\id 2TI NT0013.4t1 YAWEYUHA DEIBLERS TFR DP-DEC 21-APR-86 
\h 2 TIMOTI 
\toc1 Timotida luhuwa naba 2 Polokaho je miye 
\toc2 2 TIMOTI 
\mt1 Timotida luhuwa naba 2 Polokaho je miye  
\c 1  
\s1 Polokaho Timotida maku meko luhuwa je mibo ga.  
\p
\v 1 Nemo Polokaho Jisesi Kalaestitoka woko kolokoyoko, elewole depa mutiwaki minatae loko lo mololetaibo gama lo soto molatuwe loko Omaimidana galalo Jisesi Kalaestida aposolola lolo obo wemamo,  
\v 2 Timotiyo, monoka anugu ilime molodanaki ilime sa-obo wemidana weune me-minodanaki luhuwa maya je noemoe. Omai ahote ito We napate Jisesi Kalaestikahokiya nasahili oetoko ukala emeko ilime hulu ideyo.  
\pi1 \bd 1\bd* Apo 16:1   
\s1 Timotidamuya Omaimidana epoka lidanaki weuna ilime elewole oetaibo ga.  
\p
\v 3 Lataneleya duka laloki miniki mini-liki yowiki minadanaki, Omaimidana elekele itiki minae. Sa-iminabo nenako, awonipo nemoya ayamidana oko Omaimidana elekele oetoko epoka lokaka nobo maya muki yupeka nekewa ludakaya emokumu ele-minodanaki Omailokaya epoka lokaka noe.  
\v 4 Eba makomaloka wekolo noyoko, nemokumu wije napa adawo maya ele-minodanaki, woko muda-elokoko muluneu lalo etiye loko elekaka noe.  
\v 5 Ele elewole okaka nesaya wehe loko emotoka neboya alo ele-minoe. Ito lataka Loisite ito doka Yunisite maya omutiki eli elewole aiboma nenako, yamidana oko ele elewole onane loko ele-minoe.  
\v 6 Yamuya ele-minonako, ga mako aku lokoyoko elitaniyo. Nemoya nadene madokalo molokoyoko, Omailimo monokamidana elewoleya imiboya ujapa lalo oko hulu oko minaniyoko, jo ulumakidana lowa lowa oko minadeyo.  
\v 7 Sa-nokoya sa-loko elo: Omailimo lomoda wokaka nesaya lemamibo ne. Labuha moloko lukateloti nasahili obetoko lupa ujapa etune loko weuna oluho maya lemenebo ne.   
\p
\v 8 Sa-onenako, We napatemidana gala lalowa maya lo soto molatadawomu owaka luwamideyo. Sa-okoko We napamuye liki nala numuku hulinitikayoko minobomuya emo owaka luwamideyo. Omailimoya emoda abuha-wowola emekadeko gala lalowamuye liki ula moligitikadeko maya, yatoka nesamidana mupilaloya emokakiya aha mino.  
\v 9 Omailimoya olisauti lilimidanaki eto iki minatae loko lesa molo limiye. Oko moloko udawo maya wehe loneyokoya samiye. Eimola weunadunu molo elekadanaki nasahilima aha limiye. Emoya hapa maya mikaya le soto molamidanaki Jisesi Kalaestida wewenala yuha lolo itabomuye loko limiboya,  
\v 10 niseko ulolotetiye loko oloti onawaloya olisauti lilimekaka ahola Jisesi Kalaestidaya lemekaiyoko aya nasahilila maya soto piye. Sa-okaiyoko, Jisesimamo helekaka nesamidana koha helekadanaki, elewole lepa mutiwaki minokakamidana nesaya Omaimidana gala laloti le soto mololetaiye.  
\v 11 Ito nemoya aya ga lalowa maya lo soto soto molokaka we, ito aposolo ito monoka monawamu api-napi obetokaka we minatane loko Omailimo lonetonebo maya ne.  
\v 12 Sa-okaiyoko nenako, nemoya yamuya miluma elekaka nesalimo jeko ohenetokaiyoko, nala numuku minobomuya nupalo elamoe. Sa-oneboya, nemoya Jisesidamu ele elewole o-minobo wemuya aha ele-minoe, ito nata lowe elamoko emoya abuha ahola nenako, weune meminoboya ujapa oneto-loko noyowiyoko, emo onawalama alili ekolaiye loko ele wehe lo-minoe.  
\v 13 Ga watiya le soto moloko api-napi oetobotoya ayau ata keke o-minoko Jisesi Kalaestitoka woko koladawomuye loko ele elewole okaka ito uka mekaka nesamidana ulauya woko mino.  
\v 14 Weuna oluhoya lukau minoko leko okaka noibo welimoya doka lolo ideko Omailimo emenebo nesaya etoha oko ujapa oko le-mino.  
\pi1 \bd 5\bd* Apo 16:1 \bd 11\bd* 1 Tim 2:7   
\s1 Onesipolasida gala.  
\p
\v 15 Esiya ebakukaya muki wewenasiya hulinitikae. Edimokutiya Pigelokite ito Helemogenekiteya minaiye. Sa-aibo ga maya emoya alo ele-minane.  
\v 16 We napalimoya Onesipolasida wewenala yuhasida maya milumanipo eleko weuna bideyo. Nemoya nala numuku minobomuya nupalo elamoko muki yupeka luhawane le ilitonetaibo ne.  
\v 17 Sa-idanaki, Lomu ebatoka maya nemokumu ohu je-loko widanaki nilime soto molaiye.  
\v 18 Sa-ibo nenako, We napamo elideko wati okadeko maya, onawa napalo We napamo wati oko ilimitiye loko noloe. Epesisi numutokati nasahili onetoko yowanu lenetoko neboya, lasola nesa minamiboya emokaho wehe loko ele-minane.   
\c 2  
\s1 Jisesida imi wela wehe loko minatibo ga.  
\p
\v 1 Ipanelika, emoya Jisesi Kalaestitoka woko koludawomuye loko nasahili oletokaka noibomidana ulauya minoko elewole o.  
\v 2 Muki wewenasida domudalo muki nesamuya ilipeko api-napi oetominobo maya maloka wewenamu elideko elewole i-minabo wewena minadeko maya, aya ga maya lo bekadeko ayamidana iki maloka wewenasida api-napi ibitatae.  
\v 3 Emoya Jisesi Kalaestida imi wela wehe loko lolo oko minoko emoki ulana moligitatabomuya osele elamideyo.  
\v 4 Imi wela lolo ikiki yowanula litabo wewenasiya lupamidana yowanulaya lamikilae. Imi wela lolo itae loko dilipe eto ibo we uliki wenipo elideko dowa letiye liki yamidana yowanugoya litae.  
\v 5 Ito lesisi itabokuya we makolimo aya onomidana ujapa wemo lesisi itabomu lo hukaibo gaya auta etiboya, lalo nesala lamekolaiye.  
\v 6 Ito abuha moloko miluma eleko yuhaina etibo welimoya nodenesala o molokadeko omutoko leko niseko nakolaiye.  
\v 7 Sa-ekolaiyo, aya koha moloko ga lo noemobomidana monawa eleko le eto o. We napalimo mulukau le you lokadeko muki nesahenaya ele wehe letane.   
\s1 Monokamuye loko milumamidana mupilalo ne.  
\p
\v 8 Emoya Jisesi Kalaestidamuya ele-mino. Emoya Dewitida awola helenebokuti aku momoga oko sinaibo weyae loko gala lalo maya lokaka noe.  
\v 9 Sakoya Omaimidana gala lalomuye loko asowalaki nesa ohodanaki miluma elekaka noe. Sa-nodanaki, ulanelo wekidana nala jinitikayoko minoboya, Omaimidana gala maya nala jamabo ne.  
\v 10 Nemoya miluma yowanuya Omailimo dilipe eto ibo wewenamuye loko asowalaki nesaya ohekaka noe. Edimoya Jisesi Kalaestikaho dilipekaka nesa ito elewole lamedalaki nesaya li sa-itae loko sa-okaka noe.  
\v 11 Sa-okaka nonako, ga mako sa-loko neboya wehe loko gaya ne:  
\q1 Emo helibokuya kolo mudawokuya emoki magoina minoko leko etune.  
\v 12 Miluma nesa mupilatelo yowibokumuya osele lelamiyoko aha le oheko letudawoya, emoki koloko minoko emo yowanulalo ujapa ekoloune. Emokumuya minamiye loko lemesa metudawoya, emokahoya ayamidana oko emesa lemekolaiye.   
\q1
\v 13 Lemoya monokau elewole ametudawoya eimola monowalamu sakoya minamiye loko lametibo nenako, emo aha lonebo galaloya emesalo moloko minakolaiye.  
\pi1 \bd 12\bd* Mat 10:33; Luk 12:9   
\s1 Omailimo yowanulalo wewenamu elideko wati etibo ga.  
\p
\v 14 Monoka elebo wewenasiya emo ujapalo minabosiya emoya ga maya le ohatama oko lo bekoko Omaimidana omudaloya sa-loko lo hukoko lo bo: Aha ulawa minametibo gamuya lowa moila hamilo. Aya galimoya eleme-eleme jiki liwa liwa niayoko elebo wewenasida dilipe opa okaka noiye.  
\v 15 Sa-ikaka niayoko noloyo, Omailimo emodamu elideko wati etiye loko abuha moloko minoko yowanu litane. Sa-noko ga ulawa maya le wehe loko lo nobeko yowanukamuya owaka helekaka nesaya yowanulo we mupilakalo yowamekolaiye.  
\v 16 Ga ulawa minametibo gamuya nei nai ga nilideko maya, yamuya emesa bo. Sa-inaboya sa-iliki wiki monokaya hulakilae.  
\v 17 Suwa ganipo maya enemane oko mika ihi napamidana oko minoko muki wewenasitoka maya woko napa ekolaiye. Sa-ekolainako, yamidana weuti makoya uliwa Haimeniyote ito Piletoteyate minaiye.  
\v 18 Edimosiya ga watiya maya eli hulikaidanaki, obohatemoya helenebokuti alo sinokaibo nenako, alikaya ohatama lupaki lilime sinokaka nesa minamiye likaidanaki, monoka elebo wewena malokawasida maya dilipi opa-napa niaiye.  
\v 19 Sa-oneboya, Omaimidana wewenala yuha maya ehada ahoda hi-minabokidana iki minadeko, saina makolimo dilipe momoga amekolaiye. Sa-ikilaboya, edimo lumeyanipoloya Omailimo sa-loko luhuwa jenebo ne:  
\q1 We napalimoya eimola wewenala yuhasidaya muda wehe lokaka noiye.  
\m Ito makoya sa-loko jenebo maya ne:  
\q1 We napamidana ulila li-minabo wewenasiya opa-napa nesanipoya enemane iki huli suwikiki demesa mitae.   
\p
\v 20 Uliki we makomidana numudala napauya lape aito-aitomidana goliloti ito siluwaloti lolo abo, ito yadunu ito mikadunu lolo i-minabo ne. Sa-iminaboya, malokaya lalo nesamuya ne, ito malokaya aha amanama nesamuya ne.  
\v 21 Dilipe opa-napa etibo nesa mositabo wewenaya duka ijopa loko lape lalomidana lolo ikadeko, numuda aholalimoya maku beko dilipe nisomao lokadeko, aito aito yowanuya numuda aholamidana litakilae.   
\p
\v 22 We owahasi litaboto maya emesalo molamoko mino oli o. Sa-okoko emoki ito obohanipo ijopa lo-minadeko Omaidamu wako wako liki ju liki minikaka niabo wewenakiya wehe liki eli elewole iki duka biki hulu iki minatune liki dabuha molalo.  
\v 23 Lowa moila hikaka ga nei ga likaka nesamidana maya oli hekadeko wideyo. Aya gamidana ihilawa maya lowa lowa okaka nesa maya neboya alo ele-minane.  
\v 24 We napamidana yowanulalo wewenasiya aya gaya ligi hagi iki lowa moila hamiki, muki wewenasidaya elewole gauti lamiki monokaya dowa liki huluguti li bitae.  
\v 25 Edimosiya limiki miniki monokamidana ulalalo wewenasida maya dilipi wehe litae. Sa-idekoya, Omailimo eimola dilipe-loko nisekadeko, obohanipo li wili jiki Omaimidana ga lalowama mudai wehe litahe liki sa-ikilae.  
\v 26 Sa-ideko monokamidana ulalalo wewenasida data maya aku golotokadeko, olohamidana elehulauti maya dilimekadeko Omailimo letibotoka molatibotoka iki minatae.   
\c 3  
\s1 Onawa suwekolo noideko soto pitabo wewenasida monawanipo.  
\p
\v 1 Emoya ga mako sa-loko elitane: Onawa suwekolo noideko maya, lahelametibo nesa soto pekoko pou loko yomala jekolaiye.  
\v 2 Sa-etiboya muki wewenaya sa-iki minakilae: Edimonipomugo elideko napa okadeko, moni uvaminamu dumu helepele iki miniki, edimonipo iki moliki itabo nesalimo dumu helekadeko elowa jiki, edimonipo dupa liki yowiki, donipole ahonipolesida ganipo maya eli hulikiki, muki nesamuya liwi letiwi ikilae. Sa-nikiya lalo nesa lolo ibitabotoya depoka liki omokane liki lamiki duka laloki minamideko,  
\v 3 dukau nasahili minametibo miniki lihimaki limiki liwi letiwi ga liki auha auha likiki lowahinalo wewena ulakidana iki miniki saina lalomu liwi letiwi iki  
\v 4 mimi ikaka iki dokepa dokepa jiki edimonipomu napa-napa eliki dukaya Omailoka molamitae. Sa-ikiki dukauya dumu helekaka noibo nesaloya molatae.  
\v 5 Sa-ikiki dupamoya monoka dupa lolo etibo neboya, monokamidana abuha-wowola maya wasa jiki li hulakilae. Sa-itabo neyo, sa-iki minadeko, emo mudakoko maya edimoki woko kolamo.  
\v 6 Yamidana wewenautiya malokasiya opa-napa halukukaya nimonebo menakipasida numudanipou maya yowiki aito aito ga li biki asibitikaka niae. Sa-ikaka niaboya, aya menakipasiya lihima napa edawaki li-minadanaki, libo nesalimo ito lamibo nesalimoya dumu helekaiyoko,  
\v 7 monokau minabo wewenasida ganipoya elikaka niaboya, Omaimidana gala wehe liki eli lamae.  
\v 8 We lowe maya ulinipo Janesiko ito Jabelesikosiya Moseseda gala maya aya aweyahago iki eli aha nesa lolo aibokidana abuhanipo opa ibo wewenasi lemo monokatemidana anula maya hulikiki nei moliki opa ikae.  
\v 9 Sa-ikaboya, sainahena iki moliki niabo nesahenaya nenahanipoloti sa-imi sa-imi yowitae. Edimoya nei nihebomidana monawa maya soto pekadeko, muki wewenasiya mudai suwikilae. Janesiko Jabelesikoya nei molaibomidana monawanipoya soto pibo ne.   
\s1 Timotida ata lidanaki lo suwoko lo mibo ga.  
\p
\v 10 Sa-iboya, emoki minodanaki oko moloko obo, ito monoka api-napi oetobo, ito oko molokodanaki yowanu lobo, ito ele elewole oko minobo, ito saina-mainamu osele nelamiyoko elewole oko minobo, ito nuka beko minobo, ito asowalaki nesalimo nupalo tewa iyoko amanapa oko sino-minobo,  
\v 11 ito ulana molinitayoko miluma eleko minobo, ito Enitiyoko numutoka ito Ikoniyo numutoka ito Listela numutoka ulana aito-aitomidana molinitayoko miluma nesamidana ulau minoboya, nemesaloka nisekoko mudanelo-minadawo maya ne. Sakoya minoyoko, We napalimoya aya nesa ulauti maya olutonetokaiye.  
\v 12 Ito Jisesi Kalaestitoka wiki kolikiki monoka anulo witabo wewena mukiloka asowalaki nesa dupaloya tewa ekolaiye.  
\v 13 Sa-oneboya, lahelamabo wewenasi ito suwa monoka likaka wewenasiya ediponipoda dokepa jideko maloka wewenasida dokepa ji-liki niwideko, napa omo woko napa ekolaiye.  
\v 14 Sa-itaboya, nemokaho ga lo emekaka oboya le uka jekadawo maya ne. Sa-okaiyoko ga lo budawo wewenasida monawa ele-minadawo maya nenako, yamuya le ikitoko le-mino.  
\v 15 Emoya oluho napuda minadanaki eto onebo pepa monoka bukugu lepe-loko noyowedanaki, Jisesi Kalaestikumu ele elewole adawomuye loko olisauti lilimekaka nesa limitibo gaya ele-minane.  
\v 16 Monoka bukugu luhuwa ji-minabo ga mukiloya Omaimidana weuna oluholimo dilipe lolowa idanaki dukau yowanu liyoko li soto piminabo maya ne. Sa-onebo maya nenako, yautiya lepeko noeluniyoko monokamidana monawa maya lilipe wehe lokaka noiye. Sa-idanaki, lata leko api-napi oletokaka noiye. Ito opa ga noluniyokoya lilime anulo molokaka noiye. Ito wehe loko minatudawo anuwa maya nolilipeko, lilime wehe lokadeko,  
\v 17 Omaimidana wewenala wehe loko lolo oko minoko monokauya muki lepakiya minoko monoka yowanu laloya aito-aitomidana leko minakolune.  
\pi1 \bd 8\bd* Eks 7:11 \bd 11\bd* Apo 13:14-52; Apo 14:1-7; Apo 14:8-20   
\c 4  
\p
\v 1 Nemoya Omaimidana omudalalo ito Jisesi Kalaestikaho minoko lomudaki wewena ito helebo wewenaki ona mololetakolo noibo wemidana omudalaloya Jisesiya elewoleyalaki soto pekoko ujapa oletatibomuye loko lo hukoko lo imituyo, elo.  
\v 2 Emoya monoka lo soto moloko lo bitadawomuya wewenasi delatihe, ito delametihe, yatoka aha nesa neyo, opaya lo bo. Sa-oneyo, data leko dilipe elewole oko dilipe wehe loko osele elamideko api-napi obeto.  
\v 3 Sakiya mini-liki yowiki onawa mako alili okadeko, monoka watiyamuya auha likiki hulakilae. Sa-ikiki monokaya datadunu lahelepa onedekogo eletune likiki monoka api-napi itabo wewenasida dilipi napa ikiki dumu helitibomu opa ga li bikadeko,  
\v 4 monoka wehe lokomidana maya demesa mikiki hiyega gau maya wiki kolakilae.  
\v 5 Sa-itabo neyo, emoya muki yupeka ataka ele wehe lokogo mino. Asowalaki nesa makolimo upakalo tewa noideko maya elewole o. Omaimidana ga lalowa lo soto molokaka yowanu noleko le owo jitane. Omaimidana yowanula maya muki le oheko lo.   
\p
\v 6 Nemodaya kohane-liki uda jitibo nupalotiya miyuhawa liki nakilae. Sa-ikilanako, nemoya alo hulolibetatubo onawa alili okaiye.  
\v 7 Nemoya yowanu lalo le-loko wobo maya alo leko suwo-minoe. Onouya emo asiyoko emo asiyoko ikaka niabomidana yowanu le-loko woko makilo maya alo hetokoe. Ga watiyamidana ujapa obo nesa maya wina amibo ne.  
\v 8 Ito okulumauti onowelaki adakoli lalo wewesiki miniki liki niabo wewenasida nesanipolimo newa noiye. Minoko onawa napaloya We napa le wehe loko ona molokaka wemamo nemoki muki wewenaki emo hetatibo onawamu ewa oko ubolo o-minokaka noudawo wewenaya aya adakoli maya leko niseko olo jeletakolaiye.   
\s1 Maloka wewenasida ganipo.  
\p
\v 9 Emoya nemotoka nisituwe loko maya abuha moloko enemane oko nisitadawomuya noloe.  
\v 10 Temasikahoya maya mikauka nesamu eliyoko dowa lokaiyoko, hulonetokadanaki Tesolonika numutoka wokaiye. Sa-okaiyoko, Kelesese maya Galaisiya numutokaya wiye. Ito Taetasi maya Dalamatiya ebakukaya wiye.  
\v 11 Sa-ikayoko, nemoya makoko Lukakiya minoiye. Sa-iminayo, Makida maya ilime-loko nisitane. Makimamo yowanuguya nilime wati etiye loko noloyo, ilime-loko nisitane.  
\v 12 Ito Tikikasida maya oli hoyoko, Epesisi numutokaya nowiye.  
\v 13 Sa-oneyo, maloka nisekolo noko maya lasigu olo jekaka lawo-lawo maya Tilowasi numutoka Kapasida numudalalo ololoha oko molonebo maya lenetokokiya niso. Ito monoka pepane ito pepa ailawa mako molo-minobomakiya leko niso.   
\p
\v 14 Kapadunu saina-maina lolo okaka we Alesadeya lahelamibo nesa oha lenetokaiyoko, yamuya minoko alikaya We napalimo lihimalaya saina lolo ibomidana makoko aweyaha oko mekolaiye.  
\v 15 Sa-oneyo, emodaya ilime opa-napa okatiyo, ujapa etoha oko mino. Sa-noko aya welimoya abuha moloko monoka gatemuya mesaha jiye.  
\v 16 Obi noyoko adaya api oko nemo monawanemu lo soto obotoya wewena makolimo niseko nilimeko gaya lamiye. Edimo muki wewenasiya nemoda hulinitiminabo maya ne. Sa-iminabo maya neyo, yamidana lihimaya Omailimo le hulobetadeyo.  
\v 17 We napalimo nasahili onetoko nilime elewole idanaki gala lalowa maya lo soto molo-loko nowoko suwetane loko, ito hetoka wewenasi eli suwitae loko, luhawane maya le ilitonetaiye. Sakokoya We napalimo asowalaki nesamidana epalauti nilimidanaki wina onetokaiye.  
\v 18 Ito We napalimoya lahelamibo nesa yamuhe mamuhe nilime wati oko olisauti nilimeko okuluma ebalau mukito nilime molakolaiye. Sakoko emo lamedala maya mino-loko woko minakolaiye. Watiyae.  
\pi1 \bd 10\bd* Kol 4:14; Pai 24; 2 Kol 8:23; Gal 2:3  
\pi1 \bd 11\bd* Apo 12:12; Apo 13:13; Apo 15:37-39 \bd 12\bd* Ipi 6:21-22  
\pi1 \bd 13\bd* Apo 20:6 \bd 14\bd* 1 Tim 1:20; Sam 62:12; Lom 2:6   
\s1 Dupamu elaiyoko lo biye.  
\p
\v 19 Ito maya Piliskaki mena wauna Akuilakiyo ito Onesipoloda wewenala yuhaki dupamu nelokaiyoko noloyo, sa-loko lo bo.  
\v 20 Elasito maya Kolinti numutokaya ne, ito Tolopimasidamu elokaiyoko Mileto numutokaya huloeto-minoe.  
\v 21 Sa-ominoyo, emoya nisituwe loko maya go onawa maya owaha amideko, abuha moloko niso. Eupuloya upakamu elokaiyo, ito Putenete ito Lino ito Kalautiyateya edimoki maloka wewenatelekiya upamu delokaiye.   
\p
\v 22 We napatelimoya weuka oluholoka minadeyo. Sa-oneyo, Omailokatiya nasahili maya edimotoka mino moloko minadeyo.  
\pi1 \bd 19\bd* Apo 18:2; 2 Tim 1:16-17 \bd 20\bd* Apo 19:22; Apo 20:4