\id ROM - Yaminahua NT -Peru 2008 (DBL -2013) 
\h ROMANOS 
\toc1 Pablo Roma Anoafo Kirika Kenexõ Fomani 
\toc2 Romanos 
\toc3 Ro. 
\mt1 Pablo Roma Anoafo Kirika Kenexõ Fomani 
\c 1  
\s1 Pablo Jesús Ifofaafo Roma anoafo kirika kenexõ fomani 
\p  
\v 1 Roma anoafãfe, ẽ mato kirika kenexõ fomai. Ẽkĩa Pablo, ẽ Jesucristo yonoxomis. Niospa ea nĩchini ẽ aõnoa yoimis inõ, ãfe meka shara Jesúsnoa yoinõ. 
\p  
\v 2 Niospa ãfe Fake nokoõnoax naiyonõpokoai tãpixõ a Niospa meka yoimisfãfe meka kenenifo. Jesúsnoa meka shara yoinifo.  
\v 3 Niospa Fakeõnoa meka shara kenenifo a inõpokoai keskafakĩ. Jesús Niospa Fakekõifiax David ãfe xini ini. Nã David nõko xinifãfe ãto xanĩfokõi ipaoni.  
\v 4 Niospa afama mĩshti fatiroxakĩ nõko Ifo Jesucristo otofani. Otofaxõ ato õimani nãmãi Niospa Fakekẽ. Niospa ãfe shinãmã ãfe Yõshi Sharaõxõ ãfe Fake otofani. Ato õimani Jesúsmãi ãfe Fakekẽ.  
\v 5 Jesucristoxõ noko noi. Noko noikĩ ãfe shinã noko inãni. Nãskaxõ noko nĩchini Jesúsnoa yoimis nõ inõ. A judeofomari a xoko fetsafori afãferi Jesús chanĩmara fanõfo nõ yoiaino. Jesús chanĩmara fakaxõ nikasharakõinõfo.  
\v 6 Mãri mã mã Jesucristo chanĩmara faito mato nĩchini mã afe yorafo inõ. 
\p  
\v 7 Roma anoafãfe, ẽ mato kirika kenexõ fomai. Niospa mato noixõ mato ifini mato chaka soaxoxiki afe yorafo mã inõ. Mato noikĩ mãto shinã mẽraxõ mato shinãsharamanõ. Epa Nios feta nõko Ifo Jesucristo mato askafanõ. 
\s1 Pablo a Jesús chanĩmara faafo Roma anoafo ato õipaini 
\p  
\v 8 Ẽ mato yoinõ. Nikakapo. Keyokõichi a maitio anoafãfe mato yoimisfo, mã Jesús chanĩmara faito õikakĩ. Nãskakẽ, “Aichora,” ẽ Nios famis. Jesucristoxõ, “Aichora,” ẽ famis.  
\v 9 Ẽfi Nios yonoxokõikai. Chanĩmakõi ẽ yonoxonikai. Ẽ feparanima. Ãfe Fakeõnoa ẽ meka shara yoimis. Pena tiifi ẽ mato Nios kĩfixõfafãini. Niospa tãpia.  
\v 10 Ẽ mato õisharapai. Nãskaxõ ẽ Nios kĩfifafãini ẽ mato ano kapaikĩ. Akka ẽ kai, ẽ kayamai ẽ kaima. A Niospa ea nĩchipaiyaino ẽ katiro.  
\v 11 Ẽ mato õisharapai. Õikaxõ ẽ mato Niospa meka yoipai. Niospa ãfe Yõshi Sharaõxõ ẽ mato yoipai mã chanĩmara fakĩ finakõinõ Jesús Ifo sharakõi faxiki.  
\v 12 Nãskax Jesúsnoax nõ inima faatanãnõ. Mã Jesús chanĩmara faino ẽ inimatiro. Nãskarifiakĩ ẽ chanĩmara faino mã inimatiro. 
\p  
\v 13 Efe yorafãfe, ẽ mato tãpimapai mã tãpinõ afeskaxma ẽ matoki kapai ẽ katiroma mei, ẽ kamisma. Mẽ kãta katamis ifiakeranax afara fetsa aki ẽ kamisma, mato ari kapaifi. Mai fetsa aria ichanãmisfo judeofoma nãfo ẽ Jesús ato chanĩmara fama. Nãskari fakĩ ẽ matori askari famapai.  
\v 14 Jesús ea yoia ẽ ãfe meka keyokõi ato yoinõ. Nã kirika kenekĩ tãpiafo ita a kirika kenekĩ tãpiamafori ẽ ato yoikai. Nafafoya a nafamafori ẽ ato yoitiro. Ẽ ato yoiaito nikakakĩ Jesús chanĩmara fanõfo.  
\v 15 Nãskari fakĩ ẽ Jesúsnoa mato Roma anoari yoikapaimis. 
\p  
\v 16 Jesúsnoa meka shara yoipaikai ẽ ranotiroma. Ãfe meka xafakĩa shara. Noko Niosnoa tãpimatiro a tsõa atiroma keskara Niospa atiro. Nõ chanĩmara faito Jesucristoxõ Niospa noko chaka soaxotiro nõ afe ĩpaxanõ, nõ fenoyamaino. Taefakĩ judeofãfe nikakõinifo. Akka iskaratĩari judeofomafãferi nikakani afe ipaxakakĩ.  
\v 17 Nã Jesúsnoa meka sharaõxõ Niospa noko õimatiro. Nõ Jesús chanĩmara faito Niospa nõko chaka noko soaxotiro. Nãnori kenenifo iskafakakĩ: “A Jesús chanĩmara fakõinaifo Niospa ãto chaka ato soaxõ afaa chakafamisma keskara ato õi. Nãskax shara ipanakafo Nios fe.” 
\s1 Keyokõi yorafo chakamisfo 
\p  
\v 18 Niospa meka nikakaspaifãfe a chakafamisfo Niospa ato õimani ato omiskõimakĩ. Niospa meka chanĩmakõifiano nikakaspakata yora fetsafori ato Niospa meka chanĩmara ato famakaspakani.  
\v 19 Nõko Nios afe keskaramãkĩ tãpipaikĩ nõ tãpitiro. Akka Niospa noko õimamis.  
\v 20 Nõ Nios õiyamafixõ nõ tãpitiro Niospa keyokõi onifani, nãmãi Nioskõi ixõ. Nã Niospa onifani õikĩ nõ tãpitiro tsoa fẽtsa keyokõi atiroma. Nios fistichi atiro, afama mĩshti. Nãskakẽ Nios nikakaspaifãfe Nios chanĩmara fapaikanima, a onifani õifikakĩ. Nãskakẽ Niospa ato omiskõimani nãfãfe Nios tãpipaikanima. Akka tãpipaikĩ tãpikeranafo.  
\v 21 A Niospa onifani õifikakĩ iskafakĩ yoipaikanima: “Nios fistichi keyokõi onifani. Aicho, Nios finakõia,” ikaxõ shinãpaikanima. Nãskakaxõ ãto shinã mẽraxõ afara shinãsharakanima. Afara chaka fisti shinãkani ãto õiti fakish keskara ikaxõ.  
\v 22 “Nõfi tãpikõiaki,” ifiakaxõ tsõa shinãsharaima.  
\v 23 Niosfi sharakõikĩ shara enenakama. Nãfi isharapakenakakĩ. Isharakõifiaito Ifofapaikanima. Askata yorafo isharayamaino yora fetsafãfe afara yora keskara onifakaxõ, “Na nõko Niosra,” ikaxõ kĩfimisfo Nioskõi kĩfikaspakakĩ. Yoinã keskara onifakaxõ, peya keskara onifakaxõ, rono keskarari onifakaxõ, nãskarafo onifakaxõ, “Na nõko Niosra,” ikaxõ kĩfimisfo. 
\p  
\v 24 Askafaifãfe õikĩ Niospa anã ato Ifofamaima. Nã chakafapaiyaifo fisti akaifãfe õikĩ Niospa ato xatemanima. Nãskax ãa ranã fekaxte faatanãkani.  
\v 25 Nios fistifi chanĩmismaki. Nã chanĩyamafimiskẽ tsõa Ifofapaima nã fisti nõko Nios sharakõifiano. Niospa keyokõi onifafianino tsõakai Ifofapaima. Akka nã Niospa onifanifo, “Nã nõko niosra,” ikaxõ kĩfitaifamisfo. Tsõakai Nioskõi Ifofapaima, mẽxotaima sharafinakõia ifiamiskẽ. Nãskakẽ, “Epa Niosi, mĩ sharafinakõia,” ikaxõ yoikani. Askapakexapainõfora. 
\p  
\v 26 Askafaifãfe õikĩ Niospa ato chaka xatexonama, afara chakafapaiyaifo fisti akaifãfe. Niospa noko onifani feronãfake yafi kẽro, kẽro feronãfake fe inõ. Askafafianino kẽro rafe fichinãpaikani chaka ikani.  
\v 27 Askatari feronãfake rafe fichinãpaikanax chotanãkani, kẽro tanatama. Askax chaka ikanax omiskõikani. 
\p  
\v 28 Nãskakakĩ chaka fisti shinãpaikani. Anã Nios shinãpaikanima. Askaifãfe õikĩ Niospa ato potai nã apaiyai keskara fakĩ chaka fisti shinãnõfo.  
\v 29-31 Chaka fisti feyafakanax chaka shinãkani. Chaka faatanãi xatekanima. Feronãfakefãfe ãto ãfima fichipaikĩ chotamisfo. Kẽrofãferi ãto fenema fichipaikĩ chotamamisfo. Nãskaxõ afara shara ãa atonã fisti fipaikani. Fetsafo chakafakĩ xatekanima. Fetsafo xĩtipaimisfo. Yora retemitsamis ita, setemitsamis ita, feratenã faatanãmisfo. Õitifishkikĩ feyafamisfo. Ato pãrafofãsafamisfo. Ato noikaspamisfãfe fetsafonã fĩapaikakĩ. Ato noikaspamisfo. Chanĩmisfo fetsafo pãramisfo. Nios noikaspayanã tsoa noimisfoma. Ĩchamitsamisfo. Kakapaimisfo, ãa kakamepaimisfo. Afara fetsa chaka shinãi iskakani: “Afaa chaka fetsa ẽ afeska faimẽti,” ixõ shinãkani. Ãto apa yafi ãto afa nikakaspakani. Afara shara shinãkanima. A yoiai keskara amisfoma. Ãa chanĩmisfo. Tsoa noikanima. Õitifishkikax fetsaki raemisfoma.  
\v 32 “Askakanax nakanax omiskõipakenakafo,” ixõ Niospa anori yoini. Niospa yoia keskara ãto shinã mẽraxõ tãpifikaxõ afara chaka xatemisfoma. Askata fetsafãfe afara chakafaifãfe õikani atoki inimamisfo. 
\c 2  
\s1 Niospa mẽstekõi noko õixõ yoitiro: “Nãto afaa chakafamisma. Akka natori chakafamis,” noko fatiro 
\p  
\v 1 Ẽfe kaifo judeofãfe, ẽ mato yoinõ. Mã fatorafãfe yoi iskakĩ: “Na keskara yorafãfe afara chakafaifo omiskõipakenakafo,” ixõ mã shinãmis. Anori shinãfikĩ mãri ato keskarari afara chakafamis. Nãskata, “Nõ afaa chakafamisma,” mã itiroma.  
\v 2 Mã nõ tãpia, Niospa ato tãpikõia a yorafãfe chaka shinãifo. Nãskakẽ ato omiskõimaxii. Niospa tãpikõixõ chanĩmakõi yoi.  
\v 3 Mã, “Nato afara chakafara,” ixõ mãri mã aki. ¿Nãskakĩ mã shinãimẽ: “Niospa noko omiskõimanima,” ixõ? Akka nãskakẽ ẽ mato yoi. Niospa matori omiskõimani mã afara chakafaito.  
\v 4 Niospa mato noi. Mã chakafafiaito mato omiskõimarisafaima. Mato noikikai mato omiskõimapaima. Nãskakẽ, “¿Nã ẽ ipaiyai keskara ẽ iki,” ixõ mã shinãimẽ? Askara shinãyamakãfe. Niospa mato noikĩ mato shinã fetsafaxopai mãto chaka mã xatexõ ãfe meka mã nikasharakõinõ.  
\v 5 Niospa mato shinã fetsafaxopaifiaito mã nikayospakõi. Mãto õiti mã kerexfaxõ mã Nios nikakaspai. Mãkai mãto shinã mã fetsafapaima mãto chaka mã xatexiki. Mã askafiaino iskaratĩa Niospa mato omiskõimayoima. Akka mã mai keyoaino mato omiskõimaxii mãkairoko mãto chaka xateano. Nã keyokõi yora chakafo ato omiskõimanaitĩari nãnori matori omiskõimaxii. Niospa mẽstekõi noko õi. Nãskakẽ nã yora chakafo ato omiskõimani. Nãskaxori nã yora chakafo ato omiskõimaxõ noko õimaxii.  
\v 6 Nã nõ imis keskara Niospa tãpikõia. Nãskax nõ naano keyokõi noko kopifaxii mã nõko mai keyoaino.  
\v 7 Yora fetsafãfe shara shinãmisfo a Niospa ato amapaiyai keskara apaikĩ. Niospa ato inimamatiro. Askatari Nios fe ipaikani. Askara yorafo Nios fe ipanakafo.  
\v 8 Akka yora fetsafãfe nã apaiyai keskara shinãkani. Niospa meka nikakaspakani. Chaka fisti shinãkani. Askarafoki Nios atoki õitifishkixõ ato omiskõimani.  
\v 9 Nã chakafamisfo nãfo keyokõi omiskõixikani, judeofo, judeofomari omiskõixikani afara chakafakanax.  
\v 10 Nã Nios chanĩmara faafo tii Niospa ato imasharaxii a keskara inõfo. Nãskaxõ ato yoixii iskafakĩ: “Mãfi sharaki. Mã ea nikasharakõia. Nãskax mã efe isharapakenaka,” Niospa ato faxii. Nãnori judeofo yoixii. A judeofomari ato yoixii askafakĩ.  
\v 11 Niospa õia nãskarafos õi yorafo, a judeofo õita a judeofomari nãskarafos õi. 
\p  
\v 12 Akka a Moisés kirika keneni tãpiamato afara chakafaax omiskõipakenaka. Nios fe ipanakama. Askatari a Moisés kirika keneni tãpiato afara chakafaax nãri omiskõipakenaka. Nãnori Moisés kenekĩ yoini: “A afara chakafamisfo omiskõipakenakafo,” ixõ Moisés kirika keneni.  
\v 13 A Moisés kirika keneni keskara nikafikakĩ nikakaspaifo. Afokai Niospa shara ato õima. Akka nã Moisés kirika keneni keskara nikakõiaifo, “Sharafora,” Niospa ato faxii.  
\v 14 Moisés Niospa meka a judeofoma ato kirika kenexonima. Askafekẽ a Moisés keneni keskara judeofomafãfe tãpiamafikaxõ ãa tãpikõikaxõ shara shinãkani. Nãskakaxõ a Moisés keneni tãpiafo keskara ikafo tãpiamafikanax.  
\v 15 Moisés keneni tãpiamafikaxõ shinãsharaifono fetsafãfe ato õitirofo Moisés keneni keskara Niospa ato shinã mẽra ato shinãmana. Akka sharafakaxõ shinãkakĩ iskafatirofo: “Ẽ afaa chakafama,” ixõ shinãtirofo. Akka afara chakafaxõ shinãkani iskatirofo: “Oashta, ẽ afara chakafaa,” ixõ shinãtirofo. Nãskaxõ anã afaa chakafapaikanima.  
\v 16 Niospa nõko õiti mẽraxõ nõ shinãito noko tãpikõia. Jesucristori noko tãpia. Akka yorafãfe nõko õiti mẽraxõ nõ shinãito noko tãpiafoma. Nãskakẽ mã nõko mai keyoaino Niospa noko yoikĩ iskafaxii mãmãi noko tãpixõ: “Nafo sharafo. Akka nafori chakafo,” noko faxii. Nãskara ẽ yorafo yoimis. 
\s1 Moisés judeofo Niospa meka kenexoni 
\p  
\v 17 Ea nikakapo, efe yorafãfe. ¿Mã shinãkĩ iskafatiromẽ? “Nõrifi nõ judeofoki. Moisés keneni keskara mã nõ tãpia. Nõfi Niospa afe yorafoki,” mã imis.  
\v 18 Moisés kenenioxõ Niospa mato amapaiyai keskara mã tãpitiro. Askatari mã asharakõikĩ mã tãpitiro.  
\v 19 Akka mã shinãmis iskafakĩ: “A Moisés keneni tãpiafoma yora fẽxo keskarafo. Nãskakẽ nõ ato tãpimasharatiro ãto õiti xafa shara inõfo, anã fakish keskara inõfoma,” ixõ mã shinãi.  
\v 20 “Nã afara shara tãpiamafori nõ ato tãpimatiro,” mã iki. Nãskatari, “Nã rama tãpiaifori nõ ato yoitirora,” ixõ mã shinãi. Mã shinãi iskafakĩ: “Mã nõ Moisés keneni tãpikõia. Nãskaxõ nõ ato yoitiro noko chanĩmara fanõfo,” ixõ mã shinãi.  
\v 21 A Moisés keneni keskara mã ato yoifikĩ, ¿afeskakĩri mãri mã nikakõimamẽ? “Atoki yometsoyamakãfe,” mã ato fafiai mãri mã yometsoi.  
\v 22 “Mãto ãfima fe iyamakãfe,” mã ato fafiax mãri mãto ãfima fe mã chotanãmis. Askatari yora fetsafãfe afara onifakaxõ, “Na nõko niosra,” famisfo. Askafafiaifono mã ato yoimis: “Anã ano Nios fetsama. Nios fisti. Afara yora faxõ, ‘Na nõko niosra,’ fayamakãfe,” mã askafamis. Mã ato askafafiai ãto nios kĩfiti pexefã mẽranoax mã yometsomis.  
\v 23-24 Mãfi yoikĩ iskafamis: “A Moisés Niospa meka kirika keneni nõ tãpikõia,” nã kakapaimisfo keskara mã imis. Askafafiaxõkai a Moisés keneni keskara mã akama. Mã askayamaito õikakĩ judeofomafãfe yoikĩ iskafamisfo: “Niospa afe yorafo judeofo isharafoma. Nãskakẽ Niosrikai sharama,” ixõ yoimisfo. Askafakĩ matoõxõ Nios chakafaifo. Nãnori Niospa meka yõra kirika keneni. 
\p  
\v 25 Moisés judeofo kirika kenexoni iskafakĩ: “Mãto fake feronãfakefo foshki repa xatekãfe mato tãpinõfo mã judeofokẽ,” ixõ Moisés kirika keneni. Mãto fake foshki repa mã xatefixõ nã Niospa mato yoini keskara mã nikayamaito Niospa mato õi judeofoma keskara. Niospa yorafo mã itiroma mã judeofofiax. Nãskarari nã Epa Niospa noko yoini keskara mã ikaito Niospa mato õi judeokõifo keskara.  
\v 26 Judeofoyamafixõ Niospa meka nikaifono Niospa judeofo keskara ato õi afe yorafo keskara.  
\v 27 Nã judeofoma foshki repa xateyamafikaxõ a Moisés Niospa meka yoikĩ kirika keneni tãpiyamafikaxõ nã Niospa yoini keskara chanĩmara fakanax nãskarafofi sharafoki mato keskarama. Akka mãfi judeofofixõ a Moisés kirika keneni tãpifixõ mã nikakõima. Moisés mato Niospa meka yoikĩ kirika kenexofianino mã nikasharakõima.  
\v 28 Mãfi judeofo kãinikĩ. Nãskaxõ mã foshki repa xatemis. Akka mã judeofofixõ a Niospa yoini keskara mã nikaima. Nãskax mã judeokõifo keskarama. Mã mãto feyafatifixõ mãto chaka mã xatemisma. Nãskaxkai mã Niospa afe yora ikima.  
\v 29 Moisés kirika kenekĩ yoini keskafakĩ judeofãfe ãto fakefo foshki repa xatemisfo ato tãpinõfo judeokõifokẽ. Akka judeofo atirifãfe Nios shinãkanima. Nãfofi judeomakõifo keskara. Nãfokai Niospa afe yorafoma. Akka judeofo atirifãfe Nios shinãkani. Nãfofi judeokõifokĩ. Nãfofi Niospa afe yorafokĩ. Niospa Yõshi Sharapa noko õiti fetsafaxõano Nios keskara shara ikafo. A Moisés kirika kenenito noko õiti fetsafaxotiroma. Niospa Yõshi Sharapa noko õiti fetsafaxotiro. Akka yorafãfe, “Mĩfi sharakĩ,” noko fayamafiaifono Niospa, “Mĩ sharakĩ,” noko fai. 
\c 3  
\p  
\v 1-2 ¿Nõ judeofoxõ nõko fakefo nõ foshki repa xatemiskẽ sharamẽ? Ẽje, shara itiro. Akka nõfi judeofo fake kãiniki. Moisés Niospa meka yoikĩ noko kirika kenexoni. Nãskakẽ nõ inimai nõ judeofo. Efe yora mĩshtichi, shinãkapo. Epa Niospa nã yorafo tii yoipaiyai keskara nõko kaifo taeyoi ato yoiyoni. Noko tãpimanai keskarari nõ yora fetsafori nõ ato tãpimanõ ãfe meka.  
\v 3 Akka nõko kaifãfe atirifãfe Niospa meka ifo shara fayamaifono akka Niospa a yoiai keskara amis.  
\v 4 Yorafo chanĩmisfo. Akka Nios ramashara chanĩmisma. Yorafãfe keyokõichi noko pãrafiaifono akka Niospa noko pãramisma. Nã David Niospa meka yoikĩ kirika keneni iskafakĩ: 
\pi1 Niospa ãfe meka mẽstesharakõi yorafãfe õinõfo. A shara shinãifo Niospa ato sharafaxõi. Akka a chaka shinãifo Niospa ato tãpimakĩ omiskõimaxii, 
\m ixõ David yoikĩ kirika keneni. 
\p  
\v 5 Nios fistifi sharakõiki. Nõkai a keskarama. Nãskakẽ nõ chakafaito yorafãfe õikakĩ shinãtirofo iskafakakĩ: “Nios iskarama, Niosfi sharakõikĩ. Na yorafãfe afara chakafakani. Akka Niospa afaa chakafamisma,” ixõ shinãtirofo. Nãskaxõ Nios sharara fakani. Akka nãskaxõ ãa yora fẽtsa shinãtiro iskakĩ: “Ẽ afara chakafaito õikakĩ yorafãfe yoitirofo: ‘Akka Nios iskarama, Nios shara.’ Nãskakẽ ẽ chaka shinãi yorafãfe Nios sharakõi õinõfo ea keskarama. Nãskakẽ Niospa ea omiskõimatiroma ẽ chakafafiaito,” ixõ yora fẽtsa shara shinãima. Nãskara shinãkĩ yõra shinãi keskara shinãi, Niospa shinãi keskara shinãima.  
\v 6 Nios chakama. Nios mẽstekõi ika. Akka mẽstekõi iyamaxõ yorafo yoikeranama iskafakĩ: “Nafo sharakõifoki. Ẽ ato sharafaxõi. Akka nafori chakafo. Ẽ ato omiskõimani,” ixõ Niospa yoikeranama mẽstekõi iyamaxõ.  
\v 7 Yora fẽtsa ãa shinãi iskatiro: “Yorafãfe ea yoitirofo ẽ chanĩaito õikakĩ. Iskafakakĩ ea yoitirofo: ‘Mĩ Nios keskarama. Nios chanĩmisma. Nios mẽstekõi ika,’ ixõ ea yoitirofo. Akka ẽ chanĩaito õikakĩ fetsafãfe, ‘Nios sharakõi, mia keskarama,’ ea faxikani. Nãskakẽ ẽ shinãtiro iskafakĩ, Niospa ea yoitiro iskafakĩ: ‘Mĩ afara chakafafiaito ẽ mia omiskõimaxima,’ ea Niospa fatiro,” ixõ ãa yõra anori shinãi. Anori Niospa yoiyamafiano ãa shinãi askatiro.  
\v 8 Iskafakakĩ yoipaikani: “Nõ afara chakafanõkãfe. Nõ afara chakafaito õikakĩ yorafãfe, ‘Nios sharara,’ fanõfo,” ixõ yoipaikani. “Nã Pablori anori yoimiski nõ afara chakafanõ,” ixõ yoikani. Ãa chanĩmisfo. Ẽkai anori yoimisma. Epa Nios chanĩmisma. Nã keskara yorafo ato omiskõimaxii. 
\s1 Nõ keyokõichi chakafamis 
\p  
\v 9 “Nõ judeofo sharakõifo. Akka nã judeofoma sharafoma,” ẽ faima. Askatamaroko ẽ iskafakĩ yoimis: “Nõfi nã judeofoma õitsa, nãskarafos nõ. Nõ keyokõichi afara chakafamis. Nãskakẽ Niospa ato yafi noko omiskõimaxii noko tãpimakĩ,” nãnori ẽ yoimis.  
\v 10 Niospa meka yoikakĩ kirika kenenifo iskafakakĩ: 
\pi1 Tsoa pishtakai nã Niospa yoia keskara famisma.  
\v 11 Tsoa pishtakai Nios shinãpaikanima. Tsõakai Nios tãpipaisharakanima.  
\v 12 Tsoa pishtakai anã Nios Ifofapaikanima. Afara chaka fisti fapaikani. Afara sharakai tãpiafoma. Tsõa pishtakai sharafamisma. Fato fistichikai shara Ifofaima.  
\v 13 Yora naax maiax fepekemeax pisi kãitiro. Nãskarifiakĩ nõko axfapa meka chaka fisti nõ yoimis. Mã nõ ato pãrakĩ feyafamis. Nã rono paekapato noko chachiano nõ paemetiro keskarari nõko meka chakaõnoax omiskõixikani.  
\v 14 Nõ ato fekaxtefapaikĩ meka mitsisipato fisti nõ mekamis. Nõ ato ĩchari famis.  
\v 15 Tsoa afayamafekẽ nõ ato retepaimis.  
\v 16 Nõa kafãsakĩ nõ ato omiskõimafofãsafamis. Nõa nõ ato fekaxtefaafofãsafaki.  
\v 17 Yora fetsafokai nõ ato raefapaimisma ato fe isharaxikima.  
\v 18 Nõko shinã mẽranoaxkai Nioski nõ rateima. Ãfe meka nõ nikapaima. Nõko chaka nõ xatepaima, 
\m ixõ nãskara yoikĩ kirika kenenifo. 
\p  
\v 19 Mã nõ tãpia a Niospa yoia keskara Moisés noko kirika kenexoni. Akka tsõakai Niospa meka nikakõimisfoma. Nãskaxõ tsõa yoitiroma iskakĩ: “Ẽfi afaa chakafamismaki. Ẽ shara imis,” tsoa itiroma. Akka Niospa noko yoitiro iskafakĩ: “Mãri afara chakafamiski,” keyokõi noko fatiro.  
\v 20 Nãskakẽ Niospa meka a Moisés noko kenexoni nõ nikapaifiaito, Niospa noko yoikĩ iskafatiroma: “Mã shara imiski,” noko fatiroma. Akka tsõa ãfe meka nikasharakõima. Ãfe mekaoxõ nõ tãpitiro keyokõichi nõ chakafamisfo. 
\s1 Jesucristo chanĩmara faax nõ Nios fe ipaxatiro 
\p  
\v 21-22 Iskaratĩa Niospa noko afara fetsa tãpimana. Noko xafakĩa õimana afeska faxõ noko imasharatiromãkĩ a keskara shara nõ inõ. Moisés kenenioxõ noko shara imaima. Akka nõ Jesucristo chanĩmara fakẽ Niospa noko shara imatiro Jesúsmãi noko nãxonikẽ nõko chaka noko soaxoxiki. Nãnori Niospa meka Moisés yoikĩ kirika keneni. Niospa meka yoimisfãferi nãnoriri kenenifo. Nã keyokõichi Jesucristo chanĩmara faifo Niospa ato shara imai. Judeofo, judeofomafori Niospa shara imatiro Jesús chanĩmara faifãfe.  
\v 23 Keyokõichi mã nõ chakafamis. Tsoa Nios keskarama. Nios sharakõi. Afaakai chakafamisma. A keskarakai tsoama.  
\v 24 Nãskakẽ Niospa noko noikĩ nõko chaka noko soaxotiro nõ Jesucristo chanĩmara faino. Akka Jesucristo nõko chakaõnoax noko nãxoni. Nãskaxõ nõko chaka noko soaxoni. Nõ afaa kopifatiroma Niospa noko shara imanõ.  
\v 25 Ãfe Fake Jesucristo nĩchini ãfe imi foax nõõnoax nanõ nõko chaka noko soaxoxiki. Nãskaxõ Niospa noko omiskõimanima. Nõ Jesús chanĩmara faino Niospa nõko chaka noko soaxoni nõ shara inõ. Nãskaxõ nõ õitiro Nios sharakõi. Jesús nayoamano chakafafiaifono Niospa teneyoni. Ato omiskõimayonima Niospamãi tãpixõ ãfe Fãkemãi chipo ato nãxoxiaino Niosmãi mẽstekõi ixõ.  
\v 26 Jesús nõko mai ano oax noko nãxoni. Nãskakẽ nõ chanĩmara faito Niospa nõko chaka noko soaxoni noko imasharai. Nãskaxõ Niospa noko õimasharai amãi mẽstekõi ixõ. 
\p  
\v 27 Nãskaxõ tsõa yoitiroma iskafakĩ: “Ẽfi sharaki, fetsafo keskarama. Nãskax ẽ Nios fe ipanaka,” ixõ tsõakai yoitiroma. Moisés kirika kenekĩ yoini keskara nikafixõ tsõa anori yoitiroma. Jesucristo noko nãxoni nõko chaka noko soaxoxiki nõ shinãsharanõ. Nãskakẽ nõ Jesús chanĩmara faino, “Jesús nõko chaka noko soaxoni nõ afe ĩpaxanõ,” ixõ nõ yoitiro.  
\v 28 Nãskakẽ anã nõ mato yoi. Jesucristo nõ chanĩmara fakẽma a Moisés kirika keneni keskara nõ ifofafiaito nõko chaka noko soaxonima. Akka nõ Moisés meka nikaito Niospa, “Mĩ afara sharafamiski,” noko fatiroma. Akka nõ Jesús chanĩmara faito, “Mĩ Jesúsnoax isharakõimis,” noko fatiro. 
\p  
\v 29 Nãskakẽri, ¿Niospa judeofo fisti ato ifitiromẽ afe yora inõfo? Maa, judeofomafori ato ifitiro Jesús chanĩmara faifono afe yora inõfo.  
\v 30 Niosfi fistiki. Judeofori, judeofomafãferi Jesús chanĩmara fakanax Nios fe nipanakafo ato chaka soaxonano.  
\v 31 ¿Nõ Jesús chanĩmara faxõ a Moisés kirika keneni nõ potatiromẽ? Maa, nõ potatiroma. Jesús chanĩmara faxõ a Moisés Niospa meka yoikĩ kirika keneni nikakĩ nõ chanĩmara fatiro. 
\c 4  
\s1 Abraham Nios chanĩmara fakõini keskara yorafãferi keyokõichi Nios chanĩmara fatirofo 
\p  
\v 1 Akka nõko xini Abraham ipaoni keskara ẽ mato yoinõ.  
\v 2 Abraham afara sharafaõxokai Niospa ãfe chaka soaxonima. Akka Nios chanĩmara faito Niospa ãfe chaka soaxoni. “Mĩ afara sharafaito nãskakẽ ẽ mia ifitiro mĩ efe yora inõ,” ixõ Niospa anori yoinima. Akka Niospa anori yoiano Abraham yoikerani: “Ẽ afara sharafaito ea Niospa chaka soaxona,” ixõ yoikerani ãa kakapaikĩ. Akka anori Niospa yoinima, nã Niospamãi mã ãfe chaka soaxonano chanĩmara faito.  
\v 3 Niospa meka yoikĩ Moisés kirika keneni iskafakĩ: “Abraham Nios chanĩmara faito Niospa ãfe chaka soaxoni. Nãskakẽ Niospa yoini iskafakĩ: ‘Mĩ afaa chakafamisma keskara ẽ mia õi,’ Niospa fani.” Nãskakẽ Moisés kirika keneni.  
\v 4 Akka feronãfãke yora fetsa yonomaxõ kori inãtiro, kaxpa inãtiroma.  
\v 5 Akka nõ afara sharafaõxokai Niospa nõko chaka noko soaxonima, nõ afaa chakafamisma keskara noko õixiki. Askatamaroko nõ Jesús chanĩmara faito Niospa nõko chaka noko soaxotiro.  
\v 6 Nãskarari David yoini iskafakĩ: “Mã Nios chanĩmara faito oa afaa chakafamisma keskara Niospa mato õitiro a Moisés keneni keskara mã nikakõiyamafiaito. Nãskax mã inimatiro.” David anã yoini iskafakĩ: 
\pi1  
\v 7-8 Fatora yora Niospa ãfe chaka soaxonano inimatiro Niospamãi õiaino afaa chakafamisma keskara. Mã Niospa yora ãfe chaka soaxõ Niospa anã shinãchakaima a yõra afara chakafapaoniõnoa. Nãskax yora inimakõitiro Niospamãi mã ãfe chaka soaxonano, 
\m ixõ David yoini kirika kenekĩ. 
\p  
\v 9 ¿Nã judeofo fisti Niospa ãto chaka ato soaxotiromẽ? Maa, anorima. Judeomafãferi Nios chanĩmara faifãfe ato chaka soaxotiro afori inimanõfo. Nãskakẽ Niospa meka yoimisto kirika keneni iskafakĩ: “Abraham Nios chanĩmara faito Niospa sharakõi õini,” ixõ a Niospa meka yoimisto kirika keneni.  
\v 10 Akka taeyoi Abraham foshki repa xateyoamano Niospa yoini iskafakĩ: “Mĩ ea chanĩmara fai nã mĩ afaa chakafamisma keskara ẽ mia õi,” Niospa fani.  
\v 11 Nios chanĩmara faito Niospa Abraham ãfe chaka soaxoni afaa chakafamisma keskara õixiki. Nãskaxõ chipo Abraham foshki repa xatenifo fetsafãfe tãpinõfo Nios chanĩmara faino. Akka taeyoi Abraham Nios chanĩmara fani askayoxoma. Nãskaxõ chipo foshki repa xateni. Taefakĩ Abraham Nios chanĩmara fani Niospa fake ixiki. Nãskano a chipo Nios chanĩmara faifo Abraham ãfe fenafo. “Abraham nõko xini ipaoni,” fatirofo. Abraham keskara nõ foshki repa xateyamafixõ nõ Nios chanĩmara faito Niospa noko chaka soaxotiro afaa chakafamisma keskara noko õixiki.  
\v 12 Abraham askayoxoma Nios chanĩmara fani. Nãskaxõ foshki repa xateni. Nã Abraham judeofãfe ãto xini ipaoni. Judeofo a Nios chanĩmara faafãfe nãfãfe ãto xinikõi Abraham nafãferimãi Nios chanĩmara fakanax. 
\s1 Niospa noko yoiai keskara noko axõi 
\p  
\v 13 Niospa Abraham yoini: “Ẽ mia yafi mĩ fenafo keyokõi ẽ mato mai inãikai,” fani. A Moisés kirika keneni Abraham nikaito Niospa mai inãnima. Akka Nios chanĩmara faito Niospa mai inãni. Nãskaxõ Abraham Nios chanĩmara faito Niospa ãfe chaka soaxoni, afaa chakafamisma keskara shara õikĩ.  
\v 14 Fetsafãfe anorima shinãtirofo iskafakakĩ: “Nõ Moisés kirika keneni nikaito Niospa a yoiai keskara noko axotiro. Akka Jesús fisti nõ chanĩmara faito Niospa noko axotiroma. Kaxpa nõ Jesús shinãi,” ixõ anorima shinãtirofo. Akka nõroko Jesús chanĩmara faito Niospa yoia keskara noko axosharatiro Jesúsmãi nõko Ifoxõ.  
\v 15 Akka Niospa meka a Moisés yoini keskara nõ nikayamaito Niospa noko omiskõimatiro. Akka Niospa noko afaa yoiyamanino nõ nikayospa ikeranama. Akka iskaratĩa nõ nikayospakõifo mã nõmãi Moisés kirika keneni tãpiax. 
\p  
\v 16 Taeyoi Niospa Abraham yoiyoni Nios chanĩmara faino. Nãskakẽ Niospa afama mĩshti axoni a yoiyoni keskafakĩ. Niospa Abraham afaa yõkanima afama mĩshti axosharaxõ. Akka Abraham ãfe fenafori Niospa ato noikĩ nãskaxõ afama mĩshtiri ato axosharai a yoiyoni keskafakĩ. A Moisés yoini keskara nikakõiaito Niospa afama mĩshti axosharanima. Akka Nios chanĩmara faito Niospa axosharani. Nãskarari a Abraham keskarafo Nios chanĩmara faifori Niospa ato shara faxõi. Akka Abraham nõko xinikĩ nõmãi Nios chanĩmara fai Abraham ipaoni keskara.  
\v 17 Niospa Abraham yoini keskafakĩ, yora fẽtsa kirika kenekĩ iskafani: “Nã yora ichapakõifo ãto apa keskarakõi mĩ inõ,” ixõ kirika keneni. Abraham Nios chanĩmara fani. Askaxõ Abraham nõko epa keskara Niospa õi. Niospa nã namisfori anã otofatiro. Nãskaxõ Niospa afama mĩshti onifatiro tsõa õimismafo. Nãskakẽ Abraham Nios chanĩmara fani. 
\p  
\v 18 Nãskax Abraham anifokõi ini anã fake atiromaxakĩ. Nios chanĩmara faito Niospa yoini: “Mĩ chipo fake fixii. Mĩ fenafori ichapa rasi kaixikani,” ixõ Epa Niospa yoini keskara Abraham chanĩmara fani. Nãskax, “Yorafãfe ãto xini mĩ iki,” Niospa fani.  
\v 19 Nãskax Abraham anifokõi ini. Cien xiniya aka. Sara ãfe ãfiri yõxafokõi ini. Anã yõxafoxõ fake fitiroma ini. Nãskafixõ Abraham Nios chanĩmara fani. “Ẽ anifokõi, ẽ anã fake fitiroma,” ixõ Abraham shinãnima. “Akka Niospa tsõa atiroma keskara fatiro,” ixõ Abraham shinãkĩ Nios chanĩmara fani.  
\v 20 “Mĩ ãfi Sara fake nanexii,” ixõ Niospa yoini. Niospa nãskara yoiaito nikakĩ Abraham Nios chanĩmara fani. Niospa askafafiaino, “Ẽfe ãfi yõxafokõia. Anã fake nanetiroma,” ixõ Abraham shinãnima. “Niospa ea yoia keskara ea axotiro. Aicho, Nios fãsi sharakõi,” fani.  
\v 21 Niospa axõai keskara fakĩ Nios chanĩmara faxõ Abraham afaa fetsakai shinãnima.  
\v 22 Nãskakẽ Niospa yoini: “Mĩ ea chanĩmara fai afaa chakafamisma keskara ẽ mia õi,” Niospa fani. 
\p  
\v 23 Niospa Abraham askafaniõnoa yõra kirika keneni iskafakĩ: “Nios chanĩmara faifãfe afaa chakafamisfoma keskara Niospa ato õi,” ixõ Abrahamnoa fisti kirika kenenima. A Nios chanĩmara faifo Niospa ato õi afaa chakafamisfoma keskara mãmãi ãto chaka soafono.  
\v 24 Nokori askara kenexoni nõ Nios chanĩmara faito. “Nõko Ifo Jesús naafiakẽ Niospa otofani,” nõri chanĩmara fakẽ, afaa chakafamisma keskara Niospa noko õi.  
\v 25 Nõko chakaõnoax Jesús nani nõko chaka noko soaxoxiki. Askata mã otofaano aõnoax afaa chakafamisma keskarafo nõ ixii. 
\c 5  
\s1 Nõ Nios chanĩmara faito afaa chakafamisma keskara Niospa noko õi 
\p  
\v 1 Nõko Ifo Jesucristo nõ chanĩmara fakẽ nõko chaka noko soaxonano aõnoax nõ Nios fe isharapakexatiro.  
\v 2 Nõ Jesús chanĩmara faito noko noikĩ Niosya noko rafemani. Nãskakẽ, “Ẽ Nios ikano kaax ẽ a keskara shara itiro,” ixõ nõ shinãi nõ akiki inimakõitiro.  
\v 3 Askatari Jesúsnoax omiskõi nõko shinã mẽra nõ inimakõitiro. Askax nõ a keskara nõ itiro. Omiskõifiaito Jesús ãfe shinãmã nõko shinã mẽra noko mitsisfamaxotiro nõ tenenõ.  
\v 4 Akka Jesúsnoax omiskõikĩ nõ tenei nõ yora finakõia ipainãkafatiro anã chaka shinãyamaxiki. Nãskakẽ Nios nokoki inimai. Nokoki inimaino nõ tãpia nõ afe ĩpaxanõ.  
\v 5 Nõ askara shinãi nõ rãfitiroma Niospamãi a yoia keskara noko axõaino. Akka noko Niospa noikõikĩ ãfe Yõshi Shara nõko shinã mẽra noko nanexotiro. 
\p  
\v 6 Akka nõa nõko chaka nõ soametiroma. Nãskakẽ Niospa ãfe Fake nĩchipaiyaitĩa nai mẽraxõ nãmã nĩchini yora chakafoõnoax naaxinõ.  
\v 7 Tsõakai yora fetsa nãxopaitiroma sharafiano. Ẽtsa, itiro rakikĩa yora nai yora sharafoõnoax.  
\v 8 Akka nõ chakafokẽ Niospa ãfe Fake nĩchini noko nãxonõ. Nãskakẽ nõ tãpitiro Niospa noko noikõiai.  
\v 9 Askax nõõnoax naano ãfe imi foni. Nõ chanĩmara fakẽ afaa chakafamisma keskara noko õi noko chaka soaxõ. Akka nõ chakakẽ Jesús nõõnoax nani. Nãskakẽ iskaratĩa mã nõ chanĩmara fakĩ finakõia. Anã nokoki Nios õitifishkikĩ noko omiskõimaxima.  
\v 10 Askata nõ Nios noikaspaino ãfe Fãke noko nãxoni Nios fe nõ rafenõ. Nãskax nõ iskaratĩa Jesús afe yorafo nõ afe rafekõia. Askaxõ noko sharafakĩ finakõi. Jesús nakẽ Niospa anã otofani, nõri afe nipaxanõ.  
\v 11 Akka nõ Nios noikaspayoni. Iskaratĩa mã nõko Ifo Jesucristoõxõ noko raefaa nõ afe isharakõia. Nãskakẽ Jesús Nioski noko inimamasharakõia. 
\s1 Adáõxõ yorafãfe keyokõichi chakafamisfo. Akka Cristo nõko chaka noko soaxotiro 
\p  
\v 12 Niospa nã feronãfake Adán taefakĩ onifani. Nã Adán taefakĩ afara chakafani. Nãskakẽ aõxõ afara chakafapafo. Nã Adán afara chakafaniõnoax keyokõi nõ natiro nõmãi keyokõichi afara chakafaax.  
\v 13-14 Mã Adán afetĩama naniano Moisés Niospa meka yoini kirika keneni afe keskara nõ niimãkai. Akka Niospa Moisés yoiyoamano keyokõichi chakafayopaonifo. Nãskax mã nai keyonifo. Fetsafãfe chakafafiakaxõ Moisés kirika keneni tãpipaonifoma. Askafafiaifãfe oa afaa chakafamisfoma keskara Niospa ato õini tsõakairoko ãfe meka tãpikẽ. Adán keskarafoma. Adán Niospa meka tãpifiax nikayospani. Nãskaxõ Adán chakafakĩ taefani. Nãskarifiakĩ yorafãfe keyokõichi chakafamisfo. Akka nãskax mã nai keyokani, Adánmãi taeyoi nanikẽ. Nãskarifiai Cristo oni yora chakafoõnoax naiyoi. Nãskakẽ yorafo aõnoax nĩpaxatirofo. 
\p  
\v 15 Akka Jesucristo Adán keskarama. Adán Nios nikakaspax nani. Nãskakẽ nõri aõnoax natiro. Akka Jesúsxõ Niospa yorafo noikõikĩ ato imasharapakenaka afaa chakafamisma keskaramãi ato õikĩ. Akka nã Adán nai taeni afara chakafaax. Nãskax yorafo Adánnoax nãpanakafo. Akka Jesús Ifofakanax Jesús fistiõnoax keyokõi isharapakenakafo. Jesúsxõ Niospa ato raefatiro a chanĩmara faafo tii.  
\v 16 Adán afara chakafaniõnoax yorafo nai keyotirofo. Nãskatari ãto chakaõnoaxri nai keyotirofo. Akka nõ keyokõichi chakafakẽ Niospa noko omiskõimatiro. Nã Adán ani keskarakai Cristo afaa chakafamisma. Mã nõ keyokõichi afara chakafamiskẽ Jesucristoõxõ Niospa noko noikĩ nõko chaka noko soaxotiro afaa chakafamisma keskara noko õikĩ. Omiskõitamaroko nõ afe isharapakexanõ.  
\v 17 Adán ãfe chakafoõnoax keyokõi nakani. Akka Cristo fisti nokoõnoax nani nõ aõnoax Nios fe nĩpaxanõ Niospamãi noko shara õiaito. Jesucristoõxõ Niospa noko noixõ noko nimapakenaka. Nãskakẽ noko askafaxõkĩ Jesús Adán finõkõia. 
\p  
\v 18 Nãskakẽ ẽ mato yoiai keskara nã feronãfake Adán ãfe chakaõxõ keyokõi Niospa noko omiskõimani. Akka Jesúskai afaa chakafamisma. Nãskakẽ nã chanĩmara faafo tii Nios fe nĩpanakafo. Nãskakẽ nã afaa chakafamisma keskara Niospa ato imai.  
\v 19 Akka nã feronãfake Adán Nios nikakaspakĩ taefani. Nãskax Adán nikayospakõi taeyoi ini. Keyokõichi aõxõ nõ chakafapamis. Akka nã Cristo fistichi ares Nios nikakõimis. Afaakai chakafamisma. Nãskakẽ nã chanĩmara faafo tii aõnoax afaa chakafamisma keskarafo ipanakafo. 
\p  
\v 20 Moisés Niospa meka yoikĩ ato kirika kenexoni afara chakaõnoa tãpinõfo. Akka nã Moisés ato kenexoni mã õifikakĩ a Niospa ato yoia keskara tsõa nikakõikanima. Keyokõichi afara chakafamisfo. Mã chakafakĩ finafiafono Niospa ato noisharakõixõ ãfe Fake atoki nĩchini ato chaka soaxonõ.  
\v 21 Afara chaka fisti shinãkani namisfo. Akka Niospa noko noikõia. Nãskakẽ ãfe Fake Jesús noko nãxoni nõko chaka noko soaxoxiki. Nãskakẽ nõ Jesús chanĩmara faito Niospa afaa chakafamisma keskara noko õi. Noko chaka soaxonano nõ afe ipanaka. 
\c 6  
\s1 Cristo nia keskara nõri afe nĩpatiro 
\p  
\v 1 Akka yorafãfe atirito shinãkakĩ iskakani: “Nõ afara mẽxotaima chakafafiaino Epa Niospa noko noikĩ nõko chaka noko soaxotiro. ¿Nãskakẽ nõ afara chakafa fafafãitiro,” ixõ anori shinãkani sharamẽ? Maa, sharama.  
\v 2 Nãskakẽ afara chaka shinãyamakãfe. Nõ Jesús chanĩmara faxõ mã nõko chaka nõ pota. A nõ ipaoni keskara nõ anã shinãpaima.  
\v 3-4 Mã mã tãpia noko maotisafani nõ fetsafo õimanõ. Nãskax nõ a Jesús fe naa keskara nõ chaka ipaoni keskara anã shinãima. Nãskakẽ nõko chaka soapaikĩ nõ Jesús chanĩmara faino noko maotisafani. Jesús nokoõnoax naano maifanifo. Nãskax nõ afe naa keskarax nõri maia keskara. Akka Jesús naax otoinãkafata Apa ari kani. Nõri nono mai anoax Jesúsnoax ari nõ katiro. Askaxõ Apa Niospa mã Jesús otofaxõ noko õimani nãatomãi afama mĩshti fatiroxakĩ. Nõko õiti noko fetsafaano a nõ ipaoni keskara nõ anã itiroma, a keskara sharakõi nõ ipai. 
\p  
\v 5 Cristo nõkoõnoax nani. Nã nõ chanĩmara faax nõ afe rafetiro. Nãskakẽ Jesucristo nakẽ Apa Niospa otofani keskafakĩri anã otofatiro, a keskara shara nõ inõ.  
\v 6 Jesús mastanifo nõko chaka noko soaxonõ. Nõri Jesús fe masta keskarakõi anã chakafapaima. Nãskarifiai nõ Jesús Ifofaax nõ afe naa keskara. Nãskaxõ nõ anã chaka shinãima. Afara chakafo nõko ifoma.  
\v 7 Akka yõra nãxokai anã chaka shinãtiroma. Nãskarifiai nõri chaka shinãtiroma afara chakakairoko nõko ifokẽ. 
\p  
\v 8 Nõ Cristo fe naa keskaraxõ nõ Jesús chanĩmara faax nõ afe isharapakenaka nãmãi nõ chanĩmara faax.  
\v 9 Mã nõ tãpia Cristo mã nafiano Niospa otofani. Nãskax anã natiroma. Anãkai afeskax Cristo natiroma.  
\v 10 Akka nai fistinixakĩ nõko chaka noko soaxoni anã afara chaka nõko ifo inõma. Nãskakẽ iskaratĩa Cristo mã nia. Nãskaxõ nã Niospa apaiyai keskafai. 
\p  
\v 11 Mãri Cristo fe naa keskara. Nãskakẽ iskaratĩa mã shinãtiro iskakĩ: “Ẽ chaka ipaoni keskara anã shinãpaima. Nãskax ẽ iskaratĩa Jesucristoõnoax Epa Nios fe rafe kakaini ea amapaiyai keskara axiki,” ixõ anori shinãkãfe.  
\v 12 Nãskaxõ afara chaka anã ifofayamakãfe afara chaka mato famapai kiki a keskara mã anõma.  
\v 13 Nãskax Niosnoax isharakãfe. Afara chaka mato famapaifiaito nikayamakãfe. Afara chakafamis iyamakãfe. Nios Ifofakãfe mato sharafanõ. Iskafakãfe: “Nios ẽfe Ifokõixõ ea amapaia keskara ẽ aki sharafakĩ.”  
\v 14 Akka anã afara chakapa mato afeska fatiroma. Afara chaka anã mãto Ifo itiroma mã mã Cristo chanĩmara faano. Epa Niospa mato noikĩ ares fisti mato ifitiro mã afe ĩpaxanõ. Akka nã Moisés kirika keneniõnoaxkai mã Nios fe ipaxatiroma. 
\s1 Epa Niospa mato amapaiyai keskara mã nikakõiyanã mã yonoxokõitiro 
\p  
\v 15 Moisés yoini keskara nõ nikaito Epa Niospa noko nimasharaima. Akka Cristo nõ chanĩmara faito noko noikĩ noko nimasharatiro. Nã fisti nõko Ifo itiro noko chaka soaxonano. Nãskatari, ¿nõ afara chakafa fafafãitiromẽ Niospa noko noikĩ nõko chaka soaxonõ? Maa, nõ afaa chakafatiroma.  
\v 16 Mã tãpia ãfe yonomatixõ mãto ifo nikakõiyanã mã yonoxotiro. Nãskarifiakĩ mã katotiro fatomãkĩ mãto Ifo. Epa Nios mã nikakõitiro ãfe yonomati ixii, askayamai chaka mã katoax mã ãfe yonomati mã itiro. Chaka katoax mã naax mã omiskõixii, mã Nios fe nipanakama. Askatamaroko Epa Nios nikakõiax mã afe isharapakenaka.  
\v 17 Mã afara chaka ifofaax ãfe yonomati mã ipaoni. Akka iskaratĩa mã mã Epa Nios Ifofaa. Mato yoimis keskara mãto shinã mẽraxõ mã nikakõimis. ¡Aicho! Mã mã Epa Nios Ifofaano mato nimasharamis.  
\v 18 Nãskakẽkai afara chaka anã mãto ifo itiroma anã mato yonomatiroma. Akka iskaratĩa afara shara fisti mãto ifo itiro. Mãfi ãfe inakõifoki.  
\v 19 Ẽ mato meka fekax yoima, mãto ifoõnoa ẽ mato yoinõ mã tãpisharakõinõ. Chaka fetsa fetsatapafo mãto ifo ipaoni. Nãskaxõ mã afara chakafakĩ finakõipaoni. Akka iskaratĩa Epa Niospa ãfe inafo, mã. Anã afara chakafayamakãfe afara shara fisti mãto ifo inõ. 
\p  
\v 20 Taeyoi afara chaka mãto ifo ipaoni. Nãskakẽ afara shara mã shinãpaonima mãto ifo ipanã.  
\v 21 ¿Mã ipaoni keskara sharamẽ? ¿Mato imasharapaonimẽ? Maa, a nõ ipaoni keskarakai anã afokai nõ shinãpaima. Afo nõ shinãi nõ rãfitiro. Nã chakafo xateyamax nã nõ naitĩa nã omiskõipakenakafo mẽra nõ katiro.  
\v 22 Nãskakẽ iskaratĩa afara chaka anã mãto ifoma. Epa Nios mãto Ifo. Mãfi ãfe yonomatifoki. Mã ãfe yonomatifokẽ mato sharafa fafafãini a keskara shara mã inõ mã afe ĩpaxanõ.  
\v 23 Nã afara chaka nõko ifono, ¿afanã noko kopifaimẽ? Akka aõnoax nõ naax nõ omiskõipakenaka. Akka Jesucristo nõ Ifofaino Epa Niospa noko afaa kopi yõkaima nõ afe nipaxanõ. 
\c 7  
\s1 Nõ anã chaka ifofaxoma nõ Cristo Ifofatiro 
\p  
\v 1 Efe yorafãfe, mã mã tãpia nõko xanĩfokõichi noko yoia keskara nõ nikatiro. Nõ niyoxõ nõ nikatiro. Akka mã nõ naxõ nõ anã nikatiroma.  
\v 2 Nãskarifiai kẽromã ãfe fene niyoano enetiroma. Akka mã fene naano fetsa fe fianãtiro ixõ anori Moisés yoini Niospa meka.  
\v 3 Akka fene niyoanokai kẽromã fene eneta fetsa fe fianãtiroma. Askarafi chakakĩ. Chota feroma itiro. Akka fene naano kẽro feronãfake fetsa fe fianã askara shara, ixõ Moisés keneni. 
\p  
\v 4 Akka mã fenẽ naxõ anã ãfe ãfi yonomatiroma. Nãskarifiakĩ mã Cristo fe naa keskarax a Moisés kirika keneni anã mã nikatiroma. Akka mã Cristo fe naa keskarax mã yora fena sharakõi itiro Cristo mãto Ifono. Mã Cristo naax otoinãkafanax Nios fe ipanaka. Nãskaxõ afara shara mato amatiro mã Nios yonoxonõ.  
\v 5 Nõ Cristo Ifofamatai afara chaka fetsa fetsatapafo nõ ayopaoni. Moisés keneni keskara atama nõ chaka fisti shinãpaipaoni. Nã chakaõnoax nõ naxii.  
\v 6 Cristo noko nãxoni nõko chaka noko soaxoxiki nõ fena shara keskara inõ. Nãskakẽ nõ Cristo Ifofaax mã nõ afe naa keskarakõi. Nõ afe naa keskarax nõ yora fena shara iki. Afara chaka anã nõko ifoma. Askatamaroko ãfe Yõshi Sharaõxõ Niospa noko amapaiyai keskara noko amatiro. A fisti nõ Ifofai, a Moisés keneni keskara ifofayopaonixaki anã nõ ifofatiroma. 
\s1 Moisés kenenioxõ nõ tãpia nõ chakafamis 
\p  
\v 7 Iskafakĩ shinãyamakãfe. A Moisés noko kenexoni, chakara fayamakãfe. Akka Moisés Niospa yoini keskara keneyamanikẽkai nõ chakafamis nõ tãpikeranama. Moisés keneni iskafakĩ: “Yora fetsanã afara fĩapaiyamakãfe. Nõ yora fetsanã fĩapaikĩ nõ chakafai,” Moisés anori keneyamanikẽ nõ tãpikeranama.  
\v 8 Moisés anori keneni tãpifixõ nõko õiti chakakõikẽ nõ shinãsharaima. Nõkonãyamafekẽ nõ fichipaimis. Afara chakafori nõ fichipai. Akka Moisés Niospa meka keneyamanikẽkai nõ nikayospa ikeranama.  
\v 9 Niospa meka tãpixoma afara chakafafiakĩ nõ shinãma. Askata chipo nõ ãfe meka tãpifixõ nõ akama a noko yoia keskara. Nãskafaxõ ãfe mekaõxõ a nõ afara chakafamis nõ tãpitiro.  
\v 10 Niospa yoia keskara akax nõ nipaxatiro. Niospa yoiai keskara nõ akima mã tãpifiax, askax nõ omiskõi. “Moisés keneni keskara ayamax nõ natiro,” ixõ nõ shinãmis.  
\v 11 “Epa Niospa noko yoia keskara nõ aki. Nãskai nõ Nios fe nipanaka,” ixõ nõ shinãfikĩ nõ afara chakafakĩ nõ xateama. Akka chakapa noko pãrai. Nãskakẽ nõ tãpia nõko chakaõnoax nõ omiskõi nõ Nios fe nĩpanakama. 
\p  
\v 12 Moisés keneni keskara sharakõi nãmãi Niospa meka. Niospa meka mẽstekõi, chanĩmakõi.  
\v 13 A Moisés keneni sharafianokai a keneni keskara nõ nikasharamisma. Moisés kenenioxõ nõ tãpitiro nõ chakafamis. Moisés keneni õifikĩ, ¿afeskafaxõ nõko chaka nõ potatiromẽ? Nãskax nõ naax nõ omiskõipakenaka. ¿Moisés keneniõnoax nõ omiskõipakenakamẽ? Maa, askarama. Akka nõ Nios nikakaspax nõ omiskõipakenaka. A Moisés keneni sharakõi, Niospa meka. Moisés keneniõxõ nõ tãpia nõ nikayospakõi. Nõ Niospa meka nikakõimisma. Nãskax nõ chakakõi. 
\s1 Nõakõi nõko chaka xatepaifikĩ nõko shinã mẽraxõ nõ xatetiroma. Nõko shinã mẽra chakakõi 
\p  
\v 14 A Moisés Niospa Yõshi Sharapa shinãmanaino noko kenexoni. Niospa meka nõ shinãyamai nõ sharama. Afara chakafi nõko ifokĩ nõ ãfe yonomati.  
\v 15 ¿Afeskai nõ iskamismẽ? Nõkai tãpiama. Nõ sharafapaiyai keskara nõ akima. Akka nõ akaspafiakĩ nõ aki.  
\v 16 Moisés keneni keskara nõ nikapai, “Nã meka shara,” shinãkĩ. Askara shinãfiki nõ akima. Nã afara chakafapaiyamafikĩ nõ aki.  
\v 17 Nõakai nõ afara chakafapaima. Akka nõko shinãmã nõ shinãkĩ nõ afara chakafamis. Afara sharafapaifikĩ nõ shinãsharaima, nõko shinã mẽramãi chakakõikẽ.  
\v 18 Mã nõ tãpia nõko shinã mẽra sharama. Isharapaifi nõ itiroma.  
\v 19 Akka a nõ akai keskara sharama. Nã sharafapaifikĩ nõ amisma. Nã afara chakafapaiyamafikĩ nãskara nõ amis.  
\v 20 Nãskakĩ a nõ akaspai nõ aki. Nõakõi nõ afara chakafapaima. Nõ chaka potapaifikĩ nõ potatiroma nõko shinã mẽramãi chakakõikẽ.  
\v 21 Akka nõ askamiski. Nõ sharafapaifiaito nõko shinã mẽraxõ afara chakapa noko fakirira shinãmapai nõ shara shinãnõma. Nõ keyokõi askamis. 
\p  
\v 22-23 Nõa nõ iskafai: “Aicho. Niospa noko yoiai keskara shara,” ixõ nõ shinãfi nõ nikayospamis afara chakapamãi noko fekaxtefaito. Niospa meka nõ tãpifiax nõ nikayospamis. Nõa nõ sharafapaiyai keskara nõ atiroma. Nõ chaka xatetiroma.  
\v 24 Nãskakẽkai ẽ inimaima. Ẽ shinãchakai. Ẽfi feronãfake chakakĩ. Ẽ inimaima. Ẽfe shinã mẽraxõ ẽ afara chakafaax ẽ omiskõixii. Ooa. ¿Tsõa nõ Ifofatiromẽ nõko Ifokõi inõ, afara chaka anã nõko ifo inõma?  
\v 25 Aicho Epa Nios. Ẽfe Ifokõi Jesucristoõxõ ẽfe chaka ẽ xatetiroki. Iskaratĩa ẽ tãpia Niospa meka nõ ifofapaifikĩ afeska faxõ nõa nõ atiroma nõko shinã mẽramãi chakakẽ. Akka Jesucristoõxõ nõ atiro. 
\c 8  
\s1 Niospa Yõshi Sharaõnoax nõ ika 
\p  
\v 1 Akka Jesucristo nõko Ifono nõ afe yora. Nãskakẽ Epa Niospa noko yoima iskafakĩ: “Mã chaka. Ẽ mato omiskõimanõ. Emakinoax fotakãfe omiskõipakenakafo mẽra nãnoax mã omiskõipakenaka,” ixõ noko yoipakenakama mãmãi nõko chaka noko soaxõ,  
\v 2 Jesucristoõxõ Niospa ãfe Yõshi Sharapa noko nimasharai anã chaka nõko ifo inõma, nõ omiskõipakexanõma.  
\v 3 Moisés yoini keskara nõ tãpifiano aato noko imasharatiroma nõko chaka noko soaxotiroma. Akka Epa Niospa shinãyoni ãfe Fake nai mẽraxõ mai ano nĩchixiki ari noko keskara yora inõ. Noko keskarafiaxokai nõ amis keskara afaa chakafamisma. Akka noko nãxoni anã afara chaka nõko ifo inõma.  
\v 4 Nãskata iskaratĩa nõ Niospa Yõshi Shara Ifofaax aõxõ Moisés yoini keskara nõ nikatiro. Nõ Niospa meka ifofasharakõitiro. 
\p  
\v 5 Akka nõ chaka xateyamano afara chakapa noko amapaiyai keskara fisti nõ atiro. Akka Niospa Yõshi Sharapa noko ĩkinãno nã noko amapaiyai keskara fisti nõ atiro.  
\v 6 Nã apaiyaifo keskara fisti shinãkanax afo nakanax anã otokanax omiskõipakenakafo. Nios fe ipanakafoma. Akka Niospa Yõshi Shara ato mẽra naneano nã apaiyai keskara Niospa Yõshi Sharaõxõ atirofo. Nãskax isharapakenakafo shinãsharakata.  
\v 7 Fetsafãfe Nios noikaspakani Niospa ato yoia keskara nikapaikanima. Ãto shinã mẽraxõ afara chaka fisti shinãkani. Nãskaxõ Niospa ato yoia keskara nikatirofoma.  
\v 8 Nã ãto shinãmã shinãifo keskara fisti shinãkakĩ Niospa ato amapaiyai keskara atirofoma. Afara chaka ifofaifono Nios atoki inimaima. 
\p  
\v 9 Akka mãkai askarama. Mãto shinã mẽraxõ afara chakapa mato shinãmanima. Akka Niospa Yõshi Shara mãto shinã mẽra nanexõ mato shinãmasharamis. Akka Niospa Yõshi Shara mãto shinã mẽra naneyamaino mã Cristo fe rafetiroma.  
\v 10 Cristo mato fe rafefiaino afara chakaõnoax mãto yora nai. Mãto yora nafiano mãto fẽro mẽsho naima Nios fe nipanaka Niospamãi afaa chakafamisma keskara mato õiaino.  
\v 11 Mã Jesús naano Niospa otofani. Nãato ãfe Yõshi Shara mãto shinã mẽra nanea. Nãskarifiakĩ mãto yora naano ãfe Yõshi Sharaõxõ Niospa anã mato otofatiro mãto yora fenasharakõi inõ. 
\p  
\v 12 Efe yora mĩshtichi, Niospa Yõshi Shara nofe rafeaino Epa Niosnoa nõ shinãtiro noko amapaiyai keskara akĩ. A nõ afara chakafamiskai anã nõ shinãpaitiroma noko Niospa amapaiyai keskara akĩ.  
\v 13 Akka a nõ apaiyaifo keskara fisti shinãx nõ omiskõipakenaka nai. Akka nãskafixõ Niospa Yõshi Sharaõxõ afara chakafakĩ nõ xatexõ anã chaka nõ shinãtiroma. Nõ Epa Nios fe nisharapakenaka. 
\p  
\v 14 Niospa Yõshi Sharapa noko shinãmanaino nõ Niospa fakefo iki.  
\v 15 Ãfe Yõshi Sharapa noko shinãmasharapai nõ anã mesenõma. Mã nõfi Niospa Yõshi Shara fĩaki. Nã ãfe Yõshi Sharaõxõ ãfe fakefo noko ima. Aõxõ nõ yoitiro iskafakĩ: “Epa Nios, mĩ ẽfe Epa,” ixõ nõ yoitiro.  
\v 16 Nõko shinã mẽraxõ Niospa Yõshi Sharapa noko yoi iskafakĩ: “Mĩ Epa Niospa Fakekõi,” ixõ noko yoi.  
\v 17 Nõ Niospa fakekẽ nã noko yoia keskara noko inãtiro. Nõfi nõ Niospa fakekẽ nã ãfe Fake Cristo ani keskara nokori inãtiro. Nõõnoax omiskõifinixakĩ iskaratĩa nai mẽranoax Apa Nios fe xanĩfokõi. Nãskarifiai nõri aõnoax omiskõiax nõ nai mẽra Epa Nios ano nokoano noko sharafinakõia imaxii nõ afe isharapakexanõ, a keskara shara nõ inõ. Akka afe yorafo Niospa ato sharafaxõi nãfomãi ãfe fakefokẽ. 
\s1 Niospa fakefo Jesús fe isharapakenakafo 
\p  
\v 18 Nõ iskaratĩa omiskõiyofiax nõ chipo Jesús fe isharapakenaka. A keskara sharafinakõi noko imai. Tsõa õimisma keskara sharafo noko õimaxii. A nõ omiskõipaoni anã nõ shinãima.  
\v 19 Epa Niospa ãfe fakefo otofaxii a keskara sharakõi ato imaxii. Akka nã Niospa onifanifãfe manakani õisharapaikõikakĩ afe keskarafo ato imaimãkai.  
\v 20-21 Niospa ãfe fakefo sharakõi ato õimaxii. Nãskatari a onifanifori sharakõi ixii. Anã afaa chaka ixiima. Afarafo anã payokomepakenakama. Akka iskaratĩa nã Niospa onifanifo payokomepakenakafo askayamapaifiaifono. Nãskaxõ Niospa yoini: “Adán afara chakafaõnoax keyokõi payokomepakenaka.” Akka Niospa ãfe fakekõifo akiki nokoaifono ato yora fetsafaxoxii anã payokomenõfoma, afara chakafãfe ato fekaxtefanõma. Nãskarifiai Niospa onifanifori nã Niospa fakekõifo keskara shara ixii, anã payokomepakenakama. 
\p  
\v 22 Kẽromã fake kãikĩ pae meyotiro. Mã kãixõ anã pae metiroma. Nãskarifiai a Niospa onifanifo omiskõiyokani. Akka mã Niospa ato fetsafaano anã omiskõixikanima.  
\v 23 Akka nõ Niospa fakefo ãfe Yõshi Shara nofe rafeaino nõ tãpitiro nõ Nios ikano kaax nõ isharakõixii. Akka iskaratĩa nõ isinĩ iki fekaxtei. Nãskakẽ nõ manasharai Epa Nios ika ano noko ifinõ nõ ãfe fakefokẽ a keskara shara noko imanõ. Nãskatari nõko yora fena sharakõi noko imai anã nõ isinĩ inakama. Anãkai nõ nanakama.  
\v 24-25 Nãskara nõ shinãi nõ akiki nokoaito noko fetsafaxii a keskara shara nõ inõ. Nãskax nõ afe ipanaka. Chanĩmara faxõ inimayanã nõ manasharatiro fena fenakima nã nõ akiki nokoaitĩa. Akiki nokoxõ nõ anã manatiroma mãmãi nõ õikĩ. 
\p  
\v 26 Nãskarifiakĩ Epa Niospa ãfe Yõshi Sharapa noko axosharafafãini. Afeskaxõ nõ Epa Nios kĩfisharatiromẽ nõkai tãpiama. Akka ãfe Yõshi Shara nõ mẽra nanexõ noko shinãmanaino nõ kĩfisharatiro. Noko noikĩ noko kĩfixoni. Noko kĩfixonai keskarakai tsõarikai kĩfitiroma.  
\v 27 Ãfe Yõshi Sharapa shinãi keskara Epa Niospa tãpikõia. Keyokõi nõko shinã mẽrari nõ shinãi keskara tãpikõia. Epa Niospa noko amapaiyai keskara nãnori ãfe Yõshi Sharapa a chanĩmara faafo tii ato kĩfixomis. 
\s1 Jesúsxõ nõ keyokõi finõkõitiro 
\p  
\v 28 Akka nõ tãpia Epa Niospa noko katoni a apaiyai keskara nõ anõ. Nõ Epa Nios noiaino afarafãfe noko afeskarafafiaino afoxõ Epa Niospa noko axosharai.  
\v 29 Nõ Jesús Ifofayoamano Epa Niospa tãpiyoni fatofomãkĩ a chanĩmara faifo. Akka chanĩmara fayoafomano shinãni iskafakĩ: “Nafo ẽfe Fake keskara ẽ ato imaxii,” ixõ shinãyoni. Niospa ãfe Fake iyoa Jesús. Nãskaxri nõri ãfe fake chipoko ixii.  
\v 30 Tãpiyoni nõ ãfe fakefo ixinõ. Askano nõko shinã mẽraxõ noko yoini: “Ẽfe Fake chanĩmara fakãfe,” noko fani. Fatora anori yoixõ ato chaka soaxoni isharanõfo, afaa chakafamisma keskara ato õixii, ato chaka soaxonano ãfe Fake sharakõi keskara inõfo. 
\p  
\v 31 Noko askasharafaino ¿nõ fakiri yoitiromẽ? Epa Niospa noko sharafakõinaino afara chakafãfe noko chakafamatiroma.  
\v 32 Epa Niospa noko noikĩ ãfe Fake Jesús timamanima noko naxonõ. Nãskanixakĩ noko axosharatiro nã apaiyai keskara nõ anõ.  
\v 33 Epa Niospa noko katoni nõ afe yora inõ. Nãskaxõ nõko chaka noko soaxonano afara chakafamisma keskara noko õixiki. Askano fetsafãfe mĩ chakara noko faifono nõ ato ifofaima.  
\v 34 Jesucristo noko nãxokẽ Ãpa otofani. Iskaratĩa Apa Nios ika ano ika Apa feta ato keyokõi ĩkinã. Epa Nios noko kĩfixõfafãini. Nã chanĩmakõikẽ tsõa, “Mĩ afara chakafamiski. Nãskax mĩ omiskõipakenaka,” noko tsõa fatiroma.  
\v 35 Tsõakai Jesucristo nomakinoa potatiroma noko noiyamanõ. Nõ omiskõikãi, nõko shinã mẽra fekaxtekãi, nõ Jesúsnoa yoiaito noko omiskõimafãi, noko fonãimafãi, nõ rapati yopafãi, noko mesemafãi noko retepaifãi, keyokõi afãfekãi Cristo nomakinoa potatirofoma noko noiyamanõ.  
\v 36 Niospa meka yoikĩ David kirika keneni iskafakĩ: 
\pi1 Epa Nios, pena tii mĩõxõ noko retepaikani. Nõ oveja keskara. Ifãfe nã oveja itipinĩfasharai retexiki. Nãskarifiakĩ a mĩõxõ noko chakafaifãfe noko retepaitirofo, 
\m ixõ kirika keneni.  
\v 37 Noko askafafiaifono keyokõi nã chakafo nõ finõkõitiro Jesús noko noiaino.  
\v 38-39 Jesucristo nõko Ifonokai afanã Epa Nios nomakinoa potatiroma anã noko noinõma. Nã ẽ chanĩmara fakõini. Epa Niospa noko noiaino afanã noko afeska fatiroma anã noko noinõma. Nõ nafiakẽkai nomakinoa afanã Nios potatiroma. Nõ niyoanori nomakinoa tsõa paxkatiroma. Ãfe ãjirifãferikai nomakinoa paxkatirofoma. Yõshi chakafãferikai nomakinoa paxkatirofoma. Afarafo iskaratĩa ikaifãferikai nomakinoa paxkatirofoma. Inõpokoaifãferikai nomakinoa paxkatirofoma. Afara chakafãfe ãto xãnifofofãferikai nomakinoa paxkatirofoma. Nã nai ari ikafãfe, mai ano ikafãferikai nomakinoa paxkatirofoma. Epa Niospa nõko Ifo Jesucristoxõ noko noi. Nãskakẽ keyokõi onifanifãferikai nomakinoa paxkatirofoma anã noko noinõma. 
\c 9  
\s1 Niospa judeofo katoni afe yora inõfo 
\p  
\v 1 Ẽ Cristo fe rafexõ ẽ mato mẽstekõi yoi. Ẽ mato pãraima. Niospa Yõshi Shara ẽ mẽra naneano ẽfe shinãmã shinãkĩ chanĩma ẽ mato yoi.  
\v 2 Ẽ mato yoi iskafakĩ, ẽfe kaifo atirito Cristo Ifofaafoma. Nãskakẽ ẽfe shinã mẽra ẽ atoõnoax omiskõi kakaini. Ẽ ato shinãkõikĩ finamis afomãi efe yorafokẽ.  
\v 3 Nãskakẽ ẽ shinãmis iskafakĩ: “Epa Niospa, ẽfe kaifo nã israelifo ẽ ato axopai fenoyamanõfo, mefe nipaxanõfo omiskõipakenakafo mẽra fonõfoma. Nãskaxõ Cristo makinoa ea potãfe ato potakima ẽ ato omiskõixonõ afo omiskõipakexanõfoma. Nã ẽ fichipai ẽfe kaifo judeofo Cristo fe ĩpaxanõfo,” ixõ ẽ shinãmis.  
\v 4 Nõ judeofo, Jacobo ãfe fenafo. Epa Niospa noko ifini ãfe fakefo nõ inõ. Nãa Nios sharafinakõixõ nõko kaifo israelifo ato õimapaoni. “Ẽ mato afara sharafaxõikai. Cristo nã oxiai judeokõi ixii. Aõxõ ẽ mato sharafaxõikai,” ixõ Niospa yoini. Nãskara Moisés Niospa meka yoikĩ israelifo ato kirika kenexoni nikanõfo. Nãskaxõ ato tãpimani afeskaxõ Nios kĩfitirofomãki ichanãxõ. Nãskata afara sharakõi ato axoxiai keskara ato yoiyoni.  
\v 5 Judeofãfe xinifãfe Epa Nios Ifofasharapaonifo. Cristori judeo fake kãini, Niospa Fakekõifiax. Nãskax arifi nõko xinifãfe ãto fena. Nãfi yorafãfe ãto Ifokĩ, nãatomãi keyokõi ato ĩkikẽ. Nãskakẽ, “Nios fãsi finasharakõia,” nõ fapaxanõ. Askapainõ. 
\p  
\v 6 Epa Niospa noko yoisharayoni keskara judeofo atirito chanĩmara fayamafiaifono ãfe meka chanĩmakõi. Afe yorafo yoiyoni keskara axii. “Nã judeofo Israelifãfe ãto fenafo ẽ katoa efe yora inõfo,” ixõ Niospa yoini. Askafafiano atirito Nios chanĩmara famisfoma. Nãskakẽ afe yorakõi keskara Niospa ato õima.  
\v 7 Nãskarifiakakĩ Abraham apaoni keska fakĩ ãfe fena atirifãfe Nios chanĩmara famisfoma. Afokai Niospa yorakõifoma. Akka Niospa Abraham yoini iskafakĩ: “Mĩ fakekõichi Isaaca ãfe fakefo mĩ fenakõifo ixii, mĩ fake fetsafãfe ãto fakefori mĩ fenakõifo ixiima,” ixõ yoini.  
\v 8 Nãskano nõ tãpitiro Abraham ãfe fenafo atiri ãfe fakekõifo Niospa ato õima. Akka Niospa Abraham yoiyoni ãfe ãfinĩ Sara fake fixiai. “Nã fakefi mĩ fakekõi ixii. Mĩ fakẽ ãfe fakefori mĩ fenakõifo ixii,” fani. Nã yoini keskara Abraham Nios chanĩmara fani. Nã Abraham Nios chanĩmara fai keskafakĩri Nios chanĩmara faifono nãfofi Niospa fakekõifoki.  
\v 9 Abraham ãfe ãfinĩ Sara fake naneamatai Epa Niospa yoiyoni iskafakĩ: “Xinia fẽtsa ẽ anã mikiki nokoxii. Nãskano mĩ ãfi Sara fake kãixii feronãfake,” ixõ Niospa Abraham yoini. 
\p  
\v 10 Nãskata Sara ãfe fake kãini. Nãskaxõ aneni, Isaaca fakĩ. Nãskakẽ nã Isaaca nõko xini. Isaaca naetapaxõ Rebeca fini ãfe ãfi inõ. Rebeca fake rafe naneni. Nã fake rafeta ãto apakõi Isaaca ipaoni.  
\v 11-12 Rebeca fake kãini fake rafe naneax. Esaú kãi taeni. Chipo Jacobo ini. Akka kãiyoafomano tsõa tãpiyonima fatoto shara shinãimãkai, fatotori chaka shinãimãkai. Nãskano Niospa fisti katoni afe yora inõ. Kãiyoafomano Niospa ãto afa yoiyoni iskafakĩ: “Mĩ fake chipokoto ãfe ochi yonomaxii,” fani. Akka Niospa nã apaiyai keskara fatiro, yorafãfe apaiyai keskara Niospa faima. Askano nõ tãpitiro Niospa a inõpokoai keskara shinãyoni nãskarakõi aki.  
\v 13 Nãskara Niospa meka yõra kirikaki keneni iskafakĩ: “Ẽ Jacobo ifipai efe yora inõ. Esaú ẽ fichipaima,” fani. 
\p  
\v 14 Nãskakẽ ¿iskara nõ yoitiromẽ, “Niospa mã fake fisti katoa kãiyoafomano, afaa chakafayoafomano fisti mã katoa akka fetsa katoama õixoma. Nãskakẽ Niospa shinãsharaima,” ixõ nõ shinãtiromẽ? Maa, anori nõ shinãtiroma. Akka Niospa tãpisharakõia. Nã apaiyai keskara fatiro. Nã fichipaiyai katotiro.  
\v 15 Niospa Moisés yoini iskafakĩ: “Nã ẽ axopaiyai ẽ axosharaikai. Nãskarifiakĩ nã ẽ noipaiyai ẽ noisharaikai,” ixõ Niospa yoini.  
\v 16 Askatari nõ Nios nikasharatama nõakõi nõ afe yora isharapaiyaito askara noko axõima. Askatamaroko Niospa noko noikĩ noko ifitiro afe yora nõ inõ, nãatomãi noko õiti tãpikaxõ. Nãskaxõ noko noikĩ nã apaiyai keskara shara axõi.  
\v 17 Moisés kirika keneni iskafakĩ: “Epa Niospa Egipto anoa ãto xanĩfo yoini iskafakĩ: ‘Ẽ mia xanĩfo imapaikĩ ẽ mia xanĩfo imani mĩoxõ nã maitio ikafãfe tãpinõfo ẽ afama mĩshti faito. Akka mĩ afara chakafaito ẽ mia potai mĩ anã xanĩfo inõma. Ẽ mia askafaito õikakĩ eõnoa ato yoitirofo nã maitio ikafãfe: “Nios tsoa keskarama ãfe shinãõxõ mã Faraón pota,” ixõ eõnoa yoitirofo,’ ixõ Niospa Faraón yoini.”  
\v 18 Akka shinãkapo. Nã Niospa ato noipaiyai ato noikĩ axosharatiro. Nãskarifiakĩ fẽtsa afara chakafakĩ xateamano Niospa ãfe õiti nikayospakõi imatiro afaa shinãpaiyamai keskara imatiro. 
\p  
\v 19 Nãskakẽ fẽtsa shinãtiro iskafakĩ: “¿Afeskakĩ Niospa noko yoitiromẽ afara chakafamisfora fakĩ? Akka nãato noko amai nã apaiyai keskarafakĩ. Nãskakẽ noko omiskõimatiroma nõ nikayospaito,” ixõ fẽtsa yoitiro.  
\v 20 Askafayamafe. ¿Afeskakĩ mĩ Epa Nios kemapaimẽ? Mĩfi yoraki. Aafi Nioski nã apaiyai keskara atiro. Akka a Niospa onifatokai yoikĩ iskafatiroma: “¿Afeskafakĩ mĩ ea iskara onifaamẽ?” ixõ yoitiroma.  
\v 21 Kẽromã kesho rafe faxõ nã apaiyai keskara fatiro. Kesho fetsa mẽra afara shara nanetiro, fetsa mẽrari afara chaka nanetiro. Akka na kẽsho iskafatiroma: “¿Afeskakĩ mĩ ea iskara faamẽ?” ixõ yoitiroma. 
\p  
\v 22 Nãskarifiakĩ Epa Niospa keyokõi yorafo onifafiaxõ atiri ato potatiro ãfe meka nikakaspaifãfe. Fenãmãshta ato yoiyofiaito nikayospamisfo. Nãskakẽ anã teneima, mã atoki õitifishkikĩ ato omiskõimaxii. Nãskaxõ yorafo ato õimapai ato potakĩ omiskõinõfo chaka fisti shinãifãfe.  
\v 23 Akka nõfi ato keskarama. Noko Niospa noikĩ noko tãpimamis. Nãskatari noko itipinĩsharafamai inimakõikai nõ nai mẽra shara afe ĩpaxanõ. Noko askafamakĩ yorafo õimani nã noiaifo Niospa ato noikõia.  
\v 24 Noko judeofo fisti Niospa katonima nõ afe ĩpaxanõ. Akka judeofomafori ato katoni.  
\v 25 Nãnori Oseas Niospa meka yoikĩ kirikaki keneni iskafakĩ: 
\pi1 Fetsafo judeofomari ẽ katoxii efe yorafori inõfo. “Ẽ mato noi,” ẽ ato yoiyamafikatsaxakĩ, ẽ ato yoixii iskafakĩ: “Ẽ mato noikõi,” 
\m ixõ Epa Niospa yoini keskara Oseas kirikaki keneni.  
\v 26 Askata anã keneni iskafakĩ: 
\pi1 Niospa judeofoma ato iskafani: “Mãkai efe yorafoma,” ato fayoni. Nãskata chipo anã Epa Niospa ato ifixii afe yora inõfo. Nãskakẽ yorafãfe ato yoixikani iskafakakĩ: “Nafo Niospa fakefo. Epa Nios finakõia afama mĩshti fatiro,” 
\m ixõ yoixikani.  
\v 27 Isaías israelifoõnoa yoini iskafakĩ: “Na Israel ãfe fenafo ichapakõifo ixii oa makex mĩshtifo nõ tanãtiroma tiikõi. Nãskarifiai judeofo ichapakõi kaixikani. Askafikaxõ fisti rasichi Nios Ifofaxikani Nios fe ipaxakakĩ.  
\v 28 Nãskaxõ nã yoiyoni keskara nã maitio ikafãfe nã chanĩmara faafoma. Nõko Ifãfe ato omiskõimaxii anã ato manayoima ãto chaka potayonõfo,” ixõ Isaías yoini.  
\v 29 Isaías yoiyoni keskara nãskakõi. Nãskata anã yoini iskafakĩ: 
\pi1 Nõko Ifo finasharakõia nõko fenafo fetsafo ifini afe ĩpaxanõfo. Askafayamafiano anã judeofo ikeranama. Akka nõ nai keyokerana Sodoma anoa fe Gomorra anoafo ini keskai, 
\m ixõ Isaías kirika keneni. 
\s1 Nã judeofoma na meka shara Jesúsnoa Pablo ato yoini 
\p  
\v 30 Nãskakẽ ẽ mato yoi. Nã judeofomafãfe shinãyonifoma iskafakakĩ: “Nõko chaka nõ soapai,” ixõ shinãyonifoma. Akka iskaratĩa Cristo chanĩmara faifãfe Epa Niospa mã ato chaka soaxona afaa chakafamisma keskara ato õixiki.  
\v 31 Akka ẽfe kaifo israelifãfe Epa Niospa Moisés yoini keskara ifo sharafapainifo. Nãskaxõ shinãnifo iskafakakĩ: “A Moisés keneni nõ ifofasharaito Niospa noko shara õitiro,” ixõ shinãfiaifono Moisés kenenioxõ Niospa ato chaka soaxotiroma ato shara õixiki.  
\v 32 ¿Afeskakĩ Niospa ato shara õimamẽ? Ẽ mato yoinõ. Afãfekairoko Jesucristo chanĩmara faifono ato chaka soaxopanã. Askatamaroko Moisés ato yoini keskaraõnoax isharapaikĩ ãto chaka soapaikani Niospa ato shara õinõ. Akka Moisés yoinioxõ Niospa ato chaka soaxotiroma. Ẽ mato afara fetsa anã yoinõ. Tokiri fai nẽxpakĩa rakano finõpai akiki nõ otisikainãi nõ paketiro. Nãskarifiakĩ Jesús finõpaiyaifãfe chanĩmara fakanima afe nĩpãxakakĩma. Akka nã yorafo oa nõ tokiriki otisikai paketiro keskarafo. Nãskakĩ Jesús finõpaikakĩ shinãchakatirofo. Akka tsõa Jesús finõtiroma.  
\v 33 Nãnori Isaías Niospa meka yoikĩ kirika keneyoni iskafakĩ: 
\pi1 Nikakapo, judeofãfe ãto pexe rasi ano Niospa tokiri keskara nĩchixii yorafo akiki otisikĩ shinãchakaxinõfo. Nã tokiri efapaki yorafo otisikani paketirofo. Akka nãskarari nã Jesucristo chanĩmara faafo tiikai paketirofoma. Anã shinãchakakanima, 
\m ixõ Jesúsnoa Isaías kirika keneni. Akka Jesús nã tokiri efapa keskarakõi. 
\c 10  
\p  
\v 1 Efe yora mĩshtichi, ẽfe kaifo ẽ shinãkĩ finakõi. Ẽ ato Nios kĩfixõfafãini Jesús chanĩmara fanõfo, Nios fe ĩpaxanõfo.  
\v 2 Mẽ tãpia nãfãfe Epa Nios tãpisharapaikani. Nãskafikakĩ a Niospa ato tãpimapaiyai keskara shinãkanima. Ãa ãto shinãmã fisti shinãxõ akani.  
\v 3 Jesúsxõ Epa Niospa ãto chaka ato soaxotiro afaa chakafamisfoma keskara ato õixiki. Akka nã Jesús ato chaka soaxotiro nikakaspakani. Ãakõi shinãkanax shara ipaikani.  
\v 4 Iskakakĩ shinãkani: “Moisés keneni keskara nõ nikakõiaito Niospa noko chaka soaxotiro afaa chakafamisma keskara noko õixiki. Nãskax nõ afe ĩpaxanõ,” ixõ ãakõi shinãkani. Akka Moisés kenenioxõ nõko chaka nõa nõ soametiroma afaa chakafamisma keskara ixii Niospa noko õinõ. Askatamaroko Moisésxõ nõ Cristoõnoa tãpitiro. Nãskakĩ nõ Jesucristo chanĩmara faax aõnoax nã afaa chakafamisma keskarakõi nõ itiro nõ Nios fe ipaxakĩ. Nãskakĩ nõ Cristo fisti Ifofatiro. Nõ anã Moisés keneni nikatiroma. 
\s1 Jesús yorafoõnoax ato nãxoni 
\p  
\v 5 Moisés kirika kenekĩ iskafani: “Epa Niospa noko yoini keskara ẽ kirika keneni. Fatora fẽtsa nã meka ifo sharakõi fai isharakõixii, afaa chakafaamax. Akka mãfi Nios fe ikõisharapakenakaki. Akka nã Niospa yoini keskara nõ ifo sharakõi fatiroma. Askakimaroko nõ Cristo chanĩmara fai Niospa noko shara õinõ, nõ afe ĩpaxanõ.”  
\v 6-8 Askata anã kirika kenekĩ iskafani: “Niospa noko yoini afeskax nõ shara itiromãkĩ. Nõ Cristo chanĩmara faito nõko chaka noko soaxotiro afaa chakafamisma keskara noko õixiki. Nã Cristo meka shara nõko shinã mẽra ikakĩ. Nõ aõnoa tãpixõ nõ ato yoimis. Akka iskara shinãyamakãfe: ‘¿Tsoa nai mẽra katiromẽ Cristo fotomaxiki nõ chanĩmara fanõ?’ Akka tsoakai nai mẽra katiroma Cristo fotomaxiki. Askatari iskafakĩ shinãyamakãfe: ‘¿Afeskaxõ mã Cristo naafianikẽ mai mẽranoa nõ ifitiromẽ?’ ixõ shinãyamakãfe. Akka iskaratĩa Niospa meka nõ mẽra ikakĩ,” ixõ kirikaki Moisés keneni. Nãnori nõ mato yoimis.  
\v 9 Akka, “Jesús ẽfe Ifoki,” nõ ato fakĩ nõ shinãtiro iskafakĩ: “Chanĩma, Jesús nafianikẽ Apa Niospa otofani,” ixõ nõ shinãito nõko chaka noko soaxotiro nõ afe ĩpaxanõ.  
\v 10 Akka nõko shinã mẽraxõ nõ chanĩmara fakẽ Epa Niospa nõko chaka noko soaxotiro afaa chakafamisma keskara noko õixiki. Askatari, “Jesucristo ẽfe Ifoki,” ixõ nõ ato yoiax nõ afe ipanaka. 
\p  
\v 11 Nãnori Niospa meka yoikĩ yõra kirika keneni iskafakĩ: “A Jesucristo Ifofakanax anã ãto ifo fetsa fenakanima. Cristo fistichi ato nimasharatiro afe ĩpaxanõfo,” ixõ kirikaki keneni.  
\v 12 Judeofo feta judeofomafãferi Cristo chanĩmara faifono ãto Ifo itiro. Niospa ato õia nã yora fisti keskarafo, nãskarafos ato õi. Nãskaxõ fatotora yõkaito Niospa axosharakõifafãini aõ noikõikĩ.  
\v 13 Nãnorikõi Joel yoikĩ kirika keneni iskafakĩ: “Fatotora nõko Ifo chanĩmara faxõ yoikĩ iskafaito: ‘Mĩ ẽfe Ifoki, ea ifife ẽfe chaka ea soaxoxiki,’ faito ãfe chaka soaxotiro afe ĩpaxanõ,” ixõ Joel kirika keneni. 
\p  
\v 14 Akka tsõa Jesús Ifofaxoma, “Ea ifife ẽfe chaka ea soaxoxiki,” ixõ tsõa yõkatiroma chanĩmara faxoma. Akka Jesúsnoa nikakatsaxakĩma afeska faxõ chanĩmara fatirofoma. Tsõakairoko Jesúsnoa ato yoimiskẽ nikapanãfãfe.  
\v 15 Akka Niospa ato nĩchiyamaino tsoa katiroma Niospa meka shara ato yoixikakĩ. Ãkai fotirofoma. Nãnori Isaías kirika keneni iskafakĩ: “A meka shara yoi feai sharakõi,” ixõ yoini. 
\p  
\v 16 Ẽ mato yoinõ Niospa mã yorafo nĩchini Cristoõnoa meka shara ato yoitanõfo. Niospa meka yoisharafiaifono judeofo atirifãfe ato nikapaikanima. Nãnori Isaías kirika keneni iskafakĩ: “Ẽfe Ifãfe, nõ ato yoiaito tsõa chanĩmara faima,” ixõ yoini.  
\v 17 Nãskano Cristoõnoa meka shara yoiaito nikakakĩ fetsafãfe chanĩmara fatirofo. 
\p  
\v 18 “Akka, ¿judeofãfe nã meka shara Jesúsnoa nikamisfomamẽ?” ixõ fẽtsa ea yõkaito, ẽ kematiro iskafakĩ: “Ẽje, mã nikamisfo.” Nãnori David yoini kirika kenekĩ iskafakĩ: 
\pi1 Nã maifo tii anoafãferi nã meka shara mã keyokõichi nikamisfo, 
\m ixõ David kirika keneni.  
\v 19 Mã shinãiraka iskafakĩ: “Akka judeofãfe na meka shara Jesúsnoa mã nikafikakĩ nikasharamisfomara,” ixõ mã shinãi rakikĩa. Akka ẽ mato yoi iskafakĩ, mã nikamisfo nã meka shara Jesúsnoa. Mẽxotaima mã nikafikakĩ chanĩmara faafoma. Akka israelifomafãfe Nios nikakatsaxakakĩma mã rama aõnoa nikafo. Moisés Niospa meka yoikĩ kirika keneni iskafakĩ: 
\pi1 Nã judeofoma efe yora iyopaonifoma. Akka iskaratĩa ẽ ato noikõikĩ ẽ ato ifi efe yora inõfo. Ẽ ato askafaito õikakĩ judeofãfe ato noikaspaxikani ato xĩtipaikakĩ. Askatari, “Na judeofomafãfe afaa tãpiafoma, judeofãfe ato fafiaifono ẽ ato ifi efe yora inõfo. Nãskakanax judeofo atoki õitifishkixikani,” ixõ Niospa yoini, 
\m ixõ Moisés kirika keneni.  
\v 20 Chipo Isaíasri Niospa meka yoikĩ kirikaki keneni iskafakĩ: 
\pi1 A judeofomafãfe akõi ea fenayamafikatsaxakakĩ chipo ea fichixõ ea chanĩmara fakanax efe ipanakafo. Askatari, “Niosnoa noko tãpimafe,” ixõ ato yoiyamafikatsaxakakĩ. Akka chipo ẽ ato tãpimaxii, 
\m ixõ Niospa yoini keskara Isaías keneni.  
\v 21 Askafiaifono ẽfe kaifoõnoa Niospa yoini iskafakĩ: “Nã pena tiixõ ãto shinã mẽraxõ ẽ ato yoimis iskafakĩ: ‘Ekeki fekãfe,’ ixõ ẽ ato shinãmafiaino ekeki fepaikanima. Nikayospamisfo,” ixõ Niospa yoini keskara Isaías kirika keneni. 
\c 11  
\s1 Niospa israelifo noikõi 
\p  
\v 1 Mã iskafakĩ shinãiraka: “Epa Niospa afe yorafo israelifo mã pota,” ixõ mã shinãiraka. Mã askaito ẽ mato kematiro iskafakĩ: “Maa, ato keyokõi potama. Nãskaxõ eari potama ẽri israeli. Akka Abraham fe Benjamín ẽfe xini. Nãskax ẽ israelikẽ ea Niospa potama,” ixõ ẽ mato kematiro.  
\v 2 Epa Niospa afe yora inõpokoaifo israelifo ato katoyonixakĩkai ato potamisma. Shinãkapo. Nõko xini Elías israelifoõnoa yoikĩ kirika keneni iskafakĩ:  
\v 3 “Ẽfe Ifãfe, a mĩ meka shara yoimisfo mã ato retemisfo. Askatari a mĩsa kamakixõ mia kĩfimisfo mã potafo. Iskaratĩa ẽ fistichi mia Ifofai. Anã ano tsoama. Eari retepaikani,” ixõ Elías Nios yoini.  
\v 4 Nãskafaito nikakĩ Epa Niospa ¿afaa fanimẽ, Elías? Iskafakĩ kemani: “Maa. Meres fistikai mĩ ea chanĩmara faima. Akka nãno mĩ kaifo siete mil yorafãfe ea chanĩmara fakaxõ afaa fetsakai ifofaafoma. Akka yorafãfe onifanifo ãfe ane Baal, ‘Akai nõko niosra,’ famisfoma,” ixõ Niospa Elías yoini.  
\v 5 Nãskarifiakĩ iskaratĩari ẽfe kaifo fisti rasichi mã Nios Ifofaafo, Niospamãi afetĩama ato noikĩ ato katoyonino afe yora inõfo.  
\v 6 Niospa noko noikõisharakĩ noko ifi nõ afe yora inõ. Akka nõ afara sharafaõxokai noko ifima. Niospa noko afaa kopi yõkaima noko ifixiki. Akka ãakõi noko ifi noko noisharakĩ. Nãskakẽ nõ afara sharafatiroma noko ifinõ. Akka a nõ kopifa keskara noko õikĩ ãakõi noko ifikeranama. Nãskakẽ noko afaa kopi yõkaima ãakõimãi noko ifixõ. 
\p  
\v 7 Akka ẽfe kaifo israelifo fisti rasichi Nios fenapaonifo afe rafexikakĩ, nãfomãi Niospa katoyonino afe yora inõfo. Akka israeli fetsafãfe Nios nikakaspapaonifo Nios fe rafekaspakakĩ. Akka a Nios nikakaspaifãfe ãto õiti kerexkõifakaxõ nikakaspakani.  
\v 8 Nãnori Niospa meka kirika kenekakĩ iskafanifo: “Epa Nios nikakaspakani nã oxafo keskarafo afaa shinãkanima. Askatari oa yora fẽxo keskara ipaikani. Nãskaxõ Nios nikakõipaikanima. Askafaifãfe Epa Niospa ãfe meka shara ato tãpimanima. Iskaratĩari nãskakani,” ixõ yõra kirikaki keneni.  
\v 9 Askatari David kirika keneni iskafakĩ: 
\pi1 A Nios nikakaspaifãfe shinãkani iskafakakĩ: “A nõ piai ichapa ita nõko afama mĩshtifori ichapa. Nãskakẽ Niospa noko shara õi,” ixõ shinãkani, Nios nikayamafikakĩ. Akka nõko afama mĩshtiõxõ Niospa noko shara õima nõ afe ĩpaxanõ. A Nios nikakaspaifo ãto afama mĩshtiõnoax fenoxikani afama mĩshtifo shinãifãfe. Niospa ato omiskõimaxii.  
\v 10 Oa yora fẽxo keskara inõfo. Askarafãfe Nios nikayamaifono oa yora afara efekõi pefea keskara Niospa ato imanõ, 
\m ixõ David kirika keneni a Nios nikakaspaifoõnoa yoikĩ. 
\s1 Judeofomafãferi Jesús chanĩmara fakanax afe ipanakafo 
\p  
\v 11 Akka, ¿Niospa afe yorafo israelifo ato potapakenakamẽ? Maa, ato keyokõi potaima. Akka nã israelifãfe Cristo chanĩmara famisfomano a israelimafãferi mã Jesucristo chanĩmara fakani. Ifofaifono Niospa ato ifi afe yora inõfo. Akka nã israelifomafãfe mã Cristo chanĩmara faifono israelifãfe ato õikakĩ akairi Jesucristo chanĩmara fapaikani afe ipaxakakĩ.  
\v 12 Ẽfe kaifãfe, afara chakafamisfo Jesucristo Ifofapaimisfoma. Akka Epa Niospa nã maitio anoafo Jesucristoõnoa ato tãpimanano chanĩmara fakanax afe ipanakafo. Nãskaxõ Niospa ato shara faxõi, inimakõinõfo. Askatari ẽfe kaifo judeofãferi chipo Jesucristo chanĩmara fakanax inimai finakõixikani Niospa ato sharafaxõano. 
\p  
\v 13 Akka mã ẽfe kaifoyamafiano Epa Niospa ea mato mẽra nĩchini Jesúsnoa ẽ mato yoinõ. Ẽ inimakõi Epa Niospa ea katoni ẽ mato ano onõ.  
\v 14 Ẽ mato yoiaino mã Cristo chanĩmara fayanã mã inimakõiaito mato õikakĩ ẽfe kaifãferi Jesucristo chanĩmara fapaikani, mato keskara ipaikakĩ. Nãskarakõi ipainõfora.  
\v 15 Shinãkapo. Ẽfe kaifo judeofãfe Jesucristo chanĩmara fayamaifono Niospa ato potani anã afe yorakõi inõfoma. Akka nã maifo tii anoafãfe Cristo chanĩmara fakanax Nios fe rafekani. Nãskakẽ ẽfe kaifãferi Cristo chanĩmara faifono Niospa anã ato ifi afe yora inõfo. Nãskakanax sharakõi ixikani. Nã yora naax otoa keskara itirofo, inimakõikani.  
\v 16 Nãskaxõ ẽ anã mato yoinõ pãakiri keparanãkĩ iskafakĩ: Pãa kaxke pishta Niosnã ikano keyokõi ãfenã itiro. Nãskatari ifi ãfe tapo ãfenã ikano ãfe teshpafori keyokõi Niosnã itiro. Nãskarifiakĩ ẽfe kaifãfe Jesucristo chanĩmara fakakĩ taefanifo fisti rasichi. Nãskakẽ ãto fenafãfe Nios Ifofakanax chipo afe yora ixikani chanĩmara fakanax. 
\p  
\v 17 Ẽ mato afara fetsa anã yoinõ mã tãpinõ. Ẽfe kaifo judeofo ifi olivo ãfe põya keskarafo. Nã ifi põya fimioma ifãfe mextexõ potatiro. Nãskaxõ ifi olivo fetsa nã nii mẽra nia ãfe põya fetsa fĩaxõ tichixotiro nã olivo kayakõiki. Nãskarifiakĩ judeofãfe Jesucristo chanĩmara fayamaito Niospa mã ato pota. Akka mã judeofoma. Mãfi nã ifi olivo nii mẽra nia keskarafokĩ. Nã ifi ifoyama keskarafo, mã. Nãskax mã Epa Niospa yora ipaonima. Akka Jesucristo mã Ifofaito Niospa mato ifi afe yora mã inõ. Nãskata nã ifi olivo mã ãfe põya tichiax ãfe tapo mẽranoax yosiaino foaisharatiro. Nãskarifiakĩ nã judeofãfe ãto xinifãfe mekaõxõ mã Niosnoa tãpisharakõiafo nã ifi olivo yosiai keskaraxõ.  
\v 18 Iskara shinãyamakãfe: “Nõ sharakẽ noko Niospa ifia. Akka judeofo chakafokẽ Niospa mã ato pota,” iyamakãfe. Shinãkapo. Mãfi ifi ãfe põya keskarafo. Ifi põyakai ãfe tapomais nitiroma, xanatiro. Ifi põyafo aõ tapoõnoax nia. Nãskarifiakĩ judeofo ãto xinifãfe Nios tãpinifo taefakakĩ. Atoõxõ mãri Nios tãpitiro. 
\p  
\v 19 Mã shinãiraka iskakĩ: “Ifi põya chakakẽ, ifãfe mextexõ põtatiro. Nãskarifiakĩ judeofãfe Jesucristo chanĩmara fayamaifono Niospa ato potani. Akka nõ judeofo keskarama nõ Jesucristo chanĩmara faax nõ afe ipanaka,” ixõ mã shinãiraka.  
\v 20 Nã mã yoiai keskara chanĩmakõikĩ kexemesharakãfe. Akka judeofãfe chanĩmara fayamaifãfe Epa Niospa ato potani. Nã judeofo potani keskafakĩ Epa Niospa matori potatiroki. Kexemesharakãfe, mã anã Jesús chanĩmara fayamaito matori potatiroki. Nãskakẽ kakapaiyamakãfe. Mã Jesús chanĩmara fayamax mã fenotiroki.  
\v 21 Judeofãfe Nios chanĩmara fakĩ taefafianifono chipo ãto fenafãfe chanĩmara fayamaifãfe Niospa ato potani. Mãri mã chanĩmara fayamaito matori potatiroki. 
\p  
\v 22 Akka shinãkapo. Niospa noko noifiaino nõ nikayamaino noko tãpimatiro omiskõimakĩ. Nãskakẽ judeofãfe chanĩmara fayamaifãfe ato omiskõimakĩ ato potai. Akka Niospa mato noikĩ afe yora mato imai. Nãskakẽ mato noiai keskara shinãfafãikãfe. Chanĩmara fafafãikãfe. Mã askafayamaino matori potatiro.  
\v 23 Ẽfe kaifo judeofãfe anã chaka shinãkakima, Jesús chanĩmara faifono anã afe yora Epa Niospa ato imatiro. Ifi mextexõ anã ãfe põya tichixotiro anã foainõ. Nãskarifiakĩ Epa Niospa anã ato ifitiro afe yora inõfo.  
\v 24 Mãkai judeofoma. Judeofo ifi olivokõi keskarafo. Akka mã judeoma. Mã nã olivo nii mẽra nia keskara. Olivokõi ãfe ifãfe nã nii mẽra olivo ãfe põya xatexõ olivokõiki tichitiro foaisharanõ. Nãskarifiai mã Niospa yora ipaonima. Akka iskaratĩa Epa Niospa mato ifia mã afe yorafo inõ. Nãskakẽri ẽfe kaifo anã Niospa ato ifipaisharakĩ ifitiro afe yora inõfo. Jesús chanĩmara faifãfe afe yorafo ato imatiro. 
\s1 Epa Niospa judeofo anã ato ifixii afe yora inõfo 
\p  
\v 25 Efe yora mĩshtichi, mãfi israelifoma. Meka fetsaõnoa mã nikamisma ẽ mato tãpimanõ mãto shinã mẽraxõ mã shinãnõ, nã ẽ mato yoiai keskara mã tãpiax kakapaimis mã inõma, mã iskanõma: “Nõ israelifo keskarama, nõ sharafinakõia,” mã inõma. Chanĩma, iskaratĩa ẽfe kaifo israelifãfe ãto õiti kerexkõixõ Niospa meka shara Jesúsnoa nikakaspakani. Akka israelifãfema Jesús chanĩmara faafono Niospa ato ifini afe yora ato imaxii. Nãskatari ẽfe kaifãferi anã Nios chanĩmara faifãfe Niospa anã ato ifixii afe yora inõfo.  
\v 26 Akka keyokõichi israelifãfe Jesús chanĩmara faifãfe Epa Niospa ato ifixii afe yora inõfo. Nãnori Isaías kirika keneni iskafakĩ: 
\pi1 Nõko Ifo Sión anoax oxii nõko chaka noko soaxoxiki nõ afe ĩpaxanõ. Nã nõko Ifo israeli yora ixii. Nãato israelifo ifiyoi anã afara chaka ãto ifo inõma, 
\m ixõ Isaías kirika keneni.  
\v 27 Askata Isaías Niospa meka anã yoini iskafakĩ: 
\pi1 Ẽ ato yoiyoni keskara ẽ ãto chaka ato soaxoxii, 
\m ixõ Niospa yoini Isaías kirikaki keneni. 
\p  
\v 28 Jesúsnoa meka shara judeofãfe nikakaspakani, noikaspakakĩ. Akka mã judeoma. Nãskakẽ Epa Niospa mato sharafaxõa ãfe meka shara Jesúsnoa mã chanĩmara fanõ. Akka judeofãfe ãto xinifo Niospa yoini iskafakĩ: “Ẽ mato ifi mã efe yora inõ,” ixõ ato yoini. Nãskakẽ ãto xinifoõxõ Niospa ato noi, ãfe fenafori noikõi.  
\v 29 Epa Niospa ẽfe kaifo ãfe afama mĩshti inãxixakĩ yoiyoni keskara anã fetsafaima afetĩamamãi ato ifiyonixakĩ. Nãskakĩ ato potapakenakama.  
\v 30 Akka mã judeoyamafixõ mã Epa Nios nikayopaonima. Akka iskaratĩa mã anã nikayospa ipaima. Nãskakẽ Niospa mato sharafaxopai mã chanĩmara faito. Akka ẽfe kaifo judeofo ato sharafaxopaifiaito nikakaspapaonifo. Nãskakẽ mã chanĩmara faito Epa Niospa mato noikĩ mato sharafaxõi.  
\v 31 Nã mã Nios nikakaspayopaoni keskakani ẽfe kaifofo. Nãskafiaifono nã mato noiai keskari fakĩ atori Niospa noikõi. Nãskakẽ chipo Epa Nios anã shinãxikani.  
\v 32 Epa Niospa yoini tãpixõ iskafakĩ: “Yora keyokõichi chakafamisfo, nikayospafo,” ixõ yoini. Askafiaifono ato noikĩ ato chaka soaxoxii afe ĩpaxanõfo. 
\s1 Nios sharafinakõia 
\p  
\v 33 ¡Aicho! ¡Nõko Nios sharakõi! Afama mĩshti tãpikõia. Shinãsharakõia. Ãfe shinã mẽraxõ yorafoõnoa shinãi keskara tsõa tãpitiroma. Aato akai keskara tsõa tãpitiroma.  
\v 34 Tsõa nõko Ifãfe shinãi keskara tãpitiroma. Tsõarikai nõko Ifo tãpimatiroma.  
\v 35 Tsõarikai nõko Ifo afaa inãma noko niminõ.  
\v 36 Ares ãfe shinãmã shinãxõ afama mĩshti onifani. Keyokõi ãfenã. Aõnoax nipanaka. Nãskakẽ, “Nios sharakõira,” fapanakafo. Askapainõ. 
\c 12  
\s1 Afeskax Niospa ãfe yonomati nõ itiromãkĩ 
\p  
\v 1 Efe yora mĩshtichi, ẽ mato yoisharapaiyai keskara akãfe. Epa Niospa mato noikĩ mato sharafamiski. Nãskakẽ mãri inãmekãfe mãto Ifo inõ, ãfe yonomati ipaxakakĩ. Mã askaino anã afara chaka mãto ifo itiroma, Nios mãto Ifo iki. Shinãkapo. Mã mẽste shinãsharakõikĩ Nios noiyanã sharafakãfe. Mã askafaino Nios matoki inimakõitiro.  
\v 2 Nios Ifofaafãfema shinãi keskara shinãyamakãfe. Mã shinãpaoni keskara anã shinãyamakãfe. Iskaratĩa Niospa mãto shinã mẽra fetsafapaiyai keskara shinãkãfe. Afaa fetsakai mã shinãtiroma. Mã askakĩ mã tãpitiro Niospa mato imapaiyai keskara sharafinakõi. Mato imapaiyai keskara mã ikaino matoki inimatiro. 
\p  
\v 3 Epa Niospa ea noikĩ ea yoia ẽ mato tãpimanõ. Nãskakẽ ẽ keyokõi mato yoisharapai. Kakapaimis iyamakãfe. Niospa mato imapaiyai keskara fisti shinãkãfe. Afaa fetsa shinãyamakãfe. Niospa mato shinãmana keskara fisti matoõnoa shinãkãfe. Mẽstekõi matoõnoa shinãkãfe. Mã Nios chanĩmara fakĩ shinãkãfe iskakĩ: “Ea Niospa imapaiyai keskara ẽ ipai,” ixõ shinãkãfe.  
\v 4 Ẽ mato afara fetsa ẽa yoipai. Nõko yora fistifiano nõ põyayai fetsea. Askata nõ feroyata, pachoyata, nã nõ fisti askai fetsea. Nãskaxõ nãfãfe nõ afara fetsafo atiro.  
\v 5 Nãskarifiai nõko Ifo Cristo fistikõi. Akka nõfi ãfe põya keskarata, ãfe fero keskarata, ãfe tae keskarata nõ iki fetsea yora fisti fiax. 
\p  
\v 6 Epa Niospa noko amapaiyai keskara nõ aõxõ fetsafo axosharatiro. Mã nõ Nios Ifofaano a noko imapaiyai keskara noko imaketsai fẽtsa ãfe meka ato yoinõfo, fẽtsari ato tãpimanõ, fẽtsari afaamaisfori ato inãnõ. Nãskarafo noko imaketsai. Mã nõ Nios Ifofaano noko noikĩ noko katoa noko amai keskara nõ anõ. Noko fetsafo katoa ãfe shinãõxõ fetsafori ãfe meka nõ ato yoinõ. Nãskakẽ mã mato katoano mã chanĩmara faxõ mato yoiai keskara fetsafori ato yoisharakãfe.  
\v 7 Mã mato fetsafo katokẽ ãfe shinãõxõ fetsafori axosharafafãikãfe. Mato fetsafo katokẽ ãfe shinãõxõ ãfe meka ato tãpimasharakãfe.  
\v 8 Mato fetsafo katokẽ aõxõ fetsafo õiti ato fepeaxõfafãikãfe. Mato fetsafo katokẽ afara yopaifo inimayanã ato inãsharakãfe. Mato fetsafo katokẽ ãto xanĩfo mã inõ. Nãskakẽ Niospa shinãmana keskara ato yonomasharakãfe. Xanĩfo mẽsteshara ikãfe. Nã mato katokẽ ãfe shinãõxõ omiskõiaifo ato noikĩ inimayanã ato axosharakãfe. 
\s1 Afeskax Nios Ifofaafo itirofomẽ 
\p  
\v 9 “Ẽ mato noira,” ifiata ato pãrayamakãfe. Yorafo noikõikãfe. Afara chakafo noikaspakãfe. Afara shara noisharakãfe. Afo potayamakãfe.  
\v 10 Nã mã Nios chanĩmara faafo tii noinãkãfe. Mato fe yorakõifo fe mã noinãmis keskariai noinõnãkãfe. A mã mã nõimeai keskariai fetsafori ato noisharakãfe. “Fetsafo finakõiaki, ẽ finakõiyamaki,” ixõ ato sharafakãfe.  
\v 11 Nõko Ifo yonoxoni xaniyamakãfe. Niospa Yõshi Sharaõxõ inimakãi yonosharaxokãfe.  
\v 12 Epa Niospa mato sharafaxoxiai keskara shinãkãfe. Nãfo shinãi inimakãfe. Akka omiskõifi fena fenayamakãfe. Epa Nios kĩfikĩ xateyamakãfe.  
\v 13 Nios Ifofaafãfe afara yopaifono ato inãkãfe. Fetsafo pimasharakãfe. Pexe yopaifãfe mãto pexe mẽra ato ikimakãfe. Ato kexesharakãfe. 
\p  
\v 14 Mato omiskõimanaifãfe ato kopiyamakãfe. Nios kĩfikãfe iskafakĩ: “Epa Niospa ato chakafayamafe ato sharafafe,” ixõ Epa Nios kĩfikãfe. Nãskaxori ato ĩchayamakãfe. Askatamaroko ato sharafaxokãfe.  
\v 15 Inimaifono mãri inimakãfe. Ato sharafaifono aõnoax inimakãfe. Oiaifono mãri shinãmitsayanã ato shinãkãfe. Omiskõiaifono mãri atoõnoax omiskõikãfe.  
\v 16 Afe feratenãkakĩma Epa Niospa mato shinãmapaiyai keskara fisti anori shinãkãfe. “Ẽ ato keskarama,” iyamakãfe. Xanĩfofo fisti fe rafepaimis iyamakãfe. Afaayamafo feri rafekãfe. “Ẽ tãpia keskarakai fetsafãfe tãpiafoma,” ixõ anori shinãyamakãfe. Kakapaiyamakãfe. 
\p  
\v 17 Mato chakafafiaifãfe ato kopiyamakãfe. Ãto ferotaifi isharakãfe, “Nios chakara,” fayamanõ.  
\v 18 Keyokõi yorafo fe rafepaisharakãfe. Mã aska sharafapaifiaino fetsafo mato fe rafesharapaikanima.  
\v 19 Efe yora mĩshtichi, fẽtsa mato chakafafiaito ato kopiyamakãfe. Epa Niospa meka yoikakĩ kenenifo iskafakakĩ: “Mato chakafaifo ẽ ato omiskõimanikai,” ixõ kirika kenenifo. Epa Niospa yora chakafo ato omiskõimaxii. Mãkai ato omiskõimatiroma.  
\v 20 Ato kopitamaroko nã mato noikaspaifo fonãikaifãfe ato pimakãfe. Nõamã ikaifãfe ato ayamakãfe. Ma askafaito õikani, “Noko kopikanimara,” ikanax rãfipainõfo.  
\v 21 Askata fetsafãfe mato chakafapaifiaifãfe mãri kopikiri ato chakafayamakãfe. Chaka ifofayamakãfe. Askatamaroko afara sharafatitaifakãfe. Askafakĩ mã chaka potatiro. 
\c 13  
\s1 Nõ xanĩfofo nikakõitiro 
\p  
\v 1 Epa Niospa yoini keskara nã maitio ikafãfe xanĩfofo katotirofo. Akka xanĩfo finakõia nikata afe rafeafori nikakõikãfe Niospa ato xanĩfo imaino. Akka Niospa xanĩfo ato imayamaino itirofoma.  
\v 2 Niospa noko yoini iskafakĩ: “Mãto xanĩfofo nikakõikãfe.” Akka mãto xanĩfo mã nikakaspakĩ Niosri mã nikakaspai. Mã nikakaspaito mato omiskõimaxii.  
\v 3 Akka nõ isharaxkai nõ xanĩfoki mesetiroma. Akka nõ isharayamax nõ xanĩfoki mesetiro. Xanĩfoki mesexikima isharakãfe. Mã askaito mato chakafatama matoõnoa yoisharanõfo.  
\v 4 Xanĩfofo Epa Nios yonoxomis keskarafo mato axosharakani. Akka mã afara chakafaax xanĩfoki mã mesetiro. A xanĩfoafo afokai kaxpa xanĩfoafoma, mato omiskõimatirofo. Nãfofi Niospa õimati keskarafokĩ afara chakafaifãfe ato omiskõimatirofo.  
\v 5 Akka mãto xanĩfofo nikakõikãfe mato omiskõimayamanõfo. Mãto shinã mẽraxõ shinãsharaxikakĩ. Ato nikayamakĩ mã shinãtiro iskafakĩ: “Ooa, ẽ nikayospakõi. Nãskax ẽ shinãmitsaito ẽ mei,” ixõ mã shinãtiro xanĩfofo nikayamax. 
\p  
\v 6 Mãto xanĩfofo Nios yonoxomisfo keskarafo pena tii mato yonoxokani mã isharanõ. Nãskakẽ mato kori yõkaifãfe ato inãkãfe aõxõ mato axosharanõfo.  
\v 7 Mã ato nimixõ ato kori inãkãfe. Askatari ato noisharata ato noisharakãfe. 
\s1 Nõ nõinõnãtiro 
\p  
\v 8 Tsoa nimiyamakãfe. Askatamaroko noinãkãfe. Noinãi eneyamakãfe. Nã nõ yorafo noiaiõxõ Epa Niospa yoini keskarakõi nõ amis.  
\v 9 Noko yoikĩ iskafani: “Mãto ãfima fe iyamakãfe. Kẽrofori mãto fenema feri iyamakãfe. Retemitsapaiyamakãfe. Yometsoyamakãfe. Fetsa pãrayamakãfe. Fetsa fĩapaiyamakãfe,” ixõ noko yoini. Afara fetsafori noko yoini. Nõ yorafo noikĩ na Epa Niospa yoini keskara nõ ato chakafaima. Nãskakẽ a mĩa mĩ noimei keskari akĩ fetsafo ato noife.  
\v 10 Nõ fetsafo noikõixõ nõ ato chakafatiroma. Akka nõ ato noikõikĩ Niospa yoini keskara nõ aki. Nõ ãto ãfi fe nõ ipaima. Askatari nõ ato noikõixõ nõ atoki yometsoima. Askatari nõ ato pãraima. Akka nõ ato noiaiõxõ Niospa noko yoia keskara nõ atiro. 
\p  
\v 11 Nã Jesús fena oyoaima chãi ẽ taefakĩ Jesús Ifofani. Akka iskaratĩa nõko Ifo Jesús mã chaima oi. Nãskakẽ ẽ mato yoiai keskara akãfe. Oxakatsa ikai keskara iyamakãfe. Oxakatsa ikĩkai nõ yonosharatiroma. Nãskakẽ xanikakĩma Jesús yonosharaxokãfe itipinĩsharaxikakĩ.  
\v 12 Mã penaino samamakõi penatiro. Nãskarifiakakĩ mã nõko Ifo chaima oaino fakish mẽra ika keskara iyamakãfe. Mãto chaka xatekõikãfe. Jesús ika keskara mãri xafakĩa ikãfe afara chakafaxikakima.  
\v 13 Isharakõikãfe penano nõ õisharatiro pakexikima. Nãskarifiakĩ Jesús Ifofaax nõ isharakõitiro afaa chakafatama. Akka fetsafãfe monokakĩ afara chakafaifo mẽra foyamakãfe. Chaka fetsa fetsatapafo ayamakãfe. Pãeyamakãfe. Askatari mãto ãfima chotayamakãfe. Kẽromãri mãto fenema chotamayamakãfe. Afara chaka fetsafo shinãyamakãfe. Feratenã faatanãyamakãfe. Fetsa xĩtipaimis iyamakãfe.  
\v 14 Askatamaroko nõko Ifo Jesucristo fe rafekãfe. Jesús ika keskara mãri ikãfe afara chakafakĩma. Afara chaka mã shinãpaiyai keskara ayamakãfe. 
\c 14  
\s1 Mato fe yorafo a Nios Ifofaafo mekafakĩ chakafayamakãfe 
\p  
\v 1 Meka fetsa ẽ mato yoinõ. Fetsafãfe Jesús Ifofafiakaxõ ãfe meka tãpisharakanamax mato fe ichanãifono, “Aicho, nofe ichanãi fekãfe,” ato fakãfe. Mã shinãi keskara anori shinãyamaifono ato fe feratenãyamakãfe. Ato mekafakĩ chakafayamakãfe.  
\v 2 Mato mẽra ixõ fẽtsa yoitiro iskafakĩ: “Ẽ Jesús chanĩmara faxõ keyokõi ẽ pitiro,” ixõ yoitiro. Akka fẽtsa yoikĩ iskafatiro: “Ẽfi Jesús chanĩmara fakĩ ẽkai nami pitiroma. Ẽ fanafo fisti pitiro,” ixõ yoitiro Jesús meka tãpisharaxoma.  
\v 3 Fẽtsafãfe nami pikĩ a nami pimisfoma ato mekafakĩ chakafatiroma. Ato yoikĩ iskafatirofoma: “Mã afaa tãpiama. Nõ nami pia shara, noko chakafatiroma. Nami shara,” ato fatirofoma. Nãskarifiakĩ nã nami pimismato a nami pimisfo ato mekafakĩ chakafatiroma. Ato yoikĩ iskafatiroma: “Nafãfe nami pikakĩ chakafakani,” ixokai atoõnoa yoitirofoma. Akka Epa Niospa keyokõi nãskarafo noko ifi nõ ãfe fakefo inõ. Nãskakẽ fetsafo mekafakĩ chakafayamakãfe.  
\v 4 Jesús Ifofaafokai mãto inafoma. Akka afãfe Epa Nios yonoxomisfo. Nãskakẽ ato mekafakĩ chakafayamakãfe. Epa Niospa ato yoitiro. A chakafaifo ato iskafatiro: “Mã chakafai,” ixõ ato yoitiro. Askatari a sharafaifo, “Mã sharafai,” ato fatiro. Akka a chaka shinãifo Niospa ato tãpimatiro isharanõfo anã chaka shinãnõfoma. 
\p  
\v 5 Akka a Nios Ifofaafo fetsafãfe shinãkani iskafakakĩ: “A judeofãfe tenetitĩa nõ ichanãtiro Jesús shinãi,” ixõ anori shinãkani. Akka fetsafãferi shinãkani iskakakĩ: “Nã pena keyokõi shara nõ ichanãtiro Jesús shinãi,” ixõ shinãkani. Nãskaxõ nã ãto shinãmã shinãifo keskara shara. Nã shinãifo penata ichanãtirofo Jesús shinãkani. Akka mã shinãi keskara shinãyamaifono ato mekafakĩ chakafayamakãfe.  
\v 6 “Na judeofãfe tenetitĩa nõ ichanãtiro Jesús shinãi,” ixõ shinãifãfe, nãfãfe nõko Ifo Jesús Ifofasharapaikani. Akka a nã fatora penata nõ ichanãtiro Jesús shinãi ikaifãferi, nãfãfe nõko Ifo Jesús Ifofasharapaikani. Askatari fetsafãfe shinãkani: “Nõ nami pitiro. Aicho, Epa Niospa mĩ noko nami inã nõ pinõ,” ixõ shinãkani. Nãfãferi nõko Ifo Jesús Ifofasharapaikani. Akka fetsafãferi nã nami piyamaifãfe nãfãferi nõko Ifo Jesús, “Aicho,” fatirofo. Nãskaxõ nãfãfe Nios shinãsharapaikani.  
\v 7-8 Nõ niyoxõkai nõa nõ apaiyai keskara fisti nõ shinãtiroma. Epa Niospa noko amapaiyai keskara nõ shinãtiro. Nõfi ãfenãfoki. Nãfi nõko Ifokĩ. A nõ naitĩari nõko Ifo Jesús niyoxõ nõ Ifofasharapai nokoki inimanõ. A nõ naitĩari nõko Ifo nõ shinãtiro nõmãi ãfenãkõixõ. 
\p  
\v 9 Cristo noko nãxoni. Mã maifafono otokainixakĩ. Iskaratĩa mã nia. Nãskakẽ nõ nayoamax nõko Ifo iki. Mã nõ naaxri nõko Ifo ixii.  
\v 10 ¿Afeskafakĩ mato feta chanĩmara faafo mã mekafakĩ chakafaimẽ? ¿Afeskafakĩ mã fetsaõnoa mã shinãchakaimẽ? “Aakai afaamara,” ixõ mã shinãi. Shinãkapo, keyokõi nõ chipo Nios ikano nõ akiki nokoi kaikai. Askatari noko yoixii nõ afara sharafayamakẽ nõ chakafamiskẽ.  
\v 11 Isaías Niospa meka yoikĩ kirika keneni. 
\pi1 Niospa yoini iskafakĩ: “Chanĩmakõi ẽ nia. Chanĩmakõiri keyokõi maifo tii anoafo ekeki nokoxikani. Ekeki ratokonõ mai chachikaxõ yoixikani: ‘Epa Niospa, mĩ chanĩmakõi, mĩ Nioskõi,’ ixõ ea keyokõichi yoixikani.” 
\m  
\v 12 Akka keyokõichi Epa Niospa ferotaifi nõ amis keskara nõ yoixii. Nõ shinãmis keskarari nõ yoixii. 
\s1 Fetsafo afara chakafamayamakãfe 
\p  
\v 13 Nãskakẽ a mato feta Jesús chanĩmara faafo mekafakĩ chakafayamakãfe. Iskafakĩ shinãkãfe: “Nõ afara chakafaito õikaxõ akairi chakafatirofo. Nãskakẽ nõ afaa chakafapaima akairi afaa chakafayamanõfo.”  
\v 14 Jesús ẽfe Ifokẽ ẽ mato yoisharapai. Keyokõi a nõ piaifo shara nõ pitiro. Nã ẽ chanĩmara fakõini. Nãskafiano fetsafãfe shinãkani iskafakakĩ: “Na piaifo nõ pixõ nõ chaka shinãtiro,” ixõ shinãkani. “Nõ nami pitiroma,” ixõ shinãfikakĩ mã nami pikani. Nãskaxõ chaka shinãkani.  
\v 15 Mato feta fẽtsa Jesús chanĩmara faito ãfe ferotaifi a nami pitiroma piyamakãfe ãfe shinã mẽraxõ shinãchakanõma. A noikõixõ mã ãfe ferotaifi pitiroma. Nõko Ifo Cristo aõnoaxri nani. Nãskakẽ a pitiroma pikĩ mã fetsa shinãchakamatiro. Nãskakẽ ãfe ferotaifi piyamakãfe Jesús kachikiri faax fenoyamanõ.  
\v 16 “A ẽ akai keskara chakama,” ixõ mã shinãfiaino fetsafãfe askara shinãkanima. Iskafakĩ shinãkani: “Na mã akai keskara chaka,” mato faifono mã xaterisafatiro matoxõ shinãchakayamanõfo.  
\v 17 A nõ piaito Niospa yora noko imatiroma. Askatari a nõ ayaito Niospa yora noko imatiroma. Akka Nios nõko xanĩfokõino ãfe Yõshi Sharaõnoax nõ sharakõi. Nõko õiti fekaxteima nõ inimakõitiro.  
\v 18 Nõko Ifo Cristo nõ nikasharaino Epa Nios nokoki inimasharatiro. Yorafãferi nokoõnoa shinãsharatirofo. 
\p  
\v 19 Nãskakẽ Jesús chanĩmara fai fetsafo fe isharakõikãfe. Jesúsnoa yoinõnãkãfe a keskara shara ixikakĩ.  
\v 20 Niospa yoini keyokõi a nõ piai shara. Nãskafekẽ fetsafãfe, a Nios tãpisharafãfema shinãkani iskafakakĩ: “Afara fetsa nõ pixõ nõ chakafai,” ixõ shinãifono ãto ferotaifi afara piyamakãfe. Akka mã ãto ferotaifi piaino mato õikakĩ ãto shinã mẽra shinãchakatirofo. Nãskaxõ anã Jesús Ifofasharatirofoma.  
\v 21 Mã nami piaito fetsafãfe mato õikĩ shinãchakatirofo. Nãskaxõ anã Jesús Ifofatirofoma. Nãskakẽ ãto ferotaifi afaa piyamakãfe. Askatari mã mãmã ayaito õikakĩ fetsafãfe shinãchakatirofo. Nãskaxõ anã Jesús Ifofatirofoma. Nãskakẽ anã ayayamakãfe. Afara fetsafori akĩ mã ato shinãchakamatiro, nãskakẽ xatekãfe Jesús Ifofanõfo.  
\v 22 Nãskaxõ mã shinãi keskara mares shinãkãfe. Epa Nios fisti mã yoitiro. Mã Nios chanĩmara faxõ mãto shinã mẽra shinãsharakĩ mã iskafatiro: “Chanĩma, ẽ akai keskara chakama,” ixõ shinãkĩ mãto shinã mẽra mã inimatiro.  
\v 23 Nãskaxõ fẽtsa Niospa meka tãpisharaxoma shinãtiro iskafakĩ: “Nafo pikĩ ẽ chakafairakaiti,” ixõ shinãfikĩ akairi pikĩ chakafatiro. Afara fetsafori shinãkĩ iskafakĩ: “Nafo akĩ ẽ chakafairakaiti,” ixõ shinãkĩ akairi akĩ chakafatiro. 
\c 15  
\s1 Nã mã apaiyai keskara fatama fẽtsa apaia keskara axokãfe 
\p  
\v 1-2 Jesús chanĩmara fakõixõ a Niospa meka tãpisharafoma nõ ato fenãmãshta yoitiro ato fe feratenãtama. Nõa nõ apaiyai keskara fisti nõ atiroma. Nã Jesús chanĩmara faa fetsafori noikĩ nõ ato axotiro ãto shinã mẽra inimamakĩ shara inõfo Jesús Ifo sharafakõinõfo.  
\v 3 Shinãkapo. Nõko Ifo Cristo aafi apaiyai keskara fisti shinãpaonima. Aõnoa Nios yoimisto kirika keneni iskafakĩ: “Epa, ẽ mia nikakõia. Akka mia chakafakakĩ eari chakafakani,” ixõ kirika keneni Cristoõnoa yoikĩ.  
\v 4 Niospa meka kenepakenifo noko tãpimaxikakĩ. Ãfe meka nõ chanĩmara faxõ afara chaka finõkõixõ nõ tenekõinõ. Ãfe mekaõxõ nõko õiti nõ fepeaxõ nõ tãpitiro nõko Ifo fe nai mẽra chipo nõ afe ipanaka anã afara chakapa noko omiskõimanõma.  
\v 5 Noko afara chakapa afeskarafafiaito Epa Niospa noko mitsisfamatiro nõ tenenõ nõko õiti fepeaxokĩ. Nãskakẽ mã Jesús Ifofasharaino mato nãnori fisti shinãmatiro.  
\v 6 Nãskakẽ nõko Ifo Jesucristo ãfe Apa nõ yoisharai. Nãskax nã meka fistipa nõ mekai keskarakõi Epa Nios yoisharakĩ nã yora fisti keskara. 
\s1 Niospa meka shara judeofoma yoinifo 
\p  
\v 7 Cristo nokoki inimakĩ noko ifini afe yorafo nõ inõ. Nãskakẽ mãri fetsafo fe yõra faatanãkãfe. Mã askaino Niosnoa shinãsharatirofo.  
\v 8 Ẽ mato yoinõ Jesucristo mai ano oni judeofo ato yonoxomis keskara ikiyoi. Niospa nõko xinifo yoiyoni keskara Cristo oni. Nãskakẽ Niospa nõko xinifo yoini keskara chanĩmakõikẽ nõ tãpitiro.  
\v 9 Akka judeofomaõnoaxri Jesús oni. Nãfãferi chanĩmara faxõ yoixikani iskafakakĩ: “Aicho, Epa Niospa noko noikĩ ãfe Fake nokoki nĩchini. Epa Nios shara,” ixõ yoixikani. Nãnori David kirika keneni iskafakĩ: 
\pi1 Epa Niosi, ẽ mĩõnoa ato yoisharaxii, a judeofoma. Ẽ mia fanãki, “Aicho, Nios shara,” ẽ mia faxii, 
\m ixõ kirika keneni.  
\v 10 Anã Niospa meka yoikĩ kirika keneni iskafakĩ: 
\pi1 Judeofoma nã judeofo fe inima faatanãkãfe. Mãri ato fe Niospa yora ixii, 
\m ixõ kirika keneni.  
\v 11 Anã kirika keneni iskafakĩ: 
\pi1 Maitio anoafãfe, nõko Ifoõnoa yoisharakãfe. Keyokõi nã maifo tii ikafãfe nõko Ifo fanãkãfe, 
\m ixõ kirika keneni.  
\v 12 Isaías aatori iskafakĩ kirika keneni: 
\pi1 Nõko xini Isaí ãfe fena na maitio ikafãfe ãto xanĩfo ixii. Shinãxikani iskafakakĩ: “Nã fistichi Nios ika ano noko ifitiro nõ afe ĩpaxanõ, nõ anã nanakama,” ixõ shinãxikani, 
\m ixõ Isaías kirika keneni Cristoõnoa yoikĩ. 
\p  
\v 13 Epa Nios chanĩmara faxõ nõko Ifo oxiaino nõ manai. Epa Niospa noko shinãmani iskafakĩ: “Chanĩma, nõko Ifo oxii noko ifixiki nõ afe ĩpaxanõ,” ixõ noko shinãmani. Nãskakẽ ẽ mato kĩfixomis Niospa mato inimamanõ. Askatari mãto shinã mẽra mato shinãmasharai mã afeskatama mã isharanõ mato axosharai. Mã Nios chanĩmara faano ãfe Yõshi Sharapa mato axosharai mã isharanõ. 
\s1 Pablo Jesucristoõnoa judeofoma ato yoini 
\p  
\v 14 Efe yora mĩshtichi, mẽ tãpia mã noinã faatanãito Jesúsnoa mã tãpisharai mã yoinõnãsharatiro.  
\v 15-16 Niospa ea noikĩ ea katoni Jesucristo ãfe yonomati ẽ inõ, ãfe meka shara ẽ mato tãpimanõ. Nãskakẽ ẽ ranotama anã aõnoa ẽ mato shinãmasharai kirika kenekĩ. Akka Niospa ea nĩchini judeofoma ẽ ato Jesús Ifofamanõ. Mã Jesús Ifo sharafaxõ, mãto chaka mã soax a keskara shara mã inõ. Nãskax Epa Nios matoki inimakõi. 
\p  
\v 17 Nãskakẽ ẽ inimakõi nõko Ifo Jesucristomãi ea katonikẽ Epa Nios ẽ yonoxonõ judeofoma Niospa meka ẽ ato yoinõ.  
\v 18 Ẽa ẽ ato yoima. Cristo ea shinãmanaino ẽ ato yoimis. Nãskakẽ a ẽ ato yoimis keskara Epa Niosnoa nikakõimisfo.  
\v 19 Ãfe Yõshi Sharapa ea shinãmanaino a tsõa atiroma keskara ẽ ato õimana. Nã maitio Jerusalén anoafo yoita Ilírico anoafori ẽ ato yoini. Keyokõi nã meka shara Cristoõnoa ẽ ato yoifofãsafamis.  
\v 20 Ẽkai a yora fetsafãfe Cristoõnoa yoimisfo ari ẽ kapaimisma. A Cristoõnoa nikamisfoma ano ẽ kapaimis ato tãpimaxiki.  
\v 21 Nãnori Isaías Niospa meka keneni iskafakĩ: 
\pi1 Tsõa aõnoa nikayomisma chipo nikakaxõ tãpinõfo, 
\m ixõ keneni. 
\s1 Pablo Roma ano kapaikĩ shinãni 
\p  
\v 22 Akka ẽ mato ari kapaimis. Ẽ mato õikapaifi ẽ kamisma. Afara fẽtsa ea katimafamis.  
\v 23 Nãskafixõ iskaratĩa Jesúsnoa mẽ ato yoikĩ mẽ mitoa. Nãskax mẽ itipinĩa mato ari kaxiki. Mẽ xini ichapa amis mato õikapaikĩ. Mẽxotaima ẽ mato ari kapaimis.  
\v 24 Ẽ España ari kai ẽ mato ano nẽteyoxii mato fe mekaxiki nõ yoinõnãsharaxiki. Mato anoax ẽ kaito a ẽ yopai ea inãxikãfe ẽ España ari nokosharanõ.  
\v 25 Akka iskaratĩa ẽ Jerusalén ano kayoikai. Jesús chanĩmara faafãfe ea nĩchikani a Jerusalén anoxõ Jesús chanĩmara faafo ẽ ato kori inãnõ.  
\v 26 Macedonia anoxõ a Jesús chanĩmara faafãfe Jerusalén anoafo a Jesús chanĩmara faafo ato kori inãpainifo. Acaya anoxori Jesús chanĩmara fakaxõ ato kori inãpainifo a afaamaisfo. Nãskakẽ ea kori inãnifo ẽ ato inãtanõ.  
\v 27 Inimayanã ato inãpaikakĩ ato yoinifo iskafakakĩ: “Jerusalén anoax Jesúsnoa yoimisfo nokoki fenifo Jesúsnoa meka shara noko yoi fekani. Akka nokoki feyamanifono na meka shara nõ nikakeranama. Nãskaxõ nõ afarayaxõ nõ ato inãpai ato sharafakĩ,” ixõ yoinifo.  
\v 28 Nãskata ẽ ato kori inãfainikai Jerusalén anoax España ari kakĩ. Nãskaxori ẽ Roma anoa ẽ mato õifainikai.  
\v 29 Mẽ tãpia ẽ mato ano nokoxõ nõko Ifoxõ ẽ mato yoisharaxii mãto shinã mẽra mã inimanõ. 
\p  
\v 30 Efe yora mĩshtichi, meka fetsari ẽ mato yoipai. Mã nõko Ifo Jesucristo noixõ ãfe Yõshi Sharaõxõ ea noikãfe. Ea Nios kĩfixokãfe ẽ yonosharaxonõ afanã ea afeska fanõma.  
\v 31 Ea kĩfixokãfe Epa Niospa ea kexenõ Judea anoafãfe a Jesús chanĩmara faafãfema ea afeska fanõfoma. Ea kĩfixokãfe a Jesús chanĩmara faifo Jerusalén anoafo ẽ ato kori inãino inimakõikai finõfo.  
\v 32 Mẽ ato inãkĩ mitoano Epa Niospa ea nĩchiano ẽ inimayanã matoki nokoxinõ. Nãskata nõ yoinõnãsharaxinõ nõko õiti mẽra inimayanã.  
\v 33 Epa Nios mato fe inõ. Akka Niospa noko imasharatiro nõ isharanõ. 
\c 16  
\s1 Pablo ato meka fomani 
\p  
\v 1-2 Nofe yora Febe, Cencrea anoax matoki nokokẽ sharafakãfe. Nã kẽromã nõko Ifo Ifofasharakõimis. Cencrea anoxõ a Nios Ifofaafo ato sharafaxomis. Yora fetsafori ato afara yopaito axokãfe. 
\p  
\v 3 Aquila ãfe ãfi Prisca nã rafe efeta Jesucristo yonosharaxomisfo. Ea ato yoisharaxokãfe.  
\v 4 Yorafãfe ea retepaiyaifãfe nã rafeta ea kexesharamisfo ea reteyamanõfo. Ẽfe kaifomari nã Jesús chanĩmara faafãfe ichanãkaxõ yoimisfo iskafakĩ: “Aquila yafi Prisca nõ atoki inimasharakõi,” ixõ yoimisfo.  
\v 5 Ãto pexe anoaxri ichanãkaxõ ea ato yoisharaxokãfe. Efe yorakõiri Epeneto ea yoisharaxokãfe. Nãatofi Asia anoxõ Cristo chanĩmara fakĩ taefaniki.  
\v 6 Maríari mato yonosharaxomiski aari ea yoisharaxokãfe.  
\v 7 Efe yora raferi Andrónico yafi Junias ea ato yoisharaxokãfe. Nã rafe efe karaxa mẽra ikinifo. A Jesúsnoa yoimisfãfe a rafeõnoa yoisharamisfo. Ẽ Jesucristo chanĩmara famatai nã rafeta chanĩmara fakĩ taefanifo. 
\p  
\v 8 Ampliatori ẽ noishara nãatomãi nõko Ifo Ifofasharakõiaito. Aari ea yoisharaxokãfe.  
\v 9 Urbano efeta Jesucristo yonoxomis. Nãrifi ea yoisharaxokãfe. Efe yorashtari Estaquis nãri ea yoisharaxokãfe.  
\v 10 Apeles feronãfake sharakõi. Epa Nios akiki inimamis. Nãatori Jesucristo yonosharaxomis. Nãri ea yoisharaxokãfe. Aristóbulo yafi afe yorafori ea ato yoisharaxokãfe.  
\v 11 Efe yorashtari Herodión ea yoisharaxokãfe. Narciso yafi afe yorafãferi nõko Ifo chanĩmara faafo, afori ea ato yoisharaxokãfe.  
\v 12 Trifena yafi Trifosari ea ato yoisharaxokãfe. Nã kẽro rafeta nõko Ifo yonosharaxomisfo. Nofe yora Pérsidari ea yoisharaxokãfe. Nã kẽromãri nõko Ifo yonosharaxomiski.  
\v 13 Nõko Ifãfe Rufori katoni afe yora inõ. Nã Rufo ãfe afa ẽfe efakõi keskara. Ea kexesharamis. Nã raferi ea ato yoisharaxokãfe.  
\v 14 Asíncrito ikaino Flegonte ikaino Hermas ikaino Patrobas ikaino Hermes ikaino nãfãfe nõko Ifo chanĩmara faafo. A fetsafãferi nõko Ifo chanĩmara fakanax ato fe ikafori ea ato yoisharaxokãfe.  
\v 15 Filólogo ikaino Julia ikaino Nereo ikaino ãfe poi Olimpas ikaino keyokõi a nõko Ifo chanĩmara fakanax ato fe ikafori ea ato yoisharaxokãfe. 
\p  
\v 16 Keyokõi ichanãkanax yoinõnã faatanãsharakãfe noinõnãsharaxikakĩ. Nã maitio ikafãfe a Cristo Ifofaafãfe mato yoisharapaikani. 
\p  
\v 17 Efe yora mĩshtichi, ẽ mato yoinõ nikakapo. Mato fe ichanãmis fetsafãfe mato afara chakafamapaikani anã mã Jesúsnoa shinãnõma. Akka nõ mato mẽstekõi tãpimanai keskara nãfãfe mato anori yoikanima. Akka fakirira mato yoipaikani anã mã Jesús shinãnõma. Nãskax ato fe rafeyamakãfe, mato pãratirofokĩ.  
\v 18 Afãfekai nõko Ifo Cristoõxõ yoimisfoma. Nãfãfe afara fipaiyaifo fistis shinãmisfo. Niospa meka tãpisharafoma ãto meka fistiõxõ ato pãrapaikani ato anorima shinãmaxikakĩ.  
\v 19 Keyokõichi mã nikafo nõko Ifo mã Ifofasharakõikẽ. Nãskakẽ ẽ matoki inimakõini. Afara sharafoõnoa tãpikõikãfe. Mã afara chakaõnoa tãpiyamakãfe. Afoõnoa shinãyamakãfe.  
\v 20 Epa Niospa mato imasharatiro mã isharanõ. Nãato Satanás mato nãmã potai anã mato afeskafanõma. Nõko Ifo Jesucristo mato sharafaxopainõ. 
\p  
\v 21 Nã Timoteo efeta Jesús yonoxomisto mato mekashara fomai. Askatari Lucio ikaino Jasón ikaino Sosípater ikaino nãfãferi mato mekashara fomakani. Nãfo efe yorakõifo. 
\p  
\v 22 Nã Terciori mato mekashara fomai. Nãato ea kirika kenexona. 
\p  
\v 23 Gayopa pexe mẽra ẽ ikẽ ea kexemis. Jesús chanĩmara faa fetsafori Gayopa pexe mẽranoax ichanãmisfo. Nãfãferi mato mekashara fomakani. Na Erasto pexe rasi anoa ato kori kexexomisto mato mekashara fomai. Askatari nofe yora fetsari Cuarto nãatori mato mekashara fomai. 
\p  
\v 24 Nõko Ifo Jesucristo mato noikĩ mato sharafanõ. Askapainõ. 
\s1 Mã ato yoikĩ enekĩ Niosnoa ato yoisharani 
\p  
\v 25-26 Epa Niospa mato kexesharanõ. Ẽ Jesucristoõnoa mato yoimis keskara ãfe shinãmã mato shinãmatiro mã Ifofasharanõ. A iyopaonifãfekai tsõa Jesucristoõnoa tãpiyopaonifoma. Akka iskaratĩa keyokõichi mã tãpiafo. Epa Niospa nã nipanakato noko nĩchini Jesucristoõnoa nõ ato yoinõ. A ixiainoa Epa Niospa ato yoini nãnorikõi kirika kenenifo. Nã maitio ikafãfe Jesús chanĩmara fayanã nikasharatirofo. 
\p  
\v 27 Nõko Ifo Jesucristoxõ keyokõichi Niosnoa yoisharapakenakafo. Nõko Nios fistichi keyokõi tãpikõia. Askapainõ. 
\p Nã tii ẽ mato yoi.