\id HEB - Yaminahua NT -Peru 2008 (DBL -2013) 
\h HEBREOS 
\toc1 Jesúsnoa Yoikĩ Fẽtsa Hebreofo Kirika Kenexõ Fomani 
\toc2 Hebreos 
\toc3 He. 
\mt1 Jesúsnoa Yoikĩ Fẽtsa Hebreofo Kirika Kenexõ Fomani 
\c 1  
\s1 Jesús ãfe Apaõxõ yoini. Nãskakẽ nõ tãpitiro afe keskaramãki 
\p  
\v 1 Efe yora mĩshtichi, ẽ mato kirika kenexõ fomai mã tãpinõ Jesúsnoa. Taeyoi Epa Niospa ãfe meka nõko xinifo israelifo yoipaoni mẽxotaima. Ãfe ãjiriõnoa ato yoipaoni. Askatari ãfe namapa ato yoipaoni. Askatari ãfe meka yoimisfoxõ ato yoipaoni.  
\v 2 Akka iskaratĩa noko yoia ãfe Fakeoxõ. Nãskakẽ nõ tãpitiro Nios afe keskaramãki. Ãfe Fakeoxõ keyokõi nai mẽranoafoya mai anoafoyari onifani. Nãskafata ãfe Fake katoni nai mẽranoafoya mai anoafoyari nõko xanĩfo finakõia inõ.  
\v 3 Nãfi sharafinakõiaki Apa Nios keskarakõi. Apa Nios afe keskaramãki noko õimani. Nãato keyokõi kexesharamis ãfe mekasharaõxõ. Askatari nokoõnoax nani nõko chaka noko soaxoxiki a keskara shara noko õi. Nãskakẽ nõko chaka anã shinãima. Nãskata mã otoax nai mẽra kani Apa fe xanĩfokõi ixiki. 
\s1 Niospa ãfe ãjirifo Jesús ato finõkõia 
\p  
\v 4 Nãskakẽ nõ tãpitiro Niospa Fãke ãjirifo ato finõkõia. Nãskax Niospa Fake xanĩfokõi Jesús.  
\v 5 Akka Niospakai ãfe ãjirifo yoikĩ iskafamisma: 
\pi1 Mãfi ẽfe Fakekõifokĩ. Ẽ mãto Epaki, 
\m ato famisma. Akka ãfe Fake fisti yoikĩ iskafani: 
\pi1 Mĩ ẽfe Fakekõi. Nãskakẽ mĩ fisti ãto xanĩfo finakõia ipanakaki, 
\m ixõ yoini.  
\v 6 Nãskaxõ ãfe Fakekõi mai ano nĩchini. Nãskata ãfe ãjirifo yoini iskafakĩ: 
\pi1 Keyokõichi ẽfe Fake noikõikãfe. “Mĩ fãsi sharakõi,” 
\m ixõ yoikãfe.  
\v 7 Nãskata ãfe ãjirifoõnoa yoikĩ iskafani: 
\pi1 Ẽfe ãjirifo oa nefe koshi katiro keskara ẽ fai, ẽfe meka yoinõfo. Nãfori oa chii xoisai keskarafo. Nãskakẽ nã ẽ ato yoiai keskafakĩ afara arisafatirofo, 
\m ixõ Niospa yoini.  
\v 8 Akka afianã ãfe Fakeõnoa yoikĩ iskafani: 
\pi1 Mĩ ea keskarari. Mĩri mĩ Nioskõi. Mĩ ãto xanĩfokõi ipanaka. Mĩ keyokõi ĩkikõisharapakenaka.  
\v 9 Mĩ afara sharafo noikõimis, nã afara chakafo noikaspayanã. Nãskakẽ ẽ mia katoni mĩ ãto xanĩfo inõ. Akka ãjirifo ẽ ato inimamai. Akka ẽ mia inimamakõi, 
\m ixõ yoini.  
\v 10 Askata anã yoini, 
\pi1 Mĩri ea keskarakõi. Mĩ ãto xanĩfokõi. Afaa oniyamatai mai yafi nai mĩ onifakĩ taefani.  
\v 11 Nãskakẽ nãfo keyokõi mitokomexii. Akka mĩ fisti keyonakama. Nã rapati mã chapoax keyotiro keskai mai fe nai keyoxii.  
\v 12 Rapati chapokẽ potatirofo fetsa fena shara fixikakĩ. Nãskarifiakĩ mai fe nai anã sharakẽma mĩ anã mai yafi nai pãofakĩ keyotiro. Anã fenashara faxiki fenashara inõfo. Akka mĩ fetsatiroma. Mĩ fisti ipanaka, 
\m ixõ Epa Niospa ãfe Fake yoini.  
\v 13 Niospakai ãfe ãjirifo yoikĩ iskafamisma: 
\pi1 Mã efe xanĩfo ikikai efe ketaxamei. Tsaokãfe, 
\m ixokai yoimisma. Akka ãfe Fake fisti yoini iskafakĩ: 
\pi1 Mĩ efe xanĩfokõi ikano nã mia noikaspaifãfe anã mia afeska fatirofoma mĩmãi keyokõi ato ĩkikẽ. Nã mia noikaspaifo mĩ ato ikĩxii, ẽ mia askafaino mĩ efe xanĩfokõi ixii, 
\m ixõ yoini.  
\v 14 Akka Epa Niospa ãfe ãjirifo yoini noko kexesharanõfo. Fatorafãferi Jesús Ifofaafomãkĩ afe ipaxakakĩ. Nãskakẽ Niospa ãfe ãjirifo yoini a Ifofaafo kexesharanõfo. 
\p Nãskakẽ nõ tãpia ãjirifo Jesús finõkõia. 
\c 2  
\s1 Jesús nokoõnoax nanixakĩ noko imapakenakakĩ. Nãskakẽ kachikiri fayamakãfe 
\p  
\v 1 Akka Cristo ãjirifo finõkõia. Nãskakẽ nã meka chanĩmakõi Niospa Fakeõnoa nõ nikasharakõitiro, na meka shara kachikiri fayamaxiki.  
\v 2 Niospa ãfe ãjirifo nĩchini ãfe meka yorafo yoitanõfo nõko xinifãfe nikasharanõfo. Akka nikasharayamaifono Niospa ato omiskõimani.  
\v 3 Akka taefakĩ Jesús yoiyoni nokoõnoax chipo naxiai, nõko chaka noko soaxoxiki nõ afe ĩpaxanõ. Nãnori ato yoiaito nikakaxõ a afe rafemisfãfe noko yoinifo. Akka nõ Jesús Ifofaino, Niospa noko ifitiro. Akka nõ nikayamaino Niospa noko ifitiroma.  
\v 4 Askatari Niospa afara fetsa fetsatapafo tsõa atiroma keskara ato ispapaoni aõxõ tãpinõfo ãfe meka chanĩmakõikẽ. Askatari ãfe Yõshi Shara ato mẽra naneni ato katoxõ nãfãfe yonokĩ fetsa fetsafakĩ yonoxonõfo. Nãskakẽ nõ Niospa meka chanĩmara fai. 
\s1 Jesucristo nono mai anoax yorakõi ikiyoi oni, feronãfakekõi askafiax Nioskõi 
\p  
\v 5 Akka Niospa ãfe ãjirifo yoikĩ iskafanima: “Na mai fena anoax mã xanĩfo ixii,” ixõ yoinima. (Nãskakẽ nõ Jesúsnoa nõ shinãmakitiroma nãmãi xanĩfofinakõikẽ.)  
\v 6 Akka na kirika kenekĩ David yoikĩ iskafani Niospa shinãmanaino: 
\pi1 Epa Niosi, keyokõi mĩ onifani. Akka nõkai afama. Nãskafekẽ mĩ noko noiyanã mĩ noko shinãmis, noko kexesharayanã.  
\v 7-8 Akka mĩ ãjirifãfe noko finõyonifo. Nãskafiano nono mai anoa mĩ noko xanĩfo ima. Nãskakẽ nã mĩ onifanifãfe noko nikakõitirofo mĩmãi noko xanĩfo imasharakẽ, 
\m ixõ keneni. Akka keyokõi nã Niospa onifanifo nõ ãto xanĩfo itiro. Tsoa fetsakai xanĩfo itiroma. Askafiano keyokõichi noko nikakanima.  
\v 9 Akka mã nõ tãpia Niospa noko noikĩ nono mai ano Jesús nĩchini yorakõi inõ. Nãskakẽ ãfe ãjirifãfe Jesús finõyonifo. Akka mã nokoõnoax nai omiskõixõ noko chaka soaxokẽ. Epa Niospa xanĩfo finakõi imani, nãskaramãi Niospa fichipaikĩ keyokõi noko noikĩ.  
\v 10 Epa Niospa keyokõi onifani aõnoax keyokõi inõfo. Nãskakẽ ãfe fakefo afe isharapakenakafo. Nãskaxõ ãfe Fake Jesús nĩchini nokoõnoax omiskõiyonõ nõ afe ĩpaxanõ. Ãfe Fake fisti nokoõnoax omiskõitiro nõko chaka noko soaxoxiki. Nãato Apa Nios ika ari noko iyoano nõ afe ipaxatiro.  
\v 11 Akka Jesús ãfe Apa Nios nãri nõko Epa. Nãskaxõ noko chaka soaxona nõ a keskara shara inõ. Nãskaxõ rãfikima noko yoikĩ iskafatiro: “Nafo ẽfe fakefo,” ixõ noko yoitiro.  
\v 12 Nã chanĩmara faafoõnoa Jesús Apa Nios yoikĩ iskafani: 
\pi1 Epa Niosi, mĩõnoa efe yorafo ẽ yoisharaxii. Nãskakẽ ato fe mĩõnoax ẽ fanãixii, 
\m ixõ yoini.  
\v 13 Nãskaxõ anã yoikĩ iskafani: 
\pi1 Epa Niosi, ẽ mia chanĩmara faaki, 
\m ixõ yoini. Nãskafata anã yoikĩ iskafani: 
\pi1 Epa Niosi, nã ea chanĩmara faafo mã mĩ ea inã ẽfe fakefo inõfo, 
\m ixõ Jesús Apa Nios yoini. Nãskarakõi keneni David. 
\p  
\v 14 Nã fakefo apa fistichi ato fake fafĩano nã yora fistiyata nã imi fistiya ikafo tsoa osiama. Nãskarifiai Jesúsri noko keskara yorakõi ipaoni. Yorakõi kãinixakĩ noko nãxoni Satanás yõshi chaka nõko ifo iyamanõ anã noko namapakenõma. Nokoõnoax Jesús naitĩa Satanás ãfe kerex xateni anã noko afeska faxima.  
\v 15 Akka Jesús nokoõnoax nayoamano yorafo nõ naira ikax ratekõipaonifo. Askafiano mã nokoõnoax Jesús naxõ noko chaka soaxona afe ĩpaxanõfo. Nãskakẽ napai nõ anã ratetiroma.  
\v 16 Akka mã nõ tãpia Jesúskai onima ãfe ãjirifo afara ato axoyoi. Askatamaroko Abraham ãfe fenafo nã chanĩmara faafo, Abraham chanĩmara fapaoni keskafakĩ chanĩmara faifono ato afara axosharayoi oni.  
\v 17 Akka Jesús noko keskara yorakõi ini. Nãskakẽ nã nõ meemis keskarari arifi meepaoni. Yorafãfe noikaspaifono meepaoni paekõi. Askatari mekafaifono, askatari chakafamapaiyaifono, meepaoni paekõi. Nãskakẽ nokoõnoa shinãi. Noko potaxikima. Nãskakẽ Epa Nios noko kĩfixomis noko imasharanõ. Akka nã Jesús nokoõnoax nani nõko chaka noko soaxoxiki. Nãskakẽ noko Apa Nios kĩfixotiro iskafakĩ: “Epa Niosi, ẽ ato nãxonikĩ ato chaka soaxõfe nã ea chanĩmara faifo,” ixõ Apa yoitiro. Nãskaxõ noko Epa Nios kĩfixomis xanĩfokõi itiro.  
\v 18 Satanás Jesús chakafamapaini. Akka Jesús omiskõifikĩ afaa chakafanima. Nãskakẽ nokori Satanás afara chakafamapaiyaito Jesús noko axosharatiro nõ afaa chakafayamanõ. 
\c 3  
\s1 Jesús Moisés finõkõia 
\p  
\v 1 Efe yora mĩshtichi, Epa Niospa mato katoni ãfe Fakekõifo mã inõ, nãskaxri mã afe xanĩfo inõ. Niospa Jesús nĩchini nokoõnoax nanõ. Akka nãatori Apa Nios noko kĩfixomis. Akka a ato Nios kĩfixomisfo Jesús ato finõkõia. Nãskakẽ Jesús shinãsharakõikãfe.  
\v 2 Akka a Niospa Jesús yoini keskara, nãskara asharakõini. Nãskatari Niospa Moisés katoni israelifo Egipto mai anoa ato ifinõ, askatari ãfe meka shara ato yoinõ. Nã Niospa yoini keskarari Moisés asharakõini.  
\v 3 Akka Moisésnoa yoisharafitirofono, askatamaroko Jesúsnoa yoisharakõitirofo. Nã pexe sharaõnoa yoisharatirofono, askatamaroko nã pexe famisnoa yoisharakõitirofo. Nãskarifiakĩ Moisésnoa yoisharafitirofono akka Jesúsnoaroko yoikĩ finasharakõitirofo.  
\v 4 Ãa pexe itiroma. Akka nã pexe famisto atiro pexesharafakĩ. Nãskarifiakĩ Epa Niospa keyokõi onifani.  
\v 5 Akka Moisés Epa Niospa ãfe yonomati ini. Niospa yoini keskafakĩ, nãskarakõi ani. Ãfe kaifo israelifo ato yoipaoni Niospa meka. Askatari ato kexesharapaoni. Askatari Egipto anoa ato ifixõ ato iyoni. Nã Moisés apaoni keskafakĩ õikĩ keyokõichi tãpikõitirofo Epa Niospa ãfe Fake nĩchiai afe yorafo ichapakõi ifinõ nai mẽra afe ĩpaxanõfo.  
\v 6 Akka Jesúskai Epa Niospa ãfe yonomatima. Ãfe Fakekõi. Nãskakẽ afe yorafãfe ãto Ifokõi. Akka tsoamãki afe yorafo ẽ mato yoinõ. Nõ Jesús Ifofaxõ a noko yoiyoni keskafakĩ nõ manasharai nã anã oaitĩa, nõ kachikiri fayamax nõ afe yorakõi nõ iki. 
\s1 Niospa fakefo aõnoax inimakõitirofo anã ãto õiti fekaxtenõma 
\p  
\v 7-8 Akka Niospa Yõshi Sharapa yoikĩ iskafani: 
\pi1 Epa Niospa mato yoiai keskafakĩ nikasharakãfe. Mãto õiti kerexfayamakãfe Niospa meka nikakaspakĩ. Mãto xinifo keskara iyamakãfe. Mãto xinifo ẽ ifini Egipto anoa. Ẽ ato ififinino tsõa istoma anoxõ ea nikasharanifoma. Askakimaroko Jesús mato yoiai keskara nikasharakõikãfe.  
\v 9 Nã tsõa istoma anoxõ mãto xinifãfe ea nikakaspapaonifo nã tsõa õiyomisma ẽfe yonoshara ẽ ato ispafiaino. Ano afaamano a piaifo ẽ ato inãpaoni. Askatari ano fakamano, ẽ ato inãpaoni. Ẽ ato xinia ranã askafafiaino ea nikakaspapaonifo.  
\v 10 Nãskakẽ ẽ atoki õitifishkini. Nãskakẽ ẽ yoini iskafakĩ: “Ea nikatamaroko ãto õiti mẽraxõ afara chaka shinãmisfo. A ẽ ato shinãmapaiyai keskarakai tsõa nikafoma.”  
\v 11 Nãskakẽ ẽ atoki õitifishkikĩ ẽ atoõnoa yoini iskafakĩ: “Na israelifãfe ea nikakaspakani. Nãskakẽ a ẽ ato inimamapaiyai keskafakĩ ẽ ato axopakenakama,” 
\m ixõ Epa Niospa nõko xinifoõnoa yoini. 
\p  
\v 12 Efe yora mĩshtichi, õisharakãfe. Nõko xinifo keskara iyamakãfe. Mãto shinã mẽraxõ mã Jesús chanĩmara fayamax chakakõi mã itiro. Mã askaikai nã Nios nĩpanakãfe mã ipanakama.  
\v 13 Askatamaroko pena tii yoinõnãsharakĩ inimama faatanãkãfe nõko Ifoxõ shinãsharakõixikakĩ. Afara chakafãfe noko pãratirofoki nõ chakafanõ. Akka nõ nikaxõ nõ anã shinãsharatiroma. Nõko õiti chakakõi itiro. Nãskakẽ ato nikayamakãfe.  
\v 14 Akka nõ taefakĩ Jesús chanĩmara fakõini keskafakĩ eneyamax nõ afe ipaxatiro.  
\v 15 Akka nã kirika keneano iskakĩ ẽ mato yoinõ, 
\pi1 Epa Niospa mato yoiai keskara fisti nikasharafafãikãfe. Mãto xinifãfe Epa Nios nikakaspakakĩ ãto õiti kerexkõi fapaonifo. Nãskakẽ ato keskara iyamakãfe. Mãto õiti kerex fayamakãfe. Nãskax nikayospa iyamakãfe, 
\m ixõ Niospa meka yoikĩ kenenifo. 
\p  
\v 16 Akka, ¿tsoafo Niospa tsekanimẽ Egipto mai anoa ãfe meka nikakaspakakĩ kachikiri faifono? Akka keyokõi nõko xinifo Moisés Egipto mai anoa iyoni. Nãfãfe Nios nikakaspapaonifo.  
\v 17 Akka, ¿tsoafoki Epa Nios õitifishkinimẽ cuarenta xinia mã akax? Nã nikakaspayanã afara chakafaifoki ini. Nãskakẽ Epa Niospa tsõa istoma anoxõ keyokõi ato namapakeni.  
\v 18 Akka, ¿tsoafo Niospa yoinimẽ iskafakĩ? “A ẽ mato inimamapaiyai keskafakĩ ẽ anã askafapanakama,” ixõ yoini. Akka nã nikayospafo ato yoikĩ askafani.  
\v 19 Akka Epa Nioskai tsõa chanĩmara fanima. Nãskakanax a Niospa ato imapaiyai ano tsoa ikinima. Nãskakẽ tsõa anoxõ tenenima inimayanã. 
\c 4  
\p  
\v 1 Akka Epa Niospa noko yoiyoni iskafakĩ: “Mã ea Ifofaino ẽ mato anã inimamatiro. Akka mã ea Ifofayamakẽ ẽ mato inimamatiroma,” ixõ noko yoiniki. Nãskakẽ keyokõichi nõ Ifofanõkãfe.  
\v 2 Epa Niospa noko yoia: “Ẽ mato ifipai,” noko fani. Nãskarifakĩ Epa Niospa nõko xinifo yoikĩ iskafani: “Ẽ mato ifipai mato inimamapaixikĩ anã mã fekaxtenõma,” ixõ ato yoini. Ato askafafiaino tsõakai nikasharanima. Kaxpakõi Epa Niospa ato yoini.  
\v 3 Akka Niospa Moisés shinãmanaino iskafakĩ kirikaki kenekĩ yoini: 
\pi1 Ea nikayamaifono ẽ atoki õitifishkikĩ. Nãskakẽ ẽ ato fãsikõi yoia iskafakĩ: “Mã ea nikayamaino ẽ mato mai shara fetsa ano imapakenakama anoax mã isharanõ,” 
\m ixõ ato yoini. Akka Epa Niospa keyokõi onifani. Mã keyokõi askafakĩ fetsaxõ teneni. Nãskafakĩri Niospa fichipai afe yorafo isharanõfo anã fekaxteyamanõfo. Iskaratĩari afe yorafo isharamapai afe isharapakexanõfo. Akka nõa nõ Nios chanĩmara faino, Epa Niospa noko ifisharai nõ inimapakexanõfo.  
\v 4 Akka kirikaki Moisés keneni pena tenetiõnoa yoikĩ. Iskafakĩ keneni: 
\pi1 Seis nia yonokĩ Epa Niospa keyokõi onifani. Nãskaxõ pena fisti teneni, 
\m ixõ keneni.  
\v 5 Askatari anã kirikaki keneni, iskafakĩ yoikĩ: 
\pi1 Efe isharapakenakafoma, 
\m ixõ kirikaki kenekĩ yoini. 
\p  
\v 6 Askafiano ranãri afe isharapakenakafo. Akka nã Niospa meka nikakaspaifo afe ipanakafoma.  
\v 7 Nãskakẽ Niospa shinãmanainori chipo David kirika kenekĩ yoini iskafakĩ: 
\pi1 Iskaratĩa Niospa meka nikakĩ mãto shinãmã shinãsharakãfe. Anorima shinãkakima, 
\m ixõ David yoini. 
\p  
\v 8 Mã Moisés naano, Josué israelifo iyoni Canaán mai ano isharanõfo. Nãskaifono Niospa iskafakĩ yoini: “Nã ea Ifofaafo efe nai mẽra isharapakenakafo,” ixõ yoini.  
\v 9 Nãskakẽ mã nõ tãpia nõ Ifofaax, nõ afe isharapakenaka. Epa Niospa afe yorafo inimamasharapai isharapakexanõfo.  
\v 10 Epa Niospa keyokõi onifaxõ inimayanã teneni. Nãskarifiai nõ Epa Nios ano kaax a nõ iyopaoni keskara nõ anã itiroma, Niospa noko inimamasharakõiaino.  
\v 11 Akka fekaxfiano nõ Nios Ifofakõitiro afe isharapakexakĩ. Akka nõko xinifãfe nikayamaito Epa Niospa ato mai shara inãpaifikĩ ato inãnima. Nãskakẽ nõri ato keskara ipaima. 
\p  
\v 12 Epa Nios nipanaka. Nãskarifiai ãfe meka keyonakama, mitsisipakõi. Akka keno ikikõichi nami potexõ ãfe xaki mẽra nõ õitiro. Nãskarifiai Epa Niospa meka fãsi finakõia. Ãfe meka shara nõ mẽra ikano aõxõ nõ tãpitiro nõ shara ikamãki askayamai nõ chakamãki.  
\v 13 Epa Niospa keyokõi tãpia nõ õtatiroma. A nõ afara shinãxõ nõ amis keskara keyokõi tãpikõia. Akka nõri tãpia a nõ amis keskara. Nãskakẽ nõ Nios pãratiroma. 
\s1 A Nios ato kĩfixomisfo Jesús ato finõkõia 
\p  
\v 14 Akka Jesúsfi Niospa Fakekĩ. Askatari noko Nios kĩfixomis. Nãatofi a Nios ato kĩfixomisfo finõkõiaki. Nãskax nai mẽra Nios ano kani. Nãskakẽ nõ kachikiri fatiroma nikakõisharayanã.  
\v 15 Nãatori meemis a Satanás noko afara chakafamapaiyai keskara. Nãskakẽ nãato tãpia a nõ meemis keskara fekaxkõi. Akka Satanás Jesúsri afara chakafamapaini. Nãskafekẽ Jesús nikanima. Nãskakẽ nokori axotiro.  
\v 16 Nãskakẽ nõ Nioski ranokima nã nõ yoipaiyai keskara nõ yoitiro. Nõ yoiaito Niospa noko noikĩ noko afara axosharatiro. 
\c 5  
\p  
\v 1 Ẽ mato yoinõ afeskax ato Nios kĩfixomis xanĩfo itirofomãki. Nã Niospa ato katoato nãato noko kĩfixonõ. Nã Niospa katoa noko keskara yorari itiro. Nãfi Nios noko kĩfixomis xanĩfo itiro. Nãskakẽ yorafãfe Epa Nios aicho fakakĩ a Nios ato kĩfixomisto ãfe xanĩfo afara inãmis atori Nios inãnõ. Askatari yorafãfe ãto chaka soapaikakĩ nã yoinã ina fexomisfo retexõ ato koofaxonõ Epa Niospa ãto chaka ato soaxonõ.  
\v 2 Akka nãri noko keskarari nãatori afara chakafatiro. Nãskakẽ tsõa tãpisharayamakĩ, shinãsharakima afara chakafaino, nã xanĩfãfe tanaima isharaxõ ato axosharatiro.  
\v 3 Nãskaxõ yorafãfe nã yoinã inafo inãino nãato retexõ koofakĩ Epa Nios ato kĩfixomis Epa Niospa ãto chaka ato soaxonõ. Nãskatari ãri ãfe yoinã ina retexõ koofamis ari Epa Niospa chaka soaxonõ, a noko axomis keskafakĩ.  
\v 4 Akka ãkai tsoa katometiroma Nios ato kĩfixomis xanĩfo ixii. Nios fistichi ato katotiro Aarón ani keskafakĩ.  
\v 5 Nãskarifiai Cristo aari katomenima Nios ato kĩfixomis xanĩfokõi ixiki. Akka Apa Nios fistichi yoini iskafakĩ: 
\pi1 Mĩ ẽfe Fakekõi. Nãskakẽ mĩ fisti ãto xanĩfo finakõia ipanakaki, 
\m ixõ yoini.  
\v 6 Askatari anã iskafakĩ yoini: 
\pi1 Mĩfi ato Nios kĩfixomis xanĩfo ipanakaki, nã xanĩfo Melquisedec ipaoni keskara, 
\m ixõ Apa yoini. 
\p  
\v 7 Jesús nono mai ano ikax, mã chaima naxiki omiskõikõini. Nãskaxõ fãsikõi mekayanã oiaiyanã Apa kĩfini iskafakĩ: “Epa, mĩ keyokõi tãpia. Ea mĩa ifipaikĩ ea mĩa ifitiro ẽ nanõma,” ixõ yoini. Mẽxotaima nã Ãpa amapaiyai keskara fisti shinãkĩ Jesús ãfe Apa nikakõini. Nãskakẽ ãfe Ãpa tenemakõini axosharakõiyanã omiskõiaino.  
\v 8 Akka Jesús Niospa Fakekõifiax omiskõini. Omiskõifikĩ Apa nikakõini.  
\v 9 Nokoõnoax omiskõifikĩ Apa Niospa yoiai keskara nikakõini. Nãskaxõ a nikaifo ato ifipakexakĩ. Nãskax noko ifimis sharakõi imis.  
\v 10 Epa Niospa ãfe Fake Jesús katoxõ yoikĩ iskafani: “Mĩfi nã Melquisedec keskara ikikai. Nãskakẽ a ea ato kĩfixomisfãfe ãto xanĩfokõi mĩ ipanakaki ato ĩkipakexakĩ. Nãskaxõ a eõnoa ato kĩfixomisfo xanĩfofori mĩ ato finõkõinĩfofãnakĩ,” ixõ Ãpa yoini. 
\s1 Õisharakõikãfe. Mã Jesús kachikiri faa fãsi mesekõi itiroki 
\p  
\v 11 Ẽ mato yoia Epa Niospa Jesús katoa a noko Nios kĩfixomis afe xanĩfo finakõia ixii. Akka nãõnoa ẽ mato fetsa yoisharapai. Nãskakẽ ẽ mato anã yoisharatiroma mãmãi fenãmãshta tãpiaino.  
\v 12-13 Akka mã Niospa meka nikakĩ mã mã xinia ranã aka. Nãskakẽ tãpikõixõ mã ato yoikerana. Akka mãkai tãpisharama. Akka a mã taefakĩ Niosnoa mã ato yoiyoni mã mã shinãmakia. Nãskakẽ mato anã tãpimanõfo mã ato fenai. Nã fake yome chocho afiai yosiaima keskarakõifo, mã. Akka fake yomẽkai afaa piyotiroma. Nãskarifiakĩ mãri Niospa meka tãpisharaima. Nãskakẽ mã tãpiama fato sharamãkĩ fatofori chakamakĩ.  
\v 14 Akka nõ pena tii Niospa meka õifafãikĩ nõ tãpikõiax isharakõitiro mãmãi nõ tãpiax fato sharamãki, fatofori chakamãki. 
\c 6  
\p  
\v 1 Akka nõkai fakefo keskarama. Fakefãfekai afaa tãpisharafoma. Akka nõroko tãpisharakõia. Akka fetsa ẽ mato yoipai a ẽ mato yoiyomis keskara anã ẽ mato yoima. Mã nõ tãpia a nõ afara chakafamis. Nãskakẽ nõ rãfikõiyanã nõko chaka shinãmakitiro. Nãskaxõ nõ Nios Ifofaino noko chaka soaxotiro nõ afe ĩpaxanõ.  
\v 2 Mã nõ tãpia noko fẽtsa maotisafaino keyokõi tãpitirofo mã nõmãi Nios Ifofaino. Askatari nõ tãpia noko Nios kĩfixoyanã ãto mifi noko mãmãtirofo Niospa Yõshi Sharapa noko imasharanõ. Nãskatari mã nõ tãpia nõ Jesús Ifofaax nõ naax nõ anã otoxiai. Akka a Jesús nikakaspamisfo Niospa a omiskõipakenakafo mẽra ato potaxii. Nãskakẽ nãfo mã nõ tãpikõia.  
\v 3 Nãskakẽ a Niospa fichipaiyaino afara fetsafori nõ tãpitiro. 
\p  
\v 4 Nãskakẽ nõ Jesucristoõnoa meka shara nikaxõ chanĩmara faax mã naax Nios fe nõ ipaxatiro. Nãskatari Niospa Yõshi Shara noko fe iki.  
\v 5 Nãskakẽ nõ Niospa meka tãpisharakõiaino a Niospa afara shara noko yoiai nõ atiro. Askatari Niospa afara sharafo noko famapai afara sharafo nõ atiro, ãfe Yõshi Sharaõxõ.  
\v 6 Nãskakẽ keyokõi nõ afo tãpifixõ nõ Niospa Fake kachikiri faxõ chakafakĩ mekafaxõ, nõ anã Ifofatiroma mã nõmãi chakafaxõ a noko Ifimis. Anã tsõa noko ifitiroma.  
\v 7 Akka ẽ mato yoinõ nikakapo. Oi ikaino mai mechanatiro. Nãskakẽ tare anoax fanafo foaisharatiro. Nãskakẽ a tare yonomisfo inimatirofo fanafo foaisharaino Niospamãi imasharaino.  
\v 8 Akka nã tare fetsa chaka anori oi ikaino, fanasharafo foaitiroma. Moxa chakafo fisti foaitiro. Nãskakẽ koofatirofo nã fanachakafo kooi mitokomenõ. Nãskarifiakĩ fẽtsa Niospa meka shara nikafafãifikĩ Nios chakafakĩ mekafaito nã keskarafo Niospa nã omiskõipakenakafo mẽra potaxii. Nõ tare shara keskarakẽ Epa Nios nokoki inimatiro. Akka nõ tare chaka keskarakẽ Epa Nios nokoki inimatiroma. Nãskakẽ noko omiskõimaxii. 
\s1 Akka mã nõ tãpia nõ Jesús chanĩmara faax nõ isharakõitiro 
\p  
\v 9 Efe yora mĩshtichi, mẽ matoõnoa tãpisharakõia. Mãkai ato keskarama. Akka Jesús Ifofaax oa mã fãi kai keskara mã Nios ari kai.  
\v 10 Akka Epa Nios sharakõi. Afaa chaka shinãmisma. A mã sharafamis Epa Niospa tãpia, shinãmakima. Askatari mã Nios noikĩ a chanĩmara famisfo mã ato axosharamis. Nãskakẽ Epa Nios shinãmakima.  
\v 11 Akka Epa Nios kachikiri faxoma a mã akai keskararifakĩ, ato sharafakĩ mẽxotaima Ifofasharakõikãfe, “Nioski nokoaitĩa nõ afe isharapakexakĩ,” shinãkõikĩ.  
\v 12 Akka Epa Niospa meka shinãmakiyamakãfe. Epa Niospa fetsafo yoini iskafakĩ: “Mã ea Ifofakĩ mã ea manasharaito ẽ mato afara shara inãxii,” ixõ ato yoini. Nãskarifiakĩ mãri manasharakãfe, Jesús kachikiri faxoma. Mãri afara shara fixikakĩ. 
\p  
\v 13-14 Niospa nõko xini Abraham yoiyoni iskafaki: “Ẽkĩa mĩ Nios. Ea tsõa finõtiroma. Ramashara ẽ chanĩmisma. Ẽ mia yoinõ mĩ tãpisharakõinõ. Ẽ mia axosharakõikai mĩ fenafo ichapakõi inõfo. Akka mĩkai ato tanãtiroma mĩ fenafomãi ichapakõikẽ,” ixõ Niospa Abraham yoiyoni.  
\v 15 Nãskakẽ Abraham fena fenakima manakõipaoni. Nã Niospa yoiyoni keskarakõi fakĩ Abraham ãfinĩ fake fini. Ãfe fake Isaaca.  
\v 16 Akka fẽtsa noko yoikĩ iskafatiro: “Ẽ mia pãraima ẽfe xanĩfãfe mã ea õi. Nãskakẽ nã ẽ mia yoiai keskara ẽ mia axoxii,” ixõ noko yoitiro. Nãskakẽ nõ tãpitiro nokokairoko pãraito.  
\v 17 Nãskarifiakĩ Niospa noko tãpimapai ãfe meka chanĩmakõi. A noko yoiyoni keskara afeskaxõ anã fetsafatiroma. Nãskaxõ ato yoini iskafakĩ: “Ẽ Nioskõi. Tsõakai ea finõtiroma. Nãskakẽ nã ẽ mato yoiai keskafakĩ mã ea chanĩmara fatiro,” ixõ ato yoini chanĩmara fanõfo.  
\v 18 Chanĩma Niospa a noko yoiyoni keskara mã noko õimasharakõia mã nõ tãpia. Nãskakẽ noko pãratiroma. Noko yoini iskafakĩ: “Ẽfe Fake ẽ matoki nĩchixii mãto chaka mato soaxonõ mã efe ĩpaxanõ,” ixõ noko yoini. Nãskakẽ nõ chanĩmara fai nã noko yoiyoni keskara ãfe Fakeõnoax Epa Nios ano nõ afe ipaxatiro.  
\v 19 Nãskaxõ anã afaa fetsa nõ shinãtiroma. Nios makinoakai tsõa noko potatiroma. Nãskakẽ Epa Nios fe nõ ipanaka.  
\v 20 Jesús nai mẽra kani nõ aõnoax chipo kanõ. Nãrixõ xanĩfokõixõ noko Apa Nios kĩfixõfafãini Melquisedec ipaoni keskaraxõ. 
\c 7  
\s1 Nã Melquisedec yorafo Nios kĩfixomis ipaoni 
\p  
\v 1 Akka Melquisedecnoa ẽ mato yoinõ afe keskara ipaonimãki. Melquisedec xanĩfo ipaoni pexe rasi ãfe ane Salem anoax. Askatari ato Nios kĩfixomis ipaoni. Nã cuatro xanĩfofo yometso chakafo ato ĩchoxõ Abraham ãfe pia ifitani, afama mĩshtifoya oaino, nã Melquisedec Abrahamki nokoni. Nãskata Melquisedec Abraham Nios kĩfixoni axosharanõ.  
\v 2 Askafaito õikĩ Abraham Melquisedec nã afama mĩshti fitanai ranãri inãni. Nã Melquisedec ãfe ane “Asharakõimis,” famisfo. Nã Salem pexe rasi anoax xanĩfo ipaoni. Nã Salem ãfe ane “Isharakõi,” fapaonifo.  
\v 3 Nã Melquisedec ãfe epa yafi ãfe efa nõ tãpiama. Ãfe xiniforikai nõ tãpiama. Askatari nõ tãpiama a fake kãinitĩa. A nanitĩari nõ tãpiama. Nãskakẽ nõ Melquisedec shinãkĩ Niospa Fakeri nõ shinãtiro. Nãato noko Niosnoa kĩfixomis xanĩfo ipanaka. 
\p  
\v 4 Efe yora mĩshtichi, shinãkapo. Melquisedec xanĩfokõi ipaoni tsoa keskarama. Akka Abraham israelifãfe taefenai ãto xini iyopaoni. Abraham sharakõi ipaoni. Askafixõ Abraham Melquisedec afama mĩshti inãni ãfe afaayamafekẽ. Akka Melquisedec xanĩfo finakõia ini Abraham sharafiano.  
\v 5 Israeli xoko fetsafo Leví ãfe fenafo Epa Niospa katoni. Nãfãfe ãto kaifo Epa Nios kĩfixopaonifo. Nãskakẽ Moisés yoini keskafakĩ nã ato Nios kĩfixomisfo kori fisti rasi ato inãpaonifo. Askatari ãto afama mĩshtifori ato inãnifo ãto kaifãfe.  
\v 6 Akka Melquisedec Leví ãfe fenayamafiano Abraham ãfe afama mĩshtifo fetsa fetsatapafo inãni. Nãskakẽ Melquisedec Abraham yoini iskafakĩ: “Abraham, mia Niospa axosharai,” ixõ yoini.  
\v 7 Chanĩma, keyokõi nõ tãpikõia fẽtsa ato finõkõixõ ãfe mekapa ato shara fatiro. Nãskakẽ nõ tãpia Melquisedec Abraham finõkõia.  
\v 8 Nãskakẽ nã israeli xoko fetsafãfe nã Leví fenafo afama mĩshti ato inãfinifono nãfo mã nai keyonifo. Akka Melquisedec Abrahamnã afama mĩshti fini. Akka Niospa meka yoikĩ kenenifo Melquisedec iskaratĩa nia keskara.  
\v 9-10 Leví fenafãfe ãto xini Abraham ipaoni. Nãskaxõ Abraham Melquisedec afarafo inãino Levífãfe akairi inãi keskafanifo. Nõ tãpiama afetĩara nani. Nãskakẽ nia keskara nõ famis. Nã Abraham Melquisedec afarafo inãitĩa Abraham ãfe fena Leví anokai fakeama ini. Chipo Leví fakeni. Nãskakẽ nõ tãpitiro Melquisedec fistichi ãto xini Abraham yafi ato finõkõia. 
\p  
\v 11 Efe yora mĩshtichi, shinãkapo. Epa Niosxõ Moisés noko yoini keskafakĩ Leví fenafãfe noko Nios kĩfixomisfãfe noko ifitirofono Niospa ãfe Fake nĩchikeranima Apa Nios noko kĩfixomis inõ. Cristokai Leví ãfe fena Aarón keskarama. Nã Cristo Melquisedec keskarakõi.  
\v 12-14 Akka tae fenai Leví ãfe fena Aarón ini. Nã Aarón yorafo ato Nios kĩfixomis ini fetsafãfe ãto xanĩfo. Akka nõko Ifo Jesúskai Leví ãfe fenama, xoko fetsa ini. Nãskax Aarón keskarama. Akka nõko Ifo Jesús Judapa fena. Nã Levipa chipoko Judá. Akka, “Judapa yorafãfe yorafo ato Nios kĩfixomisfo itirofora,” ixõ Moisés yoinima. Askafiano Niospa ãfe Fake Jesús nĩchini yorafo ato Nios kĩfixomis inõ. Nãskatari a Moisés yoini keskara Epa Niospa fetsafani. 
\p  
\v 15 Nãskakẽ anã ẽ mato mẽstekõi yoisharapai. Iskaratĩa xafakĩakõi nõ tãpishara Nios afara fetsa yoini keskara noko Nios kĩfixomis ãfe fena Jesús, Melquisedec keskara nokoki nokoni.  
\v 16 Akka Moisés yoini keskarakõi Leví ãfe fenafo fisti ato Nios kĩfixomisfo itirofoki. Jesúskai Leví fenaxoma a Moisés yoini keskaraõnoax noko Nios kĩfixomis itiroma. Askatamaroko Niospa Jesús katoni noko kĩfixomis inõ. Ãfe sharaõxõ Epa Niospa Jesús otofani. Anã nanakama. Nãskax noko Nios kĩfixomis ipanaka Niospa sharaõxõ.  
\v 17 Nãnori Niospa yoiyoni David Jesucristoõnoa kenekĩ iskafani: 
\pi1 Mĩ Melquisedec keskara. Nãskaxõ mĩ yorafo Nios kĩfixomis ipanaka, 
\m ixõ keneni.  
\v 18-19 Nãskakẽ a Moisés yoini keskarakai nõ anã ifofaima. Nokokai imasharatiroma. Askatari nõko chaka noko soaxomisma nõ Nios fe ĩpaxanõ. Akka Jesús ãfe meka askarama. Ãfe meka sharafinakõia. Epa Niospa Fake nokoki nĩchini aõnoax nõ afe ipanaka. 
\p  
\v 20-21 Akka Epa Niospa ãfe Fake yoini keskafakĩkai Leví ãfe fenafo anori yoinima. Niospa yora shinãmanaino iskara keneni, Niospa ãfe Fake Jesús yoikĩ iskafani: 
\pi1 Na meka ẽ mia yoiai chanĩmakõi. Nãskakẽ ẽ anã fetsapakenakama. Ẽ yorafãfe ãto Ifokõi. Nãskakẽ a ẽ mia yoiai keskafakĩ yorafo mĩ ato ea kĩfixomis ipanaka, 
\m ixõ Epa Niospa ãfe Fake yoini.  
\v 22 Akka Apa Niospa nãnori yoinikẽ nõ tãpitiro Jesúsnoax Nios fe nõ ipaxatiro. Akka Moisés meka askarama. Aõnoax Niospa yorafo nõ itiroma. Akka Epa Niospa Moisésxõ Leví ãfe fenafo yoini keskara sharafiano akka ãfe Fake Jesús yoini keskara sharafinakõia. 
\p  
\v 23 Akka a ãto kaifo ato Nios kĩfixomisfo ichapafofiax afo natirofo. Tsoa nĩpaxatirofoma. Mã fetsa nano fetsari katotirofo atori ãfe yorafo Epa Nios kĩfixomis inõ.  
\v 24 Akka Jesúskai ato keskarama. Nãfi nĩpanakakĩ nãato noko Epa Nios mẽxotaima kĩfixomis ipanaka.  
\v 25 Nãskakẽ Apa Niosxõ noko ifitiro nõ afe ipaiyaito nokoõxõ Apa Nios yoifafãini iskafakĩ: “Epa Niosi, ẽ ato nãxoniki, ato chaka soaxõfe. Nãskaxõ a mĩ ika ano ato imafe,” ixõ nokoõxõ Apa yoimis. Nãskakẽ a nokoõnoa Apa yoia keskafakĩ noko nãskakõi faxoxii nõ afe ĩpaxanõ. Nãskaxkai nõ fenopakenakama. 
\p  
\v 26 Akka nã Jesúsfi noko Nios kĩfixomis xanĩfokõikĩ. Apa Nios keskara sharafinakõia. Fetsafo finõkõia. Tsõakai aõnoa afaa chaka yoitiroma. Aatokai afaa chaka shinãmisma yora chakafo keskarama. Nãskaxõ Apa Nios ika anoafori ato finõkõia. Nãskaxõ a nõ yopaifo noko axosharatiro.  
\v 27 Akka a ato Nios kĩfixomis xanĩfo fetsafo keskarafoma. Taefakĩ afãfe pena tii yoinã ina retepaonifo Epa Nios inãkakĩ ato chaka soaxonõ. Nãskakẽ Niospa mã ato chaka soaxonano yora fetsafãferi ato yoinã inafo inãnifo, atori Epa Niospa chaka soaxonõ. Akka Jesúskai ato keskarama. Jesús ato finõkõia. Nãskakẽ Jesús nai fistini noko chaka soaxonano Epa Nios fe nõ ipaxatiro.  
\v 28 Akka Epa Niosxõ Moisés yoini keskafakĩ yorafoõnoa Epa Nios ato kĩfixomisfo inõfo ãto xanĩfofo katonifo. Akka nãfofi noko keskarafori nãfãferi afara chakafamisfo. Nãskakẽ Niospa yoiyoni keskafakĩ ãfe Fake Jesús chipo katoni nokoõxõ Nios kĩfixomis ĩpaxanõ. Aatokai afaa chakafamisma. Isharakõimis. 
\c 8  
\s1 Epa Niospa meka fenasharakõi yoini Jesús noko nãxonõ nõko chaka noko soaxoxii 
\p  
\v 1-2 Akka nã sharafinakõia nõ yoiai nãfi Apa Nios xanĩfokõi ika ari afe ikaki. Nãskakẽ nõ afara yoipaiyaito nokoõxõ Apa yoipakenaka. Nãatofi noko Apa Nios kĩfixomis xanĩfokõikĩ. Nãskakẽ a ika arikai tsõa afaa fetsa onifanima. Akka Nios fistichi onifani. Nãskakẽ ariax Apa fe nokoõnoax mekakakãini. Nã ika ari nai mẽra anoa a anoxõ Nios kĩfiti pexefã keskarakõifiax finakõia. Nãskakẽ nã ẽ mato kenexona keskara xafakĩakõi mã tãpitiro. 
\p  
\v 3 Nã ato Nios kĩfixomis xanĩfokõi inõfo Niospa ato katoni afarafo yorafãfe Nios inãkata finõfo. Askatari yoinã inafo fixõ retekaxõ koofaxõ ato kĩfixonõfo ãto chaka ato soaxonõ Niospa ato katoni. Nãskakẽ nã Jesús, noko Nios kĩfixomisto, nãatori Nios inãni. Yoinã ina inãnima. Askatamaroko ãa noko nãxoni nõko chaka noko soaxoxiki. Ãfe Ãpa amapaiyai keskara ani.  
\v 4 Moisés yoini keskafakĩ Leví ãfe fenafos israelifãfe ato Nios kĩfixomis itirofo yoinã retekaxõ ato Nios inãxoxikakĩ Niospa ato chaka soaxonõ. Akka Jesúskai Leví ãfe fenama. Nãskakẽ Jesús nono mai ano ixõ nokoõxõ Apa Nios kĩfimis ikeranama. Akka nai mẽra ixõ noko kĩfixomis, Niospa ato katoano.  
\v 5 Akka nono mai anoxõ nã Leví fenafãfe a anoxõ Nios kĩfiti karapa pexe mẽraxõ yonopaonifo. Nãnoxõ ãto kaifo israelifo tãpimapaikakĩ Nios ika ari afe keskaramãkĩ tãpinõfo. Askafixõ askarakõi tsõa tãpiyonima. Nãskakẽ Epa Niospa Moisés yoini iskafakĩ karapa pexe fayoamano: “Ẽ mia yoiai keskafakĩ a anoxõ ea kĩfiti karapa pexe fafe. ¿Mã mĩ shinãimẽ ẽ mia machi anoxõ tãpimana keskara nãskakõi fafe karapa pexe fakĩ? Nãskakẽ a yonomisfo tãpimafe nã ẽ mia yoiai keskarakõi fanõfo,” ixõ Epa Niospa Moisés yoini.  
\v 6 Akka Niospa ãfe Fake Jesús yoini keskarato a Moisés yoini keskara finõkõia. Nãskakẽ Jesús Apa ika arixõ nokoõxõ Apa Nios kĩfifafãini. Akka Leví fenafãfekai askafapaonifoma. Epa Niospa ãfe Fake Jesús yoiyoni keskarakõi ato yoimisma. Akka nã ato yoiyoni keskara sharafiano nã ãfe Fake Jesús yoini keskararoko sharafinakõia. 
\p  
\v 7 Niospa Moisés yoini keskara nõ nikasharakõixõ nõ afara chaka nõ fakeranama. Akka nõ nikasharakõima. Nãskakẽ Epa Niospa aõxõ noko ifitiroma. Nãskakẽ noko fetsa yoini iskafakĩ: “Ẽfe Fake ẽ nĩchixii mato nãxonõ mato chaka soaxonõ. Mã Jesús Ifofaino ẽ mato ifixii,” ixõ Epa Niospa yoini.  
\v 8 Akka Epa Niospa Moisésxõ yoini keskarakai tsõa askara nikasharakanamax nõko xinifo nikayospakõi inifo. Nãskakẽ nõko Ifo Niospa yoini iskafakĩ: 
\pi1 Ẽ chipo na efe yorafo israelifo yafi Judapa ãfe fenafo meka fena shara ẽ ato yoixii. Nã ẽ ato sharakõi axõai keskara ẽ ato õimaxii.  
\v 9 Ẽ ãto xinifo Egipto anoa iyoni. Nãskaxõ ẽ ato yoisharani ẽfe meka nikasharaifãfe ato kexesharafafãixikĩ. Ẽ ato yoisharafiaino ẽfe meka kachikiri fanifo. Nãskakẽ ẽ ato potani. Akka a ãto xinifo ẽ ato yoini keskarakai ẽ ãto fenafo askara ẽ yoixiima. Askatamaroko ẽfe meka fena shara ẽ ato yoixii ea nikasharanõfo.  
\v 10 A ẽ israelifo yoixiai kene fistiõxõ ẽ ato tãpimaxima. Askatamaroko ãto shinã mẽra ẽfe meka shara ẽ nanexii ãto õiti mẽraxõ a kirika kenea keskara sharaõxõ shinãsharanõfo. Nã ẽ ato yoiai keskakõixii shinãsharaxikani. Nãskakẽ ẽ ãto Epa Nioskõi ixii. Akka afo efe yorafo ixikani.  
\v 11 Akka anã fisti rasichi ato tãpimaxikanima. Keyokõichi ea tãpixikani. Yorafo afamafãferi ea tãpiaifono, xanĩfofofãferi ea tãpikõixikani. Nãskakẽ anã eõnoa tsõa ato tãpimaxima akõi keyokõichi mã ea tãpikõiafono.  
\v 12 Ẽ ato chaka soaxoxii afara chakafafiaifãfe. Nãskaxõ a afara chakafamisfo ẽ anã shinãpakenakama, 
\m ixõ Niospa yoini.  
\v 13 Nãskakẽ Niospa anã ato yoini iskafakĩ: “Meka fena shara ẽ mato yoinõ,” ixõ ato yoini. Akka a Moisés ato yoini keskarakai anã tsõa shinãtiroma. Nã Moisés ato yoini keskara meka xinikõi. A mekakai anã tsõa shinãpakenakama. Nãskakẽ nã meka shinãmakipakenakafo. 
\c 9  
\s1 Karapa pexe kene fetsa mẽraxõ Epa Nios ato kĩfixopaonifo. Akka iskaratĩa Jesús noko kĩfixomis Apa Nios ika arixõ 
\p  
\v 1 Ẽ mato yoinõ afe keskara yorafo ipaonifomakĩ. Akka Epa Niospa Moisés yoini afeskaxõ nono mai anoxõ afe yorafo ato Nios kĩfixotirofomãkĩ Niospa ato chaka soaxonõ. Akka karapa pexe fanifo a mẽraxõ Nios kĩfinõfo.  
\v 2 Akka a karapa pexe fanifo mẽra kene rafe ini. Nã kene rekẽtana mẽra siete rãpari oro otatia metax keskara ini. Askatari mĩsari a mẽra ini. Nã mĩsa kamaki mẽxotaima doce pãa fapaonifo. Nã kene rekẽtana anenifo iskafakakĩ: “Nios chaimashta ika,” ixõ anenifo.  
\v 3 Akka karapa pexe fanifo mẽra sama namikõi nakirafekõi potexõ xĩtia ini. Nã kene chikaya anenifo iskafakakĩ: “Nono Nios ikõina,” ixõ anenifo.  
\v 4 Nã kene rekẽtana ketaxamei mĩsa kafãshara oroya taxta fanifo ini. A kamakixõ nakas potoshara kooati ipaoni. Nãskatari kene chikaya fetsa mẽrari kafo oroya taxtafanifo ini. Nã kafo mẽra pãa keskara ãfe ane mãnã kecho oro mẽra nanea ini. Akka Aarón ãfe chatiri nã kafo mẽra naneyoamano Niospa nã Aarón ãfe chati charofo onifayoni. Nãskata Aarón ãfe chati chipo kafo mẽra naneni. Nãskatari Niospa Moisés ãfe meka makexki kenexõ inãni nikanõfo. Nã makex para Niospa mekaya nã kafo mẽra nanea ini.  
\v 5 Nãskakẽ nã kafo mãmãkĩa Niospa ãfe ãjiri keskara raferi nia ini. Ãto peta rafeta kafo fepoafo keskara ini. Nãskakẽ nã Niospa ãfe ãjiri keskara rafeoxõ nõ tãpitiro Nios fãsi sharakõikẽ nõko chaka noko soaxomis. Askafiano akka nafoõnoakai ẽ mato iskaratĩa yoitiroma. 
\p  
\v 6 Nãskakẽ nã Nios kĩfiti karapa pexe kene rekẽtana mẽra a ato Nios kĩfixomisfo mẽxotaima ikipaonifo anoxõ nakas potoshara koofaino ato Nios kĩfixoxikaki.  
\v 7 Akka a kene fetsa mẽrari tsoa ikitiroma ipaoni. Nã ato Nios kĩfixomis xanĩfo finakõia fisti ikipaoni. Xinia fisti ata ikipaoni. Nãskatari imimais ikipaonima. Yoinã imiya ikipaoni nã imi Epa Nios inãxikĩ ãfe chaka soaxonõ, askatari afe yorafori ato chaka soaxonõ.  
\v 8 Nãskakẽ Niospa Yõshi Sharapa xafakĩa noko tãpimani. Akka nã karapa pexe iyoano ãfe kene fetsa mẽra tsoa ikipaonima. Nã ato Nios kĩfixomis xanĩfokõi fisti ikipaoni Nios fe mekaxiki. Yorafo Epa Nios fe mekayoxoma, Nios ato kĩfixomis xanĩfo fisti yoiyopaonifo.  
\v 9 Nãskakẽ nã ipaonifoõnoa iskaratĩa noko shinãmatiro Moisés ato yoini keskafakĩ. Karapa pexe ano yoinã ina retexõ inãpaonifo Niospa ãto chaka ato soaxonõ. Askafikanax isharapaonifoma afara chakafakaxõ shinãtaifapaonifo.  
\v 10 Akka Moisés ato yoini keskafakĩ a ato Nios kĩfixomisfãfe nãskakõi fanifo. Nãskaxõ afara shara fetsafori ato tãpimani Moisés meka. Afara pita, afara ayata mã fatiro ato fani. Askatari afaari mã pitiroma, afaari mã ayatiroma ato fani. Askatari ato tãpimani afeskax mechokometirofomãki Epa Niospa ato nikakõinõ. Akka askafiaifono afãfekai ato chaka soaxokõitirofoma. Cristo oyoamano nãnori Niospa ato yoiyoni. Nã Cristo naitĩa aõxõ keyokõi Niospa fetsafani. Nãskakẽ nõ Jesús Ifofaino, Niospa nõko chaka noko soaxotiro. Nãskakẽ a Moisés yoini keskara anã tsõa ifofasharatiroma ãfe chaka soapaikĩ. 
\p  
\v 11 Akka Cristo mã anã nai mẽra kaax, noko Nios kĩfixomis xanĩfokõi ini. A Niospa noko yoiyoni keskara noko inãmis. A karapa pexe anoxõ a ato Nios kĩfixomisfãfe ato Nios kĩfixopaonifo yorafãfe anifo. Akka Jesús noko kĩfixomis ano sharafinakõia Nios fistichimãi nai fanino.  
\v 12 Akka Cristokai karnĩro imi fota fakka fakeshtari fonima. Askatamaroko nokoõnoax nakĩ ãfe imi foax ĩkisi Apa Nios ari kani. Nãskaxkai anã Jesús nanakama. Nãskaxõ nõko chaka noko soaxonano ãfe Apa Nios ari nõ katiro.  
\v 13 Akka chanĩma, karnĩro yafi fakka retekaxõ ãfe imi fĩkaxõ nã karnĩro koofakaxõ ãfe chii mapoya nã imi osikaxõ saa saa anifo Epa Niospa ato chaka soaxonõ anã choshta keskara iyamanõfo.  
\v 14 Akka Cristokai afaa chakafamisma. Nãfi sharafinakõia. Niospa Yõshi Shara a nĩpanakato Jesús shinãmani. Nãskakẽ Apa yoini iskafakĩ: “Epa, ẽ atoõnoax naikai. Nãskakẽ ẽfe imi foano eõxõ mĩ ãto chaka soaxotiro mefe yorafo inõfo,” ixõ Apa yoini. Akka a nõ Nios inimamapaikĩ nõ shinãpaoni keskara nõ anã shinãima. Akka iskaratĩa nõ Nios inimamapaikĩ nõ nikasharakõitiro. Nã Nios nĩpanaka sharafinakõia. 
\p  
\v 15 Akka a Moisés ato yoini keskara sharafiano tsõa nikapaonima. Afara chakafapaonifo. Nãskakẽ nã afara chakafapaonifo keskara Cristo fistichi ato chaka soaxotiro. Akka a Moisés yoipaoni keskara anã ato yoitiroma. Nãskakẽ Cristo oni nokoõnoax naiyoi nõko chaka noko soaxoxiki nõ Nios fe ipaxanõ. Nãskakẽ Niospa noko yoini iskafakĩ: “Ekeki fekãfe ẽfe Fakeõnoax efe yorafo ixikakĩ,” ixõ noko yoini. Nãskaxõ a noko yoiyoni keskara noko inãxii.  
\v 16-17 Iskaratĩa afara fetsa ẽ mato yoinõ mã tãpinõ. Nõ nayoxoma nõ yoitiro iskafakĩ ato yoikĩ: “Ẽ naano tsõa ẽfe afarafo fiimãkai ĩkisi ẽ mato tãpimayonõ,” ixõ nõ yoitiro. Nãskakẽ nã nõ yoiyomis keskafakĩ nõ nayoxoma nõko afarafo fetsafo inãpaikĩ nõ yoitiro. Akka nõ nayoamano nõko afarafo tsõa fena fitiroma.  
\v 18 Nãskakẽ Niosxõ Moisés afe yorafo yoini ãto yoinã inafo reteaifono imi fonõ. Akka a yoinã inafãfe imi foyamaino a ato yoiyoni keskafakĩ Niospa ato chaka soaxotiroma.  
\v 19-20 Taefakĩ Epa Niospa shinãmanaino Moisés israelifo keyokõi ato yoini nikanõfo. Mã ato yoikĩ mitoxõ, nã ifi hisopo ãfe põya pishta fini. Mã fixõ fakka fake imi yafi oveja imi fakkaya osini. Nãskaxõ ifi hisopo põya pishta fixõ oveja raniya texkeani. Nãskata nã ifi hisopo põya pishta texkeata fakka fake imiki momo momo axõ nã Niospa meka kirikaki kenea a Niospa yoiyoni keskafakĩ fakka imi saa saa ani. Askatari yorafokiri fakka imi saani. Ato yoikĩ iskafayanã: “Na imioxõ mã tãpitiro Epa Niospa noko yoiyoni keskara axii. Nãskax nõ afe yorafo itiro,” ixõ Moisés ãfe kaifo yoini.  
\v 21 Nãskatari nã karapa pexe a mẽraxõ Nios kĩfiti Moisés imĩ saa saa ani, askatari a mẽranoafori keyokõi imĩ saa saa ani.  
\v 22 Chanĩma, nã Epa Niospa Moisés yoini keskafakĩ Moisés imi saakano karapa pexe anoafo keyokõi ato chaka soaxona. Akka imi foyamaino noko chaka soaxotiroma. Anã ano fato fetsama nõko chaka noko soaxotiro. 
\s1 Cristo nõkoõnoax nani noko chaka soaxoxiki 
\p  
\v 23 Nã anoxõ Nios kĩfiti karapa pexe mẽranoa keskarakõifo Nios ika ari. Nãfoki ato Nios kĩfixomisfãfe yoinã imi saanifo Niospa afo õisharanõ. Akka a karapa pexe mẽranoa imifo sharafiano afãfe nõko chaka noko soaxotiroma. Askatamaroko nã Cristo nokoõnoax nai fistini nõko chaka noko soaxoxiki. Noko chaka soaxonano Nios ika ari nõ katiro, a keskara shara afe ipaxakĩ. Askatari anokai a anoxõ Nios kĩfiti karapa pexe keskarama. A Nios ika ano sharafinakõia.  
\v 24 Akka yorafãfe karapa pexe fanifo anoxõ Nios kĩfinõfo. Nãskakẽ a mẽra a Nios nai mẽra ika keskarakõi ipaoni. Akka Cristo mã otoax a karapa pexe fanifo mẽra ikinima. Askatamaroko Apa ari nai mẽra kani. Nãskakẽ iskaratĩa ari afe ika noko Apa Nios kĩfixõfafãixiki.  
\v 25 Akka nã ato Nios kĩfixomis xanĩfo karapa pexe kene fetsa mẽra ares fisti xinia fisti akax ikipaoni a mẽraxõ Nios kĩfixiki. Ãfe imikõiya a mẽra ikitamaroko, yoinã imiya ikipaoni. Akka Cristokai ato keskarama. Akai mẽxotaima natiroma, nai fistini Apa Nios ari kaxiki.  
\v 26 Akka askakatsaxakĩ Cristo nokoõnoax nai ranã ranãkerana nã Niospa mai onifanichãi. Akka askamisma. Jesús nai fistini ĩkisi noko keyokõi chaka soaxoxiki.  
\v 27 Akka keyokõi nõ nai fetsexii. Nõ naax keyokõi nõ akiki nokoaito noko yoixii a nõ niyoxõ amis keskara. Nãskakẽ a nõ amis keskara noko yoiaino nã Jesús Ifofaafo tii afe isharapakenakafo. Akka nã nikamisfoma omiskõipakenakafo mẽra ato potaxii.  
\v 28 Cristo ãari inãmeax noko naxõi fistini. Yora ichapafoõnoax omiskõixõ noko nãxoni. Askafiax anã ãfe yorafoki oxii, noko ĩkisharapakexakĩ. Nãskakẽ anã nokoõnoax nanakama noko chaka soaxoxiki. Askatamaroko aõnoax nõ isharapakenaka. 
\c 10  
\p  
\v 1 Niospa Moisés yoini keskaraõxõ nõ tãpitiro Cristo noko afarasharakõi faxoxiai. Nãskakẽ nã Moisés ato yoini keskarakai tsoa imasharatiroma. Afia Moisés ato yoini keskafakĩ nã xinia tii a ato Nios kĩfixomisfãfe yoinã inafo retepaonifo Niospa ato chaka soaxonõ. Askatari a Moisés yoini keskaratokai ato imasharamisma Nios fe ĩpaxanõfo.  
\v 2 Akka a ato Nios kĩfixomisfãfe yoinã inaoxõ ato chaka soaxonaifono, tsõa anã akeranama yoinã ina retekĩ. Ãfe chakaõxõ anã shinãchakakeranama. Nãskakẽ anã tsõa yoinã ina retekeranama.  
\v 3-4 Akka askarama. Nã xinia tii cabra ato retexonaifotĩa nã afara chakafamis keskara ato shinãmapaonifo. Akka yoinã ina imioxõ ãfe chaka ato soaxotiroma. 
\p  
\v 5 Nãskakẽ Cristo mai ano fotoyoxoma Apa yoini iskafakĩ: 
\pi1 Epa, mĩkai fichipaima yoinã ina imioxõ ãto chaka soanõfo. Askatamaroko yorakõi mĩa ea onifani ẽfe yora ẽ mia inãnõ. Nãskaxõ yorafoõnoax naxõ ẽ ato chaka soaxoxiki.  
\v 6 Akka yorafãfekai mia inimamakanima yoinã ina retekaxõ kooakĩ mĩ ato chaka soaxonõ, 
\m ixõ yoini.  
\v 7 Akka anã mẽ mia yoia iskafakĩ: 
\pi1 Mẽ nono mai ano fotoa a mĩa amapaiyai keskara ẽ axiki. Nãnorikõi mĩ meka yoimisto eõnoa yoikĩ keneyoni, 
\m ixõ Cristo Apa yoini.  
\v 8 Efe yora mĩshtichi, shinãkapo. Cristo Apa yoikĩ taefani iskafakĩ: “Epa, mĩõxõ Moisés ato yoini keskara sharafiano mĩ anã fichipaima. Akka nãato ato yoikĩ iskafani: ‘Yoinã inafo retekãfe ãfe imi foano aõxõ Niospa mato chaka soaxonõ,’ ixõ ato yoini. Akka a yoinã retexõ koakaxõ mia inãifãfekai afãfekai mia inimamaima,” ixõ Apa yoini.  
\v 9 Nãskaxõ anã yoikĩ iskafani: “Epa, ẽ nono mai ano ẽ fotoni a mĩa amapaiyai keskara axiki,” ixõ Apa yoini. Akka Cristo noko nãxoni noko chaka soaxoxiki. Nãskakẽ a Moisés ato yoini keskara nõ anã nikatiroma nõko chaka Epa Niospa noko soaxonõ. Nãfo mã Niospa fetsafaa.  
\v 10 Nãskakẽ a Apa amapaiyai keskai Jesucristo ãari inãmeni noko nãxoxikĩ aõnoax nõ a keskara shara inõ. Nãskakẽ nõ anã afaa fetsa fichipaima mãmãi Jesús noko nai fistixonikẽ. 
\p  
\v 11 Akka a atoõxõ Nios kĩfixomisfãfe pena tii yoinã ina retepaonifo Epa Niospa keyokõi ato chaka soaxonõ. Askafekẽkai afãfe ato chaka soaxopaonifoma.  
\v 12 Akka Jesucristo mã noko nai fistixoni noko chaka soaxoxiki. Nãskakẽ nõ anã afaa fetsa yopanakama noko chaka soaxonõ. Nãskakẽ mã nokoõnoax naax Apa Nios ari kani ariax afe xanĩfokõi ikikai.  
\v 13 Akka mã Apa ari kanixakĩ iskaratĩa arixõ manai, a noikaspamisfo Apa Niospa ato potaitĩa. Nãskakẽ Jesucristo Apa fe xanĩfofinakõia ixii.  
\v 14 Nãskakẽ ãarifi inãmei fistixõ noko nãxoni nõko chaka noko soaxoxiki. Nãskaxõ nõ Ifofaax a keskara shara nõ ixii. Nãskakẽ Niospa anã afaa chaka nõkoõnoa õipakenakama. Nãskakẽ nõri a keskara sharakõi ixii. 
\p  
\v 15-16 Nãnori Niospa Yõshi Sharapa noko yoiyoni iskafakĩ: 
\pi1 Efe yorafãfe, ea Ifofaifono ãto shinã mẽra ẽfe meka ẽ nanexii ãto õiti mẽrari a ẽfe meka kenea keskara ẽ faxii ea Ifofasharanõfo, 
\m ixõ yoini.  
\v 17 Nãskaxõ anã yoikĩ iskafani: 
\pi1 Mã ea Ifofaino ẽ anã shinãpakenakama a mã chakafamisfo, 
\m ixõ Niospa Yõshi Sharapa yoini.  
\v 18 Akka mã noko chaka soaxonano, nãskakẽ nõ anã yoinã ina inãtiroma noko chaka soaxonõ. 
\s1 Nios fe rafesharakõikãfe 
\p  
\v 19 Efe yora mĩshtichi, nãskakẽ nõ nai mẽra ikitiro Nios ano ranotama Jesucristomãi nokoõnoax nai imi fonikẽ, noko chaka soaxoxiki.  
\v 20 A ato Nios kĩfixomisfo kĩfiti pexefã kene fetsa mẽra xinia tii ikifistipaonifo ato Nios kĩfixoxikakĩ. Anã iskaratĩa nõ yopatiroma askara. Anã askafapanakama. Akka iskaratĩa afara fetsa fenasharakõi Jesús noko axoni. Nãskakẽ mã Jesús naino nã Nios kĩfiti pexefã kene mẽranoa sama nãmĩfã faxtetani anã tsoa ikiyamanõ. Nãskakẽ nãkõi nã Nioskõi nõ kĩfitiro.  
\v 21 Nõko Ifo Jesús nokoõxõ Apa Nios kĩfixomis xanĩfokõi. Nãskakẽ keyokõi Niospa fakefãfe ãto Ifokõi.  
\v 22 Nãskakẽ nõ Jesús chanĩmara fakẽ nã noko nãxonioxõ nõko õiti fena sharakõi noko faxotiro. Nãskaxõ a nõ afarafo chakafamis keskarafo anã nõ shinãtiroma nõko õiti inimakõitiro. Nãskaxõ faka sharapa nashimana keskara noko fatiro anã afaa chaka nõko shinã mẽraxõ nõ shinãnõma. Nãskakẽ Nios fe rafekãfe.  
\v 23 Akka nõ yoikĩ iskafamis: “Jesús nõko Ifokẽ Epa Niospa a noko yoiyoni keskara noko axoxii,” ixõ nõ yoimis. Nãskakẽ afaa fetsa shinãyamakãfe. Nã nõ shinãi fisti shinãfafãikãfe.  
\v 24 Akka Epa Niospa noko sharafamis. Nõri nõ shinãsharanõ afeskaxõ nõ fetsafo shinãmasharatiromãkĩ nõinã faatanãkaxõ afara axoshara faatanãnõfo.  
\v 25 Mã mã tãpia mã Jesús chaima oi. Akka fetsafo anã ichanãmisfoma. Nãskakẽ ato keskara iyamakãfe. Nãskakẽ ichanãi xateyamakãfe. Jesúsnoa mã shinãi keskafakĩ fetsafori yoitaifakãfe mãto õiti inimasharakõinõ. 
\p  
\v 26 Fatora fẽtsa mã tãpia Jesús nokoõnoax nani nõko chaka noko soaxoxiki. Nãskara mã tãpifixõ afara chakafakĩ nõko Ifo Jesús kachikiri fakĩ, askarakai Niospa ãfe chaka soaxotiroma.  
\v 27 Nãskarafo Niospa ato omiskõimaxii. Akka Niospa ato õiaino ratei finakõixikani. Nãskakẽ Niospa ato yoixii iskafakĩ: “Emakinoax omiskõipakenakafo mẽra fotakãfe, chiifã mẽra,” ixõ ato yoixii.  
\v 28 Akka fẽtsa nã Moisés yoini keskara nikakaspakĩ afara chakafaito fẽtsa õixõ xanĩfo yoimis. Fistichi yoiyamakĩ rafeta yoitiro, askayamakĩ trespa yoitiro iskafaki: “Mã nõ õia nato afara chakafaito,” ixõ yoitirofo. Nãskakẽ xanĩfãfe yoitiro: “Na feronãfãke afara chakafaa mã natiro,” ixõ yoitiro.  
\v 29 Akka nã Moisés yoini keskara nikakaspaifo afo retepaonifo keskafakĩ fatorafãferi Jesús nikakaspamisfokẽ Niospa ato omiskõimakĩ finakõixii. Nãskakẽ nã yora chakafãfe shinãkĩ iskafamisfo: “Mẽ nikamis Jesús ea nãxoni. Nã naino ãfe imi foni. Nãskaxõ ea katoni aõnoax ẽ Niospa fake inõ. Akka ẽ shinãikai afama. Nãskakẽ ẽ Jesús Ifofapaima,” ixõ anori shinãkĩ nãato Niospa Fake nikakaspakõimis. Askara meka yoikĩ Niospa Yõshi Shara chakafakĩ mekafamis, Niospa Yõshi Sharapa sharafafiamisno noikĩ.  
\v 30 Akka mã nõ tãpia Niospa yoikĩ iskafani: “Afara chakafaifãfe ẽ ato omiskõimaxii,” ixõ yoini. Askatari yoikĩ iskafani a kirika keneano: “A ea Ifofaafãfe afara chakafaifono ẽ ato omiskõimaxii,” ixõ yoini.  
\v 31 Akka fatorafãfe nõko Ifo Jesús kachikiri fakaxõ afara chakafariafaifono atonã fãsi mesekõi ixii. Nãskakẽ askarafo nã Nios nĩpanakato ato achixõ ato omiskõimakĩ finakõixii. 
\p  
\v 32 Shinãkapo efe yora mĩshtichi. Mã taefakĩ Jesúsnoa tãpixõ mã Ifofani keskafakĩ shinãmakiyamakãfe. Fetsafãfe mato Jesús Ifofatimafaifono ato nikatama mã nõko Ifo Jesús Ifofasharakõipaoni.  
\v 33 Nãskaxõ mã Jesús Ifofasharaito õikakĩ fetsafãfe mato ĩchayanã mato omiskõimamisfo. Akka a Jesús Ifofamis fetsafori omiskõiaifono mãri ato fe omiskõipaimis.  
\v 34 A Jesús Ifofaa fetsafo karaxa mẽra ato ikimanifo. Nãskakẽ mã ato noiyanã ato inimamapai karaxa mẽranoa mã ato õikai kani ato shinãmasharata ato inimamaxiki. Nãskatari nã Jesús Ifofaafãfema mãto afarafo mato fĩakĩ keyokõinifo. Mato askafafiaifono a shinãchakatamaroko mã tãpini Epa Niospa nã ika arixõ mato afara mekexona afokai fenopakenakama. Nãskara tãpiax mã inimakõini.  
\v 35 Nãskakẽ a mã Jesús chanĩmara faa keskafakĩ kachikiri fayamakãfe. Mã kachikiri fayamakẽ Epa Niospa mato sharafaxii noko yoiyoni keskafakĩ. Nãskaxõ afara shara mato inãxii.  
\v 36-37 Akka Niospa meka keneni iskai: 
\pi1 Cristo mã chaima matoki oi, samarakaima, 
\m ixõ kenenifo. Nãskakẽ mã Jesús Ifofasharai keskafakĩ omiskõifikĩ tenekãfe. Epa Niospa mato inãpaiyai keskara aõxõ nã mato yoiyoni keskara mã fixii.  
\v 38 Nãskaxõ anã Niospa meka kenenifo iskafakĩ yoikĩ: 
\pi1 Nã ea chanĩmara fai ẽ imasharaito, nãato ea Ifofasharakõixii. Akka nã ea kachikiri faafoki ẽ inimaxima, 
\m ixõ Niospa yoini kirika keneano.  
\v 39 Nãskarafãfe Jesús kachikiri fakanax omiskõipakenakofo mẽra fokani. Akka nõkai askarama. Askatamaroko nõ Jesús chanĩmara fakõimis noko nimasharapakexanõ nõ afe ipaxakĩ. 
\c 11  
\s1 Nios nikakõipaonifo 
\p  
\v 1 Akka nõ Epa Nios chanĩmara fakõixõ a noko yoiyoni keskara noko axoyoamano nõ chanĩmara fai chipomãi noko axõfaito. Nãskarifiakĩ a noko yoiyoni keskara nõ õiyamafixõ ãfe mekaõxõ nõ chanĩmara fai. Nãskara nõ shinãkĩ nõ Nios chanĩmara fai.  
\v 2 Nãskakẽ nõko xinifãfe Niospa ato yoini keskara chanĩmara fakõipaonifo. Nãskakẽ Epa Nios atoki inimakõikĩ atoõnoa meka shara yoini. 
\p  
\v 3 Akka nõ chanĩmara faxõ nõ tãpitiro Niospa ãfe mekapa mai yafi nai onifani. A nõ õiyomisfoma afarafo Niospa onifani, akka iskaratĩa mã nõ õitiro. Nãskakẽ ãfe mekapas keyokõi onifani. 
\p  
\v 4 Ẽ mato yoinõ nikakapo mã tãpinõ a nõko xinifo ipaonifo afe keskaramãkĩ. Nõko xini Abel Nios chanĩmara faxõ oveja fake inãni nã Niospa yoini keskafakĩ. Nãskakẽ Nios akiki inimakõini. Akka ãfe ochi Caínkai askara inãnima. Nã Caín Nios nikakaspayanã ãfe afarafo inãpaiyaito Niospa fichikaspani. Akka ãfe exto Abel Nios chanĩmara fakõikẽ Niospa aõnoa yoikĩ iskafani: “Mĩ ea chanĩmara fakõina,” ixõ yoini. Abel Nios chanĩmara faax mã nafianikẽ nõ Abel shinãkĩ nõ tãpitiro Nios chanĩmara faxõ nõ nikasharakõitiro. Nõ askafaino Nios nokoki inimasharakõi. 
\p  
\v 5 Nõko xini Enoc aatori Nios chanĩmara fakõinax afe rafekõipaoni. Nãskakẽ nayamafiakẽ a ika ari Niospa ifirisafatani. Aõnoa yoikĩ Niospa meka kenenifo iskafakĩ: “Ẽ Enoc yoiai keskafakĩ ea nikakõimis. Nãskakẽ ẽ akiki inimakõi,” ixõ Niospa yoini.  
\v 6 Akka nõ Nios nikayamakĩ nõ Nios inimamatiroma. Akka nõ Nios fe ipaikõikĩ nõ nikakõitiro. Iskaratĩa Nios nia. Nãskakẽ nõ chanĩmara fatiro Niosmãi nikẽ. Askatari nõ nikapaikõikĩ chanĩmara fayanã akiki nokoaito Niospa noko afara shara faxoxii. 
\p  
\v 7 Nõko xini Noéri Nios chanĩmara fakõipaoni. Nãskakẽ Niospa Noé yoikĩ iskafani: “Ẽ oi kaya imai faka faipafanõ ãsai fetsenõfo. Nãskakẽ kanõanãfã pexeya fafe. Mĩ fakefo fe mĩ ãfinõ ano ikanax ãsaxikanima. Nã ẽ mia yoiai keskafafe,” ixõ Niospa Noé yoini. Akka tsõa askara õiyomisma nãskakẽ Noé chanĩmara fakĩ kanõanãfã fani ãfe fakefo fe ãsaxikakima. Nã Noé Nios chanĩmara faax isharakõipaoni. Akka nã nikakaspaifo askapaonifoma, afãfe afara chakafapaonifo. Nãskakẽ Niospa ato omiskõimani ãsanõfo. Nãskakẽ Nios fe Noé rafeaito akiki inimakõini. 
\p  
\v 8 Nõko xini Abrahamri Nios chanĩmara fakõipaoni. Nãskakẽ Niospa Abraham yoikĩ iskafani: “Nã ẽ mia nĩchipaiyai ari mĩ katiro. Ẽ mia mai inãnõ mĩnã inõ,” ixõ Epa Niospa yoini. Akka Abraham tãpia inima fakiri kaimãkai. Askafiax nã Niospa yoia keskakõini.  
\v 9 Nãskakẽ nã Niospa yoiyoni keskara chanĩmara faax, a Niospa nĩchia mai ano nokoax Abraham yora fetsafo mẽra kani. A keskarafo inima. Nãnoax pexe keskara a karapa pexe fofãsafapaoni a mẽra oxaxikaki. Nãskakẽri ãfe fake Isaaca fe ãfe fafa Jacobo nã keskara mẽra ipaonifo. Epa Niospa Abraham yoini keskafakĩ nã raferi ato yoikĩ askafani: “Ẽ mato mãto mai inãxii,” ixõ yoini.  
\v 10 Nãskakẽ Abraham manapaoni. Akka Niospa yoini keskara nã mai ano ifiaxõ tãpipaoni a Nios ika ari afe ipanaka. Nãno Niospa onifanifo keyokõi sharakõifo nãfori ãfenã ipanaka. Nãskakẽ Abraham manapaoni. 
\p  
\v 11 Niospa Abraham yoini iskafaki: “Mĩ ãfi Sarapa chipo fake fixii. Ãfe fake feronãfake ixii. Nãskakẽ mĩ fenafo ichapakõi ixikani,” ixõ yoini. Akka Abraham anifokõi ini ãfe ãfiri yõxafokõi ini fake fimisma. Nãskakẽ Abraham ãfe shinã mẽraxõ shinãkĩ iskafani: “Epa Niospa ea yoiyoni keskara ea axõi. Nãato nã yoiai keskarakõi famis,” ixõ Abraham Nios chanĩmara fani. Nãskakẽ Abraham ãfinĩ fake fini, ãfe fake feronãfake. Nãskakẽ Abraham fakeya ini.  
\v 12 Akka Abraham mã anifokõia ini. Nãskano ãfe fenafo ichapakõifo ini. Tsõa ato tanãtiroma. Nã fishifo tiikõi askatari nã mashi exe tiikõi inifo tsõa ato tanãtiroma. Abraham ãfe fenafo ichapakõi inifo. 
\p  
\v 13 Nã ẽ yorafoõnoa mato rama yoia keskara atoõnoa ẽ mato yoinõ. Nã yorafo nai mitokomenifo a Niospa ato yoiyoni keskara fikanaxma. Akka askafikaxõ chanĩmara fakakĩ ato shinã mẽraxõ oa õiai keskara fanifo. Nãskakẽ inimakõinifo. Nãskakanax yoinãnifo iskakani: “Nonokai na mai ano nõ ipanakama, mai fetsa ano nõ ixii,” ikax yoinãnifo.  
\v 14 Akka nãnori yoiaifãfe nõ tãpitiro nãskara yorafo nono mai ano ipaitama Nios ika ari fopaikani afe ipaxakakĩ.  
\v 15 Akka a ipaonifo ano shinãkani ãto mai ano anã fopaikani fokeranifo.  
\v 16 Akka ãto mai ari fopai atama Nios ika ariroko shinãnifo ari nokopaikakĩ. Nãfãfe tãpinifo Nios ika ari sharafinakõia. Nãskakẽ Epa Niospa a ika ari ato pexe shara faxoni afe ĩpaxanõfo. Nãskakẽ Niospa atoõnoax inimakĩ ato yoikĩ iskafani: “Ẽfi mãto Nioski,” ixõ atoõnoa yoini inimayanã. 
\p  
\v 17-18 Anã Abrahamnoa ẽ mato yoinõ. Epa Niospa tãpipaini Abraham chanĩmara fakĩ nã yoia keskara akimãkai. Nãskaxõ yoikĩ iskafani: “Mĩ ina ea retexotamaroko mĩ fake fisti Isaaca ea retexõfe,” ixõ yoini. Nãskatari Epa Niospa taefakĩ Abraham yoiyoni ãfe fake fisti Isaacaõnoax ãfe fenafo ichapakõi ixiaifo. Nã afara sharafo Niospa Abraham yoiyoni keskafakĩ ãfe fake Isaacaõxõ keyokõi axoxixakĩ tãpimayoni. Nãnori Niospa Abraham yoiaino ãfe fake fisti retexõ Nios inãkerani. Nãskaxõ Nios chanĩmara fakõixõ nã yoini keskakõi fani.  
\v 19 Nãskaxõ Abraham ãfe shinã mẽraxõ shinãkĩ iskafani: “Epa Niospa ea yoia iskafakĩ: ‘Mĩ fake Isaaca ea retexõfe,’ ea faito ẽ shinã Niospa afama mĩshti fatiro. Akka ẽfe fake nafiakẽ Epa Niospa samama ea otofaxotiro,” ixõ shinãni. Chanĩma, ãfe fake nakerani. Nãskakẽ Abraham shinãni ãfe fake nafiakẽ Niospa otofaxotiro. 
\p  
\v 20 Akka Isaaca nãatori Nios chanĩmara fakõipaoni. Nãskakẽ ãfe fake feronãfake rafe yoini a inõpokoai: “Jacobo yafi Esaú, chipo Epa Niospa afara shara mato faxoxii,” ato fani. 
\p  
\v 21 Nãskarifiakĩ Jacobori Nios chanĩmara fakõipaoni. Nãskakẽ mã chaima naito Niospa ãfe shinã mẽra shinãmanai keskafakĩ ãfe fafa rafe, José fake rafe, Niospa ato shara faxonõpokofai ato yoini. Ato yoita ãfe chatiki mẽstexõ Epa Nios kĩfiyanã aicho fani. 
\p  
\v 22 Nã Joséri Nios chanĩmara fakõipaoni. Nãskaxõ mã chaima nakĩ ãfe yorafo yoikĩ iskafani: “Chipo Epa Niospa nõko fenafo nã israelifo Ejipto anoa ato iyoxii kiki. Fokakĩ ẽfe xaori foxikani kiki. Nã ikaifo ano ea maifaifoxikakĩ,” ixõ ato yoiyoni. 
\p  
\v 23 Moisés ãfe apa feta ãfe afa Nios chanĩmara fakõipaonifo. Nãskakẽ Moisés yomeax sharapishtakõikẽ ãfe apa feta ãfe afa õini. Nãskaxori tãpinifo mã yosixõ a Niospa yoiai keskara yonosharakõixiaito. Nãskakẽ Ejipto anoa xanĩfãfe ato yoini a israelifãfe ãto fake feronãfake yome mĩshti keyokõi ato rẽtekĩ mitokakõinõfo. Askafiaifono Moisés ãfe apa feta ãfe afa Nios chanĩmara fakaxõ ratekakima tres oxe anifo ãto fake onekakĩ xanĩfãfe ãto fake rẽteyamanõ. 
\p  
\v 24 Moisés ãfe chata keskara ini Faraón. Askafafiaifono Moisés askara fichikaspani. Nãskaxõ ato yoini iskafakĩ: “Xanĩfo Faraónkai ẽfe chatama. Ãfe fakerikai ẽfe efama,” ixõ ato yoini, chanĩmara fanõfo israelifo ãfe kaifo ini. Moisésri Nios chanĩmara fakõipaoni.  
\v 25 Akka Moisés shinãni iskakĩ: “Ẽ Ejipto anoax xanĩfãfe pexe ano ikax ẽri ato fe inimasharakai xini ranã ayanã ẽ afara chakafatiro Nios shinãyamakĩ. Ẽ askapaima,” ixõ shinãni. Askapaitamaroko iskafakĩ shinãni: “Ẽkai ejiptofo feta afara chakafapaima, askakimaroko ẽfe kaifo fe nã Niospa inafo omiskõiaifo keskai ẽri ato fe omiskõi.  
\v 26 Ẽ Egipto anoafo ato afara fĩapaikĩ ẽ ato fĩakerani. Ẽ fĩaxoma, ea mekafafiaifono Egipto anoafãfe, nãskanõ. Akka afarafoyafiax shara. Akka Cristo, a Niospa noko nĩchixii noko ifinõ, nã sharafinakõia. Ẽ Cristoõnoax omiskõifiano Epa Niospa a ika arixõ ẽ nokoaito afara sharakõi ea inãxii ẽ afe ĩpaxanõ,” ixõ shinãni. 
\p  
\v 27 Akka Nios chanĩmara fakõinax Ejipto anoax ãfe kaifo fe Moisés kani. Ejipto anoax ãto xanĩfo akiki õitifishkifiaino akiki mesetama nã xanĩfãfe mai anoax kani. Akka Nios tsõa õiyamafitirono Moisés fisti Nios fe rafekõiax afe mekapaoni. Nãskakẽ nã Niospa yoini keskafakĩ enepaonima.  
\v 28 Akka Ejipto anoax israelifo foyoafomano Niospa Moisés yoini iskafakĩ: “Mĩ kaifo yoife ovejanã fake retenõfo. Nãskakaxõ nã oveja imi ãto pexe fepotifo raish anõfo, askafafono õiki ẽfe ãjirinĩ ãto fake iyoafo rẽteyamanõ, nã Ejipto anoafo ãto fake iyoafo ato reteaitĩa,” ixõ Niospa yoini. Nãskakẽ Moisés nã Niospa yoia keskara chanĩmara faxõ ãfe kaifo israelifo yoini. Nãskakẽ israelifãfe ãto fake iyoafo nanima. 
\p  
\v 29 Nãskakẽ israelifãfe Nios chanĩmara fanifo. Nãskakaxõ nã fakafã ãfe ane Õshi pokefainifo. Epa Niospa nẽxpakĩa fakafã shinãfatanaino israelifãfe pokefainaifono ato acho Ejipto anoafo fonifo ato retepaikani. Mã fakafã nẽxpakĩa kãiyaifono Niospa atoki fakafã yosifani. Nãskakẽ ãsai mitokomenifo. 
\p  
\v 30 Akka Niospa israelifo yoini: “Nã Jericó pexe rasi kachiori siete nia foaketi fayakenõfo,” ixõ yoini. Nã pexe rasi kachiori simĩto kene keyakõi masoa ini. Nãskakẽ israelifãfe a pexe rasi kachiori foaketi fayakenaifono nã Niospa yoini keskara nã pexe rasi maokomei fetseni.  
\v 31 Akka keyokõi Jericó anoafo nai keyonifo. Akka nã kẽro chotaferoma ãfe ane Rahab nã fisti nanima nãatomãi mã Nios chanĩmara faax. Akka Jericó pexe rasi ano foyoafomano israeli xanĩfãfe feronãfake rafe nĩchini ato onãti fatanõfo. Mã foafono nã rafe Rahab ãfe pexe mẽra ato ikimani tsõa ato fichixõ reteyamanõ. Nãskakẽ nã Rahab tsõa retenima ãfe kaifo retefikakĩ. 
\p  
\v 32 Akka, ¿anã afaa fetsa ẽ mato yoitiromẽ? Nã yora ichapafãfe Epa Nios chanĩmara fapaonifoõnoa ẽ mato yoikĩ keyotiroma. Nã Gedeón ikaino, Barac ikaino, Sansón ikaino, Jefté ikaino, David ikaino, Samuel ikaino nã Niospa meka yoimis fetsafoõnoari ẽ mato yoipanã ẽkai yoikĩ keyotiroma.  
\v 33 Nãskakẽ afãfe Epa Nios chanĩmara fakaxõ ãto sorarofo yoinifo a ato noikaspaifo ato retenõfo. Nãskakẽ a ato noikaspaifo ato retepaifikakĩ finõkõinifo. Akka atiri xanĩfo ikaxõ ãfe yorafo kexesharapaonifo isharanõfo. Nãskakẽ a Niospa ato yoiyoni keskara ato axosharani. Nãskatari atiri nã Nios Ifofaafãfema poomã mẽra ato potanifo. Askafiaifono Epa Niospa ato kexesharani poomãnã ato pinõma.  
\v 34 Akka atiri xanĩfo chakafãfe ato yoinifo chiifã mẽra ato potanõfo. Chii mẽra ato potafiafono Niospa ato kexesharani koonõfoma. Atiri kenofãfe ato retepaifikakĩ tsõa ato retenima. A isinĩ ikani ato yora pachikõifokẽ afori Niospa ato mitsiskõi imani. Nãskakẽ nã ato noikaspaifãfe ãto sorarofãfe ato retepaifiaifono nãfãferoko ato ĩchonifo ato afeskafanõfoma.  
\v 35 Kẽrofãferi Nios Ifofaino, fake naano Niospa ato otofaxoni anã ninõ. 
\p Akka fetsafo Nios chanĩmara fakõinafono nã Nios Ifofaifãfema ato omiskõimanifo ato retekakĩ. Nãskaxõ ato yoikĩ iskafanifo: “Mã Nios Ifofayamaito nõ mato afeska faima mã kasharatanõ. Akka mã Ifofaito nõ mato retei,” ixõ ato yoinifo. Ato askafafiaifono tsoa Nios shinãmakinima. Nãskakẽ ato retenifo ato reteyoafomano shinãkĩ iskafanifo: “Noko retefiaifono Epa Niospa samama noko õtofatiro nõ afe ĩpaxanõ,” ixõ shinãnifo.  
\v 36 Askatari a Nios chanĩmara faa fetsafori ato kaxemetsamafayanã ato koshaketsayanã ato cadenãnã metexkere ata ato otexkere axõ ato karaxa mẽra ikimanifo.  
\v 37 Askatari ranãri tokirinĩ ato tsakaketsakaxõ ato retenifo, ranãri sirochonõ nakirafe ato xatenifo nanõfo, ranãri kenopa ato retenifo, ato askafaifono. Nãskakẽ nã afaamaisfãfe ano rapatiyamano oveja fichi iyamai cabra fichi rapati fakaxõ safenifo. Ato retepaikakĩ ato ĩchorifaifono. Nãskakẽ omiskõikõinifo.  
\v 38 Nãskakẽ tsõa istoma anoax machi keya anoax a mafa kini mẽra ikikata mai kini mẽrari ikinifo. Akka nã Nios chanĩmara faafo a Nios Ifofaafãfema ato shara fanifoma Niospa ato õia sharafiafono, ato chakafapaonifo. 
\p  
\v 39 Nãskakẽ nãfo omiskõi finafikakĩ Nios Ifokõi fapaonifo. Nãskakẽ Niospa atoõnoa yoikĩ iskafani: “Nafãfe ea nikakõikani. Nãskakẽ ẽ atoki inimakõi omiskõifikani isharakõimisfo,” ixõ Niospa atoõnoa yoini. Askafikaxõ a Niospa ato yoiyoni keskara tsõa fiama ini.  
\v 40 Nãskakẽ Epa Niospa ato manamayopaoni. Akka nõri nõ Nios chanĩmara faax nõ ato fe a Jesús ika ari nõ nokoxii. Nãskakẽ yora fisti keskara nõ ato fe ixii a keskara shara noko imaino. Nãskaxõ ato feta anã afaa fetsa nõ yopapakenakama. A Niospa yoiyoni keskara keyokõi noko inãxii nai mẽraxõ. 
\c 12  
\s1 Nõ Jesúsnoa shinãsharatiro 
\p  
\v 1 Akka nõko xinifãfe Nios chanĩmara fapaonifo. Nãskakẽ nõri ato keskara nõ itiro. Nãskaxõ a afara chakata noko nẽtefapaiyai keskara nãfo nõ kachikiri fakõini. Nãskaxori afara chakafãferi samamakõi noko afara chakafamapaitiro. Nãfo chakari nõ kachikiri fakõini a Niospa noko amapaiyai keskara fisti axiki, fena fenakima a noko yoiai keskara nõ axosharakõi.  
\v 2 Akka nõ Jesús fisti shinãfafãinõ. Nãfi nõko Ifokõikĩ noko tãpimamiskõi. Akka nãato noko õimakĩ taefanikĩ afara afeskara afiaino nõ Nios chanĩmara fakõinõ. Nãskaxõ a Apa yoia keskara akõipaoni. Nãskakẽ nõri a keskara inõkãfe. Nãskaxõ mã mastakakĩ yorafãfe ferotaifi rãfinĩ fanifo. Askafafiaifono omiskõiyanã tenekõini mãmãi tãpiax a chipo xanĩfo ixõ Apa Nios feta noko ifixiai inimakõiyanã Apa Nios ika arixõ. 
\p  
\v 3 Yora chakafãfe chakafafiaifono tenekõini. Nãskaxõ a nokoõnoax omiskõini keskara shinãkĩ matori omiskõimanaifono, shinãchakatama mãto õiti fekaxtefayamakãfe. Nãskaxõ a Niospa mato amapaiyai keskara mã enetiroma.  
\v 4 Akka yorafetsafãfe mato afara chakafamapaimisfo anã mã Jesús Ifofanõma, ato nikatama mã omiskõifi mã omiskõi sharamisma. Akka Jesúsroko omiskõi finakõini.  
\v 5 Mã mã shinãmakia keskara ẽ anã mato yoinõ. Mã ãfe fakekẽ, Epa Niospa mato yoini keskara ãfe meka kirikano kenea iskara fẽtsa keneni: 
\pi1 Ẽfe fãke, ẽfi mĩ Ifokõikĩ. Akka nã ẽ mia yoiai keskara mĩ ayamaito ẽ mia omiskõimani mĩ ea nikanõ, mĩ ea Ifofasharanõ. Ẽ mia askafaino, akai afamara mĩ fatiroma. Askatari shinãchakayamafe. Tãpisharafe.  
\v 6 Nã ẽ aõ noiai tãpimasharai aõ noikĩ. Ẽfe fake keyokõi omiskõimani anã nikasharanõ, 
\m ixõ keneni a Niospa shinãmanaino.  
\v 7 Epa Niospa mato tãpimapaiyai keskara tãpikãfe. Nãskax omiskõifikĩ shinãchakatamaroko tenesharakõikãfe. Nãskakẽ omiskõixõ mã tãpitiro mãmãi Niospa fakefoxõ. Apafãfe ãto fakefo tãpimatirofo keskafakĩ Epa Niospa mẽstekõi nokori tãpimani.  
\v 8 Keyokõi Epa Niospa ãfe fakefo ato tãpimanaito mã meemisfo. Akka Epa Niospa noko tãpimayamaino nõ ãfe fakekõifo itiroma. Nãskax nõri ãfe yorafo itiroma.  
\v 9 Akka nõ yomekẽ nõko epafãfe nono mai anoxõ noko tãpimapaonifo. Nãskakẽ nõ shinãkĩ nõ ato nikakõimis. Akka Epa Niospa noko tãpimanaino nõ tenekõitiro. Nãskaxõ nã noko tãpimapaiyai keskai nõ inimayanã nõ isharakõitiro.  
\v 10 Nõko epafãfe ãa shinãkaxõ noko tãpimamisfo nõ shara inõ. Akka mã nõ yosiano anã noko askafamisfoma. Nãskarifakĩ Epa Niospa mẽste shinãsharakõikĩ, nokori shara fapaikĩ noko tãpimamis a keskara shara nõ inõ.  
\v 11 Chanĩma, noko tãpimayanã noko omiskõimanaino nõ shara meetiroma. Paekõi mei nõ ichopaitiro. Askafixõ mã yosixõ chipo nõ shinãtiro Epa Niospa noko tãpimasharai, nõko õiti inimasharatiro shara noko imaino. 
\s1 Nõ Niospa meka nikakaspaino mesekõi ixii 
\p  
\v 12 Nãskakẽ afara afeskara afiaino shinãchakayamakãfe. Epa Niospa mato tãpimapaiyai keskara fisti akãfe. Nãskaxõ Nios Ifofakĩ kachikiri fatama nikasharafafãikãfe. Nãskatari ãfe meka shara nikakĩ enepaiyamakãfe. Yora pachi keskara iyamakãfe.  
\v 13 Nãskax isharakõikãfe Jesús Ifofasharaxikakĩ. Mã askaito õikani nã Jesús Ifo sharafaafoma mato fe rafepaitirofo Jesús keskara shara ipaikani. 
\p  
\v 14 Nãskakẽ mẽenãpaitama keyokõi yorafo fe isharafafãikãfe. Nãskatari Jesús keskara shara ipaikãfe. Akka tsoa Jesús keskara shara iyamakani afãfekai nõko Ifo õinakafoma.  
\v 15 Epa Niospa noko noikõikĩ ãfe Fakeoxõ noko sharafa fafafãimis. Nãskakẽ a Niospa noko amapaiyai keskara akãfe fenoxikakima. Askatari mãto shinãmã afaa shinãyamakãfe. Akka mãto shinãmã mã afara shinãkĩ fetsafori mã ato afara chakafamatiro akairi askara anõfo.  
\v 16 Nãskatari mãto ãfima fe iyamakãfe. Kẽrofori mãto fenema fe iyamakãfe. Akka nõ naino, nõko fake iyoato nõko afama mĩshti fitiro. Akka Esaú shinãsharanima. Fonãikĩ ãfe exto yõkani ãfe ẽxto pimanõ. Nãskaxõ a ãfe apa inãpaiyai shinãkima ãfe exto yoini iskafakĩ: “Epa naano ãfe afama mĩshtifo ẽ fiai ẽ mia inãnõ kopifakĩ,” ixõ yoini. Nãskakẽ nã Esaú keskara iyamakãfe. Atokai Niosnoa shinãpaonima. Akka a Niospa mato inãpaiyai keskara fikaspakĩma, fikãfe.  
\v 17 Mã mã tãpia ãpa afara shara inãpaiyai keskara fipaifikĩ finima. Nãskaxõ apa yõkakĩ iskafani: “Epa, a mĩa inãpai keskara ea inãfe, ẽ mĩ fake iyoakõi,” ixõ oiaiyanã yõkafiaito ãpa inãnima mãmãi chipokoto fiano. Nãskakẽ õisharakãfe. Mã Nios nikayamai mãri Esaú keskara itiro. Nãskakẽ Niospa mato inãpaiyai keskara mã fitiroma. 
\p  
\v 18 Epa Niospa a nõko xinifo yoini keskara iskaratĩa noko yoimisma a keskara. Ato yoini machi ãfe ane Sión tenãmã fotanõfo anoxõ afara fetsa ato yoixiki. Akka nã machi anoax chiifã erepafãkõi, askatari kõi fakishifãkõi, askatari nẽfefãkõiyanã kana piishini.  
\v 19-20 Nai mẽranoax maneti fãsikõi chãi chãisaito nikanifo. Nãskatari nai mẽraxõ fãsikõi ato yoiaito nikanifo ato Niospa iskafaito: “Na machi ano tsõa mãpetiroma. Mãpeaifãfe tokirinĩ ato tsakakĩ retekãfe. Askatari yoinãfãferi mãpeaito mã retetiro,” ixõ ato yoiaito nikanifo. Nãskakẽ ratekõikakĩ Moisés yoinifo iskafakakĩ: “Moisés, nõ anã Niospa meka nikapaima. Mãchi ari mãpei nõ narisatiro. Nãskakẽ Nios yoife noko anã yoiyamanõ,” ixõ israelifãfe Moisés yoinifo.  
\v 21 Akka Moisésri nã õia keskara ato yoini iskafakĩ: “Ẽri fãsi ratekõi, tari tari iki,” ixõ ato yoini. 
\p  
\v 22 Akka nõkai machi Sión ano nõ kaima. Askatamaroko machi Sión fetsa ano nõ kai, ãfe ane fetsa nã Jerusalén Fena ano a Nios ika ari. Nãskakẽ nãnoax ãfe ãjirifo ichanãkaxõ, “Nios sharara,” fafafafãikani. Akka nã ãfe ãjiri ichapakõifo tsõa ato tanãtiroma.  
\v 23 Nãnori nõ keyokõi a Jesús chanĩmara faafo afe ixii. Akka nã Nios ika ari ãto anefo kenea afe ĩpaxanõfo. Nãskakẽ nõri nõ Nioski nokoa. Nãskakẽ noko yoixii fatofãfe Ifofakanax afe ipanakafomãki. Nã Ifofaafos a keskara shara ato nai mẽraxõ imai afaa chakafamisfoma keskara inõfo.  
\v 24 Jesús noko nãxoyoamano tsõakai nokoõnoax nãxoyonima. Nãskakẽ iskaratĩa Jesús noko nãxonikẽ nõ Nios fe isharapakexatiro. Akka nõko xini Caín onefetsa Abel reteni. Nãskakẽ Epa Niospa Caín yoikĩ iskafani: “Caín, ¿afeskakĩ mĩ exto mĩ reteamẽ? Iskaratĩa ẽ mia omiskõimani,” ixõ yoini. Abel nafianixakĩ aato noko nimapaketiroma, Jesús keskarama. Akka Jesús nanixakĩ noko nimapakenaka. 
\p  
\v 25 Nãskakẽ Niospa mato yoiai keskara nikakaspayamakãfe. Nã nono mai anoxõ nõko xinifo Moisés ato yoini keskara nikayamaifãfe Epa Niospa ato omiskõimani. Akka Jesús Moisés keskarama. Nios ika ariax nokoki fotoni Niospa Fakekõiax. Nãskakẽ a Jesús noko yoiai keskara nõ nikayamaito nokori omiskõimakĩ finakõixii.  
\v 26 Akka Epa Niospa Moisés yafi nõko xinifo machi Sión anoxõ ato yoikĩ ãfe mekapa mai naya naya ani. Nãskaxõ anã ato yoini iskafakĩ: “Anã mai fisti ẽ naya naya axima. Nairi ẽ naya naya axii,” ixõ ato yoini.  
\v 27 Nãskakẽ nã Epa Niospa noko yoini keskaraõxõ nõ tãpitiro nã afara nipatirofoma, Niospa nãfo yamafarisafataxii anã afaa inõfoma. Akka nã Niospa ato imapaiyai fisti itirofo.  
\v 28 Nãskatari a Nios ika ariax mai naya naya itiroma. Nãskakẽ nãno nõ afe isharapakexatiro. Nãskakẽ aõnoa nõ shinãsharayanã nõ kĩfifafãinõ. Nãskaxõ a noko amapaiyai keskara nõ axõaino nokoki Epa Nios inima sharakõixii.  
\v 29 Akka mã nõ tãpia nõko Ifo Nios nã chiifã erepafãi keskara. Akka nã ãfe meka shara nikakaspakĩ kachikiri faifono Niospa chiifã erepafãi mẽra ato potaxii anoax omiskõipakexanõfo. Nãskakẽ nõ nikasharakõinõ. 
\c 13  
\s1 Afeskaxõ nõ Nios inimamatiromẽ 
\p  
\v 1 Mãfi Cristo afe yorafokĩ. Nãskakẽ mã ranã nõinãi xateyamakãfe.  
\v 2 Yora fetsafori mai fetsa ariax oaito mãto pexe anoxõ ifisharakãfe. Nãskakẽri tãpixoma fetsafãfe yorayama fiano ãjirifo fiano ifimisfo. 
\p  
\v 3 Nã karaxa mẽra ikafori ato shinãkãfe. Nãskaxõ ato õiti inimamasharakãfe. Askatari ato axosharakãfe. Nã mã ato fe karaxa mẽra ika keskara shinãkõikãfe. 
\p  
\v 4 Feronãfakefo, mãto ãfifo fe nõinãsharakãfe. Nãskax isharakãfe. Askatari mãto ãfima fe ipaiyamakãfe, mãto ãfi fisti fe ikãfe. Kẽrofori mãto fenema fe ipaiyamakãfe, mãto fene fisti fe ikãfe. Akka nã ãto ãfima fe ikaifono, kẽrofori ãto fenema fe ikaifono, nãskarafo Niospa ato omiskõimaxii. 
\p  
\v 5 Akka kori ichapa noiyamakãfe. Askatamaroko inimakãfe afe tii mã ayamakĩ. Epa Niospa yoinikĩ iskafakĩ: “Ẽkai mato makinoax paxkanakama. Askatari ẽ mato potanakama. Nãskakẽ a mã yopai ẽ mato inãxii,” ixõ yoini.  
\v 6 Nãskakẽ chanĩmakõi nõ yoitiro iskafakĩ: 
\pi1 Afara afeskara afiaito ẽfe Ifãfe ea axomis. Nãskakẽ ẽ rateima, Epa Niospamãi ea kexesharaino yorafãfe ea afeskafanõfoma, 
\m ixõ nõ yoitiro. 
\p  
\v 7 Niospa meka yoimisfãfe mato yoinifo keskara atoõnoa shinãfafãikãfe. Nãfãfe mato shara famisfo. Nãskakaxõ nõko Ifo Jesús chanĩmara famisfo. Nãskakẽ ato keskara ikãfe nõ Jesús Ifofasharakõinõ. 
\p  
\v 8 Akka Jesucristo nã ipaoni keskara ĩpanaka. Anãkai iskaratĩa fetsatiroma.  
\v 9 Akka fetsafãfe mato anorima yoipaikani, a tsõa nikamisma keskara. Nãskakẽ ato nikayamakãfe mato iskafakĩ yoipai ani kiki: “Nõko xinifãfe noko yoinifo keskara nõ nami fetsa piaino nõko shinã mẽra noko shinãmasharatiro,” ixõ mato yoipai ani kiki. Akka a nõ piaitokai nõko shinã mẽra noko shinãmasharatiroma. Askatamaroko Niospa noko noixõ noko imasharatiro a keskara shara nõ inõ. 
\p  
\v 10 Nãskakẽ nõ chanĩmara famis Jesucristo ifi cruz ikakinoax noko nãxoni nõko chaka noko soaxoxiki. Akka Jesucristo chanĩmara fatama nã Moisés ato yoini keskara fisti chanĩmara famisfo. Nãskakẽ afãfekai ato chaka soaxotirofoma. 
\p  
\v 11 Akka nã Moisés ato yoini keskai a ato Nios kĩfixomis xanĩfo fisti, ares fisti pexe kene fetsa mẽra ikipaoni, nã mẽra yoinã ina imiya ikikẽ õikĩ Epa Niospa ato chaka soaxonõ. Akka nã yoinãfãfe ato kaya pexe rasi pasotaixõ koofapaonifo.  
\v 12 Nãskarifiai Jesús Jerusalén pasotainoax noko omiskõixokĩ ãfe imi foax noko nãxoni nõko chaka noko soaxoxiki a keskara shara nõ inõ.  
\v 13 Akka nõri Jesús ipaoni keskara inõkãfe a nõ ipaoni keskara anã ixikima. Nãskaxõ ãfe kaifãfe potanifo keskafakĩ nokori nofe yorafãfe potatirofo. Nãskakaxõ Jesús ĩchaketsanifo keskafakĩ nokori aõxõ ĩchatirofo. Akka Jesúsnoa chaka shinãmisfo keskafakĩ nokori aõxõ chakafatirofo.  
\v 14 Nono mai anoax nõ omiskõifikĩ nõ shinãchakaima, mã nõmãi tãpiax nono mai ano nõ ipanakama. Askatari mã nõ tãpia a Nios ika ari nokoax nõ afe ipanaka. Nãskakẽ nã nõ manasharamis. 
\p  
\v 15 Jesús noko nãxonioxõ nõ Epa Nios aicho fai. Akka nõ yoikĩ iskafatiro: “Aicho Epa Niosi, mĩ Fake Jesús ẽfe Ifokõi. Aõxõ ẽ mia aicho fai,” ixõ nõ yoitiro.  
\v 16 Askatari ato shinãmakiyamakãfe mã afarayaxõ a afaamaisfo ato inãsharakãfe. Mã ato askafaito õikĩ Nios matoki inimasharakõi kiki. 
\p  
\v 17 Akka nã ichanãti pexe anoxõ Niospa meka mato yoimisfo ato nikasharakõifafãikãfe. Nãskax nã mato yoiaifo keskakõikãfe. Nãfãfe mato kexesharamisfo mã Jesús nikasharanõ. Akka nãfãferi tãpiafo Nios ari nokoaifãfe ato yõkaxii iskafakĩ: “¿Mã ẽfe meka mã ato tãpimasharamismẽ?” ixõ ato yõkaxii. Nãskakẽ ato nikasharakãfe inimakõinõfo. Akka mã ato nikayamaino inimatirofoma, shinãchakatirofo. Nãskaxõ mato axosharatiroma. 
\p  
\v 18 Nokori Epa Nios kĩfixokãfe. Epa Niospa noko amapaiyai keskara mã nõ apaimiski. Nãskaxõ nõko shinã mẽraxõ nõ afaa chaka shinãima. Nõ isharapaikõi.  
\v 19 Eari Nios kĩfixokãfe matoki ea samama nĩchinõ ẽ anã mato fe inõ. 
\s1 Ato Nios kĩfixoyanã mã mekai xatekĩ ato yoini 
\p  
\v 20-21 Epa Niospa noko inimamakõimis nõ afaa shinãchakanõma. Nõko Ifo Jesús mã nokoõnoax nafiakẽ Apa Niospa otofani Jesús keyokõi finõax noko kexemis inõ. Jesús noko nãxoniõnoax Epa Nios fe nõ afe yora ipanaka. Nãskakẽ mã afara shara yopaito Epa Niospa mato inãtiro a mato apaiyai keskara shara mã anõ. Ãfe Fake Jesucristoõxõ nõko shinã mẽra noko shinãmasharax nokoki inimakõixii. Nãskakẽ keyokõichi Jesúsnoa nõ yoisharapakenaka. Nãskara sharakõi ĩpanaka. 
\p  
\v 22 Efe yora mĩshtichi, nã ẽ mato ichapama yoia keskara nikasharakãfe fena fenakãkima. Nã ẽ mato kenexona keskai mãto shinã mẽra mato shinãmasharaxii kiki.  
\v 23 Ẽ mato yoipai mã nofe yorashta Timoteo iskaratĩa karaxa mẽranoax mã tsekea. Akka samamashta ekeki oano ẽ afe kai mato ari. 
\p  
\v 24 Keyokõi ichanãkaxõ a mato Niospa meka yoixomisfo yafi a mato kexemisfori nõ ato yoisharai. Akka nono Italia anoxori nã Nios Ifofaafãferi mato yoisharakani. 
\p  
\v 25 Epa Niospa keyokõi mato noikĩ mato shara faxõfafãinõ. Nã tii.