\id 1JN - Yaminahua NT -Peru 2008 (DBL -2013) 
\h 1 JUAN 
\toc1 Juan Jesús Chanĩmara Faafo Kirika Kenexõ Fomani 
\toc2 1 Juan 
\toc3 1 Jn. 
\mt1 Juan Jesús Chanĩmara Faafo Kirika Kenexõ Fomani 
\c 1  
\s1 Jesús noko nimasharaino nõ afe ĩpaxanõ 
\p  
\v 1 Ẽkĩa Juan, ẽ mato kirika kenexõ fomai mã tãpinõ. Jesucristo ẽ õimisxaki ẽ mato yoi mãri mã tãpisharanõ. Nã Jesucristo nõko Ifokõi tae fenakõi Nios fe iyopaonixakĩ. Akka Niospa afama mĩshti onifamatai afe iyopaonixakĩ, chipo nãmã fotoxõ noko yoiaito nõ nikamis. Oa yorakõi keskara nõ õimis. Mã õikĩ feyafaxõ nõ ramãti nõko mĩfi. Nãskakẽ noko yoiaito nikayamexakĩ ẽ mato yoi, noko imasharanõ nõ afe ĩpaxanõ.  
\v 2 Apa Nios ariax nokoki Jesús fotoni. Fotokẽ nõ õikĩ feyafani. Nãfi afeskapishta nakama, nãfi nĩpanakakĩ. Apa Nios fe ikatsaxakĩ nokoki fotoni. Nãskakẽ nã nõ õia keskara nõ mato yoi.  
\v 3 Nõ õipaonixakĩ nõ mato yoi noko yoiaito ãfe meka. Nãskakẽ nofe rafexõ nã nõ shinãi keskarari mãri mã shinãtiro. Nios feta ãfe Fake Jesucristo shinãi keskafakĩ nõri anori nõ shinãi, nõ ato fe rafekõitiro.  
\v 4 Nãskakẽ ẽ mato kirika kenexõ fomai nã kirika kene õiax mã inimakõinõ. 
\s1 Nios xafakĩakõi ika oa luz keskara 
\p  
\v 5 Akka noko Cristo yoiai, anori ẽ mato yoinõ. “Oa xinĩ chai chaxaino fakishtiroma keskara, xafakĩakõi Nios ika. Afaa chaka afe rafemisma,” ixõ Cristo noko yoimis.  
\v 6 Akka anorima shinãi yora fetsafo iskakani: “Ẽ Nios fe rafea,” ifiaxõ a Niospa yoiai anori shinãima ãa chanĩ anorima yoi. Ãfe õiti sharama xafakĩakõi ikama, fakish keskara a Niospa yoiai anori shinãyamafi.  
\v 7 Nios xafakĩakõi ikakĩ, afaa pishta chakafamisma. Ãfe õiti mẽra oa fakish keskarama, xafakĩa sharakõi ika. Akka nõri afe rafekõixõ, nõ ãfe meka nõ mẽra nanekõixõ, Niospa shinãi keskafakĩ nõri nõ shinãtiro. Nõ askara shinãx, nã Ifofaafo fe nõ ato fe rafetiro. Nãskax nõ xafakĩakõi nitiro, Niospa Fake Jesúsmãi noko nãxonikẽ. Ãfe imĩ nõko chaka noko soaxõfafãini keyokõi. 
\p  
\v 8 Akka nõ yoikĩ iskafamis: “Ẽ afaa chakafamisma,” ifiax nõa nõ pãramemis. Nãskax nõa nõ chanĩkõimis. Nõko õiti mẽra Niospa meka naneama.  
\v 9 Akka nõ afara chakafaxõ nõko chaka nõ soapaikĩ, nõ Nios yoiaito nõko chaka noko soaxotiro. Keyokõi noko soaxotiro noko raefakĩ, Niosmãi mẽstekõi isharakõixõ.  
\v 10 Niospa yoimis: “Keyokõi yorafãfe chakafamisfo,” noko famis yoikõikĩ. Noko askafafiaino, “Ẽkai afaa pishta chakafamisma, ẽ chaka shinãima,” ixõ yoikĩ nõ Nios chanĩmara faima, “Ãa chanĩra,” nõ Nios fai. Nãskakẽ ãfe meka nõko õiti mẽra naneima. 
\c 2  
\s1 Jesús Apa Nios noko yoixoni 
\p  
\v 1 Efe yora mĩshtichi, ẽ mato shinãi. Mẽ mato Jesús Ifofamaxõ ẽ mato fakefai. Mato fakefaxõ ẽ mato kirika kene fomai, mã anã afarafo chakafanõma, shinãsharata mã inõ. Askara Niospa fichipai. Akka nõ chakafaino Niospa fichipaima. Nãskakẽ nõ anã afara chakafaxõ nõ nõko Ifo Jesucristo nõ yoitiro anã nõko chaka nõ soapaikĩ, nokomãi nikaito. Noko nikaxõ Apa Nios noko yoixoni iskafakĩ: “Epa, ẽ ato nãxoni. Eõxõ ato chaka soaxõfe, ãto chaka soapaikani kiki,” Apa fatiro. Nã fistimãi mẽstekõi ixõ, afaa chakafamisma. Nãskaxõ Apa Nios noko yoixotiro.  
\v 2 Noko nãxoni nõko chaka noko soaxoxiki. Noko fistima, keyokõiõnoax noko nãxoni. Nõko Ifo Jesucristo noko nãxoni. Nõko chaka noko soaxõfaini nani. 
\p  
\v 3 Nãskakẽ Cristo noko yoiai keskafakĩ nõ nikakõixõ nõ tãpisharakõitiro nõmãi afe rafexõ.  
\v 4 Yora fetsafo iskai: “Ẽ Cristo fe rafea,” ifiaxõ ãfe meka nikama, ãa akikiri kẽtapamis, mẽstekõi ikama.  
\v 5 Akka nõ Niospa meka nikakõikĩ nõ aõ noikõi. Nãskafaxõ nõ tãpitiro nõ afe rafekõia, Nios fe.  
\v 6 “Mẽ Nios fe rafekõiaki,” ixõ yoi, a Jesús imis keskara ikãfe. 
\s1 Noko meka fena shara yoini nõ nõinãsharakõinõ 
\p  
\v 7 Efe yora mĩshtichi, ẽ mato yoisharakĩ ẽ mato kirika kenexoni. Na ẽ mato yoiai keskafakĩ taefakĩ mã mã nikamiskĩ. Jesús noko yoia keskafakĩ ẽ mato kenexonõ.  
\v 8 Mã mã nikafimiskẽ, ẽ mato anã fenafakĩ yoinõ chanĩma. Jesucristo noko noikõi. Nãskari fakĩ nõ fetsafo noikõi. Fetsafo noikĩ, nõko õiti mẽra xafakĩakõi iki. Anã fakish keskara ikima.  
\v 9 Akka, “Ẽ Nios fe rafea ẽ xafakĩakõi ika,” ixõ nõ yoifixõ nofe yorafo nõ noikaspamis, nõkai xafakĩakõi ikama.  
\v 10 Akka nõroko nofe yorafo noi, nõ xafakĩakõi iki. Nõ shinãsharata nõ ikax, nõ anã fenotiroma. Nãskakẽ nõ xafakĩakõi iki, afaa pishta chaka shinãtama.  
\v 11 Akka a afe yorafo noikaspaifo, afokai sharama. Fakish mẽra niafo keskara. Afaakai shinãkanima. Ãto chaka xatekaspakani. Askafikaxõ afaa tãpiafoma, fenokõiafo. 
\p  
\v 12 Efe fakefãfe, mãto chakafo Jesúsxõ Epa Niospa mato soaxonano, nãskakẽ ẽ mato shinãkĩ ẽ mato kirika kenexoni.  
\v 13 Afaa oniataima Epa Nios fisti iyopaoni. Efe anifo tiito, ẽ mato kirika kenexoni, afe keskaramãki mã mã Epa Nios tãpiakĩ. Mã mã tãpixõ mã chanĩmara famiski. Naetapafãfe, matori ẽ kirika kenexoni, Satanás chakata mato afara chakafamapaiyaito mã mã finõfakĩ. Nãskakẽri naetapa tiito ẽ mato kenexõ fomai, mã Satanás chaka finõano. Efe fakefãfe, ẽ mato yoikĩ kenexona mãmãi Epa Nios tãpikẽ. 
\p  
\v 14 Efe anifo tiito, matori ẽ kirika kenexona, mã mã tãpiakĩ, afaa oniyataima Epa Nios fisti iyopaoni. Naetapafãfe, matori ẽ kirika kenexona, mãto õiti kerexkõifafãi Epa Nios ãfe meka shara nikakõiyanã mã mã Satanás chaka finõfakĩ. 
\p  
\v 15 Akka a Niospa fichipaiyamai, nõri fichipaitiroma. Afo fichipaikĩ nõ Nios shinãtiroma. Afarafo na yora chakafãfe ãto shinã mẽraxõ shinãifo keskara afo fichipaiyamakãfe. Afo fichipaikĩ mã Nios shinãtiroma.  
\v 16 Akka a Nios shinãifoma nono nãmã ikafo ãa shinãkani iskamisfo: “Ẽa ẽ shinãxõ nã ẽ apaiyai keskara ẽ atiro. Afara õikĩ ẽ fichipaikĩ ẽ fitiro. Ẽ tsoa keskarama. Ẽ afama mĩshti shinãi. Ea keskara tsoama,” ixõ fẽtsa yoitiro ãa chanĩkĩ. Aato Niospa meka shinãima, ãa shinãx askatiro.  
\v 17 Akka na afe keskararafo Niospa õikaspaifo mã afo mitokomei. Nãskatari a yora chakafãfe fichipaiyaifo mã afori mitokomei. Akka nã Niospa yoiai keskara nikakõiax nõ Nios fe nĩpanaka. 
\s1 A yora chanĩaifo nõ nikatiroma 
\p  
\v 18 Efe fakefãfe, mã chaima Jesucristo anã nãmã fotoiyoi mã nõ nika. Nãskakẽ Jesús nãmã fotoyoamano, akka nã yora chakafãfe Cristo shinãmisfoma ãto xanĩfo finakõia oi taei. Nãato, “Ẽ Cristora,” ixõ noko pãrapaixii. Mã mã tãpia nãato Jesús noikaspamis. Akka iskaratĩa, “Ẽ Cristora,” ikanaifo yora ichapakõifo. Nãskakẽ mã nõri tãpia nã Cristo kayakõi samama fotoi.  
\v 19 Nã Cristo noikaspaifo nofe iyoafo, mã noikaspakani nomakinoax tsekeafo. Afokai noko keskarafoma. Cristo anã shinãkanima, mã kachikiri faafo. Nãskax nomakinoax tsekeafono nõ tãpitiro afãfekai Cristo Ifofaafoma. Akka a Cristo ãto Ifokõikẽ nomakinoax tsekekeranafoma. 
\p  
\v 20 Akka Cristo ãfe Yõshi Shara mãto õiti mẽra nanea. Nãskakẽ keyokõichi mã mã tãpia Niospa Yõshi Sharapa mato tãpimapaiyai keskara.  
\v 21 Nãskata Jesucristo mã tãpikĩ finakõiakĩ. Tãpixõ mã mã chanĩmara fakĩ. Nãskakẽ ẽ mato kenexoni. Nãskaxõ afara mato pãraifãfe mã chanĩmara faima. Mã tãpia Jesucristo ramashara anorima ato yoimisma, nãfi chanĩmakõikĩ.  
\v 22 Yora fetsafo iskamisfo: “Cristokai Niospa nai mẽraxõ nĩchinikeroko, akai Niospa Fakekẽroko,” ixõ yoimisfo. Askafakaxõ Epa Nios yafi ãfe Fake Jesús chanĩmara fakanima. Afãfe Cristo noikaspakõikani.  
\v 23 Akka nã Cristo noikaspaifãfe iskafakani: “Jesús Niospa Fakema,” fakanax Epa Nios fe rafemisfoma. Afokai Niospa yorafoma. Akka a yoikĩ iskafaifo: “Jesús Niospa Fakekõi,” fakanax nãfo Nios fe rafekani. 
\p  
\v 24 Nãskakẽ Jesúsnoa mã nikakĩ taefani keskafakĩ, ãfe meka shara shinãmakiyamakãfe. Nã mã nikakĩ taefani keskafakĩ, mã shinãmakiyamax mã nikakõisharaino Epa Nios fe ãfe Fake Jesús mato fe rafekõipakenaka.  
\v 25 Nãskakẽ Jesús noko iskafakĩ yoiyoni: “Ea yafi ẽfe Epa mã Ifofaax, mã nofe nĩpanaka, anã mã nanakama,” ixõ noko yoini. 
\p  
\v 26 Akka na yorafãfe Cristo noikaspaifo afãfe mato pãrapaikani. Mato anorima yoipaikani. Nãskakẽ ẽ mato yoisharakĩ kirika kenexoni mã tãpikõinõ tsõa mato pãrayamanõ anorima yoikĩ.  
\v 27 Akka Epa Niospa ãfe Yõshi Shara mato inãni mato fe rafekõinõ. Nãskakẽ aõxõ mã mã tãpikõia. Mã anã tsoa yopaima mato tãpimanõ, ãfe Yõshi Sharapamãi keyokõi mato tãpimakẽ. A mato tãpimanai keskara chanĩmakõi, mato pãratiroma. Nãskakẽ nikakõiyanã Cristo fe rafesharakõikãfe, a Niospa Yõshi Sharapa mato yoiai keskai. A Niospa Yõshi Sharapa mato yoini keskai shinãmakikakĩma Cristo fe rafesharakãfe enekakĩma. 
\p  
\v 28 Ẽfe fakefãfe, iskaratĩa Cristo nikakõiyanã afe rafekõikãfe, mã nãmã fotofaino nõ akiki meseimakai nõmãi isharakõiax. Askatari nõ akiki rãfimakai. 
\p  
\v 29 Mã mã tãpiakĩ Nios isharakõimiskĩ afaa chakafatama. Nã isharakõimisfo nãfo Epa Niospa imasharapakenaka ãfe fakefo inõ. Nafofi Epa Niospa fakekõifokĩ. 
\c 3  
\s1 Niospa fakefo 
\p  
\v 1 Epa Niospa noko noikõi. Shinãfãi ikãfe. “Ẽfe fakefora,” noko famis. Akka nõ ãfe fakekõifo. Akka nã yora fetsafãfe Jesucristo shinãifoma Nios tãpiafoma. Nãskafakĩri nokori tãpiafoma, nõ Niospa fakefofiano.  
\v 2 Efe yora mĩshtichi, ea nikakãfe. Nõfi iskaratĩa Niospa fakekõifokĩ. Nãskakẽ afe keskarara chipo noko Niospa imai nõ tãpiama. Cristo fotoaito nõ õiax nã keskarakõi nõ iki, ãfe õiti keskarakõi.  
\v 3 Niospa fakekẽ nonori nõ yoi: “Ẽ Jesucristo fe ipanaka. Ẽ Jesús fe ikaino ãfe õiti keskarakõi ẽ ixii,” ixõ shinãkĩ nõ anã chaka shinãpaima. Jesucristo shinãi keskarari nõ shinãtiro, anã chaka shinãyamakĩ. 
\p  
\v 4 Akka yora fetsafãfe ato chakafakakĩ, ãto chaka potakaspakani, a Niospa yoiai keskara shinãkanima, afara chaka fisti shinãmisfo.  
\v 5 Jesucristo nai ariax nokoki fotoni nõko chaka noko soaxoxiki. Akka nãatofi afaa chakafamismakĩ. Nã fistifi finakõiakĩ. Ẽ mato yoiai keskara mã mã tãpiakĩ.  
\v 6 Nãskakẽ a afe rafeafãfe chaka shinãmisfoma. Akka a õiti chakayafãfe Jesús tãpiafoma, Jesús shinãkanima. Jesús fe rafeafoma.  
\v 7 Ea nikasharakãfe, ẽ mato yoinõ. Fetsa iskatiro: “Ẽ Niospa meka mato yoinõ,” ixõ mato yoisharaima. Mato anorima tãpimapai, akka aa nikax mã chaka nitiro. Akka a isharakõixõ shinãsharamis. Aa keskarafi yora sharakõikĩ. A Cristo ika keskarari ari isharakõia shinãsharakõita.  
\v 8 Akka nã afara chakafamisfo Satanás fe rafeafo. Nã Satanásmãi taeyoi õiti chakaya inino, iskaratĩari nãskara. Nãskaxõ Satanás keyokõi yorafo afara chakafamapai. Nãskakẽ Niospa ãfe Fake nokoki nĩchini. Noko nãxoxiki nokoki fotoni, nõko chaka noko soaxoxiki. Nomakinoa Satanás potatiro noko afara chakafamapaiyaito. Nãskakẽ Jesucristo Satanás finõinĩfofana. 
\p  
\v 9 Akka Niospa ãfe Yõshi Shara nõmẽra naneano nõ Niospa fake itiro. Nõ Niospa fakexõ nõ anã afaa chakafapaima. Nã Niospa Yõshi Shara nõko õiti mẽra ikẽ nõ anã afaa chakafatiroma, nõko õiti noko fetsafaano. Nõko õiti noko fetsafaxõ, mã Niospa noko fakefa.  
\v 10 Fetsafãfe afara chakafamisfo, afokai Niospa fakefoma. Afofi aa ranã noinãkanima. Askarafo Niospa fakefoma. Afofi Satanás fakefoki. Nãskakẽ Satanás fakefo nõ tãpitiro. Nãskafakĩri Niospa fakefo nõ tãpitiro. 
\s1 Nõa ranã nõ noinãtiro 
\p  
\v 11 Nãskakẽ taefakĩ mã Nios Ifofaxõ mã mã nikamiskĩ mato yoiaito: “Nõa ranã nõ noinãsharanõ,” ixõ mato yoiaito mã mã nikamis.  
\v 12 Akka nã Caín onefetsa noikaspakĩ reteni keskara iyamakãfe. Askara Satanás chaka fe rafea. Nãskaxõ onefetsa reteni noikaspakĩ, ẽ mato yoinõ nikakapo. A Niospa yoia keskafakĩ onefẽtsa Nios shinãni. Akka Caín askanima. Ãfe onefetsaki õitifishkikĩ reteni. A onefẽtsa Nios Ifofaito õikĩ noikaspakĩ reteni, Niosri noikaspayanã.  
\v 13 Akka mãri Jesús Ifofaito, matori noikaspatirofo. “Ẽ Jesús Ifofaito ea tsõa noikaspaima kiki,” ixõ shinãyamakãfe. A mã Jesús Ifofaito a Jesús Ifofaafãfema mato noikaspatirofo.  
\v 14 Nõ yorafo noikõixõ nõ tãpitiro nõmãi Niospa fakefoxõ. Nãskakẽ a omiskõipakenakafo mẽra katama, afe nõ ipanaka. Akka a yora fetsafo noikaspai, afokai Niospa fakema. Nios fe rafeamax afe ipanakama.  
\v 15 Akka a yorafo noikaspaifo afofi retemitsamis keskarafoki. Afo chakakõifo. Askarafo mã mã tãpia Niospa fakefoma. Askarafo Nios fe rafeafoma. Nios fe nĩpanakafoma, yorafo noikaspakanax.  
\v 16 Akka Jesús noko noikõikĩ, noko nãxoni. Ãakõi nokoõnoax nani. Nãskarifiakĩ nõ fetsafo noikõiax nõ atoõnoax natiro.  
\v 17 Akka afama mĩshti ichapayafixõ, fetsafãfe afara yopaito nõ ato afaa inãmã, askara sharama. Epa Niospa noko noiai keskafakĩ, nõ ato noima.  
\v 18 Efe yorafãfe, ea nikakõikãfe, ẽ mato yoinõ. Fetsafo iskakani, ãa chanĩkani: “Ẽfi yorafo noikai,” ifiaxõ ato chakafakani, atokai noikanima. Akka nõfi askaramakĩ. Nõ yorafo noisharakõixõ nõ ato shara fatiro. 
\s1 Nõ Nios nikasharax nõ akiki ranotiroma 
\p  
\v 19 Akka nõ ato noisharakĩ nõ tãpitiro nõ fanĩrira chaka shinãkĩma, Jesús nõko Ifokõimãiyakẽ. Anori shinãi nõ akiki meseima.  
\v 20 Nãskafixõ nõko õiti mẽraxõ nõ shinãkĩ iskafatiro: “Ẽ afara chakafaa,” ixõ nõ shinãito Niospa noko õi. Noko õikĩ tãpia a nõ shinãi keskara. Nãskakẽ nõko chaka nõ soapaiyaito nõko chaka noko soaxotiro. Nios nõko õiti keskarama. Aato keyokõi tãpia.  
\v 21 Efe yora mĩshtichi, ea nikasharakãfe. Nõko õitinĩ nõ shinãi iskatiro: “Ẽ Nios Ifofaito ẽfe chaka mã ea soaxona, mã ea shinãsharamana,” ixõ shinãi, nõ Nios fe rafetiro, nõ akiki nõ ranotiroma.  
\v 22 Nõ askaino Epa Nios nokoki inimatiro. Nãskakẽ nã nõ yõkai keskara noko inãtiro, a noko yoiai keskaramãi nõ nikasharaito, askatarimãi nõ inimamasharaito.  
\v 23 Iskafakĩ noko yoini: “Ẽfe Fake Jesucristo nikasharakõikãfe,” ixõ noko yoini. Nãskatari a noko yoini keskai nõa ranã nõ noinãsharai.  
\v 24 Akka a Niospa noko yoini keskafakĩ nõ nikasharakõiax Nios fe nõ rafekõitiro. Askatari Niosri nofe rafekõitiro. Epa Niospa ãfe Yõshi Shara nokoki nĩchini. Aõxõ nõ tãpitiro Epa Nios nofe ikaito. 
\c 4  
\s1 Niafaka chakata Niospa Yõshi Shara noikaspai. Askatari Cristo noikaspai 
\p  
\v 1 Efe yora mĩshtichi, fetsafãfe mato anorima yoiaifãfe ato nikayamakãfe. Iskafakĩ mato yoipaikani: “Nõ mato Niospa meka yoi Niospa noko shinãmanaino,” ifiakaxõ anorima mato yoimisfo. Askaifono Niospa meka õikĩ mã tãpitiro a yoiaifo keskara chanĩmamãkĩ. Niospa Yõshi Sharaõxõ mato yoikanimakĩ. Akka afokai Niospa ato afaa yoiama.  
\v 2 Nãskakẽ ẽ mato yoisharai, ea nikakãfe. Fetsafãfe a Niospa meka mato tãpimasharaito mã tãpitiro. Niospa Yõshi Shara a mẽra naneano yoiaito mã tãpitiro. Iskara mato yoiaito: “Jesucristo fotoni Apa ariax nai mẽranoax. Nãfi yora keskara kãiniki. Aafi yorakõiki,” mato faito mã tãpitiro Niospa shinãmanaino mato askafakĩ yoiaito.  
\v 3 Akka yora fetsafãfe anori yoiyamaifãfe nõ tãpitiro afãfe Jesucristo noikaspamisfo, Niospa Yõshi Shara ãto mẽra naneama. Satanás ato shinãmamis. Akka a Cristo noikaspaifo noko ano fexikani mã mã nikamis. Akka iskaratĩa mã noko ano feafo, afãfe Cristo noikaspamisfo. 
\p  
\v 4 Akka mãroko askaramakĩ efe yorafãfe, Niosfi mãto Ifokõikĩ, mãfi Niospa yorakõifokĩ. Ãfe Yõshi Shara mã mãto õiti mẽra nanea. Akka a anorima shinãifo askarafoma, Satanás yõshi ãto õiti mẽra nanea. Akka Niospa Yõshi Shara mato mẽra naneano mã Satanás finõkõia.  
\v 5 Akka fetsafãfe Nios tãpiafomano, nãskakẽ anorima ato yoimisfo, Satanás ato shinãmanaino. Nãskakẽ Satanás ifofaafãfe ato nikamis Satanásmãi ãto ifokẽ.  
\v 6 Akka nõfi Niospa yorafokĩ. Nãskakẽ a Nios tãpiafãfe noko nikakõitirofo nõ yoiai anori. Akka a Nios Ifofaafãfema a nõ yoiai anori nikatirofoma. Akka nõ tãpitiro ato mẽra Niospa Yõshi Shara naneano noko nikasharaifono. Ato mẽra nanexõ fanĩrira ato shinãmanima. Akka a noko nikaifoma ato mẽra Satanás nanea. Satanás ato mẽra nanexõ fanĩrira ato shinãmani. Satanás chanĩ finakõia. Nãskax õiti chakaya. 
\s1 Niospa noko noikõi 
\p  
\v 7 Efe yora mĩshtichi, nõ noinãkõinõ, Niospa noko ato noimanõ. Nios fistichi noko shinãmatiro nõ ato noinõ, a fistichimãi noko noikĩ finakõixõ. Nãskakẽ nõ ato noikõikĩ nõ Nios tãpia nõ afe yora, nõko õiti mã noko fetsafaano.  
\v 8 Niospa yorafo noikõia. Nãskaxõ ato noikĩ noko tãpimatiro. Akka a yorafo noiaifãfema, Nios tãpiafoma.  
\v 9 Niospa ãfe Fake fisti nãmã nĩchini, nãmãnoax noko nãxoyonõ. Nãskakẽ nõ afe nĩpaxatiro, nãatomãi nõko chaka noko soaxomiskẽ. Nãskakẽ Niospa noko õimani afeskaxõ noko noimãkai.  
\v 10 Nãskakẽ nõ Nios noi. Akka nõ Nios keskarama, nõ ato noikĩ finamisma. Nios fistichi noko noikõimis. Noko noikõikĩ ãfe Fake Jesús nãmã nĩchini noko nãxoyonõ nõko chaka noko soaxoxiki. 
\p  
\v 11 Akka efe yora mĩshtichi, Epa Niospa noko noikõi. Nãskakẽ nõa ranã nõri nõ noinãsharakõikãfe.  
\v 12 Akka tsoa pishta Nios õimisma. Nãskafiax nõ noinãino, Nios nõmẽra ika. Nofe ixõ yorafo noko noimasharatiro.  
\v 13 Niospa ãfe Yõshi Shara nõmẽra ikimakẽ nõ tãpitiro nõ Nios fe rafea, Nios nofe ikano.  
\v 14 Epa Niospa nai arixõ ãfe Fake noko nãmã nĩchixoni. Ãfe Fake nãmãnoa nõ õipaoni. Õipaonixakĩ nõ ato yoimis iskafakĩ: “Epa Niospa ãfe Fake noko nãmã nĩchixoni, keyokõi nokoõnoax nanõ nõko chaka noko soaxoxiki noko ifiano nõ afe ipaxanõ.”  
\v 15 Fetsa iskai: “Jesúsfi Niospa Fakeki,” ixõ shinãi. Aafi Nios fe rafeakĩ Nios afe ikano. 
\p  
\v 16 Niospa noko noikõia mã nõ tãpia, nõ chanĩmara faiyanã, Niospamãi noko noimiskẽ. Nõ Nios chanĩmara faito nofe rafexõ noko yorafo noimatiro. Akka nõ ato noikõiaino Nios nofe ika, afe nõ rafekõia.  
\v 17 Nõ Nios noi. Nõ Nios noikĩ finakõiax nõ inimatiro Jesús anã nãmã fotoano. Anã fotoxõ noko iskafatiro: “Nã ea Ifofaafo tii ẽfe Epa Nios ari fokani. Akka nã ea Ifofaafoma tii ẽfe Epa ari fokanima, nã omiskõipakenakafo mẽra fokani,” ato fatiro. Ato askafaino nõkai Nioski meseima. Nõ ranoima nõ afe rafekõi. Afe rafei nõ Jesús keskara iki, ãfe õiti keskara nõ iki. Nãskakẽ Jesús oaitĩa nõ akiki meseima.  
\v 18 Nõ Nios noikõiax nõ akiki mesetiroma. Nõko shinã mẽraxõ nõ Nios noikĩ finakõixõ nõ rate potatiro. Akka fẽtsa mesekĩ iskafai: “Niospa ea omiskõimani,” ixõ shinãi aatokai noikĩ finakõiama. Ato noikõiamax Nioski mesetiro. 
\p  
\v 19 Nõ Nios noiyamatai noko noikĩ taefani. Akka noko taefakĩ noinikẽ iskaratĩari nõri nõ aõ noi.  
\v 20 Akka fetsafo iskakani: “Ẽ Nios noi,” ifiaxõ a Nios Ifofaafo noima, anorima yoimisfo. Mã afe yorafo õifikĩ atokairoko noikatsaxakakĩ, Niosri noisharakanima askara õiroko fakatsaxakakĩ.  
\v 21 Niospa noko yoimis: “Ea noixõ nã ea Ifofaafori noikãfe,” noko famis. 
\c 5  
\s1 Nõ Nios Ifofakẽ tsõa noko afaa chakafamatiroma 
\p  
\v 1 Jesucristo Niospa Fakekõi. Nokoki nĩchini noko nimapakexanõ, nõko Ifo inõ. Akka nõ a chanĩmara fai nõ Niospa fakefo itiro. Nãskaxõ ãfe Apa Nios nõ noixõ, ãfe Fakeri nõ noikõitiro.  
\v 2 Nõ Nios noikõikĩ noko yoiai keskara nõ nikai. Nãskaxõ mã nõ tãpia nõ Niospa fakefori noikõi.  
\v 3 Nõ Nios noikõixõ ãfe meka nõ nikakõikĩ a noko yoiai keskara nõ nikai nõ fekaxteima.  
\v 4 Nãskakẽ nõ Epa Niospa fakexõ afara chakafãfe noko amapaiyai keskarakai nõ atiroma. Niospa Fake Jesucristo chanĩmara faxõ afarafãfe noko afara chakafamapaiyai keskara nõ finõtiro.  
\v 5 Afara chakafo noko amapaiyaifo keskara Niospa noko amatiroma nõ anõma. Nãskaxõ Jesucristo Niospa Fake nõ chanĩmara faxõ aõxõ na chakafo nõ finõtiro anã afaa chakafaxikima. Nã chanĩmara faafãfe finõtirofo. 
\s1 Niospa ãfe Fakekõi noko õimani 
\p  
\v 6 Mã nõ tãpia Niospa ãfe Fake feronãfakekõi ini. Nã Jesús mã maotisata faka mẽra ikipakekafãta kainãkafanaino, Epa Niospa yoini iskafakĩ: “Nafi ẽfe Fakeki,” ixõ yoini. Jesús naino ãfe imi foaino Apa Niospa noko tãpimani ãfe Fakemãiakẽ. Ãfe Yõshi Shara chanĩmisma nõmẽra nanexõ noko yoimis Jesús Niospa Fakekõi.  
\v 7 Nã trespato yoimisfo Jesús Niospa Fakekõi.  
\v 8 Jesús faka mẽra maotisani shinãta, askatari naino ãfe imi foni shinãta, askatari Niospa Yõshi Sharapa noko yoiaino, nãnorifos nã trespa shinãmisfo.  
\v 9 Akka yorafãfe noko afara yoiaito ato chanĩmara fata a Niospa noko yoiairi nõ chanĩmara fakĩ finakõitiro. Akai yora keskarama, afi Nioskõikĩ. Akka ãfe Fakeõnoa noko yoiaito nõ chanĩmara fakõitiro.  
\v 10 Akka Niospa Fake chanĩmara faxõ Apa Niospa aõnoa yoini keskara ãfe õiti mẽraxõ chanĩmara fatirofo. Nãskafekẽ ãfe Fakeõnoa yoimis keskara tsõa chanĩmara fayamaxõ, “Nios chanĩra,” fakaxõ yorafo fanĩrira shinãmapaikani.  
\v 11 Nãskakẽ Nios iskamis: “Ẽ mato nimasharapaketiro ẽfe Fake Jesúsxõ,” ixõ noko iskafamis. Nãskakẽ nõ Jesús Ifofaax nõ afe nĩpaxatiro.  
\v 12 A Niospa Fake Ifofaifo afe nĩpaxatirofo. Akka a Ifofaima afe nĩpaxatirofoma. 
\s1 Mã mekai xatekĩ ato yoisharani 
\p  
\v 13 Mã Niospa Fake chanĩmara faaki. Nãskakẽ ẽ mato kirika kenexoni, mã tãpinõ mã afe nĩpanaka. 
\p  
\v 14 Nõ afara sharafo nõ fichipaikĩ, a Niospa noko shinãmanaino, nõ Nios yoitiro kĩfikĩ, a Niospa fichipaiyai keskafakĩ. Nõ askakĩ nõ tãpitiro Niospamãi noko nikasharamiskẽ.  
\v 15 Nãskakẽ nõ tãpitiro a nõ Nios yoiaito noko nikaito noko nikaxõ noko afara inãtiro nõ yõkaito. 
\p  
\v 16 Akka a Nios Ifofaa fẽtsa afara chakafaito õikĩ, a Nios Ifofaa fẽtsa Nios kĩfixotiro ãfe chaka xatenõ. Akka Epa Niospa ato nimatiro isharapakexanõfo. Askafikanax fetsafãfe oa Nios Ifofaafo keskara iyokanax mã potakaxõ chaka shinãfafãikakĩ Nios kachikiri fakõinafo. Askarafokai tsõa ato nimatiroma nĩpaxanõfo. Naax omiskõipakenakafo mẽra fokani. Atoõnoa Epa Nios kĩfixokãfe ixõ ẽ mato yoiama.  
\v 17 A Niospa noko yoiai keskara nõ nikayamaxõ nõ chaka shinãi. Askafixõ anã nõ chaka xatepaiyaito õikĩ nõko õiti noko fetsafaxotiro, nõ anã chaka shinãpaiyamanõ. 
\p  
\v 18 Mã nõ Nios Ifofaano, noko fakefai. Nõ ãfe fake ixõ nõ tãpia nõ anã chaka shinãpaima, mãmãi noko Niospa õiti fetsafaano. Mã nõ askano Satanás afara anã noko chakafamapaiyaito, Niospa Fakekõichi Jesús noko ifixõ noko kexesharatiro. Noko askafakẽ Satanás noko afeska fatiroma.  
\v 19 Mã nõ tãpia nõ Niospa fake. Akka fetsafãfe Nios nikakaspaifono, afo Satanás ato shinãmani ãto ifo inõfo.  
\v 20 Niospa Fake nokoki oni. Noko tãpimaniyoi ãfe Apa nõ tãpisharakõinõ. Ãfe Apafi mẽstekõi ikaki. Akka nõ Jesús fe rafeax ãfe Apa feri nõ rafetiro. Nã Jesucristo Niospa Fake. Nãri Nioskõi. Nãskakẽ noko nimapakexatiro.  
\v 21 Efe yora mĩshtichi, Nios fisti Ifofakãfe. Satanás mato afara chakafamapaiyaito afe rafeyamakãfe. Askatari afara chakafo mã ifofapaikĩ afo shinãyamakãfe. Nios fisti shinãkãfe. 
\p Nã tii ẽ mato kirika kenexõ fomai, efe yora mĩshtichi. 
\cls \sig Ẽkĩa Juan \sig*