\id 2TI - Yagua NT -Peru 2008 (web -2013) \h 2 Timutévu \toc1 Tamitya Timutevuju̱ra Catera \toc2 2 Timutévu \toc3 2Ti \mt1 Tamitya Timutevuju̱ra Catera \c 1 \s1 Pávurubay mu̱chuvedani̱ Timutévubay \p \v 1 Ray Pávuru, Crístu Jesús nusu̱byi ra̱tidye tu̱chuna̱ya̱sara sanchiy, darya sava̱ta Ju̱denura rirya̱tidye datya̱sitye nijya̱nvay: “Jasintyatera jnu̱yada Crístu Jesúsmu.” \v 2 Rañu̱y jiijyu̱ra catera Timutévu, jiryatiy ri̱tay si̱tenu radyenu ji, jaryi ravya̱tasi̱ daryaju̱ ji. Ravya̱ta jiijyu̱ra samirya jivyicha̱da Ju̱denu jtedamuju̱, sa̱jantyutya Ju̱denu samiy variy ji, samirya jivyicha̱daju̱ jiryorimyu. Ti̱ta̱ju̱ jirya ravya̱ta jiijyu̱ Ju̱denumusiy, Vu̱yntyityu̱ Crístu Jesúsmusiy jarye. \s1 Ne vurya̱jada niquejadara samitu̱choda jiryatiy Ju̱denumusirya \p \v 3-4 Ray siitye saju̱ Ju̱denu, jiryatiy ta̱riy richiityenu̱yada vu̱myunatyavay saju̱ntiy, ne radyetyi̱sa ni̱ni̱ ra̱yada rajyuuchuveda jiyada. Ray ji̱ta jchana̱tyani̱ Ju̱denu day, ti̱ta̱ju̱ rundamu rajyorácharanumatiy sanijyu̱. Ne rajechipuy jachipityaja̱jada rajyorádodamu ji, jna̱rya, nupora jarye, radyiryu̱y daryaju̱ yiva, ra̱tidye jchana̱tyate samiy variy ji. Rajechipityara jiñi̱sijya̱ jiryatiy yina̱yada variy raya̱damú. \v 5 Rajechipityatanirye, nu̱tyu jichiityenu̱yada saju̱ Ju̱denu quivu̱yasa̱damu, daryaday nanusiityenu̱yada jitye̱yadabay Nóyidaju̱bentyi, yino̱dabay jarye, jiryatiy nani̱tya Évunise. Daryaday ri̱tatye jiñijyu̱, jiijerye ra̱siityee saju̱. \p \v 6 Ramuni̱ rajechipityatanitye ji jiryatiy Ju̱denu jmu̱tya̱da ji rabeyadanumatirya rajyomutu yino̱mu. Nu̱tyu riryijchera jintyuruvo̱ jiiday quivedaju̱, darya ye̱cha Ju̱denu jmu̱tya̱damuntiy, jiryatiy sasa̱yada tara ji. \v 7 Sasa̱yadate Ju̱denu Yintu vu̱y, vurya̱tidye vichasara ne suvu̱yada jachityavay. Sasa̱y ji̱ta vanu̱yada jachivyeda varivyu̱y, sava̱ta̱damuju̱, vurya̱tidye jachipiya̱ tara jvaayadaju̱ variy. \v 8 Ne ya̱jada tarade niquejada Vu̱yntyityu̱nchiy, ne ya̱jada raynchintyi jiryatiy tanuvu̱nujovimu ray, jiryatiy rachiitye daryaju̱ saju̱. Ya̱jmutya̱ ji̱ta jiintyirya jiyaru̱ryantiy, paru̱cha̱riy vicha̱da, jiryatiy ravicha̱da samitu̱choda datyadodamusiy. Ju̱denu sa̱y vu̱vyanu̱tya̱daju̱ vu̱y, vurya̱tidye jachi̱nityara paru̱cha̱riy vicha̱da variy. \v 9 Ni̱day ra̱yada vuryeyadantiy. Ni̱day natuyada varintyivyu̱y, vurya̱tidye siitye vinu saju̱. Ju̱denu ne jaryeta̱da tara vuryivaayadiva jijyu̱ vu̱y. Sajaryeta̱da ji̱ta vu̱y, jiryatiy su̱teda ya̱jto̱tanirya ta̱riy jijechipiya̱jada: “Ra̱vichanichara samirya riy.” Ni̱ni̱ vichaniryu̱yada samivyu̱y sadenunchiy, Crístu Jesúsnchiy; mucadi pi̱ru̱yadajisiy sajachipiya̱nu̱yadara. \v 10 Saca̱siyada dityadoda jidyiryara samirya jachipiya̱jada vu̱ñijyu̱, sadityadoda Vu̱yntyityu̱ vuryeyada rá̱ñu Crístu Jesús jti̱jadamusirya. Ni̱ni̱ vuudodara diiyada, samitu̱chodamusiy sasipyata̱da vandamuju̱ra jnu̱yada vuryi̱nu̱yadaju̱, vurya̱tidye datya variy: “Ne vana̱y jarapu̱rya ra̱chasara vuryi̱nu̱yada variy.” \v 11 Ju̱denu bayada yinsu̱byiju̱, samitu̱choda tu̱chodaju̱ jasirye, ra̱tidye datyanusara riy rityimyu̱ ne judíyuveda day. \v 12 Jirya tu̱chodanchiy ravyicha paru̱cha̱riy diye, ne ra̱da riva, radyetyi̱satya daryaju̱ni̱ Ju̱denu, saju̱ni̱ rachiitye. Radyetyama̱ samiy: “Ní̱ ra̱bárya samirya jiryatiy rabeyada simura, siti̱jada rundasa̱ra̱ju̱.” \v 13 Ya̱bay yimura samirya niquejada, jiryatiy jityuva̱choda rimusirya, daryani̱ ya̱nique jidchavu̱ varintyidye, Ju̱denumu tuva̱chodamu, Crístu Jesús va̱tasa̱damu jarye. \v 14 Ya̱jnu̱tya samirya jiryatiy Ju̱denu bayada yimura. Sa̱jmu̱tya jnu̱tya̱da Ju̱denu Jnutu variy jiirya, ni̱tiy vichasara vuryiva. \p \v 15 Jidyetyama̱ samiy jiryatiy rityocheda Ásiyamu vichavay ti̱ta̱ju̱ ray, rirya̱numitye variy ra̱jisiy. Nanuvichanu̱yada Ijédu, Ermójetya rityenuju̱y. \p \v 16-17 Sa̱ma̱ jantyutyaru̱tya Ju̱denu riy Onesíjuru taryi̱ vichi̱veda, rajuuraju̱ saramityaniy daryaju̱ra rayivatya̱da rivasiy. Sito̱jadanumatiy Rómamu, ne sa̱danu̱yada riva jijeñu̱yada rimu, tanuvu̱nujovimu. Sava̱tanu̱yada jaryi rañe̱cho̱, riva dicha̱dasa̱ra̱ju̱te. \v 18 Sa̱ma̱ jmu̱tya Vu̱yntyityu̱ yentyutya̱damu variñi̱, variryundamutiy sa̱jti̱ Vu̱yntyityu̱. Jiryatiy sivaayadate rajuura ta̱riy vu̱jyu̱, Evésumu, tama̱ jidyetyi̱sa jiintyirya. \c 2 \s1 Samiy jivya̱ta̱datate ya̱jvaarya yivaayada \p \v 1 Ji radyenu, ya̱vanu̱tya Crístu Jesús jmu̱tya̱data ji. \v 2 Jiryatiy jityuva̱choda rañique rajuuvay tuva̱chodaju̱ra, ra̱day ya̱jatyi datyadoda riy tavay vaduntyi, jiryatiy samirya jachipiya̱varyi, rirya̱tidye datyanuriy tavay varintyidye. \p \v 3 Ya̱jachi̱niy nu̱tyu ray ji, surramu vicha̱daju̱, nu̱tyu Crístu Jesús su̱taru, samiy su̱taru. \v 4 Ne sa̱jnu̱y su̱taru nutyityu̱ samiy jiñe̱cho̱ saryityi ji̱tye su̱taru ta̱ryu̱yada mityayu. \v 5 Daryaday savichasara pedótata tiyi̱si̱ntiy: netimyu̱ ne satiyi̱sa samiy, ne sa̱ca̱na̱y variy tiyi̱sa̱da murichiryara jatusiiy. \v 6 Jaryi nudiy jvaarya jiryatiy sivaachara yindimyu, ni̱ni̱ ra̱jo̱ta ju̱ryedara yivaaryavasiy vichara. \v 7 Ya̱jachipitya samirya jiryatiy ri̱tay yivara, Vu̱yntyityu̱ ji̱ta ra̱datyanujaya̱ samiy ti̱ta̱ju̱ variy jiirya. \p \v 8 Ya̱jachipityani̱ Jesucrístu jiryatiy sami̱sa̱da jidyiijyomusiy. Ni̱ni̱ vichasara Davyíbe jasi̱, jiryatiy su̱teda Ju̱denu ta̱riy: “Ti̱qui Davyí jasi̱ ra̱cha nutyityu̱, judíyuveda jiyada rá̱ñuju̱.” Daryani̱ rani̱cha samiy tu̱choda jiryatiy ríti̱tára. \v 9 Samitu̱choda datyadodamusiy, ravyichasara paru̱cha̱riy, ramuni̱ ravyicha tanuvu̱nusi̱ntiy, nu̱tyu jvi̱ sa̱ra̱ju̱. Ju̱denu niquejada ji̱ta ne tanuvu̱nusara day. \v 10 Ramuni̱day rajechi̱nitya ti̱ta̱ju̱ riyadaju̱ra jiryatiy Ju̱denu jaryetavaryi, rirya̱tidye ju̱riy varirya jantyutya̱da, jiryatiy Crístu Jesúsmura, rirya̱tidye vichajaya̱sara sisa̱ vandamu variy. \v 11 Rani̱ si̱tenu niquejada ji̱ta: “Vu̱tyi dii sisa̱ Crístu, daryaday vu̱ryi jnu̱chara sisa̱ju̱ varintyi. \v 12 Vu̱tyi jachi̱nityara paru̱cha̱riy vicha̱da sisa̱, daryaday vu̱ryicha nu̱tyu nutyityu̱veda variy sisa̱ju̱ntiy. Vurya̱tiy jtay sayadaju̱ Crístu: Ne radyetyani̱, daryaday sa̱jtay Ju̱denuva vuryeyadaju̱ntiy: Ne radyetya riy.” \v 13 Dañumamu̱y ne vurya̱jto̱tanicharara vu̱ñiquejada, ni̱ ji̱ta jiryiryi̱ jto̱tadeda darya jiñiquejada day, ne vana̱y sanique variy: “Ne ri̱teda dárya.” \s1 Si̱tenu jvaarya \p \v 14 Ya̱jachipityaja̱taniy jirya riy Ju̱denu siityari̱vay. Vu̱dyetyi̱satya yinu̱y Ju̱denu jnu̱y vu̱ñe̱cho̱. Ya̱jtay samiy ruuva: “Ne jirya̱niquetta jaryi ranchiy Ju̱denu niquejadayu, ne samirya ra̱cha variy,” tapi vinu ra̱rupanute riy tuva̱chuvay. \v 15 Ya̱jvaay samiy jijechiy jachipiya̱jadata, sa̱jtatye Ju̱denu variy yiva: “Si̱tenu jvaarya ji,” jiñuma vicha tariva jana̱dacanu variy. Ya̱datya munatya jiirya Ju̱denu niquejada, jidyetyadodaju̱ vasera, jiñuma carera si̱tenu tu̱choda. \v 16 Ya̱bay tajijyu̱ ra̱jisiy va̱cha niquejada, jiryatimyu̱ ne samirya ravichasara day, raju̱tyanuru̱ñuma japichiy daryaju̱ variy nicyara̱y vicha̱damuju̱ davyu̱y. \v 17-18 Jiryatiy riñiquera va̱cha niquejada, ra̱rapu̱ñuma varidye nu̱tyunuma ru̱cudivay variy. Nanuvichanu̱yada Imenévu, Jidétuta darya, nanujiintyemya̱ si̱tenujisidye. Nadani̱ datyanu variy: “Rimyi̱sama̱ Ju̱denu siityari̱vay diiyadamusiy.” Jirya datyadodata ricyaretaniy Ju̱denu siityari̱sa̱dajisiryi tavay. \v 19 Jiryatiy Ju̱denu jvaarya, ravichasarate ne vana̱y siquityaja̱tanichara, samiy bacharanumate jasirya, jirya niquejadata bacharate: “Vu̱yntyityu̱ datya riy jiñijya̱nvay,” jadchintyi jirya niquejadata: “Jirya̱ntya jiintye tajijyu̱ jadchiy, va̱cha vicha̱dajisiy, ti̱ta̱ju̱ rityi jtay siva: Rayntyityu̱ dajyi, Jesús.” \p \v 20 Criquityi̱ jaryi rajuura sabarya jiryorimyu, nu̱tyu sidye vandapa̱y criquityera jvaachara, órutera jvaachara jarye, jasidye rani̱cha jiiputera jvaachara risa̱ju̱ntiy, nandiimusiy jvaachara jarye. Jasidyerya vandapa̱y sidye, ne jaryi ruvaadyerya, tapinubesiy ru̱nu̱tya varirya, ravimu sasa̱ryi tavay nijya̱nvay, jiryatiy samirya na̱cho̱ jnu̱chavaryi. Tara sidye ji̱ta, ne ru̱nu̱tya jaryidyerya, ti̱ta̱ju̱ ribe tara bajyoju̱ra. \v 21 Daryani̱datye vu̱ryityi jiya tajijyu̱, va̱cha jachipiya̱jada quivu̱yadajisiy, sa̱bay Ju̱denu jimyuchechijyu̱ jiryorimyu varivyu̱y, vurya̱tidye jmu̱tyasara variñi̱, vani̱ra siityevay vurye̱cha varintyi, tara jvaayadaju̱. \p \v 22 Jivyicharu̱tyi Ju̱denu siityari̱nuju̱, ya̱bay vadero̱nuveda ni̱ru̱yadajisiy. Ti̱ta̱ju̱ rityi joránu Ju̱denunijyu̱ jiryatiy samirya jachityavay daryaju̱ riy, ya̱va̱ta risa̱ju̱ rana̱cho̱ samirya vichasa̱da jiryatiy Ju̱denu va̱tate yivara, jiryatiy tara jachipiya̱jadajisirya. Ya̱siityari̱ ji̱tani̱, ya̱va̱ta jaryi variñi̱. \v 23 Ya̱bay ra̱jisiy riñiquetta̱dayu, ne ridyetya̱damu daryaju̱yu. Ne yinu̱y jadchiy rú̱nday nique̱yada day. \v 24 Ni̱tiy vichasara Ju̱denu muchechiy, ne saryi nique̱ ti̱sa̱, saryi vichanichara samirya riy tavay, darya saryi datyara datyadoda samidyentiy. Daryaday saryi jachi̱niy ti̱ju̱ntiyu ni̱tiy ra̱chaniy tara ntani̱. \v 25 Sa̱ntya datyanutityi samiryamusiryi rityi vicha nique̱vye saju̱, mityajisitye saryi jmu̱tyate Ju̱denu riy, riryityidye paru̱y riva taji jachipiya̱jada variy, rirya̱tidye datyara si̱tenu varintyi. \v 26 Ra̱numatiy ramiy va̱cha jachipiya̱jada ruuva, rirya̱sipyatay variy bayantu nutyityu̱ ju̱redamusiy, jiryatiy tanuvu̱nusavay rivyichasara variy, rirya̱tidye jvaay saju̱ra jivya̱tara. \c 3 \s1 Nu̱tyura rirye̱chasara nijya̱nvay tamitya rundamu \p \v 1 Ya̱datya samirya jirya: Tamitya rundamu ji̱ta ra̱cha suvu̱chara. \v 2 Daryaday rirye̱cha nijya̱nvantyi, rirya̱va̱ta jaryiyu, daryaday rirya̱va̱tara criquiy jaryi varintyi. Rirya̱nunuva̱charayu, rirya̱jchana̱tya yinnuva̱yadamuyu, rirye̱cha javityiye̱yada niquevay, ne rirya̱siityeru̱y rijyu̱ jijye̱vyeda. Ne rirya̱datya jchana̱tya̱dani̱ ti̱ tarivantiy, dantyamu̱y ne rirya̱tuva̱churu̱y simu Ju̱denu. \v 3 Ne rirya̱datyara samirya va̱ta̱da, ne rirya̱datyara jantyutya̱dantiy, rirye̱cha va̱cha niquevantyi, ne rirya̱datyara yinu̱tyasa̱da, rirye̱cha si̱tenu datyi̱sa̱miy ji̱ta, rirya̱javittyuy varirya samirya vicha̱da. \v 4 Rirye̱cha jatachuvantyi, suvu̱yasa̱miy, ridyirya day jijechipiya̱ raju̱ day, rirya̱siityari̱ ji̱tara jiryatiy ru̱canuy ra̱jisiy Ju̱denumu tuva̱chodara. \v 5 Rirya̱jtay variy: “Ray siityari̱ni̱ Ju̱denu,” tama̱ vu̱ñi diryu̱y nta su̱mu̱tya Ju̱denu ruvaayadamuyu, tama̱. Ya̱bay tajijyu̱ rirya̱jisiy darya vichavay nijya̱nvay. \v 6 Davyeñi̱ ji̱ta ji̱tyenu̱ñumaya̱ rorivyayu, riquivu̱chu riy vatuvyeda datyi̱sa̱miy, jaryi juuchatavay, va̱cha vicha̱damu ritiya̱taniy yimuju̱ra. \v 7 Jivye vatuy rañi jachipiya̱ datya̱dara, tama̱ riñi datyara samirya si̱tenu, tama̱. \v 8 Nu̱tyu nanuvichanu̱yada rimyuraju̱be, Jánesiy jtyati̱bay, Jámbresiy jtyati̱bay jarye, jiryatiy nanuvicha̱da Muyisésibe jiyaro̱ju̱, daryaday jivye vaduntyi jiryatiy riquivu̱churiy vatuy, rivyichasara si̱tenu jiyaro̱ju̱ntiy. Vamirya jachityavay daryaju̱ daryi, ru̱tañu̱yada variy siityevayu, tama̱ riñi̱cha, tii, mitya. \v 9 Ne rirya̱jiriryi̱va̱ ju̱na̱y jadchiñu̱ndyerya, rirya̱numa datya nijya̱nvay varidye, jiryatiy ru̱nu̱y datyi̱sa̱miy daryaju̱ riy, nu̱tyu daryani̱ nani̱chantiy, nu̱tyu Jánesibejyu̱y vicha̱da daryantiy. \s1 Su̱pa̱jada Pávurubay tamitya tara simu Timutévubay \p \v 10 Ji ji̱ta siityari̱jada radyetyadodamuntirye, daryatiy ravyichadedate samiryamu ray, daryatiy rivaachara rajechipiya̱jadata, rachiityejada daryaju̱ Ju̱denuju̱. Jidyiyada riva ravyicha̱da tapimusintyi, ravya̱ta̱da jarye. \v 11 Daryaday jidyiyada rivantiy jiryatiy riyasanta javatya̱data ray, Ju̱denu siityari̱sa̱diva, jiryatiy ravyicha̱da paru̱cha̱riy ramusintyi, jiryatiy rivyichadedate Antiyuquíyamu ray, Icóniyumu, Dísturamu jarye, nu̱tyuñi̱ta ravyicha̱da paru̱cha̱riy ti̱ta̱ju̱ tara javatya̱datacu̱. Vuryi̱ndenu ji̱ta sipyata̱da ramusiy ti̱ta̱ju̱ ray. \p \v 12 Rani̱ si̱tenute ti̱ta̱ju̱ta: Rityi siityari̱ru̱ñi̱ Ju̱denu, Crístu Jesús jmu̱tya̱data, rirye̱chate javatyasavatye riva. \v 13 Vamiryamu vichavay ji̱ta, jatachodacanumiy jarye, jaryinrava̱ju̱ rirya̱jvaay variy, rirya̱quivu̱chu riy tavay, daryaday rirye̱cha quivu̱chusavay varintyidye. \v 14 Ri̱tay yiva, ji ji̱ta ra̱siityari̱ si̱tenura jiryatiy jidyetya samityera, jityuva̱chu variy jijechitya ramu. Ne jiñi datyi̱satecu̱: “Chi̱ra datyanu ray.” \v 15 Deramusidyete jidyetya̱datera Ju̱denu niquejadate, rani̱ ra̱datyanute vu̱y nu̱tyuramusiy sara̱y Crístu Jesús vuryeyada, nu̱tyuramusiy, vu̱dyetyatera simu tuva̱choda ramusiy. \v 16 Ju̱denu niquejada ji̱ta, ti̱ta̱ju̱ jiryatiy riñu̱yada vaduy cateravara, sasa̱yada Ju̱denu Yintutára. Rani̱ ji̱ta samirya datyadodaju̱ riy, rityimyu̱ ne datyara, samirya day nique̱tya̱daju̱ntiryi jiryatiy ripyaru̱yada riva Ju̱denu siityari̱sa̱da, daryaday samirya jmu̱tya̱daju̱ntiryi rityi caray ra̱jisiy tajijyu̱, ta̱rya̱tadedaju̱ntiryi, Ju̱denu siityari̱sa̱daju̱. Darya samirya raju̱ntirya vurya̱tidye niquetta riy jiryatimyu̱ ne rityuva̱churu̱y Ju̱denu niquejadamu. \v 17 Jirya Ju̱denu niquejada saja̱vyetya, ni̱tiy siityari̱ni̱ Ju̱denu day, sa̱numa jdutya ji̱tyaju̱yu, ti̱ta̱ju̱ samirya jvaayadaju̱ tara. \c 4 \p \v 1 Ra̱jtay tara yiva, ya̱tuva̱chu samiy rana̱cho̱, Ju̱denu jnu̱y daryaju̱ vu̱ñe̱cho̱, Crístu Jesús jarye, ni̱tiy ra̱cha cadnadu jnu̱vyejyu̱, diivyejyu̱ jarye; ya̱tuva̱chu samiy rana̱cho̱, jiñuma jada sa̱numatiy mu̱ti̱ Jesús varintyi, si̱tenu sansu̱yadaju̱. \v 2 Ramu ri̱tay yiva, ya̱tuva̱chu rimu day: “Ya̱datyanu samityera Ju̱denu niquejadate. Ya̱datyanujaya̱sarára, ne ya̱jachipiya̱: ‘¿Samiryavidye diyera datyadoda?’ ” Ya̱datyanu riy jiryatiy ricyarantyi, ya̱nique̱tya riy jiryatimyu̱ ne ruvaay samiy, ya̱vanu̱tyaniy rayaro̱ju̱ riy, ne yinu̱y ripyaru̱ryu̱ñuma riva Ju̱denu siityari̱sa̱da day. Ya̱jvaay ti̱ta̱ju̱ra jiñuma paru̱y riva tapi vicha̱da, daryamusidye ya̱datyanuntiy. \v 3 Ra̱day ju̱ti̱ ji̱ta rarundantiy dañi̱ta rirya̱tuva̱churu̱chara nijya̱nvay variy samirya datyadodana̱cho̱ nu̱ndye; tapitya rirya̱va̱ta rajuu datyanuvañe̱cho̱ rityi ra̱datyanu variy tarata riy, ratiy rityuva̱churu̱dye. \v 4 Rirya̱paru̱y tuva̱choda riva si̱tenu niquejada, rirya̱siitye ji̱ta rana̱cho̱ taji niquejada varidye. \v 5 Ji Timutévu, ya̱ntya jnu̱tya samiy ji, ya̱jachi̱niy raju̱ jipyaru̱tya̱da ji, ya̱ntya datyanu samirya samitu̱choda, ya̱jto̱taniy ti̱ta̱ju̱ yivaayadatara. \p \v 6 Rajyu̱ ji̱ta, rito̱numa raya̱da rundate, riryumiryu̱ñumara rayndaja̱ samitu̱choda jiyadaju̱. \p \v 7 Rivaamya̱ samirya Ju̱denu jtedamuju̱, rito̱tanimya̱ra rañú̱ ri̱nu̱yadata, rachiityema̱ si̱tenu saju̱ Ju̱denu, ne rachu̱tyeniryu̱rya. \v 8 Diye ji̱ta sa̱bay ra̱jiju̱ra samirya vicha̱da murichirya, ratiy sa̱sa̱ñuvi̱ Vuryi̱ndenu ray, variryundamutiy sa̱jti̱. Ni̱ni̱ ji̱ta si̱tenu datya samiy, ne sa̱carera. Ne vinu ray ra̱jmutya̱ra Vuryi̱ndenu murichedoda day, ti̱ta̱ju̱ rityi nuturya siti̱jada runda, jaryi rivya̱ta daryaju̱ni̱. \s1 Jaticheyada \p \v 9 Ya̱ntya jniy vani̱ra rimuju̱. \v 10 Sarrachuma̱ Démasiy vadero̱nu ray, saya̱da Tesadónicamuju̱ ra̱jisiy, sava̱ta̱da daryaju̱ra jaryi tarati̱ vicha̱da; vadero̱nu Cresénte jiya̱da Cadásiyamuju̱, Títu jarye jiya̱da Darumásiyamuju̱ntidye. \v 11 Vinu Dúcasiy ma̱cho̱sara risa̱. Ye̱jiryitya̱ rumusiñi̱ Márcu, ya̱pu̱chiy jiyuju̱ni̱, sa̱tidye jmu̱tya variy jiyu ray, jiryatiy siityera daryaju̱ni̱. \v 12 Ri̱pa̱tiñi̱ Tíquicu Evésumuju̱. \v 13 Ya̱numatiy jnintyi, ya̱jtu rumusirya sudorajisiy raryetya̱, raryeje jiryatiy ratyocheda Trúvasimyura, Cárpu rorimyu. Ya̱jtura catera padye nu̱chara risa̱ju̱, dantyamu̱y ne ya̱jachipurya racyateravi̱ rañu̱yadaju̱ntiy. \p \v 14 Adejá̱ntru ji̱ta, jiryatiy yivamyutera jvaañuni̱, ni̱ni̱ jarupanu jaryirye. Vu̱yntyityu̱ ra̱murichenutaniy sa̱rupadodivayu. \v 15 Ji jarye ra̱jnu̱tya sa̱jisiy ji, sa̱rupadodajisiy, sanique̱tta yinu̱rya vu̱dyetyadoda. \p \v 16 Jiryatiy rajo̱ttya̱ rañiquetí vijyo̱mujache satuunu cadnadu, ne ti̱ jti̱ru̱tyí rayadaju̱ niquejasi̱ju̱ varidye, tii, mitya, ti̱ta̱ju̱ni̱ rijetyachiya̱ varidyerye. Ne rañi̱ru̱y ti̱ ra̱jiyasatyaniy variy riva nu̱ndyeryi. \v 17 Vuryi̱ndenu ji̱ta vichanu̱yada ratyuunu, savanu̱tya̱da varirye, ra̱tidye tu̱chunumaya̱ra samitu̱choda, ti̱ta̱ju̱ nijya̱nvay tuva̱chodaju̱. Nu̱tyu ni̱ni̱day rañi jantyuyada tonibyí jtosiy rivantiy, ne riñi baya̱jada rañijyu̱ darya. \v 18 Vuryi̱ndenu ra̱jnu̱tyasarate nicyara̱y vicha̱dajisirye. Sa̱ra̱y rayada ra̱tidye jay variy ravimu savichajo, jadchityi sa̱nusu̱chara. Ni̱day ra̱chajaya̱sara vandamuntiy. Daryanuma ra̱cha jasiy. \s1 Mu̱chuvedata satu̱chu sisa̱ Ju̱denu riyadaju̱ \p \v 19 Ya̱mu̱chuvañi̱ Prísidya, savanu Aquída jarye, jivye Onesíjuru tenuveda jarye. \v 20 Erástu ma̱cho̱jada Coríntyumu, ratyochedani̱ Trójimu Myidétumu, jdiva̱jni̱ daryaju̱ni̱. \v 21 Ya̱ntya jniy vani̱ra, nijya̱jisiy. Ru̱pa̱ ji̱ta yimura mu̱chuveda Evúbudu, Pudénte, Dínu, Cudávuryaju̱y jarye, ti̱ta̱ju̱ jiryatiy Crístu Jesúsmusiy vu̱tyeryi̱veda riy. \v 22 Jasidye sa̱chasara Vuryi̱ndenu Jesucrístu yisa̱, Timutévu. Sa̱jmu̱tya Ju̱denu jirye ti̱ta̱ju̱. Rabaryi̱ma̱ jasiy. \cls Sayanuma Pávuru