\id COL  
\h Colosenses 
\toc1 Carta n‑tundaꞌa Spalu nuu ñayiu Colosas 
\toc2 Colosenses 
\toc3 Col. 
\mt1 Carta n‑tundaꞌa Spalu nuu ñayiu Colosas 
\c 1  
\s1 Ndajan tnuꞌu Spalu ñayiu ka kukanu ini Jesucristu xndaxio Colosas 
\p  
\v 1-2 Daña Spalu xiꞌin ñani‑ro Timoteo, tundaꞌa‑da carta yaꞌa juan xee nuu ndixi xa xndaxio‑n Colosas, te ka kuu‑n ñayiu n‑kida Ianyuux xa n‑ka nduu ii‑n, te dani ka kukanu ini naꞌi‑n‑ia. Xaxeꞌe xa ka kukanu ini‑ro Cristu, ka kuu ñani tnaꞌa‑ro. N‑tundaꞌa ñaꞌa Cristu Jesús xa dakuaꞌa‑da ñayiu chi daa ñu ini Ianyuux. Xijan taꞌu‑da nuu Taa‑ro Ianyuux xa na chindee chituu ñaꞌa‑ia. Xijan taꞌu‑da nuu‑ia xa na kada‑ia xa na ku kundaa ku kuvatu anu koio‑n, chi n‑ka natu ini‑n xa n‑ka kida‑n kuechi. 
\s1 Xiaꞌan Spalu nuu Ianyuux xa n‑kutaꞌu‑s xaxeꞌe xa ka kukanu ini ñayiu Colosas Jesucristu 
\p  
\v 3 Ntnaꞌa vuelta ka xijan taꞌu‑da nuu Ianyuux, Ia kuu Taa Xtoꞌo‑ro Jesucristu, ka xiaꞌan‑da xa n‑kutaꞌu‑da  
\v 4 xaxeꞌe xa n‑ka kukanu ini‑n Cristu Jesús xiꞌin xaxeꞌe xa ka xemani tnaꞌa‑n xiꞌin ntdaa ñayiu n‑kida Ianyuux xa n‑ka nduu‑i ñayiu ii. Daa n‑ka teku‑da.  
\v 5 Xaxeꞌe xa ka jandixa‑n xa xandaa xakuiti io taꞌu‑n andɨu, ka kida‑n xijan. N‑ka teku‑n xijan na n‑ka teku‑n nax io xa kada koio‑n xa nanitaꞌu‑n. Ɨɨn xandaa kuu.  
\v 6 Kueꞌe ñayiu ñuu ñuñayiu n‑ka teku xaꞌa, te ka jandixa‑i Cristu, te ka kida‑i xavaꞌa, te ka teku ka dava ñayiu juaꞌan. Dani ndixi, nde na n‑ka teku‑n nax n‑kida Ianyuux xa nanitaꞌu‑n te n‑ka jandixa‑n xa ɨɨn xandaa kuu, nde daa ka kida‑n xavaꞌa. Dɨuni ka teku ka ñayiu ñuu‑n xaꞌa juaꞌan.  
\v 7 Xá ka xini‑n xaꞌa chi Epafras, se mani juini‑ro, n‑kachitnuꞌu ñaꞌa. Ka xinokuechi‑da xiꞌin‑s nuu Cristu. N‑tetutniu ñaꞌa Cristu nduu‑da xiꞌin‑s xa junukuechi‑da xiꞌin‑s nuu‑n.  
\v 8 Dɨu‑s n‑kachitnuꞌu ñaꞌa ntdaa‑da xa kida Espíritu Ianyuux xa ka xemani tnaꞌa‑n. 
\p  
\v 9 Xijan kuu xa nde na n‑ka teku tnuꞌu‑da xaꞌa, ka xijan taꞌu‑da nuu Ianyuux xaxeꞌe‑n ndɨkɨu ndɨñuu. Xko xijan taꞌu‑da xa na kada‑ia xiꞌin Espíritu‑ia xa na kutnuni vaꞌa ini koio‑n tnuꞌu‑ia yodotnuni na kuaꞌa kada koio‑n xa juini‑ia. Dani xijan taꞌu‑da nuu‑ia xa na kada Espíritu‑ia xa nduu‑n ñayiu kaxi ini  
\v 10 na kuaꞌa na kutuu kunukoo koio‑n ná xtuu ñayiu ndeka ñaꞌa Cristu. Xa na kuaꞌa na kutuu kunukoo koio‑n ná xtuu ñayiu ndeka ñaꞌa Cristu, jandixa naꞌi‑n‑ia, te kada naꞌi‑n xavaꞌa, te jun ini‑n xa jini vaꞌa ka‑n jundu kuu‑ia xiꞌin nuu nax juini‑ia xa kada‑ro. Kada koio‑n xijan chi tna ini Ianyuux. Davaꞌa nga nuu kuikonuu kuikondodo‑n kada‑n xa juini‑ia.  
\v 11 Kada koio‑n xaꞌa, te kada Ianyuux xa kundee ini koio‑n hora ndaꞌu na yaꞌa‑n, te ma ndundeꞌe‑n nuu ñayiu kida uꞌu ñaꞌa. Naka kueꞌe xa kuaꞌa‑ia kada‑ia.  
\v 12 Na jaꞌan‑ro xa n‑kutaꞌu‑ro nuu Ianyuux xaxeꞌe xa n‑kida‑ia xa niꞌi koio‑ro taꞌu‑ro na niꞌi ntdaa ñayiu n‑kida‑ia xa n‑ka nduu‑i ñayiu ii taꞌu‑i, te kuvete‑ro. Niꞌi koio‑ro taꞌu‑ro nuu jaꞌan ñayiu mee ni xa ndaa. 
\s1 Taxnuni Jesucristu xiꞌin Ianyuux nuu ntdaa xa n‑kidavaꞌa‑ia 
\p  
\v 13 Kuenda kɨu nuu nee n‑ka xo xikonuu‑ro xa n‑ka xo kida‑ro kuechi. Daa n‑dananitaꞌu ñaꞌa Ianyuux. Mee‑ia n‑kida xa n‑ka kɨu tnaꞌa‑ro nuu ñayiu ka jandixa xa taxnuni Daꞌya Yɨɨ mani‑ia nuu‑ro.  
\v 14 Daꞌya Yɨɨ‑ia kuu Ia n‑chiyaꞌu kuechi‑ro, te n‑taxkanu ini Ianyuux kuechi n‑ka kida‑ro.  
\v 15 Kuu‑ia ná kuu mee Ianyuux, Ia ña kanda ndeꞌa‑ro. Kunuu‑ia nuu ntdaa xa n‑kidavaꞌa Ianyuux.  
\v 16 Dɨuni n‑kidavaꞌa‑ia ntdaa xa io andɨu, ntdaa xa io ñuñayiu, ñayiu, ángel du. Mee‑ia n‑kidavaꞌa ntdaa xa ndeꞌa‑ro xiꞌin ntdaa xa ña kanda ndeꞌa‑ro. Mee‑ia n‑xani ini xa koo se taxnuni xiꞌin xa koo se kunxaꞌnu. Xa na ndadakaꞌnu ñaꞌa koio ntdaa xijan, n‑kidavaꞌa Daꞌya Yɨɨ‑ia xiꞌin‑ia xijan.  
\v 17 Xa daa nga io Cristu. Dada n‑xe koo ntdaa xa n‑kidavaꞌa‑ia xiꞌin ñayiu, ángel du. Mee‑ia kida xa ñatu naa xijan, ni ñayiu, ni ángel. Xndaxio naꞌi‑i xiꞌin‑ia.  
\v 18 Dɨuni kuu‑ia kuenda kɨu dɨkɨ roo xa kuu ro ñayiu ka kukanu ini‑ia xa taxnuni‑ia nuu‑ro. Kiꞌna ka‑ia n‑nandoto. N‑nandoto‑ia xa na kuaꞌa na nandoto ndɨyɨ, te kunuu‑ia nuu roo, ñayiu ka xiꞌí. N‑nandoto‑ia chi taxnuni‑ia.  
\v 19 N‑juini Ianyuux xa ku kuu‑ia ná kuu mee‑ia. Ntdaa xa kuaꞌa Ianyuux kada‑ia kuaꞌa Cristu kada‑ia. Ɨnuu ka tuꞌa‑ia.  
\v 20 Dɨuni n‑juini Ianyuux xa kada Daꞌya Yɨɨ‑ia xa na kumani‑ia xiꞌin ntdaa xa io andɨu xiꞌin ntdaa xa io ñuñayiu, ñayiu du. Xaxeꞌe xa n‑xitakaa dika‑ia nuu curuxi, te n‑xatu nɨñɨ‑ia, ñatuka kiti ini Ianyuux nuu ñayiu. 
\p  
\v 21 N‑ka xo kida‑n kuechi xaxeꞌe xa mee ni xaloko n‑ka xo ñuꞌu anu‑n. Kuenda kɨu ñayiu juera n‑ka xo kuu‑n nuu Ianyuux xa ñatu n‑xo ndeka ñaꞌa‑ia, te n‑ka xo xini uꞌu‑n‑ia,  
\v 22 ko vitna n‑kida Jesucristu xa n‑kumani Ianyuux xiꞌin‑n na n‑xiꞌí‑ia nuu curuxi. Hora na nadayujun nadataka ñaꞌa Ianyuux nuu‑ia, jini‑ia xa n‑ka nduu‑n ñayiu ii, ñayiu ña tuu na kuechi ndido tau, te jaꞌan‑ia xa n‑ka ndundoo n‑ka ndunini‑n.  
\v 23 Jini‑ia xa n‑ka ndundoo n‑ka ndunini‑n xiꞌin xa ña tuu ka na kuechi xndido xtau‑n xiꞌin xa n‑ka nduu‑n ñayiu ii nux dani na kukanu ini naꞌi‑n‑ia, te nux dani na jun ini‑n xa ndixi‑ia. Na n‑ka teku‑n xa dananitaꞌu ñaꞌa Ianyuux, n‑ka teku‑n xa kutuu koio‑n xiꞌin‑ia nɨkava nɨkuita. Kueꞌe ñayiu ñuu ñuñayiu n‑ka teku xa dananitaꞌu ñaꞌa Ianyuux xiꞌin xa kutuu koio‑i xiꞌin‑ia nɨkava nɨkuita. Xaꞌa jaꞌan daña, Spalu nuu ñayiu. Mudu yaꞌa xinokuechi‑da nuu Ianyuux. 
\s1 N‑xe konetniu Spalu xa jaꞌan‑s nuu ñayiu ka kukanu ini Jesucristu xa n‑jaꞌan Ianyuux 
\p  
\v 24 Ndaꞌu yaꞌa‑da vitna xaxeꞌe‑n, ko kudɨ ini‑da xa duꞌa yaꞌa‑da. Juini kueꞌe vida n‑yaꞌa Cristu xaxeꞌe ñayiu ka kuu kuenda kɨu yɨkɨ kuñu‑ia, ko ndoñuꞌu xa ndaꞌu yaꞌa‑da tuku, na kuaꞌa na kɨu tnaꞌa ndɨꞌɨ ñayiu io xa kɨu tnaꞌa‑i nuu ñayiu ka kukanu ini‑ia, ñayiu kuu kuenda kɨu yɨkɨ kuñu‑ia.  
\v 25 N‑tetutniu ñaꞌa Ianyuux xa jaꞌan‑da nuu ndixi xa n‑jaꞌan‑ia. Ná io ná juaꞌan jaꞌan‑da.  
\v 26 Ñatu n‑datuu‑ia nuu ñayiu xanaꞌa xa n‑ñu ini‑ia xa kada‑ia ñayiu ñatu ka kuu ñayiu Israel xavaꞌa, ko n‑datuu‑ia xijan vitna nuu roo, ñayiu n‑kida‑ia xa n‑ka nduu‑ro ñayiu ii.  
\v 27 N‑juini Ianyuux xa jini‑ro ntdaa‑ro xijan vitna. Ñu ini‑ia xa ñayiu ñatu ka kuu ñayiu Israel kunduu xiꞌin Cristu, te kukanu ini‑i xa kutuu‑i xiꞌin‑ia andɨu. Naka vaꞌa‑ia. Naka kueꞌe xavaꞌa kida ñaꞌa‑ia ntdaa‑ro. Ñayo n‑ka xo xini xa kada ñaꞌa‑ia ndixi, ñayiu ñatu ka kuu ñayiu Israel xavaꞌa. Ñayo n‑ka xo xini xijan, chi ñatu n‑datuu‑ia.  
\v 28 Ka jaꞌan‑da nuu ntdaa ñayiu jundu kuu Cristu te nax n‑kida‑ia, te ka jan doꞌo‑da‑i. Ka xanu ichi koio‑da ñayiu ichi vaꞌa na kuaꞌa kada‑i xavaꞌa. Ka dakuaꞌa‑da‑i na kuaꞌa na nduu koio‑i ñayiu vaꞌa na vaꞌa mee‑ia.  
\v 29 Xaxeꞌe xijan vichi ndeꞌe kidatniu‑da te ndukundee‑da. Kida Cristu xa kuaꞌa‑da kada‑da tniu‑ia. 
\c 2  
\p  
\v 1 Kachitnuꞌu ñaꞌa‑da xa ndeꞌe kidatniu‑da xa na kuaꞌa kutnuni ini koio‑n xiꞌin ñayiu Laodicea xiꞌin dava ka ñayiu ña xini tnaꞌa xiꞌin‑da tnuꞌu Ianyuux.  
\v 2 Jaꞌan‑da nuu‑n tnuꞌu Ianyuux xa na kukaꞌnu anu koio‑n. Io xa juemani tnaꞌa‑n na kuaꞌa vivii kada koio‑n tniu Ianyuux, te ma jantnaꞌa tnuꞌu‑n. Xa na kuaꞌa vivii kada koio‑n tniu‑ia, io xa kaꞌu ka‑n tnuꞌu‑ia yodotnuni te kutnuni vaꞌa ka ini‑n. Dɨuni io xa jandixa‑n xa ɨɨn xandaa kuu tnuꞌu‑ia; maxku jɨn tnɨɨ anu‑n. Nux daa na kada koio‑n, kukaꞌnu anu‑n. Nux vaꞌa na kaꞌu koio‑n tnuꞌu‑ia yodotnuni, jini koio‑n xa Cristu kuu Ia n‑ñu ini Ianyuux xa kixi‑ia ñuñayiu. Ñatu n‑datuu‑ia xijan nuu ñayiu xá n‑ka xiꞌí.  
\v 3 Cristu ntdandituꞌu tuꞌa‑ia, ntdandituꞌu xini‑ia.  
\v 4 Kachitnuꞌu ñaꞌa‑da xa io xa jini vaꞌa koio‑n xa yodotnuni jan na kuaꞌa maxku jandixa‑n xa jaꞌan ñayiu ka tuꞌa xa dajaꞌan‑i ɨnka ñayiu xa na jandixa‑i ɨɨn xa ñatu kuu xandaa.  
\v 5 Vichi ñu ini ñaꞌa‑da ɨɨn ɨɨn‑n. Vichi kuvete‑da xa n‑teku‑da xa xtuu vii xtuu vaꞌa‑n. Naka vaꞌa xa ɨnuu ka xani ini‑n, te ñatu ka jantnaꞌa‑n. Dɨuni kuvete‑da xaxeꞌe xa dani ka kukanu ini‑n Cristu, xiꞌin xa ñatu dandoo‑n‑ia. 
\s1 N‑ka dama ñayiu n‑ka kukanu ini Cristu mudu‑i 
\p  
\v 6 Xaxeꞌe xa n‑ka kukanu ini‑n Cristu Jesús, Ia kuu Xtoꞌo‑ro io xa kunduu‑n xiꞌin‑ia, te kada koio‑n ná n‑kida mee‑ia.  
\v 7 Idii ni vuelta io xa kajan‑n anu‑n xa kunduu‑n xiꞌin‑ia, te jandixa naꞌi‑n xa xandaa kuu xa n‑jaꞌan‑ia. Jandixa naꞌi‑n xa n‑ka jaꞌan se n‑ka dakuaꞌa ñaꞌa. Ndɨkɨu ndɨñuu ku juñaꞌa‑n nuu Ianyuux xa n‑kutaꞌu‑n.  
\v 8 Jun ini koio‑n xa maxku dandaꞌu ñaꞌa se jaꞌan tnuꞌu ndichi n‑ka xo jaꞌan xixitna‑s. Ñadu ɨɨn xa ñukax ini ka jaꞌan‑s. Ñadu ɨɨn xa ndaa kuu xa ka jaꞌan‑s. Xaloko ka xikonuu andɨu ka kida xa ka taꞌu tniu‑s xa ka taꞌu tniu‑s. Ñatu kuu‑i tnuꞌu n‑jaꞌan Cristu,  
\v 9 Ia kuu Ianyuux. Dɨuni n‑kuu Cristu ñayiu. Ntdaa xa kuaꞌa Ianyuux kada‑ia kuaꞌa Cristu kada‑ia. Ɨnuu ka tuꞌa‑ia. Ɨnuu ka kuu‑ia.  
\v 10 N‑ka nduu‑n ñayiu vaꞌa ná vaꞌa Cristu chi ka kunduu‑n xiꞌin‑ia. Mee‑ia taxnuni nuu ntdaa se ka taxnuni xiꞌin nuu ntdaa xaloko ka taxnuni xiꞌin nuu ntdaa ángel ka taxnuni.  
\v 11 Xaxeꞌe xa ka kunduu‑n xiꞌin‑ia, kuenda kɨu n‑taꞌnde ndodo ñɨɨ nuu ii‑n te n‑ka dajane‑n xijan xa ñatuka ka kida‑n xaloko.  
\v 12 Kuenda kɨu n‑ka xe konduxi‑n xiꞌin Cristu te n‑ka nandoto‑n xiꞌin‑ia na n‑nandoto‑ia xa n‑ka xendute‑n, chi ka jandixa‑n xa n‑nadandoto Ianyuux Cristu.  
\v 13 Dɨuni kuenda kɨu ndɨyɨ n‑ka xo kuu‑n xaxeꞌe xa ña tuu na xavaꞌa n‑ka xo kida‑n. Daa n‑ka xo kida‑n xaloko xaduꞌa ka kida ñayiu ñatu ka chinuu Ianyuux. Kuenda kɨu ndɨyɨ n‑ka xo kuu‑n, ko kuenda kɨu n‑nadandoto ñaꞌa‑ia na n‑nadandoto‑ia Cristu, te n‑taxkanu ini Ianyuux ntdaa kuechi‑n, te ña tuu nax jenyaꞌu‑ia.  
\v 14 Kuenda kɨu n‑ndada ndoo Ianyuux kuechi n‑ka kida‑ro n‑yodotnuni. N‑ka kida‑ro kuechi chi ñatu n‑ka jandixa‑ro ley‑ia. Kuenda kɨu neꞌe‑ia xijan juaꞌan nuu n‑xitakaa dika Cristu te ijan n‑ndoo.  
\v 15 Ndaku Ianyuux nuu Kuiꞌna xiꞌin nuu dava ka xaloko ka taxnuni xiꞌin‑i. Kɨu n‑nandoto Cristu xa n‑xiꞌí‑ia nuu curuxi, n‑ndaku Ianyuux nuu Kuiꞌna, te ndaꞌu ndaꞌu n‑kendoo‑i te n‑ka xini ñayiu xa n‑ndaku‑ia nuu‑i. Ná kida soldado xa xani yujun‑s se n‑ka tnɨɨ‑s te dakuikonuu ñaꞌa‑s nuu xyuku ñayiu n‑kida Ianyuux Kuiꞌna. 
\p  
\v 16 Xijan kuu xa maxku juejoon‑n xa jan tnuꞌu ñaꞌa ñayiu xa ka xaxi‑n ɨɨn xa ka xani ini‑i xa ñatu io vaꞌa xa kaxi‑n, ni maxku juejoon‑n xa jan tnuꞌu ñaꞌa‑i xa ka xiꞌi‑n ɨɨn xa ka xani ini‑i xa ñatu io vaꞌa xa koꞌo‑n, ni maxku juejoon‑n xa ku jan tnuꞌu ñaꞌa‑i xa ñatu neꞌe ii‑n kɨu kuu viko, ni xa ñatu neꞌe ii‑n kɨu io yoo yɨjɨn, ni xa ñatu neꞌe ii‑n kɨu kuu sabado.  
\v 17 Kuenda kɨu juendaꞌu ɨɨn yutnu kuu xa taꞌu tniu ñayiu jan xa kada‑ro; ñatu kuu‑i ná kuu mee yutnu. Mee‑ro ntdaa‑ro, ñayiu ka kukanu ini Cristu, ñayiu kuu kuenda kɨu yɨkɨ kuñu‑ia ka kuu ná kuu mee yutnu.  
\v 18 Ka jaꞌan ñayiu xa io xa jini uꞌu‑n mee‑n, xiꞌin xa io xa ndadakaꞌnu‑n ángel, ia ka xinokuechi nuu Ianyuux, ko maxku chinuu koio‑n xijan. Maxku daa kada‑n chi na ñaꞌa dakuita‑n taꞌu‑n taxi Ianyuux. Kakuneꞌe‑i xa ka xko xini‑i espíritu, te ka xko jaꞌan espíritu jan nuu‑i. Ka tutuku ni‑i. Ndeꞌe ka kuu iꞌni‑i. Diko ni xaloko xñuꞌu anu‑i, te ka xani ini‑i xa kada‑i xaloko.  
\v 19 Ñatuka ka kunduu‑i xiꞌin Cristu, Ia kuu kuenda kɨu dɨkɨ roo, xa ka kuu‑ro ñayiu ka kukanu ini‑ia, te kuenda kɨu ɨɨn ɨɨn parti yɨkɨ kuñu‑ia ka kuu‑ro. Xaꞌnu ɨɨn ɨɨn parti yɨkɨ kuñu ñayiu según janda xnetnaꞌa‑i. Kida‑ia xa chindee tnaꞌa‑ro xa na kukanu ini ka‑ro‑ia. Te kukueꞌe ka‑ro juaꞌan. 
\p  
\v 20 Kuenda kɨu n‑ka xiꞌí‑n xiꞌin Cristu na n‑xiꞌí‑ia xa n‑ka dandoo‑n ntdaa xa ka taxnuni xaloko ka xikonuu ñuñayiu nuu‑n, ¿ko nakuenda xa dani ka jandixa naꞌi‑n xaloko ka taxnuni nuu dava ka ñayiu ñuñayiu jan? Duꞌa taꞌu tniu‑i:  
\v 21 “Maxku tnɨɨ‑n xa kuu anu‑n xa tnɨɨ‑n, maxku kaxi‑n xa kuu anu‑n xa kaxi‑n, ni maxku kajuꞌun ndaꞌa‑n xa kuu anu‑n xa tnɨɨ‑n.”  
\v 22 Duꞌa ka jaꞌan‑i xiꞌin ñayiu ñatu ndeka Ianyuux, ko ñadu daa jaꞌan Ianyuux chi mee‑ia n‑xantuu xa juetniu ñayiu ntdaa xa ka xetniu‑ro, te naa. Dɨuni n‑xantuu‑ia xa kaxi xa koꞌo‑ro ntdaa xa io xa kaxi‑ro, te dɨuni naa.  
\v 23 Io ñayiu ka xani ini xa yo vaꞌa ka tuꞌa ñayiu n‑ka jantuu ley jan. Dɨuni ka jaꞌan‑i xa io xa jini uꞌu‑ro mee‑ro xiꞌin xa io xa kada uꞌu‑ro mee‑ro xaxeꞌe Ianyuux. Ma kundee xijan xa kada‑i xa ma kuu ka anu ñayiu xa kada‑i xaloko. 
\c 3  
\s1 Janda io xa kutuu kunukoo ñayiu ka kukanu ini Cristu 
\p  
\v 1 Kuenda kɨu n‑nadandoto ñaꞌa Ianyuux mee‑n xiꞌin Cristu. Xaxeꞌe xijan io xa ndukundee‑n xa kada‑n xa juini Ianyuux, Ia tuu andɨu xiꞌin Cristu. Lado kuaꞌa Ianyuux nukoo Cristu xa taxnuni‑ia.  
\v 2 Najaꞌan koio‑n Ianyuux. Jun ini‑n xa kada‑n ná ka kida Ia xtuu andɨu; maxku jun ini koio‑n xa kada koio‑n xa ka kida ñayiu ñuñayiu.  
\v 3 Kuenda kɨu n‑ka xiꞌí‑n xiꞌin Cristu chi ñatuka ka kuu‑n ná n‑ka xo kuu‑n. Ka kunduu‑n xiꞌin‑ia xiꞌin Ianyuux, te mee ni Ianyuux xini janda ka kuu‑n vitna. Mee ni‑ia xini janda kuu Cristu du. Ñunuu ñaꞌa Ianyuux te ma dandoo ñaꞌa‑ia.  
\v 4 Na ndixi Cristu, Ia n‑kida xa n‑ka nduu‑ro ɨnka ñayiu, kada Ianyuux xa kundeꞌa‑ro‑ia, te dɨuni kada‑ia xa kundeꞌa ñaꞌa ɨnka ñayiu roo. Te dɨuni kada‑ia xa diñu‑ro ná diñu Cristu. 
\p  
\v 5 Xaxeꞌe xijan maxku kada ka‑n xaloko ka kida ñayiu ñatu ndeka Ianyuux. Dandoo koio‑n xijan. Maxku kava ɨɨn solteru xiꞌin ɨɨn soltera chi ta tnundaꞌa koio ka‑i. Maxku kada‑n kuechi xiꞌin ñayiu ñatu n‑tnundaꞌa xiꞌin‑n; maxku ku kuu anu‑n xa daa kada‑n. Dɨuni maxku kukajan ini‑n xa xnevaꞌa ɨnka ñayiu chi kuenda kɨu xndeñuꞌu‑ro ɨɨn xa xndeñuꞌu‑ro xa ka kukajan ini‑ro xa xnevaꞌa ñayiu.  
\v 6 Kiti ini Ianyuux nuu ñayiu daa ka kida. Ka kuxe ini‑i nuu‑ia, te kada uꞌu‑ia‑i na xeé kɨu.  
\v 7 N‑ka xo tuu‑n ná xtuu ñayiu ñatu ndeka ñaꞌa Ianyuux.  
\v 8 Dɨuni maxku kiti ini nuu tnaꞌa ka‑n. Maxku ndundeꞌe ka‑n nuu ñayiu. Maxku ñaꞌa kada koio ka‑n ñayiu. Ni maxku kuiꞌa jaꞌan ka‑n ñayiu. Maxku jan kuiꞌa tnaꞌa‑n. Maxku ku jan ne ku jan yichi‑n; kava nxaꞌnu tnuꞌu‑n. Maxku daa ka ku jaꞌan koio ka‑n, ni maxku daa ka ku kada koio‑n.  
\v 9 Maxku yoo‑n ku jaꞌan vete nuu tnaꞌa chi ñatuka ka kuu‑n ná n‑ka xo kuu‑n chi n‑ka dandoo‑n xaloko n‑ka xo kida‑n te n‑ka nduu‑n ɨnka ñayiu.  
\v 10 Tuku ñayiu n‑ka nduu‑n vitna. Ñatuka ka kuu‑n ná n‑ka xo kuu‑n. Xaxeꞌe xa ka kutnuni ini‑n tnuꞌu Ianyuux yodotnuni, ka dama‑n juaꞌan. Kida‑ia xa xee‑ro ku kuu‑ro ná kuu mee‑ia.  
\v 11 Ña tuu nax viꞌi Ianyuux nu ka kuu‑ro ñayiu griegu a ka kuu‑ro ñayiu Israel, nu ka kuu‑ro ñayiu n‑taꞌnde ndodo ñɨɨ nuu ii a ka kuu‑ro ñayiu ñatu n‑taꞌnde ndodo ñɨɨ nuu ii. Ni ña tuu nax viꞌi‑ia nu n‑ka kuu‑ro ñayiu ña tuꞌa tutu, nu n‑ka kuu‑ro ñayiu ndeꞌe, ñayiu loko, nu ka kuu‑ro ñayiu ka kidatniu duꞌa nuu xtoꞌo‑ro a ka kuu‑ro ñayiu ñayo na xtoꞌo io, chi ñatu ndandɨꞌɨ xijan. Cristu, ndandɨꞌɨ‑ia, te ñuꞌu ñaꞌa‑ia ntdaa‑ro. 
\p  
\v 12 Xaxeꞌe xijan n‑kaxi ñaꞌa Ianyuux xa ku kuu‑n daꞌya‑ia, te n‑kida‑ia xa n‑ka nduu‑n ñayiu ii, te xemani ñaꞌa‑ia. Xaxeꞌe xijan io xa duꞌa kada koio‑n: Kundaꞌu ini tnaꞌa koio‑n. Ku kuu koio‑n ñayiu vaꞌa anu. Maxku ku kuu koio‑n ñayiu xe ini. Vivii jaꞌan koio‑n nuu ñayiu. Maxku yachi kiti ini koio‑n.  
\v 13 Maxku kiti ini‑n nuu ñayiu kida ɨɨn xa ñatu tna ini‑n, te taxkanu ini‑n ñayiu kida uꞌu ñaꞌa. Taxkanu ini‑n ñayiu chi n‑taxkanu ini ñaꞌa Ianyuux mee‑ro.  
\v 14 Duꞌa kada koio‑n, te dɨuni juemani tnaꞌa‑n chi ndandɨꞌɨ ka xijan. Nux juemani tnaꞌa‑n, ndaku‑n xa kada koio‑n ntdaa xaꞌa.  
\v 15 Kutuu mani koio‑n chi xa na kutuu mani koio‑n n‑kaxi ñaꞌa Ianyuux. Dɨuni xa na kutuu mani koio‑n n‑kida‑ia xa n‑ka nduu‑n ɨnka ntuku ñayiu. Ku juñaꞌa koio‑n xa n‑kutaꞌu‑n nuu Ianyuux.  
\v 16 Jaꞌan koio‑n tnuꞌu yodotnuni libru Salmos hora dakuaꞌa tnaꞌa‑n xiꞌin hora jaꞌan doꞌo tnaꞌa‑n. Jaꞌan koio‑n nuu ñayiu nax kakuneꞌe canción Ianyuux. Dɨuni jaꞌan koio‑n nuu‑i nax kakuneꞌe alabanza‑ia. Ku kuu‑n ñayiu kaxí ini. Xiꞌin nde yɨkɨ nde tuchi‑n kata‑n nuu Ianyuux, te juñaꞌa‑n xa n‑kutaꞌu‑n nuu‑ia. Nux kunaꞌa‑n xa n‑jaꞌan Cristu, ndaku‑n xa kada koio‑n ntdaa xaꞌa.  
\v 17 Nux kida‑n ɨɨn tniu a na ka ɨnka xa kida‑n, kada‑n xaxeꞌe Jesús, Ia kuu Xtoꞌo‑ro; a nux jaꞌan‑n ɨɨn xa jaꞌan‑n, jaꞌan‑n xaxeꞌe‑ia. Ndɨkɨu ndɨñuu ku juñaꞌa koio‑n xa n‑ka kutaꞌu‑n nuu Taa‑ro Ianyuux, chi chinuu Ianyuux xa jaꞌan koio‑n nuu‑ia xaxeꞌe xa n‑xiꞌí Jesús. 
\s1 Janda io xa kutuu kunukoo ñayiu n‑ka tnundaꞌa nukee nuveꞌe‑i 
\p  
\v 18 Ndixi, ñá xndaxio yɨɨ, jueyuꞌu juendetu‑n nuu yɨɨ‑n chi xijan nandajan Cristu, Ia kuu Xtoꞌo‑ro, Ia kunduu xiꞌin‑ro.  
\v 19 Ndixi, se xndaxio ñadɨꞌɨ, juemani koio‑n‑ña te maxku ku jaꞌan deen ku jaꞌan xatu‑n nuu‑ña. 
\s1 Janda io xa kutuu kunukoo daꞌya xiꞌin tadɨꞌɨ‑i 
\p  
\v 20 Ndoꞌo, sekuechi xiꞌin dichi kuechi xiꞌin solteru kuechi, io xa jandixa‑n ntdaa xa ka taꞌu tniu tadɨꞌɨ‑n chi tna ini Ianyuux, Ia kuu Xtoꞌo‑ro xijan.  
\v 21 Ndixi, se ka kuu taa maxku dakiti ini koio‑n daꞌya‑n na kuaꞌa na ku kuvaꞌa anu‑s hora kada‑s xa taꞌu tniu‑n. 
\s1 Janda io xa kutuu ñayiu ka kidatniu duꞌa nuu xtoꞌo‑i, te janda kutuu se kuu xtoꞌo‑i 
\p  
\v 22 Ndixi, ñayiu ka xinokuechi, jandixa koio‑n xtoꞌo‑n. Kada koio‑n ntdaa xa taꞌu tniu‑s nuu‑n. Maxku hora ni ndeꞌa ñaꞌa xtoꞌo‑n ndeꞌe ku kadatniu‑n xa na tna ini ñaꞌa‑s. Koo ndaa koo kuiti anu‑n hora ka kidatniu‑n nuu‑s. Duꞌa kada koio‑n chi ka yuꞌu‑n nuu Cristu, Ia kuu Xtoꞌo‑ro.  
\v 23 Koo ndaa koo kuiti anu‑n hora na kada‑n tniu xtoꞌo‑n. Kada‑n kuenda xa nuu Ianyuux, Ia kuu Xtoꞌo‑ro ka xinokuechi‑n; ñadu nuu ñayiu.  
\v 24 Xá xnaꞌa‑n xa mee‑ia kuu Ia taxi taꞌu‑n. Nuu Cristu, Ia kuu Xtoꞌo‑ro, ka xinokuechi‑n; ñadu nuu ñayiu.  
\v 25 Kada uꞌu Ianyuux davaꞌa nga ñayiu ka kida uꞌu ɨnka ñayiu. Juñaꞌa‑ia taꞌu‑i. Ña tuu nax viꞌi‑ia nu ka kuu‑ro ñayiu ka xinokuechi a ka kuu‑ro se xndaxio ñayiu ka kidatniu nuu‑ro. 
\c 4  
\p  
\v 1 Ndixi, se xndaxio ñayiu ka kidatniu nuu‑n, vaꞌa chiyaꞌu koio‑n‑yɨ, te maxku juenduꞌa‑n‑yɨ. Xa xnaꞌa‑n xa ɨɨn ni Ia kuu xtoꞌo ñayiu, ka xinokuechi nuu xtoꞌo‑i io xiꞌin ñayiu ñayo na xtoꞌo io. Andɨu kuu nuu tuu‑ia. 
\p  
\v 2 Io xa kajan taꞌu koio‑n nuu Ianyuux ndɨkɨu ndɨñuu. Kunini vaꞌa‑n nax ka jaꞌan dava ka ñayiu ka xijan taꞌu xiꞌin‑n nuu‑ia. Ɨɨn ni xa jun ini koio‑n. Jun ini koio‑n xa juñaꞌa‑n xa n‑kutaꞌu‑n nuu‑ia.  
\v 3 Dɨuni kajan taꞌu koio‑n xa na kada Ianyuux xa na juejoon ñayiu xa jaꞌan koio‑da nuu‑i nax n‑kida Cristu xa na kuaꞌa nanitaꞌu‑i. Xaxeꞌe xaꞌa yɨndiꞌu‑da. Xa daa nga n‑xo naꞌa Ianyuux nax kada Cristu. Mee ni‑ia n‑xo naꞌa, ko n‑datuu‑ia vitna.  
\v 4 Kajan taꞌu koio‑n nuu Ianyuux xa na ku jaꞌan‑da nuu ñayiu xa n‑jaꞌan Cristu xiꞌin xa n‑kida‑ia. Ná n‑kuu ná n‑xino io xa ku jaꞌan‑da nuu ñayiu ka nataka. 
\p  
\v 5 Koo‑n cuedado na ñaꞌa kada koio‑n xa kada ñayiu ña ka kukanu ini Cristu ɨɨn xaloko xaduꞌa. Kundu ini koio‑n dakuaꞌa‑n‑yɨ.  
\v 6 Jaꞌan vii jaꞌan vaꞌa koio‑n nuu ñayiu jan xa na tna ini‑i tnuꞌu jaꞌan‑n. Kani ini‑n na tnuꞌu na ngoneꞌe‑n nuu ñayiu kajan tnuꞌu ñaꞌa ɨɨn xa kajan tnuꞌu ñaꞌa‑i. 
\s1 Ka ndajan tnuꞌu se xtuu xiꞌin Spalu ñayiu ka kukanu ini Jesucristu xndaxio Colosas 
\p  
\v 7 Tíquico, se kukanu ini xiꞌin‑ro Cristu kuu se kachitnuꞌu ñaꞌa nuu janda tuu‑da, te nax kida‑da do yaꞌa kɨu na xee‑s do dian. Mani ka juini‑ro‑s. Xinokuechi kutu‑s nuu Ianyuux, te ña dandoo‑s tniu‑ia. Nduu‑da xiꞌin‑s kida tniu‑ia.  
\v 8-9 Xa na kachitnuꞌu ñaꞌa‑s janda xtuu koio‑da yaꞌa, tundaꞌa‑da‑s juan xee. Kutuu‑n xiꞌin‑s, te kukaꞌnu anu‑n. Nduu‑s xiꞌin Onésimo, ɨnka se kukanu ini xiꞌin‑ro Cristu, se ñuteyu mee‑n naxee. Mani ka juini‑ro‑s tuku. Dɨuni xinokuechi kutu‑s nuu Ianyuux te ña dandoo‑s tniu‑ia. Kachitnuꞌu ñaꞌa koio‑s nax ka yaꞌa‑da do yaꞌa. 
\p  
\v 10 Ndajan tnuꞌu ñaꞌa Aristarco, ɨɨn se yɨndiꞌu kaꞌnu xiꞌin‑da vekaa. Dɨuni ndajan tnuꞌu ñaꞌa Smarku, se kuu daxi Bernabé. Nux xee Smarku dian ku kuvaꞌa anu‑n nuu‑sɨ. Xá xnaꞌa‑n nax n‑jaꞌan‑da xa juñaꞌa‑n‑sɨ.  
\v 11 Dɨuni ndajan tnuꞌu ñaꞌa Jesús, se dɨuni nani Justo. Se yaꞌa ni ka kuu se Israel ka kidatniu xiꞌin‑da xa na kuaꞌa na kɨu tnaꞌa ka ñayiu nuu ñayiu taxnuni Ianyuux nuu‑i. N‑kukaꞌnu anu‑da xaxeꞌe xa kunduu‑da xiꞌin‑s ɨɨn ɨɨn‑s.  
\v 12 Dɨuni ndajan tnuꞌu ñaꞌa Epafras, ɨnka ntuku se ñuteyu‑n. Xinokuechi‑ro xiꞌin‑s nuu Cristu. Xiꞌin nde yɨkɨ nde tuchi‑s xko xijan taꞌu‑s nuu Ianyuux xa dani na kukanu ini‑n Cristu xiꞌin xa ma dandoo‑n‑ia. Dɨuni xijan taꞌu‑s xa kutnuni ka ini‑n tnuꞌu Ianyuux yodotnuni xiꞌin xa na kada ndɨꞌɨ koio‑n ntdaa xa juini Ianyuux.  
\v 13 Xini‑da xa yo ndeꞌe kidatniu‑s xaxeꞌe‑n, xaxeꞌe ñayiu Laodicea, xaxeꞌe ñayiu Hierápolis du.  
\v 14 Ndajan tnuꞌu ñaꞌa Sluka, se kuu setatna. Mani ka juini‑da‑s. Dɨuni ndajan tnuꞌu ñaꞌa se nani Demas.  
\v 15 Juñaꞌa‑n nuu ñayiu ka kukanu ini Cristu xndaxio Laodicea xa ndajan tnuꞌu‑da‑i. Dɨuni juñaꞌa‑n nuu Ninfas xa ndajan tnuꞌu‑da‑ña xiꞌin ñayiu ka kukanu ini Jesucristu ka nataka veꞌe‑ña. 
\p  
\v 16 Na yaꞌa xa kaꞌu ndodo carta yaꞌa, te tundaꞌa‑n na jɨꞌɨn nuu ñayiu ka kukanu ini Cristu Laodicea na kuaꞌa na kaꞌu ndodo ijan, te na yaꞌa xa kaꞌu ndodo carta n‑tundaꞌa‑da juaꞌan Laodicea, na naxee dian na kaꞌu ndodo tuku.  
\v 17 Duꞌa juñaꞌa koio‑n nuu Arquipo: “Jun ini‑n xa kada‑n ntdaa tniu n‑taxi Ianyuux, Ia kuu Xtoꞌo‑ro. Dani junukuechi naꞌi‑n nuu‑ia.” 
\p  
\v 18 Daña Spalu, ndajan tnuꞌu ñaꞌa‑da. Xiꞌin ndaꞌa mee‑da n‑kidavaꞌa‑da uni koon tnuꞌu yaꞌa. Dani yɨndiꞌu‑da. Na chindee chituu ñaꞌa Ianyuux ndixi ɨɨn ɨɨn‑n.