\id 2PE NT0143 - Clark - May, 1995 
\h 2 Petero 
\toc1 Pepa Petero iŋgere muli panzi kalo-tawana tamâta 
\toc2 2 Petero 
\toc3 2Pe 
\mt1 2 PETERO  
\mt2 Pepa Petero iŋgere muli panzi kalo-tawana tamâta  
\ib  
\ip \it Yesu ne pâri-tamâta Petero iŋgere ŋgua panzi Juda tamâta ŋinde kalonzi tawana Yesu ku simo pwapwataki (1 Petero), aku zo pinde ilâ lâ, ŋineŋga iŋgere ŋgua pinde panzi kilo. Petero ne zo ŋana imâte kâ nde imâ ipâŋga laiti lâ (1:14), aku isama tu kinzi pananâŋa tamâta laŋeŋa pinde nde simo kinzi ŋgu ŋgininzi, ku situla ilo-kalo soki-soki siyaula tamâta nenzi kalo-tawana. Kinzi pinde siporo tu Yesu ma itaulo imâ kilo tia, andeta Petero itula ŋgua mao tu Yesu ne zo nde ikeno mo ŋai yo (3:3-13). Ara ŋana kinda rârâni ma tapu mulinda pa ŋgua laŋeŋa, ku tapaveta kuku Maro Kindeni kawa ŋgua mao.\it*  
\c 1  
\p
\v 1 Naŋa Saimon Petero, naŋa nde Yesu Kirisi ne wurâta tamâta, aku amo i ne pâri-tamâta tava. Yesu ina kinda nenda Maro Ŋalae wa nenda Yautâŋa Tamwata wa. Naŋa aŋgere ŋgua lâ pepa ŋine tini imâ pa miki kalo-tawana tamâta. Yesu Kirisi ne vetâŋa ara ikai nzâla piti pami lâ ŋana nemi kalo-tawana ipâŋga kelekele ara ndo, itogo maka nema kalo-tawana mine.  
\v 2 Kala ŋine miki kasama Maro Kindeni ku nenda Maro Ŋalae Yesu rua kilalanzi marumbu lâ. Mine kala Maro Kindeni ne wisi-wisi wa wisi-pisi wa imâ ŋalae pami.   
\s1 Maro Kindeni ipatea kinda pa i tamwata  
\p
\v 3 Kirisi nde ŋa ŋalae ndo, aku ina vetâŋa ara warika. Aku inani isarâwa pa kinda ku itula i tamwata kilala pwataki pa kinda tasama lâ. Mine kala io tamwata ne walo kaika imâ pa kinda, kala takura tu tamo sondo ku tapaveta kuku vetâŋa arara, aku kinda ma taroto ŋana sâ toŋge kilo ŋana tapavila warakânda kâ, ande ma tia.  
\v 4 Ŋana i kilala ara ŋinde kâ, ande iveta vetâŋa arara kie-kie pa kinda lâ, ikura muŋga ipa ŋgua tu ma iveta mine. Aku vetâŋa ŋinde uru isuka kinda, kala takura tu taŋgeŋge ŋana vetâŋa potomule ne pazavaruŋa kâ, vetâŋani ndaina tamâta nenzi ilo-kalo sakamao iveta ipâŋga tâno kulu. Mine kala kinda takura tu tamo sondo ndo, itogo Maro Kindeni imo mine.   
\p
\v 5 Kirisi iveta vetâŋa ŋinde rârâni pa kinda lâ. Mine nde ara ŋana miki ma kakai wurâta kaika ndo ŋana kalomi tawana i mao nâ. Kaveta mine lâ ŋga, ŋineŋga kakai wurâta kaika ŋana kapaveta kuku vetâŋa arara. Kaveta mine lâ ŋga, ŋineŋga kakai wurâta kaika ŋana kapanâna sondo ŋana i ne ilo-kalo kâ.  
\v 6 Kaveta mine lâ ŋga, ŋineŋga kakai wurâta kaika ŋana kakai poe sondo pa warakami ilomi kalomi. Kaveta mine lâ ŋga, ŋineŋga kakai wurâta kaika ŋana kamandi kaika lâ zo ndia malia ipâŋga pami. Kaveta mine lâ ŋga, ŋineŋga kakai wurâta kaika ŋana kamo itogo Maro Kindeni ilo papa mine.  
\v 7 Kaveta mine lâ ŋga, ŋineŋga kakai wurâta kaika ŋana kaveta kemi ara nâ panzi nimi-nambwe kalo-tawana tamâta. Kaveta mine lâ ŋga, ŋineŋga kakai wurâta kaika ŋana kao ilomi ndo ilo panzi tamâta rârâni.  
\v 8 Aporo ŋgua mine ŋana duvi ŋine kâ; ambo vetâŋa mine ma ikeno pami lee ipâŋga ŋalae tina, ande ŋinde ma isuka nemi wurâta kaveta pa nenda Maro Ŋalae Yesu Kirisi kâ. Mine nde nemi wurâta ŋinde ma ipâŋga kanaŋo, aku miki ma kasama i kilala sondo tona.  
\v 9 Ambo kalo-tawana tamâta toŋge ma ipaveta kuku vetâŋa ŋinde tia, ande i imo itogo tamâta mata ŋaŋa mine. I ipâŋga tamâta mata leva-leva nâ, aku i kalo kapa tu Maro Kindeni muŋga izavaru kiesaka ne muso piti lâ i tini.   
\p
\v 10 Niŋgu-nambwe wukale, Maro Kindeni muŋgani isarawami lâ, aku ipateami pa i tamwata nâ. Mine nde ara ŋana miki ma kakai wurâta kaika ŋana kapono muli pa i ne pateâŋa ŋinde. Ambo miki ma kaveta mine, ande nemi kalo-tawana ma ikura ŋana imbe kâ, ande tia.  
\v 11 Ŋineŋga Maro Kindeni ma ilo ndeka pami ku ma ikai nzâla piti pami ŋana kakai via mao lâ samba lawea. Aku miki ma kamo kuku nenda Maro Ŋalae Yesu Kirisi, ina nenda Yautâŋa Tamwata, ma kamo ara mine ku kamo nâ.   
\p
\v 12 Mao nâ, miki kapanâna lâ ŋana kelekele ŋinde kâ, aku miki kapaipa lâ kuku ŋgua mao muŋga kaloŋo ŋinde. Andeta naŋa ma aporo ŋguani ndaina pami kilo ikura zo zo, ŋana miki ma kalomi ŋgere kilo ŋana ŋinde kâ.  
\v 13 Naŋa iloŋgu patea tu ambo naŋa ma akai wurâta mine ŋana apaŋo ilomi kalomi ikura zo rârâni naŋa amo viâŋgu lâ tâno kulu, ande ŋinde ma ara.  
\v 14 Ŋana tu naŋa asama ŋine; zo mbwana-mbwana nâ, ŋineŋga naŋa ma apile karaeŋgu ŋine ku amâte. Nenda Maro Ŋalae Yesu Kirisi itula ŋine pwataki pa naŋa lâ.  
\v 15 Mine kala ŋine naŋa ma aveta wurâta kaika ndo ŋana apaŋo ilomi kalomi kâ. Ŋineŋga lâ zo ŋana amâte kâ, ande miki ma kakura tu kalomi ŋgere kilo ŋana ŋgua ŋine kâ ikura zo zo.   
\s1 Kinzi pâri-tamâta simora Maro Kindeni ne sinâla pwataki lâ Yesu Kirisi tini  
\p
\v 16 Muŋga maka katula ŋgua pami ŋana Maro Ŋalae Yesu Kirisi ne zo ŋana itaulo imâ kilo tava ne walo kaika. Andeta maka ŋandai katapâri tamâta nenzi usi kaa nâ pinde pami ŋga. Maka warakama matama kamora i ne walo kaika ŋinde.  
\v 17 Zo toŋge, kawa ŋgua ne sarawâŋa iyoka pa Maro Kindeni ne sinâla ŋalae ilo ku indue imâ pa Yesu Kirisi mine tu, “Naŋa natuŋgu ara kala ŋine. Naŋa tiniŋgu mwasa papa wa iloŋgu ndeka papa wa.” Aku lâ zoni ndaina, kinda Tamânda Maro Kindeni isuka Yesu Kirisi ŋa kâki, aku Yesu tini pasinala.  
\v 18 Maka warakama kaloŋo ŋgua ŋinde ne sarawâŋa iyoka pa samba ilo indue imâ, lâ zo ŋinde maka kamo kuku Yesu lâ tuu sapâŋa ŋinde kulu.   
\p
\v 19 Mine nde maka kasama tu ŋgua-tulâŋa tamâta muŋgâŋa nenzi ŋgua ŋinde nde mao kanaŋo. Aku ara ŋana miki kala ma kalomi tawana ŋgua ŋinde mine nâ. Ŋgua ŋinde nde itogo sinâla ŋana ipane kondoma pwataki kâ. Aku sinâla ŋinde ma isinala nia mine lee mbwale pwataki, ŋineŋga pitu mboi ŋalae ma ipâŋga ku ma isinala ilomi kalomi. \f + \fr 1:19 \ft 19 Petero isia ŋgua ŋana Yesu Kirisi kâ lâ Pitu Mboi tini.\f*  
\v 20 Miki ma kapanâna sondo ndo ŋana ŋgua ŋine kâ, ŋana tu ŋine nde kelekele ŋalae tina; siŋgani, lâ zo ŋinde kinzi ŋgua-tulâŋa tamâta siporo ku siŋgere nenzi ŋgua lâ pepa tini, ande kinzi warakanzi sikura ŋana situla ŋgua ŋinde ne duvi pwataki, ande tia.  
\v 21 Andeta Koroani Sapâŋa ikai poe pa kinzi ŋgua-tulâŋa tamâta ilonzi kalonzi, kala situla Maro Kindeni kawa ŋgua. Kinzi ŋandai sikai poe pa warakanzi ilonzi kalonzi ŋineŋga situla ŋgua ŋga. Tia ndo kanaŋo.   
\c 2  
\s1 Kinzi tamâta sakamao pinde siyaulanzi kalo-tawana tamâta ilonzi kalonzi  
\p
\v 1 Mao nâ, muŋga ŋgua-tulâŋa tamâta laŋeŋa pinde simo lâ Isrel ŋgu ŋgininzi. Aku mine nâ, pananâŋa tamâta laŋeŋa pinde ma simâ sipâŋga miki ŋginimi tona, aku ma sikai laŋeŋa nâ sipanananzi tamâta ŋana Maro Kindeni ne vetâŋa kâ. Kinzi ma sipavea nâ situla ŋgua laŋeŋa kaŋa-kaŋa ŋana sizavaru ilomi kalomi kâ. Maro Ŋalae muŋga iyautenzi pananâŋa tamâta ŋinde piti lâ kondoma ilo, andeta kinzi sipu mulinzi pa Maro Ŋalae kilo. Mine nde Maro Kindeni ma muli izavarunzi walele nâ.  
\v 2 Andeta kalo-tawana tamâta rârâ ma sipaveta kuku pananâŋa tamâta laŋeŋa ŋinde nenzi vetâŋa potomule kie-kie. Mine kala tamâta pinde ma siporo ŋgua soki-soki ŋana Nzâla Mao kâ.  
\v 3 Kinzi pananâŋa tamâta laŋeŋa ŋinde ilonzi yosi ŋana tâno ne kelekele nâ. Mine kala kinzi ma siveta ŋgua laŋeŋa rârâ ŋana sikai nemi mbaliŋa wa kelekele saŋemi. Andeta siŋgani Maro Kindeni ipatea tu ma izavarunzi tamâta ŋinde ndo. Aku i ŋandai ikeno mata ŋga. I ma iveta panzi ikura muŋga ipa ŋgua tu ma iveta mine.   
\p
\v 4 Miki kasama tu muŋga, kinzi aŋelo pinde siveta kiesaka, aku Maro Kindeni igera kinzi tia ndo. Itambiranzi silâ yââ ŋalae ne mbââ ilo, aku ipanzi lâ wâlo kaika tini. Kinzi uru simo mine lâ nia ŋaŋa ilo, aku sindaŋe Maro Kindeni ne zo ŋalae ŋana ipare nia sondo panzi kâ.  
\v 5 Aku miki kasama tu nia ndoyo, tamâta rârâni simo siveta vetâŋa sakamao nâ lâ Maro Kindeni nao. Mine kala ipare nia panzi lâ. Iveta pondi ŋalae ipâŋga panzi ku izavarunzi ndo lâ, kala naonzi tia lâ. Aŋga timbunda Noa, i tamâta ŋana itula ŋgua pwataki ŋana vetâŋa ara kâ, ande Maro Kindeni ikea ŋana i tavanzi tamâta lima kanaŋonzi rua, kala kinzi ŋinde nâ simo ara.  
\v 6 Aku miki kasama tu muli, Maro Kindeni ipa ŋgua ŋana izavaru Sodom lawea wa Gomora lawea wa. Isupwa yââ indue imâ ikananzi lawea rua ŋinde, kala kââ nâ ikeno. I ilo tu kinzi tamâta sipâŋga muli-muli ŋinde ma kalonzi ŋgere ŋana mâsi ŋalae ŋinde muŋga ipâŋga pa Sodom lawea ŋga Gomora lawea. Ambo kinzi kala ma sipu mulinzi pa i, ande mâsi kie mine ma ipâŋga pa kinzi tona.  
\v 7 Aŋga Loto, i nde tamâta ara ndo lâ Maro Kindeni nao, ande i muŋga imo Sodom lawea. Imora vetâŋa potomule kie-kie kinzi tamâta sakamao ŋinde siveta, kala ilo malia ndo. Mine kala Maro Kindeni ikea ŋana Loto, kala imo ara nâ.  
\v 8 Loto nde tamâta ara lâ Maro Kindeni nao, taitu i imo kunzi tamâta simo Sodom lawea, aku ikura zo zo imora nenzi mâsi sakamao wa iloŋo nenzi ŋgua soki-soki wa. Mine kala i ilo kura tia ndo, aku kalo loko nâ.  
\v 9 Miki kasama lâ ŋana vetâŋa ŋinde rârâni. Aku ŋinde itula pwataki tu lâ zo ndia samâŋa wa malia mine ma ipâŋga panzi tamâta, ande Maro Ŋalae uru ikea ŋananzi tamâta ea kalonzi tawana i. Aŋga kinzi kiesaka tamwatanzi, ande Maro Ŋalae ikainzi kaika ku nâna ilanzi lee, ikura lâ zo ŋalae ŋinde i ma ipare nia sondo panzi.  
\v 10 Aku lâ zo ŋinde, tamâta pinde ma sikai pareŋa-nia sakamao ŋalae tina. Naŋa aporo ŋananzi tamâta ŋinde sipono muli pa ilo-kalo siŋga ne mâsi sakamao, ku simora tukuŋa rârâni tu kelekele kaa nâ.  
\p Ayo, pananâŋa tamâta laŋeŋa pinde nde simâ sipâŋga lâ, kala simo ŋginimi. Kinzi nde taŋa-kaika tamwatanzi, aku sipaveta kuku warakanzi nenzi pateâŋa nâ. Mine kala kinzi ŋandai simege ŋananzi aŋelo arara ŋinde simo samba ilo ŋga. Kinzi siporo ŋgua pavaligiŋa nâ panzi.  
\v 11 Taitu aŋelo ŋinde nenzi walo kaika nde ŋalae ndo, ipolenzi pananâŋa tamâta laŋeŋa ŋinde nenzi walo. Andeta kinzi aŋelo simege ŋana Maro Ŋalae kâ. Mine kala kinzi ŋandai siporo soki ku sisowe ŋgua lâ tamâta ŋinde tininzi lâ Maro Ŋalae nao ŋga.  
\v 12 Aŋga pananâŋa tamâta laŋeŋa ŋinde nde sitogonzi ŋgoa ŋgoi, nenzi ilo-kalo tia ndo. Ambo ilonzi igagatinzi tu siveta vetâŋa toŋge, ande ma siveta nâ. Vetâŋa ara ndia kinzi sizizâla ŋana, ande kinzi siporo ŋgua pavaligiŋa lâ ŋinde tini. Muli ŋga Maro Kindeni ma ikainzi tamâta ŋinde kaika ku ma izavarunzi ndo lâ, itogo uru taveta panzi ŋgoa ŋgoi mine.   
\p
\v 13 Kinzi uru nâna silanzi tamâta pinde. Mine nde muli Maro Kindeni ma itu ŋana nenzi vetâŋa ŋinde, aku ma nâna ilanzi. Kinzi sindeka ŋana sika wa sinu ŋalae tina lâ tamâta naonzi, aku mainzi tia ndo. Mao nâ, kinzi sindeka ŋana sika potomule mine nâ kuku miki.  
\v 14 Ikura zo zo, ambo kinzi matanzi ilâ simora taine toŋge, ande ilonzi ndo tu ma sipalulua tininzi kuku i. Kinzi uru ilonzi yosi mine ku simo nâ. Kinzi uru siporo silaŋenzi tamâta pinde, kinzi ŋinde nenzi kalo-tawana ikeno kaika tia, aku silele tamâta ŋinde naonzi ilâ tu siveta kiesaka. Kinzi ilonzi ndo ŋana sikai tamâta pinde nenzi kelekele saŋenzi kâ. Mine kala Maro Kindeni ma izavarunzi pananâŋa tamâta laŋeŋa ŋinde ndo lâ.   
\p
\v 15 Kinzi sipile vetâŋa ara ne nzâla marumbu lâ, kala soka potomule silâ wa simâ wa. Kinzi sipono muli pa Beor natu Balam ne vetâŋa. Muŋga, Balam iveta kiesaka, aku ilo yosi ŋana mbumbu ikai lâ kiesaka ŋinde tini.  
\v 16 Iveta mine lee, ŋineŋga zo toŋge “donki” toŋge kawa ipwa, kala iporo ŋgua itogo tamâta mine. Donki ŋinde imbita Balam ŋana i ne vetâŋa sakamao ŋinde kâ. Kinda tasama tu kinzi donki sikura tu siporo ŋgua, ande tia. Mine kala ŋgua-tulâŋa tamâta laŋeŋa Balam imora mâsi ŋalae ŋinde, aku ipile ne vetâŋa kapa-kapa ŋinde.   
\p
\v 17 Kinzi pananâŋa tamâta laŋeŋa ŋinde nde sitogo lââ bwalika ipâŋga mâsa-mâsa ndo mwasina. Aku sitogo take-take karâzi ikeno ilo, andeta lawea itapala ilâ kala karâzi imbe tia. \f + \fr 2:17 \ft 17 Ŋgua siâŋa ŋine nde duvi mine; pananâŋa tamâta ŋinde siporo tu ma sivilanzi tamâta, andeta ŋandai sivilanzi ŋga.\f* Maro Kindeni ipatea nia kondoma ŋaŋa ndo pa kinzi tu ma silâ simo nia ŋinde.  
\v 18 Ŋana tu tamâta ŋinde kawanzi ŋalae sisuka warakanzi ŋanzi kâki, aku sindeka nâ ŋana nenzi ŋgua kaa kaa ŋinde. Kinzi siporo ŋgua mâru-mâru silaŋenzi tamâta pinde, kala ilonzi kâki ŋana sipalulua tininzi potomule kâ. Kinzi sitapanzi kalo-tawana tamâta wasaseki pinde, kinzi ŋinde muŋga nâ sipile tinikoa nenzi mâsi sakamao. Kinzi ilonzi tu kalo-tawana tamâta wasaseki ŋinde nenzi kalo-tawana ma imbe ndo.   
\p
\v 19 Pananâŋa tamâta laŋeŋa ŋinde uru siporo mine tu, “Ambo miki ma kapaloŋo pa maka, ande miki ma kamo tinimi soo nâ, aku ma kakura tu kaveta vetâŋa ndia warakami nâ ilomi papa.” Andeta kiesaka ne nimbu nde ikainzi kaika lâ, kala simo sakamao nâ. Ŋinde nde duvi mine; ambo tamâta toŋge isâu pa kelekele toŋge tu ikai poe kaika papa i, ande ŋinde itogo iveta wurâta koa tia nâ pa kelekele ŋinde.  
\v 20 Pananâŋa tamâta laŋeŋa ŋinde muŋga kalonzi tawana nenda Maro Ŋalae Yesu Kirisi, ina nenda Yautâŋa Tamwata, aku nenzi kalo-tawana ŋinde ivilanzi tu siŋgeŋge ŋana tâno ne vetâŋa sakamao kâ. Andeta muli ŋga sipaveta kuku vetâŋa sakamao ŋinde kilo, kala vetâŋa sakamao ŋinde ne nimbu nde ikainzi kaika ku ipu nenzi walo ndue lâ. Muŋga, lâ zo ŋinde kinzi sizizâla yo ŋana Kirisi kâ, ande kinzi simo ara tia. Taitu vetâŋa sakamao ŋinde ne nimbu nde ipanzi kaika kilo, kala simo sakamao ndo.  
\v 21 Ambo pananâŋa tamâta laŋeŋa ŋinde sizizâla yo ŋana nzâla ara kâ, ande ŋinde ma ara tia. Taitu kaloŋo ŋga; kinzi siloŋo pâri ara ku sisama nzâla ŋinde kilala pwataki lâ, aku sipono muli pa Maro Kindeni ne tukuŋa. Andeta muli, kinzi sipu mulinzi pa nzâla ŋinde kilo, aku ŋinde nde ara tia ndo.   
\p
\v 22 Kinzi nenzi vetâŋa mine nde iyoke ŋgua pinde tamâta uru siporo. Ŋgua toŋge nde keno mine; “Ambo mbwâmbwa ilua, ande i ma itaulo ika ne luâŋa ŋinde kilo.” Aŋga ŋgua toŋge kala ikeno mine; “Ambo ŋgoa ilili lâ lââ ilo, ande i ma itaulo kilo ku ipu ndumu lâ nziŋa ilo.”   
\c 3  
\s1 Ŋgua ŋine nde mao kanaŋo; Maro Ŋalae ma itaulo imâ kilo  
\p
\v 1 Niŋgu-nambwe wukale, naŋa muŋga aŋgere ŋgua lâ pepa toŋge tini ku ao imâ pami, kala ŋine aŋgere ŋgua pinde lâ pepa tini kilo imâ pami. Lâ pepa rua ŋine, ande naŋa aŋgere ŋgua ŋana apaŋo ilomi kalomi kâ, ŋana miki ma kalomi ŋgere kilo ŋana ŋgua mao wa ilo-kalo ara wa.  
\v 2 Naŋa iloŋgu tu miki ma kalomi ŋgere kilo ŋana ŋgua ŋinde Maro Kindeni ne ŋgua-tulâŋa tamâta muŋga situla. Aku naŋa iloŋgu tu miki ma kalomi ŋgere kilo ŋana Maro Ŋalae ne tukuŋa tona, ina nenda Yautâŋa Tamwata. Muŋga kinzi pâri-tamâta simâ pami ku situla ŋgua tukuŋa ndainani nâ pami kaloŋo lâ.   
\p
\v 3 Naŋa iloŋgu tu miki ma kaloŋo ŋgua ŋine sondo; muli ŋga, ande tamâta pinde ma simâ sipâŋga. Kinzi tamâta ŋinde ma sipaveta kuku vetâŋa sakamao ndia ilonzi papa ŋinde. Kinzi ma siporo ŋgua pavaligiŋa pami mine tu,  
\v 4 “Yesu muŋga iporo tu i ma itaulo imâ kilo, a? Ande imo ndia, a? Yoo, i ma itaulo imâ kilo tia! Nia ndoyo, lâ zo ŋinde tâno ipâŋga wasaseki, aku imâ lee ikura lâ zo ŋinde timbunda simâte lâ, aku lâ zo ŋine wa, ande vetâŋa wasaseki toŋge kie mine ipâŋga tia ndo.”  
\v 5 Tamâta ŋinde tininzi pwâka tu kalonzi ŋgere sondo. Mine kala kinzi kalonzi kapa ŋana ŋine kâ; nia ndoyo, Maro Kindeni iporo ŋgua kala ipulianzi samba tava tâno sipâŋga lâ. Ikai lââ ku iveta tâno, ŋineŋga io tâno kâki ipâŋga lâ lââ ŋgini.  
\v 6 Aku muli, ŋineŋga Maro Kindeni ikai lââ ndainani nâ ku iveta pondi ŋalae ikâki ipaŋando tâno ku iyaula tâno ndo lâ.  
\v 7 Kala lâ zo ŋine, ande Maro Kindeni kawa ŋgua ndainani nâ uru ikatona samba wa tâno wa. I ma iveta mine lee, ikura lâ zo ŋalae ŋana i ma ipare nia panzi tamâta ea sipu mulinzi pa i, aku ma izavarunzi ndo lâ. Aku lâ zoni ndaina i ma isupwa yââ ikananzi samba wa tâno wa, kala naonzi tia lâ.   
\p
\v 8 Niŋgu-nambwe wukale, lâ Maro Ŋalae nao, ande kari taitu mai nâ nde zo luandondo, itogo mbwera 1,000 mine, aŋga mbwera 1,000 nde zo mbwana-mbwana nâ, itogo kari taitu mai nâ mine. Miki ma kalomi ŋgere sondo ŋana ŋinde kâ, aku kalomi kapa ndimo.  
\v 9 Ŋana tu tamâta pinde ilonzi patea tu Maro Ŋalae uru iveta ne ŋgua pâŋa ipâŋga kanaŋo walele tia, aku situ ŋinde nde soki. Andeta tia. I tini pwâka tu tamâta taitu ma ipayaula. I ilo tu kinzi tamâta rârâni taitu-taitu ma sipalele ilonzi kalonzi ku kalonzi tawana i. Mine kala i kalo sukâŋa ŋananzi ku imo io tini nâ.   
\s1 Samba wa tâno ma naonzi tia lâ  
\p
\v 10 Taitu Maro Ŋalae ne zo ŋana itaulo imâ kilo kâ, ande ma imâ ipâŋga itogo nzanzare tamâta uru imâ ipâŋga mine. Lâ zo ŋinde, ande nduŋeŋa ŋalae tina ma ipâŋga, aku samba ma nao tia lâ. Aku yââ ma ikananzi pitu rârâni marumbu lâ. Aŋga tâno tava kelekele ndoni ikeno tâno kulu, ande ŋinde ma marumbu ndo.   
\p
\v 11 Miki kalomi ŋgere sondo ŋga! Vetâŋa mine ma izavaru kelekele rârâni ŋinde, kala ma naonzi tia lâ. Mine kala lâ zo ŋine, ande miki ma kamo tamâta mana, a? Ara ŋana miki ma kapasakana ilomi kalomi sondo ku kapaveta kuku vetâŋa rârâni Maro Kindeni ipatea ku itula pami ŋinde.  
\v 12 Ara ŋana miki ma kao tinimi nâ ŋana Maro Kindeni ne zo ŋana imâ ipare nia panzi tamâta kâ. Aku ara ŋana miki ma kapasusua zo ŋinde tu imâ ipâŋga walele nâ. Lâ zo ŋalae ŋinde, ande yââ ma ikana samba marumbu lâ, aku yââ ne mela-mela kaika ma ikananzi pitu rârâni tona. Mine kala pitu ŋinde ma sipâŋga sitogo lââ mine.  
\v 13 Andeta Maro Kindeni ne ŋgua pâŋa ikeno mine tu i ma muli ipulia samba wa tâno wasaseki. Aku lâ tâno wasaseki ŋinde, ande tamâta rârâni ma sipono muli mao nâ papa i. Kinda uru tao tininda nâ ŋana Maro Kindeni ne ŋgua pâŋa ŋinde tu ma ipâŋga kanaŋo.   
\s1 Ara ŋana kinda ma tapakatona sondo ku tao tininda ŋana Maro Ŋalae kâ  
\p
\v 14 Niŋgu-nambwe wukale, miki uru kao tinimi nâ ŋana Maro Kindeni ne zo ŋalae ŋinde ŋana imâ ipâŋga kâ. Mine nde ara ŋana miki ma kakai wurâta kaika ŋana kapakatona warakami nemi ilo-kalo sondo kâ. Ambo miki ma kaveta mine, ŋineŋga lâ zo ŋalae ŋinde, ande miki ma kamandi lâ Maro Kindeni nao tava ilomi mbâra-mbâra nâ. I ma imora soki wa kiesaka toŋge ikeno tinimi, ande tia. Mine kala i ne wisi-nâna ma ikeno pami tia ndo.  
\v 15 Miki kalomi ŋgere ŋana ŋine kâ; Maro Ŋalae uru io tini pa kinda tu tapalele ilonda kalonda, ŋana tu i ilo tu iyaute kinda rârâni piti lâ kondoma ilo. Muŋga, Maro Kindeni itula ilo-kalo ara pa ninda-nambwe Paulo, kala iŋgere ŋgua kaŋa taituni nâ imâ pami lâ.  
\v 16 Lâ i ne pepa rârâni, ande Paulo uru iŋgere ŋgua kaŋa taituni mine ŋana zo ŋalae ŋinde kâ. Mao nâ, zo pinde Paulo ne ŋgua katiŋe ne duvi ŋandai ikeno nia yo ŋga, kala taroto ŋana ŋgua ŋinde ne duvi. Mine kala tamâta pinde uru situla ŋgua ŋinde ne duvi soki-soki. Kinzi tininzi pwâka tu sisama ŋgua ŋinde duvi, aku nenzi kalo-tawana nde kaika tia. Kinzi sikai Maro Kindeni kawa ŋgua rârâ ikeno lâ pepa tini, aku silele soki-soki mine nâ. Mine nde lâ Maro Kindeni ne zo ŋalae ŋinde, ande i ma izavarunzi tamâta ŋinde ndo lâ.   
\p
\v 17 Niŋgu-nambwe wukale, miki kasama lâ ŋana pananâŋa tamâta laŋeŋa ŋinde nenzi vetâŋa. Mine nde kapakatona warakami sondo ŋga. Tia ma pananâŋa tamâta sakamao ŋinde silaŋemi ku sisowe ilomi kalomi, kala nemi kalo-tawana ma imbe tâ.  
\v 18 Kinda nenda Maro Ŋalae Yesu Kirisi, ina nenda Yautâŋa Tamwata, ande uru io ne wisi-wisi imâ pami, aku miki kasama i kilala marumbu lâ. Ara ŋana miki ma kakai wurâta kaika ŋana kapanâna sondo ndo ŋana ŋinde kâ. Tapanea Yesu Kirisi tasuka i ŋa kâki ikura zo zo! Mao.