\id 2TH - Yaminahua NT -Peru 2008 (DBL -2013) 
\h 2 TESALONICENSES 
\toc1 Pablo Tesalónica Anoafo Afianã Kirika Kenexõ Fomani 
\toc2 2 Tesalonicenses 
\toc3 2 Ts. 
\mt1 Pablo Tesalónica Anoafo Afianã Kirika Kenexõ Fomani 
\c 1  
\s1 Pablo afe rafeafo feta Tesalónica anoxõ Nios Ifofaafono ato kirika kenexõ fomani 
\p  
\v 1 Ẽkĩa Pablo. Silvano ikaino Timoteo ikaino nõ mato kirika kenexõ fomai. Efe yora mĩshtichi, mã Epa Nios Ifofaano pexe rasi Tesalónica anoxõ, mãfi nõko Epa Nios fe rafekõiakĩ nõko Ifo Jesucristo feri mã askakõia.  
\v 2 Nãskakẽ Epa Nios feta nõko Ifo Jesucristo mato noikĩ mato sharakõifanõ, askatari mato imasharakõinõ mãto õiti mẽranoax mã anã fekaxtenõma. 
\s1 Epa Niospa a yora chaka omiskõimaxii mã Cristo anã oaino 
\p  
\v 3 Efe yora mĩshtichi, mã taefakĩ mã Nios chanĩmara fani. Nãskakẽ iskaratĩa mã chanĩmara fakĩ finakõia. Askatari mã rama Nios Ifofaax mã nõinãsharakõini. Nãskakẽ iskaratĩa mã nõinãifinakõi. Nãskakẽ nõ matoõxõ Nios kĩfikĩ iskafa fafafãini: “Aicho Epa Niosi, mefe yorafãfe Tesalónica anoafãfe mia Ifokõi faafoki,” ixõ ẽ mato kĩfixõfafãini.  
\v 4 Nãskakẽ Niospa mekaõnoa nõ ato yoifofãsafakĩ nã Nios Ifofaafo fe nõ ato fe ichanãitĩa nõ matoõnoa ato yoimis iskafakĩ: “Nã Nios Ifofafo Tesalónica anoafo ãto kaifo fetsafãfe ato omiskõimamisfo. Nãskakẽ afara chakafãfe ato afeskarafafiaino a shinãtamaroko Jesús Ifokõi fakaxõ tenekõimisfo,” ixõ nõ matoõnoa ato yoixomis.  
\v 5 Nãskakẽ mã Jesucristoõnoax omiskõifixõ mã tãpitiro Niospa isharakõixõ mato yoikĩ iskafaino: “Nafo isharakõiafo,” mato faino mã afe ipaxatiro. Nãskax mã mã omiskõifiax chipo mã afe isharapakenaka. 
\p  
\v 6 Niospa mẽstekõi fisti shinãmis, a mato omiskõimamisfo kopikiri chipo Niospa ato omiskõimaxii.  
\v 7 Nãskakẽ nõko Ifãfe mato tenemasharaxii mã anã omiskõinõma a noko akai keskafakĩ mã nõko Ifo fotoxõ. Akka nõko Ifo nai mẽranoax fotoi oa chii xoisai itikikeraxii ãfe ãjiri finakõiafo fe oi.  
\v 8 Akka nõko Ifo oxii a Nios Ifofamisfoma ato omiskõimaniyoi, askatari ãfe meka sharaõnoari nikamisfomano ato omiskõimaxii.  
\v 9 Nãfo omiskõipakenakafo, anãkai nĩpanakafoma. Nõko Ifokai õipakenakafoma, askatari ãfe shara yafi ãfe kerex shara õipakenakafoma.  
\v 10 Akka nõko Ifo oaino, nã penata a Ifofamisfãfe aõnoa yoisharaxikani. Nãskafaifono nã Nios Ifofamisfãfe õiketsaxikani, akka mã mã nikamis nõ mato yoiaito. 
\p  
\v 11 Nãskakẽ nõ matoõxõ Nios kĩfikĩ iskafa fafafãini: “Epa Niosi, mĩ ato imapaiyai keskafakĩ ato imasharafe mia Ifofakaxõ fetsafo sharafapaikani kiki mĩ kerex shara ato inãfe,” ixõ ẽ matoõxõ Epa Nios kĩfimis.  
\v 12 Nãnori nõ mato Epa Nios kĩfixomis, fetsafãfe mato õikakĩ nõko Ifo Jesúsnoa yoisharanõfo iskafakakĩ: “Jesús afama mĩshti fatiro, nãskaxõ afe yorafo a keskara sharakõi ato ima,” ixõ aõnoa yoisharanõfo. Nãskakẽ Epa Nios feta nõko Ifo Jesucristo mato noiyanã a keskara sharakõi mato imatiro. 
\c 2  
\s1 Nã feronãfake afara chakafamisnoa ato yoini 
\p  
\v 1-2 Akka nõko Ifo Jesucristo anã fotofaino nã Ifofaafo tii akiki nokoxikani afe ipaxakakĩ. Nãskafekẽ fetsafãfe mato parapaikani iskafakakĩ: “Jesús mã oxõ a inõpokoaifo keskara ea tãpimana,” ixõ mato yoikani. Nãskatari fetsafãferi mato yoikĩ iskafakani: “Mã nõ nika Jesús mã oa,” ixõ mato yoiaifono, fetsafãferi yoikĩ iskafakani: “Pablo noko kirika kenexõ fema, ‘Jesús mã oa,’ ” ixõ mato yoipaikani, ãa chanĩkakĩ. Nãskakẽ rateyamakãfe. Ẽ mato yoinõ. Jesús oaino nã Ifofaafo afe ichanãxikani, nãskax afe ipanakafo. Akka mato yoisharapaiyaito nikasharakãfe.  
\v 3 Nã chanĩmisfo ato nikayamakãfe. Jesús oyoamano keyokõichi Epa Niospa meka kachikiri fakani anã nikaxikakima. Nãskakanax nikayospakõi ixikani. Nãskaifono a feronãfake chakafinakõia oxii. Nãato a Niospa yoini keskara nikakaspakõimis. Nãato Satanás ifofakõimis. Askafiax chipo a omiskõipakenakafo mẽra kaxii.  
\v 4 Akka a feronãfãke niyoxõ iskafakĩ yoixii: “Ẽ keyokõi finõa. ‘Na nõko Niosra’ ixõ mã kĩfimis, nãri ẽ finõa. Akai Niosma,” ixõ ato yoita, nã Nios kĩfiti pexefã mẽra ikikaixõ ato yoixii iskafakĩ: “Afaa fetsa kĩfiyamakãfe. Askatari afaa fetsari noiyamakãfe. Ẽfi Nioski,” ixõ ato pãraxii. 
\p  
\v 5 Akka, ¿mã shinãimamẽ a ẽ mato fe iyoxõ a ẽ mato yoipaoni keskara?  
\v 6 Akka mã mã tãpia nã chaka finakõia Epa Niospa nẽtefayoa, fena oyoyamanõ. Nãskafiax chipo oxii Epa Niospa anã nẽtefayamaino.  
\v 7 Nã noikaspamis Epa Niospa nẽtefayoano fena oyoima. Chipo oxii Epa Niospa anã nẽtefayamaino. Akka oyoamano nã aõxõ afara chakafamisfãfe fomãpaiyoxikani.  
\v 8 Nãskakẽ nã chakafinakõia mã oano, nõko Ifo Jesús ãfe axfapa xoõ atakĩ retekĩ mapokõi fataxii.  
\v 9 Nõko Ifãfe reteyoamano nã yora chakafinakõiato Satanáõxõ afama mĩshtifo faxii afarafo afeskarafakĩ ato parayanã.  
\v 10 Nãskaxõ afarafo afeskarafakĩ ato pãraxii a nikaifo, nãskakẽ nã nikakanax afe nã omiskĩskõipakenakafo mẽra foxikani. Nãfãfe Niospa mekakõi nikayamakãta, ãfe meka sharari noimisfoma Nios fe ipaxakakĩma. Nãskakẽ nã omiskõipakenakafo mẽra foxikani.  
\v 11 Nãskakẽ Niospa anã ato yoipaima ãa ato paranõfo, a ato paramisfãfe ato yoiaifo keskara nikakõiaifono.  
\v 12 Nãskakẽ nãfãfe Niospa mekakõi nikayamakãta, tsoarikai aõ noimisma. Askatamaroko afara chaka fisti fichipaiyaifono Epa Niospa nã omiskõipakenakafo mẽra ato potaxii nã ato paramisfo fe omiskõipakexanõfo. 
\s1 Niospa noko katoni nõko chaka noko soaxoxiki nõ afe ĩpaxanõ 
\p  
\v 13 Efe yora mĩshtichi, taekõifakĩ Epa Niospa mato noikĩ mato katoni afe mã ipaxanõ. Nãskakẽ ãfe Yõshi Sharaõxõ mato ifini afe yora mã inõ, Jesúsnoa mã chanĩmara faino. Nãskakẽ mẽxotaima nõ Nios aicho famis mato shinãkĩ.  
\v 14 Nãskakẽ ãfe meka shara nõko Ifo Jesucristoõnoa nõ mato yoiaino nokoõxõ mã mã tãpikõia. Nãskaxõ mã chanĩmara faino ãfe Fake Jesucristo otofani keskafakĩ matori õtofaxii a ika ano mã afe ipaxanõ. 
\p  
\v 15 Nãskakẽ efe yora mĩshtichi, nã nõ mato yoimis anorikõi nikafafãikãfe. Akka anoriyamakẽ afo nikayamakãfe. Nã nõ mato yoipaoni keskara nã fisti chanĩmara fayanã, a nõ mato kirika kenexoki nõ mato yoini keskarari shinãfafãikãfe.  
\v 16 Nõko Ifo Jesucristo feta nõko Epa Niospa noko noikĩ, nõko õiti mẽraxõ noko inimamakõinõ. Nãskakẽ nõ tãpitiro noko potanakama nõ afe ipaxanõ.  
\v 17 Mãto õiti inimamakõikãfe mato imasharakõiaino. Nãskaxõ afara afeskara afiaino ato yoisharakõita mã ato axosharafafãixikakĩ. 
\c 3  
\s1 “Noko Epa Nios kĩfixokãfe,” ixõ Pablo ato yoini 
\p  
\v 1 Akka efe yora mĩshtichi, mẽ mekai xatekĩ ẽ mato yoi. Noko Epa Nios kĩfixokãfe, nõko Ifãfe ãfe meka shara mã nika keskafakĩ nõko Ifoõnoa keyokõichi nikanõfo.  
\v 2 Askatari noko Epa Nios kĩfixokãfe na yora chakafo feta a shinãsharaifãfema noko afeskafanõfoma. Nãkakẽ Jesúsnoa nõ ato yoiaito noko nikakatama noko xatemapaimisfoki.  
\v 3 Akka nõko Ifo sharakõi, nã noko yoimis keskara noko axomis. Nãato mato imasharapakenaka, afara chakatari mato fekaxtefanõma. Askatari nãato mato kexesharapakenaka.  
\v 4 Nãskakẽ nõko Ifoõxõ nõ chanĩmara fai, nã nõ mato yoimis keskara mã akaito. Nãskakẽ mẽxotaima mã askafa fafafãini a nõ mato yoimis keskafakĩ.  
\v 5 Epa Niospa mato noiai keskafakĩ nõko Ifãfe mato tãpimapainõ. Cristo omiskõifikĩ teneni keskafakĩ, aõxõ mãri mã tenesharakõifafãinõ. 
\s1 Keyokõichi nõ yonosharakõitiro 
\p  
\v 6 Efe yora mĩshtichi, nõko Ifo Jesucristoõxõ nõ mato yoimis. A Epa Nios Ifofaa fetsafãfe yonokaspaifono mã ato makinoax paxkanõ a nõ mato yoimis keskara nikakaspaifono.  
\v 7 Akka mã mã tãpia a nõ imis keskara mã askapai mã isharakõitiro. Nõ mato mẽra ixõ nõ yonokaspapaonima. Askatamaroko nõ yonokõipaoni.  
\v 8 Askatari nõ tsoa afaa kaxpa pĩapaonima. Askatamaroko nõ yonopaoni, penata yonota, fakishi yonota nõ fapaoni a nõ piai fĩxõ pixii mares fisti mãto kori ichapa mã potanõma. Nõ yonokĩ askafapaoni.  
\v 9 Niospa mekaõnoa yoinifo iskafakĩ: “Nã mato Niospa meka yoimisfãfe afara yopaifãfe ato inãkãfe,” ixõ kenenifo Niospa ato shinãmanaino. Nãskakẽ, “Noko afara inãkãpe,” ixõ nõ mato yõkakerapaoni. Askatamaroko nõ yonopaoni nõ mato õimakĩ a nõ akai keskafakĩ mãri mã yononõ.  
\v 10 Akka nõ mato mẽra ixõ nõ mato yoipaoni iskafakĩ: “Akka nã yonoyamaito afaa pitiroma,” ixõ nõ mato yoini.  
\v 11 Akka matoõnoa noko yoiafo iskafakakĩ: “Na ranãrito yonokaspata ikafo, nãskakanax afaa meekatama ãa fofãsakaki ato parafofãsa famisfo,” ixõ noko yoiafo.  
\v 12 Nãskakẽ nõ mato yoi iskafakĩ, nõko Ifo Jesucristoõxõ mã tanaima yonosharakõinõ anã xanikima a mã fichipaiyai keskara fixiki. 
\p  
\v 13 Efe yora mĩshtichi, a mã afarafo sharafamis keskafakĩ xateyamakãfe.  
\v 14 Akka na kirika kenexõ nõ mato yoiai keskara nikakaspai, aõnoa shinãkãpo. Nãskakẽ afe rafepaiyamakãfe, mã askafaino rãfinõ.  
\v 15 Nãskafiaito noikaspayamakãfe. Askatamaroko yoisharakãfe mato fe yora keskara fakĩ. 
\s1 Mã mekai xatekĩ Pablo ato yoisharani 
\p  
\v 16 Nõko Ifãfe nõko õiti noko inimamaxotiro. Pena tii afara afeskara afiaino mato inimamatiro. Nõko Ifo keyokõi mato fe isharanõ. 
\p  
\v 17 Ẽkĩa Pablo, ẽkõi ẽfe mẽkemã kirika kenexõ ẽ mato fomai yoisharakõiyanã. Akka nã ẽfe kirika kenefo ẽ iskafamis kenekĩ.  
\v 18 Nõko Ifo Jesucristo mato noikĩ keyokõi mato sharafanõ. Nã tii ẽ mato yoi.