\id 2PE  
\ide UTF8
\h 2 PETER 
\toc3 2 Pe 
\toc1 GIN MIGID E BABYOR NI PI’ PETER 
\toc2 2 Peter 
\mt2 GIN MIGID E BABYOR NI PI’  
\mt1 PETER  
\ip Gin migid e babyor ni pi’ Peter e yan ngak bo’or e tin som’on i girdi’en Kristus. I togopluw Peter ko maruwel rok e pi tamchib ni go’ bogi ban’en nge ngarogon ni fol bo’or e girdi’ u ngongolen e pi cha’nem, ni ngongolen e darngal ni wenegan e machib rorad. Kemus ni yira nang e thin rok Got nge murung’agen Somol Jesus Kristus ni yib ngodad u daken e pi’in nra guyed Jesus ma kar rung’aged e machib rok e rayag ni ngan chuw u fithik’ urngin fapi ngongol nib kireb nge machib ni go’ bogi ban’en. I yog boch fapi tamchib ni Kristus e dabki sul. Me tamilangnag Peter girdi’en Kristus u murung’agen e pin’ey. I yog ngorad ndawori sul Kristus ni bochan e dabun ni nge n’ag be’, ya ba’adag ni nge urngin e girdi’ miyad pi’ keru’rad nga urngin e denen ni yad be rin’.  
\is1 Tin ni bay riy  
\io1 Tabolngin 1:1–2  
\io1 Pong ni tay Got ngak e girdi’ 1:3–21  
\io1 Pi tamchib ni go’ bogi ban’en 2:1–22  
\io1 I Somol ni bay sul 3:1–18  
\c 1  
\p
\v 1 Re babyor ney e yib rok Simon Peter, ni ir reb e tapigpig me ir reb e apostel rok Jesus Kristus —  
\p Ngak e pi’in nu daken e mat’aw rok Got rodad nge Jesus Kristus ni ir e ma thapeg e girdi’ ngak Got e ke yag riy ngorad e michan’ nta’reb rogon feni ga’ fan ko biromad e michan’:   
\p
\v 2 Ngi i ayuwegmed Got ma be pi’ e gapas nga lanin’med nge yan i mus ngarogon u daken murung’agen Got ni kam nanged nge Jesus ni ir e Somol rodad.   
\s1 Pong nma tay Got ko girdi’ nge rogon nma mel’egrad  
\p
\v 3 Gelngin Got e ke pi’ ngodad urngin e tin nge yag ngodad ngad pired ko wok ni ir e mm’agan’ Got ngay ni bochan e kadnanged fa’anem ni ir e ke piningdad ni ngad uned ngak ko fla’ab ni bay rok ma gadad rin’ e tin nib mat’aw ni bod ir.  
\v 4 Ireray rogon nike tow’ath nagdad ko pin’en nib th’abi fel’ nike micheg ngodad, ya nge yag ngomed e tin ke weliy nra pi’ ngomed mi gimed thay ko ar’ar nma kireb nigey ni bay u roy u fayleng, me yag ngomed rarogon Got.  
\v 5 Ireray fan ni ngam athamgiliyed ngam puthuyed pangimed ni bfel’ ngarogon nike michan’med ngak Kristus; mi gimed puthuy e gonop nga pangimed ni bfel’;  
\v 6 mi gimed puthuy ko gonop romed e t’ar laniyan’; mi gimed puthuy e k’adan’ ko t’ar laniyan’ romed; mi gimed puthuy ko k’adan’ romed e yan nga laniyan’ Got;  
\v 7 ma yan nga laniyan’ Got ni gimed be tay e ngam puthuyed ngay rogon nib t’uf bigimed rok bigimed nrogon e pi’in kar walaggad u daken Kristus; ma rogon nib t’uf bigimed nrogon e pi’in kar walaggad u daken Kristus e ngam puthuyed e t’ufeg ngay.  
\v 8 Ireray e pin’en ni nge yag ngomed, ya rayag ngomed ni pire’ ma gimed ra pasig me yib fan murung’agen e Somol rodad i Jesus Kristus ni kam nanged.  
\v 9 Machane en ndariy e pin’ey rok e rib ngoch e changar rok ndabiyag ni nge guy ban’en, ma ke pag talin ni kireb ni i ngongliy kakrom e ka ni maluknag rok ke chuw.   
\p
\v 10 Ere pi walageg ni girdi’en Kristus, mu guyed rogon ngam athamgilgad nge yib fan e pong nike tay Got ngomed, nge rogon nike mel’egmed ngu’um pired riy; fa’an gimed ra rin’ ni aray rogon ma ri dabiyag ni ngam thaygad.  
\v 11 Ireray kanawo’en me yag nni pi’ mat’awmed ni aram e gimed ra yan ngalan e gin’en ni bayi par ndariy n’umngin nap’an, ni aram e gin’en ni suwon e Somol rodad i Jesus Kristus, ni ir e en nma thapegdad ngak Got.   
\p
\v 12 Ireray fan ni gubin ngiyal’ ni bay ug puguran ngomed e pin’ey, ni yugu aram rogon ni kam nanged ma kam pired ni gimed bmuduwgil u fithik’ e tin ni ir e ba riyul’ ni kam nanged.  
\v 13 Gu be finey ma bmat’aw ni ngu’ug puguran e pin’ey ngomed u n’umngin nap’an ni ku gub fos.  
\v 14 Ya gu manang ndabki n’uw nap’an mu gu pag e re dowef rog ney nra yim’, ni bod rogon feni tamilang ni yog e Somol rodad i Jesus Kristus ngog.  
\v 15 Ere bay gguy rogon ngu’um pired ndab mpaged talin e pin’ey ni gubin ngiyal’ u tomuren ni ku gum’.   
\s1 Pi’in nra guyed Kristus nga owcherad  
\p
\v 16 Da gu toergad nga bogi yat ni girdi’ e sunumeg nggu weliyed ngomed murung’agen gelngin e Somol rodad ni Jesus Kristus nge wub ni bayi tay. Ya gguyed nga owchemad feni sorok!  
\v 17 Ugumed u rom me tay Got ni Chitamangiy fan Jesus Kristus ni piliyeg ram’en downgin nge galgal ko ngiyal’ ni yib ba lam ngak, ni yib rok e en ni Th’abi Gil Tolangin ni be ga’ar e re lam nem, “Ireray Fakag nrib t’uf rog, ni kari felan’ug ngak!”  
\v 18 Gamad e gu rung’aged e re lam nem ni be yib u tharmiy ngomad nga but’ ko ngiyal’ ni ba’aram ni gamad bay rok u daken fare burey nib thothup.   
\p
\v 19 Aram fan ni kari pagan’mad ko thin rok Got ni i weliy fapi profet. Bfel’ ni ngam tiyan’med ko pi thin nem, ya bod ba magal ni be par ram’en u fithik’ e lumor nge yani mada’ ko fare Rran ni nge puf e woch riy me gal ram’en fasiran, ni t’ufen e kadbul, nge tamilangnag lanin’med.  
\v 20 Machane bin som’on e ngam ted fanmediyan ko re bugithin ni ba’aram ni ga’ar: dariy be’ nrayag rok ni gelngin e leam rok e nge maruwel ngay nge weliy fan bbugithin ni bay u lan e babyor nib thothup, ni profet e yi’iynag.  
\v 21 Ya dariy bbugithin ni yog e profet ni sum u laniyan’ be’, ya fare Kan Nthothup rok Got e yib i ying ngak e girdi’ ngar weliyed e thin nike yib rok Got ngorad.   
\c 2  
\s1 Pi tamchib ni go’ bogi ban’en  
\p
\v 1 Pi profet ni go’ bogi ban’en e m’ug u fithik’ e pi’in kakrom, ma ku aram rogon ni bay yib i m’ug e tamchib ni go’ bogi ban’en u fithik’med. Bay ra feked i yib ngomed e machib nra kireb nigey, ni machib nde riyul’, ma bay ra mithaged murung’agen e re Masta ni ir e ke biyuliyrad, ma aram miyad girngiy e riya’ nib tomgin nga dakenrad.  
\v 2 Ma bo’or e girdi’ ni bay ra folgad u ngongolen e pi cha’nem, ni ngongol nib kireb nike thum’ nga wuru’; ma bayi weliy e girdi’ e thin nib kireb nib togopluw ko fare Kanawo’ nib riyul’ ni bochan e pin’en ni be rin’ e pi cha’nem.  
\v 3 Pi tamchib nem ni go’ bogi ban’en e yad ba chogow ni salpiy, ma bay yo’or e salpiy rorad ni puluwrad ko machib ni yad be yog ngomed, ni machib ni yad e sum rorad. Machane En ni nge pufthin nagrad e ke fal’eg rogon ke par, ma En ni nge kireb nagrad e be par ni be od!   
\p
\v 4 Ya fapi engel nra denengad e de ta’rad Got, ya tharbegrad nga infiyerno, ni aram e gin kan chen nagrad riy u fithik’ e lumor,\f + \fr 2:4 \ft chen nagrad riy u fithik’ e lumor; \fq boch e babyor e bay riy ni \ft lan e pi low nib lumor.\f* yad be sonnag e Rofen ni Pufthin.  
\v 5 I Got e de pag e pi’in kakrom nde gechig nagrad, ya pag e ran nge tharey e nam ni tafen e girdi’ ni kireb; ma kemus ni pi’in ni ayuwegrad ndar uned ko yam’ e Noah, ni i machibnag e tin nib mat’aw, nge ku medlip i girdi’.  
\v 6 I Got e gechignag e binaw nu Sodom ngu Gomorrah ya ni urfiy e gali binaw nem, ni aram e ke dag ngak e pi’in kireb e n’en nra rin’ ngorad ni fa’anra ur pired nib kireb e ngongol rorad.  
\v 7 Me chuweg Lot u rom nde buch ban’en rok, ni ir be’ ni bfel’ ni i kireban’ ko ngongol ni darngal ni be ngongliy e girdi’ ni dariyfan e motochiyel u wun’rad.  
\v 8 Ya re mo’on nem ni bfel’ ni i par u fithik’rad u reb e rran nge reb e i guy ma i rung’ag e pin’em, ma be kireban’ ko ngongol rorad nib kireb.  
\v 9 Ere Somol e manang rogon ni nge ayuweg e pi’in yad ma fol rok ko gafgow nma yib ngorad, nge rogon ni nge tay e pi’in kireb u tan e gechig rok nge yan i mada’ ko Chirofen ni bayi pufthin nagrad Got,  
\v 10 ni ba ga’ ni pi’in yad be fol ko tin nib golong e ngongol ni be yim’ e dowef rorad ni bochan, ma dariyfan u wun’rad e gagiyeg ni be tay Got ngak e girdi’.  
\p Pi tamchib nem ni go’ bogi ban’en e darir tamdaggad ma yad ba uf, ma darir ted fan e pi engel nu tharmiy ni yad ba fla’ab; ya n’en ni yad ma rin’ e yad ma yog e thin nib kireb ngorad.  
\v 11 Mus ngak e pi engel ni yad ba gel ma kab sororad ngak e pi tamchib nem ni go’ bogi ban’en ma darir rogned e thin nib kireb ngak e pi cha’nem u p’eowchen Somol.  
\v 12 Machane pi girdi’ ney e yad be ngongol ni n’en ni yad be ar’arnag e ir e be gagiyeg nagrad, ni bod rogon e gamanman ni malboch ni kan gargelegrad ni nge kolrad e girdi’ ngan li’rad; ma pi girdi’ nem e yad ma yog e thin nib kireb nga bogi ban’en ndar nanged fan. Ma bay nli’rad ngarm’ad ni bod rogon e gamanman ni malboch;  
\v 13 puluwon ni bay ni pi’ ngorad e gafgow, ni bochan e gafgow ni kar ted ko girdi’. Ma rogon e felfelan’ ni yad ma tay e ngar ngongliyed u lan e tamilang e tin ni ir e be ar’arnag e dowef rorad nge tin ni ir e yad be yim’ ni bochan; ya yad ma girngiy e tamra’ nge ngachal nib kireb i yib ngomed ko ngiyal’ ni yad ma yib ra uned riy ngomed ko mu’ulung nge abich, ma yad be felfelan’ ko pi ngongol ni yad be rin’ ni ir e yad be bannag e girdi’ ngay!  
\v 14 Dariy ban’en ni yad ba’adag ni ngar changargad ngay ya kemus ni ppin nib darngal e yad ba’adag ni ngar changargad ngorad; ma ar’ar rorad ko denen e der tal. Ma yad ma waliy e pi’in ni me’waer e leam rorad ngar awgad ko wup rorad. Ma lanin’rad e ke ilal nga fithik’ e chogow. Ma yad be par ni yad bay u tan e gechig rok Got!  
\v 15 Ya kar paged fare pa’ i kanawo’ nib k’iy kar olobochgad; ma kar leked fare pa’ i kanawo’ ni lek Balaam ni be’ nib mo’on ni Beor e chitamngin, mi Balaam e t’uf rok e salpiy ni yira pi’ ngak ni fa’anra ngongliy e tin nib kireb,  
\v 16 machane min puwan’ ngak ko kireb nike ngongliy. Ya ba gamanman ni dongki rok e non ni bod lungun be’ nge taleg fare profet u ngonglen ni balyang.   
\p
\v 17 Pi girdi’ nem e yad bod e alublub ndakir yib e ran riy, ma yad bod e manileng ni be yan nagrad e nifeng nib gel; i Got e ke tay tagil’rad ko gin nrib talumor.  
\v 18 Yad ma yog e thin ni ufanthin nge thin ko balyang, ma yad be maruwel nga ngongolen e darngal ni be ar’arnag e dowef rorad ni fan e nge aw ko wup rorad e pi’in ka fini chuw u fithik’ e girdi’ nike oloboch.  
\v 19 Be lungurad e gadad e girdi’ e ba puf rogodad ni ngad rin’ed e tin gadad ba’adag, machane yad e kar pired ni kar manged sib ko ngongol nma kireb nigey nike mecham ngorad — ya demturug ban’en nra gel ngak be’ ma aram e ke par fa’anem ni kemang sib rok fare n’em.  
\v 20 Ya fa’anra chuw e girdi’ u fithik’ e tin nib kireb e ngongol u roy u fayleng ni ir e ma kireb nigey ni bochan e kar nanged e Somol rodad i Jesus Kristus ni ir e ma thapegdad ngak Got, miki kolrad e kireb bayay nge gel ngorad, ma aram e pi girdi’ nem e yad ra par nike gel boch e kireb rorad ko som’on.  
\v 21 Ya kabfel’ ni fa’an mang e ur pired ndar nanged kanawo’en e mat’aw ko bin kar nanged miyad pi’ keru’rad ko fare motochiyel nib thothup ni kan pi’ ngorad!  
\v 22 Ya n’en ni kar rin’ed e ke m’ug riy ni fare bugithin ni yima yog e ba riyul’ ni fa’ani ke lunguy, “Pilis e ma sul ko n’en nike sul u l’ugun nga but’,” ma, “Ba babiy ni kan luknag downgin ke be’ech e ma sul nge yan i pig u fithik’ e bar.”   
\c 3  
\s1 I Somol ni yog ni bayi sul  
\p
\v 1 Pi tafager rog, ni gimed ba t’uf rog! Gi ney e babyor e ke gaman e ruw yay ngay ni kug yol ngomed. U lan e gali yang i babyor ney e kug guy rogon riy ni nggu puguran ngomed e pin’ey ni aram e gu be pug e tafinay nib machalbog u lanin’med.  
\v 2 Gu ba’adag ni ngam leam niged fapi thin ni i yog fapi profet ni kakrom ni yad ba thothup, nge motochiyel ni yib rok Somol ni ir e ma thapegdad ngak Got ni fapi apostel romed e karogned ngomed.  
\v 3 Bin som’on e thingar mu nanged ni tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur mon’oggad ngomed  
\v 4 ni be lungurad, “I yog faram ni bay sul, errogon ni yog fa danga’? Ere bu uw? Chitamangidad e karm’ad, machane urngin ban’en ni ka be par ni karogon ni kanap’an e ngiyal’ ni sum e fayleng riy ke mada’ ko chiney!”  
\v 5 Machane daburad ni ngar tafinay niged e re bugithin ni ba’aray nib riyul’: kakrom e non Got me sum e pi tharmiy nge fayleng. Me yib e but’ u fithik’ e ran ngalang ni ran e yodoromnag,  
\v 6 ma ku ran ni fare ran ni yib nge tharey e nam e ir e kirebnag e bin kakrom e fayleng.  
\v 7 Machane lanelang nge re fayleng ney ni bay e chiney e ka re bugithin nem rok Got e ir e ke tay ni dabi kireb nge yan i mada’ ko ngiyal’ ni nge yib e nifiy i kirebnag. Ke tay Got ni dabi kireb ni fan ko chirofen ni bay ni pufthinnag e girdi’ nib kireb nge mu’ min kireb nagrad.   
\p
\v 8 Machane pi tafager rog ni gimed ba t’uf rog, dab mpaged talin e re bugithin ni ba’aray: rogon ko changar rok Somol e dariy ban’en nib thil u thilin ta’reb e rran nge bbiyu’ e duw, ya l’agruw ni ta’reb rogon u wan’.  
\v 9 Ya dawori sowath Somol ni nge rin’ e tin keyog nra rin’, ni bod rogon ni be leamnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba’adag ni nge urngin e girdi’ miyad pi’ keru’rad ko urngin e denen ni yad be rin’.   
\p
\v 10 Ya chirofen ni Rran rok Somol e bayi taw ni bod rogon ba moro’ro’. Chirofen nem e bay yan nga bayang lanelang ni be falgear lingan, ma urngin e tin ni bay u lanelang ban’en ni bayi yik’ nge kireb, ma fayleng nge urngin e tin bay riy e bayi chuw.  
\v 11 Fa’anra urngin ban’en ma bay ni kirebnag ni aray rogon, me ere mit i mang girdi’ e susun e ngam boded? Pangimed e nge par nib thothup ma kam pi’ed gimed nga pa’ Got,  
\v 12 ma gimed be sonnag e chirofen nem, ni ir e Rran rok Got, mi gimed athamgiliy nrogon nrayag romed nge papey nge taw ngay — Rofen ni ba’aram ni bay yik’ lanelang nge kireb e urngin ban’en ni bay u lanelang e bayi ranrannag e gowel.  
\v 13 Machane ke yog Got ni bay sum e bin nib be’ech e lanelang nge bin nib be’ech e fayleng, ni aram e tin nib mat’aw e ngongol e bay i par riy, ni ireray e pin’en ni gadad be sonnag.   
\p
\v 14 Pi tafager rog, n’umngin nap’an ni gimed be par ni gimed be sonnag e re Rran nem e ngu’um athamgiliyed ngam pired ni gimed bmachalbog ma dariy thibngimed u p’eowchen Got ma ngam pired nib aw e gapas u thilmed Got.  
\v 15 Mu leam niged e gumaen’ rok e Somol rodad, ni aram e tayim ni be pi’ ngomed ni ngam guyed rogon ngam thapgad ngak, ni bod rogon nike yoloy walagdad i Paul nib t’uf rodad murung’agen ke yib ngomed, ni gonopiy nge yoloy u rogon e gonop ni pi’ Got ngak.  
\v 16 Ireray rogon ni i yog u lan urngin yang e babyor rok ko ngiyal’ ni ba’aram ni i yoloy murung’agen e re bugithin ney. Bay boch ban’en u lan e babyor rok nib mo’maw’ ni ngan nang fan, ni girdi’ ndar nanged fan nge girdi’ ndar muduwgilgad e yad be tunguy fan ngar weliyed, ni bod rogon e n’en ni yad be rin’ nga yu thal e thin ni bay u lan e babyor nib thothup; ni aram e yad e kar girngiyed e gechig nga dakenrad ni aram e bay ni kireb nagrad.   
\p
\v 17 Machane gimed e pi tafager rog e go’ kam nanged e re bugithin ney. Ere mu gonopiyed gimed, nge dabiyag ni waliymed nga bayang e oloboch ni be tay e pi’in ndariyfan e motochiyel u wun’rad ngam thaygad ko gin kam pired riy ni dabi buch ban’en romed riy.  
\v 18 Machane Somol rodad i Jesus Kristus ni ir e ke thapegdad ngak Got e ngi i ayuwegmed ngu’um mon’oggad i yan ma gimed be nang i yan; ni ir e ngu’un tayfan e chiney i yan ngam’on ndariy n’umngin nap’an! Amen.