\id 1JN  
\ide UTF8
\h 1 JOHN 
\toc3 1 Jn 
\toc1 GIN M’ON E BABYOR NI PI’ JOHN 
\toc2 1 John 
\mt2 GIN M’ON E BABYOR NI PI’  
\mt1 JOHN  
\ip Gin m’on e babyor ni pi’ John e bay riy l’agruw ban’en ni ba ga’ fan. Ba’adag John ni nge ayuweg girdi’en Kristus ngar pired ni kar ta’ab girdi’gad Got nge Fak ni Jesus Kristus. Ma bin migid e fonow nagrad nge dab ra folgad ko machib ni go’ bogi ban’en, ya nge kirebnag thilrad Got nge Fak. I leamnag e pi tamchib nem ni urngin e kireb e ma yib u daken e par ko re fayleng ney. Aram fan nde mich u wun’rad ni Jesus e yib i ngal’ nib girdi’, ma yad ma weliy murung’agen e tin nu fayleng ban’en, mma motoyil e girdi’ nu fayleng ngorad ni bochan e mmil farad nga fayleng. Ma dar nanged kanawo’en ni ngan thap ngak Got u daken e yam’ ni tay Jesus ni Fak e Girdi’.  
\ip I John e yoloy nib tamilang ni Jesus e riyul’ ni ngal’ nib girdi’, ma urngin e pi’in ke mich Jesus u wun’rad me t’uf Got rorad e nge t’uf bagayad rok bagayad.  
\is1 Tin ni bay riy  
\io1 Tabolngin 1:1–4  
\io1 Tamilang nge lumor 1:5—2:29  
\io1 Pifak Got nge pifak mo’onyan’ 3:1–24  
\io1 Tin nib riyul’ nge tin ni gathi riyul’ 4:1–6  
\io1 Thingar ni par nib t’uf be’ rok be’ 4:7–21  
\io1 Gel ni yira tay u daken e michan’ ngak Kristus 5:1–21  
\c 1  
\s1 Fare thin ni murung’agen e yafos  
\p
\v 1 Gamad be yoloy ngomed murung’agen fare Thin ni murung’agen e yafos, ni ki immoy ko tabolngin: kug rung’aged, ma kug guyed nga owchemad; errogon, kug guyed, ma ke math pa’mad ngak.  
\v 2 Ma nap’an ni yib i m’ug e re yafos nem ma gamad guy, ere gamad be weliy murung’agen ma gamad be weliy ngomed murung’agen e yafos ndariy n’umngin nap’an ni i par rok e en ni Chitamangiy mi nib ndag ngomad.  
\v 3 Ma tin kug guyed ma kug rung’aged e gamad be yog ngomed, ni fan e ngam uned ngomad ngad ta’ab girdi’gad e en ni Chitamangiy nge en ni Fak ni Jesus Kristus.  
\v 4 Kug yoloyed murung’agen e ren’ey ni fan e nge yag ni yan i libug e felfelan’ rodad.   
\s1 I Got e tamilang  
\p
\v 5 Ba’aray e thin ni kug rung’aged rok Fak ni nggogned ngomed ni nge lungumad: I Got e tamilang, dariy bochu’uw e lumor u fithik’.  
\v 6 Ere fa’anra lungudad e kad ta’ab girdi’gad nike ta’reban’dad, ma ka gadad be par u fithik’ e lumor, ma aram e gadad be ban ko tin gadad be yog nge tin ni gadad be rin’.  
\v 7 Machane fa’anra ud pired u fithik’ e tamilang — ni bod ir ni bay u fithik’ e tamilang — ma aram e kad ta’ab girdi’gad nike ta’reban’dad, ma racha’en Jesus ni Fak e ir e be be’ech nagdad u urngin e denen rodad.   
\p
\v 8 Fa’anra lungudad e dariy e denen rodad, ma aram e gadad be ban nagdad ma tin nib riyul’ e dariy u fithik’ i lanin’dad.  
\v 9 Ma fa’an gadad ra weliy e denen rodad ngak Got mrayag ni ngad pagan’gad ngak, ya tin nib mat’aw e ra rin’ — ya ra n’ag fan u wan’ e denen rodad me be’ech nagdad u urngin e kireb ni kad ngongliyed.  
\v 10 Fa’anra lungudad e dawor da denengad, ma aram e kdogned ni Got e be’ nma lifith l’ugun, ma aram e dariy e thin rok u fithik’ i lanin’dad.   
\c 2  
\s1 Kristus nma ayuwegdad  
\p
\v 1 Kug yoloy e ren’ey ngomed, pifakag, ni fan e nge dab mu denengad; ma fa’anra chey ni denen be’, ma bay Jesus Kristus, ni be’ nib mat’aw, nma wenig nagdad ngak e en ni Chitamangiy.  
\v 2 Yu daken Kristus e ir e be n’ag Got fan e denen rodad riy, ni gathi kemus ni denen rodad, ya ku errogon e denen rok urngin e girdi’.   
\p
\v 3 Fa’an gadad ra fol ko tin ke yog Got ngodad ni ngad rin’ed, ma aram e ke muduwgil u wun’dad ni kadnanged ir.  
\v 4 Fa’anra yog be’ ni ga’ar, “Gu manang Got,” machane der fol ko thin rok, ma facha’ e be’ nma lifith l’ugun ma dariy e tin nib riyul’ u fithik’ i laniyan’.  
\v 5 Machane en nra fol ko thin rok Got e aram e cha’ ni rogon nib t’uf Got rok e ke yan i aw nrib fel’ rogon. Ireray rogon me muduwgil u wun’dad ni gadad be par u fithik’ Got.  
\v 6 Ma en nra ga’ar e be par u fithik’ Got e susun e ngi i par e wok rok ni bod rogon ni i rin’ Jesus Kristus.   
\s1 Fare motochiyel nib be’ech  
\p
\v 7 Gimed e pi tafager rog ni gimed ba t’uf rog, re motochiyel ney ni kug yoloy murung’agen ngomed e gathi bbe’ech; ya ka fare motochiyel ni kakrom ni ka fa binem ni immoy romed ko tabolngin. Fa bin kakrom e motochiyel e aram fare thin nni pi’ nge yib ni yigo’ kam rung’aged.  
\v 8 Machane bin ni kug yoloy e motochiyel keb ngomed e bbe’ech, ma tin nib riyul’ ni be yog e re motochiyel ney e kan guy rok Kristus ma ku errogon gimed; ni bochan e be chuw e lumor ma bin riyul’ e tamilang e ke gal ram’en.   
\p
\v 9 En nra ga’ar i ir e bay u fithik’ e re tamilang nem, machane ka be fanenikay walagen ni girdi’en Kristus, e kabay u fithik’ e lumor ke mada’ ko re awa ney.  
\v 10 En nib t’uf rok walagen ni girdi’en Kristus e be par u fithik’ e re tamilang nem, ma aram fan ndariy ban’en u fithik’ i laniyan’ nra pingeg be’ nge denen.  
\v 11 Machane en ni be fanenikay walagen ni girdi’en Kristus e bay u fithik’ e lumor; ni be yan u fithik’, ni der nang e gin be sor ngay, ya fare lumor e ke pingeg ke malmit.   
\p
\v 12 Gu be yol ngomed, pifakag, ni bochan e ke n’ag Got fan e denen romed u wan’ ni bochan fithingan Kristus.  
\v 13 Gu be yol ngomed, pi chitamangiy, ya gimed manang fa’anem ni immoy ko tabolngin. Ma gu be yol ngomed e pi’in ni pagel, ya kam gelgad ngak Fa’anem nib Kireb.   
\p
\v 14 Gu be yol ngomed e pi’in ni bitir, ya gimed manang e en ni Chitamangiy. Ma gu be yol ngomed, pi chitamangiy, ya kam nanged fa’anem ni immoy ko tabolngin. Ma gu be yol ngomed e pi’in ni pagel, ya kam gelgad; ya be par e thin rok Got u lanin’med ma kam gelgad ngak Fa’anem nib Kireb.   
\p
\v 15 Dabi t’uf romed e tin bay u roy u fayleng ara n’en nib milfan nga fayleng. Fa’anra t’uf romed e tin bay u fayleng, ma aram e de t’uf e en ni Chitamangiy romed.  
\v 16 Gubin ban’en nib milfan ngaray nga fayleng — ni aram e tin kireb ban’en ni yima ar’arnag, ni tin nra guy e girdi’ ma yad ba’adag ni nge yag ngodad, nge urngin ban’en ni bay u roy u fayleng nri ma uf e girdi’ ngay dariy reb e pin’ey ni yib rok e en ni Chitamangiy; ya urngin me yib rok e fayleng.  
\v 17 Re fayleng ney nge urngin ban’en ni bay riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.   
\s1 To’ogor rok Kristus  
\p
\v 18 Pifakag, ke chugur nga tungun! Kanog ngomed ni bay yib e To’ogor rok Kristus; me ere chiney e bo’or e to’ogor rok Kristus nike yib i m’ug, ma aram fan ni kad nanged nike chugur ko tungun.  
\v 19 Pi girdi’ ney e dar moyed ko ba’ rodad e girdi’, aram fan ni kar paged gadad; ya fa’an mang e yad girdi’en e ba’ rodad e girdi’ ma kar pired rodad. Machane kranod ni bochan e nge m’ug nib tamilang ndariy bagayad nri girdi’en e ba’ rodad e girdi’.   
\p
\v 20 Machane ke pi’ Kristus fare Kan Nthothup ngomed, aram fan ni gimed gubin ma kam nanged e n’en nib riyul’.  
\v 21 Gu be yol ngomed ni gathi bochan e da mu nanged e n’en nib riyul’, machane bochan e gimed manang, ma kigimed manang ndariy bbugithin nde riyul’ ni ka’a yib rok e n’en nib riyul’.   
\p
\v 22 Ere mini’ e en ni be lifith l’ugun? En ni ir e be yog ni Jesus e gathi ir fa’anem i Kristus. Ireram e cha’ ni ir e To’ogor rok Kristus — ya ir e dabun e en ni Chitamangiy nge en ni Fak.  
\v 23 Ya en nra dabuy e en ni Fak Got e ku errogon ni aram e ke dabuy e en ni Chitamangiy; ma en nra mich u wan’ e en ni Fak Got e ku errogon e en ni Chitamangiy nike yag ngak.   
\p
\v 24 Mu guyed rogon nge dab mpaged talin e thin rok Got nni fek i yib ngomed ni kam rung’aged ko som’on. Fa’anra dab mpaged talin e tin kam rung’aged ko som’on, ma aram e gubin ngiyal’ ni bay um pired ni kam ta’ab girdi’gad e en ni Fak Got nge en ni Chitamangiy.  
\v 25 Ma ba’aray e n’en ni yog Kristus nra pi’ ngodad — ni aram e yafos ndariy n’umngin nap’an.   
\p
\v 26 Kug yoloy e ren’ey ni murung’agen e pi’in yad be guy rogon ni ngar ban niged gimed.  
\v 27 Machane gimed e ke pi’ Kristus e Kan Nthothup rok ngomed. N’umngin nap’an ni be par e Kan Nthothup rok romed e dariy rogon ni nge yib be’ i fil ban’en ngomed. Ya fare Kan Nthothup e be fil ngomed murung’agen urngin ban’en, ma tin be fil ngomed e ba riyul’, ma gathi de riyul’. Ere mfolgad ko tin be fil e Kan Nthothup ngomed ngam pired u fithik’ Kristus.   
\p
\v 28 Er rogon, pifakag, mpired u fithik’ Kristus, nge dab da tamdaggad ko ngiyal’ nra yib i m’ug riy me siy da mithgad rok ni bochan e tamra’ rodad ngak ko fare Rran nra yib riy.  
\v 29 Gimed manang ni Kristus e bmat’aw; ere susun e ngam nanged ni gubin e girdi’ nma rin’ e tin nib mat’aw e yad pifak Got.   
\c 3  
\s1 Pifak Got  
\p
\v 1 A mu guyed ngarogon fadad t’uf rok e en ni Chitamangiy! Rogon ni gadad bt’uf rok e ri ba ga’, ni aram tapgin ma kanog ni gadad pifak Got, ma riyul’ ni gadad pifak. Aram fan ni girdi’ nu fayleng e dar nanged gadad, ya dar nanged Got.  
\v 2 Pi tafager rog ni gimed ba t’uf rog, chiney e gadad pifak Got, machane dawori tamilangan’dad u rogodad ni bay darod da pired. Machane ba’aray e tin gadad manang: nap’an nra yib i m’ug Kristus ma gadad ra bod ir, ya bay da guyed ir nrogon.  
\v 3 Gubin e girdi’ nike l’agan’rad ngak Kristus ni aray rogon e ra bagayad ma be tay ir nib machalbog, ni bod rogon feni machalbog Kristus.   
\p
\v 4 Ya en nra denen e ba kireb e rok nike th’ab e motochiyel rok Got; ya denen e aram e kan th’ab fare motochiyel.  
\v 5 Gimed manang ni m’ug Kristus ni bochan e nge fek e denen ko girdi’ nge chuweg, ma ir e dariy e denen rok.  
\v 6 Aram fan ni gubin e girdi’ ni be par u fithik’ Kristus e dakurir denengad i yan; machane en nra i denen i yan e ri dawori guy ma dawori nang Kristus.   
\p
\v 7 Pifakag, dab mpaged be’ nge ban nagmed! En nra rin’ e tin nib mat’aw e bmat’aw ni bod feni mat’aw Kristus.  
\v 8 Ma en nra i denen i yan e ke par nike mil suwon ngak fare mo’onyan’, ya fare mo’onyan’ e ke denen ko tabolngin. Ireray fan ni yib i m’ug Fak Got, ni bochan e nge kirebnag e maruwel rok e re mo’onyan’ nem.   
\p
\v 9 En kemang fak Got e dakir denen i yan, ya ke yib rarogon Got ngak; ma bochan i Got e kemang Chitamngin, ma aram fan ndabkiyag ni nge denen i yan.  
\v 10 Ba’aray e ren’en nib gagiyel nib thil u thilin e pi’in ni pifak Got nge pi’in ni pifak mo’onyan’: en nde rin’ e tin nib mat’aw ara de t’uf rok e en ni walagen ni girdi’en Kristus e gathi ir be’ ni fak Got.   
\s1 Nge bigimed me t’uf rok bigimed  
\p
\v 11 Ya thin rok Got ni kam rung’aged ko tabolngin e ba’aray rogon: thingari bagadad me t’uf rok bagadad.  
\v 12 Thingar dab da boded Kain ni i par nib milfan ngak Fa’anem nib Kireb, me li’ walagen ni pumo’on nge yim’. Mangfan ni li’ Kain e cha’nem? Bochan e ngongol ni i ngongliy Kain e ba kireb, ma ngongol ni i ngongliy walagen e bmat’aw.   
\p
\v 13 Pi walageg, dab mu gin gad ngay ni fa’anra fanenikaymed e girdi’ nu fayleng.  
\v 14 Gadad manang ni kad chuwgad ko yam’ kadbad ko ba’ ni bay e yafos riy; kadnanged ni bochan e ke t’uf rodad pi walagdad ni girdi’en Kristus. En ndariy e t’ufeg rok e kab yam’.  
\v 15 En ni be fanenikay walagen ni girdi’en Kristus e be’ nma thang e fan ko girdi’; ma gimed manang ni be’ nib tathang e fan ko girdi’ e dawori yag e yafos ndariy n’umngin nap’an ngak.  
\v 16 Ba’aray tapgin ma kadnanged fan e t’ufeg: Kristus e ke pi’ e pogofan rok ni fan ngodad. Ere ku er rogodad nsusun e ngad pi’ed e pogofan rodad ni fan ngak pi walagdad!  
\v 17 Fa’anra bo’or ban’en rok be’ ma be guy be’ ni walagen ni girdi’en Kristus nike gafgow nthingari yag ban’en ngak, me fek owchen rok, mra di’in me ga’ar e ba t’uf Got rok?  
\v 18 Pifakag! Rogon nib t’uf Got nge girdi’ rodad e dabi par ni kemus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad nma m’ug ko ngongol.   
\s1 Pagan’ u mit Got  
\p
\v 19 Ireray rogon ma gadad nang ni gadad bmu’un ko tin riyul’. Ireray rogon me pagan’dad u p’eowchen Got.  
\v 20 Ya fa’anra yog lanin’dad ngodad ni gadad ba kireb, ma kadnanged ni Got e ka ba ga’ nga lanin’dad, ni gubin ban’en ma manang.  
\v 21 Pi tafager rog, fa’anra dabi yog lanin’dad ngodad ni gadad ba kireb ma ba pagan’dad u p’eowchen Got.  
\v 22 Demturug e n’en ni gadad ra ning ngak mma pi’ ngodad, ni bochan e gadad be fol ko tin keyog ngodad ma gadad be rin’ e tin nib m’agan’ ngay.  
\v 23 Ba’aray e tin ni yog ni ngad rin’ed: ni aram e nge pagan’dad nga fithingan Fak ni Jesus Kristus me bagadad me t’uf rok bagadad, ni bod rogon ni yog Kristus ngodad ni ngu’ud rin’ed.  
\v 24 En nra fol ko tin keyog Got e be par u fithik’ Got ma be par Got u fithik’ fa’anem. Ireray rogon ma gadad nang ni be par Got u fithik’dad: gadad manang ni bochan fare Kan Nthothup nike pi’ ngodad.   
\c 4  
\s1 Bin riyul’ ni Kan Nthothup nge bin ni gathi Kan Nthothup  
\p
\v 1 Pi tafager rog nri gimed ba t’uf rog, dabi pagan’med ngak urngin e pi’in yad be yog ni bay fare Kan Nthothup rorad, ya ngam sikeng niged yad ngam nanged ko re kan ni bay rorad e yib rok Got fa dangay. Ya bo’or e profet ni yugu ban’en ni kar weargad nga urngin yang.  
\v 2 Ere ba’aray rogon ni gimed ra nang ko Kan Nthothup rok Got fa dangay: gubin e girdi’ ni yad be weliy ni Jesus Kristus e yib i ngal’ ni girdi’ nrayag ni nge yim’ e dowef rok e bay fare Kan Nthothup rorad ni ir e yib rok Got.  
\v 3 Ma en nra weliy nde riyul’ e re bugithin ney ni murung’agen Jesus, e dariy rok fare Kan Nthothup ni yib rok Got. Ya re kan ni ba’aram ni bay rok e ke yib rok e To’ogor rok Kristus; kam rung’aged ni bay yib, me ere chiney e ke taw ngaray nga fayleng.   
\p
\v 4 Machane gimed, pifakag, e bmil famed ngak Got, ma kam gelgad ko fapi profet ni go’ bogi ban’en; ya fare Kan Nthothup ni bay u fithik’med e kab gel ngak fare kan ni bay u fithik’ e pi’in nib mil farad ngaray nga fayleng.  
\v 5 Yad ma weliy murung’agen e tin nu fayleng ban’en, mma motoyil e girdi’ nu fayleng ngorad ni bochan e bmil farad nga fayleng.  
\v 6 Machane gadad e bmil fadad ngak Got. En ni manang Got e ma motoyil ngodad; ma en nde mil suwon ngak Got e der ma motoyil ngodad. Ireray kanawo’en me yag nda nanged e n’en nib thil ko Kan ko tin riyul’ nge kan ko tin nib oloboch.   
\s1 I Got e t’ufeg  
\p
\v 7 Pi tafager rog ni gimed ba t’uf rog, nge bagadad me t’uf rok bagadad, ya rogon ni nge t’uf Got rodad nge girdi’ e yib rok Got ngodad. En nib t’uf Got rok nge girdi’ e ir be’ ni fak Got, ma manang Got.  
\v 8 En nde t’uf Got rok nge girdi’ e be’ nde nang Got ni bochan e Got e ba t’uf e girdi’ rok.  
\v 9 Ba’aray rogon ni dag Got ni gadad ba t’uf rok: i l’oeg Fak ni kari maagirag rok ngaray nga fayleng ni fan e nge yag e yafos ngodad u daken.  
\v 10 Ba’aray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’oeg Fak nge yib, nu daken Fak e nge n’ag Got fan e denen rodad riy.   
\p
\v 11 Pi tafager rog ni gimed ba t’uf rog, fa’anra ireray rogon ni gadad ba t’uf rok Got, me ere susun e nge bagadad me t’uf rok bagadad.  
\v 12 Dariy be’ ni ka’a guy Got; ma fa’anra bagadad ma ba t’uf rok bagadad, ma aram e be par Got u fithik’dad, ma rogon ni gadad ba t’uf rok nike af ngodad e ke ilal u fithik’dad ke yan i aw ngarogon ni kari fel’.   
\p
\v 13 Ba’aray rogon ma ke michan’dad ngay ni gadad be par u fithik’ Got ma be par u fithik’dad: ke pi’ e Kan Nthothup rok ngodad.  
\v 14 Ma kad guyed ma ka dogned ngak yugu boch e girdi’ ni en ni Chitamangiy e l’oeg Fak nge yib ni ir e en ni nge thapeg e girdi’ nu fayleng ngak Got.  
\v 15 En nra weliy ni Jesus e Fak Got e aram e be par Got u fithik’ fa’anem, ma fa’anem e be par u fithik’ Got.  
\v 16 Gadad manang ma bmich u wun’dad ni gadad ba t’uf rok Got.  
\p I Got e t’ufeg, ma en nra i par nib t’uf Got rok nge girdi’ e be par u fithik’ Got ma be par Got u fithik’ fa’anem.  
\v 17 Ba’aray fan ni rogon nib t’uf Got rodad nge girdi’ e nge yan i aw ngarogon u fithik’dad, ni fan e ngari pagan’dad ko Chirofen ni bayi pufthinnag Got e girdi’ riy, ni bochan e gadad be par u roy u fayleng ni bod ir.  
\v 18 Ra ba t’uf Got nge girdi’ rok be’ ma der rus fa’anem; ya rogon ni nge t’uf Got nge girdi’ rok be’ e ra yan i aw ngarogon ma ra chuweg urngin e marus rok fa’anem. Ere fa’anra be rus be’, ma rogon ni nge t’uf Got rok nge girdi’ e dawori yan i aw ngarogon, ya marus e bay rogon ko gechig.   
\p
\v 19 Ba t’uf Got rodad nge girdi’ ni bochan e Got e som’on ni at’ufegdad.  
\v 20 Fa’anra ga’ar be’, “Ba t’uf Got rog”, machane be fanenikay walagen ni girdi’en Kristus, ma be lifith l’ugun. Ya dabiyag ni nge t’uf Got rok, ni be’ nder guy ni fa’anra de t’uf rok walagen ni girdi’en Kristus ni be’ ni be guy.  
\v 21 Ere ba’aray e n’en ni yog Kristus ni ngad rin’ed ni ga’ar: en nib t’uf Got rok e ku errogon nthingari t’uf rok walagen ni girdi’en Kristus.   
\c 5  
\s1 Gel ni kad ted ko fayleng  
\p
\v 1 En nra mich u wan’ ni Jesus e ir fare Messiah e kemang be’ ni fak Got; en nib t’uf be’ nib matam rok e ku ba t’uf rok e en ni fak fare matam.  
\v 2 Ba’aray rogon ma gadad ra nang nib t’uf rodad e pi’in ni fak Got: fa’anra gadad be par nib t’uf Got rodad ma gadad be fol ko tin keyog ni ngad rin’ed.  
\v 3 Ya ba’aray fan ni nge t’uf Got rodad: fan e ngad folgad ko tin keyog ni ngad rin’ed. Ma tin keyog ni ngad rin’ed e gathi rib mo’maw’,  
\v 4 ya ra reb i fak Got mrayag rok ni nge gel ko tin nde m’agan’ Got ngay u fayleng. Ba’aray rogon ma gadad gel ko pin’en nde m’agan’ Got ngay u fayleng: fa’anra pagan’dad ngak Kristus.  
\v 5 Mini’ e rayag ni gel ko tin nde m’agan’ Got ngay u fayleng? Kemus ni en nike mich u wan’ ni Jesus e ir Fak Got.   
\s1 N’en ni micheg ko mini’ Jesus Kristus  
\p
\v 6 Jesus Kristus e ir fa’anem ni yib ni ran ko tawfe rok nge racha’en ko yam’ ni tay e micheg ko ir mini’. Gathi yib ni kemus ni ran e mich rok, machane ran nge racha’. Ma fare Kan Nthothup e ke micheg nib riyul’ e ren’ey; ya fare Kan Nthothup e ir e riyul’.  
\v 7 Dalip ban’en ni be micheg e re bugithin ney,  
\v 8 fare Kan Nthothup, nge ran, nge racha’; ma dalip ni gubin ni be micheg e re bugithin ney.  
\v 9 Ke riyul’ u wun’dad e mich riy nike pi’ e girdi’; ma mich riy nike pi’ Got e kab gel, ni ireray e mich nike pi’ Got u murung’agen Fak.  
\v 10 Ere en nra michan’ ngak e en ni Fak Got e bay e re mich ney u laniyan’; machane en nde mich Got u wan’ e aram e ke yog ni Got e be lifith l’ugun, ya de mich u wan’ e tin keyog Got ni murung’agen Fak.  
\v 11 Ere ba’aray e mich riy: Got e ke pi’ e yafos ndariy n’umngin nap’an ngodad, nre yafos nem e yib ngodad u daken Fak.  
\v 12 En ni bay Fak Got rok e bay e re yafos ney rok; ma en ndariy Fak Got rok e dariy rok e re yafos ney.   
\s1 Yafos ndariy n’umngin nap’an  
\p
\v 13 Kug yoloy e re bugithin ney ni ngeb ngomed ni bochan e ngam nanged nike yag e yafos ndariy n’umngin nap’an ngomed — ni gimed e pi’in ke michan’med nga fithingan e en ni Fak Got.  
\v 14 Aram fan nib pagan’dad u p’eowchen Got; bmuduwgil u wun’dad nra rung’ag e tin ni gadad be yog ni fa’an gadad ra ning ban’en ngak ni ban’en nib m’agan’ ngay.  
\v 15 Demturug e ngiyal’ ni gadad ra ning ban’en ngak ma be rung’ag e n’en ni gadad be yog; ere fa’anra gadad manang nib riyul’ e re bugithin ney, me ere ka gadad manang ni gadad ra ning ban’en ngak ma ra pi’ ngodad.   
\p
\v 16 Fa’anra guy be’ walagen ni girdi’en Kristus nike ngongliy reb e denen ni dabi fek fa’anem ko yam’, ma susun e nge meybil ngak Got, ni ir e ra pi’ e yafos ngak fa’anem. Re bugithin ney e bay rogon ngak e pi’in ni kar ngongliyed e denen ni dabi fekrad ko yam’. Machane bay e denen nma fekey ko yam’, ma dagur yog ni ngam meybilgad ngak Got u murung’agen e binem.  
\v 17 Urngin e kireb ni yima ngongliy ma denen, machane bay e denen ni dabi fekey ko yam’.   
\p
\v 18 Gadad manang ndariy be’ ni kemang fak Got ni kayigi pi’ nga daken be denen, ya en ni Fak Got e be ayuweg fa’anem, ma Fa’anem nib Kireb e dabkiyag ni nge rin’ ban’en ngak.   
\p
\v 19 Gadad manang nib mil fadad ngak Got, ma tin ni kabay e girdi’ nu fayleng e ke suweyrad Fa’anem nib Kireb.   
\p
\v 20 Gadad manang ni en ni Fak Got e ke yib ma ke tamilangnag an’dad ni ngad nanged fa bin riyul’ e Got. Gadad bay u fithik’ e bin riyul’ e Got — u fithik’ Fak ni Jesus Kristus. Ir e bin riyul’ e Got, ma ir e yafos ndariy n’umngin nap’an.   
\p
\v 21 Pifakag, mpired u orel rok e tin nde riyul’ e got!