\id 1TH - Yagua NT -Peru 2008 (web -2013) \h 1 Tesadónica \toc1 Rajo̱ttya̱ Catera Tesadonica Ja̱nvajyu̱ \toc2 1 Tesadónica \toc3 1Te \mt1 Rajo̱ttya̱ Catera Tesadonica Ja̱nvajyu̱ \c 1 \s1 Pávuruvedabay nu̱yadara catera rijyu̱, Tesadónica ja̱nvavyedabay, jiryatiy Ju̱denu siityari̱vavyedabaryi \p \v 1-2 Ray Pávuru, Sinubánuta, Timutévuta jarye, nu̱ñú̱rya catera jiryejyu̱ Tesadónicamu vichavay, jiryatiy savicha Ju̱denu jiryejye̱, savicha Jesucrístu jiryentyityu̱ntiy. Samirya jirye̱cha, samirya ra̱cha jiryejechiy varintyi. \s1 Ridyityadoda Tesadónicamu siityari̱vavyedabarya samirya jachipiya̱jada \p Variñumatiy nu̱tyu̱chutityi sisa̱ Ju̱denu jiryeyadaju̱, nu̱ñi̱tachara ji̱ta Ju̱denuva nu̱ñi jiryejyu̱: “¡Ranumatera!” \v 3 Nu̱jechipitya Vu̱jye̱ Ju̱denu diyadajachera jiryatiy jiryivaachara saju̱ra, jiryetyuva̱chodamu jvaachara, jiryivaayada paru̱cha̱rimyusiy, jiryevya̱ta̱damu jarye, jiryatiy jiryevya̱tani̱ Ju̱denu; nu̱jechipityara jiryentuyadantiy, jiryatiy jiryentuy jaryiñi̱ Vu̱yntyityu̱ Jesucrístu daryaju̱. \v 4-5 Ratyeryi̱veda, Ju̱denu va̱tasavay, nu̱dyetya ji̱ta sajaryeta̱da Ju̱denu jijyu̱ jirye, tapi jiryatiy nu̱tyu̱chodara samitu̱choda jiryiva, ne rito̱jada mitya niquejada jiryimu, rito̱jada ji̱ta Ju̱denu vanu̱yadata, su̱ntuta jarye, nu̱dyetya̱da ji̱ta si̱tenu varidyerya. Daryanuma ji̱ta jiryedyetyantidyerya nu̱vyicha̱da jiquebyimuntidye, nu̱me̱cho̱ variy jiryi̱mu̱tyi̱savajyu̱. \v 6 Ramusintyi nu̱dyetya sajaryeta̱da Ju̱denu jirye, jiryatiy jirye ji̱ta jantyatityirya nu̱vyicha̱da day, Vu̱yntyityu̱ Jesucrístu vicha̱dantiy, daryatiy jiryedyiryejadara Ju̱denunchiy tu̱choda paru̱tyasa̱danube; jiryi̱chana̱yadamu jidyiryejada darya, Ju̱denu Jnutumusiy jiryi̱chana̱yada. \v 7 Daryanuma ji̱ta ravichanu̱yada jiryevyicha̱da rirye̱ntya̱daju̱ ti̱ta̱ju̱ Ju̱denumu tuva̱chuvay, jiryatiy Masedóniya mucadimu vichavaryi, Acáya mucadimu vichavantyi. \v 8 Ra̱tiche ji̱ta jiryedyetyadodara Vu̱yntyityu̱ niquejada, ne vinu Masedóniya mucadimu, Acáya mucadimuntiy, ti̱ta̱ju̱ vicha̱diva ra̱tiche jiryetyuva̱choda Ju̱denumu, ne rivya̱ta nu̱ña̱jtay tara yiva variñu̱day, ridyetyama̱ daryaju̱ darya. \p \v 9 Riñi̱ ji̱ta jiryatiy rityuva̱chodara, riñi tu̱chutityiyada nu̱nchiy, nu̱tyuramusiy jiryedyiryejada nu̱y, varityi nu̱jeñu̱yada jiryimu. Rityu̱chuntiy jiryatiy jiryepyaru̱yada riva jiiputerana̱cho̱ jnu̱yada, jirya̱numityejada variy Ju̱denu na̱cho̱ju̱, jirya̱tidye vicha variy samuchechimyi. Ni̱ni̱ ji̱ta si̱tenu Ju̱denu day, ne diiyasi̱ sani̱cha, ne quivu̱rya risa̱ju̱ni̱, mitya. \v 10 Jirya̱numityedivasiy sana̱cho̱ju̱yu, jiryentutyityirya sadenu jti̱jada jarichumusiy, jiryatiy sami̱sadeda diibyimiy cabyimusiñi̱, jiryatiy Jesús jtyati̱ ni̱. Ni̱ni̱ ra̱ra̱chara vuryeyadaju̱ Ju̱denu nique̱yadajisiy, vu̱jyuuchuveda murichirya nique̱yadajisiy, sa̱ra̱chara vuryeyadaju̱. \c 2 \s1 Nu̱tyuramusiy sivaayada Pávurubay Tesadónicamu \p \v 1 Jiryeñi ji̱ta, ratyeryi̱veda, jiryedyetyi̱satya ne ravicha̱da mitya nu̱jeñu̱yada jiryimu. \v 2 Ne jiryi̱nu̱y, nu̱ñi jvacha̱divasiy nu̱ña̱vityiye̱cha̱divasiy jarye Vidípomu, nu̱dyito̱jada variy jiryimu, nu̱vyanu̱tya̱da variy Vuryi̱ndenumuyu, dañuma riñique̱yada jaryi variy nu̱ñijyu̱, nu̱dyetyadoda variy jichuvu̱yasa̱damura samitu̱choda, jiryatiy Ju̱denumusirya. \v 3 Nu̱dyetyadoda ji̱ta ne cararya, dantyamu̱y ne va̱cha jvaayadamusirya, dantyamu̱y ne quivu̱yada. \v 4 Daryatiy ji̱ta sa̱ntya̱da Ju̱denu nu̱y, sadatyama̱ rivasiy nu̱nchiy: “Riñi siityevay ra̱tu̱chura samitu̱choda.” Daryani̱ ji̱ta nu̱tyu̱chura samitu̱choda day, ne nijya̱nvay canuyadaju̱, Ju̱denu canuyadaju̱ ji̱ta nu̱tyu̱chu darya, ne jiryi̱nu̱y sa̱ntyasarara vu̱jechiy. \v 5 Jiryedyetyi̱satya samiy, tama̱ nu̱ñique yinnuva̱yadamusiy jirye, tama̱, sadatya ji̱ta Ju̱denuntiy, ne nu̱dyetyanu jirye, nu̱ña̱tidye jato tara variy jijyu̱. \v 6-7 Dantyamu̱y ne nu̱vya̱ta̱da rirya̱jchana̱tya nijya̱nvay nu̱y, richiityari̱jadivasiy, dantyamu̱y ne jiryimusiy, dantyamu̱y ne tavamyusiy. Jiryatiy nu̱vyicha Crístu nusu̱byimiy, nu̱ryi saboniy ramusiy jirye. Dañuma nu̱ñi̱cha nu̱tyu derapudera jiryequebyimu, nu̱tyu nanutama deramiy jnu̱tyanu̱ryi deramiy, nanunique nu̱tyu dera niquejadata variy ruuva, daryani̱ nu̱ñi̱cha jiryisa̱. \p \v 8 Daryantiy, nu̱vya̱ta̱da jaryi daryaju̱ jirye, nu̱che̱ryu̱yada variy jiryerya, ne vinu samitu̱choda Ju̱denumusiy, nu̱ñi sa̱ryu̱ntyirya jivyicha̱da ti̱ta̱ju̱ntiy, jiryatiy jaryi va̱tasavay daryaju̱ nu̱jyu̱ jirye. \v 9 Jiryejechipitya dyetyara nu̱dyivaayada, ratyeryi̱veda; paru̱cha̱rimyusiy nu̱dyivaañu̱yada nuporasa̱ra̱ju̱ra, nu̱ryiñuma ca̱sirya jiryetyevay barya, jiryatiy nu̱dyetyadoda varirya Ju̱denu tu̱choda jasiy. \v 10 Jirye ji̱ta diyada riva, Ju̱denu jarye, nu̱tyuramusiy nu̱vyichanu̱yada jiryisa̱, nu̱tyuramusiy, jiryatiy Jesúsmu tuva̱chuvay jirye. Nu̱vyichanu̱yada Ju̱denumu jnu̱vye, samirya vichavay, ne juuchatavay nu̱vyicha variy. \v 11-12 Jiryedyetya ji̱ta nu̱tyura nu̱vyichadeda jirye, nu̱tyu ti̱qui vanutiy jvaatyaniryu̱ryi jidyedyeñu, si̱chana̱chu variy ramusiryi, sadatyanuntiryi, daryani̱ ji̱ta nu̱vyichadeda jirye, jirya̱tidye vicha su̱canuyadaju̱ Ju̱denu, ne jiryi̱nu̱y sanatuyada yinsu̱jyomuju̱, vandajomuju̱ jiryedye. \p \v 13 Ramusiy ji̱ta nu̱ñi̱chana̱tya japichiñi̱ Ju̱denu, tapi jiryi̱mutya̱jadanumatirya Ju̱denu niquejada nu̱dyimusiy, ne jiryedyiryejada nu̱tyu nijya̱mi̱ niquejadara, jirye diryejada ji̱ta nu̱tyu Ju̱denu niquejada darya, daryani̱ ji̱ta si̱tenu rani̱cha, ravanu̱tya ji̱ta jirye, Jesúsmu tuva̱chuvay. \p \v 14 Jirye ji̱ta, ratyeryi̱veda, jiryevyichanu̱yada daryantiy nu̱tyu Jesucrístumu tuva̱chuvajyuu, jiryatiy Judéya mucadimu vichavay daryantiy. Nu̱tyu ripyaru̱tya̱datiy judíyuveda jityevay jarupanta̱damusiyu, daryaday jiryepyaru̱tyasara jityevay jarupanta̱damusintyidyeyu. \v 15 Judíyuveda ji̱ta mudodani̱ Nutyityu̱, ni̱ni̱ Jesús rimyudoda, Ju̱denuju̱ tu̱chuvay jarye, rimyununu̱yada nu̱ñi ti̱quimusiy, nu̱y ji̱tantiy, rijetya̱da variy nu̱ntyidye. Ju̱denu ni̱ru̱ryavitya darya jvaayada day, ti̱ta̱ju̱ nijya̱nvay jiyaro̱nusavay riva riy. \v 16 Riñi ju̱bayadara nu̱ñiquejada rirya̱jisiy jiryatimyu̱ ne Judíyuveda daryi, riñuma ramityaniy yivara Ju̱denu jiyasayada. Ramusiy rirya̱jto̱tanichara judíyuvedara jijyuuchuveda, ra̱jti̱sara Ju̱denu jiyasayada ranijyu̱, pattaryi ti̱ta̱ju̱ra. \s1 Pávurubay jañu̱ryu̱yada ruumuntiy \p \v 17 Nu̱y ji̱ta, ratyeryi̱veda, nu̱bechetadiveda jiryenchiy taraquiju̱, vu̱cyarayada vinu vu̱myo̱nchiy, ne vu̱cyaray vu̱jechinchidye. Jaryi nu̱ñuvayada variy jirye, nu̱dyiryu̱yada daryaju̱ riva jiryemyó̱, nu̱dyeyaru̱yada variy vani̱rava̱ju̱ jiryimuju̱. \v 18 Nu̱ñi jiyaru̱yada jiryimuju̱, ray Pávuru rañi jniryu̱ñu̱yada jiryimu, Satanásiy tutaniya̱jada daryaju̱ nu̱y. \v 19 Ne jiryi̱nu̱y jiryimu darya nu̱yntuyada day, nu̱ñi̱chana̱yada jarye; nu̱dyivaayada murichirya jarye, ranchityi nu̱ña̱jchana̱tyani̱ Vu̱yntyityu̱ Jesús, jimyu̱ti̱jadamu. \v 20 Si̱tenute jiryeñi̱cha vandavatye nu̱jyu̱, nu̱ñi̱chana̱yadamuju̱. \c 3 \p \v 1 Varityimyu̱ ne nu̱jechi̱deda diryu̱yada jiryiva, nu̱jechipiya̱jada samiy ra̱tidye ma̱cho̱ ra̱siquita Aténamu, nu̱ña̱jpa̱ni̱ Timutévu sa̱tidye jañu̱y jiryimu variy. \p \v 2 Nu̱ñi̱pa̱jada ji̱tani̱ Timutévu variy, ni̱tiy vu̱tyeryi̱, jiryatiy Ju̱denu muchechintyidyeñi̱, sa̱tidye datyanura samitu̱choda sanchiy Crístu. Nu̱ñi̱pa̱jadani̱ sa̱tidye suru̱tyaniy jirye, sa̱vanu̱tyaniy variy jiryetyuva̱chodamuyu. \v 3 Ne ti̱ ra̱siquitya variy jiryetyenu jityuva̱choda jarupadodamusiy, jiryeñi datyama̱: “Jarupadoda jarye sabay Ju̱denu vu̱jyu̱.” \v 4 Nu̱vyichanu̱yadanumatiy jiryisa̱, nu̱tyu̱chutityi ji̱tyaju̱ jiryivara, samitu̱choda jiyadaju̱ vurya̱paru̱tyajaya̱sara vu̱y, jiryedyetyi̱satya daryani̱day ravicha̱da day. \v 5 Ramuni̱timyu̱ ne rajechi̱deda nu̱ndyerye, ri̱pa̱jada variñi̱ Timutévu, ra̱tidye datya simusirya nu̱tyura ravichanu̱yada jiryetyuva̱choda, ri̱tay daryaju̱ saquivu̱chu dyetya quivu̱rya tarata jirye, rama̱cho̱jada mitya variy rivaayada jiryimu. \p \v 6 Diye ji̱ta siti̱ma̱ Timutévu jiryimusiy, satu̱chujamya̱ nu̱dyivara samiy tu̱choda jiryetyuva̱chodanchiy, jiryevya̱ta̱danchiy jarye; ranchintyi jiryatiy jiryejechipiya̱sara samiy nu̱ñijyu̱, jiryeñuvay jarye nu̱dyivasiy, nu̱tyu nu̱ñuvay darya jiryivasintyidye. \v 7 Jirya tu̱chodamusiy, ratyeryi̱veda, nu̱vyanu̱tyaja̱jasiy variy ranchiyu. Ti̱ta̱ju̱ nu̱pyaru̱tya̱danube, nu̱ña̱rupanusa̱damu jarye, ravanu̱tyaja̱ jiryetyuva̱choda nu̱y. \v 8 Ne jiryi̱nu̱y si̱tenuni̱ nu̱ñi̱nu̱y jiryetyi jiryiryi̱ radeda surra Nutyityu̱mu. \v 9 ¿Nu̱tyichiña̱te nu̱ña̱jchana̱tya samiñi̱ Ju̱denu jiryeyadaju̱, nu̱tyichiy? ti̱ta̱ju̱ nu̱ñi̱chana̱yadaju̱ jarye jiryatiy nu̱ñi̱chana̱y jiryenchintyi, Vuryi̱ndenu diyadajache. \v 10 Nu̱jechiñu̱y jaryi variy siva jna̱rya, nupora jarye, nu̱ña̱tidye diy ju̱na̱y jiryemyo̱va, nu̱ña̱ratyanu varirya jiryatiy rasu̱tye jiryetyuva̱chu̱sa̱damu. \p \v 11 Vu̱jye̱ Ju̱denu ji̱ta, Vu̱yntyityu̱ Jesús jarye, sa̱ma̱ jdutyara nú̱ nu̱ña̱jiju̱, nu̱ña̱tidye jto̱ jiryimu variy. \v 12 Jiryejyu̱ ji̱ta sa̱jasa̱chu Nutyityu̱ra jiryevya̱tarate day, jirya̱tidye va̱ta variy jaryi nu̱ñi jiryeyu, jirya̱ntya va̱ta ti̱ta̱ju̱ntidyeryi nijya̱nvantyidye, nu̱tyu nu̱vya̱ta darya jiryentyidye. \v 13 Ramusiy sa̱vanu̱tyanirya jiryejechiy jirya̱tidye vichasara jiintyi̱savay, ne juuchatavay, mitya, Vu̱jye̱ ju̱denu diyadajache, sa̱numatiy mu̱ti̱sara Vu̱yntyityu̱ Jesús, ti̱ta̱ju̱ sajiintyavay yisa̱. \c 4 \s1 Nu̱tyura sava̱tasara Ju̱denu vu̱vyicha̱daju̱ \p \v 1 Jadchintyi, ratyeryi̱veda, nu̱jechiñu̱y samiy jiryiva, nu̱ñi̱tay samiy Nutyityu̱ Jesús jtedamu jiryivantiy: Daryatiy jiryi̱mutya̱jada nu̱dyimusirya nu̱tyuramusiy vurya̱vicha samirya, nu̱tyuramusiy vu̱ryi jvaarya Ju̱denu va̱tarantiy, daryatiy jiryevyichantidye, daryanuma jirye̱chantidye, jaryivya̱ju̱ntya jirya̱jvaarya. \v 2 Jiryedyetya daryaju̱ra nu̱dyetyadoda, jiryatiy nu̱dyetyadoda Nutyityu̱ Jesús jtedamu jirye. \p \v 3 Rani̱ ji̱ta Ju̱denu va̱tara day, jirya̱tidye vicha jiintyi̱savay, juuchajsa̱miy, ne jirya̱jvaañada jiryatimyu̱ ne jiryevyaturu̱y nada day. \v 4 Jirya̱ntya datya jvaayada nada, nu̱ñi jivyaturu̱y, Ju̱denu diyadajache, samirya jachipiya̱jadamu jarye. \v 5 Ne jirya̱jvaay mitya jiñi̱ru̱yadamu nada, va̱cha jachipiya̱jadamu, nu̱tyu nijya̱nvay jvaay darya nada jivyaturu̱y, jiryatimyu̱ ne ridyetyani̱ Ju̱denu. \v 6 Ne ti̱ ra̱jvaaryu̱ñada jityenu vaturu̱y, sa̱jarupanu variñi̱, tapi sa̱murichenutaniy ji̱ta Nutyityu̱ra ti̱ta̱ju̱ darya jvaayada. Nu̱tyu̱chodama̱ daryaju̱ ji̱tyaju̱ darya jiryiva day. \v 7 Sanatuyada vitya jiryi̱nu̱y Ju̱denu va̱cha jvaayadaju̱ vu̱y, sanatuyada ji̱ta samirya jvaayadaju̱ davyu̱y. \v 8 Ramuni̱tiy ni̱tiy ne tuva̱churu̱y ramu jirya datyadoda, ne sa̱viryu̱tya ratani̱ datyanu̱, sa̱viryu̱tya ji̱ta varityeni̱ Ju̱denu day, ni̱tiy sa̱yada Yintu jiintyasi̱ jirye. \p \v 9-10 Ranchiñi̱ ji̱ta jiryatiy vu̱ryi va̱tasara nu̱ñivajyuu vu̱y, ne rasu̱tye nu̱yada jiryejyu̱nu̱day, tapi datyanusavañuma jirye Ju̱denumusidye, jirya̱tidye va̱ta nu̱ñi jiryeyu, nu̱tyu jiryevya̱tanuma ti̱ta̱ju̱ riy vu̱tyeryi̱veda Masedóniya mucadimu vichavay. Nu̱ñi̱tay ji̱ta jiryivantiy, ratyeryi̱veda: Jirya̱jasa̱chura jivya̱ta̱da nu̱ñi jiñijyu̱. \v 11-12 Jadchintyi, jirya̱ntya jantya vicha̱da ji̱tyojomu, jirya̱tidye jvaay nu̱ñi ti̱quimusirya yivaayada, nu̱ñi jijyomututa, nu̱tyu nu̱ñi̱teda ta̱riy jiryiva, jirya̱tidye vicha samirya jachityavay ridyiya jiryatimyu̱ ne Jesúsmu tuva̱chuvadyeryi, ne ra̱su̱tye tara variy jiryimusiy. \s1 Nu̱tyura ra̱cha Vu̱yntyityu̱ jti̱jada \p \v 13 Nu̱ñi̱tay ji̱ta jiryiva, ratyeryi̱veda, nu̱vya̱tatya jirye̱cha datyi̱sa̱miy rinchiy jiryatiy rime̱ jidyiiryo̱vedamu, ne jirya̱yivay jaryi ruuvasiy, nu̱tyu riyivatyasara tavayu, rityimyu̱ ne datya ta̱ra nu̱ña̱jiju̱. \v 14 Vu̱tyi tuva̱chu ji̱ta ramu Jesús diiyada, sami̱sa̱damu jarye vu̱tyuva̱chu, daryamusiy ji̱ta sa̱jara̱y Ju̱denu Jesústa riy ma̱vye, rityi ma̱y Jesúsmu tuva̱chodamu. \v 15 Jiryate nu̱tyu̱chute jiryiva Nutyityu̱ jtedamu: Vu̱y ji̱ta jiryatiy vu̱me̱cho̱ jnu̱vye ru̱biva diivye, Nutyityu̱ mu̱ti̱jadasa̱ra̱ju̱, ne vurya̱jasumiy rirya̱jisiy jiryatiy ma̱vyedyeryi. \v 16 Tapi ni̱day Nutyityu̱ ra̱jmusa jarichumusintyi natuye̱yadata, jiryatiy sa̱nique Ju̱denu jpa̱nu munatyi̱, jiryatiy ra̱suy Ju̱denu natutya̱. Rirya̱mi̱sa ji̱ta diivye variy munatya, jiryatiy Jesúsmu tuva̱chuvay rivyichanu̱yada. \v 17-18 Jadchiy ji̱ta, jiryatiy vu̱me̱cho̱ jnu̱vye ru̱biva, vurya̱jasumichara rusa̱, rapuryeryadinube, vurya̱tidye jidchoniy na̱vañi̱ Nutyityu̱. Daryamusiy ji̱ta vurye̱chajaya̱sara samirya sisa̱ variy. Ramuni̱day jirya̱vanu̱tyaniy jirya niquejadata nu̱ñi jiryedyeyu. \c 5 \p \v 1 Ranchiy ji̱ta jiryatiy ti̱ datyaru̱y nu̱tyeryivye sa̱jtimu Jesús, ta̱ra rundamu sa̱jvaay Ju̱denu tará, ri̱tay diye jiryiva, ratyeryi̱veda, ne jiryevya̱ta ra̱tidye nu̱y tara jiryimuju̱. \v 2 Jiryeñi̱day datya samirya jiryatiy Nutyityu̱ runda ra̱jti̱ vu̱ñiya̱resiy, nu̱tyu paranu̱ni̱ ju̱ti̱ vu̱ñiya̱resiy nupora daryá. \v 3 Riñumatiy jtay: “Samirya day vu̱ñi̱cha,” ra̱numa ju̱ti̱ rarunda, variñi̱ ji̱ta ra̱ju̱u̱y mityamusiy paruteda ruumu, nu̱tyu rupachodamu nuvadeda ra̱jti̱ nadimu jiryatiy mudasijyu̱ nada, dantyamu̱y ne rirya̱bay parutedajisiy. \v 4 Jirye ji̱ta, ratyeryi̱veda, ne jiryevyichasara nupocudinube, raryiñuma sarye sarunda jirye, nu̱tyu paranu̱ni̱ ne saryeñi̱ ti̱ sabaryatiy saparanuru̱y. \v 5 Jirye ti̱ta̱ju̱ daryaju̱ vanda dadyeñu day, jna̱rya dadyeñu jarye, ne nupora dadyeñu davyu̱y, dantyamu̱y ne nupocudi dadyeñu vu̱y. \v 6 Ramuni̱mu̱y ne vurya̱ma̱y, nu̱tyu rime̱ tavay; vurya̱ntya jnu̱y vuryeyada, ne vurye̱cha niyu̱yada jachi̱miy. \v 7 Ma̱vye ji̱ta nupora ma̱vye, niyu̱byimiy jarye nupora niyu̱vye. \v 8 Vu̱y ji̱ta jiryatiy jna̱rya dadyeñu davyu̱y, vurya̱ma̱cho̱ mitya rundamu, vu̱beyada variy vuryivara Jesúsmu tuva̱choda, surra jachivyetyidye vurye̱cha variy; sava̱ta̱da jarye vurya̱bay vuryiva, vu̱jechiy mutadujyu̱, vurya̱bantyirya vuryeyada ra̱yada vicha̱da vuryi̱no̱co̱ju̱ntiy. \v 9 Tapi ne sabayada Ju̱denura nu̱jyuuchuvediva tanuvu̱dodaju̱, sabayada ji̱tara vurya̱tidye ca̱na̱rya vuryiva jantyucha̱da Vu̱yntyityu̱ Jesucrístumusiy. \v 10 Ni̱ni̱ ji̱ta diiyada vuryeyadaju̱, nu̱tyura vurye̱cha variy jnu̱vyevyi, varimyata ma̱vye, vurye̱chajaya̱sara vatajuu sisa̱ variy. \v 11 Ramusiy jirya̱vanu̱tya nu̱ñi jiryedyeyu, jirye̱ntya jmu̱tya nu̱ñi ti̱quimusiyu, daryatiy jiryivaadyerya. \s1 Pávuru datyadoda samiryi jityeryi̱veda \p \v 12 Nu̱jechiñu̱y ji̱ta jirye, ratyeryi̱veda, jirya̱tidye tuva̱chu ruumu, rityi jvaay jaryi jiryequebyimu, rityi jiryeyantavay Nutyityu̱mu, rityi vasenu jirye. \v 13 Jirya̱jachipiya̱ samivya̱ju̱ riñijyu̱ jivya̱ta̱damuju̱, ruvaayadiva; jirya̱ntya vichaniy samivyeryi. Jirya̱vichanichara samiy nu̱ñi jiryeyu. \p \v 14 Nu̱ñi̱tay ji̱ta jiryiva, ratyeryi̱veda, jirya̱ntya vasenu riy pituvye. Jadchintyi, jirya̱ntya vanu̱tyaniryi vadiiryo̱ jachityavay. Jadchintyi jirya̱jmu̱tya riy jantyuramu vichavay, ne vani̱ra nique̱vye jiryeñi̱cha rijyu̱. \v 15 Jatyi jiryemyurichenu va̱cha vicha̱datara va̱cha vichadeda. Jirya̱va̱ta ji̱tara samirya vichadeda jiñijyu̱ day, ti̱ta̱ju̱ nijya̱nvay nijyu̱ jarye. \p \v 16 Jirya̱jchana̱jeya̱sara. \v 17 Jirya̱tu̱chujaya̱ sisa̱ Ju̱denu. \v 18 Jirya̱jchana̱tyajaya̱ ti̱ta̱ju̱ tara vichasa̱damuni̱ Ju̱denu, ne jiryi̱nu̱y darya sava̱ta Jesucrístumu jiryejyu̱. \v 19 Ne jirya̱jirichani̱ Ju̱denu Jnutu. \v 20 Ne jirya̱rrachura Ju̱denuju̱ tu̱choda. \v 21 Jirya̱jantya ti̱ta̱ju̱ra, jirya̱ju̱riy surrara jiryatiy samirya darya. \v 22 Jirya̱ntya jiintyechara va̱cha vicha̱damusiy. \p \v 23 Ni̱ni̱ ji̱ta Ju̱denu ni̱tiy sa̱y samirya vichasa̱da vu̱y, ni̱ni̱ ra̱jiintya ti̱ta̱ju̱ taramusiy jijyu̱ jirye, sa̱bay miryani̱ni̱ jiryi̱ntu, jiryejechiy jarye, jiryevyu̱ jarye ti̱ta̱ju̱. Sa̱bay juuchajsa̱miy variy jirye, Vu̱yntyityu̱ Jesucrístu jti̱jadasa̱ra̱ju̱. \v 24 Ni̱tiy natuvyu̱y, ne quivu̱rya ji̱ta day, ni̱ni̱ ji̱ta ra̱jto̱tanintyirya. \s1 Samu̱chuveda riy, sava̱ta̱da sa̱jvaay Ju̱denu samiy riyadaju̱ \p \v 25 Ratyeryi̱veda, jirya̱tu̱chu sisa̱ Ju̱denu nu̱dyeyadaju̱. \v 26 Jirya̱mu̱chuvay Jesucrístu va̱ta̱damu riy vu̱tyevay ti̱ta̱ju̱, samirya jvadiyadamuju̱ jirya̱mu̱chuvay nu̱jyu̱ntidye. \p \v 27 Ri̱tay ji̱ta Nutyityu̱ jtedamu jiryiva: Jirya̱niquetta vijyo̱mujachera jirya catera, ti̱ta̱ju̱ vu̱tyeryi̱veda tuva̱chodaju̱. \p \v 28 Samirya ra̱cha jiryejyu̱, Vu̱yntyityu̱ Jesucrístumusiy. \cls Sayanuma jiryetyeryi̱ Pávuru