\id ZEP 
\ide UTF-8
\h Nabi Sofoni Sora
\toc1 Nabi Sofoni Alaa Falan Naxan Sɛbɛ
\toc2 Sofoni
\mt1 Sofoni
\mt2 Nabi Sofoni Alaa Falan Naxan Sɛbɛ
\ip Nabi Sofoni kawandini ito sɛbɛxi nɛn yanyina nde ɲɛɛ kɛmɛ sennin ɲɔxɔn benun Yesu xa bari. Yanyina nde a tan nan nabiya falane ti benun Xabakuki xa a nabiya wanla fɔlɔ. A yi falan tima waxatin naxan yi, Manga Yosiya munma yi Isirayila yamaan maxili singen, alogo e xa Alaa sariyan suxu tinxinni. Na taruxun mato Mangane Kitabu firinden kui a sora 23.1-28.
\ip Sofoni naxa a Alaa wanla rakamalima yamanane ma ikii nin: Ala Yuda muxune nun Yerusalɛn muxune makitima nɛn (1.1 han 2.3). A yi Yuda yamaan dɛxɔn siyane kala (2.4-15). A mɔn yi Yerusalɛn yitɔn a na yelin fe ɲaxin bɛ a yi, a yi yama xuruxin lu na alogo a xa dunuɲa muxune birin mabandun a yɛtɛ ma (3.1-20).
\ip Sofoni a falama nɛn a lanna mi nɔɛ luyɛ Ala nun a yamaan tagi xa na muxune mi ba a yamaan yɛ naxanye e yɛtɛ hayun kataxi e Marigina yamarine rabeɲin. Koni muxun naxanye xuruxi Alaa yamaan yɛ, Ala ne xanuxi ki faɲi (2.3 e nun 3.12).
\c 1
\p
\v 1 Alatala yi falan ti Kusi a dii xɛmɛn Sofoni xa. Kusi findixi Gedaliyaa dii xɛmɛn nan na. Gedaliya yi findi Amari a dii xɛmɛn na. Amari yi findixi Xesekiyaa dii xɛmɛn nan na. A falaxi Yuda mangan Yosiya waxatin nin Amɔn ma dii xɛmɛna.
\p
\v 2 Alatalaa falan ni ito ra, a naxa,
\q “N seene birin naxɔrima nɛn bɔxɔ xɔnna fari.
\q
\v 3 N na adamadiine nun subene birin naxɔrima nɛn,
\q n yi xɔline nun yɛxɛne raxɔri,
\q e nun seen naxanye muxu ɲaxine birama yulubini.
\q N mi muxu yo luyɛ bɔxɔ xɔnna fari.”
\q Alatalaa falan nan na ra.
\b
\q
\v 4 “N na n yiini bandunma nɛn Yuda kaane nun Yerusalɛn kaane birin xili ma.
\q N yi Baali suxurene birin ɲan e yi,
\q yamaan yi ɲinan e ki muxune xɔn
\q naxanye yi saraxane bama e xa,
\q
\v 5 e nun naxanye e xinbi sinma kore banxin xuntagi
\q kore xɔnna yanban seene batudeni,
\q e nun naxanye e kɔlɔma Alatala yi,
\q e mɔn yi e kɔlɔ e gbee ala Mɔlɔkɔ yi,
\q
\v 6 e nun naxanye e xun xanbi soxi Alatala yi
\q naxanye mi Alatala fenma,
\q e mi a maxɔdinma.”
\s Alatalaa kiti sa lɔxɔna fe
\q
\v 7 Ɛ raxara Marigina Alatala yɛtagi,
\q bayo Alatalaa lɔxɔn bata maso.
\q Alatala bata saraxani tɔn,
\q a yi a muxu xilixine rasariɲan.
\b
\q
\v 8 Anu Alatala naxa,
\q “N ma saraxa ba lɔxɔni,
\q n kuntigine nun manga diine saranma nɛn e fe ɲaxine ra,
\q e nun naxanye birama siya gbɛtɛne namunne fɔxɔ ra.
\q
\v 9 Na lɔxɔni,
\q n muxune saranma nɛn e fe ɲaxine ra
\q naxanye birin e sanna ratuganma so dɛɛn gbingbinna xun ma\f + \fr 1.9\fr* Suxure batune mi yi e sanna tima \fk so dɛɛn gbingbinna\fk* fari. Yanyina nde na yi findixi binyen nan na e suxurene xa. A mato Samuyɛli Singen 5.4-5 kui.\f*
\q e nun naxanye birin e kanne banxine rafema nafunle ra
\q naxanye sɔtɔxi funmaan nun yanfane yi.”
\q
\v 10 Alatalaa falan ni ito ra, a naxa,
\q “Na lɔxɔni,
\q gbelegbele xuiin tema nɛn taan so dɛɛn na
\q dɛnaxan xili Yɛxɛ Dɛna,
\q e nun wuga xuiin Yerusalɛn Taa Nɛnɛni
\q e nun sɔnxɔ xui gbeena geyane yi.
\q
\v 11 Naxanye dɔxi taan laben na,
\q ɛ gbelegbele!
\q Bayo yulane birin bata halagi,
\q gbeti fenne birin naxɔrima nɛn.
\q
\v 12 Na waxatini,
\q n lɛnpun nadɛgɛma nɛn,
\q n yi Yerusalɛn taan birin yigbɛ.
\q N yi na muxune saran e hakɛne ra,
\q naxanye e wasa soxi e fe ɲaxine yi,
\q e lu a falɛ, e naxa,
\q ‘Alatala mi fefe rabama,
\q a faɲina hanma a ɲaxina.’
\q
\v 13 Yaxune e nafunle birin tongoma nɛn yɛngɛni,
\q e banxine yi kala.
\q E banxine tima nɛn,
\q koni e mi soma e kui.
\q E wudine sima nɛn,
\q koni e mi e bogine igen minma.”
\b
\q
\v 14 Alatalaa lɔxɔ gbeen bata maso,
\q a bata maso,
\q a famatɔɔn ni i ra.
\q Hali sofa wɛkilɛxine gbelegbelema nɛn yigitɛgɛni
\q Alatala fa lɔxɔn xuiin bun.
\q
\v 15 Na lɔxɔn findixi xɔlɔ lɔxɔn nan na.
\q Kɔntɔfinla nun xamin lɔxɔna,
\q ɲaxankatan nun halagi lɔxɔna,
\q dimin nun nii rafɔrɛn lɔxɔna,
\q kundaan nun kuye yi fɔrɔn lɔxɔna.
\q
\v 16 Sofane xɔta fe xuiin minima nɛn na lɔxɔni
\q e sɔnxɔ yɛngɛ so xinla ma
\q taa sɛnbɛmane nun e rabilinne yinne xili ma.
\b
\q
\v 17 N muxune luma nɛn ɲaxankatani,
\q e yi sigan ti alo danxutɔne
\q amasɔtɔ e bata Alatala yulubin tongo.
\q E wunla radinma nɛn
\q alo burunburunna bɔxɔn ma,
\q e fatin yi kun alo ɲaman bɔxɔn ma.
\q
\v 18 E gbetin nun e xɛmane mi nɔɛ e rakisɛ
\q Alatalaa xɔlɔn fa lɔxɔni.
\q A xɔlɔ gbeen yi bɔxɔ xɔnna birin halagi alo tɛɛna,
\q a muxune birin naxɔri a fari ki magaxuxini.
\c 2
\q
\v 1 Ɛ malan, ɛ bode to,
\q ɛ tan yama yagitarena,
\q
\v 2 benun waxati saxin xa a li,
\q benun lɔxɔni ito xa dangu
\q alo se dagin foyeni,
\q benun Alatalaa xɔlɔ gbeen xa ɛ li,
\q benun Alatalaa xɔlɔ lɔxɔn xa fa ɛ ma.
\q
\v 3 Ɛ Alatala fen,
\q ɛ tan yamanan muxu xuruxine,
\q ɛ tan naxanye a sariya kɛndɛn ligama.
\q Ɛ tinxinyaan fen,
\q ɛ lu yɛtɛ magodoni.
\q Waxatina nde, ɛ tangama nɛn
\q Alatalaa xɔlɔ lɔxɔn ma.
\s Gbalona siyane xa
\q
\v 4 Gasa taan nabeɲinma nɛn,
\q Asikalɔn taan halagima nɛn,
\q Asadodi kaane yi kedi yanyin na,
\q Ekirɔn yi raxɔri.
\q
\v 5 Gbalon na muxune xa,
\q naxanye dɔxi fɔxɔ igen dɛ
\q siyaan naxanye sa kelixi Kereti yamanani.
\q Ɛ tan Kanan kaane,
\q ɛ tan Filisitine,
\q Alatala falan tima ɛ xili ma,
\q a naxa, “N na ɛ raxɔrima nɛn,
\q muxu yo mi luyɛ ɛ yi.”
\q
\v 6 Fɔxɔ igen dɛxɔnne findima nɛn
\q xuruse rabadene nun kula yirene ra xuruse kantanne xa.
\q
\v 7 Mɛnne findima nɛn Yuda muxu dɔnxɛne gbeen na.\f + \fr 2.7\fr* \fk muxu dɔnxɛne:\fk* Yuda kaane fama suxudeni yɛngɛni nɛn. Muxun naxanye luma e nii ra yɛngɛn ɲan xanbini, ne nan ma fe falaxi be.\f*
\q E yi e xuruseene raba na.
\q Ɲinbanna ra,
\q e sa e sa Asikalɔn kaane banxine kui.
\q Bayo, Alatala, e Ala,
\q e malima nɛn,
\q Ala yi e muxune raxɛtɛ e ma
\q naxanye yi suxi yɛngɛni.
\q
\v 8 N bata Moyaba konbi ti xuine mɛ
\q e nun Amonine n ma yamaan magelema kii naxan yi,
\q e yi e yamanan danne fari sa,
\q ba Isirayila bɔxɔn na.
\q
\v 9 Alatala Sɛnbɛn Birin Kanna falan ni ito ra,
\q Isirayilaa Ala naxa,
\q “N tan habadan Ala,
\q n bata n kɔlɔ n yɛtɛni,
\q Moyaba yamanan luma nɛn
\q alo Sodoma taana,
\q Amoni yamanan yi lu
\q alo Gomora taana,
\q sɛxɛ ɲaxine dɛnaxan yi,
\q fɔxɔn gema dɛnaxan yi,
\q dɛnaxan halagixi han habadan.
\q N ma yamaan muxu dɔnxɛne yi ne yii seene tongo.
\q N ma muxun naxanye na lu,
\q ne yi e bɔxɔn tongo.”
\b
\q
\v 10 Na fena e sɔtɔma e wason saranna nan na,
\q bayo e bata Alatala Sɛnbɛn Birin Kanna yamaan konbi
\q e yi keli e xili ma.
\q
\v 11 Alatala ɲaxuma ayi nɛn e ra,
\q bayo a e gbee alane birin naxɔrima nɛn yamanani.
\q Hali yire makuyene yi,
\q siyane birin a batuma nɛn e konne yi.
\q
\v 12 Ɛ tan Kusi kaane,\f + \fr 2.12\fr* \fk Kusi:\fk* Yamanan naxan Misiran faxa ra Nila baan dɛ. Fati fɔrɛ yamanan nan yi a ra.\f*
\q n na ɛ fan yɛngɛma nɛn,
\q n yi ɛ faxa.
\b
\q
\v 13 A kelima nɛn sogeteden kɔmɛnna binna yamanan xili ma,
\q a yi Asiriya raxɔri.
\q A yi Niniwa taan halagi,
\q a na findi tonbonna ra.
\q
\v 14 Xuruseene yi na findi e kuruden na,
\q e nun suben sifan birin.
\q Singbinne nun sagalene yi xi a sɛnbɛtɛn longonne nun kondene yi.
\q Sɔnxɔ xuiin minima nɛn foye soden na, a naxa,
\q “Taan bata kala fefe fɔlɔ so dɛɛn ma,
\q bayo suman xalanbene birin bata mini kɛnɛnni.”
\q
\v 15 Taa faɲi makantanxini ito mato,
\q naxan yi a falama, a naxa,
\q “Ba n tan na, gbɛtɛ mi na!”
\q Taani ito kalaxi di,
\q a findi subene birin konna ra?
\q Naxan yo na dangu a dɛxɔn,
\q na kanna kolinma a ma nɛn,
\q a yiin ti a ma, a kabɛ.
\c 3
\s Yerusalɛn kaane mi e tuli mati
\q
\v 1 Gbalon na taan xa,
\q naxan findixi taa murutɛxi xɔsixin na,
\q ɲaxankata tiine dɛnaxan yi.
\q
\v 2 Mɛn kaane mi ndende xui ramɛma,
\q e mi e tuli matima maxadi xuine ra,
\q e mi laxi Alatala ra,
\q e mi e masoma e Ala ra.
\q
\v 3 E kuntigine luxi nɛn
\q alo yata xaɲɛne.
\q E kitisane luxi nɛn
\q alo kankon naxanye suben suxun ɲinbanna ra,
\q e mi sese ramara xɔtɔnna xa.
\q
\v 4 E nabine xurutare,
\q e muxune yanfanten.
\q E saraxaraline se sariɲanxine raxɔsima,
\q e sariyan kalama.
\b
\q
\v 5 Anu, Alatala dɔxi taani nɛn
\q alogo a xa a tinxinyaan mayita.
\q A kiti kɛndɛn sama lɔxɔ yo lɔxɔ waxatin birin.
\q Koni fe ɲaxi rabane mi yagima mumɛ.
\b
\q
\v 6 N bata siyane raxɔri
\q n yi e taa makantanxine kala.
\q N yi e taane nun e kirane findi yire rabeɲinxine ra.
\q Muxe mi fa dɔxɔma e taane yi,
\q muxe mi danguma e kirane xɔn.
\q
\v 7 N na a fala nɛn mɛn kaane xa, n naxa,
\q “Xa ɛ yi gaxu n yɛɛ ra nun,
\q xa ɛ yi tin n ma maxadi xuiin na nun,
\q n mi yi ɛ dɔxɔden kalama nun.
\q N nɛma ɛ fe ɲaxine saranma ɛ ra,
\q ɛ tan mɔn ɛ mafurama fe ɲaxi rabadeni ɛ feene birin yi.”
\q
\v 8 Alatalaa falan ni ito ra, a naxa,
\q “Ɛ waxatin mamɛ,
\q n fama ɛ suxudeni yɛngɛni waxatin naxan yi.
\q Bayo, n bata a ragidi,
\q n xa siyane nun yamanane birin malan,
\q n yi n ma xɔlɔ gbeen nagodo e xili ma.
\q Bayo n ma xɔlɔ gbeen bɔxɔn birin halagima nɛn alo tɛɛna.”
\s Siyane findima nɛn Ala gbeen na
\q
\v 9 Nayi, n fala sariɲanxine rasoma nɛn yamanan muxune dɛ,
\q alogo e xa Alatala maxandi a xinla ra.
\q E birin yi a batu e bode xɔn.
\q
\v 10 Naxanye n batuma,
\q naxanye raxuyaxi ayi bɔxɔn xun xɔn,
\q ne sa fama nɛn saraxane ra n xa
\q sa keli Kusi yamanan baane kidi ma.\f + \fr 3.10\fr* \fk Kusi:\fk* Yamanan naxan Misiran faxa ra Nila baan dɛ. Fati fɔrɛ yamanan nan yi a ra.\f*
\q
\v 11 Na lɔxɔni,
\q ɛ mi fa yagima ɛ kɛwanle fe ra,
\q ɛ n yulubin naxanye tongo
\q bayo, n wasodene birin bama nɛn ɛ yɛ na lɔxɔni.
\q Ɛ yi ba ɛ yɛtɛ yigboɛ n ma geya sariɲanxin fari.
\q
\v 12 N muxu diɲaxine nun yiigelitɔne luma nɛn ɛ yɛ,
\q naxanye e yigi sama Alatala yi.
\q
\v 13 Isirayila muxu dɔnxɛne mi fa tinxintareyaan nabama sɔnɔn.
\q E mi wule falama.
\q E mi yanfa falane tima.
\q E na e yigiyaden li waxatin naxan yi
\q muxu yo mi e yigbɛtɛnɲɛ mɛnni.
\q
\v 14 Siyon kaane, ɛ ɲaxan!
\q Isirayila kaane,
\q ɛ gbelegbele sɛwani!
\q Yerusalɛn kaane,
\q ɛ sɛwa ɛ bɔɲɛn ma feu!
\q
\v 15 Alatala bata kitin masiga ɛ ra,
\q a yi ɛ yaxune ragi ɛ bun.
\q Alatala, Isirayila mangana ɛ xɔn.
\q Ɛ mi fa gaxuma gbalo fe yo yɛɛ ra.
\q
\v 16 Muxune a falama nɛn Yerusalɛn kaane xa na lɔxɔni,
\q e naxa, “Siyon kaane,
\q ɛ nama gaxu!
\q Siyon kaane, ɛ nama tagan!
\q
\v 17 Alatala, ɛ Ala ɛ xɔn,
\q naxan ɛ rakisima a sɛnbɛ gbeeni.
\q A sɛwama nɛn ɛ fe ra han!
\q A i madɛndɛnma nɛn a xanuntenyani,
\q a sɔnxɔ sɛwani ɛ fe ra.
\q
\v 18 N sali lɔxɔn ɲaxankatane bama nɛn ɛ ma,
\q naxanye bata yi findi goronna nun yagin na ɛ ma.
\q
\v 19 Na waxatini,
\q naxanye birin ɛ ɲaxankata,
\q n kelima nɛn ne xili ma.
\q Naxanye ɲaxankataxi,
\q n yi ne rakisi.
\q Naxanye yi raxuyaxi ayi,
\q n yi ne malan.
\q N yi tantunna nun xinla fi e ma yirene birin yi,
\q e yagin sɔtɔ dɛnaxanye yi.”
\q
\v 20 Alatala naxa,
\q “Na lɔxɔni,
\q n mɔn fama nɛn ɛ ra ɛ konni,
\q n yi ɛ malan.
\q Bayo n na ɛ findima nɛn xili kanne nun binye muxune ra
\q bɔxɔn muxune birin yɛ,
\q n na fa ɛ muxune ra ɛ yɛtagi waxatin naxan yi
\q naxanye yi suxi yɛngɛni.”