\id 1CO - Yaminahua NT -Peru 2008 (DBL -2013) 
\h 1 CORINTIOS 
\toc1 Pablo Corinto Anoafo Kirika Kenexõ Fomani 
\toc2 1 Corintios 
\toc3 1 Co. 
\mt1 Pablo Corinto Anoafo Kirika Kenexõ Fomani 
\c 1  
\s1 Pablo Jesús chanĩmara faafo Corinto anoafo kirika kenexõ ato fomani 
\p  
\v 1 Ẽkĩa Pablo, ẽ mato kirika kenexõ fomai. Nofe yora feta nã Jesús Ifofamis feta, ãfe ane Sóstenes, efeta mato kirika kenexoni. Epa Niospa ea katopaikĩ ea katoni ãfe meka shara Jesucristoõnoa ẽ yoifofãsafanõ.  
\v 2 Akka Jesucristo ea nĩchini ẽ ãfe meka shara keyokõi maifo tii ẽ ato yoifofãsafanõ. Corinto anoafãfe mãfi Niospa fakefoki. Nãskakẽ ẽ mato kirika kenexõ fomai. Mã mẽxotaima ichanãmis Niospa meka shara tãpisharakõixikĩ. Niospa mato katoni Jesucristoõnoax mã afe yora shara inõ. Mato fisti katonima, a shinãifori keyokõi ato katoni mato fe Niospa yora inõfo. Nã mai fetsa anoafãfe nõko Ifo ãto Ifori.  
\v 3 Mato noikĩ mãto shinã mẽraxõ mato shinãmasharanõ. Epa Nios feta nõko Ifo Jesucristo mato askafanõ. 
\s1 Jesucristo afara sharafo noko axotiro 
\p  
\v 4 Mẽ tãpia Jesucristo mato noikĩ afarafo mato tãpimani ãfe õiti keskara mã inõ. Nãskara tãpixõ ẽ Epa Nios kĩfikĩ iskafa fafafãini: “Aicho Epa Niosi, mĩ Corinto anoafo afara sharafo Jesucristoõxõ mĩ ato tãpimanaki,” ixõ ẽ kĩfifafãini.  
\v 5 Chanĩma, Jesucristo mato fe rafesharaino aõxõ mã Niosnoa tãpisharakõitiro. Akka ãfe shinãõxõ xafakĩa mã yorafo mã yoisharatiro. Jesucristoõnoa mã ato yoisharatiro.  
\v 6 Nõ mato Jesúsnoa yoini keskara nikakĩ mãto õiti fetsafaxõ a keskara shara mã ixii. Nãskakẽ mã Jesús chanĩmara faxõ mã mã ato õimana.  
\v 7 Nãskakẽ Epa Niospa ãfe Yõshi Sharaõxõ mato imapaiyai keskara mã iki. Nios chanĩmara faa fetsafo nãskarifiakani Niospa mato shinãmasharaino. Nãskakẽ mã nõko Ifo Jesucristo fe ipaikõikĩ mã manasharai nã nokoaitĩa õixikĩ.  
\v 8 Oyoxoma mato kexesharayoi. Ãfe kerex shara mato inãyoi mã Ifofasharano. Nãskakẽ nokoõxõ yoixii iskafakĩ: “Mãfi efe ipanakaki, ẽ mato chaka soaxonano. Nãskakẽ tsõa mato iskafatiroma: ‘Mã chakakõifoki,’ mato tsõa fatirofoma,” ixõ mato Jesús yoixii.  
\v 9 Epa Niospa mato katoni ãfe Fake nõko Ifo Jesucristo fe mã rafenõ. Epa Nios chanĩma, noko yoiai keskara aki. 
\s1 Corinto anoxõ Jesús chanĩmara faafãfe anoris shinãnifoma 
\p  
\v 10 Efe yora mĩshtichi, ẽ mato yoisharapai. Nõko Ifo Jesucristo ea yoiaino ẽ mato yoi nãnorifos mã shinãnõ, mã fetsa shinãnõma. Jesucristo mato shinãmapaiyai keskara fisti shinãkãfe.  
\v 11 Efe yora mĩshtichi, mẽ nika a Jesucristo mato shinãmapaiyai keskara fisti mã shinãima. Cloépa afe yorafo nono fẽkaxõ ea yoiafo mã feratenã faatanãito.  
\v 12 Akka mã atiri iskai fetsei: “Nõfi Pablo ifofamiski. Noko tãpimanai keskara kayakaikõi nõ nikamis. Fetsafãfekai kayakai shinãkanima,” ixõ mã yoimis. Askatari fetsafori iskakani: “Nõfi Apolos ifofamiski,” ixõ mã yoimis. Askatari fetsafori mã iskamis: “Nõfi Pedro ifofamiski,” ixõ mã yoimis. Askatari fetsafori mã iskamis: “Nõfi Cristo Ifofai,” ixõ mã yoiketsamis. 
\p  
\v 13 Efe yora mĩshtichi, ¿afeskai mã feratenãimẽ? Askarakai sharama. Cristokai anori noko shinãmanima feratenãyanã anorima nõ shinãketsanõ. Cristokai ãfe shinã ranãyama. Mẽstekõi fisti noko yoimis. Akka, ¿afeskakĩ “Nõ Pablo ifofaira” mã ato faimẽ? Ẽkai mato ifi cruz ikakĩnoax nãxonima. Cristo fistichi mato ifi cruz ikakĩnoax nãxoni mã Ifofanõ. Askatari ẽkai tsoa faka mẽra ikimakĩ maotisafama ea ifofanõfo.  
\v 14 Nãskakẽ ẽ inimai. Ẽkai tsoa maotisafama. Akka Crispo yafi Gayo nã rafes ẽ maotisafa Cristo Ifofaifãfe õikĩ.  
\v 15 Nãskakẽ tsõa yoitiroma iskafakĩ: “Pablo ãfe aneõnoax ẽ maotisameni. Nãskakẽ ẽ Pablo ifofai,” ixõ tsõa shinãtiroma.  
\v 16 Chõõ, iskaratĩari ẽ rama shinãi. Estéfanas yafi afe yorafori ẽ ato maotisafani. Ẽ shinãyoama ẽ tsoa fetsa maotisafamara ẽ ika.  
\v 17 Cristokai ea yoiama ẽ yorafo maotisafapanõ. Akka ea yoia ẽ aõnoa meka shara ẽ mato yoinõ. Ẽa shinãxõ ẽ mato yoima. Ẽa shinãxokai ẽ mato Jesucristo chanĩmara famatiroma. Jesucristo mato ifi cruz ikakĩnoax nãxoni mato chaka soaxoxikĩ. Cristo mekaõxõ Niospa mato chanĩmara famatiro. 
\s1 Epa Niospa keyokõi tãpikõia afara fetsa apaikĩ atiro. Cristoõxõ noko õimayopaoni 
\p  
\v 18 Nãskakẽ Jesús ato nãxoni nikakanax a chanĩmara faafãfema yoikĩ iskafakani: “Jesús ifi cruz ikakinoax noko nãxoni nõko chaka noko soaxoxikĩ, ixõ noko yoipaiyaifãfe nõkai chanĩmara fatiroma. Ãa chanĩkani,” ixõ shinãmisfo. Nãskakanax nãfo fenokõikani. Omiskõipakenakafo mẽra fokani. Akka nõ Jesús chanĩmara faito noko nimapakenaka nõ afe ĩpaxanõ. Niospa ãfe shinãõxõ Jesús noko nãxoni nõko chaka noko soaxoxiki. Afara fẽtsakai noko nimatiroma nõ afe nĩpaxanõ.  
\v 19 Akka Niospa meka kirikaki kenekĩ iskafanifo: 
\pi1 Fẽtsa yoikĩ iskafatiro: “Nõ tãpikõia. Nõko mãpo shinãsharafãi nõ afara fetsafo fatiro nõfi tãpisharakõiakĩ,” ixõ shinãfikakĩ afaa tãpiafoma. Askarafofi ẽ ato õimanikai afãfe shinãifo keskarakai ẽ ato shinãmanima. Nãfãfekai afaa tãpimisfoma. Ãa shinãmisfo, 
\m ixõ Niospa yoini. 
\p  
\v 20 Akka, ¿fanĩmẽ a nõ kirika kenekĩ tãpiakõiara imisfo? Akka tãpifikaxõ a Niospa shinãi keskara shinãkanima. Nãfofi Niospa ato õimaxii afaa tãpiafoma keskara fakĩ. “Nõfi afama mĩshti tãpikõiaki,” ifiaifãfe Niospa afaa tãpiama keskarafo ato imai.  
\v 21 Tsõa pishtakai ãto shinãmã Nios tãpitirofoma. Nios fistichi keyokõi tãpisharakõia. Nãskakẽ nõ ato yoimis iskafakĩ: “Niospa tãpikõixõ ãfe Fake Jesucristo nĩchini noko nãxonõ nõko chaka noko soaxoxikĩ,” ixõ nõ ato yoimis. A Nios chanĩmara faafãfema yoikĩ iskafamisfo: “Jesús chanĩmara faifãfe aõnoa anorima yoimisfo,” ato famisfo. Akka nã Jesús chanĩmara faifo Niospa ato chaka soaxoni afe nipaxanõfo. Nã nõ mato yoimis. 
\p  
\v 22 Akka ẽfe kaifo judeofo iskamisfo: “Niospa nai mẽraxõ afama mĩshti noko õimanaito chipo nõ Jesús chanĩmara fatiro,” ixõ shinãmisfo. Akka nã judeofomafãferi afama mĩshti tãpipaikani. Afeskaxõ Niospa yorafo imasharaimãkai tãpipaikani. Askatari afeskaxõ Jesús yorafo ãto chaka soaxonamãkĩ nãri tãpipaikani. Afama mĩshti ãa shinãkakĩ tãpipaikani. Akka tãpitirofoma. Nãskakẽ iskamisfo: “Noko Jesucristoõnoa yoiaifono nõ tãpitiroma, fekaxkõi. Nãskakẽ nõ Jesús chanĩmara faima. Nã afara nõa nõ shinãi nã nõ chanĩmara fai,” ixõ yoimisfo.  
\v 23 Nãnori shinãfiaifono nõ yoikĩ iskafamis: “Jesucristo ifi cruz ikakinoax noko nãxoni noko chaka soaxoxikĩ,” ixõ nõ yoimis. Akka ẽfe kaifãfe judeofãfe yoikĩ iskafamisfo: “Ifi cruz ikakĩ mastafo askarakai nõko Ifo itiroma. Akka Cristokai afeskax natiroma,” ixõ judeofãfe shinãmisfo. Nãskatari yora fetsafo Cristoõnoa nikakani akiki kaxepaikani iskamisfo: “Tsõakai askara chanĩmara faima. Akka tsoa fẽtsakai noko nãxotiroma,” ixõ yoimisfo.  
\v 24 Askafiaifono nã chanĩmara faifo tii Niospa ato katoni afe ipaxanõfo. Judeofo yafi judeofomari Cristoõxõ Epa Niospa ato katoni chanĩmara faifãfe. Nãskakẽ ãfe shinã sharaõxõ ato nima. Atofi keyokõi tãpikõiaki Cristoõxõ noko nima nõ afe nipaxanõ.  
\v 25 Jesús chanĩmara faafãfema yoikĩ iskafamisfo: “Jesucristo noko nãxoni,” ixõ yoifikakĩ anorima shinãmisfo, ãa chanĩkakĩ. “Akka yora mapo sharayato Cristo chanĩmara fatiro,” ixõ yoimisfo a Jesús chanĩmara faafãfema. Akka anorima yoifiafono Niospa ãfe Fake Jesús noko nĩchixoni noko nãxoyonõ. Nãskax Niospa ãfe shinã a chanĩmara faafãfema ãto shinã keskarama. Aatofi mẽstekõi shinãmis. Akka nã chanĩmara faafãfema yoimisfo iskafakakĩ: “Nõ tãpikõia,” ixõ yoifikakĩ yoisharamisfoma. Anorima shinãmisfo. “Nõ afama mĩshti fatiro,” ifiakakĩ fetsafo nimasharatirofoma. Askafikata aforikai ãa chaka soametirofoma. Akka Epa Nios fistichi afama mĩshti fatiroxakĩ noko chaka soaxotiro. 
\p  
\v 26 Efe yora mĩshtichi, Niospa rama mato katoano afe keskara mã iyopaonimãki. Shinãkapo. Mã fisti rasichi mã kirika kene tãpia mã ipaoni. Askatari mã xanĩfo ipaonima. Nãskax mã finakõia mã ipaonima. Akka nã Jesús chanĩmara faafãfema yoikĩ iskafamisfo: “Afãfekai afaa tãpiafoma,” ixõ mato yoimisfo.  
\v 27 Mato askafafiaifono Epa Niospa mato katoni afe yora mã inõ. Matoõnoa yoimisfo iskafakakĩ a Jesús Ifofaifãfema: “Afãfekai afaa tãpiafoma. Shinãsharakanima,” ixõ yoimisfo. Askatari shinãmisfo iskakakĩ: “Nõfi afama mĩshti fatiroki. Akka a Jesús chanĩmara faifo pachikõifo, kerexkai shinãtirofoma. Nõ atiro keskara atirofoma,” ixõ shinãmisfo. Mato askafafiakakĩ chipo mato tãpitirofo. Niospa mato afara shara tãpimanaino õikani rãfipaitirofo.  
\v 28 Nãskakẽ shinãkani iskakakĩ: “Jesús chanĩmara faifo afãfekai afaa tãpiafoma. Nãskakẽ nõ ato õipaima,” ixõ matoõnoa mato yoifiaifono Niospa mato katoni afe yora mã inõ. “Mãkai afaama,” mato fafiaifono Niospa mato katoni mã ato õimanõ akka afãfekairoko afaa tãpiafoma.  
\v 29 Akka tsõa pishtakai Niospa ferotaifi yoitiroma iskafakĩ: “Ẽ tsoa keskarama. Ẽ shara shinãi fetsafo keskarama,” ixõ yoitiroma.  
\v 30 Niosnoax Jesucristo afe yorafo mã inõ. Jesucristoõxõ noko mẽstekõi tãpimani ãfe õiti keskara noko imaxii. Noko nãxoni noko chaka soaxoxiki nõ afe nĩpaxanõ.  
\v 31 Nãskakẽ nõ Jesús chanĩmara faaxkai nõ kakapaimis itiroma. Niospa meka yoikĩ yõra kirika keneni iskafakĩ: “Akka tsoakai ãa yoimesharatiroma iskai: ‘Ẽ afama mĩshti tãpikõia,’ ikax ãa kakapaitiroma. Askatamaroko nõ yoisharatiro nã afara sharafo nõko Ifãfe aka,” ixõ kirika ano yõra keneni. 
\c 2  
\s1 Jesucristo ifi cruz ikakĩ mastanifo Pablo ato yoini Corinto anoafo 
\p  
\v 1 Efe yora mĩshtichi, ẽ matoki nokofenaxõ yõra shinãõxõ ẽ mato Niospa meka yoiyameama. Niospa ãfe shinã fistiõxõ ẽ mato yoiyamea. Ẽa shinãxõ ẽ mato yoiyameama. Niospa ea shinãmanaino ẽ mato yoiyamea.  
\v 2 Ẽ matoki oyoxoma ẽ shinãkĩ iskafani: “Jesucristo ifi cruz ikakinoax noko nãxoni, nã fisti ẽ ato yoixikai. Afaa fetsa ẽ ato yoitiromaki,” ixõ ẽ shinãyamea.  
\v 3 Askata mẽ nokoax ẽ matoki ratekõiyamea. Nãskakĩ rateyanã ẽ shinãyamea iskafakĩ: “Ẽ mitsisipama ea õikakĩ ea nikakaspatirofo,” ixõ ẽ shinãyamea.  
\v 4 Nãskakẽ ẽ mato Jesucristoõnoa yoimis ẽfe shinãmã shinãxõ ẽ mato yoitamaroko Niospa Yõshi Sharapa ea shinãmanaino ẽ mato yoiyamea. Ẽ mato yoiaino aõxõ mã Jesús chanĩmara fayamea.  
\v 5 Akka yõra shinãõxõ mã Jesús chanĩmara fayameama. Niospa shinãõxõ mã chanĩmara fayamea. 
\s1 Niospa Yõshi Sharapa noko shinãmasharatiro 
\p  
\v 6 Nãskakẽ a Niospa meka nikasharaifãfe mã tãpiafo nõ Niospa Yõshi Sharaõxõ xafakĩakõi nõ ato yoiaito. Nãskaifono fetsafãferi kirika kene tãpisharakõifikaxõ Niospa shinãi keskara tsõa anori shinãima. Ãto shinãõxõkai Niospa meka nõ mato yoima. Ãto xanĩfofofãfe shinãifo keskararikai nõ mato yoima. Akka ãto xanĩfofo mã chaimashta tsekekani. Anã afo xanĩfo ikanima. Nã xanĩfofofãfe shinãifo keskara mã keyoi. A shara shinãifo keskara shinãkanaxma.  
\v 7 A nõ mato iskaratĩa Niosxõ yoia tsõa tãpiyopaonima. Niospa mai onifayoxoma shinãkĩ iskafani: “Ẽfe Fãke ato chipo nãxoxii nã chanĩmara faafo tii ato nimapakexixakĩ,” ixõ shinãni.  
\v 8 Ẽ na meka mato yoiai keskarakai xanĩfofofãfe tãpiyopaonifoma. Nãskaxõ Jesús retenifo. Akka tãpikaxokai tsõa nõko Ifo Cristo ifi cruz ikaki mastakeranifoma. Nã nõko Ifo Cristo sharafinakõia.  
\v 9 Akka yõra kirika kenekĩ iskafani: 
\pi1 Afama mĩshti shara Niospa ato axoxii. Tsõa õiyomisma sharafo ato axoxii. A tsõa nikayomisma ato axõfãi a tsoa pishta ãto shinã mẽraxõ shinãyomisfoma nãfo ato axosharaxii. A ato noiaifo ato itipinĩshara faxoxii, 
\m nãskara yoikĩ Niospa meka yõra kirikaki keneni.  
\v 10 Nã kirika kenekĩ yoinifo keskarakõi Epa Niospa ãfe Yõshi Sharapa noko õimani. Ãfe Yõshi Sharapa keyokõi tãpikõia. Epa Niospa shinãi keskarari ãfe Yõshi Sharapari tãpikõia. 
\p  
\v 11 Yõra ãfe shinã mẽraxõ ãa shinãitokai tsõa tãpitiroma. Akka ares fisti tãpitiro. Nãskarifiai Epa Niospa shinãi keskara ãfe Yõshi Shara fistichi tãpikõia.  
\v 12 Epa Niospa ãfe Yõshi Shara nokoki nĩchini noko tãpimapaiyai keskara noko tãpimanõ. Akka nã chanĩmara faafãfema Niospa meka nikakanima. Nãfãfe shinãi keskarakai Niospa noko shinãmanima. 
\p  
\v 13 Nãskakẽ yorafãfe noko tãpimanifo keskara nõ mato yoitamaroko Niospa Yõshi Sharapa nõko shinã mẽraxõ noko shinãmana keskara nõ mato yoimis. Ãfe meka chanĩmakõi fisti. Nãskakẽ nõri aõxõ nõ mato chanĩmakõi Niospa mekakõi tãpimani. Nã meka shara mã nikamis mãmãi Niospa Yõshi Shara mato fe rafeano. 
\p  
\v 14 Akka fetsafo Niospa Yõshi Shara fe rafeyamano nãfãfe Niospa Yõshi Sharapa yoiai keskara nikakaspakani. Nãskaxõ iskafatirofo: “Tsõakai nã meka chanĩmara faima. Akka nã shara shinãifãfe chanĩmara fakanima,” ixõ shinãkani. Akka Niospa Yõshi Sharapa shinãi keskara tsõa tãpiama. Nãskakẽ Niospa Yõshi Shara ato fe rafeyamano a yoiai keskara tãpiafoma. Akka Niospa Yõshi Shara fistichi ato tãpimatiro chanĩmara faifono.  
\v 15 Akka fatora fetsa Niospa Yõshi Shara afe ikano Niospa tãpimapaiyai keskara tãpitiro. Fatoforimãkĩ chaka shinãifo, askatari fatoforimãkĩ shara shinãifo Niospa Yõshi Sharapa ato tãpimatiro. Nãskakẽ a Niospa Yõshi Shara fe rafeyamato a Jesús chanĩmara faifo ato tãpitirofoma.  
\v 16 Akka Isaías kirika keneni iskafakĩ: 
\pi1 Tsõakai nõko Ifãfe ãfe shinã mẽraxõ shinãi keskara tãpitiroma. Tsõakai nõko Ifo tãpimatiroma, 
\m ixõ kirika keneni. Askafiaifono nã nõ Cristo chanĩmara faifãfe a shinãi keskara nõ tãpitiro nõ afe rafexõ. 
\c 3  
\s1 Corinto anoafo Niospa Yõshi Shara fe rafeafoma 
\p  
\v 1 A fake rama kãiatokai afaa tãpitiroma. Mã yosixõ tãpitiro afara fetsa. Nãskarifiai a rama Jesús Ifofaifãfe Niospa meka tãpisharafoma a fake yome rama kãia keskarafo. Nãskarafo mã Jesús mãto Ifo fiano ranãrito ãfe meka mã tãpisharama. Mã rama Jesús Ifofayamafiai oa rama Jesús Ifofaifo keskarafo, mã. Niospa meka mã mã nikafikatsaxakĩ a yoiai keskara mã nikasharama. Ooa efe yora mĩshtichi, mãfi Niospa meka nikamisma keskarafoki, rama Jesús Ifofaifo keskara. Mãfi nã Niospa Yõshi Shara fe rafeama keskarafo. Nãskakẽ ẽ mato Niospa meka tãpimasharatiroma mãkairoko itipinĩsharakẽ nikasharaxikima.  
\v 2 Fake yome rama kãiato chocho fisti atiro, afaakai pitiroma. Nãskarifiakĩ Niospa meka mã nikapaifikĩ ãfe meka mã nikasharatiroma. Nãskakẽ ãfe meka ichapa ẽ mato yoiyotiroma. Ãfe meka fetsafori ẽ mato yoipaifiaino mã nikasharaima. Nãskax mãkai itipinĩsharapaima Niospa meka nikasharaxikima.  
\v 3 Mãfi nã Niospa Yõshi Shara fe rafeama keskarafokĩ. Nãskaxõ fetsafo mã ato xĩtipai mã ato keskara ipaikĩ. Nãskax mã fochishpanã faatanãi mã ika. Nãskaxõ yõra shinãi keskara mã shinãi. Akka Niospa Yõshi Sharapa mato shinãmapaiyai keskara mã shinãima.  
\v 4 Mã fatora fetsafãfe yoikĩ iskafai: “Nõfi Pablo ifofakĩ. Pablo fistichi noko tãpimasharatiro,” ixõ mã yoimis. Akka fetsafãferi mã yoikĩ iskafai: “Nõfi Apolos ifofakĩ. Apolos noko shara yoitiro,” ixõ mã yoimis. Nãskax mã fochishpanã faatanãpai. Nãskaxõ yõra shinãi keskara mã shinãi. Askarafokai Niospa Yõshi Sharapa mato shinãmanima. 
\p  
\v 5 Akka askayamakãfe. Nõ afaama. Akka Apolos fetakai nõ afaa tãpiama. Nõkai Nios keskarama. Akka nõfi ãfe inaki. Nãskaxõ nõ mato Jesús chanĩmara famani. Nõko Ifo Niospa noko katoni noko yonomapaiyai keskara nõ yonoxonõ.  
\v 6 Ẽ mato iskafakĩ yoipai. Yora fẽtsa taefakĩ xiki fanatiro. Fetsafãfe a nãmã orometirofo foaisharanõ. Nãskafixokai nã rafeta xiki foaimatirofoma. Nios fistichi xiki foaimasharatiro. Nãskarifiakĩ ẽ mato taefakĩ Jesucristo chanĩmara famani. Chipo Apolos Cristoõnoa mato yoini ãfe meka mã nikasharakõinõ. Nõ mato yoiaino Nios fistichi mãto shinã mẽraxõ mato shinãmasharatiro ãfe meka mã tãpisharakõinõ.  
\v 7 Nã ẽ mato yoiaito mã nikai keskara Apolos feta nõ afaa tãpiama. Akka Nios fistichi yorafo shinãmasharatiro ãfe meka tãpisharakõinõfo.  
\v 8 Akka taefakĩ fetsafo Jesús chanĩmara famano, a chipo ato yoiaitori nãnorikõiri ato yoi. Nã rafetamãi nãnorikõi shinãkakĩ Niospamãi ato shinãmanaino. Nãskakẽ ato Jesúsnoa yoixikani a Ifofasharanõfo. Nãskatari Niospa a yonoxonafo ato afara inãxii. Fetsa ichapa inãta fetsafori ichapama inãxii yonoxosharafomano.  
\v 9 Efe yora mĩshtichi, ẽ meka fetsa mato yoipai. Tarepa ifo fistifiano fetsafãferi yonoxotirofo. Askatari pexe ifo fistifiano fetsafãferi yonoxotirofo. Nãskarifiai mãfi Niospa ãfe tare keskarafokĩ. Askatari mã ãfe pexe keskara. Nios fisti mãto Ifo. Akka nõri Apolos feta yonoxomiski. Noko yoiai keskara nõ mato tãpimasharani ãfe meka mã nikasharakõinõ. 
\p  
\v 10 Ẽ mato yoinõ afeska faxõ pexe fatirofomãki. Taefakĩ ãfe kishi kerexkõi fikaxõ nĩchitirofo. Mã kishi nĩchikaxõ aõxõ yonotirofo. Nãskarifiai mãfi pexe keskaraki. Akka nõ mato Niospa meka tãpimani nã pexe faifo keskara. Cristofi pexe kishi keskaraki. Nã ãfe kishiõnoax pexe nitiro. Nãskarifiakĩ Cristo mato nimai. Ea Niospa tãpimashara keskarari taefakĩ ẽ mato yoiaito mã Cristo Ifofani. Askatari fetsafãferi nãnorikõi mato yoikani mã Cristo Ifofasharanõ. Nãskata nã fetsafo ẽ ato yoimis iskafakĩ: “Shinãsharata ato mẽstekõi yoisharakãfe,” ixõ ẽ ato yoimis.  
\v 11 Ẽ mato taefakĩ Cristoõnoa yoini mã Ifofanõ. Akka tsõakai mato yoikĩ iskafatiroma: “Ẽ mato meka fetsa tãpimanõ mã chanĩmara faax Nios fe ĩpaxanõ,” ixõ tsõa mato anori yoitiroma. Jesucristo fistichi noko nimasharatiro nõ Nios fe ĩpaxanõ.  
\v 12 Afara fetsa anã ẽ mato yoinõ, ea nikakapo. Fẽtsa pexe fakĩ kishi kerexkõi nĩchitiro. Akka fẽtsari akiki rofetaxõ kerexkõi kenetirofo. Fẽtsari akiki oro kenetiro. Fẽtsari akiki tokiri sharakõi kenetirofo. Askatari fẽtsari akiki ifi kerexma kenetirofo. Fẽtsari xepa pei akiki kenetirofo. Fẽtsari tafa akiki kenetiro. Nãskakẽ nã pexe kooaino pexe ano ikafo ichotirofo kooyamaxikakĩ. Akka pexe kishi kerexkõi akiki keneafo oro akiki keneta, roe taxo akiki keneta, tokiri sharari akiki keneafono kootirofoma. Akka nã ifi kerexma kootiro. Xepa peifori kootiro. Tafari kootiro.  
\v 13 Nãskarifiai Nios nã pẽxe ifo keskara. Niospa meka yoimisfo nã pexe ifo pexe faxõaifo keskarafo. Fetsafãfe shara faxomis, fetsafãferi shara faxomisma. Nãskaxõ anã oaitĩa Cristo noko õimaxii nã nõ axomis keskara fatofo keyonakamakĩ. Akka fatofori nipanakafomãkĩ. Noko õimaxii afeskaxõ nõ Nios yonoxonamãki. Fẽtsa Jesús Ifofasharaxoma ãa shinãxõ Niospa meka ato yoisharaima, tãpisharaxoma ato yoisharatiroma. A yoiai keskara sharama, ifi kerexma keskara, samama keyotiro. Akka fẽtsa Niospa mekakõi ato yoi. Niospa shinãmanaino ato tãpimani. Nã tokiri kerexkõi keskara keyotiroma.  
\v 14 Nãskatari fatotora Nios yonosharaxonano Niospa afara shara inãsharaxii nã Jesús oaitĩa.  
\v 15 Akka fatotorari Nios yonosharaxonamano Niospa afara shara inãima. Nãskafiax Nios fe ipanaka. Ãa kaxpa yonokatsaxakĩ akka ãfe yono keyoxii. 
\p  
\v 16 Akka, ¿mã tãpiamamẽ mã Niospa pexe keskarakõi? Ãfe Yõshi Shara mato mẽra ika.  
\v 17 A Nios ika anokai afaa chakama. Nãskakẽ ãfe Yõshi Shara mato mẽra ikano õisharakãfe chaka shinãi iyamakãfe. Mã afe nĩpaxanõ Niospa mato katoni afe yora mã inõ. Nã Ifofaafo tii ato shara imai. Akka fatotora ato anorima yoikĩ ato afara chakafamaino Niospa kopikiri omiskõimaxii. 
\s1 Cristo noko tãpimasharatiro 
\p  
\v 18 Efe yora mĩshtichi, iskafakĩ shinãyamakãfe: “Nã Jesús chanĩmara famafãfe kirika raiskakĩ afama mĩshti tãpisharakõiafo. Nõri ato keskaraxõ anori shinãkĩ tãpikõia,” ixõ anori shinãi mã pãrameyamakãfe. Jesús chanĩmara famafãfe shinãkakĩ iskafakani: “Nã Jesús chanĩmara faafãfe shinãsharakanima,” ixõ nokoõnoa yoimisfo. Matoõnoa anori yoifiaifono Niospa mato mẽstekõi shinãmasharapai mã shinãtiro.  
\v 19 Nã Jesús chanĩmara famafãfe shinãkani iskafakakĩ: “Nõfi mẽstekõi shinãsharakĩ,” ifiaifãfe Niospa ato õia mẽstekõi shinãsharakanima. Tatima keskarafo ato õi. Nãnori yõra Niospa meka yoikĩ kirika keneni iskafakĩ: “Nã Jesús chanĩmara famafãfe ãa shinãkani iskakakĩ: ‘Nõfi tãpikĩ finakõiaki,’ ixõ shinãkakĩ Nios pãratirofoma. Ãakõi anori pãramekani. Nãskakanax fenoafo,” ixõ Niospa meka yõra kirikaki keneni.  
\v 20 Anã David kirika keneni iskafakĩ: “ ‘Nõfi tãpisharakõiaki,’ ifiaifãfe nõko Ifo Niospa ato tãpikõixõ yoikĩ iskafatiro: ‘Nafãfekai mẽstekõi shinãsharafoma, tatima keskarafo,’ ” ixõ David kirika keneni. 
\p  
\v 21 Nãskakẽ anã yoi iskayamakãfe: “Na feronãfãke a noko tãpimamisto ãfe meka fisti mẽstekõi, sharakõi,” ixõ anori anã shinãyamakãfe. Niospa ato shinãmayamainokai tsõa mẽstekõi shinãkeranama. Nios fistioxõ nõ mato mẽstekõi yoitiro mã tãpisharakõinõ. Keyokõi Niosnã, nã Niosnãri mãtonã. Nãskakẽ aõxõ mato shara faxõi.  
\v 22 Ẽ ikaino, Apolos ikaino, Pedro ikaino nõ Nios yonoxomis. Ãfe meka nõ mato yoimis mã nikasharanõ. Askatari naax mã afe ĩpaxanõ. Keyokõi Niosnã, askatari nã Niosnãri mãtonã. Iskaratĩa afara sharafo ikai aõxõ Niospa mato shara faxõi. Nã chipo ixiaifori aõxori Niospa mato shara faxoxii. Keyokõi a Niospa onifanifo mãtonãri. Nãskakẽ mãri ãto ifo ixii.  
\v 23 Akka Cristofi mãto Ifokĩ. Cristori ãfe Ifori Nios. 
\c 4  
\s1 Cristo yonoxomisfãfe afeskaxõ yonoxotirofomãki 
\p  
\v 1 Akka mã nokoõnoa shinãkĩ iskafatiro: “Nafãfefi Cristo yonoxomisfokĩ,” ixõ nokoõnoa yoikãfe. Cristoõnoa meka shara tsõa nikayomisma Epa Niospa nõko shinã mẽraxõ noko shinãmanaino nõ atori tãpimani.  
\v 2 Akka ãfe inafãfe ãfe ifo nikakõitirofo. Ãto ifãfe ato yoia keskara axosharatirofo. Akka nõfi Cristo ãfe inafoki. Niospa noko yoini iskafakĩ: “Ẽ mato yoia keskara ato yoikãfe ato fomãkakĩma. Ato yoikãfe xanikakĩma,” ixõ noko yoimis.  
\v 3 Nios fistichi tãpikõiakĩ nã ea yoia keskara ẽ aki. Akka yorafãfe ea mekafakĩ chakafakani. Akka fetsafãferi ea yoisharakani. Nãskanõki ãa ea mekafanõfo. Ẽ ãto yonomatimaki. Akka ẽ Niospa yonomatiki. Akka Nios fistichi tãpia ẽ yonoxosharakõiaito. Yorafãfekai tãpiafoma. Ẽrikai tãpiama.  
\v 4 Ẽfe shinã mẽraxõ ẽ shinãi iskafakĩ: “Ea Niospa yoiai keskara ẽ aki,” ixõ ẽ anori shinãfiaino nõko Ifo fistichi ea tãpikõia a ea yoia keskara ẽ ayamakĩ ẽ akima.  
\v 5 Cristo anã oyoamano iskafakĩ yoiyamakãfe: “Nãfãfekai Nios yonosharaxokanima,” ixõ anori yoiyamakãfe. Akka yora fẽtsa shinãi keskara tsõa tãpiama. Shinãkapo. Nõko Ifo anã oaitĩa keyokõichi noko õiaifono nõko shinã mẽraxõ nõ shinãmis keskara nõko Ifãfe ato õimaxii. Anãkai nõ afaa pishta nõ fomãxiima, Niospamãi keyokõi tãpikõikẽ. Nã nõ afara shara nõ one axomis tsõa õiyamaino, askatari nã nõ afara chakafamis nãfo keyokõi Niospa noko kãimaxoxii. Askatari nõ afara shara faino Niospa noko yoikĩ iskafaxii: “Aicho. Ẽ mato yoia keskara mã amis. Mã sharakõi,” ixõ noko yoixii. 
\p  
\v 6 Efe yora mĩshtichi, nãnori ẽ mato yoi mã isharanõ. Yõra kirika keneni keskara a Niospa yoiai nã fisti ẽ aki. Nã Apolosri Epa Niospa yoia keskara fisti aki. Nõ askafaito mã noko õixõ nõ akai keskara mãri akãfe. Nãskakẽ iskayamakãfe: “Nã noko yoimisto ãfe meka sharafinakõia, fetsafo keskarama. Akka nõ fetsafo nikapaima,” ixõ anori shinãyamakãfe.  
\v 7 Akka Niospa keyokõi noko onifani. Nõ Nios fistiõxõ afara fetsa nõ ato sharafaxonõ. Nãskaxõ, “Nã ẽ akai keskarakai tsõa atiroma,” ixõ shinãyamakãfe. Nãskax kakapaimis iyamakãfe. 
\p  
\v 8 Mã shinãkĩ iskafamis: “Nõ Niospa meka tãpikõia. Nõ fetsafo finõkõia. Nãskaxõ nõ anã tsoa fichipaima noko tãpimanõ. Nõfi Cristo fe xanĩfo keskaraki. Nõ yorafãfe ãto ifo keskarakĩ,” ixõ mã shinãi. Nãskapainõra mã xanĩfokõifo iki. Mã xanĩfokõifo ikaino nõri mato fe xanĩfo ikerana. Akka nõ xanĩfoma. Noko tsõa ifofaima.  
\v 9 Ẽ afara fetsa mato yoipai, nikakapo. Karaxa mẽra ikiafo ato retematirofo. Yora ichapafãfe õiaifono ato retematirofo. Nãskarifiakĩ nõri ato keskara. Noko Jesús nĩchini nõ aõnoa meka shara nõ ato yoinõ. Nõ Jesúsnoa yoiax nõ Jesúsnoax omiskõiaino keyokõi yorafãfe noko õikani. Niospa ãfe ãjirifãferi noko õikani. Nõ yora mitsisipama noko õikani, nõkairoko xanĩfofo keskarakẽ. Nõ ãto nãmã rakakõia noko õikani. 
\p  
\v 10 Nãskakẽ ẽ Jesucristo Ifofamis. Akka mã ea yoimis: “Pablo afaa tãpiamara,” mã ea famis. Askatari, “Nõ Jesús Ifofakĩ nõ tãpisharakõia,” mã imis. Askafixõ mã tãpisharakõiama. Nãskaxori mã ea yoimis, “Na Pablo afaa afeska fatiroma. Akka nõ afarafo nõ atiro,” mã imis. Askafixõ mã askafatiroma. Mã shinãkĩ sharakõi mã meei. Akka ea mã õia ẽ afaamakõi mã ea õimis.  
\v 11 Akka iskaratĩari nõfi fonãiyanã nõamaikĩyanã rapati shara safeyamata nõ imis. Askatari noko koshamisfo. Akka pexemais ixõ Niospa meka fisti nõ ato yoifofãsafamis. Nãskax nõ omiskõi.  
\v 12 Nãskaxõ nõ kerexkai yonotiro a nõ piai fixiki. Nãskatari yorafãfe noko mekafakĩ chakafaifono ato kopitamaroko nõ tenemis. “Jesús mato shara faxopainõ,” ixõ nõ yoimis. Noko omiskõimafiaifono nõ tenemis.  
\v 13 Askatari noko ĩchaifãfe ato kopitamaroko Niospa meka shara nõ ato yoimis. Nãskakẽ iskaratĩa noko chakafakani, “Mãfi nã afamafo keskarakĩ, nã afara chaka potafo keskara,” ixõ nokoõnoa yoimisfo. 
\p  
\v 14 Nãskakẽ ẽ mato nãnori yoikĩ kirika kenexõ ẽ mato rãfimapaima. Askatamaroko ẽ mato shinãmasharapai. Akka mãfi ẽfe fakekõifo keskarafoki. Ẽ mato noikõi. Nãskakẽ ẽ mato yoisharapai anã mã anorima shinãyamanõ.  
\v 15 Yora ichapato mato Cristoõnoa tãpimakani. Akka ẽ taefakĩ mato Cristoõnoa tãpimayoni. Nãskakẽ mã Cristo chanĩmara fani. Eõnoax mã Niospa fakekõifo. Nãskatari ẽ mãto epa keskarakõi. Fetsafãfe Cristoõnoa mato tãpimafiaifono afokai mãto epa keskarama. Akka ẽ fisti mãto epa keskarakõi.  
\v 16 Nãskakẽ nã ẽ ikai keskakãfe. Ẽ Nios Ifofasharai keskafakĩ mãri askafakãfe.  
\v 17 Nãskakẽ ẽ Timoteo matoki nĩchikai. Ẽ Timoteo Cristo chanĩmara famaki taefani. Nãskax ẽfe fake keskarakĩ. Ẽ aõ noikõi. Nõko Ifo Jesús yoiai keskarakõi nikakõi. Ẽ Jesucristo Ifofai keskara Timoteo mato shinãmaxii mã shinãmakinõma. Nã chanĩmara faafo pexe rasi tii anoafo ẽ ato tãpimani keskara Timoteori mato tãpimaxii. 
\p  
\v 18 Mẽ tãpia mã ranãrito shinãkĩ iskafai: “Pablo Timoteo nokoki nĩchi nokoki mesekĩ. Ãakai nokoki opaima. Akka nõ keyokõi tãpikõia. Nõ Pablo yopaima,” ixõ mã shinãi. Askai mã kakapaimis.  
\v 19 Anori mã shinãfiaino ẽ samamakõi ẽ mato ari kaikai. Niospa ea yoiaino ẽ samamakõi mato ari kai. Mẽ mato ano nokoõxõ ẽ tãpixii nã kakapaimisfãfe Niospa Yõshi Sharaõxõ yoikanimãkai, ãakõi yoimisfomãkĩ.  
\v 20 Nios nõko Ifono nõ meka fisti yoitamaroko ãfe shinã sharaõnoax nõ isharatiro.  
\v 21 Nãskakẽ nã ẽ matoki nokoaitĩa ãfe shinã sharaõnoax ẽ matoki nokoxii. Mẽ nokoxõ ẽ tãpixii afeskax mã ikamãkĩ. Mã chaka xateyamakẽ Niosxõ ẽ mato tãpimaxii omiskõimakĩ. Akka mãto chaka mã xatekẽ ẽ mato noikõikĩ fenãmãshta ẽ mato yoisharaxii. Nãskakẽ ẽ matoki nokoxõ ẽ mato omiskõimayamano fenãmãshta oi tsii faxõ ẽ mato yoixii ea yoikãfe fato mã fichipaimãkai. 
\c 5  
\s1 Jesús chanĩmara fafiakaxõ afara chakafakani 
\r (Hch. 9.1-19; 22.6-16) 
\p  
\v 1 Mẽ nika mato mẽraxõ feronãfake fistichi afara chakafaito. Akka, ¿afeskakĩ mã yoimamẽ anã afaa chakafayamanõ? Nã feronãfake ãpa ãfi fe oxakĩ chakafai. Askara chakakõi. Nã Nios chanĩmara faafoma tsoa askamisma.  
\v 2 Ooa. Nã feronãfãke mato mẽraxõ afara chakafai aõnoa rãfipaikanima, “Nõ sharakõifora,” ixõ mã yoimis kakapaiyanã. Akka, ¿afeskakĩ nã feronãfakeõnoa mã shinãchakaimamẽ? Akka nãskaxõ ãfe chaka xateyamax anã mato fe ichanãito potakãfe anã mato fe ichanãyamanõ.  
\v 3-5 Ẽ mato fe iyamafiaxõ ẽ mato shinãkõi. Ẽ ano mato fe iyamafiaxõ nã feronãfake afeskaimãkai mẽ tãpikõia. Ẽ mato anoxõ yoikĩ iskafakerana: “Mã Jesucristo shinãyanã ichanãino Niospa ãfe Yõshi Sharaõxõ nã feronãfake ãpa ãfi fe imiskẽ mato makinoa potakãfe Satanás ifofaafo mẽra inõ. Nãskakẽ Satanás nã feronãfake omiskõimanõ. Nãskaxõ Satanás nã apaiyai keskara faxii nã feronãfake. Nãskafaino omiskõixii. Satanás omiskõimanaino ãfe chaka xatepaixii Jesús anã Ifofapaikĩ anã omiskõiyamaxiki. Mã ãfe chaka xateano nõko Ifo Jesucristo anã oaitĩa nã feronãfake ifixii afe ipaxanõ anã omiskõinõma,” ixõ ẽ mato yoikerana ẽ mato fe ixõ. 
\p  
\v 6 Ooa, mã iskamis: “Nõ sharakõi,” ixõ mã shinãfikĩ mãkai nã feronãfake mato mẽranoa mã potapaima afara chakafafiaito. ¿Mã tãpiamamẽ, yora fistichi mato mẽra ixõ afara chakafaito mã xatemayamax aõnoax keyokõi mã chaka itiro?  
\v 7 Ẽ mato afara fetsa yoipai. Nikakapo. Kẽromã pãa fakĩ levadura aya osiano keyokõi faraxitiro. Pishta aya osiano keyokõi faraxitiro. Nãskarifiakĩ fẽtsa mato mẽraxõ afara chakafaito mã xatemayamax aõnoax keyokõi mã chaka itiro. Nãskakẽ nã yora fistichi afara chakafaito potakãfe mato mẽraxõ anã afara chakafayamanõ, mã fena keskara ixikakĩ. Akka Niospa Fake, Jesucristo, noko nãxoni nõko chaka noko soaxoxiki. Nãskakẽ mã afaa chakafamisma keskara.  
\v 8 Nãskaxõ a nõ chakafapaoni anã nõ shinãpaima. Fetsafo fekaxtefayamata ato pãrayamata meka chanĩmakõi fisti nõ ato yoitiro. 
\p  
\v 9 Ẽ mato kirika kenexoyoni iskafakĩ: “Feronãfakefo ãto ãfima fe imisfo. Askatari kẽrofori ãto fenema fe imisfo. Askarafo yorafo fe rafeyamakãfe.”  
\v 10 Akka a Jesús Ifofaafoõnoama ẽ mato kenexoyonima. Nã Jesús Ifofaifoõnoa ẽ mato kenexoni. Akka faki pishtakai iyamafoma a Jesús Ifofaifoma. Nãskakẽ nõ ato fe imis. Fakira kaxõ nõ õimis nãriri ikafo a Jesús Ifofaafoma. Nõ ato fe ifiaxõ afãfe akaifo keskarakai nõ amisma. Afãfe ãto ifo Satanás. Nãskaxõ ãto chaka xateafoma. Chaka fetsa fetsatapafo amisfo. Nãskaxõ ãto ãfimafo chotamisfo. Kẽrofori nãskarifiamisfo ãto fenema fe chotanãkani. Afama mĩshti fipaikata ãfenãfoma fipaimisfo. Nãskatari yometsokõifo imisfo. Nãskakata nioskõiyamafekẽ, “Na nõko niosra,” ikaxõ afara kĩfimisfo. Nãskafaifono nõ ato feta afaa chakafamisma. Nãskafikẽ nõ ato fe imis. Nõ ato makinoax faki paxkatiroma.  
\v 11 Akka mã efeta Nios Ifofaino ẽ mato kirika kenexoyoni. Nãskakẽ fatotora yoikĩ iskafatiro: “Ẽri mato feta Jesucristo Ifofai,” ixõ yoifixõ ãfe ãfima chotamis. Kẽrofori askari amisfo ãfe fenema fe chotanãmisfo. Askatari afama mĩshti fichipaimisfo. Atonãma fipaimisfo. Nioskõiyamafekẽ afara kĩfimisfo. Yora fetsafo chakafamisfo. Pãemisfo. Yometsomisfo. Askarafo fe rafeyamakãfe. “Nõ Jesús Ifofaira,” ifiakaxõ afara chakafamisfokĩ. Askarafo fe rafeyamakãfe. 
\p  
\v 12-13 Nã Jesús Ifofaifãfema afara chakafaifãfe nõ ato yoitiroma omiskõinõfo. Akka Nios fistichi ato yoitiro iskafakĩ: “Mã afara chakafamis. Nãskaxõ mãto chaka mã xateyamaito ẽ mato omiskõimaxii,” ixõ Niospa ato yoitiro. Akka nõ ato yoitiroma. Nãskakẽ Niospa noko yoia nã Nios Ifofaa fetsafãfe afara chakafaifono nõ ato yoitiro ãto chaka xatenõfo omiskõixikakima. Akka Niospa meka yõra kirikaki keneni iskafakĩ: “Nã feronãfãke mato mẽraxõ afara chakafamis yoikãfe anã mato fe ichanãyamanõ ãfe chaka xateyamax,” ixõ kirika keneni. 
\c 6  
\s1 A Nios Ifofamisfo rafeta fẽtsa chakafaino fẽtsa chakafayamafiaito, askara achixõ a xanĩfo Nios Ifofaama ano iyotiroma ato yoinõ 
\p  
\v 1 A mato feta Nios Ifofaafo ato yõayamakãfe xanĩfofo yoikĩ a xanĩfofofãfe Nios Ifofaafomaki. Askatamaroko nã Nios Ifofaafo ano ato iyokãfe ato yõkanõfo mato chakafafomakĩ.  
\v 2 Akka, ¿mã tãpiamamẽ mã Nios Ifofaxõ mã nõko Ifo nokoaino mã xanĩfo keskara mã ixii? Nãskaxõ mã ato yoixii fatofomãkĩ shara imisfo. Askatari mã yoixii fatofomãkĩ chaka imisfo Niospa ato omiskõimanõ. Nãskakẽ iskaratĩari fẽtsa pishta chakafaano mã ranã yoinõnãsharakãfe xanĩfofoki chanikakĩma.  
\v 3 Askatari mã Nios feta yoixii ãfe ãjirifo fatofãfe sharafafomãkĩ, askatari fatofãferi chakafafomãkĩ Niospa ato omiskõimanõ, a chakafamisfo. Nãskakẽ iskaratĩa mã mã ato õi fatofomãkĩ chakafo fatoforimãkĩ sharafo. Nãskakẽ mã ranã mã yoinõnãsharakãfe xanĩfofoki chanikakĩma a xanĩfofãfe Nios Ifofaafomaki.  
\v 4 A mato feta shara shinãifo mã ato ifitiro mato yoisharanõfo, mã fochishpanã faatanãino. Akka a Jesús Ifofaafoma mã ato ifitiroma.  
\v 5 Afaa tãpiafoma mã ato ifiax mã rãfitiro. Akka, ¿a shara shinãifo mato fe ikafomamamẽ? Ẽje, nãno ikafo a shara shinãifo. Nãskakẽ ato ifikãfe mato yoisharanõfo mã fochishpanã faatanãino.  
\v 6 Akka mã fochishpanã faatanãx, mã raenã faatanãsharamisma. Askakimaroko mã ato yõaxõ nã Nios Ifofaafoma ano mã ato iyomis xanĩfofofãfe ato yõkanõfo. 
\p  
\v 7 Mã ranã mã fochispanã faatanãx nã Nios Ifofaafomaki mã atoki chanimis. Akka askarakai sharama. Nãskakẽ Jesús Ifofaa fẽtsa mato chakafaito kopitamaroko a Jesús Ifofaafomaki mã chanitiroma. Nãskax mã shara itiro. Askatari a Jesús Ifofaa fẽtsa matoki yometsoano nã Jesús Ifofaafomaki mã chanitiroma ãa matoki yometsonõfo. Nãskax mã shara itiro.  
\v 8 Akka mã ranã mã yometso faatanãmis chaka faatanãyanã. Askatari mato fe yorafori mã ato chakafamis. 
\p  
\v 9 ¿Mã tãpiamamẽ a yora afara chakafamis Nios xanĩfo ano katiroma? Nãskakẽ mãri mã pãrameyamakãfe. Mã afara chakafaax Nios xanĩfo ano mã katiromaki. Akka nã ãto ãfima chotamisfo Nios xanĩfo ano fotirofoma. Askatari kẽrofori ãto fenema chotamamisfo Nios xanĩfo ano fotirofoma. Nãskatari nioskõiyamafekẽ afara fetsa fichipaikĩ, “Na nõko niosra,” ixõ fichipaimisfo. Afokai Nios xanĩfo ano fotirofoma. Askatari feronãfakefo aa ranã chotanãpaimisfo. Kẽrofori nãskari amisfo aa ranã chotanãpaikani. Afokai Nios xanĩfo ano fotirofoma.  
\v 10 Askatari yometsomisfo, atonãma fipaimisfo, pãemisfo, ĩchamitsamisfo, nikayospamisfo, afara fẽtsa fĩatiaxõ ato pãraxõ afara fetsa fĩamisfo. Nãskarafokai Nios xanĩfo ano fotirofoma.  
\v 11 Mã askapaonixakĩ iskaratĩa mã mã Niospa afe yorafo. Niospa ãfe Yõshi Sharaõxõ mãto chaka mato soaxona nõko Ifo Jesucristo mã Ifofaito. Mãto chaka mato soaxoyanã ãfe õiti keskara shara mato imai. Askafaxõ afaa chakafamisfoma keskara mato õi. 
\s1 Nõ Cristo fe rafexõ nõ chakafatiroma 
\p  
\v 12 Akka mã yoiraka iskafakĩ: “Cristo ẽfe Ifo. Nãskakẽ a Niospa yoiyamano nã ẽ apaiyai keskara ẽ atiro, afaa chakama,” ixõ mã yoiraka. Ẽje, nãnorikõi. Askatamaroko afara shara fetsa fekẽ ẽ aki ẽ ifofatirora ixõ ẽ apaima.  
\v 13 Askatari mã yoiraka iskafakĩ: “Niospa nõko xãki noko onifaxoni a nõ piai nõ pinõ. Nãskaxori a nõ piai noko onifaxoni,” ixõ mã yoimis. Akka chipo Niospa a nõ piai yafi nõko xãki yamafaxoxii nãatomãi a nõ piai noko onifaxonixakĩ. Chanĩmakõi Niospa noko onifani nõ afe rafepakexanõ. Niospakai nõko ãfima fe nõ inõ noko onifanima. Kẽrofori ãto fenema fe inõ ato onifanima. Askatamaroko Niospa nõko yora noko onifaxoni nõ nõko Ifo fe nõ rafepakexanõ, Jesús ãfe ina nõ inõ, nãskata Jesús nõko Ifo inõ.  
\v 14 Nõko Ifo Jesús mã nafianikẽ Epa Niospa ãfe shinã sharayaxõ otofani. Nãskarifiakĩ ãfe shinã sharayaxõ nokori otofaxii. 
\p  
\v 15 ¿Mã tãpiamamẽ nõ Cristo Ifofaax nõ ãfe yorakõi? Nãskaxõ nõ nõko ãfima chotatiroma nõmãi Jesús afe yorakõixõ.  
\v 16 Niospa meka yoikĩ yõra kirika kenekĩ iskafani: “Feronãfake kẽro fe ikaino nã rafe yora fisti keskarakõi itirofo,” ixõ keneni. ¿Mã tãpiamamẽ, nã mãto ãfima fe mã ikĩ yora fisti keskara mã itiro? Nãskakẽ mãto ãfima fe iyamakãfe mã chakanatiroki. Askatari kẽrori fene fetsa fe itiroma.  
\v 17 Nãskax nõ nõko Ifo Jesús fe rafeax nã yora fisti keskara nõ ixii. Niospa ãfe Yõshi Shara nokoya rafemaxii. Nãskax nõko fero mẽsho nã fisti keskara ixii Niospa Yõshi Shara fe rafeax. 
\p  
\v 18 Nãskakẽ mãto ãfima fe ipaiyamakãfe. Askatari kẽrofori mãto fenema fe ipaiyamakãfe. Askara shinãyamakãfe. Askapaikakĩma ato makinoax ichotakãfe mãto ãfima fe ixikakĩma. Mã chakanatiroki. Askatari kẽrofori ichotakãfe mãto fenema fe ipai kakĩma mã chakanatiroki. Akka mãto ãfima mã chotakĩ mãto yora mã chakanafatiro. Askatari afara chaka fetsa akĩ mãto yora mã chakanafatiroma, afara chaka afiafikĩ mã chakanatiroma.  
\v 19 ¿Mã tãpiamamẽ Niospa Yõshi Shara nofe ika? Nõko yora ãfe pexe keskarakõi. Nãskakẽ Niospa Yõshi Shara nõmẽra ika nãmãi nõko Ifofaax. Nãskax mãkõi mã ifofametiroma. Akka Nios mãto Ifo.  
\v 20 Jesucristo mato nãxoni mãto Ifo ixikĩ. Nãskax mã ãfe inakõifo. Nãskatari Nios mãto Ifokõi. Nãskax mãto yora Niosnã. Nãskakẽ Niosnã ixosharakãfe Niospa mato imapaiyai keskara. Mã askafaito õikakĩ fetsafãfe, “Nios sharara,” fatirofo. 
\c 7  
\s1 Afeskax feronãfake ãfi fe isharatirofomẽ 
\p  
\v 1-2 Mã ea kirika kenexõ femakĩ mã ea yõkaita. Nãskakẽ nã mã ea yõkai keskara ẽ mato yoisharapai mã tãpinõ. Feronãfãke kẽromaisax shara itiro. Askafiax ãfiyapai ãfiyatiro chakafaxikĩma. Nãskax feronãfakefo ãfiyatirofo. Xotofakefori feneyatirofo. Nãskara shara.  
\v 3-4 Feronãfake mã ãfiyax ãfe yora anã ãfenã fistima. Ãfe ãfinãri itiro. Nãskarifiai kẽro mã feneyax anã ãfe yora ãfenã fistima. Ãfe fenenãri itiro. Nãskakẽ ãfinĩ ãfe fene afe ipaiyaito fene ranĩtiroma. Nãskatari fenẽri ãfe ãfi afe ipaiyaito ranĩtiroma.  
\v 5 Nãskakẽ ranĩnõnãyamakãfe. Akka nãskaxõ mã shinãtiro iskafakĩ: “Nõ Epa Nios kĩfiyonõ, nõ paxkanõnãx oxa ranãyoxikĩ. Chipo anã nõ kemãnãxikĩ,” ixõ mã yoitiro. Nãskafiax chai samarakayamakãfe. Mã samarakaino Satanás mato chakafamatiro mã kẽro fetsa fe ipaitirokĩ. Nãskarifiai kẽrori feronãfake fetsa fe ipaitiro. Afe ipaikĩ chakafatiro. 
\p  
\v 6 Ẽ mato, “Fianãkãfe,” ixõ ẽ mato yoima. Akka mã fianãpai mã fianãtiro.  
\v 7 Askata ẽ shinãkĩ iskafai: “Feronãfakefo ea keskara kẽromais ikanax shara itirofo. Niosnoax ẽ ãfiyamax ẽ isharai. Ẽ shinãchakaima. Ẽ inimakõi. Akka Niospa ea kẽromais ima keskarakai ato askafaima. Fetsafo Niosnoax ãfiyafo. Fetsafori kẽromaiskanax nã ẽ ikai keskariai inimatirofo.” 
\p  
\v 8 Akka iskaratĩa nã kẽromaisfo yafi fenemaisfo ẽ ato yoinõ. Feronãfakefo ea keskara kẽromais itirofo. Askatari kẽrofori fenemais itirofo. Askara shara. Askatari ãto fene ato makinoax namis, afo anã feneyatirofoma. Ea keskara shara itirofo.  
\v 9 Akka feronãfake ares ixõ teneyamai kẽro fe ipaikĩ fatora kẽro fe oxatiro. Askara sharama. Askatamaroko ãfiyatiro tanaima shara ixikĩ, anã kẽro fetsafo fe ipaixikĩma. 
\s1 Feronãfãke ãfe ãfi potatiroma, nãskarari kẽromãri ãfe fene potatiroma 
\p  
\v 10-11 Askata iskaratĩa feronãfake ãfiya ẽ yoipai, xotofãke feneyari ẽ yoisharapai. Ẽa ẽ mato yoima. Nõko Ifoõxõ ẽ mato yoi iskafakĩ, kẽromã fene enetiroma. Mã fene eneax fetsa fe fianãtiroma. Ares itiro. Akka askayamai anã feneki kematiro. Askara shara itiro. Askatari feronãfãke ãfi enetiroma. 
\p  
\v 12 Nãskakẽ iskaratĩa keyokõi ẽ mato yoisharapai. Na meka ẽ mato yoiai Niospa ea yoiyamafekẽ ẽa mẽstekõi shinãkĩ ẽ mato yoi. Feronãfãke Jesús Ifofaino ãfe ãfinĩ Jesús Ifofaxoma fene noikĩ fene enepaiyamaino fenẽ ãfe ãfi potatiroma.  
\v 13 Askatari ãfe ãfinĩ Jesús Ifofaino fenẽ Jesús Ifofaxoma ãfe ãfi enepaiyamaino ãfinĩ fene enetiroma.  
\v 14 Feronãfãke Nios chanĩmara faimano ãfe ãfinĩ Nios chanĩmara faino ãfe ãfiõxõ Niospa nã feronãfake shara faxotiro. Nãskaxõ ãfe ãfinĩ Jesús Ifofaito õikĩ ãfiõxõ fenẽ Jesús Ifofatiro. Nãskatari kẽromã Jesús Ifofayamaino fenẽ Jesús Ifofaino feneoxõ Niospa nã kẽro shara faxotiro. Akka feronãfake fe ãfi enenãifono ãto fakefo shara itirofoma. Akka enenãyamaifono Niospa ãto fakefo shara õitiro.  
\v 15 Akka feronãfãke Jesús Ifofayamakẽ ãfinĩ Jesús Ifofaito fenẽ enepaikõikĩ enetiro. Nãskax kapaiyaito nẽtefayamafe. Katanõ. Mã nẽtefaino fekaxtetiroki. Askatari kẽromã Jesús Ifofayamakẽ fenẽ Ifofaito kẽromã enepaikõikĩ enetiro. Kapaiyaitori nẽtefayamafe. Katanõ. Mã nẽtefaino fekaxtetiroki. Niospa noko katoni nõko shinã mẽraxõ afanã noko fekaxtefanõma nõko õiti tanaimakõi shara inõ.  
\v 16 Kẽromã Jesús Ifofaxõ ãfe feneri Jesúsnoa tãpimatiro ãfinĩ fene yoiaino fenẽ Ifofai rakikĩa nõ tãpitiroma. Feronãfãkeri Jesús Ifofaxõ ãfe ãfiri Jesúsnoa tãpimaino Ifofai rakikĩa, nõ tãpitiroma. 
\p  
\v 17 Nã nõko Ifo Jesús mato ima keskara nãskara ikãfe. Akka Niospa mato ifini nã Jesús mato ima keskara mã inõ. Askatari nã Nios Ifofaafo tii Nios kĩfiti pexefã anoafoya nã maitio anoafori nãnorikõi ẽ ato yoimis.  
\v 18 Iskafakĩ ẽ ato yoimis. Judeofo Niospa ato yoini keskarakõi ãto fake feronãfakefo foshki repa xatepaonifo. Akka mato foshki repa xatenifono Jesús Ifofaxõ shinãkĩ mã iskafatiroma: “Iskaratĩa ẽ Jesús Ifofai. Nã fistichi ẽfe chaka ea soaxonano ẽ afe ĩpaxanõ. Ooa, ¿afeskakĩ ea foshki repa xatenifomẽ, ẽ askayamapaifiaino? Aatokai ẽfe chaka ea soaxotiroma. Nãskakẽ ẽ foshki repa xateama keskaraxõ ẽ ato fomãi,” ixõ shinãyamakãfe. Akka mãto foshki repa mã mato xatenifono shinãchakayamakãfe. Askatari mã Jesús Ifofaxõ iskakĩ shinãyamakãfe: “Judeofo ãto xinifãfe ato yoini keskara ẽ ipai. Ẽ foshki repa xatepai nã Moisés yoini keskara ẽ ixikĩ,” ixõ anori shinãyamakãfe. Nõ foshki repa xatetiroma Niospa noko ifinõ.  
\v 19 Akka nõ foshki repa xatemisma askatari nõ foshki repa xatemis nãskara shara. Akka nõ askanokai, “Mã chakafaa,” noko Niospa faima. Askatari nõ askamanori, “Mã chakafaa,” noko Niospa faima. Nã judeofo imis keskarakai nõ itiroma noko Niospa ifinõ. Askatamaroko Niospa noko yoini keskara nã fisti nõ atiro.  
\v 20 Akka nã Niospa mato ifini keskarakõi ikãfe.  
\v 21 Mã fẽtsa yonomati ikatsaxakĩ shinãchakayamakãfe. Nãskarakõi ikãfe. Akka mãto ifãfe mato nĩchipaiyaino, “Fotakãfe anã yonoxoxikakĩma,” mato faino mã katiro.  
\v 22 Akka nõko Ifo Jesús mato ifini. Mato ifiyoamano ranãri mã ãto yonomati iyopaoni. Iskaratĩari mã ãto yonomati mã ato yonoxomis. Mã askafixõ mã Jesús Ifofaano, Jesús mãto chaka mato soaxonano, ãfe yonomatikõifo mã iki. Nãskaxõ tsõa mato iskafatiroma: “Mãkai Jesús afe yorafoma,” tsõa mato fatiroma. Akka ranãritokai mã tsõa yonoxomisma. Askafiax mãri Jesús Ifofaax mãri ãfe yonomatikõifo.  
\v 23 Epa Niospa ãfe Fake Jesucristo noko nĩchixoni noko nãxoyonõ nãskax nõko Ifo inõ. Nãskax mã afe yorakõifo. Nã fisti mãto Ifokõi. Nã fistichi mẽstekõi mato shinãmasharatiro. Askaxõ fetsafo ifofayamakãfe mato shinãmasharatirofomaki.  
\v 24 Efe yora mĩshtichi, Niospa mato ifiano nã mã ipaoni keskara ikãfe Epa Nios mato fe ikaino. 
\s1 Feronãfake ãfimaisfoya kẽrofo fenemaisfoõnoa Pablo yoini 
\p  
\v 25 Akka iskaratĩa afara fetsa anã ẽ mato yoipai mã ea yõkaita. Feronãfakefo ãfimaisfoya kẽrofo fenemaisfoõnoa ẽ mato yoi. Ẽ mato yoiai keskara nõko Ifãfe ea yoiyamafixõ ea noikĩ ea nĩchini ẽ ãfe ina inõ. Nãskakẽ ẽ mato yoiai keskara mã chanĩmara fatiro.  
\v 26 Iskaratĩa afara mesekõikĩ noko omiskõimani. Nãskakẽ mã ãfimais ika shara. Nios Ifofaafãfema noko omiskõimapaikani nõ Jesús Ifofakẽ.  
\v 27 Akka ãfiyakaxõ mãto ãfi eneyamakãfe. Askatari ãfimaisxõ kẽro fenayamakãfe.  
\v 28 Akka mã kẽroyaxõ mã chakafatiroma. Kẽrofori feneyakatsaxakĩma mã feneyaxõ mã chakafatiroma. Askata mã feneyax askatari feronãfake mã ãfiyax mato omiskõimanaifono mã omiskõitiro. Nãskaxõ mato omiskõimatirofo mã Jesús chanĩmara faino. Nãskakẽ ẽ mato yoisharapai mã omiskõiyamanõ. 
\p  
\v 29 Askatari ẽ mato iskafakĩ yoipai, efe yora mĩshtichi. Nõko Ifo Jesús mã chaima oi kiki. Nõko Ifo nõ yonoxokĩ nõ chai faima. Nãskakẽ nõ nõko Ifo yonoxosharakõipai. A ãfimaisfãfe nõko Ifo yonoxosharakõitirofo kẽro shinãkima. Askatari nã ãfiyatori nõko Ifo yonoxosharatiro nã ãfimaisfãfe yonoxonaifo keskafakĩ.  
\v 30 Askatari nã shinãchakaifãfe nõko Ifo yonosharaxotirofo nã shinãchakaifãfema yonoxonaifo keskafakĩ. Nãskatari nã inimaifãfema nõko Ifo yonoxosharatirofo nã inimaifãfe yonoxonaifo keskafakĩ. Askatari nã afara fiaifãfe shinãtirofo iskafakĩ: “Na nõkonãma, akka na nõko Ifonã,” ixõ shinãtirofo. Akka nõko Ifo shinãkõikĩ nõ yonotiro.  
\v 31 Nõko Ifo Jesús mã chaima oi kiki. Nãskakẽ nõko mai anoxõ nõ yonosharafafãinõ nã nõ yopai fixiki. Nãskafixõ afama mĩshtifos shinãkima nõko Ifokõiroko nõ shinãkõinõ. Keyokõi mai anoafo keyoxikani. Nãskakẽ Jesús nõ shinãkĩ finakõikĩ afama mĩshti fipaikĩ nõ shinãtiroma. 
\p  
\v 32-35 Ẽ mato anori yoi mãto shinã mẽraxõ afaranã mato fekaxtefanõma. Ẽ mato, “Ãfiyayamakãfe,” faima. Askatari xotofakefori, “Feneyayamakãfe,” ẽ ato faima. Ẽ mato mẽstekõi imapai nõko Ifo fisti mã shinãkĩ finakõinõ, mã afara fetsa shinãnõma. Askaxõ ẽ mato yoia keskara feronãfake ãfimaisto ãfe Ifo inimamapai. Akka feronãfãke ãfiyaxõ ãfiri inimamapai. Ãfinĩ afara yopaito fenẽ shinãchakakĩ ãfi fixotiro. Nãskakĩ ãfe Ifo fistikai shinãtiroma. Nãskaxõ ãfe Ifo inimamapaikĩ ãfiri inimamapai. Askatari xotofake fenemaisto ãfe Ifo Jesús fisti yonoxosharapai. Afara fetsakai shinãima ãfe Ifo fisti shinãi. Niospa amapaiyai keskara fisti aki. Akka xotofake feneyaxõ ãfe feneri inimamapaikĩ afara fetsafori shinãtiro ãfe Ifo Jesús fisti shinãkĩma. 
\p  
\v 36 Nãskakẽ meka fetsari ẽ mato yoi. Feronãfãke taefakĩ xotofake yoiyoxõ fichisharapaikĩ chipo fitiro ãfe ãfi inõ. Shinãkĩ iskafatiro: “Mẽ afetĩama afe mekaitakĩ, mia fipa,” shinãchakayamaxiki ixõ fitiro, chaka shinãyamaxiki. Nãskafakĩ afaa chakafaima.  
\v 37 Askatari feronãfake fẽtsa shinãkĩ iskafatiro: “Ẽfe Ifo ẽ yonoxosharapaiyai keskara ẽ ãfiyaxõ ẽ axotiroma. Nãskakẽ ẽ ãfiyaima mẽ yoifixõ,” ixõ anori shinãkĩ afaa chakafaima. Tsõa kerexkai, “Ãfiyafe, mã mĩ yoiaki,” fayamaino nã feronãfãke xotofake fe fianãtiroma Nios yonoxosharaxii.  
\v 38 Akka feronãfake nã xotofake fe fianãsharatiro. Akka nã xotofake fe fianãima nõko Ifo yonoxosharatiro. Nãskarari shara itiro. 
\p  
\v 39 Askata meka fetsari ẽ mato yoi. Ãfe fene naamanokai kẽromã fene enetiroma fetsa fe fianãxiki. Akka mã fene naano fetsa fe fichinãpai afe fianãtiro nã Nios Ifofaa fe. Askara shara.  
\v 40 Nãskatari ẽa ẽ shinãkĩ iskafai. Mã fene naano fetsa fe fianãmax nãskarari sharakõi itiro. Ẽ shinãi Niospa Yõshi Sharapari nonorikõi mato yoipai. 
\c 8  
\s1 Nioskõima onifakaxõ yorafãfe kĩfipaonifo. Nãskaxõ nami inãpaonifo atoõnoa Pablo yoini 
\p  
\v 1 Mã ea yõkaito ẽ mato yoisharatiro. Yora fetsafãfe afara onifakaxõ, “Na nõko niosra,” ikaxõ nami inãmisfo. Askata anã nã nami fikaxõ ato inãmisfo yorafãfe pinõfo. Akka yorafãfe ãto niosnã nõ nami pia, shara. Nõ piamari, shara. Nãskaxõ nõ afaa chakafaima. Akka mã yoikĩ iskafamis: “Mã nõ tãpia nõ ãto niosnã nami pia, shara. Akka nõ piamari, shara,” mãmãi shinãkĩ Nioskõimara ixõ. Akka mã fatora fetsafãfe shinãkĩ iskafamis: “Ẽfi tãpikõiaki. Nã ẽ shinãi keskara ẽ mẽstekõi shinãi. Ẽ fetsafo keskarama. Ẽ apaiyai keskara ẽ atiro,” ixõ mã yoimis. Askara yoi kakapaimis mã itiro. Askara shinãkĩkai nõ fetsafo inimamatiroma. Askakimaroko nõ yorafo noixõ nõ ãto õiti fepeaxosharakõitiro Jesús Ifofasharanõfo. Nãskakẽ nõ ato inimamatiro.  
\v 2 Askatari fatora fẽtsa shinãkĩ iskafamis: “Ẽfi afama mĩshti tãpiakĩ,” ixõ anori yoifikĩ atiri afaa tãpiama.  
\v 3 Akka fatora fẽtsa Nios noiaino nãskarifakĩ Niospa aõnoa yoitiro iskafakĩ: “Nã ea noiai mẽ tãpikõia. Nãfi efe yoraki,” ixõ yoitiro. 
\p  
\v 4 Nãskaxõ yorafãfe afara fetsa onifakaxõ, “Na nõko niosra,” ikaxõ nami inãifo. Nã nami nõ pitiro. Nã shara. Nõ chakafaima. Akka nõ piamari, shara. Akka mã nõ tãpia a afara fetsa yorafãfe onifafo akai afama. Nã onifafotokai afaa tãpiama. Akai õitiyama. Ãfe mãporikai afaa shinãtiroma. Akai Niosma. Akka Nioskõi fisti.  
\v 5 Jesús Ifofaafãfema yoikĩ iskafamisfo: “Nios ichapa. Nai mẽranoafoya mai anoafoya nios ichapakõi,” ixõ yoimisfo. Akka nã ãto nios ichapafiax Nioskõifoma.  
\v 6 Mã nõ tãpia Epa Niosfi fistiki. Fetsakai anoma. Nãato keyokõi onifani. Nokori onifani nõ ãfe fakefo inõ. Nãskatari nõko Ifo Jesucristori fisti. Anã ano fetsama. Nãskaxõ Niospa ãfe Fake feta keyokõi onifani. Aõnoax nõ nitiro. 
\p  
\v 7 Nã ẽ mato yoiai keskara fisti rasichi Jesús chanĩmara faifãfe tãpiafoma. Shinãmisfo iskafakakĩ: “A fetsafãfe afara onifafo, nã ãto nioskõi nia,” ixõ yoimisfo niyamafiakẽ. Akka ãto xinifãfe nãnori ato yoipaonifo. Nãskakẽ shinãkani iskakakĩ: “Nã ãto niosnã nõ nami pixõ nõ Nioskõi chakafatiro,” ixõ shinãtirofo. Akka mã pikaxõ ãto shinã mẽraxõ shinãchakatirofo: “Mã nõ chakafara,” ikaxõ.  
\v 8 Anori shinãfiaifonokai a nõ afara piatokai Nios yafi noko rafemasharatiroma. Nios makinoa noko potatiroma. Afara onifakaxõ, “Na nõko niosra,” ikaxõ nami inãfo nã nami nõ piamanokai noko shara imatiroma. Askatari noko chakafatiroma. Nãskatari mã nõ pianori noko chakafatiroma. Nãskatari noko shara imatiroma. 
\p  
\v 9-12 Nãskakẽ mato feta Nios Ifofaafo afaa chakafamayamakãfe. Mã shinãi iskafakĩ: “Nõ keyokõi pitiro. Afara onifakaxõ, ‘Na nõko niosra,’ ikaxõ nami inãfo. Nã nami nõ pitiro nã onifafokairoko Nioskõikẽ. Akka mã nõ na nami pixokai nõ ãto nios chanĩmara faima. Akka mã nõ tãpia Nioskõima. Akka pixõ Nioskõi nõ chakafaima. Jesúsri nõ kachikirifaima,” ixõ mã shinãi. Mã anori shinãfiaino Jesús Ifofaa fetsafãfe anori tãpiafoma. Tãpiamaifono nã nioskõimato kĩfiti pexefã anoxõ mã piai fisti mã pipai mãkai ãto nios ifofapaima, nãskakĩ mato õikakĩ akairi apaikani. Akka mã mã tãpia yorafãfe ãto niosnã nõ nami pia shara, chakama. Akka fetsafãferi Nios Ifofafiakaxõ yoimisfo iskafakakĩ: “Ãto niosnã nõ nami pia sharama, nõ chakafatiro,” ixõ yoimisfo. Nãskaxõ mã nami piaito fetsafãfe mato õikakĩ akairi afãfe nami pitirofo. Nãskaxõ mã nami pikaxõ chipo shinãtirofo iskafakakĩ: “Ooa, mẽ nami pixõ ẽfe Ifo Jesús ẽ chakafaa ẽmãi ãto niosnã nami pixõ. Nã nami pikĩ ẽ ãto nios sharafai. Ẽ ãto nios ifofai õitsai. Ooa, ẽ chakafaa,” ixõ shinãtiro. Askaxõ ãfe shinã mẽraxõ shinãchakakõitiro mã nami piaito õikakĩ akairi pikaxõ. Nãskakẽ mã chakafamatiro. Askafakĩ Cristori mã chakafai. Mã mã tãpia afara onifakaxõ, “Na nõko niosra,” ikaxõ nami inãifo nã pixokai mã chakafaima nã onifafokairoko Nioskõikẽ. Akka fetsafãfekai tãpiafoma. Afãfe shinãkani: “Nã nami pixõ nõ chakafatiroki,” ixõ shinãmisfo. Akka mã piaito õikakĩ akairi pikaxõ shinãchakatirofo. Mã akai keskafakĩri shinãkani. Akka mã nã nami piyamainokai akairi pikeranafoma. Shinãchakakeranafoma. Nãskakẽ mato fe yorafo noikõixõ mã nã nami pitiroma ato chakafamaxikima. Akka atoõnoaxri Cristo naniki.  
\v 13 Nãskakẽ nõ nami pixõ Jesús Ifofaa fetsafo nõ ato chakafamatiro. Nãskakẽ ãto niosnã nõ nami pitiroma fetsafo chakafamayamaxikĩ. Nãskakẽ nõ fetsafo chakafamapaima. Nofeta Jesús Ifofaa fetsafo noikĩ nõ afaa chakafamapaima. 
\c 9  
\s1 Niospa Pablo nĩchini ãfe meka ato yoinõ 
\p  
\v 1 Nios fistifi ẽfe Ifokĩ. Nã ea yonomapaiyai keskara ẽ atiro. Tsõakai ea yonomatiroma. Jesús ea nĩchini ẽ aõnoa yorafo yoinõ. Akka nõko Ifo Jesús mẽ õisharakõini. Aõnoa ẽ mato yoiaito mã chanĩmara fani. Nãskakẽ nõko Ifo Jesús ẽ yonoxonaõxõ Jesús mã Ifofai.  
\v 2 Fetsafãfe shinãkakĩ iskafamisfo: “Niospakai Pablo nĩchiama Jesúsnoa noko tãpimanõ,” ixõ anori yoimisfo. Fetsafo mekaino anori shinãyamakãfe. Ẽ mato yoiaito mã nõko Ifo Jesús chanĩmara fai. Nãskakẽ mã tãpitiro chanĩma Niospa ea nĩchini ẽ mato Jesúsnoa yoinõ. 
\p  
\v 3 A ea ĩchakakĩ mekafaifono iskafakĩ ẽ ato kematiro:  
\v 4 Fetsafãfe Jesúsnoa yoiaito nikakakĩ afaa kopi yõkaxoma kaxpa ato pimamisfo. Akka ẽ mato Jesúsnoa yoiaito nikakakĩ, ¿eari afaa kopi yõkaxoma kaxpa eari pimatirofomamẽ?  
\v 5 Ẽ akai keskafakĩ Pedrori Jesúsnoa yoifofãsafamis. A Jesús nĩchiafãfe fetsafãferi Jesúsnoa ato yoifofãsafamisfo. Jesús ãfe extofãferi ato yoifofãsafamisfo. Nãfo kẽro Jesús Ifofaafo fe fianãkaxõ Jesúsnoa ato yoifofãsafaifono ãto ãfifori ato fe fofãsamisfo. ¿Nãfãfe ãto ãfifãfe Jesús Ifofaafo fe fianãfo keskari ẽri nã kẽro Jesús chanĩmara faa fe ẽ fianãtiromamẽ eferi kafãsanõ?  
\v 6 ¿Afeskakĩ ẽ Bernabé feta nõ mato Jesúsnoa yoifikĩ nõ yonoimẽ, a nõ yopai yafi a nõ piai fixikĩ? Akka fetsafãfe Jesúsnoa mato yoifikakĩ yonokanima nõ akai keskafakĩ. Akka afara yopaifono mã ato inãmis. Akka a nõ yopai kaxpa nõ fimisma, yonoxõ nõ fimis.  
\v 7 Anã meka fetsari ẽ mato yoinõ. Sorarofãfe kaxpa yonokanima. Ãto xanĩfãfe a piaifo ato inãkani. Askatari ato kori inãkani. Nãskarifakĩ yora tare fanamisto ãfe tare foaisharano ãfe yono pitiro. Askatari fakka kexemistori ãfe fakka chocho fĩaxõ ayatiro. Nãskarari a Jesúsnoa yoimisfãfe a piaifo fitirofo pixikakĩ tsõa kopifaxoma. 
\p  
\v 8 Nã ẽ mato yoiai keskara yõra mekama. Akka Moisés nãnori kirika keneyoni Niospa meka yoikĩ.  
\v 9-10 Moisés Niospa meka kenekĩ iskafani: “Nã fakka keskara nexakaxõ xiki peama peama amamisfo ãfe xaka potaxikakĩ. Nãskakẽ ifãfe renextiroma xiki xaka pinõ ifomãi yonoxokĩ,” ixõ Moisés Niospa meka yoikĩ kirika keneni. Akka fakkaõnoa Niospa yoinima. Yorafoõnoari yoini. Nã Jesús yonoxomisfoõnoa yoini. Nãskaxõ afaa kopifaxoma fitirofo yopaifo Niosnoa ato yoikakĩ. Askatari fetsafãfe tare kexexõ shinãtirofo iskakakĩ: “Ẽ na tare kexeakĩ nãskakẽ ẽ tarepanoa afama mĩshti fipa,” ixõ shinãtirofo. Nãskarifakĩ a Niospa meka ato yoimisfãfe a piai fitirofo.  
\v 11 Nãskarifakĩ nokori kopikiri a nõ yopai mã noko kaxpa inãtiro afaa kopi yõkaxoma.  
\v 12 Fetsafãfe Jesúsnoa mato yoiaifono nikakĩ nã yopaifo mã ato inãmis. 
\p Akka nõ mato taefakĩ yoiyoni. Nãskakẽ mã noko afama mĩshti inãtiro fetsafo finõmainĩfofã. Mã noko afama mĩshti inãfitirokẽ nõ mato afaa yõkamisma. Nãskaxõ nõ tenemis. “Nõ ato kori yõkaito anã noko nikapaitirofoma,” ixõ nõ shinãmis. Nãskakẽ nõ mato afaa yõkapaimisma.  
\v 13 ¿Mã tãpiamamẽ? Nõko kaifo judeofo na Nios kĩfiti pexefã mẽra femisfo a piaifo. Nã piaifo Nios inãxikakĩ. Nãskakẽ a Nios kĩfiti pexefã mẽra yonomisfãfe a piai kaxpa pimisfo tsõa kopifaxoma.  
\v 14 Nãskarifakĩ nõko Ifãfe yoini iskafakĩ: “Fẽtsa ẽfe meka shara fetsafo yoiaito nikakakĩ nã nikaifãfe a yopaifo ato inãtirofo,” ixõ nõko Ifãfe yoini.  
\v 15 Nãnori nõko Ifãfe yoifinikẽ ẽ mato afaa pishta yõkamisma. Mato Niospa meka yoifikĩ ẽ mato kirika kene fomaima: “Ea kori inãnõfora,” ixõ. Nãskakẽ tsõa ea yoikĩ iskafatiroma: “Pablo ato kori fĩapaikĩ ato Jesucristoõnoa yoimis,” ixokai tsõa eõnoa anori yoitiroma. “Akka Pablo ato kori fĩamiski ato Jesucristoõnoa yoikĩ,” ea mã faito ẽ rãfipaitiro. Nãskaxõ ẽ mato afaa pishta yõkamisma: “Pablo kori fia,” mã ea fanõma.  
\v 16 “Ẽ mato afaa yõkatama Jesúsnoa ẽ mato yoimis. Nãskakẽ ẽ sharafinakõiakĩ,” ixokai ẽ yoitiroma kakapaiyanã. Akka Niospa ea katoxõ ea nĩchini ẽ Jesúsõnoa ẽ yoifafãinõ. Akka ẽ Jesúsõnoa yoiyamaito Niospa ea omiskõimatiro.  
\v 17 Ẽ yoikĩ iskafamis: “Epa Niosi, mĩ Fakeõnoa ẽ yoipai,” ixõ ẽ yoikẽ Epa Niospa ea afara inãtiro. Akka ẽa ẽ yoima. Niospa ea nĩchini Jesúsnoa ẽ ato yoinõ. Nãskakẽ nã ea yoini keskara ẽ ato yoimis.  
\v 18 Akka ẽ Niospa meka shara yoimiskẽ, ¿afaa ea Niospa inãimẽ? Ato Niospa meka yoixokai ẽ afaa ato yõkamisma. Askaxorikai ẽ ato yoimisma iskafakĩ: “Niospa mato yoikẽ Jesúsnoa ẽ mato yoifafainaito a ẽ yopai ea inãnõfora,” ixokai ẽ ato yoimisma. Akka ẽ Niospa meka ato yoipai afaa yõkaxoma. Nãskax ẽ inimasharakõi Epa Niospa ea inimamaino. 
\p  
\v 19 Ẽkai tsõa yonomatima. Nãskafiax ẽakõi ẽ mãto yonomati keskarakõi. Nãskakẽ keyokõi yorafo ẽ axosharapai ato Jesús chanĩmara famaxikĩ. Nãskax ẽ yorafãfe ãto yonomati keskaraki. Akka nã Nios Ifofaafoma ẽ ato fe rafemis ãto feyafati shara keskara ixõ ẽ ato yoiaito, Jesús Ifofanõfo ẽ Niospa meka yoiaito.  
\v 20 Ẽfe kaifo judeofo fe ẽ ikax nã ikaifo keskari ẽri ato keskara ipai. Ẽ ato keskara ikaito ea õikakĩ Jesús chanĩmara fatirofo. Nõko xini Moisés nõko kaifo yoipaoni keskarakai iskaratĩa anã ẽ nikaima. Akka ẽ nikayamafikĩ a Moisés yoipaoni keskara nikamisfo fe ẽri ato fe ixõ Moisés yoini keskara ẽri askai ato Jesús chanĩmara famaxikĩ.  
\v 21 Nãskakẽri nã Moisés yoini keskara nikaifoma fe ẽ ato fe ixõ nã Moisés yoini keskara ẽ akima ato Jesús chanĩmara famaxikĩ. Ẽ nãskafafiamiskẽ Cristo ea yoini keskara ẽ amis. Ẽ nikasharaxõ nã fisti ẽ kachikiri fatiroma.  
\v 22 Jesús chanĩmara faafãfe ranãrito Niospa meka tãpisharayokanima. Ẽ nã keskarafo fe ikax ẽri ẽ ato keskara ipai eari Jesús tãpimasharanõ. Nã ea tãpimana keskara ẽri ato tãpimasharanõ. Nãskatari fatora fetsafo fe ẽ ikax ẽ ato keskarari ẽ ipai. Eõxõ Jesús chanĩmara fakanax afe isharapakexanõfo.  
\v 23 Nãskakẽ ẽ askafakĩ ẽ ato Jesucristoõnoa tãpimasharai nã chanĩmara faifono ẽri ato fe inimai finakõitiro. 
\p  
\v 24-25 Akka mã mã tãpia nã naetapafo xonõnõnãxikakĩ ichotirofo yora ichapafãfe ato õiaifono. Akka nã koshi fistichi ato xonõtiro. Nãskakẽ akiki xanĩfo inimakĩ afara shara fetsa inãtiro. Nãskakẽ kerexkai ichotirofo fetsafo xonõpaikani. Akka ichoyokanaxma tae fenai ichoyofofãfofãitirofo feyafaxikakĩ xokenãxikakima. Nãskarifakĩ nõko Ifo Jesús kerexkai yonosharaxokãfe afara chakafo fayamaxikakĩ. Akka Niospa mato yoiaito nikakĩ akãfe Jesús feyafaxõ Ifofaxikakĩ mã akiki nokoaitĩa mato afara shara inãnõ. Akka nã ichokĩ ato xonõa xanĩfãfe afara shara inã keyotiro. Akka Niospa noko afara inã keyonakama.  
\v 26 Nãskakẽ ẽ Jesús fisti yonoxoni afaa fetsa shinãtama. Akka ẽa ẽ kaxpa mato yoimisma. Niospa ea shinãmanaino ẽ mato yoimis. Naetapafo xonõnõnãpaikani mẽstekõi ichotirofo. Nãskarari ẽ mẽstekõi ika. Ẽfe Ifãfe ea yoiai keskarakõi ẽ iki akiki nokosharaxiki.  
\v 27 Ẽa ẽ apaiyai keskara ẽ akima. Ẽfe Ifãfe ea amapaiyai keskara ẽ aki. Ẽ tenepaifikĩ ẽ tenetiroma Jesús Ifofasharaxikĩ. Ẽ xokenãfiakĩ ẽ tenetiroma Jesúsnoa yoikĩ. Jesús fistichi ea yonomatiro. Nãskakẽ ẽ fetsafori yoifafãini Jesús Ifofaxõ yonosharaxonõfo. Nãskakẽ Niospa ea yoia keskara ẽ ayamax ẽ fenotiro, afianã ẽ Nios yonoxotiroma. Niospa anã ea yonomatiroma. Ẽ fenopaima. Nãskakẽ nã ẽa ẽ apaiyai keskara ẽ akima. Ẽfe Ifãfe ea amapaiyai keskara, nã fisti ẽ aki. 
\c 10  
\s1 Judeofãfe Nios chakafapaoni keskara iyamakãfe 
\p  
\v 1 Efe yora mĩshtichi, tãpikãfe. Nõko xinifo Egipto anoax fonifo. Akka Niospa nai kõi nãmã pishta ato fotomaxoni a õiax nõko kaifo judeofo acho fonifo. Niospa nã nai kõiõxõ ato iyopaiyai ari ato iyoni. Ato iyoikaino nã ĩamãfã ãfe ane Õshi ano nokonifo. Nãnoxõ nõko kaifo judeofo Niospa ato ĩamãfã nẽxpakĩa rafe ato paxkaxotani anori pokefainõfo.  
\v 2 Moisés ato rekẽ tanaxoni. Akka nõko kaifo judeofo Moisés acho fonifo. Nã Moisés chanĩmara fakanax afe rafepaonifo. Nãskakẽ nai kõi nãmã pishta kaino Moisés nãmã ato iyoni. Ĩamãfã pokeifokani mã ĩamãfã nakirafekõi shinãtanano. Nãskakẽ pokefainifo ĩamãfã nẽxpakĩa. Mã ãfe kaifo ato ififani Moisés kani.  
\v 3 Askatari Niospa nai mẽraxõ a piaifo ato potaxoni fikaxõ pinõfo.  
\v 4 Nãskatari ano fakamano Moisés tokirinĩfã ãfe mẽstetinĩ ramãino faka sharakõi tsekeni keyokõichi ayanõfo. Cristoõnoax faka sharakõi tsekeni judeofãfe ayanõfo. Akka fakirira fofãfofãipaonifo Cristo ato fe kaino, tsõa Cristo õinima. ato fe kakĩ ato axopaoni ato kexexõ.  
\v 5 Askafafiaifono Epa Nioskai atoki inimanima ãfe meka nikayamaifono. Nãskakanax tsõa istoma anoax fofãfofãikani nikayospakanax nai keyonifo. Nã tsõa istoma ano ato maifakĩ fetsanifo Niospa ato namakĩ keyoano. 
\p  
\v 6 Akka afãfe afara chakafapaonifo. Nãskakẽ atoõnoa noko tãpimani afara chakafo fapaonifo keskara nõri ayamanõ inifo keskai omiskõixikima.  
\v 7 Afãfe afara chakafapaonifo keskara ayamakãfe. Akka nãfãfe afara fetsa onifakaxõ, “Na nõko niosra,” fapaonifo. Nãskakaxõ kĩfipaonifo. Kĩfikaxõ ãfe ferotaifi piyanã ayata ikaxõ afara fetsafo chakafapaonifo. Pãeyanã monopaonifo. “Nõko nios nokoki inimaira,” ikanax askapaonifo. Nãskakẽ mãri ato keskara iyamakãfe.  
\v 8 Nãskakanax ãto ãfima fe ipaonifo. Askatari kẽrofori ãto fenemafo fe ipaonifo. Askaifãfe õikĩ Niospa veintitrés mil yorafo ato namarisafatani nã pena fisti.  
\v 9 Mãri ato keskara chaka iyamakãfe. Akka, “Nioskai nokoki fena õitifishkiyotiroma. Nãskakẽ ẽ afara chakafafiaito ea Niospa omiskõimanima,” ixõ shinãyamakãfe. Akka nõko xinifãfe chakafaifãfe õikĩ anã teneyamakaikĩ Niospa ato omiskõimani. Nãskakẽ ato mẽra rono paekõifo nĩchini ato chachinõfo. Ato chachiano ranãri nanifo. Nãskakẽ noko tãpimai nõri Nios chakafaito nokori omiskõimatiro.  
\v 10 Askatari mẽxotaima mekaifãfe õikĩ Niospa ãfe ãjirinĩ ranãri ato namani. Akka mãri ato keskara iyamakãfe mato omiskõimayamanõ. 
\p  
\v 11 Nã nõko xinifãfe afara chakafapaonifoõnoa noko kenexonifo noko yoisharanõ nõri ato keskara iyamanõ omiskõixikima. Akka nõko Ifo Jesús oyoamano chaima nõ itipinĩsharayoi mã nõko Ifo nokoaino anã nõ keskara chaka nõ ixikima.  
\v 12 Akka fẽtsa shinãkĩ iskafai: “Ẽkai ato keskarama. Ẽ afaa chakafatiroma. Akka afara sharafo fisti ẽ amis,” ixõ anori shinãtiro. Nãskakẽ kexemesharakãfe ato keskara iyamaxikakĩ afara chakafai. Akka mãri Jesús Ifofasharamax mã ato keskarari mã itiro afara chakafai.  
\v 13 Satanás mato afara chakafamapaikĩ mato fisti chakafamapaimisma. Keyokõi nã Nios Ifofaafori ato chakafamapaimis. Mato chakafamapaifiaino Niospa mato yoia keskara mato kexesharatiro mã afaa chakafanõma. Akka mato yoimis keskara mato axõi mã chanĩmara faito. Nãskakẽ Niospa Satanás mato ichapama fekaxtefatimafai mã chakafanõma. Mato Niospa amatiro mã tenenõ mato fekaxtefafiaino. Mãto õiti mato kerexfaxotiro mã Satanás nikanõma. Askatari afara afe keskararafãfe mato fekaxtefaino Niospa mato amatiro mã tenenõ mã Nios kachikirifaxikima. 
\p  
\v 14 Efe yora mĩshtichi, fetsafãfe afara onifakaxõ, “Na nõko niosra,” ikaxõ chanĩmara faifono ato makinoax paxkafaitakãfe.  
\v 15 Nãskakẽ shinãsharakõikãfe nã ẽ mato yoiai keskara õitsai ẽ mato pãrairaka. Akka ea yoikãfe ẽ mato pãraimãkai.  
\v 16 Mã mã tãpia Niospa meka nikai nõ ano fisti ichanãmis. Nãskaxõ nõ fimi ene ayamis Jesús noko nãxoni shinãyanã. Nã nõ ayamis, “Fimi ene Jesús ãfe imira,” ixõ nõ shinãmis. Nãskaxõ nõ shinãtiro Jesús noko naxõi ãfe imi foni nõ afe nĩpaxanõ. Nãskakẽ nõ yoitiro iskafakĩ: “Aicho Epa Niosi, mĩ Fãke noko nãxoni nõ afe ĩpaxanõ,” ixõ nõ yoitiro. Nãskatari pãa torepakexõ Jesús noko nãxoni shinãkĩ nõ pimis. “Nã pãa Jesús ãfe namira,” ixõ nõ shinãmis. Nãskaxõ nõ shinãtiro Jesucristo noko omiskõixoni mastaifono ifi cruz ikakinoax. Nãskakẽ nõ afe rafepakenaka Ifofaax.  
\v 17 Akka pãa fisti torepakexõ keyokõichi nõ pimis. Nãskarifakĩ Jesucristo fisti keyokõichi nõ chanĩmara faax fisti keskara nõ ixii. 
\p  
\v 18 Nãskatari nõko kaifo israelifo shinãkãfe. Nãfãfe ãto inafo retekaxõ Nios inãmisfo ãto chaka soapaikakĩ. Nãskatari nã israelifãfe Nios kĩfiti pexefã mẽraxõ Nios yonoxomisfãfe nã nami pimisfo. Nãskakanax nã fisti keskara imisfo ano fisti ichanãnãkaxõ pikani Nios shinãyanã.  
\v 19 Nãskakẽ ẽ mato yoi nã afara fetsa onifafo akai afama. Askatari afara fetsa onifakaxõ nami inãfo nã namikai afama a onifafokairoko Nioskõikẽ.  
\v 20 Akka nã Jesús Ifofaafãfema Nioskõi nami inãtamaroko afara fetsa onifakaxõ, “Nã nõko niosra,” ikaxõ niafaka chaka nami inãmisfo. Nãskakẽ mãri nami inãyamakãfe. Niafaka chaka fe mã rafeaito ẽ mato õipaima.  
\v 21 Mã nõko Ifo Jesús fe rafepai a niafaka chakafo fe rafeyamakãfe. Askaxõ nã rafe mã ifofatiromaki. Nã Jesús Ifofaafo fe mã ato fe ichanãkaxõ pãa torexõ mã ato feta pimis Jesús noko nãxoni shinãyanã. Nãskakẽ nã Jesús Ifofaafoma fe ato fe mã ichanãtiroma niafaka chakafo nikaxikĩma.  
\v 22 Nõko Ifo Jesús fe rafepaifikĩ nõ niafaka chaka fe rafepaikĩ nõ nõko Ifo Jesús nõ õitifishkimatiro. Nõ askafaito noko omiskõimatiro. Akka, ¿nõ Jesús kerexkai finõtiromẽ noko omiskõimayamanõ? Maa, nõ Jesús finõtiroma. Jesús noko omiskõimanaito tsõa noko timamatiroma. 
\s1 Nã Jesús Ifofaafo nõ ato noikõixõ nõ ato shinãchakamatiroma 
\p  
\v 23 Akka mã shinãiraka iskafakĩ: “Cristo ẽfe Ifo. Nãskakẽ nã ẽ apaiyai keskara ẽ atiro, afaa chakama,” ixõ mã shinãiraka. Ẽje, nãnorikõi mã shinãmis. Nãskakẽ afara shara shinãkĩ: “Nã chakama nõ atiro,” ixõ mã shinãfiaino akka fetsafãfe anori shinãkanima: “Chakara,” famisfo. Nãskakẽ fẽtsa ferotaifi nõ afara pitiroma ato shinãchakayamaxikĩ. Chanĩma, nõ Jesús Ifofaxõ Niospa noko yoini keskara keyokõi nõ pitiro. Keyokõi nami shara nõ pitiro. Chanĩmakõifiano, Jesús Ifofaa fetsafãfe shinãmisfo iskafakakĩ: “Ẽ nami pitiroma. Ẽ nami pixõ ẽ Jesús chakafatiro,” ixõ shinãtirofo. Nãskakẽ nõ ato ferotaifi nõ nami pitiroma shinãchakanõfoma. Akka nõ ato shinãchakamatama Jesús fisti nõ ato shinãmapai.  
\v 24 Nãskakẽ nã mã apaiyai keskara fisti shinãyamakãfe. Fetsafoõnoari shinãkãfe. Ato axosharakãfe. 
\p  
\v 25 Fatora fẽtsa mato nami inãpai mato kori fĩaxikĩ akka pipaikĩ mã fitiro pixikĩ. “¿Fanĩa mĩ na nami feamẽ?” ixõ yõkayamakãfe mã pixõ shinãchakaxikakĩma: “Nã nami nã mĩ niosnãraka,” ixõ yõkayamakãfe. Akka noko Niospa yoini iskafakĩ: “Keyokõi mã nami pitiro,” ixõ noko yoini.  
\v 26 Nõko Ifãfe keyokõi onifani. Keyokõiri ãfenã. Nã onifani tii noko inãpai nõkonã keyokõi inõ. 
\p  
\v 27 Akka nã Jesús chanĩmara famato mato pimapaiyaito mã a feta pipaiyai afeta pikãfe. Nãskaxõ iskafakĩ yõkayamakãfe: “¿Fanĩa na nami mĩ feamẽ? Nã mĩ niosnãraka,” ixõ yõkayamakãfe. Yõkaxoma mã pitiro shinãchakaxikima.  
\v 28-29 Askatari fẽtsa mato yoikĩ iskafatiro: “Ẽ mato nami pimai nã ẽfe niosnã,” ixõ mato yoiaito nã nami piyamakãfe. Akka mã piaito õikĩ ãfe shinã mẽraxõ shinãtiro iskafakĩ: “Ajaa, na feronãfãke Jesús Ifofafiaxõ nã ẽfe niosnã mã nami pii. Na feronãfãkekai Jesús Ifofasharama,” ixõ ãfe shinã mẽraxõ shinãtiro. Nãskakẽ mãri mã nami pixõ mãto shinã mẽraxõ mã shinãchakatiro: “Mã nõ chakafara,” ixõ. Akka mã mã tãpia keyokõi nõ nami pitiro. Nãskakẽ fetsafãfe tãpiamano ato ferotaifi nã nami piyamakãfe shinãchakayamanõfo.  
\v 30 Mã yoiraka iskafakĩ: “Ẽ keyokõi nami pikĩ ẽ Nios, ‘Aichora,’ fafafafãini. ¿Akka afeskakĩ fẽtsa eõnoa shinãchakatiromẽ?” ixõ mã shinãiraka. 
\p  
\v 31 Ẽ mato yoinõ afara mã akai shara shinãkĩ akãfe. Niospa mato shara õinõ akãfe. Niosnoa shinãsharanõfo akãfe.  
\v 32 Nã mã akai keskafakĩ fetsafo shinãchakamayamakãfe. Nõko kaifo judeofo iyamai mani fetsafo Nios Ifofaafoya ato shinãchakamayamakãfe matoõxõ nõko Ifoõnoa shinãchakanõfoma.  
\v 33 Nãskari fakĩ ẽri keyokõi yorafo ẽ ato shara faxopai inimanõfo. Akka nã ẽ apaiyai keskara fisti ẽ akima. Fetsafãfe afara apaiyaifo keskafakĩ ẽ ato axopai Jesucristo Ifofakaxõ ato chaka xatekanax afe ĩpaxanõfo. 
\c 11  
\p  
\v 1 Akka na Cristo akai keskara ẽri aki. Akka mãri nã ẽ akai keskara akãfe. 
\s1 Ichanãxõ nõ Nios shinãino feronãfake fe kẽro afeskax itirofomãki Pablo ato yoini 
\p  
\v 2 Mã ea shinãmiskẽ ẽ mato aicho fai matoki inimakĩ. Nã ẽ mato yoimis keskara mã nõ feyafamiski. Nã mã nikafafãini.  
\v 3 Efe yora mĩshtichi, ẽ afara ẽ mato yoipai mã tãpinõ. Cristofi keyokõichi nõko Ifokĩ. Nãskarari kẽrofãfe ãto ifo ãto fenefo. Akka Cristo ãfe Ifokĩ Epa Nios.  
\v 4 Nãskakaxõ feronãfake Nios yoiti pexe anoxõ yoiyanã kĩfikani marakometirofoma Cristo shinãkani. Nõ marakomexõ nõko Ifo nõ noima. Nãskakẽ nõko Ifo nõ rãfimatiro.  
\v 5 Askatari kẽrofãfe Nios kĩfipaiyanã Niospa meka yoipaikani marakometirofo fetsafãfe tãpinõfo ãto fenefo ãto ifokẽ. Nãskara mã nõ feyafamis. Ãto marakometimaisax maxko ika keskara itirofo. Nãskaxõ ãto fenefo rãfimatirofo.  
\v 6 Akka kẽrofãfe Nios kĩfipaikani marakomekaspakani feronãfakefo keskara maxko itiro. Nãskakanax kẽrofo maxko ikanax rãfipaitirofo. Nãskakẽ ato iskafatirofo: “Nã kẽrofo chakafora,” ikaxõ yoitirofo. Nãskakẽ kẽrofãfe Nios kĩfipaiyanã ãfe mekari yoipaikani marakometirofo.  
\v 7 Akka feronãfakefãfe Nios kĩfipaikani askayamai ãfe meka yoipai marakometirofoma Nios keskara sharamãi ikanax. Askatari Nios nikakõikanax ãfe õiti keskara shara ikafo. Nãskafakĩri kẽrofãfe ãto fene nikakõikanax shara itirofo. Nãskakẽ ãto fenefo atoki inimatirofo.  
\v 8-9 Niospa feronãfake onifakĩ taefani. Chipo xotofake onifani. Feronãfakeõnoa Niospa xotofake onifani. Kẽronoakai Niospa feronãfake onifanima. Akka feronãfakeõnoa xotofake Niospa onifani fene afara axosharanõ.  
\v 10 Nãskakẽ feronãfãke kẽro ĩkitiro. Kẽrofãferi ãto fene nikakõitirofo. Nãskax Nios Ifofaafo ichanãifono kẽrofãfe ãto marakometi maitirofo ãto fenefo nikakõikaxõ fetsafãfe ato õinõfo ãto fenefo nikakõiaifono. Askaifono Niospa ãfe ãjirifãfe ato õikakĩ yoitirofo iskafakakĩ: “Niospa yoini keskara na kẽrofãfe ãto fenefo nikakõisharakani,” ixõ yoitirofo.  
\v 11 Nãskax nõko Ifo fe nõ rafeax feronãfakefo fe xotofakefo nõ axõ faatanãsharatirofo. Akka xotofakefo iskatirofoma: “Nõ feronãfakefo nõ yopaima,” itirofoma. Askatari feronãfakefo iskatirofoma: “Nõ xotofakefo nõ yopaima,” itirofoma.  
\v 12 Niospa taefakĩ feronãfake onifani, ãfe ane Adán. Nãskaxõ xotofakeri onifani, ãfe ane Eva. Adán ãfe pishi tsẽkaxõ Niospa onifani. Nãskatari xotofake fake feronãfake kãipakemis. Akka xotofakefoya feronãfakefo Niospa onifani. 
\p  
\v 13 Efe yora mĩshtichi, shinãkãpo. Xotofakefãfe mato fe ichanãkaxõ Nios kĩfipaikakĩ marakomexoma Nios kĩfikĩ, ¿askara sharamamẽ? Mã ea yoitiro.  
\v 14 Mã mã tãpia feronãfake foo chainipaya nõ shara õitiroma. Akka nõkai askara feyafamisma. Nãskakẽ feronãfãke foo chainipa fatiroma. Foo chainipayax rãfitiro.  
\v 15 Akka xotofakefãfe ãto foo chai faafo nã marakometi shara õitsa itirofo.  
\v 16 Akka na ẽ mato yoiai keskara ea nikakaspai fetsa efe feratenãito ẽ afaa yoipaima. Akka nã fisti ẽ mato yoimis. Xotofakefo marakometiro ẽ mato yoimis. Nã ẽ mato yoimis keskarari Nios Ifofaa fetsafãfe nãnorikõiri yoimisfo nã ichanãifotĩa. 
\s1 Nios yoiti pexe anoax ichanãkaxõ Corinto anoafãfe afarafo chakafaifono Pablo ato yoini anã askanõfoma 
\p  
\v 17 Akka afara fetsari ẽ mato yoipai. Mẽ nika Nios yoiti pexe anoax ichanãxõ mã afara chakafaito. Nãskaxõ afara shara fatama mã afara chakafakõini. Nãskakẽ, sharafora ẽ mato faima.  
\v 18 Akka mẽ nika mato anoax fẽkaxõ ea yoiaifono nã mã ichanãitĩa fetsafo fe mã osinãxma ato fe ichanãkaspaito. Nãskax mã ato ketaxamei tsaopaitiroma. Mã ichanãxõ nã nõko Ifo Jesús mato nãxoni shinãpaifi mã ranã mã noikaspa faatanãi. Nã ẽ matoõnoa nikai keskara ẽ chanĩmara fai rakikĩa.  
\v 19 A mã shinãi fisti anori mã shinãima. Nãskarafo yorafo a shinãi fisti anori shinãkanima. Nãskakẽ mã ranã feratenãkakĩma yoinãnãsharakãfe tãpisharaxikakĩ. Fetsafãfe anori mã shinãino, nãskakẽ fetsafãferi anorima shinãi. Nãskakẽ yoinãsharakãfe fato sharamãkĩ.  
\v 20 Ẽ anã mato yoisharapai. Mã Nios yoiti pexe anoax ichanãxokai mã pãa piyanã ayayanã a noko Jesús nãxoni mã shinãima. Askatamaroko mã piai yafi a mã ayai fisti mã shinãmis.  
\v 21 Mẽ nika a mã piai mã feaito mares pixikĩ ichanãxõ ato manayoxoma. A fonãikaifokai mã ato inãima. Nãskakẽ fonãikani. Askatari mã pãemis. Askarakai sharama.  
\v 22 Akka pipaikĩ ichanãti pexe ano kayoxoma ĩkisi mãto pexe anoxõ piyokãfe. Akka mãto pexe anoxõ piyoxomaroko nã Nios yoiti pexe ano mã femis anoxõ mares pixikĩ a fonãikaifo ato akĩxikima. Nãskakẽ a fonãikaifo rãfitirofo. Mã askafakĩ a mato fe ichanãfo mã chakafai. Mã ato noima. ¿Ẽ matoõnoa yoisharaimẽ? Maa. Ẽkai matoõnoa yoisharaima mãmãi ato chakafaito. 
\s1 Jesús noko nãxoni shinãyanã nõ piyanã nõ ayatiro 
\r (Mt. 26.26-29; Mr. 14.22-25; Lc. 22.14-20) 
\p  
\v 23-24 Nãskakẽ nõko Ifo Jesús ea yoini keskara ẽ anã mato yoini. Ea tãpimani keskara ẽri mato tãpimapai. Nõko Ifo Jesús Judaspa ato achimayoamano nã fakish fisti aõxõ tãpimisfo fe ichanãyoni. Nãskaxõ ato feta pikĩ pãa tsomaxõ Apa Nios yoini iskafakĩ: “Epa Niospa, mĩ sharafinakõia. Mĩfi keyokõi tãpiaki. Aicho,” fata pãa torepakexõ ato tii inãni. Nãskaxõ ato anã yoini iskafakĩ: “Na pãafi ẽfe yoraki. Ẽfi matoõnoax chipo naikai mato noikõiax. Mẽ naano nã mã ichanãitĩa nã mã pãa piaitĩa ea shinãfafãikãfe,” ixõ ato yoini.  
\v 25 Nãskaxõ mã piaifono anã kecho tsomaxõ ato yoini iskafakĩ ato ayamayanã: “Afara fena shara ẽ mato yoinõ. Nã mã ayai ẽfe imi. Nãskakẽ mã ea shinãtiro. Ẽfe imi foyanã ẽ matoõnoax nai mã efe Epa Nios ari ĩpaxanõ. Nã nõ akai keskara chipo akãfe mẽ naano nã mã ichanãitĩa ea shinãkĩ,” ixõ ato Jesús yoini.  
\v 26 Nãskakẽ nã mã ichanãitĩa pãa piyanã ayayanã Jesús shinãfafãikãfe: “Nõko Ifãfe noko nãxoni,” shinãyanã. “Nã pãa Jesús ãfe yora,” ixõ shinãfafãikãfe pãa piyanã. Jesús anã oaitĩa nã chanĩmara faifo askapakexanõfo. Ẽ anã oaitĩa nãskaras akãfe. 
\s1 Ichanãifo anoxõ pãa pikĩ nõ Jesús shinãtiro 
\p  
\v 27 Nãskakẽ nã mã ichanãi anoxõ mã pãa piyanã ayayanã mã Jesús shinãtiro. Askafafiakĩkai mãto chaka xatekaspaxõ mãri mã chakafai pãa pixõ. Akka nõko Ifãfe noko nãxoni ãfe yora omiskõiyanã ãfe imi foyanã noko nãxoni. Nãskakẽ nõ ichanãi anoxõ pãa piyanã ayayanã nõko Ifoõnoa shinãkima nõ nõko Ifo nõ chakafai.  
\v 28-32 Nãskakẽ nõ ichanãyanã nõ pãa piyanã nõ ayatiro nõko Ifo shinãyanã. Akka taefakĩ nõ shinãtiro iskafakĩ: “Ẽ afara chakafamis,” ixõ nõ shinãtiro. Akka nõ afara chakafafiaxõ Epa Nios nõ yõkayotiro nõko chaka noko soaxonõ. Nãskaxõ Jesús noko nãxoni nõ shinãkõitiro pãa piyanã. Akka nõ askafayamaito Epa Niospa noko omiskõimani. Akka nã ẽ mato yoiai keskara atiri mã askaima. Nãskakẽ mã iramanai. Ranãri mã isinĩ iki. Nãskatari ranãri mã mã nai. Nãskakẽ nã mã ichanãitĩa pãa piyoxoma afara chakafaxõ ĩkisi Epa Nios yoiyokãfe mato chaka soaxonõ matori omiskõimayamanõ. Akka noko omiskõimafiakĩ a Jesús Ifofaafoma Niospa ato omiskõimanai keskafakĩ noko omiskõimasharaima. Akka afokai ãfe fakefoma. Nãskaxõ omiskõipakenakafo mẽra ato potaxii. Akka nõfi ãfe fakekõifokĩ. Nõko Ifãfe noko omiskõimafiakĩ a omiskõipakenakafo mẽra noko potatamaroko noko omiskõimakĩ noko tãpimani nõ anã chakafanõma. 
\p  
\v 33 Akka mã ichanãxõ pãa pixikĩ ranãrito mã taefakĩ piimis. Nãskakẽ fetsafãfe akairi pipaikani afaa pitirofoma. Akka piyoxoma ato manayokãfe fetsafo feta pixikakĩ. Nãskakẽ mã ato manayotiro keyokõichi pitirofo.  
\v 34 Akka fatora fetsa mã fonãiki ichanãyoxoma mãto pexe anoxõ mã piyotiro. Nãskaxõ mã ichanãxõ mã ichapa piyamaino fetsafãferi pitirofo. Nãskaxõ mã ichanãxõ Jesús shinãkĩ ato feta mã pisharaino Niospa mato omiskõimanima. Afara ichapakõi ẽ mato yoipai. Nãskaxõ ẽ matoki nokoxõ atoõnoa ẽ mato yoisharapai. 
\c 12  
\s1 Jesús Ifofaafãfe Niospa Yõshi Sharaõxõ afarafo atirofo fetsafo fe axõ faatanãsharaxikaki 
\p  
\v 1 Efe yora mĩshtichi, afara fetsa anã ẽ mato yoisharapai. Niospa Yõshi Sharaõxõ afarafo nõ atiroõnoa ẽ mato tãpimapai aõnoa mã tãpisharakõinõ.  
\v 2 Shinãkapo. Mã Jesús Ifofaamano afara fetsa onifakaxõ, “Na nõko niosra,” ikaxõ mato chanĩmara famapaonifo. Mã chanĩmara fafiaino a onifafotokai afaa shinãtirofoma. Askaxorikai afaa pishta mato yoitiroma. Nãskakẽ mã anorima shinãyopaoni.  
\v 3 Askata yora fetsafãfe matoki nokoxõ yoitirofo iskafakakĩ: “Ẽ mato Niospa meka yoinõ. Niospa Yõshi Sharaõxõ ẽ mato yoi,” ixõ mato yoiaito, ¿afeskaxõ mã tãpitiromẽ Niospa Yõshi Sharaõxõ mato yoimãkĩ? Ẽ mato tãpimanõ afeskaxõ mã tãpitiromãkĩ. Fatora yora fẽtsa Jesús mekafakĩ chakafai, akai Niospa Yõshi Sharaõnoax mekaima. Akka, “Jesúsfi nõko Ifokĩ,” ixõ yoi Niospa ãfe Yõshi Sharaõxõ yoitiro. 
\p  
\v 4 Nã nõ Epa Nios Ifofa tii ãfe Yõshi Sharapa noko amapaiyai keskara noko amai. Ares fisti noko shinãmatiro aõxõ nã Nios Ifofaafo fetsafo nõ ato asharaxonõ.  
\v 5 Aõxõ fetsa fetsafakĩ afo akĩ nõko Ifo nõ axotiro. Nã keyokõi Nios chanĩmara faifo tii nõko Ifo fisti.  
\v 6 Nãskakẽ Niospa nã nõ Ifofa tii noko shinãmani aõxõ nõ fetsafo afara axosharanõ. Askatari Niospa keyokõi noko tãpimani a noko axopaiyai keskara noko axõi. Nã nõko Nios fisti anã ano fetsama.  
\v 7 Askatari nõ Nios Ifofaito noko tãpimani ãfe Yõshi Shara nofe iki. Nofe ixõ noko amatiro nã Nios Ifofaifo nõ ato axosharanõ.  
\v 8 Fetsafãfe Niospa Yõshi Sharaõxõ mẽstesharakõi noko yoitiro. Askatari fetsafãfe Niospa Yõshi Sharaõxõ tãpisharakõikĩ noko tãpimasharatiro.  
\v 9 Askatari fetsafori Niospa Yõshi Shara fistiõxõ Nios chanĩmara fakanax finakõia ikafo. Askatari fetsafãferi Niospa Yõshi Sharaõxõ yorafo sharafakani.  
\v 10 Askatari fetsafãferi Niospa Yõshi Shara fistiõxõ tsõa atiroma keskara faino, fetsafãferi Niospa Yõshi Sharaõxõ nã Niospa yoiai keskara noko yoiaifono, fetsafãferi Niospa Yõshi Sharaõxõ tãpitiro fẽtsa niafaka chakaõxõ yoimãkai askayamai Niospa Yõshi Sharaõxõ yoimãkai. Askatari fetsafãferi Niospa Yõshi Sharaõxõ meka fetsa nikayomisma yoitiro. Askatari fetsafãfe meka fetsafãfe noko yoiaito nikafikĩ nõ tãpiyamaito fetsafãferi Niospa Yõshi Sharaõxõ noko yoisharatiro tãpinõfo.  
\v 11 Nã nõ Nios Ifofatifi Niospa Yõshi Shara fistichi noko amapaiyai keskara nõ atiro. Nã noko amapaiyai keskara noko amatiro. 
\s1 Nõfi yora fisti keskaraki 
\p  
\v 12 Nõko yora fistifiano nõ põyayai fetsea. Askata nõ feroyata, pachoyata nã nõ fisti askai fetsea. Nãskarifiai nõ keyokõichi Cristo Ifofaano nã fisti keskarakõi.  
\v 13 Cristo fistifiano nõfi ãfe põya keskarakĩ. Atiri nõ judeofo ikaino mani fetsafori judeofoma ikaino yorafãfe ãto yonomatifo ikaino askatari yorafãfe ãto yonomatifoma ikaino nõ askai fetsea. Nã nõ Cristo chanĩmara faafo tii nõ afe yora ika. Niospa Yõshi Sharapa noko õiti fetsafaax nõ mẽra iki. 
\p  
\v 14 Nõko yora fistifiano nõ põyayai fetsea.  
\v 15 Nãskakẽ nõko tãekai yoikĩ iskafatiroma: “Ẽkai mẽkema. Nãskakẽ ẽkai ãfe afaama,” ixõ yoifi nã nõko tãeri nõko yoraõ nea.  
\v 16 Nãskatari nõko pachori yoikĩ iskafatiroma: “Ẽkai feroma. Nãskakẽ ẽkai ãfe afaama,” ixõ yoifi nã nõko pachori nõko yoraõ nea.  
\v 17 Akka nõko yora nõko fero fistikẽ afeskaxõ nõ nikakeranama. Nãskatari nõko yora nõko pacho fistikẽ afeskaxori nõ xetekeranama.  
\v 18 Akka Niospakai askara noko onifanima. Nã apaiyai keskara fakĩ noko onifani. Mapoya fãta feroya fãta põyaya fãta pachoya fata kishiya fãta noko fani.  
\v 19 Akka nõko yora afara fistiya ikanokai shara ikeranama.  
\v 20 Akka nõko yora fistifiano nõ põyayai fetsea. 
\p  
\v 21 Nãskakẽ nõko fẽrokai mẽke yoikĩ iskafatiroma: “Ẽ mia yopaima,” ixõ yoitiroma. Mãporikai tae yoikĩ iskafatiroma: “Ẽkai mia yopaima,” ixokai yoitiroma. Nãskafakĩri a Nios Ifofaa fetsafo iskafakĩ yoiyamakãfe: “Ẽ mia yopaima,” ixõ yoiyamakãfe. Niospa nã Ifofaafo tii noko noikõia. Nãskakẽri nõa ranã noinãkãfe.  
\v 22 Nõko yora ãfe afara fetsafo mitsisipayamafekẽ nãfori nõ yopakõi.  
\v 23 Nõko yora ãfe afara fetsafo, sharamara, nõ fafiakĩ nãfori nõ kexesharai. Nõko afara fetsafori nõ onesharatiro nõ rãfixikĩma.  
\v 24 Akka nõko yora ãfe afara fetsa sharano nõ onetiroma. Niospa noko yora onifaxoni nõ kexesharanõ. Nãskaxõ nõ yoitiro iskafakĩ: “Ẽfe afara ẽ yopakõi,” ixõ nõ yoitiro. Nãskafakiri fẽtsa a Nios Ifofaa fetsa yoikĩ iskafatiroma: “Nakai afama,” ixõ yoifiaino Nios aõ noikõi. Nãskakẽ noko onifani nã Ifofaafo tii keyokõi nõ yopakõi.  
\v 25 Niospa noko onifani nã Ifofaafo tii keyokõi nõ kexenõnãsharatiro isharaxikĩ nãnori fisti shinãxikĩ.  
\v 26 Akka nõ fanĩra moxaki chachixõ nõ pae meetiro keyokõi nõko yora pãei fetsetiro. Nãskarifakĩ Jesús Ifofaa fetsa omiskõiaito keyokõi nõri shinãmitsatiro. Nãskafakĩ yorafãfe Jesús Ifofaa fetsa sharafakẽ keyokõi nõ afe inimakõitiro. 
\p  
\v 27 Akka nõ Cristo yora keskarakõi. Nãskax nõ ãfe põya keskarafo. Nõ ichapafiax nõ yora fisti keskarakõi.  
\v 28 Nãskaxõ keyokõi nã nõ Jesús Ifofaa tii Epa Niospa noko katoni aõxõ afara fetsa nõ anõ. Akka fetsafori taefakĩ ato katoni Jesucristoõnoa ato yoifofãsafanõfo. Askatari fetsafori katoni ãfe meka yoimis inõfo Niospa ato shinãmanaino. Askatari ato katoni ato tãpimamisfo inõfo. Askatari aõxõ tsõa atiroma keskara amisfo ato katoni. Askatari Niospa Yõshi Sharaõxõ a isinĩ ikaifo ato sharafamisfo ato katoni. Askatari fetsafo ato axomisfo ato katoni. Askatari fetsafo shara yonomamisfo ato katoni. Askatari fetsafãfe ãfe Yõshi Sharaõxõ meka fetsapa yoiyomisma ato katoni ato yoinõ ãfe mekapa. Noko keyokõi katoni aõxõ yorafo nõ axosharanõ.  
\v 29 Niospa keyokõi noko katoni a apaiyai keskara nõ anõ. Akka noko askafafianino keyokõichi Jesucristoõnoa nõ ato yoifofãsafamisma. Askaxori keyokõi noko katonima ãfe meka yoimisfo nõ inõ. Askaxori keyokõi noko katonima aõxõ ato tãpimamisfo nõ inõ. Askaxori keyokõi noko katonima tsõa atiroma keskara aõxõ afama mĩshti nõ fanõ.  
\v 30 Keyokõi noko katonima Jesúsxõ isinĩ ikaifo ato sharafamisfo nõ inõ. Keyokõi noko katonima nã meka fetsapato ãfe Yõshi Sharaõxõ nõ ato yoinõ. Keyokõi noko katonima nã meka fetsa nikaxõ nã yoia keskara nõ ato tãpimanõ.  
\v 31 Nãskakẽ Niospa mato imapaiyai keskara ixõ nã Jesús Ifofaafo mã ato shara faxotaifai. Niospa Yõshi Sharapa mato amapaiyai keskara nãfo fichipaikãfe. Akka nãfo sharafiano ẽ mato afara fetsa sharafinakõia iskaratĩa ẽ mato yoinõ. Ea nikasharakapo. Shara finakõia Niospa noko imapaiyai keskara ẽ mato tãpimanõ, a noko Niospa noiai keskari fakĩ nõri fetsafo noisharakõinõ. 
\c 13  
\s1 Nõ fetsafo nõisharakõitiro 
\p  
\v 1 Ẽfe mekapa ẽ yoifitiroxakĩ, yora fetsafãfe mekapari ẽ yoifitiroxakĩ, Niospa ãfe ãjirifãfe mekapari ẽ yoifitiroxakĩ ẽ Niosxõ yorafo noiyamax ẽkai afaa itiroma. Nãskax ẽ mekai achakõi itiro, fetsafo fekaxtefai keskara ẽ itiro. Nãskafakĩ ẽa ẽ fetsafo axomis keskara ẽ itiroma.  
\v 2 Niospa meka ẽ ato yoifikĩ ẽ ato noiyamax ẽkai afaa itiroma. Askatari fetsafãfe Niospa meka tãpiyamaino akka ẽ tãpikõifixõ ẽ ato noiyamax ẽkai afaa itiroma. Askatari ẽ Nios chanĩmara fakĩ finakõixõ ẽ Niosxõ ẽ nã machi xekafitiroxaki ẽ yorafo noiyamax ẽkai afaa itiroma. Ẽ ato noiyamaino Niospa ea shara õima.  
\v 3 Nãskatari ẽ afama mĩshti nã afaamaisfo keyokõi ẽ ato inãfixõ ẽ ato noiyamax ẽkai afaa itiroma. Askatari Niospa meka shara ẽ ato yoiaito ea nikakaspakakĩ ea koaifono ẽ atoõnoax nafiakĩ ẽ ato noiyamax ẽkai afaa itiroma. Ẽ ato noiyamaino Niospa ea shara õima. 
\p  
\v 4 Nõ yorafo noikõiaino noko fekaxtefaifono nõ atoki õitifishkitiroma, nõ tenetiro. Nãskaxori nõ ato noikõikĩ nõ ato axosharatiro. Askaxori nõ ato noikĩ nõ xĩtipaitiroma. Askatari kakapaimis nõ itiroma. Nõ yorafo noikõikĩ nõ iskatiroma: “Ẽ tãpikõiaki. Ẽ fetsafo keskarama,” ixõ nõ yoitiroma.  
\v 5 Nãskaxori nõ ato noikõikĩ nõ ato rãfinĩfaima. Askaxori nõa apaiyai keskara fistis nõ shinãtiroma. Akka nõ fetsafori nõ ato axosharatiro. Askaxori nõ ato fena feratemisma nõ itiro. Nãskaxori noko fẽtsa chakafakĩ mekafaino nõ shinãtaifatiroma. Afo shinãtamaroko nõ aõ noisharatiro.  
\v 6 Askaxori nõ ato noixõ fetsafãfe afara chakafaito õi nõ inimatiroma. Akka afara chanĩmakõi shara nikai nõ inimakõitiro.  
\v 7 Askaxori afara afe keskararafiaino nõ Nios noikĩ nõ shinãchakatiroma. Nõ tenetiro. Askatari ato noikõikĩ atoõnoa afara chaka yoiaifono nikakĩ nõ chanĩmara fatiroma. Akka fetsafoõnoa chaka nikafixõ nõ tãpixoma, “Afaa chakafayamapainõfora,” ixõ nõ shinãtiro ato noikĩ. Askatari a mẽxotaima chakafaifoõnoa atoõnoa nõ yoitiroma iskafakĩ: “Nãfãfe mẽxotaima afara chakafaifono Niospa ato chaka soaxotiroma,” ixõ nõ yoitiroma. Askatamaroko nõ iskafatiro: “Nios Ifofakakĩ ãto chaka xatetirofo,” ixõ nõ shinãtiro ato noikĩ. Nãskaxori afara afe keskararafiaino nõ Nios noikĩ nõ kachikiri fatiroma. 
\p  
\v 8 Nã Jesús Ifofaafãfe Epa Nios yafi yorafo ato noipakenakafo. Askafiaino nõko mai keyoaino Niospa meka yoimisfãfe anã ato yoixikanima. Askaxori a yõra mekapama meka fetsapa yoimisfãfe anã meka fetsapa yoixikanima. Askaxori nã tãpimamisfãferi anã noko tãpimaxikanima. Mã nõko Ifo nokoaino nõ anã ato yopaxiima noko axonõfo.  
\v 9 Nãskakẽ iskaratĩa Niospa noko tãpimanai keskara nõ tãpisharayoama. A Niospa meka noko yoimisfãfe keyokõi tãpisharafoma.  
\v 10 Mã Jesucristo nokoaino nõ a keskara shara ixii. Aatofi keyokõi tãpiakĩ. A tãpia keskara nokori tãpimaxii. 
\p  
\v 11 Akka ẽ yomeax ẽfe meka fãke meka keskara ẽ iyopaoni. Fakefãfe metiro keskarari ẽ meyopaoni. Fakefãfe shinãtiro keskarari ẽ shinãyopaoni. Iskaratĩa mẽ yosixõ fakefãfe shinãi keskara ẽ anã shinãima. Fakefãfe ichapa tãpiama. Akka ẽ iskaratĩa mẽ yosiax fakefo keskara anã ẽ ikima. Iskaratĩa ẽ feronãfakekõi ẽ anã fakefo keskarama.  
\v 12 Feisiti fetakõikẽ nõko femãnã nõ õisharatiroma. Nãskarari Jesús nõ õitiroma afe keskara ikamãkĩ. Akka nã oaitĩa nõ õixii afe keskaramãkĩ. Akka iskaratĩa nõ tãpisharayoama. Akka Jesús oaino nõ tãpisharakõixii. Jesús noko tãpikõia keskarari nõri tãpikõixii.  
\v 13 Iskaratĩa nõ Nios chanĩmara fai. Nõ Nios chanĩmara faxõ nõ manai nã oaitĩa afe ipaxakĩ. Nõ Nios chanĩmara fai nã shara. Askatari afe ipaxakĩ nõ manaino nãri shara. Askatari nõ fetsafo noikõia nãfi sharafinakõiaki. 
\c 14  
\s1 Niospa Yõshi Sharapa noko amapaiyai keskara anã Pablo yoini 
\p  
\v 1 Nã Niospa noko noiai keskafakĩ fetsafori noitaifakãfe. Nãskara sharakõi. Nãskara fichipaikãfe askaxikakĩ. Askatari Niospa Yõshi Sharapa afara fetsa mato amapaiyai keskara nõ fetsafo fe axoshara faatanãnõ, afori fichipaikãfe. Niospa Yõshi Sharaõxõ nã Niospa meka mã ato yoinõ fichipaikõikãfe.  
\v 2 Askatari fẽtsa Niospa Yõshi Sharaõxõ meka fetsapato yoikĩ yorafo yoitama Niosroko yoitiro. Niospa Yõshi Sharaõxõ yoifiaitokai tsõa tãpitiroma.  
\v 3 Askatari fẽtsari Niospa meka shara noko yoikĩ noko tãpimasharatiro nõ Jesús Ifofasharanõ. Askata nõko õiti noko fepeaxosharatiro nõko õiti mẽra nõ inimanõ afara afeskarafiaino.  
\v 4 Askatari fẽtsa Niospa Yõshi Sharaõxõ meka fetsapato yoikĩ ãa metiro ãfe õiti fepeaka keskara. Askatari fẽtsa nõko mekapa Niospa meka shara noko yoisharaito nõ keyokõichi nikatiro. Nãskakẽ Niospa noko yoiai keskara nikasharax nõko õiti fepeaka keskara shara nõ itiro. 
\p  
\v 5 Mã keyokõichi nã meka fetsapato Niospa Yõshi Sharaõxõ mã yoipainõ. Nãskara sharafiano akka fẽtsa mãto mekapa mato tãpimasharai nãfi sharafinakõiaki. Akka fẽtsari meka fetsapato mato yoiaito mã nikatiroma tsõa mato yoiyamaino. Akka nã mato yoiai keskara fẽtsari mato tãpimatiro mã tãpinõ. Nikai mãto õiti fepeaka keskara shara itiro.  
\v 6 Efe yora mĩshtichi, meka fetsapato ẽ mato yoiaito mã nikayamax nã mekakai mãtonã afama. Nãskakẽ nã ẽ mato yoiai keskara Niosxõ mãto mekakõichi ẽ mato tãpimatiro Niospa mato yoipaiyai keskara mã tãpinõ. 
\p  
\v 7 Shinãkãpo, meka fetsa ẽ mato yoinõ. Xãiti anorima maneaito nõ nikasharatiroma fatomãkĩ xafakĩa maneaifo.  
\v 8 Askatari soraro fẽtsa nã kexemisto ãfe põõiti põõatiro ãfe sorarofo itipinĩsharanõfo ato reteifoxikakĩ. Askafafiakĩ põõasharamano tsõa tãpitiroma. Nãskakẽ tsoa itipinĩsharatiroma ato reteifoxikakĩ.  
\v 9 Askatari meka fetsapa mã fetsafo yoiaino afeska faxõkai mã yoiai keskara tsõa tãpitirofoma. Mã askara mekapa mekai mãakõi mã mekai tsõa mato nikayamafiaino.  
\v 10 Akka nã maitio ikafo meka fetsapa mekakani. Akka nõ ato nikatiroma. Ãto kaifãfe meka fisti nikatirofo. Nãskax keyokõi meka shara.  
\v 11 Akka ẽfe mekapa ẽ ato yoiaito yora fetsafãfe tãpitirofoma. Ẽkairoko ãto kaifãfe mekapa yoiaito ea nikafo. Akka ẽ ãto meka tãpiamax ẽ ãto kaifo keskara itiroma.  
\v 12 Nãskakẽ Niospa Yõshi Sharapa mato afara fetsa amapaiyai keskara nãfo mã fichipaikõitiro. Mato askafaino aõxõ nã Jesús Ifofaafo mã ato õiti fepeaxosharakõitiro Jesús Ifofasharanõfo. Nãskara fichipaikãfe Nios yonosharaxoxikakĩ. 
\p  
\v 13 Nãskakẽ Niospa Yõshi Sharaõxõ meka fetsapato yoikĩ Epa Nios kĩfikãfe nã mã yoiai keskara mato tãpimanõ. Mã tãpisharaxõ atori mã ato tãpimatiro akairi nikakõisharanõfo.  
\v 14 Nãskakẽ Niospa Yõshi Sharaõxõ meka fetsapato nõ Nios kĩfikĩ nõko shinãmã shinãxõ nõ kĩfima.  
\v 15 Akka Niospa Yõshi Sharaõxõ meka fetsapato ẽ Nios kĩfitiro. Askatari yorafãfe mekakõichiri ẽ Nios kĩfitiro keyokõichi nikanõfo. Askatari meka fetsapa fanãitiro. Askatari yorafãfe mekapari ẽ fanãitiro keyokõichi nikanõfo.  
\v 16 Mã Niospa Yõshi Sharaõxõ meka fetsapa Epa Niosnoa mã yoifiaito afeskaxokai a mato fe ichanãfãfe yoitirofoma iskafakakĩ: “Chanĩmakõi mã yoi,” mato fatirofoma tsõakairoko mãto meka tãpixõ.  
\v 17 Mã meka fetsapato Nios aicho fafiakĩ fetsafo mã ato õiti fepeaxosharatiroma mato nikafiaifono mãmãi meka fetsapato yoikĩ.  
\v 18 Efe yora mĩshtichi, Niospa Yõshi Sharaõxõ yõra mekapama meka fetsapa mato finõinĩfofãta ẽ yoimiskĩ. Nãskakẽ ẽ Epa Nios aicho fai.  
\v 19 Askafia a Jesús Ifofaafoya fetsafori ẽ ãto yoipai ea nikanõfo. Ichanãti pexe anoxõ ato ichanãfaxõ ãto mekakõichi ẽ ato yoipai meka ichapama ẽ yoifiaito. Nãskarafi sharakĩ. Akka yõra mekapama meka fetsapa ẽ ato yoiaito ea nikatirofoma meka ichapa ẽ ato yoifiaito. Nãskakẽ mekakõichi ẽ ato yoipai ea nikanõfo. 
\p  
\v 20 Efe yora mĩshtichi, ẽ mato tãpimapaiyai keskara tãpisharakãfe. Fake yomẽ tãpisharayoxoma, shinãsharatiroma. Nãskarifakĩ fake yomẽ shinãi keskara shinãyamakãfe. Mẽstekõi shinãkãfe. Akka yora xinifãfe chaka shinãtirofo. Akka fake yomefãfekai chaka shinãtiroma. Nãskakẽ fake yome keskara ikãfe. Afara chaka tãpipaiyamakãfe.  
\v 21 Isaías Niospa meka yoikĩ keneni iskafakĩ: 
\pi1 Nã israelifo ẽ ato yoifiaito ea nikakaspamisfo. Nãskakẽ ẽ ato kaxpakõi yoimis. Nãskaifãfe õikĩ ãto kaifoma ẽ atoki nĩchikẽ, ãto mekapa ato yoiaifãfe ato nikakanima meka fẽtsapamãi yoiafono. Ato yoifiaifonokai ato nikakanima, 
\m ixõ Isaías kirika keneni Niospa meka yoikĩ.  
\v 22 Nãskakẽ yõra mekapama nõ meka fetsapa ato yoiaito a Nios Ifofaafãfema noko nikatirofoma. Nãskakẽ Niospa ato õimani afãfekai Niospa meka tãpitirofoma Nios chanĩmara fayamakaxõ. Akka Nios Ifofaafãfe Niospa meka tãpitirofo. Askata ichanãxõ ãto mekakõichi nõ ato Niospa meka yoiaino Niospa Yõshi Sharaõxõ nikasharatirofo. Akka nã chanĩmara faafãfema nikasharakanima ãto mekakõichi nõ ato yoifiaino.  
\v 23 Nãskakẽ ichanãx yõra mekapama meka fetsapa mã mekaino a Nios chanĩmara faafoma fe a mato fe yoramafori mato fe ichanãxõ mato nikakakĩ shinãtirofo iskafakakĩ: “Õikapo, nã yorafo nã afaa shinãifoma keskarafo,” ikanax yoinãtirofo.  
\v 24-25 Nãskata mã ichanãxõ Niospa meka mã yoisharaito a Nios chanĩmara faafoma fe a nofe yoramafori mato nikakaxõ ãto õiti mẽraxõ shinãtirofo iskakakĩ: “Ooa, nõri Niospa yoiai keskara nõ amisma. Niospa keyokõi tãpikõia. Nõko shinã mẽraxõ nõ afara pishta fomãpaimisfo Niospa tãpikõia. Chipo noko kãimaxoxii,” ixõ shinãtirofo. Nãskaxõ shinãtirofo Niospa meka mẽstesharakõikĩ. Anori shinãkakĩ ratokonõ mai chachixõ Epa Nios kĩfitirofo iskafakakĩ: “Epa Niospa, mĩ sharafinakõia. Na mia chanĩmara faafo fe mĩ ika keskai nõri mefe ipai,” ixõ kĩfitirofo. 
\s1 Pablo ato yoini nõ ichanãx nõ afeskatiromãki 
\p  
\v 26 Efe yora mĩshtichi, ẽ mato yoipai iskafakĩ ẽ mato tãpimapai. Mã ichanãino fẽtsa mato fanãixotiro. Fẽtsari mato Niospa meka yoitiro. Fẽtsari Niospa Yõshi Sharaõxõ meka fetsapa mato yoitiro. Fẽtsari Niospa Yõshi Sharaõxõ a meka fetsapato mato yoiaifo mato tãpimatirofo. Nãskakẽ nã ẽ yoiai keskara asharakãfe. Nãskax mã ranã mã õiti fepeasharatiro.  
\v 27 Mã ichanãino yora ichapama a yõra mekapama meka fetsapa mekapai mekatirofo. Nãskakẽ fetsa mekai taetiro. Askatari fetsari chipo mekatiro. Akka meka fetsapato mato yoiaito fẽtsari mãto mekapa xafakĩa mato tãpimatiro a mato yoiai keskara mã nikasharanõ.  
\v 28 Akka yõra mekapama meka fetsapato mã yoipaiyaito tsõa nikatiroma. Akka a ato tãpimatirofo ano ikafomano meka fetsapa mã ato yoitiroma. Akka mãto pexe anoax mares fisti mã mekatiro yõra mekapama Epa Nios fe. 
\p  
\v 29 Mã ichanãino nã Niospa meka yoimis rafeta Niospa meka mato yoitirofo. A yoiai keskara nikakaxõ nã Jesús Ifofaifãfe shinãtiro iskafakakĩ: “Niospa Yõshi Sharaõxõ noko yoi,” askayamai, “Ãa shinãxõ noko yoira,” ixõ shinãtirofo.  
\v 30 Askaxõ fẽtsa Niospa meka mato yoiyoaino fetsari tsaoano Niospa Yõshi Sharapa shinãmanaino mato yoipaikĩ yoitiro. Akka a taefakĩ yoiato tsaoxõ nikatiro.  
\v 31 Nãskakẽ Niospa Yõshi Sharapa mato shinãmanai keskara fẽtsa yoikĩ taefatiro fẽtsari chipo yoitiro. Askatari fẽtsari yoitiro. Nãskaifono nã ichanãfãfe keyokõichi ato nikatirofo. Nãskaxõ ato õiti fepeaxosharakani.  
\v 32 Nã Niospa meka ato yoiaito ãfe shinã mẽraxõ shinãtiro iskafakĩ: “Fẽtsari ato yoipai kiki ikax xatetiro.”  
\v 33 Askaxõ ichanãxõ rafekaita ato yoiaifono tsõa ato nikasharatiroma. Nãskakẽ ãto õiti fekaxtefatirofo. Askarakai Niospa fichipaima. Akka Niospa fichipai nã ichanãfo anoxõ rafekaita ato yoiyamaino fistichi ato yoinõ nikasharakõinõfo. 
\p  
\v 34 Askatari afara fetsari ẽ mato yoisharapai. Nios Ifofaafo ichanãifo anoax xotofakefo mekatirofoma. Niospa meka yoimisto yoiaino xotofakefãfe nikakõitirofo. Mekatamaroko nã Niospa meka yoiai keskara nikasharaxikakĩ. Nãnori taeyoi Niospa meka yoikakĩ kirikaki kenenifo.  
\v 35 Nã ichanãkaxõ nikafo keskara xotofakefãfe tãpisharaxoma ãto fene yõkapaikakĩ manayotirofo. Akka ãto pexe ano nokokaxõ ãto fenefo yõkatirofo ãto fenefãfe ato tãpimanõ. Nãskakẽ mã ichanãino xotofakefo mekaifokai sharama. 
\p  
\v 36 Akka Epa Niospa yoipaiyai keskara mato fisti taefakĩ tãpimanima. Niospa meka yoimisfo matoki fisti fenifoma Niospa meka yoifekani. Fetsafori yoifekani fenifo.  
\v 37 Akka fatora fẽtsa mã yoikĩ iskafatiro: “Nõ Niospa meka ato yoimis. Askatari nõ Niospa Yõshi Sharaõxõ nã Nios Ifofaafo nõ afara fetsa ato axosharatiro,” ixõ mã yoikĩ mã tãpitiro nã ẽ mato kenexonai keskara nõko Ifãfe mato yoia mã anõ.  
\v 38 Fẽtsa anorima mato yoiaito nikayamakãfe.  
\v 39 Nãskakẽ efe yora mĩshtichi, nã mã ichanãi anoxõ Niospa meka ato yoipaikãfe. Nã sharakõikĩ. Akka fẽtsa yõra mekapama meka fetsapa Niospa Yõshi Sharaõxõ mato yoipaiyaito xatemayamakãfe.  
\v 40 Akka mã ichanãino fẽtsa taefakĩ yoitiro. Askatari fẽtsari chipo yoitiro nã yoiaifo keskara mã nikasharakõinõ. Mã askaino mãto õiti fekaxteima. 
\c 15  
\s1 Cristo nafiax anã otoni 
\p  
\v 1-2 Efe yora mĩshtichi, iskaratĩa meka shara Jesúsnoa ẽ mato yoimis keskara ẽ anã mato shinãmapai. Ẽ mato Jesúsnoa yoiaino mã chanĩmara fani. Mã chanĩmara faito Jesús mato chaka soaxoni mã afe ĩpaxanõ. Akka ẽ mato yoini keskara mãkai kachikiri famisma. Akka mã kachikiri faino ẽa kaxpa mato yoikerani. 
\p  
\v 3-7 Yorafãfe ea meka sharafinakõia yoiyonifo. Nãskakẽ ẽri mato yoini iskafakĩ: Cristo noko nãxoni nõko chaka noko soaxoxiki. Akka Cristo tres nia maiyoni. Askata anã otoni. Mã otoax Pedroki nokoi taeni. Nãskatari chipo a aõxõ tãpimisfokiri nokoni. Askatari nã chanĩmara faafoki yorafã rasifokiri nokoni. Akka fisti rasi nãpaifono, akka ranãri nanifoma. Nãskatari chipo Santiagoki nõko Ifo nokoni. Askatari a aõnoa ãfe meka yoimisfoki nokoni. 
\p  
\v 8 Akka chipokõi ekeki Jesús nokoni. Ẽkai aõnoa afaa tãpiyopaonima. Akka fetsafãfe mẽxotaima nikayopaonifo. Nãskakẽ chanĩmara fakĩ taefanifo. Akka ẽ afe niyopaonima taeyoi a fetsafo ikai keskai. Ẽ askafiaino ea Jesús katoni chipo. Ekeki nokoxõ ea yoiaito ẽ koshi Ifofani.  
\v 9 Akka ẽ chakafayopaoni keskara Jesús Ifofaa fetsafãfe chakafamisfoma. Akka ẽ afara chakafakĩ finayopaoni. A Jesús Ifofaafo ẽ ato omiskõimayopaoni. A afe yorafo ẽ chakafayopaonifikẽ Jesús ea noikĩ ea nĩchini aõnoa ẽ ato yoinõ.  
\v 10 Niospa ea noixõ ea katoni a apaiyai keskara ẽ anõ. Nãskakẽ nã ea amapaiyai keskara mẽ amis. Akka ea kaxpakõi katonima. Nã aõxõ yonoxomisfo keskafakĩ ẽ yonoxokĩ finakõimis. Akka ẽakõi ẽ yonoxomisma. Ea noikĩ Niospa ea katoni ẽ Jesús yonoxomis inõ.  
\v 11 Akka ẽ Jesúsnoa yoimis iyamai fetsafãfe mato Jesúsnoa yoimis itirofo nãnori fisti nõ mato yoimis. Nãskakẽ nã Jesúsnoa fisti nõ mato yoimis keskara nikakĩ mã mã Jesús chanĩmara faa. 
\s1 Namisfo otoxikani 
\p  
\v 12 Nõ mato yoimis iskafakĩ: “Cristo noko naxõfinixakĩ mã anã otoni,” ixõ nõ mato yoimis. Akka, ¿afeskakĩ atirito mã yoikĩ iskafamismẽ? “Yora naax anã ototiroma,” ixõ mã anorima yoimis.  
\v 13 Akka yora naax ototirokẽma Cristori otokeranima. Akka nõ tãpia yora naax ototirokẽ nãskakẽ Cristo otoni.  
\v 14 Akka Cristo otoyamanikẽ kaxpa aõnoa nõ mato yoikerana. Nãskakẽ kaxpakõi mã chanĩmara fakerana. Akka chanĩma Cristo naax otoni.  
\v 15 Akka Cristo otoyamanikẽ nõ mato pãrakerana. Akka nõ mato yoimis iskafakĩ: “Epa Niospa Fake Jesús otofani,” ixõ nõ mato yoimis. Yora naax ototirokẽma Epa Niospa Cristo otofakeranima.  
\v 16 A naafo otoyamaino Cristori otokeranima.  
\v 17 Cristo otoyamanikẽ kaxpakõi mã chanĩmara fakerana. Mãto chaka mato soaxokeranama.  
\v 18 Akka Cristo otoyamanikẽkai nõri naax nõ otokeranama. Askax nõ afe nĩpakeranama.  
\v 19 Nono mai anoxõ niyoxõ nõ shinãkĩ iskafakerana: “Ẽ naax Cristo otoni keskai ẽri otoxii ea Niospa otofaano,” ixõ nõ shinãfiax Cristo otoyamanikẽ nãskakẽ kaxpa nõ chanĩmara fakerana. Akka Cristo otoyamanikẽ chanĩmayamakẽ, “Afaa tãpiafoma,” noko fakeranafo nokoõnoa shinãchakakõikeranafo. 
\p  
\v 20 Akka chanĩmakõi, Cristo otoi taeni. Anã naxiima. Nãskakẽ Cristo otonino nã chanĩmara faafo nakanax otoxikani afe ipaxakakĩ.  
\v 21-22 Akka Adán Niospa onifakĩ taefani. Adán taefakĩ afara chakafani. Nãskakẽ afara chakafaax nani. Akka nã feronãfakeõnoax keyokõi nãpamisfo. Nãskarifiai nã feronãfake Cristoõnoax nã chanĩmara faafo ototirofo afe nĩpaxikakĩ.  
\v 23 Cristo otoi taeni nĩpaxakĩ. Nã anã oaitĩa keyokõi afe yorafo otofaxii afe nĩpaxanõfo.  
\v 24 Nãskatari nono mai anoafo keyoxikani. Nãskatari Cristo keyokõi xanĩfofo potaxii anã xanĩfo inõfoma. Askatari niafakafãfe ãto xanĩfofori potaxii. A niafakafãfe ãto xanĩfo finakõiari potaxii. Cristo ato potano anã ato yonomapakenakafoma. Nãskaxõ Cristo Apa Nios yoikĩ iskafaxii: “Mã yorafo keyokõi ãto xanĩfo mĩ itiro. Ẽ anã ãto xanĩfo ikima,” ixõ Apa yoixii.  
\v 25 Akka iskaratĩa Cristo nõko xanĩfo iyoa. Nã xanĩfo fetsafo a Cristo nikakaspaifo Niospa anã ato afaa imaxiima. Cristo nãmãri ato nĩchixii. Nãskatari Epa Nios xanĩfokõi ipanaka.  
\v 26 Akka Niospa Satanás omiskõipakenakafo mẽra potaxii. Akka nã Satanás Adán afara chakafamanino keyokõichi nõ afara chakafaax nõ napanaka. Nãskakẽ Niospa Satanás omiskõipakenakafo mẽra potano anã tsoa nanakama.  
\v 27 Nãskaxõ Niospa ãfe Fake Cristo nãmãri keyokõi ato nima. Akka mã nõ tãpia Apa Nios fisti ãfe Fake nãmã ikama nãatomãi nãmã keyokõi ato nimax.  
\v 28 Keyokõi Niospa Fake nãmã ikafono Apaõxõ ato yonomatiro. Nãskaxõ ãfe Fãke Apa yoixii iskafakĩ: “Epa mĩri ea yonomatiro,” ixõ yoixii. Nã Apa yoiai keskara nikasharakõi. Nãskakẽ Apa Nios fistichi keyokõi yonomaxii ãto xanĩfo finakõimãiaxõ. 
\p  
\v 29 Akka yora maotisamisma naano fẽtsa maotisaxotiro. Nãskara mã feyafamisfo. Akka yora naax otoyamanikẽkai tsõa ato maotisanoxokeranama. Tsoa otoyamanikẽ nõri ototiroma. Akka, ¿afeskai nõ maotisaxonimẽ nõ otoyamafi? Akka nõ tãpia mã nõ naax nõ anã otoxiai.  
\v 30 Akka tsoa otoyamanikẽkai ẽri otokeranama. Nãskakẽ, ¿afeskai mẽxotaima Cristoõnoax mesekõi mẽra ẽ kafãsaimẽ ẽ otoyamafi? Akka ẽ tãpia a ẽ otoxiai. Nãskakẽ mẽxotaima ẽ Cristoõnoax mesekõi mẽra kafãsai Cristoõnoa ato yoifofãsafai.  
\v 31 Nãskakẽri ẽ fetsafo matoõnoa yoisharamis mãmãi eõxõ nõko Ifo Jesucristo mã Ifosharafaino. Efe yora mĩshtichi, chanĩma ẽ mato yoi mẽxotaima Cristoõxõ ea retepaikani.  
\v 32 Poomãnã noko pipaiyai keskara nã Efeso anoafãfe ea retepainifo, a Cristo nikakaspaifãfe. Akka Cristoõnoax ẽ naax ẽ otoyamax kaxpa ẽ aõnoax nakerana. Askatari ẽ ato Cristo Ifofamano nakanax tsoa otoyamaino kaxpa ẽ ato Cristo Ifofamakerana. Nõ naax anã otoyamafixixakĩ nã nõ apaiyai keskara nõ anõkãfe. Nãskakẽ fetsafãfe yoikakĩ iskafakani: “Nõ nayoxoma nõ piyanã nõ ayayoi inimayanã. Nõ Nios shinãtama nã nõ apaiyai keskara nõ ayoi,” ixõ shinãkani anorima. Akka nõ naax nõ anã otoxii. Nãskakĩ nõ nayoxoma Niospa noko amapaiyai keskara nõ anõkãfe. 
\p  
\v 33 Niosnoa yora chakafãfe mato pãramisfo. ato fe rafeyamakãfe. Yora chakafo fe mã rafeaito matori afara chakafamatirofoki.  
\v 34 A mã anorima shinãmis anã shinãyamakãfe. Chakafakĩ xatekãfe. Atiritokai mã Nios tãpisharama. Nãskax mã rãfipaitiro. 
\s1 Nõ naax anã nõ otoaitĩa nõko yora fetsa keskara ixii 
\p  
\v 35 Akka yoikĩ iskafakani: “¿Afeskaxõ Niospa naafo otofaxiimẽ? ¿Anã nõ otonõ afe keskara yoraya noko imaimẽ?” ixõ yoikani. Anori yoikakĩ afaa shinãkanima. Akka shara shinãsharakakĩ tãpitirofo.  
\v 36 Nõ ifi exe fanano ãfe xaka payokometiro. Akka ãfe exe oke mẽranoa pishta payokometiroma chipo foaitiro. Maiax ãfe exe xaka naamax ãfe exe pishta foaitiroma.  
\v 37 Akka nõ afara fanakĩ nõ ãfe kayafoya fanatiroma. Ãfe exe fisti nõ fanatiro. Mã ãfe xaka payokomeaino ãfe exe foaitiro. Nãskax mã foaikax anã ãfe exe keskara itiroma. Fetsa keskara itiro.  
\v 38 Nã ifi exe nõ fanano Niospa foaimasharatiro. Nã apaiyai keskafakĩ fanafo fetsa fetsatapafo fai. 
\p  
\v 39 Akka nõko yorari yoinãto yora keskarama. Nõko yora fetsa keskara. Yoinãnã fetsa keskarafono peyafonãri fetsa keskarafo. Foenãri fetsa keskarafo. Akka nã yora fisti keskara Niospa noko onifanima, fetsa fetsatapafo Niospa noko onifani.  
\v 40 Akka nõko mai anoafãfe ãto yorafo fetsa keskarafo. Askatari Epa Nios ari anoafori nai mẽranoafãfe ãto yorafori fetsa keskarafo. Keyokõi sharafiax askarafoma.  
\v 41 Akka xini ikaino oxe ikaino fishifo ikaino nã yora fisti keskarama fetsa keskarafo. Nãfo sharafiax askarafoma. 
\p  
\v 42 Nãskarifiai yora naino ãfe yora payokometiro. Anã nõ otoaxkai nõko yora payokomenakama. Nãskara shara nõ ipanaka anãkai nõ nanakama.  
\v 43 Nõko yora maia anoax chakakõi ixii. Akka nõ otoax sharakõi nõ ipanaka. Nõ nono mai ano niyoax nõ iramanapakeax nõ natiro. Nõ anã otoaxkai nõ anã nanakama, mitsisipa shara nõ ipanaka.  
\v 44 Nõ naano noko maifafono nõko yora payokomei. Akka nõ otoano Niospa noko nimaxii afe ĩpaxanõfo. Akka nõ mai ano niyoax nõ natiro. Akka mã nõ naax anã nõ otoax nõko yora fetsa keskara ixii. Nõ anã nanakama.  
\v 45 Niospa meka yõra kenekĩ iskafani: “Feronãfake Adán Niospa onifakĩ taefani. Onifaxõ xãka ikai fani,” ixõ yõra kirikaki keneni. Akka Cristori Adán keskara feronãfake. Feronãfakekõixõ noko nimapakenaka. Nõ naax anã otoax nõ anã natiroma.  
\v 46 Niospa feronãfake Adán onifakĩ taefani. Chipo Cristori kãini noko nimapakexakĩ.  
\v 47 Niospa nã feronãfake Adán onifakĩ taefani. Mai yorafaxõ onifani. Akka Cristo nai mẽranoax nokoki fotoni. Tsõakai Cristo onifanima.  
\v 48 Akka nono mai anoax nõ kãiax nõko yora Adán yora keskara. Nõ Jesús Ifofaax nã keskara nõ ixii.  
\v 49 Nõ nono mai anoax fake kãini. Nãskax nõ Adán keskarakõi. Askatari nõ Niospa yora ikax nõ Jesucristo keskarakõi ixii. 
\p  
\v 50 Efe yora mĩshtichi, ẽ mato yoinõ nõ afeskax iximãkai. Nõ iskaratĩa namiya. Askatari nõ imiya. Nãskara yorayax Nios fe nõ ipanakama. Akka nõko yora natiro nõ anã otoxixakĩ. Nõ anã otoax nõko yora fetsa keskara ixii. Nãskakẽ nõ anã nanakama.  
\v 51 Tsõakai nikayomisma na meka shara ẽ mato yoi. Tãpipaikĩ ea nikasharakãfe. Akka nõkai atiri naima. Askafiax nõ keyokõi fetsa keskara iki fetsexii.  
\v 52 Jesús anã oaino ãfe ãjirinĩ ãfe maneti maneaino Jesús chanĩmara faafo, a nayoamafo, fetsa keskara ĩtaxikani. Fetsoitanai keskarataxikani fetsa keskara ĩtãxikani. Askatari Jesús chanĩmara faax namisfori otorisataxikani. Nãskakẽ keyokõi Jesús chanĩmara faafo tii fetsa keskara ixikani. Askax anã nanakafoma.  
\v 53 Nõ iskaratĩa naino nõko yora payokometiro. Askafiano Niospa nõko yora noko fetsafaxoxii nõ anã nanõma, nõ afe nĩpaxanõ.  
\v 54 Nãnori Niospa meka yoikakĩ kirika kenenifo. Nã yoinifo keskara chanĩmakõi ixii. Iskafakakĩ kirika kenenifo yoikakĩ: “Aicho. Anãkai Niospa yorafo nanakama. Cristoõnoax nõ afe isharapakenakaki,” ixõ kirika kenenifo.  
\v 55 Askatari kenenifo iskafakĩ: “Anãkai afanã noko namatiroma. Anãkai nõ nai omiskõinakama,” ixõ kirika kenenifo.  
\v 56 Nõ afara chakafamisnoax nõ nai nõ omiskõitiro. Nãskakẽ nã Moisés noko yoinioxõ nõ tãpitiro afara chakafaax nõ natiro. Naax nõ omiskõixii.  
\v 57 Akka Jesucristo noko nãxoni noko chaka soaxoxiki. Nãskakẽ nõ Jesucristo Ifofaax nõ nafiax nõ anã otoax nõ anã nanakama. Nõ afe nĩpanaka. Nãskakẽ nõ Epa Nios aicho fai. 
\p  
\v 58 Akka efe yora mĩshtichi, afara fetsa shinãyamakãfe. Niospa noko imapaiyai keskara nã fisti shinãsharakãfe. Jesús Ifofasharakãfe. Nõko Ifo Jesús yonoxosharafafãikãfe. Mã mã tãpia nõko Ifoõxõ nõ yonoai kaxpa nõ yonomisma, nõko Ifomãi noko amakẽ. Nãskakẽ nõ aõxõ ato axosharatiro nõ kaxpa ato axõima. 
\c 16  
\s1 Nã Nios Ifofaafãfe kori ichafaxõ Nios Ifofaafo fetsafo fomani 
\p  
\v 1 Iskaratĩa mã ea yõkaita, afara fetsa kirikaki kenexõ ẽ mato yoi. Nios Ifofaafo Jerusalén anoafo afaamais. Ato noikĩ mã ato afara fomatiro. Akka nã Nios Ifofaafo Galacia anoafo ẽ ato yoia keskara ẽ matori yoipai nã afaamaisfo afarafo mã ato inãsharanõ.  
\v 2 Nomĩkotĩa ichanãi mã kori ichafaxõ chipo Jerusalén anoa mã ato fomatiro. Yonoxõ kori fĩta atiri mã ato inãtiro. Akka mã kori ichapama fixõ ichapamari mã ato inãtiro. Akka mã ichapa fixõ ichapari ato inãkãfe. Nomĩkotĩa ichanãi mã kori ichafatiro, ea manakima kori ichafayokãfe. Nã ẽ matoki nokoaitĩa mã anã kori meketiroma. Nã kori mã ichafaa nã Jerusalén anoafo afaamaisfo mã ato fomatiro mẽ Corinto ano matoki oano.  
\v 3 Nãskano feronãfake sharakõifo katokãfe afãfe nã afaamaisfo ato kori foxotanõfo Jerusalén anoafo. Nãskatari ẽ Corinto ano nokoxõ Jerusalén anoafo ẽ kirika kenexõ ẽ ato fomanõ. Nã feronãfake sharakõifãfe ato foxotanõfo. Akka nã feronãfakefãfe nofeta Jesús Ifofaafo. Nãskakẽ ato ifisharakãfe ixõ ẽ kirika kenei nã feronãfakefo sharakõifãfe foxonõfo Jerusalén anoxõ Jesús Ifofaafãfe ato tãpinõfo.  
\v 4 Niospa ea nĩchipaiyaino nã feronãfakefo mã katoa efe fotirofo. 
\s1 Pablo Corinto ano kapaikĩ ato yoini 
\p  
\v 5 Ẽ Macedonia finõfainikai ẽ matoki Corinto ano nokoikai.  
\v 6 Ẽtsa, ẽ ano mato fe samaraka pishtayotiro rakikĩa. Askayamai ẽ mato feta mechaka fisti finõyotiro rakikĩa. Nãskakẽ ẽ matoki nokoaino mã ea axosharayotiro. Askatari mẽ kaino mã ea nĩchitiro ẽ kasharatanõ.  
\v 7 Ẽkai mato finõfaipaima. Niospa ea nẽtefayopaiyaino ẽ mato ano nẽteyotiro. 
\p  
\v 8 Askafiax ẽ nono Efeso ano iyoi nã nõko fista ãfe ane Pentecostés ikaitĩa.  
\v 9 Nonoxõ yorafãfe nõko Ifoõnoa nikapaikani. Nãskakẽ ẽ nonoxõ nõko Ifoõnoa ẽ ato yoisharayoi chanĩmara fanõfo. Ẽ nõko Ifoõnoa ato yoifiaito atirifãfe ea xatemapaikani ẽ Jesúsnoa yoiyamanõ. 
\p  
\v 10 Akka ẽ nõko Ifo yonoxomis keskafakĩ Timoteori nõko Ifo yonoxomis. Nãskakẽ matoki Timoteo nokoaino kexesharakãfe akiki inimayanã.  
\v 11 Nãskakẽ, “Mĩ afaamara,” fayamakãfe. Nãskax mato anoax ekeki oaino nĩchisharakãfe inimayanã ekeki nokonõ. Nios Ifofaa fetsafo fe ekeki nokoyonõ ẽ anã ato fe rafesharanõ. 
\p  
\v 12 Askatari iskaratĩa nofe yora Apolosõnoa ẽ mato yoi. Ẽ Apolos yoia iskafakĩ: “Corinto anoafo õiyotãfe,” ẽ faito ea yoia iskafakĩ: “Ẽ iskaratĩa kayotiroma. Niospa ea nĩchipaiyaitĩa ẽ katiro,” ixõ ea yoia. 
\s1 Pablo mã mekai xatekĩ Corinto anoafo ato meka fomani 
\p  
\v 13 Jesús shinãfafãikãfe chakafakakĩma. Jesús Ifofasharakãfe. Jesús chanĩmara faax afara afeskarafiaito rateyamakãfe. Kachikirifayamakãfe.  
\v 14 Afarafo mã akai keskara Nios yafi yorafo noikĩ axosharakãfe. 
\p  
\v 15-16 Estéfanas afe yorafo fe Acaya ano ixõ nãnoxõ Jesús chanĩmara fakĩ taefanifo. Mã mã ato õimiskĩ. Mã mã tãpia nãfãfe Nios Ifofaafo sharafamisfo. Nã keskarafo nikasharakãfe. Nã ato feta yonoaifori nikasharakãfe. 
\p  
\v 17 Ẽ inimasharakõi Estéfanas, Fortunato, Acaicori afo ekeki nokoafono. Akka mã ea axopaiyai keskara nãfãfe mã ea axõafo. Mã ea axotiroma mã chaikõi ika.  
\v 18 Nã tiito ea inimamamisfo. Mato inimamamisfo keskafakĩ eari inimamamisfo. Nãskakẽ atoõnoa yoisharakãfe. 
\p  
\v 19 Nã nõko Ifo chanĩmara famisfãfe Asia anoafãfe mato yoisharapaikani. Aquila feta ãfe ãfi Priscila mato yoisharapaikani. Mato shinãkõikani. Ãto pexe mẽranoax ato fe ichanãmisfãferi mato yoisharapaikani.  
\v 20 Keyokõi nõko Ifo chanĩmara faafãfe nono efe ikaxõ mato yoisharapaikani. Nãskakẽri mã ranã yoinõnãsharakãfe. 
\p  
\v 21 Ẽfi Pabloki mẽ mekai xatekĩ meka rafes ẽ mato kenexonõ. Akka taefakĩ nofe yora Sóstenes ea kirika kenexona. Akka iskaratĩa ẽkõi kirika mato kenexoni mã tãpinõ. 
\p  
\v 22 Fatotora nõko Ifo noiyamaino Niospa omiskõimapainõ omiskõipakenakafo mẽra potakĩ. 
\p Nõko Ifo Jesús chaima nokopainõ. 
\p  
\v 23 Nõko Ifo Jesucristo mato noikĩ mato inimamasharakõinõ. 
\p  
\v 24 Ẽ nõko Ifo Jesucristoõxõ keyokõi ẽ mato noi. Nã tii.