\id 2CO - Yaminahua NT -Peru 2008 (DBL -2013) 
\h 2 CORINTIOS 
\toc1 Pablo Corinto Anoafo Afianã Kirika Kenexõ Fomani 
\toc2 2 Corintios 
\toc3 2 Co. 
\mt1 Pablo Corinto Anoafo Afianã Kirika Kenexõ Fomani 
\c 1  
\s1 Pablo Corinto anoafo yoisharani 
\p  
\v 1 Ẽfe yora mĩshtichi, ẽkĩa Pablo. Ẽ kirika kenexõ mato fomai mã tãpinõ. Nofeta Jesús Ifofamis Timoteo feta ẽ mato kirika kenexõ fomai. Epa Niospa ea katopaiyaito Cristo Jesús ea katoni ãfe meka ẽ mato yoifofãfofãinõ. 
\p Nios chanĩmara faafo Corinto anoafo, Acaya mai anoafori ẽ mato keyokõi yoisharai.  
\v 2 Ẽ nõko Nios mato kĩfixomis iskafakĩ: “Epa Niospa, nõko Ifo Jesús feta ato noikõikĩ ãto õiti inimamasharaxõfe. Askatari ato shara fafe,” ixõ ẽ matoõnoa yoimis. 
\s1 Pablo omiskõini 
\p  
\v 3-4 Nõ Epa Nios yoisharanõ iskafakĩ: “Epa Niospa, mĩ noko sharafa fafafãini. Mĩ sharafinakõia. ¡Aicho!” ixõ nõ Epa Nios yoinõ. Nãfi nõko Ifo Jesucristo ãfe Apaki. Nãatori noko noisharakõi. Askatari nõ omiskõiaito noko inimamatiro. Akka nã nõ meemis keskara mei, fetsa omiskõiaito nõ inimamatiro, nã Epa Niospa nõ omiskõiaito noko inimamamis keskafakĩ.  
\v 5 Cristo omiskõimakĩfinakõinifo. Nãskakẽri nõri Cristoõnoax omiskõikõi. Akka Cristo omiskõiaito Niospa axosharakõini. Nãskakẽ Cristoõxori nokori Niospa axosharakõi.  
\v 6 Akka nõ Niospa meka mato yoi nõ omiskõiaito mã noko nikakõixõ mã nõko Ifo Jesús chanĩmara faax mã afe isharakõitiro. Nãskax mã inimakõitiro. Akka nõ mato yoi nõ omiskõifiaito nõko õiti Epa Niospa noko inimamaxomis. Akka mã mã noko õimis nõ omiskõiaito Epa Niospa noko axosharaito. Nãskarifiai mãri omiskõiaito Epa Niospa matori axosharakõixii mã tenesharakõinõ.  
\v 7 Mã nõ tãpia nõ omiskõiai keskai mãri nofe omiskõiaito Epa Niospa nõko õiti inimama keskafakĩ matori inimamasharai. 
\p  
\v 8-9 Efe yora mĩshtichi, Asia mai anoax nõ omiskõita ẽ mato yoi mã tãpinõ. Nõ omiskõifinakõita tenetiroma mei nai keskarakõi nõ meita. Nãskakẽ nõ tãpitiro nãskara Epa Niospa noko tãpimana nõa nõ ifimetiroma nõ omiskõiyamanõ. Epa Nios fistichi noko ifitiro. Akka nõ omiskõiaino nõ naano, nãatofi yorafo otofatirokĩ, ixõ nõko shinã mẽraxõ nõ shinãita.  
\v 10-11 Akka nõ fãsi omiskõi nakerafiaino Epa Niospa noko ifita. Anã afetĩara noko ifixii. Askatari nõ chanĩmara fakõini nokomãi ifitaifamiskẽ, mãmãi noko Epa Nios kĩfixomiskẽ. Mã noko askafaino nã Nios chanĩmara faa fetsafãfe shinãkĩ iskafaxikani: “Aicho Epa Niospa, mĩ Pablo yafi afe rafemisfo mĩ ato ifisharakõia. Mĩ fãsi sharakõi,” ixõ yora ichapafãfe yoixikani. 
\s1 Afeskai Pablo kanimamẽ Corinto ano 
\p  
\v 12 Nã nõ fakira kafãsai ariax nõ isharakõimis, nõ afaa chakafamisma. Niospa fichipaiyai keskara nõ amis. Askatari mato mẽranoax nõ isharaifinakõimis. Nãskakẽ nõ shinãchakaima nõ inimasharakõi. Akka nõkai nõ mato pãramisma, chanĩma fisti nõ mato yoimis. Niospa noko noikĩ noko shinãmanaino nõ isharanõ mato mẽranoax. Askatari nã nõ fakira kafãsai ariax nõ isharakõimis.  
\v 13-14 Ẽ mato kirika kenexõ manamani tãpitiropinĩ shara faxõ fekaxma mã tãpitiro xafakĩa sharakõi. Nãskafekẽ atirifãfe tãpisharafoma ẽ afe keskaramãki. Nãskafixõ mã tãpisharai, nãskara shara ẽ fichipai. Nãskakẽ nõko Ifo Jesús anã oaino mã nokoki inimasharaxii, nõri matoki inimasharanõ. 
\p  
\v 15-16 Nãskakẽ ẽ shinã ẽ Macedonia ano kaitĩa ẽ mato ano mãpefaixii anã ẽ mato yoisharaxiki mãto õiti mẽra mã inimanõ. Askata nã Macedonia anoax ẽ oaitĩa anã ẽ mato ano mãpetiro mato fe iyoxiki. Chipo Judea ano ea nĩchitirofo, ixõ ẽ shinãni.  
\v 17 Nãnori ẽ shinãfiax ẽ mato ari ẽ kayoikaima. Akka mã iskafakĩ shinãiraka: “Pablo ẽ kaira ifiax kaima, ¿afeskakĩ noko pãramẽ?” ixõ mã shinãiraka. Akka ẽkai õiti ranãyama fetsa yoikĩ, fetsa yoikĩ ẽ fapanã. Nã yõra Jesús Ifofaamato shinãi keskara ẽ shinãima.  
\v 18 Nã Niospa noko pãramisma keskafakĩ nõrikai mato pãramisma. Nãskakẽ tãpisharakõia nõ mato pãramisma.  
\v 19 Akka Timoteo ikaino Silvano ikaino ẽ ikaino Jesucristo Niospa Fakeõnoa nõ mato yoimis. Jesucristo mekakai rafema, ãfe meka mẽstekõi. Chanĩma fisti.  
\v 20 Epa Niospa noko yoiyoa keskara keyokõi Cristo mã noko axomis. Nãskakẽ nõ keyokõichi yoimis iskafakĩ: “Epa Niosi, mĩ fãsi sharakõi. Jesúsxõ keyokõi mĩ afama mĩshti famis nã mĩ yoiyoa keskafakĩ. Nãskakẽ Jesús aneõxõ nõ mia aicho fai,” ixõ nõ yoimis.  
\v 21 Askatari Epa Niospa mato yafi noko Jesús Ifosharakõifama. Nãskatari noko katoxõ noko nĩchini ãfe meka yoimis nõ inõ.  
\v 22 Akka fẽtsa ãfe afarafo marakka fatiro fetsafãfe tãpinõfo ãfenãkẽ. Nãskafakĩri Epa Niospa ãfe Yõshi Shara nõ mẽra nanea aõxõ nõ tãpinõ nõ afe yoraxõ. Nãskakẽ nõ tãpitiro afara fetsa nã noko yoiyoa keskara chanĩmakõi noko inãxii. 
\p  
\v 23 Ẽ mato ari kaira ixõ ẽ shinãfiitaxakĩ ẽ kaama. Epa Niospa ea tãpikõia ẽ chanĩkẽma. Ẽ mato ari kakerana. Nãskafiax ẽ kaama ẽ mato shinãkĩ. Ẽ ato ari kaxõ ẽ ato fasi yoikĩ ẽ ato shinãmitsamatirora ikax nãskax ẽ mato ari kaama.  
\v 24 Ẽ mato askafatama ẽroko mato inimamapaisharai. Ẽkai mãto ifo ipaima. Akka Jesús fisti nõko Ifo. Akka mã mã Jesús chanĩmara faxõ mã mã Jesús Ifo sharakõifai. Nãskakẽ ẽ mato feta Jesús yonoxopai mã inimai finakõinõ, askatari mã Jesús Ifo sharakõifanõ. 
\c 2  
\p  
\v 1-2 Nãskakẽ ẽfe shinã mẽraxõ shinãkĩ ẽ iskafayamea: “Ẽ Corinto ari kapaifi ẽ kaima. Akka ẽ kaxõ ẽ ato yoikĩ iskafapaima: ‘A mã afara chakafamis keskara xatekãfe,’ ixõ ẽ ato yoikĩ ẽ ato inimamatiroma. Askakimaroko ẽ ato shinãmitsamatiro. Ẽ ato shinãmitsamanaino, ¿tsõa ea inimamatiromẽ? Akka ares fisti ea inimamatirofo,” ixõ ẽ shinãyamea.  
\v 3 Nãskakẽ ẽ mato kirika kenexona, mato ari kakĩma. Akka ẽ shinã, “Ẽ ato ari kaxõ ẽ ato iskafaino: ‘Mã isharakõiyama mãto chaka xatekãfe,’ ẽ ato faino shinãmitsakõitirofo,” ixõ ẽ shinãyamea. Akka mã ea nikayamaino ẽri shinãmitsakõitiro. Akka mã anã Nios nikakĩ anã isharakõiaino, mã ea inimamasharakõitiro. Akka mẽ tãpikõia ẽ inimakõiaino mãri inimakõitiro.  
\v 4 Ẽ mato kenexokĩ ẽ meyamea ẽfe õiti shinãmitsakõiaito oiayanã. Ẽkai mato shinãmitsamapainima. Askatamaroko ẽ mato kenexoni a ẽ mato noikõiai keskara mã tãpinõ. 
\s1 Fẽtsa noko chakafaito nõ rae fatiro 
\p  
\v 5 Akka nã feronãfake fẽtsa ea chakafakĩ mekafakĩ ea fisti shinãchakamanama, nã mã Nios Ifofaafori keyokõi mato shinãchakamana. Nãskakẽ noko keyokõi chakafakĩ mekafaa. Noko askafafiaino ẽkai na feronãfake omiskõimaki finapaima.  
\v 6 Akka mã ranãrito omiskõimanakĩ nãskanõkãfe.  
\v 7 Akka a mã aka keskafakĩ anã askafakĩma rae fakãfe. Nãskaxõ yoisharakãfe inimamasharaxikakĩ anã omiskõinõma. Akka mã askafayamaino ãfe shinã mẽra shinãmitsakõitiro anã shinãsharatiroma anã Nios Ifofapaima.  
\v 8 Nãskakẽ ẽ mato yoiai keskafakĩ ea nikasharakãfe. “Nõ mia noikõi. Mĩ anã nofe isharakõitiro,” ixõ yoikãfe tãpinõ.  
\v 9 Ẽ mato kirika kenexõ manamayamea tãpipaikĩ mã mẽxotaima ea nikakõimãkai.  
\v 10 Mã fetsa raefakẽ ẽri nã raefatiro. Fẽtsa ea chakafaito ẽ mato shinãkĩ Cristo ea õiaino ẽri nã raefatiro.  
\v 11 Nõ fetsa raefasharakõiaino Satanás noko feparatiroma. Nõ tãpisharakõia Satanás noko kexepaikõi. Akka a Nios Ifofaafo isharayamaino, raefayamaino, a Nios Ifofaafoma tiito chakafakĩ mekafatirofo Satanás fichipaiyai keskara. Akka nõ fetsa raefaino Satanás noko afeskafatiroma. 
\s1 Pablo pexe rasi Troas ano nokoax inimanima 
\p  
\v 12 Akka ẽ mato eõnoa tãpimapai. Ẽ pexe rasi Troas ano kani meka shara Cristoõnoa ato yoikai. Cristoõnoa nikapaikõinifo. Nãskano nõko Ifãfe ea atoki nĩchini ẽ ãfe meka ato yoinõ.  
\v 13 Akka ẽ shinãni nofe yora Tito Troas anoa ẽ fichikaira ixõ. Akka fichiyamax ẽ inimanima. Nãskaxõ ẽ fãsi shinãkõini. Nãskata, “Mẽ kai,” ixõ Troas anoafo nã nõko Ifo chanĩmara faafo ẽ ato yoita ẽ oni nono Macedonia ano. 
\s1 Cristoõxõ nõ keyokõi finõtiro 
\p  
\v 14 Aicho Epa Niosi, mĩ Cristo Jesús afara chaka potamana anã afeskafanõma. Nãskakẽ nõri afe inimai nõmãi aõxõ ãfe meka yoikatsaxakĩ yorafãfe tãpinõfo. Akka pirofomã nakas shara nachikomea nõ keyokõichi xetetiro keskafaki, nãskafakĩri Niospa noko nĩchiano nokoõxõ keyokõichi tãpitirofo ãfe meka shara.  
\v 15 Akka nõ meka shara Cristoõnoa yoimis keyokõichi nikanõfo. Akka atirifãfe chanĩmara fakõikani, Nios fe ipaxakakĩ. Akka atirifãfe nikasharakanamax Jesús Ifofakanamax nakanax omiskõipakenakafo.  
\v 16 Akka na meka shara nikaifoma mã nakanax omiskõipakenakafo mẽra fokanax omiskõixikani, nãfãfemãi na meka shara nã nõ afara pisikõi xetemis keskara xetekatsaxakakĩ. Akka nã meka shara nikaifãfe nã nõ pirofomã nakas shara xetemis keskara xetemisfo. Nãskakanax Nios fe nĩpanakafo. Akka, ¿tsõa Niospa meka Jesúsnoa yoisharatiromẽ? Akka tsõa atiroma.  
\v 17 Akka fetsafãfe Niospa meka ato yoikakĩ kori fipaikani ãa ato pãrakaxõ. Nõ mato Niospa meka yoikai noko kopifakãfe ikaxõ ãa ato pãrakaxõ ato kori fĩaifo keskafakĩ nõkai mato askafamisma. Mã nõ tãpia nõ ãfe meka yoiaito Epa Niospa noko õisharakõi, nãatomãi noko nĩchinixakĩ. Ãfe meka yoikai nõ kaxetiroma, Niospamãi noko õiaino nõmãi Cristo ãfe inaxõ. 
\c 3  
\s1 Jesús ato meka fena yoimis Pablo ato yoini 
\p  
\v 1 Askara nõ yoiaino, mã shinãiraka nã nõa nõ yoimesharai keskara. Maa. Nõa nõ yoimesharaima. Mã chaka shinãi. Akka fẽtsa yonopaiyaito fẽtsari fetsa kirika kene fomaxotiro fetsafãfe õinõfo yonosharamiskẽ. Akka, ¿mã shinãimẽ fetsafãfe nokoõnoa kirika kenenõfo noko yoisharakakĩ nõ yonosharamiskẽ Niospa meka yoikĩ? Akka nõ askara fichipaima. Akka, ¿mã shinãimẽ nõ mato kirika kene yõkaito kirika kenexõ mã noko inãnõ nõri fetsafo inãnõ noko tãpinõfo nõ mato mẽraxõ yoisharamiskẽ? Maa. Askara nõ fichipaima.  
\v 2 Akka nã kirika kenea keskara nõ fichipaima mãmãi nã kirika kenea keskarakẽ, fetsafãfe mato õitirofo mãmãi Nios Ifofasharakẽ. Mato õikakĩ nokori tãpitirofo nõ Niosxõ yonosharamiskẽ.  
\v 3 Akka mã mã isharakõia anã mã imis keskarama a Niospa fichipaiyai keskaraino. Nã noko õimana Cristo mãto õiti fetsafaa fena keskara mã inõ. Nãskakẽ mã kirika kenea keskara. Mato õixõ fetsafãfe tãpitirofo nõ Niospa meka mato tãpimasharamiskẽ. Akka na kirika kene lapisi kenemeama, askatari tokiri sapaki kenemeama; Epa Nios nĩpanakato ãfe Yõshi Sharapa mato imashara mã isharakõinõ. 
\p  
\v 4 Iskafakĩ nõ yoia, mã nõmãi tãpixõ Niospamãi noko nĩchinikẽ nõ ãfe meka mato yoinõ Cristo ãfe sharaõxõ nõ mato yoisharamis.  
\v 5 Akka nõa nõ afara shara nõ mato yoitiroma mã isharanõ. Askatamaroko Epa Niospa ãfe Yõshi Sharaõxõ nõ fetsafo tãpimatiro isharanõfo.  
\v 6 Niospa Yõshi Sharaõxõ na meka fena nõ ato yoimis Jesúsnoa nõ Nios fe nĩpaxatiro. Akka a Moisés keneniõnoa nõ ato tãpimamisma, sharafiano keyokairoko nikanõfo nõ ato yoipanã. Akka a Moisés yoini keskara keyokõi nikakanamax Nios ika ano katiroma. Askatamaroko Niospa Yõshi Sharapa noko imasharapakenaka Nios ika ano nõmãi Cristo Ifofakẽ. 
\p  
\v 7-8 Epa Niospa nõko xinifo israelifo nã ato yoipaiyai keskara ato yoini nikanõfo. Tokiri pãraki kenexõ ato yoini. Epa Niospa Moisés tokiri kene inãino luz keskara fafekõini. Nãskatari Moisés femãnã fafekõini. Nãskakẽ mã Moisés mãchi keya ariax fotokẽ nõko xini israelifãfe õitiroma inifo. Nãskax fafekõifiax fenãmãshta matapakeni. Akka Epa Niospa Moisés yoini keskara sharakõifixõ noko imapakexatiroma. Sharakõifixõ, akka iskaratĩa Niospa Yõshi Sharapa noko yoiai keskara nãroko sharafinakõia.  
\v 9 Akka nã Moisés yoini keskara sharafiano nikakanamax nakanax Nios ika ano katiroma. Akka iskaratĩa Niospa ãfe Fake Jesúsxõ noko chaka soaxotiro nõ afe isharapakexanõ. Nã sharafinakõia afaa fetsakai askarama.  
\v 10 Epa Niospa Moisés yoini keskara sharafiax, akka Epa Niospa Jesúsxõ noko axoni keskara nãroko sharafinakõia.  
\v 11 Niospa meka shara Moisés fiaino fafesharakõini. Mã fiax ãfe femãnã fafesharakõini, Moisés. Ãfe femãnã fafesharakõifiax fenãmãshta matapakeni. Epa Niospa Moisés yoini keskara sharafiax, akka Epa Niospa Jesúsxõ noko axoni keskara keyonakama nãroko sharafinakõia. 
\p  
\v 12 Nãskakẽ mã nõ tãpikõia Epa Niospa Jesúsnoa yoini keskara keyonakama. Nãskakẽ ranotama nõ Jesúsnoa yorafo yoitiro.  
\v 13 Nõkai Moisés keskarama. Moisés ãfe femãnã fafeaino samapa feopomeni israelifãfe õinõfoma nãskax fenãmãshta matapakeni.  
\v 14 Akka nõko xinifãfe nikasharapaonifoma, ãto õitimãi fẽstokõi keskarakẽ. Iskaratĩari nõko kaifo nãskarafori. A Moisés ato yoini keskara ato kirika anexonaifono ato nikakaspakanax. Nãskakaxõ Epa Niospa meka tãpisharatirofoma. Akka Cristo fistichi ato shinãmatiro nã õiti fẽstoa keskara inõfoma.  
\v 15 Iskaratĩari nã Moisés yoini keskara ato anexonaifono ãto õitimãi fẽstokõiano shinãsharapanãfãfe.  
\v 16 Askafikaxõ iskaratĩa a Moisés keneni keskara anã shinãkaxoma nõko Ifo chanĩmara fakaxõ aõnoa fisti shinãtirofo. Nãskakẽ anã feopomea keskara ixikakima.  
\v 17 Niospa Yõshi Shara nõ Ifofaax nofe ikaino afaa fetsa nõko ifo itiroma, noko ĩkixikĩ.  
\v 18 Akka nõko õitikai fẽstoa keskarama. Nõko Ifãfe ãfe meka nõ nikasharakõitiro. Ãfe Yõshi Sharapa noko ĩkixõ noko fetsafatiro a keskara shara nõ inõ. Akka mã noko fetsafaano nõ sharakõi ixii. Nãskakẽ fetsafãfe noko õikakĩ tãpitirofo nõ shara isharakẽ. Nã feisiti xinĩ chaxaino fafeai keskara noko õikakĩ nõko Ifo Jesús tãpitirofo afe keskaramãki. 
\c 4  
\p  
\v 1 Akka Epa Niospa noko shinãkĩ noko yoini ãfe meka shara Jesucristoõnoa nõ yoifofãfofãinõ. Nãskakẽ nõ shinãchakaima, nõ Niospa meka yoiki xateima.  
\v 2 Nãskakẽ nõ afaa one chakafamisma rãfixikima, a afara one chakafamisfo keskafakĩ. Askatari nõ tsoa pãramisma. Askatari nõa nõ Niospa meka fetsafaxõ yoimisma. Akka Niospa tãpia meka chanĩma fisti nõ yoimiskẽ. Nãskakẽ mã nokoki inimasharapainõ, nã nõ afarafo shara faito õi.  
\v 3 Na meka shara Jesúsnoa nõ yoimis nikakaspaifono nã onea keskara. Nãskakẽ tãpikanamax oa fẽstoa keskarafo. Nãskakanax omiskõipakenakafo.  
\v 4 Nãfofi nã niafaka chaka ãto ifoxõ ato yoimis. Nãskaxõ nã õiti fẽstoa keskara ato faano na meka shara Jesúsnoa tãpitirofoma. Nã yora fẽxõ luz ota sharafiano õitiroma keskarafo. Nãskarakaxori Jesús finakõia tãpitirofoma. Nãskatari tsõa tãpitiroma Jesús Apa keskara sharafinakõifiano.  
\v 5 Akka nõkai nõa nõ nokoõnoa nõ mato yoimisma mã noko ifofanõ. Askatamaroko nõ mato yoimis Jesucristo mãto Ifo inõ. Nõko Ifokẽ aõ noixõ nõ yonoxosharapai. Akka nõ mato axosharapai Cristoõnoa mã tãpinõ.  
\v 6 Niospa pena onifayoxoma fakishkẽ yoini pena inõ. Nãskarari nõ Jesús Ifofayamax nõko õiti nã fakish keskara chakakõi ipaoni. Akka Niospa Jesucristoõxõ nõko õiti mẽra noko chaxamashara aõxõ nõ tãpinõ afe keskara sharakõimãki. 
\s1 Pablo yoini nõ Jesús chanĩmara faax nõ isharatiro 
\p  
\v 7 Akka nõ afaayamafekẽ Niospa ãfe sharakõi noko mẽra nanea nõ ãfe meka shara Jesúsnoa ato yoinõ. Akka nã kesho noko keskarari akai afaama. Samama moshitiro. Moshifitirokẽ a mẽra afara sharakõi nõ nanetiro. Nãskarifiai nõ afaayamafiano Jesús nofe rafea. Nãskakẽ yorafãfe tãpitirofo Niospa Yõshi Shara nõmẽra nanea.  
\v 8 Nã nõ imis keskara iskaratĩa ẽ mato yoinõ mã tãpinõ. Noko chakafafiakakĩ noko xatemakanima. Nãskafixõ nõ afeskaimẽti ixõ, nõ shinãchakafikĩ mã nõ tãpia Epa Niospamãi noko axosharafafainaito.  
\v 9 Noko noikaspakakĩ noko chakafapaimisfo. Nãskakaxõ noko chĩfafofãsafamisfo. Noko askafafiaifono Epa Niospa noko potaima. Nãskakatari noko retepaikakĩ noko tsefeya fafiafono Epa Niospa noko kexesharamis nõ nayamanõ.  
\v 10 Jesús niyoano retepaipaonifo keskafakĩ nokori nãskari fakani retepaikakĩ. Noko retepaifiaifono nõko Ifo Jesús noko kexesharai noko retenõfoma. Nãskakẽ yorafãfe tãpitirofo mã Jesús nafianixakĩ anã otoax nikẽ.  
\v 11 Nõ Jesús yonoxonaito mẽxotaima noko retepaikani. Akka noko retepaifiaifono nõko Ifo Jesús noko kexesharai noko reteyamanõfo. Akka nõa nõ ifimetiroma nayamaxiki. Nãskakẽ tãpitirofo mã Jesús nafianixakĩ anã otoax nofe ikẽ.  
\v 12 Nãskakẽ Jesúsnoa nõ mato yoimis fetsafãfe noko retepaifiaifono mã chanĩmara faax mã afe ĩpaxanõ. 
\p  
\v 13 Akka Epa Niospa meka kirika ano yõra keneni iskafakĩ: “Ẽ Epa Nios chanĩmara fakõini. Nãskakẽ Niosnoa ẽ ato yoi,” ixõ kirikaki Niospa meka keneni yõra. Nãskarifiakĩ nõri Niospa meka chanĩmara fakõixõ nõ mato yoi.  
\v 14 Akka mã nõ tãpia nõko Ifo Jesús mã nafiakẽ Ẽpa Niospa anã õtofani afe ĩpaxanõ. Nãskakẽ Apa Jesús otofani keskafakĩ mato yafi nokori otofaxii nõ afe ĩpaxanõ.  
\v 15 Akka nõ omiskõikõi mato Epa Niospa meka yoi mã ãfe meka chanĩmara fakõinõ. Nãskakẽ yora ichapafãferi Epa Nios nikakõikaxõ, “Aicho, Epa Niosi, mĩ fãsi sharakõi,” faxinõfo. 
\p  
\v 16 Nãskakẽ nõ omiskõifikĩ nõ shinãchakaima. Nõko Ifokai nõ kachikiri faima. Akka nõko yorari anã kerexma nõ omiskõiaino. Askafixõ nõko shinã mẽra mẽxotaima noko kerex fafafãini.  
\v 17 Akka a nõ niyoax nõ omiskõiyoai akai afaama, samamashta keyoi. Akka nõ Jesúsnoax omiskõiaito a noko sharakõi imai a keskarakai tsõa õiyomisma. Nãfori keyonakama.  
\v 18 Akka nã nõ omiskõiai shinãtamaroko nã nõ õiyomisma nõ shinãi. Nios ika anoxõ noko inimamapakenaka. Nãa nõ shinãi. Akka nã afaranã noko omiskõimanai samama keyoxii. Akka a Niospa noko chipo imai keskara keyonakama. 
\c 5  
\p  
\v 1 Akka ẽ mato yoinõ nikakapo. Pexe xiniax pão ikax keyotiro. Nãskarifiai nõ naino nõko yora keyotiro anã nõko fero mẽsho nõ mẽra inõma. Akka tsõakai noko yora fenafaxotiroma. Epa Nios fistichi noko yora fena onifaxotiro. Akka mã nõ nai mẽra kaax nõko yora fena shara ixii. Epa Niospa noko yora fena shara faxõano a anã keyonakama.  
\v 2 Akka nõ fekaxtemis nõko yora fekaxkõimei. Nõko yora fenashara fapai nai mẽraxõ.  
\v 3 Akka nõ naax, ¿nõko fero mẽsho yoraya itiromamamẽ? Maa. Epa Nios fisti nõ Ifofamiskẽ noko yora fena shara faxotiro nõ afe ĩpaxanõ. Nãskakẽ nõko fero mẽsho yoramais nai mẽranoax itiroma Epa Niospamãi noko yora fena faxõano.  
\v 4 Iskaratĩa nono mai ano niyoax nõko yora omiskõiyoi. Askafiax nõ nayopaima. Nõ nayoamano Cristo onõ noko yora fetsafaxoxiki nõ isharapakexanõ.  
\v 5 Nã Epa Nios fistichi noko onifani nõ afe ĩpaxanõ. Nãskakẽ ãfe Yõshi Shara nõ mẽra nanea nõ tãpinõ noko yora fetsa faxoxiaino. 
\p  
\v 6 Nãskakẽ nõ shinãsharafafãini nono mai ano niyoxõ, nayoxoma, nõko Ifo Jesús ari kayoxoma mã nõ tãpia.  
\v 7 Nãskakẽ nã Jesús ika ano õiyamafikĩ nono mai anoxõ nõ chanĩmara fafafafãini. Nãskaxõ chipo nõ õixii Epa Niospa noko fetsafaano.  
\v 8 Akka mã nõ tãpisharakõia Epa Niospamãi noko yora fetsa inãino. Akka mã nõ nakĩ nõko yora nõ ratafainikai nõ sharafinakõia ikikakĩ. Nãskakẽ nõ inimasharakõi mã nõ nai nõko Ifo Jesús femãi nõ ikikai.  
\v 9 Akka nono mai ano nõ niyoxõ nõko Ifo nõ yonoxosharayopai nokoki inimanõ. Nãskatari nai mẽraxori na fischisharapaiyai keskafakĩ nõko Ifo nõ inimamapaisharakõi.  
\v 10 Akka nã chanĩmara faafo tii Cristoki nokoxikani. Nãskatari noko yoipakexii nono mai ano niyoxõ nõ shara famismãkĩ, askayamakĩ nõ chakafamismãki. Akka nõ afara shara famiskẽ afara sharakõi noko inãxii. Akka nõ afara chakafamiskẽ afara shara noko inãpaifikĩ noko inãxima. Nãskakẽ nõ fixiima. Nãskakẽ Jesúsxõ nõ yonopai sharakõi. 
\s1 Pablo yoini Cristoõnoax nõ Nios fe rafetiro 
\p  
\v 11 Akka Niospa noko yoia keskara nõ ayamax nõ rãfitiro. Nãskatari fetsafori nõ ato yoipai nã Niospa ato yoiai keskara anõfo. Niospa noko tãpikõia nõmãi mẽstekõi yoiaito. Nõkai ato feparapaima. Mãri mã mã noko tãpikõia nõ mato pãramisma. Nõko meka mẽstekõi fisti nõ mato yoimis. Nãnori fisti mãto shinã mẽraxõ mã shinãpainõ.  
\v 12 Akka kakapai nõa nõ yoimesharapaima. Akka mẽstekõi fisti nõ mato yoimis, mã mã tãpia. Akka fetsafãfekai mato yoikõikanima mato feparapaikani. A yoiaifo anorikai yoimisfoma ãa ãto shinã mẽraxõ shinãkaxõ yoimisfo kakapaiyanã. Akka nõfi mato pãramisma, chanĩma fisti nõ mato yoimis. Nãskakẽ mã nokoki inimakõimis. Nãskaxõ mã nokoõxõ ato yoikĩ nokoõnoa mã ato yoisharatiro.  
\v 13 Chanĩma, nõ Nios noikĩ kerexkai nõ yonoxofafãimis aõnoa fetsafãfe nikasharanõfo. Akka yorafãfe nokoõnoa yoimisfo iskafakakĩ: “Na Pablo feta yonomisfãfe shinãsharamisfoma mẽxotaima ato Niospa meka yoifofãsafamisfo omiskõifinafikakĩ,” ixõ noko yoimisfo. Ãa noko askafanõfokĩ mã nõ tãpiakĩ Niosxõ nõ yonofikai mã ãfe meka tãpinõ. Akka nõ mẽstekõi shinãsharakĩ nõ mato yonoxosharamis.  
\v 14 Cristo noko noikĩ noko yoini nõ ãfe meka shara mato yoinõ. Cristo keyokõi yorafoõnoax naani. Nãskakẽ mã nõ naa keskara a nõ iyopaoni keskara ixikima.  
\v 15 Akka mã Jesús nayoni yorafoõnoax keyokõi a keskara shara ixiki. Nãskakẽ a nõ chaka ipaoni keskara ixiima. Nãskakẽ nã nõ apaiyai keskara fisti anã nõ shinãtiroma. Cristoõnoax nõ yonosharaxotiro. Cristo ãa nokoõnoax nayoni. Nafiano Epa Niospa ãfe sharaõxõ anã otofani. 
\p  
\v 16 Akka nã Jesús chanĩmara faafãfema fetsafoõnoa shinãifo keskarakai nõ anã atoõnoa anori shinãpakenakama. Nõri anori shinãyopaoni nõ anã askapaima. Cristoõnoari nõ chakakõi shinãyopaoni. Nõkai anã aõnoa anori shinãima.  
\v 17 Nãskakẽ Cristo nã Ifofaafo ato shinã fetsafaxõa anã shinãyopaoni keskara inõfoma, fena keskara shara inõfo. A Niospa fichipaiyai keskara fena keskara nõ ixii. Keyokõi fena keskara ixii.  
\v 18 Epa Niospa Cristoõxõ noko fetsafaa anã nõ noikaspanõma, nõ afe rafenõ. Askatari noko yoini aõxõ ãfe meka nõ ato tãpimanõ Epa Nios fe rafenõfo.  
\v 19 Epa Niospa Cristoõxõ keyokõi yorafo afe rafemapai anã noikaspanõfoma. Cristomãi noko nãxonikẽ Epa Niospa a nõ afara chakafamisnoa anã shinãima. Nã Epa Niospa noko yoia keskafakĩ nãnorikõi nõ mato yoimis. 
\p  
\v 20 Akka Cristo noko nĩchini nõ ãfe meka mato yoinõ. Nõ ãfe meka mato yoi nã Epa Niospa mato yoiai keskara. Epa Niospa nokoõxõ mato yoi nã Cristo mato yoipaiyai keskafakĩ. Nãskakẽ nikakõikãfe Cristo mato nãxonikĩ mato chaka soaxoxiki. Nãskakẽ Cristo Ifofaxõ mãto chaka xatekãfe Epa Nios fe rafexikakĩ.  
\v 21 Akka Cristo afaa chakafapaonima. Nãskafikẽ Apa Niospa nõko chakafo akiki nĩchini. Cristo afaa chakafayamafiakatsaxakĩ noko nãxoni Epa Niospa noko omiskõimayamanõ. Nã yora chaka keskarax nõko chakafoõnoax Jesús nani. Nãskakẽ nõ Jesús Ifofaino Niospa noko õitiro sharakõi nã nõ afaa chakafamisma keskara, nokoki inimakõikĩ. 
\c 6  
\p  
\v 1 Akka nõ Nios feta yonomis ãfe meka mato yoikĩ. Nãskakẽ nõ mato yoisharapai Epa Niospa mato noisharakõiaino, mã shinãmakiyamanõ, ãfe meka mã kachikiri fayamanõ. Fetsafãfe anorima mato yoiaito nikayamakãfe. Askatamaroko Jesús meka shinãmakiyamakãfe.  
\v 2 Taeyokĩ Niospa meka yoimisto kirika keneni iskafakĩ Niospa yoiaino: 
\pi1 Ẽ mato shinãito, mã ea yoiaino ẽ mato nikai mã omiskõiaino. Ẽ mato ifinõ, ẽ mato axosharaxiki, 
\m ixõ yoini Epa Niospa. Nãskakẽ nikasharakãfe iskaratĩari Epa Niospa noko axosharapai noko ifixii. 
\p  
\v 3 Nõkai mato afaa chaka yoipaima tsõa noko chakafayamanõfo. Akka nõ chaka niaito õikaki a Nios chanĩmara faamafãfe noko mekafatirofo. Nãskakẽ nõ afaa chakafapaima.  
\v 4 Akka nã nõ keyokõi Niosxõ aka keskara nõ mato õimamis nõmãi yonoxokatsaxakĩ. Noko omiskõimafiaifono nõ tenekõimis. Askatari fekaxteifinakõita nõ tenekõimis. Noko chakakõi famisfo, noko askafafiaifono nõ tenekõimis.  
\v 5 Nãskakaxõ noko koshamisfo, askatari karaxa mẽra noko ikimamisfo. Nãskatari yora chakafãfe noko noikaspakakĩ fãsi noko mekafamisfo. Noko askafafiaino fekaxtekõiyanã nõ yonomis. Askatari nõ oxa tenekõimis. Nãskaxri nõ fonãikõimis.  
\v 6-7 Noko askafafiaifono afaa chakafatama nõko õiti mẽraxõ nõ afaa chaka shinãima. Nõ Cristo fe rafeaito nã noko yoimis keskara mã nõ tãpia. Noko chakafafiaifono nõ atoki õitifishkitama. Fena fenakima nõ tenekõimis. Nãskax fetsafo fe rafepaikĩ nõ ato sharafa fafafãimis Niospa Yõshi Sharaõxõ nõ ato askafamis ato pãrakĩma nõ ato noikõimis. Nõ askakĩ keyokõi nõ mato õimatiro nõmãi Niospa yonomatixõ. Satanás noko afara chakafamapaifiaito Niospa Yõshi Sharapa nã Nios keskara shara noko imaino ãfe Yõshi Sharaõxõ nõ afara chaka potatiro.  
\v 8 Akka fetsafãfe nokoõnoa meka shara yoifiaifono fetsafãferi nokoõnoa meka chaka yoimisfo. Akka fetsafãferi na yorafo sharakõira noko fafiaifono fetsafãferi noko ĩchamisfo. Nõ chanĩmakõi yoifimiskẽ noko feparamisfo ixõ nokoõnoa fetsafãfe yoimisfo.  
\v 9 “Pablo fe rafeakai tsoama. Nõkai ato õimisma,” noko fafiaifono akka fetsafãfe Nios Ifofakõikaxõ noko noikani. Nãskatari nõ napaifiax nõ nia. Noko omiskõimafiakakĩ noko tsõa reteama.  
\v 10 Akka nõ shinãmitsafiaito nõko Ifo Niospa noko inimamamis. Akka afaamaisfixõ nõ Niosxõ nõ fetsafo imasharakõimis, Nios Ifo shara faifono. Nõ afaamais keskarafiax nõ aya a Niospa noko inãi. Akka nã keyokõi Niosnã nõkonãri. 
\p  
\v 11 Efe yora mĩshtichi Corinto anoafãfe, nã nõko õiti mẽraxõ nõ shinãi keskara nõ mato yoimis. Nõ mato fomãmisma. Keyokõi nõko shinã mẽraxõ nõ shinãi keskara nõ mato yoimis mã tãpinõ.  
\v 12 Akka nõ mato noikaspamisma. Akka mãroko noko noisharamisma.  
\v 13 Akka iskaratĩa ẽ mato yoi ãpa fake noisharakĩ yoitiro keskafakĩ, nokori noisharakãfe nã nõ mato noiai keskafakĩ. 
\s1 Nã Nios chanĩmara faafãfema akaifo keskara ayamakãfe 
\p  
\v 14 Nã Jesús chanĩmara faafoma fe rafeyamakãfe. Akka na yora Nios Ifofaafãfe shinãifo keskarakai nã yora chakafãfe shinãkanima. Nãskarifiai pena fe fakish osinãtiroma.  
\v 15 Nãskarifiakĩ Cristo feta Satanás anoris shinãtirofoma. Akka nã Cristo Ifofaafãfe fichipaiyaifo keskara nã Cristo Ifofaafãfema askara fichipaikanima.  
\v 16 Nã Cristo chanĩmara faafãfe ichanãmisfo Epa Nios kĩfinõfo. Akka nã Ifofaafoma ato fe ichanãtirofoma afara nimofo fakaxõ kĩfitirofo na nõko niosra ikaxõ. Nãskakẽ nã rafe osinãtiroma. Akka afãfekai Epa Nioskõi kĩfipaikanima. Akka Epa Nios nõ mẽra ika. Nãskakẽ nõ Niospa pexe keskara. Nõko Nios nia. Epa Niospa yoini iskafakĩ: 
\pi1 Ẽfi ato fe ikikai, ato fe rafexikĩ. Ẽ ãto Nios ikaino afo efe yora ikani, 
\m ixõ yoini.  
\v 17 Askatari Epa Niospa yoini iskafakĩ: 
\pi1 Akka nã Cristo chanĩmara faamafãfe akaifo keskara ayamakãfe. Ato fe rafeyamakãfe afaa chakafaxikãkima. Mã askaino ẽ mato ifikai, 
\m ixõ yoini.  
\v 18 Askatari nã afama mĩshti atiroto ato yoini iskafakĩ: 
\pi1 Akka ẽ mãto Epa ixii. Akka mã ẽfe fakefo ixii, 
\m ixõ nõko Ifo Niospa yoini. 
\c 7  
\p  
\v 1 Ẽfe yora mĩshtichi, Epa Niospa nã noko yoiyoni keskara shara. Nãskakẽ nõ isharanõ keyokõichi nõko chaka nõ xatenõ. Afarafãfe nõko yora iyamai nõko õiti mẽraxõ noko chakafamatiro nãfo nõ xatekõinõ sharakõi ixiki. Nõ Epa Nios noikõiax a keskara shara nõ ipai. 
\s1 Corinto anoxõ chaka shinãyopaonifo. Akka iskaratĩa mã shara shinãkani 
\p  
\v 2 Akka nã yora fisti keskara nõ inõ noko noisharakãfe. Nõkai mato chakafamismaki. Askatari nõ mato afaa chakafamamisma, askatari nõ mato pãramisma.  
\v 3 Ẽkai nã ẽ mato yoiai keskafakĩ mekakĩ chakafakĩ ẽ mato yoimisma. Akka ẽ nayoxoma ẽ mato mẽxotaima noikõifafãini. Nãskatari mẽ nafiaxõ mẽxotaima ẽ mato noikõixii. Nãskakẽ tsõa noko paxkanã fatiroma nã yora fisti keskaramãi nõ ikẽ.  
\v 4 Mã nõ tãpikõia mã noko noikõiyanã, mã Jesús Ifo sharakõi fakẽ. Nãskakẽ nõ yorafo yoimis mã isharakõimiskẽ. Nãskatari nõ omiskõifi nõ inimakõimis. 
\p  
\v 5 Akka nã nõ Macedonia ano nokoitatĩa nõ teneama, mẽxotaima fanĩma mĩshtinoax fekaxteaifãfe õi. Akka nõ shinãchakakõimis. Askatari a Nios Ifofaa fetsafori nõ ato shinãkõimis, mã nõko Ifo Jesús kachikiri faafora ixõ.  
\v 6 Akka nã shinãmitsaifo Niospa ato inimamamis. Nãskakẽri nokoki Tito nĩchiano nõ inimakõimis.  
\v 7 Akka mã nokoki Tito nokoxõ noko inimama noko yoia iskafakĩ: “Corinto anoafãfe ea inimamakõiafo,” ixõ Titopa noko yoia. Askara nõ nikai nõ inimakõia. Askatari noko yoia mã eõnoa yoikĩ iskafakĩ: “Nõ Pablo shinãkõi nokoki samamashta nokopainõ,” ixõ mã yoikẽ: “Nãskaxori nõko õitinĩ nõ shinã chanĩma nõ afara chakafamis. Akka nõkai anã askapaima. Nõ Pablo shinãi,” ixõ mã yoiaino Titopa ea yoia. Nã keskara nikai ẽ inimai finasharakõi. 
\p  
\v 8 Akka ẽ mato kirika kenexõ manamakĩ ẽ mato shinãmitsamana. Nãskax ẽri shinãmitsakõiyoa. Akka anã ẽ shinãmitsaima.  
\v 9 Akka iskaratĩa ẽ inimakõi. Akka ẽ mato shinãmitsamanax ẽ inimaima. Akka mã shinãmitsayanã mã Epa Nios kĩfiti iskafakĩ: “Epa Niosi, nõ afara chakafakĩ noko raefafe nõ afara chakafamiski,” ixõ mã yoikĩ. Nãskakẽ ẽ inimasharakõimis. Mã askafaino Epa Niosri matoki inimasharakõi. Akka ẽ mato kirika kenexõ manamakĩ ẽ mato yoikĩ chakafaama. Askatamaroko ẽ mato yoisharakõia mato axosharayanã.  
\v 10 Akka nõ shinãkĩ iskafatiro: “Ooa, ẽ afara chakafakĩ, Niosri ẽ chakafaa,” ixõ shinãkĩ nõko chaka nõ xatepaitiro Epa Nios Ifofapaikĩ. Nõ askaito õikĩ Epa Niospa noko ifitiro nõ afe ĩpaxanõ. Nãskaxõ nõ shinãtiroma iskafakĩ: “Ooa, ẽfe chaka ẽ xateama shara ẽ ikerana. Niosri ẽ Ifofaama ẽ shara ikerana,” ixõ anori nõ shinãtiroma. Akka nã chanĩmara faamafãfe nõ shinãi keskara shinãkanima. Iskafakĩ shinãmisfo: “Ooa, nõ afara chakafaa,” ixõ shinãkani ãto õiti mẽra shinãmitsakanima Nioskai shinãpaikanima. Nãskax nakanax Epa Nios fe ipanakafoma.  
\v 11 Akka mãkai askarama. Shinãkapo. Mã mãto õiti mẽraxõ mã mã shinã anã mã Nios Ifofai mãto chaka xatepaikĩ nã Niospa fichipaiyai keskafakĩ. Nãskax mã ratekõia Niospa keyokõi noko omiskõimaxira ikax. Nãskakẽ mã mã itipinĩkõia ika a afara chakafaifo ato omiskõimaxiki. Nãskaxõ mã fãsikõi ato yoia ãto chaka xatenõfo. Nãskakẽ mã mã noko ispamãkai ato keskarama. Nãskakẽ mã ea fichisharapaikõi ẽ mato õikanõ mã isharakõiyamãkĩ.  
\v 12 Akka ẽfe kirika kene fixõ mã ea noiyanã mã ea nikakõisharamis. Akka ẽ kirika keneama, nã feronãfãke afara chakafaaõnoa omiskõimakãfe ixõ. Askatari nã feronãfãke omiskõimanafoõnoari ẽ kirika keneama. Akka ẽ mato kirika kenexona mã tãpinõ mã ea noimãkai. Akka mã ea nikakõimis. Nãskaxõ mã tãpitiro mãmãi ea noikĩ Niospa ferotaifi. 
\p  
\v 13 Nãskakẽ nõ inimasharakõi, mãmãi noko noisharakõiaino nikakõisharayanã. Akka Titori matoõnoax inimasharayamea. Nã Tito inimaito õi nõri inimaifinasharakõiyamea.  
\v 14 Akka Tito kayoamano ẽ yoiti iskafakĩ: “Na Corinto anoafo sharakõifo,” ixõ ẽ yoiti. Nãskakẽ Tito mato mẽra kaano mã ifisharakõiyamea. Nãskakẽ ẽ matoõnoax rãfiyameama. Akka chanĩma fisti nõ mato yoimis. Nã ẽ matoõnoa Tito yoia keskara chanĩmakõi Titopa mato õia.  
\v 15 Tito matoki nokoxõ õia mã rateaito mato õita noko Titopa ferateneira ikax. Nãskakẽ pishta rateyanã mã Tito nikakõita. Nãskakẽ Titopa mato shinãkĩ, mato noikĩ finakõi.  
\v 16 Ẽri matoki inimakõi. Akka iskaratĩa mẽ tãpia nã ẽ mato yoiai keskara mã amiskẽ. 
\c 8  
\s1 “Afarayaxõ fetsafo inãsharakãfe,” ixõ Pablo Corinto anoafo yoini 
\p  
\v 1 Akka meka fetsari ẽ mato yoinõ mã tãpinõ. Mã Epa Nios Macedonia anoxõ chanĩmara faafono Epa Niospa ato noikĩ ãto shinã mẽraxõ ato shinãmashara fetsafori kori inãsharakõinõfo.  
\v 2 Akka Macedonia anoax omiskõifikakĩ Niosnoax inimakõikakĩ, afaayayamafiakaxõ nã yora afaamaisfo ato afara fetsa inãsharakõiafo.  
\v 3 Akka nã ẽ õia keskara ẽ mato yoinõ. Fetsafãfe afaayayamafiakaxõ fetsafori ato afara ato inãsharakõiafo. Ato afaa fĩshkofafoma. Nãskakẽ atonã afaa ichapa nẽteama.  
\v 4 Iskafakĩ ea yoiafo ato inãsharapaikĩ: “Nã Jesús chanĩmara faa fetsafãfe kori yopakani. Nãskakẽ nõri ato afara fomasharapai,” ea faafo.  
\v 5 Nõ shinãyamea kori fistis noko inãkanira ixõ, Jerusalén anoafo a Nios Ifofaafo ato foxopaikĩ. Akka noko kori inãyokaxoma taefakĩ Nios inãyameafo, iskafakĩ yoiyanã: “Ifo, nõfi mefe yorakĩ nã mĩ noko afara amapaiyai keskara mĩ noko yoitiro,” ixõ yoiyameafo. Nãnori yoikãta nokori yoiyameafo iskafakakĩ Niospa fichipaiyai keskafakĩ: “Nõri nõ mato nikakõinõ,” ixõ noko yoiyameafo.  
\v 6 Titopa taefakĩ mato yoiyoni iskafakĩ: “Mãto korifo ichafakãfe a afaamaisfo Jerusalén anoafo ato inãxikakĩ,” ixõ mato yoiyoni. Nãskakẽ nõ Tito yoiyamea iskafakĩ: “Nã mĩ yoimis keskafakĩ anã ato yoife nã afaamaisfo Jerusalén anoafo ato kori inãnõfo. ‘Mã ato noikĩ mã ato kori inãtiro,’ Corinto anoafo ato yoife,” ixõ nõ Tito yoiyamea.  
\v 7 Akka mã Jesús chanĩmara fakĩ finakõiyanã mã Niospa meka mẽstekõi yoimis, ãfe meka tãpisharakõiyanã. Chanĩmakõi mã Jesús yonoxosharakõiyanã mã noko noisharakõi. Nãskakẽ nã mã afarafo shara faa keskafakĩ nã afaamaisfori mã ato inãsharatiro. Niosxõ mã ato noikõikĩ inimasharakõikai mã ato inãtiro, fetsafo finõkõinĩfofã nã mã imis keskayanã. 
\p  
\v 8 Akka ẽakõi ẽ mato yoima nã afaamaisfo mã ato kori inãnõ. Akka ẽ tãpipai fetsafãfe ato kori inãpaiyai keskafakĩ mãri ato inãpaimãkai. Askayamakĩ mãto meka fistichi mã yoiaraka nõ ato inãira ixõ. Akka askakĩma mã ato noikõiyanã mã ato inãsharatiro.  
\v 9 Mã mã tãpia nõko Ifo Jesucristo nai mẽranoax nãmã fotoyoamax afama mĩshtifoya iyopaoni. Afaakai yopapaonima. Nãskafixõ noko noikõikĩ ãfe afama mĩshtifo keyokõi potãferani. Nãskax nokoõnoax afaamais iyopaoni nõ aõnoax isharapakexanõ. 
\p  
\v 10 Akka nã ẽ shinãinoa ẽ mato yoinõ mã tãpinõ. Akka mã xinia fisti finõa mãkai inimakõiyanã kori ichafaxõ mã ato inãma. Akka taefakĩ nã afaamaisfo mã ato noikĩ mã ato kori inãpaikĩ mã fiyamea mã mekea ato chipo inãxiki.  
\v 11 Nãskakẽ inimakõikĩ mã kori ichafakĩ taefati keskafakĩ iskaratĩari inimayanã ato inãsharakãfe anã afaa yopanõfoma. Nã mã ato inãpaiyaiti ato inãkãfe.  
\v 12 Akka mã ato inãpaikĩ mã ato inãtiro. Askatari mã afarayaxõ mã ato inãsharaito Epa Niospa tãpia. Askatari mã afara ichapayaxoõma mã ato inãitori nãri Epa Niospa tãpia. Nãskakẽ inimakõi. 
\p  
\v 13-14 Akka ẽ mato iskafakĩ yoima: “Ichapakõi ato inãkãfe,” ixõ ẽ mato yoima. “Askatari keyokõi mã ato inãx mã afayaima,” ixõ ẽ mato yoiama. Akka iskaratĩa mã afara ichapaya. Nãskakẽ nã afara yopaifo mã ato inãtiro. Akka mãri afara yopaito nãfãfe afara ichapayakaxori matori inãtirofo. Mã askai mã ranã mã kexenõnãsharax mã isharakõitiro afaa yopaxikima.  
\v 15 Akka kirika ano Niospa meka kenea iskai: “Akka nõko xinifo tsõa istomaxõ a piaifo Niospa ato inãpaoni. Akka nã ichapa fiato texefapaonima. Akka nã ichapama fiatori afaa yopapaonima,” ixõ kirika ano Niospa meka yõra keneni. Nãskakẽ yora fetsafo nõ afara inãito, Niospari noko afara fetsafo noko inãtiro nõ afaa yopayamanõ. 
\s1 Tito fe rafeafo 
\p  
\v 16 Ẽ matoõnoa shinãkõiai keskafakĩ Titopari ãfe õiti mẽraxõ mato shinãkõi, Epa Niospa shinãmanaino. Nãskakẽ nõ Epa Nioski inimakĩ nõ aicho fai.  
\v 17 Akka iskafakĩ nõ yoiyamea: “Corinto anoafo anã ato õitãfe ato yoisharaxikĩ,” ixõ nõ Tito yoiyamea. Nãnori nõ yoiaino inimayamea. “Aicho, ẽ ato ari kaikai ẽ ato yoisharai kaikai,” ixõ noko yoiyamea. Akka ẽ shinãi nõ yoiai fistiõnoax kaima. Ãari matoki kasharapai kai.  
\v 18 Akka nã nofeta Nios Ifofamis fetsa nõ Titoya nĩchi. Nã nofe yora, nãatori Jesúsnoa ato yoisharamis. Nãskakẽ aõnoa keyokõichi meka shara yoimisfo.  
\v 19 Akka nã Nios chanĩmara faafo tiito ichanãkaxõ na feronãfake katonifo, nofeta nã kori yopaifo foxõikanõ. Nios shinãkĩ na kori nõ ato inãyanã nõko Ifo sharara fanõfo. Askatari nõ mato feta nõ ato inãpai tãpinõfo nõ ato axosharapai. 
\p  
\v 20-21 Nã afaamaisfo nõ ato kori foxosharapai. Nãskakẽ yorafãfe ferotaifi nõ ato õimasharapai noko chakafakĩ mekafayamanõfo. Na kori ichapa nõ ato foxosharapai noko iskafanõfoma: “Nõko kori ranãri oneafo,” noko fanõfoma. Nãskakẽ nõko Ifãfe ferotaifi nã yorafãfe ferotaifiri nõ ato õimapai nõ isharakõixõ. 
\p  
\v 22 Akka nã nofe yora nã Jesús Ifofamis fetsa Tito yafi nõ mato nĩchi. Nã feronãfake mã nõ õimis nãato Jesús chanĩmara fakõimis. Nofeta Jesús yonoxosharakõimis. Akka nãato mato nikamis mã Jesús Ifofasharakõixõ nã afaamaisfo mã ato inãsharakõiaito. Nãskakẽ mato ari kapaimis mato feta ato shara faxiki.  
\v 23 Akka mã mã Tito õimiski. Nãato efeta mato yonoxosharamiski. Nã efe rafemis Jesús yonosharaxoxiki. Nã Jesús chanĩmara faafo raferi afe mato ari fokani. Akka nã Jesús chanĩmara faafãfe ichanãkaxõ ato katonifo mato ari fonõfo. Nã rafeta Nios Ifofasharakõimisfo. Nãskakẽ ato katonifo mato ari fonõfo.  
\v 24 Akka mato ari nokofaifãfe ato ifisharakõikãfe nã Nios Ifofaafo ato katonifo ato tãpinõfo mã ato ifisharaito. Mã ato askafaino nã ẽ matoõnoa yoisharamis keskara tãpitirofo chanĩmakõikẽ. 
\c 9  
\s1 Nã Nios Ifofaafãfe Corinto anoafo feta Macedonia anoxõ nã Nios Ifofaa fetsafori ato kori manamanifo 
\p  
\v 1-2 Akka nono Macedonia anoxõ ẽ kirika kenexõ ẽ mato fomakĩ ẽ mato yoikĩ iskafapaima: “Ato kori fomakãfe,” ixõ ẽ mato yoipaima. Akka mẽ tãpia mã xinia fisti aka nã Jesús chanĩmara faa fetsafãfe afara yopaifãfe mã ato inãpaiyaito. Akka ẽ Macedonia anoafo ẽ yoikĩ iskafaa: “Acaya anoxori ato kori fomapaikani Judea anoafo,” ixõ ẽ yoia. Ẽ ato askafaito nikakaxõ akairi ato kori fomasharapaikani.  
\v 3 Nãskakẽ ẽ Tito yafi nã afe rafeafo ẽ matoki nĩchi nã ẽ matoõnoa yoisharai keskara chanĩmakõikẽ tãpinõfo. Ẽ Macedonia anoafo ato yoimis iskafakĩ: “Nã Corinto anoafãfe mã itipinĩshara faafo ato kori fomaxikakĩ,” ixõ ẽ ato yoia. Akka ẽ Tito yafi a afe rafeafo ẽ nĩchi mato ano nokokaxõ õinõfo nã ẽ matoõnoa ato yoia keskara chanĩmamãkĩ.  
\v 4 Akka Macedonia anoafori efe foaifono ẽ ato fe mato ano nokoxõ õia mã kori ichafayamano ẽ mãto rãfiaino mãri mã rãfipaitiro.  
\v 5 Nãskakẽ ẽ shinã Tito yafi afe rafeafo rekẽ mato ari nĩchixiki mato feta kori itipinĩfanõfo ato fomaxikakĩ nã afaamaisfo. Akka afetĩama mã mã shinãxõ yoiyoni: “Nã afaamaisfo nõ ato kori fomanõ,” ixõ. Akka ẽ mato yoiama: “Ato kori inãkãfe,” ixõ. Mãakõi mã ato inãi. Akka nãskara shara mã ato inãpaiki mã ato inãtiro. 
\p  
\v 6 Nãskakẽ shinãsharakãfe. Akka nõ fimi exe fisti fanaxõ ichapa fitiroma. Akka nõ fimi exe ichapa fanano nõ fimi exe ichapa fitiro. Nãskarifiakĩ nõ fetsafo afara ichapama inãkẽ nokori Niospa ichapama inãxii. Akka nõ inimayanã fetsafo ichapa inãito nokori Niospa ichapa inãtiro.  
\v 7 Nã ãto shinã mẽraxõ shinãifo keskafakĩ fetsafo inãtirofo. Nãskakẽ iskafakĩ shinãtirofoma: “Ooa, ẽ ichapama inãpaifiaito ea yõkarifaito ẽ inã.” Askatari iskafakĩ shinãtirofoma: “Akka ẽ inãyamaino ekeki õitifishkitiro. Akka ẽ inãi ekeki õitifishkiyamanõ,” ixõ anori shinãyamakãfe. Askatamaroko inimayanã inãkãfe. Nã fetsafo ato afara inãi inimamis nã Niospa noikõi.  
\v 8 Akka nã mã fichipaiyai tii keyokõi Niospa mato inãtiro afara sharafo fetsa fetsatapafo mã afaa yopanõma. Askatari nã afara yopaifo mã ato inãno, Niospa keyokõi tãpia mato sharafa fafafãitiro mãri fetsafo shara fanõ.  
\v 9 Niospa meka aõnoax kirikaki kenea iskai: 
\pi1 Feronãfake sharapa nã afaamaisfo afara ichapa ato inãsharamis. Nãskakẽ Epa Niospa nã feronãfake axosharaino mẽxotaima ato afara inãsharatiro, 
\m ixõ keneni.  
\v 10 Niospa fimi exefo onifani. Nãskakẽ nõ fimi exe fanatiro. Chipo Niospa ãfe fanafo foaimasharaxotiro pisharanõ. Nãskarifiakĩ mã afara yopaito Niospa mato inãsharatiro. Afara ichapakõi mato inãno mã inimayanã nã Nios Ifofaafo Jerusalén anoafo mã inãsharafafãitiro.  
\v 11 Chanĩma, Niospa mato afaa fĩshkoima afara ichapa mato inãi mãri ato afara ichapa inãnõ. Akka nã afara yopaifo mã ato inãi nãfo nõ ato foxoxii. Nãskakẽ inimayanã yoixikani iskafakĩ: “Aicho Epa Niosi, mĩ fãsi sharakõi,” ixõ yoixikani.  
\v 12 Akka mã ato afara inãsharaino nã afaamaisfãfe fixikani. Nãskakẽ mã fĩkaxõ inimayanã Epa Nios yoixikani iskafakakĩ: “Aicho Epa Niosi, mĩ noko shara famis,” ixõ yoixikani.  
\v 13 Mã ato afara inãsharano nã afaamaisfo inimakõixikani mã ato inãsharano. Nãskakẽ yoikĩ iskafaxikani: “Aicho Epa Niosi, nã noko afara inãifãfe mĩ meka nikasharakõimisfo. Jesús nõko Ifo mia famisfo. Mĩ ato yoia keskafakĩ noko inãsharafo. Fetsafori nãfãfe afara ato inãsharafo. Nãskakẽ mã nõ ato tãpikõia chanĩmakõi mĩ Fake Jesús ãto Ifokõi,” ixõ nã afaamaisfãfe yoixikani.  
\v 14 Nãskakẽ mato Epa Nios kĩfixoxikani. Mã Niosxõ ato afara inãsharakẽ, yoikĩ iskafaxikani: “Epa Niosi, mĩõxõ na yorafãfe noko afara inãsharafo. Aicho Epa, nõ ato fãsi noikõi. Atori shara fafe,” ixõ mato Epa Nios kĩfixoxikani.  
\v 15 Aicho Epa Niosi, mĩ Fake Jesucristo mĩ noko inãsharakõini nofe rafesharapakexanõ. Nãfi sharafinakõiakĩ aõnoa nõ yoisharapaikõi nõkai tãpiama afeskaxomãi nõ yoisharakõinõ. 
\c 10  
\s1 “Niospa ea nĩchini Jesúsnoa ẽ mato yoinõ” ixõ Pablo ato yoini 
\p  
\v 1 Iskaratĩari meka fetsari ẽ mato yoisharapai. Efe yora mĩshtichi, ea nikasharakãfe. Jesucristokai meka mitsisipato noko yoimisma. Noko yoikĩ fenãmãshta noko yoisharamis nõ ãfe meka nikasharakõinõ. Nãskarifiakĩ ẽri Cristoõxõ mato fenãmãshta yoisharapai mã tãpinõ. Akka eõnoa yoikĩ iskafamisfo: “Pablo nofe ixõ fenãmãshta noko yoiaito nõ õimis. Nãskafixõ noko kirika kenexoni mitsisipakai noko kirika kenexonaito nõ õimis,” ixõ ea yoimisfo.  
\v 2 Ẽ matoki nokoxõ fãsi mekakai ẽ ato yoipaima ea nikanõfo. Askafixõ ea nikayamafiaifono fãsi kerexkai ẽ ato yoitiro. Akka nã ea chakafakakĩ mekafaifo ato nikayamakãfe. Akka eõnoa yoi iskafamisfo ãa chanĩkani iskakani: “Pablo noko yoi nã Nios Ifofaamafãfe yoiaifo keskara. Niospa shinãõxõkai noko yoima,” ixõ yoimisfo. Akka ẽ matoki nokoxõ ẽ mato yoitiro nã Nios Ifofaamafãfe shinãifo keskara ẽ mato yoimisma. Niospa shinãi keskara fisti ẽ mato yoimis. Akka mẽ nokoxõ fãsi mekakai ẽ ato yoixii tãpinõfo.  
\v 3 Chanĩma, nono mai ano nõ ika nã Nios Ifofaafoma fe. Akka nã Nios chanĩmara faamafãfe fetsafo finõpaiyaifo keskai nõkai askamisma nã noko noikaspaifo ato finõxiki.  
\v 4 Akka a Nios Ifofaafoma a Satanás nikakĩ mato chanĩkĩ tãpimapaikani mã anã Jesús Ifofayamanõ. Mato pãrapaikani. “Nõ Nios Ifofara,” ikani. Askatamaroko nõ Nios nikakĩ nõ mẽxotaima yoimis chanĩmakõi. Nãskaxõ Nios ãfe sharaõxõ nõ ato xatematiro afara chaka anã yoiyamanõfo.  
\v 5 Epa Niospa noko yoiaino nõ fetsafo tãpimatiro ãa chanĩaifo, “Nõ Niospa meka tãpisharakõiakĩ,” ikanaifo, kakapaiyaifo. Akka nõ Niospa sharaõxõ fetsafo nõ ato tãpimatiro nã chanĩmisfo Niospa meka tãpisharafoma. Shara shinãfoma. Epa Nios Ifofaima. Niosxõ nõ ato yoimis Nios Ifofanõfo.  
\v 6 Akka ea Jesús nĩchini ãfe meka ẽ mato yoinõ. Nãskakẽ mã Jesús yafi ea nikakõixõ mã anã afaa chakafayamaino ẽ mato afeskafatiroma. Akka mã noko nikakaspaito ẽ mato omiskõimatiro. 
\p  
\v 7 Akka mã õikĩ shinãi oa shara keskaraxõ fetsafãfe yoiaifono iskafakĩ: “Cristo ea nĩchini ãfe meka ẽ mato yoinõ. Akka Pablokai ea keskarama,” ixõ mato yoimisfo. Akka nãfãfe shinãsharakaxõ tãpitirofo eari Cristo nĩchinikẽ ãfe meka shara ẽ mato yoinõ.  
\v 8 Nõko Ifo Jesús ea yoimis keskara ẽ mato yoitiro. Mato afaa chakafamatama nõko Ifo ẽ mato Ifofamasharapai mato õiti fẽpeaxosharaxiki. Ẽ anori mato yoi ẽa kakapaitama, ẽroko mato yoisharapai. Ẽ anori mato yoikai ẽ rãfima.  
\v 9 Akka ẽ mato kirika kenexõ ẽ mato ratepaima mã mesenõma.  
\v 10 Akka fetsafãferi eõnoa yoikĩ iskafamisfo: “Pablo noko kirika kenexokĩ noko feratekõiaito nõ õimis. Akka askafiax nofe ikẽ nõ õia afaamakõi nõ õimis. Ãfe mekakai mitsisipama,” ixõ eõnoa yoimisfo.  
\v 11 Nãnori eõnoa yoifimisfono ẽ mato ari samama kaxõ ẽ ato tãpimaxii. Nã ẽ mato kenexona keskafakĩ nãnorikõi ẽ mato yoixii. 
\p  
\v 12 Fetsafãfe mato yoimisfo iskafakĩ: “Nõfi afara tãpikõiakĩ nõ mato tãpimasharakõitiro,” ixõ mato yoimisfo. Nãskarafo ichanãkanax ãa ranã yoinãkani iskakani: “Noko keskarakai tsoama. Nores fisti nõ tãpisharakõia,” ikanax kakapaimisfo. Nãfo tatimakõifo afaakai tãpiafoma. Nãskakaxõ nãfãfe anorima afara chaka yoimisfo. Akka ẽkai ato keskarax ẽ sharakõi ẽ itiroma ẽroko ato keskarax.  
\v 13 Akka nõkai anori yoipaitiroma. Nã Niospa noko yoiai keskara fisti nõ mato yoitiro. Noko yoini ãfe meka shara fisti nõ mato yoinõ. Nã fisti nõ mato yoimis. Akka mã ika nã Niospa ea nĩchini ano. Akka ẽ kani Corinto anoxõ mato Niospa meka tãpimaxiki.  
\v 14 Nãskakẽ ori fetsa ari ẽ kanima, nã ea nĩchini ano ẽ kani. Akka nã nõ mato yoiai keskara chanĩmakõi. Nõkai kakapaimisma. Nã Niospa noko yoiai keskara fisti nõ mato yoitiro. Akka nõ mato Niospa meka yoikĩ taefatani Jesucristoõnoa meka shara mã nikamiskẽma.  
\v 15 Akka nã ẽ kamisma anoxõ fetsafãfe ato yoiafono nõ ato yoia ixõ nõ ato yoimisma. Akka nõ mato yoi nã nõ mato afara axosharamis fistiõnoa. Akka nã fetsafãfe mato axomisfoõnoa nõ yoimisma. Akka mã mã Jesús nikasharai. Nãskapainõ. Mẽxotaima mã nikasharakõifafãinõ. Akka mã ea ifisharakõiano mẽxotaima ẽ mato yoisharatiro nã Niospa fichipaiyai keskafakĩ.  
\v 16 Nãskakẽ mai fetsa ari chaikõi mato finõfãi ẽ kapai Jesúsnoa ato yoixiki nã Niospa meka nikamisfoma ari. Akka nãrixõ mã fetsafãfe ato yoiafono nõ ato yoia, nõ ipaima fetsafo imis keskai. Nõkai fetsafo ato yono xĩtikapaima.  
\v 17 Akka kirika ano Niospa meka kenea iskai: “Akka tsõakai ãa yoimesharatiroma iskai ẽ afama mĩshti tãpikõiakĩ ikax ãa kakapaitiroma. Askatamaroko nõ yoisharatiro nã afara sharafo nõko Ifãfe aka,” ixõ kirika ano yõra keneni.  
\v 18 Akka fetsa ãa yoimesharai akai afaama. Akikikai Nios inimatiroma. Akka Niospa fetsa na feronãfake sharakõi faax akiki inimakõitiro. 
\c 11  
\s1 Pablo ato yõani ãa chanĩkani noko Niospa nĩchiaki nõ Niospa meka mato yoinõ imisfoõnoa 
\p  
\v 1 Iskaratĩa ẽ mato yoinõ, nã yora shinãsharayamaito yoiai keskara nãnorikõi ẽ mato yoifikĩkai askarakõi ẽ mato yoima. Nã mã ea nikamis keskafakĩ iskaratĩa ea nikasharakãfe.  
\v 2 Feronãfãke kẽroyapaikĩ ãfe apa yõkatiro, nã kẽro fixiki ãfe ãfi inõ. Nãskakẽ apa ãfe fake xotofake kexesharatiro feronãfake fetsa fe oxayamanõ. Nãskax mã fianãkanax fene fes fianãtirofo feronãfake fetsafekairoko oxakatsaxakĩ. Nãskarifiakĩ ẽ mato Nios Ifofamakĩ ẽ mato kexesharani. Nãskaramãi Epa Niospa fichipaiyaino. Nãskakẽ mẽxotaima ẽ mato kexesharai mã fetsafo nã chanĩmisfo mã ato nikayamanõ. Nãskakẽ mã nai mẽra Nios ano kaax Cristo afe yorakõi mã ixii.  
\v 3 Nãskakẽ ẽ shinãchakakõi Satanás Eva ani keskafakĩ fetsafãfe matori pãrayamanõfo, mato pãraifono mã anã Cristo noinõma.  
\v 4 Ooa. Fetsafãfe mato pãrapaikani. Nõ Jesúsnoa mato yoimis keskara anori mato yoikõiyamafiaifono mãkai ato xatematama mã ato chanĩmara fai. Nõ Niospa Yõshi Sharaõxõ meka shara Jesúsnoa nõ mato yoimis keskara anorikai afãfe yoikanima. Jesúsnoa anorima mato yoifiaifono mã ato xatemanama. Mã ato nikayanã mã yoimis iskafakĩ: “Aicho, mã nofe isharapainõ,” ixõ mã ato yoimis.  
\v 5 Akka mã shinãi nãfãfe Niospa meka yoisharakõimisfora ixõ. Akka askafikaxõ ea finõfafoma.  
\v 6 Akka, ¿mã shinãimẽ ẽ yoisharatiroma? Akka ẽ Niospa meka tãpisharakõia. Nã ẽ mato yoiai anori mẽstekõi. Mã mã ea tãpikõia ẽ mato Niospa meka xafakĩakõi yoimis. Nã keskara ẽ mato õimafafãini. 
\p  
\v 7 Nã ẽ mato Niospa meka yoimis chãikai ẽ mato afaa yõkamisma. Ẽkai mato afaa fĩamisma, koriri ẽ mato yõkamisma. Õitsai, ẽ mato chakafairaka ẽ mato kori fĩakĩma. Akka ẽ Niospa meka shara Jesúsnoa ẽ mato yoimis Niospa fakefo mã inõ. Ẽ mato askafai afaamais keskara ẽ imis mã Niospa meka tãpisharakõinõ.  
\v 8 Akka ẽ mato fe ikano nã Nios chanĩmara faa fetsafãfe ea kori inãnifo aõ nã ẽ fichipaiyai keskara ẽ finõ. Õitsai, ẽ atoki yometsoa keskararaka nã kori fii mato Niospa meka yoi, ẽ mato yonoxomis keskaraxõ.  
\v 9 Ẽ mato fe imis chãikai ẽ afara yopafikĩ ẽ mato fekaxtefamisma. Akka Macedonia anoafãfe Nios chanĩmara faafo fẽkaxõ ea afarafo inãnifo. Akka ẽ mato fe imis chãikai ẽ tsoa afaa yõkamisma. Askatari ẽ tsoa afaa yõkapakenakama.  
\v 10 Cristo ãfe meka chanĩmakõi. Nãskarari nã ẽ mato yoiairi chanĩmakõi. Nãskakẽ Acaya mai anoxõ nã ẽ mato yoiai keskara ea tsõa xatematiroma.  
\v 11 Ẽ mato anori yoikĩ, ¿ẽ mato noimamẽ? Maa. Anorikaima Niospa tãpikõia ẽ mato noikõi. 
\p  
\v 12 Nã ẽ mato yonoxomis chãi ẽ mato afaa fĩapaimisma. Iskaratĩari ẽ mato afaa yõkaima. Nãskaxos ẽ mato yonoxoni nã chanĩmisfo mã anã ato chanĩmara fanõma. Nã ẽ yonoaito õikaxõ fetsafãfe yoimisfo iskakakĩ: “Nõri Pablo yonoai keskafakĩ nõ yonoi,” ifiakaxõ afãfekai ẽ yonoai keskafakĩ tsõa yonomisma.  
\v 13 Akka nãfo chanĩmisfo. Ẽ ikai keskara ipaifikani tsoa askakõimisma. “Cristo noko nĩchia aõnoa ãfe meka nõ mato yoinõ,” ixõ mato yoifikani afokai Cristo fe rafemisfoma.  
\v 14 Chanĩma, Satanás nokoki nokotiro nã Niospa ãfe ãjiri fafeai õitsa. Nãskarato noko yoitiro iskafakĩ: “Ẽfi mato xafakĩa yoikai,” ixõ noko feparapaitiro.  
\v 15 Akka nã Satanás yonoxomisfori nã keskara itirofo. “Nõri nõ Nios yonosharaxomis,” ixõ noko pãrapaikani. Nãskaifãfe õikĩ Niospa ato omiskõimakĩ finakõixii. Nãskakẽ nãfãfe afara chakafakanax omiskõipakenakafo. 
\s1 Pablo omiskõini Niospa meka yoikatsaxakĩ 
\p  
\v 16 Ẽ mato yoia keskara anã ẽ mato yoinõ: “Pablo afaa tãpiama,” ixõ eõnoa shinãyamakãfe. Akka ea nikapaikĩ ea nikayokãfe. Nã yora fetsa afaa tãpiama mã nikamis keskafakĩ eari nikasharayokãfe. Ẽari ẽ pishta yoimeyonõ.  
\v 17 Nã ẽ mato yoiai keskara a ẽa ẽ yoimesharai ẽfe Ifãfe ea anori yoiama. Akka nã afaa tãpiamafãfe anori yoimisfo.  
\v 18 Akka nã nõko Ifo chanĩmara faafoma ãa yoimesharaifo keskara nãnori fetsafãfe mato yoimisfo. Akka iskaratĩari ẽ mato yoi a ẽari ẽ yoimesharai keskara.  
\v 19 Akka mã shinãi mã tãpikõia. Nãskaxõ nã afaa tãpiamafo mã ato nikamis. Akka afeskakĩ mato anorima yoifiaifono mã ato xatemamisma.  
\v 20 Mato yoimisfo ãto yonomati keskarakõi mato fakaxõ, askatari mato kaxpa yonomamisfo. Nãskatari mato pãramisfo, askatari mato chakafamisfo, askatari mato ĩchamisfo. Mato askafaifono mã tenekõimis.  
\v 21 Mato askafakakĩ shinãkaniraka nõ mitsisipakõira ikaxõ. Ooa. Nõkai mitsisipama oa ato akaifo keskafakĩ nõri mato askafapanã. Akka nõkai mato askafamisma nõkairoko ato keskaraxõ. 
\p Akka nãfo ãa yoimesharakakĩ mato afara yoimisfo keskafakĩ ẽari ẽ yoimesharatiro. Ooa. Nã afaa tãpiamafo keskaraxõ anã ẽ mato yoi.  
\v 22 Akka nãfo, “Nõ hebreos yorafo,” ikani. Akka ẽri hebreo yora. Askatari, “Nõ israeli yorafo,” ikani. Akka ẽri israeli yora. Askatari, “Nõ Abraham ãfe fena,” ikani. Akka ẽri Abraham ãfe fena.  
\v 23 Akka, ¿nãfo fistimẽ Jesucristo yonoxomisfo? Maa. Akka ẽroko yonoxokĩ finakõimis. Ooa. Ẽ iskafakĩ ẽ mato yoi oa shinãsharayamaito yoiai keskaraxõ ẽ mekai askayamapaifi. Akka nã chanĩmisfãfe mato yoikĩ iskafakani: “Nõ Jesús yonoxokõimis. Askatari Jesúsxõ noko karaxa mẽra ikimanafo,” imisfo. Akka ẽroko yonokĩ finakõimis. Nãskakẽ earoko karaxa mẽra ikimakĩ finakõimisfo. Askatari ea koshakĩ finakõimisfo. Ea askafakĩ fetsaifono mẽ nakerakõimis.  
\v 24 Efe yora judeofãfe ea koshakakĩ cinco veces fakĩ ea koshamisfo. Nã ea koshaifo tii treinta y nueve ea famisfo.  
\v 25 Romano xanĩfofofãferi ãto chãti ea koshanifo tres veces fakĩ. Askatari ẽfe kaifãferi tokirifãfe ea tsakakĩ fisti fanifo. Askatari kanõanãfãnẽ ẽ pokefainaino kanõanãfã fakafã fospia ikiaino mẽ ãsakerani. Mã kanõanãfã fakafã mẽra ikiano nã kanõanãfã ãfe kaxke ẽ fakafã mãnão ẽ nononi ãsaxikima. Fakish fisti ita pena fistiri ẽ ini.  
\v 26 Mẽ kafãsamis, faka faiyaito mesekõi ẽ õimis; askatari yometsoafãfe ea achikaxõ ea mesenifaifono mẽ õimis; askatari ẽfe kaifokõifãfe ea mesenifaifono mẽ õimis; yora fetsafãferi ea mesenifaifono mẽ õimis; pexefã rasi anoxori ea mesenifaifono mẽ õimis; tsõa istomaxori ea mesenifaifono mẽ õimis; fakafã anoari mesekõi mẽ õimis; “Nõri Nios Ifo sharakõifamis,” ikax a chanĩmisfãfe ea mesenifaifonori mẽ õimis.  
\v 27 Ẽ omiskõiyanã ẽ yonomis xokenãkõiyanã; askatari ẽ oxa tenekõimis; askatari ẽ fonãiyanã nomi tenekõimis; askatari ẽ pimisma; askatari matsi mei ẽ omiskõikõimis rapatimais ikax. 
\p  
\v 28 Nãskarafo ẽ mei ẽ omiskõikõimis. Askatari afara fetsafoõnoaxri ẽ omiskõimis. Askatari mẽxotaima ẽ mato shinãkõimis nã mã ichanãxõ keyokõichi mã nõko Ifo Jesús Ifofamis tii mã kachikiri fayamanõ.  
\v 29 Akka ẽ nika fẽtsa Jesús Ifofasharapaifi rateaino ẽ aõxõ shinãchakakõitiro. Akka fẽtsa a Nios Ifofaa afara chakafamakẽ ẽ akiki õitifishkikĩ rãfikõitiro.  
\v 30 Akka nã ẽ mato rama yoiai keskara kakapaikĩ ẽ mato yoima. Ẽ mato yoi mã tãpinõ ẽa ẽ afaa atiroma.  
\v 31 Nã Nios fisti nõko Ifo Jesucristo ãfe Apa, nãato tãpikõia ẽkai chanĩmisma. Iskafakĩ nõ yoinõ: “Epa Niospa, mĩ sharafinakõia,” ixõ nõ yoipakexanõ.  
\v 32 Akka Aritas xanĩfokõi iyopaoni. Nã Aritas fetsa nĩchini Damasco anoax xanĩfo inõ. Damasco ano ẽ ikano, nãato ãfe sorarofo yoini nã pexe rasi anoxõ ãfe kãiti anoxõ ea kexenõfo ea achixikakĩ.  
\v 33 Akka anoxõ ea achipaiyaifono, nã nõko Ifo Jesús Ifofaafãfe fẽta efapa mẽra ea onekaxõ pexe rasi kene fomãkĩaxõ ea fotomanifo ẽ katanõ. 
\c 12  
\s1 Pablo ãfe namapa õiai keskara õini Niospa tãpimanaino 
\p  
\v 1 Akka ẽa ẽ yoimesharai. A ẽa ẽ yoimesharai keskarakai akai afaama. Nãskafekẽ nõko Ifo Jesús ea õimana keskara ẽ mato yoinõ. Nã ẽfe namapa ẽ õiai keskara ea õimana. Nã tsõa nikamisma ea tãpimani. Nãnori ẽ mato yoi.  
\v 2 Mã catorce xinia finõa a Niospa ea ifirisafayoni, ẽ Cristo fe rafeaito õikĩ. Ẽkai tãpiama ẽfe fero mẽsho fisti nai mẽra kani rakikĩa, askayamai ẽfe yora kani rakikĩa. Nios fistichi tãpia a ẽ ini keskara.  
\v 3-4 Niospa nã ika ano ea ifirisafayoni. Nã ẽ mato yoiyoa keskara anã ẽ mato yoi. Ẽfe yora iyamai ẽfe fero mẽsho fisti kani rakikĩa ẽkai tãpiama. Nios fistichi tãpia nã ẽ ini keskara. Nã ika anoxõ ea afara nikamani keskara ẽ tsoa yoitiroma. Akka ea yoikĩ iskafani: “A mĩ nika keskara tsoa yoiyamafe,” ixõ ea Niospa yoini.  
\v 5 Ẽ nã õia keskara ẽ fetsafo yoipaima iskafakĩ: “Niospa ea fisti nã ika ari ea õimani,” ixõ ẽ yoitiroma. Ẽ anori yoipaima. Anori ẽ yoi kakapaimis ẽ itiro. Ẽkai ẽa ẽ yoimesharapaima. Ereskai ẽ afaa fatiroma. Nãskakẽ nã fisti ẽ yoimis inimakĩ.  
\v 6 Akka ẽa ẽ yoimesharai ẽ yoimetiro. Ẽ anori yoi nã yora afaa tãpiamafãfe yoimisfo keskara ẽ yoima. Chanĩmakõi eõnoa ẽ yoimesharatiro. Akka ẽakai eõnoa ẽ yoimesharapaima eõnoa shinãkĩ finakõinõfoma. Mã ea õimis ẽ afe keskaramãkĩ, askatari mã ea nikamis ẽ afe keskara yoimismãkĩ. 
\p  
\v 7 Akka Epa Niospa a ika ari ea õimani keskara tsõa õimisma. Akka Niospa ea õimaniõnoax ẽa ẽ yoimesharapaitiro ẽ tãpikõiara ikax. Nãskakẽ Niospa nẽtefayamano Satanás ea isinĩ imani nã nõ moxaki chachiano noko mõxa fekaxtefai keskafakĩ ẽa ẽ yoimesharayamanõ.  
\v 8 Nãskakẽ ẽ kĩfikĩ iskafani: “Ifo, ea sharafafe,” ixõ tres ves fakĩ ẽ yõkani.  
\v 9 Ẽ askafaito nõko Ifãfe ea kemakĩ iskafani: “Ẽ mia noi. Askafixõ ẽ mia sharafaima. Cristo mia axotiro na pae mĩ tenenõ ẽ mefe rafekakaini. Mĩ mitsisipayamafikẽ ẽ mĩõxõ ẽ ato õimatiro ẽ afama mĩshti fatiro,” ixõ ea kemani. Nãskakẽ ẽ isinĩ ifiai ẽ inimasharakakaini.  
\v 10 Nãskakẽ ẽ mitsisipayamafiax Jesucristoõnoax ẽ inimakõi. Nãskaxõ ea ĩchaifono ẽ tenemis, afaayayamaxri ẽ inimakõimis ea omiskõimanaifonori ẽ tenemis. Nãskatari afarafo fekaxkõifekẽ ẽ tenemis. Ẽ askafakĩ ẽ mitsisipayamafixõ Jesucristoõxõ ẽ afama mĩshti fatiro. 
\s1 Pablo nã Nios chanĩmara faafo Corinto anoafo ato shinãkõini 
\p  
\v 11 Akka nã yora afaa tãpiamafo ãa yoimetirofo keskarax ẽa ẽ yoimea. Akka mã eõnoa afaa yoisharama. Akka mã ea õisharakĩ, “Nã Pablo sharakõi,” ixõ mã eõnoa yoiano nã sharakõi ikerana. Nãskakẽ ẽa ẽ yoimesharakõi fetsafãfe ea tãpinõfo ẽ afe keskaramãki. Akka ẽakai ẽ afaa asharatiroma. Ẽkai afaama. Nãskafekẽ nã eõnoa afara chaka mato yoimisfãfe ea finõkanima.  
\v 12 Jesucristo ea nĩchini aõxõ ãfe meka ẽ mato yoinõ. Nãskakẽ tanaimakõi ẽ yonomis fena fenakima. Nãskara ẽ yonofaino Niospa afama mĩshti amis eõxõ mã tãpinõ Jesucristo ea nĩchinikẽ.  
\v 13 Akka, ¿afeskakĩ mã iskafakĩ shinãimẽ? “Pablo nã Nios chanĩmara faa fetsafo ato shara fai keskafakĩ nokori shara faima,” ixõ mã eõnoa yoitiroma. Akka nã Nios chanĩmara faa fetsafori ẽ ato shara fai keskafakĩ, nãskarifakĩ ẽ mato sharafa fafafãini. Ẽkai mato afaa fĩapaimisma. Askatari ẽ mato fekaxtefamisma. Ea pimakape ea rapati safemayanã ẽ mato famisma. Õitsai, ẽ mato afaa fĩapaikima ẽ mato chakafaamakĩ ea raefakãfe. 
\p  
\v 14 Mẽ mato ari kai rafea. Akka iskaratĩa mẽ itipinĩsharax anã ẽ mato ari kai. Ẽ mato amis keskafakĩ anã ẽ mato yõkakĩ fekaxtefaima. Ẽ mato afaa fĩapaitama ẽroko mato shinãfafãini. Shinãkapo. Fakefãfekai apa yafi afa pimatiroma. Akka afa fetaroko apa fakefo pimatiro. Akka mãfi ẽfe fakekõifo keskarakĩ. Akka ẽ mato Niospa meka tãpimasharakõia eõnoax mã isharanõ.  
\v 15 Akka ẽ afarafo fikĩ mẽ kori potakĩ keyokõia, askafafiaxõ ẽ shinãchakaima, askatari ẽakõi ẽ inãmei mã Niosnoax isharakõinõ. Akka ẽ mato noikĩ finasharakõifianokai õitsai mã ea noikĩ finasharakõimisma rakikĩa. 
\p  
\v 16 Akka ẽ mato afaa yõkamisma. Akka fetsafãfe mã Corinto anoafãfe eõnoa yoimisfo iskafakakĩ: “Akka mã nõ tãpia Pablo mato afaa yõkamisma. Askafixõ mato pãraxõ mato kori fĩamis, Judea anoafo ẽ ato foxotanõra,” ixõ.  
\v 17 ¿Nã feronãfakefo ẽ matoki nĩchinioxõ ẽ mato pãramẽ ẽ mato kori fĩaxiki? Maa.  
\v 18 Ẽ Tito yoini iskafakĩ: “Corinto ano katãfe,” ixõ ẽ yoini. Nã nõko Ifo chanĩmara faa fetsafori ẽ matoki nĩchini. Akka, ¿Titopa mato pãramẽ mato afara fĩaxiki? Maa. Mẽ tãpia Titopakai mato afaa fĩapaimisma. Nã ẽ mato fe imis keskai ari mato fe imis. Noko rafeta nõ mato yoimis. Nãskara fisti nõ mato afara shara faxopai noko rafe nõ mato fe imis. 
\p  
\v 19 Mã shinãiraka ẽ mato yoiai keskara mã eõnoa shinãsharanõ. Maa. Anorikaima. Epa Niospa nã ẽ yoiai keskara ea nikamis Cristo ea shinãmanaino. Efe yora mĩshtichi, nã ẽ mato yoiai keskafakĩ ẽ mato shara fapai Jesús shinãi keskafakĩ mãri mã shinãsharanõ.  
\v 20 Akka ẽ tãpiama, õitsai, ẽ ari nokoxõ õia a ẽ yoiai keskai mã isharayamakẽ ẽ mato fichikai. Askatari ẽ matoki nokoaino õitsai, mã ekeki inimaima rakikĩa nã mã shinãi keskai. Akka ẽ matoki nokoxõ õipai mã mã chaka xatexõ mã Jesús Ifofasharaino. Akka ẽ matoki nokoxõ õia mã chaka xateyamano ẽ shinãmitsatiro. Mã fochishpanã faatanãta, fẽtsa fiaiti mãrifi mã fipaita, fetsa mekafata, õitifishkita, mares fisti mã fipaita, mã chanĩta, fetsafo mekafata, nõ tsoa keskarama ita, isharayamata, mã askaito ẽ mato õipaima.  
\v 21 Nãskatari ẽ shinãchakakõi, shinãyanã õitsai Niospa atoõxõ ea rãfimaniraka ixõ ẽ shinãi mã isharayamaino. Mã askaino ẽ matoki nokoax ẽ rãfikõixii mã afara chakafaino. Akka ranãri mã isharapaonima. Mãto ãfima fe mã oxapaoni. Askatari kẽrofori ãto fenema fe oxapaonifo. Nãskatari afara chakafo fetsa fetsatapafo mã apaoni. Akka mã xateyamaino ẽ nokoax ẽ mato õi ẽ shinãmitsakõixii, rãfikõiyanã. 
\c 13  
\s1 Pablo iskafakĩ ato yoini: “Anã afaa chakafayamakãfe,” ixõ ato yoini 
\p  
\v 1 Mẽ mato õikĩ rafe faa. Iskaratĩari anã ẽ mato õikaikai. Ẽ anã mato õikaikai mã mãto chaka mã xateamãkĩ. Akka kirika ano Epa Niospa meka kenenifo iskafakĩ: “Fẽtsa afara chakafaito õixõ yõfaito, ‘Nato afara chakafaa,’ ixõ rafeta yoiaifono, askayamakĩ trespa yoiaino askayamakĩ ranãfai yoiaifono chanĩmara nõ fatiro,” ixõ kirika ano Niospa meka kenenifo. Nãskafakĩri ẽ mato ano nokoxõ ẽ nikai mã afara chakafaito mã afara chaka xateyamaito. Akka ẽ mato õitiro mã chaka ikamãki, askayamai shara mã ikamãki.  
\v 2 Akka anã ẽ mato ano kayoxõ mẽ mato yoiyoni mã afara chakafanõma. “Mã afara chakafakĩ xateyamaino ẽ mato omiskõimaxii,” ixõ ẽ mato yoiyoni. Anã iskaratĩari chai ixõ ẽ mato yoi kirika kenexõ iskafakĩ: “Ẽ anã kaxõ ẽ mato õikai mã mã chaka xateamãki. Akka mã chaka xateyamaito ẽ mato omiskõimaxii. Akka tsoa pishtakai ẽ finõmaxima.”  
\v 3 Akka mã tãpipai Cristo eõxõ mato yoiaino. Chanĩma, mã samama tãpinõ xafakĩakõi ẽ mato õimani. Akka ẽakai ẽ mato yoima, Cristoõxõ ẽ mato yoi. Jesucristo mitsisipakõikai mato tãpimani mãto chaka mã xatenõ.  
\v 4 Chanĩma, Jesucristo nokoõxõ ifi cruz ikakĩ mastaifono nã feronãfake pachikõi keskara ini. Nokoõnoax nai ãakai ifimenima. Nãskafinixakĩ iskaratĩa Niospa sharaõnoax nia. Nãskarifiai nõri mitsisipama. Nãskafixõ Jesús feta nã Niospa apaiyai keskara nõ atiro Epa Niospa sharaõxõ. 
\p  
\v 5 Akka mãto shinã mẽraxõ shinãsharakãfe chanĩmamãkĩ mã mã Jesús Ifofasharamãkĩ. Mãa tãpimesharakãfe. Akka, ¿mã mã tãpiamẽ Jesucristo mato fe ikano? Askayamai mã mã chanĩmis rakikĩa nõ Jesús Ifofaira ifiaxõ mã Ifofaama.  
\v 6 Akka mã mã ea õikĩ tãpia ẽ Jesucristoõxõ yonosharakõimiskẽ mato mẽraxõ. Nã mã chanĩmara fakõipainõ.  
\v 7 Ẽ mato Epa Nios kĩfixomis mã afaa chakafanõma. Nokoõnoa shinãnõfo ixokai ẽ Epa Nios kĩfimisma. Iskafakĩ fetsafãfe nokoõnoa shinãkani rakikĩa: “Pablo fe rafeafãfe ato yonoxosharafoma,” ixõ nokoõnoa yoikani rakikĩa. Akka noko askafafiaifono mã Jesús Ifosharakõifai nãskara nõ fichipai.  
\v 8 Akka Niospa meka shara fistiõnoa nõ yoitiro. Aõnoakai meka chaka nõ yoitiroma ãfe mekamãi sharakõikẽ.  
\v 9 Akka fetsafãfe nõ afama noko askafakĩ shinãfiaifono nõ shinãchakaima. Akka mã Jesúsnoax isharakõikẽ nõ fãsi inimakõitiro. Akka nõ mato Epa Nios kĩfixona mã a keskara sharakõi inõ.  
\v 10 Akka ẽ mato kirika kenexona mato ari kayoxoma mã ea nikanõ. Mẽ mato ari nokoxõ õia mã Cristo Ifo sharakõifaino ẽ mato õitoshinõ. Nãskakẽ mã isharakõiaino Niosxõ fãsi mekakai ẽ mato yoima mã isharakõinõ. Epa Niospa ea yoia ẽ mato yoisharanõ mã Nios Ifo sharakõifanõ isharakõixõ. 
\s1 Mã Pablo ãfe meka xatekĩ ato yoisharani 
\p  
\v 11 Mẽ mekai xatekĩ ẽ mato yoisharai. Jesús keskara isharakãfe. Ea nikasharakãfe. Nãnori fisti shinãkãfe. Isharakãfe. Mã askaino Niospa mato noikõikĩ mato inimamasharai ãfe Yõshi Sharaõxõ mato fe ixõ.  
\v 12 Keyokõi nã mã Nios Ifofaa tii yoinõnãsharakãfe.  
\v 13 Keyokõi nõko Ifo Jesús chanĩmara faafãfe nã efe ikafãfe mato yoisharapaikani. 
\p  
\v 14 Nõko Ifo Jesucristo mato axosharapai. Epa Niospari mato noikõi. Niospa Yõshi Shara mato fe rafepakexanõ. Nã tii. 
\cls \sig Ẽkĩa Pablo \sig*