimo lo molaiboto oluho etaibo ne.  
\v 24 Ya gamidana ukauya ga mako koha moloko ga sa-loko ne: Aya mena lowesiya hapa le koheko libo ga lowemidana aweyaha minaiye. Le koheko mako Saenai bolau soto pibo gamidana iguka minabo wewenasi lo hukoko libo gamidana elekele itiki minikaka niae. Elekele olu Hegaya aya gamidana le aweyaha iye.  
\v 25 Ito Alabiya ebakuka Sainae bolamuya Hegada bolalae liki likaka niae. Ito Hegaya Jelusalemu oloti aha nebo ebamidana aweyaha ne. Jelusalemuya Mosesekaho lo hukoko libo gamidana emesalo moloko minatudawoya Omaimidana omudalo wehe loko minatune liki aya gamidana iguka minabo wewenasida oto ebanipo ne.  
\v 26 Ito okulumau nebo Jelusalemuya huki mebo mena Selada aweyaha oko ne. Sa-onenako, ya ebato wetudawo wewenaya Mosesekaho lo hukobo gamidana nalau minamune. Sa-onenako, aya ebalimoya doteya lolo one.  
\v 27 Yamuya monoka bukuguya luhuwa mako sa-liki ji-minabo ne:  
\q1 Edimoya Jelusalemuga minabo menakipaya, mulutipouya elowa jilo. Olotiya namopa mena minae. Miluma nielebo menakipoya, edimoya elowa jiki minatabo ne. Yu makoya oluhotipo wavu-liki etakilae.   
\p
\v 28 Wewenanele yuhase, lemoya Aesikikidana oko Omailimo lo molaiboto soto pune.  
\v 29 Aha yatoka soto pibo we Isimaeloya Omaimidana weuna oluholimo liboto soto pibo we Aesikida lowa ulalalo we lolo oetoko lahelamibo nesa lolo oetaiye. Olotiyakiya aya nesa maya soto piyoko, Mosesekaho lo hukoko libo galoya emesalo emesalo moliki yowanu nilebo wewenasiya lemo Omaimidana weuna oluholoti soto pudawo wewenaya lahelamibo nesa lolo ilitiki lowa ulatelo we lolo nilitae.  
\v 30 Sa-oneboya, monoka bukuguya nenae loko ne. Elekele olumidana ipalakahoya uvaminaloya ujapa ametiye. Huki mebo menamidana ipalakahoya eimolago litibo nenako, elekele agowe ipama dolate doli hikadeko wideyo, liki luhuwa ji-minabo ne. Yamuya Mosesekaho lo hukoko nebo ga muki emesalo molatae liki abuha moliki ga libikaka niabo wewenasidaya luwawautiboti doli hilo.  
\v 31 Sa-onenako, wewenanele yuhase, lemoya agowe menamamidana oluhola awopilala yuha minamune. Jisesidamuya ele elewole udawomuye loko huki mebo menamamidana oluholakidana minudanako, Omaimidana uvaminala maya lemote letudawo ne.  
\pi1 \bd 22\bd* Jen 16:15; Jen 21:2 \bd 27\bd* Aes 54:1 \bd 29\bd* Jen 21:9 \bd 30\bd* Jen 21:10   
\c 5  
\s1 Nalau minametune loko ga.  
\p
\v 1 Nalatipo minametibo minatae loko Kalaestimamo olutoletonebo ne. Sa-onebo neyo, maloka wewenasi Mosesekaho lo hukaibo gauya dilipe moloko nala jetune liki nilideko maya, o'e liki elewole ilo.  
\v 2 Nemoya Polomamo lo noliboyo, elilo. Dupalokaya Omaimidana anela netiye liki eli bitaboya, Kalaestida nasahilila maya woko aha nesatipo lolo okatiye.  
\v 3 Akuya esewau leko wehe loko lo libituyo, elilo. Edimoya Omaimidana anewa lupatelo moludawomuye loko Omaimidana wewenala lolo udawo ne loko noladawolikaya, lo hukoko libo ga malokaya dupalo yowekadeko, emeke emeke iki yowanu li-liki witabo nesa ne.  
\v 4 Ito lo hukaibo galoya ele lekoko lihimate suwokadeko minatune liki nilabo wewenalitaya Kalaestida mutihina iki onuwa nikaka abo maya pasikadanaki Jisesida nasahililama aloya hulikae.  
\v 5 Ito lemoya Omaimidana weuna oluho abuhalaloti ele elewole udawomuye loko lihimate suwokadeko minatune loko yamidana uvaminala letune loko ewa oko ubolo o-minune.  
\v 6 Jisesi Kalaestitoka woko ometudawoya Omaimidana anelaki minokaka ito minamibo minokakakiya muki le nupa napa oko wehe loko ulawa minamibo hutuwae loko letune. Jisesidamu ele elewole okaka nesaya lukau minokadeko, lukaya wewenatelesida molobetatudawoya wehe loko ne loko lekolune.   
\p
\v 7 Edimoya monoka anuwa maya wati iki li-liki niwayoko, wewena makolimo niseko anuwa heko li lolibikaiyoko, nenaha iyoko Jisesida ga laloya demesa mikaka niae.  
\v 8 Ju libo wemamoya ula moloko sa-ilo loko lolibetokaka amiye.  
\v 9 Jamidana silinalotiya ekesa nesa lasolasi mako nebolimoya muki nodenesauka ekesa oko suwokaka noiye.  
\v 10 Sa-okaka noiyoko, edimoya nemo niyakauya nemesalo molatae loboya eda amideko aha molatabo nesa leneyoko noloe. We napaloka woko omudawoe loko Omaimidana anela maya dupaloka netibokumu nemo noelobo nesa leko edimoki elitaboya woko ilitekolaiye loko eloe. Ito olohalimo dilipe opa okaka noinako, lihima napa lekolaiye.  
\v 11 Wewenanele yuhase, nemoya dupalo Omaimidana anelaki minatae loko api-napi obo minatidanako, lahelamibo nesaya lolo initametine. Omaimidana anela dupalo netiye loko lo libekogo minatidanako, Jisesi maya yoho yaha yalo helibomidana gala laloya lo libe libe oko minobomuya mukaha data kametine.  
\v 12 Dilipi opa ikaka niabo wewenasiya edimonipo dupanipo esuwawa minatanako. Sa-ikadeko monoka wewenasidaya luwawanipoutiya doli hi hulatabo ne.   
\p
\v 13 Wewenanele yuhase, nalau minamitae loko Omailimo lesa molo libibo maya ne. Sa-oneboya, nalau minamayoko dupalimo dumu helekaka noibo nesamidana elekele itamilo. Emo uka mideko emo uka mideko iki emo nasahili oetadeko emo nasahili oetadeko iki you liki minalo.  
\v 14 Mosesekaho lo hukoko libo gaya le nupa oko monoka bukuguya sa-loko ne: Emokamu elekaka noadawo nesa leko iwekalesidamuya eleko uka bo.  
\v 15 Edimoya yamidana amiki emo okohimi oetadeko emo okohimi oetadeko ikiki wiki latila ikatae loko data leko noloe.  
\pi1 \bd 9\bd* 1 Kol 5:6 \bd 14\bd* Liv 19:18   
\s1 Asehawa lukamidana ula nesala ito Omamidana weuna oluhomidana ula nesala.  
\p
\v 16 Ga nolobomidana monawaya sako ne: Edimoya Omaimidana weuna oluholimo letibotoka molatibotoka iki emesalo moli-liki wilo. Sa-ikikiya asehawa dukalimo umu helekaka noibo nesamidana yowanuwa lamilo.  
\v 17 Asehawa dukalimo elaibo nesalimoya Omamidana weuna oluhomidana lowa moila he mekaka noiye. Ito weuna oluho elaibo nesalimoya asehawa lukamidana lowa moila he mekaka noiye. Sa-ikiya lowa-sawa ikaiyoko, edimoya saina mako lolo esiye liki laibo nesa maya moletiki lolo amae.  
\v 18 Weuna oluholimo dilipitiboya Mosesekaho lo hukoko libo galimo dilipe duliki we lolo amekolaiye.  
\v 19 Asehawa lukamidana yowanulaya haluku nesa minamiye. Sakoya soto pekaka noiye: We olisa mena olisa, ito lahelamibo nesa, huma nesa, lupamidana ilime owana helekaka nesa,  
\v 20 luweha nesamidana epoka lokaka nesa, ito iheda yahameda nesa, ito lowa-sawa nesa, ito ma yamidana sa-etudawolae liki duka kohaidikaka nesa, ito depalo molokaka nesa, ito duliki we lolo etune liki edimonipo dukanipo liki yowikaka nesa, ito mini maloka maloka iki lowa hikaka nesa,  
\v 21 ito mukaha nesa, ito ekesa no wavu-liki nikaka nesaya, ito nodenesamidana eli miki nikaka nesa, ito maloka lahelamibo nesa lolo ikaka niabokumuya alo hapa lo libekobo maya ne. Sakobo maya neboya, akuya data leko lo noliboe. Aya lahelamibo nesa lolo itabo wewenaya Omaimidana ebalau yowamikilae.  
\v 22 Ito Omaimidana weuna oluholimoya ula nesa sakoya le soto noiye: Wewena nasahili obetoko luka bekaka, ito muluteu aila uluma silekaka, hulu oko minokaka, aito wewenasida dilipe lalo okaka, luka laloki minoko elewole oko emesalo molokakamidana,  
\v 23 ito lemeko you loko minokaka, ito lupaloya ujapa okaka nesaya pelesa jekoko anuwaya li lokoki minamiye.  
\v 24 Ito Jisesi Kalaestida wewenala yuha lemoya asehawa lukalimo umu helekaka nesaya, lahelamibo nesamuya, abuha molokaka nesa maya koha helekuniyoko, woko aha nesa lolo okaka noibo ne.  
\v 25 Omaimidana weuna oluho elewoleyalaloya minokaka noudanako, weuna oluhomidana iyakau mijeko wetune.  
\v 26 Lupa leko yowekoko emo ipisokadeko emo ipisokadeko nouniyoko, maloka wewenasida mulunipouka lahelametibo nesaya lolo amekulo. Ito emo mideko emo mideko oko demega lametune.  
\pi1 \bd 17\bd* Lom 7:15-23   
\c 6  
\s1 Edawaki nesalo maya emo he elowo oetadeko emo he elowo oetadeko etune.  
\p
\v 1 Wewenanele yuhase, edimokutiya wewena makolimo lihima litibomidana elehulau minatiboma, edimo Omaimidana weuna oluhoki minabolitaya dukau hulu ideko ilimi wehe lilo. Sa-nikiya edimoda mimi itabokumu limiki udikatayo, ujapa ilo.  
\v 2 Eda delokaka noibo nesamuya emo ilimekadeko emo ilimekadeko iki miniki Kalaestikaho lo hukaibo gaya wati iki emesalo molalo.  
\v 3 Maloka wewena duli minametibo wewenasiya edimodamuya elideko yowitiboya, edimonipo dukamidana okepa jideko sa-ekolaiye.  
\v 4-5 Ito yowanumidana edawaki nesala maya aloya ona molokaiyoko, muki wewenalikaya aya nesamidana aholago lolo okoko minudanako, edimoya makoko makoko iki monawatipoya li wehe lilo. Monawahenatipomuya ohu jikaka nesaya soto pitiboya, edimotipo iki moliki itabolimoya monawatipo soto pekolaiye. Wewena makomidana monawalamuya moli eliki elowa jamilo.   
\p
\v 6 Ito monoka elikaka niabo wewenalikaya, monoka api-napi ilibitikaka niabo wesidaya ehadahena ito muki nesahenaya ona moliki bitaboya watiyone.   
\p
\v 7 Edimoya dukatipomidana okepa jamilo. Omaimidanaya okepa jikaka nesa minamiye. Wewena makolita yowanu litaboya miniki aya nesamidana ihilawa likilae.  
\v 8 Wewena makolitaya, minoko asehawa ukalotiya yowanu litadawoya, alikaya asehawa ukamidana ihilawaya tolowa okakawaya le soto molakolane. Ito wewena makolitaya, Omaimidana weuna oluho yowanula litadawoya, minoko alikaya epa mutiwa suwametiboya lekolane.  
\v 9 Saina lalomamuya osele-pasele amoko abuha moloko yowanuwa lekulo. Udoikoko minametudawoya Omailimo molaibo onawaloya meinawa le soto molakolune.  
\v 10 Sa-onenako, oloti maya onawate nebotogoya muki wewenasida nasahili obetatune. Sakoya monoka wewenatelesida maya dilipe yowalo moloko sa-obetatune.   
\s1 Data leko eke lobetaibo.  
\p
\v 11 Olotiya luhuwa jekaka oijo maya luhuwa jekaka wemidana adeloti leko luhuwa napamidana neimone nadeloti luhuwa nojobo maya mudalo.  
\v 12 Maloka wewenasi dupalimo monoka weunipo lolo okaiyoko, dupatipoloka Omaimidana anela netiye liki dabuha molikaka niae. Edimo dupalokaya Omaimidana anela minamiboto Kalaesti maya yoho yaha yalo helibo galimogoya lahelamibo nesauti lilimitiye loko letudawoya, lahelamibo nesaya lolo ilitatabo ne liki eleyoko, edawaki molokaiyoko nenako, maya nesaya lolo ikaka niae.  
\v 13 Dupalo Omaimidana anela molikaka niabo wewena malokasiya Mosesekaho lo hukoko libo ga maya edimonipo emesalo molamiki edimosida dupa hukiki aneya molibikadeko edimoya eli likadeko dupanipoya liki yowikili elikaka niae.  
\v 14 Nemoya yamidana mamidana nesamuya nupa leko yoweko lamoe. We napa Jisesi Kalaestiya yoho yaha yalo helibomidana gawagoya epoka lokaka noe. Yamuye loko ma mikauka nesahena hulupa jekoko uli jekaka noibo nesamuya lametuwe. Jisesiya yoho yaha yalo helibomuye loko maya mikauka nesahenaloya nemo hele-minobo nenako, ula molamekolaiye. Ito yoho yaha yalo helibo nesamuye loko nelaibo nesahenaya edimotoka minamiyoko, ma mikau monoka elamabo wewenasi data keboya helebo ilene.  
\v 15 Ito lupaloya Omaimidana anelaki minokakahe, ito minamokaka nesaya wehe loko ihila nesa minamiye. Ohatama lepa mutiwaki minokaka nesaya wehe loko ihila nesa ne.  
\v 16 Aya anuguya wikaka niabo wewenasitokaya Omailokati hulu ito uka lalo libitibo nesaya mino-loko yoweko netiye. Sa-ideko, Omamidana wewenala muki numuto namato wewenaloya netiye.   
\p
\v 17 Jisesida ga laloya wewenasida lo bekaka noudawomuye loko lahelamibo nesa lolo initiki kohanelikayoko, nemodaya hulane maya neyoko, yalimoya nemo Jisesida elekele wela minobomidana monawa maya soto pekaka noibo nenako, ga maya lo nolibobomidana yoweko mupilaloya wewena makolimo aku edawaki yowanu nemamideyo.   
\p
\v 18 Wewenanele yuhase, We napate Jisesi Kalaestida nasahililamoya dukau mino-loko woko minadeyo. Watiyae.