\id COL  
\ide UTF8
\h COLOSSIANS 
\toc3 Kol 
\toc1 BABYOR NI PI’ PAUL NGE YAN NGAK E GIRDI’ NU KOLOSE 
\toc2 Kolose 
\mt2 BABYOR NI PI’ PAUL NGE YAN NGAK E GIRDI’ NU  
\mt1 KOLOSE  
\ip Babyor ni pi’ Paul nge yan ngak girdi’en e galesiya nu Kolose, nib binaw ni bay u lan yu Asia Minor ni bay yu Efesus ko ngek riy. Re galesiya ney nu Kolose e gathi Paul e tababnag e maruwel riy, machane me pi’ Paul boch e girdi’ nu Efesus, ni fare binaw ni ba ga’ ni bay ko nug nu Asia nib milfan nga Roma ngranod nga Kolose ngar wereged e thin rok Got riy. I rung’ag Paul ni keb e tamchib ni go’ bogi ban’en nga fithik’ girdi’en e galesiya nu Kolose ni yad be yog ni en ni ba’adag ni nge nang murung’agen Got me thap ngak e thangri meybil ngak e pi kan ni yad ma gagiyeg ma yad ma tay murung’agen ban’en. Miki yog e pi tamchib nem ni dabisiy ni ngan maad’adnag e dowef, ma kun ayuweg e motochiyel u murung’agen e ggan nge yugu boch ban’en.  
\ip I yoloy Paul ngak girdi’en e galesiya ni be togopluw ko re machib nem ni gathi riyul’, me pi’ e thin nib riyul’ ngorad. Me ri tamilang nagrad u murung’agen Jesus Kristus ni ir e rayag rok ni nge thapeg e girdi’ ngak Got, machane pin’en ni be machibnag fapi tamchib ni go’ bogi ban’en e ir e ra mal’af nagrad rok Got. Pa’ Kristus e sunumeg Got urngin ban’en ngay, mu daken Kristus e fulweg Got urngin ban’en ngak. Kemus ni yam’ ni tay Kristus u daken e kuruth e ir e ra awnag e gapas u thilin Got nge girdi’. Ma pi’in ke aw e gapas u thilrad Got e rayag ni ngar pired ko bin nib be’ech e pangiy ni pi’ Got ngorad.  
\ip I Tykikus e fek e babyor ni yoloy Paul nga Kolose, me un Onesimus ngak, ni ir fare sib ni mil rok e masta rok ni Filemon.  
\is1 Tin ni bay riy  
\io1 Tabolngin 1:1–8  
\io1 Rarogon Kristus nge maruwel rok 1:9—2:19  
\io1 Pangiy nib be’ech u daken Kristus 2:20—4:6  
\io1 Tin tomur e thin 4:7–18  
\c 1  
\p
\v 1 Re babyor ney e yib rok Paul, ni Got e leamnag ni ir e nge mang reb e apostel rok Kristus Jesus, ma ki yib rok walagdad i Timothy —   
\p
\v 2 Ngak e girdi’ rok Got nu Kolose, ni pi’in yad ba yul’yul’ ni kad walaggad u daken Kristus:  
\p I Got ni Chitamangidad e ngi i ayuwegmed ma be pi’ e gapas nga lanin’med.   
\s1 Pining e magaer ngak Got  
\p
\v 3 Gubin ngiyal’ ni gamow ma pining e magaer ngak Got, ni Chitamngin e Somol rodad i Jesus Kristus, ko ngiyal’ ni gamow ma pi’ e meybil romed riy.  
\v 4 Ya kug rung’aged rogon fene rib mich Kristus Jesus u wun’med, nge rogon fene rib t’uf romed urngin e girdi’ rok Got.  
\v 5 Ngiyal’ ni som’on ni yib e thin rok Got nib riyul’ ngomed, ni ir fare Thin Ni Bfel’, ma mu rung’aged e n’en ni be yog nra pi’ ni ir e nge lagan’uy ngay. Ere rogon nib mich Kristus u wun’med nge rogon nib t’uf Got nge girdi’ romed e yib ko n’en nike lagan’med ngay, ni ir e be cha’riy Got u tharmiy ni fan ngomed.  
\v 6 Fare Thin Ni Bfel’ e be yib wenegan ni bfel’ ngak e girdi’ ma be wear u fayleng i yan, ni bod rogon ni wear romed ni ka nap’an e chirofen ni som’on ni mu rung’aged rogon gelngin ni be runguy Got e pi’in nib tadenen ngari tamilangan’med riy.  
\v 7 Mu rung’aged e re bugithin ney rok Epafras, ni be’ nrib t’uf rodad, ni ir reb e tapigpig ni bod gamow, ni ir be’ nib yul’yul’ ko maruwel rok Kristus, ni er gamow.  
\v 8 Ke weliy ngomow rogon nib t’uf Got nge girdi’ romed ni fare Kan Nthothup e ke yagnag ngomed.   
\p
\v 9 Ireray fan ni gubin ngiyal’ ma gamow be pi’ e meybil ni fanmed, ni fa ngiyal’ ni ba’aram ni gu rung’agew murung’agmed riy ke mada’ ko chiney. Gamow ma wenignag ngak Got ni nge tamilangnag lanin’med ngam nanged e tin nib magan’ ngay ni ir e ngam rin’ed, nib cheag urngin e gonop nge tamilangan’ ngay nma pi’ e Kan Nthothup rok.  
\v 10 Ma aram me yag ni um ngongolgad nrogon ni ba’adag Somol, mu um rin’ed e tin nib magan’ ngay ni gubin ngiyal’. Me yib wom’ngin i pangimed u fithik’ urngin mit e maruwel ni bfel’, ma gimed be nang rogon Got i yan nge tin ni ba’adag.  
\v 11 Nge gel nagmed Got nga polo’ i gelngin nma yib u gelngin ni dabi m’ay, nge yag ni mu athamgiliyed urngin ban’en u fithik’ e gumaen’.  
\v 12 Mu um pinined e magaer u fithik’ e felfelan’ ngak e en ni Chitamangiy ni ir e ke ngongliymed kam pired nrayag ni nge yag e f’oth ngomed u urngin ban’en ko tin ke tay Got ni fan ngak e tirok’ e girdi’ ko gin nsuwon nrib tamilang.  
\v 13 Ya ayuwegdad nge chuwegdad u fithik’ i gelngin e talumor me thapegdad ko gin nsuwon e en ni Fak nib t’uf rok,  
\v 14 ni ir e ke pithigdad rok urngin mit e kireb ma ke n’ag Got fan e denen rodad u daken.   
\s1 I Kristus nge maruwel rok  
\p
\v 15 Kristus e ta’reb rogon ya’an ngak Got, ni Got ndanir guy. I ir e bin ni m’on i Fak, ni ir e ba tolang ngak urngin ban’en ni sunumiy Got.  
\v 16 Ya pa’ Kristus e sunumeg Got urngin ban’en ngay ni bay u tharmiy ngu but’, ntin yibe guy nge tin ndanir guy, nib mu’un e pi kan ni be gagiyeg ngay, ni tin ni pilung nge tin ni yad be yog e thin, nge tin yad be tay murung’agen ban’en. Pa’ Kristus e sunumeg Got ngay e gin’en ni ba’ urngin ban’en u lanelang riy nib mu’un e fayleng ngay, ni fan ngak Kristus.  
\v 17 I Kristus e immoy u m’on ko ngiyal’ ndawori sum urngin ban’en riy, me ir e be tay urngin ban’en nra reb ma be par u tagil’.  
\v 18 I Kristus e llug u downgin, ni aram girdi’en e galesiya; ni ir e be tay e re dowef nem nib fos; ir e bin ni m’on i Fak Got ni Got e faseg ko yam’ ndabki yim’, ni bochan e kemus ni ir e nge par nib m’on u gubin ban’en.  
\v 19 Ya Got e turguy ni en ni Fak e nge par ni bod rogon Got.  
\v 20 I Got e turguy ni nge sulweg urngin ban’en ngak u daken Fak. Mi Got e ngongliy e gapas u thilin e girdi’ nge ir u daken racha’en Fak\f + \fr 1:20 \ft u daken racha’en Fak; \fq ara \ft maligach ni yam’ rok Fak.\f* ni map’ u kuruth, ma aram me yag ni nge sulweg urngin ban’en ngak, ntin ni bay u fayleng nge tin bay u tharmiy.   
\p
\v 21 Bay ba ngiyal’ ni um moyed ni gimed bmal’af rok Got ma gimed be taymed ni gimed e pi to’ogor rok ni bochan e tin nib kireb ban’en ni um rin’ed ma gimed be leamnag.  
\v 22 Ma chiney e ke taymed Got ni gimed e pi tafager rok u daken e yam’ ni tay Fak, ni fan e nge yag ni fekmed i yib nga p’eowchen ni kam thothupgad ma kam machalboggad ma dariy e kireb romed.  
\v 23 Thingar um pired ni gimed ba yul’yul’ ma gimed bmuduwgil ko n’en nike michan’med ngay, ma dab mpaged gimed nge maruwaran’med ko n’en ke lagan’med ngay, ni yag ngomed ko ngiyal’ ni mu rung’aged fare Thin Ni Bfel’. I gag Paul e gu mang reb e tapigpig ni bochan e re Thin Ni Bfel’ ney — nre Thin Ni Bfel’ ney ni kan machibnag ngak urngin e girdi’ u fayleng.   
\s1 Pigpig ni tay Paul ko galesiya  
\p
\v 24 Ere chiney e kug felfelan’ ko gafgow ni gu be tay ni fan ngomed. Ya gafgow ni be tay dowag e gu be ayuweg e tin kabay ni nge gafgow Kristus riy ni fan nga downgin, ni aram girdi’en e galesiya.  
\v 25 Mi Got e ke ngongliyeg kug mang reb e tapigpig rok girdi’en e galesiya, me ir e pi’ e re maruwel ney ngog nggu rin’ ni fan ngomed, ni aram e nggu wereg urngin e thin rok ngan nang,  
\v 26 ni ir e immoy nib mith ni i mithag rok urngin e girdi’ ni kab kakrom i yib, ma chiney e ke dag ngak e girdi’ rok.  
\v 27 Ya ba’aray rogon ni leamnag Got: i leamnag ni nge nang e girdi’ rok e tin immoy nda nnang, ni fare n’en nrib fel’ ni bay rok ni fan ngak girdi’en urngin e nam. Ere ren’em ni immoy nda nnang e ba’aray: Kristus e bay u fithik’med, ni fan e ren’ey e aram e gimed ra un ngak Got ko fla’ab.  
\v 28 Ere gamad be machibnag murung’agen Kristus ngak urngin e girdi’. Gamad be fonownag ma gamad be fil ngak urngin e girdi’ murung’agen nrogon ni gamad manang, ni fan e nge yag ni nge be’ min fek i yib nga p’eowchen Got nike yal’uw ko ta’ab girdi’ ni kar tew Kristus.  
\v 29 Ere gu be maruwel nib gel ma gu be athamgil ni nge yag e ren’ey, ni gu be maruwel ko fare gelngin nib th’abi gel ni Kristus e be pi’ ngog, ma ku ir e be maruwel u fithik’ag.   
\c 2  
\p
\v 1 Nggog ngomed rogon feni gel e maruwel ni kug tay ni fan ngomed, nge girdi’ nu Laodicea, nge urngin e pi’in ndawor ra nanged gag.  
\v 2 Gu be rin’ ni aray rogon ni bochan e nge athamgil lanin’rad miyad chichir nga ta’bang u fithik’ e t’ufeg rorad ngorad, me ri pagan’rad ko tin kar nanged fan ni ir e ba riyul’. Ma aram miyad nang e tin rib fel’ ni kem’ay i leamnag rok Got, ni er Kristus.\f + \fr 2:2 \ft n’en ni mithag Got, ni aram Kristus; \fq boch e babyor e bay riy ni \ft n’en ni mithag Got; \fq ma boch e bay riy ni \ft n’en ni mithag Got ni Chitamngin Kristus: \fq ma boch e bay riy ni \ft fare n’en ni mithag Got nge Chitamngiy, nge Kristus.\f*  
\v 3 Ya ir fare kiy nma bing urngin e pin’en ni bfel’ nike tay Got nib mith, ni aram e gonop rok nge llowan’ rok.   
\p
\v 4 Ere nggog ngomed ni nge lungug: mu guyed rogon ya ri ban nagmed be’ ko tugthin ni bay ra feked i yib ngomed ni gathi ir e tin nib riyul’, ndemturug feni manigil ni gimed be rung’ag ma dab mu folgad riy.  
\v 5 Ya yugu da gu moy romed, machane bay lanin’ug romed, ma kug felan’ ngarogon ni kug guy nike muduwgil lanin’med me ir e ke chagiymed kam pired ni gimed bmuduwgil u fithik’ e michan’ romed ngak Kristus.   
\s1 Taab girdi’ ni kad ted Kristus  
\p
\v 6 Ke mich u wun’med ni Kristus Jesus e ir e Somol romed, ere um pired rok.  
\v 7 Mu ted lik’ngimed nib to’ar nga fithik’ Kristus, mu ubunged e ngongol romed nga daken ya ir e def romed, mi i gel i yan e mich romed ngak, ni bod rogon ni kan fil ngomed. Mu um pininged e magaer ngak.   
\p
\v 8 Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon ngabang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni bay urngin ban’en nu lanelang riy nib mu’un e fayleng ngay, ma gathi Kristus e yib rok.  
\v 9 Ya rarogon Got ni polo’ e bay rok Kristus ni ngal’ nib girdi’,  
\v 10 ma ta’ab girdi’ ni kam ted Kristus e ke yagnag ngomed urngin e pin’en ni nge ayuwegmed ngu’um rin’ed e tin nib m’agan’ Got ngay. I ir e th’abi tolang u fithik’ urngin e kan nma gagiyeg nge tin nma tay murung’agen ban’en.   
\p
\v 11 Taab girdi’ ni mu ted Kristus e aram e kan maad’ad ngomed, ni gathi maad’ad nma tay e girdi’ ngak e girdi’, machane rogon e maad’ad nma tay Kristus ngak e girdi’, ni aram e ke lufdad u gelngin e re dowef rodad ney nib tadenen.  
\v 12 Ya fa’an ntawfe nagmed, ma aram e kan unegmed ngak Kristus kan k’eyagmed, ma tawfe ntay ngomed e ir e kun unegmed riy ngak Kristus ngan fasegmed ko yam’ u daken e michan’ romed nga gelngin Got ni be maruwel, ni Got ni ir e faseg Kristus ko yam’.  
\v 13 Bay ba ngiyal’ ni um pired ni gimed ba yam’ ni bochan e denen romed, ma bochan e um moyed u wuru’ e Motochiyel rok Got ni fan e gathi gimed piyu Israel. Machane chiney e ke unegmed Got ngak Kristus ke fekmed i yib ko yafos! I Got e ke n’ag fan urngin e denen rodad.  
\v 14 Ma ke thang babyoren e malfith rodad ni ir e immoy nib mich nib togopluw ngodad, nib mu’un ngay e tin ni i yog e motochiyel ni ngan rin’, me richibiy ko kuruth, ni aram e re babyor nem e ke m’ayfan.  
\v 15 Mu daken e re kuruth nem e ir e chuweg Kristus ir riy u fithik’ i gelngin e pi kan nib kireb nma gagiyeg nge pi kan nma tay murung’agen ban’en; ni aram e ke gel ngorad min sebaliyrad nike m’on be fekrad i yan ni kar manged kalbus rok.   
\p
\v 16 Ere dariy be’ ni nge ngongliy e motochiyel u murung’agen e n’en ni ngam ked ara n’en ni ngam garbodgad ngay ara pi rran nib thothup, ara madnom ni yima tay ko m’ug e pul ara Sabbath.  
\v 17 Ya urngin e pin’ey e kemus ni tagalul’ ko pin’en ni kabay ngam’on ni bay fini m’ug; ma bin ni ir riy e Kristus.  
\v 18 Dab mpaged be’ nge mang ir e turguy ni gimed ba kireb ni be yog ni ir e ba ga’ ni bochan e kan piliyeg e changar rok ke guy bogi ban’en, ma be yog nthingar ni sobut’ nigey ni gathi bin riyul’ e sobut’an’, ma yad be yog ni ngan tayfan min meybil ngak e pi engel. Ya ra aram rogon be’ ma ke ufanthin ndariy rogon, ya leam ni be tay e rogon e leam nma tay e girdi’,  
\v 19 ma ke tal ndaki chichiiy pa’ ku Kristus, ni ir e llug. I Kristus e be gagiyegnag fare dowef ni polo’, ma ir e be duruw’iy, ma ul ul riy i yan nge m’agan e ul ul riy e ke tay nib chayem nga ta’bang, ma be ilal nrogon ni ba’adag Got ni nge ilal.   
\s1 Kad uned ngak Kristus ko yam’ ma kad uned ngak kan fasegdad ko yam’  
\p
\v 20 Kam uned ngak Kristus ko yam’ kan chuwegmed u tan pa’ e pi kan ni yad ma gagiyegnag e gin’en ni bay urngin ban’en u lanelang riy nib mu’un e fayleng ngay. Ere mangfan ni gimed be ngongol ni gowa mmil famed ngaray nga fayleng? Ere mang ni gimed be fol ko pi motochiyel ni bod e pi motochiyel ni ba’aray nike lunguy,  
\v 21 “Dab ni math ko ren’en ni ba’aray,” “Dab ni limilimiy e ren’en ni ba’aram,” “Dab ni math ko tin kabay”?  
\v 22 Urngin e pin’ey nnap’an ni yira maruwel ngay nge mu’ ma aram e ke par nike m’ayfan. Tiney e kemus ni motochiyel nge machib ni girdi’ e sunumeg.  
\v 23 Er rogon, bmuduwgil ni be m’ug e pi motochiyel nem ni gowa bay e gonop u fithik’ ni be ga’ar e thingar nta’ fan min meybil ngak e pi engel, nge bin ni gathi ba riyul’ e sobut’an’, nge gafgow ni yibe tay nga dowey; machane dabiyag rok e pin’ey ni nge talegdad i rin’ e tin ni be ar’arnag e dowef rodad.   
\c 3  
\p
\v 1 Kan unegmed ngak Kristus kan fasegmed ko yam’. Ere mu suguyed lanin’med ko pin’en ni bay u tharmiy, ko gin nike par Kristus riy nga tagil’ u ba’ ni mat’aw rok Got.  
\v 2 Um pired ni be l’agan’med ko pin’en ni bay u tharmiy, ma gathi pin’en ni bay u roy u fayleng.  
\v 3 Ya kam m’ad, ma yafos romed e kan uneg ngak Kristus kan mithag nga fithik’ Got.  
\v 4 Bin riyul’ e yafos romed e aram Kristus, ma ngiyal’ ni bay sul riy nge yib i m’ug, e ku er rogomed ni bay mu uned ngak ngambad mm’uggad u ta’bang mi gimed un ko fla’ab rok!   
\s1 Bin kakrom i pangiy nge bin nib be’ech  
\p
\v 5 Ere thingar mu li’ed ngem’ e ar’ar nu fayleng ni be maruwel u fithik’ i dowmed, ni aram e darngal, nge puwlag, nge ar’ar nib kireb nma waliy e girdi’ ko denen, nge chogow (ya chogow e bmit e tayfan nge meybil ni yibe tay ngak e liyos nma meybil boch e girdi’ ngay.)  
\v 6 Bochan e pin’ey ma aram e bay yib e damumuw rok Got nga daken e pi’in nder fol rok.  
\v 7 Ma gimed e bay ba ngiyal’ ni um uned ngak e girdi’ nma rin’ e pin’ey ko re ngiyal’ i n’en ni ba’aram ni pi ar’ar ney e i gagiyegnag pangimed.   
\p
\v 8 Me ere chiney e thingar mpaged urngin e pin’ey: ni aram e damumuw, nge ar’ar nib kireb, nge fanenikan. Thangri dabi yib bbugithin u l’ugunmed nga but’ nra kirebnag laniyan’ be’ ara bbugithin nib puwlag.  
\v 9 Dabi lifith bigimed l’ugun ngak bigimed, ya bin kakrom i gimed nge tin nike mecham ngay e kam n’iged,  
\v 10 ma bin be’ech i gimed e kamon’ed nga dakenmed. Ireray e bin nib be’ech i gimed, ni Got ni ir e sunumiy e yugu be be’echnag i yan ni nge yan i par ni bod ir, me fal’eg rogomed ngar mu nanged ir.  
\v 11 Ma wenegan e ren’ey e gadad gubin nta’reb rogodad ndariy ban’en nib thil u thilin e pi’in gathi yad piyu Israel nge piyu Israel, nge pi’in kan maad’ad ngorad nge pi’in ndawor ni maad’ad ngorad, nge pi’in gathi yad yu Greece, nge pi nam ni dawori ga’ e llowan’ rorad, nge girdi’ ni yad e sib ara girdi’ ni gathi yad e sib, ya Kristus e ir e urngin, mi Kristus e bay u fithik’ urngin e girdi’ ni kar yodoro’gad.   
\p
\v 12 Gimed girdi’en Got; ya gimed ba t’uf rok ma ke duwgiliymed ni ngam manged girdi’en. Aram fan ni runguy, nge gol, nge sobut’an’, nge sumunguy, nge gumaen’ e thingar mon’ed nga dakenmed nge mang mad romed.  
\v 13 Nge bigimed mi i ayuweg bigimed ko me’waer rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni bay ban’en nike dabuy bigimed nike rin’ bigimed ngak. Thingar um n’iged fan u wun’med e n’en nike rin’ bigimed ngak bigimed ni bod rogon nike n’ag Somol fan u wan’ e tin ni kam rin’ed nib togopluw ngak.  
\v 14 Nge rogon nib t’uf Got nge girdi’ romed e ngam puthuyed nga urngin e pin’ey, ni ir e ma chugumiy urngin ban’en nga ta’bang nge par nike fel’ rogon.  
\v 15 Ma gapas nma pi’ Kristus nga lanin’dad e nge mang ir e ngi i gagiyegnag lanin’med; ya re gapas ney e ir e ke piningmed Got ngay ko fare dowef nri ta’reb. Ere um pininged e magaer ngak Got u lanin’med.  
\v 16 Thin ni ir e bth’ab feni fel’, ni weliy Kristus e thangri i par ni polo’ u lanin’med. Um filed ngomed ma gimed be fonow nagmed ngay u fithik’ e gonop. Umon’ed e tang ni thin rok Got ni bay ko Psalm, nge tang ni machib, nge tang ni murung’agen Got; um tang niged Got ni gimed be pining e magaer ngak Got u wun’med.  
\v 17 Ere urngin ban’en ni ngu’um rin’ed ara gimed be yog ma ngam rin’ed u daken fithingan Somol Jesus, ma gimed be pining e magaer u daken ngak Got ni Chitamangiy.   
\s1 Rogon be’ ngak e girdi’ u fithik’ e bin nib be’ech e pangin nike pi’ Got ngak  
\p
\v 18 Pi’in ni ppin, mu folgad ko thin rok pi figirngimed, ya ireray e n’en ni ngam rin’ed nrogon nma rin’ girdi’en Kristus.   
\p
\v 19 Pi’in pumo’on, nge t’uf romed pi leengimed, ma dab um gel niged e thin ngorad.   
\p
\v 20 Pi’in bitir, thingar um folgad ko thin rok e gallibthir romed ni gubin ngiyal’ nrogon girdi’en Kristus, ya ireray e n’en ni ba’adag Got.   
\p
\v 21 Ma gimed e gallibthir e yugu dabi pag rogon e puwan’ ni ngu’um ted ngak pifakmed ngam k’aringed e damumuw ngorad, ya ri mulan’rad.   
\p
\v 22 Gimed e pi sib, um folgad ko thin rok e pi’in yad e suwrad gimed u gubin ban’en, ma gathi kemus ni ngiyal’ ni yad be guymed e ngu’um rin’ed riy ni bochan e kemus ni ngam fel’gad u wun’rad, machane ngam rin’ed u fithik’ e tafinay nib yul’yul’, ni bochan e gimed be liyor ngak Somol.  
\v 23 Demturug e n’en ni gimed ra ngongliy ma ngam tiyan’med ngay, ni gowa gimed be maruwel rok Somol, ma gathi rok e girdi’.  
\v 24 Dab mpaged talin nra pi’ Somol puluwon ngomed; ya ra pi’ ngomed e tin ke tay ni fen e tirok’ e girdi’. Ya Kristus e ir e cha’ nriyul’ ni ir e suwon gimed ni gimed be pigpig ngak.  
\v 25 Ma en nib tagan e ngongol rok e demturug ko ir mini’, ma yira pi’ puluwon ko kireb nma ngongliy; ya Got e urngin e girdi’ nta’reb rogon u wan’.   
\c 4  
\p
\v 1 Gimed e pi’in bay e sib romed, mu ngongliyed e tin nib mat’aw ma bfel’ ngak e sib romed. Dab mpaged talin ni ku errogon gimed ni bay be’ u tharmiy ni ir e suwon gimed.   
\s1 Fonow  
\p
\v 2 Dab mpaged e meybil, mu tiyan’med ko ngiyal’ ni gimed be meybil riy, ma gimed be pining e magaer ngak Got.  
\v 3 Mu ku um yibiliyed gamow, nge bing Got e kanawo’ ngomow nge yag ni gu machib nigew e thin rok ngak e girdi’, ma gamow weliy e tin immoy nda nnang ni murung’agen Kristus. Ya ireray fan ni gu bay u kalbus e chiney.  
\v 4 Ere mmeybilgad nge yag ni gu weliy murung’agen nib tamilang, nrogon nthingar gu rin’.   
\p
\v 5 Um gonopiyed rogon pangimed ngak e pi’in ndawori mich Jesus Kristus u wun’rad, ma gubin ngiyal’ nra bung rogomed ni ngam weliyed e thin rok Got ngorad mi gimed weliy.  
\v 6 Ma gubin ngiyal’ nthingar umogned e thin ngorad ni bfel’ ma bay fan, ma thingar mu nanged rogon ni ngam pi’ed e fulweg nib mat’aw ko tin ke fith be’ nge be’ ngomed.   
\s1 Tin tomur e thin  
\p
\v 7 I Tykikus nib t’uf rodad ni walagdad ni girdi’en Kristus, ni ir reb e tapigpig nib yul’yul’ ma gamad nga ta’ab raba’ i maruwel ku Somol, e ir e bayi weliy salpeg ni gubin ngomed.  
\v 8 Ireray fan ni kug l’oeg ke yib ngomed, ni nge weliy salapmad ni gamad gubin ngomed nge felfelan’med.  
\v 9 Ma ke un Onesimus ngak, ni ir fa’anem ni walagdad ni girdi’en Kristus nrib t’uf rodad ma ba yul’yul’, me ir bigimed. Yow e bay ra weliyew ngomed urngin ban’en ni yibe rin’ u roy.   
\p
\v 10 Aristarkus, ni bay rog u kalbus e be ga’ar nge felan’ Got ngomed, ma ku errogon Mark, ni be’ rok Barnabas. (Nike taw e thin riy ngomed faram u rogon ni ngam t’ufeged ko ngiyal’ nra taw ngomed.)  
\v 11 I Joshua, ni yima pining Justus ngak, e ku errogon ni be ga’ar nge felan’ Got ngomed. Kemus e dalip i girdi’ nu Israel nra manged girdi’en Kristus ni yad be un ngog ko maruwel ni fan ko gagiyeg rok Got, ma rib ga’ e ayuw ni kar pi’ed ngog.   
\p
\v 12 I Epafras, ni gimed nga baraba’ me ir reb e tapigpig rok Kristus Jesus e be ga’ar e nge felan’ Got ngomed. Gubin ngiyal’ nri ma pi’ e meybil romed, nma wenig nagmed ngak Got ni nge ayuwegmed ngam pired ni gimed bmuduwgil me ilal e leam romed nrogon girdi’en Kristus, ma kari muduwgilan’med, ma gimed be rin’ e tin nib m’agan’ Got ngay.  
\v 13 Rayag ni nggu mang mich rok ngomed ko maruwel ni be tay nib gel ni fan ngomed, ma fan ko girdi’ nu Laodicea ngu Hierapolis.  
\v 14 I togta Luke nrib t’uf rodad, nge Demas e be lungurow e nge felan’ Got ngomed.   
\p
\v 15 Mogned ngak e pi’in ni walagdad ni girdi’en Kristus ni yad ma par u Laodicea nge fare pin i Nimfa nge girdi’en e galesiya ni yad ma mu’ulung nga naun rok ni be lungumad e nge felan’ Got ngorad.  
\v 16 Gimed ra mu’ i be’eg e re gi babyor ney mi gimed guy rogon ngkun be’eg ngak girdi’en e galesiya nu Laodicea. Mi gimed be’eg e babyor ni bay ni pi’ u Laodicea nge yib ngomed.  
\v 17 Me lungumed ngak Arkippus, “Mu guy rogon ngam mu’nag fare maruwel ni kan pi’ ngom ko maruwel rok Somol.”   
\p
\v 18 Re bugithin ni ba’aray e ri gag Paul e gu yoloy nga pa’ag: Nge felan’ Got ngomed. Dab mpaged talin e chen ni ka nin’ ngog!  
\p I Got e ngi i ayuwegmed.