\id AMO 
\ide UTF-8
\h Nabi Amosi Sora
\toc1 Nabi Amosi Alaa Falan Naxan Sɛbɛ
\toc2 Amosi
\mt1 Amosi
\mt2 Nabi Amosi Alaa Falan Naxan Sɛbɛ
\ip Amosi, nabiin nan yi a ra naxan keli Yudaya yi, Manga Yusiyaa waxatini, fɔ ɲɛɛ kɛmɛ solofere ɲɛɛ tonge sennin benun Marigi Yesu xa bari. Na waxatini Isirayila bɔxɔn yi taxunxi firinna ra. A yii fari fɔxɔn xili Yudaya yamanana, a kɔmɛn fɔxɔn xili Isirayila. Manga Yerobowan yi Isirayila bɔxɔni. A mi tinxi birɛ Alaa sariyan fɔxɔ ra, a yamaan fan mi luxi kira faɲin xɔn ma.
\ip Nabi Amosi yi kawandin ba Isirayila kaane xa, alogo e xa xɛtɛ e yulubine fɔxɔ ra. A yi tɔnna dɔxɔ suxure batun na. E mi yi Ala batun nabeɲinxi, koni e bata yi suxure batun sa na fari. Nanara, Ala yi a yita e ra Nabi Amosi barakani, a e Ala maxandin nun Ala batun birin bata lu fufafu. Ala mi wama a firinden xɔn ma.
\ip Na waxatini Isirayila kaa wuyaxi bata yi nafulu gbegbe sɔtɔ. E yi e miri a na birin findixi Alaa barakan na e tan mabinni. Nabi Amosi yi a yita e ra, a na nafunla mi yi kelima Ala yii, a kelixi e fe kobine yi e naxanye ligaxi yiigelitɔne ra.
\ip Nabi Amosi to yelin na falan tiyɛ e ma, a yi a fala e xa a Ala fama e ɲaxankatadeni e yulubine fe ra. Isirayila kaane yi a miri a fe xɔdɛxɛ yo mi nɔma e lideni, koni Nabi Amosi yi e mafan e xa xɛtɛ Alaa sariyan ma, xa na mi a ra e birin fama halagideni.
\ip Ala yi Isirayila kaane ɲaxankata alo Nabi Amosi a fala e xa kii naxan yi. E yaxune yi e yɛngɛ. Isirayila kaan naxanye mi faxa silanfanna ra, ne yi lu konyiyani yamana gbɛtɛ yi. Alaa falan birin yi kamali.
\ip Kitabun yireni ito falan tɔnɔn gbo to muxune xa. A lanma en xa en tuli mati kawandini ito ra alogo en xa dɛnkɛlɛya Ala ma alo a wama a xɔn ma kii naxan yi. Xa na mi a ra, en fan fama ɲaxankatan sɔtɔdeni alo Isirayila kaane.
\c 1
\p
\v 1 Amosi, Tekowa kaana, xuruse kanna a falan ni i ra. A toon naxan tixi Isirayilaa fe yi alo xiyena Yuda Manga Yusiya nun Isirayila Manga Yerobowan, Yowasi a diin waxatini, ɲɛɛ firin benun bɔxɔn xa xuruxurun. 
\v 2 A naxa,
\q “Alatala xaɲɛ xuiin naminima Siyon ma alo yatana,
\q a galan xuiin kelima Yerusalɛn yi.
\q Balo mi na xuruseen naxanye donma,
\q Karemele geya yati bata xara.”
\s Damasi a yulubin saranna
\p
\v 3 Alatala ito nan falaxi, a naxa,
\q “Damasi a hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q Bayo e bata Galadi tɔrɔ ɲaxi ra,
\q alo maala bɔnbɔma kii naxan yi.
\q
\v 4 Nanara, n Xasayele a banxin ganma nɛn.
\q Tɛɛn fama Ben-Hadada yire makantanxin kaladeni nɛn.
\q
\v 5 N Damasi taan so dɛɛn balan seene girama nɛn.
\q N Aweni lanban yi kaane halagima nɛn,\f + \fr 1.5\fr* \fk Aweni\fk* bunna nɛɛn fa fala hakɛna.\f*
\q e nun mangan naxan Beti-Eden yi.
\q Arami yamaan xalima nɛn Kiri yi.”
\q Alatala naxa na kiini.
\s Gasa taana yulubin saranna
\p
\v 6 Alatala ito nan falaxi, a naxa,
\q “Gasa taana hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata taana ndee muxune birin
\q xali Edɔn yi konyiyani.
\q
\v 7 Nanara, n Gasa a yinna ganma nɛn.
\q Tɛɛn fama a yire makantanxin kaladeni nɛn.
\q
\v 8 N na Asadodi kaane halagima nɛn,
\q e nun mangan naxan Asikalɔn yi.
\q N na Ekirɔn ɲaxankatama nɛn,
\q han Filisiti kaan birin yi faxa.”
\q Marigina Alatala naxa na kiini.
\s Tire taana yulubin saranna
\p
\v 9 Alatala ito nan falaxi, a naxa,
\q “Tire taana hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata taana ndee yamaan birin xali Edɔn yi konyiyani,
\q e layirin kala
\q e nun e ngaxakedenne Isirayila kaane tagi.
\q
\v 10 Nanara, n Tire taan yinna ganma nɛn.
\q Tɛɛn fama a yire makantanxin kaladeni nɛn.”
\s Edɔn ma yulubin saranna
\p
\v 11 Alatala ito nan falaxi, a naxa,
\q “Edɔn kaane hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata e ngaxakedenne yɛngɛ silanfanna ra.\f + \fr 1.11\fr* \fk Silanfanna:\fk* Sofane yɛngɛso dɛgɛmana.\f*
\q E mi kininkinin e ma,
\q e e xɔlɔn nadangu ayi!
\q
\v 12 N Teman ganma nɛn.
\q Tɛɛn nan fama Bosara yire makantanxin kaladeni.”
\s Amoni a yulubin saranna
\q
\v 13 Alatala ito nan falaxi, a naxa,
\q “Amonine hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata Galadi ɲaxalan fudikanne kuine yibɔ silanfanna ra,
\q alogo e xa bɔxɔ gbɛtɛ sɔtɔ.
\q
\v 14 Nanara, n tɛɛn soma nɛn Rabaha yinna ra.
\q Tɛɛn nan fama na yire makantanxin kaladeni
\q yɛngɛ sɔnxɔ sɔnxɔ xuini.
\q Na yɛngɛn luma nɛn
\q alo foye gbeena,
\q alo tule gbeena.
\q
\v 15 E mangan xalima nɛn konyiyani,
\q e nun a kuntigine.”
\q Alatala naxa na kiini.
\c 2
\s Moyabaa yulubin saranna
\p
\v 1 Alatala ito nan falaxi, a naxa,
\q “Moyabaa hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata Edɔn mangan xɔnne gan
\q han e findi a fuɲin na.
\q
\v 2 Nanara, n Moyaba ganma nɛn.
\q Tɛɛn nan fama Kɛriyoti yire makantanxin kaladeni.
\q Moyaba ɲanma yɛngɛ sɔnxɔn nin,
\q yɛngɛ so xɔtaan na fe waxatin naxan yi.
\q
\v 3 N na e mangan halagima nɛn,
\q e nun e kuntigine.”
\q Alatala naxa na kiini.
\s Yudayaa yulubin saranna
\p
\v 4 Alatala ito nan falaxi, a naxa,
\q “Yuda kaane hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E bata e mɛ Alatalaa sariyan na,
\q e mi a tɔnne suxi.
\q Bayo e bata la wule alane ra,
\q e fafane yi naxanye fɔxɔ ra.
\q Na nan e ralɔxi ayi.
\q
\v 5 Nanara, n Yuda yamanan ganma nɛn.
\q Tɛɛn nan fama Yerusalɛn yire makantanxin kaladeni.”
\s Isirayilaa yulubin saranna
\p
\v 6 Alatala ito nan falaxi, a naxa,
\q “Isirayila a hakɛ saxanna,
\q hanma naanin ma fe ra,
\q n mi xɛtɛma n ma fe ragidixin fɔxɔ ra.
\q E tinxin muxune masara gbetin na,
\q e tɔrɔ muxune masara sankidi saren na.
\q
\v 7 Yiigelitɔne tɔrɔn nafan e ma han
\q e e dunuɲa yi gidin bama e yii.
\q Diine nun e baba kafuma sungutun kedenna ma.
\q Nayi, e bata n xili sariɲanxin xɔsi.
\q
\v 8 E e sa saraxa ganden dɛxɔn dugine ma
\q e naxanye sɔtɔ tolimaan na.
\q E dɔlɔn min e suxurene banxin kui
\q e naxan sɔtɔ tinxintareyani.”
\b
\q
\v 9 “Anu, n tan nan Amorine halagi e xa,
\q naxanye sɛnbɛn yi gbo
\q alo suman wudina alo warine.
\q N na Amorine fangan birin ɲan fefe,
\q alogo e nama fa keli sɔnɔn.
\q
\v 10 N mɔn yi ɛ ramini Misiran bɔxɔn ma,
\q n yi ɛ rasiga ti ɲɛɛ tonge naanin tonbonni
\q alogo ɛ xa Amori bɔxɔn sɔtɔ.
\q
\v 11 N yi nabine ramini ɛ diine tagi,
\q e nun Dɛ Ti Nasiri muxune.
\q Isirayila kaane, a mi na kiini ba?”
\q Alatalaa falan nan na ra.
\q
\v 12 “Koni ɛ tan bata dɔlɔn so Dɛ Ti Nasiri muxune yii.\f + \fr 2.12\fr* \fk Nasirine\fk* fe mɔn sɛbɛxi Yatɛne 6.3 kui.\f*
\q Ɛ bata tɔnna dɔxɔ nabine ma
\q a e nama nabiya falane ti.”
\b
\q
\v 13 “Nanara, n na ɛ yibutuxunma nɛn,
\q alo wontorona, goron binyen naxan fari.
\q
\v 14 Muxu xulunxin mi nɔɛ a giyɛ.
\q Sɛnbɛmaan sɛnbɛn ɲanma nɛn.
\q Sofaan faxama nɛn yɛngɛni.
\q
\v 15 Xalimakuli wonla mi tiyɛ.
\q Naxan san mafura,
\q na mi a giyɛ.
\q Soo ragiin mi a niin nakisɛ.
\q
\v 16 Sofa wɛkilɛxin nagenla a gima nɛn na lɔxɔni.”
\q Alatalaa falan nan na ra.
\c 3
\s Ala naxan ɲɛnige Isirayila xa
\q
\v 1 Ɛ falani ito ramɛ,
\q Alatala naxan falama Isirayila kaane xili ma,
\q a xabilan naxan namini Misiran bɔxɔn ma.
\q
\v 2 “N na ɛ tan nan gbansan sugandi
\q dunuɲa xabilane birin tagi.
\q Nanara, n bata a ɲɛnige
\q n xa ɛ yulubine saran ɛ ra.”
\b
\q
\v 3 Muxu firin nɔɛ sigan tiyɛ yire kedenni ba,
\q xa e mi lanxi na ma?
\q
\v 4 Yatan wurundunɲɛ burunna ra ba,
\q xa a mi subena nde sɔtɔxi?
\q A a xuini tɛ a faranna ra ba,
\q xa a munma sese suxu?
\q
\v 5 Xɔliin birama yalaan kui bɔxɔn ma ba,
\q xa a mabandun se mi saxi na woson ma?
\q Yalaan woson balanɲɛ ba,
\q xa sese mi a kui?
\q
\v 6 Xɔtaan fema taan kui waxatin naxan yi,
\q muxune mi kɔntɔfilɛ ba?
\q Gbalon taan liyɛ ba,
\q xa Alatala mi a ragidixi?
\q
\v 7 Marigina Alatala mi fefe ligama,
\q fɔ a wundon makɛnɛn a nabine xa,
\q a walikɛne.
\q
\v 8 Xa yatan bata wurundun,
\q nde mi gaxuɛ?
\q Marigina Alatala bata falan ti,
\q nde tondɛ na nabiya falan naliyɛ?
\b
\q
\v 9 Ɛ xa ito fala Asadodi a yire makantanxine yi,
\q e nun Misiran ma yire makantanxine yi,
\q ɛ naxa, “Ɛ xa ɛ malan Samari geyane fari,
\q ɛ xa a mato
\q mɛn kaane kɔntɔfilixi kii naxan yi,
\q e e bode ɲaxankatama kii naxan yi.
\q
\v 10 E mi tinxinna kolon,
\q e seene sɔtɔma gbalon nun muɲan nin,
\q e ne se sɔtɔxine mara e banxi faɲine kui.”
\q Alatalaa falan nan na ra.
\p
\v 11 Nanara, Marigina Alatala ito nan falaxi, a naxa,
\q “A mato, ɛ yaxun fama ɛ bɔxɔ kaladeni nɛn.
\q E fama ɛ xunnakaladeni,
\q e yi ɛ yire makantanxine kui geli.”
\p
\v 12 Alatala ito nan falaxi, a naxa,
\q “Yatan na yɛxɛɛni bɔ,
\q xuruse rabaan nɔɛ yɛxɛɛn sanna
\q hanma a tunla nan gbansan nakisɛ yatan ma.
\q Isirayila kaane fan kisima na kiini nɛn.
\q Samari kaan naxanye e matabuma saden ma,
\q naxanye e magodoma Damasi karaxane ma,
\q ɛ tan mi kisɛ.”
\q
\v 13 Marigina Alatala,
\q Ala Sɛnbɛn Birin Kanna falan nan na ra.
\q “Ɛ ɛ tuli mati n na,
\q ɛ sereyani ito ba Yaxuba bɔnsɔnna xili ma.
\q
\v 14 N na Isirayila yulubine saran e ra waxatin naxan yi,
\q n na e ɲaxankatama nɛn e saraxa gandene fe ra
\q naxanye Betɛli yi.
\q Na saraxa gandene suxu seene birama nɛn bɔxɔni.
\q
\v 15 N mɔn e banxi faɲine rabirama nɛn,
\q ɲɛmɛn nun sogefuren banxine birin,
\q naxanye maxidixi sama ɲinne ra.
\q N ne birin kalama nɛn.”
\q Alatalaa falan nan na ra.
\c 4
\s Isirayila munma tubi Ala ma
\q
\v 1 Ɛ falani ito ramɛ,
\q ɛ tan ɲaxanla naxanye belebele
\q alo ɲinge turaxin naxanye Basan bɔxɔn ma.
\q Ɛ tan naxanye dɔxi Samari geyaan fari,
\q ɛ tan naxanye sɛnbɛtarene yigbɛtɛnma,
\q ɛ tan naxanye tima tɔrɔ muxune fari.
\q Ɛ a falama ɛ xɛmɛne xa, ɛ naxa,
\q “Ɛ fa minseene ra nxu xa, yo!”
\q
\v 2 Marigina Alatala bata a kɔlɔ a sariɲanni, a naxa,
\q “A mato, kiti lɔxɔn fama ɛ xa.
\q E fama ɛ suxudeni wure kɔnkɔrɔnxin nan na,
\q e yi ɛ tan nun ɛ diine xali.
\q
\v 3 Ɛ minima nɛn ɛ taa nabilinna yin kalaxin kui,
\q birin tixi a bode xanbi ra.
\q E ɛ xalima nɛn e yire makantanxini.”
\q Alatalaa falan nan na ra.
\b
\q
\v 4 “Ɛ siga Betɛli yi,
\q ɛ sa yulubin liga na.
\q Ɛ siga Giligali yi,
\q ɛ sa yulubin fari sa.
\q Ɛ xa saraxan ba xɔtɔnna birin yi,
\q ɛ mɔn xa yaganna ba
\q ɲɛɛ saxan yo ɲɛɛ saxan.
\q
\v 5 Ɛ burun ba barika bira saraxan na
\q buru rate seen naxan yi.
\q Ɛ xa ɛ kanba ɛ ɲɛnige ma saraxane yi,
\q bayo na fe sifan nafan ɛ ma,
\q ɛ tan Isirayila kaane.”
\q Marigina Alatalaa falan nan na ra.
\b
\q
\v 6 “N bata yi kamɛn naso ɛ taane birin yi.
\q Donseen yi dasa ɛ konni.
\q Koni hali n to na birin liga,
\q ɛ mi tubi n ma.”
\q Alatalaa falan nan na ra.
\b
\q
\v 7 “Kike saxan to yi luxi xɛɛn xa xaba,
\q n tondi nɛn tulen nafɛ ɛ ma.
\q N bata a liga taana nde yi tulen sɔtɔ,
\q taana nde mi a sɔtɔ.
\q N bata a ragidi xɛɛna nde xa tulen sɔtɔ,
\q xɛɛna nde nama tulen sɔtɔ.
\q
\v 8 Muxune yi e masiga taane yi ige fendeni,
\q koni hali min xɔnla,
\q a mi ba e ra.
\q Hali n to na birin liga,
\q ɛ mi tubi n ma.”
\q Alatalaa falan nan na ra.
\b
\q
\v 9 “N bata furen nafa ɛ sansine ma,
\q n bata e xara.
\q Tuguminne bata ɛ nakɔne kala,
\q e nun ɛ manpa bili nakɔne nun ɛ xɔdɛ binle
\q nun ɛ oliwi binle.
\q Hali n to na birin liga,
\q ɛ mi tubi n ma.”
\q Alatalaa falan nan na ra.
\b
\q
\v 10 “N bata fitina furen nafa ɛ ma,
\q alo n na a liga Misiran bɔxɔn ma kii naxan yi.
\q N bata ɛ banxulanne faxa silanfanna ra,
\q han ɛ yi wasa e binbine xirin na ɛ konni.
\q Ɛ yaxune yi ɛ soone tongo.
\q Hali n to na birin liga,
\q ɛ mi tubi n ma.”
\q Alatalaa falan nan na ra.
\b
\q
\v 11 “N bata ɛ ɲaxankata
\q alo Sodoma nun Gomora.
\q Ɛ luxi nɛn
\q alo wudi ganmatɔɔn naxan baxi tɛɛni.
\q Hali n to na birin liga,
\q ɛ mi tubi n ma.”
\q Alatalaa falan nan na ra.
\b
\q
\v 12 “Nanara, n fama ɛ tan Isirayila kaane ɲaxankatadeni nɛn.
\q N na a ligama ɛ ra nɛn.
\q Ɛ xa ɛ yitɔn ɛ dɛntɛgɛ feen na ɛ Ala xa.”
\q
\v 13 Naxan geyane nun foyen daxi,
\q a a miriyane makɛnɛn adamane xa,
\q naxan subaxan findima kɔɛɛn na,
\q naxan sigan tima yire matexin fari,
\q a xili nɛn Alatala, Ala Sɛnbɛn Birin Kanna.
\c 5
\s Alaa mawugana
\q
\v 1 Ɛ falani ito ramɛ.
\q N bata ɲande bɛtini ito ba Isirayila yamaan xa.
\q
\v 2 “Isirayila bata lu
\q alo sungutun faxaxina,
\q a mi fa kelɛ sɔnɔn.
\q A saxi bɔxɔni,
\q muxu yo mi a rakelɛ.”
\p
\v 3 Marigina Alatala ito nan falaxi, a naxa,
\q “Isirayila bɔnsɔnna,
\q taan naxan muxu wuli keden nasigama yɛngɛsodeni,
\q a muxu kɛmɛ nan gbansan toma xɛtɛ.
\q Taan naxan muxu kɛmɛ rasigama yɛngɛsodeni,
\q a muxu fu nan gbansan toma xɛtɛ.”
\p
\v 4 Alatala ito nan falaxi Isirayila yamaan xa, a naxa,
\q “Ɛ xa n fen alogo ɛ niin xa kisi.
\q
\v 5 Ɛ nama n fen Betɛli yi,
\q ɛ nama siga Giligali yi,
\q hanma Bɛriseba,
\q bayo Giligali kaan birin sigama nɛn konyiyani,
\q Betɛli fan halagima nɛn.”
\b
\q
\v 6 Ɛ xa Alatala fen alogo ɛ niin xa kisi.
\q Xa na mi a ra, Yusufu bɔnsɔnna,
\q a ɛ ɲanma nɛn alo tɛɛna.
\q Betɛli kaa yo mi na
\q naxan na tɛɛn natuyɛ.
\q
\v 7 Ɛ tan bata sariyan maxɛtɛ xɔlɛn na,
\q ɛ bata yo tinxinyaan ma.
\b
\q
\v 8 A tan nan Dii Tɛmɛ Solofere sare kurun
\q nun Donso sare kurun yɛbaxi kore xɔnna ma,\f + \fr 5.8\fr* Mɛn kaane yi \fk sare kurune\fk* yatɛxi nɛn alo se sawurane, e yi na sare kurune xili sa na seene xun ma. \f*
\q a dimini yalan kuyebaan na,
\q a sogen nagodo kɔɛɛn na,
\q a igen nakeli baani,
\q a na ragodo bɔxɔni tulen na.
\q A tan xili nɛn “Alatala.”
\b
\q
\v 9 A muxu gbeene halagima nɛn,
\q a e yire makantanxine kala.
\q
\v 10 Ɛ muxun xɔnnantenyama
\q naxan na ɛ makiti,
\q bayo ɲɔndi falan mi rafan ɛ ma.
\q
\v 11 Ɛ sɛnbɛtarene yigbɛtɛnma,
\q ɛ balon nasuxuma e ra mudun na.
\q Ɛ bata banxi faɲine ti gɛmɛne ra,
\q koni ɛ mi fama dɔxɔdeni ne kui.
\q Ɛ bata manpa bili nakɔ faɲine si,
\q koni ɛ mi na dɔlɔ minɲɛ.
\q
\v 12 Amasɔtɔ, n na a kolon ɛ hakɛn nun yulubin gbo.
\q Ɛ tinxin muxune yigbɛtɛnma.
\q Ɛ dimi yi seene rasuxu
\q alogo tɔrɔ muxune nama makiti ɲɔndin na.
\q
\v 13 Na na a toxi xaxilimaan dunduma,
\q bayo waxatini ito mi fan.
\q
\v 14 Ɛ fanna fen,
\q ɛ xɛtɛ fe ɲaxin fɔxɔ ra,
\q alogo ɛ xa kisi.
\q Nayi, Alatala, Ala Sɛnbɛn Birin Kanna
\q na luma nɛn ɛ xɔn,
\q alo ɛ a fala kii naxan yi.
\q
\v 15 Ɛ xa fe ɲaxin naɲaxu.
\q Fe faɲin xa rafan ɛ ma.
\q Ɛ xa kiti tinxinxin sa.
\q Xa ɛ na liga, yanyina nde, Alatala,
\q Ala Sɛnbɛn Birin Kanna diɲama ɛ tan
\q Yusufu bɔnsɔn dɔnxɛn ma nɛn.
\b
\q
\v 16 Nanara Marigina Alatala,
\q Ala Sɛnbɛn Birin Kanna ito nan falaxi, a naxa,
\q “E wuga xuini tema nɛn taana ngaani,
\q e sunu xuini te kirane birin xɔn.
\q E xɛɛ rawanle xilima nɛn
\q e xa e wuga xuini te,
\q e bɛti baane xilima nɛn,
\q e xa ɲande bɛtine ba.
\q
\v 17 N na dangu ɛ konni,
\q wuga xuiin tema nɛn ɛ xɛɛne birin ma.”
\q Alatala naxa na kiini.
\s Gbalon dina muxune xa
\q
\v 18 Gbalon ne xa,
\q naxanye waxi Alatalaa kiti lɔxɔn xa fa.
\q Ɛ wama nanse xɔn ma na lɔxɔni?
\q Na findima dimin nan na ɛ xa,
\q na mi findɛ kɛnɛnna ra ɛ xa.
\q
\v 19 Na luxi nɛn alo muxun
\q naxan a gima yatan yɛɛ ra,
\q a sa kanko xaɲɛ li.
\q A na so banxin kui,
\q a a digan banxini,
\q saɲin yi a xin.
\q
\v 20 Alatalaa kitin lɔxɔna,
\q dimin xa mi a ra ba?
\q Kɛnɛnna mi a ra ɛ xa na lɔxɔni hali!
\q
\v 21 “N bata ɛ sanle raɲaxu,
\q e mi rafan n ma fefe ma.
\q N mi waxi ɛ malanne xɔn feu!
\q
\v 22 Ɛ saraxa gan daxi yo,
\q ɛ Ala kise yo,
\q ɛ bɔɲɛ xunbeli saraxa yo,
\q ɛ saraxa turaxi yo,
\q e sese mi rafan n ma.
\q N mi tinma e rasuxɛ hali keden.
\q
\v 23 Ɛ bɛti xuiin makuya n na.
\q N mi waxi ɛ konden bɛtin xuiin mɛ feni.
\q
\v 24 N wama naxan xɔn,
\q sariya kɛndɛn xa gbo ɛ tagi
\q alo igen naxan baani.
\q Ɛ tinxinyaan xa lu
\q alo xuden naxan mi xɔrima.
\q
\v 25 Ɛ tan Isirayila yamaan to yi na tonbon yireni ɲɛɛ tonge naaninna bun ma,
\q ɛ saraxane ba nɛn n tan xa ba?
\q
\v 26 Ɛ ɛ gbee suxure Sikoti xali nɛn na waxatini ba?
\q Alo ɛ gbee mangana.
\q Hanma ɛ sare ala Kiyun,
\q ɛ naxanye rafalaxi ɛ yɛtɛ xa.
\q
\v 27 Nanara, n na ɛ xalima nɛn
\q konyiyani Damasi xanbi ra.”
\q Alatala naxa na kiini.
\q A xili nɛn “Ala Sɛnbɛn Birin Kanna.”
\c 6
\s Gbalon nafulu kanne xa
\q
\v 1 Gbalona e xa,
\q naxanye laxi e yɛtɛ ra
\q Siyon nun Samari geyane fari.
\q Ɛ tan muxu gbeene
\q naxanye na siya fisamantenna xun na,
\q Isirayila kaane xaxili tixi ɛ tan nan na.
\q
\v 2 Ɛ siga Kalene taan matodeni,
\q hanma Xamata, na taa gbeena.
\q Ɛ mɔn xa godo Filisiti bɔxɔni
\q Gati matodeni.
\q Ne fisa ɛ xa ba?
\q E bɔxɔn gbo ɛ gbeen xa?
\q
\v 3 Ɛ a mirixi
\q a ɲaxankata lɔxɔn mi ɛ lima,
\q koni ɛ a ligama nɛn
\q gbalon yi ɛ sɔtɔ.
\q
\v 4 Ɛ ɛ matabuma sade faɲin ma,
\q ɛ yɛxɛɛn nun ɲinge raturaxin donma,
\q
\v 5 ɛ sigin sa kondenna ra.
\q Ɛ yengi a ma, a ɛ fatan maxaseene ra
\q alo Nabi Dawuda.
\q
\v 6 Ɛ dɔlɔ gbegbe minma,
\q ɛ ture faɲin maso ɛ fatin ma.
\q Koni, ɛ mi kɔntɔfilixi
\q Yusufu bɔnsɔnna kala feen na.
\q
\v 7 Nanara, ɛ singe nan sigama konyiyani.
\q Ɛ sumunne danma nɛn.
\b
\q
\v 8 Marigina Alatala bata a kɔlɔ a yɛtɛ yi.
\q Alatala, Ala Sɛnbɛn Birin Kanna falan ni ito ra:
\q “Yaxuba bɔnsɔnna wason bata raɲaxu n ma.
\q E yire makantanxine mi rafan n ma.
\q N fama e birin halagideni nɛn.”
\b
\q
\v 9 Xa muxu fu banxina nde kui,
\q e birin faxama nɛn.
\q
\v 10 E kon kaan na so na banxini,
\q e binbine tongodeni,
\q a xa e gan,
\q a na naxan li banxini
\q a a falama nɛn na xa,
\q “Muxu gbɛtɛ mi be,
\q ba i tan na ba?”
\q A a yabima nɛn, “Ɛn-ɛn.”
\q A mɔn naxa, “I dundu,
\q i nama Alatala xinla fala!”
\q
\v 11 Bayo Alatala bata yamarin fi
\q a banxi gbeene nun banxi xurine,
\q e birin xa rabira, e kala.
\b
\q
\v 12 Soone e giyɛ gɛmɛ yireni ba?
\q Ɲingene mɛnna biyɛ ba?
\q Awa, nanfera ɛ sariyan maxɛtɛma xɔlɛn na,
\q ɛ tinxinyaan maxɛtɛ fe ɲaxin na?
\q
\v 13 Ɛ ɲaxanma fe fuune ra.
\q Ɛ naxa, a ɛ fe bata sɔnɔya
\q ɛ yɛtɛɛn sɛnbɛn xɔn.
\q
\v 14 Alatala, Ala Sɛnbɛn Birin Kanna falan ni ito ra:
\q “Nanara, n kelima nɛn ɛ xili ma,
\q Isirayila yamana.
\q Ɛ tan naxanye Lebo-Xamata taani
\q han Araba xudeni,
\q siyana nde fama nɛn ɛ tɔrɔdeni.”
\c 7
\s Amosi a fe to singena alo xiyena
\q
\v 1 Marigina Alatala yi fe tooni ito yita n na:
\q Xɛɛn to xaba mangan xa,
\q sansi nɛnɛn fan yi minima,
\q Alatala yi tuguminne ramini.
\q
\v 2 E to yelin sansine birin donɲɛ bɔxɔn ma,
\q n yi a fala,
\q “Marigina Alatala,
\q i xa e mafelu e hakɛne ra,
\q xa na mi a ra
\q Yaxuba bɔnsɔnna baloma di?
\q A sɛnbɛn mi gbo.”
\q
\v 3 Alatala yi kininkinin e ma,
\q a yi a fala, a naxa, “Ito mi ligɛ.”
\q Alatala naxa na kiini.
\b
\q
\v 4 Marigina Alatala yi tooni ito yita n na:
\q Marigina Alatala yi a ragidi a tɛɛn xa mini.
\q Tɛɛn yi bɔxɔn birin gan,
\q bɔxɔ igen birin yi xara.
\q
\v 5 N yi a fala,
\q “Marigina Alatala, yandi, diɲa,
\q xa na mi a ra
\q Yaxuba bɔnsɔnna baloma di?
\q A sɛnbɛn mi gbo.”
\q
\v 6 Alatala yi kininkinin e ma,
\q a yi a fala, a naxa, “Ito mi ligɛ.”
\q Marigina Alatala naxa na kiini.
\b
\q
\v 7 A yi fe tooni ito yita n na alo xiyena:
\q Marigin yi tixi yinna tinxinxin dɛxɔn,
\q bitikidi\f + \fr 7.7\fr* \fk Bitikidin\fk* mɔn falama yirena nde yi fa fala “\fk Birikidina\fk*.”\f* matinxin lutin yi suxi a yii.
\q
\v 8 Alatala yi n maxɔdin, a naxa,
\q “Amosi, i nanse toxi?”
\q N yi a yabi, n naxa,
\q “Bitikidi matinxin lutina.”
\q Marigin yi a fala,
\q “N waxi a xɔn,
\q n ma yamaan xa matinxin, Isirayila kaane.
\q N mi diɲɛ sɔnɔn.
\q
\v 9 Suxure batude matexine kalama nɛn
\q Isiyaga bɔxɔn ma.
\q Isirayila a batudene rabirama nɛn.
\q N kelima nɛn Yerobowan ma denbayaan xili ma silanfanna ra.”
\s Amosi nun Amasiyaa fe
\p
\v 10 Amasiya Betɛli saraxaraliin yi a fala Isirayila manga Yerobowan xa, a naxa, “Amosi yanfan nakelima i xili ma Isirayila bɔnsɔnna tagi. A naxan falama na mi fan bɔxɔn xa. 
\v 11 Amosi a falama, ‘Yerobowan faxama silanfanna nan na. Isirayila kelima nɛn a bɔxɔni konyiyani.’ ”
\p
\v 12 Amasiya yi a fala Amosi xa, a naxa, “I tan naxan toon tima, keli be, siga Yuda yamanani! Sa i balon fen mɛnni nabiya wanli, 
\v 13 koni i nama fa nabiya falane ti Betɛli sɔnɔn, bayo mangana yire sariɲanxin be manga taani ito yi.”
\p
\v 14 Amosi yi Amasiya yabi, a naxa, “Nabiin xa mi n na! N fafe fan, nabi mi yi na ra. Xuruse kanna nan n na. N Sikomoro binle fan nawalima. 
\v 15 Alatala yi n fen xuruseene tagi, a yi a fala n xa, ‘Siga, nabiya falane ti n ma yamana Isirayila xa.’ 
\v 16 Iki, i tuli mati Alatalaa falan na, i tan naxan a falama n xa, ‘I nama nabiya falane ti Isirayila xa, i nama falan ti Isiyaga bɔnsɔnna xa.’ 
\v 17 Nayi, Alatala ito nan falaxi, a naxa, ‘I ya ɲaxanla findima nɛn yalunden na taani. I ya diine faxama nɛn silanfanna ra. I ya bɔxɔn bama nɛn i yii, a yitaxun muxu gbɛtɛne ra. I tan, i faxama nɛn bɔxɔ haramuxin ma, Isirayila fan xalima nɛn yire makuyeni.’ ”
\c 8
\s Nabi Amosi a fe toon naanindena alo xiyena: Debena
\q
\v 1 Marigina Alatala yi fe tooni ito yita n na alo xiyena:
\q Deben naxan yi rafexi sansi bogi mɔxin na.
\q
\v 2 A yi n maxɔdin, a naxa,
\q “Amosi, i nanse toxi?”
\q N yi a yabi,
\q “Debe rafexi sansi bogi mɔxin na.”
\q Alatala yi a fala n xa, a naxa,
\q “Isirayila fan bata kɔxɔ n ma yamana.
\q N mi diɲɛ sɔnɔn.”
\q
\v 3 Marigina Alatalaa falan ni ito ra:
\q “Na lɔxɔni,
\q sigin naxan sama mangana banxini,
\q na masarama nɛn wuga xuiin na.
\q Binbine wolima ayi nɛn yiren birin yi,
\q birin dunduma nɛn.”
\b
\q
\v 4 Ɛ falani ito ramɛ,
\q ɛ tan naxanye yiigelitɔɔn tɔrɔma,
\q ɛ tan naxanye tɔrɔ muxun ɲaxankatama.
\q
\v 5 Ɛ naxa, “Kike nɛnɛn sanla ɲanma waxatin mundun yi,
\q alogo en xa en ma seene mati?
\q Matabu Lɔxɔn ɲanma waxatin mundun yi,
\q alogo en ma maala yi mati?
\q En ma se maliga seen xa xurunɲɛ ayi,
\q en ma saren xa mate.
\q En xa wule sikeela rafala.
\q
\v 6 En sɛnbɛtarene masarama nɛn gbetin na,
\q en tɔrɔ muxune masara sankidi saren na.
\q En maala matima nɛn e nun a dagina.”
\b
\q
\v 7 Alatala naxan Yaxuba rakanbaxi,
\q na yi a kɔlɔ a yɛtɛ yi, a naxa,
\q “N mi ɲinanɲɛ e liga feene ma,
\q han dunuɲa yi ɲan.
\q
\v 8 Bɔxɔni ito kalama na nan ma.
\q Be kaane birin luma nɛn sununi.
\q Bɔxɔn xuruxurunma nɛn
\q alo Misiran xudena,
\q naxan tema, a mɔn yi godo.”
\b
\q
\v 9 Marigina Alatalaa falan ni ito ra:
\q “N fama a ragidideni nɛn na lɔxɔni,
\q sogen xa godo benun a waxatina,
\q dimin xa sin bɔxɔni yanyi waxatini.
\q
\v 10 Ɛ sanle findima nɛn ɲan feene ra,
\q ɛ sigine findima nɛn wuga xuiin na.
\q N kasa dugin nagodoma nɛn ɛ ma,
\q n yi ɛ xunna bi sununi.
\q N fama sunu xungbeen nasodeni bɔxɔni,
\q alo dii kedenna na faxa waxatin naxan yi.
\q Na xɔlɛn mi bɛ ɛ ma habadan!”
\b
\q
\v 11 Marigina Alatalaa falan ni ito ra:
\q “Na lɔxɔne yi,
\q kamɛn soma nɛn bɔxɔni,
\q koni donse kamɛ mi a ra,
\q ige xɔli fan mi a ra.
\q Ɛ kamɛma Alatalaa falan nan ma.
\q
\v 12 Ɛ bɔxɔn birin yisigama nɛn,
\q keli kɔmɛnna ma han sogetedeni,
\q Alatala a fala fendeni,
\q koni ɛ mi a toma.
\q
\v 13 Na lɔxɔni,
\q ɛ sungutun tofaɲine
\q nun ɛ banxulanne fugama a ra nɛn.
\q
\v 14 A singeni nun,
\q e yi e kɔlɔma
\q Samari a suxure haramuxin nin.
\q E a fala, e naxa,
\q ‘Ɛ gbee ala gbo, Dan kaane!’
\q ‘Bɛriseba gbeen sɛnbɛn gbo!’
\q Koni, e fama nɛn biradeni,
\q e mi kelɛ habadan!”
\c 9
\s Nabi Amosi a fe to dɔnxɛna alo xiyena: Halagina
\q
\v 1 N yi fe toona nde ti.
\q Marigin yi a saraxa ganden dɛxɔn.
\q A yi yamarin fi, a naxa,
\q “Sɛnbɛtɛnne konden din,
\q han bɔxɔn yi xuruxurun.
\q Banxin birin xa bira muxune fari.
\q N na e diine halagima nɛn silanfanna ra.
\q Hali muxu keden mi kisima.
\q Muxu keden mi a xunbama.
\q
\v 2 Hali e sa e luxun laxira yi,
\q n na e suxuma nɛn.
\q Xa e te kore xɔnna ma,
\q n na e ragodoma nɛn.
\q
\v 3 Xa e e luxun Karemele geyaan fari,
\q n na e sagatanma nɛn,
\q n na e suxu.
\q Xa e e luxun baan xɔnna ma,
\q n saɲin yamarima nɛn,
\q a xa e xin.
\q
\v 4 Xa e yaxune e xali konyiyani,
\q n yamarin fima nɛn,
\q e xa faxa silanfanna ra.
\q N na n yɛɛn tima e ra nɛn,
\q koni e munanfanna mi a ra,
\q n na e ɲaxankatama nɛn.”
\b
\q
\v 5 Marigina Alatala Sɛnbɛn Birin Kanna,
\q a tan nan a yiin din bɔxɔn na, a xuya ayi.
\q Muxun birin yi sunu.
\q Bɔxɔn xuruxurunma nɛn,
\q a te, a mɔn yi godo
\q alo Nila Misiran xudena.
\q
\v 6 A bata a dɔxɔden ti kore xɔnna ma.
\q A bata kore walaxan sa bɔxɔn xun ma.
\q A igen nakelima baani,
\q a na ragodo bɔxɔni tulen na.
\q A xili nɛn “Alatala.”
\b
\q
\v 7 Alatalaa falan ni ito ra:
\q “Isirayila kaane,
\q ɛ nun Kusi kaane keden mi a ra n tan xa ba?
\q N mi ɛ ramini Misiran bɔxɔn ma,
\q alo n Filisitine ramini Kafatoro kii naxan yi?
\q N mi ɛ ramini Misiran bɔxɔn ma,
\q alo n Arami kaane ramini Kiri kii naxan yi?
\q
\v 8 A mato:
\q Marigina Alatala bata yulubi kanne mangayaan to,
\q n fama na raxɔrideni nɛn bɔxɔni ito ma.
\q Koni n mi Yaxuba yamaan birin halagima.”
\q Alatalaa falan nan na ra.
\b
\q
\v 9 A naxa, “N yamarin fima nɛn
\q alogo Isirayila yamaan xa yimaxa.
\q N na a yifema nɛn
\q alo maali fema kii naxan yi,
\q alogo xɔri faɲin keden nama bira.
\q
\v 10 Koni yulubi kanna naxanye n ma yamaan tagi,
\q n na e faxama nɛn silanfanna ra,
\q e tan naxanye a falama,
\q ‘A mi fama nxu ɲaxankatadeni,
\q na mi nɔɛ nxu liyɛ.’ ”
\s Isirayilaa kisi fena
\q
\v 11 “Na lɔxɔni,
\q n Dawudaa mangaya kalaxini tɔnma nɛn.
\q N na rafalama nɛn,
\q n na nɛnɛni tɔnma nɛn
\q alo a yi kiinde,
\q
\v 12 alogo e mɔn xa Edɔn bɔxɔn sɔtɔ,
\q e nun siyane birin
\q naxanye n xinla batuma.”
\q Alatalaa falan nan na ra,
\q a fama na birin nakamalideni nɛn.
\q
\v 13 Alatalaa falan ni ito ra, a naxa:
\q “A mato:
\q Lɔxɔne fama,
\q xɛɛ biine nun se xabane
\q walima waxati kedenna nin.
\q Manpa rafalane nun xɛɛ biine,
\q ne fan walima nɛn waxati kedenni.
\q Manpaan gboma ayi nɛn geyane fari,
\q a yi lu alo geyane birin yikunxi.
\q
\v 14 N na n ma yamaan naxɛtɛma nɛn a konni
\q keli konyiyani, Isirayila kaane.
\q E fama nɛn taa kalaxine tideni,
\q e dɔxɔma dɛnaxanye yi.
\q E manpa bili nakɔne sima nɛn,
\q e na minseen min.
\q E nakɔɔn sama nɛn,
\q e na bogin don.
\q
\v 15 N na Isirayila rasabatima nɛn e gbee bɔxɔni.
\q E mi kelɛ na sɔnɔn,
\q n dɛnaxan fixi e ma.”
\q Alatala naxa na kiini, ɛ Ala.