\id COL NT0013.CO1 YAWEYUHA DEIBLERS TFR DP-DEC 21-APR-86 
\h KOLOSIYONI 
\toc1 Kolosiyoni wewenasida luhuwa Polokaho je bibo 
\toc2 KOLOSIYONI 
\mt1 Kolosiyoni wewenasida luhuwa Polokaho je bibo  
\c 1  
\s1 Kolosiyoni wewenasida maku beko luhuwa je bibo ga.  
\p
\v 1 Nemo Polokahoya Omaimidana galalo Jisesi Kalaestida aposolola lolo obo we wewenane Timotiteya magoina minoidanaki,  
\v 2 Kolosiyoni numutoka monoka elebo wewenateleya elewole iki Kalaestitoka koliki minabo wewenalita, luhuwa nesa maya jeko noliboe. Ahote Omailokati nasahili ito huluya edimotoka minowa minowa oko netiye.   
\s1 Kolosiyoni wewenamu Omailoka libo.  
\p
\v 3-5 Edimotokaya Kalaestida ga watiya ito elewoleya maya soto pekaiyoko okulumau elewole monokamidana uvaminala edimokumuye loko hapa mololibetaibomu elikadanaki, aya uvamina maya letune liki ewa iki minabokumuya, edimo Jisesi Kalaestikumu eli elewole ikaka niabo nesa, ito monoka wewena mukisiya dukatipo bikaka niabo nesamuya elekodanaki, edimokumuye loko Omailoka nomuda likokaka noibo yupekaya We napate Jisesi Kalaestida ahola Omaidaya epoka lokaka noiye.  
\v 6 Ga lalo maya numuto namato soto pe-loko woko ihilawa maya soto pekaka noiboya Omaimidana nasahililaya edimotoka ada api oko nisekaiyoko, watiyaloti eli wehe likadanaki, ya onawalotiya edimotoka asako ihilawa soto pe-loko wokaka noiye.  
\v 7 Wewenate makoko yowanu le emesalo moloko lekaka we Epapalasikahoya lemokumuye loko Kalaestida elekele oluhola lalo emokaho aya ga lalo maya alo lo libekaiyoko eli-minabo ne.  
\v 8 Ito emogoya Omaimidana weuna oluholimo dilipe olo liyoko, duka emo miyoko emo miyoko ikaka niabo gawa maya alo elekadanaki, niseko lo lemekaiye.   
\p
\v 9 Sa-oneboya, lemo gatipo laloya elekoidanaki, ayalo api oko Omailimo elekakatipo maya le napa okadeko letibotoka molatibotoka iki emesalo moli-liki wiki weuna oluholimo ele wehe lokaka gala eli wehe liki elitae loko Omailoka nomuda likokaka minoiye.  
\v 10 Ito edimosiya miniki iki moliki itabolimo monawatipo le soto molokadeko, We napalimo mudadeko wehe letiye, ito monokauya yowanu aito-aitomidana ni-liki yamidana ihilawa maya li soto molatae. Ito sa-nikiya Omaimidana monawala maya eli wehe liki eliki minatae.  
\v 11 Sa-nikiya Omaimidana abuha-wowola oliwakilimoya dilipe elewole okadeko, dupalo edawaki nesa makolimo oloto molatiboya wiki udamiki moletiki aya nesa maya li ohikiki mulutipou aila uluma silideko minatae loko Omailoka lomudate likokaka noiye.  
\v 12 Ito ahotekahoya emo lamedalamidana uvaminala mololetaiboya edimo monoka eli-minabo wewenakiya li eto eto itae loko le lolowa oko mololibetaibolimoya mulutipou lahelepa ideko epoka liki minalo.  
\v 13 Omailimoya lubu aholamidana abuha-wowolaloti dilimekadanaki umula helibo ipalamidana ujapa oletokaka abuha-wowolo lilime molaiye.  
\v 14 Emo ipalakahoya lahelamibo nesate maya nokalawe oletokaiboya, olisatekiya lilimidanaki meina heletaiye.  
\pi1 \bd 7\bd* Kol 4:12; Pai 23 \bd 14\bd* Ipi 1:17   
\s1 Kalaestida weunaki ito yowanulaki.  
\p
\v 15 Ipalamoya muda-elamudawo we Omaimidana weunaki soto pidanaki muki nesasida asebetoko nebo we maya ne.  
\v 16 Sa-okadanaki, eimola yowanulauti minokakaloya muki nesa okulumalo ito maya mikalo le soto molo suwiye. Mudamodemidana nesa ito mudaokakamidana nesaya maya mikauka wewenahe ito okananipoki wehe abuha-wowolakiya makoko aweyaha oko nebo nesa ito abuha-wowola yoweko nebohe ito duliki we minabo mukiya eimola abuha-wowolalo soto pebo ne. Sakiya soto pebo nesa mukiya emola nesala lolo itae loko liyoko soto peboma ne.  
\v 17 Ito sa-iboya, aya muki nesahena yatokaya owaha soto pamiyoko, ipalakahoya hapa yeikamaloti mino-loko woko minonebo we ne. Sa-onebo we nenako, muki nesahenaya emola abuha-wowolalo koloko nebo we maya ne.  
\v 18 Ito aya weya lemo ila adela lolo oko minudawo wewena madoteya lolo oko ne. Sa-noidanaki api okaka ito wewena hele-minokakakuti le omutoko momoga oko sinokaka ahola nedanaki, yatoka nesamidana ahodawa lolo oko ne.  
\v 19 Omaimidana weuna hanalaya ipalaloka koloko netiye loko lokaiyoko,  
\v 20 okulumaloka ito maya mikauka muki nesaya Omailimo eimolaki aku lilime kolatiye loko loetokaiyoko, emokaho yoho yaha yalo oladala kisidanaki le eha jeko muki nesasida ahodawanipo lolo iye.   
\p
\v 21 Edimoya hapaya Omaiki koliki minamiki ulalalo we lolo iki miniki, demesa mikadanaki, lahelamibo nesa aito-aitomidana nesa lolo iki minikaka aboma ne.  
\v 22 Sa-iki minaboma neboya, olotiya Kalaesti helibo upalimo hulu maya le libekaiyoko, dukauya uluwitoneyoko eto iki Omaimidana omudaloya lihimatipo suwokadeko minatae loko akuya Omaiki dilipe kolaibo ne.  
\v 23 Ito yamuya eli elewole ikakakuya elewole iki miniki luhawatipo li ikitiminadeko, Kalaestida gala laloya eliki elewole monoka uvamina li lolowa ikaka nesa le soto mololibetaiboya woko opa okatiye. Sa-okatiyo, humakidana mini lagoli iki sini-minalo. Aya ga lalo maya alo li libikayoko eleboya, ma edimogo minamiye. Numuto namato wewenasida li bi-liki wi-minabo gala maya nemo Poloya yamidana elekele oluhola lolo oko minoe.  
\pi1 \bd 18\bd* Ipi 1:22-23 \bd 20\bd* Ipi 2:16   
\s1 Polo maya monoka elebo wewenasida elekelewanipo lolo oko nebo.  
\p
\v 24 Nemoya olotiya edimokumuye loko miluma eleko minoe. Sakoya miluma eleko minobolimoya nukauka lahelepa adoha noiye. Jisesida upalamidana ila adela lolo iki miniki monoka nielebo wewenalitaya edimokumuye loko Kalaesti maya miluma-aluma elibo ne. Sa-onebo nenako, ya milumamidana aisawaloka kolo meko miluma elekaka nesaya nemoto nisekaiyoko, le suwetubo yowanuya noloe.  
\v 25 Nemoya Omaimidana gala maya heko hutili o-loko wetiye loko monoka elebo wewenasida elekelenipo minodanaki, edimotoka Omailimo epalauti libo gawa maya lo libemo lo libemo nowoko lo suwetane loko nilime molaibo ne.  
\v 26 Wewenaya mini-liki mini-liki yoweyoko aya suna gamidana emesawaya wewenasi elamitae loko suna oko minokaiyoko, elamoko aha minudawoya, oloti onawalo wewenala yuha le wesama oko lo lemekaibo maya ne.  
\v 27 Ito hetoka wewenamu saina esewa waitoko nebo monoka eludawo wewenalokaya sa-loko lo soto moloko lo lemekaiye: Haluku gamidana ihilawaya sa-loko ne: Kalaestikahoya lemo lukau minokaka noibomuye liki okulumau elewole uvaminamuya letune liki elikiki ubolo minikaka niae.  
\v 28 Emo monawalaya numuto namato wewenasida lo soto moloko lo bekaka noudawoya Kalaestida wewenala ulawa lolo iki emotoka koliki dukamo monokau napa omo yoweko elewole oko netiye loko ele wehe lokakadunu data leko api-napi obikaka noune.  
\v 29 Emo abuha-wowola napa napalimoya nemoda nilime elewole onetokaiyoko yowanula maya nabuha moloko lekaka noe.   
\c 2  
\p
\v 1 Nemoya ga lo libituyo, elilo. Edimo minabo, ito Laudisiya numutoka wewena minabo, ito maloka nokepa mudamabo wewena, edimokumuye loko yowanu le-loko nowoboya lasola yowanu lamoe.  
\v 2 Edimokiya dukadunu dabuha moliki duka emo mideko emo mideko iki ouna jiki muki nesamuya eli wehe likiki Omaimidana sunauka galamidana monawaya Kalaestidamukiya eli wehe likiki wiki yalokaya koliki minatae loko yowanu lekaka noe.  
\v 3 Emotokaya dukau luhuwa soto pekakamidana ele wehe lokakamidana uvaminala maya halukonebo maya ne.  
\v 4 Wewena makolimo dumu helitibo ga mako lo libekadeko, duka woko opa okatiye loko ga maya lo noliboe.  
\v 5 Sa-iboya, yatoka nesaya nenahamuye. Hotoya minoko neimone nukadunu edimoki minodanaki edimoya Kalaestikumu eli elewole adanaki koli lalo iki elewole iki minayoko, mudalidokoko muluneuka lahelepa okaka noiye.   
\s1 Kalaestitoka kolatudawoya lukamu saina-maina ohu jametudawo ne.  
\p
\v 6 Sa-onebo nenako, edimo Jisesi Kalaestiya We napatipo netiye liki li-minabo maya nenako, emotokaya wiki koliki minalo.  
\v 7 Sa-ikikiya emotoka luhawatipo jekadeko koliki minatae. Ito monoka anuwa dilipebotogo niwiki lo libibo nesamuya epoka likaka iki minatabo nesalimoya dukau waitoko minadeyo.   
\p
\v 8 Wewena makolimoya wewenasitokati elekaka ga ito dokepa jekaka ga mako lo libekadeko maya, aya galoya elikiki ayamidana wewena lolo ikatae. Sa-ikatayo, ujapa iki minalo. Ayamidana gaya ahotelesida dukauti soto pekaiyoko mini-liki yowebotokaya ga monawa likaka abotoya ne. Sa-ikaka aboto nenako, yaya Kalaestida gala minamiye.  
\v 9 Eli-minahe. Omaimidana aweyahaloya mukilo Kalaestida ila adela upala mukiya mino liki loko ne.  
\v 10 Ito edimoya Jisesitoka wiki kolabomuye loko dukalimo saina makomu ohu jamekolaiye. Emokahoya dupalo mudamo okaka nesa ito duliki minabo nesa mukisida madonipoya lolo oko ne.  
\v 11 Sa-onenako, edimoya emotoka kolikayoko, dukauka Kalaestida luhuwala maya ne. Wewenalita dadeloti dupaloka luhuwa jikakawaya minamiye. Asehawa iki moliki ikaka abo nesaya suwatiki hulikadanaki Kalaestitoka wiki ohatama lolo ikaboma ne.  
\v 12 Yamuya noku udiki Jisesi helibokuya koliminaboma ne. Sa-ikayoko, Omaimidana abuha-wowolaloti Kalaestida ilime sinaibo abuha-wowolamu eli elewole ikayoko, ohatama weutipoki iki moliki itaboto kolo libituwe loko dilipe sinaibo maya ne.  
\v 13 Ito edimoya hapa dukau ito dupaloya Omaimidana anela minamibo minadanaki lahelamibo nesa opa-napa lolo iki minabomuye loko duka helibo minayoko Omaikaho lihimawatipo le hulokadanaki, Kalaestidaki dilipe sinaibo maya ne.  
\v 14 Sa-okadanaki, ga pelesa jekaka udawomu obi oletatue loko luhuwa je molaibo maya uliyeko le hulokadanaki, yatoka nesamidana lihimala le nupa okadanaki, yoho yaha yalo tekaiyoko woko aha nesa lolo okaibo maya ne.  
\v 15 Sa-idanaki, ulinipoki wewena ito abuha-wowonipoki wewena lolo abo wewenasida abuha-wowonipo maya le aha nesa lolo obetokoko dadelo leko niseko moletiki minatae loko muki wewenasida domudalo maya hulobetokaiyoko yowikiki limikiki iki minayoko, asebetaibomidana monawa maya le soto molobetokaibo maya ne.   
\p
\v 16 Sa-onebo maya nenako, yamuya nodenesamuhe, ito no nokaka nesamuhe, ito ukadamidana holiwalamuhe, ito eto onebo holi mako minokakamuhe, ito minamokakamuhe, wewena makolimo yatoka nesamuye loko hukolibetatibomuya eli mamilo.  
\v 17 Yatoka nesamuya aha nesa ne loko letune. Saina ihilawaya alika soto pekolo aha amamunawa nonisiye loko letune. Sa-onenako, saina ihilawaya Kalaestitoka soto peko ne.  
\v 18 Maloka wewenasiya lukate mino wili jekaiyoko sainahena muda wehe lokaka udawomuye liki mimi iki edimosi iki moliki abomidana iki miniki okananipoki wewenasida monoka li bitae liki data likadeko maya, yamuya ga lalo ne liki elamilo. Aha data elikakawaya neboya, ahamuya dupa liki yowikaka niae. Yamidana wewenasiya monoka ihilawatipo maya hipo ilibitikatae.  
\v 19 Yamidana wewenaya Kalaestitoka kolabo maya aku wina ikae. Emoya madoteya lolo oko neyoko, lemoya ila adela minune. Sakoya nenako, ade lukanalimoya lilimekoko luhawate maya le ilitoletaiye. Sakoya le mutiheletoko ujapa oletaidanaki neyoko, abuha-wowo maya Omailokati lekudanaki soto pe napa o-loko wokaka noune.  
\pi1 \bd 12\bd* Lom 6:4 \bd 13\bd* Ipi 2:1-5 \bd 14\bd* Ipi 2:15 \bd 16\bd* Lom 14:1-6  
\pi1 \bd 19\bd* Ipi 4:16   
\s1 Kalaesti maya heliboto kolokoko lukate helenebokuti sinokune.  
\p
\v 20 Kalaesti helibotoya edimosi koli miki ga monawa li libikaka nitaboto demesa miminatabo maya, nenahamu maya mikamidana numuda ahola minune liki labo wewenasi li hukabo galoya elekele ikaka niae.  
\v 21 Li hukabo ga maya sa-loko ne: Maya nodenesaloya ade lamo. Ito leko namo. Ito no elamo. Liki yamidana gaya liki ebili sikaka niabomuya noloe.  
\v 22 Ito lade leko nokuniyoko, woko suwokaka noibo nesamugoya liki hoipa ikaka niae. Wewenasi yatokaya data eleboto li nupa iki likaka niae.  
\v 23 Ga mako sa-loko nebo gaya eli likaka niabo wewenasiya edimonipomugo adoha nesa liki elikadanaki luhuwaki wewena minune liki dupanipo li eto ikadanaki miniki suwa nesa liki dupa liki limiki molikayoko, ele wehe lokaka ga ihilawakidana lolo okaiboya, yamidana nesaya wehe loko ula nesa minamiye. Yamidana ga li hukaboya, lupamo umu helekaka nesamidana anula ma voetamekolaiye.   
\c 3  
\p
\v 1 Kalaestikaho helenebokuti momoga oko sinaibomidana iki edimo duka helenebokuti sinabolasiya sotoloka Omaimidana ade lamawakaloka Kalaestiya ukulamau nebotoka nebo nesamugo data liketiki minalo.  
\v 2 Maya mikauka nebo nesamu nehekala, yowaloka nebo nesamugoya data ki moliki minalo.  
\v 3 Edimo maya mikauka lahelamibo nesamuya helebo wewena lolo i-minabo nenako, lahelamibo nesa makolimo aku dilipe sinamekolaiye. Ito miniki iki moliki itabomuya Kalaestileki wiki Omaimidana amaitoka haluki-minae.  
\v 4 Kalaestiya edimo miniki iki moliki abomidana monawaya nenako, emokahoya aku soto nopideko, edimokiya emo lamedala huwepalakiya ija jiki litae.  
\pi1 \bd 1\bd* Sam 110:1   
\s1 Asehawa lukalimo oko moloko ibo maya ololoha oko hulikudanaki ohatama lukate lekune.  
\p
\v 5 Sa-onebo nenako, yatoka nesamuya eto iki miniki dupamo umu helekaka noibo nesaya nuwama wibo nesa, huma jibo nesa, anulo monikaka nesa, aito wewenasi nesamu muda lahelepa okaka nesalimoya, suwa omaimidana emesalo molokaka nesa nenako, yamidana nesa maya huli hoto molalo.  
\v 6 Muki yatoka nesamuya Omailimo auha libo nesahenaya soto pekolaiye.  
\v 7 Sa-ibo nesa neboya, edimoya hapa yeikala ayamidana nesaya liminayoko dukatipoya lolo one.  
\v 8 Sa-onebo nesaya neyo, olotiya hulalo. Mukaha nesa, ito mesaha nesa, ito hokoliya nesa, ito lewo letowo okaka, ito nosamibo nesahenaya muki huli suwiki hulalo.  
\v 9 Asehawa dukalimo oko moloko ibo nesa muki ololoha iki hulikiki ohatama dukalimo letibotoka suwa ga maya li yolau mau amilo.  
\v 10 Omaimidana monawala maya eli wewesitae loko ohatama luka le soto molaibo welimo eimolakidana le ohatama oletokaka noiye.  
\v 11 Sa-okaka noiyoko, yamuya aito aito minudawo nesa maya alo suwokaibo ne. Sa-okaibo maya nenako, olotiya hetoka wewena, ito Juda wewena, lupaloka Omaimidana anela nebo minamibo, ito numutoka anakana wewena, ito sukulu liki sawe li-minabo wewena, elekele wewena, ito nala ohou minabolawa ito minamabolawayaki aito aito minamuniyoko, Kalaestikaho le nupa oko lemo We napate lolo okadanaki madonauya waitoko ne.   
\p
\v 12 Edimo Omaimidana wewenalalitaya eimola ukala libekoko dilipe eto iboma nenako, yamuya edimo duka bikaka, ito nasahili ibitikaka, ito duka laloki minikaka, ito duka liki limiki minikaka, ito duka li eha jiki minikaka nesalimoya onoweyatipo lolo ideko li olo jikiki minalo.  
\v 13 Edimoya hulu wewena miniki ito edimo luwawatipouya ga mako soto nopiyoko, maya We napamo lihimawatipo hulaibomidana edimokiya asaiki emo lihimala huladeko emo lihimala huladeko iki minalo.  
\v 14 Ito muki nesasida mupilanipoloya duka bitabolimo saina le nupa oko mutihekadeko mino makoko okoko epakiya netibo ne.  
\v 15 Sa-okadeko, Kalaestida hululalimo dukauya ujapa olibetadeyo. Aya hulu maya edimosi litae loko Omailimo dilipe eto okaiyoko, eimola wewenala yuha lolo i-minabo maya ne. Sa-okaka noibo maya neyo, le libekaka noibo nesamugoya epoka liki minalo.  
\v 16 Sa-okadeko, Kalaestida galalimoya edimo luwawatipouya he hutili oko minadeyo. Ito Omaimidana ele wehe lokaka nesa aito aitomidanaya emo lo mideko emo lo mideko iki api-napi iki emo ata lideko emo ata lideko iki minalo. Sa-nikiya Omaimidana weuna oluholimo dilipe olo lideko, dukadunu Omai epoka litiki monoka namahena liki elowa jiki Omaimidana li miki epoka liwa liwa iki minalo.  
\v 17 Ito depadunuhe ito dukadunuhe saina mako lolo-halo ikili maya, We napa Jisesida uliwama li sawa jikiki emo elewoleyalalotiya muki nesamu ahote Omaimidana epoka liki minalo.  
\pi1 \bd 9\bd* Ipi 4:22; Ipi 4:24 \bd 12\bd* Ipi 4:2 \bd 13\bd* Ipi 4:32 \bd 16\bd* Ipi 5:19-20   
\s1 Lemote dola aholalika elekele oluhola ulinipoki we ohatamamidana iki moliki itabo.  
\p
\v 18 Menakipalitaya edimo wautipolesida damaekuka limiki minalo. We napamidana wewenala lolo ikabo wewenalitaya sa-itaboya wehe lekolaiye.   
\p
\v 19 Welitaya edimo menatipolesidaya duka bilo. Ito elewole ga mako li bamilo.   
\p
\v 20 Ito edimo oluholitaya dotipole ahotipolesi litabo galo maya emesalo molalo. Sa-itaboya, We napalimo mudatiboya ukauka lahelepa ekolaiye.   
\p
\v 21 Ito dotipole ahotipolesiya oluhotipolesida osele delokatiye liki depalo molatibo nesama lolo ibitamilo.   
\p
\v 22 Ito edimo elekele welitaya, muki nesamuya maya mikauka duliki wetipolesida ganipoya eli lilo. Ito maloka wewenasiya mudaidadeko wati etiye liki nehekala, dukau auha minamideko, We napa Jisesikumu oli mikaka niabomuye liki litalo.  
\v 23 Muki yowanutipoya ujapa wetipodamugo nehekala, We napakumuye liki dukalimo olo lonedeko iki moliki italo.  
\v 24 Sa-likiya eli-minalo: Edimoya We napa Kalaestida elekele itikaka nianako, yamuya yowanumidana meinawaya okulumau elewole uvamina neboya We napalokati litabo ne.  
\v 25 Ito wewena malokasiya yowanuwa li opa iki litaboya, yamidana apila malokaya dupa delo wekolaiye. Omailokaya yowe-mina leme-mina oko nehekala, makoko aweyaha okogo lemekolaiye  
\pi1 \bd 18\bd* Ipi 5:22; 1 Pit 3:1 \bd 19\bd* Ipi 5:25; 1 Pit 3:7 \bd 20\bd* Ipi 6:1  
\pi1 \bd 21\bd* Ipi 6:4 \bd 22-25\bd* Ipi 5:6-8 \bd 25\bd* Ipi 6:9   
\c 4  
\p
\v 1 Duliki welitaya, elekele wetipolesida saina mako li opa ibitamilo. Li wehe likigo li bilo. Ito We napatipoya okulumau neyo, saina maya nolobomidana apila malokaya alika lemekolaiye liki eli-minalo.   
\s1 Aku esewau leko lobetaibo ga.  
\p
\v 2 Edimoya osele delamideko Omailoka domuda likiki minalo. Ito ujapa iki miniki saina libibo nesamuya epoka lika lika ikigo minalo.  
\v 3 Ito lemokumuya Omailoka lideko Omailimo monokamidana anula siyeletokadeko, Kalaestida halukuka gala maya lo soto moloko le wati oko letune. Aya gamuye liki nala numuku hulinitikayoko minoe.  
\v 4 Yamuya Omailoka liki li etoha initikadeko, nemoya yamidana gaya lokoyoko wehe letibomidana lo soto moloko lo bituwe.   
\p
\v 5 Omaimidana ohola monoka elamabo wewenakiya hotula-patula ikikima yatoka wewenakiya li obe likadeko, mijalauka maya yowitae liki moli eliki saina-maina maya eli wehe liki lolo ibitalo. Saina lalo lolo okaka onawa maya libitiboya mako woko aselibetamideyo.  
\v 6 Gatipoya ke likadeko wati etiye. Sa-onedeko, maloka wewenasiya yamidana mamidana nesamu li libiminaboto le wili jeko lo betune liki opa ga lamilo.  
\pi1 \bd 5\bd* Ipi 5:16   
\s1 Ekenipo lobetaibo.  
\p
\v 7 Nemo okaka nobo nesamu Tikikasikahoya lo libekolaiye. Emoya wewenate lalo We napamidana elekele oluhola yowanuya le emesalo moloko lekaka weya ne.  
\v 8 Emokahoya minokaka nobomidana gawaya wetome oko lo libekadeko, dukauka le hulu etiye loko edimotoka oli hekoyoko yaitaya nowiye.  
\v 9 Ito Onesimasiya monokau elewole onebo we wewenate lalo edimo numudatipolokati we emokiya oli hekoyoko, magoina wiki maya numutoti gawa maya li li biki suwikilaiye.   
\p
\v 10 Nala numuku wewenate Alistakasi ito Banabasida ahola Maki ito Jisesida abala uliwa mako Justasilekiya dupamu delokaiyoko noloe. Ito Makida gala maya alo omutoko lo liboboma ne.  
\v 11 Sa-oneyoko noloyo, duli duli lobo wewena wiki hetikadeko maya, dilipi damaekuka molalo. Juda wewenasikukati lemo monokateu nisiki kolabo wewenasikuti aya we loweki makokisiya edimonipogo Omai oholamidana yowanuwamuya nilimi wati ikaka niae. Sadanaki, muluteu li wati ikaka niae.  
\v 12 Ito numudatipolokati we mako Epapalasidaya emo Jisesi Kalaestida elekele oluhola makomamoya dupamu elokaiyoko noloe. Emoya Omailimo he elowa olibetadeko letibotoka molatibotoka eli wehe liki monokauya etoha iki napa liki minatae loko abuha-wowo loko Omailoka noliye.  
\v 13 Nemokahoya monawalamu alo ele-minodanaki lo noliboe: Edimokumuhe ito Laudisiya numutoka ito Hiyalapoli numutoka monoka elebo wewenamuhe miluma yowanu napa-napa lekaka noiye.  
\v 14 Lemo lusa we lalo Luku ito Demasitesiya edimo dupamu delokaiyoko noloe.  
\v 15 Nemoya Laudisiya numutoka monoka elebo wewena ito monoka mena Nimipa ito Omaimidana wewenala yuhasiya numudalau monoka likaka niabo wewenasida dupamu nelokaiyoko noloyo, li bilo.  
\v 16 Edimoya luhuwa nesa maya muki wewenasida lepiki li bideko, muki wewenasiya eliki suwikadeko, Laudisiya numutokaya monoka elebo wewenasitoka molokadeko, lepiki elitae. Ito Laudisiyasida luhuwa nesa mako joboya asaikigo li bikadeko lepilo.  
\v 17 Akipasida maya sa-liki li mitae: Monoka yowanu We napalimo le imiboya moletoko minoko le suwoko lo liki li milo.   
\p
\v 18 Nemo Polomamo kusikusi wenemidana adeuti luhuwa jekaka nesala maya oloti nolodanaki neimone nadeloti uline maya nojoe. Nala numuku minoyo, data molokatiyo, yamuya eli-minalo. Omaimidana nasahililalimoya edimoto minowa minowa oko netiye.  
\pi1 \bd 7\bd* Apo 20:4; 2 Tim 4:12 \bd 8\bd* Ipi 6:21-22 \bd 9\bd* Pai 10-12  
\pi1 \bd 10\bd* Apo 19:29; Apo 12:12; Apo 13:13; Pai 24 \bd 12\bd* Kol 1:7  
\pi1 \bd 14\bd* 2 Tim 4:10-11; Pai 24 \bd 17\bd* Pai 2