\id 1TH - Yaminahua NT -Peru 2008 (DBL -2013) 
\h 1 TESALONICENSES 
\toc1 Pablo Tesalónica Anoafo Kirika Kenexõ Fomani 
\toc2 1 Tesalonicenses 
\toc3 1 Ts. 
\mt1 Pablo Tesalónica Anoafo Kirika Kenexõ Fomani 
\c 1  
\s1 Pablo a afe rafeafo feta a Tesalónica anoxõ Nios Ifofaafo ato kirika kenexõ fomani 
\p  
\v 1 Ẽkĩa Pablo, nõ mato kirika kenexõ fomai, Silvano ikaino Timoteo ikaino nã tiito nõ mato fomai. Nã pexe rasi Tesalónica anoxõ Nios Ifofaafo nõ fomai, anoxomãi Epa Nios yafi nõko Ifo Jesucristo mã Ifokõi faafono. Epa Nios feta nõko Ifo Jesucristo mato noikĩ mato sharafanõ fekaxtetama mã isharakõinõ. 
\s1 Tesalónica anoafãfe Jesús Ifokõi fakaxõ ato õimanifo 
\p  
\v 2 Mẽxotaima nõ matoõxõ Epa Nios aicho fakĩ nõ kĩfikĩ iskafa fafafãini.  
\v 3 “Epa Niosi, na Tesalónica anoafãfe, mia noikakĩ mia yonoxosharamisfo, nãskakaxõ fena fenakãkima nõko Ifo Jesús manasharamisfo nokoki anã oi kiki,” ikaxõ. Nãnori pena tii ẽ mato kĩfixõfafãini.  
\v 4 Efe yora mĩshtichi, Niospa mato fãsi noikĩ mato katoni afe yorafo mã inõ.  
\v 5 Nõ mato Niospa meka sharaõnoa yoimis afeskax nõ afe ĩpaxatiromãki. Akka nõko mekapas nõ mato yoimisma, askatamaroko Niospa Yõshi Sharayaxõ ãfe kerex sharafoyaxõ nõ mato Jesúsnoa nã meka chanĩmakõi nõ mato yoimis. Akka mã mã tãpia nõ mato fe isharapaoni. Nõ askaino mã Jesús Ifofakõini. 
\p  
\v 6 Akka nõ Jesús Ifofai keskafakĩ mãri Ifofani. Nãskakẽ Niosnoa meka shara nõ mato yoiaito inimakõiyanã mã nikakõini, Niospa Yõshi Sharapamãi mato inimamakõiaino fetsafãfe mato omiskõimafiaifono.  
\v 7 Nãskakẽ mã isharakõixõ mã ato õimakõia nã Nios Ifofaafo Macedonia anoafo yafi Acaya anoafo.  
\v 8 Matoõxõ nõko Ifãfe meka shara nikakĩ taefanifo Macedonia anoafo feta Acaya anoxõ. Akka anoxos nikanifoma. Nã pexe fetsafo anoxori nikanifo. Nãskaxõ mã tãpiafo mã Nios Ifokõifakẽ. Nãskakẽ nõ anã matoõnoa ato yoitiroma, mãmãi matoõnoa tãpikõiafono.  
\v 9 Askatamaroko fetsafãfe nokoõnoa ato yoimisfo iskafakãki: “Tesalónica anoafãfe nõko Ifo Nios Ifofakõinafo, nãskaxõ Pablo yafi a afe rafeafo ato sharafayanã a yoiaifo keskara ato nikakõimisfo. Nãskakaxõ afara fetsa onifakaxõ, ‘Na nõko niosra,’ ikaxõ anã kĩfimisfoma, Nioskõi Ifofakakĩ. Nãskakaxõ nã nipanaka Nioskõi yonoxomisfo.  
\v 10 Akka nã Niospa Fake Jesús mã manakõi nai mẽranoax anã oaitĩa. Akka Niospa ãfe Fake otofani. Nãato noko ifitiro a omiskõiaifo mẽranoax nõ omiskõinõma.” 
\c 2  
\s1 Pablo Tesalónica anoxõ Jesúsnoa ato yoini 
\p  
\v 1 Efe yora mĩshtichi, mã mã tãpia kaxpa nõ mato õikai kanima. Jesúsnoa nõ mato yoikai kani nikakĩ mã Ifofakõinõ.  
\v 2 Mã mã tãpia nõ matoki kayoamano na Filiposo anoafãfe noko ĩchayanã noko omiskõimapaonifo. Nãskaxõ noko xatemapaiyaifono, Epa Niospa ãfe kerex shara noko inãno, nõ ratetama na meka sharaõnoa Jesúsnoa nõ mato yoimis keskara tsõa noko xatematiroma.  
\v 3 Akka nõ mato yoiki fanĩrira nõ mato yoimisma, nõ mato yoisharakõimis. Askatari nõ mato chakafakĩ yoimisma, askatari nõa nõ mato paramisma.  
\v 4 Askatamaroko Epa Niospa noko katoni ãfe meka shara Jesúsnoa nõ mato yoinõ. Akka nõkai yorafo nokoõnoa shinãmapaitiroma. Askatamaroko nokoõnoa Nios fisti nõ inimamapai, nã fistichi nõko shinã mẽraxõ nõ shinãi keskara tãpikõia.  
\v 5 Mã mã tãpia nõkai matoõnoa meka shara yoimisma, mãri nokoõnoa yoisharanõ. Ẽkai mato feparamisma, “Noko afara shara inãnõfora,” ixõ. Akka a ẽ mato yoimis keskara Epa Niospa tãpikõia, nãato ea õifafaini.  
\v 6 Nõkai fetsafo nokoõnoa yoisharakãfe nõ ato famisma.  
\v 7 Akka nõ aõnoa yoinõ noko nĩchini ãfe meka shara nõ mato yoinõ. “Akka noko afara afeskarafaxokãfe,” ixõ nõ mato yoikerapaoni. Akka ãfa ãfe fake yome kexesharamis keskafaki nõ mato kexesharapaoni.  
\v 8 Nõ mato noikõikĩ inimakãi nõ mato Niospa meka shara yoiyanã nõa nõ inãmepaikõini, mã Nios tãpisharakõinõ. Nãskaxõ nõ mato noipaoni keskafaki, iskaratĩa nõ mato noikĩ finasharakõimis.  
\v 9 Efe yora mĩshtichi, mã mã tãpia nõ mato mẽraxõ yonomiski omiskõikõiyanã, a nõ fichipaiyai fixiki, penata yonota fakishchãiri nõ yonomis. Akka nõ mato afaa kaxpa fĩapaimisma, Niospa meka sharaõnoa mato yoiyanã. 
\p  
\v 10 Akka mã mã noko õimis, Niospari tãpia nõ tanaima isharakõimiskẽ mato fe a mã Nios Ifofaafo fe. Nãskakẽ nokoõnoa tsõa afaa chaka yoitirofoma.  
\v 11 Askatari mã mã tãpia nõ mato inimamakõimis, mã shinãmitsaitori nõ mato askafamis inimamamis oa ãpa ãfe fake inimamatiro keskafakĩ.  
\v 12 Akka nõ mato yoimis mã isharakõinõ a Nios Ifofaafo imis keskai. Akka nãato mato katoni Jesús keskara shara mã ĩpaxanõ. 
\p  
\v 13 Nãskakẽ mẽxotaima nõ Epa Nios aicho fatitaifaa mãmãi noko nikasharaito, nõ mato Niospa meka sharaõnoa yoiaito. Nãskakẽ mã yoikĩ iskafani: “Na meka shara mã noko yoiai yõra mekama, Niospa meka shara,” ixõ mã yoini. Chanĩma, Niospa mekakõi nõ mato yoimis. Nãskakẽ mã ãfe meka nikakĩ mã chanĩmara faino mato shinãmasharai Jesús keskara shara mã inõ.  
\v 14 Efe yora mĩshtichi, mãri omiskõini mãto kaifãfe mato omiskõimanaifono. Nãskarifiai nã mã ikai keskai a Nios Ifofaafo Judea anoxõ Cristo Jesús Ifofakanax omiskõikani ãto kaifo judeofãfe ato omiskõimanaifono.  
\v 15 Nã judeofãfe nõko Ifo Jesús retenifo, taefakĩ a ato Niospa meka sharaõnoa yoimis ato retepaonifo, nãskaxori noko omiskõimayanã noko potanifo. Nãskaxori Nios aicho fayamata yorafo chakafakĩ mekafamisfo.  
\v 16 Askatari a judeofoma Nios fe ĩpaxanõfo nõ ato yoisharapaiyaino, noko ato yoitima famisfo. Nãskakẽ afaa chakafakĩ finayamafikatsaxakakĩ mã afara chakafakĩ finakõimisfo. Akka iskaratĩa anã tenetiromameki Niospa ato omiskõimaki finakõi. 
\s1 Pablo Tesalónica anoafo anã ato õipai kapaini 
\p  
\v 17 Efe yora mĩshtichi, mã nõ mato fe paxkanãifinixakĩ, nõa nõ shinãki mato õiamafikĩ mẽxotaima nõ mato shinãtaifai nõko õiti mẽraxõ. Akka nõ kaxõ nõ mato õisharapaikõi.  
\v 18 Akka mã nõ mato ari kapaitaiamis, nãskaifi ẽroko mẽxotaimakõi mato ari kapaikõimis. Nõ askafiaino, akka Satanás noko katimafamis.  
\v 19 Nõ mato yoimis Jesús keskara shara mã inõ. Nãskakẽ Jesucristo oaino keyokõichi tãpitirofo Jesúsmãi Ifokõi fakaxõ. Nãskakẽ Jesús õiaino matoõnoax nõ inimakõixii, nõ mato yoipaoni keskaramãi mã nikakõimiskẽ.  
\v 20 Chanĩma, nokoõxõ mã Jesús Ifofakõinafono nõ inimakõi. Nãskakẽ Epa Nios nokoki inimakõi. 
\c 3  
\p  
\v 1-2 Nãskakẽ nõ anã tenetiroma meekĩ nõ shinãita nono Atenas ano nores nẽtexiki, nãskaxõ nofe yora Timoteo nĩchixiki mato õikanõ. Na Timoteori Nios yonoxomis, nãato nofeta yonomis Jesucristoõnoa meka sharaõnoa ato yoikĩ. Nãato mato yoikĩ mato inimamasharakõitiro.  
\v 3 Nãskakẽ ẽ matoki Timoteo nĩchini: “Omiskõikãki anã Niospa meka nikatirofomara,” ixõ. Akka mã mã tãpia na nõ omiskõiai keskara.  
\v 4 Akka nõ mato fe iyoxõ, nõ mato yoifafãiyamea, nõ omiskõixiira fakĩ. Nõ mato yoifafãiyamea keskai mã askakõia, nãskakẽ mã mã tãpia.  
\v 5 Nãskakẽ ẽ anã tenetiroma meekĩ, ẽ Timoteo nĩchiyamea mato yõkatanõ, a mã Jesús Ifofapaoni keskafakĩ ai mã Jesús Ifofamãkĩ ẽ tãpipaikĩ. Akka ẽ ratekõiyamea, “Niafaka chakata ato afara chakafamaira,” ikax. Akka nõakõi kaxpa Niospa mekaõnoa nõ mato yoiyamea ikerana. 
\p  
\v 6 Akka Timoteo mã Tesalónica anoax anã oa mato õitani. Meka shara matoõnoa noko yoitoshia, mã Jesús Ifofasharayanã mã noinãsharakõiaito. Noko yoia mã noko shinãyanã mã noko noikõiaito, askatari mã noko õisharapaikõiaito, nã nõ mato õipaiyai keskafakĩ mã noko õisharapai.  
\v 7 Nãskakẽ efe yora mĩshtichi, noko Jesúsxõ omiskõimayanã noko fekaxtefaifono mã Jesús Ifo sharafakĩ mã noko inimamakõimis.  
\v 8 Akka mã mã Jesús Ifofashara, mã anã afaa fetsa shinãima. Mã nõ tãpiax nõ inimasharakõi nõ isharakõitiro. Nãskakẽ afara afeskaraino nõ tenetiro.  
\v 9 Nõ matoõnoa shinãki nõ Epa Nios kĩfikĩ, nõko õiti mẽranoax nõ fãsi inimakõi. Nãskakẽ nõ matoõxõ Epa Nios kĩfiki nõ aichofa fafafãini.  
\v 10 Nãskakẽ penata yoita fakishi yoita nõ Nios kĩfifafãini matoõxõ, noko mato ari nĩchiaino nõ mato õikanõ a mã tãpiamafo nõ mato yoixiki mã Jesús Ifofakõinõ. 
\p  
\v 11 Nãskakẽ Epa Nios feta nõko Ifo Jesucristo mato ari noko nĩchipainõ nõ mato õikanõ.  
\v 12 Nõko Ifãfe mato shinãmasharaino mã noinãi finakõinõ, fetsafori mã noisharanõ, nõ mato noiai keskafakĩ mãri keyokõi yorafo noisharakõinõ.  
\v 13 Mã askaino Epa Niospa mãto õiti mẽraxõ mato shinãmasharai, Jesús Ifo sharafayanã mã afaa chakafayamanõ. Mã askaino nõko Ifo Jesús afe yorafoya oaitĩa mãri a keskara shara ixii, Epa Niospa õiaino. 
\c 4  
\s1 Afeskax isharaxõ nõ Nios inimamatiromẽ nokoki inimanõ 
\p  
\v 1 Efe yora mĩshtichi, mẽ mekai xatekĩ ẽ mato yoinõ. Nõ mato yoipaoni afeskax mã itiromãkĩ Nios matoki inimanõ. Akka nã nõ mato yoipaoni keskai mã mã askakõia. Nãskakẽ anã nõ mato yoi noko nikakapo. Mã Nios Ifofaa keskafakĩ nõko Ifo Jesucristoõxõ Ifofakĩ finakõikãfe. 
\p  
\v 2 Akka mã mã tãpia nõko Ifo Jesús noko yoini keskara, nãnorikõi nõ mato yoimis.  
\v 3 Akka Niospa fichipai a keskara shara mã inõ. Nãskakẽ tsõa ãfe ãfima chotatiroma. Kẽrofãferi ãto fenemafo chotamatirofoma,  
\v 4 Askatamaroko ãfiyatirofo ãfe ãfi noiyanã ãfe ãfifes ixiki.  
\v 5 Nãskata afara chakafapaimiskõi iyamaxikakĩ, a Nios tãpiamafãfe amisfo keskara axikakima.  
\v 6 Akka Epa Niospa yoini iskafakĩ: “Fẽtsa ãfi fe ipaiyamakãfe. Tsoa fomãyamakãfe fetsa ãfi fe ixiki,” ixõ Niospa yoini. Akka nõ mato yoini keskai, tsoa askayamakĩ afara chakafaifono Epa Niospa ato omiskõimaxii.  
\v 7 Epa Niospa noko katonima nõ afara chakafanõ. Askatamaroko noko katoni a keskara shara nõ inõ.  
\v 8 Nãskakẽ a ẽ mato yoimis keskara tsõa nikayamakĩ atokai yora fisti nikakaspaima. Niosri nikakaspai, nãato ãfe Yõshi Shara mato inãfiano a mato amapaiyai keskara mã anõ. 
\p  
\v 9 Ẽfe mekakai mã fichipaima mã ranã noinãxiki. Epa Niospa mato tãpimani mã noinãnõ.  
\v 10 Mã nõ tãpia nã Nios Ifofaafo Macedonia anoxõ mã ato noikõiaito. Nãskakẽ nõ mato yoisharapai, mã ato noiki finakõinõ.  
\v 11 Nãskakẽ isharakãfe mãto õiti mẽraxõ afanã mato fekaxtefanõma. Fẽtsa afara afeskarafaino aõnoa shinãchakayamakãfe. Nã Niospa mato amapaiyai keskara fisti akãfe. Askatari mã yonotiro xanikima. Nãnori nõ mato yoimiski.  
\v 12 Nãskafakĩ mã yonotiro a mã fichipaiyai fixiki. Kaxpa afaa ato yõkayamakãfe. Mã askaito a Nios Ifofaafãfema matoõnoa shinãkõitirofo. 
\s1 Nõko Ifo Jesús anã oaino, ¿afe keskara ixiimẽ? 
\p  
\v 13 Efe yora mĩshtichi, ẽ mato yoiai keskara nikasharakãfe. Jesús Ifofaafo nakanax afeskakanimãkai ẽ mato yoinõ, akka a Ifofaafoma ato fe yorafo naafono, manomitsakani omiskõikani. Akka mã askaima mãmãi Nios Ifofaax, mãmãi anã õinõnãxixakĩ. Akka a Nios Ifofaafoma anã õinõnãkanima.  
\v 14 Mã nõ tãpia Jesús nafiax afianã otoni. Nãskarifiakĩ mã nõ tãpia Niospa atori otofaxii. Jesús anã oaino, a Ifofakanax namisfo. 
\p  
\v 15 Nãskakẽ nõ mato yoimis nõko Ifo Jesús noko tãpimamis keskara. Akka nõ nayoamax nõko Ifo Jesús oaino nõ rekẽ nai mẽra kaima, nã naitaenifo rekẽ fokani.  
\v 16 Akka nõko Ifo nai mẽranoax fotopakekafãni fãsikõi mekakeraxii xanĩfo finakõimãiax. Askatari nã ãjiri xanĩfo finakõiafãfe ãto mekari nõ nikaxii. Askatari Niospa ãfe maneti chãi chãisaito nõ nikaxii. Nãskakẽ a Cristo Ifofakanax namisfo otoi taexikani.  
\v 17 Nãskata a nõ namisfoma Niospa atoya noko iyoxii, nãskakẽ nai kõi mẽranoax nõ fichinãxii. Nõko Ifori nofe ixii nai kõi mẽra. Nãskakẽ nõko Ifo fe mẽxotaima nõ ipanaka.  
\v 18 Nãskakẽ mã ranã inima faatanãsharakãfe, na meka sharaõnoax. 
\c 5  
\p  
\v 1 Efe yora mĩshtichi, nõko Ifo Jesucristo anã oaino anã nõ mato yoitiroma.  
\v 2 Akka mã mã tãpikõia nã oaitĩa tsõa manasharayamaino nõko Ifo nokotiro. Nã afaa shinãima tanaima oxafono, fakishi oax yometso atoki yometsotiro keskai.  
\v 3 Yorafo iskaifono: “Nõkai afaa chakafamisma nõ isharakõia,” ikaifono Epa Niospa ato omiskõimanaino pae meexikani. Oa kẽromã fake nanexõ mã fake kãikĩ pae meetiro keskara meexikani. Nãskakẽ nã omiskõiai nokoaino tsoa faki onetiroma. 
\p  
\v 4 Akka efe yora mĩshtichi, mãkai oa fakish mẽra nia keskarama, askatamaroko mã oa penata nia keskara. Nãskakẽ mã manasharaito nõko Ifãfe mato fichitoshitiro. Akka nã Ifofaafoma oa fakish mẽra nia keskarafono, atoki yora yometso oax atoki yometsoaino tsõa tãpitiroma keskarafo. Nãskarifiakĩ nõko Ifo oaino afaa shinãtirofoma, Ifokairoko fakaxõ.  
\v 5 Akka mãfi nã penata nia keskara sharakõifokĩ. Mãkai oa fakish mẽra nia keskarafoma.  
\v 6 Nãskakẽ nã Satanás ifofamisfo keskara nõ imisma, afãfe afarafo chakafaifo fisti shinãmisfo. A Jesús fotoainoa tsõa shinãmisma. Akka nõ anã Jesús oaitĩa nõ shinãi, oa yora oxa keskara nõ imisma. Oa yora moia keskara nõ imis Jesús oaitĩa manai xafakĩakõi isharaxõ.  
\v 7 Nã afaa shinãifoma a Satanás ifofaafo nã fakishi oxafo keskarafo. Nãskarifiai a Satanás ifofaafo a afaa shinãifoma fakishi pãemisfo keskarafo.  
\v 8 Akka nõkai ato keskarama, nõfi oa penata nia keskara sharafoki. Nãskakẽ Jesús Ifokõi fata nõ yorafo noikõita nã Jesús oaino nõ manakõitiro, nõ askaito Satanás noko afaa chakafamatiroma. Mãraki sorarofãfe ãto rapati kerexkõi safeafono tsõa ato retetiro, ãto maiti kerexkõi safeafonori tsõa ato retetiroma. Nãskarifiakĩ nõ Jesús Ifofaano, ãfe Yõshi Shara nõ mẽra naneano Satanás noko afeska fatiroma.  
\v 9 Akka Niospa shinãnima a omiskõipakenakafo mẽranoax nõ omiskõipakexanõ. Askatamaroko noko ifini Jesucristoõxõ nõko chaka noko soaxoxiki nõ afe ĩpaxanõ.  
\v 10 Akka Jesucristo nokoõnoax nani nõ afe ĩpaxanõ. Nayamafiax mã naaxri nõ afe nĩpanaka.  
\v 11 Nãskakẽ inimayanã fetsafo ato inimamasharakãfe. Mẽ tãpiaki mã ato askafaino. Nãskakẽ ato fe mẽxotaima aska faatanãkãfe. 
\s1 Pablo A Nios Ifofaafo ato yoisharani 
\p  
\v 12 Efe yora mĩshtichi, ẽ mato yoisharapaikai, ea nikasharakãfe. Epa Niospa nã Ifofaafo katoni ãfe meka shara mato yoinõfo. Nãfãfe nõko Ifoõnoa mato yoisharamisfo nõko Ifo mã Ifo sharafanõ. Nãskakẽ ato noiyanã ato nikasharakãfe.  
\v 13 Nõko Ifoõxõ mato yoisharamisfo, nãskakẽ ato nikasharakãfe, ato noisharayanã. Mato fe yorafo fe isharakãfe, mẽenãpaitama isharakõikãfe. 
\p  
\v 14 Askatari efe yora mĩshtichi, nõ mato yoisharamis iskafakĩ: A xanimisfori ato yoisharakãfe yonosharanõfo, askatari a shinãmitsaifo ato inimamakãfe. Nãskaxõ a Nios Ifofasharafoma ato yoisharakãfe chanĩmara fakõinõfo. Nãskaxõ ato noiyanã fenãmãshta mã ato yoisharatiro. 
\p  
\v 15 Nãskakẽ kexemesharakãfe, fetsafãfe mato noikaspaifono ato kopiyamakãfe. Askatamaroko noinã faatanãsharakãfe, keyokõi yorafo sharafakãfe. 
\p  
\v 16 Mẽxotaima inimafafãikãfe.  
\v 17 Pena tii Epa Nios kĩfifafãikãfe.  
\v 18 Afara afeskara afiaino, Epa Nios aicho fakãfe. Nãskara Niospa matoõnoa fichipai kiki mã Cristo Jesús Ifo shara fakẽ. 
\p  
\v 19 Niospa Yõshi Sharapa mato amapaiyai keskara xateyamakãfe.  
\v 20 Fetsafãfe Niosxõ mato yoiaifono a yoiaifo keskara, “Na afamara,” ixõ ato nikakaspakakĩma, ato nikasharakõikãfe.  
\v 21 Akka fẽtsa mato yoipaiyaito Niospa Yõshi Sharaõxõ yõkakãfe nã mato yoiai keskara chanĩmamakĩ askayamai chanĩ itiroki. Akka nã meka chanĩmakõi nikafafãikãfe, a meka chanĩ nikakakima.  
\v 22 Afara chaka fishtayamakãfe. 
\p  
\v 23 Niospa mãto yorafoya, mãto fero mẽshofoya mãto yõshi sharafoya Niospa mato sharakõi fatiro mã fekaxtenõma. Nãato shara mato imatiro ãfe õiti keskara shara mã inõ. Mato kexesharata mãto õiti mẽraxori mato shinãmasharatiro. Askax mã sharakõi inõ. Epa Niospa mato askafaino nõko Ifo Jesucristo afianã oaitĩa mato shinãmasharaxii.  
\v 24 Niospa mato katoni mã Ifofanõ. A noko yoiai keskara Niospa noko pãratiroma, noko axotiro. 
\s1 Mã mekai xatekĩ Pablo ato yoisharani 
\p  
\v 25 Efe yora mĩshtichi, noko Epa Nios kĩfixokãfe. 
\p  
\v 26 Keyokõi a nõko Ifo Jesús Ifofaafo fe yoinõnãsharakãfe. 
\p  
\v 27 Nãskaxõ Epa Niospa mato yoia keskara nikasharakãfe. Nã mã Ifofa tii ẽ mato kirika kenexõ fomaikai ato nikamasharakãfe. 
\p  
\v 28 Nõko Ifo Jesucristo mato noikĩ mato sharakõifanõ. Nã tii ẽ mato yoi. 
\cls \sig Pablo \sig*