\id HAB 
\ide UTF-8
\h Nabi Xabakuki Sora
\toc1 Nabi Xabakuki Alaa Falan Naxan Sɛbɛ
\toc2 Xabakuki
\mt1 Xabakuki
\mt2 Nabi Xabakuki Alaa Falan Naxan Sɛbɛ
\ip Xabakuki falani itoe sɛbɛxi nɛn yanyina nde, ɲɛɛ kɛmɛ sennin benun Marigi Yesu xa bari. Na waxatini, sogeteden binna muxune yi Babilɔn kaane nɔɔn nan bun ma.
\ip Nabi Xabakuki Ala maxɔdinxi nɛn fa fala nanfera Ala mi tinxintarene halagima a yamaan yɛ. Ala yi a yabi a naxa, na ligama nɛn koni Babilɔn kaane nan fama yamaan birin ɲaxankatadeni tinxintarene fe ra. Nayi, Nabi Xabakuki mɔn yi Ala maxɔdin fa fala nanfera a tinma Isirayila kaa tinxinxine yi halagi Babilɔn kaa tinxintarene xɔn bayo Isirayila kaane tinxin Babilɔn kaane xa. Ala yi a yabi fa fala ne fan e saranna sɔtɔma nɛn. A mɔn yi a ralimaniya fala kɛndɛni ito xɔn, a naxa, “Tinxin muxun nii rakisin sɔtɔma nɛn a dɛnkɛlɛyaan xɔn.” (Xabakuki 2.4)
\ip Xɛra Pɔli xɛtɛxi falani ito ma nɛn, a yi a findi Yesu a fe Xibaru Faɲin yɛba falana nde ra. A mato Romi Kaane 1.17 e nun Galati Kaane 3.11. A mɔn sɛbɛxi Heburune 10.38 kui.
\c 1
\p
\v 1 Waliyiya falan naxan so Nabi Xabakuki yii fe tooni alo xiyena:
\s Nabi Xabakuki a mawuga singena
\q
\v 2 Alatala, n luma i maxandɛ
\q han waxatin mundun yi n mali feen na
\q i mi n xuiin mɛ?
\q N luma gbelegbelɛ
\q han waxatin mundun yi
\q n naxa, “Gbalona!”
\q i mi n nakisi?
\q
\v 3 Nanfera i tinxi
\q n yɛɛn yi lu hakɛn na?
\q Nanfera i tinxi
\q a yamaan xa ɲaxankata?
\q Halagin nun gbalona n yɛtagi waxatin birin.
\q Lantareyaan nun yɛngɛn bata gbo ayi.
\q
\v 4 Nanara, sɛnbɛ mi fa sariyan na,
\q kiti kɛndɛn mi sama mumɛ!
\q Bayo muxu ɲaxine bata tinxin muxune rabilin,
\q kiti tinxintarene yi lu sɛ.
\b
\s Ala yi Nabi Xabakuki yabi
\q
\v 5 Ɛ yɛɛn ti siyane ra,
\q ɛ e mato, ɛ yi kabɛ,
\q ɛ yigitɛgɛ.
\q Bayo n fena nde ligama nɛn ɛ waxatini ito yi
\q ɛ mi yi lɛ naxan na,
\q hali xa a fala ɛ xa.
\q
\v 6 Bayo n Babilɔn kaane rakelima nɛn,
\q siya kininkinintare wɛkilɛxina,
\q e yi bɔxɔn birin yisiga
\q e yi yirene tongo
\q e gbee mi naxanye ra.\f + \fr 1.6 \fr*\fk Babilɔn\fk* kaane sɛnbɛn gbo nɛn ayi ɲɛɛ kɛmɛ sennin benun Marigi Yesu xa bari. E mangan yi na rabilinna bɔxɔne birin tongo yɛngɛni na waxatini.\f*
\q
\v 7 E magaxu, e sɛnbɛn gbo,
\q e fangan nan e sariyan nun e xunna kenla ra.
\q
\v 8 E soone xulun burunna ɲarin xa,
\q e xaɲɛ ɲinbari ra kankone xa.
\q E soo ragine gixin fama nɛn tuganɲɛ
\q sa keli yire makuyeni.
\q E gima alo singbinna nɛɛn fɔnɲɛ seen ma.
\q
\v 9 E birin fama gbalon nan xili ma.
\q E ganle yɛɛn tixi e sigaden nan na,
\q e suxu muxune malan
\q alo ɲɛmɛnsinna.
\q
\v 10 E mangane magelema,
\q e gelema kuntigine ma.
\q E gelema yire makantanxine birin ma
\q e gbingbinne nan nafalama taan yinna xɔn
\q e dangu yinna xun ma,
\q e taan suxu.
\q
\v 11 E yi dangu alo foye kala tiina,
\q e birin hakɛ kan,
\q e fangan nan e gbee ala ra.
\s Xabakuki a mawuga firindena
\q
\v 12 Koni Alatala xa mi i tan na xabu a fɔlɔni ba,
\q n ma Ala sariɲanxina?
\q Nayi, e mi nxu faxama!
\q Alatala, i bata e findi nxu makiti muxune ra.
\q Ala, n kantan fanyena,
\q i bata e sɛnbɛ so
\q alogo e xa nxɔ wanle saran nxu ra.
\q
\v 13 I yɛɛne sariɲan fe ɲaxin toon ma.
\q I mi tinɲɛ yamana ɲaxankatan matoɛ.
\q Nanfera nayi,
\q i yɛɛn tixi yanfantenni itoe ra?
\q Nanfera i dunduxi
\q muxu ɲaxini itoe yi yamaan naxɔri
\q naxanye tinxin e xa?
\q
\v 14 I bata adamadiine liga
\q alo yɛxɛne baani,
\q alo kari mi niimaseen naxanye ma.
\q
\v 15 Yaxune e birin suxuma kɔnna ra,
\q e yi e rate e yalaan na,
\q e e malan e bɛnbɛnla kui,
\q e ɲaxan han!
\q
\v 16 Nayi, e yi saraxane ba e yalane xa
\q e yi wusulanna gan e bɛnbɛnle xa,
\q bayo ne nan a ligama
\q e balon yi gbo ayi,
\q e donse ɲaxumɛne sɔtɔ.
\q
\v 17 Nayi, a mɔn xa lu a yalani kunkunɲɛ nɛn ba,
\q a mɔn yi siga siyane halagɛ kininkinintareyani ba?
\c 2
\q
\v 1 N tan luma nɛn tixi kantan tideni,
\q n yi lu taan nabilinna yinna xuntagi
\q alogo n xa a kolon
\q Ala naxan falama n xa,
\q mawuga xuini ito yabima kii naxan yi.
\s Ala mɔn yi Nabi Xabakuki yabi
\q
\v 2 Alatala yi n yabi, a naxa,
\q “Fe tooni ito sɛbɛ
\q n naxan yitama i ra,
\q i yi a sɛbɛ walaxane ma ki faɲi
\q alogo muxune xa mafura a xarandeni.
\q
\v 3 Bayo fe makɛnɛnxin na a ra
\q naxan nakamalima a waxatini.
\q A fa a waxatin nan legedenma,
\q a mi luma a ligataren na.
\q Hali a bu, a mamɛ,
\q bayo a rakamalima nɛn yati.
\q A mi xunkuyama ayi.
\q
\v 4 A mato! A yɛtɛ yigboxi,
\q a niin mi fan.
\q Koni tinxin muxun nii rakisin sɔtɔma nɛn
\q a dɛnkɛlɛyaan xɔn.”
\b
\q
\v 5 “Dɔlɔn mayanfan nan tima.
\q Wasoden mi a raxarɛ mumɛ!
\q A mi wasama alo laxira,
\q alo sayaan to mi wasama.
\q A siyane birin malanma a yɛtɛ xa
\q a e birin suxu yɛngɛni.
\q
\v 6 Na muxune birin xa mi a mafalama ba
\q magele falane nun fala xɔlɛne ra?
\q E naxa, ‘Gbalon na kanna xa
\q naxan se muɲaxine malanma.
\q A yi a doli goronna fari sa!
\q Ito fa ligama
\q han waxatin mundun yi?’
\q
\v 7 I doli faane mi kelɛ i xili ma ba?
\q Ne mi xulunɲɛ ba,
\q e fa i yimaxa?
\q I fan findima nɛn e se suxin na!
\q
\v 8 Bayo i bata siya wuyaxine yii seene tongo yɛngɛni,
\q yama dɔnxɛne i fan yii seene tongoma nɛn yɛngɛni.
\q Amasɔtɔ i bata muxune faxa,
\q i yi yamanane nun taane nun e muxune birin halagi.”
\b
\q
\v 9 “Gbalon na kanna xa,
\q naxan tɔnɔn fenma tinxintareyani
\q alogo a xa tide gbeen sɔtɔ,
\q a yi a futuxulu tɔrɔn na.
\q
\v 10 I bata i ya denbayaan yagi feen nan nata na ra,
\q i yi yama wuyaxi halagi,
\q i bɔnɔ i niini.
\q
\v 11 Bayo hali i banxin tixi gɛmɛn naxanye ra,
\q ne gbelegbelema nɛn i xili xunna,
\q xalanbene fan yi a ratin.”
\b
\q
\v 12 “Gbalon na kanna xa,
\q naxan taan nasabatima muxun wunla xɔn
\q naxan taan bɛtɛn sama ɲaxankatan xɔn.
\q
\v 13 Alatala Sɛnbɛn Birin Kanna xa mi a ragidixi ba,
\q a yamane wali xɔnne findixi yegen nan tun na tɛɛn xa,
\q a siyane e yɛtɛ yixadanma fuyan?
\q
\v 14 Amasɔtɔ bɔxɔ xɔnna rafema nɛn
\q Alatalaa binyen kolonna ra
\q alo igen baane rafexi kii naxan yi.”
\b
\q
\v 15 “Gbalon na kanna xa,
\q naxan dɔlɔn fima a adamadi bodene ma
\q han e xunne yi keli,
\q a yi e ragenla to.
\q
\v 16 I tan lugoxi yagin nan tun na,
\q binyen mi a ra.
\q I fan xa i min,
\q i xunna yi keli,
\q i ragenla yi lu.
\q Alatala a yiifari ma igelengen xɔlɛn soma nɛn i yii
\q i ya binyen yi findi yagin na!
\q
\v 17 Bayo i gbalon naxan nabaxi Liban yamanani,
\q na xɛtɛma nɛn i ma.
\q I bata xuruseen naxanye halagi,
\q na feen findima gaxun nan na i ma.
\q Amasɔtɔ i bata muxune faxa,
\q i yamanane nun taane nun e muxune birin halagi.
\q
\v 18 Suxurene tɔnɔn nanse ra
\q naxan a ligɛ muxune xa e yitɔn?
\q Sawuran nan tun ne ra
\q naxanye rafalaxi wuren naxulunxin na.
\q E wulen nan falama muxune xa
\q alogo e rafala muxun xa e yigi sa e yi.
\q E ala bobone nan nafalama.
\q
\v 19 Gbalon na kanna xa,
\q naxan a falama wudin xa,
\q a naxa, ‘Keli!’
\q A yi a fala gɛmɛn xa,
\q a naxa, ‘Xulun!’
\q Xɛmaan nun wure gbeti fixɛn nan soxi a ma,
\q koni nii mi a yi.
\q Na fa i xaranma di?
\q
\v 20 Koni Alatala nan a Batu Banxi sariɲanxini.
\q Bɔxɔn muxune birin xa sabari a yɛtagi.”
\c 3
\s Nabi Xabakuki Ala maxandina
\p
\v 1 Nabi Xabakuki Ala maxandina, muxune naxan bama mawuga bɛtin na.
\q
\v 2 Alatala, n bata i xinla mɛ.
\q Alatala, n bata kabɛ i kɛwali gbeene ma.
\q I mɔn xa ne rakamali to!
\q I mɔn xa i kɛwanle yita waxatini ito muxune ra.
\q I ya kininkininna xa rabira i ma i ya xɔlɔni.
\b
\q
\v 3 Ala kelima Teman nin.
\q Sariɲantɔɔn sa kelima Paran geyaan nin.
\qr Bɛti xuini te.
\q A binyen kore xɔnna birin ma,
\q a tantunna bɔxɔ xɔnna rafexi.
\q
\v 4 A nɔrɔn gbo alo sogena.
\q Tɛɛ dɛgɛn kelima a yiini
\q a sɛnbɛn luxunxi dɛnaxan yi.
\q
\v 5 Fitina furen minima a yɛɛ ra,
\q furene biraxi a fɔxɔ ra.
\q
\v 6 A na ti, a bɔxɔni maxa.
\q A na a yɛɛn ti siyane ra,
\q e xuruxurun.
\q Habadan geyane xuyama ayi,
\q geya singene kalama,
\q a dangu funfune luma nɛn habadan.
\q
\v 7 N Kusan kaane bubune kalaxine toma,
\q n Midiyan kaane dɔxɔdene yigitɛgɛxin to.
\b
\q
\v 8 Alatala i yi xɔlɔxi baane nan ma ba?
\q I bɔɲɛ te nɛn xudene xili ma ba?
\q I xɔlɔxi fɔxɔ igen nan ma,
\q i te i ya soone fari waxatin naxan yi,
\q i to te i ya yɛngɛ so wontorone kui nɔ sɔtɔni?
\q
\v 9 I ya xanla bata ramini,
\q i kɔlɔ xuine luxi nɛn
\q alo xalimakunle.
\qr Bɛti xuini te.
\q I bɔxɔni bɔma,
\q baa igene yi mini.
\q
\v 10 Geyane to i to,
\q e xuruxurun,
\q tule gbeen yi fa,
\q tilinna yi xuxu,
\q a yi a mɔrɔnne yite.\f + \fr 3.10\fr* \fk Igen mɔrɔnne:\fk* alo foyen na so igeni.\f*
\b
\q
\v 11 I xalimakunla naxanye wolima
\q sogen nun kiken bata ti e funfuni ne dɛgɛn bun,
\q koren yi a ɲinna masɔxɔn i ya tanban bun.
\q
\v 12 I fitinaxin nan bɔxɔni siga,
\q i siyane halagi xɔlɔni.
\q
\v 13 I minima i ya yamaan nan xunbadeyi,
\q alogo i xa i ya muxu yɛbaxin nakisi.
\q I muxu ɲaxine bɔnsɔnna mangan faxa,
\q i yi a bundɔxɔne birin naxɔri.
\qr Bɛti xuini te.
\q
\v 14 I e kuntigine xunne sɔxɔnma
\q e yɛtɛna xalimakunle nan na
\q naxanye gixin yi fama nxu raxuyadeni ayi
\q e gbelegbelema sɛwani,
\q alo e nɛma yiigelitɔne faxama wundoni.
\q
\v 15 I ya soone bata fɔxɔ igeni bodon,
\q igene yi walanɲɛ ayi.
\b
\q
\v 16 N to na birin mɛ,
\q n bɔɲɛn yi mini,
\q n dɛ xara gaxuni.
\q N xɔnne yi n xɔlɔ,
\q n sanne yi lu xuruxurunɲɛ.
\q Anu, n gbalo lɔxɔni ito mamɛma limaniyaan nin
\q bayo a fama nxu ɲaxankata siyaan nan xili ma.
\q
\v 17 Hali xɔdɛ binle mi fa fugama,
\q manpa binle mi fa bogima,
\q oliwi bogine yi kala,
\q hali donse yo mi fa kelima xɛɛne ma,
\q hali yɛxɛɛne mi fa kulani,
\q ɲingene fan yi ɲan ɛ sansanne yi,
\q
\v 18 koni n tan sɛwama nɛn Alatala yi,
\q n tan ɲaxanma nɛn Alaa fe ra,
\q n nakisimana.
\b
\q
\v 19 Marigina Alatala nan n sɛnbɛn na.
\q A bata n sanne lu
\q alo xɛnla sanne
\q a yi geyane xuntagine findi n ma siga tiden na.
\b
\p Na sɛbɛxi bɛti baane kuntigin nan xa. A xa ba maxase luti kanne ra.