\id 1PE - Yaminahua NT -Peru 2008 (DBL -2013) 
\h 1 PEDRO 
\toc1 Pedro Jesús Chanĩmara Faafo Kirika Kenexõ Fomani 
\toc2 1 Pedro 
\toc3 1 Pe. 
\mt1 Pedro Jesús Chanĩmara Faafo Kirika Kenexõ Fomani 
\c 1  
\s1 Pedro Jesús Ifofaafo paxkanãnifono ato kirika kenexõ fomani 
\p  
\v 1 Ẽkĩa Pedro. Jesucristo ea nĩchini aõnoa ẽ ato yoimis inõ. Niospa mato katoni afe yorafo mã inõ. Akka mato potaifono mã Jesúsnoax paxkanãnino ẽ mato kirika kenexõ fomai mã tãpinõ. Ponto anoafo fomata, Galacia anoafo fomata, Capadocia anoafo fomata, Asia anoafo fomata, Bitinia anoafo fomata, ẽ mato fomai.  
\v 2 Epa Niospa taefakĩ mato katoni mã afe yorafo inõ, ãfe Yõshi Sharaõxõ nã mato amapaiyai keskara mã anõ, mã Jesucristo nikasharakõinõ. Akka ãfe Fãke Jesús mato nãxoni ãfe imiõxõ mãto chaka mato soaxoxiki. Niospa mato noikĩ mãto õiti mato sharafaxonõ ixõ ẽ matoõnoa shinãi. 
\s1 Jesucristoõnoax nõ Nios fe ipaxatiro 
\p  
\v 3 Nãskakẽ nõko Ifo Jesucristo ãfe Apa Nios nõ aicho fatiro: “Mĩ fãsi sharakõi,” ixõ nokomãi noikõiaino ãfe Fake Jesucristomãi nõkoõnoax naax anã otonikẽ. Nãskaxõ fake yome rama kãia keskara shara noko imai õiti fenasharayakõi. Nãskakẽ nõ afe isharakõipakenaka.  
\v 4 Nãskaxõ noko ĩkisharapakenaka nõ afe ipaxanõ. Akka nõ ãfe fakekẽ nã nai mẽraxõ noko mekexona nõkonãri ixii. Nã Niospa noko mekexona afanã afeskafatiroma, chakanari atiroma, askatari keyotiroma. Charofo keskarama. Charofo sharashtafiax chipo otsi fetsetiro. Nãskakẽ nãfo Niospa noko mekexona nõkonã inõ.  
\v 5 Akka mã Nios chanĩmara fakẽ, Epa Niospa ãfe sharaõxõ mato kexesharafafãini nã Jesús oaitĩa mã omiskõinõma, nã oaitĩa afe isharapakexakĩ a mato itipinĩshara faxoni ano. 
\p  
\v 6 Nãskakẽ mã inimai finakõikakaini, omiskõifi nono mai anoax. Mã omiskõifiax chipo Jesús fe mã isharakõipakenaka.  
\v 7 Akka mã Jesucristo chanĩmara fakõini mã oa oro keskara. Akka kooaito mã õitiro orokõimãki, chakaya osiyamaito. Nãskarifiakĩ Niospa noko tãpitiro nõ chanĩmara faimãkai, akka oro sharafiano nõroko finõinĩfofana. Akka nã oro sharafiax keyotiro. Akka mã Epa Nios chanĩmara fasharakõiyanã mã Jesús potayamaino Jesús anã nãmã matoki fotoax inimasharakõixii. Iskafakĩ mato yoixii: “Aicho, mĩ ea chanĩmara fakõimis. Mĩ efe isharakõipakenaka,” ixõ mato yoixii. 
\p  
\v 8 Mã Jesucristo noisharakõi õiyamafikatsaxakĩ. Askatari iskaratĩa mã chanĩmara fakõini õiyamafikatsaxakĩ. Nãskakẽri mã inimai finasharakõiyanã mã tsoa yoisharatiroma.  
\v 9 Nõmãi chanĩmara fasharakõiax, nãskax nõ afe isharakõipakenaka. 
\p  
\v 10-11 Nã Niospa meka yoimisfãfe a inõpokoai yoikakĩ Cristoõnoa meka shara yoipaonifo, Niospa Yõshi Sharapa ato shinãmanaino. Iskafakĩ yoinifo: “A noko noikĩ noko ifimis nokoki oxii, mato omiskõixoxiki mã aõnoax isharanõ,” ixõ kenenifo. Ato askafafiaino tsõa tãpisharapaonima afeskaxoma tãpisharapaipaonifo. ¿Tsoamẽ noko ifimis ixiai afetĩari oximẽ? ixõ shinãpaipaonifo.  
\v 12 Akka Niospa Yõshi Sharapa ato tãpimani a inõpokoai yoiaifo keskara, akka afãfe niyokaxõ õiyonifoma. Akka afãfe õiyamafiaifono mãroko mã mã õia. Akka na meka shara Jesucristoõnoa keyokõichi mã nõ nikamis. Noko yoiaifãfe Epa Niospa ãfe Yõshi Shara atoki nĩchini nai mẽraxõ Jesucristoõnoa noko yoinõfo. Nã mã nikamis keskarari Niospa ãjirifãferi tãpipaikõikani. 
\s1 Epa Niospa noko yoini Jesucristo keskara shara nõ inõ 
\p  
\v 13 Nãskakẽ itipinĩsharakãfe shinãsharakõiyanã. Nã Niospa noko noikĩ noko afara shara inãxiaitĩa Jesucristo oaino. Nãskakẽ manasharakõikãfe.  
\v 14 Mãfi Niospa fakefoki. Nãskakẽ Epa Nios nikasharakõikãfe. Mato amapaiyai keskara mã tãpiyopaonima. Mã afara chakafapaoni keskara anã ayamakãfe.  
\v 15 Askatamaroko afaa fetsa shinãtama isharakõikãfe. Akka Nioskai afaa chakaya osiama. Niospa mato katoni a keskara shara mã inõ.  
\v 16 Akka Niospa meka kenekĩ iskafanifo Niospa ato shinãmanaino: “Ẽ isharakõimiski. Nãskakẽ isharakõikãfe,” ixõ Niospa ato shinãmanaino kenenifo. 
\p  
\v 17 Shinãkapo. Mã Epa Nios kĩfikĩ Epa mã famis. Nãskax nõ ãfe fakefokẽ noko õi. Akka a ãfe meka nikamisfo Niospa ato shara fai. Akka a nikamisfoma ato omiskõimatiro. Ares fisti Epa Niospa noko õimis mẽstekõi. Nãskakẽ isharakõikãfe nono nãmãnoax. Nãskaxõ Nios shinãsharakãfe meseyanã.  
\v 18 Akka mãto xinifãfe mato tãpimapaonifo keskarato mato nimapakexatiroma. Mãto xinifo Nioski mesepaonifoma. Ãakõi ipaonifo. Nãskakẽ mãri ato keskara ipaoni chaka shinãi. Mã askaito Niospa mato ifini mã anã chaka shinãyamanõ a mã ipaoni keskara Nios shinãmax. Akka shinãkapo. Mã mã tãpia a oro sharakõi mã Nios inãx mã aõnoax nĩpaxatiroma. Askatari kori exe mã inãx aõnoaxri mã nĩpaxatiroma.  
\v 19 Akka Cristo fistichi noko nimatiro. Atokai afaa chakafamisma, nã oveja fake meema keskara sharakõi. Jesús noko nãxoni ãfe imi foni noko imasharapakexakĩ nõ anã chaka inõma.  
\v 20 Epa Niospa mai onifatama ãfe Fake Jesús katoni noko nimapakexanõ. Nãskafekẽ fetsafãfe tãpiyopaonifoma, akka iskaratĩa Epa Niospa mã mato tãpimana.  
\v 21 Jesucristoõxõ mã Epa Nios chanĩmara fai, Epa Niospa Jesucristo otoax akiki inimakõini. Nãskakẽ mã iskaratĩa chanĩmara fakõini, Nios manakõiyanã afe ipaxakĩ. 
\p  
\v 22 Akka mã mã Jesucristoõnoa meka shara nikakõixõ anã afaa chaka shinãyamakĩ. Mã mã isharakõixõ mã fetsafo noikõi. Nãskakẽ mãa ranã nõinã faatanãsharakõikãfe mãto shinã sharafoyaxõ shinãsharakõita.  
\v 23 Nãskakẽ nã mã rama fake kãia keskara shara mã. Akka mãto epa feta mãto ẽfa mato fake fifiakanax chipo natirofo. Akka Niospa ãfe meka sharaõxõ fena keskara shara noko ima, nã keyonakama.  
\v 24 Akka kirika ano kenekĩ iskafanifo: 
\pi1 Keyokõi yorafo fana keskarafo, sharakõifikanax nã charofo keskarafo. Akka nã fanafo naino ãfe charofo keyopaketiro. Nãskarifiai keyokõi yorafo nĩpaxatirofoma, keyokõi natirofo.  
\v 25 Akka nõko Ifãfe ãfe mekakai keyonakama, 
\m ixõ kenenifo. Nã mekaõnoa Jesucristoõnoa fetsafãfe mato yoimisfo mã afe ipaxanõ. 
\c 2  
\p  
\v 1 Nãskakẽ nã mã afara chakafamisfo xatekãfe. A mã ato pãramisfo, askatari a mã ato feparamisfo: “Noko sharara fanõfora,” ixõ nãfori xatekãfe. Nãskatari a fẽtsa fiai tii fipai fekaxtemis iyamakãfe. Askatari fetsafo ato chakafapai chanĩmis iyamakãfe.  
\v 2-3 Askatamaroko nã fake rama kãiato yosixiki chocho apaiyai keskafakĩ, mãri Niospa meka shara fichipaikãfe, oa fake yomẽ chocho aki yositiro keska shara ixikakĩ. Mã mã tãpiaki nõko Ifãfe mato shara faxõaito. Nãskakẽ nã Epa Niospa mato amapaiyai keskara fisti akãfe. 
\s1 Cristo nã tokiri mitsisipa keskaraki 
\p  
\v 4 Nõ pexe fakĩ tokiri mitsisipasharakõi nõ fenatiro, pexe mitsisipa sharakõi inõ. Akka tokiri mitsisipakima nõ pexe faano pexe shara itiroma. Nõko Ifo Jesucristofi nãskarakĩ oa tokiri mitsisipakõi keskara shara. Nãskaxõ afama mĩshti fatiro. Nãskafekẽ tsõa chanĩmara famisma, nõko Ifo fichipaimisfoma. Nãskaxõ yoimisfo iskafakakĩ: “Afeskakĩkai nõ fichipaitiroma,” ixõ yoimisfo. Akka Epa Niospa Jesús katoni noikõikĩ nõko Ifo inõ. Nãskakẽ akiki fekãfe Ifofaxikakĩ.  
\v 5 Nãskarifiakĩ Niospa mato tokiri pexefã keskara faxii mã afe yorafokẽ. Askatari mã ato Epa Nios kĩfixomis inõ mato imaxii afaaya osiama sharakõi mã inõ Jesúsnoax, Jesúsmãi noko nãxonikẽ. Nãskakẽ Nios aicho fakãfe akiki inimakõikãfe, “Epa Niosi, mĩ fasi sharakõi,” fayanã.  
\v 6 Akka kirika ano kenekĩ iskafanifo, Niospa ato shinãmanaino: 
\pi1 Õikapo, ẽ Cristo õia ares fisti sharakõi. Nãskakẽ ẽ katoni efe yorafo afe yora inõfo. Nã tokiri mitsisipa keskarakõiki. Nãskakẽ afe yorafo afe isharakõipakenakafo. Nãskakaxõ Cristo chanĩmara fakaxõ anã afaa chaka shinãpakenakafoma. Askatamaroko afe inimakõipakenakafo, 
\m ixõ Niospa yoini. 
\p  
\v 7 Nãskakẽ nõ Jesús Ifofaxõ nõ shinãkĩ iskafatiro: “Jesúsfi nã tokiri kerex keskarakõikĩ, nãskax sharafinakõiaki,” ixõ nõ shinãtiro. Akka a Jesús Ifofaifãfema askara shinãkanima: “Oa tokiri shara nõ potatiro,” keskafakani. Akka aõnoa yoikĩ kirika kenekĩ iskafanifo Niospa ato shinãmanaino: 
\pi1 Oa tokiri pexe famisfãfe tokiri efapa shara potafono, pexe ifãfe ato yoitiro iskafakĩ: “¿Afeskakĩ na tokiri efapa mã potaimẽ? Potayamakãfe, efapa sharaki. Ẽ fichipaikai ẽ akiki pexe fanõ,” ixõ pexe ifãfe yoitiro, 
\m ixõ yoinifo Jesúsnoa yoikakĩ.  
\v 8 Askatari kirika kenenifo iskafakakĩ Niospa Yõshi Sharapa ato shinãmanaino: 
\pi1 Tokiri efapafai nẽxpakĩa rakano tsõa õiamax akiki otisikaini paketirofo keskakani. Nãskarifiakani tsõa nõko Ifo chanĩmara fakanaxma, oa pakeai keskarakanax fenokanax Epa Nios ika ari fopaifikani nã omiskõipakenakafo mẽra fokani, 
\m ixõ kenenifo. Niospa anori yoifinino Cristoõnoa nikayamakanax fenopakenakafo. Nãnori kirika kenenifo, Niospa ato shinãmanaino. 
\p  
\v 9 Akka mãfi askaramakĩ. Niospa mato katoni afe yorafo mã inõ. Nãfi nõko Xanĩfokõikĩ mã yonoxotiro, fetsafori mã ato kĩfixotiro Jesúsnoa ato tãpimaxiki. Noko aa keskara shara imaino mã afe yorakõi itiro. Nãskaxõ aõnoa fetsafo mã yoisharatiro iskafakĩ: “Epa Nios sharafinakõia afara noko sharafaxomis,” ixõ nõ ato yoitiro. Epa Niospa mato katoni afe yorakõifo ikax xafakĩakõi shara mã afe ipaxanõ, anã fakish mẽra ika keskara mã inõma.  
\v 10 Akka mãkai Nios shinãyopaonima, afe yorakai mã iyopaonima. Akka iskaratĩa mã afe yorafo, taeyoi Niospa mato noifiaino mã tãpiyopaonima. Akka iskaratĩa mato noikõiaito mã mã tãpia. 
\s1 Nõ Niospa yorafo ikax nõ shara itiro 
\p  
\v 11 Efe yora mĩshtichi, ẽ mato yoisharapai ea nikasharakãfe. A Nios Ifofaafomafo fe nõ ato fe ikax oa yora fetsa keskara nõ iki. Askafiax nõkai ato fe ipanakama. Akka nõroko Epa Nios fe ĩpanaka. Nãskakẽ nã Epa Nios Ifofaafoma keskara iyamakãfe. A mato shinãmapaiyaifo keskara shinãyamakãfe. Mã ato keskara itiroki, Satanás mato chakafamapai kiki.  
\v 12 Nãskakẽ ato mẽranoax Jesús Ifofaax isharakõikãfe. Akka afãfe mato yoikĩ chakafamisfo fanĩrira mato mekafakakĩ. Nãskakẽ ato kopiyamakãfe. Tanaimakõi ato mẽra ikãfe. Mã askaito mato õinõfo mã afaa chakafatama mã isharakõikẽ a Niospa keyokõi noko ichanãfaitĩa mã mai keyoaino. Nãskakẽ mato iskafakani: “Aicho, na yorafo fãsi sharakõifo, nõ ato chakafafiaino noko kopikanima, Niosxõ noko shara famisfo. Fãsi Nios sharakõi,” ixõ yoinõfo. 
\p  
\v 13-14 Nõko Ifo Jesús fichipaiyai keskafakĩ, xanĩfofo nikasharakõikãfe. Askatari a noko ĩkinã nõko xanĩfo finakõia nikasharakõikãfe. A xanĩfo fetsafori ato nikakãfe. Nã xanĩfo finakõiato ato xanĩfo imakĩ, afãfe nã afara chakafaifo ato omiskõimanõfo, askatari a afara shara famisfo ato yoisharanõfo.  
\v 15 Nãskakẽ Niospa fichipaiyai keskafakĩ mã fetsafo afara shara faxõfafãikãfe. Nã afaa tãpiamafãfe shara shinãmisfomakĩ, askatari Niospa meka tãpiafomakĩ õikaxõ anã mato mekafatirofoma mãmãi ato shara faxõaito a Niospa fichipaiyai keskafakĩ. 
\p  
\v 16 Jesús fisti mãto Ifokõi, akka afaa fetsa shinãtama isharakõikãfe. Niospa mato amapaiyai keskara fisti shinãkãfe. Mã askax afaa fetsa mãto ifo itiroma. Afaa chakafatama Nios yonosharaxõfafãikãfe.  
\v 17 Nãskakẽ keyokõi yorafo shinãfafãikãfe. Nã Jesús Ifofaafori ato noikõikãfe. Niosnoa shinãkõikãfe iskafakĩ: “Ẽ Nios noikõi nã ea yoiai keskara ẽ nikakõi. Ẽkai nikayospapaima ea omiskõimanõma,” ixõ Niosnoa shinãkãfe. Nãskaxõ mãto xanĩfofo nikakaspayamakãfe, ato nikasharakãfe. 
\s1 Cristo noko omiskõixoni keskai nõri nõ aõnoax omiskõitiro 
\p  
\v 18 Ato yonoxomisfãfe mãto xanĩfofo ato nikasharakõikãfe. Nã mato sharafaifos shinãkakĩma. Nã yora chakafãferi mato yonomamisfoki ato nikakãfe.  
\v 19 Mã afaa chakafayamafiakẽ mãto xanĩfãfe mato omiskõimanaino Nios shinãki tenekãfe. Mã askaito Epa Niospa matoõnoa yoisharai kiki.  
\v 20 Akka mã afara chakafakẽ mãto xanĩfãfe mato omiskõimanaino, Niospa mato iskafakĩ yoitiroma mã teneaito: “Mĩ afara sharakõifaa,” ixõ mato yoitiroma mãmãi afara chakafakẽ. Akka mã afara sharafaino mato omiskõimanaifono mã omiskõifinafikĩ mã tenekẽ, nõko Ifo Niospa matoõnoa yoikĩ: “Sharakõifo,” mato fatiro.  
\v 21 Cristo nokoõnoax omiskõikõini, nãskakẽ nõri aõnoax nõ omiskõitiro. Nãskax nõ aa keskara shara itiro.  
\v 22 Cristokai afaa pishta chakafamisma, askatarikai tsoa pishta pãramisma.  
\v 23 Fetsafãfe mekafakakĩ ĩchafiaifono, atorikai kopikĩ tsoa ĩchamisma. Askatari omiskõimanaifono, “Ẽri mato kopixii,” ixõ ato yoinima. Askatamaroko Apaõnoa shinãkĩ iskafani: “Epa, mĩ eõnoa tãpiaki. Nãskarifakĩ mĩ ato tãpikõia. Nãskakẽ a mĩ ato chipo omiskõimaxiai chanĩmakõi,” ixõ Apa shinãni, Apamãi mẽstekõi ikẽ.  
\v 24 Cristo cruznoax noko nãxoni, nõko chaka noko soaxoxiki. Nãskakẽ nõ anã fanĩrira shinãtiro oa yora naa keskara nõ itiro mã noko chaka soaxonano nõ afe isharapakexanõ. Mãraki yora naato afaa shinãtiro. Nãskax mẽstekõi nõ isharakõitiro. Nã noko omiskõixoniõnoax nõ isharakõipakexanõ.  
\v 25 Akka mã taeyoi oa oveja fenoa keskara mã iyopaoni afara chaka shinãi. Akka iskaratĩa mã Cristo Ifofasharakõi, mato kexesharano oa oveja kexemisto ãfe oveja kexetiro keskafakĩ. Nãskaxõ mato kexesharakõiaino mã afe yora iki. 
\c 3  
\s1 Afeskax fene fe kẽro isharatirofomãki Pedro ato yoini 
\p  
\v 1 Nãskarifiakĩ mãri kẽrofãfe, mãto fenefo nikasharakõikãfe. Nã Niospa meka shara chanĩmara faifãfema mã isharaito mato õikakĩ Niospa meka shara chanĩmara fanõfo, mã afaa yoiyamata mã isharakõiaito õikakĩ.  
\v 2 Mãto fenefãfe mato yoiaifono ato nikakaspakakĩma ato nikasharakãfe. Mã Jesús keskara shara ikaito õikakĩ nõko Ifo chanĩmara fanõfo.  
\v 3 Akka mã samasharakõi safexõ, foarome sharakõita, teoti sharakõi safeta, parotameti sharakõi mã safekẽ, mato tsõa tãpitiroma mã õiti sharaya iyamai mã õiti chakayakẽ.  
\v 4 Akka mã Cristo Ifofasharakõixõ mã ato õimasharakõitiro. Mãto õiti mẽraxõ shinãsharakõita, meka mitsisipato mã ato yoitiroma, tanaima sharakõi mã itiro. Fetsafo õikĩ ato yoisharakãfe, ato fe isharakãfe. Mã askaito õikĩ Niospa mato iskafatiro: “Na kẽrofo sharakõifo ẽ õi,” ixõ Niospa mato yoitiro matoki inimayanã.  
\v 5 Nãskakanax kẽrofo ranãri Nios Ifofasharakanax isharakõipaonifo. Nãskakaxõ ãto fenefo nikakõisharapaonifo.  
\v 6 Akka nã Sara ãfe fene Abraham nikakõisharapaoni, “Ẽfe ifora,” fayanã. Nãskax mã isharakõiax, askatari mã meseyamax Sara ãfe fenafo keskara mã itiro. 
\p  
\v 7 Akka mãri feronãfakefãfe, mãto ãfifo ĩkisharakõikãfe. Nã kẽrofokai mitsisipafomakĩ mato keskara. Nãskakẽ ato kexesharakãfe, mato feta Nios Ifofaafoki Niospa ato noikĩ atori ifiakĩ afe ipaxanõfo. Nãskakẽ mãto ãfifo ato noisharakãfe. Mã ato noiamax ato kexesharaxoma mã kĩfiaito Niospa mato nikasharatiroma. 
\s1 Afara ato sharafaxõkani omiskõitirofo 
\p  
\v 8 Nãskakẽ isharakõixõ keyokõichi nãnori fisti shinãsharakãfe. Oa mato fe yora mã noiai keskafakĩ ato fe nõinã faatanãsharakõikãfe. Ato shinãkĩ ato axosharafafãikãfe. Askatari, “Nã yora afaa tãpiamafo ẽ finakõia,” ikaifo keskai askayamakãfe.  
\v 9 Fẽtsa mato chakafaito kopiyamakãfe. Askatari mato ĩchaito kopikiri ĩchayamakãfe. Askatamaroko ato noisharakãfe, akka Niospa noko katonikĩ noko sharafakĩ.  
\v 10 Niospa meka yõra kenekĩ iskafani, Niospa Yõshi Sharapa shinãmanaino: 
\pi1 Mã isharapaikĩ afara chakafo yoiyamakãfe, fetsafo pãrayamakãfe.  
\v 11 Afara chakafo fishtayamakãfe, ato makinoax fotakãfe. Askatamaroko afara sharafos akãfe. Afeskax mã isharatiromãkĩ nãskax isharakõikãfe fetsafo fe.  
\v 12 A Niospa meka nikasharakõipaiyaifono Niospa ato kexesharakõifafãini, kĩfiaifãferi ato nikakõimis. Akka a afara chakafamisfo Niospa ato nikatama ato tãpimatiro ato chakafakĩ, 
\m ixõ yorafãfe Niospa mekaõnoa kenenifo. 
\p  
\v 13 ¿Mã afara ato axosharaino, akka tsõa mato chakafatiromẽ?  
\v 14 Akka mã askafiaino mato omiskõimanaifono inimai finasharakõikãfe. Nãskakẽ atoki meseyamakãfe, askatari shinãchakayamakãfe.  
\v 15 Askatamaroko nõko õiti mẽraxõ nõko Ifo kĩfikĩ iskafakãfe: “Cristo, mĩfi ẽfe Ifokõiki. Mĩkai afaa chakafamisma, mĩ sharakõi,” ixõ yoikãfe. Askatari fetsafãfe mato iskafaifãfe: “¿Afeskaxõ mĩ tãpiamẽ mĩ Nios fe ipanaka?” ixõ mato yoiaifãfe ato yoixikakĩ ĩkisi itipinĩsharakãfe ato tãpimasharaxikakĩ.  
\v 16 Akka mãroko isharakõita ato nikasharakõikãfe, mato õinõfo mã shara ikaito. Mãto õiti fekaxtefayamakãfe. Akka mato chakafakĩ mekafaifãfe iskafakĩ mato yoikanax: “Na Jesús Ifofamisfãfe afara chakafamisfo,” ixõ mato yoifikanax rãfitirofo mãmãi isharakõikẽ.  
\v 17 Akka nõ afara shara faino fetsafãfe noko omiskõimanaifono nõ teneaino Epa Nios nokoki inimatiro. Akka nõ afara chakafaax nõ omiskõiaino nokoki inimatiroma. 
\p  
\v 18 Akka Cristo nokoõnoax omiskõiax nani nõko chaka noko soaxoxiki. Anãkai nanakama nai fistini. Sharakõifiano retenifo. Akka nõ chakakõifokẽ noko nãxoni. Apa Nios ano noko imapakexakĩ. Akka mã nafiax ãfe fero mẽsho nanima, anã otoni Ãpa Yõshi Sharaõnoax.  
\v 19 Akka mã naax ãfe fero mẽsho Niospa Yõshi Sharaõnoax a namisfo mẽra kayoni a tsoa tseketiroma ano, anoxõ yoikai.  
\v 20 Akka nãfo nayokanaxma taeyoi nikayospakõi iyopaonifo. Nãskaifono Noéri nãno ato fe iyopaoni. Nãskakẽ Epa Niospa Noé manayopaoni kanõanãfã fayofaino, Noémãi Epa Nios Ifofakẽ. Ãfe fakefori afe inifo, ãto ãfifo fe. Ocho inifo. Nãskakẽ ato fãka ãsanima Epa Niospamãi ato kexesharakẽ. Akka nã nikayospafo ato fakafãnẽ ãsakĩ mitoni.  
\v 21 Faka faipafãino kanõanãfã mẽra ikiax Noé ãfe ãfi fe ãsanima. Ãfe fakefori ãto ãfifo fe afe ikikanax ãsanifoma. Ocho inifo. Nãskarifiakĩ fẽtsa noko maotisafakĩ faka mẽra noko ikimaxõ, noko fininĩfofanaino nõ yorafo ispai nõ Jesús Ifofakĩ nõko chaka noko soaxonõ nõ afe ipaxanõ. Akka nã noko maotisafafoõxokai nõko choshta nõ soatiroma. Askatamaroko nõ Nios yõkai nõko chaka noko soaxonõ noko ĩkipakexanõ Jesúsmãi mã naax anã otonikẽ. Nãskaxõ nõ anã shinãchakatama Jesucristoõxõ nõ shinãsharakõi Nios fe ĩpaxakĩ.  
\v 22 Jesús Apa ari nai mẽra kani Apa Nios fe xanĩfokõi ixiki. Nãskakẽ ãjirifãfe ãto xanĩfofofãfe Jesús finõtiroma nã yõshifãferi. Askatari nã yõshifãferi xanĩfofiakaxõ Jesús finõtirofoma Jesúsmãi finakõikẽ. 
\c 4  
\s1 Epa Niospa noko ãfe shara inãi keskafakĩ fetsafori nõ sharafaxotiro 
\p  
\v 1 Nãskakẽ nã Cristo ãfe yora omiskõini keskai, mãri nãskai omiskõixikai itipinĩsharakãfe. Akka nã omiskõiato anã afaa chaka shinãtiroma mãmãi ãfe chaka xatexõ.  
\v 2 Isharakõixõ nã mã apaiyai keskara mã atiroma, nã Niospa mato amapaiyai keskara mã atiro.  
\v 3 Mã xini ichapa finõa, nã Jesús Ifofaafãfema apaonifo keskara mã ayopaoni. Nã mã afara chakafapaiyai keskara fisti mã ayopaoni. Mãto ãfimafo mã fichipaipaoni. Kẽrofori askapaonifo. Askatari mẽxotaima mã pãepaoni, ato fe ichanãx afarafo chakafayanã ayakĩ finakõiyanã. Askatari afara fetsafo mã noikõipaoni nã Nioskõi noitama.  
\v 4 Akka mã anã ato fe rafeyamaxõ mã anã ato feta afaa chakafayamaito õikakĩ. Nãskaxõ mato yoikĩ iskafatirofo: “Õikapo. Na yorafãfe anã nofeta afaa akanima,” ikaxõ mato chakafakĩ mekafatirofo.  
\v 5 Akka ato askafaifãfe Niospa ato yoixii iskafaki: “¿Afeskakĩ mãto chaka mã xatekaspakĩ na fetsafo mã ato chakafamismẽ?” ixõ ato yõkaxii. Ato askafata ato omiskõimaxii. A niyoafoya a namisfo Niospa ato omiskõimaxii, tsõa Ifofatama ãto chaka xateyamafono.  
\v 6 Nãskakẽ Epa Niospa ãfe meka yoimisfo nĩchini yorafãfe nayokaxoma Jesucristoõnoa meka shara nikanõfo. Nã namisfãfe niyokaxõ nikayopaonifo. Akka mã keyokõi nanifo. Nãskafikẽ fatora fetsafãfe Jesús chanĩmara fakẽ Epa Niospa nã nia keskara ato imapakenaka afe ipaxanõfo. 
\p  
\v 7 Nãskakẽ meka fetsari ẽ mato yoinõ. Nikakapo. Mã chaima mai keyoi kiki. Nãskakẽ shinãsharakãfe, afaa chaka shinãtama. Epa Niospa mato shinãmapaiyai keskara fisti shinãkãfe. Nãskaxõ Epa Nios fisti kĩfifafãikãfe.  
\v 8 Nãskax noinã faatanãkõikãfe nõ noinãkõia sharaki. Fetsa noikõixõ nõ rae fatiro, a noko chakafai keskara anã shinãnõma.  
\v 9 Fetsafo mãto pexe ano nokoaito akiki inimayanã mãto pexe anoxõ ifikãfe, ato mekafakĩ chakafaxoma.  
\v 10 A Niospa ãfe Yõshi Sharapa noko tãpimanai keskafakĩ nõri fetsafo axosharatiro fetsafãferi Nios Ifofanõfo. Nãskaxõ fetsafo afara shara faxokĩ xateyamakãfe. A Niospa afe yorafo noikõiai keskafakĩ mãri ato noikõikãfe.  
\v 11 Mã Niospa meka yoi, nã Nioskõi mekai keskaraõxõ ato yoikãfe. Mãto shinãmã shinãxõ ato yoikakĩma. Askatari mã Niospa Yõshi Sharaõxõ mã afarafo ato shara faxõfaito õikakĩ yorafãfe iskafakĩ yoitirofo: “Aicho, Epa Nios sharakõi. Ãfe Fake Jesucristoõxõ afama mĩshtifo fatiro,” ixõ yoitirofo. “Epa Niospa ares fisti afarafo shara famis, atokai afaa chakafapanakama. Ares fisti ãfe Yõshi Sharaõxõ afama mĩshti fapanaka,” ixõ yoinõfo. 
\s1 Nõ omiskõifikĩ nõ tenetiro nõmãi Jesucristo chanĩmara fakĩ 
\p  
\v 12 Efe yora mĩshtichi, omiskõifikĩ rateyanã shinãchakayamakãfe. Mã askaito Epa Niospa tãpitiro mã Jesús Ifokõi fakẽ. Nãskakĩ shinãkĩ iskafayamakãfe: “¿Afeskai ẽ omiskõimẽ?” ixõ anori shinãyamakãfe.  
\v 13 Askatamaroko inimakõikãfe Jesucristo omiskõiai keskai mãri omiskõifikĩ. Askatari chipo mã inimasharakõixii Jesucristo anã nai mẽranoax fotoaino. Nãskakẽ keyokõichi õixikani ãfe sharafoya nai mẽranoax fotokẽ, nõko xanĩfo finakõi ixiki.  
\v 14 Akka mã Cristo Ifo shara faino Cristoõxõ mato ĩchaifono inimakõikãfe. Nãskakẽ Epa Niospa ãfe sharafoya ãfe Yõshi Shara matoya rafemani kiki.  
\v 15 Akka fatora mã fẽtsa mã afaa chakafamiskẽma mato omiskõimanaifono tenekãfe inimayanã. Askatari yometsoyamata, askatari afara chakafakĩ finata iyamata, askatari fetsafãfe afara yoipaiyaifo keskara ato feta ayamakãfe omiskõixikãkima. Ato keskara iyamakãfe.  
\v 16 Akka nõ omiskõi Nios Ifofaax, nãskakẽ rãfiyamakãfe. Askatamaroko Epa Nios yoikãfe iskafakĩ: “Aicho Epa Niosi, ẽ mĩ Fãke Jesús afe yora. Nãskakẽ nã chanĩmara faafãfema ea omiskõimanaifono ẽ Jesúsnoax omiskõi. Aicho,” ixõ yoikãfe. 
\p  
\v 17 Akka Epa Niospa yorafo keyokõi tãpimaniyoi afe keskara ikafomãkĩ. Taefakĩ noko õikĩ taefaiyoi nõmãi afe yorafokẽ. Akka chipo nã Jesús chanĩmara faafomafori ato yoixii afe keskara ikafomãkĩ. Akka iskaratĩa nõ omiskõiyoi, anãkai nõ omiskõinakama nõ isharakõipakenaka, Epa Nios fe nai mẽra. Akka chipo nã Niospa meka nikakaspamisfo omiskõi finakõixikani, afokai anã nĩpanakafoma.  
\v 18 Niospa meka yoikĩ iskafakĩ kenenifo: “Nã Nios chanĩmara faifo isharakõimisfo, Nios ari foyokanaxma omiskõiyotirofo. Nãskafikanax mã Nios ari nokokanax anã omiskõinakafoma. Akka nã Nios chanĩmara faafãfema afara chakafamisfo nãfo omiskõi finakõipakenakafo,” ixõ kenenifo.  
\v 19 Nãskakẽ nã Niospa mato yoiai keskai mã omiskõifikĩ shinãchakayamakãfe. Nãato mato onifaniki. Nãskakẽ yoikĩ iskafakãfe: “Epa Niosi, mĩ ea amapaiyai keskara fisti ẽ apai. Meres fisti mĩ ea yoitiro,” ixõ yoikãfe. Nãskax isharakõikãfe nã mato yoiai keskara amiski. 
\c 5  
\s1 Afeskax isharatirofomãki a Nios Ifofaafo Pedro ato yoini 
\p  
\v 1 Akka nã Niospa meka nikakani ichanãfono ato kexemisfo, ẽ mato yoisharapai ea nikasharanõfo. Nãskaxõ mãto shinã mẽra ẽfe meka nanesharakãfe. Ẽri nã Jesús chanĩmara faafo ẽ ato kexemiski. Nõko Ifo Cristo omiskõiaito ẽ õini. Anã oaino ẽri afe isharapakenaka. Tsõa a keskara õimisma sharakõi keyokõichi õixikani. Ẽri õixii a keskara sharafinakõia.  
\v 2 Nãskakẽ ẽ mato yoi nã Jesús chanĩmara faafo ichanãifono Niospa mato yoini keskafakĩ ato kexesharakãfe. Ato Niospa meka yoisharakãfe isharanõfo. Nãskaxõ shinãkĩ iskafayamakãfe: “Ooa, ẽ afara fetsafapaifikĩ ẽ Niosxõ ato kexei,” ixõ shinãyamakãfe. Askatamaroko a Niospa fichipaiyai keskafakĩ ato kexesharakãfe ato noiyanã. Nãskakẽ, “Ea Niospa ato yoimanaino ẽ ato yoikaspai,” ixõ yoiyamakãfe. Anori shinãtamaroko inimasharayanã Niospa meka ato yoisharakãfe. “Ẽ ato yoiaito ea kori inãkani kiki,” ixõ shinãyamakãfe. Anori shinãtamaroko ato Niospa meka yoisharakãfe inimayanã.  
\v 3 Nãskata ãto xanĩfo ipaikakĩma ato õimasharakãfe afeskaxõ Jesús Ifofasharax isharatirofomãkĩ.  
\v 4 Mã askaito a noko kexemis, nõko Ifo Jesucristo anã nãmã fotoxõ mato õisharaxii. Nãskaxõ mato afara shara inãxii a keyonakama. Nãskakẽ mã afe ĩpanaka. 
\p  
\v 5 Nãskarifiakĩ mãri naetapafãfe anifofo yafi a mato Niospa meka yoimisfo nikakõisharakãfe. Naetapafãfe anifofo fe isharakõikãfe. Nãskata mã ranã axoshara faatanãkãfe. “Ẽ xanĩfoki,” iyamakãfe. Akka, “A xanĩfo nipaikani kakapaimisfoki Nios atoki inimaima. Akka a kakapaimisfomaki Nios atoki inimayanã ato afara axosharai ato noikĩ,” ixõ kenenifo Niospa meka yoikakĩ.  
\v 6 Epa Nios finakõixõ afama mĩshti famis. Nãskakẽ kakapaimis iyamakãfe. Anori shinãtamaroko iskafakãfe: “Epa Nios finakõia. Ẽ afaa tãpiama,” ixõ yoikãfe kakapaimis ikakĩma. Mã askaito Niospa ato mãnão mato nĩchixii xanĩfo keskara mã inõ.  
\v 7 Askatari afaa shinãchakayamakãfe. Afaa shinãtamaroko Nios yoikãfe mato kexesharanõ. Niospa mato noikĩ mato kexesharaino anã mãto õiti fekaxtefayamakãfe. 
\p  
\v 8 Shinãsharata mẽste shinãkãfe. Satanás noko noikaspakĩ noko chakafapai kiki, oa poomã fonãiki kafãsakĩ yoinã fenai keskaraxõ. Satanás chakata noko afara chakafamapaimiski Niosnoa tsõa shinãnõma, Satanás ato chakafamaino afe yora inõfo.  
\v 9 Nã mã omiskõiai keskariai nã nõko Ifo chanĩmara faa fetsafori maitio anoax omiskõikani. Nãskakẽ Satanás mato afara chakafamapaiyaito nikayamakãfe. Mãto Ifo fistiroko chanĩmara fakãfe. Afara chakafayamakãfe.  
\v 10 Niospa mato noikõikĩ mato katoni, Cristo ika ari mã afe isharakõipakexanõ nã sharafinakõia ano. Nono mai ano mã iyoax mã aõnoax omiskõiyoi. Mã askaino Epa Niospa mãto õiti mato kerex faxõi. Nãskaxõ afara afeskara afiaino mã tenekõixõ mã Jesucristo Ifofasharakõixii.  
\v 11 Nãatofi afama mĩshtifo fapanakaki. Nã fistichi atiro keskafakĩ tsõa askafatiroma. Nã fistichi askafãpanaka. 
\s1 Mã mekai xatekĩ Pedro ato meka shara yoini 
\p  
\v 12 Ẽfi Silvano shinãkõimis. Ẽ tãpia nã Niospa amapaiyai keskara amiskẽ. Akka nã ẽ mato yoipaiyai anori ea kirika kenexoni. Na kirika ichapama ẽ mato kenexoni mãto õiti mato inimamasharakõixonõ mã shinãsharakõinõ. Ẽ mato yoi chanĩmakõi Niospa noko noikõi. Nãskakẽ nãnori fisti shinãkãfe fanĩrira shinãkakima. 
\p  
\v 13 Jesús chanĩmara faafo ichanãmisfo mẽraxõ Babilonia anoafãfe mato yoisharakani. Ẽfe fake Marcosri mato yoisharapai. Nãfori Niospa katoni afe yora inõfo, noko akai keskafakĩ.  
\v 14 Mãri mã nõinã faatanãi yoinõnãsharakãfe. Mã Cristo yorakõifokĩ, nãskakẽ inimasharakõikãfe. Nã tii. 
\cls \sig Pedro \sig*