\id ZEC 
\ide UTF-8
\h Nabi Sakari Sora
\toc1 Nabi Sakari Alaa Falan Naxan Sɛbɛ
\toc2 Sakari
\mt1 Sakari
\mt2 Nabi Sakari Alaa Falan Naxan Sɛbɛ
\ip Nabi Sakari a nabiya falani itoe sɛbɛxi nɛn yanyina nde ɲɛɛ kɛmɛ suulun ɲɛɛ mɔxɔɲɛ benun Marigi Yesu xa bari. E nun Nabi Xage yi walima waxati kedenna nin. Yuda bɔnsɔnna muxune bata yi keli konyiyani Babilɔn taani. E katama e mɔn xa Ala Batu Banxin ti.
\ip Kitabun yireni ito yitaxunxi dɔxɔ firin. Sakari sora keden han sora solomasɛxɛna, na fe toone nan yɛbama naxanye luxi alo xiyena. Ne bunna nɛɛn fa fala yamaan mɔn na Yerusalɛn taan nun Ala Batu Banxin ti, na findima waxati nɛnɛn nan na Alaa muxune xa.
\ip Kitabun yireni ito bode fɔxɔn waxatina nde a fe falama, manga faɲina nde yi fama Alaa mangayaan na waxatin naxan yi Isirayila yamanani (Sakari 9 han Sakari 12). Na nabiya falane Marigi Yesu a fe falaxi ɲɛɛ kɛmɛ suulun benun a xa liga. Na mato Sakari 9.9 nun 11.12-13 nun 12.10 nun 13.7 kui. A fe mɔn sɛbɛxi Matiyu 21.4-5 nun Matiyu 26.31 nun Maraka 14.27 nun Yoni 19.37 kui.
\c 1
\p
\v 1 Dariyusi a mangayaan ɲɛɛ firinden kike solomasɛxɛdeni, Alatala yi falan ti Nabi Sakari xa, Bereki a dii xɛmɛna, Yido mamandenna. A naxa:
\p
\v 2 “Alatala xɔlɔ gbeen ti nɛn ɛ benbane xili ma. 
\v 3 Koni, i xa a fala e xa fa fala Alatala Sɛnbɛn Birin Kanna naxa iki: ‘Ɛ mɔn xa fa n ma,’ Alatala Sɛnbɛn Birin Kanna ito nan falaxi, a naxa, ‘N fan fama nɛn ɛ ma.’ Alatala Sɛnbɛn Birin Kanna falan nan na ra. 
\v 4 Ɛ nama lu alo ɛ benbane, nabi fonne yi ito ralima naxanye ma: Alatala Sɛnbɛn Birin Kanna ito nan falaxi, a naxa, ‘Ɛ xɛtɛ ɛ fe ɲaxine nun ɛ kɛwali ɲaxine fɔxɔ ra.’ Koni e mi e tuli mati, e mi n xuiin namɛ. Alatalaa falan nan na ra. 
\v 5 Ɛ benbane minɛn? Nabine go? E ɲɛɲɛ habadan? 
\v 6 Anu, n falane nun sariyan naxanye yamari nabine ma, n ma walikɛne, ne xa mi ɛ benbane li ba? Nayi e yi tubi, e yi a fala, e naxa, ‘Naxan lanxi nxɔ feene nun kɛwanle ma, Alatala Sɛnbɛn Birin Kanna bata na nan liga nxu ra alo a bata yi a ragidi kii naxan yi.’ ”
\s Fe to singena alo xiyena: Soone
\p
\v 7 Kike fu nun kedenden xii mɔxɔɲɛn nun naanindena, Sebati kikena, Dariyusi a mangayaan ɲɛɛ firindena, Alatala yi falan ti Nabi Sakari xa, Bereki a dii xɛmɛna, Yido mamandenna.
\p
\v 8 N fe toon tixi nɛn kɔɛɛn na alo xiyena. N soo ragina nde nan to soo gbeela fari, a yi tixi miriti wudine tagi darani. Soo gbeele, a gbeeli makatunxine e nun a fixɛne yi a xanbi ra. 
\v 9 N yi a maxɔdin, n naxa, “Nanse itoe ra, n kanna?” Malekan naxan yi falan tima n xa, na yi n yabi, a naxa, “N xa a yita i ra naxan e ra.” 
\v 10 Muxun naxan yi tixi miriti wudine tagi, na yi a fala, a naxa, “Alatala ne nan xɛxi bɔxɔni sigadeni.” 
\v 11 E yi dɛntɛgɛn sa Alatala malekan xa naxan yi tixi miriti wudine tagi, e naxa, “Nxu bata bɔxɔn birin yisiga, bɔxɔn muxune birin sabatixi bɔɲɛ xunbenli.” 
\v 12 Nayi, Alatalaa malekan yi a fala, a naxa, “Alatala Sɛnbɛn Birin Kanna, i mi tinma kininkininɲɛ Yerusalɛn nun Yuda taane ma han waxatin mundun yi, i xɔlɔxi naxanye ma xabu ɲɛɛ tonge solofere?”\f + \fr 1.12\fr* \fk ɲɛɛ tonge solofere:\fk* Na mato Yeremi 25.11 nun Yeremi 29.10 kui.\f* 
\v 13 Malekan naxan yi falan tima n xa, Alatala yi fala faɲine ti na xa, a yi a masabari.
\p
\v 14 Malekan naxan yi falan tima n xa, na yi a fala n xa, a n xa falani ito rali: “Alatala Sɛnbɛn Birin Kanna ito nan falaxi, a naxa, ‘Xɔxɔlɔn gbeena n yi Yerusalɛn nun Siyon ma fe ra.\f + \fr 1.14\fr* Ala \fk xɔxɔlɔn,\fk* bayo e nun a yamaan bata yi layirin xidi alo futun xidima kii naxan yi. Na kui, Ala a yamaan masuxuma alo xɛmɛna a ɲaxanla makantanma kii naxan yi. A mi tinma a xa bira se gbɛtɛ fɔxɔ ra a batu xinla ma, a mɔn mi tinma yama xɔɲɛn xa a raxɔri. Na feen mato Xɔrɔyaan 20.5 kui.\f* 
\v 15 Siya gbɛtɛn naxanye bɔɲɛ xunbenli, n bata xɔlɔ ne ma han! Amasɔtɔ n yi xɔlɔxi nɛn ndedi, koni e tan bata yihadin fari sa.’ 
\v 16 Nanara, Alatala ito nan falaxi, a naxa, ‘N mɔn fama nɛn Yerusalɛn taani kininkininni, n ma banxin mɔn yi ti. Se maliga lutin mɔn yibandunma nɛn Yerusalɛn taan xun ma.’ Alatala Sɛnbɛn Birin Kanna falan nan na ra. 
\v 17 I mɔn xa ito rali: Alatala Sɛnbɛn Birin Kanna ito nan falaxi, a naxa, ‘Ɲaxunna mɔn soma nɛn n ma taane yi. Alatala mɔn Siyon muxune madɛndɛnma nɛn, a mɔn yi Yerusalɛn sugandi.’ ”
\s Fe toon firindena alo xiyena: Fenne nun xabune
\p
\v 18 N yi n yɛɛn nakeli n yi fe toon ti alo xiye. Feri naanin yi n yɛtagi. 
\v 19 Malekan naxan yi falan tima n xa, n yi na maxɔdin, n naxa, “Nanse itoe ra?” A yi n yabi, a naxa, “Sɛnbɛne nan e ra naxanye Yuda nun Isirayila nun Yerusalɛn raxuyaxi ayi.”
\p
\v 20 Na xanbi ra, Alatala yi xabu naanin yita n na. 
\v 21 N yi maxɔdinna ti, n naxa, “Itoe faxi nanse ligadeyi be?” A yi n yabi, a naxa, “Fenni itoe nan Yuda raxuyaxi ayi fefe, han muxu yo mi fa nɔɛ a xunni tɛ. Koni xabuni itoe tan faxi e magaxudeni, e yi siya gbɛtɛne sɛnbɛne rabira, naxanye kelixi Yuda bɔxɔn xili ma alogo e xa Yuda kaane raxuya ayi.”
\c 2
\s Fe toon saxandena alo xiyena: Se maliga lutina
\p
\v 1 N yi n yɛɛn nakeli n yi fe toon ti alo xiye. Se maliga lutin yi suxi muxuna nde yii. 
\v 2 N yi a maxɔdin, n naxa, “I sigan minɛn?” A yi n yabi, a naxa, “N Yerusalɛn nan maligama, alogo n xa a yigboon nun a kuyan kolon.”
\p
\v 3 Malekan naxan yi falan tima n xa, na yi siga, koni maleka gbɛtɛ yi fa na ralan. 
\v 4 A yi a fala a xa, a naxa, “I gi, sa a fala banxulanni ito xa, a Yerusalɛn kaane nun xuruseene wuyama ayi nɛn han! Yinna mi fa nɔɛ taan nabilinɲɛ. 
\v 5 Alatalaa falan ni ito ra, a naxa, ‘N tan yɛtɛna a kantanma nɛn alo tɛɛna a rabilinni, n yi n nɔrɔn nagodo a yi.’ ”
\p
\v 6 “Ɛ xɔdɔxɔ de!
\q Ɛ gi kɔmɛn fɔxɔn yamanan bun!”
\q Alatalaa falan nan na ra,
\q “Bayo n na ɛ raxuya ayi nɛn
\q bɔxɔn tongon naaninne ma.”
\q Alatalaa falan nan na ra.
\q
\v 7 “Ɛ xɔdɔxɔ!
\q Siyon kaane, ɛ gi,
\q ɛ tan naxanye dɔxi Babilɔn yi.”
\q
\v 8 Alatala Sɛnbɛn Birin Kanna naxa iki:
\q “A bata n xɛ binyeni siyane ma
\q naxanye fuxi ɛ ma,
\q bayo naxan na a yiin din ɛ ra,
\q a luxi nɛn
\q alo na bata a yiin din Ala yɛ diin na.
\q
\v 9 N kelima nɛn e xili ma yati,
\q e konyine yi e yii seene birin tongo yɛngɛni.
\q Nayi, ɛ a kolonma nɛn
\q a Alatala Sɛnbɛn Birin Kanna nan n nafaxi.
\q
\v 10 Ɛ xuini te sɛwani,
\q ɛ tan Siyon kaane,
\q bayo n fama nɛn,
\q n yi lu ɛ tagi.”
\q Alatalaa falan nan na ra.
\q
\v 11 Siya wuyaxine fama nɛn Alatala ma na lɔxɔni
\q e yi findi n ma yamaan na.
\q N luma nɛn ɛ tagi,
\q ɛ yi a kolon
\q a Alatala Sɛnbɛn Birin Kanna nan n nafaxi ɛ ma.
\q
\v 12 Yuda mɔn findima nɛn Alatala gbeen na,
\q yamana sariɲanxina,
\q a mɔn yi Yerusalɛn sugandi.
\q
\v 13 Adamadiin birin xa a dundu Alatala yɛtagi,
\q amasɔtɔ a bata keli mini a yire sariɲanxini.
\c 3
\s Fe toon naanindena alo xiyena: Saraxarali kuntigina
\p
\v 1 A yi saraxarali kuntigi Yosuwe yita n na, a yi tixi Alatalaa malekan yɛtagi. Setana yi tixi a yiifanna ma a tɔɲɛgɛdeni. 
\v 2 Alatalaa malekan yi a fala Setana xa, a naxa, “Alatala xa falan ti i xili ma, Setana, a xa falan ti i xili ma, a tan naxan Yerusalɛn sugandixi! Tɛɛ yege dungin xa mi yi xɛmɛni ito ra ba naxan baxi tɛɛni?”\f + \fr 3.2\fr* Yosuwe ito baxi kelideni Babilɔn taani a yi konyiyani dɛnaxan yi. E nun Yahudiyana ndee nan faxi Yerusalɛn yi.\f* 
\v 3 Dugi xɔsixine nan yi ragodoxi Yosuwe ma, a yi tixi malekan yɛtagi. 
\v 4 Naxanye yi tixi a yɛtagi, malekan yi a fala ne xa, a naxa, “Ɛ dugi xɔsixine ba a ma!” A mɔn yi a fala Yosuwe xa, a naxa, “A mato, n bata i hakɛne ba i ma n dugi faɲine ragodo i ma.” 
\v 5 N yi a fala, n naxa, “E xa namu sariɲanxin so a xunna!” E yi namu sariɲanxin so a xunna, e yi dugine ragodo a ma. Alatala malekan yi tixi na.
\p
\v 6 Alatala malekan yi ito rali Yosuwe ma, a naxa, 
\v 7 “Alatala Sɛnbɛn Birin Kanna ito nan falaxi, a naxa, ‘Xa i sigan ti n ma kirane xɔn, xa i n ma yamarine suxu, i tan nan dɔxɔma n ma banxin nun n ma tanden xun na, n yi tiden fi i ma itoe yɛ naxanye tixi be. 
\v 8 Nayi, saraxarali kuntigi Yosuwe, i tan nun i fɔxɔrabiran naxanye dɔxi i yɛtagi, ɛ tuli mati! Amasɔtɔ muxuni itoe findima fe famatɔne taxamasenne nan na. N nan n ma walikɛɛn nafama nɛn, naxan xili “Nimɛna.” 
\v 9 Amasɔtɔ gɛmɛn mato n naxan dɔxi Yosuwe yɛtagi. Fɔxɔ solofere nan na gɛmɛ kedenna ma. N sɛbɛnla tima nɛn a ma. Alatala Sɛnbɛn Birin Kanna falan ni ito ra: N yamanani ito hakɛn bama nɛn a ma lɔxɔ kedenni. 
\v 10 Na lɔxɔni, muxun birin a lanfaan xilima nɛn, e yi dɔxɔ e manpa binla nun xɔdɛ binla nininna ra.’ Alatala Sɛnbɛn Birin Kanna falan nan na ra.”
\c 4
\s Fe toon suulundena alo xiyena: Lɛnpu dɔxɔ sena
\p
\v 1 Malekan naxan yi falan tima n xa nun, na mɔn yi fa, a n nakeli alo muxun naxan naxulunxi xixɔnli. 
\v 2 A yi n maxɔdin, a naxa, “I nanse toma?” N yi a yabi, n naxa, “N lɛnpu dɔxɔ se xɛma daxin nan toma, e nun ture ramaradena a xuntagi. Lɛnpu solofere a ma. Ture godode solofere nan turen sama lɛnpu soloferene kui. 
\v 3 Oliwi wudi bili firin tixi ture ramaraden dɛxɔn ma, keden a yiifanna ma, keden a kɔmɛnna ma.” 
\v 4 Malekan naxan yi falan tima n xa, n yi na maxɔdin, n naxa, “N kanna, nanse itoe ra?” 
\v 5 A yi n maxɔdin, a naxa, “I mi a kolon?” N yi a yabi, n naxa, “N mi a kolon, n kanna.” 
\v 6 Nayi, a yi a fala n xa, a naxa, “Alatalaa falan ni i ra, a naxan tixi Sorobabeli ma, a naxa, ‘A mi ligama sɛnbɛn xɔn hanma fangana, koni fɔ n ma Niin barakan nin.’ Alatala Sɛnbɛn Birin Kanna falan nan na ra.”
\p
\v 7 “Hali geya gbeen naxan Sorobabeli yɛɛ ra, na findima nɛn lantaan na. A fama nɛn Ala Batu banxin konde gɛmɛn na, yamaan yi e xuini te, e naxa, ‘Ala xa hinan a ra habadan!’ ”
\p
\v 8 Alatala yi falan ti n xa, a naxa, 
\v 9 “Sorobabeli bata banxini ito ti fɔlɔ, a mɔn a raɲanma nɛn. Nayi, ɛ a kolonma nɛn a Alatala Sɛnbɛn Birin Kanna nan n nafaxi ɛ ma. 
\v 10 Nde feene fɔlɔn magelema nɛn a to xurun? Yamaan ɲaxanma nɛn e na gɛmɛ matinxin seen to Sorobabeli yii.”
\p Na lɛnpu soloferene findixi Alatala yɛɛne nan na naxanye bɔxɔn birin yisigama.
\p
\v 11 N yi a maxɔdin, n naxa, “Nanse Oliwi wudi firinna ne ra, lɛnpu dɔxɔ seen yiifanna nun a kɔmɛnna ma?” 
\v 12 N mɔn yi a maxɔdin, n naxa, “Nanse Oliwi wudi yii firinna ne ra, naxanye ture godode xɛma daxi firinne dɛxɔn, oliwi turen danguma naxanye kui?” 
\v 13 A yi n maxɔdin, a naxa, “I mi a kolon naxan ne ra?” N yi a yabi, n naxa, “N mi e kolon, n kanna.” 
\v 14 Nayi, a yi a fala n xa, a naxa, “E findixi muxu firinne\f + \fr 4.14\fr* Na \fk muxu firinne\fk* findixi saraxarali Yosuwe nun yamana kanna Sorobabeli nan na.\f* nan na naxanye masusan turen na alogo e xa wali dunuɲa birin Marigin xa.”
\c 5
\s Fe toon sennindena alo xiyena: Danga kɛdina
\p
\v 1 N mɔn yi n yɛɛn nakeli, n fe toon ti alo xiye, n kɛdin mafilinxin to kore. 
\v 2 Malekan yi a fala n xa, a naxa, “I nanse toma?” N yi a yabi, n naxa, “N kɛdin nan toma kore, a kuya nɔngɔnna yɛ mɔxɔɲɛ, a yigbo nɔngɔnna yɛ fu.”
\p
\v 3 Nayi, a yi a fala n xa, a naxa, “Dangan nan na ra naxan xuyama ayi yamanan birin yi. A sɛbɛxi kɛdin fɔxɔ kedenna ma fa fala muɲadene birin kedima nɛn yamanani. A mɔn sɛbɛxi fɔxɔ kedenna boden ma fa fala naxanye birin e kɔlɔma wuleni, ne fan kedima nɛn. 
\v 4 Alatala Sɛnbɛn Birin Kanna falan ni ito ra: ‘N dangani ito rafama nɛn, a yi so muɲadene birin ma banxine yi e nun muxun naxanye birin e kɔlɔma wuleni n xinli. A luma nɛn e banxine kui alogo a xa e nun a xalanbene nun a gɛmɛne birin kala.’ ”
\s Fe toon soloferedena alo xiyena: Ɲaxanla debedin kui
\p
\v 5 Malekan naxan yi falan tima n xa, na yi a maso, a a fala n xa, a naxa, “I yɛɛn nakeli, i a mato naxan minin be iki.” 
\v 6 N yi a maxɔdin, n naxa, “Nanse a ra?” A yi n yabi, a naxa, “Liga se debedin nan famatɔ a ra.” A mɔn yi a fala, a naxa, “Na nan toma yamanan muxun birin yi.”
\p
\v 7 E yi debedin dɛ raganla yɔxɔ daxini te, n yi ɲaxanla nde to dɔxi a kui. 
\v 8 Malekan yi a fala n xa, a naxa, “Fe ɲaxin misaala nan ɲaxanli ito ra.” Na xanbi ra, a mɔn yi ɲaxanla madɛtɛn debedin kui, a yi a dɛraganla dɛtɛn a dɛ ra.
\p
\v 9 N yi n yɛɛn nakeli, n yi fe toon ti alo xiyena, n yi ɲaxalan firin to tuganɲɛ. Foyen yi e gabutɛne yi alo yaya xɔnla gabutɛne. E yi debedin tongo, e te a ra kore. 
\v 10 Malekan naxan yi falan tima n xa, n yi na maxɔdin, n naxa, “E debedin xalima minɛn?” 
\v 11 A yi a fala n xa, a naxa, “E sa banxin nan tima a xa Babilɔn yamanani. Banxin na raɲan, debedin dɔxɔma nɛn mɛnni, e yi a batu.”
\c 6
\s Fe toon solomasɛxɛdena alo xiyena: Wontoro naaninne
\p
\v 1 N mɔn yi n yɛɛne rakeli, n yi fe toon ti alo xiye. N wontoro naanin to minɛ geya firinne longonna ra, sulan geyaan nan yi ne ra. 
\v 2 Soo gbeele nan yi wontoro singen bandunma, a firindena soo fɔrɛne, 
\v 3 a saxandena, soo fixɛne, a naanindena, soo gbeeli makatunxine. 
\v 4 Malekan naxan yi falan tima n na, n yi na maxɔdin, n naxa, “Nanse itoe ra n kanna?” 
\v 5 Malekan yi a fala n xa, a naxa, “Bɔxɔn tongon naaninne foyene nan ne ra. E kelixi dunuɲa birin Marigin nan fɛma. 
\v 6 Soo fɔrɛne naxan bandunma, na sigama kɔmɛnna yamanan binna nin. Na xanbi ra, a fixɛne nan minima. A makatunxine sigama yiifanna yamanan binna nin.” 
\v 7 A gbeeli makatunxine yi mini, e yi wama bɔxɔni siga feni. Malekan yi a fala e xa, a naxa, “Ɛ siga, ɛ bɔxɔni siga!” E yi bɔxɔni siga. 
\v 8 A yi n xili, a naxa, “A mato, naxanye sigama kɔmɛnna yamanan binni, ne bata n nii yifan n ma kɔmɛnna yamanani.”
\s Yosuwe a mangayana
\p
\v 9 Alatala yi falan ti n xa, a naxa, 
\v 10 “I xa suxu muxune kiseene rasuxu, Xɛlidayi, Tobiya e nun Yɛdaya. I xa siga Sofoni a dii Yosiya a banxini to, e faxi dɛnaxan yi keli Babilɔn yi. 
\v 11 I xa gbetin nun xɛmaan tongo. I yi mangaya taxamasenna rafala i yi a so saraxarali kuntigi Yosuwe xun na, Yehosadaki a dii xɛmɛna. 
\v 12 I xa a fala a xa a Alatala Sɛnbɛn Birin Kanna ito nan falaxi, a naxa, ‘Muxun ni i ra naxan xili “Nimɛna,” a sabatima nɛn a dɛnaxan yi, a yi Alatala Batu Banxin ti. 
\v 13 A tan nan Alatala Batu Banxin tima, mangayaan binyen yi lu a tan ma. A dɔxɔma nɛn a mangaya gbɛdɛni, a nɔɔn ti. Saraxaralina nde fan dɔxɔma nɛn a mangaya gbɛdɛni. Bɔɲɛ xunbenla yi lu e firinna tagi.’ 
\v 14 Mangaya taxamasenna luma nɛn Alatala Batu Banxini ɲɔxɔ lu seen na Xelemi nun Tobiya nun Yɛdaya nun Sofoni a dii Xeni xɔn. 
\v 15 Muxun naxanye makuya, ne fama nɛn, e wali Alatala Batu Banxin tideni. Nayi, ɛ a kolonma nɛn a Alatala Sɛnbɛn Birin Kanna nan n nafaxi ɛ ma. Na ligama nɛn, xa ɛ Alatala xuiin namɛ ki faɲi, ɛ Ala.”
\c 7
\s Sun suxuna fe
\p
\v 1 Dariyusi a mangayaan ɲɛɛ naaninden kike solomanaaninden xii naaninde lɔxɔni, Kisilewi kikena, Alatala yi falan ti Sakari xa. 
\v 2 Betɛli kaane bata yi Sareseri nun Regemi-Meleki nun e muxune rasiga Alatala maxandideni. 
\v 3 E yi lan e Alatala Sɛnbɛn Birin Kanna a saraxaraline nun nabine maxɔdin, e naxa, “Nxu lan nxu yi lu sunuxi ba, nxu lu sunna suxɛ kike suulunden ma ba, alo nxu a liga kii naxan yi ɲɛɛ wuyaxi danguxine yi?”
\p
\v 4 Alatala Sɛnbɛn Birin Kanna yi falan ti n xa, a naxa, 
\v 5 “A fala yamanan muxune birin xa e nun saraxaraline, i naxa, ‘Ɛ to yi sunna suxuma ɛ yi sunu kike suulundene nun kike soloferedene yi, xabu ɲɛɛ tonge solofere, ɛ yi sunna suxuma n tan nan xa ba? 
\v 6 Ɛ to yi ɛ dɛgema, ɛ yi ɛ min, ɛ mi yi a ligama ɛ yɛtɛ xan xa ba? 
\v 7 Alatala mi falan ne xan ti nabi singene xɔn ba, Yerusalɛn nun a rabilinna taane yi sabatixi bɔɲɛ xunbenli waxatin naxan yi, muxune yi dɔxi Negewi nun Sefala geyane yi waxatin naxan yi?’ ”
\s Sariya kɛndɛna
\p
\v 8 Alatala yi falan ti Sakari xa, a naxa, 
\v 9 “Alatala Sɛnbɛn Birin Kanna ito nan falaxi, a naxa, ‘Ɛ xa kitin sa tinxinni, ɛ hinan ɛ bode ra, ɛ yi kininkinin. 
\v 10 Ɛ nama kaɲa gilɛne nun kiridine nun xɔɲɛne nun yiigelitɔne tɔrɔ, ɛ nama miriya ɲaxin tongo ɛ bode xili ma.’ 
\v 11 Koni e tan mi tin na ramɛ, e yi e xun xanbi so, e yi e tunle dutun. 
\v 12 E bɔɲɛne yi xɔdɔxɔ ayi alo dayimuna. E yi tondi Alatala Sɛnbɛn Birin Kanna sariyane ramɛ e nun falane a yi naxanye tima nabi singene xɔn Alaa Niin barakani. Nayi, Alatala Sɛnbɛn Birin Kanna yi xɔlɔ han! 
\v 13 Alatala Sɛnbɛn Birin Kanna naxa, ‘N to yi xinla tima, e mi n natin. E fan na n xili, n mi e ratinma. 
\v 14 N na e raxuya ayi nɛn siyane birin yɛ e mi naxanye kolon. Yamanani geli nɛn e xanbi. Muxu yo mi yi sigan na, muxu yo mi yi keli na. E yi yamana faɲini geli.’ ”
\c 8
\s Yerusalɛn mɔn tima nɛn
\p
\v 1 Alatala Sɛnbɛn Birin Kanna yi falan ti, a naxa, 
\v 2 “Alatala Sɛnbɛn Birin Kanna ito nan falaxi, a naxa, ‘Xɔxɔlɔn gbeena n yi Siyon ma fe ra han. N bɔɲɛn wolonxi a fe ra ki faɲi!’ ”
\p
\v 3 Alatala ito nan falaxi, a naxa, “N mɔn fama nɛn Siyon yi, n yi dɔxɔ Yerusalɛn taani. Yerusalɛn fama nɛn xili badeni ‘ɲɔndi taana.’ Alatala Sɛnbɛn Birin Kanna geyaan yi xili ba ‘geya sariɲanxina.’ ”
\p
\v 4 Alatala Sɛnbɛn Birin Kanna ito nan falaxi, a naxa, “Xɛmɛ fonne nun ɲaxalan fonne mɔn dɔxɔma nɛn Yerusalɛn taan malandene yi, dunganna suxi e birin yii e siimaya xunkuyena fe ra. 
\v 5 Taan malandene rafema nɛn dii xɛmɛne nun dii tɛmɛne ra saba sodeni.”
\p
\v 6 Alatala Sɛnbɛn Birin Kanna ito nan falaxi, a naxa, “Yanyina nde, yama dɔnxɛn naxan na lu, na kabɛma nɛn na feen ma na lɔxɔni, koni na mi n tan natɛrɛnama!” Alatala Sɛnbɛn Birin Kanna falan nan na ra.
\p
\v 7 Alatala Sɛnbɛn Birin Kanna ito nan falaxi, a naxa, “N nan n ma yamaan nakisima nɛn sogeteden nun sogegododen yamanane ma. 
\v 8 N fama nɛn e ra, e yi dɔxɔ Yerusalɛn taani. E findima nɛn n ma yamaan na, n yi findi e Ala ra, ɲɔndin nun tinxinni.”
\p
\v 9 Alatala Sɛnbɛn Birin Kanna ito nan falaxi, a naxa, “Ɛ wɛkilɛ, ɛ tan naxanye falani itoe mɛma, nabine yi naxanye falama muxune yi Alatala Sɛnbɛn Birin Kanna banxin bɛtɛn sama waxatin naxan yi a ti feen na. 
\v 10 Bayo benun na lɔxɔne, walikɛna hanma ɲingene wanla saranna mi yi sɔtɛ. Yaxune mi yi tinɲɛ yamaan yi mini hanma e so bɔɲɛ xunbenli. Amasɔtɔ n yi muxune luma e bode xili ma nɛn. 
\v 11 Koni iki n mi fa a ligama yama dɔnxɛni ito ra alo waxati danguxine,” Alatala Sɛnbɛn Birin Kanna falan nan na ra. 
\v 12 “E sansiin sima nɛn bɔɲɛ xunbenli. Manpa binle bogima nɛn. Bɔxɔn balon naminima nɛn. Tule igen fama nɛn. N na birin soma nɛn yama dɔnxɛn yii e kɛɛn na. 
\v 13 Yuda bɔnsɔnna nun Isirayila kaane, ɛ bata yi findi danga muxune ra siyane tagi kii naxan yi, n na ɛ rakisima nɛn, ɛ yi baraka na kiini. Ɛ nama gaxu, ɛ wɛkilɛ.”
\p
\v 14 Amasɔtɔ Alatala Sɛnbɛn Birin Kanna ito nan falaxi, a naxa, “Ɛ benbane to yi n naxɔlɔma, n na a ragidi nɛn n xa ɛ ɲaxankata, n mi nimisa. 
\v 15 Koni iki n mɔn bata a ragidi, n xa a faɲin naba ɛ xa, Yerusalɛn nun Yuda bɔnsɔnna muxune. Nayi, ɛ nama gaxu. 
\v 16 Ɛ xa feni itoe liga: Ɛ xa ɲɔndin fala ɛ bode xa, ɛ kitin sa ɲɔndini, kitin naxan bɔɲɛ xunbenla rasoma. 
\v 17 Muxu yo nama miriya ɲaxin tongo a boden xili ma. Ɛ nama ɛ kɔlɔ wuleni. Amasɔtɔ n na feene raɲaxuxi,” Alatalaa falan nan na ra.
\s Sun suxun maxɔdinna yabina
\p
\v 18 Alatala Sɛnbɛn Birin Kanna yi falan ti n xa, a naxa, 
\v 19 “Alatala Sɛnbɛn Birin Kanna ito nan falaxi, a naxa: Kike naaninden sunna, kike suulunden sunna, kike solofereden sunna e nun kike fuden sunna, ne findima nɛn Yuda bɔnsɔnna sɛwa lɔxɔne nun ɲaxaɲaxa lɔxɔne ra, e nun sali lɔxɔne. Koni ɲɔndin nun bɔɲɛ xunbenla xa rafan ɛ ma de!”
\p
\v 20 Alatala Sɛnbɛn Birin Kanna ito nan falaxi, a naxa, “Siya wuyaxine nun taa wuyaxi muxune mɔn fama nɛn. 
\v 21 Taa keden muxune fama nɛn taan bonna muxune ma, e naxa, ‘En siga Alatala maxandideni, en yi Alatala Sɛnbɛn Birin Kanna fen! N tan fan sigama nɛn!’ 
\v 22 Nayi, yama wuyaxin nun siya sɛnbɛmane fama nɛn Alatala Sɛnbɛn Birin Kanna fendeni Yerusalɛn taani, e yi a maxandi.”
\p
\v 23 Alatala Sɛnbɛn Birin Kanna ito nan falaxi, a naxa, “Na lɔxɔne yi, xɛmɛ fu fama nɛn keli siyane birin yi naxanye xuine birin falama, e yi e singan Yahudiya keden ma domaan lenben na, e yi a fala, e naxa, ‘En birin nan sigama, amasɔtɔ nxu bata a mɛ a Ala i xɔn.’ ”
\c 9
\s Siya gbɛtɛne kitina
\p
\v 1 Waliyiya falan ni i ra,
\q Alatala falan naxan tixi Xadiraki yamanan xili ma,
\q a Damasi taan li.
\q Amasɔtɔ Alatala gbeen nan adamadiin bonne ra,
\q alo Isirayila bɔnsɔnne birin.
\q
\v 2 A mɔn xa Xamata taan li,
\q Damasi danna,
\q e nun Tire taan nun Sidɔn taana,
\q kolonna gbo dɛnaxan yi.
\q
\v 3 Tire taan bata yinna ti,
\q a bata gbetin malan
\q alo burunburunna.
\q A xɛmaan gbo alo kira xɔn borona.
\q
\v 4 Koni Marigina a bama a yii nɛn,
\q a yi a yinna radin baani,
\q tɛɛn yi taan gan.
\q
\v 5 Asikalɔn kaane na toma nɛn e gaxu.
\q Gasa kaane fan gaxuma nɛn e xuruxurun,
\q e nun Ekirɔn kaane,
\q amasɔtɔ e yigitɛgɛma nɛn.
\q Mangayaan ɲanma nɛn Gasa taani,
\q Asikalɔn taani gelima nɛn.
\q
\v 6 Siya basanxin fa Asadodi taan tongoma nɛn,
\q n yi Filisitine wason kala.
\q
\v 7 N suben bama nɛn e dɛ wunla naxan yi,
\q e nun donse haramuxine.
\q E dɔnxɛn naxanye na lu,
\q ne fan findima nɛn en ma Ala gbeen na.
\q E yi lu alo Yuda xabila kedenna.
\q Ekirɔn kaane luma nɛn alo Yebusu kaane.
\q
\v 8 Ganla naxanye danguma
\q hanma naxanye fama,
\q n daaxama nɛn n ma yamaan makantandeni ne ma.
\q E mi luma fitina muxu yo a nɔɔn bun,
\q amasɔtɔ iki n yɛɛn tixi e ra.
\s Mangan famatɔna
\q
\v 9 Siyon kaane, ɛ ɲaxan han!
\q Yerusalɛn kaane, ɛ xuini te sɛwani.
\q Ɛ a mato!
\q Ɛ mangan fama ɛ ma.
\q A tinxin. A bata rakisi.
\q A limaniya.
\q A fama sofanla nan fari,
\q sofali diina, sofali gilɛn diina.
\q
\v 10 N yɛngɛ so wontorone bama nɛn Efirami yi
\q e nun soone Yerusalɛn taani.
\q Yɛngɛ so xanle kalama nɛn.
\q A tan bɔɲɛ xunbenla ralima siyane ma nɛn.
\q A mangayaan xuyama ayi nɛn
\q keli fɔxɔ igen ma han fɔxɔ igena,
\q keli baan ma han bɔxɔn danna.
\q
\v 11 Ɛ tan mabinni,
\q n na ɛ muxu suxine xunbama nɛn
\q en ma layirin wunla fe ra
\q naxanye ramaraxi alo kasorasane yili kui xareni.
\q
\v 12 Ɛ mɔn xa so taa makantanxini,
\q ɛ tan kasorasaan naxanye yigi saxi.
\q N mɔn xa a rali ɛ ma to:
\q n ni i saranma nɛn dɔxɔɲa ma firin.
\q
\v 13 Amasɔtɔ n bata Yuda yitɔn alo xanla,
\q Efirami yi lu alo n ma xalimakunla.
\q Siyon, n ni i ya dii xɛmɛne rakelima nɛn Girɛki kaane xili ma.
\q N yi ɛ lu alo sofana silanfanna.\f + \fr 9.13\fr* \fk Silanfanna:\fk* Sofane yɛngɛso dɛgɛmana.\f*
\q
\v 14 Alatala a makɛnɛnma nɛn e xun ma,
\q a xalimakunla yi siga alo kuye sarinna.
\q Marigina Alatala xɔtaan fema nɛn,
\q a fa yiifari ma tule foyeni.
\q
\v 15 Alatala Sɛnbɛn Birin Kanna e rakantanma nɛn.
\q E e dɛgema nɛn,
\q e sigan ti lantan gɛmɛne fari.
\q E e minma nɛn sɛwani,
\q e sarin alo dɔlɔ minne.
\q E lugo alo goron nafexina
\q alo saraxa ganden tongonne wasan wunla ra kii naxan yi.
\q
\v 16 Alatala, e Ala e rakisima nɛn na lɔxɔni,
\q alo a xuruse kuruna.
\q E nɔrɔxin yi lu a yamanani
\q alo gɛmɛ faɲine mangaya taxamaseri kɔmɔtin ma.
\q
\v 17 E tofanma nɛn han!
\q E rayabuma nɛn han!
\q Balon banxulanne ragboma nɛn,
\q minse faɲine yi sungutunne rayabu.
\c 10
\s Ala nan bɔɲɛ xunbenla fima
\q
\v 1 Ɛ xa Alatala maxɔdin
\q a xa tulen nafa ɛ ma ɲɛmɛn na.
\q A tan nan foyen nakelima,
\q a yi tule gbeen nafa
\q a yi birin ma xɛɛn nasabati.
\q
\v 2 Amasɔtɔ wule falan nan suxurene ra.
\q Yiimatone wule feene nan toma.
\q E wule xiye falane nan tima!
\q E madɛndɛnna tima fala fuune nan na.
\q Nanara, yamaan bata siga a xun xɔn,
\q e tɔrɔxi
\q alo kari mi xuruseen naxanye ma.
\q
\v 3 N bata xɔlɔ na xuruse rabane ma han!
\q N yɛɛratine hakɛne saranma e ra nɛn.
\q Amasɔtɔ Alatala Sɛnbɛn Birin Kanna
\q a ɲɔxɔ luma nɛn a kurun xɔn,
\q a yamana, Yuda bɔnsɔnna.
\q A fama e ra nɛn yɛngɛni
\q alo a soo kɛndɛne.
\q
\v 4 Kuntigine sifan birin minima a tan nin.
\q Banxin tongon gɛmɛ kɛndɛn minima a tan nin.
\q Bubu wudin minima a tan nin.
\q Yɛngɛ so xanla minima a tan nin.
\q
\v 5 E luma nɛn alo sofa wɛkilɛxine
\q naxanye e yaxune yibodonma yɛngɛni
\q alo kira xɔn borona.
\q Bayo Alatala e xɔn,
\q e yɛngɛn soma nɛn,
\q e sofa soo ragine yarabi.
\q
\v 6 N Yuda bɔnsɔnna sɛnbɛ soma nɛn,
\q n yi Yusufu bɔnsɔnna rakisi.
\q N mɔn e rafama nɛn e konni
\q bayo n bata kininkinin e ma.
\q E luma nɛn alo n mi e rabeɲin.
\q Alatala nan n tan na, e Ala,
\q n na e maxandine yabima nɛn.
\q
\v 7 Efirami kaane findima nɛn sofa wɛkilɛxine ra.
\q E sɛwama nɛn alo e minxin na a ra.
\q E diine na toma nɛn, e ɲaxan,
\q e sɛwama nɛn Alatalaa fe ra.
\q
\v 8 N nan n ma yamaan xilima nɛn,
\q n yi e malan.
\q N na e xunbama nɛn,
\q e mɔn yi wuya alo a fɔlɔni.
\q
\v 9 Hali n to e raxuyaxi ayi siyane yɛ,
\q n ma fe rabirama e ma nɛn yire makuyeni.
\q E nun e diine yi kisi,
\q e mɔn yi xɛtɛ.
\q
\v 10 N na e rafama nɛn
\q keli Misiran yamanani
\q n yi e malan keli Asiriya yamanani.
\q N fama nɛn e ra Galadi nun Liban yamanani,
\q koni e mi xanɲɛ mɛnni.
\q
\v 11 Ala baan walanne ragodoma nɛn
\q e yi tɔrɔ baani gidi,
\q hali Nila baan tilinne xɔrima nɛn.
\q Asiriya yamanan wason kalama nɛn,
\q Misiran yamanan sɛnbɛn yi ɲan.
\q
\v 12 N tan nan e sɛnbɛ soma,
\q e yi sigan ti n xinli,
\q Alatalaa falan nan na ra.
\c 11
\q
\v 1 Liban bɔxɔna, i ya dɛɛne rabi.
\q Tɛɛn xa i ya suman binle gan.
\q
\v 2 Fɔfɔ binle, ɛ gbelegbele,
\q amasɔtɔ suman wudin bata bira.
\q Wudi gbeene bata kala.
\q Basan warine, ɛ gbelegbele,
\q amasɔtɔ fɔtɔn xɔlɛn bata kala.
\q
\v 3 Xuruse rabane bata gbelegbele,
\q amasɔtɔ e binyen waxatin bata dangu.
\q Yatane bata wurundun,
\q bayo fɔtɔn gbeen bata kala Yurudɛn baan dɛ.
\s Xuruse rabane
\q
\v 4 Alatala n ma Ala naxa iki:
\q “I xa xuruse kuru faxa daxini ito raba.
\q
\v 5 Muxun naxanye e sarama
\q ne e kɔɛ raxabama,
\q e kɛwali ɲaxin mi saran e ra.
\q Naxanye e matima ne naxa,
\q ‘Alatala tantun!
\q N bata bannaya!’
\q E raba muxune mi kininkininxi e ma.
\q
\v 6 Amasɔtɔ n mi fa kininkininma yamanan muxune ma,”
\q Alatalaa falan nan na ra.
\q “N bata e birin lu e bode a yii ma,
\q e nun e mangana yiin ma.
\q E yamanan ɲaxankatama nɛn.
\q N mi muxu yo bama e yii.”
\p
\v 7 Nayi, n yi xuruse kuru faxa daxin naba, katarabi xuruse tɔrɔxine ma. N yi dungan firin tongo. N yi keden xili sa “Fanna,” bonna “Lanna.” N yi xuruse kurun naba. 
\v 8 N yi xuruse raba saxan kedi kike kedenna bun. Diɲan yi ɲan n yi, n fan yi raɲaxu xuruseene ma. 
\v 9 Nayi, n yi a fala ne xa, n naxa, “N mi fa ɛ rabama. Xa naxan faxama, a xa faxa. Xa naxan lɔma ayi, a xa lɔ ayi. Naxanye na lu, ne xa e bode suben don.” 
\v 10 N yi n ma fanna dunganna tongo n yi a yigira, alogo n xa n ma layirin kala n naxan xidi nxu nun siyane birin tagi. 
\v 11 A yi kala na lɔxɔni, nayi xuruse tɔrɔxin naxanye yi n matoma na lɔxɔni, ne yi a kolon a Alatalaa falan nan yi a ra. 
\v 12 N yi a fala e xa, n naxa, “Xa a ɛ kɛnɛn, ɛ n saranna fi, xanamu, ɛ a lu na.” E yi gbeti gbanan tonge saxan fi n saranna ra. 
\v 13 Alatala yi a fala n xa, a naxa, “A wolɛ ayi fɛɲɛ rafalan xa, e saran gbeeni ito naxan mirixi n xa.” N yi gbeti gbanan tonge saxanna tongo, n yi e woli Alatala banxini fɛɲɛ rafalan xa. 
\v 14 Na xanbi ra, n yi n ma lan dunganna fan yigira alogo n xa ngaxakedenyaan kala Yuda nun Isirayila tagi.
\p
\v 15 Alatala yi a fala n xa, a naxa, “I mɔn xa xuruse raba xaxilitarena waliseene tongo. 
\v 16 Amasɔtɔ n tan yɛtɛɛn xuruse rabana nde rafama nɛn yamanani. A mi a yengi dɔxɛ xuruseene xɔn ma naxanye lɔma ayi, a mi a dii xali nɛnɛne fenɲɛ, a mi a maxɔlɔxine dandanɲɛ, a mi a kɛndɛne baloɛ. Koni a yɛxɛɛ turaxine donma nɛn a yi e toron koten.”
\q
\v 17 Gbalon na xuruse raba fuyantenna xa,
\q naxan xuruseene rabeɲinma!
\q Silanfanna xa a yiin sɛgɛ\f + \fr 11.17\fr* \fk Silanfanna:\fk* Sofane yɛngɛso dɛgɛmana.\f*
\q a yi a yiifari ma yɛɛn sɔxɔn.
\q A yiin xa faxa a ma fefe,
\q a yiifari ma yɛɛn yi xɔri.
\c 12
\s Yerusalɛn xunba famatɔna
\q
\v 1 Waliyiya falan ni i ra,
\q Alatala falan naxan tixi Isirayila fe yi.
\q A tan naxan kore xɔnna nun bɔxɔ xɔnna daxi,
\q a yi muxun niin sa a yi,
\q Alatalaa falan ni ito ra:
\q
\v 2 N Yerusalɛn findima nɛn dɔlɔ min seen na,
\q naxan a rabilinna siyane birin fugama a ra.
\q Yerusalɛn taan nabilinma nɛn yɛngɛni,
\q e nun Yuda yamanan birin.
\q
\v 3 Na lɔxɔni, n Yerusalɛn findima nɛn
\q gɛmɛ binyen na siyane birin xa.
\q Naxan yo na kata a yite feen na,
\q na maxɔlɔma nɛn.
\q Bɔxɔn siyane birin e malanma nɛn a xili ma.
\q
\v 4 Alatalaa falan ni ito ra:
\q Na lɔxɔni
\q n faan nasoma nɛn e soone birin yi,
\q n yi gaxun naso e soo ragine yi.
\q Koni n nan n yɛɛn tima nɛn
\q Yuda bɔnsɔnna muxune ra.
\q N yi siyane soone birin yɛɛne xɔri.
\q
\v 5 Yuda mangane a falama nɛn e bɔɲɛni,
\q “Yerusalɛn muxune bata en sɛnbɛ so
\q Alatala Sɛnbɛn Birin Kanna barakani, e Ala.”
\q
\v 6 Na lɔxɔni,
\q n Yuda mangane luma nɛn
\q alo tɛɛ wolonne yegene dɛ,
\q alo xaye radɛgɛxin malo xidine tagi.
\q E fama e rabilinna siyane halagideni
\q e kɔmɛnna nun e yiifanna ma.
\q Koni Yerusalɛn kaane mɔn luma nɛn e konni.
\q
\v 7 Alatala Yuda dɔxɔdene nan singe rakisima,
\q alogo Dawuda yixɛtɛne nun Yerusalɛn muxune
\q binyen nama dangu Yuda muxune ra.
\q
\v 8 Na lɔxɔni,
\q Alatala Yerusalɛn kaane ratangama nɛn.
\q Hali naxan bata tagan e yɛ,
\q a yɛngɛn soma nɛn na lɔxɔni
\q alo Dawuda.
\q Dawuda yixɛtɛne fan luma nɛn
\q alo Ala yɛtɛna,
\q alo Alatalaa malekana e yɛɛ ra.
\q
\v 9 Na lɔxɔni,
\q n siyane birin naxɔrima nɛn
\q naxanye fama Yerusalɛn xili ma.
\q
\v 10 Nayi, n hinanna nun maxandin niin nagodoma nɛn
\q Dawuda yixɛtɛne ma e nun Yerusalɛn muxune.
\q E yi e yɛɛ rafindi n ma,
\q e naxan yisɔxɔnxi.
\q E sunuma nɛn a fe ra
\q alo dii keden peena.
\q E a wugama nɛn sɔxɔlɛni,
\q alo dii singena.
\q
\v 11 Na lɔxɔni,
\q sunun gboma ayi nɛn Yerusalɛn taani,
\q alo Xadada-Rimɔn ma sununa Megido mɛrɛmɛrɛni.
\q
\v 12 Yamanan sunuma nɛn,
\q xabilane birin yi lu e danna.
\q Dawuda bɔnsɔnna a danna,
\q e ɲaxanle fan e danna,
\q Natan bɔnsɔnna a danna,
\q e ɲaxanle fan e danna,
\q
\v 13 Lewi bɔnsɔnna a danna,
\q e ɲaxanle fan e danna,
\q Simayi bɔnsɔnna a danna,
\q e ɲaxanle fan e danna,
\q
\v 14 e nun bɔnsɔnna bonne birin.
\q Birin luma nɛn a danna,
\q e ɲaxanle fan yi lu e danna.
\c 13
\s Suxurene nun wule nabine
\q
\v 1 Na lɔxɔni,
\q tigin minima nɛn Dawuda yixɛtɛne xa,
\q e nun Yerusalɛn muxune,
\q alogo yulubine nun xɔsin xa ba e ma.
\q
\v 2 Alatala Sɛnbɛn Birin Kanna falan ni ito ra:
\q Na lɔxɔni,
\q n suxurene xinle bama nɛn yamanani,
\q ɲinan yi ti e xɔn ma fefe!
\q N mɔn nabine nun xaxili ɲaxin bama nɛn yamanani.
\q
\v 3 Xa muxuna nde mɔn nabiya falan ti,
\q a nga nun a baba naxan a barixi,
\q ne a falama a xa nɛn,
\q e naxa, “I xa faxa,
\q amasɔtɔ i bata wulen fala Alatala xinli.”
\q A nga nun a baba naxan a barixi,
\q ne a sɔxɔnma nɛn
\q a nɛma nabiya falane tima.
\q
\v 4 Na lɔxɔni, nabine birin yagima nɛn
\q e fe toxine nun e waliyiya falane ra.
\q E mi fa nabiya domaan soma sɔnɔn
\q alogo e xa madaxun ti.
\q
\v 5 E birin a falama nɛn, e naxa,
\q “Nabi mi n na, xɛɛ biin nan n na.
\q Amasɔtɔ muxuna nde n sara nɛn
\q xabu n dii ɲɔrɛ waxatini.”
\q
\v 6 Koni e a maxɔdinma nɛn, e naxa,
\q “Nanse laru itoe ra i kanken ma?”
\q A e yabima nɛn, a naxa,
\q “E n maxɔlɔ nɛn n xɔyine konni.”
\s Silanfanna
\p
\v 7 “Silanfanna,
\q i xa keli n ma xuruse rabaan xili ma,
\q xɛmɛn naxan n fɛma.”
\q Alatala Sɛnbɛn Birin Kanna falan ni ito ra.
\q “Xuruse rabaan faxa,
\q yɛxɛɛne xa xuya ayi.
\q N yi keli a xunxurine xili ma.
\q
\v 8 Nayi, yamaan dɔxɔde saxan,
\q firin faxama nɛn keden yi lu na.
\q Alatalaa falan nan na ra.
\q
\v 9 N yi a dɔnxɛn sa tɛɛni
\q n yi a rasɛnsɛn alo gbetina.
\q N yi e mato tɛɛni,
\q alo xɛmaan matoon kii naxan yi.
\q Nayi, e n maxandima nɛn,
\q n yi e yabi.
\q N na a falama nɛn,
\q ‘N ma yamaan nan ne ra.’
\q E yi a fala, e naxa,
\q ‘Alatala nan nxɔ Ala ra.’ ”
\c 14
\s Alatala fa lɔxɔna
\q
\v 1 Alatalaa lɔxɔn fama.
\q Yaxune ɛ seene yitaxunma nɛn ɛ yɛɛ xɔri.
\q
\v 2 N siyane birin malanma nɛn
\q e yi Yerusalɛn yɛngɛ.
\q Taan suxuma nɛn.
\q Banxine yi kui geli.
\q E yi fu ɲaxanle ma.
\q Taan fɔxɔ kedenna yi siga suxuni.
\q Koni yama dɔnxɛn luma nɛn taani.
\q
\v 3 Alatala kelima nɛn
\q a yi na siyane yɛngɛ,
\q alo a yi yɛngɛn soma waxati gbɛtɛ yi kii naxan yi.
\q
\v 4 A tima nɛn na lɔxɔni Oliwi geyaan fari,
\q naxan Yerusalɛn yɛtagi a sogeteden binni.
\q Oliwi geyani bɔma nɛn a tagi,
\q keli a sogeteden binni
\q han a sogegodode binni.
\q Folo gbeen yi lu na.
\q Geyaan fɔxɔ kedenna xɛtɛma nɛn kɔmɛnna ma,
\q a fɔxɔ kedenna boden fan yi siga yiifanna ma.
\q
\v 5 Nayi, ɛ ɛ gima nɛn n ma geyane folon na.
\q Amasɔtɔ geyane folon sigama nɛn han Aseli.
\q Ɛ ɛ gima nɛn
\q alo ɛ to ɛ gi bɔxɔ xuruxurunna yɛɛ ra,
\q Yusiya waxatini, Yuda mangana.
\q Nayi, Alatala fama nɛn, n ma Ala,
\q e nun malekane birin.
\q
\v 6 Na lɔxɔni,
\q kɛnɛn mi luma na,
\q hanma xunbenla hanma ige xundina.
\q
\v 7 E nun lɔxɔn bonne keden mi a ra.
\q Alatala nan na lɔxɔn kolon.
\q Yanyi mi luma na,
\q kɔɛ mi luma na.
\q Hali kɔɛɛn na,
\q kɛnɛnna luma nɛn na.
\q
\v 8 Na lɔxɔni,
\q siimaya igen minima nɛn Yerusalɛn taani.
\q A fɔxɔ kedenna yi siga sogetede baan binni,
\q a fɔxɔ kedenna yi siga sogegodode fɔxɔ igen binni.
\q A minima nɛn soge fure waxatini alo ɲɛmɛna.
\q
\v 9 Alatala nan findima bɔxɔn birin mangan na.
\q Na lɔxɔni,
\q Alatala nan keden yatɛma Ala ra,
\q a keden peen xinla yi lu na.
\q
\v 10 Yerusalɛn rabilinna bɔxɔn birin
\q findima nɛn mɛrɛmɛrɛn na,
\q keli Geba yi han Rimɔn yi,
\q Yerusalɛn yiifanna ma.
\q Yerusalɛn tima nɛn.
\q Taan danne yi lu iki:
\q Keli Bunyamin dɛɛn na
\q han dɛ singen yireni
\q han tongonna dɛna.
\q Keli Xananɛli sangansoon ma
\q han mangana manpa ige badena.
\q
\v 11 Muxune dɔxɔma nɛn taani.
\q A mi fa halagima.
\q Yerusalɛn luma nɛn bɔɲɛ xunbenli.
\q
\v 12 Siyaan naxanye Yerusalɛn yɛngɛxi,
\q Alatala fitina fureni ito nan sama ne fari:
\q E birin fatin kunma nɛn e ɲɛɲɛn na.
\q E yɛɛne kunma nɛn e yɛ yinla ra,
\q e lɛnne fan yi kun e dɛ.
\q
\v 13 Na lɔxɔni,
\q Alatala gaxu gbeen nasoma nɛn e yi,
\q e yi e bode suxu e yiin ma,
\q e yi e bode yɛngɛ.
\q
\v 14 Yuda kaane fan Yerusalɛn xun mayɛngɛma nɛn.
\q E e rabilinna siyane birin ma nafunle tongoma nɛn:
\q xɛmaan nun gbetin nun dugi gbegbe.
\q
\v 15 Na fitina fure sifan soone nun gbaxalone\f + \fr 14.15\fr* \fk Gbaxaloni\fk* itoe sɔtɔma soon nun sofanla na diin sɔtɔ waxatin naxan yi.\f*
\q nun ɲɔgɔmɛne nun sofanle fan suxuma nɛn
\q e nun xuruseen naxanye birin yaxune daaxadeni.
\q
\v 16 Nayi, siyaan naxanye birin Yerusalɛn yɛngɛxi
\q na muxu dɔnxɛne fama nɛn ɲɛɛ yo ɲɛɛ,
\q e Manga Alatala Sɛnbɛn Birin Kanna batu,
\q e yi Bubu Kui Sanla raba.\f + \fr 14.16\fr* \fk Bubu Kui Sanla\fk* fe sɛbɛxi Saraxaraline 23.33-38 kui.\f*
\q
\v 17 Xa bɔxɔn xabilana nde tondi sigɛ Yerusalɛn taani
\q Manga Alatala Sɛnbɛn Birin Kanna batudeni,
\q tulen mi fama e konni.
\q
\v 18 Xa Misiran kaane tondi sigɛ,
\q xa e mi fa, tulen mi fama na.
\q Alatala fitina furen nagodoma e ma nɛn
\q a naxan nagodoma siyane ma
\q naxanye tondixi sigɛ Bubu Kui Sanla rabadeni.
\q
\v 19 Ala Misiran kaane fe ɲaxin saranma e ra na kii nin,
\q a siyane yulubine birin saran e ra,
\q naxanye mi sigama Bubu Kui Sanla rabadeni.
\q
\v 20 Na lɔxɔni,
\q hali talandin naxanye singanxi soone ra
\q a sɛbɛma nɛn ne ma fa fala:
\q “A Sariɲanxi Alatala xa.”
\q Tunden naxanye Alatalaa banxini
\q ne fan yatɛma nɛn se rasariɲanxine ra
\q alo saraxa ganden goronne.
\q
\v 21 Tunden naxanye birin Yerusalɛn nun Yuda yi,
\q ne birin nasariɲanma nɛn Alatala Sɛnbɛn Birin Kanna xa.
\q Naxanye birin fama saraxa badeni,
\q ne nde xalima nɛn,
\q alogo e xa sa kudin so e kui.
\q Na lɔxɔni, sare mati yo mi fa luma
\q Alatala Sɛnbɛn Birin Kanna batu banxini.