\id JOL 
\ide UTF-8
\h Nabi Yowɛli Sora
\toc1 Nabi Yowɛli Alaa Falan Naxan Sɛbɛ
\toc2 Yowɛli
\mt1 Yowɛli
\mt2 Nabi Yowɛli Alaa Falan Naxan Sɛbɛ
\ip Nabi Yowɛli naxan kawandini ito baxi, a fe mi sɛbɛxi yire gbɛtɛ yo yi Kitabun kui. Nanara, muxune mi a sɛbɛ waxatin kolon. A luxi nɛn alo tuguminne nan yi Isirayila kaane tɔrɔma na waxatini naxanye yi luxi alo suɲɛ xungbene. E ganla nan yi fama, e seene dɛɛne don e ma, na yi findi fitina feen na Yowɛli waxatini. Yowɛli yi a fala, a na fe sifan ligama nɛn bayo yamaan mi tubixi Ala ma.
\ip Yowɛli nan a sɛbɛxi, a lɔxɔna nde, Alaa Nii Sariɲanxin nagodoma nɛn muxune birin ma. Na sɛbɛxi Yowɛli sora 3.1-2 kui. Dɛnkɛlɛya muxu singene nan na feen toxi rakamalɛ Nii Sariɲanxin godo lɔxɔni. Na sɛbɛxi Xɛrane 2.16-21 kui.
\c 1
\p
\v 1 Alatala falan naxan ti Yowɛli xa, Petuweli a dii xɛmɛna.
\s Tuguminne gbalon yamanani
\q
\v 2 Ɛ tan fonne, ɛ feni ito ramɛ,
\q ɛ tan yamanan muxune,
\q ɛ birin xa ɛ tuli mati.
\q Fe sifani ito ɲɔxɔnna bata yi liga ɛ waxatini ba,
\q hanma ɛ benbane waxatini?
\q
\v 3 Ɛ a yɛba ɛ diine xa,
\q ɛ diine yi a yɛba e diine xa,
\q e diine yi a yɛba mayixɛtɛ famatɔne xa.
\q
\v 4 Suɲɛne donseen naxanye luxi,
\q tuguminne bata ne don.
\q Tuguminne naxan luxi,
\q xoxorone bata na don.
\q Xoxorone naxan luxi,
\q songolonbalane bata na don.
\b
\q
\v 5 Ɛ xulun, dɔlɔ minne,
\q ɛ wuga!
\q Ɛ birin xa gbelegbele,
\q ɛ tan naxanye dɔlɔn minma,
\q bayo manpa bogine bata kala,
\q e ba ɛ dɛ.
\q
\v 6 Ganla nde bata fa fu n ma yamanan ma,
\q e fangan gbo,
\q e wuya han e mi yatɛ.
\q E ɲinne luxi alo yatan ɲinne,
\q e gbɛgbɛne luxi
\q alo yata gilɛn gbeene.
\q
\v 7 E n ma manpa binle kalama.
\q E n ma xɔdɛ binle ɲan fefe,
\q e yi e yixin,
\q e yi e kobelene ba e ma,
\q e yiine yi gbendu fefe!
\b
\q
\v 8 Ɛ mawuga
\q alo sungutunna kasa dugini ɲandeni
\q naxan a xɛmɛn wugama,
\q a baxi dɔxɔdeni naxan xɔn.
\q
\v 9 Bogise saraxan nun minse saraxan bata ɲan Alatalaa banxini.
\q Saraxaraline sunuxi, Alatalaa walikɛne.
\q
\v 10 Xɛɛne bata kala,
\q bɔxɔn bata xara.
\q Bogiseene bata raxɔri.
\q Manpa bogi igen bata so a ra.
\q Turen bata ɲan.
\q
\v 11 Xɛɛ biine bata yigitɛgɛ.
\q Manpa bili nakɔ sane gbelegbelema sununi,
\q murutun nun fundenna fe ra,
\q bayo se xaba daxine bata halagi.
\q
\v 12 Manpa binle bata xara ayi.
\q Xɔdɛ binle bata lisi a ra
\q e nun Girenada wudine nun tugu binle nun pɔnmi binle.
\q Xɛɛ ma wudine birin bata xara.
\q Muxune sɛwan birin bata ɲan.
\s Yamaan xa tubi Alaa lɔxɔna fe ra
\q
\v 13 Ɛ sunu dugine tongo,
\q ɛ wuga, ɛ tan saraxaraline.
\q Ɛ gbelegbele,
\q ɛ tan naxanye walima saraxa ganden yɛtagi.
\q N ma Alaa walikɛne, ɛ fa,
\q ɛ xi maxidixi kasa bɛnbɛli dugine yi nimisani,
\q bayo bogise saraxane nun minse saraxane bata ɲan ɛ Alaa banxini.
\q
\v 14 Ɛ sun suxu waxatin nagidi,
\q ɛ yamaan maxili malan sariɲanxini,
\q ɛ fonne malan
\q e nun yamanan muxune birin,
\q e xa fa Alatalaa banxini, ɛ Ala,
\q ɛ yi ɛ xuini te Alatala ma.
\b
\q
\v 15 Lɔxɔ xɔdɛxɛn bata a li de!
\q Alatalaa lɔxɔn bata maso,
\q a fama kalan nan na
\q fata Ala Sɛnbɛ Kanna ra.
\b
\q
\v 16 Donseen bata ɲan en yɛɛ xɔri yati!
\q Sɛwan nun ɲaxanna bata ɲan en ma Alaa banxini!
\q
\v 17 Sansi xɔnne bata xara ayi xutune bun,
\q sagane bata kui geli.
\q Se ramaradene bata kala,
\q bayo murutu mi fa na.
\q
\v 18 Xuruseene wuga xuiin gbo iki!
\q Ɲinge kurune xuyaxi ayi na xun xɔn ma,
\q amasɔtɔ sɛxɛ mi fa na,
\q hali yɛxɛɛne fan tɔrɔxi.
\b
\q
\v 19 Alatala, n nan n xuini te i tan nan ma!
\q Amasɔtɔ tɛɛn bata burunna halagi,
\q tɛɛ dɛgɛn bata xɛɛ ma wudine birin gan.
\q
\v 20 Na ma, hali burunna subene e wuga xuini tema i tan Ala ma.
\q Xudene bata xɔri,
\q tɛɛn bata burunna halagi.
\c 2
\s Alatalaa lɔxɔn bata maso
\q
\v 1 Ɛ xɔtaan fe Siyon yi!
\q Ɛ gbelegbele n ma geya sariɲanxin fari!
\q Yamanan muxune birin xa xuruxurun gaxuni
\q bayo Alatalaa lɔxɔn fama,
\q a bata maso.
\q
\v 2 Dimin nun nii rafɔrɛn lɔxɔna,
\q kundaan nun kuye yifɔrɔn lɔxɔna.
\q Ganla\f + \fr 2.2\fr* Yanyina nde \fk ganli\fk* ito findixi tuguminne nan na naxanye halagin naso yamanani Alaa xɔlɔn bun ma.\f* fama
\q alo kuye yi yalanna geyaan kanke ra subaxani.
\q Gali gbee sɛnbɛmaan fama,
\q naxan ɲɔxɔn munma to,
\q naxan ɲɔxɔn mi fa toma waxati famatɔne birin yi.
\b
\q
\v 3 Tɛɛ dɛgɛna e yɛɛ ra,
\q a e xanbi ra.
\q Bɔxɔn tofan e yɛɛ ra
\q alo Eden nakɔna.\f + \fr 2.3\fr* \fk Eden nakɔna\fk* fe sɛbɛxi Dunuɲa Fɔlɔn 2.8-9 kui. E nun Esekiyɛli 36.35.\f*
\q Tonbonna nan a ra e xanbi ra.
\q Sese mi a futuxuluma e yii.
\q
\v 4 E maliga soo yama gbeen nan na,
\q alo soo ragine ganla,
\q naxanye xulun e gideni han!
\q
\v 5 E dangu xuiin luxi nɛn
\q alo yɛngɛ so wontorone.
\q E tuganma geyane xun ma,
\q alo tɛɛ gbeen nɛma sɛxɛ xaren ganɲɛ
\q alo gali sɛnbɛmaan na ti yɛngɛ so xinla ma.
\b
\q
\v 6 Siyane birin xuruxurunma e yɛɛ ra,
\q e yɛtagine yi tɔɲɔnxi.
\q
\v 7 E fɔnma seene ma
\q alo yɛngɛ sone,
\q e tema taan nabilinna yinna ma
\q alo sofane.
\q E birin sigama e kiraan xɔn,
\q e mi kiraan fatama.
\q
\v 8 E sese mi dinma e bode ra,
\q birin sigama a tinxinni.
\q Sese na ti e yɛɛ ra,
\q e tuganma nɛn na xun ma,
\q e safane mi kalama.
\q
\v 9 E na bɔxɔn taan ma,
\q e e gi yinna ma,
\q e tema banxine ma,
\q e so banxin foye sodene ra
\q alo muɲadene.
\b
\q
\v 10 Bɔxɔn xuruxurunma e yɛɛ ra,
\q kore xɔnna yi maxa.
\q Sogen nun kiken yi yidimi.
\q Sarene mi fa dɛgɛma.
\q
\v 11 Alatala sɔnxɔma a ganla yɛɛ ra.
\q A yamaan mi nɔɛ yatɛ.
\q Naxanye a falan suxuma,
\q ne sɛnbɛn gbo!
\q Amasɔtɔ Alatalaa lɔxɔn gbo,
\q a magaxu!
\q Nde nɔɛ tiyɛ a bun?
\s Yamaan xa tubi Ala ma
\q
\v 12 Alatalaa falan ni ito ra, a naxa,
\q “Koni iki, ɛ mɔn xa xɛtɛ n ma ɛ bɔɲɛni feu,
\q sun suxun nun wugan nun gbelegbele xuine yi!”
\q
\v 13 Benun ɛ xa ɛ dugine yibɔ nimisani
\q ɛ bɔɲɛne nan xa kala.
\q Ɛ xɛtɛ Alatala ma, ɛ Ala
\q bayo a diɲa, a kininkinin,
\q a mi xɔlɔn xulɛn,
\q a hinanna gbo.
\q A a yɛtɛ ratangaxi yihadin ma.
\q
\v 14 Nde a kolon xa a mi maxɛtɛma
\q a kininkinin ɛ ma,
\q a yi baraka sa ɛ feene yi,
\q alogo ɛ xa nɔ bogise saraxane
\q nun minse saraxane bɛ Alatala xa, ɛ Ala?
\b
\q
\v 15 Ɛ xɔtaan fe Siyon yi!
\q Ɛ sun suxu waxatin nagidi.
\q Ɛ yamaan maxili malan sariɲanxini.
\q
\v 16 Ɛ yamaan malan, ɛ malanna rasariɲan.
\q Ɛ fonne malan,
\q ɛ dii ɲɔrɛne malan
\q hali naxanye xiɲɛn minma.
\q Hali xɛmɛn naxan baxi ɲaxanla dɔxɔdeni,
\q na fan xa mini a banxini,
\q a ɲaxanla fan xa fa malanni.
\q
\v 17 Saraxaraliin naxanye walima Alatala xa
\q ne xa wuga Ala Batu Banxin
\q so dɛɛn nun saraxa ganden tagini.
\q E yi Ala mafan, e naxa,
\q “Alatala, kininkinin nxu ma,
\q nxu tan i ya yamana.
\q I nama i ya muxune rayagi,
\q i nama tin yama xɔɲɛne yi nxu magele,
\q e a fala, e naxa,
\q ‘E Ala minɛn yi?’ ”
\s Alatala yi a yamaan yabi
\q
\v 18 Nayi, Alatalaa xɔxɔlɔnna kelima nɛn
\q a yamanana fe ra,
\q a yamaan kininkininna yi a suxu.
\b
\q
\v 19 Alatala a yamaan yabima nɛn nayi, a naxa,
\q “N mɔn bogiseene ragidima ɛ ma nɛn,
\q e nun manpa bogine nun ture faɲina.
\q Ɛ lugoma nɛn ken!
\q N mi fa ɛ findima magele seen na siyane tagi.
\q
\v 20 Yaxun naxan kelima sogeteden kɔmɛnna ma,
\q n na a masigama nɛn ɛ ra pon!
\q N na a kedima nɛn
\q siga bɔxɔ xare madunduxin mabinni.
\q N na a ganla yɛɛ ra xiin naxuyama ayi nɛn
\q siga han sogeteden baana,
\q e nun a xanbi ra xiina
\q siga han sogegododen fɔxɔ igena.
\q E faxaxine xiri ɲaxin minima nɛn,
\q a findi furen na foyeni.
\q Amasɔtɔ Ala wali gbeen kɛma nɛn.
\q
\v 21 I tan, bɔxɔna,
\q i nama gaxu!
\q I ya sɛwan xa gbo ayi,
\q i ɲaxan!
\q Amasɔtɔ Alatala bata fe gbeene rakamali.
\q
\v 22 Ɛ tan, subene,
\q ɛ nama gaxu!
\q Amasɔtɔ burunna sɛxɛne mɔn ɲingima nɛn,
\q wudine mɔn yi bogi.
\q Xɔdɛ binle nun manpa binle mɔn yi dahamun namini.
\q
\v 23 Ɛ tan, Siyon kaane, ɛ ɲaxan,
\q ɛ sɛwa Alatala yi, ɛ Ala,
\q bayo a mɔn tulen fima ɛ ma a waxatini a tinxinni,
\q a tule gbeen nafa ɛ ma
\q a darixi fɛ waxatin naxanye birin yi.
\q
\v 24 Lonne rafema nɛn,
\q kundine yi rafe manpa nɛnɛn nun turen na.”
\b
\q
\v 25 “N ɲɛɛ danguxine seene ɲɔxɔne raxɛtɛma nɛn ɛ ma
\q tuguminne nun xoxorone naxanye donxi,
\q e nun songolonbalane nun suɲɛne,
\q n ma gali gbeena,
\q n naxan nasiga ɛ xili ma.
\q
\v 26 Ɛ dɛgema nɛn han ɛ lugo.
\q Ɛ Alatala xinla tantunma nɛn, ɛ Ala,
\q naxan bata kabanako feene liga ɛ xa.
\q N ma yamaan mi fa yagima mumɛ!
\q
\v 27 Ɛ a kolonma nɛn nayi
\q a n luxi Isirayila kaane yɛ.
\q Alatala nan n tan na, ɛ Ala.
\q Ala gbɛtɛ mi na mumɛ.
\q N ma yamaan mi fa yagima mumɛ!”
\s Alaa lɔxɔna fe
\q
\v 28 “Na xanbi ra,
\q n na n ma Nii Sariɲanxin nagodoma nɛn
\q adamadiin birin ma.
\q Ɛ dii xɛmɛne nun ɛ dii tɛmɛne nabiya falane tima nɛn.
\q Ɛ xɛmɛ fonne yi xiye sa.
\q Ɛ banxulanne yi fe toon ti alo xiyena.
\q
\v 29 Na lɔxɔne yi,
\q n na n ma Nii Sariɲanxin nagodoma nɛn
\q hali konyi xɛmɛne nun konyi gilɛne xun ma.
\q
\v 30 N kabanako feene yitama nɛn kore xɔnna ma
\q e nun bɔxɔ xɔnna ma,
\q wunla nun tɛɛn nun tɛɛ tuti gbeen minima nɛn.
\q
\v 31 Sogeni dimima nɛn,
\q kiken yi gbeeli alo wunla,
\q benun Alatalaa lɔxɔ binye gbeen xa a li.
\q
\v 32 Nba, naxan yo na Alatala maxandi a xinla ra,
\q na kisima nɛn.
\q Nayi, yamaan muxu dɔnxɛna ndee luma nɛn e nii ra
\q Ala na naxanye xili,
\q ne nan xunbama Siyon geyaan fari
\q e nun Yerusalɛn yi
\q alo Alatala a fala kii naxan yi.”
\c 3
\s Siyane makiti fena
\q
\v 1 “Amasɔtɔ na lɔxɔne yi, na waxatini,
\q n na fa Yuda nun Yerusalɛn suxu muxune ra waxatin naxan yi,
\q
\v 2 n siyane birin malanma nɛn,
\q n yi fa e ra Yosafati lanbanni,\f + \fr 4.2\fr* \fk Yosafati\fk* bunna nɛɛn fa fala “Alatala nan kitin sama.” \f*
\q n na e makitima dɛnaxan yi,
\q lan n ma yamana fe ma, Isirayila.
\q Amasɔtɔ, e e raxuyaxi ayi nɛn siyane yɛ,
\q e yi e bɔxɔni taxun e tagi.
\q
\v 3 E n ma yamanan muxune yitaxun nɛn e ra,
\q masɛnsɛnna xɔn,
\q e yi dii xɛmɛne mati konyine ra
\q alogo e xa yalundene sara,
\q e yi dii tɛmɛne mati
\q alogo e xa manpaan sara,
\q e yi a min.”
\b
\q
\v 4 “Ɛ tan Tire kaane nun Sidɔn kaane
\q nun Filisitine birin, nanse xɔli ɛ ma n xili ma?
\q Ɛ gbeen ɲɔxɔn nanse ra n ma?
\q Koni xa ɛ waxi yɛngɛn nakeli feni n xili ma,
\q nayi n na ɛ yɛngɛne raxɛtɛma ɛ ma nɛn mafurɛn!
\q
\v 5 Ɛ tan naxanye n ma gbetin
\q nun n ma xɛmaan tongoxi, n ma nafulu faɲine,
\q ɛ yi e sa ɛ suxurene batudeni.
\q
\v 6 Ɛ Yuda nun Yerusalɛn muxune mati nɛn
\q Girɛki muxune ma, ɛ yi e masiga e bɔxɔn na.”
\b
\q
\v 7 “N tan nan sa e bama na yirene yi
\q ɛ e matixi dɛnaxanye yi.
\q N yi tɔrɔn naxɛtɛ ɛ ma ɛ naxan ɲɔxɔn saxi e fari.
\q
\v 8 N na ɛ dii xɛmɛne nun ɛ dii tɛmɛne matima nɛn
\q Yuda kaane ma.
\q E fan yi e mati Sabe kaane ma, siya makuyena.”
\q Alatala nan falan tixi!
\s Yɛngɛn nun kitina
\q
\v 9 Ɛ ito fala siyane xa, ɛ naxa,
\q “Ɛ yitɔn yɛngɛn xili yi, ɛ yɛngɛ sone rakeli.
\q Sofane birin xa keli, e yɛngɛn so.
\q
\v 10 Ɛ ɛ ɲinge kenne bɔnbɔ silanfanne ra,\f + \fr 4.10\fr* \fk Silanfanna:\fk* Sofane yɛngɛso dɛgɛmana.\f*
\q ɛ wɔlitɛne rafala tanbane ra.
\q Sɛnbɛtarene xa a fala, e naxa, ‘Nxu sɛnbɛn gbo.’
\q
\v 11 Ɛ mafura, ɛ fa,
\q ɛ tan siyaan naxanye birin be rabilinni,
\q ɛ fa ɛ malan be.”
\b
\q Alatala, i ya malekane ragodo e xili ma.
\b
\q
\v 12 Siyane xa keli, e xa godo Yosafati lanbanni.
\q Amasɔtɔ n dɔxɔma mɛnna nin,
\q n na Isirayila rabilinna siyane birin makiti.
\q
\v 13 Ɛ wɔlitɛn tongo ɛ bogi seene xaba
\q bayo e bata mɔ.
\q Ɛ fa manpa bogine yibodon, ɛ e igen ba
\q bayo manpa ige baden bata rafe,
\q han a fɛɲɛne yi bɔxɔnɲɛ a ma.
\q E ɲaxuyaan fan gboxi ayi na kii nin.
\b
\q
\v 14 Yama gbeen bata lu kiti saden lanbanni!
\q Amasɔtɔ Alatalaa lɔxɔn bata maso e ra
\q kiti saden lanbanni.
\q
\v 15 Sogen nun kikeni dimima nɛn,
\q sarene mi fa dɛgɛma.
\q
\v 16 Alatala sɔnxɔma nɛn keli Siyon yi,
\q a a xui ramini sɛnbɛni, keli Yerusalɛn yi.
\q Nayi, bɔxɔn nun koren xuruxurunma nɛn,
\q koni Alatala findixi luxunden nan na a yamaan xa,
\q e nun yigiyade makantanxina Isirayila kaane xa.
\s Ala baraka feen naxanye ragidima a yamaan ma
\q
\v 17 “Ɛ a kolonma nɛn nayi, a n tan nan Alatala ra,
\q ɛ Ala, naxan dɔxi Siyon yi, n ma geya sariɲanxina.
\q Yerusalɛn sariɲanma nɛn,
\q xɔɲɛne mi fa fuma a ma sɔnɔn!”
\b
\q
\v 18 “Na lɔxɔni,
\q manpa nɛnɛn minima nɛn geyane yi,
\q yire matexine yi nɔnɔn namini,
\q igen yi lu Yuda baane birin yi.
\q Tigin minima nɛn Alatalaa banxini,
\q a yi kasiya lanbanna ige sa.
\q
\v 19 Misiran tan findima nɛn bɔxɔ kalaxin na,
\q Edɔn yi findi tonbonna ra
\q e gbalone fe ra e naxanye ligaxi Yuda kaane ra.
\q E bata sɔntarene faxa Yuda yamanani.
\q
\v 20 Koni muxun luma nɛn Yuda nun Yerusalɛn yi habadan,
\q mayixɛtɛ nun mayixɛtɛ.
\q
\v 21 N munma n ma yamaan yulubin naxanye xafari e faxa tixine ma,
\q n ne mafeluma nɛn.
\q N tan Alatala, n lu Siyon taani.”