\id 2PE - Yaminahua NT -Peru 2008 (DBL -2013) 
\h 2 PEDRO 
\toc1 Pedro Jesús Chanĩmara Faafo Afianã Kirika Kenexõ Fomani 
\toc2 2 Pedro 
\toc3 2 Pe. 
\mt1 Pedro Jesús Chanĩmara Faafo Afianã Kirika Kenexõ Fomani 
\c 1  
\s1 Pedro Jesús Ifofaafo ato kirika kenexõ fomani 
\p  
\v 1 Ẽkĩa Simón Pedro, Jesucristo ẽ yonoxomis. Aõnoa yorafo ãfe meka shara ẽ ato yoinõ ea nĩchini. Nãskakẽ ẽ mato kirika kenexõ fomai, mã mã nõko Ifo Jesús mã chanĩmara fakĩ finakõiano ẽ akai keskafakĩ. Nã nõko Ifo Nios feta Jesucristo noko ifimis nã ẽ chanĩmara famis nãmãi isharakõimiskẽ. 
\p  
\v 2 Akka Epa Nios yafi nõko Ifo Jesús mã tãpikõikẽ matoõnoa shinãkĩ mato inimamakõikĩ mãto õiti mato inimamaxotiro tanaima sharakõi mã inõ. 
\s1 A Nios Ifofaafo afeskax isharatirofomãki 
\p  
\v 3 Niospa noko katoni a keskara shara ikax nõ afe ĩpaxanõ. Nãatofi afama mĩshti fatiroki. Nõ Nios tãpikõikẽ afara nõ yopaito ãfe kerex sharaõxõ noko inãxii. Nãskaxõ noko amapaiyai keskara nõ anõ.  
\v 4 Nãskakẽ noko yoiyoni keskafakĩ ãfe kerex sharaõxõ afara sharakõifo noko axoxii a keskara sharakõi nõ inõ. Akka a nikakaspaifãfe nã afara chakafapaiyaifo keskara fisti amisfo. Nãskaifono Niospa noko imasharai nõ ato keskara inõma.  
\v 5 Nãskakẽ nã mato imapaiyai keskakãfe, chanĩmara faax a keskara sharakõi ikãfe. A keskara sharakõi mã ikaino, Niosxõ mato amapaiyai keskara fisti tãpikãfe.  
\v 6 Akka nã mã apaiyai keskara fisti shinãkakĩma, kexemesharax aõnoax isharakõita afara afeskaraino tenekõita Niosnoa fisti shinãfafãikãfe.  
\v 7 Askatari keyokõi yorafo sharafata oitsifaxõ ato noifafãikãfe. 
\p  
\v 8 Mã askafakĩ nõko Ifo Jesucristo mã tãpikõitiro. Nãskaxõ nã mato amapaiyai keskafakĩ mã yonoxosharakõitiro.  
\v 9 Akka mã askafayamai oa fẽxo keskara mã itiro, õisharaima. Nãskakẽ mãto chaka mã mato soaxofiano mã anã shinãima, mã mã shinãmakiax.  
\v 10 Nãskakẽ efe yora mĩshtichi, Niospa mato ifikĩ mato shinãmani mã afe yorakõifo mã inõ. Nãskakẽ afe yorakõi isharapaikõikãfe. Shinãsharata isharakõikãfe. Askafaax mã anã afara chakafo ifofaima.  
\v 11 Mã askaito õikĩ mato ifisharakõixii a ika ano mã afe ĩpaxanõ nõko Ifo fe. Nõko Ifo Jesucristo noko ifimis. 
\p  
\v 12 Nãskakẽ ẽ mato shinãmafafãini, mã mã tãpifekẽ, nãskakẽ iskaratĩa na meka shara mã mã tãpixõ nã fisti mã shinãkõimis.  
\v 13 Akka ẽ nayoxoma ẽ mato yoisharafafãini,  
\v 14 mãmãi nõko Ifo Jesucristo ea tãpimanano ẽ chaima naino.  
\v 15 Nãskakẽ mẽxotaima ẽ mato yoirifai mẽ naano nã ẽ mato yoimis keskara mẽxotaima mã shinãfafãinõ. 
\s1 “Cristo Niospa Fake chaxapakekafanaito ẽ õini,” ixõ Pedro ato yoini 
\p  
\v 16 Nõ mato yoimis nõko Ifo Jesucristo ãfe kerex sharaõxõ afama mĩshti fatiro. “Anã nokoki oxii,” ixõ nõ mato yoimis. A yorafãfe yoipaonifo anori nõ mato yoimisma. Akka nõko ferokõichi nõ õini, nõko Ifãfe chaxapakefofãnaito.  
\v 17 Askatari ãfe Apa Niospa iskafakĩ yoini: “Nafi ẽfe Fakekõikĩ ẽ aõ noisharakõi, ẽ akiki inimakõi,” ixõ yoini.  
\v 18 Nõkõi nikani nai mẽranoax mekai askaito. Nã mãchifã ano nõko Ifo fe nõ ini, nã mãchifã anoxõ nõ nikani anoax Nios mekaito. 
\p  
\v 19 Akka a Niospa meka yoipaonifãfe a inõpokoai keskara yoikakĩ Jesúsnoa kenenifo keskara nõ chanĩmara fakõitiro. Nãskakẽ mãri mã na meka mã chanĩmara fakõitiro. Oa rãparinĩ fakish mẽraxõ chaxatiro keskafakĩ, akka mã penano xafasharakõitiro. Nãskarifakĩ mã Niospa meka nikasharaino Epa Niospa mãto õiti mẽra oa pena keskara mato fatiro.  
\v 20 Akka taefakĩ iskara tãpikãfe. A Niospa meka yoipaonifãfe ãa ãto õiti mẽraxõ shinãkaxõ kenepaonifoma.  
\v 21 Askatari ãa ãto shinãmã shinãxõ yoipaonifoma. Askatamaroko Niospa Yõshi Sharapa ato shinãmanaino nãnorikõi ato yoipaonifo. Nãskakaxõ a Niospa Yõshi Sharapa ato shinãmanai keskara kenepaonifo. 
\c 2  
\s1 Fetsafãfe chanĩ fisti ato yoipaonifo 
\r (Ju. 4-13) 
\p  
\v 1 Akka, “Nõ Niospa meka mato yoinõra,” ixõ ãa nõko xinifo ato pãrapaonifo. Nãskarifiakĩ mato mẽraxõ mato pãramisfo, “Nõ Niospa meka mato yoinõra,” ikaxõ. Afãfe mato pãrakani fanĩrira mato yoikani mã anã shinãsharanõma. Akka nõko Ifo Jesús ato nãxoni afara chaka ãto ifo inõma. Nãskakẽ a nõko Ifãfe noko tãpimapaoni keskara chanĩmara faafoma. Nãskakẽ nãfo Epa Niospa ato omiskõimarisafaxii omiskõipakexanõfo.  
\v 2 Nãfãfe afara chakakõifo ato tãpimanaifo keskafakĩ yora ichapafãfe ato nikamisfo. Nãskakaxõ atoõxõ Niospa mekaõnoa chakakõi fatirofo. Nãskakẽ a Niospa ato shinãmapaiyai keskara shinãkanima mã fenoafo.  
\v 3 Nãskakaxõ kori fisti noikõimisfo, “Nõ mato yoinõra,” ixõ mato pãrakani. Akka a afara chakafaifo keskara mã Niospa tãpia fatora penata ato tãpimani omiskõipakexanõfo. Afetĩama Niospa shinãyoni a yora chakafo ato omiskõimapakexakĩ. 
\p  
\v 4 Epa Niospa ãfe ãjirifo ãto chaka ato soaxonima afara chakafaifãfe. Askatamaroko chiifã mẽra ato potani, anoax fakishifã mẽra ĩpaxanõfo kaninãnã ato metexkere axõ. Nã ato ichanãfaitĩa ato yoixõ ato omiskõimaxii.  
\v 5 Nãskatari nã yorafo Noé niyoatĩa Niospa meka nikakaspaifono Niospa ãto chaka ato soaxonima. Askatamaroko oi kaya imani faka faipafaxõ a yora chakafo ato ãsakĩ mitonõ. Akka Noé fisti ãsanima. Nã Noé ato yoiyopaoni iskafakĩ: “Nios sharakõikĩ mãto chaka xatekãfe a keskara shara ixikakĩ,” ixõ ato yoipaoni. Nãskakẽ Noé ãsanima afe yora sietefo fe Niospa ato kexesharano.  
\v 6 Nãskatari Niospa pexe rasi Sodoma yafi Gomorra pãoakĩ fetsaxõ kooakĩ mitoni, mapokõifakĩ. Nãskakẽ nã rama chipo ixiaifãfe tãpinõfo yora chakafo keyokõi Niospa ato omiskõimaxiai.  
\v 7-8 Akka Lot fisti nanima Niospa nimasharakõini. Nã feronãfakemãi sharakõikẽ, nãato õipaoni yorafãfe anoxõ chaka shinãifãfe. Nã Lot fekaxtekõini, nã yora chakafo askaifãfe õi.  
\v 9 Nãskakẽ nõko Ifãfe afe yorafo kexesharatiro afarafo ato chakafamapaiyai keskara anõfoma. Nãskaxõ nã afara chakafamisfo ato omiskõimakĩ nã omiskõipakenakafo mẽra ato potaxii anoax omiskõipakexanõfo. 
\p  
\v 10 Nãskakẽ Niospa ato omiskõimaxii ãa shinãkaxõ afara chakakõi famisfono, nõko Ifãfe ãfe meka sharari nikakaspamisfono. Afãfekai afaa tãpiafoma. Mesetamakõi ato ĩchamisfo a nõ õimisma nai mẽranoa xanĩfo finakõiafo.  
\v 11 Akka nã ãjirifo xanĩfofikanax afokai askamisfoma. Afãfe tsoa ĩchamisfoma nõko Ifãfe ferotaifi. Askatamaroko yoikĩ iskafamisfo: “Ãa Niospa ato tãpimanõ omiskõimakĩ,” ixõ shinãmisfo ãfe ãjirifãfe a yora chakafãfe chakafafiaifono ato afeska fapaimisfoma. 
\p  
\v 12 Akka na yorafo yoinã keskarafo, afaa tãpiafoma. Afaa shinãima ikafo. Nãskakẽ achixõ retetirofo. Afãfe afara chaka yoimisfo õiyamafikakĩ, nãskakẽ afori naxikani na yoinãfo natirofo keskakani.  
\v 13 Fetsafo omiskõimakatsaxakakĩ afori omiskõixikani. Afãfe afarafo chakakõifo fakakĩ sharakõimeyokani. Akka nã mato pãramisfo mato fe ichanãfo Jesús nikayamafikatsaxakakĩ. Anoxõ mato feta piyanã mato pãrapaikani. Akka mãfi askaramakĩ mã noinãsharakõita ano fisti ichanãxõ mã piisharamis. Mã askafiaito a ato pãramisfo mato fe ichanãpaikani mato fanĩrira chakafo yoipaikani mã anã shinãsharanõma. Inimakõiyanã nã mato pãrapaiyai fisti yoipaikani.  
\v 14 Askatari kẽro fetsa õikakĩ akiki nokofenepaikakĩ chotapaimisfo, chaka fisti shinãmisfo. Akka kẽromã Jesús Ifofayamaxõ ato fichipai ato fe ixiki. Askatari a chanĩmisfãfe Jesús Ifofasharamisfoma ato chakafamapai ato feta afarafo chakafanõfo ato õikakĩ. Askatari ato afama mĩshti ato fichipaimisfo mã askara feyafamisfo. Niospa nã keskara yorafo ato omiskõimani omiskõipakexanõfo, yora chakafomãiano.  
\v 15 Nãfo fofãsakani mã fenoafo, Niospa meka shara kachikiri fakanax nã Balaam ipaoni keskarafo. Nã Balaam Niospa meka yoimis iyopaoni, Beorpa fake. Mã Niospa meka yoipaofinixakĩ kori kaya fichipaini, afara chaka shinãkĩ.  
\v 16 Niospa yoiaino Balaam ãfe burro nã yora mekai keskani. Nãskaxõ ãfe ifo iskafakĩ yoini: “¿Afeskakĩ mĩ ea koshaimẽ?” ixõ nã burropa yoini. Askafaito nikai Balaam oa yõra shinãsharaima keskarakõi ini. 
\p  
\v 17 Na feronãfakefo faka fiti anoa faka netsoa keskarafo. Afaakai tãpiafoma, nãskaxõ Niospa meka shara noko tãpimatirofoma. Askatari mã oi fei kiki ixõ, nai kõi choshta nõ õifiaino, nẽfe nai kõi potatiro keskarafo. Nãskarakaxõ noko pãratirofo: “Niosnoa nõ mato yoira,” ikaxõ ãa shinãi imisfo Niosnoa yoikõimisfoma. Nãskakẽ Epa Niospa ato potaxii fakishifã mẽra ipaxanõfo.  
\v 18 Nãfo chanĩkani kakapaimisfo. Nãskaxõ yoimisfo iskakani: “Nõ tãpia keskafakĩ tsõa tãpiama. Nã tsõa atiroma keskafakĩ nõ tãpikõia,” ixõ ãa yoikani chanĩfinamisfo. Nãskakaxõ a rama Nios Ifofapaikakĩ ãto chaka xatepaiyaifo ato yoitirofo iskafakakĩ: “Mĩ fẽtsa ãfe ãfi fe ika sharakĩ, nãskax mĩ afe inimakõitiroki, nõ anõ kafe,” ixõ fẽtsa iyotiro afara chakafamaxiki.  
\v 19 Afãfe iskafakĩ yoimisfo: “Mã afara shara faõnoaxkai Nios fe mã ĩpaxatiroma. Akka nã mã afarafo apaiyai keskafakãfe. Nã mã apaiyai keskafaino tsõa mato xatematiroma inimayanã akãfe,” ixõ ato yoikakĩ anorima ato yoikani. Afori isharamisfoma, ãa pãramemisfo. Afara chakafo ãto ifo, nãfo Satanás inafo. Nãskakẽ shinãsharakanima. Chaka fisti shinãmisfo.  
\v 20 Akka nõko Ifo Jesucristo nã noko ifimis, nõ nikakõixõ nã nikaifãfema afara chakafaifo keskafakĩ, anã afaa chakafakanima. Nã afara chakafo makinoax paxkatirofo anã ãto ifo inõma. Akka anã afara chakafaifono afara chakakõi ato mẽra nanetiro a ipaonifo keskara chakafinakõia inõfo.  
\v 21 Akka afo shara ikeranafo Jesús nikayamakatsaxakakĩ. Akka a meka shara mã nikafikatsaxakakĩ chipo anã kachikiri faifono ato omiskõimaki finakõixii.  
\v 22 Akka nõko xinifãfe Niospa mekaõnoa kenekĩ yoikõinifo iskafakĩ: “Paxta nã imis keskai ori kafãsayotiro. Chipo anã a anãpakea ano otiro. Nãskariai kochiri mĩfamã raish iyotiro, nãskax fakanaki kaax choki sharata, mã choki sharafiax anã chipo mĩfamã raish itiro.” Nãskari akani Niospa Yõshi Sharaõxõ ãto chaka potakanamax Satanás ãto ifo iki. Ãto chaka xatepaifikanax afianã afara chaka mẽra paketirofo. 
\c 3  
\s1 Nõko Ifo Jesús anã fotoxii 
\p  
\v 1 Efe yora mĩshtichi, anã ẽ mato kirika kenexõ fomai. Taeyoi ẽ mato manamayonixakĩ, nã kirika kene rafeoxõ ẽ mato shinãmasharapai mã shinãsharakõinõ.  
\v 2 Shinãkãfe, a Niospa meka yoimis sharafãfe afetĩama mato yoipaonifo anori. Askatari a noko ifimisto nõko Ifo Jesús ato yoiaito a aõnoa yoimisfãfe nikakatsaxakakĩ nãnori mato yoipaonifo keskara shinãkãfe. 
\p  
\v 3 Nãskakẽ ẽ mato yoinõ shinãkõikãfe. Mã chaima Jesús oaino nã yora chakafo matoki fekanax nãfo matoki kaxemetsamapaixikani kiki ãakõi askara chakafo shinãkanax.  
\v 4 Nãskaxõ mato yõkaxikani iskafakakĩ: “A Niospa yoini keskai, ¿afeskai Cristo oimamẽ? Akka nõko xinifo nanifo chãikai afaa afeskaito nõ õimisma, keyokõi nãskara. Nã Niospa mai onifani chãi afaa afeskaito nõ õimisma,” ixõ yoixii.  
\v 5 Akka nã yorafãfe mã tãpifikaxõ shinãkanima, afetĩama Niospa nai onifafianino Niospa yoiaino fakafã nẽxpakĩa mai onifani, taeyoi fakafã iyopaoni. Nãskakẽ Niospa ãfe mekapa fakafã nẽxpakĩa mai onifarisafatani.  
\v 6 Askatari fakafaipafakĩ mai maiyaino keyokõi yorafo ãsai mitokomeni.  
\v 7 Akka mai yafi nai iskaratĩa ato mekeyoa, chipo ato koofakĩ mitokõixii. Niospa yoiaino askai fetsexii. Nã Niospa ato ichanãfaitĩa na chiifãnẽ ato koofakĩ mitoxii nã yora chakafo ato omiskõimanaitĩa. 
\p  
\v 8 Nãskakẽ efe yora mĩshtichi, shinãmakiyamakãfe. Nõ õimiski xiniachãikõi. Akka nõko Ifãfe õia pena fisti xini ichapa keskara, askatari xini ichapa pena fisti keskara õi.  
\v 9 Nãskakẽ shinãkĩ iskafamisfo: “Nõko Ifãfe yoiyoni keskara ikamano, akka mã yoini keskara mã finõkõia,” ixõ shinãmisfo. Askatamaroko Niospa noko noikõikĩ a omiskõipakenakafo mẽra ato potapaima. Fena fenakima ato manasharamis keyokõichi ãto chaka xateyonõfo ãfe meka shara nikaxikakĩ omiskõipakexakakĩma. 
\p  
\v 10 Akka nõko Ifo nokoki nokorisai tsõa manasharayamaino nã yometso nõko pexe ano oaito nõ tãpitiroma keskai. Nãskarifiakĩ tsõa tãpiama afetĩara nõko Ifo nokorisai, itipinĩsharafomano. Mã nõko Ifo nokoaino chãa itakõixii. Nãskaino nai mẽranoafo koofi keyokõixii, nãskatari nono mai anoafori koofi keyokõixikani. 
\p  
\v 11 Nã ẽ mato yoiai keskai keyokõi keyoxii. Nãskakẽ tãpisharakõixõ nõko Ifo nikasharakõikãfe. Mã mã itipinĩsharakõixõ a mã apaoni keskara anã mã akimakai. A mato amapaiyai keskara fisti mã akikai. Epa Nios shinãkĩ finakõiax sharakõi ikãfe.  
\v 12 Fatora penata Jesús nokoi kiki manashara fafãikãfe. Nãskakẽ fetsafo Jesúsnoa yoisharakãfe tãpisharakõinõfo, ãto chaka xatekaxõ mã chaima Jesús oi kiki. Mã Jesús oaino nai mẽranoafo koofi mẽsho mẽshokõixikani.  
\v 13 Akka nai fenashara nõ manai, mai fena yafi a Niospa yoiyoni keskafakĩ afo sharafai. Akka afara chakafo ano itiroma, nã sharafos ano itirofo. 
\p  
\v 14 Nãskakẽ efe yora mĩshtichi, mã Jesús manakĩ manasharafafãikãfe. Mã askaito Niospa mato õi kiki ãfe Fãkeõnoax mã isharakõikẽ. Nioski mesekĩma iskafakĩ shinãfafãikãfe: “Epa Niospa ãfe Fakeõxõ ea noi. Ẽri Epa Nios noi afe rafepakexakĩ,” ixõ anori shinãfafãikãfe.  
\v 15 Nãskakẽ mãri fekaxtekãkima. Shinãsharata isharakõikãfe. Õikapo. Nõko Ifo samarakamis fena omisma yorafãfe ea Ifofanõfora ixõ shinãmis Epa Niospa. Nãskarifakĩ nofe yora Pablo mato kirika kenexoni Epa Niospa shinãmasharaino.  
\v 16 Nã kirika keneai tii nõko Ifo anã oxii kiki ixõ aõnoa yoikĩ mato kirika kenexoni Pablo. Akka a atiri yoikĩ keneni afokai nõ tãpisharatiroma. Akka a Niospa meka tãpiamafãfe ãa fanĩrira yoimisfo a Pablo yoikĩ keneni anori tsõa yoimisma. Nãskarifiakĩ Niospa mekakõi yoitama, fanĩrira yoimisfo. Nãskakanax omiskõipakenakafo. 
\p  
\v 17 Efe yora mĩshtichi, a ẽ mato yoiai keskara mã mã tãpiaki. Nãskakẽ õisharakãfe, a chanĩmisfãfe mato yoipaiyaifo anori mã ato nikaxikima. Mã Jesús nikakõiaito mato kexesharakõitiro. Akka a fanĩrira yoimisfo mã ato nikaxõ anã mã shinãsharatiroma. Nãskaxõ fanĩrira mã shinãtiro.  
\v 18 Akka a noko ifimis nõko Ifo Jesucristo nikasharakõifafãikãfe tãpisharakõixikakĩ. Mato sharafapaiyai keskara a keskara shara ixikakĩ. Mãto õiti mẽraxõ a mato tãpimapaiyai keskara tãpisharakõikãfe. Nã fisti nõ yoikĩ iskafatiro: “Mĩ nõko Ifo, mĩõxõ afara shara nõ atiro, meres fisti mĩ sharakõi,” ixõ iskaratĩa yoita a inõpokoai keskara nõ yoipakenaka. Nãskakõipakexanõ. Nã tii. 
\cls \sig Pedro \sig*