\id 2TI - Yaminahua NT -Peru 2008 (DBL -2013) 
\h 2 TIMOTEO 
\toc1 Pablo Timoteo Afianã Kirika Kenexõ Fomani 
\toc2 2 Timoteo 
\toc3 2 Ti. 
\mt1 Pablo Timoteo Afianã Kirika Kenexõ Fomani 
\c 1  
\s1 Pablo Timoteo yoisharani 
\p  
\v 1 Ẽkĩa Pablo ẽ mia kirika kenexõ fomai. Epa Niospa fichipaiyai keskafakĩ Cristo Jesús ea katoni aõnoa ãfe meka shara ẽ yoifofãsafanõ. Ea yoini iskafakĩ: “Keyokõi yorafo yoife iskafakĩ: ‘Jesucristo matoõnoax nãxoni mãto chaka mato soaxoxiki nã chanĩmara faafo tii afe nĩpaxanõfo,’ ixõ ato yoife nã ẽ mia yoiai keskafafe,” ixõ Jesús ea yoini.  
\v 2 Timoteoshta, ẽ mĩo noikĩ ẽ mia kirika kenexõ fomai mĩ tãpinõ. Epa Nios nõko Ifo Cristo Jesús feta mia noikĩ mia shara famanõfo. Askatari mĩ shinã mẽra mia shinãmasharakõinõfo mĩ õiti fekaxtenõma. 
\s1 Ato Jesúsnoa yoisharafe 
\p  
\v 3 A ẽfe xinifãfe Epa Nios yonoxosharapaonifo keskari fakĩ, ẽri a yonoxosharai. Ẽ mẽraxõ ẽ afaa shinãchakayamafai ẽ yonoxosharai. Nãskakẽ ẽ mia Nios kĩfixõfafãini aicho fakĩ. Pena tii yafi fakish tii ẽ mia Nios kĩfixõfafãini.  
\v 4 Nãskakẽ mẽ oaino, mĩ ea shinãi oiaito ẽ mia õiferani. Nãskakẽ ẽ anã mia õisharapai, mia õi ẽ inimasharakõixiki.  
\v 5 Taefakĩkõi mĩ chichi Loida Jesús Ifofani. Askata mĩ efa Euniceri Jesús Ifofani. Afãfe Ifofasharakõimisfo keskafakĩ, mĩri Ifofasharai. Mẽ mia tãpia mĩ Ifofasharakõiaito nãskakẽ ẽ mia yoi. 
\p  
\v 6 Anã shinãmakiyamafe ẽ mia mãmãxõ ẽ mia Nios kĩfixoni. Nãskakẽ Niospa mia katoni Jesús yoimis mĩ inõ. Mã chii nokakẽ nõ anã xofisa fatiro anã xofisanõ. Nãskarifiakĩ mĩ anã yorafo ato yoipaima mã mĩ xokenãifinaxõ askara meekĩ mĩ Nios kĩfitiro anã mia õiti fepeaxosharanõ, mĩ anã ato yoisharanõ inimayanã a mĩ taefakĩ ato yoini keskafakĩ.  
\v 7 Nãskakẽ Niospa Yõshi Sharapa noko yorafoki mesematama. Aõxõ afama mĩshti noko amatiro. Askatari noko ato noimasharai. Aõxori noko shinãmasharatiro anã nõ chakafanõma.  
\v 8 Askafai rãfiyamafe Jesúsnoa yorafo yoitaifãfe rãfikima. Askatari eõri rãfiyamafe. Ẽ Jesucristo ato yoirifaito ea karaxa mẽra ikimatifoki. Mĩri Jesús ato tãpimasharafe; mĩ askaito, miari omiskõimanaifono rateyamafe. Jesúsnoax mĩ omiskõiaito, Niospa mia axoxii.  
\v 9 Akka Niospa ãfe Fake Cristo Jesús noko nĩchixoni nokoõnoax nãxoyonõ nõko chaka noko soaxoxiki. Askaxõ noko shinãni afe yora nõ inõ. Nõ yora chakafofiakẽ Niospa noko noimis. Taefakĩkõi Niospa mai onifaxoma, a inõpokoai tãpixõ, noko shinãni noko ifixixakĩ Jesúsxõ.  
\v 10 Jesús noko ano oamatai Niospa noko ifipaiyai anori nõ tãpipaonima. Akka rama iskaratĩa mã nõ tãpia noko ifimis Jesucristo noko nãxoni. Nãskax iskaratĩari nõ nai, nõ rateima omiskõipakenakafo mẽra nõ kairoko. Nõ Nios ari kaax anã nõ naxima. Jesús noko chaka soaxonano nõ Nios ari nĩpanaka. Mã iskaratĩa nõ tãpia Jesús noko nãxoni nõ chiifã mẽra kanõma noko ifiano. 
\p  
\v 11 Niospa ea katoni na meka shara Cristoõnoa yora fetsafo ẽ ato tãpimanõ.  
\v 12 Nãskakẽ ẽ karaxa mẽranoax Cristoõnoax omiskõifi ẽ rãfima. Ẽ Jesús tãpikõiax chanĩmara fayanã. Jesús ẽfe chaka taefakĩ ea soaxonitĩa ẽ Epa Nios iskafakĩ yoini: “Epa Niosi, ea kexesharapakexafe Jesús afianã oaitĩa,” ixõ ẽ yoini keskara ea axoxii ẽ chanĩmara fakõini. 
\p  
\v 13 Na ẽ Cristo Jesúsnoa mia chanĩmakõi tãpimana shinãmakiyamafe. Ẽ mia mẽstekõi tãpimana keskafakĩ, nãskari fakĩ ato tãpimafe. Cristo Jesús chanĩmara fakĩ afe rafekĩ aõxõ yorafo noife mĩ afe rafeakĩ.  
\v 14 Nã ẽ mia yoia keskara mĩ mẽraxõ shinãfe, shinãmakixikima. Ãfe Yõshi Shara mĩ mẽra ikano mefeta aki. Õifãi, Niospa mia yoia keskafakĩ kachikiri fayamafe. 
\p  
\v 15 Mã mĩ tãpia keyokõichi chanĩmara faafo Asia mai anoafãfe ea õifainafo. Askatari ato feta Figelo feta Hermógenesri ea õifainafo ato fe fokãkĩ.  
\v 16-17 Akka Onesíforokai askanima, eõ rãfinima ẽ karaxa mẽra ikikẽ. Nãafi Roma ano nokoxõ pena tii ea fenafafãikĩ ea karaxa mẽranoa fichita, ea õiyoi nã otitaiapaoni mẽxotaima ea õifaa õifakĩ, ea pishta inimamani. Nãskakẽ nõko Ifãfe Onesíforo ãfe ãfinõ ãfe fakefonõ Efeso anoxõ ato noikĩ ato kexesharaxonõ.  
\v 18 Onesíforo Efeso anoxori ea yonosharaxopaoni, mĩfi a õixõ tãpisharakĩ. Jesucristo anã fotoxõ noko ichanãfaxõ Onesíforoki inimakõikĩ noikĩ axosharaino ẽ askara fichipai. 
\c 2  
\s1 Nõ Jesús Ifofakĩ oa soraronõ ãfe xanĩfo nikakõiai keskafakĩ nõri Nios nikasharakõitiro 
\p  
\v 1 Timoteoshta, Jesucristo ãfe kerex sharaõnoax isharafe, afaa chakafaxima.  
\v 2 Ẽ yorafo Jesúsnoa yoiaito mĩri ea nikafafãini. Nãskarifiai mĩ ato chanĩmara fasharatiro. Nãskaxõ a feronãfakefãfe a shinã sharaifo ifife mĩ ato tãpimaxikĩ afãferi fetsafo tãpimanõfo. 
\p  
\v 3-4 Akka soraro õiti sharayato omiskõifikĩ tenetiro. Ãfe pexe shinãyamata ãfe xanĩfo fisti ifofaxõ nikasharakõi. A afara yonoai keskara ãfe xanĩfãfe yonomanaino soraro sharapa yonosharatiro. Nãskarifakĩ Niospa mia yonomapaiyai keskari fakĩ yonosharaxõfe fanĩrira fetsa shinãkima. Jesúsnoax omiskõifi meseyamafe.  
\v 5 Askatari fetsafo xonõnõnãxikakĩ ĩkisi itipinĩsharatirofo xonõnõnãpaikani. Askatari mĩri shinãsharafai Niospa mia yoiaito nikasharakõife. Akka mĩ nikasharayamaito Niospa mia, “Aicho, mĩ fãsi sharakõi,” ixokai mia yoitiroma.  
\v 6 Askatari feronãfãke yonosharamiskõi ãfe tare efapafaxõ, ĩkisi ãfe yono fitiro pixikĩ. Nãskarifiakĩ mĩri Jesúsnoa yonoxosharamis Jesús mikiki inimakõinõ mia afara shara inãxii.  
\v 7 Ẽ mia yoiai keskara shinãsharafe. Nõko Ifãfe mato tãpimasharai kiki. 
\p  
\v 8 Nãskakẽ shinãmakiyamafe Jesucristo naafiakẽ anã Niospa otofani noko ifimis inõ. Nã David ãfe fena. Nãnori nã meka shara ẽ yoifafãimis.  
\v 9 Nã ẽ yoifiaito, yorafãfe Jesús Ifofaafoma õitifishkikakĩ. Ẽ Niospa mekasharaõnoa yoiaino ekeki õitifishkikakĩ ea karaxa mẽra ikimanafo. Ẽ afaa chakafayamafiakẽ ẽ feronãfake chaka keskarakẽ ea karaxa mẽra ikimanafo. Ea ikimafianifono Niospa meka Jesucristoõnoa ẽ enetiroma.  
\v 10 Nãskakẽ ẽ atoõnoax omiskõifikĩ ẽ tenekõi a Jesús Ifofaafo tii ẽ ato tãpimani chanĩmara fanõfo, Nios fe ĩpaxakakĩ. 
\p  
\v 11 Na meka sharakõi nikafe: 
\pi1 Nõ Jesúsnoax nakĩ nõ chanĩmara faax nõ afe ĩpanaka.  
\v 12 Askatari nõ Jesúsnoax omiskõifikĩ nõ tenei, nõ Jesús fe Epa Nios ariax xanĩfo ĩpanakakĩ. Akka nõ Jesús potakĩ, “Niospa fakemara,” ixõ nõ askafaito Jesús noko yoitiro iskafakĩ: “Mã ea Niospa Fakemara faito ẽri mato kopitiro iskafakĩ: Mĩ ẽfe fakema,” fakĩ noko fatiro.  
\v 13 Askatari nõ Jesús nikayamai nõ isharayamafimisno, akka akai askarama, aroko isharakõimis. Aatokai afaa chanĩ yoimisma, ãfe meka chanĩmakõi. Aakai õiti ranãyama. 
\s1 Afe keskara a Niospa meka yoimis shara itiromẽ Nios akiki inimanõ 
\p  
\v 14 Na ẽ mia yoiai anori, mefe yorafo ichanãmisfo ato shinãma fafãife. Niospa mia xafakĩa õiaino ato yoife Niospa mekaõnoa feratenãnõfoma, feratenãkani aõnoax mekanõfoma. Akka fatotokai yoisharaimãkai fatotori yoisharaimamãkai ikaxõ tsõa tãpitiroma tãpipai kakĩ. Anorima nika kakĩ tsõa tãpitiroma. Askakani fanĩrira mekamisfo ãa chanĩkani.  
\v 15 Timoteo, Niospa meka pena tii õife. Askafaxõ Niospa meka tãpisharaxõ yorafo mẽstekõi ato tãpimafafãife. Mĩ askaito Niospa mĩõnoa yoitiro iskafakĩ: “Na ea yonoxosharamis, ẽ akiki inimasharakõi,” ixõ mĩõnoa yoixiki. Mia askafainokai mĩ aõ rãfitiroma.  
\v 16 A feratenãmisfo ãto meka nikayamafe. Nõ ãto meka nikaxõ meka mẽstekõi Jesúsnoa nõ nikapaitiroma. Askaxõ anã nõ Nios Ifofapaitiroma. Chakakõi itiro.  
\v 17 Oa yora faraxiki finaxõ, koofi payokometiro keskafakĩ, a yõra anorima yoikĩ yorafo ãto õiti chakana fatiro. Himeneo feta Fileto askara chakakõi ato yoimisfo.  
\v 18 A Jesús oaitĩa a namisfo anã otoxiaifo mã nõ tãpifekẽ, a feronãfake rafeta Himeneo feta Fileto anorima mato yoimisfo. Akka nõ tãpia mã Jesús anã fotoaino Epa Niospa nã namisfo otofaxii. Akka nã rafeta mato pãramisfo ãa chanĩkakĩ. Iskara mato yoimisfo: “Mã finõa a mato yoimisfo keskara. A Niospa namisfo mã ato otofaa,” ixõ a refeta yoimis. Afãfe nã meka nikaxõ shinãkĩ iskafatirofo: “Ooa. Mã nõ nakẽ Niospa noko anã otofaima,” ixõ anorima shinãtirofo. Anori shinãkani Jesús shinãmakitirofo.  
\v 19 Akka Niospa meka chanĩmakõi. Tokirinĩfakai tsõa rafetiroma. Niospa meka nãskarari. Tsõakai ãfe meka fetsafatiroma. A chanĩma, nã yoimis keskara nãskarakõi. Tokirinĩfakĩ yõra keneakai tsõa soatiroma. Nãskarifiakĩ Niospa meka kenenifo iskafakĩ: “Nõko Ifãfe afe yorafo tãpikõia.” Nãskakaxõ, “Afe yorafãfe a afara chakafamisfo keskara potatirofo,” ixõ kenenifo. 
\p  
\v 20 Feronãfãke ãfe pexe efapa sharakõi faxõ a mẽra kecho sharakõifo faa, askaxõ a kecho sharafo mẽra afara sharafo fatiro. Akka a kecho chakafo mẽra afara chakafori fatiro.  
\v 21 Mã mĩ chaka mĩ xatekõiax, nã fẽta xinikĩ afara chaka potatiro keskara itamaroko. Nã sapa choka keskara sharakõi mĩ itiro. Nãskax Jesús keskara shara mĩ ikaino Epa Niospa mia yonomapaiyai keskara mĩ aõxõ afara sharafo faxotiro. 
\p  
\v 22 A naetapafãfe afara chakafo shinãkĩ nã apaiyai keskara faifono mĩri askayamafe. Anori shinãtamaroko Niospa fichipaiyai keskara shinãfe, Jesús chanĩmara fafãi, yorafo noikĩ, fetsafãferi shinãsharakõiaifono, Jesús Ifofaifo ato fe mẽstekõi isharakõife.  
\v 23 Anã ẽ mia yoinõ, ea nikasharafe. A feratenãifo ato nikayamafe. Ato fe feratenãpaiyamafe. Askara yorafo samama õitifishkitirofoki.  
\v 24 Niospa meka yoimisto tsoa feratetiroma. Anori askatamaroko keyokõi yorafo ato noisharafãi, ato tãpimasharatiro, tenekõisharata ato yoitiro.  
\v 25 Fẽtsa Niospa mekakõi nikakaspakĩ meka anorima fisti shinãito, fenãmãshta ato tãpimasharafe. Mĩ ato askafaino ãto chaka xatetirofo Niospa mefeta akaino. Askaxõ Jesús chanĩmara fakõinõfo.  
\v 26 Nãskafakĩ anã Niosnoa shinãsharanõfo. Oa tarapa mẽra ikia keskara Satanás ato fapai kiki. Nãskaxõ ato amapaiyai keskafakĩ ato yonofafãini. Akka mia nikaxõ Jesús ato ifitiro. Nãskaifono Satanás afianã ato afara yonomatiroma. Afianã tarapa mẽra ikia keskara ikanima. 
\c 3  
\s1 Afeskakanimãkai yorafo na mai keyoaino 
\p  
\v 1 Timoteo, õisharafe. Ẽ mia yoi Jesús chaima oaino fekaxkõi ixii kiki.  
\v 2 Fetsa noitama ãakõi kexemei, askatari fẽtsa ãfe kori fisti shinãfãi, ãakõi anofi inimamis ikãi, Niosnoa chaka yoimis ikãi, askaxõ ãto apa yafi ãto afa nikakaspamisfo ikãi, yonoxofiaifãfe aichora ato famisfoma ikãi, ato noikaspamisfo, Niosnoa shinãtama chakakõi fistis shinãmisfo,  
\v 3 afe yorakõi noiyamafãi, fetsafo noiyamata axokaspafãi, fetsafo ãa pãramis ikãi, ãa apaiyai keskafakĩ enemisma ikãi, mitsisipakõi ikãi, afara mĩshti sharafo noiyamafãi,  
\v 4 askata a afe rafeafo ato chakafafãi, samama õitifishkimis ikãi, “Ẽkai tsoa keskarama,” ixõ yoifãi, Nios noitama afara chaka fisti fakĩ ato inimamapaimiskõi ipaikani.  
\v 5 Askata a Nios Ifofaafo ichanãifono ato fe ichanãkaxõ Niospa meka nikafikaxõ shinãsharakanima. “Nõri Nios Ifofai,” ixõ ãa mato pãrakani. Askax ãa chanĩmisfo Nios Ifofayamafiakanax. 
\p Askaifãfe õi ato fe rafeyamafe.  
\v 6 Askara yorafãfe a fofãsakakĩ ato pãratirofo a kẽro tãpisharamisfoma fanĩrira ato yoimisfo ato anorima yoiaifãfe. Atirifãfe noko yoikõikanira ato famisfo. Nãskakẽ a xotofakefãfe noko yoikõikanira ikaxõ a yoiaifo anori ato nikataifaafo. Nãskakẽ a kẽrofãfe ãa shinãkani iskakakĩ: “Nõ fãsi chakakakainaito, noko tãpimasharanõfora,” ixõ shinãkani anorima ãto shinã mẽraxõ shinãkaxõ nãskai fekaxtetitaiafo.  
\v 7 Nãskaxõ a ato yoimis fẽtsari ato yoiaito, nikatai fakaxõ Niospa meka sharakõi tsõa mẽstekõi tãpinakafoma. A rama ikai fẽtsari yoiaito, nikakãkiri aõxõ tãpisharapaifikakĩ, tsõa tãpinakama Niospa mekakõi.  
\v 8-9 ¿Mã mĩ shinãimẽ anori aakõi Egipto anoa xanĩfãfe Faraón israelifo ato yonomapaoni, mesemaxõ? Askaito õikĩ Niospa Moisés nĩchini afe yorafo israelifo mai fetsa ari ato iyotanõ. Ato askafaito Faraón ato nĩchikaspani. Askaino a feronãfake rafe ano mokaya inifo; fẽtsa ane Janes ikaino fẽtsa aneri Jambres ini, nã rafe Faraón fe rafeafo ini. A rafe Moiséski õitifishkinifo. Nãskaxõ ãto xanĩfo Faraón ãa pãranifo ato Moisés nikanõma. Askafaifãfe õikĩ chipo ãto xanĩfãfe tãpini Moisés a feronãfake mokaya rafe finõkõia ini. Mokayafiakaxõ afaa tãpiama inifo. Nã rafeta Faraón yoinifo Moisés nikanõma. Nãskafakĩri fetsafãfe Niospa meka mẽstekõi ato nikamakaspakani. Nãskakaxõ Niospa meka mẽstekõi tsõa yoima ãto shinãmã anorima shinãkani. Oa Janes feta Jambres ãto xanĩfo anorima yoiaifono ãto xanĩfãfe ato tãpini keskafakĩ. Nãskafakĩri na iskaratĩa na anorima yoimisfo ãa chanĩaifãfe nõ ato tãpixii afãfe afaa tãpiafoma. 
\s1 Mã Pablo mekai xatekĩ Timoteo yoisharani 
\p  
\v 10 Timoteo, mã mĩ ea õisharakõimiskĩ ẽ ato afo tãpimanaito. Mã mĩ ea õimiskĩ afeskax ẽ isharaimãkai, Nios fisti inimamapaifãi, Jesús noikĩ chanĩmara fafãi, afarafo chakafo nokoaito ẽ tenefãi, ẽ yorafo noifãi,  
\v 11 a yora chakafãfe ea Jesúsxõ chakafaifãfe ẽ tenefãi, askai ẽ omiskõimis. Mã mĩ tãpia ẽ afo tenemis. Askatari mã mĩ tãpia a Antioquía anoa ita, Iconio anoa ita, a Listra anoxõ ea chakafafiaifãfe ẽ teneni. Nãskakẽ nã chakafoõxõ nõko Ifo Nios ea kexesharamis ẽ tenesharakõimis inõ.  
\v 12 Na ẽ mia yoiai anori chanĩma. Nõ Cristo Jesús fe rafesharapaiyaito a Jesús noikaspamisfãfe noko omiskõimaxii.  
\v 13 A yora chakafãfe ãa ato pãrakani. Askatari chipo ato pãrakĩ finakõixikani. Nãskakẽ afara chakafakĩ ato pãraifãfe õikĩ Satanásri ato pãraxii. 
\p  
\v 14 Nãskakẽ Timoteo, na meka Jesúsnoa mĩ tãpisharai. A mia tãpimanafo mã mĩ tãpikõia. Nãskakẽ mĩ tãpisharakõi. Anori meka chanĩmara fafe, shinãmakikima.  
\v 15 ¿Mã mĩ shinãimẽ yomepishtaxõ mĩ Niospa meka tãpiakĩ? A mekaõnoa mĩ shinãsharamiskĩ Cristo Jesús chanĩmara faax nõ afe isharapakenaka.  
\v 16 Niospa ato shinãmanaino feronãfakefãfe kirika ato kenexonifo Niospa meka ato tãpimaxikakĩ. Fetsafãfe afara chakafaifono, nõ ato Niospa meka tãpimasharatiro anã askayamanõfo. Askatari nõ isharapaikõikĩ nõ Niospa meka õikĩ nõ tãpitiro afeska faxõ nõ Jesús Ifofasharatiromãkĩ.  
\v 17 Akka Nios Ifofamisfãfe ãfe meka nikasharakõikaxõ, Nios yonoxosharakõitirofo. 
\c 4  
\p  
\v 1 Timoteo, ẽ mia kaxeta yoima, nikafe. Jesús oatĩa nõko xanĩfokõi ixii Apa Nios feta, keyokõi yorafo namisfo yafi niafori ato yoixii. Jesús chanĩmara fakanax afe nai mẽra nisharapakenakafo; akka a chanĩmara famisfoma chiifã mẽra Niospa ato potai omiskõipakexanõfo. Nãskakẽ ãfe Fake Jesucristo feta Niospa noko õiaino ẽ mia yoi iskafakĩ:  
\v 2 Niospa meka fena fenakima ato yoife fenãmãshta shara. A nikapaiyaifo askatari a nikakaspaifori ato yoisharafe, mĩ ato yoisharaino ãto chaka xatenõfo Jesús Ifofasharax isharanõfo. Shinãsharata, Niospa meka mẽstekõi yoife.  
\v 3 A yora chakafamai nokoaino yorafãfe Niospa mekakõi nikakaspatirofo. A nikatamaroko meka fetsafo shinãtirofo, nã apaiyai keskafakakĩ. Anori fisti shinãkani. Nãskakanax ano fisti ichanãkaxõ anorima a fetsafãferi yoiaito nikakakĩ.  
\v 4 A Niospa mekakõi nikakaspakani a ãto xinifãfe shinãpaonifo keskari fakakĩ.  
\v 5 Nãskakẽ Timoteo, õisharafe. Afara afeskaraito Niospa mekakõi Ifofasharafe; mĩ shinãfenotama anori tãpisharafe. Mia omiskõimanaifono tenefe. Kafãkakaikĩ yorafo Jesúsnoa tãpimafe Ifofanõfo. Nã mia Niospa yoiai keskafafe shinãfãi. 
\p  
\v 6 Iskaratĩa eõnoa ẽ mia yoi. Anã ẽ samarakaima mẽ chaima nai ea Jesúsxõ retexikani.  
\v 7 Mẽ yonosharakõitiani ẽfe Ifo Jesúsxõ. Ẽ chanĩmara fatitaifaa enekima. Keyokõi Niospa ea yoiai keskara mẽ aka.  
\v 8 Nõko Ifokõichi ea õimis ẽ Ifofasharakõiaito. Nãskakẽ ẽ akiki nokoaito ea afarafo inãsharaxii. Eres fisti ẽ fixiima. Nã nõko Xanĩfo finakõia oaitĩa keyokõi nã Ifofaafãferi fixikani. Aõ noikĩ a manaifori ato inãsharaxii. 
\s1 Pablonõ Timoteo fisti yoini kirika kenexokĩ 
\p  
\v 9 Timoteo, ea ano orisape.  
\v 10 Demãs afarafo fichipaikĩ ea nonoa õifaiti, Tesalónica ano kakĩ. Askatari Crescenteri kati Galacia ano. Askatari Titori Dalmacia ano kati.  
\v 11 Akka na Lucas fisti efe ika. Nãskakẽ Marcos ea efexõfe ea axosharaiyonõ Niospa meka ato yoikĩ.  
\v 12 Akka ẽ Tíquico Efeso ano nĩchiyamea ẽa.  
\v 13 Mĩ oaitĩa ea ẽfe rakoti fexõfe a Troas ano ẽ faferati a Carpo pexe ano. Askata ẽfe kirikari ea fẽxota, askatari kirika fetsari ea fẽxota a fakka fichisharakõi ẽ akiki kenemis, aari ea fexõfe. Ẽ afo fichipaikai. 
\p  
\v 14 Na yami famis Alejandro ea fãsi mekafamis. Aato ea chakafaito õikĩ Niospa kopikiri omiskõimaxii.  
\v 15 Õisharafe. Alejandro miari chakafatiroki na meka shara Jesúsnoa nõ yoiaito noko meka xatemapai kiki. 
\p  
\v 16 Akka ea taefakĩ xanĩfo ano iyonifo tsõakai eõnoa yoisharanima. Akka keyokõichi ea õifainifo fõkakĩ. Askafiaifono ẽ Nios iskafakĩ yoini: “Epa, na ea nonoa õifainaifo ato chakafayamafe,” ixõ ẽ Nios yoiyamea.  
\v 17 Ea askafafiaifono ẽfe Ifãfe Jesús ea potayameama, ea kexexõ. Ea askafaifono ẽ ratetima ẽfe Ifãfe ea kexeano ãfe kerex ea inãno ẽ ato yoinõ. A judeofomafãfe ea yõkaifãfe keyokõi nikanõfo ẽ Niospa meka Jesúsnoa ato yoiyamea. Ẽ askaito ea retepaikakĩ, oa poomãnã noko pipaiyai keskara ea fatifo ea retepaikakĩ. Ea askafafiaifono ea Niospa kexesharayamea ea tsõa retenõma.  
\v 18 Afara chakafo ekeki nokoaito õikĩ ẽfe Ifãfe ea kexetaifa a ẽ akiki nai mẽra nokoaitĩa. Fãsi nõko Nios sharakõi, tsoa fẽtsakai askafatiroma. Nãskakẽ tsõa nõko Nios finõtiroma. Ares fisti sharafinakõia. Nõ aõnoa yoisharapakexanõ. Nãskapakexapainõ. 
\s1 Pablo mã mekai xatekĩ ato meka shara fomani 
\p  
\v 19 Timoteoshta, ea Prisca yafi Aquila ea yoixõfe, keyokõi yorafo Onesíforo pexe ano ikafori ea yoixõfe.  
\v 20 Erasto Corinto ano nẽteyamea. Trófimo isinĩ ikĩ rakakẽ ẽ Mileto ano rataferayamea.  
\v 21 Nã mechaka ikamano ekeki ofe. Eubulonõ, Pudentenõ, Linõnõ, Claudianõ, keyokõichi Jesús chanĩmara faafãfe mato yoisharapaikani. 
\p  
\v 22 Nõko Ifo Jesucristo mefe ipaxanõ. Askatari Niospa mato noikõikĩ mato kexesharakõinõ keyokõi. Nã tii ẽ mato yoi. 
\cls \sig Ẽkĩa Pablo \sig*